Month: March 2020

1 Mayarig ti biag ti tao iti kapilitan a panagserbi ti soldado,

kasla biag ti agtartrabaho iti nadagsen,

2 kas tagabu a kalikagumanna ti paglinonganna,

kas mangmangged nga agur-uray iti tangdanna.

3 Binulan nga ubbaw ti panagbibiagko;

rinabii a ladingit ti malakamko.

4 No maturogak, alimbasagenak iti iddak;

saanak a makaturog, sumgaakon nga aglawag.

5 Ig-iggesen ti bagik, nalapunos iti keggang;

bumtak dagiti gaddilko ket agnanada.

6 Aggibusen dagiti aldawko nga awan namnamak,

naparpardas ngem ti barkiliati panaglabasda.

7 Lagipem, O Dios, a kasla anges ti biagko;

naggibusen dagiti ragragsakko.

8 Addaak pay la ita, ngem didakton makita.

No birokendak, didakton masapulan.

9-10 Kasiti ulep nga aglabas ket agpukaw,

kasta ti tao a matay ket dinton agsubli;

malipatan payen dagiti makaam-ammo kenkuana.

11 Diak mabalin ti agulimek!

Madi ti riknak ket makapungtotak.

Masapul nga agsaoak.

12 Apay kadi a pabambantayannak?

Ipagarupmo aya a maysaak a dragon ti taaw?

13 Agiddaak tapno aginanaak;

kayatko nga iliwliwag ti panagsagabak.

14 Ngem sika, pagbutngennak kadagiti tagtagainep;

pagparmataennak ket butbutngennak.

15 Kaykayatko laengen a mabekkelak;

nasaysayaat laengen a matayak

ngem ti agbiag iti kastoy a rigat.

16 Saanko a kayaten ti agbiag!

Awanen serserbi ti biagko.

Baybay-annakon. Awanen serserbi toy biag.

17 Apaya napateg unay ti tao kenka?

Apay nga ikaskasom dagiti aramidna?

18 Binigat a bisitaem,

ket tunggal kanito a suotem.

19 Dimo la aya mayadayo ti panagkitam kaniak,

iti uray apagdarikmat tapno matilmonko ti tuprak?

20 No agbasolak, apay aya a sika ti masakitan,

sika nga agbambantay kaniak?

Apay a siak ti pangipapasam iti pungtotmo?

Makapadagsenak unay aya kenka?

21 Dimo la aya mapakawan ti basolko?

Di la mabalin a punasem dagiti labsingko?

Agiddaakton iti katapokan,

ket no sapulennak awanakton a mabirokam.

1-2 Nalpas kadin ti bukodmo a bitla?

Atiddog ngem awan met ti linaonna.

3 Ballikugen aya ti Dios ti hustisia?

Killoenna aya ti kinalinteg?

4 Nalabit a nakabasol dagiti annakmo;

dinusa ida ti Dios kas maitutop iti aramidda.

5 Agkamangka iti Dios a Mannakabalin-amin,

ket agpakpakaasika kenkuana.

6 No pudno a nalintegka ken awan basolmo,

awan duadua a tulongannaka ti Dios,

ket isublina a kas gunggonam dagiti napukawmo.

7 Dinto maidilig ti napukawmo a kinabaknang

iti itedto kenka ti Dios iti kamaudianan,

8 Amirisemti kinasirib idi punganay;

utobem dagiti nasursuro dagidi ammatayo.

9 Ababa unay ti biagtayo ket ania ti ammotayo?

Ditoy daga, anniniwan laeng ti kayarigantayo.

10 Paisuroka kadagiti mamasirib idi ugma;

ammoem ti pannursuroda, denggem ti ibagada:

11 “Saan nga agtubo dagiti runo iti awan danumna;

iti la kadanuman ti pakasarakan kadakuada.

12 No agmaga ti nagtuboanda,

magangoda idinto a kalanglangtoda,

ken saan pay a mabalin a makeltay,

kadagiti amin a mula, umunada a malaylay.

13 Mayarig dagiti awan Diosna kadagita a runo;

apaman a lipatenda ti Dios, mapukaw metten ti namnamada.

14 Agtalekda iti panait—iti sapot ti lawwalawwa.

15 Matuangda no agsanggirda iti balay ti lawwalawwa;

no kumpetda iti panait, matulonganna aya ida a tumakder?”

16 Kasla barsanga dagiti managdakdakes nga agtubo iti kainitan,

barsanga nga agsaknap iti minuyongan.

17 Kadagiti bato, agkawikaw dagiti ramutda,

kadagiti dadakkel a bato nairut ti ikakapetda.

18 Ngem no parutem ida,

awan ti makaammo a sadiay ti nagtuboanda.

19 Wen, kasta laeng ti ragsak dagiti managdakdakes,

adda dagiti umay a sumublat iti lugarda.

20 Saan a baybay-an ti Dios dagiti napudno a tattao;

dina met tulongan dagiti nakillo.

21 Pagragsakennakanto manen;

agkatawakanto, agriawkanto iti rag-o.

22 Ngem ibabainna dagiti manggura kenka,

ket awanton ti taeng dagiti managdakdakes.

1-2 Wen,nangngegko aminen dagita.

Ngem iti imatang ti Dios,

awan ti makaikalintegan iti bagina.

3 Kasta met nga awan ti makasuppiat kenkuana,

awan makasungbat iti rinibu a saludsodna.

4 Masirib ken nabileg unay ti Dios;

awan ti agballigi a bumusor kenkuana.

5 Di mapakpakadaan a yalisna dagiti bantay;

iti pungtotna dadaelenna ida ket inda margaay.

6 Paggingginedenna ti daga,

ket gunggonenna dagiti fondasionna.

7 Mabalinnaa di palgaken ti init,

ken di pagrimaten dagiti bituen.

8 Awan timmulong kenkuana idi inyukradna ti tangatang

wenno idi nagtalaytay kadagiti dalluyon ti taaw.

9 Binilinnati Oso ken ti Orion iti tangatang,

ken ti Pleiades ken ti grupo dagiti bituen iti abagatan.

10 Ditayo maawatan dagiti nakaskasdaaw nga aramidna;

saan nga agpatingga dagiti milagrona.

11 Lumabas ti Dios, ngem diak makita.

12 Alaenna ti kayatna, ket awan ti makalapped kenkuana;

awan ti makaitured nga agkuna, “Ania ti ar-aramidem?”

13 Saan a medmedan ti Dios ti pungtotna;

pinarukmana dagiti katulongan ni Rahabiti babaenna.

14 Ania ngarud ti masaok,

Ania ti isungbatko iti Dios?

15 Nupay awan basolko, awan maaramidko;

idawdawatko laengen iti Dios a kaasiannak.

16 Uray ikkannak iti gundaway nga agpalawag,

saanak a mamati nga ipangagnak.

17 Mangyeg iti bagio a mangbasnot kaniak,

awan ti gapgapuna a sugatsugatennak.

18 Pulos a saannak a paangsen;

bin-ig a kinapait ti impaayna kaniak.

19 Aramatek ti pigsa? Adda aya makaparmek kenkuana?

Idarumko? Sinno ti makabael.

20 Awan basolko ket napudnoak,

ngem iti panagsaok, kasla nakabasolak,

ket amin a sawek kasla ukomendak.

21-22 Awan basolko ngem awanen aniamanna kaniak;

maumaakon nga agbibiag.

Total, isu met la nga isu:

nakabasoltayo man wenno saan,

agpapadatayo a dadaelento ti Dios.

23 Agkatawa ti Dios no kellaat a matay ti awan basolna.

24 Inyawat ti Dios ti lubong kadagiti managdakdakes.

Kinullaapanna ti mata dagiti amin nga ukom.

No saan a ti Dios ti akin-aramid iti daytoy, siasino ngarud?

25 Napardas ti panaglabas dagiti aldawko;

awan ti naimbag kadakuada, uray la koma no maysa.

26 Lumabas ti biagko a kas iti kapardasan a bangka,

kas iti kapardas ti agila a mangsippayot iti tukmaanna.

27-28 No umisemak ket padasek a lipaten ti rigatko,

agsubli met laeng a mangtuok kaniak dagiti ut-otko.

Ammok nga ikeddeng ti Dios a nakabasolak.

29 Yantangay ta ibilang ti Dios a nakabasolak,

apay pay laeng a maringgorannak?

30 Uray sabonak dagiti basolko, diak maikkat ida.

31 Iti abut a narugit ti nangipurruakan ti Dios kaniak,

ket uray dagiti pagan-anayko, karugitdak.

32 No tao la koma ti Dios, mabalinko a sungbatan;

mabalinmi ti dumatag iti pangukoman

tapno maibanag ti ririmi.

33 Ngem awan mamagkappia kadakami;

awan ukom a mangrisut iti ringgormi.

34 O Dios! sardengannakon a dusaen!

Yadayom kadin kaniak dagiti pammutbuteng!

35 Saanak nga agamak, agsaoak latta!

Ngamin, ammok ti bukodko a karirikna.

1 Naumaakon nga agbibiag.

Ti sakit ti nakemko denggenyo ta ibagak.

2 Saannak koma nga ukomen, O Dios.

Ibagam no ania ti pangpabasolam kaniak.

3 Tumutop kadi kenka ti kasta a kinaranggasmo?

Rumbeng kadi nga umsiem ti pinarsuam a tao?

Kanunongam kadi ti panggep dagiti managdakdakes?

4 Kitaem aya dagiti banag a kas iti panangkita ti tao?

5 Ababa kadi a kas iti biagmi ti biagmo?

6 Apay ngarud a tuntonem dagiti amin a basolko

ken birokem dagiti amin a salungasingko?

7 Ammomnga awan ti basolko;

ammom nga awan ti makaisalakan kaniak iti pannakabalinmo.

8 Dagita imam ti nangsukog ken nangaramid kaniak;

ket ita,dagita met la nga ima ti mangdadael kaniak.

9 Lagipem, O Dios, nga inaramidnak iti pitak;

rumkennak kadi ket agbalinak manen a tapok?

10 Inikkamni amak iti pigsa a mangputot kaniak;

pinadakkelnak iti tian ni inak.

11 Pinagkakamangmo dagiti tulang ken pempennetko;

lasag ken kudil ti imbungonmo kadagiti tulangko.

12 Inikkannak iti biag ken ayat a di agbalbaliw,

ket iti panangaywanmo, tinaginayonmo ti biagko.

13 Ngem ita, ammok a bayat dayta a tiempo,

adda nalimed a panggepmo a mangdangran kaniak.

14 Sinipsiputannak tapno kitaem no agbasolak,

ket adda panggapuam a di mamakawan kaniak.

15 Dakesak iti imatangmo no makabasolak,

ngem no agaramidak iti naimbag awan magunggonak.

Nalapunosak iti bain ket nakakaasiak.

16 No met ngarud adda bassit pagrang-ayak,

kaska la leon a manganup kaniak;

agaramidka pay iti milagro a pakadangrak.

17 Adda latta pammaneknekmo a maibusor kaniak;

umad-adda ti pungtotmo kaniak, ad-adda a gumilgil-ayab;

adda latta baro nga ipabasolmo kaniak!

18 Diosko, apay pay la nga impalubosmo a mayanakak?

Natayak la koman sakbay nga adda nakakita kaniak.

19 Naim-imbag la koman a naglayonak iti tanem apaman a naipasngayak.

Kapada dayta ti pulos a di naitao.

20 Di met aya agpatinggan ti biagko?

Bay-annak nga agragsak kadagiti nabati pay nga aldawko.

21-22 Innakon iti mabiit ket saanakton nga agsubli.

Innak iti nasipnget ken naliday a daga,

daga a nalidem ken awan urnosna,

daga dagiti anniniwan,

nga uray ti lawag ket napnoan sipnget.

1-2 Awan kadi ti sumungbat kadagitoy a kinamaag?

Mapalinteg kadi ti tao babaen iti adu a saona?

3 Job, ipagarupmo aya a didaka masungbatan?

Manglalaiska, agulimekkami kadi lattan?

4 Kunam a pudno ti sasawem;

ibagam a nadaluska iti imatang ti Dios.

5 No sungbatannaka la koma ti Dios,

6 ipakaammona kenka dagiti palimed ti kinasirib;

adda dagiti di matukod nga ammoen ti tao.

Nalag-an ti impatay ti Dios a pannusa kenka

ngem iti rumbeng a dusam koma.

7 Marukodmo kadi ti kinangato ti Dios

ken ti kadakkel ti pannakabalinna?

8 Nangatngato ngem ti langit;

saanmo a magaw-at.

Naun-uneg ngem ti lubong dagiti natay;

saanmo a matukod.

9 Dakdakkel ti kinatan-ok ti Dios ngem ti daga,

ket nalawlawa ngem ti baybay.

10 No tiliwennaka ti Dios ket isaklangnaka,

siasino ti makalapped kenkuana?

11 Ammona no siasino dagiti awan serserbina a tattao;

makitana amin ti dakes nga aramidda.

12 Agbalinto la a masirib dagiti nanengneng

inton agbalin a naamo dagiti atap nga asno.

13 Palintegem ta pusom, Job,

ket umawagka iti Dios!

14 Papanawem iti balaymo ti kinadakes ken kinakillo.

15 Iti kasta, mabalinmonto manen a sangoen ti lubong

ket maaddanka iti talged ken tured.

16 Malipatamton ti amin a rigatmo

kas layus a naglabas, saanen a malagip.

17 Nalawlawagto ti biagmo

ngem ti init iti tengnga ti aldaw.

Agraniagto a kas bannawag

ti kasipngetan a kanito ti biagmo.

18 Agbiagkanto a natalged ken napnoan namnama;

salaknibannakanto ti Dios,

ket ikkannakanto iti inana.

19 Awanto ti kabusor a kabutengmo;

Agpatulongto kenka ti adu a tattao.

20 Ngem inton makita dagiti managdakdakes ti likmutda,

maawanandanto iti namnama.

Awanto a pulos ti paglisianda,

ket ti la namnamada isu ti yaay ti Patay.

1-2 Wen, dakayo ti timek dagiti tattao;

awanton ti kinasirib inton mataykayo.

3 Ngem kadakayo, adda met nakemko;

awan ti pakaatiwak kadakayo.

Ammok met amin nga imbagayo.

4 Uray ita, dagiti gagayyemko katkatawaandak

nupay nalintegak ket awan pakababalawak.

Ngem adda idi tiempo nga immawagak iti Dios

ket impangagna ti kararagko.

5 Awan ti pakariribukanyo,

ngem kaskasdi a pagang-angawandak;

kabilenyo ti tao a ngannganin matumba.

6 Ngem natalna ti panagbiag

dagiti mannanakaw ken awanan Dios

nupay ti bukodda a pigsa

ti kakaisuna a diosda.

7 Uray dagiti billit ken animal

adu ti maisuroda kenka.

8 Dawatem kadagiti parsua iti baybay ken daga

nga ipakaammoda kenka ti kinasiribda.

9 Ammoda amin nga inaramid tiApoida.

10 Ti Dios ti mangidaldalan kadagiti pinarsuana;

ti biag ti tunggal tao adda iti pannakabalinna.

11 Saan aya a pagraman ti dila,

kas iti lapayag a pagdengngeg iti sarita?

12-13 Addaan dagiti lallakay iti sirib,

ngem addaan ti Dios iti sirib ken bileg.

Addaan dagiti lallakay iti sirmata

ngem addaan ti Dios iti sirmata ken pigsa.

14 No agrakrak ti Dios,

siasino ti makaipatakder iti rinakrakna?

siasino ti makawayawaya iti tao nga ibaludna?

15 No saanna a pagtudoen, agmaga ti daga.

No ibuyatna ti tudo, dumteng ti layus.

16 Nabileg ti Dios ket kanayon nga agballigi;

agpada nga iturayanna ti maallilaw ken ti mangallilaw.

17 Ikkatenna ti kinasirib dagiti agtuturay,

ket pagbalinenna a kasla maag dagiti pangulo.

18 Padisienna dagiti ar-ari iti saadda,

ket pagbalinenna ida a balud.

19 Ipababana dagiti papadi ken dagiti adda iti turay.

20 Pagulimekenna dagiti matalek a mammagbaga,

ket pukawenna ti sirib dagiti lallakay.

21 Ibabainna dagiti adda pannakabalinna,

ket pukawenna ti bileg dagiti agtuturay.

22 Waknitanna ti nalidem a lugar

ket lawaganna ti kasipngetan.

23 Itan-okna dagiti nasion, pabilgenna

sana met la parmeken ken dadaelen ida.

24 Pagbalinenna a maag dagiti panguloda,

ket pagalla-allaen ken yaw-awanna ida.

25 Iti sipnget, agar-arikapda;

agibar-ibarda a kasla nabartekda.

1-2 Nangnangngegko idin dagiti ibagbagayo;

maawatak amin ida.

Ammok met ti ammoyo;

saanak a nababbaba ngem dakayo.

3 Ngem ti Dios ti kasuppiatko, saan a dakayo;

kayatko ti makilinnawag kenkuana.

4 Agulbodkayo a pangkalub iti kinanengnengyo;

kaskay la doktor nga awan mapaimbagna.

5 Naim-imbag pay nga agulimekkayo,

bareng adda mangipagarup a masiribkayo.

6 Denggenyo ti rasonko

a mangikalintegan iti kasasaadko.

7 Apay nga agul-ulbodkayo?

Ipagarupyo aya a matulonganyo ti Dios iti panagulbodyo?

8 Salsalaknibanyo kadi ti Dios?

Ikalkalinteganyo kadi iti pangukoman?

9 No sukimatennakayo ti Dios,

makasarak ngata iti imbag kadakayo?

Maallilawyo kadi ti Dios

a kas panangallilawyo iti tao?

10 Uray no ilimedyo ti panangidumdumayo,

awan duadua a tubngarennakayto,

11 ket kigtotennakayto ti pannakabalinna.

12 Kasla dapu nga awan serbina dagiti proberbioyo;

nalupoy a kas pitak dagiti rasonyo.

13 Agulimekkayo ket pagsawendak

ket sungbatak ti aniaman a mapasamak.

14 Sisasaganaaka mangipusta iti biagko.

15 Napukawen ti amin a namnamak,

ket uray no patayennak ti Dios,

ikalintegak latta ti bagik kenkuana.

16 Nalabit a ti turedko ti pakaispalak,

yantangay ta awan ti managdakdakes

a makaitured a sumango iti Dios.

17 Ita, denggenyo a naimbag ti innak ipalawag.

18 Sisasaganaak a mangitakder iti kalintegak,

agsipud ta ammok a nalintegak.

19 O Dios, no idarumnak ket mapaneknekam a nagbasolak,

sumardengakon nga agsao ket madadaanak a matay.

20 Adda dua a banag a dawatek kenka;

umanamongka ket dika ilemmengan:

21 Isardengmon ti panangparigatmo kaniak,

ken dinak patayen iti buteng.

22 Agsaoka nga umuna, O Dios, ket sumungbatak,

wenno siak ti umuna nga agsao ket sungbatannak.

23 Ania aya dagiti biddut ken labsingko?

Ania kadi dagiti basolko?

24 Apay aya a lislisiannak?

Apay a maysa a kabusor ti pangibilangam kaniak?

25 Butbutngem kadi ti maysa la a bulong?

Darupem aya ti maysa la nga arutang?

26 Nakaro dagiti pammabasolmo kaniak,

ket ibilangmo pay dagiti basolko idi ubingak.

27 Kawarampay dagiti sakak;

sipsiputam ti tunggal addangko,

ammirisen pay dagiti tugotko.

28 Ket pagangayanna,

madalupisakak a kasla narukop a kayo;

kaslaak la pagan-anay a sinanga.

1 Agpapadatayamin a nakapuy ken awan mabalbalinna,

ababa ken napno iti rigat ti biagtayo.

2 Dumakkel ken malaylaytayo a kas iti sabong;

agpukawtayo a kas iti anniniwan.

3 Kitaennak pay kadi, O Dios,

wenno isaklangnakon ket ipaulogmo ti pangngeddengmo?

4 Adda kadi nadalus nga agtaud

iti narugit a tao?

5 Naitudingen dagiti aldawna;

naikeddengen ti kaatiddog ti biagna.

Inkeddengmon ti kaatiddogna,

ket saanen a mabaliwan.

6 Dimo talliawenen ket panawamon

bay-am a ragragsakenna ti biagna

a napno iti kinarigat.

7 No mapukan ti maysa a kayo,

mabalin nga agsaringitto manen

ket dinto sumardeng nga aguggot.

8 Uray no lumakay dagiti ramutna,

ket matay ti puonna iti daga,

9 no la ket adda danum,

agsaringit ken agsanganto

a kas iti apagtubo a mula.

10 Ngem matay ti tao, ket daytan ti gibusna.

Mauyos ti biagna, agpatinggan ti kaaddana.

11 Kas iti karayan nga agsardeng ti panagayusna

wenno kas iti dan-aw nga agmaga

12 matay ti tao, awanton ti ibabangonna.

Didanto agriing uray awanen dagiti langit;

pulos a didanton agkuti iti turogda.

13 Ilemmengnak koma iti lubong dagiti natay;

wen, ilingednak koma

agingga nga agbaaw ti pungtotmo;

kalpasanna, tudingam ti tiempo a pananglagipmo kaniak.

14 No matay ti tao,

agbiagto aya manen?

Ngem urayek ti nasaysayaat a tiempo

agingga nga agpatingga daytoy agdama a rigatko.

15 Kalpasanna, ayabannakto ket sumungbatak;

maay-ayokanto kaniak a parsuam.

16 Sipsiputamto dagiti addangko,

ngem dimonton kitaen dagiti basolko.

17 Pakawanem ken pukawemto dagiti salungasingko,

ket punasemto amin dagiti labsingko.

18 Dumtengto ti panagreggaay dagiti bantay;

mayalisto pay dagiti dadakkel a bato.

19 Runotento ti danum dagiti bato,

ket ti daga yanudto ti napigsa a tudo;

kasta ti panangpukawmo iti namnama ti tao.

20 Parmekem ti tao ket pukawem iti agnanayon;

agbaliw ti rupana iti ipapatayna.

21 Makagun-od dagiti annakna iti pammadayaw

ngem pulos a saanna a maammoan;

awan mangibaga kenkuana no maibabainda.

22 Ti laeng ut-ot ti bagina ti mariknana

ken ti leddaang ti pusona.

Ti Maikadua a Bitla

1-2 Job, ubbaw dagiti imbalikasmo, ubbawda!

3 Awan ti masirib nga agsao a kas kenka

wenno mangikalintegan iti bagina

kadagiti awan serserbina a sao.

4 Dagiti agbuteng iti Dios maupayda;

lapdam ida nga agkararag kenkuana.

5 Ti basolmo ti mamagsao kenka;

ab-abbongam dagiti basolmo kadagiti nasikap a sao.

6 Saan a masapul nga ikeddengko a nagbasolka;

dagiti met la saom ti mangukom kenka.

7 Ipagarupmo aya a sika ti kaunaan a nayanak?

Addaka kadin idi parsuaen ti Dios dagiti bantay?

8 Nangngegmo kadi dagiti panggep ti Dios?

Siksika la aya ti tao nga adda ammona?

9 Ammomi amin ti ammom.

10 Nagtaud ti kinasiribmi

kadagiti ub-ubanan a lallakay,

lallaki a nayanak sakbay ni amam.

11 Liwliwaennaka ti Dios ngem dimo ikaskaso;

iti naganna, naalumamay dagiti saomi ngem dimo ikankano.

12 Nupay kasta, masair ta riknam,

ket sipupungtotka a mangkuskusilap kadakami.

13 Kapungtotmo ti Dios,

ket agsaoka pay iti maibusor kenkuana.

14 Addaaya tao a nadalus?

Adda kadi nalinteg iti imatang ti Dios?

15 Di pay talken ti Dios dagiti anghelesna;

uray isuda, saanda a nadalus iti imatangna.

16 Anianto ketdin ti narukop a tao nga awan serserbina,

Arub-obenna ti dakes a kas iti danum nga inumenna.

17 Dumngegka, Job,

ta ibagak ti ammok.

18 Insuro dagiti mamasirib kaniak

ti pudno a naadalda kadagiti ammada,

ket awan inlimlimedda.

19 Awan ti mangyadayo kadakuada iti Dios,

ta awan ganggannaet a nakipagtaeng kadakuada.

20 Ti dakes a tao a mangirurumen,

agtutuokto bayat ti panagbiagna.

21 Nakabutbutengto nga ikkis dagiti mangngegna;

no ipagarupna nga awan ti pakaan-annoanna,

serken dagiti mannanakaw ti balayna.

22 Awan namnamana a makaaon iti sipnget,

ta agur-uray ti kampilan a mangpapatay kenkuana.

23 Agur-uray met dagiti buitrea mangsida iti bangkayna.

Ammona a nasipnget ti masakbayanna,

24 ta agur-uray kenkuana ti pannakadadael

kas nabileg nga ari a mangdarup kenkuana.

25 Kasta ti pagtungpalan ti tao a bumusor iti Dios,

ti pagbanagan ti agsukir iti Mannakabalin-amin.

26-27 Napalangguad ken nasukir ti kasta a tao;

sitatangsit a mangitag-ay iti kalasagna,

ket agdarasudos a mangsaranget iti Dios.

28 Dayta ti tao a nangsakup kadagiti siudad

ken nangtagikua kadagiti balbalay

a dagiti akinkukua pimmanawda

ngem madadaelto dagitoy inton adda gubat.

29 Dinto agbayag ti kinabaknangna;

dinto met agpaut ti sanikuana.

Mapukawto uray ti anniniwanna

30 ket dinanto malisian ti sipnget.

Mayarigto iti kayo

a mauram dagiti sangsangana,

ken ipalais ti angin dagiti sabongna.

31 No maag nga agtalged iti kinadakesna,

kinadakes met laeng ti apitenna.

32 Malaylaytosakbay ti naikeddeng a tiempona,

ket saanton a lumangto dagiti sangana.

33 Kaslanto iti ubas a maregreg dagiti bungana

sakbay a maluomda;

kaslanto iti olibo nga agtinnag dagiti sabongna.

34 Awanto ti kaputotan dagiti awan Diosna;

mauramto dagiti balay

a nabangon gapu iti pasuksok.

35 Dagitoy dagiti tattao a dakes ti panggepda;

panangallilaw ti kanayon a pampanunotenda.

1-2 Nangngegkon dagita a sasao;

padagsenandak laeng kadagita a panangliwliwayo.

3 Dikay pay laeng aya sumardeng a sao a sao?

Dakayo laengen ti mapatpati ti saona?

4 No dakayo ti adda iti lugarko,

mabalinko met a sawen ti ibagbagayo.

Mabalinkay met a wingiwingan,

layusenkayo iti adu a sao.

5 Mapapigsakayo met kadagiti pammagbagak;

diak met sumardeng nga agsasao

a mangliwliwa kadakayo.

6 Ngem awan ti maitulong ti amin a sasawek;

di met maep-ep dagiti ut-otko no agulimekak.

7 Inibusmo, O Dios, ti amin nga adda kaniak;

binaybay-am a napapatay ti familiak.

8 Tiniliwnak, sika ti kabusorko.

Kudil laengen ti nangbungon kadagiti tulangko,

ket dayta ti ibilang dagiti tattao

a pammaneknek a nakabasolak.

9 Iti pungtot ti Dios, lasanglasangennak;

urayna la kagaten ti bibigna

gapu iti gurana kaniak.

10 Guyabandak dagiti tattao;

aribungbongandak ket tungpaendak.

11 Inyawatnak ti Dios kadagiti managdakdakes.

12 Natalna idi ti panagbiagko,

ngem binekkelnak ti Dios,

ket dinudog ken indumudomnak.

Aramatennak a pagsanayanna iti panagpana,

13 ket panaenna ti amin a sikigak

kadagiti pana a mangdunor ken mangsalput kaniak;

uray kasta, pulos a dinak kaasian.

14 Saan a mauma a mangdundunor kaniak;

kasla agpagunggan a mannakigubat a mangdarup kaniak.

15 Agladingitak ket agpanesak iti nakersang a lupot;

agtugawak iti katapokan gapu iti pannakaparmekko.

16 Nakalablabbagan toy rupak iti kasasangit;

lumlumbeg ken lumitlitem payen dagitoy matak.

17 Ngem awan ti inaramidko a kinaranggas,

ket napasnek ti kararagko iti Dios.

18 O daga, dimo kaluban dagiti dakes

a naaramid kaniak!

Ipalubosmo a mangngeg ti asugko

a mangtunton iti kalintegak.

19 Sadilangit, adda mangkanunong

ken mangitakder kaniak.

20 Umsiendak dagiti gagayyemko;

agarubos dagiti luluak iti Dios.

21 Adda koma mangikalintegan kaniak iti Dios,

kas panangitakder ti maysa a tao iti gayyemna.

22 Bassiten ti nabati nga aldawko,

ket magnaakton iti dalan

nga awan ti makasubli.