Month: March 2020

1 Gapu iti bagio, agtibbayoak ket uray la lumagto toy puso.

2 Dumngegkay amin iti timek ti Dios,

ken iti gurruod nga aggapu iti ngiwatna.

3 Ibulosna ti kimat iti tangatang

ket sal-itenna dagiti pungto ti daga.

4 Kalpasanna, mangngeg ti ungor ti timekna,

ti nadayag a dulluog ti gurruod

bayat ti panagsiwet ti kimat.

5 Agbilin ti Dios, ket maaramid dagiti nakaskasdaaw a banag;

wen, dagiti datdatlag a ditay maawatan.

6 Pagtinnagenna ti niebe ditoy daga,

kasta met ti bumayakabak a tudo.

7 Pagsardengenna ti trabaho dagiti tattao;

ipakitana kadakuada no ania ti maaramidna.

8 Sumrek dagiti atap nga ayup kadagiti rukibda.

9 Aggapu ti bagio iti abagatan

ken ti kasta unay a lam-ek iti amianan.

10 Babaen iti anges ti Dios,

agbalay dagiti danum ket agbalinda a yelo.

11 Aggilap ti kimat kadagiti ulep.

12 Agrikosrikosda iti tangatang,

ket tungpalenda ti pagayatan ti Dios.

Aramidenda amin nga ibilin ti Dios

iti sadinoman a paset ti lubong.

13 Pagtinnagen ti Dios ti tudo a mangpadanum iti daga;

mabalin a pangdusana kadagiti tattao,

wenno pangipakitana iti kaasina kadakuada.

14 Job, agtalnaka bassit ket dumngegka;

utobem dagiti nakaskasdaaw nga aramid ti Dios.

15 Ammom aya no kasano ti panangbilin ti Dios,

ket pagkimatenna dagiti ulep?

16 Ammom aya no kasano nga aglayag dagiti ulep iti tangatang?

Gappuanan daytoy ti nakaskasdaaw a laing ti Dios!

17 Saanmo nga ammo dayta!

Mariknam laeng ti pudot ket agsagabaka

no dumteng ti angin-abagatan a manglanet iti daga.

18 Matulongam kadi ti Dios a mangyukrad iti langit

ken mangpatangken a kas iti napasileng a metal?

19 Isuronakam iti sawenmi iti Dios,

ta nakullaapan ti panunotmi.

20 Diak dawaten iti Dios a pagsawennak.

Apay nga ikkak ti gundawayna a mangdadael kaniak?

21 Ket ita, makapurar ti lawag iti tangatang,

naraniag unay a kitaen;

ket dinalusan ti angin ti langit.

22 Adda makita a nabalitokan nga anaraar iti amianan,

ket lapunosennatayo iti buteng ti dayag ti Dios.

23 Naindaklan unay ti pannakabalin ti Dios

ket ditay makaasideg kenkuana.

Nalinteg ken awan idumdumana iti pannakilangenna.

24 Saan ngarud a pagsiddaawan

nga agbuteng kenkuana ti amin a tao,

ket dina ikankano dagiti mangipagarup a masiribda.

Sumungbat ni Yahweh

Idi madama ti bagio, nagsao ni Yahweh ken ni Job:

1-2 Siasinoka nga agduadua iti siribko?

Ipakpakitam laeng ti kinanengnengmo.

3 Tumakderka ita a kas maysa a lalaki,

ket sungbatam dagiti saludsodko.

4 Addaka kadin idi aramidek ti lubong?

Ala, agsaoka man no adda ammom.

5 Siasino ti nangikeddeng iti kadakkelna?

Siasino ti nangrukod iti kaakabana?

Awan duadua nga ammom!

6 Ania ti nakaikapetan

dagiti adigi a nagbatayan ti daga?

Siasino ti nangisaad

iti pasuli ti lubong?

7 Itiparbangon dayta nga aldaw,

sangsangkamaysa a nagkanta dagiti bituen

ket nagdir-i iti rag-o dagiti nailangitan a parsua.

8 Siasinoti nangirikep kadagiti ruangan

tapno matengngel ti baybay

idi nagpussuak iti uneg ti daga?

9 Siak ti nangabbong iti taaw kadagiti ulep,

ket kinumotak iti kinasipnget.

10 Insaadkoti beddeng ti baybay,

ket binalunetak dagiti ruanganna.

11 Kinunak iti baybay,

“Aginggaka laeng ditoy a beddeng;

agpatingga ditoy dagiti dadakkel a dalluyonmo.”

12 Job, bayat ti panagbiagmo

adda kadin aldaw a pinagbannawagmo?

13 Nabilinmo kadin ti bannawag tapno gammatanna ti daga

ken gunggonenna dagiti managdakdakes nga iruar kadagiti paglemlemmenganda?

14 Ipannayag ti raniag ti init

dagiti turod ken tanap

a kas iti nabatad a kupin ti pagan-anay.

15 Naraniag unay ti lawag ti aldaw,

ket lapdanna nga agranggas

dagiti managdakdakes.

16 Nakapanka kadin kadagiti ubbog iti uneg ti baybay?

Nagnaka kadin iti lansad ti taaw?

17 Naipakitan aya kenka dagiti ruangan

a mangbantay iti nasipnget a lubong dagiti natay?

18 Ammom kadi ti kadakkel ti lubong?

Sungbatannak man no ammom.

19 Ammom kadi ti paggapuan ti lawag,

wenno ti pagtaudan ti sipnget?

20 Maipakitam kadi kadakuada

ti kaadayo ti papananda?

Mapasublim kadi ida?

21 Ammok a maaramidmo ti kasta ta lakayka unayen,

ket addakan idi maparsua ti lubong!

22 Nastrekmo kadin ti pagiduldulinak

kadagiti niebe ken yelo?

23 Isagsaganak ida iti panawen ti didigra,

kadagiti aldaw ti dangadang ken gubat.

24 Nakapanka kadin iti leleggakan ti init,

wenno iti paggapuan ti angin iti daya?

25 Siasino ti nagkali iti pagayusan ti bumayakabak a tudo?

Siasino ti nangwaknit

iti pagnaan ti gurruod ken kimat?

26 Siasino ti mangted iti tudo

iti lugar nga awan matagtagitao?

27 Siasino ti mangpadanum iti namaga ken natikag a daga

tapno agtubo dagiti ruot?

28 Adda aya ama ti tudo wenno ti linnaaw?

29 Siasino ti ina ti yelo ken uraro,

30 a namagbalay iti danum,

ket timmangken ti rabaw ti baybay?

31 Kabaelamkadi a reppeten

ti bunggoy dagiti Pleiades,

wenno warawaren dagiti galut ti Orion?

32 Maiturongmo aya dagiti bituen iti tunggal panawen?

Maidalanmo aya dagiti bituen a managan iti Dakkel ken iti Bassit nga Oso?

33 Ammom kadi dagiti alagaden a mangituray kadagiti langit?

Maipakatmo kadi dagitoy iti daga?

34 Kabaelam kadi a bilinen dagiti ulep

tapno rusependaka iti tudo?

35 No bilinem nga aggilap ti kimat,

umay kadi kenka ket kunana,

“Madadaanak, apo, nga agserbi kenka”?

36 Siasino ti pakaammoan ti billit nga ibis

nga aglayus ti Karayan Nile?

Siasino ti pakaammoan ti kawitan a dumteng ti tudo?

37 Siasino ti masirib a makabilang kadagiti ulep

ken bangkingenda tapno agbayakabak?

38 Ket agtutukel ti tapok a basaen ti tudo.

39 Yanupam aya dagiti leon iti taraonda?

Mabussogmo kadi dagiti mabisin nga urbonda,

40 no aglemlemmengda iti rukibda

wenno agur-urayda nga agsaneb iti aponda?

41 Siasino ti mangpakan kadagiti wak

no mabisin ken agkalkallautangda?

Siasino ti mangpakan kadagiti urbonda,

no umasugda kaniak gapu iti kaawan kanenda?

1 Ammom kadi no kaano a nayanak

dagiti atap a kalding ti bantay?

Naimatangam kadin ti panagpasngay ti ugsa?

2 Ammom kadi no mano a bulan ti panagsikogda

wenno ania nga aldaw ti panaganakda?

3 Ammom kadi no kaano ti panagrukobda

tapno agpasngayda?

4 Dumakkel dagiti urbonda iti kabakiran;

pumanawda ket dida agsubsublin.

5 Siasino ti nangted iti wayawaya dagiti atap nga asno?

Siasino ti nangibulos kadakuada tapno agturongda iti kaykayatda a papanan?

6 Intedko ti let-ang a pagtaenganda,

ket pinagnaedko ida iti naapgad a daga.

7 Adaywanda dagiti naarimbangaw a siudad,

ket awan ti makapaamo kadakuada tapno pagtrabahoenda ida.

8 Sursorenda dagiti bambantay a kas pastoda

ket agbirokda iti naraber a ruot nga arabenda.

9 Mapagtrabahom kadi ti atap a nuang?

Kayatna aya ti maturog iti koralmo iti rabii?

10 Mataliam aya tapno pagaradoem

wenno pagsagadem iti talonmo?

11 Makapagpannurayka kadi iti dakkel a pigsana?

Namnamaem kadi nga aramidenna ti trabahom?

12 Manamnamam kadi nga isangpetna ti apitmo,

ket ummongenna ti nairikmo?

13 Napardas ti panagpayakpak ti abestrus!

Ngem awan ti abestrus a makatayab a kas iti kannaway!

14 Panawan ti abestrus dagiti itlogna iti daga,

ket bay-anna ti pudot ti daga a mangpessa kadakuada.

15 Dina pampanunoten

no mabaddekan dagiti itlogna

wenno pis-iten dagiti atap nga animal.

16 Kasla saan a nagtaud dagiti itlog kenkuana;

kasla awan aniaman ti nagbannoganna.

17 Siak ti namagbalin kenkuana a maag,

ket saanko nga inikkan iti sirib.

18 Ngem no rugianna ti agtaray,

atiwenna ti kabalio ken ti nagsakay.

19 Sika aya, Job, ti namagbalin kadagiti kabalio a nakapigpigsa?

Sika aya ti nangted iti agal-allon a pargayen iti tengngedda?

20 Palagtoem kadi ida a kas kadagiti dudon?

Agbuteng dagiti tattao iti panagbang-esda.

21 Sigagagarda a mangkurob iti daga iti tanap;

kasta unay ti pardasda a mapan iti paggugubatan.

22 Dida ammo ti agbuteng, dida madanagan

ket dida itarayan ti kampilan.

23 Kumalangiking ken aggilapgilap

ti igam dagiti nagsakay kadakuada.

24 Gapu iti nalaus a gagarda,

agtarayda a dagus no mapuyot ti trumpeta.

25 Agbang-esda tunggal aguni ti trumpeta;

adayoda pay ngem maangotda ti gubat.

Mangngegda ti arimbangaw;

agbilin dagiti ofisiales ket matimudda dagiti pukkaw.

26 Sika aya ti pagsursuroan ti kali iti panagtayabna,

no yukradna dagiti payakna nga agpa-abagatan?

27 Agpannuray aya ti agila iti bilinmo

tapno agaramid iti umokna iti nangato a bantay?

28 Agtaeng kadagiti kangatoan a rangkis,

ket pagbalinenna a sarikedkedna

dagiti nangato a pantok.

29 Manipud sadiay, agsiput iti alun-onenna,

adayo pay laeng ngem makitana.

30 Aguummongdagiti buitre iti ayan dagiti bangkay,

ket inumen dagiti urbonda ti dara dagiti natay.

1-2 Job, kinaritmo ti Dios a Mannakabalin-amin;

sumukoka kadin wenno makisuppiatka pay laeng?

3-4 Minamaag ti panagsaok, OApo.

Ania pay ti maisungbatko kenka?

Awanen ti masaok.

5 Ad-adun ti naisaok ngem ti rebbengko.

6 Idi madama ti bagio, nagsao manen ni Yahweh ken ni Job.

7 Tumakderka ita a kas maysa a lalaki,

ket sungbatam dagiti saludsodko.

8 Kayatmo kadi a paneknekan a nakilloak?

Pagparangem kadi a nagbiddutak,

ket pagbalinem ti bagim a nalinteg?

9 Napigsaka kadi a kas kaniak?

Gumluong kadi ti timekmo a kas iti timekko?

10 No maaramidmo dagitoy, tumakderka ngarud a sidadayaw ken sidadaeg.

Agkaweska iti kinatan-ok ken iti kinadayag.

11 Kitaem dagiti natangsit;

idissuormo ti pungtotmo, ket ibabainmo ida.

12 Wen, kitaem dagiti napalangguad

ket pagpakumbabaem ida.

Dadaelem dagiti managdakdakes iti pagtaktakderanda.

13 Ikalim amin ida iti daga;

ibaludmo ida iti lubong dagiti natay.

14 Iti kasta, siakto ti umuna a mangdayaw kenka

ken mangannugot a nagballigika.

15 Kitaem ti Behemot;

pinarsuakayo a dua.

Mangan iti ruot a kas iti baka,

16 ngem anian a pigsana,

anian a bileg dagiti piskelna!

17 Tumakder a kas sedro ti ipusna;

napigsa ti piskel dagiti gurongna.

18 Kasla bronse ti kapigsa dagiti tulangna;

limmandok dagiti sakana.

19 Isu ti kangrunaan kadagiti aramid ti Dios.

Ti laeng Namarsua ti makaparmek kenkuana.

20 Agarab kadagiti ruot nga agtubo kadagiti bantay

a pagay-ayaman dagiti atap nga ayup.

21 Agidda iti sirok dagiti kayo a sisiitan,

ket aglemmeng kadagiti runo iti kadanuman.

22 Dagiti kayo a siitan

ken karawaweiti igid ti waig

ipaayda kenkuana ti linongna.

23 Saan nga agbuteng no aglayus ti Jordan.

Natalna latta uray no masabbuagan ti rupana.

24 Siasino ti makabulsek kenkuana tapno matiliwna?

Siasino ti makataldeng kenkuana?

1 Mabanniitamkadi ti Leviatan?

Mataliam kadi ti dilana?

2 Mataldengam kadi?

Makawitam kadi ti ngiwatna?

3 Agdawat aya kenka tapno bulosam?

Agpakpakaasi aya kenka?

4 Makitulag aya kenka,

ket ikarina nga agnanayon a pagserbiannaka?

5 Galutam aya a kas iti taraken a billit,

kas iti paglinglingayan dagiti tagabum a babbai?

6 Pagtitinnawaran aya dagiti mangngalap?

Rangrangkayen aya dagiti agtagtagilako sada ilako?

7 Matatekmo kadi ti kudilna kadagiti pisga?

Masalputmo kadi ti ulona iti pika?

8 Sagidem la iti mamimsan ket dimonto mapiduan;

pulos a dimonto malipatan ti dangadang!

9 Siasinoman a makakita iti Leviatan,

mapabutngan ket mapasag.

10 Narungsot no mapagpungtotmo;

awan ti makaitured a sumango kenkuana.

11 Siasino ti mangdarup kenkuana ket saan a maan-ano?

Iti entero a lubong, awan ti makaaramid!

12 Saritaek man ti maipapan kadagiti saka ti Leviatan,

ket iladawak ti kadakkel ken kapigsana.

13 Awan ti makalalat kenkuana

wenno makasalput iti napuskol a kabalna.

14 Siasino ti makaitured a mangungap iti pangana

idinto ta nakabutbuteng dagiti naintar a ngipenna?

15 Dagiti siksikna ti pagtangsitna;

nairut ti panagkakamangda,

ket kas iti bato ti tangkenda.

16 Nadekket unay ti panagkakapetda,

ket awan pagnaan ti angin iti baetda.

17 Nairut unay ti panagsasaipda,

ket pulos a dida mapagsisina.

18 No agbang-es, rummuar ti apuy iti agongna;

agrimat dagiti matana a kas iti init iti agsapa.

19 Agruar ti gumilgil-ayab nga apuy iti ngiwatna;

dagiti rissik ti apuy agparsiakda.

20 Agruar ti asuk iti agongna,

kasla asuk ti ruot a mapupuoran.

21 No umanges, sumged dagiti uging;

agruar ti apuy iti ngiwatna.

22 Napigsa unay ti tengngedna,

ket agbuteng ti makasabat kenkuana.

23 Awan nalukneng a paset ti lalatna;

nasikkil ken natangken a kas landok.

24 Bimmato ti pusona, di agbuteng;

saan a magaraw ken natangken a kas iti gilingan.

25 No bumaringkuas, makigtot uray ti kapigsaan;

awan ti maaramidda gapu iti buteng.

26 Awan ti kampilan a makadunor kenkuana;

saan a masugat iti gayang, iti pana wenno iti buneng.

27 Ibilangna ti landok a kasla garami

ken ti gambang a kasla narukop a kayo.

28 Saanna nga itarayan ti pana;

kasla kalag-an ti arutang dagiti bato a maibarsak kenkuana.

29 Ibilangna a garami ti maysa a pang-or;

agkatawa laeng no gayangen dagiti tattao.

30 Kasla natadem a buong ti sarming dagiti kukona;

no magna iti kataltalonan, maarado ti daga.

31 Kiburenna ti baybay a kasla agburburek a danum.

Pagluagenna ti taaw a kasla lumlumuag a lana.

32 Aglabutab ti malabasanna a baybay;

pumuraw a burek ti mapagnaanna.

33 Awan ti kas kenkuana iti rabaw ti daga;

maysa a parsua nga awan kabutengna.

34 Laisenna uray dagiti kapalangguadan nga animal;

isu ti ari dagiti amin a narungsot nga ayup.

1 Simmungbat ni Job ken ni Yahweh.

2 Ammok a mannakabalinka unay, OApo,

ket maaramidmo ti amin a kayatmo.

3 Damagemno apay a pagduaduaak ti siribmo,

idinto ta kasta unay ti kinanengnengko.

Nagsaoak maipapan kadagiti diak maawatan;

bambanag a nakaskasdaaw unay, saanko nga ammo.

4 Imbagama dumngegak bayat ti inka panagsao,

ket padasek a sungbatan dagiti saludsodmo.

5 Nadamdamagko la idi ti maipapan kenka;

ngem ita, nakitaka kadagiti mismo a mata.

6 Isut’ gapuna a mabainak iti amin a naisawangko;

agbabawiak ket warsiak ti bagik iti tapok ken dapu.

Paggibusan

7 Kalpasan ti panangisao ni Yahweh kadagitoy ken ni Job, kinunana ken ni Elifaz, “Karurodka kasta met dagiti dua a gagayyemmo, ta saan a pudno ti imbagayo maipapan kaniak, a kas ken ni Job nga adipenko.

8 Ita ngarud, mangalakay iti pito a toro a baka ken pito a kalakian a karnero sayo ited ken ni Job, ket puoranyo dagitoy nga animal a kas datonyo. Idawdawatannakayto ni Job ket sungbatakto ti kararagna. Iti kasta, dikayto ibabain a kas iti kaikarianyo. Ngamin, saan a pudno ti imbagayo maipapan kaniak a kas iti inaramid ni Job.”

9 Tinungpal da Elifaz, Bildad ken Zofar ti imbilin ti Yahweh nga aramidenda, ket impangag ni Yahweh ti kararag ni Job.

10 Pinagrang-aymanen ni Yahweh ni Job kalpasan ti panangidawdawatna kadagiti tallo a gagayyemna. Dinoblena ti kaadu ti sigud a sanikua ni Job.

11 Napan kenkuana dagiti amin a kakabsatna ken dagiti sigud a gagayyemna ket nakipagrambakda kenkuana. Inyebkasda ti pannakipagriknada kenkuana ket liniwliwada gapu iti amin a rigat nga impalak-am ni Yahweh kenkuana. Nangted ti tunggal maysa kadakuada iti kuarta ken singsing a balitok.

12 Kadagiti maudi a tawen ti panagbiag ni Job, ad-adu ti bendision nga inted ni Yahweh kenkuana ngem idi damo. Naaddaan iti 14,000 a karnero, 6,000 a kamelio, 2,000 a baka ken 1,000 nga asno.

13 Naparaburan pay iti pito nga annak a lallaki ken tallo a babbai.

14 Pinanagananna ti inauna a babai iti Jemima; ti maikadua, Kesia, ken ti maikatlo, Keren-Happuc.

15 Awan ti babai iti entero a lubong a napimpintas ngem dagiti annak ni Job. Pinatawidan met ida ni Job nga amada a kas iti impatawidna kadagiti kakabsatda a lallaki.

16 Nagbiag pay ni Job iti 140 a tawen ket nakitana pay dagiti appoko ken appokona iti tumeng.

17 Lakay unayen idi matay.