Month: March 2020

Kariten ni Goliat dagiti Israelita

1 Nagtitipon dagiti Filisteo idiay Soco, maysa nga ili ti Juda, tapno agsaganada a makigubat. Nagkampoda iti maysa a disso a maaw-awagan iti Efes Dammim iti nagbaetan ti Soco ken Azeca.

2 Naguummong met da Saul ken dagiti Israelita ket nagkampoda iti Tanap ti Ela. Ditoy ti nagsaganaanda a makigubat kadagiti Filisteo.

3 Nagsango dagiti dua a bunggoy. Adda dagiti Filisteo iti maysa a turod ket adda met dagiti Israelita iti sabali; adda tanap iti baetda.

4 Maysa a nalaing a mannakigubat ti rimmuar iti kampo dagiti Filisteo tapno karitenna dagiti Israelita. Isu ni Goliat a taga-Gat. Nasurok a siam a kadapanti katayagna,

5 ket nakakalasag iti bronse nga agdagsen iti agarup 75 a kilo. Bronse ti helmetna.

6 Nakapulinas iti bronse dagiti sakana. Nakabaklay iti atiddog a pika a bronse.

7 Napuskol ti gayangna, kas iti kapuskol ti kayo ti pagablan, ket agarup 10 a kilo ti dagsen ti tademna. Adda soldado a magmagna iti sangona a para-awit iti kalasagna.

8 Nagtakder ni Goliat ket impukkawna kadagiti Israelita, “Apay pay laeng nga agsagsaganakayo a makigubat? Maysaak a Filisteo, dakayo a tagabu ni Saul! Pumilikayo laengen iti maysa kadagiti tattaoyo a makiranget kaniak.

9 No mapataynak, mangabak ket agbalinkamto a tagabuyo; ngem no mapatayko mangabakak, ket dakayonto ti agbalin a tagabumi.

10 Karitek ita met laeng ti armada ti Israel. Mangpilikayo iti makiranget kaniak!”

11 Nagbuteng ni Saul ken dagiti Israelita a nakangngeg iti daytoy.

Mapan ni David iti Kampo ni Saul

12 Anak ni Jesse ni David. Maysa nga Efrateo ni Jesse a taga-Betlehem idiay Juda. Walo ti annakna, ket lakay unayenidi panawen ti panagturay ni Saul.

13 Kumuykuyogen dagiti tallo nga inauna nga annakna ken ni Saul iti paggugubatan. Eliab ti nagan ti inauna, Abinadab ti maikadua, ket Samma ti maikatlo.

14 Ni David ti kaubingan. No kumuyog dagiti tallo a kabsatna ken ni Saul iti paggugubatan,

15 masansan nga agawid ni David idiay Betlehem tapno aywananna dagiti karnero ni tatangna.

16 Iti unos ti 40 nga aldaw, binigat ken minalem a kariten ni Goliat dagiti Israelita.

17 Iti maysa nga aldaw, kinuna ni Jesse ken ni David, “Darasem a mapan ipan daytoy sangasalup nga iniruban ken dagitoy sangapulo a tinapay, kadagiti kakabsatmo iti kampoda.

18 Itedmo met dagitoy sangapulo a keso iti kapitan ti buyot. Ammoem ti kasasaad dagiti kakabsatmo ket mangyawidka iti pakakitaan a nakitam ida a nasalun-at.

19 Adda idiay Tanap ti Ela ni Ari Saul, dagiti kakabsatmo ken dagiti dadduma nga Israelita a makigubgubat kadagiti Filisteo.”

20 Kabigatanna, nasapa a bimmangon ni David. Impaaywanna dagiti karnero iti sabali nga agpaspastor sana innala dagiti makan ket napan iti nangibaonan ni amana. Idi sumangpet iti kampo, apag-isu a rummuar dagiti Israelita a mapan iti puestoda iti paggugubatan. Yik-ikkisda ti pakdaar ti gubat.

21 Naguurnos dagiti buyot dagiti Filisteo ken dagiti Israelita iti bukodda a puesto; nagsinnango dagiti dua nga armada.

22 Imbati ni David ti intugotna a makan iti para-aywan kadagiti gargaret sa nagtaray a nagturong iti paggugubatan. Napan kadagiti kakabsatna ket sinaludsodna no kasano ti kasasaadda.

23 Bayat ti pannakisarsaritana kadakuada, nagpasango ni Goliat sana kinarit manen dagiti Israelita. Nangngeg ni David ti panangkaritna kadakuada.

24 Nagtaray dagiti Israelita a kasta unay ti butengda idi makitada ni Goliat.

25 “Kitaenyo!” kinunada iti tunggal maysa. “Denggenyo ti karitna. Gunggonaan ti ari ti siasinoman a makapatay iti dayta a tao. Yasawana ti anakna kenkuana ket dina pagbuisen ti familia ni tatangna.”

26 Sinaludsod ni David kadagiti soldado nga adda iti asidegna, “Ania ti gunggona ti mangpatay iti daytoy a Filisteo tapno ikkatenna daytoy a pannakaibabain ti Israel? Siasino met la aya daytoy saan a nakugit a Filisteo a mangkarit iti armada ti sibibiag a Dios?”

27 Imbagada kenkuana ti gunggona nga awaten ti makapatay ken ni Goliat.

28 Nangngeg ni Eliab a kabsat ni David ti pannakisarsarita ti adingna kadagiti tattao. Nakapungtot ken ni David ket kinunana, “Apay nga addaka ditoy? Siasino itan ti mangay-aywan kadagiti karnero idiay let-ang? Kaska la kalaingan. Immayka laeng tapno umaymo buyaen ti gubat!”

29 “Ania kadi ti inaramidko?” sinaludsod ni David. “Nagsaludsodak laeng.”

30 Pinanawan ni David ti kabsatna tapno agsaludsod manen iti sabali. Tunggal tao a pagsaludsodanna, agpapada ti isungbatda kenkuana.

31 Adda dagiti nakangngeg iti sao ni David ket imbagada ken ni Saul. Pinaayaban ngarud ni Saul ni David.

32 Kinuna ni David kenkuana, “Natan-ok nga Ari, awan koma ti agbuteng iti daytoy a Filisteo. Siak ti mapan makiranget kenkuana.”

33 “Saan,” insungbat ni Saul. “Dimo kabaelan ti makiranget kenkuana. Ubingka pay laeng idinto a soldadon manipud kinaagtutubona!”

34 “Natan-ok nga Ari,” kinuna ni David, “siak ti agay-aywan kadagiti karnero ni tatangko. No adda leon wenno oso a mangitaray iti urbon,

35 kamatek sako rugmaan ket isalakanko ti urbon. No sangoennak ti leon wenno oso, bekkelek agingga a matay.

36 Adun ti napatayko a leon ken oso ket kasta met ti aramidek iti daytoy saan a nakugit a Filisteo a nangkarit iti armada ti sibibiag a Dios.

37 TiApoa nangisalakan kaniak kadagiti leon ken oso, ti mangisalakan met kaniak iti daytoy a Filisteo.”

Kinuna ni Saul, “Inka ngarud ket sapay koma ta tulongannaka tiApo.”

38 Inted ni Saul ti bukodna a kalasag ken ni David. Inikkanna iti bronse a helmet ken iti kabal a pagan-anayna.

39 Inyarruat ni David ti kabal sana imbarikes ti kampilan ni Saul. Ngem dandani saan a makapagna ni David agsipud ta saan a naruam nga agaramat kadagitoy. Kinunana ken ni Saul, “Diak mabalin ti makiranget a siaarmas kadagitoy. Diak pay napadasan ti nagaramat kadagitoy.” Inikkatna ngarud ida.

40 Innalana ti sarukodna nga agpaspastor. Pimmidut iti lima a nalinis a bato iti waig sana inkarga iti supotna. Insaganana ti pallatibongna ket napanna sinango ni Goliat.

Patayen ni David ni Goliat

41 Nagna ni Goliat nga agturong ken ni David. Magmagna iti sangona ti para-awit iti kalasagna. Umasideg nga umasideg ti Filisteo

42 ket idi makitana a naimbag ni David, napalalo ti panangumsina kenkuana, agsipud ta maysa laeng nga ubing a naguapo ken nataer.

43 Kinunana ken ni David, “Ania ti ipagarupmo? Aso kadi ti karangetmo ta sarukod laeng ti armasmo?” Ket inlunodna ni David iti nagan dagiti diosna

44 sana inkarit, “Ala, umasidegka ngarud ta ipakanko ti bangkaymo kadagiti tumatayab ken ayup.”

45 “Umayka makiranget kaniak a sikakampilan, sigagayang ken sipipika,” insungbat ni David, “ngem sangoenka iti nagan tiApoa Mannakabalin-amin a Dios ti armada ti Israel a kinaritmo.

46 Ita met la nga aldaw, yawatnaka tiApoiti pannakabalinko. Patayenka ket putolanka, sakonto met ipakan kadagiti tumatayab ken ayup ti bangkay dagiti mannakigubat a Filisteo. Maammoanto ti entero a pagilian nga adda Dios ti Israel,

47 ket makitanto dagiti amin a naummong ditoy a dina masapul ti kampilan wenno gayang a pangisalakan kadagiti tattaona. Agballigi tiApoiti gubat ket yawatnakayo amin iti pannakabalinmi.”

48 Intuloy ni Goliat ti immasideg. Nagtaray met ni David a simmabat kenkuana.

49 Kinautna ti supotna ket nangiruar iti maysa a bato nga impallatibongna ken ni Goliat. Napuntaan ti muging ni Goliat ket limmumlom ti bato. Natuang a napakleb ni Goliat iti daga.

50 Nagballigini David. Uray awan ti kampilanna, pinarmekna ni Goliat babaen iti pallatibong ken maysa a bato.

51 Nagtaraya napan iti yan ni Goliat ket nagtakder iti bangkayna. Inasutna ti kampilan ni Goliat ket pinutolanna.

Nagtataray dagiti Filisteo idi nakitada a natayen ti maingelda.

52 Um-umkis dagiti tattao ti Israel ken Juda a nangsunson kadakuada. Kinamatda ida agingga iti dalan nga agpa-Gatken kadagiti ruangan ti Ekron. Agkaiwara dagiti nasugatan a Filisteo iti dalan nga agpa-Saaraim agingga idiay Gat ken Ekron.

53 Idi nagsubli dagiti Israelita iti panangkamatda kadagiti Filisteo, nagsamsamda iti kampo dagiti kabusorda.

54 Inyawid ni David ti ulo ni Goliat sana impan idiay Jerusalem, ngem indulinna dagiti armas ni Goliat iti bukodna a tolda.

Maiparang ni David ken ni Saul

55 Nakita idi ni Saul ti pannakiranget ni David ken ni Goliat, ket sinaludsodna ken ni Abner a pangulo ti armadana, “Abner, siasino ti ama dayta nga ubing?”

“Diak ammo, Natan-ok nga Ari,” insungbat ni Abner.

56 “Inka ngarud ammoen,” kinuna ni Saul.

57 Isut’ gapuna nga idi agsubli ni David iti kampo kalpasan ti panangpapatayna ken ni Goliat, inayaban ni Abner ket indatagna ken ni Saul. Ig-iggaman pay laeng ni David ti ulo ni Goliat.

58 Sinaludsod ni Saul, “Agtutubo, siasino kadi ti akin-anak kenka?”

“Siak ti anak ni Jesse nga adipenmo a taga-Betlehem,” insungbat ni David.

1 Nalpas ti panagsarita da Saul ken David. Naragsakan ni Jonatan nga anak ni Saul ken ni David ket manipud idin, nasursurona nga impateg a kas iti panangipategna iti bagina.

2 Pinagnaed ni Saul ni David iti sidongna ket dina pinalubosanen nga agawid.

3 Gapu iti panangipateg unay ni Jonatan ken ni David, nagtulagda nga aggayyemda iti agnanayon. Sinapataanda ti nagtulaganda.

4 Inuksob ni Jonatan ti kagayna ket intedna ken ni David. Intedna pay ti kalasag ken ti kampilanna, ti bai ti panana ken ti barikesna.

5 Nagballigi ni David iti amin a nangibaonan ni Saul kenkuana isut’ gapuna a pinagbalin ti ari a maysa nga ofisial iti armadana. Gapu iti pannakaital-o ni David, naragsakan dagiti amin a tattao ni Saul ken dagiti ofisialesna kenkuana.

Agimon ni Saul ken ni David

6 Kalpasan ti panangpatay ni David ken ni Goliat, nagawid ni Ari Saul ken dagiti tattaona. Tunggal ili a malabasanda, sabten ida dagiti babbai nga agsasala ken agkakanta bayat ti panagtokarda kadagiti pandereta ken lira.

7 Kastoyti ikankantada:

“Rinibu ti pinatay ni Saul,

ngem pinullo ribu ti pinatay ni David.”

8 Nasair ti rikna ni Saul iti daytoy a kanta ket kasta unay ti pungtotna. “Pinullo ribu ti kunada a pinatay ni David idinto a rinibu laeng ti ibagada a pinatayko,” kinunana. “Awan duadua nga isarunodanto a pagbalinen nga ari.”

9 Manipud idin, napalalo ti apasna ken ni David.

10 Iti sumuno nga aldaw, bayat ti kaadda ni Saul iti balayna, adda dakes nga espiritu a naggapu iti Dios a nangituray kenkuana. Kasla agmauyong a nagsaosao ni Saul idinto nga agtuktokar ni David iti arpa a kas iti ar-aramidenna iti inaldaw. Siiiggem met ni Saul iti gayang,

11 ket kinunana iti bagina, “Gayangek ni David agingga a masalput ti bagina, ket maipideg iti diding.” Namindua a ginayangna ngem nakalisi ni David.

12 Nagbuteng ni Saul ken ni David, ta ammona nga adda ni Yahweh ken ni David ngem awan ni Yahweh kenkuana.

13 Pinapanawna ngarud ni David ket pinagbalinna a pangulo iti 1,000 a soldado. Impanguloan ni David dagiti tattaona iti paggugubatan.

14 Nagballigi iti amin nga aramidna agsipud ta adda kenkuana ni Yahweh.

15 Immad-adda ti panagbuteng ni Saul ken ni David idi makitana ti balligina.

16 Nupay kasta, inay-ayat dagiti amin nga Israelita ken taga-Juda ni David, ta impanguloanna ida iti amin a pakigubatanda.

Asawaen ni David ti Anak ni Saul

17 Kinuna ni Saul ken ni David, “Yasawak kenka ni Merab nga inauna nga anakko no agserbika kaniak a kas natured a soldado a makiranget kadagiti gubat ni Yahweh. (Napanunot ni Saul nga iti kastoy a pamuspusan, dagiti Filisteo ti mangpatay ken ni David a saan nga isu.)

18 “Siasinoak ken ania ti familiak tapno maikariak nga agbalin a manugang ti ari?” insungbat ni David.

19 Ngem idi dumteng ti tiempo a pannakayasawa ni Merab ken ni David, naited ketdi iti lalaki nga agnagan iti Adriel a taga-Mehola.

20 Nupay kasta, agayat ken ni David ni Mical a sabali nga anak ni Saul, ket naragsakan ni Saul idi maammoanna daytoy.

21 Kinunana iti nakemna, “Itedko ni Mical ken ni David. Isut’ usarek a mangipalab-og ken ni David tapno patayen dagiti Filisteo.”

Ngarud, iti maikadua a daras, kinuna ni Saul ken ni David, “Agbalinka a manugangko.”

22 Binilinna dagiti ofisialesna a kasaoda ni David iti nalimed tapno ibagada, “Maay-ayo kenka ti ari, kasta met dagiti amin nga ofisialesna. Daytoyen ti napintas a gundawaymo a mangasawa iti anakna.”

23 Impakaammoda daytoy ken ni David ket insungbatna, “Dakkel a pakaidayawan ti panagbalin a manugang ti ari. Maysaak laeng a napanglaw ken nanumo a tao.”

24 Imbaga dagiti ofisiales ken ni Saul ti kinuna ni David.

25 Binilin ni Saul ida a kastoy ti ibagada kenkuana: “Awan ti sab-ong a kalikaguman ti ari no di laeng dagiti mageppas a kudil iti murdong ti mabagbagi dagiti 100 a natay a Filisteo, kas panagibalesna kadagiti kabusorna.” (Kastoy ti panangplano ni Saul iti pannakapapatay ni David iti ima dagiti Filisteo.)

26 Imbaga dagiti ofisiales ken ni David ti kinuna ni Saul. Naragsakan ni David iti panagbalinna a manugang ti ari. Sakbay ti naituding nga aldaw ti kasar,

27 rimmuar ni David ken dagiti tattaona ket nangpatayda iti 200 a Filisteo. Impanna dagiti nageppas a kudilda iti ari ket binilangna ida iti sangona tapno maawat a kas manugangna. Inyasawa ngarud ni Saul ni Mical ken ni David.

28 Nalawag ti pannakabigbig ni Saul nga adda ni Yahweh ken ni David ken ay-ayaten met ni Mical nga anakna.

29 Daytoy ti gapuna nga ad-adda manen ti panagbutengna ken ni David ket binusorna iti unos ti panagbiagna.

30 Masansan a rumaut dagiti buyot dagiti Filisteo tapno makigubatda, ngem tunggal umayda, ad-adda ti panagballigi ni David ngem dagiti dadduma nga ofisiales ni Saul. Daytoy ti gapuna a nagdindinamag ni David.

Idadanes ni Saul ni David

1 Imbaga ni Saul ken ni Jonatan nga anakna ken amin nga ofisialesna a kayatna a patayen ni David. Ngem ipatpateg unay ni Jonatan ni David,

2 isut’ gapuna nga imbagana ken ni David ti panggep ni tatangna. Kinuna ni Jonatan, “Agannadka koma inton agsapa no bigat. Aglemmengka iti nalimed a disso ket dika rumrummuar.

3 Kumuyogakto ken ni tatangko a mapan iti away a paglemlemmengam ket kasaokto maipapan kenka. Ipakaammokto kenka ti aniaman a matakuatak.”

4 Indaydayaw ni Jonatan ni David ken ni Saul. Kinunana: “Apo, dika koma agaramid iti dakes ken ni David nga adipenmo. Awan dakes a naaramidna kenka. Kinapudnona, dakkel ti naitulongna kenka ti amin nga inaramidna.

5 Impustana ti biagna idi patayenna ni Goliat, ket inted tiApoti dakkel a balligi iti Israel. Nakitam daytoy nga inaramidna ket naragsakanka. Apay ngarud a patayem ni David nga awan ti gapuna? Apay nga agaramidka iti dakes iti tao nga awan basolna?”

6 Impangag ni Saul ti imbaga ni Jonatan. Insapatana iti nagan ni Yahweh a saanna a patayen ni David.

7 Inayaban ngarud ni Jonatan ni David ket imbagana ti amin kenkuana. Kalpasanna, impanna ni David ken ni Saul ket nagserbi ni David iti ari a kas idi damo.

8 Bimtak manen ti gubat. Dinarup ni David dagiti Filisteo ket pinarigatna ida agingga a nagtatarayda.

9 Iti maysa nga aldaw, adda dakes nga espiritu a naggapu ken ni Yahweh a nangituray ken ni Saul. Adda idi ni Saul iti balayna ket situtugaw a nakaiggem iti gayang. Adda met ni David sadiay nga agtuktokar iti arpa.

10 Kayat ni Saul nga ipideg ni David iti diding babaen iti gayangna, ngem naglisi ni David ket naitugkel ti igam iti diding. Nagtaray ni David ket naglibas.

11 Itidayta met la a rabii, nangibaon ni Saul iti sumagmamano a tattao a mangsiim iti balay ni David. Panggepda a patayen ni David iti kabigatanna, ngem binallaagan ni Mical nga asawana. Kinunana ken ni David, “No saanka nga aglibas ita a rabii, mataykanto inton bigat.”

12 Pinababana ni David iti maysa a tawa ket nagtaray a naglibas ti asawana.

13 Kalpasanna, innala ni Mical ti didiosenda ket impaiddana iti katre. Inikkanna iti pungan a naaramid iti dutdot ti kalding sana inulesan.

14 Idi sumangpet dagiti tattao ni Saul a mangtiliw ken ni David, imbaga ni Mical kadakuada a masakit ti asawana.

15 Ngem pinagsubli ida ni Saul tapno kitaenda a mismo ni David. “Bagkatenyo agraman ti iddana nga ipan ditoy ket patayek,” imbilinna.

16 Nagsubli ngarud dagiti naibaon iti uneg ti balay, ket nasarakanda ti didiosen iti katre ken ti nagpungananna a naaramid iti dutdot ti kalding.

17 “Apay nga inallilawnak iti kastoy ket impalubosmo a naglibas ti kabusorko?” sinaludsod ni Saul ken ni Mical.

“Imbagana ngamin a patayennak no diak tulongan nga aglibas,” insungbatna.

18 Kabayatanna, nakalibas ni David. Napan idiay Rama ket impulongna ken ni Samuel ti amin nga inaramid ni Saul kenkuana. Kalpasanna, nagkuyogda ken Samuel a napan idiay Najot ket nagyanda sadiay.

19 Idi maammoan ni Saul nga adda ni David idiay Najot, maysa a lugar idiay Rama,

20 nangibaon iti sumagmamano a tattao a mangtiliw kenkuana. Nakitadati bunggoy dagiti profeta nga agsasala ken agdidir-i, ket ni Samuel ti panguloda. Inturayan ti espiritu ti Dios dagiti tattao ni Saul ket nagsasala ken nagdidir-ida met.

21 Idi naipadamag daytoy ken ni Saul, nangibaon manen iti ad-adu pay a tattao ket nagsasala ken nagdidir-ida met. Nangibaon manen iti maikatlo a daras kadagiti tattaona, ket kasta met ti napasamak kadakuada.

22 Kalpasanna, isu a mismo ti napan idiay Rama. Idi dimteng iti dakkel a bubon idiay Secu, nagsaludsod no sadino ti ayan da Samuel ken David ket naibaga kenkuana nga addada idiay Najot.

23 Idi magmagna a mapan sadiay, inturayan ti espiritu ti Dios, ket nagsalsala ken nagpukpukkaw agingga a dimmanon idiay Najot.

24 Inuksobnati pagan-anayna ket nagsalsala ken nagpukkapukkaw iti imatang ni Samuel. Nagmalmalem ken nagpatpatnag a nagidda a lamolamo. Daytoy ti nangrugian ti pagsasao, “Apay, profeta kadi metten ni Saul?”

Tulongan ni Jonatan ni David

1 Nagtalaw ni David idiay Najot a sakup ti Rama ket napan ken ni Jonatan. Sinaludsodna ken ni Jonatan, “Ania ti inaramidko? Adda kadi krimen nga inaramidko? Ania aya ti basolko ken ni tatangmo ta kayatnak a patayen?”

2 “Adayo a kasta ti mapasamak,” insungbat ni Jonatan. “Awan ti aramiden ni tatang a dina ipakaammo kaniak, nasken man wenno saan. Diak patien a kayatnaka a patayen!”

3 Ngem simmungbatni David, “Ammo unay ni tatangmo no kasano ti panangipategmo kaniak, ket napanunotna a dina ipalgak kenka ti panggepna nga aramiden amangan no agsakit ti nakemmo. Isapatak kenka a maysa laengen nga addang ti baetmi ken patay!”

4 “Aramidek ti aniaman a tarigagayam,” kinuna ni Jonatan.

5 Insungbatni David, “Fiesta ti Lutuad inton bigat, ket masapul a makilanglangakto iti ari. Ngem palubosannak koma a mapan aglemmeng iti away agingga iti rabii iti sumaruno nga aldaw.

6 No madlawto ni tatangmo nga awanak iti panganan, ibagam kenkuana nga inyunay-unayko kenka a palubosannak nga agawid a dagus idiay Betlehem, agsipud ta idaton ti entero a familiak ti tinawen a sakrifisio.

7 No kunana, ‘Ala, wen,’ awanto ti pakaan-anoak. Ngem no makapungtot isunto ti pakaammoam a pudno a kayatnak a patayen.

8 Pangngaasim ta ipaaymo a naimbag a nakem, ket tungpalem daytoy nasagradoan a karim kaniak. Ngem no nagbasolak, sika a mismo ti mangpatay kaniak. Apay nga ipalubosmo a ni tatangmo ti mangpatay kaniak?”

9 “Dimo panunoten dayta,” insungbat ni Jonatan. “No maammoak a pudno a dangrannaka ni tatang, ibagak nga ibaga kenka.”

10 “Siasinonto ti mangipakaammo kaniak no sungbatannaka a sipupungtot ni tatangmo?” sinaludsod ni David.

11 “Inta idiay away,” insungbat ni Jonatan.

Napanda ngarud iti away,

12 ket kinuna ni Jonatan ken ni David, “Ti komaApoa Dios ti Israel ti agpaay a saksita.Iti kastoy nga oras inton bigat ken iti sumaruno nga aldaw, pagsaludsodakto ni tatang. No nasayaat ti riknana kenka, pakaammoankanto.

13 No panggepnaka a dangran, patayennak koma tiApono dika pakaammoan ket pumanawka nga awan ti pakaan-anoam. Sapay koma ta adda kenka tiApoa kas iti kaaddana idi ken ni tatangko.

14 Ita, no sibibiagak pay met laeng, salimetmetam koma ti nasagradoan a kari ket agtalinaedka a napudno kaniak. Ngem no matayak,

15 aywanamtokoma iti agnanayon ti familiak. Ket kalpasan ti panangdadael a mamimpinsan tiApoiti amin a kabusormo,

16 sapay koma ta dinto mawaswas ti nagtulaganta. No masalungasing, dusaennakanto tiApo.”

17 Pinagkari manen ni Jonatan ni David a taginayonenna ti panangipategna kenkuana ta ipatpateg unay ni David a kas iti panangipateg iti bagina. Nagkari ni David.

18 Kalpasanna, kinuna ni Jonatan ken ni David, “Fiesta ti Lutuad inton bigat, ket no awanka iti panganan, madlawto ti kaawanmo.

19 Iti sumuno nga aldaw, nalaklakanton a madlaw ti kaawanmo.Inka ngarud iti disso a naglemmengam idi, ket aglemmengka iti likudan ti nabunton a bato sadiay.

20 Mangibiatakto iti tallo a pana iti nabunton a bato a kasla isu ti puntaak.

21 Ibagakto a mapan biroken ti adipenko. No kunak kenkuana, ‘Adda dagiti pana dita sikigam; alaem ida,’ kaipapananna nga awan ti pakaan-anoam ket mabalinmo ti rummuar. Isapatak iti nagan ti sibibiag ngaAponga awanto ti pagpeggadam.

22 Ngem no ibagak kenkuana, ‘Adda dagiti pana iti labesmo,’ pumanawkan, agsipud ta papanawennaka tiApo.

23 No maipapan iti nagtulaganta, tiApoti saksita tapno agtalinaed daytoy a kari iti agnanayon.”

24 Naglemmeng ngarud ni David iti away. Iti Fiesta ti Lutuad, simmango ni Saul iti lamisaan ket

25 nagtugaw iti masansan a pagtugtugawanna iti asideg ti diding. Nagtugaw ni Abner iti abayna. Nagtugaw met ni Jonatan iti bangir ti lamisaan a sumangsango iti ari.Bakante ti tugaw ni David,

26 ngem awan ti sinao ni Saul iti dayta nga aldaw, agsipud ta impagarupna nga adda napasamak kenkuana ket saan a nadalus iti imatang ti linteg.

27 Iti sumuno nga aldaw kalpasan ti Fiesta ti Lutuad, bakante pay laeng ti tugaw ni David. Sinaludsod ni Saul ken ni Jonatan, “Apay a saan nga immay nangan ni David ita ken idi kalman?”

28 “Nagpakpakaasi kaniak a palubosak a mapan idiay Betlehem,” insungbat ni Jonatan.

29 “‘Pangngaasim ta palubosannak,’ kinunana, ‘agsipud ta rambakan ti familiak ti fiesta ti daton idiay ilimi, ket imbilin ti kabsatko a lalaki a mapanak sadiay. Ngarud no gayyemnak met laeng, palubosannak a mapan tapno makitak dagiti kabagiak.’ Isut’ gapuna nga awan ni David iti tugawna iti panganan.”

30 Nakapungtot ni Saul ken ni Jonatan ket kinunana kenkuana, “Sika nga anak ti nasukir ken dakes a babai! Ita, ammokon a kankanunongam ni David ket ibabainmo ti bagim ken dayta nga inam!

31 Dimo kad ammo a no sibibiag pay met la ni David, pulos a dikanto makapagari iti daytoy a pagilian? Ita, inka alaen ket yegmo ditoy—masapul a matay!”

32 “Apay a rumbeng a matay?” insungbat ni Jonatan. “Ania kadi ti inaramidna?”

33 Gapu iti daytoy, ginayang ni Saul ni Jonatan tapno patayenna ket nabigbig ni Jonatan a pudno a kayat a patayen ni Saul ni David.

34 Sipupungtot ni Jonatan a pimmanaw iti panganan; saan a nangan iti dayta nga aldaw—ti maikadua nga aldaw ti Fiesta ti Lutuad. Kasta unay ti pannakariribukna maipuon ken ni David agsipud ta imbabain ni Saul.

35 Iti sumuno nga agsapa, napan ni Jonatan iti away tapno agkitada ken ni David a kas nagnumoanda. Nangitugot iti maysa a bumarito.

36 “Agtarayka ket sapulem dagiti pana nga ibiatko,” kinunana kenkuana.

Nagtaray ti ubing ket nangibiat ni Jonatan iti pana iti labes ti adipenna.

37 Idi dumanon ti ubing iti disso a nagdissoan ti pana, impukkaw ni Jonatan kenkuana, “Adda ti pana iti labesmo.

38 Darasem a mapan alaen! Dika agtaktak!”

Pinidut ti ubing ti pana ket nagsubli iti ayan ti apona.

39 Dina ammo no ania ti kaipapanan ti amin. Da Jonatan ken David laeng ti makaammo.

40 Inted ni Jonatan dagiti igamna iti ubing ket imbagana kenkuana nga isublina iti ili.

41 Kalpasan ti ipapanaw ti ubing, rimmuar ni David iti nabunton a bato,namitlo a nagpakleb iti daga a kas panangipakitana iti panagdayawna. Agsangsangitda ken ni Jonatan bayat ti panaginnagekda. Nakarkaro ti panagladingit ni David ngem ni Jonatan.

42 Kinuna ni Jonatan ken ni David, “Dios ti kumuyog kenka. Sapay koma ta tulongannata tiApoa mangsalimetmet iti karinkarita a nasagradoan ket kasta koma met ti panangsalimetmet dagiti kaputotam ken dagiti kaputotak iti agnanayon.”

Pimmanaw ni David, ket nagsubli ni Jonatan iti ili.

Itarayan ni David ni Saul

1 Napanni David idiay Nob iti ayan ni Ahimelec a padi. Agtigtigerger ti padi a simmabat kenkuana. Sinaludsodna ken ni David, “Apay a siksika nga immay? Apay nga awan ti kaduam?”

2 Insungbat ni David, “Addaak ditoy ta adda nangibaonan kaniak ti ari. Imbagana nga awan ti pangipakaammoak iti nangibaonanna kaniak. No maipapan kadagiti tattaok, imbagak kadakuada nga agsasarakkami iti maysa a lugar.

3 Ita, ania ti makan dita? Ikkannak man iti lima a tinapay wenno aniaman nga adda kenka.”

4 Kinuna ti padi, “Awan ti gagangay a tinapay. Ti la nasagradoan a tinapay ti adda. Mabalinmo nga alaen no la ket saan a nakikaidda dagiti tattaom kadagiti babbai itay nabiit.”

5 Kinuna ni David, “Awan duadua a dida pay nakikaidda iti babai. Tunggal adda pakaibaonan dagiti tattaok, ikagumaanda ti agtalinaed a nadalus, uray no gagangay a mision ti papananmi. Anianto la ketdin ita ta naisangsangayan ti nakaibaonanmi?”

6 Ngarud,inted ti padi ti nasagradoan a tinapay, ta awanen ti adda no di la dagiti tinapay a naidaton ken ni Yahweh. Naikkat dagitoy iti nasantoan a lamisaan ket nasuktanda iti kalutluto a tinapay.

7 Iti dayta nga aldaw, nairana nga adda sadiay ni Doeg nga Edomita a pangulo dagiti agay-aywan kadagiti arban ni Saul, ta masapul a tungpalenna ti maysa nga annongna a nasantoan.

8 “Adda kadi maitedmo kaniak a gayang wenno kampilan?” sinaludsod ni David ken ni Ahimelec. “Awan ti naitugotko nga armas; nagdardarasak a pimmanaw ta nasken unay ti bilin ti ari.”

9 “Tilaeng kampilan ni Goliat a Filisteo a pinataymo idiay Tanap ti Lugo ti adda nga armas ditoy,” insungbat ni Ahimelec. “Nabungon iti lupot ket naidulin iti likudan ti efod. Alaem no kayatmo.”

“Itedmo kaniak,” kinuna ni David. “Awanen ti kampilan a nasaysayaat ngem iti daytoy.”

10 Pimmanaw ni David tapno itarayanna ni Saul. Nagkamang ken ni Akis nga ari ti Gat.

11 Ngemnabigbig dagiti ofisiales ni Akis ket kinunada iti ari, “Saan aya nga isu ni David nga ari iti pagilianna? Isu ti ikankanta dagiti babbai bayat ti panagsasalada:

‘Rinibu ti pinatay ni Saul,

ngem pinullo ribu ti pinatay ni David.’”

12 Naimulaken ni David dagitoy a saoda, ket kasta unay ti panagbutengna ken ni Akis.

13 Naginmamauyongngarud ni David iti imatangda amin, aglalo no padasenda a tenglen. Suratsuratanna dagiti rikep ti ruangan ket bay-anna nga agayus ti katayna iti imingna.

14 Kinuna ngarud ni Akis kadagiti ofisialesna, “Diyo kadi makita nga agmauyong dayta a tao? Apay nga inyegyo kaniak?

15 Adu unayen ti agmauyong a lallaki nga adda kaniak! Apay aya a nangyegkayo ditoy balayko iti sabali pay a mangriribuk kaniak?”

Ti Pannakapapatay dagiti Papadi

1 Naglibasni David iti siudad ti Gat ket napan iti maysa a rukib iti asideg ti ili ti Adullam. Idi madamag dagiti kakabsatna ken dagiti dadduma a kameng ti familiana nga adda sadiay ni David, napanda timmipon kenkuana.

2 Timmipon kenkuana ti amin a maidaddadanes wenno nakautang wenno dagiti adda saksakiten ti nakemda, ket isu ti nagbalin a panguloda. Agarup a 400 a lallaki ti kimmappon kenkuana.

3 Manipud sadiay, napan ni David idiay Mizpa nga ili iti Moab, ket kinunana iti ari ti Moab, “Pangngaasim ta ipalubosmo nga agdagus pay la kenka ni tatangko ken ni nanangko agingga a maammoak no ania ti aramiden ti Dios kaniak.”

4 Imbati ngarud ni David dagiti nagannak kenkuana iti ari ti Moab, ket nagyanda sadiay bayat ti panaglemmengna iti rukib.

5 Napan ni profeta Gad ken ni David. “Saanka nga agyan ditoy,” kinuna ti profeta. “Inka a dagus idiay Juda.”

Pimmanaw ngarud ni David ket napan iti kabakiran ti Heret.

6 Iti maysa nga aldaw, adda ni Saul idiay Gabaa. Agtugtugaw iti sirok ti maysa a salamagi ket ig-iggamanna ti gayangna. Agtaktakder met iti lawlawna dagiti ofisialesna. Naipadamag kenkuana a nabirokandan ti paglemlemmengan ni David ken dagiti tattaona,

7 ket kinunana kadagiti ofisialesna, “Dumngegkayo, dakayo a Benjaminita! Namnamaenyo kadi nga ikkannakayo amin ni David iti talon ken kaubasan? Ipagarupyo kadi a pagbalinennakayo nga ofisial iti armadana?

8 Daytoy kadi ti gapuna nga isiksikatdak? Awan kadakayo ti nangibaga kaniak a nakitulag ti mismo nga anakko ken ni David. Awan ti mangisakit kaniak, wenno mangibaga nga agsapsapul itan ti maysa kadagiti tattaok iti gundawayna a mangpatay kaniak ken sinugsogan ti anakko nga isikatnak!”

9 Nakatakdermet idi ni Doeg nga Edomita iti ayan dagiti ofisiales ni Saul. Kinunana, “Nakitak ni David idiay Nob, idi napan ken Ahimelec nga anak ni Ahitob.

10 Nakiuman ni Ahimelec ken ni Yahweh ket sinaludsodna no ania ti rumbeng nga aramiden ni David. Kalpasanna, inikkanna ni David iti balonna sana inted ti kampilan ni Goliat a Filisteo.”

11 Pinaayaban ngarud ni Ari Saul ni Ahimelec a padi ken dagiti amin a kabagianna a papadi met iti Nob ket dimmatagda kenkuana.

12 “Dumngegka, Ahimelec,” kinuna ni Saul.

“Adtoyak a madadaan nga agserbi kadakayo, apo,” insungbatna.

13 Sinaludsod ni Saul, “Apay nga isiksikatdak—dakayo ken David? Apay nga inikkam ni David iti taraon ken kampilan? Apay a nakiumanka iti Dios maipuon kenkuana? Ita, binusornakon, ket ur-urayenna ti gundawayna a mangpatay kaniak!”

14 Simmungbat ni Ahimelec, “Ni David ti kapudnoan nga ofisialmo! Isu ti mismo a manugangmo, kapitan dagitiguardiam ken raraemen amin nga adda iti palasiom.

15 Wen, nakiumanak iti Dios a maipaay kenkuana ngem saan la a daytoy ti pannakiumanko. No maipapan iti panangisikatko kenka, dinak koma pabasolen ti natan-ok nga ari wenno pabasolen ti siasinoman a kameng ti familiak. Awan ti ammok iti daytoy a banag!”

16 “Ahimelec,” kinuna ti ari, “masapul a mataykayo nga agkakabagian.”

17 Kinunana kadagiti guardia nga agtatakder iti asidegna, “Patayenyo dagiti papadi tiApo, ta nakikumplotda ken ni David! Dida imbaga kaniak a naglibas ni David uray no ammoda.”

Ngem nagkedked dagiti guardia a mangpatay kadagiti papadi ni Yahweh.

18 Isut’ gapuna a kinuna ni Saul ken ni Doeg, “Sika ti mangpapatay kadakuada!” Ket pinatay amin ida ni Doeg. Iti dayta nga aldaw, pinatayna ti 85 a papadi a siaarwat iti linen nga efod.

19 Pinapapatay met ni Saul ti dadduma nga agnaed iti Nob a siudad dagiti papadi. Babbai ken lallaki, ubbing ken maladaga, bakbaka ken asno ken karnero—napapatayda amin.

20 Ngem nakalibas ni Abiatar a maysa kadagiti annak ni Ahimelec. Napan timmipon ken ni David,

21 ket imbagana kenkuana a pinapatay ni Saul dagiti papadi ni Yahweh.

22 Kinuna ni David kenkuana, “Idi nakitak ni Doeg sadiay iti dayta nga aldaw, ammok nga agipulong ken ni Saul. Ngarud, siak ti nakaigapuanti pannakapapatay dagiti amin a kabagiam.

23 Agyanka kaniak ket dika agbutbuteng. Kayatnata a patayen ni Saul, ngem natalgedka ditoy dennak.”

Ispalen ni David ti Ili ti Keila

1 Naipakaammo ken ni David a rarauten dagiti Filisteo ti ili ti Keila ket taktakawenda dagiti kaap-apit a trigo.

2 Sinaludsodna ngarud ken ni Yahweh, “Innak kadi gubaten dagiti Filisteo?”

“Wen,” insungbat ni Yahweh. “Gubatem ida ket ispalem ti Keila.”

3 Ngem kinuna dagiti tattao ni David, “Adu unayen ti pagpeggadantayo ditoy Juda. Nakarkaro manen no intayo darupen dagiti mannakigubat a Filisteo idiay Keila!”

4 Ngarud, nakiuman manen ni David ken ni Yahweh.

“Inka idiay Keila ket yawatkonto kenka dagiti Filisteo,” imbaga ni Yahweh.

5 Napan ni David ken dagiti tattaona idiay Keila ket rinautda dagiti Filisteo. Adu ti pinapatayda kadakuada sada innala dagiti animalda. Iti kasta, inispal ni David ti ili ti Keila.

6 Idi naglibas ni Abiatar nga anak ni Ahimelec, nagkamang ken ni David idiay Keila. Intugotna ti efod.

7 Naipadamag ken ni Saul a napan ni David idiay Keila, ket kinunana, “Inyawaten ti Dios ni David iti pannakabalinko. Naipalab-ogen ta simrek iti nabakudan nga ili nga adda rikep ken balunet dagiti ruanganna.”

8 Daytoy ti gapuna nga inummong ni Saul dagiti soldadona tapno makigubatda. Simmalogda idiay Keila tapno lakubenda ni David ken dagiti soldadona.

9 Idi naammoan ni David ti panggep ni Saul a mangraut kenkuana, kinunana ken ni Abiatar a padi, “Yegmo ditoy ti efod.”

10 Kinuna ni David, “OApoa Dios ti Israel, naammoak a panggep ni Saul ti umay ditoy Keila tapno dadaelenna ti siudad gapu kaniak nga adipenmo.

11 Yawatdakto kadi dagiti umili ti Keila iti pannakabalin ni Saul? Pudno kadi nga umay ni Saul a kas nadamagko? OApoa Dios ti Israel, pangngaasim ta sungbatannak!”

“Umay nga umay ni Saul,” insungbat ni Yahweh.

12 “Ket dagiti umili ti Keila, yawatdakto kadi ken dagiti tattaok iti pannakabalin ni Saul?” sinaludsod ni David.

“Yawatdakanto,” insungbat ni Yahweh.

13 Dinagdagus ngarud ni David ken dagiti agarup nga 600 a tattaona ti pimmanaw idiay Keila. Nagalis-alisda. Idi madamag ni Saul a naglibas ni David idiay Keila, saanna nga intuloy ti panggepna.

Ni David iti Nasamek a Katurturodan a Pagilian

14 Naglemmeng ni David iti let-ang iti asideg ti Sif nga adda iti katurturodan a pagilian. Inaldaw a sarsaraken ni Saul, ngem saan nga inyawat ti Dios ni David iti pannakabalin ni Saul.

15 Nupay kasta, kaskasdi a mabuteng ni David, agsipud ta ammona a desidido ni Saul a mangpatay kenkuana.

Adda ni David idiay Jores iti let-ang iti asideg ti Sif

16 idi napan kenkuana ni Jonatan nga anak ni Saul, ket pinapigsana ti nakemna babaen iti panangipatalgedna iti pannalaknib ti Dios.

17 “Saanka nga agbuteng,” kinuna ni Jonatan. “Dinaka mabalin a dangran ni tatangko. Agbalinkanto nga ari ket siakto ti sumaruno kenka iti saad, kas pagaammo ni tatangko.”

18 Sinapataandati nasagradoan a karida nga aggayyemda. Nagawid ni Jonatan ngem nagbati ni David idiay Jores.

19 Idiadda ni Saul idiay Gabaa, adda tattao a taga-Sif a napan kenkuana ket impakaammoda nga aglemlemmeng ni David iti sakupda. “Adda ni David idiay Jores iti Bantay Hakila iti akin-abagatan a paset ti let-ang ti Juda,” kinunada.

20 “Ammomi no kasano ti ayatmo a mangtiliw kenkuana, Natan-ok nga Ari. Umayka ngarud iti lugarmi ket ipanamnamami kenka a matiliwmo.”

21 Kinuna ni Saul, “Sapay koma ta bendisionannakayo tiApo, gapu iti pannakipagriknayo kaniak.

22 Inkay manen kitaen a naimbag. Siguradoenyo no sadino ti paglemlemmengan ni David ken no siasino ti nakakita kenkuana. Naibaga kaniak a nasikap la unay.

23 Inton maammoan ken makitayo dagiti nalimed a disso a paglemlemmenganna, dagdagusenyonto nga umay ibaga kaniak. Kumuyogakto kadakayo ket no adda pay la sadiay, anupek uray no masapul a sursorek ti entero a Juda.”

24 Nagsubli dagiti tattao ket immun-unada ngem ni Saul a napan idiay Sif. Adda idi ni David ken dagiti tattaona iti let-ang ti Maon, iti awan matagtagitao a tanap iti akin-abagatan a paset ti let-ang ti Juda.

25 Nagrubbuat ni Saul ken dagiti tattaona tapno birokenda ni David. Ngem naammoan daytoy ni David ket napan naglemmeng iti maysa a kabatoan a turod iti let-ang ti Maon. Sadiay ti nagyananna. Idi madamag ni Saul iti maipapan iti daytoy, napanna sinarak ni David.

26 Adda ni Saul ken dagiti tattaona iti maysa a bangir ti turod. Adda met iti sabali a bangir ti turod da David ken dagiti tattaona. Agdardarasda a pumanaw ta asidegen ni Saul ken dagiti tattaona ket dandanida matiliwen.

27 Pagammoan, simmangpet ti maysa a naibaon ket imbagana ken ni Saul, “Darasem ti agawid! Rarauten dagiti Filisteo ti pagiliantayo!”

28 Ngarud, saan nga intuloy ni Saul ti panangsunsonda ken ni David ket napanda ginubat dagiti Filisteo. Daytoy ti gapuna a maaw-awagan dayta a disso iti Turod a Nagsinaan.

29 Pimmanaw ni David ket napan naglemmeng iti sakup ti Engadi.

Ispalen ni David ti Biag ni Saul

1 Idi agsubli ni Saul kalpasan iti pannakigubatna kadagiti Filisteo, naibaga kenkuana nga adda ni David iti let-ang iti asideg ti Engadi.

2 Nangitugot ni Saul iti 3,000 a napili a mannakigubat iti Israel ket napanda binirbirok ni David ken dagiti tattaona iti dayaen ti Kabatoan dagiti Atap a Kalding.

3 Dimtengiti maysa a kueba nga asideg iti sumagmamano a pagaponan ti karnero iti igid ti dalan, ket simrek tapno mapan umibleng.

Nairana a ditoy ti paglemlemmengan ni David ken dagiti tattaona, iti kaunggan a paset ti rukib.

4 Kinuna dagiti tattaona, “Daytoyen ti gundawaymo! Inyawaten tiApoti kabusormo iti pannakabalinmo kas inkarina, ket mabalinmo nga aramiden kenkuana ti aniaman a kayatmo.”

Nagar-arudok ni David a napan iti ayan ni Saul ket nangragas iti gayadan ti kagay ni Saul a di nadlaw ni Saul.

5 Ngem kalpasanna, nariribuk ti konsensia ni David,

6 ketkinunana kadagiti tattaona, “Yad-adayo koma tiApoa dangrak ti apok a pinilina a kas ari! Diak mabalin a dangran, agsipud ta isu ti ari a pinili tiApo!”

7 Naallukoy ngarud ni David dagiti tattaona a dida darupen ni Saul.

Timmakder ni Saul ket rimmuar iti rukib.

8 Simmaruno met a rimmuar ni David ket inawaganna, “Natan-ok nga Ari!”

Timmalliaw ni Saul. Nagkurno ni David a kas pammadayawna iti ari

9 sana kinuna, “Apay a patiem dagiti tattao nga agkunkuna a kayatka a patayen?

10 Itay laeng, mismo a sika ti nakakita nga inyawatnaka tiApoiti pannakabalinko dita uneg ti rukib. Adda dagiti tattaok a nangibaga kaniak a patayenka, ngem naasianak kenka ket imbagak kadakuada a pulos a saanka a dangran, agsipud ta sika ti ari a pinili tiApo.

11 Kitaem, ama. Kitaem daytoy ig-iggamak a gayadan ti kagaymo! Nalaka koma a pinatayka ngem rinagasko laeng daytoy. Daytoy koma ti mangipaneknek nga awan ti panggepko a mangsukir wenno mangranggas kenka. Uray no awan ti naaramidko a dakes kenka, kaskadi nga an-anupennak tapno patayennak.

12 Ikeddeng koma tiApono siasino kadata ti nagbiddut. Sapay koma ta dusaennaka gapu iti tignaymo a maibusor kaniak; ta pulos a dika dangran.

13 Ammom ti pagsasao, ‘Dagiti laeng dakes a tattao ti agaramid iti dakes.’ Ket saanka ngarud a ranggasan.

14 Kitaemti panggep a patayen ti ari ti Israel! Kitaem ti an-anupenna! Maysa a natay nga aso! Maysa a timel!

15 NintoApoti mangukom ket ikeddengna no sinno kadata ti nagbiddut. Usigenna koma daytoy a banag; salaknibannak ket isalakannak iti pannakabalinmo.”

16 Idi nalpas a nagsao ni David, kinuna ni Saul, “Pudno kadi a sika dayta, anakko a David?” Ket nagsangit ni Saul.

17 Kalpasanna, kinunana ken ni David, “Nalintegka idinto a nagbiddutak. Naimbagka la unay kaniak ngem dakes ti insubalitko kenka!

18 Ita nga aldaw, impakitam ti kinaimbagmo kaniak agsipud ta dinak pinatay uray no inyawatnak tiApoiti pannakabalinmo.

19 Manmano a mapasamak a no matiliw ti maysa a tao ti kabusorna, palubosanna met laeng nga awan ti pakaan-annoanna. Bendisionannaka koma tiApogapu iti impaaymo kaniak ita nga aldaw.

20 Ita, kapkapnekakon nga agarikanto iti Israel, ket natalgedto ti pagarian iti panangituraymo.

21 Ngem ikarim koma kaniak iti nagan tiAponga ispalemto dagiti kaputotak tapno saan a malipatan ti naganko ken ti nagan ti familiak.”

22 Inkari ni David nga aramidenna ti dawat ni Saul.

Nagawid ni Saul ket nagsubli met ni David ken dagiti tattaona iti paglemlemmenganda.

Ti Ipapatay ni Samuel

1 Natay ni Samuel, ket naguummong amin dagiti Israelita a mangdung-aw kenkuana. Intanemda iti balayna idiay Rama.

Ni David ken ni Abigail

Kalpasan daytoy, napan ni David iti let-ang ti Paran.

2-3 Adda idi lalaki nga agnagan iti Nabal a nagtaud iti kapuonan ni Caleb. Taga-Maon ni Nabal. Nakabakbaknang ket adda dagana iti asideg iti ili ti Carmel. Adda 3,000 a karnerona ken 1,000 a kaldingna. Napintas ken nasaririt ni Abigail nga asawana, ngem nasabrak ken dakes ti ugali ni Nabal.

Pukpukisan idi ni Nabal dagiti karnerona idiay Carmel.

4 Adda met idi ni David idiay let-ang ket idi maammoanna daytoy,

5 nangibaon iti sangapulo nga agtutubo a mapan idiay Carmel. Binilinna ida a birokenda ni Nabal ket idanonda kenkuana ti pakomustana.

6 Kastoy ti pinaibagana: “Pakomustaannaka ni David; pakomustaanna met ti familiam ken amin nga adda kenka.

7 Nadamagna a pappapukisam dagiti karnerom, ket kayatna nga ipakaammo kenka nga adda idi dagiti pagpaspastorem iti sakupna ket dida rinangranggasan ida. Pulos nga awan ti natakaw a kukuada bayat ti kaaddada idiay Carmel.

8 Damagem laeng kadakuada, ket ibagada kenka a pudno daytoy. Dawaten ni David a sangailiennakami ta umaykami iti kaaldawan ti fiesta. Pangngaasim ngarud ta itedmo ti mabalinmo nga ipaay kadakami nga adipenmo ken ni David a napateg a gayyemmo.”

9 Dimteng dagiti tattao ni David ket indanonda ken ni Nabal ti pinaibaga ni David. Nagur-urayda.

10 Kamaudianna, simmungbat ni Nabal: “David? Siasino dayta a tao? Diak pay nadamag dayta a tao. Kadagitoy nga aldaw, napno ti pagilian iti tagabu a nagtalaw iti balay ti apoda.

11 Ha! Kayatyo a sawen nga alaek ti tinapay ken ti arakko ken dagiti animal a pinartik nga agpaay kadagiti agpukpukis kadagiti karnerok ket itedko kadagiti tattao a diak ammo no sadino ti naggapuanda?”

12 Nagsubli dagiti tattao ni David ket imbagada kenkuana ti sao ni Nabal.

13 “Ibarikesyo dagiti kampilanyo,” imbilin ni David. Kasta ti inaramidda. Imbarikes met ni David ti kampilanna ket pimmanaw agraman dagiti ag-400 a tattaona. Nagbati ti 200 a tattao a mangbantay kadagiti masapsapulda.

14 Adda maysa kadagiti adipen ni Nabal a napan ken ni Abigail. Kinunana, “Nadamagmo kadin? Adda sumagmamano a tattao ni David nga imbaonna manipud let-ang tapno kablaawanna ti apomi, ngem ininsultona ida.

15 Naimbag unay dagiti tattaona kadakami. Didakam siningsinga ket bayat ti kaaddami kadakuada idiay away, pulos nga awan ti natakaw a kukuami.

16 Aldaw-rabii a sinalaknibandakami bayat ti panangipastormi kadagiti arban iti asidegda.

17 Ita, panunotem a naimbag daytoy ket ikeddengmo no ania ti rumbeng nga aramidem amangan la ketdi no dakes ti mapasamak ti apomi ken ti amin a kameng ti familiana. Nadamsak unay ket pulos nga awan ti makatured a makisao kenkuana!”

18 Nagdardaras ni Abigail a nangala iti 200 a tinapay, dua a supot a lalat a napno iti arak, lima a litson a karnero, dua kasukat nga iniruban a trigo, 100 a karaay nga ubas ken 200 a kankanen a naaramid iti namaga nga igos. Impasakayna dagitoy kadagiti asno.

19 Kinunana kadagiti adipen, “Umunakayon ta sumarunoak.” Ngem dina imbagbaga daytoy iti asawana.

20 Sisasakay ni Abigail iti asnona ket agsikko koma iti bakras ti turod a pagpagnaanna idi pagammoan la ta masabatna ni David ken dagiti tattaona.

21 Kunkuna itay ni David iti bagina, “Dinaddadaelko la ti tiempok iti let-ang a nangsalaknib kadagiti sanikua daytoy a tao. Pulos nga awan ti natakaw a kukuana, ket daytoy ketdin ti pagsupapakna kaniak iti panangtulongko kenkuana!

22 Siakkoma ti patayen ti Dios no diak ikisap dagita a tattao sakbay a dumteng ti bigat!”

23 Idi makita ni Abigail ni David, dagus a dimsaag iti asnona ket nagpakleb iti daga,

24 iti sakaanan ni David sana kinuna kenkuana, “Pangngaasim ta denggennak, apo. Siak ti mangibaklay iti biddut.

25 Dimo ikankano ni Nabal. Awan serserbi dayta a tao! Kasla met laeng iti naganna—maysa a maag!Awanak idi immay dagiti imbaonmo nga adipen, apo.

26 TiApoti manglapped kenka nga agibales ken mangpatay kadagiti kabusormo. Ita, isapatak kenka iti nagan tiApoa sibibiag a madusanto dagiti kabusormo ken dagiti agpanggep a mangranggas kenka a kas iti pannakadusanto ni Nabal.

27 Pangngaasim, apo, ta awatem daytoy sagut nga inyegko kenka ket itedmo kadagiti tattaom.

28 Pakawanennak, apo, iti aniaman a biddut a naaramidko. Isaadnakanto tiApoa kas ari, kasta met dagiti kaputotam, agsipud ta makirangrangetka kadagiti gubatna ket dikanto agaramid iti dakes bayat ti panagbiagmo.

29 No addanto mangdarup kenka ket kayatnaka a patayen, aywanannakanto tiApoa Diosmo ket awanto ti pakaan-anoam, kas iti panangaywan ti maysa a tao iti napateg a gameng. Ngem no maipapan kadagiti kabusormo, ipurruaknanto ida a kas iti panangipurruak ti tao iti bato iti pallatibong.

30 Ket inton maaramid tiApoti amin a naimbag nga inkarina kenka ket isaadnaka a kas ari ti Israel,

31 awanto ti panagbabawim wenno pannakatuok ti konsensiam iti panagpapataymo nga awan gapgapuna wenno panagibalesmo. Ket inton nabendisionannakan tiApo, pangngaasim ta dinakto liplipatan.”

32 Kinuna ni David kenkuana, “Madaydayaw tiApoa Dios ti Israel a nangibaon kenka nga umay mangsabat kaniak ita nga aldaw.

33 Agyamanak iti Dios iti naimbag a panagnaknakemmo ken iti pananglappedmo kaniak nga agibales ken pumatay.

34 Saan nga impalubos tiApoa dangranka. Ket no dika nagdardaras nga immay nangsabat kaniak, isapatak itiApoa sibibiag a Dios ti Israel a sakbay a dumteng ti bigat, natay koma aminen a tattao ni Nabal!”

35 Inawat ni David ti sagut ni Abigail nga inyegna kenkuana sana kinuna, “Agawidkan ket dika agdanag. Patgak ti dawatmo!”

36 Idi agawid ni Abigail iti balayda, nadanonna nga adda parambak nga inangay ni Nabal. Kasla parambak ti ari ti inangayna. Nabartek ni Nabal ket kasta unay ti ragsakna, isu a pulos nga awan imbagbaga ni Abigail kenkuana agingga iti bigat.

37 Idi maunawanen ni Nabal, imbaga ni Abigail ti amin kenkuana. Naatake ni Nabal iti puso ket naparalitiko a namimpinsan.

38 Kalpasan ti 10 nga aldaw, dinissoan manen ni Yahweh ket natay ni Nabal.

39 Nadamag ni David ti pannakatay ni Nabal ket kinunana, “Madaydayaw tiApo! Binalesna ni Nabal gapu iti pananginsultona kaniak. Dinak pinalubosan nga adipenna nga agaramid iti dakes. Dinusana ni Nabal gapu iti kinadakesna.”

Nangibaon ni David kadagiti tattaona a mapan ken ni Abigail tapno idanonda ti singasingna a mangasawa kenkuana.

40 Dimteng dagiti adipenna idiay Carmel ket imbagada ken ni Abigail, “Imbaonnakami ni David a mangala kenka tapno agbalinka nga asawana.”

41 Nagkurno ni Abigail iti daga sana kinuna, “Siak ti adipenna a sisasagana a mangbuggo kadagiti saka dagiti adipen ti apok.”

42 Dinagdagusna ti timmakder ket nagsakay iti asnona. Simmurot kadagiti adipen ni David. Kimmuyog kenkuana dagiti lima a babbai a babaonenna. Nagbalin ni Abigail nga asawa ni David.

43 Sakbay ti panangasawana ken ni Abigail, inasawa ni David ni Ahinoam a taga-Jezreel.

44 Kabayatanna,ni Palti nga anak ni Lais a taga-Gallim ti nangyasawaan ni Saul ken ni anakna a Mical, ti asawa idi ni David.

Ispalen manen ni David ti Biag ni Saul

1 Addalallaki a taga-Sif a napan ken ni Saul idiay Gabaa ket imbagada kenkuana nga aglemlemmeng ni David iti Bantay Hakila iti beddeng ti let-ang ti Juda.

2 Dinagdagus ni Saul ti napan idiay let-ang ti Zif. Kinuyog ti 3,000 a kamaingelan a mannakigubat ti Israel tapno birokenda ni David.

3 Nagkampo ni Saul iti igid ti dalan iti Bantay Hakila. Adda pay laeng ni David iti let-ang, ket idi naammoanna a simmangpet ni Saul a mangsapsapul kenkuana,

4 nangibaon kadagiti espia ket napaneknekanda a pudno nga adda sadiay.

5 Nagdardaras ni David a napan sadiay ket nasarakanna ti nagkampoan ni Saul. Tinannawaganna ti pagturturogan ni Saul ken ni Abner nga anak ni Ner a komander ti buyot ti ari. Naturog ni Saul iti tengnga ti kampo, ket nagyan dagiti soldadona iti lawlawna.

6 Sinaludsod ni David ken ni Ahimelec a Heteo ken ni Abisai a kabsat ni Joab (annak ida ni Zeruyas), “Siasino kadakayo ti kumuyog kaniak a mapan iti kampo ni Saul?”

“Siak,” insungbat ni Abisai.

7 Ngarud, simrek da David ken Abisai iti kampo ni Saul iti dayta a rabii. Nasarakanda a matmaturog ni Saul iti tengnga ti kampo. Situtugkel iti daga ti gayangna iti asideg iti ulona. Matmaturog ni Abner ken dagiti soldado iti likmutna.

8 “Ita a rabii,” kinuna ni Abisai ken ni David, “inyawat ti Dios ti kabusormo iti pannakabalinmo. Ipalubosmo nga iduyokko kenkuana ti bukodna a gayang agingga a sumalput iti daga. Maminsan laeng a duyokek, saankon a piduaen!”

9 Ngem kinuna ni David, “Saanmo a dangran! Awan duadua a dusaen tiApoti siasinoman a mangranggas iti pinilina nga ari.

10 Iti nagan ti sibibiag ngaApo,” intuloy ni David, “ammok a tintoApoa mismo ti mangpatay kenkuana inton umay ti tiempo a pannakatayna wenno inton matay iti paggugubatan.

11 Yad-adayokoma ti Dios a dangrak ti ari a pinili tiApo! Ngem alaenta ti gayang ken ti pagkargaan ti danum ket pumanawta.”

12 Innala ni David ti gayang ken ti pagkargaan ti danum iti abay ti ulo ni Saul sada pimmanaw ken ni Abisai. Awan ti nakakita iti inaramidda wenno nakaammo iti napasamak wenno nakariing la koma. Nakaturogda amin, agsipud ta pinaturog ida ni Yahweh iti nairut.

13 Kalpasanna, bimmallasiw ni David iti sabali a bangir ti tanap ket napan iti tapaw ti maysa a turod. Adayo ti baetda ken ni Abner ken dagiti soldado ni Saul.

14 Impukkawna kadakuada, “Abner! Mangngegnak kadi?”

“Siasino ti agpukpukkaw ken mangririing iti ari?” sinaludsod ni Abner.

15 Kinuna ni David, “Abner, di met sika aya ti kamainglan iti Israel? Apay a dimo salsalakniban ti apom nga ari? Adda simrek itay iti kampo tapno patayenna ni apom.

16 Nagliwayka iti pagrebbengam, Abner! Iti nagan tiApoa sibibiag, rumbeng a matayka agsipud ta dimo sinalakniban ti apom nga ari a pinili tiApo. Ita, kitaem no sadino ti ayan ti gayang ti ari. Sadino ti ayan ti pagkargaan ti danum nga adda iti abay ti ulona?”

17 Nailasin ni Saul ti timek ni David ket sinaludsodna, “David, sika kadi dayta, anakko?”

“Wen, siak, Natan-ok nga Ari,” insungbat ni David.

18 Ket innayonna, “Apo, apay kadi a birbirokennak pay laeng nga adipenmo? Ania kadi ti inaramidko? Ania a dakes ti inaramidko?

19 Natan-ok nga Ari, denggem koma ti ibagak. No tiApokoma ti akin-aramid iti ibubusormo kaniak, awatenna ti maysa a daton tapno baliwanna ti panunotna. Ngem no tao ti akin-aramid, agdissuor koma kadakuada ti lunod tiApo. Imbagada kaniak nga innak agdaydayaw kadagiti didiosen, ket agpeggad ti kalintegak a makipagtawid iti daga nga inted tiApokadagiti tattaona.

20 Dimo koma ngarud ipalubos a matayak iti ganggannaet a daga nga adayo itiApo. Ta rimmuar ti ari tapno patayenna ti maysa a timel a kas kaniak. Apay a nasken nga an-anupennak a kas iti atap a tumatayab?”

21 Insungbat ni Saul, “Nagbasolak. Agsublika, David nga anakko! Pulos a dikanton dangran, ta inispalmo ti biagko ita a rabii. Talaga a maagak ket naka-aramidak iti nadagsen a biddut!”

22 “Adtoy ti gayangmo, Natan-ok nga Ari,” insungbat ni David. “Mangibaonka iti umay mangala.

23 Gunggonaan tiApodagiti tattao a napudno ken nalinteg. Ita nga aldaw, inyawatnaka tiApoiti pannakabalinko ngem dika rinanggasan, sika a pinilina nga ari.

24 Inispalko ti biagmo ita nga aldaw; kasta koma met ti aramiden kaniak tiApoket ilisinak iti amin a riribuk!”

25 Ngarud, kinuna ni Saul ken ni David, “Bendisionannaka koma ti Dios, anakko! Agballigikanto iti amin nga aramidmo!”

Napan ni David iti papananna ket nagawid met ni Saul.