Month: March 2020

Maipan ti Lakasa ti Tulag idiay Jerusalem

1 Inummong manen ni David dagiti napili a mannakigubat ti Israel; agdagupda iti 30,000

2 ketindauloanna ida a mapan Baalaidiay Juda tapno alaenda ti Lakasa ti Tulag ni Yahweh a mangipakita iti nailangitan a trono ni Yahweh a Mannakabalin-amin.

3 Innaladaiti balay ni Abinadab nga adda iti tuktok ti turod ket inkargada iti baro a karison sada pimmanaw. Da Uzza ken Ahio nga annak ni Abinadab ti mangiturturong iti karison.

4 Magmagna ni Ahio iti sango ti lugan.

5 Agsalsala ken agkankanta ni David ken dagiti amin nga Israelita iti amin a kabaelandaa kas pammadayawda ken ni Yahweh. Agtoktokarda kadagiti arpa, salterio, pandereta, kastanuelas ken piangpiang.

6 Ngem idi dumtengda iti panaltagan ni Nahon, naitibkol dagiti baka isut’ gapuna a tinengngel ni Uzza ti Lakasa ti Tulag.

7 Simgiab ti pungtot ni Yahweh a Dios ket dinusana ni Uzza gapu iti saanna a panagraem. Iti dayta a darikmat, natay ni Uzza sadiay iti abay ti Lakasa ti Tulag.

8 Madi ti rikna ni David gapu ta iti pungtot ni Yahweh, dinusana ni Uzza. Manipud idin, maaw-awagan dayta a disso iti Perez Uzza.

9 Iti dayta nga aldaw, nagbuteng ni David ken ni Yahweh ket kinunana, “Kasano nga alaek itan ti Lakasa ti Tulag?”

10 Saanna kayat nga ipan ti Lakasa idiay Jerusalem. Simmiasi ketdi iti dalan ket inkabilna ti Lakasa iti balay ni Obed Edom a taga-siudad ti Gat.

11 Talloa bulan a nagyan sadiay ti Lakasa ket binendisionan ni Yahweh ni Obed Edom ken ti familiana.

12 Nadamag ni Ari David a nabendisionan ti familia ni Obed Edom ken ti amin nga adda kenkuana gapu ti Lakasa ti Tulag. Iti kasta, innalana ti Lakasa iti balay ni Obed Edom tapno ipanna idiay Jerusalem a napakuyogan iti dakkel a rambak.

13 Idi nakaadayo iti innem nga addang dagiti lallaki a nagawit iti Lakasa ti Tulag, pinagsardeng ida ni David sa nangidaton iti maysa a baka ken maysa a nalukmeg a karnero.

14 Nagbarikes ni David iti linen nga efod ket nagsala iti amin a kabaelanna a kas pammadayawna ken ni Yahweh.

15 Iti kasta, isu ken dagiti amin nga Israelita inyawidda ti Lakasa ti Tulag idiay Jerusalem. Bayat ti pannagnada, agdidir-ida iti ragsak ken agpuypuyotda kadagiti trumpeta.

16 Idi madamada nga iserrek ti Lakasa iti siudad, timman-aw ni Mical nga anak ni Saul, ket nakitana ni Ari David nga agsalsala ken aglaglagto iti imatang ni Yahweh. Inumsi ni Mical ti ari.

17 Inserrekda ti Lakasa ket inkabilda iti uneg ti nakairantaanna a Tolda a binangon ni David. Nangidatag ni David kadagiti daton a mapuoran ken kadagiti daton a pakikappia a maipaay ken ni Yahweh.

18 Kalpasanna, binendisionanna dagiti tattao iti imatang ni Yahweh a Mannakabalin-amin

19 ketbinunonganna amin ida iti kanen. Inikkanna ti tunggal Israelita iti maysa a tinapay, sangkaiwa a natuno a karne ken kankanen nga adda pasasna. Kalpasanna, nagawidda amin.

20 Idi agawid ni David tapno kablaawanna ti familiana, rimmuar ni Mical a nangsabat kenkuana. “Intan-ok ti ari ti Israel ti naganna ita nga aldaw,” kinuna ni Mical. “Kasla maag a naglamolamo iti sangoanan dagiti babbai nga adipen dagiti ofisialesna!”

21 Insungbat ni David, “Nagsalsalaak a kas pammadayawko itiApoa nangpili kaniak a saan ketdi a ni amam wenno ti familiana nga agbalin a pangulo dagiti tattaona nga Israelita. Wen, itultuloyko ti agsala a kas pammadayaw itiApo,

22 ket ad-adda manen nga ibabainko ti bagik. Nalabit nga ipagarupmonga awan serserbik ngem dayawendakto dagita a babbai.”

23 Pulos a saan a naganak ni Mical nga anak ni Saul.

Ti Mensahe ni Natan ken ni David

1 Natalgeden ti panangituray ni Ari David iti pagarianna. Babaen iti tulong ni Yahweh saanen a siningsinga dagiti amin a kabusorna.

2 Kalpasanna, kinuna ti ari ken ni Natan a profeta, “Kitaem, agnaedak iti balay a naaramid iti sedro ngem tolda laeng ti pagtaengan ti Lakasa ti Tulag ti Dios.”

3 “Aramidem ngarud ti panggepmo nga aramiden, gapu ta adda kenka tiApo,” insungbat ni Natan.

4 Ngem iti dayta a rabii, kinuna ni Yahweh ken ni Natan,

5 “Inka ibaga daytoy ken ni David nga adipenko: ‘Saan a sika ti mangbangon iti templo a pagnaedak.

6 Manipud inispalko dagiti Israelita idiay Egipto agingga ita, pulos a diak nagnaed iti templo. Nagdaldaliasatak nga agnaed iti tolda.

7 Iti amin a panagdaliasatko a kaduak dagiti Israelita, diak nagsaludsod iti siasinoman kadagiti panguloa dinutokak no apay a didak imbangonan iti templo a naaramid iti sedro.’

8 “Ngarud, ibagam ken ni David nga adipenko a kastoy ti kunak kenkuana, siak, ni Yahweh, a Mannakabalin-amin, ‘Innalaka iti pagpastoran iti karnero ket tinudinganka a mangituray kadagiti Israelita.

9 Kinuykuyogka iti sadinoman a napanam ket pinarmekko dagiti amin a kabusormo iti idadarupmo. Pagbalinenka a nalatak a kas kadagiti katan-okan nga agtuturay ditoy lubong.

10-11 Nangpiliak iti lugar nga agpaay kadagiti Israelita ket pinagnaedko ida sadiay nga awanen ti mangidadanes kadakuada. Saanton a singsingaen ida dagiti naranggas a tattao a kas idi un-unana. Inkarik a salaknibanka kadagiti amin a kabusormo ken ikkanka iti kaputotan.

12 Intonmatayka ket maitiponka kadagiti kapuonam, isaadkonto ti maysa kadagiti annakmo a kas ari, ket pabilgekto ti pagarianna.

13 Isunto ti mangbangon iti templok, ket itultuloyto dagiti kaputotanna ti agturay a kas ari.

14 Siaktoti agbalin nga amana, ket isunto ti anakko. No agaramid iti dakes, dusaekto a kas iti panangdusa ti ama iti anakna.

15 Ngem diakto ibabawi ti tulongko kenkuana a kas iti panangibabawik iti panangtulongko ken ni Saul nga inikkatko tapno sika ti maisaad nga ari.

16 Maaddaankantolatta iti kaputotam. Pagpautekto ti pagariam. Dinto agpatingga ti panagari kadagiti kaputotam.’”

17 Imbaga ni Natan ken ni David dagiti amin nga impaltiing ti Dios kenkuana.

Ti Kararag a Pagyaman ni David

18 Napan ni Ari David iti nasagradoan a tolda, nagtugaw ket inkararagna: “Saanak a maikari wenno ti familiak, O ApoDios, iti impaaymo kaniak.

19 Nupay kasta, ad-adu pay ti ar-aramidem, O ApoDios. Nagkarika maipapan kadagiti kaputotak kadagiti tawen a mapasungad. Impalubosmo, O ApoDios, a makita daytoy ti maysa a tao.

20 Awanen ti mabalinko a sawen, ta ammonak nga adipenmo.

21 Nagayatam ken panggepmo nga aramiden daytoy. Impakaammom kaniak amin dagitoy naindaklan a banag.

22 Natan-okka, O ApoDios. Awan ti kas kenka. Awan pay ti sabali a Dios a nadamagmi no di laeng sika.

23 Awanenti sabali a nasion ditoy rabaw ti daga a kas iti Israel nga inispalmo iti pannakaadipen tapno pagbalinem ida a tattaom. Nagsaknap ti kinalatakmo iti entero a lubong gapu kadagiti naindaklan ken nakaskasdaaw a banag nga inaramidmo kadakuada.Pinagtalawmodagiti sabali a nasion ken dagiti didiosenda idi sumangpet dagiti tattaom, isuda a winayawayaam idiay Egipto tapno agbalinda a kukuam.

24 Pinagbalinmo dagiti Israelita a tattaom iti agnanayon, ket sika, OApo, ti nagbalin a Diosda.

25 “Ita, O ApoDios, tungpalem iti amin a tiempo ti inkarim kaniak ken kadagiti kaputotak, ket aramidem a kanayon ti imbagam nga aramidem.

26 Maidaydayawkanto iti kasta unay, ket kunanto dagiti tattao iti agnanayon, ‘TiApoa Mannakabalin-amin ti Dios ti Israel.’ Taginayonemto ti panagari ti kaputotak iti amin a tiempo.

27 OApoa Mannakabalin-amin, Dios ti Israel! Naturedak a mangikararag kenka iti daytoy, agsipud ta imparangarangmo amin dagitoy kaniak nga adipenmo, ket imbagam a pagbalinem nga ari dagiti kaputotak.

28 “Ita, O ApoDios, sika ti Dios. Kanayon a tungpalem dagiti karim, ket nakaskasdaaw daytoy nga inkarim kaniak.

29 Dawatek a bendisionam dagiti kaputotak tapno agtultuloy a sagrapenda ti paraburmo. Sika, O ApoDios, ti nangikari iti daytoy, ket sapay koma ta agtalinaed iti agnanayon dagiti bendisionmo kadagiti kaputotak.”

Dagiti Panagballigi ni David iti Gubat

1 Iti saan a mabayag, rinaut ni David dagiti Filisteo. Naparmek dagiti Filisteo ket naggibus ti panangiturayda iti daga.

2 Pinarmek met ni David dagiti Moabita. Pinagliliniana a nakaidda ida iti daga, ket pinapatayna dagiti adda iti dua a linia idinto nga inispalna dagiti adda iti maysa linia. Inturayanna dagiti Moabita ket nagbuisda kenkuana.

3 Kalpasanna, pinarmek ni David ni Adadezer nga anak ni Rehob ti ari ti Soba. Napasamak daytoy idi mapan ni Adadezer iti deppaar ti akingngato a paset ti Karayan Eufrates tapno ipasdekna manen ti panagturayna iti dayta a daga.

4 Tiniliw ni David ti 1,700 a soldado a nakakabalio ken 20,000 a mannakigubat a kameng ti armada ni Adadezer. Nangibati iti umdas a bilang dagiti kabalio a pagpaguyod iti 100 a lugan a pakigubat, ket pinilayna amin dagiti natda.

5 Idi dumteng ti armada nga imbaon dagiti taga-Siria nga adda idiay Damasco iti armada a tumulong ken ni Ari Adadezer, dinarup ni David, ket pinapatayna ti 22,000 a mannakigubat.

6 Nangipasdek ni David kadagiti kampo ti militar iti masakupan dagiti taga-Siria. Inturayanna dagiti Siriano ket pinagbuisna ida. Iti sadinoman a papananna, nagballigi ni David babaen iti tulong ni Yahweh.

7 Innala pay ni David dagiti balitok a kalasag dagiti ofisiales ni Adadezer sana impan idiay Jerusalem.

8 Nakaad-adu met a bronse ti sinamsamna idiay Beta ken Berotai, dagiti siudad nga iturayan ni Adadezer.

9 Nadamag ni Toi nga ari ti Hamat ti panangparmek ni David iti entero nga armada ni Adadezer.

10 Iti kasta, imbaonna ni Joram nga anakna tapno kablaawanna ni David ken yebkasna ti ragsakna iti panangparmekna ken ni Adadezer a namin-adun a kinagubgubat ni Toi. Nangitugot ni Joram kadagiti alikamen a balitok, pirak ken bronse ket intedna ken ni David.

11 Indaton ni David dagitoy a maaramat iti panagdaydayaw, agraman dagiti balitok ken pirak nga innalana kadagiti pinarmekna a nasion:

12 Edom, Moab, Ammon, Filistia, ken Amalec—agraman dagiti dadduma a sinamsamna ken ni Adadezer.

13 Ad-addamanen ti panaglatak ni David idi agsubli kalpasan ti panangpapatayna iti 18,000 nga Edomita iti Tanap ti Asin.

14 Kalpasanna, nangipasdek ni David kadagiti kampo ti soldado iti entero nga Edom, ket inturayanna dagiti tattao sadiay. Iti sadinoman a nakigubatanna, nagballigi babaen iti tulong ni Yahweh.

15 Inturayan ni David ti entero nga Israel. Impatungpalna ti linteg ket inkagumaanna a maipakat ti hustisia iti amin nga iturayanna.

16 Ni Joab nga anak ni Zeruyas ti pangulo ti armada. Ni Jehosafat nga anak ni Ahilud ti para-aywan kadagiti listaan.

17 Ni Zadok nga anak ni Ahitub ken ni Ahimelec nga anak ni Abiatar ti nagserbi a papadi. Ni Seraias ti sekretario iti palasio.

18 Ni Benaias nga anak ni Jehoyada ti pangulodagiti personal a guardia ni David. Nagserbi met a papadi dagiti annak ni David.

Ni David ken ni Mefiboset

1 Itinaminsan, sinaludsod ni David, “Adda ngata pay sibibiag a kabagian ni Saul? Kayatko nga ipakita ti asik kenkuana gapu ken ni Jonatan.”

2 Adda idi maysa nga adipen iti familia ni Saul nga agnagan iti Siba. Naibaga kenkuana a dumatag ken ni David, ket idi napan, sinaludsod ti ari no isu ni Siba.

“Wen, apo,” insungbat ni Siba, “siak ti nanumo nga adipenmo.”

3 Sinaludsodti ari kenkuana, “Adda kadi pay sibibiag iti familia ni Saul? Kayatko a maipakitak kenkuana ti kinapudno ken kinaimbagko kas inkarik iti Dios.”

Simmungbat ni Siba, “Adda pay la maysa kadagiti annak ni Jonatan, ngem pilay.”

4 “Sadino ti ayanna?” sinaludsod ti ari.

“Adda idiay Lodebar, iti balay ni Makir nga anak ni Ammiel,” insungbat ni Siba.

5 Iti kasta, pinaayaban ni Ari David.

6 Idi sumangpet ni Mefiboset nga anak ni Jonatan ken apoko ni Saul, nagpakleb iti sangoanan ni David a mangipakita iti panagraemna.

Sinaludsod ni Ari David, “Sika kadi ni Mefiboset?”

“Wen, apo,” insungbat ni Mefiboset. “Siak ti nanumo nga adipenmo.”

7 “Dika agbuteng,” kinuna ni David. “Ipakitak ti kinaimbagko kenka gapu ken ni Jonatan nga amam. Isublik ti amin a daga a kukua daydi apongmo a Saul, ket awisenka a makipangan kaniak iti agnanayon.”

8 Nagpakleb manen ni Mefiboset sana kinuna, “Apay a naimbagkay unay kaniak, apo? Mayarigak la iti natay nga aso nga awan serserbina.”

9 Pinaayaban ni David ni Siba nga adipen ni Saul. Kinunana kenkuana, “Itedkon ken ni Mefiboset ti amin a kukua daydi Saul ken ti familiana.

10 Dakayo ngarud kadagiti annak ken adipenmo, ti mangtalon iti daga ket itedyo ti amin nga apit iti familiana. Nupay kasta, kanayonto a makilanglang kaniak ni Mefiboset.” (Sangapulo ket lima a lallaki ti annak ni Siba ken 20 ti adipenna.)

11 “Aramidek amin nga ibilinmo,” insungbat ni Siba.

Manipud idin, nakilanglang ni Mefiboset iti lamisaan ti aria kas maysa kadagiti annakna.

12 Adda agtutubo nga anak ni Mefiboset nga agnagan iti Mica. Nagbalin nga adipen ni Mefiboset dagiti amin a kameng ti familia ni Siba.

13 Nagnaed ngarud idiay Jerusalem ni Mefiboset a pilay ti dua a sakana, ket nangan iti lamisaan ti ari iti unos ti panagbiagna.

Parmeken ni David dagiti Ammonita ken dagiti Taga-Siria

1 Iti saan a mabayag, natay ni Naas nga ari ti Ammon. Ni Hanun nga anakna ti simmukat kenkuana a kas ari.

2 Kinuna ni Ari David, “Masapul nga ipakitak ti napudno a pannakigayyemko ken ni Hanun, kas iti impakita kaniak daydi amana.”

Nangibaon ngarud ni David kadagiti tattaona a mangidanon iti pannakipagladingitna ken ni Hanun gapu iti ipapatay ti amana.

Idi dumteng dagiti naibaon,

3 kinuna dagiti papangulo nga Ammonita iti ari, “Mamatika kadi nga imbaon ni David dagitoy a tattao tapno yebkasda ti pannakipagladingitda gapu iti ipapatay ni amam? Imbaonna ida ditoy a kas espia tapno siimenda ti siudad ket maparmeknatayo!”

4 Pinatiliw ni Hanun dagiti imbaon ni David, kiniskisanna ti maysa a bangir ti barbasda, pinutedna dagiti pagan-anayda agingga iti patongda sana pinagawid ida.

5 Gapu iti bainda, saanda a nagawid. Idi maipadamag ken ni David ti napasamak kadakuada, pinaibagana kadakuada nga agyanda idiay Jerico agingga nga agtubo manen dagiti barbasda.

6 Nabigbig dagiti Ammonita a nagbalin a kabusorda ni David gapu ti inaramidda. Isut’ gapuna a nangtangdanda iti duapulo a ribu a mannakigubat a Siriano manipud iti Berehob ken Soba, agraman 12,000 a soldado manipud Tob ken ti ari ti Maaca agraman ti sangaribu a soldadona.

7 Nadamag daytoy ni David, ket imbaonna ti entero nga armadana nga impanguloan ni Joab a manggubat kadakuada.

8 Rimmuar dagiti Ammonita ket nagpuestoda iti pagserkan iti Raba, ti kangrunaan a siudad. Nagpuesto met dagiti mannakigubat ti Siria ken dagiti soldado ti Tob, kasta met ken ni Maaca iti patad.

9 Nakita ni Joab a dumarup dagiti kabusor iti sangoanan ken iti likudanna. Iti kasta, pinilina dagiti kalaingan a mannakigubat ti Israel ket impuestona ida a sumango kadagiti Siriano.

10 Inkabilna dagiti dadduma a soldadona iti babaen ni Abisai a kabsatna, ket impasangona ida a sumaranget kadagiti Ammonita.

11 Kinuna ni Joab ken ni Abisai, “No makitam a saanmi a kabaelan dagiti taga-Siria, umaynak tulongan. No makitak met a diyo kabaelan dagiti Ammonita, umayka met tulongan.

12 Tumuredkayo. Makigubattayo a sipipinget gapu iti pagiliantayo ken kadagiti siudad ti Diostayo. Maaramid koma ti pagayatan tiApo.”

13 Dimmarup ni Joab ken dagiti soldadona ket nagtataray dagiti Siriano.

14 Idi makita dagiti Ammonita nga agtatarayda, intarayanda met ni Abisai sada simrek iti siudad. Kalpasan ti pannakigubat ni Joab kadagiti Ammonita, nagsubli idiay Jerusalem.

15 Nabigbig dagiti taga-Siria a pinarmek idan dagiti Israelita. Iti kasta, inummongda dagiti amin a buyotda.

16 Pinaayaban ni Ari Adadezer dagiti Siriano nga adda iti ballasiw ti Karayan Eufrates, napanda idiay Helam babaen iti panangipangulo kadakuada ni Sobac a pangulo ti armada ni Adadezer.

17 Idi madamag daytoy ni David, inummongna dagiti mannakigubat nga Israelita, binallasiwda ti Karayan Jordan ket napanda idiay Helam. Nagpuesto dagiti Siriano a mangsaranget kenkuana. Nangrugi ti gubat,

18 ket pinagtaray dagiti Israelita dagiti mannakigubat a taga-Siria. Pinatay ni David ken dagiti soldadona ti pito gasut a mangiturturong kadagiti lugan a pakigubat ken 40,000 a nagkabalio. Nasugatan ni Sobac a pangulo dagiti kabusor, ket natay iti paggugubatan.

19 Idi makita dagiti ari a pasurot ni Adadezer a pinarmek idan dagiti Israelita, nakikappiada ket pinaiturayanda kadagiti Israelita. Manipud idin, nagbuteng dagiti taga-Siria a tumulong kadagiti Ammonita.

Ni David ken ni Batseba

1 Idimangrugi ti tawen, iti tiempo a mapan makigubat dagiti ari, imbaon ni David ti armada ti Israel. Babaen iti panangipangulo ni Joab ken dagiti ofisialesna, pinarmekda dagiti Ammonita ket linakubda ti siudad ti Rabba. Ngem nagbati ni David idiay Jerusalem.

2 Iti maysa a mumalem, kalpasan ti pannaturog ni David immuli iti tuktok ti palasio ket nagpagnapagna. Manipud iti ayanna, natannawaganna ti maysa a babai nga agdigdigos. Nakapimpintas ti babai.

3 Nangibaon ngarud iti mapan mangdamag no siasino ti babai. Naammoanna nga isu ni Batseba nga anak ni Eliam ken asawa ni Urias a Jeteo.

4 Pinaala ni David ni Batseba. Indatag dagiti naibaon ti babai kenkuana ket kinaiddana. (Kalkalpas ni Batseba a nangannong iti binulan a seremonia ti pannakadalusna gapu iti panagreglana.) Kalpasan ti panagkaiddada iti ari, nagawid ni Batseba.

5 Nagsikog ni Batseba, isu a nangibaon iti mangibaga iti kasasaadna ken ni David.

6 Dinagdagus a pinaibaga ni David ken ni Joab a pagawidenna ni Urias a Jeteo ket imbaon ngarud ni Joab ni Urias a mapan iti ari.

7 Idi sumangpet ni Urias, nagdamag ni David maipapan ken ni Joab ken ti buyot ken no ania ti kasasaad ti gubat.

8 Kinunana pay ken ni Urias, “Agawidkan ta aginanaka bassit.”

Kalpasan ti ipapanaw ni Urias, pinatulodan ni David iti maysa a sagut idiay balayna.

9 Ngem saan a nagawid ni Urias. Naturog ketdi iti ruangan ti palasio iti ayan dagiti guardia ti ari.

10 Naammoan ni David a saan a nagawid ni Urias ket sinaludsodna kenkuana, “Apay a dika agawid? Nabayag nga awanka iti balaymo.”

11 Simmungbat ni Urias, “Adda dagiti soldado ti Israel ken Juda iti paggugubatan, ket adda met kadakuada ti Lakasa ti Tulag. Adda ni Joab a pangulok ken dagiti ofisialesna nga agkamkampo iti tay-ak. Kasano nga agawidak a mangan ken uminum ket kaiddaek ti asawak? Isapatak iti nagan dagiti amin a nasagradoan a banag a diak maaramid daytoy.”

12 Kinuna ni David ken ni Urias, “Agyanka pay ditoy ita nga aldaw ket palubosankanto nga agawid inton bigat.” Ngarud, nagtalinaed ni Urias idiay Jerusalem iti dayta nga aldaw. Iti sumuno nga aldaw,

13 inawis ni David a makipangan kenkuana ket binartekna. Ngem saan manen a nagawid ni Urias. Iti dayta a rabii, inyaplagna ti ulesna ket naturog iti kuarto dagiti guardia iti palasio.

14 Kabigatanna, nagsurat ni David ken ni Joab, ket impaw-itna ken ni Urias.

15 Kastoy ti linaon ti surat: “Ibaonmo ni Urias iti paggugubatan, iti disso a kapigsaan ti gubat. Kalpasanna, agsanudkayo ket baybay-anyo a matay.”

16 Ngarud, bayat ti pananglakub ni Joab iti siudad, imbaonna ni Urias iti disso nga ammona a napigsa dagiti kabusor.

17 Rimmuar dagiti kabusor ket nakirangetda kadagiti soldado ni Joab. Natay ti sumagmamano kadagiti ofisiales ni David, agraman ni Urias.

18 Nangibaon ni Joab iti mangipadamag ken ni David maipapan iti amin a mapaspasamak iti gubat.

19 Binilinna ti naibaon: “Inton maipadamagmon iti ari ti amin a banag maipapan iti gubat,

20 nalabit nga agpungtotto ket kunananto kenka, ‘Apay a nakirangetkayo kadakuada iti asideg ti siudad? Diyo kad ammo nga agibiatda manipud kadagiti bakud?

21 Diyoaya malagip no kasano a natay ni Abimelec nga anak ni Gideon? Idiay Tebez, adda babai a nangipuruak iti gilingan a bato manipud iti tuktok ti bakud; natupakan ni Abimelec ket natay. Apay nga immasidegkay iti bakud?’ Kastoyto ti isungbatmo: ‘Natay met ni Urias nga ofisialmo.’”

22 Napan ti naibaon ket imbagana ken ni David ti imbilin ni Joab.

23 Kinunana, “Nabilbileg dagiti kabusor ngem dakami, ket rimmuarda iti siudad a makirupak kadakami iti tay-ak. Ngem pinagsanudmi ida agingga iti ruangan ti siudad.

24 Manipud iti tuktok ti bakud, pinanadakami ket natay ti sumagmamano kadagiti ofisialesmo agraman ni ofisialmo nga Urias.”

25 Kinuna ni David iti naibaon, “Papigsaem ti nakem ni Joab. Ibagam kenkuana a saan a mariribuk ta awan ti makaammo no siasino ti matay iti paggugubatan. Ibagam kenkuana a mangisagana iti nabilbileg nga armada a mangdarup iti siudad ket sakupenyo.”

26 Idi madamag ni Batseba a napapatay ti asawana, dinung-awanna.

27 Apaman a nalpas ti tiempo a panangdung-awna iti asawana, pinaala ni David ni Batseba, ket nagbalin nga asawana. Nagpasngay ni Batseba iti lalaki. Ngem saan a naragsakan ni Yahweh iti inaramid ni David.

Ti Mensahe ni Natan ken ti Panagbabawi ni David

1 Imbaonni Yahweh ni profeta Natan ken ni David. Napan ni Natan ken ni David ket imbagana, “Adda dua a lallaki nga agnaed iti maymaysa nga ili. Ti maysa nabaknang ket ti maysa napanglaw.

2 Adu ti baka ken karnero ti baknang,

3 idinto ta maymaysa nga urbon ti karnero ti napanglaw, a ginatangna. Tinarakenna ti karnero ket dimmakkel iti balayna a kadua dagiti annakna. Imbilangna ti karnero a kas anakna a babai. Pakanenna iti bukodna a taraon, painumenna iti bukodna a kopa ken masansan a saklotenna.

4 Iti naminsan, adda dimteng a sangaili ti baknang ngem dina kayat a partien ti maysa kadagiti animalna nga ipasango iti sangailina. Innalana ketdi ti karnero ti napanglaw ket pinartina nga impasango iti sangailina.”

5 Kasta unay ti pungtot ni David iti nabaknang ket kinunana, “Isapatak iti nagan tiApoa sibibiag a masapul a mapapatay ti kasta a tao!

6 Masapul a bayadanna iti mamimpat ti kaadu ti innalana gapu iti dakes nga inaramidna.”

7 Kinuna ni Natan ken ni David: “Sika dayta a tao! Kastoy ti kuna tiApoa Dios ti Israel, ‘Pinagbalinka nga ari ti Israel, ket inispalka iti pannakabalin ni Saul.

8 Intedko kenka ti pagarianna ken dagiti assawana. Pinagbalinka nga ari ti Israel ken Juda. No saan pay a makaanay daytoy, dinoblek pay koma ti itedko kenka.

9 Apay a sinukirmo dagiti bilinko? Apay nga inaramidmo daytoy a kinadakes? Pinapapataymo ni Urias iti paggugubatan. Impalubosmo a papatayen dagiti Ammonita, ket kalpasanna, innalam ti asawana!

10 Ita, gapu ta sinukirnak ket innalam ti asawa ni Urias, kanayonto nga adda matay iti kampilan nga agtaud iti kaputotam.

11 Isapatakkenka a pataudekto ti maysa iti bukodmo a familia a mangyeg iti riribuk kenka. Alaekto dagiti assawam ket itedko ida iti sabali a tao. Kaiddaennanto ida uray iti tengnga ti aldaw.

12 Nagbasolka iti nalimed, ngem ipalubosko a maaramid daytoy iti tengnga ti aldaw tapno makita dagiti amin nga Israelita.’”

13 Kinuna ni David, “Nagbasolak itiApo.”

Simmungbat ni Natan, “Pakawanennaka tiApoiti basolmo; saanka a matay.

14 Ngem gapu ta sinukirmo tiApo, matayto ti agbalin nga anakmo.”

15 Kalpasanna, nagawid ni Natan.

Matay ti Anak ni David

Kas kinuna ni Yahweh, nagsakit iti nakaro ti anak ni David nga impasngay ni Batseba nga asawa ni Urias.

16 Nagkararag ni David iti Dios tapno umimbag ti ubing. Saan a nangan iti uray ania, ket tunggal rabii mapan iti kuartona ket agpatpatnag nga agid-idda iti datar.

17 Napan dagiti ofisiales iti palasiona ket pinadasda a pabangonen ngem dina kinayat. Saanna a kayat ti makilanglang kadakuada.

18 Kalpasan ti makadomingo, natay ti ubing, ket mabuteng dagiti ofisiales a mangipadamag kenkuana. Kinunada, “Idi sibibiag pay ti ubing, dinatay impangag ni David no kasaotayo. Kasano ti panangibagatayo kenkuana a natayen ti ubing? Amangan no makapanunot nga agaramid iti dakes.”

19 Idi madlaw ni David nga agiinnarasaasda, ammona a natayen ti ubing. Iti kasta, sinaludsodna kadakuada, “Natay kadin ti ubing?”

“Wen, apo, natayen,” insungbatda.

20 Bimmangon ni David, nagdigos, nagsagaysay ken sinukatanna ti pagan-anayna. Napan iti balay ni Yahweh ket nagdaydayaw sadiay. Nagsubli iti palasio, dimmawat iti taraon, ket nangan.

21 Kinuna dagiti ofisialesna, “Dimi maawatan daytoy. Idi sibibiag pay ti ubing, sinangsangitam ket dika nangnangan. Ngem apaman a natay, bimmangonka ket nanganka.”

22 “Wen,” kinuna ni David. “Idi sibibiag pay ti ubing, nagayunarak ket nagsangsangitak idi bareng no kaasiannak tiApoket paimbagenna ti anakko.

23 Ngem ita ta natayen ti ubing, apay pay la nga agayunarak? Mapagbiagko pay kadi ti ubing? Addanto aldaw a sumarunoak kenkuana iti ayanna ngem pulos a dinton agsubli kaniak.”

Mayanak ni Solomon

24 Liniwliwa ni David ni Batseba ket nagkaiddada nga agassawa. Nagpasngay ni Batseba iti lalaki a pinanaganan ni David iti Solomon. Inay-ayat ni Yahweh ti ubing,

25 ket binilinna ni profeta Natan a panagananna ti ubing iti Jedidia,agsipud ta inay-ayat ni Yahweh ti ubing.

Sakupen ni David ti Rabba

26 Kabayatanna, intultuloy ni Joab ti pananggubatna iti Rabba, ti kangrunaan a siudad ti Ammon. Idi dandanina masakup ti Rabba,

27 nangibaon kadagiti mapan mangibaga ken ni David iti daytoy, “Dinarupko ti Rabba ket sinakupko ti paggapuan ti danum ti siudad.

28 Ummongem ngarud dagiti amin a soldadom, darupenyo ti siudad ket sakupenyo. Diak kayat a siak ti maidayaw iti pannakasakupna.”

29 Inummong ngarud ni David dagiti amin a soldadona. Napan idiay Rabba, dinarupna ket nagballigi a nangparmek iti siudad.

30 Adda balitok a korona ni Molec a dios dagiti Ammonita. Agdagsen iti 75 a libra ti korona, ken napattokan iti napateg a bato. Innala ni David ti napateg a bato ket inkabilna iti koronana. Adu ti sinamsamna iti siudad.

31 Pinagtalawna dagiti umili iti siudad; adda dagiti pinagtrabahona a kas kantero, mammanday ken karpintero, ket adda met dagiti pinilitna nga agaramiditi ladrilio. Kastoy ti inaramidna kadagiti tattao iti amin nga ili ti Ammon. Kalpasanna, nagsubli ni David ken dagiti amin a soldadona idiay Jerusalem.

Ni Amnon ken ni Tamar

1 Adda napintas a babai a kabsat ni Absalom nga anak ni David. Isu ni Tamar. Nagayat kenkuana ni Amnon a maysa kadagiti annak ni David iti sabali a babai.

2 Kasta unay ti panagayatna kenkuana, ket urayna la insaksakit, ta narigat a matagikuana ni Tamar. Kas maysa a birhen, saan a mapalubosan a makilangen iti lalaki.

3 Ngem adda gayyem ni Amnon nga agnagan iti Jonadab nga anak ni Samma a kabsat ni David. Nasikap unay ni Jonadab.

4 Kinuna ni Jonadab ken ni Amnon, “Anaknaka ti ari, ngem apay nga inaldaw a makitaka a malmalday?”

“Agayatak unay ken ni Tamar a kabsatko iti ama ken kabsat ni Absalom,” insungbat ni Amnon.

5 Kinuna ni Jonadab ken ni Amnon, “Agiddaka iti katre ket aginsasakitka. Inton umaynaka sarungkaran ni amam, ipakpakaasimto kenkuana nga ibaonna ni Tamar tapno ilutoannaka iti kankanen. Kayatmo a makita ti panaglutona ket dawatem pay nga isu ti mangsubo kenka.”

6 Naginsasakit ngarud ni Amnon ket napan nagidda.

Sinarungkaran ni Ari David ni Amnon. Kinuna ni Amnon kenkuana, “Pangngaasim ta ibagam nga umay ditoy ni Tamar tapno yaramidannak iti kankanen. Kayatko a makita ti panaglutona ket isu metten ti mangpakan kaniak.”

7 Iti kasta, pinaibaga ni David ken ni Tamar, “Inka iti balay ni Amnon, ket isaganaam iti kanenna.”

8 Napan ni Tamar ket nadanonna ni Amnon a nakaidda. Nangala iti arina sana linuto sadiay a makitkita ni Amnon.

9 Kalpasanna, innalana ti pariok, inadawna dagiti kankanen sana impasango ken ni Amnon. Ngem madi a mangan ni Amnon. Binilinna ni Tamar a paruarenna dagiti adda iti kuarto. Idi nakapanawda aminen,

10 kinunana iti kabsatna, “Yegmo dagiti kankanen ditoy katrek ket suboannak.” Innala ni Tamar dagiti kankanen ket inyasidegna ida ken ni Amnon.

11 Ngem idi yawatna dagiti kankanen, ginammatan ni Amnon sana kinuna, “Umayka ta agkaiddata.”

12 “Saan,” insungbat ni Tamar, “dinak piliten; ta naalas nga aramid dayta. Saan a maipalubos iti entero nga Israel.

13 Anianto pay ti rupak iti publiko? Ket sika, mamimpinsan a maibabainkanto iti Israel. Pangngaasim ta kasaom ti ari. Ammok a saan nga agkedked ti panagasawata.”

14 Ngem dina impangag ni Tamar ket gapu ta napigpigsa ngem isu, impaiddana sana rinames.

15 Kalpasan ti panangramesna ken ni Tamar, rimsua ti napalalo a gurana iti babai. Nakarkaro ti gurana ngem ti nariknana a panagayatna idi kenkuana. “Pumanawkan!” kinunana kenkuana.

16 “Saan,” insungbat ni Tamar. “Dakdakkel a basol ti panangpapanawmo kaniak ngem ti panangramesmo kaniak.”

Ngem saan nga impangag ni Amnon ni Tamar.

17 Inayaban ni Amnon ti adipenna sana kinuna, “Paruarem daytoy a babai samo balunetan ti ruangan.”

18 Pinapanaw ti adipen ni Tamar sana binalunetan ti ruangan.

Siaarruat idi ni Tamar iti kawes nga atiddog ti manggasnati kawes ti saan pay a naasawaan a prinsesa kadagidi nga aldaw.

19 Winarakiwakan ni Tamar ti ulona iti dapu. Rinay-abna ti kawesna sana intakkab ti imana iti rupana ket agsangsangit a nagawid.

20 Idi makita ni Absalom a kabsatna, sinaludsodna, “Pinilitnaka kadi ni Amnon? Pangngaasim ta dika unay agladingit. Agulimekka laengen ta kabsatmo iti ama.” Nagyan ngarud ni Tamar nga agladladingit iti balay ni kabsatna.

21 Kasta unay ti pungtot ni Ari David idi madamagna ti amin a napasamak. Ngem dina kayat a dusaen ni Amnon agsipud ta inauna nga anakna ket ay-ayatenna unay.

22 Kasta unay met ti gura ni Absalom ken ni Amnon gapu iti inaramidna ket manipud idin, saannan a kinasasao ti kabsatna.

Agibales ni Absalom

23 Napalabas ti dua a tawen. Iti maysa nga aldaw a pappapukisan ni Absalom dagiti karnerona idiay Baal Hazor iti asideg ti Efraim, inawisna dagiti amin a lallaki nga annak ti ari.

24 Dimmatag ni Absalom ken ni Ari David. “Natan-ok nga Ari, pappapukisak dagiti karnerok,” kinunana. “Pangngaasim ta umayka agraman dagiti ofisialesmo.”

25 “Saan, anakko,” insungbat ni David. “Adu unayen a pakaringgoram no umaykam amin.” Pinilit ni Absalom, ngem kaskasdi a madi ti ari, ket dinawatna nga agawid ti anakna.

26 Kinuna ni Absalom, “No dikayo makaumay, dumar-ay koma ngarud ni Amnon.”

“Apay a masapul a dumar-ay?” sinaludsod ti ari.

27 Ngem sipapasnek ni Absalom a nagawis, isut’ gapuna a pinalubosan ti ari ni Amnon ken dagiti dadduma a prinsipe a kumuyog kenkuana.

Nangisagana ni Absalom iti padaya a maikari iti maysa nga ari.

28 Binilinna dagiti adipenna, “Urayenyo a mabartek ni Amnon. Inton kasta unayen ti bartekna, patayenyon. Awan ti pagbutnganyo; siak ti akimbilin iti daytoy. Papigsaenyo ti nakemyo ket dikay agsarimadeng.”

29 Tinungpal dagiti adipen ti bilin ni Absalom, ket pinatayda ni Amnon. Ngarud, dinagdagus dagiti annak ti ari ti naglibas a nakasakay kadagiti muloda.

30 Adda pay laeng dagiti annak ti ari iti dalan idi naipadamag ken ni David a pinatay ni Absalom dagiti amin nga annakna.

31 Timmakder ti ari, rinay-abna ti pagan-anayna ket nagpakleb iti daga. Rinay-ab met dagiti amin nga adipenna nga adda sadiay dagiti pagan-anayda.

32 Ngem kinuna ni Jonadab nga anak ni Samma a kabsat ni David, “Natan-ok nga Ari, saanda a pinapatay dagiti amin nga annakmo. Ni la Amnon ti natay. Naikeddengen ni Absalom ti panangpapatayna ken ni Amnon manipud pay panangrames ni Amnon ken ni Tamar a kabsatna.

33 Ngarud, dimo koma patpatien ti damag a natay dagiti amin nga annakmo. Ni la Amnon ti napapatay.”

34 Kabayatanna, nakalibas ni Absalom.

Apag-isu met a kumita ti guardia, ket naimatanganna ti maysa a bunggoy ti tattao a sumalsalog iti turod manipud iti dalan nga agpa-Horonaim.Napan iti ari ket imbagana ti nakitana.

35 Kinuna ni Jonadab ken ni Ari David, “Adtoyen a sumangpet dagiti annakmo kas imbagak.”

36 Apaman a naisaona daytoy, dimteng dagiti annak ti ari ket nagsasangitda. Nagsangit met iti nasaem ni David ken dagiti ofisialesna.

37-38 Nagtalawni Absalom ket nagkamang ken ni Talmai nga anak ni Amiud nga ari ti Gesur. Tallo a tawen a nagyan sadiay. Nabayag a dinung-awan ti ari ni Amnon.

39 Idi nailiwliwagen ti ari ti ipapatay ni Amnon, simken ti iliwna ken ni Absalom nga anakna.

Ipamuspusan ni Joab ti Panagsubli ni Absalom

1 Ammo ni Joab nga anak ni Zeruyas a mailiw unay ni Ari David ken ni Absalom.

2 Pinaayabanna ngarud ti maysa a masirib a babai nga agnaed idiay Tekoa. Idi sumangpet ti babai, kinuna ni Joab kenkuana, “Agpaneska ket agparangka a kasla nagminatay. Bay-am a kusokuso ti buokmo. Ipakitam a kasla nabayagen nga agdungdung-awka.

3 Kalpasanna, inka iti ari ket ibagam kenkuana ti ibagak kenka.” Imbaga ni Joab no ania ti sawen ti babai.

4 Dimmatag ti babai ken ni David, nagpakleb iti daga a mangipakita iti panagraemna kenkuana. Kinunana, “Tulongannak kadi, Natan-ok nga Ari.”

5 “Ania ti masapulmo?” sinaludsod ti ari.

“Natan-ok nga Ari, maysaak a napanglaw a balo,” kinuna ti babai.

6 “Adda dua nga annakko a lallaki. Iti naminsan nga addada iti away, nagapada. Awan ti naganawa kadakuada ket pinatay ti maysa ti kabsatna.

7 Ita, apo ari, nagmaymaysa dagiti kakabagiak a bimmusor kaniak. Kayatda nga alaen ti anakko tapno papatayenda met gapu iti panangpapatayna iti kabsatna. No patayenda ti anakko, sisiak laeng ti mabati. Pukawenda ti kakaisuna a namnamak ti biag; awan ti mabati a kaputotan ti asawak tapno mataginayon ti naganna.”

8 “Agawidkan,” kinuna ti ari. “Siak ti makaammo iti dayta.”

9 “Natan-ok nga Ari,” kinuna ti babai, “no aniaman ti aramidem, siak ken ti familiak ti akimbasol. Saan koma nga agbasol ti ari ken ti familiana.”

10 Kinuna ti ari, “No adda pay mangbutbuteng kenka, yamangmo kaniak ket dinakanto ringringgorenen.”

11 “Natan-ok nga Ari,” kinuna ti babai, “ikararagmo koma itiApoa Diosmo a saan nga ituloy dagiti kabagiak ti panggepda nga agibales ket patayenda ti anakko. Ta no ituloyda ti panggepda, makaaramidda iti nadagdagsen a basol.”

“Isapatak iti nagan tiApoa sibibiag nga awan ti pakaan-anoan ti anakmo,” insungbat ti ari.

12 Intuloy ti babai, “Adda pay koma ibagak, Natan-ok nga Ari.”

“Ibagam latta,” kinuna ti ari.

13 Kinuna ti babai ken ni David, “Apay nga inaramidmo ti kasta a kinadakes kadagiti tattao ti Dios? Saanmo nga impalubos nga agsubli ti anakmo. Ket inukommo ti mismo a bagim babaen iti saom.

14 Mataytayto amin; arigtay iti danum a saanen a maurnong kalpasan ti pannakaibuyatna. Uray ti Dios dina pasublien ti biag dagiti natay, ngem maipamuspusan ti ari a pasublien ti anakna a napagtalaw.

15 Immayko imbaga daytoy kenka, Natan-ok nga Ari, agsipud ta binutbutengdak dagiti tattao. Napanunotko a no ipudnok daytoy kenka, mabalin a dumngegka ket tulongannak.

16 Impagarupko nga ipangagnak ket ispalennak iti agpanggep a mangpatay kadakami nga agina tapno maisinakami a dua iti Israel ken iti impatawid ti Dios kadagiti tattaona.

17 Kinunakpay iti bagik a natalgedakto gapu iti karim, apo. Ngamin, mayarig ti ari iti anghel ti Dios ket mapaggiddiatna ti naimbag ken dakes.Sapay koma ta adda kenka tiApoa Diosmo.”

18 Simmungbat ti ari, “Agsaludsodak kenka, ket ibagam ti pudno.”

“Wen, Natan-ok nga Ari,” kinuna ti babai, “agsaludsodka latta.”

19 Sinaludsod ti ari iti babai, “Sinugsogannaka kadi ni Joab?”

Simmungbat ti babai, “Isapatak iti nagan dagiti amin a nasagradoan a banag a diak mabalin a liklikan a sungbatan ti saludsodmo. Wen, pudno a ni ofisialmo a Joab ti nangisuro iti amin nga aramiden ken sawek.

20 Ngem inaramidna daytoy tapno marisut daytoy a parikut. Natan-ok nga Ari, masiribka a kas iti anghel ti Dios ket ammom amin a mapaspasamak iti daga.”

21 Kalpasanna, kinuna ti ari ken ni Joab, “Inkeddengko nga aramiden ti kayatmo a maaramid. Inka alaen ni agtutubo nga Absalom, ket yegmo ditoy.”

22 Nagrukob ni Joab iti daga iti sangoanan ni David kas panangipakitana iti panagraemna. Kinunana, “Bendisionannaka koma ti Dios, Natan-ok nga Ari. Ita, ammok a nagun-odko ti panagtalekmo gapu ta pinatgam ti nanumo a dawatko.”

23 Dinagdagus ni Joab ti napan idiay Gesur ket inyawidna ni Absalom idiay Jerusalem.

24 Ngem imbilin ti ari a saan nga agyan ni Absalom iti palasio. Kinunana, “Diak kayat a makita ti rupa ni Absalom.” Iti kasta, nagnaed ni Absalom iti balayna ket saan a dimmatag iti ari.

Agkinnaawatan da Absalom ken David

25 Iti entero nga Israel, awan lalaki a nalatlatak ngem ni Absalom gapu iti kinataerna. Awan pamilawan kenkuana manipud ulo agingga iti dapanna.

26 Nakapuspuskol unay ti buokna, ket masapul a putdanna iti maminsan iti makatawen ta nadagsen unay no umatiddog. Agdagsen iti agarup lima a libra iti timbangan ti ari.

27 Uppat ti annak ni Absalom—tallo a lallaki ken maysa a babai nga agnagan iti Tamar a nakapimpintas.

28 Dua a tawen a nagyan ni Absalom idiay Jerusalem ket pulos a dina nakita ti ari.

29 Kalpasanna, pinaayaban ni Absalom ni Joab tapno ibaonna a makisao iti ari, ngem madi ni Joab a mapan ken ni Absalom. Pinaayabanna manen ngem dina kayat ti mapan kenkuana.

30 Daytoy ti gapuna a kinuna ni Absalom kadagiti adipenna, “Inkayo puoran ti talon ni Joab. Agabay ti talonmi ket namulaan iti sebada.” Napanda ngarud pinuoran ti talon.

31 Dinagdagus ni Joab ti napan iti balay ni Absalom ket kinunana kenkuana, “Apay a pinuoran dagiti adipenmo ti talonko?”

32 “Gapu ta saanka nga immay idi pinaayabanka,” insungbat ni Absalom. “Kayatko idi nga inka makisarita iti ari ket ibagam daytoy kenkuana: ‘Apay a pinaalanak pay laeng idiay Gesur? Nasaysayaat koma no nagyanak sadiay.’” Intuloy ni Absalom, “Inka iti ari ta ibagam a kayatko ti makisarita kenkuana. No kas pangarigan ta nagbasolak, nakasaganaak a mapapatay.”

33 Iti kasta, napan ni Joab ken ni Ari David ket imbagana ti sao ni Absalom. Pinaayaban ti ari ni Absalom. Idi dumatag ni Absalom, nagrukob iti sangoanan ni David. Inungngoan ti ari ti anakna a mangipakita iti panangawatna kenkuana.

Panggep ni Absalom ti Umalsa

1 Kalpasan daytoy, nangisagana ni Absalom iti bukodna a lugan a pakigubat ken kabkabalio agraman guardiana a 50 a lallaki.

2 Masapa a bumangon ket mapan agtakder iti asideg ti ruangan ti siudad. No lumabas ti maysa a tao nga addaan iti kaso a kayatna a parisut iti ari, ayabanna ket saludsodenna no taga-ano. Kalpasan ti panangibagana iti tribu a nagtaudanna,

3 kuna ni Absalom, “Makitak nga adda kalintegam, ngem awan ti pannakabagi ti ari a mangasikaso kenka.”

4 Ket inayonna, “No maysaak la koma nga ukom! Awatek ti siasinoman a dumatag kaniak nga addaan kaso wenno parikut ket kitaek a maikkan iti hustisia.”

5 No umasideg kenkuana ti tao tapno kumablaaw, arakupenna sana agkan.

6 Kastoy ti aramiden ni Absalom iti tunggal Israelita a mapan agdarum iti ari, ket nagun-odna ti panagtalekda kenkuana.

7 Uppata tawen ti napalabas. Kinuna ni Absalom ken ni Ari David, “Apo, pangngaasim ta palubosannak a mapan idiay Hebron tapno tungpalek ti sinapataak itiApo.

8 Idi addaak idiay Gesur iti Siria, inkarik itiApoa no makapagsubliak idiay Jerusalem, innakto agdaydayaw kenkuana idiay Hebron.”

9 “Inka ngarud,” kinuna ti ari. Iti kasta, napan ni Absalom idiay Hebron.

10 Ngem nangibaon kadagiti tattao a mapan iti amin a tribu ti Israel tapno ibagada daytoy, “Apaman a mangngegyo ti uni ti trumpeta ipukkawyo, ‘Nagbalin ni Absalom nga ari idiay Hebron!’”

11 Adda 200 a tattao nga inawis ni Absalom ket kimmuyogda kenkuana manipud idiay Jerusalem; pulos nga awan ti ammoda maipapan iti panggepna.

12 Bayat ti panagidatag ni Absalom kadagiti daton, nangibaon kadagiti mapan idiay Gilo tapno ayabanda ni Ahitofel, maysa kadagiti mamalbalakad ken ni David. Pimmigsa ti yaalsa ket immadu dagiti tattao ni Absalom.

Pumanaw ni David idiay Jerusalem

13 Idiay Jerusalem, simmangpet ti maysa a naibaon ket impadamagna ken ni David ti panangbigbig dagiti tattao ken ni Absalom a kas ari iti Israel.

14 Kinuna ni David kadagiti amin nga ofisialesna nga adda idiay Jerusalem, “Masapul a pumanawtayo a dagus. Agpeggadtayo no ditay itarayan ni Absalom. Agdardarastay amangan no makamakamnatayo; parmekennatayo ken papatayenna amin nga adda iti siudad.”

15 Insungbatda, “Natan-ok nga Ari, nakasaganakami a mangaramid iti aniaman nga ibagam.”

16 Iti kasta, pimmanaw ti ari a kinuyog ti familiana, ken dagiti ofisialesna. Nabati ti 10 kadagiti kamalalana a mangaywan iti palasio.

17 Idi makadanonda iti maudi a balay ti siudad, nagsardeng ti ari ken dagiti amin a kakaduana.

18 Nagtakderdagiti amin nga ofisialesna iti abayna bayat ti ilalabas iti sangoananna dagiti guardia ti palasio. Limmabas met dagiti 600 a soldado a naggapu idiay Gat a simmurot kenkuana.

19 Kinuna ti ari ken ni Ittai a panguloda, “Apay a sumurotka kadakami? Agsublika ket makipagyanka iti baro nga ari. Maysaka a ganggannaet a napagtalaw iti bukodmo a pagilian.

20 Nabiitka pay a nagnaed ditoy ket saan a masapul nga agalla-allaka a kas kadakami. Diak pay ammo no sadino ti papanak. Agsublika ket alaem dagiti kailiam. Sapay koma ta naasi ken napudno tiApokenka.”

21 Ngem kinuna ni Ittai, “Natan-ok nga Ari, isapatak kenka iti nagan tiApoa sibibiag, a sumurotak iti sadinoman a papanam uray pay pakatayak.”

22 “Nasayaat! Magnakayo ngaruden,” kinuna ti ari. Iti kasta, intuloy ni Ittai ti nagna agraman dagiti tattaona ken dagiti annakda.

23 Nagsangit dagiti umili iti napigsa idi pumanaw dagiti pasurot ni David. Binallasiw ti ari ti waig ti Kidron, agraman dagiti tattaona ket nagkukuyogda a nagturong iti let-ang.

24 Adda sadiay ni Zadok a padi; kaduana dagiti Levita a mangaw-awit iti nasagradoan a Lakasa ti Tulag. Indissodaket saanda a binagkat agingga a nakapanaw amin a tattao iti siudad. Adda met sadiay ni Abiatar a padi.

25 Pinaayaban ti ari ni Zadok ket kinunana kenkuana, “Isublim ti Lakasa ti Tulag iti siudad. No magun-odko ti parabur tiApo, addanto aldaw a palubosannak nga agsubli tapno makitak ti Lakasa ti Tulag ken ti pagyananna.

26 Ngem no saan, aramidenna latta ti kaykayatna kaniak.”

27 Kinuna pay ti ari ken ni Zadok, “Kitaem,agsublikayo a dua ken ni Abiatar a kaduayo ken ni Ahimaas nga anakmo ken ni Jonatan nga anakna. Agannadkayo!

28 Agyanak pay laeng iti pagballasiwan ti karayan iti let-ang ket urayek ti ipadamagmo.”

29 Innala da Zadok ken Abiatar ti Lakasa ti Tulag, nagsublida idiay Jerusalem ket nagyanda pay laeng sadiay.

30 Agsangsangit ni David a simmang-at idiay Bantay Olibo. Sakasaka ket naabungotan ti ulona kas mangipakita iti ladingitna. Siaabungot met dagiti amin a sumursurot kenkuana ket agsangsangitda met a simmang-at.

31 Idi naibaga ken ni Davida timmipon ni Ahitofel kadagiti immalsa nga impanguloan ni Absalom, inkararagna daytoy: “Pangngaasim, OApo, ta pagbalinem nga awan serserbi ti pammagbaga ni Ahitofel.”

32 Idi makadanon ni David iti tapaw ti turod, iti paset nga adda lugar a pagdaydayawan, sinabat ti matalek a gayyemna, ni Cusai nga Arkita. Naray-ab ti pagan-anay ni Cusai ken tapoktapok ti ulona.

33 Kinuna ni David kenkuana, “Awan maitulongmo no sumurotka kaniak.

34 Ngem matulongannak no agsublika iti siudad ket ibagam ken ni Absalom nga agserbika a sipupudno kenkuana a kas iti panagserbim kaniak nga amana. Aramidem amin a kabaelam a mangsuppiat iti aniaman a balakad ni Ahitofel.

35 Addanto sadiay da Zadok ken Abiatar a papadi. Ibagamto kadakuada ti amin a mangngegmo iti palasio.

36 Kaduada dagiti annakda, da Jonatan ken Ahimaas, ket isuda ti ibaonmonto a mangyeg kaniak iti damag.”

37 Napan ngarud ni Cusai a gayyem ni David idiay Jerusalem. Apag-isu a sumangpet idi ni Absalom iti siudad.