Month: March 2020

Ti Pagayatan ti Dios

1 Siasino, OApo, ti makastrek iti templom?

Siasino ti makapagyan iti Sion a nasantoan a bantaymo?

2 Ti makastrek isu ti managtulnog iti Dios,

kanayon a naimbag ti aramidna;

pudno ken naimpusoan ti amin a sawenna.

3 Awan ti tao a padpadaksenna,

dina ranggasan dagiti gagayyemna,

dina sarsaritaen ti siasinoman a kaarubana.

4 Umsienna dagiti laksiden ti Dios,

ngem padayawanna dagiti agbuteng itiApo,

tungpalenna ti karina

uray no pakatayanna,

5 dina paanakan ti kuarta nga ipautangna,

di mapasuksokan tapno agsaksi

iti maibusor iti awan basolna.

Natalgedto latta dagiti kasta ti aramidna.

Kararag ti Panagtalek

1 Salaknibannak, O Dios,

ta sika ti pagkamangak.

2 Kunak itiApo, “Sika ti Apok;

naggapu kenka ti amin a naimbag nga adda kaniak.”

3 Nagimbag ketdin dagiti

mapagtalkan a tattao tiApo!

Pagragsakak unay ti pannakikaduak kadakuada.

4 Dagiti agkamang kadagiti sabali a dios,

paaduenda laeng ti parikutda.

Diakto kumuyog kadagiti panagidatonda

wenno agdaydayaw kadagiti didiosenda.

5 Sika laeng, OApo, ti adda kaniak,

ket itedmo amin ti kasapulak;

adda kadagita imam ti masakbayak.

6 Nakaskasdaaw dagiti sagutmo kaniak;

pasigda amin a nakasaysayaat.

7 Idaydayawko tiApota idaldalannak;

iti rabii patigmaanannak ti konsensiak.

8 Kanayona mariknak ti kaadda tiApo,

asideg ket awan ti pakaan-anoak.

9 Ngarud, napnoanak iti rag-o ken ragsak

ket kanayon a natalged ti riknak.

10 Ngamin,iti bileg ni patay salaknibannak,

ket iti lubong dagiti natay,

dimo bay-an nga agrupsa ti ay-ayatem.

11 Isurom kaniak ti dalan nga agturong iti biag;

ti kaaddam kaniak, punnoennak iti rag-o,

ket ikkannak iti agnanayon a ragsak.

Kararag ti Nalinteg a Tao

1 Denggem, OApo, ti asugko a mangtunton iti kalintegak;

ti panagdawatko iti tulong imdengannak.

Ipangagmo daytoy napudno a kararag.

2 Ipaulogmo ti pangngeddengmo a manganamong kaniak

agsipud ta ammom ti naimbag.

3-4 Naan-anay nga ammom ti pusok;

umayka kaniak iti rabii.

Naan-anay ti panangsuotmo kaniak,

ket awan nasarakam a dakes a tarigagayko.

Pudno ti saok, saan a kas kadagiti dadduma;

tinungpalko dagiti bilinmo

ken diak sinurot ti dalan dagiti naranggas.

5 Kankanayon a sinurotko ti wagasmo,

ket pulos a diak pinanawan ti dalanmo.

6 Agkararagak kenka, O Dios, agsipud ta sungbatannak;

taliawennak ngarud ket dagiti saok inka ipangag.

7 Ipakitam ti nakaskasdaaw nga ayatmo ket ispalennak;

iti sibaymo, kadagiti kabusor awan pakaan-anoak.

8 Salaknibannak, kas panangsalluadmo iti ay-ayatem;

salukobannak kadagiti bukodmo a payak

9 iti panangdarup dagiti managdakdakes a kabusor a nanglikmut kaniak.

10 Awan asida ket natangsit ti panagsaoda.

11 Addada iti sadinoman a pagturongak;

agur-urayda iti gundaway a mangipababa kaniak.

12 Kasda la leon a mangur-uray kaniak

tapno rangrangkayendak.

13 Umayka, OApo, ket parmekem dagiti kabusorko!

Isalakannak kadagiti managdakdakes babaen iti kampilanmo.

14 Isalakannak kadagiti addaan iti amin a kasapulan ditoy a biag.

Ipataymo kadakuada dagiti panagsagaba nga insaganam kadakuada,

ket adda pay koma agpaay nga ibaklay dagiti appokoda.

15 Ngem makitakanto gapu ta awan dakes nga aramidko;

ket gapu iti kaaddam, no makariingak mapnoakto iti rag-o.

Kanta ni David iti Panagballigina

1 Ay-ayatenka, OApo!

Sika ti pagtaudan ti pigsak.

2 TiApoti salaknibko;

isu ti bato a sarikedkedko.

Ti Diosko ti mangsalaknib kaniak,

kenkuana, awan ti pakaan-anoak.

Kas maysa a kalasag salaknibannak,

ikaluya ken salluadannak.

3 Umawagak itiApo,

ket isalakannak kadagiti kabusorko.

Madaydayaw tiApo!

4 Dagiti tali ni patay pinulipolandak;

dagiti dalluyon ni pannakadadael inyallondak.

5 Dagiti tali ni tanem pinulipolandak;

ket nangikabil ni patay iti pakaipalab-ogak.

6 Iti pannakariribukko, immawagak itiApo;

immasugak iti tulong iti Diosko.

Iti templona, nangngegna ti timekko,

ket impangagna ti asugko.

7 Ket nagkintayeg ken nagunggon ti daga;

nadayeg ken nagindayon ti fondasion dagiti bantay,

agsipud ta nakapungtot ti Dios.

8 Rimmuar ti asuk iti agongna,

kasta met ti gumilgil-ayab nga apuy

ken umap-apuy a beggang iti ngiwatna.

9 Linuktanna ti langit sa bimmaba;

adda nangisit nga ulep iti babaen dagiti sakana.

10 Bimmaba a sisasakay kadagiti kerubim,

nagdaliasat a sipapardas iti payak ti angin.

11 Binungonna iti sipnget ti bagina;

napuskol nga ulep a napno iti danum ti nanglikmut kenkuana.

12 Iti masangoananna, mayur-urit ti kimat

a nangpataud kadagiti yelo ken beggang,

a nangsalput kadagiti nangisit nga ulep.

13 Naggurruod tiApoiti tangatang,

ket nangngeg ti timek ti Kangatoan.

14 Imbiatna dagiti panana, ket nawarawara dagiti kabusorna;

pinagkimatna, ket pinagtatarayna ida.

15 Nagparang ti lansad ti taaw;

nawaknitan dagiti puon ti daga,

idi binabalawmo, OApo, dagiti kabusormo,

ken binang-esam ida gapu iti pungtotmo.

16 Manipud langit ginaw-atnak tiApoket iniggamannak,

kadagiti adalem a danum inalawnak.

17 Insalakannak iti pannakabalin dagiti kabusorko

napipigsada ket diak kabaelan ida, awan gawayko.

18 Dinarupdak iti tiempo ti rigatko,

ngem sinalaknibannak tiApo,

19 Tinulongannak idi nagpeggadak;

insalakannak gapu ta maragsakan kaniak.

20 Ginunggonaannak tiApota naimbag ti aramidko,

binendisionannak ta awan basolko.

21 Ti linteg tiApotinungpalko;

saanak a bimmusor iti Diosko.

22 Inannurotko dagiti amin a lintegna,

diak sinalungasing dagiti bilinna.

23 Ammona nga awan biddutko,

ket inadaywak ti kinadakes.

24 Gunggonaannak gapu ta naimbag ti aramidko

ta ammona nga awan ti basolko.

25 OApo, napudnoka kadagiti napudno kenka;

awan pagkurangan ti kinaimbagmo kadagiti awan pakapilawanna.

26 Kadagiti nadalus, agparangka a nadalus,

ngem naungetka kadagiti nadangkok.

27 Isalakanmo dagiti napakumbaba,

ngem dagiti natangsit ipababam ida.

28 Ni Yahweh ti mangted iti silawko;

lawagan ti Diosko ti nasipnget a biagko.

29 Papigsaennak a sumaranget kadagiti kabusorko;

duprakek dagiti sarikedkedda ta ikkannak iti bilegko.

30 Daytoy a Dios awan pakapilawan ti aramidna,

mapagtalkan dagiti saona!

Mayarig iti maysa a kalasag

nga agpaay kadagiti amin a kumamang kenkuana.

31 Ta siasino ti Dios no di laeng tiApo

ket siasino ti maysa a bato no di ti Diostayo?

32 Isu ti Dios a mangmangted iti pigsak,

aramidenna a natalged ti pagnaak.

33 Kadagitibambantay, aywanannak;

kas iti ugsa, papartakennak.

34 Sanayennak iti pannakigubatko,

tapno ti katibkeran a bai ti pana mabiatko.

35 Salakniban ken isalakannak, OApo;

tinaripatonak babaen iti pannakabalinmo,

ket intan-oknak babaen iti tulongmo.

36 Dimo impalubos a matiliwak

ket pulos a diak naitublak.

37 Kamatek dagiti kabusorko ket tiliwek ida;

saanak a sumardeng agingga a maparmekda.

38 Dida makabangon iti panangpadsok kadakuada;

addada a napasag iti sakaanak.

39 Ikkannak iti pigsa a makigubat,

tapno parmekek dagiti kabusorko.

40 Pagtarayem dagiti kabusorko nga umadayo kaniak;

pukawek dagiti gumura kaniak.

41 Agpaarayatda ngem awan makaikanawa kadakuada;

umawagda ken ni Yahweh ngem dina sungbatan ida.

42 Baddekek ida ket kasda la tapok a mayangin,

payatpayatek ida a kas pitak kadagiti kalsada.

43 Insalakannak kadagiti nasukir a tattao,

ket pinagturaynak kadagiti pagilian;

nagserbi kaniak dagiti saanko idi nga am-ammo.

44 Agtamedda kaniak dagiti ganggannaet;

agtulnogda no mangngegdak.

45 Mapukawda ti namnamada,

ket agtigergerda a rummuar iti sarikedkedda.

46 Agbiag tiApo!

Madaydayaw ti salaknibko!

Ipakaammoyo ti kinatan-ok ti nangisalakan kaniak.

47 Isu ti mamagballigi kaniak kadagiti kabusorko,

ken mangparukma kadagiti tattao tapno iturayak ida,

48 ket isalakannak kadagiti gumura kaniak.

Sika ti mamagballigi kaniak kadagiti kabusorko,

ken mangsalaknib kaniak kadagiti naranggas a tattao.

49 Ngarud,OApo, agyamanakto kenka

iti imatang dagiti pagilian;

agkantaak kadagiti pagdaydayawko kenka.

50 Ited ti Dios dagiti naindaklan a balligi iti arina;

ipakitana ti di agbalbaliw nga ayatna iti pinilina,

ni David ken kadagiti kaputotanna iti agnanayon.

Ti Dayag ti Dios kadagiti Naparsua

1 Nabatad nga ipakita ti langit ti dayag ti Dios!

Nalawag nga ipakaammo ti tangatang ti inaramidna!

2 Tunggal aldaw ipakaammona iti sumaruno nga aldaw;

tunggal rabii ibagana iti sumaruno a rabii.

3 Awan maaramat a sao wenno bitla,

awan met timek a mangngeg.

4 Nupaykasta, iti entero a lubong agsaknap ti mensaheda,

makadanon ti saoda kadagiti pungto ti daga.

Nangikabil ti Dios sadi langit

iti tolda a pagyanan ti init.

5 Rummuar iti bigat, kas iti lalaki nga agkasar,

kas tumataray a siraragsak a makilumba.

6 Iti maysa a pungto ti langit ti taudanna,

ket agrikos agingga iti sabali a pungtona.

Awan ti makalisi iti pudotna.

Ti Linteg ni Yahweh

7 Ti linteg tiApoawan pagkuranganna;

baro a pigsa ti itedna.

Pudno ti pammaneknek tiApo,

pagsiribenna uray dagiti nanumo.

8 Nalinteg dagiti alagaden nga intuyang tiApo,

maragsakan dagiti agtulnog kadakuada.

Nainkalintegan dagiti bilbilinna,

ket iti isip pannakaawat ti itedna.

9 Nasayaat ti panagdayaw itiApo,

agpaut nga agnanayon.

Nalinteg dagiti pangngeddengna,

ket kanayon nga awan idumdumada.

10 Ad-addada a matarigagayan ngem iti kasayaatan a balitok,

nasamsam-itda ngem ti puro a diro.

11 Isuda ti mamagbaga kaniak nga adipenmo;

no tungpalek ida, magunggonaanakto.

12 Saan a madlaw ti tao ti bukodna a biddut;

isalakannak ngarud kadagiti diak makita a babakko.

13 Yadayonak met kadagiti agdadata a basolko;

dimo koma ipalubos nga iturayandak.

Iti kasta, awanton ti pakapilawak,

ket iti nakaro a basol mawayawayaanak.

14 Sapay koma ta maragsakanka kadagitoy balikas

ken panagpampanunotko,

OApoa kamang ken mannubbotko.

Kararag a Pagdawat iti Balligi

1 Sungbatannaka koma tiApoiti aldaw ti riribuk!

Salaknibannaka koma ti Dios ni Jacob!

2 Mangyeg koma iti tulong kenka manipud iti Templona,

ket manipud Bantay Sion itedna ti saranayna.

3 Malagipna koma dagiti amin a datonmo,

ket maragsakan iti amin a mapuoran a sagutmo.

4 Patganna koma ti tarigagaymo

ket pagballigienna ti amin a panggepmo.

5 Ipukkawminto ti ragsakmi gapu iti balligim,

ket rambakanmi ti panangabakmo

babaen ti panangidaydayawmi iti Diostayo.

Ited koma tiApodagiti amin a dawatmo!

6 Ita, ammokon a tulongan tiApoti ari a pinilina,

sungbatanna manipud iti nasantoan a langitna,

ket itedna kenkuana dagiti dadakkel a balligi

babaen iti pannakabalinna.

7 Adda agtalek kadagiti pakigubatda a lugan;

ti dadduma agtalekda met kadagiti kabalioda,

ngem agtalektayo iti pannakabalin tiApoa Diostayo!

8 Maidaramudom ken makusbodanto,

ngem bumangon ken tumakdertayto!

9 Pagballigiem ti ari, OApo;

sungbatannakami kadi no umawagkami!

Panagyaman iti Panagballigi

1 OApo, naragsakan ti ari gapu ta pinapigsam;

napalalo ti rag-ona gapu ta pinagballigim.

2 Intedmo ti tinarigagayanna,

ket impangagmo ti dawatna.

3 Sinaraboam kadagiti naindaklan a bendision,

ket binalangatam iti korona a balitok.

4 Nagkiddaw iti biag ket intedmo kenkuana,

biag a napaut nga awan inggana.

5 Dakkel ti dayagna gapu iti panangtulongmo;

dayaw ken tan-ok kenkuana ti intedmo.

6 Kanayon nga adda kenkuana ti bendisionmo,

ket ti kaaddam ti mangpunno kenkuana iti rag-o.

7 Agtalek ti ari ken ni Yahweh a Kangatoan;

gapu iti di agbalbaliw nga ayat ni Yahweh

kanayonto a natalged, di maan-ano.

8 Tiliwento ti ari dagiti amin a kabusorna;

tiliwennanto dagiti amin a gumurgura kenkuana.

9 Inton agparang, dadaelennanto ida

kas iti gumilgil-ayab nga apuy.

Alun-onento ida ni Yahweh iti pungtotna,

ket apuyto ti mangikisap kadakuada.

10 Awanto ti makalasat kadagiti kaputotanda;

ikisapmonto ida a sangapada.

11 Agplanoda iti dakes,

ket agtutulagda iti maibusor kenkuana,

ngem didanto agballigi.

12 Agtataraydanto inton panaenna ida.

13 Maitan-okka, OApo, iti bukodmo a pigsa!

Ikanta ken idaydayawmi ti pannakabalinmo.

Araraw ti Agas-asug ken Kanta a Pagdayaw iti Dios

1 Diosko,Diosko,

apay a binaybay-annak?

Immasugak kenka tapno tulongannak,

ngem awan latta ti pannaranaymo.

2 Iti aldaw umawagak kenka, Diosko,

ngem saamla a sumungbat,

ken iti rabii, ngem awan inanak.

3 Ngem sika ti Nasantoan,

naisaad iti trono nga itantan-ok ti Israel.

4 Sika ti nangitalkan dagiti ammami iti namnamada;

wen, nagtalekda kenka ket insalakanmo ida.

5 Immawagda kenka ket ti peggad nalisianda;

nagtalekda kenka ket saanmo a pinaay ida.

6 Ngem arigko iti igges, saan a tao,

lalaisen ken uy-uyawen dagiti tattao.

7 Amina makakita kaniak, pagang-angawandak;

guyguyaban ken wingwingiwingandak.

8 Kunada,“Nagtalekka itiApo.

Apay a dinaka isalakan?

No ayatennaka tiApo,

apay a dinaka tulongan?”

9 Sika ti nangipaay iti talged iti pannakaipasngayko,

inaywanannak idi maladagaak pay nga agsussuso.

10 Nagtalekak kenka manipud pannakayanakko;

sikan ti Diosko manipud pay pannakaipasngayko.

11 Dinak adaywan ta agpeggadak,

ket awan tumulong kaniak.

12 Adda dagiti kabusor iti lawlawko,

kasda la atap nga arban ti baka.

Nalikmutak kadagiti narungsot a toro iti Basan.

13 Ungapenda dagiti ngiwatda kaniak;

arigda ti ngumerngernger a leon a sigagagar a mangalun-on.

14 Naibusen ti amin a pigsak,

kasla danum a naibuyat.

Agkutukoten amin a tultulangko,

toy pusok kasla allid a marunaw iti unegko.

15 Namaga a kas tapok ti ngiwatko,

ket dumket ti dilak iti ngadasko.

Binaybay-annakon a matay

iti tapok a nakapasagak.

16 Ti bunggoy dagiti managdakdakes lawlawendak;

kasda la pangen ti aso a mangalikubkob kaniak,

lasanglasangendadagiti ima ken saksakak.

17 Agparangen dagiti amin a tulangko,

mulmulagatannak dagiti kabusorko;

18 Pagsusugalandadagiti pagan-anayko,

pagbibinnunotanda ti kagayko.

19 OApo, saannak kadi a panawan!

Umaynak ispalen, darasennak a tulongan.

20 Iti kampilan, toy kararuak isalakanmo;

kadagitoy nga aso ispalem toy biagko.

21 Iti ngiwat dagitoy a leon isalakannak;

awan gawaykokadagitoy a toro nga atap.

22 Saritaektokadagiti kailiak ti naganmo;

kadagiti kongregasion idaydayawkanto:

23 “Dakayo nga adipen tiApo,

agdaydayawkayo kenkuana;

dakay a kaputotan ni Jacob, itan-okyo;

dakay a tattao iti Israel, agrukbabkayo kenkuana.

24 Dina lipaten dagiti napanglaw,

wenno baybay-an ida nga agsagaba;

saanna met nga adaywan ida, ngem sungbatanna no agpatulongda kenkuana.”

25 Iti dakkel a gimong,

saritaekto dagiti inaramidmo;

iti imatang dagiti amin a natulnog kenka,

iruknoykonto ti inkarik a daton.

26 Manganto koma dagiti napanglaw agingga a mapnekda;

agdaydayawto itiApo

dagiti mangbirok kenkuana.

Rumang-ayda koma iti awan inggana!

27 Lagipendakanto ti tunggal maysa ditoy daga,Apo;

manipud iti amin a suli ti lubong

umaydanto agkamang kenka ket agrukbabda.

28 Ni Yahweh, isu ti Ari,

ket iturayanna dagiti amin a nasion.

29 Kenkuana, dagiti natangsit agtameddanto;

kenkuana, dagiti amin a tao agruknoyto,

isuda amin nga aggibus ken patay.

30 Agserbinto kenkuana dagiti sumarsaruno a kaputotan;

ipakaammodanto ni Yahweh iti masakbayan a kaputotan.

31 Maibaganto kadagiti saan pay a nayanak,

“Insalakan ti Apo dagiti tattaona.”

Daniw ti Agpaspastor

1 Apo, sika ti pastorko,

adda aminen a masapulko.

2 Itinalangto a karuotan, paginanaennak;

iti sibay dagiti dandanum a natalinaay, idalannak.

3 Ipaaymo kaniak ti baro a pigsa.

Tarabayennak iti tumutop a dalan, kas inkarim.

4 Uray pay no ginget ni patay ti paglasatak

saanakto nga agbuteng ta addaka kaniak!

Ti sarukod ken bastonmo salaknibandak.

5 Mangisaganaka iti padaya nga agpaay kaniak,

iti imatang dagiti kabusorko.

Pinaaruyotam daytoy ulok iti lana,

ket agliplippias ti kopak.

6 Awan duadua a kumuyogto kaniak ti kinaimbag

ken ti kinamanagayatmo bayat ti panagbiagko,

ket agtaengakto nga agnanayon iti balaymo.

Ti Naindaklan nga Ari

1 KukuatiApoti lubong ken amin a linaonna;

kukuana ti daga ken ti amin nga agnaed kenkuana.

2 Binangonna iti rabaw dagiti adalem a danum,

ket iti lansad ti taaw impasdekna ti pamuon.

3 Siasino ti maikari a sumang-at iti bantay tiApo?

Siasino ti mapalubosan

a sumrek iti nasantoan a Templona?

4 Tinadalus ti aramidna ken ti panunotna,

ti natarnaw ti pusona,

ti napasnek nga agserbi iti kinapudno,

ken ti saan nga agulbod.

5 Bendisionanto tiApo,

ket awatento ti Dios a mangisalakan kenkuana.

6 Dagiti kakasta a tattao ti umasideg iti Dios,

isuda ti agparang iti imatang ti Dios ni Jacob.

7 Ilukatyo a naimbag dagiti ruangan,

luktanyo dagiti ridaw a kadaanan,

ket pastrekenyo ti Ari a naindaklan.

8 Siasino daytoy naindaklan nga Ari?

Isu tiApoa nabileg ken napigsa,

tiApoa maingel iti paggugubatan.

9 Ilukatyo a naimbag dagiti ruangan,

luktanyo dagiti ridaw a kadaanan,

ket pastrekenyo ti Ari a naindaklan.

10 Siasino daytoy naindaklan nga Ari?

tiApoa Mannakabalin-amin—isu ti naindaklan nga Ari.