Month: March 2020

Pagdayaw ken Pagyaman

1 O Dios, rumbeng nga

idaydayawdaka idiay Sion,

ket tungpalenmi ti inkarimi kenka.

2 Ipangagmo dagiti kararag ket dumatagto kenka dagiti amin a tattao

3 gapu kadagiti basbasolda.

Adu unay ti biddutmi,

ngem pakawanemto ida.

4 Nagasat dagiti piliem a tattao,

isuda nga awisem nga agtaeng iti santuariom!

Mapnekkaminto iti agkakaimbag iti balaymo,

kadagiti bendision iti nasantoan a Templom!

5 Sungbatannakami ket ikkannakami iti balligi;

agaramidka kadagiti nakaskasdaaw a banag a pakaispalanmi.

Agtalek kenka dagiti tattao iti sangalubongan,

kasta met dagiti agnaed iti ballasiw-taaw.

6 Babaen iti pigsam, impasdekmo dagiti bantay

a mangipakita iti nabileg a pannakabalinmo.

7 Pagtalnaem ti daranudor dagiti taaw;

pagsardengem ti ungor dagiti dalluyon

ken ti riribuk kadagiti pagilian.

8 Gapu kadagiti aramidmo a naindaklan

agruknoy a sibubuteng kenka ti sangalubongan!

Gapu kadagiti aramidmo,

agriaw iti rag-o dagiti tattao

iti maysa a pungto ti daga.

9 Ipakitam ti panangipategmo iti daga babaen iti panangyegmo iti tudo,

ket pagbalinem a nadam-eg ken nabaknang.

Napno iti danum dagiti karayanmo,

mangipaayka iti apit nga adu.

10 Yegmo ti nabuslon a tudo kadagiti talon a naarado

ket rusepem ida,

pagarbisem tapno lumukneng ti daga

ket agtubo dagiti mula.

11 Adu nga apit ti ipaay ti kinaimbagmo!

Iti sadinoman a papanam adu a bendision ti itedmo!

12 Kadagiti pagpastoran, adu ti baka;

adda rag-o kadagiti bakras ti turod!

13 Nasaknapan iti karnero dagiti pagaraban;

nakumotan iti trigo dagiti tantanap;

agkakanta ken agdidir-i ti amin gapu iti ragsak!

Kanta a Pagdayaw ken Pagyaman

1 Dakay amin a tattao,

agdaydayawkay iti Dios ket agdir-ikayo.

2 Ikantayo ti dayag ti naganna;

idatonyo ti nagloriaan a pagdayaw kenkuana.

3 Kunayo iti Dios: “Nakaskasdaaw dagiti aramidmo!

Nabileg ti pannakabalinmo,

agkurno a sibubuteng kenka dagiti kabusormo.

4 Agrukbab kenka dagiti amin nga adda iti daga,

agkantada kadagiti pagdaydayaw kenka,

agkantada kadagiti pagdaydayaw iti naganmo.”

5 Umayyo kitaen dagiti inaramid ti Dios;

nakaskasdaaw dagiti gapuananna iti imatang dagiti tattao.

6 Pinagbalinnati taaw a namaga a daga

a nagnaan dagidi kapuonanmi.

Sadiay, nagrag-okam iti inaramidna.

7 Agturay nga agnanayon babaen iti pannakabalinna,

ket dina isina dagiti matana kadagiti pagilian.

Awan koma ti tumakder a bumusor kenkuana!

8 Dakay amin a pagilian, agdaydayawkay iti Diostayo;

ti pannakaidaydayawna idir-iyo.

9 Inaywananna ti biagtayo,

ket dina impalubos a matnagtayo.

10 O Dios, sinuotnakami;

ginugorannakami kas iti pirak.

11 Impalubosmo a maipalab-ogkami;

nadagsen ti impabaklaymo kadakami.

12 Binay-am dagiti kabusor a mangibaddek kadakami;

apuy ken layus ti naglasatanmi,

ngem impannakami iti awan pakaan-anoanmi.

13 Mangyegakto kadagiti mapuoran a daton iti balaymo,

ket tungpalek dagiti karik kenka.

14 Wen, itedko ti imbagak idi nariribukak.

15 Mangidatonakto iti karnero a mapuoran iti altar.

Mangidatagakto kadagiti toro a baka ken kalding,

ket ngumatonto ti asuk iti tangatang.

16 Umaykay agdengngeg, dakay a managbuteng iti Dios,

ta saritaek ti inaramidna kaniak.

17 Nagdawatak kenkuana a tulongannak;

indaydayawko babaen kadagiti kantak.

18 No diak inkankano dagiti basolko,

saannak koma nga impangag ti Apo.

19 Ngem saannak la a dinengngeg ti Dios;

sinungbatanna pay ti kararagko.

20 Idaydayawko ti Dios,

gapu ta ti kararagko inna impangag,

ket dina imbabawi ti napudno nga ayatna kaniak.

Kanta a Pagyaman

1 Kaasiannakam, O Dios,

ket bendisionannakami;

talliawennakami kadi a sikakaasi,

2 tapno maammoan ti sangalubongan ti pagayatam,

ken ti bilegmo a mangisalakan!

3 O Dios, daydayawendaka koma dagiti tattao!

Wen, amin a tattao daydayawendaka koma!

4 Agragsak koma dagiti

nasion ket agkantada a sirarag-o,

ta awan idumdumam iti panangukommo,

ken idaldalanmo dagiti amin a tattao ditoy lubong.

5 O Dios, daydayawendaka koma dagiti tattao!

Wen, amin a tattao daydayawendaka koma!

6 Pinataud ti daga ti apit nga

adu ta binendisionannatayo ti Dios a Diostayo.

7 Binendisionannatayo ti Dios;

itan-ok koma dagiti tattao iti amin a suli ti lubong.

Kanta ti Pagilian iti Panagballigina

1 Tumakder ti Dios ket

warawaraenna dagiti kabusorna!

Maparmek koma dagiti gumurgura kenkuana ket agtatarayda.

2 Pukawenna ida a kas mayangin nga asuk;

kas pannakalunag ti allid iti apuy,

kasta met ti pannakapukaw dagiti managdakdakes iti imatang ti Dios.

3 Ngem maragsakan dagiti nalinteg,

ket agrambakda iti imatangna;

naragsakda ket agriawda iti rag-o.

4 Kantaanyo ti Dios,

agkantatayo para kenkuana

nga umay a nakasakay kadagiti ulep.

Apoti naganna—agragsakkay iti sangoananna.

5 Agnaed ti Dios iti nasantoan a Templona;

salaknibanna dagiti balo, aywananna dagiti ulila.

6 Ikkanna iti balay ti tao a malmalday;

wayawayaanna dagiti balud, paragsakenna ida;

ngem agyan dagiti nasukir iti awan matatao a daga.

7 Idi impanguloam dagiti tattaom, O Dios,

idi binallasiwyo ti let-ang,

8 naggingginedti daga ket nagtudo iti napigsa

gapu iti kaaddam.

Uray ti Bantay Sinai nadayeg iti yaaymo, O Dios ti Israel.

9 Pinagtudom iti napigsa, aglablabonan

ket dimmam-eg manen ti natikag a daga;

10 nagtaeng dagiti tattaom sadiay;

iti kinaimbagmo, inikkam ti kasapulan dagiti nakurapay.

11 Nagbilin ti Apo,

ket adu a babbai ti nangisaknap iti damag:

12 “Agtatalawen dagiti ari ken dagiti buyotda!”

Dagiti babbai a nabati iti pagtaengan

nagbibingayandan dagiti nasamsam:

13 sinan-kalapati a nakalupkopan iti pirak;

sumilsilap ti puro a balitok a payakda.

(Iti aldaw ti gubat, apay a nagyan ti dadduma

kadakayo iti koral dagiti karnero?)

14 Idi warawaraen ti Mannakabalin a Dios

dagiti ari idiay Bantay Salmon,

pinagtudona iti niebe sadiay.

15 Nagtayag ketdin ti Bantay Basan!

Nagadun a pantokmo, bantay ti Basan!

16 Manipud iti adu a pantokmo,

apay a matmatam a silalais

ti bantay a pinili ti Dios a pagtaengan?

Agnanayonto nga agnaed sadiay tiApo!

17 Kadua ti Dios ti rinibribu a nabileg a luganna.

Naggapu ti Apo idiay Sinai

ket mapan iti nasantoan a disso.

18 Ikuyognati adu a balud a sumang-at iti nangato a disso.

Umawat kadagiti sagut nga aggapu

kadagiti nasukir a tattao.

Agtaengto sadiay tiApoa Dios.

19 Madaydayaw ti Apo,

inaldaw nga ibaklayna dagiti awittayo.

Isu ti Dios a mangisalakan kadatayo.

20 Dios a mangisalakan ti Diostayo;

isu tiAponga Apotayo;

ket iti patay, ispalennatayo.

21 Awan duadua a buraken

ti Dios ti ulo dagiti kabusorna

a di mangiwaksi iti kinamanagbasolda.

22 Kinuna ti Apo, “Yawidkonto dagiti kabusormo manipud Basan;

aonekto ida iti lansad ti taaw nga inda nagkamangan

23 tapno magna dagiti saiti darada,

ket agab-ab dagiti asom iti kaykayatda.”

24 O Dios nga Arik, makita amin a tao

ti parada ti balligim nga agturong iti santuario.

25 Umuna dagiti kumakanta;

sumaruno dagiti babbalasang nga agtuktokar iti pandereta,

adda dagiti musiko iti likudda.

26 “Idaydayawyo ti Dios iti taripnong dagiti tattaona;

wen, idaydayawyo tiApo, dakayo a kaputotan ti Israel!”

27 Ti kabassitan a tribu

ti Benjamin ti mangipangulo kadakuada,

sumaruno dagiti pangulo ti Juda ken ti grupoda

sa dagiti prinsipe ti Zabulon ken Neftali.

28 Ipakitam ti bilegmo, O Dios,

ipakitam ti pigsam nga inusarmo nga agpaay kadakami.

29 Manipud iti Templom idiay Jerusalem

a pangipanan dagiti ari kadagiti sagutda kenka,

30 tubngarem ti Egipto, dayta atap nga ayup iti karunoan;

tubngarem dagiti pagilian,

dayta arban ti toro a baka ken dagiti urbonda

aginggat’ agparintumengda

ket idatonda dagiti pirakda.

Warawaraem dagita a tattao a naayat a mangparnuay iti gubat!

31 Umayto dagiti embahadormanipud Egipto.

Ingatonto dagiti taga-Etiopia ti imada nga agkararag iti Dios.

32 Kantaanyo ti Dios, dakayo a pagarian ti lubong;

agkantakay iti pagdaydayaw iti Apo,

33 isu nga agdaliasat iti tangatang, ti daan a tangatang.

Denggenyo ti napigsa a timekna!

34 Ipakaammoyo ti pannakabalin ti Dios,

ti dayagna a mangrimbaw iti Israel;

rimbawan ti bilegna ti tangatang.

35 Anian a nakaskasdaaw ti Dios a rummuar iti santuariona!

Anian a nakaskasdaaw ti Dios ti Israel!

Ikkanna ti pigsa ken bileg dagiti tattaona.

Madaydayaw ti Dios!

Kararag a Pagdawat iti Tulong

1 O Dios, isalakannak!

Ta pagattengngedkon ti danum

ket dandaniakon malmes.

2 Lumnedakon iti nauneg a gayong-gayong,

ket awan natangken a pagbatayak.

Addaak iti adalem a danum,

ket lemmesendakon dagiti dalluyon.

3 Nautoyanakon nga umaw-awag iti tulong,

ket agmagan ti karabukobko;

naapgesen dagiti matak a mangur-uray kenka.

4 Ad-adungem dagiti buokko

dagiti gumurgura kaniak nga awan gapuna;

padpadaksendak dagiti kabusorko,

napipigsada ket kayatdak a patayen.

Ipabasolda a nagtakawak,

paisublida kaniak ti kunada nga innalak.

5 Ammom, O Dios, ti kinamaagko;

saan a nailinged kenka dagiti basolko!

6 Saan koma a siak ti gapuna

a maibabain dagiti agtalek kenka,

O Apo aDiosa Mannakabalin-amin!

Saan koma a siak ti gapuna

a malalais dagiti agdaydayaw kenka,

O Dios ti Israel!

7 Sika ti gapuna a naum-umsiak,

ket iti bain nalapunosak.

8 Kadagiti kakabsatko, sangsangaili ti kayarigak;

kaslaak ganggannaet iti familiak.

9 Kaslagumilgil-ayab nga apuy

ti panagayatko iti Templom;

siak ti nagtinnagan dagiti umsi a maiturong kenka.

10 Babaen iti panagayunar, agpakumbabaak

ket gapu itoy, maum-umsiak.

11 Agpanesak, ket katkatawaandak.

12 Kadagiti kalkalsada, sarsaritaendak;

agputar dagiti mammartek iti kankanta maipapan kaniak.

13 Ngem no siak, agkararagak kenka, OApo.

Sumungbatka O Dios, iti kayatmo a tiempo.

Ipangagnak gapu iti ayatmo a naindaklan,

gapu ta tungpalem ti karim a mangisalakan.

14 Lumnedakon iti gayong-gayong, ispalennak.

Salaknibannak kadagiti kabusorko;

iti adalem a danum, alawennak.

15 Dimo kad ipalubos a yanudnak ti layus;

dimo itulok nga alun-onennak ti yuyeng,

dimo itulok a lumnedak iti tanem.

16 OApo, iti kinaimbag ti di agbaliw nga ayatmo ipangagnak;

iti naindaklan a panangngaasim, taliawennak.

17 Dimo kad ilemmengan toy adipenmo;

sungbatannak a dagus ta kasta unay ti panagtuokko!

18 Umayka ket isalakannak;

kadagiti kabusorko ispalennak.

19 Ammom ti pannakaum-umsik,

ti pannakaibabain ken pannakalalaisko;

makitam dagiti amin a kabusorko.

20 Gapu iti pannakaum-umsi, nagdara toy puso,

ket ti naan-anay a namnamak napukawko.

Nangnamnamaak iti asi ngem awan nangngaasi kaniak;

nagur-urayak iti pannakaliwliwa ngem naupayak.

21 Inikkandakiti sabidong idi mabisinak;

pinainumdak iti suka idi mawawak.

22 Agbalinkoma dagiti padayada a pakadadaelanda;

sapay koma ta pakatnaganda dagiti fiestada.

23 Pagbulsekem ida tapno dida makakita;

kanayon a pagtigergerem ida!

24 Idissuormo kadakuada ti pungtotmo;

layusem ida iti rungsotmo!

25 Mabaybay-ankoma a madadael ti kampoda;

awan koma ti agnaed kadagiti toldada!

26 Idadanesda dagiti dinusam;

sarsaritaenda ti panagsagaba dagiti dinangram.

27 Isuratmo dagiti amin a basolda;

dimo iraman nga isalakan ida.

28 Itilibro dagiti sibibiag

mapunas koma ti naganda;

iti listaan dagiti tattaom, mailaksidda koma.

29 Ngem nakakaasi ken matutuokak, ket napukawen namnamak;

arayatennak, O Dios, isalakannak!

30 Agkantaakto nga agdaydayaw iti Dios;

ipakaammokto ti kinatan-okna babaen iti panagyamanko kenkuana.

31 Ad-addanto a pagragsakanna daytoy ngem iti baka

wenno toro a baka a maidaton kenkuana.

32 No makita daytoy dagiti maidadanes, agragsakda;

dagiti agdaydayaw iti Dios, maparegtada.

33 Ipangagna dagiti nakurapay ken adda kasapulanna,

ket laglagipenna dagiti naibalud a tattaona.

34 Dayawenyo ti Dios, dakayo a langit ken daga,

dakay a baybay ken amin a parsua nga agnaed kadakuada!

35 Ta isalakanto ti Dios ti Jerusalem,

ket bangonennanto manen dagiti ili ti Juda.

Agnaedto sadiay dagiti tattaona,

ket tagikuaendanto dayta a daga.

36 Tawidento dagiti kaputotan dagiti adipenna ti daga

ket agnaedto sadiay dagiti agayat kenkuana.

Kararag a Pagdawat iti Tulong

1 O Dios, isalakannak!

Darasem,Apo, ti tumulong kaniak!

2 Maparmek koma ken

matikaw dagiti agpanggep a pumatay kaniak!

Mapasanud ken mabainan koma

dagiti agtarigagay iti pakaranggasak!

3 Maupay koma dagiti mangang-angaw kaniak

babaen iti inda pannakaabak!

4 Agragsak ken agrag-o koma

dagiti amin nga umay kenka!

Agnanayon koma a kuna

dagiti amin nga agyaman iti panangisalakanmo:

“Nagtan-ok ketdin ti Dios!”

5 Nakapuy ken marigrigatak;

darasem, O Dios, ti umay ditoy dennak!

Sika ti tumulong ken mangisalakan kaniak—

OApo, dika kadi agtaktak!

Kararag ti Maysa a Lakay

1 Immayak, OApo,

a pasalakniban iti sidongmo;

dimo kadi ipalubos ti pannakaparmekko!

2 Gapu ta nalintegka, tulongan ken alawennak!

Wen, ipangag ken isalakannak!

3 Sika koma ti natalged a bato a pagkamangak,

natibker a sarikedkeda mangsalaknib kaniak;

ta sika ti kamangko, sika ti salinongko.

4 Ispalennak, O Dios, iti pannakabalin dagiti nadangkes;

ispalennak iti ima dagiti nadawel ken managdakdakes.

5 Sika, O ApoDios, ti ayan ti namnamak,

manipud kinaubingko, sikan ti nagtalkak.

6 Sika ti nagtaklinak iti unos ti panagbiagko;

sinalaknibannak manipud pannakayanakko.

Idaydayawka iti amin a tiempo!

7 Kadagiti adu a tattao, nagbalin a pagtuladan ti biagko,

ta sika ti natibker a salaknibko.

8 Agmalmalem a sarsaritaek ti pannakaidaydayawmo,

ket ipadpaduyakyakko ti kinadayagmo.

9 Dinak kadi laksiden ita ta lakayakon;

dinak kadi baybay-an ita ta nakapuyakon!

10 Kayat dagiti kabusorko a patayendak

ket pagsasaritaanda ti panangisikatda kaniak.

11 Kunada, “Binaybay-anen ti Dios;

intay kamaten ken tiliwen,

ta awanen ti mangarayat kenkuana!”

12 O Dios, dinak koma adaywan!

Darasem, Diosko, ket umaynak tulongan!

13 Maibabain ken madadael koma

dagiti mangdarup kaniak!

Malalais ken maparmek koma

dagiti agpanggep a mangdangran kaniak!

14 Kanayon a mangnamnamaak kenka;

ket ad-addanto pay nga idaydayawka.

15 Saritaekto ti kinaimbagmo;

sawekto nga agmalmalem ti panangisalakanmo,

adunto pay laeng ti diak maawatan.

16 Idaydayawkonto ti pannakabalinmo, O ApoDios;

ipakaammokto ti kinalintegmo,

wen, ti laeng kinalintegmo.

17 Insuronak, O Dios, manipud pay kinaubingko,

ket agpapan ita, sarsaritaek pay laeng

dagiti nakaskasdaaw nga aramidmo.

18 Itan, ta lakayakon nga ub-ubanan,

O Dios, dinak kadi baybay-an,

tapno ti bileg ken pannakabalinmo

ipakaammok kadagiti sumarsaruno a kaputotan.

19 Dumanon sadi langit, ti kinalintegmo,

naindaklan a bambanag dagiti inaramidmo.

Awanen ti kas kenka; O Dios.

20 Riribuk ken rigat ti impalak-ammo kaniak,

ngem isublimto met laeng ti pigsak;

manipud iti tanem aonennak.

21 Ad-adda pay a kinatan-ok ti ipaaymo kaniak

kasta met ti pannakaliwliwak.

22 O Diosko, agarpaakto a mangidaydayaw kenka

gapu iti kinapudnom nga awan patinggana.

Sika a Santo ti Israel, idaydayawka iti panagtokarko iti lira.

23 Bayat ti panagtokarko, agpukkawakto a siraragsak;

agkantaakto a buyogan ti amin a kararuak,

agsipud ta insalakannak.

24 Agmalmalemto a saritaek a nalintegka

ta dagiti agpanggep a mangranggas kaniak

nalalais ken naparmekda.

Kararag a Pangidawdawat iti Ari

1 O Dios, isurom ti ari

a mangukom nga awan idumdumana;

ibingayam kadi iti hustisia nga adda kenka

2 tapno napudno ti panangiturayna kadagiti tattaom,

ket uray dagiti maidadanes

mairupirda ti kalinteganda.

3 Rumang-ay koma ti daga ket aglablabonan;

agturay koma ti kinalinteg iti daytoy a pagilian.

4 Iti panangukom ti ari,

kitaenna koma a dagiti napanglaw maikkanda iti hustisia;

dagiti marigrigat, tulonganna,

ket parmekenna dagiti mangirurumen kadakuada.

5 Agdaydayaw koma kenka dagiti tattaom iti awan patinggana,

kas ti panagpaut ti init ken ti bulan iti ayanda.

6 Arig koma ti ari iti tudo nga agtinnag iti tay-ak,

kas arbis a mangsibog iti daga a natikag.

7 Agari koma ti kinalinteg bayat ti panagbiagna,

adda koma rang-ay agingga nga awanen ti bulan.

8 Lumawantoti pagturayanna agingga iti ballasiw ti taaw,

manipud Karayan Eufrates dumanonto iti ungto ti daga.

9 Dagiti tattao ti let-ang agrukbabdanto kenkuana,

mapasagto iti tapok dagiti kabusorna.

10 Umayto dagiti ari ti Tarsis

ken dagiti purpuro ket itedda ti sagutda;

yegto dagiti ari ti Sheba ken Seba ti datonda.

11 Agrukbabto dagiti amin nga ari kenkuana,

agserbinto kenkuana dagiti amin a pagilian.

12 Arayatenna ti napanglaw nga umawag kenkuana,

kasta met dagiti makasapul ken nabaybay-an tulonganna ida.

13 Naasi kadagiti nakurapay ken nakapuy;

isalakanna ti biag dagiti makasapul.

14 Ispalenna ida iti pannakaidadanes ken kinaranggas;

ispalenna ida ta napateg kenkuana ti biagda.

15 Agbiag koma ti ari iti agnanayon!

Maikkan koma iti balitok ti Seba.

Kanayon koma ti pannakaikarkararagna.

Kanayon koma a maited ti bendision ti Dios kenkuana.

16 Umadu koma ti apit iti daga,

makumotan koma dagiti turod iti mula

kas kabunga dagiti adda idiay Libano.

Umadu koma dagiti tattao kadagiti siudad,

a kas iti kaadu ti ruruot iti tay-ak.

17 Pulos a dinto koma malipatan ti naganna;

agpaut koma a kas iti init ti kinalatakna.

Agdaydayaw koma dagiti amin a nasion kenkuana;

dawatenda koma a bendisionan ti Dios ida

a kas iti pannakabendision ti ari.

18 Idaydayawyo tiApo, ti Dios ti Israel!

Isu laeng ti makaaramid kadagitoy nakaskasdaaw a banag!

19 Idaydayawyo iti agnanayon ti nagloriaan a naganna;

ket mapno koma ti sangalubongan iti dayagna!

Amen! Amen!

20 Daytoy ti paggibusan dagiti kararag ni David nga anak ni Jesse.

Ti Kinalinteg ti Dios

1 Pudno unay a naimbag

ti Dios iti Israel!

Naimbag kadagiti nadalus ti panagpuspusona!

2 Ngem nagistayanak naitibkol, dandaniak naikaglis

3 ta inapalak ti nakitak nga irarang-ay

dagiti managdakdakes ken dagiti natangsit.

4 Awan tuok a sagabaenda;

napigsa ken nasalun-atda.

5 Dida agsagaba a kas kadagiti dadduma;

awan ti parikutda a bakbaklayenda

a kas kadagiti sabali a tattao.

6 Kinatangsit ngarud ti pannakakuentasda,

ket kinaranggas ti pannakakawesda.

7 Dakes ti agtaud iti pusoda,

kinikillo ti linaon ti panunotda.

8 Pagang-angawanda dagiti tattao ket dakes a bambanag ti saoda;

natangsitda ket agplanoda iti panangidadanesda.

9 Padpadaksenda ti Dios sadi langit;

ditoy daga, agbilinda a sitatangsit.

10 Uray dagiti tattao ti Dios sumurotda kadakuada,

ket sigagagarda a mamati iti amin a saoda.

11 Ipagarupda a dinto maammoan ti Dios ti aramidda,

ket ti Kangatoan dinanto matakuatan ida.

12 Kasta ti kasasaad dagiti managdakdakes;

aglablabonanda ket ad-adu pay ti urnongenda.

13 Awan kadi ti serserbina a nagtalinaedak

a nadalus ken nalinteg?

14 O Dios, agmalmalem nga agsagsagabaak,

ket binigat a dusdusaennak.

15 No sinaok koma ti kasta,

saanak a napudno kadagiti tattaom.

16 Inkagumaak nga ammirisen ti kaipapananda

uray no narigatko nga awaten

17 agingga a simrekak iti Templom

ket naammoak ti pagtungpalan dagiti managdakdakes.

18 Pudno nga ipanmo ida iti nagalis a disso

tapno matnagda iti awan duadua a pakadadaelanda.

19 Apagdarikmat ti pannakaikisapda;

nakabutbuteng ti paggibusanda.

20 Kasda la tagtagainep nga agpukaw iti agsapa;

no agriingka, O Apo, umsiem ti langada.

21 Idi napasakitanak ket nasugatan toy riknak,

22 arigko iti nakuneng nga animal

ket saanka a naawatan.

23 Nupay kasta, kanayon nga addaak

iti arpadmo ket kibkibinennak.

24 Idaldalannak, babaen kadagiti pamagbagam

ket iti kamaudiananna, awatennak babaen iti pammadayaw.

25 Adda aya masarakak sadi langit a kas kenka?

Yantangay ta addaka kaniak,

adda aya sabali a kayatko ditoy daga?

26 No agkapuy toy puso ken riknak,

ti Dios ti mangpakired kaniak.

Isu laeng ti agnanayon a masapulko.

27 Awan duadua a matayto dagiti mangtallikud kenka,

ket dagiti saan a napudno kenka, pukawemto ida.

28 Ngem ti kaaddak iti asidegmo ti ragsakko.

ApoDios, nagbalinka a natalged a kamangko

tapno ipakaammok ti amin nga aramidmo.

Kararag a Pagdawat iti Pannakaispal ti Entero a Nasion

1 Diosko, apay a linaksidnakami a namimpinsan?

Agnanayon kadi ti pungtotmo iti arbanmo?

2 Laglagipem dagiti tattaom a pinilim idi un-unana,

dagiti sinubbotmo nga agbalin a kukua.

Laglagipem ti Bantay Sion a taengmo.

3 Magnaka kadagitoy rebba iti agnanayon awan inggana;

amin nga adda iti Templo dinadael dagiti kabusor.

4 Iti uneg ti nasantoan a Templom,

nagdir-i dagiti kabusormo iti panagballigida;

inkabilda sadiay dagiti bandera ti panangabakda.

5 Kasda la agpukpukan iti kayo babaen iti wasayda.

6 Amin a nakitikitan a kayo

dinadaelda babaen iti wasay ken maso.

7 Rinakrakda ti Templom ket pinuoranda.

Tinulawanda ti lugar a pagdaydayawan kenka.

8 Inkeddengda nga ikisapdakami a padapada;

pinadapuda amin a nasantoan a paguummongan iti daga.

9 Awanen dagiti milagro a makitami;

awanen dagiti profeta.

No kaano nga aggibus ti agdama a kasasaadmi,

awan ti makaammo kadakami.

10 Kasano kabayag, O Dios,

a katkatawaandakami dagiti kabusormi?

Agnanayon kadi a lalaisenda ti naganmo?

11 Apay a saannakami a tulongan?

Apay a nakadalikepkepka lattan?

12 Ngem sika, O Dios, ti arimi manipud ugma;

namin-adu a nagballigika ditoy daga.

13 Babaeniti bilegmo, binisngaymo ti baybay,

ket binurakmo dagiti ulo ti dragon iti taaw.

14 Rinumekmodagiti ulo ti dragon a maaw-awagan Leviatan

ket impakanmo ti bangkayna kadagiti parsua iti let-ang.

15 Pinagpussuakmo dagiti ubbog ken waig;

pinagmagam dagiti dadakkel a karayan.

16 Pinarsuam ti aldaw ken rabii, ti init ken bulan.

17 Dagiti beddeng ti daga, sika ti nangipasdek;

intuyangmo ti tiempo ti pudot ken tiempo ti lam-ek.

18 Laglagipem, OApo, nga ang-angawendaka dagiti kabusormo;

maagda ket agsaoda iti maibusor iti naganmo.

19 Dimo baybay-an dagiti tattaom nga awan gawayna;

maidaddanesda, dimo koma liplipaten ida.

20 Laglagipem ti tulagmo kadakami,

ta nagsaknapen ti kinadawel ken kinaranggas

kadagiti nasipnget a lugar ti daga.

21 Dimo ipalubos a maibabain dagiti napanglaw ken nanumo;

idaydayawdaka koma dagiti mailupitlupit a tattao.

22 Bumangonka, O Dios, ket irupirmo ti kalintegam.

Laglagipem nga agmalmalem a katkatawaandaka dagiti awan diosna.

23 Dimo lipaten dagiti makapungtot nga ikkis dagiti kabusormo,

ti di agsarday a panagririaw dagiti sumupring kenka.