Month: March 2020

Maparmek dagiti Amorreo

1 Nadamag ni Adonisedec nga ari ti Jerusalema pinarmek ken dinadael ni Josue ti Ai sana pinapatay ti ari sadiay, kas iti inaramidna iti Jerico ken iti arina. Nadamagna pay a nakikappia dagiti taga-Gabaon kadagiti Israelita ket makipagnanaedda kadakuada.

2 Kasta unay ti buteng dagiti tattao ti Jerusalem gapu iti daytoy ta dakkel ti Gabaon a kas kadagiti siudad nga addaan iti ari, ket dakdakkel pay ngem ti Ai ken natutured dagiti soldadona.

3 Iti kasta, nagpaarayat ni Adonisedec kada Oham nga ari ti Hebron, Piram nga ari ti Jarmut, Jafia nga ari ti Lakis ken Debir nga ari ti Eglon.

4 Daytoy ti pinaibagana: “Umaydak tulongan a mangraut iti Gabaon, gapu ta nakikappia dagiti umili ken ni Josue ken kadagiti Israelita.”

5 Pinagtitipon dagitoy lima nga ari dagiti Amorreo dagiti soldadoda; linawlawda ti Gabaon sada rinaut.

6 Pinaibaga dagiti taga-Gabaon ken ni Josue iti kampo idiay Gilgal: “Dinakami baybay-an, apo! Umayka a dagus ket tulongannakami! Isalakannakami! Ta nagtitipon amin nga ari dagiti Amorreo iti katurturodan a pagilian a manggubat kadakami.”

7 Manipud Gilgal, nagrubbuat ni Josue ken ti armadana agraman dagiti kalaingan a soldadona.

8 Kinuna ni Yahweh ken ni Josue, “Saanka nga agbuteng kadakuada, ta intedko kenkan ti balligi. Awanto ti uray maysa kadakuada a makabael a sumaranget kenka.”

9 Nagpatnag a nagdaliasat ni Josue. Idi dumteng idiay Gabaon, kinellaatna a rinaut dagiti Amorreo.

10 Pinaglagaw ida ni Yahweh iti pinnakakitada iti armada ti Israel, ket pinapatay dagiti Israelita ida idiay Gabaon. Dinarundonda ida iti salogan ti Bessang Bet-horon, ket intuloyda ti nagpapatay kadakuada agingga iti abagatan, idiay Azeka ken Makeda.

11 Idi itartarayan dagiti Amorreo ti armada ti Israel iti Bessang, pinagtudo ni Yahweh iti yelo agingga idiay Azeka. Adu ti natay nga Amorreo. Ad-adu kadakuada ti natay iti yelo ngem ti pinapatay dagiti Israelita.

12 Iti dayta nga aldaw, idi pinagballigi ni Yahweh dagiti Israelita iti pannakirangetda kadagiti Amorreo, nakisao ni Josue kenkuana. Kinunana iti sango dagiti Israelita:

“Init, dika agkutkuti iti ngatoen ti Gabaon;

Bulan, agsardengka iti ngatoen ti tanap ti Aijalon.”

13 Saana naggaraw ti init ken ti bulan agingga a naparmek ti Israel ti amin a kabusorna. Nailanad daytoy itiLibro ni Jashar.Nagintek ti init iti tengnga ti tangatang, ket nagmalmalem a saan a limnek.

14 Sakbay daytoy wenno manipud iti daytoy nga aldaw, awan pay ti aldaw a kas itoy nga impangag ni Yahweh ti timek ti maysa a tao. Tinulongan ni Yahweh dagiti Israelita a nakigubat.

15 Nagsubli ni Josue ken ti amin a soldadona iti kampo idiay Gilgal.

Tiliwen ni Josue dagiti Lima nga Ari dagiti Amorreo

16 Ngem nakalibas dagiti lima nga ari dagiti Amorreo ket naglemmengda iti rukib idiay Makeda.

17 Adda nakasarak kadakuada ket naibaga ken ni Josue no sadino ti paglemlemmenganda.

18 “Mangitulidkayo kadagiti dadakkel a bato iti pagserkan ti rukib,” kinuna ni Josue, “ken mangikabilkayo kadagiti agguardia sadiay.

19 Ngem dikay agbayag sadiay; ituloyyo a kamaten dagiti kabusor, sunsonenyo ida iti likud. Diyo ipalubos a sumrekda kadagiti siudadda. Ta pinagballiginakayon tiApoa Diosyo; pinarmekyo idan.”

20 Pinapatay ida ni Josue ken dagiti Israelita, nupay adda sumagmamano a nagkamang iti uneg ti nasarikedkedan a siudadda.

21 Kalpasanna, nagsubli ti amin a soldado ken ni Josue iti kampoda idiay Makeda nga awan ti naan-ano kadakuada.

Awan ti siasinoman a tao iti daga a nakaitured nga agsao iti maibusor kadagiti Israelita.

22 Kinuna ni Josue, “Luktanyo ti rukib. Iruaryo dagiti lima nga ari ket idatagyo ida kaniak.”

23 Inruarda dagiti ari ti Jerusalem, Hebron, Jarmut, Lakis ken Eglon.

24 Idi addan dagiti ari iti sango ni Josue, inayabanna amin a mannakigubat, ket binilinna dagiti ofisiales a kaduana a nakigubat. Kinunana, “Umayyo baddekan dagiti tengnged dagitoy nga ari.” Nagtungpalda.

25 Kinuna manen ni Josue kadakuada, “Saankayo nga agbuteng wenno maupay. Pumigsa ken tumuredkayo, ta kastoyto ti aramiden tiApokadagiti amin a kabusoryo.”

26 Pinapatay ni Josue dagiti ari. Saggaysa nga imbitinna ida iti lima a kayo, ket sibibitinda sadiay agingga iti sumipnget.

27 Idi lumnek ti init, pinaibabana dagiti bangkay sana pinaipurruak dagitoy iti rukib a naglemmenganda. Iti ruangan ti rukib, naikabil dagiti dadakkel a bato nga adda pay laeng agpapan ita.

Sakupen ni Josue ti Ad-adu pay a Daga dagiti Amorreo

28 Iti dayta met la nga aldaw, rinaut ken pinarmek da Josue ti Makeda ken ti arina. Pinapatay da Josue dagiti amin a tattao iti siudad; awan ti nabati a sibibiag. Inaramidna iti ari ti Makeda ti kas iti inaramidna iti ari ti Jerico.

29 Kalpasan daytoy, napan rinaut da Josue ken dagiti soldadona ti Libna.

30 Inyawat ni Yahweh kadagiti Israelita daytoy a siudad ken ti arina. Pinatayda amin nga umili. Inaramid ni Josue iti ari ti Libna ti kas iti inaramidna iti ari ti Jerico.

31 Manipud Libna, nagturong da Josue ken dagiti soldadona idiay Lakis; linawlawda sada rinaut.

32 Iti maikadua nga aldaw ti gubat, inyawat ni Yahweh ti Lakis kadagiti Israelita. Kas iti inaramidda idiay Libna, awan ti uray maysa nga inispalda—pinatayda amin a tattao iti siudad.

33 Dimteng ni Horam nga ari ti Gezer tapno tulonganna ti Lakis. Pinarmek ni Josue ti ari ken dagiti tattaona. Awan ti inispalna kadakuada.

34 Manipud Lakis, napan ni Josue ken ti amin a soldadona idiay Eglon. Linawlawda sada rinaut.

35 Iti dayta met la nga aldaw, pinarmekda ti Eglon. Pinapatayda dagiti amin a tattao sadiay, kas iti inaramidda idiay Lakis.

36 Manipud Eglon, rinaut da Josue ken dagiti amin nga Israelita ti katurturodan ti Hebron.

37 Pinarmekda ti Hebron ket pinatayda ti ari ken ti amin nga agnaed iti siudad ken kadagiti kabangibang nga ili. Kas iti inaramid ni Josue idiay Eglon, dinadaelna a namimpinsan ti Hebron ket awan imbatida a sibibiag.

38 Kalpasanna, nagsubli ni Josue ken ti armadana ket dinarupda ti Debir.

39 Pinarmekda ti Debir agraman ti ari ken dagiti kabangibang nga ili. Pinatayda amin a tattao sadiay. Inaramid ni Josue iti Debir ken iti arina ti kas iti inaramidna idiay Hebron, Libna ken kadagiti arida.

40 Sinakup da Josue ti entero a daga. Pinarmekda dagiti ari ti katurturodan a pagilian, ti akindaya a bakras, akinlaud a puon ti bantay, kasta met dagiti natikag a tanap iti abagatan. Awan ti inispalda a biag; pinapatayna amin, ta daytoy ti bilin ni Yahweh a Dios ti Israel.

41 Pinarmekda amin ida manipud Kades Barnea agingga idiay Gaza, manipud iti entero a daga ti Gosen agingga idiay Gabaon.

42 Pinarmek ni Josue dagitoy nga ari. Sinakupna ti pagturayanda iti maysa la a rusuat ti gubat, gapu ta kadua ti Israel ni Yahweh a Diosna a nakigubat.

43 Kalpasan daytoy, nagsubli da Josue ken ti armadana iti kampo idiay Gilgal.

Maparmek ni Jabin ken dagiti Kakaduana nga Ari

1 Idi madamag ni Jabin nga ari ti Hasor ti panagballigi dagiti Israelita, pinakaammoanna ni Jobab nga ari ti Madon, dagiti ari ti Simron ken Acsaf,

2 dagiti ari ti katurturodan a pagilian iti amianan, iti Tanap ti Jordan nga abagatan ti Dan-aw ti Galilea, dagiti pagilian nga adda iti tanap ken iti igid ti baybay iti asideg ti Dor.

3 Pinakaammoanna met dagiti Cananeo iti agsumbangir ti Jordan, dagiti Amorreo, Heteo, Perezeo ken dagiti Jebuseo iti katurturodan a pagilian, ket uray pay dagiti Heveo nga agtaeng iti puon ti Bantay Hermon idiay Mizpa.

4 Dimtengda agraman dagiti amin a mannakigubatda—maysa nga armada a buklen ti adu a tattao a kas kaadu ti darat iti igid ti baybay. Adu ti kabalio ken luganda a pakigubat.

5 Pinagtitipon dagiti amin nga ari ti buyotda ket sangsangkamaysada a nagkampo iti Waig ti Merom tapno gubatenda ti Israel.

6 Kinuna ni Yahweh ken ni Josue, “Saanka nga agbuteng kadakuada. Inton bigat, iti kastoy nga oras, napapataykonton amin ida para iti Israel. Baldadoem dagiti kabalioda ket puoram dagiti luganda.”

7 Ngarud, kenellaat a rinaut ida ni Josue ken dagiti tattaona iti Waig ti Merom.

8 Pinagballigi tiApodagiti Israelita. Dimmarup dagiti Israelita ket kinamatda ida agingga iti amianan iti Dakkel a Sidon, ken iti Misrefot Mayim, ken agingga iti tanap ti Mizpa nga agpadaya. Saanda nga insardeng ti ranget agingga a nauloyan amin a kabusor.

9 Kas imbilin ni Yahweh, binaldado ni Josue dagiti kabalioda ken pinuoranna dagiti luganda a pakigubat.

10 Nagsubli ni Josue, ket pinarmekna ti Hasor sana pinatay ti ari sadiay. (Iti dayta a tiempo, ti Hasor ti kabibilgan kadagiti amin a pagarian.)

11 Pinatayda amin a tattaona; awan ti nabati a sibibiag. Pinuoranda ti siudad.

12 Pinarmek ni Josue amin dagitoy nga ari ken dagiti siudadda. Kas imbilin ni Moises nga adipen ni Yahweh, pinapapatayna ti tunggal maysa.

13 Nupay kasta, saan a pinuoran dagiti Israelita dagiti siudad a nabangon iti turod, malaksid ti Hasor a pinuoran ni Josue.

14 Innala dagiti Israelita dagiti amin a napapateg a banag ken dagiti animal kadagitoy a siudad, ket tinagikuada. Pinatayda amin a tattao—awan imbatida a sibibiag.

15 Inted ni Yahweh dagiti bilinna ken ni Moises nga adipenna. Inted met ni Moises dagitoy a bilin ken ni Josue, ket tinungpal ni Josue dagitoy. Tinungpalna amin nga imbilin ni Yahweh ken ni Moises.

Sakupen ni Josue ti Entero a Daga

16 Sinakup ni Josue amin dagita a daga—ti katurturodan a pagilian, amin nga adda iti amianan ken abagatan, ti entero a Gosen ken ti natikag a daga iti deppaar ti abagatanna, agraman ti Tanap ti Jordan.

17-18 Dumanon ti masakupan ti daga manipud Bantay Halac iti abagatan iti asideg ti Edom agingga iti Baal-gad iti amianan, iti tanap ti Libano iti abagatan ti Bantay Hermon. Pinatayna amin nga arida kalpasan ti nabayag a pannakigubgubatna kadakuada.

19 Awan ti siudad a nakikappia kadagiti Israelita, malaksid ti Gibeon a taeng dagiti Heveo. Naparmekda amin iti gubat.

20 Tani Yahweh ti akinnakem iti panagpingetda a makiranget kadagiti Israelita tapno madadaelda a mamimpinsan ket mapapatayda amin nga awan asi. Daytoy ti imbilin ni Yahweh ken ni Moises.

21 Iti daytoy a tiempo, napan pinukaw ni Josue ti maysa a puli dagiti higante a maaw-awagan iti Anakim nga agnanaed iti katurturodan idiay Hebron, Debir, Anab ken iti amin a katurturodan ti Juda ken ti Israel. Inkisap ni Josue ida agraman dagiti siudadda.

22 Awan ti natda nga Anakim iti Israel; nupay kasta, adda sumagmamano a nabati idiay Gaza, Gat ken Asdod.

23 Kas imbilin ni Yahweh ken ni Moises, sinakup ni Josue ti entero a daga. Intedna ti daga kadagiti Israelita a kas kukuada, ket biningbingayna, maysa a paset ti kada tribu.

Iti kasta, nagbiag dagiti Israelita a sitatalna iti entero a daga.

Dagiti Ari a Pinarmek ni Moises

1 Pinarmekken sinakup dagiti Israelita ti daga iti daya ti Jordan, manipud iti Tanap ti Arnon agingga iti Tanap ti Jordan agingga iti Bantay Hermon iti amianan. Pinarmekda ti dua nga ari.

2 Maysa kadakuada ni Sihon nga ari dagiti Amorreo a nagturay idiay Hesbon. Sakupen ti pagarianna manipud Aroer nga adda iti arubayan ti Tanap ti Arnon, ket manipud iti tengnga ti tanap agingga iti karayan Jabbok a beddeng ti Ammon (amin dagitoy buklen ti kagudua ti Galaad);

3 ken ti daga iti daya ti Tanap ti Jordan, manipud Dan-aw ti Galilea nga agpa-Betjesimot iti daya ti Natay a Baybay, agingga iti abagatan iti puon ti Bantay Pisga.

4 Pinarmekda met ti ari ti Basan, ni Og a maysa kadagiti natda a kaputotan dagiti Refaim. Nagturay idiay Astarot ken idiay Edrei.

5 Sakupen ti pagarianna ti Bantay Hermon, Saleca, ken amin a Basan agingga iti beddeng ti Gesur ken Maaca, ken ti kagudua ti Galaad agingga iti masakupan ti daga ni Sihon nga ari ti Hesbon.

6 Pinarmekda Moises ken dagiti Israelita dagitoy nga ari. Inted ni Moises nga adipen ni Yahweh ti dagada kadagiti tribu ti Ruben ken Gad ken iti kagudua ti tribu ti Manases tapno tagikuaenda.

Dagiti Ari a Pinarmek ni Josue

7 Pinarmek ni Josue ken dagiti Israelita ti amin nga ari iti daga nga adda iti laud ti Jordan, manipud Baal-gad iti tanap ti Libano agingga iti Bantay Halac iti abagatan iti asideg ti Edom. Biningbingayna daytoy a daga ket intedna iti tunggal tribu a kukuada iti agnanayon.

8 Mairaman ditoy ti katurturodan a disso, ti nababa a lugar, ti tanap ti Jordan, dagiti puon ti bantay, ti let-ang ken ti natikag a disso iti deppaar iti abagatan. Dagdaga dagitoy idi dagiti Heteo, Amorreo, Cananeo, Perezeo, Heveo ken Jebuseo.

9 Pinarmek dagiti Israelita dagiti ari dagiti sumaganad a siudad: Jerico, Ai (asideg iti Betel),

10 Jerusalem, Hebron,

11 Jarmut, Lakis,

12 Eglon, Gezer,

13 Debir, Geder,

14 Horma, Arad,

15 Libna, Adullam,

16 Makeda, Betel,

17 Tappua, Hefer,

18 Afec, Lasaron,

19 Madon, Hasor,

20 Simron-meron, Acsaf,

21 Taanac, Megiddo,

22 Kedes, Jocneam (idiay Carmel),

23 Dor (iti igid ti baybay), Goiim (idiay Gilgal),

24 ken Tirza. Agdagupda iti 31 nga ari.

Dadduma a Daga a Masakupan Pay

1 Lakay unayen ni Josue. Kinuna ni Yahweh kenkuana, “Lakayka unayen, ngem adu pay laeng ti daga a masapul a sakupen.

2 Isuda dagitoy: amin a daga a masakupan ti Filistia ken Gesur,

3 kasta met dagiti amin a daga ti Avvim iti abagatan. (Maibilang a kukua dagiti Cananeo ti daga manipud waig Sihor a daya ti Egipto agingga iti beddeng ti Ekron iti amianan. Agnaed dagiti turayen dagiti Filisteo idiay Gaza, Asdod, Askelon, Gat ken Ekron.)

4 Adda pay la dagiti amin a pagilian a sakup dagiti Cananeo, ken Mehara (a kukua dagiti Sidonio), agingga idiay Afec iti beddeng dagiti Amorreo;

5 ti daga dagiti Gilbeo, ti entero a Libano nga agturong iti daya, manipud Baal-gad iti puon ti Bantay Hermon, agingga iti serkan ti Bessang Hamat.

6 Mairamanditoy dagiti Sidonio nga agnaed iti katurturodan iti nagbaetan dagiti bantay ti Libano ken Misrefot Mayim. Paksiatekto ida iti dalan dagiti Israelita. Kas imbilinko kenka, masapul a bingbingayem dagitoy a daga tapno tagikuaen ti Israel.

7 Ita, bingbingayemon ti daga ket itedmo kadagiti siam a tribu ken ti sabali a kagudua ti tribu ti Manases a kas kukuada.”

Ti Daga a Masakupan da Manases, Ruben ken Gad

8 Tidaga nga agpadaya iti ballasiw ti Jordan ti naited kadagiti tribu ni Ruben ken ni Gad ken ti sabali a kagudua ti tribu ni Manases. Daytoy ti inted kadakuada ni Moises nga adipen ni Yahweh.

9 Dumanon iti Aroer ti sakupda iti arubayan ti Tanap ti Arnon ken ti siudad iti tengnga ti tanap ken amin a nangato a patad ti Medeba agingga idiay Dibon.

10 Aglayon iti beddeng ti Ammon agraman dagiti amin a siudad ni Sihon nga ari dagiti Amorreo a nagturay idiay Hesbon.

11 Mairaman pay ti Galaad, ti daga ti Gesur ken Maaca, ti entero a Bantay Hermon ken amin a Basan agingga idiay Saleca.

12 Mairaman ti pagarian ni Og, ti kakaisuna a nabati kadagiti Refaim, a nagturay idi idiay Astarot ken Edrei. Pinarmek ni Moises dagitoy a tattao ket pinagtalawna ida.

13 Nupay kasta, saan a pinapanaw dagiti Israelita dagiti agnaed iti Gesur ken Maaca. Adda pay laeng dagitoy a tattao idiay Israel.

14 Awanti daga nga inted ni Moises iti tribu ti Levi. Kas imbaga ni Yahweh ken ni Moises, awatenda a kukuada ti maysa a paset dagiti daton a mapuoran iti altar a maipaay ken ni Yahweh a Dios ti Israel.

15 Inikkan met ni Moises iti daga ti tunggal familia iti tribu ti Ruben.

16 Sakupenda ti Aroer (iti igid ti Tanap ti Arnon), ti siudad iti tengnga ti tanap, ken ti amin a tanap iti lawlaw ti Medeba,

17 agraman ti Hesbon ken amin a siudad iti tanap: Dibon, Bamot Baal, Beth Baalmeon,

18 Jaaz, Kedemot, Mefaat,

19 Kiriataim, Sibma, Saratasar a nabangon iti bantay iti tanap,

20 Bet-peor, dagiti bakras ti Bantay Pisga ken Bet Jesimot.

21 Mairaman dagiti dadduma a siudad iti tanap, ken ti entero a pagarian ni Sihon nga Amorreo a nagturay idiay Hesbon. Pinarmek ni Moises ni Sihon, agraman dagiti agtuturay ti Midian: da Evi, Rekem, Zur, Hur, ken Reba. Nagturayda amin iti daga iti nagan ni Ari Sihon.

22 Kadagiti pinatay dagiti Israelita, nairaman ni Balaam a mammadles nga anak ni Beor.

23 Agpatingga iti Jordan ti daga a naited iti tribu ti Ruben. Dagitoy dagiti siudad ken il-ili a naited kadagiti familia iti tribu ti Ruben a kas kukuada.

24 Adda met inted ni Moises a daga iti kada familia iti tribu ti Gad.

25 Sakupda ti Jazer ken ti amin a siudad ti Galaad, ti kagudua ti daga ti Ammon agingga idiay Aroer iti daya ti Raba.

26 Aglayon ti dagada manipud Hesbon agingga idiay Ramatmizpe ken Betonim; manipud Mahanaim agingga iti beddeng ti Lodebar.

27 Iti tanap ti Jordan, mairaman ti Bet Haram, Bet Nimra, Succot ken Safon, ti dadduma a pagturayan ni Sihon nga ari ti Hesbon. Ti Jordan ti beddengda iti amianan agingga iti Dan-aw ti Galilea sa agpadaya.

28 Dagitoy dagiti siudad ken il-ili a naited kadagiti familia iti tribu ni Gad a kas kukuada.

29 Inted met ni Moises kadagiti familia iti kagudua ti tribu ti Manases ti paset ti daga a kas kukuada.

30 Mangrugi idiay Mahanaim, ket mairaman ti amin a Basan, ti entero a pagturayan ni Og nga ari ti Basan ken dagiti 60 nga il-ili iti Jair idiay Basan.

31 Mairaman pay ti kagudua ti Galaad, agraman Astarot ken Edrei, dagiti siudad iti pagturayan ni Og idiay Basan. Naited amin dagitoy iti kagudua dagiti familia a nagtaud iti kaputotan ni Makir nga anak ni Manases.

32 Kastoy ti panangbingbingay ni Moises kadagiti daga nga adda iti ballasiw ti Jordan ken kadagiti daga iti Jerico. Adda idi ni Moises iti tanap ti Moab.

33 Ngemawan ti daga nga inted ni Moises iti tribu ni Levi. Imbagana kadakuada a kukuada ti maysa a paset dagiti daton a mapuoran a maipaay ken ni Yahweh a Dios ti Israel.

Mabingbingay ti Canaan babaen iti Binnunot

1 Dagitoy dagiti naited kadagiti Israelita a daga ti Canaan iti laud ti Jordan. Biningbingay da Eleazar a padi, Josue nga anak ni Nun ken dagiti papangulo dagiti familia kadagiti tribu ti Israel.

2 Kasimbilin ni Yahweh ken ni Moises, nabingbingay babaen iti binnunotti daga a tagikuaen dagiti siam ket kagudua a tribu iti laud ti Jordan.

3-4 Naitudingidin ni Moises ti daga iti daya ti Jordan nga agpaay kadagiti dua ket kagudua a tribu. (Nabingay ti kaputotan ni Jose iti dua a tribu: ti Manases ken Efraim.) Awan ti inted ni Moises a daga kadagiti Levita. Nupay kasta, naikkanda kadagiti siudad a pagnaedanda, agraman kadagiti pagpastoranda kadagiti baka ken karneroda.

5 Nagbibingayan dagiti Israelita ti daga a kas imbilin ni Yahweh ken ni Moises.

Maited ti Hebron ken ni Caleb

6 Maysanga aldaw, adda sumagmamano a tattao ti tribu ti Juda a napan ken ni Josue idiay Gilgal. Kinuna kenkuana ni Caleb nga anak ni Jefone a Kenezeo; “Ammom ti kinuna tiApoidi idiay Kades Barnea maipapan kadata; imbagana daytoy ken ni Moises a tao ti Dios.

7 Uppata pulo ti tawenko idi ibaonnak ni Moises nga adipen tiApomanipud Kades Barnea tapno innak espiaan ti daga. Idi agsubliak kenkuana, insangpetko ti pudno a damag.

8 Nupay kasta, nagbuteng dagiti tattao gapu ta sabali ti imbagbaga dagiti kinaduak a simmang-at. Ngem sipupudnoak a nagtungpal itiApoa Diosko.

9 Inkarikaniak ni Moises iti daydi nga aldaw, ‘Gapu ta nagtulnogka a sipupudno itiApoa Diosko, tagikuaenyonto nga agaama ti daga a nagnaam.’”

10 “Panunotem,” intuloy ni Caleb. “Uppat a pulo ket lima a tawenen ti napalabas manipud imbaga tiApodaytoy ken ni Moises. Imbagana daytoy idi agdaldaliasat ti Israel idiay let-ang. Wen, manipud idi, impalubos tiAponga agbiagak. Kitaennak! Walopulo ket lima ti tawenkon,

11 ngem napigsaak pay laeng a kas idi imbaonnak ni Moises. Napigsaak pay laeng a makigubat wenno mangaramid iti aniaman.

12 Ngarud, itedmo kaniak daytoy katurturodan a disso nga inkari tiApoiti daydi nga aldaw. Imbagami idi kadakayo nga adda puli dagiti higante a maaw-awagan iti Anakim nga agnaed kadagiti dadakkel ken nabakudan a siudad. Nalabit nga addanto kaniak tiApo, ket paksiatekto ida kas imbagana.”

13 Binendisionan ni Josue ni Caleb nga anak ni Jefone, ket intedna a kukuana ti siudad ti Hebron.

14 Agpapan ita, kukua dagiti kaputotan ni Caleb nga anak ni Jefone a Kenezeo ti Hebron agsipud ta sipupudno ni Caleb a nagtungpal itiApoa Dios ti Israel.

15 Maaw-awagan idi ti Hebron iti Kiryat Arba. (Ni Arba idi ti kabibilgan kadagiti Anakim.)

Addan kappia iti daga.

Ti Daga a Naited iti Tribu ti Juda

1 Daytoy ti daga a naited kadagiti familia iti tribu ti Juda:

Dumanon ti sakupda iti abagatan agingga iti pungto ti let-ang ti Zin, iti beddeng ti Edom.

2 Daytoy ti akin-abagatan a beddeng a mangrugi iti pungto ti Natay a Baybay,

3 ket agpa-abagatan manipud iti Bessang ti Akrabbim, sa lumasat idiay Zin. Agturong iti abagatan idiay Kades Barnea, agtuloy iti Hezron ket mapan idiay Addar, agpa-Karka,

4 labsanna ti Azmon, sana suroten ti waig nga adda iti beddeng ti Egipto agingga a rummuar iti Taaw Mediterranean a pagpatinggaan ti beddeng. Daytoy ti akin-abagatan a beddeng ti Juda.

5 Ti Natay a Baybay ti beddengna iti daya, agingga iti sabangan ti Jordan. Mangrugi met ditoy ti akin-amianan a beddeng,

6 aglayon nga agturong idiay Bet-hogla ket agpa-amianan agingga iti pantok a pakatannawagan iti tanap ti Jordan. Sumang-at manen iti Bato ni Bohan (anak ni Ruben ni Bohan),

7 ket manipud iti Tanap ti Acor mapan idiay Debir, sa agpa-amianan nga agsikko idiay Gilgal a sumango iti Bessang ti Adummim iti akin-abagatan a bangir ti tanap. Manipud dita, aglayon nga agturong iti ubbog ti Ensemes, ket rummuar a mapan idiay Enrogel,

8 sumang-at ti beddeng iti Tanap ti Hinnom iti abagatan a paset ti turod a nakaisaadan ti Jerusalem a siudad dagiti Jebuseo. Sumang-at ti beddeng iti tapaw ti bantay a kasumbangir ti Tanap ti Hinnom iti abagatan, iti akin-amianan a pungto ti Tanap ti Refaim.

9 Manipud iti bantay, agturong iti ubbog ti Neftoa, ket rummuar kadagiti siudad nga asideg ti Bantay Efron; agsikko nga agturong idiay Baala (wenno Kiriat Jearim).

10 Manglikaw iti laud ti Baala, mapan iti katurturodan ti Edom, agpangato iti amianan a bangir ti Bantay Jearim (wenno Kesalon), bumaba idiay Betsemes, ket aglayon idiay Timnat.

11 Rummuar kadagiti bakras iti amianan ti Ekron, agbaw-ing nga agpa-Sikkeron, labsanna ti Bantay Baala, ket aglayon idiay Jabneel. Agpatingga ti beddeng iti Taaw Mediterranean a mangbukel

12 iti akinlaud a beddeng.

Dagitoy dagiti beddeng dagiti tattao iti familia ti Juda.

Parmeken ni Caleb ti Hebron ken ti Debir

13 Kasimbilin ni Yahweh ken ni Josue, adda paset ti daga dagiti tattao iti tribu ti Juda a naited ken ni Caleb nga anak ni Jefone. Isu daytoy ti Hebron a siudad ni Arba nga ama ni Anak.

14 Pinapanaw ni Caleb iti dayta a lugar dagiti kaputotan ni Anak: dagiti familia a Sesai, Ahiman ken Talmai.

15 Manipud sadiay, rinautna dagiti agnaed idiay Debir (Kiryat Sefer idi ti nagan daytoy a siudad).

16 Kinuna ni Caleb, “Yasawak ni Acsa nga anakko iti siasinoman a mangparmek iti Kiryat Sefer.”

17 Ni Otniel nga anak ni Kenaz a kabsat ni Caleb ti nangparmek iti siudad. Inted ni Caleb kenkuana ni Acsa nga asawaenna.

18 Iti aldaw ti kasar, imbaga ni Otniel ken ni Acsaa dumawat iti talon ken ni amana. Dimsaag ni Acsa iti asnona, ket dinamag ni Caleb nga amana no ania ti kayatna.

19 “Ikkannak iti sagut,” kinunana. “Gapu ta impannak iti natikag a pagilian, ikkannak iti ubbog.” Inted ni Caleb dagiti akingngato ken akimbaba nga ubbog.

Dagiti Siudad ti Tribu ti Juda

20 Daytoy ti daga nga inawat dagiti familia iti tribu ti Juda a kukuada.

21 Dagiti kaabagatanan a siudad iti asideg ti beddeng iti Edom: Kabzeel, Eder, Jagur,

22 Kina, Dimona, Adada,

23 Kedes, Hasor, Itnan,

24 Zif, Telem, Bealot,

25 Hasor Hadatta, Keriot Hezron (wenno Hasor),

26 Amam, Sema, Molada,

27 Hazargadda, Hesmon, Bet-pelet;

28 Hazarsual, Beerseba, Biziotia,

29 Baala, Iyim, Ezem,

30 Eltolad, Kesil, Horma,

31 Siklag, Madmanna, Sansanna,

32 Lebaot, Silim, Ain, ken Rimmon: 29 a siudad, agraman dagiti kabangibangda nga ili.

33 Iti tanap, dagitoy dagiti siudad: Estaol, Zora, Asena,

34 Zanoa, Engannim, Tappua, Enam,

35 Jarmut, Adullam, Soco, Aseka,

36 Saaraim, Aditaim, Gedera, Gederotaim: 14 a siudad, agraman dagiti kabangibangda nga ili.

37 Adda met ti Senan, Hadasa, Migdalgad,

38 Dilean, Mizpa, Jocteel,

39 Lakis, Bozkat, Eglon,

40 Cabon, Lamam, Kitlis,

41 Gederot, Betdagon, Naama, Makeda: 16 a siudad, agraman dagiti kabangibangda nga ili.

42 Adda met ti Libna, Eter, Asan,

43 Jifta, Asena, Nesib,

44 Keila, Aksib ken Maresa: siam a siudad, agraman dagiti kabangibangda nga ili.

45 Adda met ti Ekron ken dagiti ili ken barriona,

46 ken amin a siudad ken ili nga asideg ti Asdod, manipud Ekron agingga iti Baybay Mediterranean.

47 Adda met ti Asdod ken ti Gaza, agraman ili ken barrioda, a dumanon iti waig iti beddeng ti Egipto ken iti igid ti Baybay Mediterranean.

48 Iti katurturodan, adda ti Samir, Jattir, Soco,

49 Danna, Kiryat Sana (wenno Debir),

50 Anab, Estemoa, Anim,

51 Gosen, Holon ken Gilo: sangapulo ket maysa a siudad, agraman dagiti kabangibangda nga ili.

52 Adda met ti Arab, Duma, Esan,

53 Janim, Bet Tappua, Afeca,

54 Humta, Kiryat Arba (wenno Hebron) ken Zior: siam a siudad, agraman dagiti kabangibangda nga ili.

55 Adda met ti Maon, Carmel, Zif, Jutta,

56 Jezreel, Jocdeam, Zanoa,

57 Canin, Gibea ken Timnat: sangapulo a siudad, agraman dagiti kabangibangda nga ili.

58 Adda met ti Halhul, Bet-sur, Gedor,

59 Moara, Bet-anot ken Eltecon: innem a siudad agraman dagiti kabangibang nga ili.

60 Adda ti Kiryat Baal (wenno Jearim Baal) ken ti Rabba: dua a siudad agraman dagiti kabangibang nga ili.

61 Iti let-ang isuda dagitoy: Bet Araba, Middin, Secaca,

62 Nibsan, ti Siudad ti Ain, ken Engedi: innem a siudad, agraman dagiti kabangibangda nga ili.

63 Ngemsaan a nabalinan dagiti taga-Juda a pinapanaw dagiti Jebuseo nga agnaed idiay Jerusalem. Agpapan ita, adda pay laeng sadiay dagiti Jebuseo a makipagmanaed kadagiti tattao ti Juda.

Ti Daga a Naited iti Tribu ti Efraim ken Manases

1 Daytoy ti daga a naited kadagiti kaputotan ni Jose: mangrugi iti Jordan nga asideg ti Jerico, iti maysa a lugar a dayaen dagiti ubbog ti Jerico, ket agturong idiay let-ang. Manipud Jerico, sumang-at iti katurturodan agingga idiay Betel.

2 Manipud Betel, agpa-Luz, sa aglayon idiay Atarot Adar a pagnaedan dagiti Arkita.

3 Sumalog nga agpa-laud ket mapan iti sakup dagiti Jaflateo agingga iti akimbaba a paset ti Bet-horon sa idiay Gezer ket agpatingga iti Taaw Mediterranean.

4 Daytoy ti daga nga inawat dagiti tribu ti Manases ken Efraim a kaputotan ni Jose.

5 Adtoy ti sakup dagiti familia iti tribu ti Efraim: ti Atarot-addar ti beddengda iti daya agingga iti akingngato a Bet-horon.

6 Manipud sadiay, agpatingga iti Taaw Mediterranean; iti amianan, agpatingga met iti Micmetat. Iti daya, agsikko ti beddeng a mapan idiay Taanat Silo ket labsanna sa aglayon iti daya ti Janoa.

7 Manipud Janoa, agpababa nga agturong idiay Atarot ken Naara. Dumanon idiay Jerico ket agpatingga idiay Jordan.

8 Manipud Tappua, agpa-laud agingga iti waig ti Cana, ket agpatingga ti beddeng iti Taaw Mediterranean. Daytoy ti daga a naited a kukua dagiti familia iti tribu ti Efraim,

9 agraman sumagmamano nga ili ken barrio iti sakup ti Manases, ngem naited kadagiti Efraimita.

10 Nupaykasta, dida pinapanaw dagiti Cananeo nga agnaed idiay Gezer, ket agpapan ita, adda pay laeng dagiti Cananeo iti denna dagiti Efraimita, ngem napilitda nga agserbi a tagabu.

Akinlaud a Manases

1 Adda paset ti daga a naited kadagiti familia a nagtaud iti kaputotan ni Manases nga inauna nga anak ni Jose. Bannuar a mannakigubat ni Makir nga ama ni Galaad ken inauna nga anak ni Manases ket naited kenkuana ti Galaad ken Basan.

2 Adda met daga iti lauden ti Jordan a naited kadagiti dadduma a familia ni Manases: Abiezer, Helec, Asriel, Siquiem, Hefer ken Semida. Dagitoy dagiti lallaki nga annak ni Manases nga anak ni Jose; pangulo ida dagiti familia.

3 Awan lalaki nga anak ni Zelofehad nga anak ni Hefer ken apoko ni Galaad nga anak ni Makir nga anak ni Manases. Pasig a babbai ti annakna: Mala, Noa, Hogla, Milca ken Tirza.

4 Napandaken ni Eleazar a padi, ken ni Josue nga anak ni Nun, ken kadagiti panguloen, ket kinunada: “Imbaga tiApoken ni Moises nga ikkannakam, agraman dagiti kabagianmi, iti daga a kukuami.”

Kas imbilin ni Yahweh, naikkan dagitoy a babbai iti daga, kasta met dagiti lallaki a kabsat ni amada.

5 Sangapulo a kadisso ti naited ken ni Manases, agraman ti Galaad ken ti Basan iti ballasiw ti Jordan,

6 ta padapada nga adda bingay dagiti annakna, babai man wenno lalaki. Naited ti daga ti Galaad kadagiti dadduma a kaputotan ni Manases.

7 Mangrugi ti teritorio ti Manases idiay Aser agingga iti Micmetat iti daya ti Siquiem, ket agpa-abagatan a mangsakup kadagiti agnaed idiay Entappua.

8 Kukua ti Manases ti daga iti lawlaw ti Tappua, ngem dagiti kaputotan ni Efraim ti akinkukua iti ili ti Tappua nga adda iti beddeng.

9 Sumalog ti beddeng iti waig ti Cana. Kukua ti Efraim dagiti siudad iti abagatan ti waig uray addada iti sakup dagiti siudad ni Manases. Aglayon ti beddeng ti Manases iti akin-amianan a ballasiw ti waig, ket agpatingga iti Taaw Mediterranean.

10 Agpa-abagatan ti daga ti Efraim idinto nga agpa-amianan ti daga ti Manases, ket ti Taaw Mediterranean ti beddengda iti laud. Dumanon iti Aser iti amianan, ken Issacar iti daya.

11 Iti sakup da Issacar ken Aser, tinagikua ti Manases ti Bet Sean ken dagiti kabangibang nga ili, ken ti Dor (ti siudad iti asideg ti baybay), Endor, Taanac, Megiddo ken dagiti kabangibangda nga ili.

12 Nupaykasta, saan a nabalinan dagiti tattao ti Manases a pinagtalaw dagiti Cananeo no di ket nakipagnaed dagitoy a tattao kadakuada.

13 Idi pumigsa dagiti Israelita, saanda a pinagtalaw amin a Cananeo, ngem pinilitda ida nga agtrabaho para kadakuada.

Agkiddaw ti Efraim ken Manases iti Ad-adu a Daga

14 Kinuna dagiti kaputotan ni Jose ken ni Josue, “Apay a sangsangkadisso la ti intedmo a tagikuaenmi? Adukami gapu ta binendisionannakami tiApo.”

15 “No adukayo la unay ket saan a makaanay kadakayo ti katurturodan ti Efraim,” insungbat ni Josue, “inkayo kadagiti kabakiran ket mangumakay iti sakupenyo iti daga dagiti Perezeo ken dagiti Refaim.”

16 “Bassit kadakami ti katurturodan,” kinuna dagiti kaputotan ni Jose, “ken adda landok a lugan a pakigubat dagiti Cananeo a taga-tanap, dagiti agnaed idiay Bet Sean ken dagiti kabangibangna nga ili, ken dagiti tattao iti Tanap ti Jezreel.”

17 Kinuna ni Josue kadagiti tribu ti Efraim ken Manases, “Pudno nga adukayo, ket nakabilbilegkayo. Nasursurok ngem maysa a disso ti maited kadakayo.

18 Kukuayo ti katurturodan. Uray no kabakiran, umaenyo ket tagikuaenyo ti amin. No maipapan kadagiti Cananeo, mapaksiatyo ida uray no nabilegda ken addaanda kadagiti landok a lugan a pakigubat.”

Ti Pannakabingay ti Daga

1 Kalpasan ti panangparmekda iti daga, naguummong ti entero nga Israel idiay Silo ket impasdekda sadiay ti Tolda ti Dios.

2 Adda pito a tribu ti Israel a di pay naibingayan iti daga.

3 Kinuna ngarud ni Josue kadagiti Israelita, “Kaanonto a sakupenyo ti daga nga inted kadakayo tiApoa Dios dagiti kapuonanyo? Apay nga itantantanyo?

4 Mangdutokkayo iti tallo a lallaki iti tunggal tribu tapno ibaonko ida a mangmapa iti daga a kayatda a tagikuaen. Kalpasanna, agsublidanto kaniak.

5 Mabingbingayto ti daga iti pito a paset. Agnaedto ti tribu ti Juda iti teritoriona iti abagatan, ket ti tribu ti Jose iti amianan.

6 Mapaenyonto ti daga iti pito a paset sayonto yeg kaniak. Kalpasanna, iti imatang tiApoa Diostayo, bunotekto no ania a paset ti maited iti tunggal maysa.

7 Dinto maibingayan dagiti Levita, ta pannakatagikuada ti panagserbida a kas papadi tiApo. Inawaten dagiti tribu ti Gad, Ruben ken gudua ti Manases ti dagada iti daya ti Jordan. Inted daytoy kadakuada ni Moises nga adipen tiApo.”

8 Imbilin ni Josue kadagiti lallaki: “Inkayo iti entero a daga ket mapaenyo sakayto agsubli kaniak. Ibunotankayto iti imatang tiApoditoy Silo.” Ket napan dagiti lallaki tapno mapaenda ti daga.

9 Sinursorda ti daga ket insuratda no kasano ti panangbingbingayda iti pito a paset; inlistada ti nagan dagiti ili. Kalpasanna, nagsublida ken ni Josue iti kampo idiay Silo.

10 Babaen iti binnunot, nakiuman ni Josue ken ni Yahweh para kadakuada, ket biningbingayna ti daga kadagiti dadduma a tribu ti Israel.

Ti Daga a Naited iti Tribu ti Benjamin

11 Immuna a naituding ti daga a tagikuaen dagiti familia iti tribu ti Benjamin. Adda ti daga iti nagbaetan ti sakup ti tribu ti Juda ken ti tribu ti Jose.

12 Iti amianan, ti Jordan ti pangrugian ti beddeng ket sumang-at iti akin-amianan nga igid ti Jerico, sa agpa-laud a lumasat iti katurturodan agingga iti let-ang ti Bet-aven.

13 Manipud ditoy, aglayon idiay Luz, iti akin-abagatan a sang-atan ti Luz (managan pay Betel), sumalog idiay Atarot-Addar, iti bantay nga adda iti abagatan ti Akimbaba a Bet-horon.

14 Iti laud, ti beddeng agkurba nga agpa-abagatan manipud iti turod nga adda iti abagatan ti Bet-horon sa agpatingga iti siudad ti Kiriat Baal (wenno Kiriat Jearim) a kukua ti tribu ti Juda.

15 Mangrugi ti akin-abagatan a beddeng iti igid ti Kiriat Jearim, ket agpa-laud nga agturong iti ubbog ti Neftoa.

16 Sumalog agingga iti arisadsad ti bantay a tumannawag iti Tanap ni Ben-Hinnom, iti akin-amianan a pungto ti Tanap ni Refaim. Lumasat iti Tanap ni Hinnom, iti abagatan ti pantok ti Jebus, ket agpababa nga agpa-Enrogel.

17 Agkurba nga agpa-amianan ket aglayon idiay Ensemes, sa idiay Gelilot, iti kasumbangir ti Bessang Adummim. Sumalog manen ket agturong iti Bato ni Bohan (ti anak ni Ruben).

18 Agpa-amianan iti pantok a pakatannawagan iti tanap ti Jordan, ket sumalog nga agturong iti tanap.

19 Lumasat iti amianan ti pagsalogan ti Bet-hogla, ket agpatingga iti akin-amianan a sabangan ti Natay a Baybay a pagpatinggaan ti Karayan Jordan nga akin-abagatan a beddeng.

20 Ti Jordan ti akindaya a beddeng. Dagitoy dagiti beddeng ti daga a tagikuaen dagiti familia iti tribu ti Benjamin.

21 Dagitoy dagiti siudad a sakupen dagiti familia iti tribu ti Benjamin: Jerico, Bet-hogla, Emek Keziz,

22 Bet-araba, Sumaraim, Betel,

23 Avvim, Para, Ofra,

24 Kefar-hammomi, Ofni ken Geba—12 a siudad agraman dagiti ilida.

25 Maibilang pay ti Gabaon, Rama, Beerot,

26 Mizpa, Kefira, Moza,

27 Rekem, Irpeel, Tarala,

28 Sela, Haclef, Jebus (wenno Jerusalem), Gibea ken Kiriat Jearim—14 a siudad agraman dagiti ilida. Daytoy ti daga a naited a tagikuaen dagiti familia iti tribu ti Benjamin.

Ti Daga a Naited iti Tribu ni Simeon

1 Naituding nga agpaay kadagiti familia iti tribu ni Simeon ti maikadua a disso. Adda daytoy iti tengnga ti daga a naited iti tribu ti Juda.

2 Isudadagitoy: Beerseba, Seba, Molada,

3 Hazarsual, Bala, Ezem,

4 Heltolad, Betul, Horma,

5 Siklag, Bet Marcabot, Hazarsusa,

6 Bet Lebaot ken Saruhen—13 a siudad agraman dagiti ilida.

7 Adda met ti Ain, Rimmon, Eter ken Asan—uppat a siudad agraman dagiti ilida.

8 Mairaman dagiti amin nga ili iti lawlaw dagitoy a siudad agingga idiay Baalat Beer (wenno Rama) iti abagatan. Daytoy ti daga a naited a tagikuaen dagiti familia iti tribu ti Simeon.

9 Paset ti sakup ti tribu ti Juda ti naited iti tribu ti Simeon. Gapu ta nalawa unay ti naipatawid iti tribu ti Juda, naited iti tribu ti Simeon ti maysa a paset ti dagana.

Ti Daga a Naited iti Tribu ti Zabulon

10-11 Naituding nga agpaay kadagiti familia iti tribu ti Zabulon ti maikatlo a disso. Dumanon ti beddengda idiay Sarid sa sumang-at nga agpa-laud agingga idiay Marala. Dumanon idiay Dabe-set agingga iti waig iti daya ti Jocneam.

12 Iti bangir ti Sarid, agpadaya a dumanon iti beddeng ti Kislot Tabor, sa agturong idiay Deberat agingga idiay Jafia.

13 Manipud sadiay, aglayon nga agpadaya idiay Gat Hefer ken Ittakazin, agkurba nga agpa-Nea nga agturong idiay Rimmon.

14 Iti amianan, agsikko ti beddeng nga agpa-Hanaton ket agpatingga iti tanap ti Jefteel.

15 Sakupenna ti Catat, Naalal, Simron, Ideala ken Betlehem—12 a siudad agraman dagiti ilida.

16 Adda dagitoy a siudad ken ili iti daga a naited a tagikuaen dagiti familia iti tribu ti Zabulon.

Ti Daga a Naited iti Tribu ti Issacar

17 Agpaay kadagiti familia iti tribu ti Issacar ti maikapat a disso.

18 Sakupenda ti Jezreel, Jesulot, Sunem,

19 Hafaraim, Sion, Anaarat,

20 Rabbit, Kislon, Ebes,

21 Remet, Enganin, Emhadda ken Bet-passes.

22 Dumanon ti beddeng idiay Tabor, Sahasuma ken Betsemes, ket agpatingga idiay Jordan—16 a siudad agraman dagiti ilida.

23 Dagitoy dagiti siudad ken ili iti daga a naited a tagikuaen dagiti familia iti tribu ti Issacar.

Ti Daga a Naited iti Tribu ti Aser

24 Agpaay kadagiti familia iti tribu ti Aser ti maikalima a disso.

25 Sakupenna ti Helcat, Hali, Beten, Acsaf,

26 Alamelec, Amad ken Misal. Iti laud, dumanon ti beddeng idiay Carmel ken Sihorlibnat.

27 Iti panagpadaya ti beddeng, agturong idiay Betdagon, ket dumanon idiay Zabulon ken iti Tanap ti Jefteel iti akin-amianan a beddeng nga agturong idiay Bet-emec ken Naiel. Aglayon idiay Cabul,

28 Jebron, Rehob, Hammon, Cana agingga iti dakkel a Sidon.

29 Kalpasanna, agsikko nga agpa-Rama ket dumap-aw idiay Tiro, ti nasarikedkedan a siudad; agpa-Hosa ket agpatingga iti Taaw Mediterranean. Mairaman ti Mahalab, Aksib,

30 Umna, Afec ken Rehob—22 a siudad agraman dagiti ilida.

31 Dagitoy dagiti siudad ken ili a naited a tagikuaen dagiti familia iti tribu ti Aser.

Ti Daga a Naited iti Tribu ti Neftali

32 Agpaay kadagiti familia iti tribu ti Neftali ti maikanem a disso.

33 Mangrugi ti beddengna idiay Helef, manipud iti lugo idiay Zaananim, sa aglayon idiay Adami-neceb ken Jebneel agingga idiay Lacum ket agpatingga idiay Jordan.

34 Agkurba nga agpa-laud idiay Asnot Tabor, agpa-Hucuca, dumanon idiay Zabulon iti abagatan, Aser iti laud ken Juda iti daya idiay Jordan.

35 Dagitoy dagiti nasarikedkedan a siudad: Siddim, Ser, Hamat, Raccat, Cineret,

36 Adama, Rama, Asor,

37 Kedes, Edrei, Enhasor,

38 Jiron, Migdalel, Horem, Bet-anat ken Betsemes—19 a siudad agraman dagiti ilida.

39 Dagitoy dagiti siudad ken ili a naited a tagikuaen dagiti familia iti tribu ti Neftali.

Ti Daga a Naited iti Tribu ti Dan

40 Agpaay kadagiti familia iti tribu ti Dan ti maikapito a disso.

41 Masakupan ti daga ti Zora, Estaol, Ir-semes,

42 Saalabin, Aijalon, Itla,

43 Elon, Timnat, Ekron,

44 Elteke, Gibbeton, Baalat,

45 Jehud, Bene-berac, Gatrimmon,

46 Mejarcon ken Racon agraman dagiti daga iti lawlaw ti Joppe.

47 Ngemidi saan a makaanay kadakuada ti daga, rinaut dagiti tattao ti Dan ti Lesem. Naparmekda ti Lesem ket pinatayda dagiti tattaona. Tinagikuada ket nagnaedda sadiay. Binaliwanda ti Lesem a nagan ti siudad ket sinuktanda iti Dan, ti nagan ti kapuonanda.

48 Dagitoy dagiti siudad ken ili a naited a tagikuaen dagiti familia iti tribu ti Dan.

Ti Daga a Naited ken ni Josue

49 Idi nalpasen dagiti Israelita ti panangbingbingayda iti daga, inikkanda ni Josue nga anak ni Nun iti dagana manipud iti sakupda.

50 Kas imbilin ni Yahweh, intedda ti siudad a kiniddawna, ti Timnat Sera iti katurturodan ti Efraim. Binangon manen ni Josue ti siudad ket nagnaed sadiay.

51 Ni Eleazar a padi, ni Josue nga anak ni Nun ken dagiti pangulo ti nadumaduma a familia kadagiti tribu ti Israel ti nangbingbingay iti daga babaen iti binnunotidiay Silo tapno makiumanda ken ni Yahweh. Naaramid daytoy iti ruangan ti Tolda a Paguummongan. Ket nalpas ti pannakabingbingay ti daga.