Month: March 2020

Categories
Nehemias

Nehemias 10

1 Ni Gobernador Nehemias nga anak ni Hacalias ti immuna a nagfirma. Simmaruno ni Zedekias kenkuana.

2-8 Dagitoy dagiti papadi a nagfirma:

Seraias, Azarias, Jeremias,

Pashur, Amarias, Malkija,

Hattus, Sebanias, Malluk,

Harim, Meremot, Obadias,

Daniel, Ginneton, Baruc,

Mesullam, Abias, Mijamin,

Maasias, Bilgai ken

Semaias.

9-13 Dagiti Levita:

Jesua nga anak ni Azanias,

Binnui iti kapuonan ni Henadad,

Kadmiel, Sebanias, Hodias,

Kelita, Pelaias, Hanan,

Mica, Rehob, Hasabias,

Zakkur, Serebias, Sebanias,

Hodias, Bani ken Beninu.

14-27 Dagiti papangulo dagiti tattao:

Paros, Pahat Moab,

Elam, Zattu, Bani,

Bunni, Azgad, Bebai,

Adoniha, Bigvai, Adin,

Ater, Hezekias, Azzur,

Hodias, Hasum, Bezai,

Harif, Anatot, Nebai,

Magpias, Mesullam, Hezir,

Mesezabel, Zadok, Jaddua,

Pelatias, Hanan, Anaias,

Oseas, Hananias, Hassub,

Hallohes, Pilha, Sobek,

Rehum, Hasabna, Maaseias,

Ahias, Hanan, Anan,

Malluk, Harim ken Baana.

Ti Tulag

28 Dakami iti entero nga Israel—papadi, Levita, guardia ti Templo, kantores iti Templo, trabahador iti Templo ken amin a simmina kadagiti ganggannaet iti pagilian gapu iti Linteg ti Dios, agraman dagiti assawa ken amin nga annakmi a nataenganen a makaawat

29 makipagsapatakami kadagiti nalatak a kakabsatmi a madusakami iti pannakailunod no saanmi a tungpalen ti sapata, ket agbiagkami kas mayannurot iti Linteg ti Dios nga intedna babaen ken ni Moises nga adipenna. Tungpalenmi dagiti amin a linteg nga ibilin kadakami tiApoa Diosmi.

30 Saankamia makiinnasawa kadagiti ganggannaet nga agnanaed iti dagami.

31 Noadda ilakoda a trigo wenno uray ania kadakami iti Aldaw a Panaginana wenno iti uray ania nga aldaw a nasantoan, dikami gumatang kadakuada.

Iti tunggal maikapito a tawen, dimi mulaan dagiti taltalon, ket pakawanenmi amin nga utang.

32 Tinawena mangtedkami iti apagkawalo nga onsa a pirak a kas tulongmi iti Templo.

33 Itedmi dagitoy a kasapulan nga agpaay iti panagdaydayaw iti Templo: ti nasagradoan a tinapay, ti inaldaw a daton a makan, dagiti animal a mapuoran a kas daton iti inaldaw, dagiti nasagradoan a sagut iti Aldaw a Panaginana, iti Fiesta ti Lutuad ken dadduma pay a fiesta, dagiti dadduma a nasagradoan a daton, dagiti daton a pakapakawanan dagiti basol ti Israel ken aniaman a kasapulan iti Templo.

34 Dakami a tattao, papadi ken Levita, tinawen nga agbibinnunotkami tapno maammoan ti familia a mangted iti kayo a pagpuor iti daton a maidatag itiApoa Diosmi, kas mayannurot iti bilin ti Linteg.

35 Tinawennga ipanmi iti Templo dagiti daton nga agtaud iti umuna nga apitmi ken ti umuna a maluom a bunga dagiti kayomi.

36 Kassagudayen ti Linteg, ipanmi kadagiti papadi nga agserserbi iti Templo dagiti sumaganad: ti inauna nga anakmi a lalaki tapno maidaton iti Dios; ti inauna nga urbon ti bakami; ti inauna nga urbon ti karneromi ken ti inauna nga urbon ti kaldingmi.

37 Ipanmimet kadagiti papadi iti Templo ti bellaay a maaramid iti umuna nga apit iti tinawen, kasta met dagiti dadduma a datonmi nga arak, lana ti olibo ken amin a kita ti frutas.

Ipanmi kadagiti Levita, isuda nga agur-urnong kadagiti apagkapullo dagiti maapit iti dagami, dagiti apagkapullo dagiti apit iti talonmi.

38 Tunggalmakolekta dagiti apagkapullo, kumuyog dagiti papadi a kaputotan ni Aaron kadagiti Levita. Ikabil dagiti Levita ti maurnongda iti pagiduldulinan iti Templo tapno mausar iti Templo ti amin a maurnongda.

39 Ipan dagiti Israelita ken dagiti Levita dagiti maited a makan, arak ken lana ti olibo iti pagiduldulinan kadagiti alikamen ti Templo ken iti pagyanan dagiti papadi a madama nga agserserbi, dagiti guardia ti Templo ken dagiti kamkameng ti koro ti Templo.

Diminto baybay-an ti balay ti Diosmi.

Categories
Nehemias

Nehemias 11

Dagiti Tattao a Nagnaed idiay Jerusalem

1 Nagnaed idiay Jerusalem dagiti papangulo. Nagbibinnunot met dagiti dadduma a tattao tapno pilienda ti maysa a familia iti tunggal sangapulo a mapan agnaed iti nasantoan a siudad ti Jerusalem. Agnaed dagiti sabali kadagiti dadduma a siudad ken il-ili.

2 Dinaydayaw dagiti tattao dagiti nagboluntario nga agnaed idiay Jerusalem.

3 Ngemiti dadduma nga ili ti Juda, nagnaed ti tunggal maysa iti bukodna a daga iti ilina. Nairaman ditoy dagiti Israelita, dagiti papadi, dagiti Levita, dagiti trabahador ti Templo ken dagiti kaputotan dagidi nagserserbi ken ni Solomon. Daytoy ti listaan dagiti mabigbigbig nga umili iti probinsia ti Juda a nagnaed idiay Jerusalem:

4 Dagiti kamkameng ti tribu ni Juda:

Ni Ataias nga anak ni Uzzias ken apoko ni Zacarias. Mairaman ti dadduma a kapuonanna da Amarias, Sefatias ken Mahalalel, dagiti kaputotan ni Perez nga anak ni Juda.

5 Ni Maaseias nga anak ni Baruc ken apoko ni Colhoze. Mairaman ti dadduma a kapuonanna da Hazaias, Adaias, Joyarib ken Zacarias, dagiti kaputotan ni Sela nga anak ni Juda.

6 Kadagiti kaputotan ni Perez, 468 a mabigbigbig a lallaki ti nagnaed idiay Jerusalem.

7 Dagiti kamkameng ti tribu ni Benjamin:

Ni Sallu nga anak ni Mesullam ken apoko ni Joed. Mairaman ti dadduma a kapuonanna da Pedaias, Kolaias, Maaseias, Itiel ken Jesaias.

8 Da Gabbai ken Sallai nga asideg a kabagianni Sallu.

Agdagup iti 928 dagiti familia dagiti Benjaminita a nagnaed idiay Jerusalem.

9 Ni Joel nga anak ni Zikri ti panguloda. Ni Juda nga anak ni Hassenua ti maikadua nga ofisial iti siudad.

10 Dagiti papadi:

Ni Jedaias nga anak ni Joyarib ken ni Jakin.

11 Ni Seraias nga anak ni Hilkias ken apoko ni Mesullam. Ti dadduma a kapuonanna mairaman da Zadok, Merayot ken Ahitub a mangimaton idi iti Templo.

12 Agdagup iti 822 dagiti kamkameng daytoy a familia a nagserbi iti Templo.

Adaias nga anak ni Jeroham ken apoko ni Pelalias. Mairaman ti dadduma a kapuonanna da Amzi, Zacarias, Pashur ken Malkija.

13 Agdagup iti 242 dagiti kamkameng daytoy a kaputotan ti ulo ti familia.

Ni Amasai nga anak ni Azarel ken apoko ni Azai. Mairaman ti dadduma a kapuonanna da Mesillemot ken Immer.

14 Adda 128 a mabigbigbig a mannakigubat a kamkameng daytoy a familia. Ni Zabdiel a kameng ti mabigbigbig a familia ti panguloda.

15 Dagiti Levita:

Ni Semaias nga anak ni Hassub ken apoko ni Azrikam. Mairaman ti dadduma a kapuonanna da Hasabias ken Bunni.

16 Da Sabbetai ken Josabad, mararaem a Levita a mangimaton iti trabaho iti ruar ti Templo.

17 Ni Mattanias nga anak ni Mica ken apoko ni Zabdi a kaputotan ni Asaf. Impanguloanna dagiti kantores iti templo iti panagkanta iti kararag ti panagyaman.

Ni Bakbukias a katulongan ni Mattanias.

Ni Abda nga anak ni Sammua ken apoko ni Galal a kaputotan ni Jedutun.

18 Agdagup iti 284 dagiti Levita a nagnaed iti nasantoan a siudad ti Jerusalem.

19 Dagiti guardia ti Templo:

Akkub, Talmon ken dagiti kakabagianda. Agdagupda iti 172.

20 Nagnaed ti dadduma kadagiti Israelita ken dagiti nabati a papadi ken Levita iti bukodda a daga kadagiti dadduma a siudad ken il-ili ti Juda.

21 Dagiti trabahador iti Templo nagnaedda iti paset ti Jerusalem a managan Ofel, ket da Siha ken Gispa ti nangimaton kadakuada.

22 Ni Uzzi nga anak ni Bani ken apoko ni Hasabias ti kapatas dagiti Levita a nagnaed idiay Jerusalem. Mairaman ti dadduma a kapuonanna da Mattanias ken Mica. Nagtaud iti familia ni Asaf, ti familia nga akin-rebbeng iti musika iti panagdaydayaw iti Templo.

23 Adda dagiti bilin nga inted ti ari a mangibaga iti panagsisinnublat dagiti familia a mangipangulo iti musika iti Templo iti inaldaw.

24 Ni Petahias nga anak ni Mesezabel iti familia ni Zera ken iti tribu ni Juda ti nangibagi kadagiti Israelita iti palasio ti Persia.

Dagiti Tattao kadagiti Dadduma nga Il-ili ken Siudad

25 Adu kadagiti tattao ti nagnaed kadagiti il-ili nga asideg kadagiti talonda. Nagnaed dagiti tattao iti tribu ti Juda iti siudad ti Arba, Dibon ken Jekabseel ken kadagiti kabangibang a barbarrio.

26 Nagnaedda pay kadagiti siudad ti Jesua, Molada, Bet Pelet,

27 Hazarsual ken Beerseba ken kadagiti barbarrio iti lawlawna;

28 iti siudad ti Siklag, Mecona agraman dagiti barbarriona,

29 idiay Enrimmon, Zora, Jarmut,

30 Zanoa, Adullam ken kadagiti kabangibang a luglugar. Nagnaedda idiay Lakis ken kadagiti asideg a taltalon ken idiay Azeka ken kadagiti kabangibangda. Kayatna a sawen, nagnaed dagiti tattao ti Juda iti nagbaetan ti Beerseba iti abagatan ken ti Tanap ti Hinnom iti amianan.

31 Nagnaed dagiti tattao iti tribu ti Benjamin iti siudad ti Geba, Mikmas, Aija, Betel ken kabangibang a barrio,

32 Anatot, Nob, Ananias,

33 Hasor, Rama, Gittaim,

34 Hadad, Zeboim, Neballat,

35 Lod, Ono ken iti Tanap dagiti Agparpartuat.

36 Sumagmamano a grupo dagiti Levita iti sakup ti Juda ti natudingan a makipagnaed kadagiti Benjaminita.

Categories
Nehemias

Nehemias 12

Ti Listaan dagiti Papadi ken Levita

1 Daytoy ti listaan dagiti papadi ken Levita a naitalaw a kas balud ken nagsubli a kadua ni Zerubbabel nga anak ni Salatiel ken ni Josue a Nangato a Padi:

2-7 Dagiti papadi:

Seraias, Jeremias, Ezra,

Amarias, Malluk, Hattus,

Secanias, Rehum, Meremot,

Iddo, Ginnetoi, Abias,

Mijamin, Maadias, Bilga,

Semaias, Joyarib, Jedaias,

Sallu, Amok, Hilkias ken Jedaias.

Papangulo dagitoy a lallaki kadagiti padada a papadi idi tiempo ni Josue.

8 Dagiti Levita:

Dagitoy dagiti mangimaton iti panagkanta kadagiti himno a pagyaman: Jesua, Binnui, Kadmiel, Serebias, Juda ken Mattanias.

9 Dagitoy dagiti kantores nga agkanta iti pagsungbat: Bakbukias, Unno ken dagiti padada a Levita.

Dagiti Kaputotan ni Josue a Nangato a Padi

10 Ni Josue ti ama ni Joyakim. Ni Joyakim ti ama ni Eliasib. Ni Eliasib ti ama ni Joyada.

11 Ni Joyada ti ama ni Jonatan. Ni Jonatan ti ama ni Jaddua.

Papangulo dagiti Familia dagiti Papadi

12-21 Idi ni Joyakim ti Nangato a Padi, dagitoy dagiti papangulo ti kapuonan dagiti papadi:

Meraias Seraias
Hananias Jeremias
Mesullam Ezra
Jehohanan Amarias
Jonatan Malluki
Jose Sebanias
Adna Harim
Helkai Merayot
Zacarias Iddo
Mesullam Ginneton
Zikri Abias
… Miniamin
Piltai Moadias
Sammua Bilga
Jehonatan Semaias
Mattenai Joyarib
Uzzi Jedaias
Kallai Sallai
Eber Amok
Hasabias Hilkias
Netanel Jedaias

Listaan ti Familia dagiti Papadi ken Levita

22 Adda naidulin a listaan dagiti papangulo ti familia dagiti Levita ken ti familia dagiti papadi idi tiempo dagiti sumaganad a Nangato a Papadi: Eliasib, Joyada, Johanan ken Jaddua. Naaramid ti listaan idi ni Dario ti emperador ti Persia.

23 Nailanad ti nagan dagiti papangulo ti familia dagiti Levita iti ofisial a listaan agingga iti tiempo ni Johanan nga apoko ni Eliasib.

Maituding dagiti Annongen iti Templo

24 Nabunggo-bunggoy dagiti Levita nga ipanguloan da Hasabias, Serebias, Jesua, Binnuiken Kadmiel. Dua a bunggoy ti agsinnungbat nga agdaydayaw ken agyaman iti Dios kas mayannurot iti bilin nga inted ni Ari David a tao ti Dios.

25 Dagitoy dagiti guardia ti Templo a mangaywan iti kuarto a pagiduldulinan iti asideg ti ruangan ti Templo: Mattanias, Bakbukias, Obadias, Mesullam, Talmon ken Akkub.

26 Adda dagitoy a tattao idi panawen ni Joyakim nga anak ni Josue ken apoko ni Josadac. Ni Nehemias idi ti gobernador ket tiempo ni Ezra a padi ken masirib iti Linteg.

Maikonsagrar ti Bakud ti Siudad

27 Idi maidaton ti bakud ti siudad ti Jerusalem, naayaban dagiti Levita iti amin a lugar a pagnanaedanda tapno dumar-ayda iti parambak ti pannakaikonsagrar ti bakud a madanggayan iti kankanta ti panagyaman ken iti aweng ti piangpiang ken arpa.

28 Naggapu dagiti kumakanta a familia dagiti Levita kadagiti lugar iti likmut ti Jerusalem, manipud kadagiti il-ili iti lawlaw ti Netofa,

29 ken manipud Bet Gilgal, Geba ken Asmabet a nagnaedanda.

30 Inaramid dagiti papadi ken Levita ti seremonia ti pannakadalus dagiti bagbagida, dagiti tattao, dagiti ruangan ken bakud ti siudad.

31 Inummongko dagiti papangulo ti Juda iti rabaw ti bakud, ket tinudengak ida a mangimaton iti dua a dadakkel a grupo a manglawlaw iti siudad nga agyaman iti Dios.

Nagpakannawan ti maysa a grupo iti rabaw ti bakud nga agturong iti Ruangan a Pagibellengan.

32 Adda ni Hosaias iti likudan dagiti kumakanta, ket sinaruno ti kagudua dagiti pangulo ti Juda.

33-35 Simmaruno met dagitoy a papadi nga agpuypuyot iti trumpeta: Azarias, Ezra, Mesullam, Juda, Benjamin, Semaias ken Jeremias. Simmaruno ni Zacarias nga anak ni Jonatan ken apoko ni Semaias. (Mairaman ti dadduma a kapuonanna da Mattanias, Micaias ken Zaccur iti kapuonan ni Asaf.)

36 Simmaruno kenkuana dagiti dadduma a kamkameng ti familiana—da Semaias, Azarel, Milalai, Gilalai, Maai, Netanel, Juda ken Hanani. Nagiggemda amin iti pagtokaran a kas iti daydi inaramat ni Ari David a tao ti Dios. Ni Ezra a masirib ti nangidaulo iti libot.

37 Idi makadanonda iti Ruangan ti Ubbog, immulida iti agdan nga agturong iti Siudad ni David. Linabasanda ti palasio ni David sada nagsubli iti bakud ti Ruangan ti Danum iti akindaya a paset ti siudad.

38 Nagpakannigid ti maysa a grupo iti rabaw ti bakud, ket simmarunoak kadakuada, agraman kagudua ti bilang dagiti tattao. Linabsanmi ti Torre dagiti Urno. Dimmanonkam iti Akaba a Bakud.

39 Manipud sadiay, linabsanmi ti Ruangan ti Efraim, Ruangan ti Jesana,Ruangan ti Ikan, ti Torre ni Hananel ken ti Torre dagiti Sangagasut, ket nagturongkam iti Ruangan dagiti Karnero. Nagpatinggakam iti asideg ti Ruangan ti Guardia.

40 Nagsabat dagiti dua a grupo nga agkankanta iti pagyaman iti Dios iti masakupan ti Templo.

Malaksid kadagiti kinaduak a papangulo,

41 kinaduak met dagitoy a papadi nga agpuypuyot iti trumpeta: Eliakim, Maaseias, Miniamin, Micaias, Elioenai, Zacarias ken Hananias.

42 Adda met dagitoy a kumakanta nga impanguloan ni Jezrahias: Maaseias, Semaias, Eleazar, Uzzi, Jehohanan, Malkija, Elam ken Ezer. Inkabilda amin a kabaelanda nga agkanta.

43 Iti dayta nga aldaw, adu ti naidatag a daton, ket kasta unay ti rag-o dagiti tattao gapu iti kinaimbag nga impaay ti Dios kadakuada. Nakipagrambak met dagiti babbai ken ubbing, ket uray la mangngeg iti adayo a lugar ti ariwawada.

Dagiti Sagut iti Panagdaydayaw iti Templo

44 Iti dayta a tiempo, adda dagiti lallaki a nadutokan a mangaywan kadagiti kuarto a pagiduldulinan kadagiti kontribusion nga agpaay iti Templo, agraman dagiti apagkapullo ken dagiti umuna nga apit ken bungbunga a maluom tunggal tawen. Isuda ti agkolekta kadagiti ited dagiti tattao manipud kadagiti talon iti asideg dagiti nadumaduma a siudad a maipaay kadagiti papadi ken Levita a kas sagudayen ti Linteg. Ngamin, naragsakan dagiti taga-Juda iti panagserbi dagiti papadi ken Levita,

45 agsipudta tinungpalda ti bilin ti Dios ken inaramidda ti seremonia ti pannakadalus. Inaramid met dagiti kantores ti Templo ken dagiti guardia ti Templo dagiti annongenda kas mayannurot kadagiti alagaden nga intuyang ni Ari David ken ni Solomon nga anakna.

46 Manipud idi tiempo ni Ari David ken ni Asaf a musiko idi un-unana, dagiti musiko ti nangidaldalan iti pannakakanta dagiti kanta a pagdaydayaw ken pagyaman iti Dios.

47 Idi tiempo ni Zerubbabel ken uray idi tiempo ni Nehemias, nagited amin dagiti Israelita kadagiti inaldaw a sagut a maipaay iti kasapulan dagiti kantores ken guardia ti Templo. Inlasinda ti binglay dagiti Levita ket inted met dagitoy ti naituding a bingay dagiti papadi.

Categories
Nehemias

Nehemias 13

Pannakaisina kadagiti Ganggannaet

1 Idimaibasbasa ti Linteg ni Moises kadagiti tattao, nakadanonda iti maysa a paset a nagkuna a maiparit ti Ammonita wenno Moabita a tumipon kadagiti tattao ti Dios.

2 Ngamin,dida inikkan idi dagiti Israelita iti kanen ken inumen idi rimmuarda idiay Egipto. Tinangdananda ketdi ni Balaam a mangilunod iti Israel ngem pinagbalin ti Diostayo ti lunod a bendision.

3 Idi mangngeg dagiti Israelita daytoy a linteg, linaksidda iti Israel ti amin a tattao a ganggannaet.

Dagiti Reforma nga Imbanag ni Nehemias

4 Nabayagen a nasayaat ti panagtunos da Eliasib a padi ken ni Tobias. Ni Eliasib ti mangay-aywan kadagiti kuarto a pagiduldulinan iti uneg ti Templo.

5 Pinalubosanna ni Tobias a mangaramat iti dakkel a kuarto a nairanta a pagidulinan laeng kadagiti daton a makan ken insenso; alikamen a maar-aramat iti Templo; dagiti daton nga agpaay kadagiti papadi; ken dagiti apagkapullo ti trigo, arak ken lana ti olibo a maited kadagiti Levita, kadagiti kantores ti Templo ken kadagiti guardia ti Templo.

6 Awanak idiay Jerusalem idi mapaspasamak dagitoy. Ngamin, iti maika-32 a tawen a panagari ni Artaxerxes,nagsubliak idiay Babilonia tapno makiumanak kenkuana. Iti saan a nabayag, pinalubosannak,

7 ket nagsubliak idiay Jerusalem. Naklaatak a nakaammo a pinalubosan ni Eliasib ni Tobias a mangaramat iti maysa a kuarto iti Templo.

8 Kasta unay ti pungtotko ket impurruakko iti ruar dagiti amin a gargaret ni Tobias.

9 Imbilinko a maaramid ti seremonia ti pannakadalus dagiti kuarto sako pinaisubli dagiti alikamen ti Templo, dagiti daton a makan ken ti insenso.

10 Nadamagkopay a pimmanawen dagiti Levita ken dagiti kantores ti Templo ket nagsublida kadagiti talonda, gapu ta saan nga umdas a pagbiagda ti it-ited dagiti tattao.

11 Inungtak dagiti ofisiales iti panangipalubosda a mabaybay-an ti Templo. Insublik dagiti Levita ken musiko ket pinagtrabahok manen ida iti Templo.

12 Kalpasanna,inyeg dagiti amin nga Israelita dagiti apagkapullo ti trigo, arak ken lana ti olibo kadagiti bodega iti Templo.

13 Insaadko dagiti sumaganad a mangaywan kadagiti pagiduldulinan: Selemias a padi; Zadok a masirib iti Linteg; ken Pedaias, maysa a Levita. Ni Hanan nga anak ni Zaccur ken apoko ni Mattanias ti katulonganda. Ammok a mapagtalkan dagitoy a tattao a mangiwaras kadagiti kasapulan dagiti padada nga agtartrabaho.

14 Laglagipem, O Diosko, amin dagitoy nga impaayko iti Templom ken iti panagdaydayaw sadiay.

15 Itidayta a tiempo, nakakitaak kadagiti tattao idiay Juda nga agpespespes iti ubas iti Aldaw a Panaginana. Adda dagiti agikarkarga iti trigo, arak, ubas, igos ken dadduma pay kadagiti asnoda sada ipan idiay Jerusalem. Binallaagak ida a saanda nga aglako iti aniaman iti dayta nga aldaw.

16 Sumagmamano a lallaki a taga-siudad ti Tiro ti agnaed idiay Jerusalem ket agisangpetda iti ikan ken nadumaduma a tagilako nga ilakoda kadagiti kailiantayo iti Aldaw a Panaginana.

17 Inungtak dagiti papangulo a Judio ket imbagak kadakuada, “Kitaenyo ti kinadakes nga ar-aramidenyo! Pagbalinenyo a saan a nasantoan ti Aldaw a Panaginana.

18 Daytoy ti nangdusaan ti Diostayo kadagidi kapuonanyo idi dinadaelna daytoy a siudad. Ngem kaskasdi a rubrobanyo ti pungtot ti Dios iti Israel gapu iti panangtulawyo iti Aldaw a Panaginana.”

19 Ngarud, imbilinko a marikpan dagiti ruangan ti siudad apaman a dumteng ti sardama panangrugi ti Aldaw ti Panaginana ket sadanto la maluktan no mapalabas dayta nga aldaw. Pinagbantayko ti sumagmamano kadagiti tattaok kadagiti ruangan tapno awan ti palubosanda nga agiserrek kadagiti tagilako iti Aldaw a Panaginana.

20 Naminsan wenno namindua nga immian dagiti komersiante nga agtagtagilako iti amin a kita ti tagilako iti ruar ti siudad sakbay ti Aldaw a Panaginana.

21 Binallaagak ida, “Awan serserbi nga agyankayo dita ruar a pangurayanyo ti bigat. No ulitenyo daytoy, dusaenkayo.” Manipud idin, didan nagsubli iti Aldaw a Panaginana.

22 Binilinko dagiti Levita nga aramidenda ti seremonia ti pannakadalusda ket guardiaanda dagiti ruangan tapno awan duadua a mangilin ti Aldaw a Panaginana.

Laglagipennak manen, O Dios, gapu iti daytoy ket ispalennak gapu iti naindaklan nga ayatmo.

23 Itidayta a tiempo, natakuatak met nga adu kadagiti Judio ti nangasawa kadagiti babbai iti Asdod, Ammon ken Moab.

24 Kagudua ti bilang dagiti annakda ti agsao iti pagsasao ti Asdod wenno ti sabali a pagsasao ket dida ammo ti agsao iti lengguahetayo.

25 Nakisuppiatak kadakuada ket inlunodko ida. Kinabilko ida ket pinarutko ti buokda. Pinagsapatak ida iti nagan ti Dios a didanton makiasawa kadagiti ganggannaet, isuda ken dagiti annakda.

26 Imbagakkadakuada, “Dagiti ganggannaet a babbai ti nakaigapuan ti panagbasol ni Ari Solomon. Awan ti siasinoman nga ari dagiti nasion a pumada kenkuana. Inay-ayat ti Dios ket insaadna nga ari a mangituray iti entero nga Israel, ngem nagbasol gapu kadagiti ganggannaet a babbai.

27 Kayatyo kadi a sawen a tuladenmi ti dakes nga aramidyo ket sukirenmi ti Dios babaen iti panangasawami kadagiti ganggannaet a babbai?”

28 Anakni Eliasib a Nangato a Padi ni Joyada. Ngem maysa kadagiti annak ni Joyada ti nangasawa iti anak ni Sanballat a taga-ili ti Bet Horon, isu a pinapanawko ni Joyada idiay Jerusalem.

29 Laglagipem, O Dios, ti panangtulaw dagitoy a tattao iti akem a kinapadi ken iti tulagyo kadagiti papadi ken Levita.

30 Inaramidko ti seremonia tapno maikkat kadakuada ti amin a banag a ganggannaet. Nagaramidak kadagiti alagaden dagiti papadi ken dagiti Levita tapno ammo ti tunggal maysa ti annongenna.

31 Nangitudingak iti tiempo a pannakaipan dagiti kayo a pagpuor iti daton, kasta met dagiti umuna nga apit ken dagiti umuna a bungbunga a maluom.

Laglagipem amin dagitoy, O Dios, ket padayawannak.

Categories
Ester

Ester 1

Sukiren ni Reyna Vasti ni Ari Xerxes

1-2 Ni Xerxesti ari idi. Agdagup iti 127 a probinsia ti inturayanna, manipud India agingga idiay Etiopia. Idiay Susa a kabesera ti Persia ti nagturayanna nga ari.

3 Iti maikatlo a tawen a panagarina, impaayanna iti padaya dagiti amin nga ofisiales ken dadduma nga agtuturay iti pagarianna. Dimmar-ay dagiti pangulo dagiti armada ti Persia ken Media agraman dagiti gobernador ken natatan-ok a tattao kadagiti probinsia.

4 Iti las-ud ti innem a bulan, imparangna ti kinabaknang ti palasiona—ti daeg ken pintasna!

5 Kalpasan dayta a padaya, impaayanna met ti ari iti padaya nga agpaay kadagiti umili iti Susa, nabaknang ken napanglaw. Pito nga aldaw ti kapaut ti pasken a naangay iti hardin ti palasio.

6 Naarkosan ti paraangan kadagiti puraw ken asul a kurtina a naibitin kadagiti sinan-singsing a pirak a naikapet kadagiti tali a linen a nalabaga. Marmol nga adigi ti nakaikapetanda. Adda dagiti sofa a balitok ken pirak iti paraangan a nabaldosaan iti marmol a puraw, nalabaga, amarilio ken nangisit.

7 Nawadwad ti arak a naiserbi. Naaramat dagiti balitok a kopa nga agsasabali ti sukogda.

8 Saan a nakedngan ti panaginum. Imbilin ti ari kadagiti agserserbi iti palasio nga ipalubosda nga agpennek nga uminum ti tunggal maysa.

9 Kabayatanna, nangipaay met ni Reyna Vasti iti maysa a padaya para kadagiti babbai iti palasio.

10 Iti maikapito nga aldaw ti padaya, agin-inum ti ari ket naragsak unay. Iti kasta, pinaayabanna dagiti pito nga eunoko nga agserserbi kenkuana, da Mehuman, Bizta, Harbona, Bigta, Abagta, Zetar ken Carcas.

11 Imbilinna kadakuada nga idatagda ni Reyna Vasti a sikokorona. Napintas ti reyna ket kayat ti ari nga ipasindayag ti kinapintas ti asawana kadagiti ofisiales ken amin a sangailina.

12 Ngem idi imbaga dagiti adipen ti bilin ti ari, saan a kinayat ni Reyna Vasti ti mapan. Gapu iti daytoy, simged ti pungtot ti ari.

13 Ugali ti ari ti makiuman kadagiti mamasirib maipapan iti linteg ken urnos. Iti kasta, pinaayabanna dagiti mammagbaga kenkuana a makaammo iti tumutop a maaramid.

14 Pito kadagitoy nga ofisiales a taga-Persia ken Media ti masansan a pakiumananna. Isuda da Carsena, Setar, Admata, Tarsis, Meres, Marsena ken Memucan. Isuda ti agakem iti kangatoan a saad iti pagarian.

15 Kinunana kadakuada, “Saan a tinungpal ni Reyna Vasti ti bilinko nga indanon kenkuana dagiti imbaonko. Ania ti ituyang ti linteg a maaramid kenkuana?”

16 Kinuna ni Memucan iti ari ken kadagiti ofisialesna: “Saan la a ti ari ti imbabain ni Reyna Vasti no di pay ket dagiti amin nga ofisialesna—kinapudnona, amin a tattao iti pagarian!

17 Awan duadua a maammoanto dagiti amin a babbai iti pagarian ti napasamak ket isunto ti panggapuanda a di agraem kadagiti assawada. Kunadanto, ‘Binilin ni Ari Xerxes ni Reyna Vasti a dumatag kenkuana ngem saan a napan.’

18 Madamagto dagiti mararaem a babbai ti Persia ken Media ti inaramid ti reyna, ket ibagadanto kadagiti amin nga ofisiales ti ari ti napasamak ita nga aldaw. Awanton ti panagraem dagiti babbai kadagiti assawada ket guraento met dagiti lallaki dagiti assawada.

19 No pagayatam, O Natan-ok nga Ari, mangipaulogka iti bilin a pulos a saanen nga agparang dayta a Vasti iti sangoanam. Pailanadmo kadagiti linteg ti Persia ken Media tapno pulos a saan a mabaliwan. Kalpasanna, itedmo ti saad ti reyna iti sabali a babai nga ad-adda ti pannakaikarina.

20 Inton maiwaragawag ti bilinmo iti amin a suli daytoy nalawa a pagariam, agraemto ti tunggal babai iti asawana, nabaknang man wenno napanglaw.”

21 Nagustoan ti ari ken dagiti ofisialesna daytoy a kapanunotan. Inaramid ti ari ti insingasing ni Memucan.

22 Iti tunggal probinsia a masakupan ti pagarian, nangipatulod ti ari iti pakaammo a naisurat iti lengguahe ken sistema ti panagsurat iti dayta a probinsia. Naibilin a ti lalaki ti mangituray iti familiana, ket ti saona ti matungpal.

Categories
Ester

Ester 2

Maisaad ni Ester a Reyna

1 Iti saan a nabayag, bimmaaw ti pungtot ni Ari Xerxes.Ngem kankanayon a pampanunotenna ti inaramid ni Vasti ken ti impaulogna a bilin a maibusor kenkuana.

2 Insingasing ngarud ti sumagmamano a nasinged a mammagbaga iti ari, “Apay a dika agpabirok kadagiti napipintas ken ubbing a birhen a babbalasang?

3 Mangdutokka kadagiti ofisiales iti tunggal probinsia ti pagarian, ket payegmo kadakuada dagitoy a babbalasitang ditoy Susa a kabesera a siudad, iti intudingmo a pagnaedan dagiti kakasta a babbai. Maipaaywanda ken ni Hegai, ti eunoko a para aywan kadagiti babbaim, tapno mapapintasda.

4 Alaemto ti babai a magustoam unay ket isaadmo a reyna a sukat ni Vasti.”

Nagustoan ti ari daytoy a balakad ket tinungpalna.

5 Adda idi maysa a Judio nga agnaed idiay Susa. Isu ni Mardokeo nga anak ni Jair. Nagtaud iti tribu ti Benjamin ket kaputotan da Kis ken Simei.

6 Naitalawidi ni Mardokeo a kas balud manipud Jerusalem. Kaduana dagidi intalaw ni Nebucadnesar agraman ni Jeconias nga ari ti Juda.

7 Adda kasinsin ni Mardokeo nga agnagan Ester. Hadasa ti naganna iti Hebreo. Idi natay dagiti nagannak ken ni Ester, innala ni Mardokeo ket pinadakkelna a kas pudno nga anakna. Nalibnos a balasang ni Ester ket napintas ti pammagina.

8 Idi naipaulogen ti baro a bilin ti ari, adu a babbalasang ti naipan idiay Susa. Naipan met ni Ester ket naipaaywan ken ni Hegai a mangimaton iti pagnaedan dagiti babbai.

9 Nagustoan ni Hegai ni Ester ket nagun-od ni Ester ti panangipateg ni Hegai kenkuana. Dinagdagus ni Hegai nga inrugi ti pannakapapintas ni Ester babaen iti masahe ken ti pannangtedna kenkuana iti naisangsangayan a taraon. Intedna ti kapintasan a kuarto kenkuana ket nangpili iti pito a babbai a naggapu iti palasio nga agserbi kenkuana.

10 Inlimed ni Ester ti kina-Judiona agsipud ta kasta ti imbilin ni Mardokeo.

11 Inaldaw nga aglabaslabas ni Mardokeo iti sango ti paraangan ti pagnaedan dagiti babbai tapno ammoenna ti kasasaad ni Ester ken ti aniaman a mapasamak kenkuana.

12 Makatawen ti naituding a pannakapapintas dagiti babbai. Innem a bulan a masapsapoanda iti lana ti mirra ken innem met a bulan iti bangbanglo. Kalpasanna, maipan ti tunggal babai ken ni Ari Xerxes no dumteng ti batangna.

13 Mapalubosan ti tunggal maysa a mangikawes iti aniaman a kayatna iti ipapanna iti palasio.

14 Mapan iti palasio iti rabii ket iti sumuno a bigat, maipan iti sabali a kuarto tapno maipaaywan ken ni Saasgaz a para aywan kadagiti assawa ti ari. Saanen nga agsubli iti palasio malaksid no kayat ti ari ket paayabanna iti mismo a naganna.

15 Dimteng ti batang ni Ester a mapan iti ari, ni Ester nga anak ni Abihail ken kasinsin ni Mardokeo a pannakaamana, ni Ester a raraemen ti amin a makakita kenkuana. Inkawesna ti pagan-anay nga imbaga ni Hegai nga aramatenna. Ni Hegai ti para aywan iti kuarto dagiti babbai.

16 Ngarud, iti maikapito a tawen a panagari ni Xerxes, iti maika-10 a bulan a maaw-awagan iti Tebet, naidatag ni Ester ken ni Ari Xerxes iti palasio.

17 Ad-adda ti panagayat ni Xerxes ken ni Ester ngem kadagiti dadduma a babbai. Ad-adda a ni Ester ti nakagun-od iti ayat ken pammategna. Kinoronaanna ni Ester ket isu ti insaadna a reyna a sukat ni Vasti.

18 Kalpasanna, nangipaay iti dakkel a padaya a kas pammadayaw ken ni Ester. Inawisna dagiti ofisiales ken dagiti agserserbi kenkuana iti trono. Inwaragawagna pay ti panagfiesta ti entero a pagarian ket nagibunong kadagiti sagut a kas maikanatad nga aramiden ti maysa nga ari.

Isalakan ni Mardokeo ti Ari

19 Kabayatanna, dinutokan ti ari ni Mardokeo iti natan-ok a saad iti palasio.

20 No maipapan ken ni Ester, inlimedna ti kina-Judiona, kas imbilin ni Mardokeo kenkuana. Tinungpalna ni Mardokeo a kas iti panagtungpalna kenkuana idi ubing pay laeng.

21 Kabayatan ti panagsaad ni Mardokeo a kas ofisial iti palasio, dua kadagiti eunoko a mangguguardia iti ridaw ti kuarto ti ari ti gimmura ken ni Ari Xerxes ket insikatda a patayen. Isuda da Bigtana ken Teres.

22 Naammoan ni Mardokeo ti panggepda ket impulongna ken ni reyna Ester. Imbaga ngarud ti reyna iti ari ti naammoan ni Mardokeo.

23 Idi mapalutpot ti kaso, natakuatan a pudno ket nabitay dagiti dua. Imbilin ti ari a mailanad daytoy a pasamak iti libro a pakaisuratan dagiti inaldaw a mapaspasamak iti pagarian.

Categories
Ester

Ester 3

Panggep ni Haman a Papatayen dagiti Judio

1 Iti saan a mabayag, insaad ni Ari Xerxesti maysa a tao nga agnagan iti Haman a kangatoan nga ofisial ti pagarian. Isu ti anak ni Hammedata a nagtaud iti kaputotan ni Agag.

2 Binilin ti ari dagiti amin nga ofisiales nga agserserbi kenkuana a raemenda ni Haman babaen iti panagparintumeng ken panagtamedda kenkuana. Nagtungpalda amin iti bilin, malaksid ni Mardokeo.

3 Sinaludsod dagiti dadduma nga ofisiales iti palasio ken ni Mardokeo, no apay a sukirenna ti bilin ti ari.

4 Inaldaw a palagipanda ni Mardokeo ngem dina impangag ida. Inlawlawagna kadakuada a kas maysa a Judio, dina kayat ti agtamed ken ni Haman. Imbagada daytoy ken ni Haman tapno kitaenda no ipalubosna ti kasta nga ar-aramiden ni Mardokeo.

5 Napalalo ti pungtot ni Haman idi naammoanna a saan nga agparintumeng ken agtamed ni Mardokeo kenkuana.

6 Ket idi nadamagna a Judio ni Mardokeo, inkeddengna a saan la a ni Mardokeo ti dusaenna. Inkeddengna a mapapatay amin a Judio iti entero a pagarian ti Persia.

7 Bulan idi ti Nisan, ti umuna a bulan ti maika-12 a tawen a panagturay ni Ari Xerxes. Naaramid iti sangoanan ni Haman ti binnunot a maaw-awagan iti Pur tapno maammoan no ania nga aldaw ken bulan ti pannakapapatay dagiti amin a Judio. Napili ti maika-13 nga aldaw iti maika-12 a bulan a maaw-awagan iti Adar.

8 Kinunani Haman iti ari, “Adda naidumduma a tattao nga agnaed ken nawaraswaras iti amin a probinsia ti pagariam. Maigiddiat ti ugalida kadagiti dadduma a tattao, ket dida agtungpal kadagiti linteg ti pagarian. Natan-ok nga Ari, saanmo a pagimbagan no bay-am a kastoy ti aramidda.

9 No kayatmo, Natan-ok nga Ari, adda koma ipaulogmo a bilin a mapapatayda, ket ikarik a mangtedak iti 375 a tonelada a pirak iti pagidulinan iti kuarta a maaramat iti pannakaituray ti pagarian.”

10 Inuksot ti ari ti singsingna ket intedna ken ni Haman nga anak ni Hammedata a kabusor dagiti Judio. Maus-usar ti singsing a pangtimbre kadagiti bilin nga ipaulog ti ari.

11 Kinuna ti ari kenkuana, “Adda iti pannakabalinmo dagiti tattao ken dagiti kuartada. Aramidem ti kayatmo kadakuada.”

12 Iti maika-13 nga aldaw iti umuna a bulan, inayaban ni Haman dagiti sekretario ti ari ket indiktarna kadakuada ti bilin nga agpaay kadagiti agtuturay, kadagiti gobernador ken ofisiales. Ipatarusda daytoy a bilin iti tunggal pagsasao iti entero a pagarian. Naisurat ti bilin iti nagan ni Ari Xerxes ket natimbrean iti bukodna a singsing.

13 Naipan dagiti kopia daytoy a bilin iti amin a probinsia ti pagarian. Nailanad kadagitoy a bilin a mapapatay amin a Judio—agtutubo ken nataengan, babbai ken ubbing—iti maysa nga aldaw, iti maika-13 nga aldaw iti bulan ti Adar, ket masamsam dagiti sanikuada.

14 Maiwaragawag a kas linteg ti linaon ti bilin iti amin a probinsia tapno maammoan dagiti tattao iti amin a puli ket makapagsaganada iti dayta nga aldaw.

15 Naiwaragawag ti pakaammo idiay Susa a kabesera ti Persia. Sipapardas met dagiti imbaon ti ari a nangipan kadagiti kopia ti bilin iti amin a probinsia tapno maammoan ti amin a tattao iti pagarian. Naginum ti ari ken ni Haman iti arak, ngem nariribuk ti siudad ti Susa.

Categories
Ester

Ester 4

Agpatulong ni Mardokeo ken ni Ester

1 Idi maammoan ni Mardokeo ti amin a naaramid, rinay-abna ti pagan-anayna, nagkawes iti nakersang a lupot, winarakiwakanna ti ulona iti dapu ket nagpagnapagna iti siudad nga agan-anug-og iti napigsa ken nasaem.

2 Nagpatingga la iti ruangan ti palasio, ta saan a mapalubosan a sumrek ti kasta ti pagan-anayna.

3 Iti amin a probinsia a nakaipakaammoan ti bilin ti ari, napigsa ti panagdung-aw dagiti Judio. Nagayunar, nagsangit ken nagdung-awda. Adu ti nagkawes iti nakersang a lupot ken nangikabil iti dapu iti uloda.

4 Napalalo ti pannakariribuk ni Reyna Ester idi ipadamag dagiti adipenna a babbai ken eunoko ti ar-aramiden ni Mardokeo. Nagpaitulod iti pagan-anay ken ni Mardokeo tapno suktanna ti nakersang a lupot a kawesna, ngem saan nga inawat ni Mardokeo.

5 Kalpasanna, pinaayaban ni Ester ni Hatak a maysa kadagiti eunoko iti palasio a dinutokan ti ari nga agserbi kenkuana. Binilinna ni Hatak a mapan ken ni Mardokeo tapno ammoenna ti mapaspasamak ken no apay a kasta ti ar-aramiden ni Mardokeo.

6 Napan ni Hatak iti ayan ni Mardokeo iti plasa iti sangoanan ti ruangan ti palasio.

7 Imbaga ni Mardokeo ken ni Hatak ti amin a napasamak kenkuana, agraman ti dagup ti kuarta nga inkari ni Haman nga ited iti pagidulinan iti gameng ti palasio para iti pannakapapatay dagiti amin a Judio.

8 Inted ni Mardokeo kenkuana ti kopia ti bilin a naipakaammo iti Susa maipapan iti pannakapapatay dagiti Judio. Indawat ni Mardokeo nga ipakitana ken ni Ester ket ilawlawagna kenkuana ti mapaspasamak. Kiniddaw ni Mardokeo a mapan agpakpakaasi ni Ester iti ari tapno kaasianna dagiti Judio.

9 Nagtungpal ni Hatak.

10 Pinagsubli ni Ester ni Hatak ket pinaibagana daytoy ken ni Mardokeo:

11 “Mapapatay ti siasinoman a lalaki wenno babai a sumrek iti akin-uneg a paraangan tapno dumatag iti ari no saan a naayaban. Dayta ti linteg. Ammo amin daytoy dagiti mammagbaga iti ari ken dagiti tattao kadagiti probinsia. Awan ti makalisi iti daytoy a linteg malaksid no ipaturong ti ari kenkuana ti balitok a setrona ket iti kasta, saan a mapapatay. Adda makabulanen a dinak inayaban ti ari.”

12 Idi naammoan ni Mardokeo ti imbaga ni Ester,

13 pinaibagana daytoy a ballaag: “Dimo ipagarup a nataltalgedka ngem ti uray siasinoman a Judio gapu ta addaka iti palasio.

14 No agulimekka iti kastoy a mapaspasamak, tinto langit ti tumulong kadagiti Judio ket isalakanna ida. Ngem mataykanto ket mapukawton ti kaputotan ni tatangmo. Siasino ti makaammo? Nalabit a naitan-okka a kas reyna para iti kastoy a panawen.”

15 Daytoy ti sungbat ni Ester ken ni Mardokeo:

16 “Ummongem ti amin a Judio nga adda iti Susa. Agayunarkayo ket idawdawatandak. Dikay mangan wenno uminum iti uray ania iti tallo nga aldaw ken rabii. Agayunarakto met agraman dagiti adipenko a babbai. Kalpasanna, uray no maisalungasing iti linteg, innakto iti ari ket no pakatayak, awatek a siraragsak.”

17 Pimmanaw ni Mardokeo ket tinungpalna amin nga imbilin ni Ester.

Categories
Ester

Ester 5

Awisen ni Ester ti Ari ken ni Haman iti Maysa a Pannangan

1 Iti maikatlo nga aldaw a panagayunar ni Ester, inkawesna ti pagan-anayna a reyna. Napan iti akin-uneg a paraangan ti palasio a sumango iti kuarto nga ayan ti trono. Agtugtugaw idi ti ari iti tronona a sumangsango iti ruangan.

2 Idi makitana ni Reyna Ester nga agtaktakder iti ruar, naragsakan ket impaturongna kenkuana ti balitok a setro. Immasideg ni Ester sana sinagid ti murdong ti setro.

3 Kinuna ti ari, “Ania ti masapulmo, Reyna Ester? Ibagam ti kayatmo ket itedko kenka uray no kagudua ti pagariak.”

4 Simmungbat ni Ester, “No pakaragsakan ti Natan-ok nga Ari, awisenkayo koma ken ni Haman ita a rabii iti maysa a pannangan nga isagsaganak nga agpaay kadakayo.”

5 Pinaayaban a dagus ti ari ni Haman tapno matungpal ti kalikagum ni Ester. Napan ngarud ti ari ken ni Haman iti pannangan nga insagana ni Ester.

6 Bayat ti panaginumda iti arak, kinuna ti ari ken ni Ester, “Ibagam ti kayatmo ket itedko kenka. Patgak ti dawatmo, uray no kagudua ti pagariak.”

7 Kinuna ni Ester,

8 “No patgan ti Natan-ok nga Ari ti dawatko, tarigagayak a dakayo koma ken ni Haman ti sangailik manen inton bigat iti pannangan nga isaganak nga agpaay kadakayo a dua. Isunto ti panangibagak ti kayatko.”

Panggepen ni Haman a Papatayen ni Mardokeo

9 Naragsak ni Haman a naggapu iti pannangan nga insagana ni Ester. Ngem idi makitana ni Mardokeo iti ruangan ti palasio a saan a timmakder a mangipakita iti panagraemna kenkuana, nakapungtot iti kasta unay.

10 Nupay kasta, tinengngelna ti pungtotna ket nagawid. Inawisna dagiti gagayyemna iti balayna, ket inayabanna ni Zeres nga asawana a makisango kadakuada.

11 Impasindayagna kadakuada ti kinabaknangna ken ti kaadu dagiti annakna a lallaki. Impalangguadna pay ti panangingato ti ari kenkuana iti saad, nga isun ti kangatoan nga ofisial ket nangatngato ngem dagiti dadduma nga ofisiales ti ari.

12 “Saan la a dayta,” innayon ni Haman, “siak laeng ken ti ari ti inimbitaran ni Reyna Ester a dumar-ay iti pasken nga inangayna. Awisennakami a mapan manen inton bigat.

13 Ngem awan ti serserbi kaniak amin dagitoy no adda pay met laeng a makitkitak dayta Judio a Mardokeo nga agtugtugaw iti ruangan ti palasio.”

14 Imbalakad ni Zeres ken dagiti gagayyem ni Haman, “Agpaaramidka iti pagbitayan a 75 a kadapan ti kangatona. Inton bigat, dawatem iti ari a mabitay ni Mardokeo dita. Kalpasanna, makadar-ayka a siraragsak iti pannangan.”

Nagustoan ni Haman daytoy a balakadda ket nagpaaramid iti pagbitayan.

Categories
Ester

Ester 6

Padayawan ti Ari ni Mardokeo

1 Alimbasagen ti ari iti dayta met laeng a rabii, isut’ gapuna a pinaalana ti libro a nakailanadan dagiti mapaspasamak iti pagarian. Naibasa kenkuana ti libro.

2 Itimaysa a paset a naibasa, nairaman ti pakasaritaan ti pannakatakuat ni Mardokeo iti panggep da Bigtana ken Teres a mangpapatay iti ari. Dua nga eunoko dagitoy iti palasio a mangguguardia iti kuarto ti ari.

3 Sinaludsod ti ari, “Nagunggonaan kadi wenno napadayawan ni Mardokeo iti daytoy nga inaramidna?”

Imbaga dagiti adipenna nga awan ti naipaay ken ni Mardokeo.

4 Sinaludsod ti ari, “Siasino kadagiti ofisialesko ti adda iti palasio?” Nairana a simrek ni Haman iti akinruar a paraangan; napan iti palasio tapno dawatenna iti ari a mabitay ni Mardokeo iti pagbitayan a naisaganan.

5 Iti kasta, kinuna dagiti adipenna, “Adda ditoy ni Haman nga agur-uray a makisao kenka.”

“Pastrekenyo,” imbilin ti ari.

6 Simrek ni Haman ket sinaludsod ti ari kenkuana, “Adda maysa a tao a kayatko unay a padayawan. Ania ti rumbeng nga ipaayko iti dayta a tao?”

Gapu ta ipagarup ni Haman nga isu a mismo ti mapadayawan,

7-8 kinunana iti ari, “Agpaalaka iti nadaeg a pagan-anay, ti mismo a pagan-anay nga ikawkawesmo, ket itedmo iti daytoy a tao. Paguarnasionamiti napintas ti bukodmo a kabalio a pagsakayanna.

9 Kalpasanna, ayabam ti maysa kadagiti kangatoan nga ofisialesmo tapno kawesanna ken iruarna ti tao a nakakabalio iti plasa ti siudad. Paipukkawmo daytoy iti ofisial bayat ti pannagnada: ‘Kitaenyo no kasano a gunggonaan ti ari ti tao a kayatna a padayawan!’”

10 Iti kasta, kinuna ti ari ken ni Haman, “Inka alaen a dagus ti pagan-anay ken ti kabalio ket padayawam ni Mardokeo a Judio. Aramidem amin kenkuana dagiti insingasingmo. Masarakam ni Mardokeo nga agtugtugaw iti ruangan ti palasio.”

11 Napan ngarud innala ni Haman ti pagan-anay ken ti kabalio. Kinawesanna ni Mardokeo sana pinagsakay iti kabalio ket inlibutna iti plasa ti siudad. Bayat ti pannagnada, ipukpukkawna, “Kitaenyo no kasano a gunggonaan ti ari ti tao a kayatna a padayawan!”

12 Nagsubli ni Mardokeo iti ruangan ti palasio. Nagawid met ni Haman a mangab-abbong iti rupana gapu iti bain.

13 Imbagana ken ni Zeres nga asawana ken kadagiti amin a gagayyemna ti amin a napasamak kenkuana. Kinuna ni Zeres ken dagiti masirib a gagayyemna: “Mangrugin a mayallatiw ti pannakabalinmo ken ni Mardokeo. Gapu ta maysa a Judio, narigatmo ti mangibaba kenkuana—ikabilnanto ti amin a kabaelanna a mangdadael kenka.”

Mabitay ni Haman

14 Agsasaritada pay laeng idi sumangpet dagiti eunoko ti palasio ket nagdardarasda nga innala ni Haman tapno dumar-ay iti pasken nga insagana ni Ester.