Month: March 2020

Maisagana ti Pannakayalis ti Lakasa ti Tulag

1 Nagbangon ni David kadagiti balay a pagyananna iti Siudad ni Davididiay Jerusalem. Nangisagana pay iti maysa a disso nga agpaay iti Lakasa ti Tulag ti Dios ket nangbangon iti tolda a pakaikabilanna.

2 Kinunana,“Dagiti laeng Levita ti rumbeng a mangawit iti Lakasa ti Tulag ti Dios, gapu ta isuda ti pinilina a mangawit iti Lakasa ken agserbi kenkuana iti agnanayon.”

3 Inummong ni David idiay Jerusalem dagiti amin nga Israelita tapno ipanda ti Lakasa ti Tulag iti lugar nga insaganana a pakaikabilanna.

4 Kalpasanna, inayabanna dagiti kaputotan ni Aaron ken dagiti Levita.

5 Iti familia ni Coat, dimmatag ni Uriel a nangipangulo kadagiti 120 a kakabagianna.

6 Iti familia ni Merari, dimmatag ni Asaias a nangipangulo kadagiti 220 a kakabagianna.

7 Iti familia ni Gersom, dimmatag ni Joel a nangipangulo kadagiti 130 a kakabagianna.

8 Iti familia ni Elizafan, dimmatag ni Semaias a nangipangulo iti 200 a kakabagianna.

9 Iti familia ni Hebron, dimmatag ni Eliel a nangipangulo iti 80 a kakabagianna.

10 Iti familia ni Uzziel, dimmatag ni Aminadab a nangipangulo iti 112 a kakabagianna.

11 Pinaayaban ni David da Zadok ken Abiatar a papadi ken dagiti innem a Levita, da Uriel, Asaias, Joel, Semaias, Eliel ken Amminadab.

12 Kinunana kadakuada, “Dakayo ti papangulo dagiti familia dagiti Levita. Dalusanyo dagiti bagbagiyo iti imatang ti linteg, dakayo ken dagiti padayo a Levita, tapno mabalinyo nga ipan ti Lakasa ti Tulag tiApoa Dios ti Israel iti lugar nga insaganak a pakaikabilanna.

13 Gapu ta awankay idi a mangbagkat iti damo a pannakayakarna, dinusanatayo tiApoa Diostayo ta saantay a nagdaydayaw kenkuana a kas rebbengtayo.”

14 Iti kasta, dinalusan dagiti papadi ken Levita dagiti bagbagida iti imatang ti linteg tapno yalisda ti Lakasa ti Tulag ni Yahweh a Dios ti Israel.

15 Inassiwandagiti Levita ti Lakasa ti Tulag ket imbaklayda kas imbilin idi ni Yahweh ken ni Moises.

16 Binilin ni David dagiti pangulo dagiti Levita a mangdutokda kadagiti dadduma a Levita nga agkanta ken agtokar kadagiti naragsak nga aweng kadagiti arpa ken piangpiang.

17-21 Kadagiti familia dagiti kumakanta, pinilida dagiti agtokar iti gumbang a piangpiang: ni Heman nga anak ni Joel, ni Asaf nga anak ni Berekias a kabagianna ken ni Etan nga anak ni Kusayas iti familia ni Merari. Pinilida dagiti sumaganad a tumulong kadakuada nga agtokar kadagiti piangpiang: da Zacarias, Jaaziel, Semiramot, Jehiel, Unni, Eliab, Maasias ken Benaias. Dagitoy dagiti Levita a pinilida nga agtokar kadagiti arpa: Mattitias, Elifelehu, Mikneias, Azazias ken da Obed Edom ken Jeiel a guardia ti Templo.

22 Ni Kenanias ti napili a pangulo dagiti musiko a Levita gapu iti laingna iti musika.

23-24 Da Berekias ken Elcana agraman da Obed Edom ken Jehias ti napili mangguardia iti Lakasa ti Tulag. Napili dagiti papadi—da Sebanias, Josafat, Netanel, Amasai, Zecarias, Benaias ken Eliezer—nga agtrumpeta iti sangoanan ti Lakasa ti Tulag.

Maipan ti Lakasa ti Tulag idiay Jerusalem

25 Napan ni David, iti balay ni Obed Edom tapno alaenna ti Lakasa ti Tulag. Kaduana dagiti pangulo ti Israel ken dagiti pangulo dagiti mannakigubat ket kasta unay ti panagrambakda.

26 Nangidatonda iti pito a toro a baka ken pito a karnero tapno awan duadua a tulongan ti Dios dagiti Levita a mangaw-awit iti Lakasa ti Tulag.

27 Nagarruat ni David iti kawes a naaramid iti kapintasan a linen, kasta met dagiti musiko, ni Kenanias a panguloda ken dagiti Levita a nagawit iti Lakasa ti Tulag. Nagarruat met ni David iti efod a linen.

28 Ngarud, kinuyog dagiti amin nga Israelita ti Lakasa ti Tulag iti pannakaipanna idiay Jerusalem. Awan ressat ti panagdidir-ida, ti panaguni ti trumpeta, tangguyob ken piangpiang ken ti pannakatokar dagiti arpa.

29 Idi maiserrek ti Lakasa ti Tulag iti siudad, timmamdag ni Mical nga anak ni Saul ket nakitana ni Ari David nga agsalsala ken aglaglagto iti ragsakna. Inumsi ni Mical ti ari iti unegna.

1 Impanda ti Lakasa ti Tulag iti uneg ti tolda a naisagana a pakaikabilanna. Kalpasanna, nagidatagda kadagiti daton a mapuoran ken daton a pakikappia iti Dios.

2 Kalpasan ti panangidatag ni David kadagiti animal a mapuoran, binendisionanna dagiti tattao iti nagan ni Yahweh

3 sa nagiwaras iti taraon. Inikkanna ti tunggal lalaki ken babai nga Israelita iti maysa a tinapay, tinuno a karne,ken kankanen a pasas.

4 Nangdutok ni David iti sumagmamano a Levita a mangipangulo iti panagdaydayaw ken ni Yahweh a Dios ti Israel iti sangoanan ti Lakasa ti Tulag babaen iti panagkanta ken panangitan-ok kenkuana.

5 Ni Asaf ti nadutokan a pangulo, ket ni Zacarias ti katulonganna. Da Jeiel, Semiramot, Jehiel, Mattitias, Eliab, Benaias, Obed Edom ken Jeiel dagiti para-tokar iti arpa. Ni Asaf ti para-piangpiang.

6 Da Benaias ken Jahaziel a papadi ti para-trumpeta, ket aramidenda daytoy iti naituding a tiempo iti sangoanan ti Lakasa ti Tulag.

7 Dayta ti umuna a pannangted ni David ken ni Asaf ken kadagiti padana a Levita iti annong a mangikankanta kadagiti pagdaydayaw iti Dios.

Kanta a Pagdaydayaw

8 Agyamankay itiApo, awaganyo ti naganna,

ipakaammoyo kadagiti tattao dagiti inar-aramidna!

9 Kantaanyo tiApoiti pagdaydayaw;

ipakaammoyo dagiti inaramidna a nakaskasdaaw!

10 Agragsaktayo ta kukuanatayo tiApo;

agragsak koma amin nga agdaydayaw kenkuana!

11 Inkay agpatulong itiApo,

ket kanayon nga agdaydayawkayo kenkuana.

12-13 Dakayo a kaputotan ni Jacob nga adipen ti Dios,

kaputotan ni Israel a pinili ti Dios,

lagipenyo dagiti milagro nga inaramidna

ken dagiti pangngeddeng nga impaulogna.

14 TiApoti Diostayo,

agpaay dagiti bilinna iti entero a daga.

15-16 Diyolipatan ti katulaganna ken ni Abraham,

ti inkarina ken ni Isaac

ti tulag nga agpaay iti amin a kaputotan.

17 NakitulagtiApoken ni Jacob;

agpaut iti agnanayon ti tulagda.

18 “Itedkonto kenka ti daga ti Canaan,” kinunana,

“sikanto ti akinkukua.”

19 Bassit idi ti bilang dagiti tattao ti Dios,

ganggannaetda iti daga ti Canaan.

20 Nagalla-allada kadagiti nadumaduma a nasion,

nagalis-alisda kadagiti nadumaduma a pagarian.

21 Ngemdi impalubos ti Dios nga adda mangparigat kadakuada,

binallaaganna dagiti ari tapno masalaknibanda.

22 “Diyo ranggasan dagiti pinilik nga adipenko;

diyo sagiden dagiti bukodko a profeta.”

23 Kantaanyo tiApo, dakay amin a tattao iti lubong!

Inaldaw nga ipakaammoyo ti naimbag a damag nga insalakannatayo.

24 Ipakaammoyo ti dayagna kadagiti pagilian;

kadagiti amin a tattao ibagayo dagiti nakaskasdaaw nga aramidna.

25 Naindaklan tiApo, ket masapul nga idaydayawtayo;

ad-adda nga isu ti kabutengtayo ngem ti siasinoman a didiosen.

26 Kinitikitan laeng nga imahen ti didiosen dagiti sabali a pagilian,

ngem tiApoti namarsua kadagiti langit.

27 Dayag ken daeg ti manglikmut kenkuana,

bileg ken rag-o ti mangpunno iti Templona.

28 Idaydayawyo tiApo, dakayo amin a tattao ditoy daga,

itan-okyo ti dayag ken pannakabalinna.

29 Idaydayawyo ti nadayag a nagan tiApo;

mangitugotkay iti daton ket umaykayo iti Templona.

Agrukbabkay iti imatang ti Nasantoan no agparang.

30 Dakayo iti entero a daga, agpigergerkayo iti sangoananna,

natibker ti pannakaipasdek ti daga ket saan a mayalis.

31 Agragsakkayo, dakay a langit ken daga!

Ibagayo kadagiti nasion a tiApoti ari.

32 Agdaranudorka, taaw ken amin nga adda kenka;

agrag-okayo, dakayo a tay-ak ken amin nga adda kadakayo.

33 Agriawto dagiti kayo iti kabakiran gapu iti rag-o,

inton umay tiApoa mangituray iti daga.

34 NaimbagtiApo, ket agyamankayo kenkuana

agpaut nga agnanayon ti ayatna.

35 Ibagayo kenkuana, “Isalakannakam, O Dios a Mannubbotmi,

ummongennakami, ket ispalennakami kadagiti nasion,

tapno agyamankami kenka

ket idaydayawmi ti nasantoan a naganmo.”

36 Idaydayawyo tiApoa Dios ti Israel!

Idaydayawyo iti agnanayon nga awan ti inggana.

Ket kinuna dagiti amin a tattao: “Amen” sada indaydayaw ni Yahweh.

Ti Panagdaydayaw idiay Jerusalem ken Gabaon

37 Dinutokan ni David ni Asaf ken dagiti padana a Levita a permanente a mangimaton iti panagdaydayaw iti lugar a nakaikabilan ti Lakasa ti Tulag. Inaldaw nga aramidenda ti annongda sadiay.

38 Tumulong kadakuada ni Obed Edom nga anak ni Jedutun ken 68 a kakabagianna. Da Hosa ken Obed Edom ti makaammo iti pannakaguardia dagiti ruangan.

39 Nupay kasta, ni Zadok ken dagiti padana a padi ti mangipangulo iti panagdaydayaw ken ni Yahweh iti santuario idiay Gabaon.

40 Binigat ken minalem nga agidatagda iti animal a mapuoran iti altar kas nailanad iti Linteg nga inted ni Yahweh iti Israel.

41 Kaduada sadiay da Heman ken Jedutun, ken dagiti dadduma a napili nga agkanta iti pagdaydayaw ken ni Yahweh gapu iti agnanayon nga ayatna.

42 Naipaannong pay kada Heman ken Jedutun ti pannakapaguni dagiti trumpeta, piangpiang ken dadduma nga instrumento a mangdanggay kadagiti kanta a pagdaydayaw. Dagiti kamkameng ti familia ni Jedutun ti makaammo iti pannakaguardia dagiti ruangan.

43 Nagawiddagiti tattao. Nagawid met ni David tapno agyan pay laeng iti mabiit iti denna ti familiana.

Ti Mensahe ni Natan ken ni David

1 Agtataengen ni Ari David iti palasiona. Iti maysa nga aldaw, pinaayabanna ni profeta Natan ket imbagana kenkuana, “Adtoy nga agnanaedak iti balay a naaramid iti sedro ngem tolda laeng ti nakaikabilan ti Lakasa ti Tulag tiApo!”

2 Insungbat ni Natan, “Aramidem ti aniaman a panggepmo ta adda kenka ti Dios.”

3 Ngem iti dayta a rabii, kinuna ti Dios ken ni Natan,

4 “Inka ibaga ken ni David nga adipenko: ‘Saan a sika ti mangbangon iti templo a pagnaedak.

5 Manipud inispalko dagiti Israelita idiay Egipto agpapan ita, diak pay nagnaed iti templo. Nagdaldaliasatak a nagnaed iti tolda.

6 Iti amin a pannakipagdaliasatko kadagiti Israelita, diak pay sinaludsod kadagiti dinutokak a pangulo no apay a didak imbangonan iti templo a naaramid iti sedro.’

7 “Ibagam ngarud ken ni adipenko a David a siak, ni Yahweh a Mannakabalin-amin, kastoy ti kunak kenkuana: ‘Innalaka iti pagpastoran iti karnero kadagiti away ket tinudinganka a mangituray kadagiti tattaok nga Israelita.

8 Kinuykuyogka iti sadinoman a napanam ket pinarmekko amin a kabusormo tunggal dumarupka. Pagbalinenkanto a naindaklan a kas kadagiti kamainglan a pangulo ditoy lubong.

9-10 Nangpiliak iti lugar a pagnaedan dagiti tattaok nga Israelita ket pinagtaengko ida sadiay nga awanton mangidadanes kadakuada. Manipud simmangpetda iti daytoy a daga, rinaraut dagiti naranggas a tattao ida ngem dinton mapasamak dagitoy. Ikarik a parmekek amin a kabusormo ken taginayonekto ti kaputotam.

11 Inton matayka ket maitanemka a kas kadagidi kapuonam, isaadkonto ti maysa kadagiti annakmo nga agari ket pabilgekto ti pagarianna.

12 Isunto ti mangbangon iti templok ket ikagumaak a mataginayon ti panagturay dagiti kaputotanna.

13 Siaktoti amana ket isunto ti anakko. Diakto isardeng ti panangtulongko kenkuana a kas iti panangisardengko iti tulongko ken ni Saul nga inikkatko tapno agbalinka nga ari.

14 Isaadkonto a mangituray kadagiti tattaok ken iti pagariak iti agnanayon. Dinto agpatingga ti panagturay dagiti kaputotanna.’”

15 Imbaga ni Natan ken ni David ti amin nga impaltiing kenkuana ti Dios.

Kararag a Pagyaman ni David

16 Simrek ni Ari David iti nasagradoan a Tolda, nagtugaw ket inkararagna: “OApoDios, saanak a maikari wenno ti familiak iti impaaymo kaniak.

17 Uray ita, ad-adu pay ti ipapaaymo; nagkarika iti maipapan kadagiti kaputotak iti masakbayan ket sika, OApoDios, ibilbilangnakon a kas naindaklan a tao.

18 Ania pay ti mabalinko nga ibaga kenka? Am-ammonak unay; nupay kasta, padayawannak nga adipenmo.

19 Daytoy ti pagayatam ken panggepmo nga aramidem kaniak ken iti panangipakitam iti kinatan-okko iti masakbayan.

20 OApo, awanen ti kas kenka; awan ti sabali a Dios kadakami no di laeng siksika.

21 Awanen ti sabali a nasion ditoy lubong a kas iti Israel nga inispalmo iti pannakatagabuna tapno kukuam. Nagsaknap ti kinalatakmo iti entero a lubong gapu kadagiti naindaklan ken nakaskasdaaw a banag nga impaaymo kadakuada. Inispalmo dagiti tattaom idiay Egipto ket pinagtalawmo dagiti dadduma a nasion idi dumteng dagiti tattaom.

22 Pinagbalinmo dagiti Israelita a tattaom iti agnanayon ket sika, OApo, ti nagbalin a Diosda.

23 “Ita, OApoDios, agnanayon koma a tungpalem ti karim nga aramidem nga agpaay kaniak ken kadagiti kaputotak.

24 Maitantan-okkanto unay ket kunkunanto nga agnanayon dagiti tattao, ‘TiApoa Mannakabalin-amin ti Dios ti Israel.’ Taginayonemto ti panagturay dagiti kaputotak.

25 Naturedak a mangikararag iti daytoy a kararag kenka, O Diosko, agsipud ta impaltiingmo kaniak nga adipenmo, amin dagitoy ket imbagam a pagbalinemto nga ari dagiti kaputotak.

26 Sika, OApo, maysaka a Dios ket sika ti nangikari iti daytoy nakaskasdaaw a banag kaniak.

27 Dawatek a bendisionam dagiti kaputotak tapno agtultuloy latta ti panaglak-amda iti paraburmo. OApo, binendisionam ida ket agtalinaed koma nga agnanayon ti bendisionmo kadakuada.”

Dagiti Balligi ni David iti Pannakigubatna

1 Iti saan a mabayag, rinaut manen ni David dagiti Filisteo ket pinarmekna ida. Sinakupna ti siudad ti Gat ken dagiti kabangibangna a barrio.

2 Pinarmekna met dagiti Moabita. Inturayanna ida ket nagbaybayadda kenkuana iti buis.

3 Insaruno ni David a rinaut ni Adadezer nga ari ti Soba, iti asideg ti Hamat, gapu ta kayat ni Adadezer a sakupen ti daga iti surong ti Karayan Eufrates.

4 Innala ni David ti 1,000 a lugan a pakigubat, 7,000 a mannakigubat a nagsakay iti kabalio ken 20,000 a saan a nagkabalio. Nangibati iti umanay a bilang ti kabalio a pagguyod kadagiti 100 a lugan ket pinilayna dagiti dadduma.

5 Idi dumteng ti armada nga imbaon dagiti taga-Siria nga adda idiay Damasco a tumulong ken ni Ari Adadezer, dinarup ni David ket pinatayna ti 22,000 a mannakigubat.

6 Nangipasdek ni David kadagiti kampo ti militar iti masakupan dagiti taga-Siria. Inturayanna dagiti Siriano ket pinagbuisna ida. Pinagballigi ni Yahweh ni David iti amin a nakigubatanna.

7 Innala ni David dagiti balitok a kalasag dagiti ofisiales ni Adadezer sana impan idiay Jerusalem.

8 Nakaad-adumet a bronse ti innalana idiay Tibhat ken Cun, dagiti siudad nga inturayan ni Adadezer. Inaramat ni Solomon dagitoy a bronse iti pannakaaramid ti nakadakdakkel a palanggana, dagiti adigi ken dagiti alikamen iti Templo.

9 Nadamag ni Toi nga ari ti Hamat a pinarmek ni David ti entero nga armada ni Adadezer.

10 Imbaonna ngarud ni Joram nga anakna tapno kablaawanna ni Ari David ken yebkasna ti ragsakna iti panangparmekna ken ni Adadezer a namin-adun a kinagubgubat ni Toi. Nangitugot ni Joram kadagiti alikamen a naaramid iti balitok, pirak ken bronse nga insagutna ken ni David.

11 Indaton ni David dagitoy a maaramat iti pagdaydayaw agraman dagiti pirak ken balitok nga innalana kadagiti nasion a pinarmekna—Edom, Moab, Ammon, Filistia ken Amalec.

12 Pinarmekni Abisai nga anak ni Sarvia dagiti Edomita idiay Tanap ti Asin ket pinatayna ti 18,000 kadakuada.

13 Nangipasdek kadagiti kampo ti militar iti entero nga Edom ket inturayan ni David dagiti taga-sadiay. Iti sadinoman a nakigubatan ni David, pinagballigi ni Yahweh.

14 Inturayan ni David ti entero nga Israel. Impatungpalna ti linteg, ket inkagumaanna a maipakat ti hustisia iti amin nga iturayanna.

15 Ni Joab nga anak ni Sarvia ti pangulo ti armada; ni Jehosafat nga anak ni Ahilud ti agay-aywan kadagiti papeles ti pagarian;

16 ni Zadok nga anak ni Ahitub ken ni Ahimelec nga anak ni Abiatar dagiti papadi; ni Seraiasti sekretario ti ari;

17 ni Benaias nga anak ni Joyada ti pangulo dagiti guardia ti ari—dagiti Kereteo ken Feleteo; ket nangato ti akem dagiti annak ni David iti palasio.

Parmeken ni David dagiti Ammonita ken Sirio

1 Iti saan a mabayag, natay ni Naas nga ari ti Ammon. Ni Hanun nga anakna ti simmukat kenkuana nga ari.

2 Kinuna ni David, “Masapul nga ipakitak ti napudno a pannakigayyemko ken ni Hanun a kas iti impakita daydi amana kaniak.”

Nangibaon ngarud ni David kadagiti tattaona tapno idanonda ti pannakipagladingitna.

Idi sumangpetda idiay Ammon ket dimmatagda ken ni Ari Hanun,

3 kinuna dagiti pangulo dagiti Ammonita iti ari, “Mamatika kadi nga imbaon ni David dagitoy a tattao tapno yebkasda ti pannakipagladingitda kenka iti ipapatay ni amam? Saan! Imbaonna ida ditoy a kas espia a mangwanawan iti daga tapno maparmekna!”

4 Pinatiliw ni Hanun dagiti imbaon ni David, kiniskisanna dagiti barbasda, pinutedna ti pagan-anayda agingga iti patongda sana pinagawid ida.

5 Gapu iti bainda, saanda a nagawid. Idi madamag ni David ti napasamak, pinaibagana kadakuada nga agyanda pay laeng idiay Jerico ket sadanto la agsubli inton agtubo manen dagiti barbasda.

6 Nabigbig ni Ari Hanun ken dagiti Ammonita a nagbalin a kabusorda ni David ket nangarkilada kadagiti lugan a pakigubat ken tattao manipud iti Akingngato a Mesopotamia ken idiay Maaca ken Soba iti pagilian ti Siria. Nagbayadda iti dandani 40 a tonelada a pirak.

7 Dimteng dagiti 32,000 a lugan a pakigubat ken ti armada ti ari ti Maaca ket nagkampoda iti asideg ti Medeba. Rimmuar met dagiti Ammonita kadagiti siudadda ket nagsaganada a makigubat.

8 Idi madamag ni David ti mapaspasamak, imbaonna ni Joab ken ti entero nga armada.

9 Rimmuar dagiti Ammonita ket nagpuestoda iti pagserkan ti Rabba, ti kabesera a siudad. Nagyan met iti away iti ruar ti ili dagiti ari a napan timmulong.

10 Nakita ni Joab a darupen ida dagiti kabusor iti sangoanan ken iti likudan. Pinilina ngarud dagiti kalaingan a mannakigubat nga Israelita ket impuestona ida a sumaranget kadagiti Siriano.

11 Imbaonna dagiti dadduma a soldadona iti babaen ni Abisai a kabsatna a nangipasango met kadakuada a sumaranget kadagiti Ammonita.

12 Kinuna ni Joab kenkuana, “No makitam a saanmi a kabaelan dagiti taga-Siria, umaynak tulongan. No makitak met a diyo kabaelan dagiti Ammonita, umayka met tulongan.

13 Tumuredkayo. Makigubattayo a sipipinget gapu iti pagiliantayo ken gapu kadagiti siudad ti Diostayo. Maaramid koma ti pagayatan tiApo.”

14 Dimmarup ni Joab ken dagiti tattaona ket nagtataray dagiti Siriano.

15 Idi makita dagiti Ammonita nga agtatarayda, intarayanda met ni Abisai ket simrekda iti siudad. Kalpasanna, nagsubli ni Joab idiay Jerusalem.

16 Nakita dagiti Siriano a pinarmek dagiti Israelita ida. Pinaayabanda ngarud dagiti soldado kadagiti pagilian ti Siria iti dayaen ti Karayan Eufrates. Insaadda ni Sobak a pangulo ti armada ni Adadezer a mangipangulo kadakuada.

17 Idi madamag ni David daytoy, inummongna ti armada ti Israel. Binallasiwda ti Jordan ket nagpuestoda a sumaranget kadagiti Siriano. Nangrugi ti dangadang,

18 ket nagtataray ti armada dagiti Siriano. Pinatay ni David ken dagiti tattaona ti 7,000 a Siriano a mangiturturong kadagiti lugan a pakigubat ken 40,000 a mannakigubat. Pinatayda met ni Sobak a pangulo ti armada dagiti Siriano.

19 Idi makita dagiti ari a pasurot ni Adadezer a pinarmek ida dagiti Israelita, nakikappiada ken ni David ket pinaiturayanda kenkuana.

20 Manipud idin, saanen a kayat dagiti Siriano ti tumulong kadagiti Ammonita.

Sakupen ni David ti Rabba

1 Itisumuno a kalgaw, iti tiempo a kadawyan a mapan makigubat dagiti ari, indauloan ni Joab ti armada ket rinautda ti daga ti Ammon. Linakubda ti siudad ti Rabba. Nupay kasta, nagbati ni David idiay Jerusalem. Rinaut ni Joab ti Rabba ket dinadaelna.

2 Adda balitok a korona ni Milcom a diosdagiti Ammonita; agdagsen iti 75 a libra ti korona ken natampokan iti napateg a bato. Innala ni David ti naitampok ket inkabilna iti koronana. Adu pay ti sinamsamna a sanikua iti siudad.

3 Intalawna dagiti tattao ti siudad. Adda dagiti pinagtrabahona a kas kantero, mammanday ken karpintero. Kastoy pay ti inaramidna kadagiti tattao iti amin nga ili ti Ammon. Kalpasanna, nagsubli ni David agraman dagiti tattaona idiay Jerusalem.

Dagiti Pannakigubat kadagiti Higante a Filisteo

4 Iti saan a nabayag, naggugubat manen dagiti Filisteo ken dagiti tattao ni David idiay Gezer. Iti daytoy a ranget, pinatay ni Sibbecai a taga-Husa ti maysa a higante nga agnagan iti Sippai ket naparmek dagiti Filisteo.

5 Itisabali a pannakigubat kadagiti Filisteo, pinatay ni Elhanan nga anak ni Jair ti kabsat ni Goliat, a taga-Gat. Isu ni Lami nga addaan iti gayang a kasla kadakkel ti pudonan ti pagabelan ti putanna.

6 Adda manen sabali a gubat idiay Gat a nakasarakanda iti maysa a higante nga innem ti ramay ti tunggal ima ken sakana. Kaputotan dagidi nagkauna a higante.

7 Kinaritna dagiti Israelita, ket pinatay ni Jonatan nga anak ni Samma a kabsat ni David.

8 Kaputotan dagiti higante idiay Gat dagitoy tallo a lallaki a pinatay ni David ken dagiti tattaona.

Bilangen ni David dagiti Tattao

1 Kayat ni Satanas a riribuken dagiti Israelita, isut’ gapuna nga inallukoyna ni David a mangsensus kadagiti Israelita.

2 Binilin ni David ni Joab ken dagiti dadduma a pangulo ti armada, “Sursorenyo ti entero nga Israel, manipud Beerseba agingga idiay Dan, ket bilangenyo dagiti tattao sayonto ipakaammo kaniak ti dagupda.”

3 Simmungbat ni Joab: “Sapay koma ta paaduen tiApoti bilang dagiti Israelita. Natan-ok nga Ari, adipenmo amin ida. Apay a kayatmo nga aramiden daytoy a banag ket pagbasolem ti entero a nasion?”

4 Nupay kasta, ti sao ti ari ti natungpal. Sinursor ni Joab ti entero nga Israel ket kalpasanna, nagsubli idiay Jerusalem.

5 Imbagana ken ni Ari David ti dagup dagiti lallaki a mabalin nga agsoldado: 1,100,000 iti Israel, ken 470,000 iti Juda.

6 Gapu ta saan nga inanamongan ni Joab ti bilin ti ari, dina inraman a binilang dagiti tribu ti Levi ken Benjamin.

7 Saan a naragsakan ti Dios iti naaramid, isut’ gapuna a dinusana dagiti Israelita.

8 Iti kasta, kinuna ni David iti Dios, “Nakabasolak iti nadagsen iti kastoy nga inaramidko. Pangngaasim ta pakawanennak; minamaag ti inaramidko.”

9 Kinuna ni Yahweh ken ni Gad a pagipadpadtoen ni David,

10 “Inka ibaga ken ni David nga ikkak iti tallo a pagpilianna. Aramidek ti pilienna a pangdusak kenkuana.”

11 Napan ni Gad ken ni David ket imbagana ti sao ni Yahweh, “Agpilika iti kayatmo:

12 Tallo a tawen a panagbisin? Tallo a bulan nga itartarayam ti armada dagiti kabusormo? Wenno tallo nga aldaw a panangdarup tiApokenka babaen iti kampilan ken panangibaonna iti anghelna a mangyeg iti patay iti entero nga Israel? Ania ti ibagak itiApo?”

13 Daytoy ti insungbat ni David ken ni Gad, “Narikut ti sasaadek! Ngem diak kayat a ti tao ti mangdusa kaniak. Yantangay ta manangngaasi tiApo, bay-am nga isu ti mangdusa kaniak.”

14 Nangyeg ngarud ni Yahweh iti angol kadagiti Israelita ket 70,000 ti natay.

15 Nangibaon ti Dios iti anghel a mangdadael iti Jerusalem, ngem nagbaliw ti panunotna idi ipatungpalna ti bilin ket kinunana, “Isardengmon! Isunan!” Nakatakder idi ti anghel iti asideg ti pagirikan ni Arauna a Jebuseo.

16 Nakita ni David ti anghel nga agtaktakder iti nagbaetan ti langit ken daga. Nakaiggem ti anghel iti kampilan ket sisasagana a mangdadael iti Jerusalem. Nagpakleb ni David ken dagiti pangulo dagiti tattao—nakakawesda amin iti nakersang a lupot

17 ket inkararagna, “O Dios, siak ti nagbasol. Siak ti nagpasensus. Awan ti basol dagitoy a tattao. OApoa Diosko, dusaennakami a sangafamilian ngem ispalem dagiti tattaom.”

18 Imbaga ti anghel ni Yahweh ken ni Gad a bilinenna ni David a mangbangon iti altar a pagdaydayawan ken ni Yahweh iti pagirikan ni Arauna.

19 Tinungpal ni David ti bilin ni Yahweh ket napan kas iti imbaga ni Gad kenkuana.

20 Agir-irik idi iti trigo ni Arauna ken dagiti uppat a lallaki nga annakna. Apaman a nakitada ti anghel, nagtaray dagiti annakna a napan naglemmeng.

21 Idi makita ni Arauna a sumungsungad ni Ari David, pimmanaw iti pagirikan ket nagpakleb iti sangoanan ni David.

22 Kinuna ni David kenkuana, “Ilakom kaniak ti disso a pagir-irikam tapno adda pangbangonak iti altar nga agpaay itiApoket iti kasta, sumardeng ti angol. Itedko ti tumutop a bayadna.”

23 Kinuna ni Arauna, “Alaem latta, Natan-ok nga Ari. Aramidem ti kayatmo. Adtoy dagiti baka nga idatagmo a daton a mapuoran. Adda met ditoy dagiti pagirik a tabla a pagsungrodmo ken trigo a maidatag a daton a makan. Ipadawatko amin dagitoy kenka.”

24 Ngem simmungbat ti ari, “Saan! Itedko ti tumutop a bayadna. Diak kayat nga idaton itiApoti aniaman a kukuam a saanko a binayadan.”

25 Inikkanna ni Arauna iti 600 a bagi ti balitok a bayad ti pagirikan.

26 Nangbangon sadiay iti altar a maipaay ken ni Yahweh ket nagidatag kadagiti daton a mapuoran ken daton a pakikappia. Nagkararag ket sinungbatan ni Yahweh babaen iti panangyegna iti apuy a nanguram kadagiti daton iti altar.

27 Imbaga ni Yahweh iti anghel nga isublina ti kampilanna iti kalubanna. Nagtungpal ti anghel.

28 Gapu iti daytoy, nabigbig ni David nga impangag ni Yahweh ti kararagna, isu a nagidatag kadagiti daton iti altar iti pagir-irikan ni Arauna.

29 Kadagitoy nga aldaw, adda pay laeng iti let-ang ti nasagradoan a tolda ni Yahweh nga inaramid ni Moises ken ti altar a pagidatagan iti daton a mapuoran iti pagdaydayawan idiay Gabaon.

30 Ngem saan a nakapan ni David sadiay tapno agdaydayaw iti Dios, agsipud ta kabutengna ti kampilan ti anghel ni Yahweh.

1 Kinuna ngarud ni David, “Ditoyto ti pakabangonan ti Templo tiApoa Dios. Daytoy ti altar a pagidatagan dagiti Israelita kadagiti datonda a mapuoran.”

Panagsagana iti Pannakabangon ti Templo

2 Imbilin ni Ari David nga aguummong dagiti amin a ganggannaet nga agnanaed iti Israel, ket pinagtrabahona ida. Sumagmamano kadakuada ti nagisagana kadagiti natikapan a bato a mausar iti pannakabangon ti Templo.

3 Nangted ti ari iti adu a landok a maaramid a lansa ken pangpairut kadagiti kayo a ruangan ken nakaad-adu a bronse a narigat a timbangen.

4 Nagpaala iti adu a troso a sedro ket inyeg dagitoy dagiti tattao ti Tiro ken Sidon.

5 Kinuna ni David iti nakemna, “Masapul a nadaeg ken pagdidinnamaganto iti sangalubongan ti Templo a bangonento ni anakko a Solomon. Ngem ubing pay ket awan ti padpadasna. Iti kasta, masapul nga isaganaak daytoy a Templo.” Nagurnong ngarud ni David iti adu a materiales a kasapulan iti pannakabangon ti templo sakbay ti ipapatayna.

6 Pinaayaban ni David ni Solomon nga anakna ket binilinna a mangbangon iti templo nga agpaay ken ni Yahweh a Dios ti Israel.

7 Kinunani David kenkuana, “Anakko, kayatko idi ti mangbangon iti templo a pakaidayawan tiApoa Diosko.

8 Ngem imbagana kaniak nga adu unay ti pinatayko a tattao ken namin-aduak a nakigubgubat. Dinak palubosan a mangbangon iti templo nga agpaay kenkuana gapu kadagiti adu a dara nga imbuyatko.

9 Nupay kasta, inkarina kaniak, ‘Addanto anakmo nga agturay. Addanto talna iti pagarianna agsipud ta dinto riribuken dagiti kabusorna. Solomonti nagannanto agsipud ta itedkonto iti Israel ti talna ken talged kabayatan ti panagturayna.

10 Bangonennanto ti templo a maipaay kaniak. Ibilangkonto nga anakko, ket siakto ti amana. Agnanayonto a dagiti kaputotanna ti mangituray iti Israel.’”

11 Intuloy ni David, “Ita, anakko, sapay koma ta adda kenka tiApoa Diosmo, ket sapay koma ta tungpalenna ti karina nga agballigika a mangbangon iti templona.

12 Paraburannaka koma tiApoa Diosmo iti pannakaawat ken sirib tapno maiturayam ti Israel iti mayannurot iti Lintegna.

13 Notungpalem dagiti amin a linteg nga inted tiApoken ni Moises nga agpaay kadagiti Israelita, agballigikanto. Papigsaem ti pakinakemmo. Dika agbuteng iti uray ania.

14 Intedko ti amin a kabaelak a nagurnong iti agpaay iti pannakabangon ti Templo tiApo. Nakaurnongak iti agarup 4,000 a tonelada a balitok, ken aganay nga 40,000 a tonelada a pirak. Malaksid kadagitoy, adda pay nawadwad a bronse ken landok a mausar. Nangisaganaak pay iti adu a kayo ken bato, ngem masapul a nayonam pay.

15 Adu a tattao ti mabalinmo a pagtrabahoen. Adda dagiti para-tikap iti bato, adda met kantero ken karpintero, ken adu dagiti nalalaing nga agtrabaho iti nadumaduma nga aramid

16 iti balitok, pirak, bronse ken landok. Ita, irugimon ti trabaho ket tulongannaka koma tiApo.”

17 Binilin ni David dagiti amin a pangulo dagiti Israelita a tulonganda ni Solomon.

18 Kinunana, “Adda kadakayo tiApoa Diosyo, ket pinaraburannakayo iti talna iti likmutyo. Pinagballiginak a nangparmek kadagiti tattao a nagnaed ditoy a daga. Ita, addadan iti babaen ti turayyo ken iti turay tiApo.

19 Agserbikayo ngarud itiApoa Diosyo iti amin a puso ken kararuayo. Irugiyon a bangonen ti Templo a pakadaydayawan tiApotapno maikabil iti unegna ti Lakasa ti Tulag tiApoken dagiti amin a nasagradoan nga alikamen a maaramat iti panagdaydayaw kenkuana.”

1 Idilakay unayen ni David, insaadna ni Solomon nga agari iti Israel.

Ti Trabaho dagiti Levita

2 Inummong ni Ari David dagiti amin a papangulo dagiti Israelita, agraman dagiti papadi ken dagiti Levita.

3 Binilangna dagiti lallaki a Levita nga agtawen iti 30 wenno nasursurok: 38,000 ti bilangda.

4 Dinutokanna ti 24,000 a mangimaton iti trabaho iti Templo, ken 6,000 ti agidulin iti rekord ken mangrisut kadagiti riri,

5 4,000 nga agguardia ken 4,000 nga agdaydayaw iti Dios babaen iti panangusarda kadagiti instrumento a pagtokaran nga insaganana nga agpaay iti daytoy a panggep.

6 Biningay ni David dagiti Levita iti tallo a grupo segun iti familiada: Gerson, Coat ken Merari.

7 Dua ti annak ni Gerson, da Ladan ken Simei.

8 Tallo ti annak ni Ladan, da Jehiel, Zetam ken Joel.

9 Papangulo ida dagiti familia a nagtaud ken ni Ladan. (Adda tallo a lallaki nga annak ni Simei: da Selomot, Haziel ken Haron.)

10-11 Uppat ti lallaki nga annak ni Simei: da Jahat, Zina, Jeus ken Berias, manipud inauna agingga iti inaudi. Gapu ta bassit ti bilang ti kaputotan da Jeus ken Berias, naibilangda a maysa a familia.

12 Uppat ti annak ni Coat: da Amram, Isar, Hebron ken Uzziel.

13 NiAmram nga inauna nga anakna ti ama da Aaron ken Moises. (Ni Aaron ken dagiti kaputotanna ti natudingan a mangimaton iti agnanayon kadagiti nasagradoan nga alikamen. Isuda ti mangpuor iti insenso a pagdaydayaw ken ni Yahweh, agserbi kenkuana ken mangbendision kadagiti tattao iti naganna.

14 No maipapan ken ni Moises a tao ti Dios, mairaman dagiti annakna iti bunggoy dagiti Levita.)

15 Dua ti annak ni Moises: da Gersom ken Eliezer.

16 Kadagiti lallaki nga annak ni Gersom, ni Sebuel ti pangulo.

17 Maymaysa ti anak ni Eliezer, ni Rehabia, ngem adu ti kaputotanna.

18 Adda anak ni Isar a maikadua nga anak ni Coat. Isu ni Selomit a pangulo ti kapuonan.

19 Uppat ti annak ni Hebron a maikatlo nga anak ni Coat: da Jerias, Amarias, Jehaziel ken Jecameam.

20 Dua ti annak ni Uzziel a maikapat nga anak ni Coat: da Mica ken Issias.

21 Dua ti annak ni Merari: da Mali ken Musi. Dua met ti annak ni Mali: Eleazar ken Kis.

22 Natay ni Eleazar nga awan anakna a lalaki. Pasig a babbai. Nakiasawa dagiti annakna kadagiti kakasinsinda nga annak ni Kis.

23 Tallo ti annak ni Musi a maikadua nga anak ni Merari, da Mali, Eder ken Jeremot.

24 Dagitoy dagiti kaputotan ni Levi. Nailista ti naganda iti sensus segun iti kapuonan ken familiada. Tumulong amin a kaputotanna a 20 ti tawenna wenno nasursurok pay iti trabaho iti templo ni Yahweh.

25 Kinuna ni David: “Inted ti Dios ti Israel ti talna kadagiti tattaona ket pinagbalinna ti Jerusalem a pagtaenganna nga agnanayon.

26 Ngarud,saanen a masapul nga awiten dagiti Levita ti nasagradoan a Tolda ken dagiti amin nga alikamen a mausar iti panagdaydayaw.”

27 Kas mayannurot iti maudi a bilin ni David, mailista dagiti amin a Levita nga agtawen iti 20 tapno agserbida iti Templo.

28 Annongdati tumulong kadagiti papadi a kaputotan ni Aaron iti panagdaydayaw iti Templo. Aywananda met dagiti paraangan ken kuarto ti templo ken kitaenda a saan a matulawan dagiti amin a nasagradoan a banag.

29 Isuda ti makaammo iti tinapay a maidaton iti Dios, iti arina a maaramat kadagiti daton, kadagiti tinapay nga awan lebadurana, kadagiti bibingka a daton, ken iti arina a nagamay iti lana. Isuda ti mangtimbang ken mangsukat kadagiti maidaton iti Templo.

30 Annongda pay ti agdaydayaw ken mangitan-ok ken ni Yahweh tunggal bigat ken tunggal rabii,

31 ken tunggal mapuoran dagiti daton ken ni Yahweh kadagiti Aldaw a Panaginana, Fiesta ti Lutuad ken dadduma a fiesta. Adda pagannurotan a mangikeddeng no mano a Levita ti mangannong iti daytoy a trabaho tunggal adda pakasapulanna. Annongda iti agnanayon ti agdaydayaw ken ni Yahweh.

32 Naipaannong kadakuada ti pannakaaywan ti Tolda ti Dios ken iti Templo, ken tumulong kadagiti kakabagianda, dagiti papadi a kaputotan ni Aaron iti panagdaydayaw iti Templo.

Ti Trabaho a Naipaannong kadagiti Papadi

1 Dagitoy dagiti bunggoy a nagtaud ken ni Aaron. Uppat ti lallaki nga annak ni Aaron: da Nadab, Abiu, Eleazar ken Itamar.

2 Immun-unaa natay da Nadab ken Abiu ngem ti amada, ket awan ti annakda. Daytoy ti gapuna a nagpadi da Eleazar ken Itamar a kakabsatda.

3 Binunggo-bunggoy ni Ari David dagiti kaputotan ni Aaron kas mayannurot kadagiti trabahoda. Timmulong kenkuana ni Zadok, iti kaputotan ni Eleazar, ken ni Ahimelec, iti kaputotan ni Itamar.

4 Sangapulo ket innem a grupo ti nakabunggoyan dagiti kaputotan ni Eleazar. Walo met a grupo ti nakabunggoyan dagiti kaputotan ni Itamar. Naaramid daytoy ta ad-adu ti lallaki a pangulo ti familia kadagiti kaputotan ni Eleazar.

5 Gapu ta adda dagiti ofisiales ti Templo ken dagiti pangulo kadagiti naespirituan a banag a nagtaud kadagiti kaputotan da Eleazar ken Itamar, naited ti annong dagiti papadi babaen iti binnunot.

6 Kalpasanna, inlista ida ni Semaias nga anak ni Netanel a sekretario a Levita. Naimatangan daytoy ti ari, dagiti ofisialesna, ni Zadok a padi, ni Ahimelec nga anak ni Abiatar ken dagiti pangulo dagiti familia dagiti papadi ken dagiti Levita. Nagsusublat dagiti kaputotan ni Eleazar ken ni Itamar iti panagbibinnunotda.

7-18 Daytoy ti panagsasaganad dagiti 24 a grupo ti familia idi bunotenda ti annongda: 1) Jehoyarib; 2) Jedayas; 3) Harim; 4) Seorim; 5) Malkija; 6) Mijamin; 7) Hakkoz; 8) Abias; 9) Jesua; 10) Secanias; 11) Eliasib; 12) Jakim; 13) Huppa; 14) Jesebeab; 15) Bilga; 16) Immer; 17) Hezir; 18) Happizzez; 19) Petahias; 20) Jehezkel; 21) Jakin; 22) Gamul; 23) Delaias; 24) Maazias.

19 Nailista dagitoy a lallaki segun kadagiti annongda no sumrekda iti Templo ket aramidenda dagiti pagrebbenganda nga intuyang ni Aaron a kapuonanda kas panagtungpalda kadagiti bilin ni Yahweh a Dios ti Israel.

Ti Listaan dagiti Levita

20 Dagitoy ti dadduma a pangulo ti familia a nagtaud ken ni Levi:

Jehedias, iti kaputotan ni Subael a nagtaud ken ni Amram;

21 Isias, iti kaputotan ni Rehabia;

22 Jahat, iti kaputotan ni Selomit a nagtaud ken ni Isar;

23 Jerias, Amarias, Jehaziel, ken Jakameam nga annak ni Hebron, segun ti panagsasaganad ti tawenda;

24 Samir, iti kaputotan ni Mikeas a nagtaud ken ni Uzziel;

25 ken Zacarias, iti kaputotan ni Isias a nagtaud ken ni Uzziel. Agkabsat da Isias ken Mikeas.

26 Dagiti kaputotan ni Merari: da Mali, Musi ken Jaazias.

27 Tallo ti annak ni Jaazias: Soham, Zaccur ken Ibri.

28-29 Dua ti annak ni Mali: da Eleazar ken Kis. Awan ti anak ni Eleazar ngem adda maysa nga anak ni Kis, isu ni Jerameel.

30 Tallo ti annak ni Musi: da Mali, Eder ken Jerimot.

Dagitoy dagiti familia dagiti Levita.

31 Ti pangulo ti tunggal familia ken ti adienna ti bimmunot kadagiti annongda kas iti inaramid dagiti kakabagianda a papadi a nagtaud ken ni Aaron. Naimatangan daytoy ni Ari David, Zadok, Ahimelec ken dagiti pangulo dagiti familia dagiti papadi ken dagiti Levita.