Month: March 2020

Categories
Ester

Ester 7

1-2 Iti kasta, iti maikadua a gundaway, napan da Ari Xerxes ken Haman iti pannangan nga insagana ni Ester. Bayat ti panaginumda iti arak, sinaludsod ti ari ken ni Ester, “Ita, Reyna Ester, ania ti kayatmo? Ibagam kaniak ket itedko, uray no kagudua ti pagariak.”

3 Insungbat ni Reyna Ester, “Natan-ok nga Ari, no adda met la pateg ti nanumo a dawatko, dawatek a maispal ti biagko ken dagiti padak a Judio.

4 Nailakokamin—siak ken dagiti tattaok—tapno mapapatay. No nailakokami laeng a matagabu, agulimekak ket diakon ringgoren ti ari, ngem dandanidakam patayenen ket mapukawkamton!”

5 Sinaludsod ti ari ken ni Ester, “Siasino ti tao a natured a nangaramid iti kastoy? Sadino ti ayanna?”

6 “Maysa a kabusormi! Maysa a mangidadanes kadakami. Awan sabali no di ni Haman a managdakdakes,” insungbat ni Ester.

Kasta unay ti danag ni Haman a simmango iti ari ken reyna.

7 Sipupungtot a timmakder ti ari, rimmuar iti kuarto a napan iti hardin ti palasio. Narikna ni Haman a desidido ti ari a mangdusa kenkuana, isu a nagbati tapno ipakpakaasina ken ni Reyna Ester a maispal koma ti biagna.

8 Idi agsubli ti ari a naggapu iti hardin, nadanonna ni Haman iti sofa ni Ester ket sipapakleb iti sangoananna. Idi makita ti ari, impukkawna, “Ramesen kadi daytoy a tao ti reyna iti sangoanak ken iti mismo nga uneg ti palasiok?”

Apaman a naisao ti ari daytoy, inabungotan dagiti eunoko ti ulo ni Haman.

9 Kinuna ni Harbona a maysa kadagiti eunoko, “Natan-ok nga Ari, nagaramid ni Haman iti pagbitayan a 75 a kadapan ti katayagna iti asideg ti balayna tapno adda pangibitayanna ken ni Mardokeo a nangispal iti biagmo.”

“Ibitayyo dita ni Haman,” imbilin ti ari.

10 Binitayda ngarud ni Haman iti pagbitayan a nairanta ken ni Mardokeo. Ket bimmaaw ti pungtot ti ari.

Categories
Ester

Ester 8

Maibilin kadagiti Judio a Makirangetda

1 Iti dayta nga aldaw, inted ni Ari Xerxesken ni Reyna Ester ti amin a sanikua ni Haman a kabusor dagiti Judio. Imbaga ni Ester iti ari a kabagianna ni Mardokeo ket manipud idin, mapalubosanen ni Mardokeo a dumatag iti ari.

2 Inuksot ti ari ti singsing nga adda timbrena sana inted ken ni Mardokeo. Daytoy daydi singsing nga intedna ken ni Haman ngem innalana met laeng. Dinutokan ni Ester ni Mardokeo nga enkargado iti amin a sanikua ni Haman.

3 Napan manen nakisao ni Ester iti ari. Agsangsangit a nagpakleb iti sangoanan ti ari. Impakpakaasina kenkuana a pasardengenna ti pannakaipatungpal ti dakes a gandat ni Haman a kaputotan ni Agag a maibusor kadagiti Judio.

4 Intudo ti ari ti setrona ken ni Ester ket nagtakder ni Ester sana kinuna,

5 “Natan-ok nga Ari, no maragsakanka, no ay-ayatennak met laeng ken no ipagarupmo a naimbag, pangngaasim ta mangipaulogka iti bilin a mangwaswas iti naiwaragawag a bilin ni Haman nga anak ni Hammedata a kaputotan ni Agag, a mangpapatay kadagiti amin a Judio iti pagarian.

6 Kasano a maituredko a kitaen ti pannakadidigra dagiti padak a Judio ken ti pannakapapatay dagiti kabagiak?”

7 Kinuna ngarud ni Ari Xerxes kada Reyna Ester ken Mardokeo a Judio, “Kitaenyo, binitayko ni Haman gapu iti panangisikatna kadagiti Judio ket intedkon ken ni Ester dagiti sanikuana.

8 Ngem saan a mawaswas ti bilin a naipaulog iti nagan ti ari ken natimbrean iti selio ti pagarian. Nupay kasta, mabalinyo ti agsurat kadagiti Judio iti aniaman a kayatyo. Mabalinyo nga isurat iti naganko ket timbreanyo iti selio ti pagarian.”

9 Napasamak daytoy iti maika-23 nga aldaw iti maikatlo a bulan a maaw-awagan iti Sivan. Inayaban ni Mardokeo dagiti sekretario ti ari ket indiktarna ti surat nga agpaay kadagiti Judio, kadagiti gobernador, kadagiti administrador, kadagiti ofisiales kadagiti 127 a probinsia manipud India agingga iti Etiopia. Naisurat daytoy a bilin iti bukod a panagsurat ken bukod a pagsasao ti tunggal probinsia, kasta met iti bukod a panagsurat ken bukod a pagsasao dagiti Judio.

10 Pinaisurat ni Mardokeo iti nagan ni Ari Xerxes, ket natimbrean ti surat iti selio ti pagarian. Pinaitulodna dagiti surat kadagiti nagsakay kadagiti napapardas a kabalio ti ari.

11 Iti daytoy a bilin ti ari, naikkan dagiti Judio iti kalintegan nga agtitimpuyog iti tunggal siudad ket salaknibanda ti bagida. Dadaelen, papatayen ken ikisapda ti aniaman a grupo dagiti armado a tattao iti aniaman a probinsia a mangraut kadakuada agraman dagiti assawa ken annakda, ken samsamenda dagiti sanikua dagiti kabusorda.

12 Maipatungpal daytoy a bilin iti entero a pagarian ti Persia iti aldaw a naikeddeng a pannakapapatay dagiti Judio—iti maika-13 nga aldaw ti maika-12 a bulan a maaw-awagan iti Adar.

13 Maipakaammo ti bilin a kas linteg iti amin a probinsia tapno makapagsagana dagiti Judio a mangsalaknib kadagiti bagbagida kadagiti kabusorda inton dumteng dayta nga aldaw.

14 Ngarud, dinagdagus dagiti nagkabalio ti napan a sipapardas iti nakaibaonanda, kas bilin ti ari. Naipaulog met ti bilin idiay Susa, ti kabesera a siudad.

15 Rimmuar ni Mardokeo iti palasio, nadaeg ti arruatna: asul ken puraw a pagan-anay, ken nalabaga a linen a kagay, ken nadayag a balitok a koronana. Ket nagallangogan ti dir-i kadagiti kalsada idiay Susa gapu iti ragsak dagiti umili.

16 Nagragsak ken nagrag-o dagiti Judio ta dakkel a pammadayaw daytoy kadakuada.

17 Iti tunggal probinsia ken siudad a nakaiwaragawagan ti bilin ti ari, nagrambak dagiti Judio. Ket iti entero a pagarian, adu ti nangipakaammo a Judioda gapu ta kabutengdan dagiti Judio.

Categories
Ester

Ester 9

Patayen dagiti Judio dagiti Kabusorda

1 Dimteng ti maika-13 nga aldaw iti bulan ti Adar. Daytoy ti aldaw a naituding a pannakaipatungpal ti bilin ti ari. Ninamnama dagiti kabusor dagiti Judio a parmekenda dagiti Judio iti daytoy nga aldaw. Ngem baliktad ti napasamak ta dagiti Judio ketdi ti nangparmek kadagiti kabusorda.

2 Iti lugar a yan dagiti Judio, iti tunggal siudad ti pagarian, nagmaymaysa dagiti Judio a mangdarup iti siasinoman nga agpanggep a mangdangran kadakuada. Nagbuteng dagiti amin a tattao kadakuada. Awan ti nakadaer a makiranget kadakuada.

3 Kinaagpaysona, tinulongan ida dagiti amin nga ofisiales ti probinsia, dagiti gobernador, dagiti administrador ken dagiti pannakabagi ti palasio agsipud ta mabutengda amin ken ni Mardokeo.

4 Ammo ti entero a pagarian a nagbalinen ni Mardokeo a nabileg a tao iti palasio ket bumilbileg pay.

5 Iti kasta, naaramid dagiti Judio ti kinayatda nga aramiden kadagiti kabusorda. Sikakampilanda a nangdarup kadagiti kabusorda ket pinapatay ken rinangrangkayda ida.

6 Iti laeng siudad ti Susa, 500 a tattao ti pinapatayda.

7 Pinatayda met da Parsandata, Dalfon, Asfata,

8 Porata, Adalia, Aridata,

9 Parmasta, Arisai, Aridai ken Vaizata.

10 Dagitoy dagiti sangapulo a lallaki nga annak ni Haman nga anak ni Hammedata ken kabusor dagiti Judio. Nupay kasta, saan a nagsamsam dagiti Judio.

11 Iti dayta met la nga aldaw, naipakaammo iti ari ti bilang dagiti napapatay idiay Susa.

12 Kinuna ti ari ken ni Reyna Ester, “Ditoy Susa laeng, 500 a tattao ti pinatay dagiti Judio; inramanda a pinatay dagiti sangapulo nga annak ni Haman. Nakarkaro pay ngata ti inaramidda kadagiti probinsia. Ita, ibagam no ania pay ti tarigagayam. Matungpal ti amin a kiddawem.”

13 Simmungbat ni Reyna Ester, “No pagayatam, Natan-ok nga Ari, palubosam koma dagiti Judio ditoy Susa a mangaramid manen inton bigat ti kas iti inaramidda ita nga aldaw. Dawatek met a paibitinmo iti pagbitayan dagiti bangkay dagiti sangapulo nga annak ni Haman.”

14 Imbilin ngarud ti ari a maaramid daytoy. Naipaulog ti bilin idiay Susa ket naibitin iti pagbitayan ti bangkay dagiti annak ni Haman.

15 Iti maika-14 nga aldaw ti bulan ti Adar, naguummong manen dagiti Judio. Tallogasut a lallaki ti pinapatayda iti siudad. Ngem saanda a nagsamsam.

16 Naguummong met dagiti Judio nga agnanaed kadagiti probinsia tapno salaknibanda dagiti bagida. Dinadaelda dagiti kabusorda—75,000 ti pinatayda kadagiti gumurgura kadakuada. Ngem saanda a nagsamsam.

17 Napasamak daytoy iti maika-13 nga aldaw ti bulan ti Adar. Iti maika-14 nga aldaw, saandan a nagpapatay ket nagfiestada a nagraragsak.

18 Ngem idiay Susa, nagbalin a fiesta dagiti Judio ti maika-15 nga aldaw agsipud ta pinapatayda dagiti kabusorda iti maika-13 ken maika-14 nga aldaw ket nagsardengda a nagpapatay iti maika-15 nga aldaw.

19 Daytoy ti gapuna a rambakan dagiti Judio nga agnanaed kadagiti babassit nga ili nga awan bakudna ti maika-14 nga aldaw iti bulan ti Adar. Agfiestada ket rambakanda dayta nga aldaw. Agpapangan ken agsisinnagutda iti taraon.

Ti Fiesta ti Purim

20 Pinaisurat ni Mardokeo dagitoy a pasamak. Sinuratanna dagiti amin a Judio iti entero a pagarian ti Persia, adayo man wenno asideg.

21 Binilinna ida a rambakanda ti maika-14 ken maika-15 nga aldaw ti Adar iti tunggal tawen.

22 Dagitoy dagiti aldaw a panangikisap dagiti Judio kadagiti kabusorda. Daytoy ti bulan a panagbalin a ragsak ken rag-o dagiti ladingit ken rigatda. Naibilin kadakuada a rambakanda dagitoy nga aldaw babaen iti panagfiesta ken panagkakaan. Agsisinnagutda ket ikkanda met dagiti napanglaw.

23 Iti kasta, tinungpal dagiti Judio ti bilin ni Mardokeo, ket tinawen a narambakan daytoy a fiesta.

24 NiHaman nga anak ni Hammedata a nagtaud iti kaputotan ni Agag ti nangplano iti pannakapapatay dagiti Judio. Isu ti kabusor dagiti amin a Judio. Inaramidna ti Purim a mangikeddeng iti aldaw a pannakapapatay ken pannakadadael dagiti Judio.

25 Ngem napan ni Ester iti ari, ket nangipaulog ti ari iti bilin. Nagbanag a ni Haman ti nagsagaba iti kinaranggas nga ipalak-amna koma kadagiti Judio: nabitayda kadagiti annakna.

26 Daytoy ti gapuna a “Purim” ti naipanagan kadagitoy nga aldaw a naadaw iti balikas a “pur” wenno binnunot.

Gapu iti surat ni Mardokeo ken gapu kadagiti amin a napasamak kadagiti Judio,

27 pinagbalinda daytoy nga alagadenda, kasta met dagiti kaputotanda ken dagiti agbalinto a Judio. Kas imbilin ni Mardokeo, tinawen a marambakan dagitoy dua nga aldaw iti tumutop a tiempo.

28 Masapul a ngilinen iti agnanayon ti tunggal familia a Judio, dagiti sumarsaruno a kaputotan, iti amin a probinsia ken siudad dagiti aldaw ti Purim.

29 Kalpasanna, nagaramid met ni Reyna Ester nga anak ni Abihail iti surat a mangpasingked iti immuna a surat ni Mardokeo maipapan iti Purim. Naipakuyog daytoy iti surat ni Mardokeo.

30 Naipatulod dagiti surat kadagiti amin a Judio nga agnanaed kadagiti 127 a probinsia iti imperio ti Persia. Nailanad iti surat a maaddaan koma dagiti Judio iti talna ken talged.

31 Imbilinna pay a rambakanda agraman dagiti kaputotanda dagiti aldaw ti Purim iti tumutop a tiempo, kas iti panangituyangda kadagiti alagaden iti panagngilin iti panagayunar ken tiempo ti panagdung-aw. Imbilin daytoy da Mardokeo ken Reyna Ester.

32 Naisurat iti nalukot a pagbasaan ti bilin ni Ester a nangpatalged kadagiti alagaden iti pannakarambak ti Purim.

Categories
Ester

Ester 10

Kinatan-ok ni Ari Xerxes ken ni Mardokeo

1 Intuyang ni Ari Xerxesti panagbuis dagiti tattao nga agnaed kadagiti igid ti baybay ken kadagiti naseksek a lugar iti pagarian.

2 Nailanad iti pakasaritaan dagiti ari ti Persia ken Media dagiti amin a naindaklan ken nakakaskasdaaw nga inaramidna agraman ti entero a pakasaritaan iti panangital-ona ken ni Mardokeo iti nangato a saad.

3 Ni laeng Mardokeo a Judio ti sumaruno iti saad ni Ari Xerxes. Raemen ken ipatpateg unay dagiti padana a Judio. Intrabahona ti pagimbagan dagiti kailianna ken ti kinatalged dagiti amin a kaputotanna.

Categories
Job

Job 1

Suoten ni Satanas ni Job

1 Adda idi maysa a tao nga agnagan iti Job nga agnanaed idiay Uz.Agdaydayaw iti Dios ket napudno kenkuana. Naimbag a tao ni Job ket saan nga agaramid iti dakes.

2 Sangapulo ti annakna: pito a lallaki ken tallo a babbai.

3 Adu ti animal a tarakenna: 7,000 a karnero, 3,000 a kamelio, 1,000 a baka ken 500 nga asno. Adu met ti adipenna ket isu ti kabaknangan iti deppaar ti Daya.

4 Agsisinnublat nga agpadaya dagiti lallaki nga annak ni Job ket kanayon met nga awisenda a dumar-ay dagiti kakabsatda a babbai.

5 Tunggal malpas ti padaya, bumangon a masapa ni Job ket agpuor kadagiti daton a maipaay iti pannakadalus dagiti annakna. Naipaugali nga aramidenna daytoy ta kunkunana iti bagina, “Amangan no nagbasol dagiti annakko babaen iti pananglaisda iti Dios iti unegda.”

6 Ididumteng ti aldaw a panagparang dagiti nailangitan a parsuaiti saklang ni Yahweh, kimmuyog met kadakuada ni Satanas.

7 Sinaludsod ni Yahweh kenkuana, “Sadino ti naggapuam?”

“Sinursursorko ti entero a daga,” insungbat ni Satanas.

8 “Napaliiwmo kadi ni adipenko a Job?” sinaludsod ni Yahweh. “Awan iti daga ti napudno ken awan pakapilawanna a kas kenkuana. Managbuteng kaniak ket saan nga agaramid iti dakes.”

9 Kinunani Satanas, “Agdaydayaw ngata kenka ni Job no awan ti imbag a magun-odna?

10 Sinalaknibam ni Job agraman ti familiana ken ti amin a sanikuana. Bendisionam ti amin nga aramidna ket inikkam iti adu unay nga animalna a mangsaknap iti entero a pagilian.

11 Ngem padasem man nga alaen ti amin a sanikuana ta kitaem no dinakanto ilunod!”

12 Kinuna ni Yahweh ken ni Satanas, “Ala wen, aramidem ti aniaman a kayatmo kadagiti amin nga adda kenkuana, ngem saanmo a dangran ni Job.” Ket pimmanaw ni Satanas iti imatang ni Yahweh.

Matay dagiti Annak ni Job ken Mapukaw ti Kinabaknangna

13 Iti maysa nga aldaw, idi agrarambak dagiti annak ni Job iti balay ti inauna a kabsatda a lalaki,

14 nagtartaray ti maysa a babaonen a napan ken ni Job. Kinunana, “Agar-aradokami iti talon ket agar-arab met dagiti asno iti asidegmi.

15 Pagammoan, rimmaut dagiti taga-Sabeket intalawda dagiti amin nga animal. Pinatayda dagiti amin nga adipenmo! Siak laeng ti nakalibas a mangipakaammo kenka iti napasamak.”

16 Agsasao pay laeng ti adipen idi dumteng ti sabali nga adipen ket kinunana, “Nakimat dagiti karnero ken dagiti agpaspastor ket natayda amin! Siak laeng ti nakalasat a mangipakaammo kenka iti napasamak.”

17 Agsasao pay laeng ti adipen idi dumteng ti sabali pay nga adipen ket kinunana, “Adda tallo a grupo dagiti Caldeoa nangdarup kadakami. Innalada amin a kamelio ket pinatayda amin nga adipenmo! Siak laeng ti nakalibas a mangibaga kenka iti napasamak.”

18 Saan pay a nalpas a nagsao ti adipen idi dumteng ti sabali manen nga adipen ket kinunana, “Agrarambak dagiti annakmo iti balay ti inauna a kabsatda.

19 Pagammoan, dimteng ti napigsa nga angin a naggapu iti let-ang. Rinebbana ti balay ket natay amin nga annakmo! Siak laeng ti nabati a mangibaga kenka iti napasamak.”

20 Timmakder ni Job ket rinay-abna ti pagan-anayna gapu iti ladingitna. Kinuskosanna ti ulona sa nagpakleb iti daga ket nagdaydayaw.

21 Kinunana,“Lamolamoak a nayanak ket matayakto met a lamolamo. TiApoti nangted ket ita, isu met laeng ti nangala. Madaydayaw koma ti naganna!”

22 Ngem uray kasta ti naaramid, saan a nagbasol ni Job. Dina pinabasol ti Dios gapu iti napasamak.

Categories
Job

Job 2

Suoten Manen ni Satanas ni Job

1 Idi dumteng ti aldaw a panagparang dagiti nailangitan a parsua iti imatang ni Yahweh, naitallaong manen ni Satanas.

2 “Sadino ti naggapuam?” sinaludsod ni Yahweh ken ni Satanas.

Insungbat ni Satanas, “Sinursorko ti entero a daga.”

3 Sinaludsod ni Yahweh, “Napaliiwmo kadi ni Job nga adipenko? Awan ti masarakan iti daga a kas kenkuana iti kinapudno ken awan pakapilawanna. Managbuteng kaniak ket saan nga agaramid iti dakes. Dinawatmo kaniak tapno palubosanka a mangdangran kenkuana nga awan gapgapuna. Ngem kaskasdi a nagtalinaed a napudno kaniak.”

4 Simmungbat ni Satanas, “Kudil iti kudil.Isalda ti tao ti batogna a langit tapno agbiag.

5 Ngem padasem ita a dangran ti bagina—awan duadua nga ilunodnaka!”

6 “Ala, wen, yawatko kenka ni Job,” kinuna ni Yahweh ken ni Satanas. “Aramidem ti kayatmo kenkuana, ngem saanmo a patpatayen.”

7 Pimmanaw ni Satanas iti sango ni Yahweh. Pinaggaddilna ni Job iti nakaar-arriek iti entero a bagina.

8 Napan nagtugaw ni Job iti pagbasuraan. Nangala iti buong ti banga a pagikkatna kadagiti keggang ti gaddilna.

9 Kinuna ti asawana, “Agtalinaedka pay la kadi iti kinapudnom iti Dios? Apay a dimo ilunod ti Dios tapno mataykan!”

10 “Minamaag ti sasawem,” insungbat ni Job. “No mangted ti Dios iti imbag, awatentayo. Apay nga agreklamotayo no mangyeg iti rigat?”

Ngem iti laksid ti panagsagaba ni Job, saan latta a nagsao iti maibusor iti Dios.

Sumarungkar dagiti Gagayyem ni Job

11 Tallo kadagiti gagayyem ni Job ti nakadamag iti didigra a napagtengna. Isuda da Elifaz a taga-siudad ti Teman, Bildad a taga-Sua ken Zofar a taga-Naama. Nagtutulagda a sarungkaran ni Job tapno liwliwaenda.

12 Nasaripatpatanda ni Job idi adayoda pay laeng ngem dida nabigbig. Idi mailasinda nga isu gayam ni Job, nagsangit ken naganug-ogda. Gapu iti ladingitda, rinay-abda dagiti pagan-anayda sada nagipurruak iti tapok iti ngato ken kadagiti uloda.

13 Kalpasanna, nakitugawda ken ni Job iti daga iti las-ud ti pito nga aldaw ken rabii. Awan ti nagsao kadakuada gapu iti nakitada a nakaro unay a panagsagabana.

Categories
Job

Job 3

Agreklamo ni Job iti Dios

1 Kalpasanti nabayag nga ulimek, nagsao ni Job ket inlunodna ti aldaw a pannakayanakna.

2-3 ODios, ilunodmo koma ti aldaw a pannakayanakko;

ilunodmo koma ti rabii a pannakainawko.

4 Pagsipngetem koma dayta nga aldaw, O Dios;

dimo koma lagipen ken lawaganen dayta nga aldaw.

5 Paglidemem ken pagsipngetem koma dayta nga aldaw;

kumotam kadagiti ulep, ket abbongam ti init.

6 Ikkatem dayta a rabii iti tawen,

ket saanmon nga ibilbilang.

7 Pagbalinem koma dayta a rabii a naliday;

ikkatem ti amin a ragsakna.

8 Bilinem dagiti baglan

a mangilunod iti dayta nga aldaw,

dagiti baglan a makabael a mangbilin iti Leviatan.

9 Dimo koma pagraniagen ti baggak;

dina koma makita ti bannawag.

10 Ilunodmo koma dayta a rabii

ta pinalubosannak a nayanak,

ket inyawatnak iti ladingit ken rigat.

11 Natayak la koman

idi addaak pay la iti tian ni inak,

wenno idi apaman a nayanakak.

12 Apay aya a sinaksaklotnak ni inak?

Apay pay laeng a pinasusonak?

13 No natayak la koma idin,

agin-inanaak koma itan.

14 Matmaturogak koman a kas kadagiti ari ken agtuturay

a nangbangon manen kadagiti nadadael a palasio.

15 Wen, matmaturogak koman a kas kadagiti prinsipe

a nangpunno kadagiti balayda iti balitok ken pirak.

16 Matmaturogak koman a kas kadagiti maladaga

a natay a nayanak,

a dida nakita ti lawag.

17 Idiay tanem, agsardeng ti kinadakes dagiti nakillo,

ket sadiay, aginanan dagiti nabannog iti trabaho.

18 Uray pay dagiti balud adda talnada sadiay;

saandan a maririawan ken mabugbugtak.

19 Addada amin sadiay, dagiti natan-ok ken nanumo,

ket siwawayawayan dagiti tagabu.

20 Apay a maikkan iti silaw ti tao nga agbiag a nakaay-ay-ay?

Apay a maikkan iti biag ti tao a napnoan pait ti kararuana?

21 Tarigagayandani patay,

ngem saan met nga umay.

Kaykayatda ti maitanem,

ngem ti maaddaan iti uray ania a gameng.

22 Saanda a naragsak

agingga a matay ken maitanemda.

23 Saan nga ipakaammo ti Dios ti masakbayanda,

ket likmutenna ida iti alad.

24 Saanak a makapangan ngem agladingitak,

ti panagas-asugko kasla danum a maibuyat.

25 Pumayso ti amin a kabutengko

ken dagiti amin a kaamakko.

26 Awan talna wenno inanak,

pulos a di agpatingga ti panagrigatko.

Categories
Job

Job 4

Ti Umuna a Bitla

1-2 Job, dinak koma kagura no agsaoak,

ta diak magawidanen toy dilak.

3 Adu a tattao ti sinursuroam,

ket pinapigsam dagiti nakapuy nga ima.

4 No adda idi matuang gapu iti kapsut ken bannogna,

tumakder manen no mangngegna ti saom a pammaregta.

5 Ngem ita ta sikan ti marigatan,

ti panagsagaba dimon maibturan.

6 Managbutengka iti Dios ken natan-ok ti panagbiagmo;

rumbeng ngarud a maaddaanka iti talged ken namnama.

7 Lagipem: Adda kadin awan basolna a nadidigra?

wenno nalinteg a nadadael?

8 Napaliiwko a dagiti agmula iti dakes,

dakes met la ti apitenda.

9 Kasla bagio ti pungtot ti Dios

a mangdadael kadakuada.

10 Kasla leon nga agngernger dagiti managdakdakes,

ngem pagulimeken ida ti Dios,

ket pusienna dagiti ngipenda.

11 Kas kadagiti leon nga awan alun-onenda,

matayda ket mawarawara amin nga annakda.

12 Adda nangngegko a sao, kasla arasaas

ket dandani saanko a nangngeg.

13 Kaslanakabutbuteng a tagtagainep

a nangtukay iti turogko.

14 Nagbuteng ken nagpigergerak;

nagkintayeg ti entero a bagik.

15 Nariknak a napul-oyan ti rupak

ket simgar ti dutdotko.

16 Adda nakitak nga agtaktakder sadiay;

miningmingak ngem diak nailasin.

Pagammoan, nangngegko ti bassit a timek a nagkuna:

17 “Adda kadi tao a nalinteg iti imatang tiDios?

Adda aya nadalus iti sangoanan tiNamarsua kenkuana?

18 Saan a talken ti Dios dagiti nailangitan nga adipenna;

uray dagiti anghelesna, adda pangbabalawanna.

19 Pagarupem kadi a talkenna ti naparsua iti pitak,

ti nagtaud iti tapok ket nalaka a marumek

a kas iti balay ti akot-akot?

20 Mabalin a sibibiag ti tao iti bigat,

ngem matay a di mapuotan sakbay ti rabii.

21 Maitalaw ti amin a sanikuana;

matay nga awan pay la ti siribna.”

Categories
Job

Job 5

1 Umawagka, Job, ta kitaem no adda sumungbat.

Adda kadi anghel a mabalinmo a pagkamangan?

2 Patayem la ti bagim gapu iti gura ken sakit ti nakem.

Minamaag daytoy nga ar-aramidem.

3 Nakakitaak kadagiti maag a kasla natalged ti biagda,

ngem dinawatko ti kellaat a pannakailunod dagiti taengda.

4 Saan a natalged dagiti annakda;

iti pangukoman, awan mangikalintegan kadakuada.

5 Kanento dagiti mabisin ti mula ti maag,

uray pay dagiti agtubo kadagiti siitan;

ket apalanto dagiti mawaw ti sanikuana.

6 Saan nga agtubo ti kinadakes iti daga,

wenno ti riribuk iti tapok.

7 Ti tao met laeng ti mangpataud iti rigatna,

a kas met iti panagtaud ti rissik iti beggang.

8 No siak ti sika, agkamangak iti Dios,

ket iparangko kenkuana ti pagtaktakderak.

9 Ditaymaawatan dagiti naindaklan nga aramidna,

ket dagiti milagrona saanda nga agpatingga.

10 Pagtudoenna ditoy daga

ket padanumanna dagiti taltalon.

11 Wen, ti Dios ti mangitan-ok kadagiti napakumbaba,

ken mangliwliwa kadagiti amin nga agladladingit.

12-13 Lapdannati panggep dagiti nasikap,

ket ipalab-ogna dagiti masirib

iti kinasikapda met laeng,

tapno saan nga agballigi ti aramidenda.

14 Agar-arikapda uray iti tengnga ti aldaw.

15 Ngem isalakanna dagiti napanglaw iti pakatayanda,

ispalenna dagiti nakakaasi iti pannakailupitlupitda.

16 Ikkanna iti namnama dagiti napanglaw,

ket pagulimekenna dagiti managdakdakes.

17 Nagasatti tao a ti Dios ti mangdisiplina!

Dimo ngarud guraen no tubngarennaka.

18 Bedbedanti Dios ti sinugatna;

agasanna met laeng ti dinunorna.

19 Kanayon a salaknibannaka

tapno awan ti pakaan-anoam.

20 No dumteng ti bisin, biagennaka;

no adda gubat, iti patay ispalennaka.

21 Salaknibannaka iti pannakapadpadakes;

isalakannaka iti pannakadadael.

22 Katawaamto ti ranggas ken bisin;

dimonto kabuteng dagiti atap nga animal.

23 Awanto ti bato dagiti aradoem a talon;

didakanto darupen dagiti narungsot nga animal.

24 Iti kasta, natalgedkanto iti taengmo;

inton bilangem dagiti karnerom,

awanto ti napukaw kadakuada.

25 Adunto ti kaputotam,

umadudanto a kas ruot iti daga.

26 Atiddogto ti panagbiagmo;

napigsakanto pay laeng inton matayka

kas trigo a nadanonan ti pannakaapitna.

27 Job, nasursuromi daytoy

iti nabayag a panangad-adalmi.

Pudno daytoy,

ket ipangagmo ta pagimbagam.

Categories
Job

Job 6

1-2 No matimbang la koma

ti rigat ken ladingitko,

3 nadagdagsenda pay ngem dagiti darat ti baybay.

No nagubsang ti panagsaok dikayo koma masdaaw.

4 Sinalputnak dagiti pana ti Dios a Mannakabalin-amin

ket nagwaras iti bagik ti sabidongda.

Inturongna kaniak dagiti pammutbutengna.

5 Naulimek ti asno no mangmangan iti taraonna,

saan nga agemmak ti baka no madama ti pannanganna.

6 Adda aya mayat a mangan iti awan ramanna?

Adda kadi nanam ti puraw ti itlog no awan asinna?

7 Diak kayat ti kasta a taraon,

agsarwaak no manganak.

8 Apay a di ipangag ti Dios ti dawatko?

Apay a dina patgan ti kararagko?

9 Nasaysayaat laengen a patayennak ti Dios.

10 No ammok nga aramidenna ti kasta,

lumagtoak gapu iti rag-o;

agragsakak uray pay napalalo ti rigatko.

Ammok a nasantoan ti Dios;

pulos a diak pay sinupring ti bilinna.

11 Ania pay ti pigsak nga agbiag?

Ania pay la ti gapuna, awan metten ti namnamak?

12 Naaramidak aya iti bato?

Bronse kadi toy bagik?

13 Awanen pigsak a mangisalakan iti bagik;

awanen ti mabalinko a pagkamangan.

14 Masapulko dagiti napudno a gagayyem

iti kastoy a rigatko,

tinallikudak man ti Dios wenno saan.

15 Allilawendak, dakayo a gagayyemko;

kaskayo la waig a namagaan no awan tudo.

16-17 Adu ti nagbalay a danum

napuskol ti niebe iti waig.

Ngem no tiempo ti pudot, marunawda

ket ti waig agmaga.

18 Mayaw-awan ti bunggoy dagiti agbibiahe

iti panagsapsapulda iti danum nga inumenda;

agalla-allada iti langalang ket matayda.

19 Agbirok iti danum dagiti bunggoy

a naggapu iti Seba ken Tema,

20 ngem mapaayda iti igid dagiti waig a nagmaga.

21 Kadagita a waig ti pangyarigak kadakayo;

makitayo ti rigatko ket makigtotkayo.

22 Dinawatko kadi nga isagutandak?

Kiniddawko kadi nga agpasuksokkayo tapno maisalakanak?

23 Imbagak aya nga ispalendak iti kabusor

wenno iti nadangkok nga agturay?

24 Ala ngarud, isurodak ket ibagayo dagiti biddutko;

agulimekak ket dumngegak kadakayo.

25 Maguyugoydak no nainsiriban ti palawagyo,

ngem minamaag met dagiti sasawenyo.

26 Kunayo nga angin ti agaon iti ngiwatko.

Apay ngarud a sungbatanyo?

27 Pagbibinnunotanyo pay dagiti ulila a tagabu,

ket ilakoyo ti nadekket a gayyemyo!

28 Perrengendak, saanak nga agul-ulbod.

29 Baliwanyo ti panunotyo ket umisu koma ti pangngeddengyo;

didak ukomen, ta awan dakes a naaramidko.

30 Ngem ipagarupyo nga agul-ulbodak—

kunayo a diak mapaglasin ti dakes ken naimbag.