Month: March 2020

Kanta a Pagdaydayaw

1 Umaykayo, ket idaydayawtayo tiApo!

Kantaantayo a sirarag-o ti Dios a salaknibtayo!

2 Dumatagtayo iti sangoananna ket agyamantayo;

Ipaayantayo iti naragsak a kanta a pagdaydayaw kenkuana!

3 Ta tiApomannakabalin a Dios;

naindaklan nga ari, naturturay ngem amin a didios.

4 Iturayanna ti entero a daga,

manipud iti kaunggan a rukib agingga iti kangatoan a turod.

5 Inaramidna ti taaw ket kukuana,

uray ti daga sinukog ti imana.

6 Umaykayo! Agparintumengtay iti sakaananna,

ket agdaydayawtayo kenkuana.

Agrukbabtayo itiApo

a namarsua kadatayo.

7 Isuti Diostayo;

datayo dagiti tattaona nga ay-aywananna,

ti arban a tartaraonanna.

Ita nga aldaw, denggenyo ti ibagana:

8 “Saankayonga agsuksukir,

a kas kadagiti kapuonanyo idiay Meriba;

wen, iti daydi aldaw a kaaddada iti let-ang idiay Masa.

9 Sinuotdak sadiay ket pinadasdak,

idinto a nakitada ti inaramidko

nga agpaay kadakuada.

10 Uppat a pulo a tawen a naupayak kadagita a tattao.

Isut’ gapuna a kinunak,

‘Saan a napudno dagitoy a tattao

dida tungpalen dagiti bilinko.’

11 Ngarud,nakapungtotak ket insapatak,

‘Saankayto a sumrek iti daga

a pangtedak koma kadakayo iti inana.’”

Ti Dios a Kangatoan nga Ari

1 Kantaanyo tiApoiti baro a kanta!

Kantaanyo tiApo, dakayo amin a tattao iti daga.

2 Wen, kantaanyo tiApoket idaydayawyo!

Inaldaw nga ipakaammoyo

ti damag ti panangisalakanna kadatayo.

3 Ipakaammoyo ti dayagna kadagiti pagilian,

dagiti nabileg nga aramidna kadagiti amin a tattao.

4 Naindaklan tiApo

ket maikari a naindaklan ti panangidaydayawtayo.

Ad-adda a pagbutngan

ngem dagiti amin a dios.

5 Imahen laeng dagiti didiosen dagiti pagilian;

ngem pinarsua tiApodagiti langit.

6 Adda dayaw ken kinatan-ok iti sangoananna;

adda bileg ken pintas iti santuariona.

7 IdaydayawyotiApo,

dakayo amin a tattao ditoy daga;

itan-okyo ti dayag ken pannakabalinna.

8 Dayawenyo ti nadayag a nagan tiApo;

mangitugotkayo iti sagut,

ket sumrekkayo iti Templona.

9 Agrukbabkay iti Nasantoan inton agparang.

Agpigergerkayo iti sangoananna,

dakayo amin a tattao.

10 Ibagayo kadagiti nasion,

“Agari tiApo!

Naipasdek a nalaing ti daga

ket awan ti pannakagunggonna.

Nalintegto ti panangukomna kadagiti tattaona.”

11 Agragsakkayo, langit ken daga!

Agdaranudorka, taaw ken amin nga adda kenka.

12 Agrag-okayo,

tay-ak ken amin nga adda kadakayo!

Amin a kayo iti kabakiran,

agriawkayo iti rag-o.

13 Inton umay ukomen tiApoti daga,

nalinteg ken awan idumdumana iti panangukomna

iti amin a tattao ditoy lubong.

Ti Dios a Kangatoan nga Agturay

1 Agari tiApo!

Agragsakka, daga!

Agrag-okayo, dakay amin nga isla!

2 Ulep ken sipnget ti nanglikmut kenkuana;

kinalinteg ken hustisia ti fondasion ti tronona.

3 Adda apuy a magmagna iti sangona;

uramenna dagiti kabusorna iti likmutna.

4 Lawagan ti kimatna ti lubong;

makita ti daga ket agpigerger.

5 Kasla allid a malunag dagiti bantay

iti sangoanan ni Yahweh,

iti sangoanan ti Apo ti amin a daga.

6 Ipakaammo dagiti langit ti kinalintegna,

ket makitanto ti amin a pagilian ti dayagna.

7 Maibabain amin nga agdaydayaw

kadagiti imahen;

Amin a dios, agparintumengdaiti sangoanan tiApo.

8 Agragsak dagiti tattao ti Sion,

agrag-o dagiti siudad ti Juda,

gapu kadagiti pangngeddengmo, O Dios!

9 OApo, sika ti agturay iti amin a daga,

natantan-okka ngem ti amin a dios.

10 Ay-ayaten tiApo

dagiti gumura iti dakes.

Salluadanna dagiti napudno nga adipenna;

ispalenna ida iti bileg dagiti managdakdakes.

11 Agraniag ti silaw kadagiti nalinteg;

adda rag-o a maipaay

kadagiti naimbag a tattao.

12 Dakay a nalinteg,

agrag-okayo itiApo,

ket idaydayawyo ti nasantoan a naganna.

Ti Dios a Mangituray iti Lubong

1 Kantaanyo tiApoiti baro a kanta

gapu kadagiti nakaskasdaaw nga inaramidna.

Nagun-odna ti balligi

babaen iti bileg

ken ti nasantoan a pannakabalinna.

2 Inwaragawag ni Yahweh ti panagballigina.

Impakaammona kadagiti pagilian

ti pannakabalinna a mangisalakan.

3 Tinungpalna ti karina kadagiti Israelita;

nalagipna ti kinapudno ken ayatna kadakuada.

Nakita dagiti tattao iti amin

a disso ti panagballigi ti Diostayo.

4 Idir-iyo, dakayo amin a daga,

ti pagdaydayawyo itiApo.

Itan-okyo kadagiti kanta

ken dir-i ti rag-o.

5 Agkantakayo a mangidaydayaw itiApo;

agtokarkayo iti arpa!

6 Puyotenyo ti tangguyob ken trumpeta,

ket idir-iyo ti rag-o itiAponga ariyo.

7 Agdaranudorka, baybay, ken amin a linaonmo.

Agkantaka, daga, ken amin nga adda kenka.

8 Dakay a karayan, agtipatkayo.

Dakayo a turod, agdadanggaykayo nga agkanta

iti rag-o iti sango tiApo,

9 ta umayna ukomen ti daga!

Nalinteg ken awan idumdumana

iti panangukomna iti amin a tao.

Ti Dios a Kangatoan nga Ari

1 AgarintiApo;

agtigerger dagiti tattao.

Agtugtugaw iti tronona

iti ngatoen dagiti kerubim,

ket agginggined ti daga.

2 Mannakabalin tiApoidiay Sion;

isu ti kangatoan iti amin a nasion.

3 Idaydayaw koma ti tunggal maysa

ti naindaklan ken nadaeg a naganna.

Nasantoan ni Yahweh!

4 Mannakabalinka nga ari,ayatem ti nalinteg.

Inyegmo ti hustisia iti Israel;

inyegmo ti kinalinteg ken panagpapada.

5 Itan-okyo tiApoa Diostayo,

agdaydayawkayo iti sango ti tronona.

Nasantoan ni Yahweh!

6 Da Moises ken Aaron dagiti papadina,

ken ni Samuel ti nagkararag kenkuana;

immawagda kenkuana ket impangagna ida.

7 Manipuditi monmon nga ulep,

nagsao kadakuada.

Tinungpalda dagiti bilin ken linteg nga intedna kadakuada.

8 OApoa Diosmi,

impangagmo dagiti tattaom;

Impakitam a maysaka a Dios a mamakawan

uray no dinusam ida gapu kadagiti basolda.

9 Itan-okyo tiApoa Diostayo;

agdaydayawkayo idiay nasantoan a turodna!

Nasantoan tiApoa Diostayo!

Kanta a Pagdaydayaw

1 Kantaanyo tiApo, dakay amin nga agnaed iti daga!

2 Agdaydayawkayo a siraragsak kenkuana!

Inkay iti sangoananna

iti naragsak a kanta!

3 Bigbigenyo a tiApoket Dios.

Isu ti namarsua kadatayo,

ket kukuanatayo.

Wen, tattaonatayo,

ket datayo ti arbanna.

4 Sumrekkay a napnoan

iti panagyaman iti templona.

Agdaydayawkayo a mapan iti santuariona!

Agyamankayo kenkuana;

itan-okyo ti naganna!

5 Tanaimbag tiApo

ket agnanayon awan inggana ti ayatna.

Agnanayon ti kinapudnona.

Kari ti Maysa nga Ari

1 Agkantaak maipapan

iti hustisia ken kinapudno,

ket ikantak kenka, OApo.

2 Awanto ti pakapilawan ti panagbiagko;

kaanonto kadi ti yaaymo kaniak?

Agbiagakto a natakneng

iti uneg ti balayko.

3 Diakto ipalubos ti dakes nga aramid iti imatangko.

Kagurak ti aramid dagiti sumina iti Dios;

awan pakasapulak kadakuada.

4 Diakto agpanunot iti dakes;

diakto makiraman iti dakes nga aramid.

5 Pukawekto ti siasinoman a mamadpadakes;

wen, iti nalimed a pammadpadakes iti kaarrubana.

Saanko a kapulapol

ti natangsit ken napasindayag.

6 Anamongak dagiti napudno iti Dios,

ket agtaengdanto iti palasiok.

Mapalubosanto nga agserbi kaniak

dagiti nadalus ti panagbiagda.

7 Awanto ti naulbod nga agtaeng iti balayko;

awanto ti managinsisingpet

nga agtalinaed iti imatangko.

8 Inaldawto nga agdadaelak

kadagiti managdakdakes iti dagatayo.

Paksiatekto amin a managdakdakes

iti siudad tiApo.

Kararag ti Mariribuk a Tao

1 OApo, denggem ti kararagko,

agpatulongak ket ipangagmo toy dawatko.

2 Saannak koma nga adaywan no mariribukak.

Denggennak ket darasem ti tumulong kaniak.

3 Kas asuk nga agpukaw ti biagko;

sumsumged ti bagik a kas iti urno.

4 Marsaakak a kas ruot a nagango;

uray iti pannangan, awan ganasko.

5 Gapu iti leddaang ken as-asugko,

kudil laengen ti nangbungon iti tulangko.

6 Kaslaak la tumatayab iti let-ang

arigko iti kullaaw iti langalang.

7 Wenno di makaidna a billit

nga agmaymaysa iti tuktok ti balay.

8 Agmalmalem a pabpabainandak dagiti kabusorko;

pagang-angawanda ti naganko ket ilunlunoddak.

9 Gapu iti pungtot ken ungetmo,

dapu ti taraon nga ipaunegko ket ti

inumek natibnokan kadagiti luak.

10 Pinidutnak sanak impurruak iti adayo.

11 Anniniwan iti malem ti kayarigan ti biagko;

kaslaak la ruot a nagango.

12 Ngem sika, OApo, agnanayonka nga ari;

laglagipendakanto dagiti amin a kaputotan.

13 Tumakderka ket kaasiam ti Sion, bumangonka;

dimtengen ti tiempo ti panangngaasim kenkuana!

14 Ay-ayaten ngamin dagiti adipenmo dagiti batona,

patpatgenda ti tapokna

uray pay no narnarba.

15 Raemento dagiti nasion ti naganmo;

bigbigento dagiti amin nga ari ti bilegmo.

16 Inton bangonen manen tiApoti Sion,

ipakitananto ti kinadayagna.

17 Denggennanto dagiti nabaybay-an a tattaona,

ket ipangagnanto dagiti kararagda.

18 Maisuratto daytoy nga agpaay iti sumaruno a kaputotan,

tapno dagiti tattao a di pay nayanak idaydayawdanto.

19 Timmannawag ni Yahweh manipud ngato a nasantoan a yanna,

manipud langit, kinitana ti daga.

20 Nangngegna ti asug dagiti balud,

ken winayawayaanna dagiti naikeddeng a matay.

21 Iti kasta, ipakaammonto dagiti tattao

ti nagan ni Yahweh idiay Sion.

Madaydayawto idiay Jerusalem,

22 inton aguummong dagiti nasion ken pagarian

tapno agdaydayawda itiApo.

23 Tinukkolna ti pigsak idi agtutuboak

pinaababana dagiti aldaw nga innak panagbiag.

24 Diosko, dimo kadi pay pugsaten ti angesko

ta diak pay la nadanon ti kinalakayko!

Ta sika agnanayonka, OApo.

25 Idiun-unana pinarsuam ti daga.

Inaramidmo dagiti langit

babaen iti bukodmo nga ima.

26 Mapukawda man amin,

agnanayonto latta nga addaka;

marunotdanto amin a kas iti pagan-anay.

Ibellengmonto ida a kas iti kawes,

ket mapukawdanto.

27 Ngem pulos nga awan ti panagbaliwmo;

awan panagpatingga ti biagmo.

28 Agbiagto a sitatalged dagiti annak dagiti adipenmo;

natalgedto dagiti kaputotanda iti babaen ti pannalaknibmo.

Ti Ayat ti Dios

1 Idaydayawmo tiApo,

O kararuak!

Amin nga adda kaniak,

idaydayawyo ti nasantoan a naganna.

2 Amin a kaunggak

idaydayawmo tiApo;

silalagipka koma iti kinamanangngaasina.

3 Pakawanenna ti amin a basolko,

paimbagenna ti amin a sakitko.

4 Yadayonak iti patay

ken bendisionannak iti asi ken ayat.

5 Punnoenna ti biagko iti kinaimbagna

tapno agtalinaedak nga agtutubo ken napigsa a kas iti agila.

6 Ikalintegan ni Yahweh dagiti mailupitlupit;

itdenna kadakuada ti kalinteganda.

7 Impakaammona ken

ni Moises dagiti panggepna;

impakitana kadagiti Israelita

dagiti naindaklan nga aramidna.

8 Managayatken manangngaasi ni Yahweh;

saan a nalaka nga agpungtot, ket di agbalbaliw ti ayatna.

9 Saan a kanayon a mangbabalaw,

saan met nga agnanayon ti pungtotna.

10 Saannatayo a dusaen

kas mayannatup iti basoltayo.

Saannatayo met balsen

kas mayannurot iti labsingtayo.

11 Kas iti kalawa ti nagbaetan ti langit ken daga,

kasta ti ayatna kadagiti agbuteng kenkuana.

12 No kasano ti kaadayo ti laud manipud daya,

kasta met ti kaadayo ti pangikabilanna kadagiti basbasoltayo.

13 Kaasian ti ama kadagiti annakna;

kasta ti panangngaasi ni Yahweh kadagiti agraem kenkuana.

14 Ammona no ania ti nakaaramidantayo;

malagipna a tapoktayo.

15 Mayarig iti ruot ti biag ti tao.

Kas iti sabong iti let-ang

a dumakkel ken lumasbang.

16 Dumteng ti angin ket mapukawen,

awanton ti makakita, dinto agparangen.

17 Ngem kadagiti agdayaw itiApo

agnanayon ti ayatna, awan patinggana.

Kadagiti amin a kaputotan, agpaut ti kinaimbagna.

18 Kasta met kadagiti mangtungpal iti tulagna,

kadagiti napudno a mangannurot kadagiti bilbilinna.

19 Impasdek tiApoti tronona sadi langit,

ket isu ti ari ti amin.

20 Idaydayawyo tiApo, dakayo a mannakabalin

ken napipigsa nga anghelesna,

dakayo a dumngeg ken agtulnog iti bilinna.

21 Idaydayawyo tiApo,

dakayo a nailangitan a pannakabalin,

dakay a babaonenna nga agtungpal iti pagayatanna.

22 Idaydayawyo tiApo,

dakayo amin a parsuana,

iti amin a disso a pagturayanna.

O kararuak, idaydayawmo tiApo.

Ti Panangidaydayaw iti Namarsua

1 O kararuak, idaydayawmo tiApo.

OApoa Diosko,

anian a tan-okmo!

Dayaw ken daeg ti kawesmo;

2 nabungonka iti lawag a kasla pagan-anay.

Inukradmo dagiti langit a kasla tolda,

3 ket impasdekmo ti bukodmo a palasio

iti rabaw dagiti danum iti ngato.

Aramatem dagiti ulep a kas lugan;

dagiti payak ti angin ti pagsakayam.

4 Aramatemdagiti angin a kas babaonem ken

dagiti gumil-ayab nga apuy a kas adipen.

5 Insaadmo a naimbag ti fondasion ti daga,

ket pulos a dinto makuti ti pamuonna.

6 Mangliwengliweng a taaw ti inyaplagmo a kagayna

ket dagiti bambantay nalapunosda.

7 Ngem idi nakapungtotka, dagiti danum nagtalawda;

idi mangngegda ti bilinmo,

dagus a pimmanawda.

8 Nagayusda kadagiti bambantay ken tantanap;

napanda iti disso nga inka insangrat.

9 Nangikabilka iti beddeng

a dida mabalin a lasaten

tapno ti daga didan layusen.

10 Pinartuatmo dagiti ubbog iti tantanap,

ket nagayus ti danumda iti baet dagiti turod.

11 Ditoy ti paginuman dagiti ayup ti tay-ak;

ditoy met ti pangep-epan iti wawda dagiti asno nga atap.

12 Iti kakaykaywan iti arubayan

agumok ken agkakanta dagiti tumatayab.

13 Manipud langit, yegmo ti tudo kadagiti bantay,

ket mapno ti daga iti pagimbagan.

14 Pagtuboem dagiti ruot nga agpaay kadagiti animal,

kasta met dagiti mula nga agserbi iti tao

tapno mapataudda dagiti taraon iti daga.

15 Agaramid iti arak a mangparagsak kenkuana,

lana ti olibo a mangparaniag iti rupana

agraman tinapay a mangted iti pigsana.

16 Nabuslon a tudo ti agtinnag kadagiti sedro ti Libano—

dagiti kayo nga immula ni Yahweh.

17 Agumok sadiay dagiti tumatayab;

agtaeng kadagiti saleng dagiti teggaak.

18 Dagiti nangato a turod

ti ayuyang dagiti kalding a balang.

Dagiti kabatoan a disso

ti kamang dagiti koneho.

19 Inaramidmo ti bulan

a mangibaga iti panagbaliw ti panawen;

inaramidmo ti init, ammona ti inna ilelennek.

20 Pinarsuam ti rabii, ket iti sipnget rummuar

dagiti narungsot nga animal.

21 Agngernger dagiti urbon a leon bayat ti panaganupda

agtaud iti Dios ti kanenda.

22 No sumingising ti init, agsublida,

ket mapanda aginana kadagiti rukibda.

23 Ngem rummuar ti tao a mapan iti aramidna,

ket iti sumipnget agsardengen iti panagtrabahona.

24 OApo, di mabilang dagiti gapuanam,

ket pinarnuaymo amin babaen iti siribmo;

pinunnom ti daga kadagiti pinarsuam.

25 Adtoy ti mangliwengliweng a taaw a nalawa

a taeng dagiti di mabilang a parsua,

babassit man wenno dadakkelda.

26 Aglayagditoy a taaw dagiti barko,

ket agay-ayam ti Leviatansadiay,

dayta dragon ti taaw nga inaramidmo.

27 Amin a parsua agpannurayda kenka iti kasapulanda.

28 Itedmo ti taraon ket kanenda;

ikkam ida ti makan ket mapnekda.

29 No ilingedmo ta rupam, agdanagda;

no pasardengem ti angesda, matayda,

ket agsublida iti tapok a nagtaudanda.

30 Ngem no ikkam ida iti anges,makaungarda,

baro a biag ti itedmo iti daga.

31 Agtalinaed koma nga agnanayon ti dayag tiApo!

Maragsakan koma tiApokadagiti inaramidna!

32 Agkintayeg ti daga no taldiapanna;

umasuk dagiti turod no sagidenna.

33 Kantaak tiApoiti unos ti panagbiagko;

wen, no la ket adda angesko idaydayawko ti Diosko.

34 Maay-ayo koma iti kantak

gapu ta isu ti mangparagsak kaniak.

35 Mapukaw koma dagiti managbasol ditoy daga;

dagiti managdakdakes mamimpinsan koma a maikisapda.

O kararuak, idaydayawmo tiApo.

Madaydayaw tiApo.