Month: March 2020

Kararag a Pagdawat iti Pannakaidalan ken Pannakasalaknib

1 Idatonko kenka, OApo, ti kararagko.

2 Agtalekak kenka, Diosko:

dimo ipalubos a maparmekak ket maibabainak;

dimo ipalubos a dagiti kabusorko laisendak!

3 Saan a maparmek dagiti agtalek kenka,

ngem maibabain dagiti mangbusor kenka.

4 Isurom kaniak dagiti daldalanmo, OApo;

wen, ipakaammom ida kaniak.

5 Isuronak nga agbiag kas mayannurot iti kinapudnom;

ta sika ti Dios a mangisalakan kaniak.

Agmalmalem nga agpannurayak kenka.

6 OApo, lagipem

ti kinamanangngaasim ken kinamanagayatmo

nga idi punganay a naipakaammo.

7 Pakawanem ti basol ken labsingko idi agtutuboak;

gapu iti di agbalbaliw nga

ayat ken kinaimbagmo, OApo, lagipennak!

8 Nalinteg ken naimbag ni Yahweh;

isurona dagiti managbasol iti rumbeng a pagnaanda.

9 Iturongna dagiti napakumbaba iti nalinteg a dalan,

ket isurona ida iti pagayatanna.

10 Iti ayat ken kinapudno idalanna ida,

dagiti amin a mangannurot iti tulag ken bilbilinna.

11 Tungpalem ti karim, OApo,

pakawanem dagiti basolko ta aduda.

12 Dagiti agtulnog ken ni Yahweh,

maammoandanto kenkuana ti rumbeng a dalan a surotenda.

13 Narang-aydanto latta,

ket tawidento dagiti annakda ti daga.

14 Gagayyem ni Yahweh dagiti agtulnog kenkuana,

ket patalgedanna kadakuada ti tulagna.

15 Kanayon nga agpatulongak itiApo,

ta ispalennak iti amin a peggad.

16 Taliawennak, OApo, ket kaasiannak,

ta agmaymaysaak ken nakapuyak.

17 Ikkatem dagiti amin a pakariribukak,

ket aonennak iti amin a pakarigatak.

18 Imatangam dagiti amin a ladingit ken sagabaek,

ket pakawanem dagiti amin a basolko.

19 Kitaem ti kaadu dagiti kabusorko;

kitaem no kasano ti pananggurada kaniak!

20 Salaknibannak ket isalakannak;

dimo ipalubos a maparmekak,

agsipud ta kenka, agkamangak.

21 Ti kinaimbag ken kinalinteg aywanandak koma,

agsipud ta agtalekak kenka.

22 Subbotem, O Dios, dagiti tattaom nga Israelita

kadagiti amin a pakariribukanda.

Ti Kararag ti Naimbag a Tao

1 Ipakaammom nga awan basolko, OApo,

ta nalinteg ti aramidko,

ket kenka naan-anay ti panagtalekko.

2 Sukimaten ken suotennak, OApo;

usigem dagiti tarigagay ken panunotko.

3 Iti di agbalbaliw nga ayatmo, iturongnak;

iti kinapudnom, kanayon nga idalannak.

4 Diak makikadua kadagiti ubbaw a tattao,

diak makibunggoy kadagiti aginsisingpet.

5 Karimonko ti bunggoy dagiti managdakdakes;

diak makikadua kadagiti nakillo a tattao.

6 Buggoak dagiti imak a mangipakita nga awan basolko,

ket likmutek ti altarmo iti panagdaydayawko kenka, OApo.

7 Agkantaak iti pagyaman

a himno ket saritaek dagiti nakaskasdaaw nga aramidmo.

8 Ipatpategko ti balay a pagtaengam, OApo,

ti lugar a pagnaedan ti dayagmo.

9 Dinak iraman a pukawen kadagiti managbasol,

ilisinak iti pagtungpalan dagiti mammapatay,

10 tattao a kanayon nga agaramid iti dakes

ken sisasagana nga umawat iti pasuksok.

11 Ngem no maipapan kaniak, nalinteg ti aramidko,

kaasiannak ket isalakannak, OApo!

12 Awan pakaan-anoak iti amin a peggad;

iti imatang ti dakkel a gimong,

ken ni Yahweh agdaydayawak.

Kararag a Pagdaydayaw

1 TiApoti silaw ken salakanko;

siasino ti kabutengko?

TiApoti sarikedked ti biagko;

siasino ti kaamakko?

2 No darupendak dagiti managdakdakes tapno patayendak,

dagiti kabusorko ti maitibkol ken mapasag.

3 Uray no lawlawennak ti entero nga armada,

saanak nga agbuteng.

Uray no darupendak,

agtalekak latta kenkuana.

4 Adda dinawatko itiApo,

daytoy laeng ti kalikagumko:

agnaedak koma iti balayna iti unos ti panagbiagko,

tapno mabuyak ti dayagna ken kiddawek ti panangidalanna.

5 Iti tiempo ti riribuk linongannak;

ilemmengnak iti Templona, iti Templona nga awan pakaan-anoak

ket iti nangato a bato kitaenna a natalgedak.

6 Iti kasta, parmekekto dagiti

kabusorko a nanglikmut kaniak;

iti Templona, agdatonakto a siraragsak.

Agkantaakto, agdaydayawakto ken ni Yahweh.

7 Denggennak kadi, OApo, no umawagak kenka,

ipangagnak koma ket mangngaasika!

8 Idi kinunam, “Umaykayo kaniak,”

insungbatko, “Umayak, OApo.”

9 Saanak koma nga ilemmengan!

Saannak koma a kapungtot;

dimo kadi papanawen ti adipenmo.

Sika ti tumulong kaniak;

dinak panawan, dinak baybay-an,

O Dios a salakanko.

10 Nalabit a baybay-andak dagiti dadakkelko,

ngem aywanannak tiApo.

11 Isuronak iti kayatmo nga aramidek, OApo,

ket iturongnak iti natalged a dalan,

agsipud ta adu dagiti kabusorko.

12 Kadagiti kabusorko dinak kadi yawat,

padpadaksen ken butbutngendak.

13 Mamatiak a bayat ti panagbiagko

makitakto ti kinaimbag tiApokadagiti tattaona.

14 Agtalekka itiApo:

Mamatika ket dimo pukawen ti namnamam.

Wen, agtalekka itiApo!

Kararag a Pagdawat iti Tulong

1 Umawagak kenka,

OApoa salaknibko.

Denggem kadi ti asugko!

No dinak ipangag,

maipadaak kadagiti bumaba iti lubong dagiti natay.

2 Denggennak kadi no umasugak a tulongannak,

iti nasantoan a templom, sitatag-ay dagiti imak.

3 Dinak kadi iraman a dusaen kadagiti nadangkes

ken kadagiti agaramid iti saan a naimbag—

Dagitoy a tattao, no agsaoda kunam la no gayyem ida

ngem napno met iti gura ti pusoda.

4 Dusaemida gapu iti inaramidda,

gapu iti amin a dakes a gapuananda.

Wen, dusaem ida gapu iti aramidda;

ipaaymo ti rumbeng a dusada!

5 Dida ikankano ti inaramid wenno gapuanan ni Yahweh.

Iti kasta, dusaennanto ida

ket agnanayon ti panagsagabada.

6 Idaydayawyo tiApo,

ta impangagna ti panagdawatko iti tulongna!

7 Ni Yahweh ti pigsak ken kalasagko,

kenkuana isaadko ti panagtalekko.

Tinulongannak isut’ gapuna nga agrag-oak;

agkantaak kadagiti himno a pagdaydayaw kenkuana.

8 Ni Yahweh ti pigsa dagiti tattaona;

salakniban ken isalakanna ti ari a pinilina.

9 Isalakanmo kadi, OApo, dagiti tattaom,

ket bendisionam ida, isuda, a kukuam!

Sika koma ti pastorda,

ket agnanayon nga aywanam ida.

Ti Timek ni Yahweh iti Bagio

1 IdaydayawyotiApo,

dakayo a nailangitan a parsua.

Itan-okyo ti dayag ken pannakabalinna.

2 Idaydayawyo ti nadayag a nagan tiApo;

agparintumengkayo a sikakawes iti panagdaydayaw.

3 Agallangogan ti timek ni Yahweh kadagiti baybay;

aggurruod ti nadayag a Dios,

ket mangngeg ti timekna kadagiti nalawa a taaw.

4 Mannakabalin ti timek ni Yahweh,

napnoan ti dayag ti timek ni Yahweh.

5 Ti timek tiAposip-akenna dagiti sedro,

dagiti sedro ti Libano tukkolen ida ni Yahweh.

6 Paglagtoenna a kasla urbon ti baka dagiti bantay ti Libano.

Ti Bantay Hermon pagkulagtitenna a kasla bumaro a toro.

7 Patauden ti timek ni Yahweh

ti agkanabsiit a kimat.

8 Pagkintayegen ti timek ni Yahweh ti let-ang;

wen, pagkintayegen ni Yahweh ti let-ang ti Kades.

9 Ti timek ni Yahweh pusiposenna dagiti kayo a narukbos,

ket iti Templona, iriaw ti amin daytoy, “Dayag iti Dios!”

10 Iturayan ni Yahweh ti layus;

agari iti agnanayon nga awan inggana.

11 Papigsaen ni Yahweh dagiti tattaona;

kappia ti ibendisionna kadakuada.

Kararag a Pagyaman iti Pannakaispal iti Patay

1 Idaydayawka, OApo,

gapu ta insalakannak,

ket dimo impalubos

nga agragsak dagiti kabusorko.

2 OApoa Diosko, immasugak a tulongannak

ket sika, pinaimbagnak.

3 OApo, manipud iti tanem inaonnak;

naikuyogak kadagiti mapan

iti mangliwengliweng nga abut iti baba

ngem insublim daytoy biagko.

4 Ikantayo ti pagdaydayaw itiApo,

dakay a mapagtalkan a tattaona!

Lagipenyo dagiti inaramid ti Nasantoan,

ket agyamankayo kenkuana!

5 Apagdarikmat laeng ti pungtotna;

ngem saan nga agpatingga ti kinaimbagna.

Mabalin nga iti rabii adda sangsangit,

ngem iti bigat, ragsak ti sumukat.

6 Nariknak ti talged ket kinunak iti nakemko,

“Pulos nga awan pakaan-anoak.”

7 Nagsayaatkan, OApo,

impasdeknak a kas iti bantay a di magunggon.

Ngem idi inlingedmo ta rupam kaniak,

ti buteng linapunosnak.

8 Kenka, OApo, immawagak;

nagpakpakaasiak a tulongannak:

9 “Ania ti magun-odmo iti ipapatayko?

Ania ti imbag a magun-od iti pannakaitanemko?

Maidaydayawdaka kadi dagiti natay?

Maiwaragawagda aya ti imbagmo a di agsarday?

10 Denggennak, OApo, ket kaasiannak!

OApo, tulongannak.”

11 Pinagbalinmo a rag-o ti dung-awko;

inikkatmo ti panesko,

ket kinawesannak iti ragsak.

12 Iti kasta, saanakto nga agulimek,

dagitinto pagdayawko kenka ti kankantaek.

Sika, OApo, ti Diosko;

agnanayon a sika ti pagyamanak.

Kararag ti Agtalek iti Dios

1 OApo, umayak kenka

tapno salaknibannak,

dimo kad ipalubos a maibabainak;

nalintegka a Dios, ispalennak koma.

2 Denggennak ket dika agtaktak a mangisalakan kaniak.

Sika koma ti kamangko ket ikanawanak.

Sika koma ti salingedko ket ispalennak.

3 Sika ti bato a pagkamangak ken sarikedkedko,

kas inkarim, tarabayen ken idalannak.

4 Ilisinak iti silo a naisagana a pakatnagak;

pagsalinongak agsipud ta adda peggad.

5 Kadagitaimam, italekko toy kararuak.

Sikanto, OApo, ti mangisalakan kaniak;

ta Dioska a mapagtalkan.

6 Guraem dagiti agdayaw kadagiti didiosen,

ngem sika ti innak pagtalkan.

7 Agrag-o ken agragsakakto,

gapu iti di agbalbaliw nga ayatmo.

Makitam amin a pakarigatak;

ammom met ti pakariribukak.

8 Dimo impalubos a parmekendak dagiti kabusorko;

inikkannak iti wayawaya a mapan iti kaykayatko.

9 OApo, kaasiannak, ta adda pakariribukak.

Iti kasasangitko napaksuyanen dagiti matak,

agraman bagi ken kararuak.

10 Immababan ti biagko;

gapu iti ladingit ken sangsangitko.

Gapu kadagiti pakasikorak,nakapsutakon,

marunot pay dagiti tultulangkon.

11 Amin a kabusorko pagang-angawandak;

karimondak dagiti kaarrubak.

Kabutengdak dagiti makaam-ammo kaniak;

no makitadak iti kalsada, itarayandak.

12 Nalipatandakon a kaslaak la natayen;

kaslaak la maysa a nabuong a banga.

13 Mangngegko ti arasaas dagiti adu a kabusorko;

buteng ti adda iti amin a lawlawko.

Agtutulagda a mangpatay kaniak.

14 Ngem agtalekak kenka, OApo,

ket kunak, “Sika ti Diosko.”

15 Addaak a kanayon iti aywanmo;

kadagiti mangidadanes kaniak

ken kadagiti kabusorko, isalakannak.

16 Kaasiam kadi toy adipenmo;

isalakannak gapu iti di agbalbaliw nga ayatmo.

17 Kenka, OApo, umawagak;

dimo kadi ipalubos a maibabainak.

Ipababam dagiti managdakdakes

agingga nga agiddada iti tanemda nga awan arimekmekda.

18 Pagulimekem dagiti natangsit ken ulbod!

Pasardengem dagita napalangguad

a manglalais kadagiti nalinteg a tattao.

19 Bendision ti insaganam kadagiti agbuteng kenka,

nakaskasdaaw dagiti imbag nga ipaaymo kadakuada.

Ammo ti amin ti kinaimbagmo,

kadagiti agtalek kenka, natalged ti salaknibmo.

20 Iti kaaddam, salinongam ida nga awan pakaan-anoanda.

iti panangisikat dagiti tattao kadakuada.

Iti natalimeng a lugar, yadayom ida

iti pammarpardaya dagiti kabusorda.

21 Madaydayaw tiApo!

Nakaskasdaaw ti ayat nga impaayna kaniak

idi linakub ken dinarupdak.

22 Kinunak gapu iti butengko,

“Nayadayoakon iti imatangmo.”

Nupay kasta, impangagmo ti ikkisko

idi dimmawatak iti tulongmo.

23 Ayatenyo tiApo, dakay amin a matalek a tattaona!

Dagiti mapagtalkan, salakniban tiApo,

ngem dagiti natangsit nakaro ti panangdusana kadakuada.

24 Kumiredkayo ket paturedenyo ti nakemyo,

dakay amin a mangnamnama itiApo.

Panangipudno iti Basol ken Pannakapakawan

1 Nagasatti tao a napakawan dagiti basolna

ken napunas dagiti salungasingna.

2 Nagasat ti tao nga awan ti ipabasol ni Yahweh kenkuana,

ket awan kinasikap a masarakan iti pusona.

3 Idi diak impudno dagiti basbasolko,

nautoyanak iti agmalmalem a panagas-asugko.

4 Aldaw ken rabii a dinusdusanak;

napukaw a namimpinsan ti pigsak,

kas panagpukaw ti linnaaw iti kalgaw.

5 Impudnok kenka dagiti basolko;

diak inlimed dagiti labsingko.

“Inkeddengko nga ipudno kenka dagiti basbasolko,” kinunak,

ket pinakawanmo dagiti amin a salungasingko.

6 Ngarud, dagiti nalinteg a tattao,

agkararagda koma kenka iti tiempo ti karigatna;

no umay ti dakkel a layus ti riribuk, dinto dumanon kadakuada.

7 Sika ti pagkamangak;

iti riribuk, salaknibannak.

Ipigsak nga ikanta ti panangisalakanmo

agsipud ta addaak iti panangaywanmo.

8 Kuna ni Yahweh, “Idalanka iti rumbeng a pagnaam;

isuroka ken inka balakadan.

9 Dika agbalin a nengneng a kas iti kabalio wenno mulo,

a maikkan iti rienda tapno maiturong ti tao.”

10 Dagiti nadangkes adu ti sagsagabaenda,

ngem dagiti agtalek itiApo,

sallukoban ti di agbalbaliw nga ayatna.

11 Dakayo a nalinteg a tattao, agrag-okayo itiApo!

Wen, agragsakkayo gapu iti inaramidna!

Agriawkayo iti ragsak,

dakay amin a naimbag ti panagpuspusona.

Kanta a Pagdayaw

1 Dakay amin a nalinteg, agragsakkayo

gapu iti inaramid tiApo.

Dakayo a natulnog kenkuana, agdaydayawkayo.

2 Buyoganyo iti lira ti panagyamanyo;

danggayanyo dagiti kantayo kadagiti arpa

a sangapulot’ kuerdasna.

3 Baro a kanta ti ikantayo kenkuana;

tokarenyo a silalaing ti arpa,

ket agriawkayo iti rag-o.

4 Pudno dagiti sao ni Yahweh;

mapagtalkan dagiti amin nga aramidna.

5 Ayatenna ti kinalinteg ken hustisia;

napno ti daga iti di agbalbaliw nga ayatna.

6 Babaen iti bilin tiApo, naparsua dagiti langit;

babaen iti saona, naparsua ti init, ti bulan, ken dagiti bituen.

7 Pinagtitiponna amin a danum ti baybay iti maymaysa a lugar;

insaadna dagiti mangliwengliweng a taaw kadagiti pagidulinan.

8 Agbutengkayo itiApo,

dakay amin a daga!

Dakay amin a tattao ti lubong,

agbutengkayo kenkuana!

9 Naaramid ti lubong babaen iti panagsaona;

timmaud ti amin babaen iti panagbilinna.

10 Dagiti gandat dagiti nasion dadaelen ni Yahweh;

ti panggep dagiti tattao, paayenna.

11 Ngem agtalinaed nga agnanayon ti planona,

ti panggepna agpaut nga awan inggana.

12 Naragsak ti nasion a tiApoti Diosna;

naragsak dagiti pinilina nga agpaay kenkuana!

13 Manipud langit, tiApotumannawag,

ket makitana ti sangkataoan.

14 Manipud pagturayanna, tannawaganna

amin nga agtaeng ditoy daga.

15 Binukelna amin a pampanunotda,

ket ammona amin nga aramidda.

16 Saannga agballigi ti ari

gapu iti nabileg nga armadana;

saan a maispal ti mannakigubat

gapu iti nagpaiduma a pigsana.

17 Awan maitulong ti pakigubat a kabalio a manggun-od iti balligi;

saanna a maispal ti siasinoman babaen iti amin a bilegna.

18 Salluadan tiApodagiti agbuteng kenkuana;

wen, salluadanna dagiti agtalek iti saan nga agbalbaliw nga ayatna.

19 Iti patay, isalakanna ida;

iti tiempo ti bisin, dina ipalubos a matayda.

20 Isaadtayo itiApoti namnamatayo;

isu ti mangtulong ken mangsalaknib kadatayo.

21 Naragsaktayo gapu kenkuana;

agtalektayo iti nasantoan a naganna.

22 OApo, itedmo koma kadakami ti di agbalbaliw nga ayatmo,

ta italekmi kenka ti namnamami.

Panangidaydayaw iti Kinaimbag ti Dios

1 Itiamin a tiempo,

agyamanak itiApo,

diakto agsardeng a mangidaydayaw kenkuana.

2 Ipannakkelko tiApogapu iti inaramidna;

mangngeg koma dagiti maidaddadanes ket agragsakda!

3 Danggayandak a mangitan-ok itiApo;

agmaymaysatayo a mangidaydayaw iti naganna!

4 Immawagak itiApoket sinungbatannak;

inispalnak kadagiti amin a pagbutbutngak.

5 Kumita kenkuana dagiti maidaddadanes ket maragsakanda;

pulos a saandanto a mabainan.

6 Umawag dagiti nakapuy ken ni Yahweh ket sungbatanna ida;

isalakanna ida kadagiti amin a pakariribukanda.

7 Aywanan ti anghel ni Yahweh dagiti agbuteng kenkuana,

ket ispalenna ida iti amin a pagpeggadanda.

8 Dakayoa mismo ti mangtakuat iti kinaimbag tiApo!

Nagasat ti tao nga agkamang kenkuana!

9 Agbutengkayo itiApo, dakay amin a tattaona;

awan pagkurangan dagiti agtungpal kenkuana.

10 Uray dagiti leon maawananda iti kanen ket agbisinda,

ngem dagiti agtulnog itiApo,

adda amin nga imbag kadakuada.

11 Umaykayo, annakko, ket denggendak,

ta isurokayo nga agraem itiApo.

12 Siasinokadakayo ti mayat

nga aglak-am iti nasayaat a biag?

Siasino ti agkalikagum iti atiddog

ken naragsak a panagbiag?

13 Aywanam ta dilam kadagiti dakes a sao;

ken ta bibigmo iti kinakillo.

14 Adaywanyo ti dakes

ket agaramidkayo iti naimbag.

Ikagumaanyo a gun-oden ti kappia iti amin a pusoyo.

15 Dagiti nalinteg bantayan tiApoida

ket denggenna dagiti asugda.

16 Ngem dagiti agaramid iti dakes, busorenna,

inton matayda, awanton ti makalagip kadakuada.

17 Umawag dagiti nalinteg itiApoket ipangagna ida;

tulonganna ida kadagiti amin a pakarigatanda.

18 Umasideg tiApokadagiti maupay;

isalakanna dagiti awanen a pulos ti namnamana.

19 Agsagaba iti adu a rigat ti tao a naimbag,

ngem isalakan tiApokadagiti amin a parikut.

20 Daytaa tao aywananto tiApo,

ket awanto ti matukkol a tulangna.

21 Ti dakes nga aramid dagiti managdakdakes

isunto met laeng ti mangpatay kadakuada,

ket madusanto dagiti gumura kadagiti nalinteg.

22 Subbotento tiApodagiti adipenna;

dinto maan-ano dagiti agkamang kenkuana.