Month: March 2020

1-2 Isapatak iti sibibiag a Dios a Mannakabalin-amin

a nangikkat iti kalintegak ken nangpadagsen iti biagko:

3 no la ket ikkannak ti Dios iti angesko,

no la ket adda ti espiritu iti agongko,

4 awanto ti dakes nga agaon iti ngiwatko,

awanto ti kinaulbod nga innak isao.

5 Uray inton ano, diak ibaga a dakayo ti husto,

ngem ipapilitko nga awan ti basolko

kabayatan nga adda pay ti angesko.

6 Diak mamingga a mangibagbaga a nalintegak;

nadalus ti konsensiak, awan ti mansak.

7 Sapay koma ta amin a kabusorko,

madusada a kas kadagiti

managdakdakes ken nakillo.

8 Ania pay ti namnama dagiti awan diosna

inton oras nga alaen ti Dios ti biagda?

9 Inton dumteng ti riribuk,

denggen aya ti Dios ti dawatda?

10 Rumbeng a tinarigagayanda ti rag-o nga ipaayna,

ken kanayon koma a nagkararagda kenkuana.

11 Palubosandak a mangisuro kadakayo

iti kadakkel ti pannakabalin ti Dios.

Ilawlawagko ti plano

ti Dios a Mannakabalin-amin.

12 Ngem saanen a masapul,

ta dakayo a mismo makitayo.

Apay ngarud nga awan namaay ti sawenyo?

13 Kastoy ti panangdusa ti Dios a Mannakabalin-amin

kadagiti managdakdakes ken naranggas a tattao.

14 Uray adu ti lallaki nga annakda,

iti paggugubatan, mataydanto a sangapada;

agkurangto ti taraon dagiti annakda.

15 Agsakitto dagiti makalasat ket mataydanto,

inton pumusayda, dinto agdung-aw dagiti baloda.

16 Uray no adu unay ti pirak ti dakes a tao,

ken ad-adu ti kawesna ngem ti kasapulanna.

17 Addanto nalinteg a tao a mangala iti pirakna,

addanto nalinteg a tao a mangikawes iti pagan-anayna.

18 Agipatakder dagiti managdakdakes kadagiti taeng a kasla balay ti lawwalawwa,

wenno kalapaw ti tagabu a taltalon ti ay-aywananna.

19 Iti maudi a tiempoda,maturogdanto a nabaknang,

ngem inton agriingda, awanen ti sanikuada.

20 Dumtengto a kellaat ti didigra a kas layus;

iti rabii ipanawto ti angin ida.

21 Addanto angin nga aggapu iti daya

a mangitayab kadakuada manipud kadagiti taengda.

22 Agdissuorto ti angin nga awan asina kadakuada,

didanto makalibas uray no ipakatda ti kabaelanda.

23 Bumanesbes ti angin bayat ti panagtarayda,

ket agbutengda gapu iti bilegna a mangdadael kadakuada.

Ti Kinapateg ti Sirib

1 Adda pagminasan iti pirak,

adda met paggugoran iti balitok.

2 Kalien ti tao ti landok iti daga,

ket tunawenna ti gambang kadagiti bato.

3 Sukisoken dagiti tattao ti nasipnget a disso,

iti kaunggan a paset ti daga, agkalida iti batbato.

4 Agkalida iti usok ti pagminasan,

iti lugar nga awan matagtagitao

wenno di pay nadanon ti tao.

Agtrabahoda sadiay a malmaldaang,

kumkumpet kadagiti tali iti uneg ti daga.

5 Agtaud ti taraon iti daga,

ngem ti mismo nga unegna

madaddadael iti apuy a bumarbara.

6 Adda safiro kadagiti bato iti daga;

adda met balitok kadagiti tapok.

7 Awan ti kali a makakita kadagiti usok ti minas.

Awan met ti buitre nga agtayab iti ngatoenda.

8 Awan ti leon wenno narungsot nga ayup

nga agdaliasat kadagiti naiputputong a dalan.

9 Agkali dagiti tattao kadagiti pamulinawen a dalumpinas.

Kalienda ti puon dagiti bantay.

10 Bayat ti panagaramidda iti usok,

makasarakda kadagiti napapateg a bato.

11 Agkalida agingga iti paggapuanti karayan,

ket iruarda dagiti nailemmeng a gameng.

12 Ngemsadino ti pagtaudan ti sirib?

Sadino ti paggapuan ti pannakaawat?

13 Saana masarakan ti sirib kadagiti tattao;

saan met a masarakan iti rabaw ti daga.

14 Ibaga dagiti lansad ti taaw ken baybay

a saan a masarakan ti sirib sadiay.

15 Saan a magatang ti sirib

iti pirak wenno balitok.

16 Saan met a magatadan

iti kanginaan a balitok ken alahas.

17 Napatpateg nga adayo ngem ti balitok,

napatpateg ngem ti alikamen a balitok ken kapintasan a baso.

18 Napatpateg nga adayo ti sirib

ngem ti koral, kristal wenno rubi.

19 Saan a maipada ti pateg ti sirib

iti kapatgan a topasio ken iti puro a balitok.

20 Sadino ngarud ti paggapuan ti sirib?

Sadino ti pakaadalantayo iti pannakaawat?

21 Nailemmeng ti sirib kadagiti sibibiag;

di makita ti siasinoman, uray dagiti tumatayab.

22 Uray ni patay ken ti pannakadadael annugotenda

a sayangguseng laeng dagiti nangngegda.

23 TiDios laeng ti makaammo iti dalan,

ammona ti lugar a pakasarakan kenkuana.

24 Ngamin, makitana ti ungto ti daga

ken ti amin nga adda iti babaen ti langit.

25 Idi inikkan ti Dios ti angin iti bileg,

ken inkeddengna ti kalawa ti baybay,

26 idi intudingna ti pagtinnagan ti tudo,

ken ti pagdaliasatan ti kimat ken gurruod,

27 nakitanati sirib ket tiningitingna ti pategna,

isut’ gapuna nga impasdek ken pinasingkedanna.

28 Kinunati Dios kadagiti tattao:

“Tapno sumiribkayo, agbutengkayo itiApo.

Tapno maaddaankay pannakaawat, laksiden ti dakes.”

Ti Maudi a Panangikalintegan ni Job iti Bagina

1 Nagsao manen ni Job:

2 Agsubli la koma ti sigud a kasasaad,

dagidi panawen a panangaywan ti Dios kaniak.

3 Kanayon idi a kadkaduaennak,

ket linawaganna ti pagnaak.

4 Isuda dagidi aldaw a kapigpigsak,

idi salsalakniban ti Dios ti pagtaengak,

gapu ta gayyemnak.

5 Wen, adda idi kaniak ti Dios a Mannakabalin-amin;

adda met dagiti amin nga annakko iti dennak.

6 Adu idi ti gatas dagiti baka ken kaldingko;

kadagiti kabatoan, dimmakkel dagiti bukodko nga olibo.

7 No agtataripnong dagiti panglakayen ti siudad,

ket makikatugawak kadakuada,

8 wayaandak dagiti agtutubo a lallaki,

ket tumakder dagiti lallakay a mangipakita iti panagraemda kaniak.

9 Sumardeng nga agsao dagiti pangulo ti ili;

10 agulimek uray pay dagiti natan-ok a tattao.

11 Nasayaat idi ti pakasarsaritaak

kadagiti amin a makakita ken makangngeg

iti maipapan kadagiti aramidko.

12 No umasug idi dagiti napanglaw, tulongak ida;

inarayatko dagiti ulila nga awan pagkamanganna.

13 Indaydayawdak dagiti nagsagaba iti nakaro a rigat.

Tinulongak dagiti balo, nga agbirok iti pagsanggiranda.

14 Inkagumaak ti nalinteg a panagbiag;

agpapada amin a tao, awan indumdumak.

15 Nagserbiak a mata dagiti bulsek,

nagpaayak a saka dagiti pilay.

16 Nagbalinak a pannakaama dagiti napanglaw,

ket inkalintegak dagiti ganggannaet a mailupitlupit.

17 Dinadaelko ti bileg dagiti naranggas,

ket inispalko dagiti rinanggasanda.

18 Ninamnamak a napaut ti biagko

ken natalna ti ipapatayko iti balayko.

19 Arigko iti kayo a kanayon a nabasa ti ramutna

ken malinlinnaawan dagiti sangana.

20 Kanayon nga idaydayawdak dagiti tattao,

ket pulos a saanak a kimmapsut.

21 Agulimek dagiti tattao no bagbagaak ida,

ket denggenda a naimbag dagiti patigmaanko kadakuada.

22 Kalpasan ti panagsaok awan ti mainayonda;

sumagepsep a kasla tudo ti saok kadakuada.

23 Sigagagardak nga urayen nga agsao,

kas kadagiti mannalon nga aguray iti tudo.

24 Isemak ida no mapukawda ti tured-pakinakemda;

mapapigsada a makakita iti daytoy naragsak a rupa.

25 Nagbalinak a panguloda,

ket inkeddengko ti maaramid.

Indalanko idi ida

a kas iti panangidalan ti ari iti buyotna,

ket liniwliwak ida idi naupayda.

1 Ngem ita, rabrabakendakon dagiti lallaki nga in-inaudi ngem siak!

Annak ida dagiti awan serserbina a tattao;

diak pay impalubos a tulonganda dagiti asok

nga agbantay kadagiti arbanko.

2 Napaksuyan ken agkakapuyda a bunggoy;

agkakapuyda ket awan ti maitulongda.

3 Kasta unay ti panglaw ken bisinda;

iti rabii, kibkibanda uray dagiti nagango a ramut

kadagiti putputong ken awan matagtagitao a disso.

4 Pinarut ken kinnanda dagiti mula iti let-ang,

uray ti awan ramramanna a ramut ti buyboy.

5 Mapapanawda a ririawan dagiti tattao

ket kasda laeng mannanakaw a maririawan.

6 Kapilitan nga agnaedda kadagiti rukib,

kadagiti abut a naaramid kadagiti rangkis.

7 Kasda la animal nga agungor iti kabakiran;

aguummongda iti kasamekan.

8 Tattao nga awan serserbi ken kaes-eskanda!

Napagtalawda iti daga.

9 Ita, nagbalinak a kas maulit-ulit a kanta,

ken ubbaw a sarsarita iti imatangda.

10 Karugitdak, ket tupraanda pay toy rupak;

ipagarupda a naim-imbagda ngem siak.

11 Gapu ta pinarigat ken pinagkapsutnak ti Dios,

ipakatda ti amin a pungtotda kaniak.

12 Darupendak daytoy naranggas a bunggoy ket agtarayak;

ipakatda kaniak dagiti pamuspusan a pakadadaelak.

13 Bangenanda ti pagtarayak tapno maparmekdak,

ket awan ti mangatipa kadakuada.

14 Sumrekda kadagiti abut ti sarikedkedko,

ket agdadarisonda nga agtupak kaniak.

15 Gapu iti daytoy, malapunosak iti buteng.

Mapukaw ti taknengko a kas iti pul-oy ti angin,

awanen ti kinabaknangko a kas iti ulep.

16 Ita, umasidegen ti ipapatayko;

di met laengen lumag-an ti sagsagabaek.

17 Iti rabii, agut-ot amin a tultulangko;

di sumardeng ti sakit a mangtutuok kaniak.

18 Gammatan ti Dios ti kueliok,

ket kunesenna dagiti pagan-anayko.

19 Ipalladawnak iti kapitakan,

ket awan dumak iti rugit.

20 Umawagak kenka, O Dios,

ngem pulos a dika sumungbat.

No agkararagak, dinak met ipangag.

21 Naranggaska la unay kaniak;

idadanesnak iti amin a pigsam.

22 Baybay-annak nga itayab ti angin;

ipallatoknak iti nadawel a bagio.

23 Ammok nga ipannak iti pakatayak,

iti pagtungpalan ti amin a tao.

24 Apay a kabilem ti nadadaelen a tao,

ti tao nga awanen maaramidna

no di la agpakpakaasi?

25 Diak aya nakipagladingit kadagiti mailupitlupit?

Diak aya nakipagrikna kadagiti marigrigat?

26 Ninamnamak nga umay ti ragsak ken lawag,

ngem sipnget ken rigat ketdi ti dimteng.

27 Kasla marangrangkay toy bagik gapu iti danag ken rigat,

panagsagaba laeng ti adda iti masakbayak.

28 Magnaak a sililiday ket awan liwliwak;

agtakderak iti gimong tapno agpatulongak.

29 Dagiti laeng atap nga aso ken kullaaw ti kaduak.

30 Ngimmisiten ti kudilko;

kasta unay ti gurigorko.

31 Naragsak a tokar ti mangmangngegko idi;

itan, pasig a sangsangit ken dungdung-aw.

1 Insapatak a pulos a diak matmatan

a sidederrep ti maysa a balasang.

2 Ania ti ipaay ti Dios a Mannakabalin-amin kadatayo?

Kasano ti panangsupapakna kadagiti aramid ti tao?

3 Yegna ti didigra ken pannakadadael

kadagiti agaramid iti dakes.

4 Ammo ti Dios ti amin nga aramidko;

makitana ti amin nga addangko.

5 Isapatak nga awan dakes nga inaramidko,

ket pulos nga awan ti inallilawko.

6 Timbangennak koma ti Dios iti husto a timbangan,

ket awan duadua a makitana nga awan basolko.

7 No simmiasiak iti nalinteg a dalan,

wenno simmurotak iti kinadakes,

no namansaan dagiti imak iti basol,

8 madadael koma dagiti mulak,

wenno kanen ti sabali a tao dagiti apitko.

9 No nasulisogak iti asawa ti sabali a tao,

ket naglemmengak nga agur-uray iti likudan ti ridaw ti balayna,

10 isagana koma ti asawak ti kanen ti sabali a tao,

ket makikaidda iti sabali a lalaki.

11 Nakaal-alinggaget ti kasta nga aramid

ket rumbeng a mapapatay ti akin-gapuanan.

12 Kasla apuy a gumilgil-ayab

nga agkayamkam a mangikisap iti amin a kukuak.

13 No agasug kaniak ti maysa kadagiti adipenko,

ipangagko ket itedko ti kalinteganna.

14 Ania ti rupak iti Dios no diak aramiden ti kasta?

Anianto ti makunak,

inton maisaklangak iti pangukomanna?

15 Ti Dios a namarsua kaniak,

isu met laeng ti namarsua kadagiti adipenko.

16 Tinulongakdagiti napanglaw;

diak impalubos nga agbiag

a nakaay-ay-ay dagiti balo a babbai.

17 Diak met impalubos a mabisinan dagiti ulila;

no la ket adda taraonko, pakanek met ida.

18 Intedko ti masapulda bayat ti panagbiagko.

19 No adda masarakak a nakapangpanglaw

a di pay makagatang iti kawesna,

20 ikkak iti pagan-anayna a de lana

a nagtaud iti dutdot dagiti karnerok.

Iti kasta, idaydayawnak iti amin a pusona.

21 No adda sinaurko nga ulila

ta ammok a mangabakak iti pangukoman,

22 matukkol koma dagiti takkiagko,

ket masip-akda iti abagak.

23 Kabutengko ti pannusa ti Dios

isut’ gapuna a diak maaramid ti kasta.

24 Pulosa diak nagtalek iti kinabaknangko

25 wenno pinagtangsit ti sanikuak.

26 Diak nagdaydayaw iti naraniag nga init

wenno iti napintas a bulan.

27 Diak nasulisog a nagdaydayaw kadakuada

ket inagkak ti imak

kas pakakitaan ti innak panagrukbak.

28 Ti agbasol iti kasta,

rumbeng a mapapatay,

ta laksidenna ti Dios a Mannakabalin-amin.

29 Diak naragsakan iti panagsagaba dagiti kabusorko;

iti pannakadidigrada diak met nagrag-o,

30 Diak nagbasol babaen iti panangidawatko iti pannakapapatayda.

31 Ammo dagiti amin a nagserserbi kaniak

a siaayatak a mangpasangbay kadagiti ganggannaet.

32 Pinagdagusko dagiti agbibiahe,

ket diak impalubos a maturogda iti kalsada.

33 Saanak a kas kadagiti dadduma

a mangilemmeng iti basolda.

34 Diak nagbuteng uray ania ti kuna dagiti tattao;

diak nagulimek wenno nagyan iti balayko

gapu iti butengko iti pananglaisda.

35 Awan kadi ti dumngeg iti saok?

Isapatak a pudno ti amin nga ibagbagak.

Sungbatannak koma ngarud

ti Dios a Mannakabalin-amin.

No naisurat koma dagiti pammabasol ti kabusorko

tapno makitak ida,

36 ikabilko dagitoy iti bukodko nga abaga

ket isaadko iti ulok a kas iti korona.

37 Ipakaammok iti Dios ti amin nga inaramidko,

ket diak agbain nga agparang kenkuana.

38 No tinakawko ti daga a taltalonek,

ket inagawko kadagiti pudno nga akinkukua;

39 no kinnanko ti naapit sadiay,

ket binay-ak ti nagmula a mabisinan

40 iti talonko, agtubo koma

dagiti barsanga ken siitan,

imbes a dagiti trigo ken sebada.

Daytoy ti gibus ti bitla ni Job.

Dagiti Bitbitla ni Elihu

1 Gapu ta mamati unay ni Job nga awan ti basolna, insardeng dagiti tallo a lallaki ti mangsungsungbat kenkuana.

2 Ngem adda nga agbuybuya sadiay ti maysa a tao a saanen a nakaigawid iti pungtotna ta ikalkalintegan ni Job ti bagina ket pabpabasolenna ti Dios. (Isu ni Elihu nga anak ni Barakel a kaputotan ni Buz, iti familia ni Ram.)

3 Nakapungtot met kadagiti tallo a gagayyem ni Job agsipud ta awan masarakanda a naimbag a pangsungbatda kenkuana ket agparang a ti Dios ti nagbiddut.

4 Agsipud ta ni Elihu ti kaubingan kadakuada, nagur-uray agingga a nalpasda amin a nagsao.

5 Ngem nakapungtot idi makitana nga awanen ti maisungbat dagiti tallo ken ni Job,

6 isut’ gapuna a nagsao.

Nagamakak a nangibaga iti kapanunotak

ta ubingak idinto a lallakaykayo.

7 Kinunak iti bagik a dakayo ti rumbeng nga agsao;

ket dakay a lallakay ti mangibingay iti siribyo.

8 Ngem ti espiritu iti tao, ti anges ti Mannakabalin-amin,

ti mangted kenkuana iti pannakaawat.

9 Saan a ti panaglakay ti mangpasirib kadagiti tattao

wenno tumulong kadakuada a mangammo iti nalinteg.

10 Dawatek ngarud a denggendak,

ket ibagak kadakayo ti kapanunotak.

11 Siaanusak a nagdengngeg bayat ti panagsaoyo;

dimngegak bayat ti panagsapsapulyo

iti nainsiriban a pagsasao.

12 Sipapasnekak a dimngeg kadakayo,

ket nakitak a diyo mapaneknekan a biddut ti sinao ni Job.

13 Kasano ngarud ti panagkunayo a ti kinasirib ket nasarakanyo?

Ti Dios ti mangsungbat ken ni Job ta diyo nasungbatan.

14 Dakayo ti kasasao ni Job, saan a siak,

ngem no siak ti sumungbat saan a kas iti wagasyo.

15 Job, awan ti naisaoda;

awanen ti maisungbatda kenka.

16 Agurayak kadi pay laeng bayat ti panagulimekda?

Addada dita ket awanen ti maibagada.

17 Diak agulimek, ket ibagak ti sungbatko;

yebkasko met ti kapanunotak.

18 Diak maibturanen ti di agsao;

adu ti kayatko nga ibaga.

19 No saanak nga agsao ita

amangan no bumtakak a kas iti baro a supot a lalat.

20 Masapul nga agsaoak tapno mapalag-ananak.

21 Awan ti kanunongak,

awan met ti patiray-okak.

22 Diak ammo ti mangpatiray-ok;

awan duadua a dusaennak ti Dios no kasta ti aramidek.

1 Job, denggem ngarud a naimbag

dagiti amin nga innak isawang.

2 Yebkasko ti adda iti panunotko.

3 Pudno amin a sasawek, diak agul-ulbod.

4 Ti espiritu ti Dios ti nangaramid kaniak; inikkannak iti biag.

5 No kabaelam sungbatannak,

isaganam dagiti pakisuppiatmo kaniak.

6 Job, iti imatang ti Dios, agpadpadata;

nabukelak met iti pitak a kas kenka.

7 Awan ngarud ti panggapuam nga agbuteng kaniak;

saanka a parukmaen.

8 Kastoy ti nangngegko a kinunam;

9 “Awan basolko, ket diak naglabsing.

Nadalusak, ket awan dakes nga aramidko.

10 Ngem agsapul ti Dios

iti panggapuanna a mangdangran kaniak,

ket ibilangnak a kas maysa a kabusor.

11 Kawarannadagiti sakak;

sipsiputanna ti amin a tignayko.”

12 Ngem ibagak kenka, Job, nga agbiddutka.

Natantan-ok ti Dios ngem ti tao!

13 Apay a makisuppiatka iti Dios?

Apay a kunam a dina ipangag ti asug ti tao?

14 Nadumaduma a wagas ti panagsao ti Dios,

ngem saan latta nga ikaskaso dagiti tattao.

15 Agsaoti Dios no matmaturog dagiti tattao iti rabii

babaen kadagiti tagtagainep ken parmata.

16 Ipangngegna kadakuada ti saona,

ket mabutengda kadagiti ballaagna.

17 Agsao ti Dios tapno pagsardengenna ida nga agbasol

ken tapno saanda nga agtangtangsit.

18 Saanna nga ipalubos a madadaelda;

iti mismo a patay, isalakanna ida.

19 Disiplinaenna ti tao.

Yegna kadakuada ti sakit ken ti nasaem nga ut-ot.

20 Ti masakit mapukaw ti ganasna a mangan

ket dina sagiden ti naimas a taraonna.

21 Main-inut nga umres ti bagina

ket kudil laengen ti mangbungon iti tulangna;

22 asidegen ti ipapanna iti tanemna.

23 Nalabit nga adda anghel a tumulong kenkuana—

maysa kadagiti rinibu nga angheles ti Dios—

a mangipalagip kadagiti tattao ti rebbengda.

24 Agpakpakaasinto ti anghel ket kunana:

“Ruk-atam! Saan a mapan iti lubong dagiti natay.

Adtoy ti pangsubbotko kenkuana.”

25 Umubingto manen ti bagina,

sumubli ti pigsana kas idi kabambanuaganna.

26 Sungbatanto ti Dios ti kararagna,

ket sirarag-onto nga agdaydayaw kenkuana.

Pagbalinento manen ti Dios a nalinteg.

27 Kunananto kadagiti tattao,

“Nagbasolak; saan a naimbag ti inaramidko,

ngem inispalnak ti Dios.

28 Dina impalubos a mapanak

iti lubong dagiti natay,

ket ita, addaak pay la a biag.”

29 Kanayon a kasta ti ar-aramiden ti Dios;

30 ispalenna ti biag ti tao,

ket ipaayna kenkuana ti rag-o ti panagbiag.

31 Job, ipangagmo ti sasawek;

agulimekka ket pagsawennak.

32 Ngem ibagam kaniak no adda maisungbatmo;

siaayatak a mangannugot a sika ti pudno.

33 Ngem no awan, agulimekka ket denggennak,

ta isuroka nga agbalin a masirib.

1-2 Denggenyo ti sawek, dakayo a masirib

ken nasikap a lallaki.

3 Ammoyo ti naimas a taraon no maramananyo;

ngem apay a diyo mailasin

ti nainsiriban a sao no mangngegyo?

4 Mailasintayo koma ti nalinteg.

Ket pilientayo ti naimbag.

5 Kuna ni Job nga awan basolna,

nga inikkat ti Dios ti kalinteganna.

6 Kunana, “Nupay awan basolko, naibilangak nga ulbod;

nasaem ti sugatko, uray awan salungasingko.”

7 Nakakitakayo kadin iti tao

a kas iti daytoy a Job?

Inumenna ti panangumsi a kasla danum.

8 Makikadkadua kadagiti dakes a tattao

ken makikuykuyog kadagiti managbasol.

9 Kunana nga awan a pulos ti magunggona

iti panangtungpal iti pagayatan ti Dios.

10 Denggendak ngarud, dakay a mannakaawat!

Agaramid kadi iti saan a naimbag ti Dios a Mannakabalin-amin?

11 Gunggonaannadagiti tattao kas mayannurot iti aramidda

ket ukomenna ida kas kaikarianda.

12 Saan nga agaramid ti Dios iti dakes,

ti Mannakabalin-amin dina a ballikugen ti hustisia.

13 Naggapu aya ti pannakabalin ti Dios iti sabali?

Adda aya nangisaad kenkuana

a mangaywan iti lubong?

14 No alaen ti Dios ti anges ti biag,

15 matay dagiti amin a sibibiag,

ket agbalinda manen a tapok.

16 Ita, Job, denggennak no masiribka.

17 Ipagarupmo aya a guraen

ti Mannakabalin ti hustisia?

Ukomem kadi ti nalinteg a Dios?

18 Dusaen ti Dios dagiti ari ken dagiti agtuturay,

no awan serserbida wenno nadangkokda.

19 Saanna nga ayonan dagiti agtuturay.

Dina idumduma dagiti baknang kadagiti napanglaw

ta pinarsua amin ti Dios ida.

20 Mabalin a kellaat a matay ti tao iti rabii.

Kabilen ti Dios dagiti tattao ket mapukawda;

dagiti mamaingel laklakaenna a patayen ida.

21 Sipsiputanna ti amin nga addang dagiti tattao.

22 Awan ti nasipnget a lugar

a mabalin a paglemmengan dagiti managdakdakes.

23 Saan a masapul nga ituding ti Dios ti aldaw

a pannakaisaklang dagiti tattao iti pangukomanna.

24 Saan a masapul ti pannakausig

tapno ikkatenna dagiti pangulo,

ket isaadna dagiti sabali iti lugarda.

25 Agsipud ta ammona ti aramidda,

ikkatenna ida iti saadda ken parmekenna ida iti rabii.

26 Dusaenna dagiti managbasol

iti imatang dagiti tattao,

27 agsipud ta nagsardengda a sumursurot kenkuana,

ket dida inkankano dagiti amin a bilinna.

28 Pinilitda dagiti napanglaw tapno umasugda iti Dios,

ket impangagna ti dawatda a tulonganna ida.

29 No saan nga agtignay ti Dios,

siasino ti mangbabalaw kenkuana?

No ilingedna ti rupana,

awan ti mabalin nga aramiden ti tao.

30 Saan koma nga agturay dagiti nadangkok

tapno saanda nga isagmak dagiti tattao.

31 Job, impudnom kadin dagiti basolmo iti Dios?

Inkarim kadin kenkuana a saanka nga agbasolen?

32 Dinawatmo kadi iti Dios

nga ipakitana dagiti biddutmo?

Immannugotka kadi nga isardengmon

ti agaramid iti dakes?

33 Gapu ta dimo kayat ti ar-aramiden ti Dios,

namnamaem kadi nga aramidenna ti kayatmo?

Saan a siak ti mangikeddeng no di sika.

Ibagam ngarud no ania ti kapanunotam.

34 Awan duadua a kumanunong dagiti manakem;

ibaga ti siasinoman a masirib a makangngeg kaniak

35 nga agsasao ni Job nga awan ammona,

ket awan mamaay ti sasawenna.

36 Amirisenyo ti amin nga imbaga ni Job;

makitayo nga agsasao

a kas maysa a dakes a tao.

37 Nayonanna ti basolna iti yaalsa;

iti imatangtay amin, lalaisenna ti Dios ken rabrabakenna.

1-2 Job, ipagarupmo aya a nalintegka?

Kunam, “Awan basolko iti imatang ti Dios.”

3 Ken saludsodem kenkuana, “Kasano a maseknanka iti basolko?

Adda kadi magunggonak iti diak panagbasol?”

4 Kastoy ti maisungbatko kenka ken kadagiti gagayyemmo:

5 Kitaem ti tangatang!

Kitaem ti kangato dagiti ulep!

6 Noagbasolka, saan a madangran ti Dios.

Awan pakaan-anoanna no adu ti labsingmo.

7 Matulongam kadi ti Dios no nalintegka?

Awan ti pakasapulan ti Dios kenka.

8 No agbasolka ti laeng padam a tao ti agsagaba;

iti panagaramidmo iti naimbag, makatulongka kenkuana.

9 Agasug dagiti tattao no maidadanesda,

umawagda iti mangisalakan kadakuada.

10 Ngem saanda nga agkamang

iti Dios a namarsua kadakuada,

isu a mangted iti namnamada

iti karigatan a tiempo ti panagbiagda.

11 Dida agkamang iti Dios a mamagsirib kadatayo;

pagbalinennatayo a nasirsirib

ngem iti animal wenno tumatayab.

12 Dumawatda iti tulong ngem awan ti pannakaipangagda,

agsipud ta natangsit ken managdakdakesda.

13 Awan serserbi ti panagas-asugda;

saan a talliawen wenno ipangag ida ti Dios a Mannakabalin-amin.

14 Job, kunam a dimo makita ti Dios;

ngem aganuska, ta ti kasom naidatagen kenkuana.

15 Ipagarupmo a saan a mangdusa ti Dios

ken dina ikaskaso ti basol.

16 Awan serserbi ti sarsaritaem;

nalawag a dimo ammo ti sasawem.

1-2 Aganuska pay bassit a dumngeg

ta adda pay ibagak kenka a paibaga ti Dios.

3 Adu ti ammok, ket usarek

a mangipakita a nalinteg ti Dios a namarsua kaniak.

4 Awan ti ulbod nga ibagbagak;

pudno a masirib daytoy makisasao kenka.

5 Mannakabalin ti Dios! Awan ti laisenna;

awan ti banag a dina maawatan.

6 Dina pagpauten ti biag dagiti managbasol,

ket ipaayna ti hustisia kadagiti napanglaw.

7 Salaknibanna dagiti nalinteg;

pagturayenna ida a kas kadagiti ari,

ket bay-anna a madaydayawda iti agnanayon.

8 Ngem no mabalud ti maysa a tao

ket agsagaba gapu iti inaramidna,

9 ipakaammo ti Dios no ania dagiti labsingna

ken ti kinapalangguadna.

10 Ballaaganna ida, inna ida palagipan;

ibilinna a panawanda ti dakes a dalan.

11 No agtulnogda iti Dios ket agserbida kenkuana,

naragsak ken narang-ay ti panagbiagda.

12 Ngem no dida ikankano ti Dios,

mataydanto iti kampilan,

ket pumusayda nga awan ti ammoda.

13 Agtalinaed latta ti pungtot dagiti awan Diosna,

dida agdawat iti tulong uray no madusada.

14 Uray no agkabannuagda pay laeng, matayda;

napnoan iti bain nga aggibus ti biagda.

15 Ngem isuro ti Dios dagiti tattao babaen iti panagsagaba,

ket aramatenna ti rigat a panglukat kadagiti matada.

16 Inaonnaka ti Dios iti pakarigatam,

ket intedna ti natalged a panagbiagmo;

naglaplapusanan iti makan ti lamisaanmo.

17 Ngem sika, madusdusaka a kas iti kaikariam.

18 Agannadka tapno dika maallilaw iti pasuksok;

agannadka amangan no yaw-awannaka ti kinabaknang.

19 Awan imbag nga ited ti panagpaarayatmo;

dinaka matulonganen ti amin a pigsam.

20 Dimo tarigagayan a dumteng ti rabii,

ti tiempo a maisina dagiti tattao iti lugarda.

21 Kitaem ta dika agaramid iti saan a nasayaat;

nagsagabaka tapno agbalinka a naimbag.

22 Laglagipem ti dakkel a pannakabalin ti Dios;

isu ti katan-okan kadagiti amin a maestro.

23 Awan ti makaibaga kenkuana iti aramidenna

wenno mangpabasol a dakes ti inaramidna.

24 Kanayon a maidaydayaw

gapu iti aramidna;

masapul met ngarud nga idaydayawmo.

25 Nakita ti amin a tao dagiti gapuananna,

ngem ditay maawatan dagiti aramidna.

26 Saan a naan-anay nga ammotayo ti kinatan-okna;

saantay met a mabilang ti kaadu ti tawenna.

27 Ti Dios ti mangala iti danum ditoy daga,

ket pagbalinenna a tudo

28 a maibukbok para iti sangkataoan.

29 Awan ti makaammo no kasano nga aggunay dagiti ulep

wenno agbettak ti gurruod

sadi langit a balay ti Dios.

30 Pagkimatenna ti entero a langit,

ngem nasipnget latta ti lansad ti baybay.

31 Kastoy ti panangpakannakadagiti tattao

ken pannangtedna iti nawadwad a taraonda.

32 Gammatanna ti kimat ket bilinenna

a sal-itenna ti kayatna a puntaan.

33 Ipakaammo ti gurruod ti umay a bagio;

ipakdaar met dagiti arban ti isusungadna.