Month: March 2020

1 No napakumbaba ti sungbat, sebsebanna ti pungtot; ngem no nagubsang, ad-adda a rubrobanna.

2 No agsao ti masirib, itan-okna ti sursuro, ngem ubbaw ti sasawen ti maag.

3 Makita tiApoti mapaspasamak iti amin a lugar; sipsiputannatayo, dakes man wenno naimbag ti aramidentayo.

4 Biag ti yeg ti nasayaat a sao, ngem ti nagubsang a balikas buriborenna ti panunot.

5 Kinamaag ti saan a panangikankano iti pannursuro ni amam kenka; ipakitam a masiribka no ipangagmo ti panangisurona.

6 Agtalinaed ti sanikua dagiti nalinteg, ngem mapukaw ti sanikua dagiti managdakdakes no dumteng ti didigra.

7 Dagiti masirib a saan ketdi a dagiti maag ti mangisaknap iti sursuro.

8 Maay-ayo tiApono agkararag dagiti naimbag, ngem kagurana dagiti daton nga idatag kenkuana dagiti managdakdakes.

9 Kagura tiApodagiti aramid dagiti dakes a tao, ngem ayatenna ti maysa a tao nga agaramid iti naimbag.

10 No saan a nasayaat ti aramidmo, nakaronto ti pannakadusam; matayka no dimo kayat ti paisuro.

11 Uray ti lubong dagiti natay saanna a mailemmeng itiApono ania ti adda sadiay; kasano ngarud nga ilemmeng ti tao dagiti pampanunotenna iti Dios?

12 Ti tao a ti la bagina ti talkenna saanna a kayat ti paisuro; pulos a di agkiddaw iti pammagbaga kadagiti masirib.

13 Naisem ti tao no naragsak, ngem nalidem ti rupana no naliday.

14 Kayat ti nasaririt a tao ti agsursuro, ngem mapneken ti nengneng iti kina-ignorantena.

15 Pasig a pannakibakal ti biag ti napanglaw, ngem inaldaw a kasla agfiesta dagiti naragsak a tattao.

16 Nasaysayaat ti napanglaw nga adda panagbutengna itiApongem ti nabaknang nga adda parikut ti biagna.

17 Nasaysayaat ti agsida iti nateng a kasangom dagiti tattao nga ay-ayatem ngem ti agsida iti kaimasan a karne nga adda gura iti unegmo.

18 Ti pungtot pataudenna ti riribuk, ngem ti anus yegna ti kappia.

19 No nasadutka, rigat la ti adda iti amin a papanam, ngem awan ti parikut a dumteng kenka no saanka nga ulbod.

20 Paragsaken ti masirib nga anak ti amana. Ti laeng maag ti mangumsi iti inana.

21 Naragsak dagiti nengneng iti minamaag nga aramidda, ngem ti masirib nalinteg ti dalanna.

22 Awatem ti amin a pammagbaga a mabalinmo a dawaten ket agballigikanto; no awan ti balakad awan banag ti panggepmo.

23 Anian a ragsaktayo no masarakantayo ti tumutop a sao iti tumutop nga okasion!

24 Magna ti masirib a tao iti dalan nga agturong iti biag, saan nga iti dana nga agturong iti patay.

25 Rebbaen tiApodagiti balay dagiti napalangguad, ngem salaknibanna ti sanikua ti babai a balo.

26 Kagura tiApodagiti dakes a pampanunot, ngem kaay-ayona dagiti nasayaat a sao.

27 Agganansiaka iti sinasaur, ket yegmo ti riribuk iti familiam. Dika umawat iti pasuksok ket napautto ti biagmo.

28 Agpanunot nga umuna ti nalinteg a tao sakbay a sumungbat. Dagus a sumungbat ti managdakdakes ngem tumaud ti riribuk.

29 No agkararag dagiti nalinteg a tattao, dumngeg ni Yahweh ngem dina ikankano dagiti managdakdakes.

30 Paragsakennaka ti naisem a rupa ket ti naimbag a damag pasayaatenna ti rikna.

31 No denggem ti pammabalaw a pangisuro kenka, maibilangka a masirib.

32 No dimo ipangag ti pannursuro, dangram met la ta bagim. No denggem ti pammagbaga, sumirsiribka.

33 Ti panagbuteng itiApomaysa a kita ti sursuro. Masapul a napakumbabaka sakbay a mabalinmo ti umawat iti pammadayaw.

1 Agplano ti tao, ngem ti Dios ti mangeddeng.

2 Nalabit nga ipagarupmo a husto ti amin nga aramidmo, ngem tiApoti mangtingiting no ania ti panggepmo.

3 Dawatem tiApoa bendisionanna dagiti kayatmo nga aramiden, ket agballigika iti panangibanagmo kadagiti panggepmo.

4 Adda panungpalan ti amin a pinarsua tiApo. Ket pannakadadael ti panungpalan dagiti managdakdakes.

5 Kagura ni Yahweh ti amin a napalangguad; pulos a dina ipalubos a malisianda ti pannakadusa.

6 Agtalinaedkaa napudno ket pakawanento ti Dios ti basolmo. Agbutengka itiApoket awanto ti dakes a mapasamakmo.

7 No maay-ayo kenka tiApo, mapagbalinmoa gayyem dagiti kabusormo.

8 Nasaysayaatti bassit a matgedan a saan a sinaur ngem ti adu a saan a nalinteg ti pannakateggedna.

9 Sika ti agplano, ngem tiApoti mangiturong kadagiti aramidmo.

10 Agsao ti ari babaen iti nasantoan a pannakabalin; husto amin a pangngeddengna.

11 Kalikaguman tiApoa husto dagiti pagtimbangan ken dagiti pagsukatan, ket awan sinasaur iti panaglako.

12 Saan nga ipalubos ti ari ti dakes nga aramid;ngamin, ti hustisia ti mangpapigsa iti turay.

13 Maragsakan ti ari a dumngeg iti pudno ket ayatenna dagiti agsao iti kasta.

14 Tarigagayan ti masirib a paragsaken ti ari; no agpungtot ti ari, mabalin nga adda matay.

15 Mayarig ti parabur ti ari kadagiti ulep a mangyeg iti tudo kadagiti maudi a tiempo ti tudtudo—adda biag sadiay.

16 Nasaysayaat nga adayo ti kinasirib ken ammo ngem ti balitok ken pirak.

17 Agdaliasat ti naimbag a tao iti dalan a mangliklik iti kinadakes; kitaem ngarud ti papanam—mabalin nga isu ti pakaisalakanan ti biagmo.

18 Agturong ti kinatangsit iti pannakadadael ket ti kinapalangguad iti pannakatnag.

19 Nasaysayaat ti napakumbaba iti sidong dagiti napanglaw ngem ti maysa kadagiti napalangguad ket mairamanka iti sinamsamda.

20 Ipangagmo ti maisursuro kenka ket agballigikanto. Agtalekka itiApoket naragsakkanto.

21 Mabigbigbig a mannakaawat ti tao a masirib ken manakem. Nasayaat ti saona ket ad-adda a makaguyugoy.

22 Iti imatang dagiti masirib, ti kinasirib isu ti ubbog ti biag, ngem bambannog ti mangisuro kadagiti maag.

23 Panunoten nga umuna ti masirib ti sawenna, ket ad-adda ngarud a makaguyugoy ti ibagana.

24 Mayarig iti diro dagiti makaay-ayo a sao; nasam-it ti ramanna ket nasayaat iti salun-atmo.

25 Addadalan a kasla nalinteg iti imatang ti tao, ngem agturong iti patay.

26 Gapu iti tarigagayna iti taraon, agsalukag ti mangmangged tapno mapedped ti bisinna.

27 Biroken ti managdakdakes ti gundawayna a mangdangran iti padana a tao; uray ti saona kasla apuy a gumilgil-ayab iti dakes.

28 Agiwarasdagiti managdakdakes iti parbo a sao; parnuayenda ti riribuk ket dadaelenda ti panaggagayyem.

29 Allilawen ti nauyong a tao dagiti kaarrubana ket iturongna ida iti didigra.

30 Agannadka kadagiti tattao nga umisem ken mangkidday kenka ta adda pampanunotenda a dakes.

31 Atiddog a panagbiag ti gunggona ti nalinteg a tao; balangatna a nadayag ti ubanna.

32 Nasaysayaat ti naanus ngem ti nabileg. Nasaysayaat a maiturayam ti bagim ngem ti iturayam ti entero a siudad.

33 Agbibinnunot dagiti tattao tapno ammoenda ti pagayatan ti Dios, ngem ti Dios a mismo ti mangikeddeng iti sungbat.

1 Nasaysayaat ti mangilabban a natalna ti panunotmo ngem ti makidaya iti balay a napno iti riribuk.

2 Ti masirib nga adipen maiturayanna ti awan serserbina nga anak ti apona ket makipagtawid kadagiti sanikua.

3 Magugoran ti balitok ken pirak babaen iti apuy, kas iti panangsuot ni Yahweh iti puso ti tao.

4 Denggen dagiti managdakdakes dagiti dakes a panunot ket denggen met dagiti naulbod ti kinaulbod.

5 No pagang-angawam ti napanglaw, insultoem ti Dios a nangaramid kenkuana. Madusaka no katawaam ti kinadaksanggasat ti maysa a tao.

6 Ipannakkel dagiti lallakay dagiti appokoda kas iti panangipanakkel dagiti barito kadagiti ammada.

7 Saan nga agulbod ti mararaem a tao; awan met nasayaat a sao nga isawang ti maag.

8 Adda dagiti tattao a mangipagarup a kasla salamangka ti pasuksok: patienda a maaramidna ti uray ania a banag.

9 No tarigagayam a kayatdaka dagiti tattao, pakawanem ida no makabasolda kenka. No lagipem dagiti biddut ti maysa a tao, madadael ti panaggayyemyo.

10 Ad-adu ti maadal ti nasaririt a tao iti maminsan a pannakatubngarna ngem ti masursuro ti maag iti maminsangagasut a pannakasaplitna.

11 Dumteng ti patay a kasla naranggas a babaonen kadagiti managdakdakes a kanayon a mangpataud iti riribuk.

12 Nasaysayaat a masabatmo ti ina nga oso a naipanaw dagiti urbonna ngem ti maag a madama nga agar-aramid iti linuloko.

13 No dakes ti isupapakmo iti imbag, pulos a dimonto mapapanaw ti dakes iti balaymo.

14 Ti panangrugi ti suppiat mayarig iti pannakaibuang ti danum ti tambak; sumardengka sakbay a dumakkel ti susik.

15 Agpada a kagura tiApoti panangilunod iti awan basolna wenno ti panangipalubos nga agtuloy ti kinadakes.

16 Awan serserbi nga aggastos ti maag iti panagadalna agsipud ta awan ti nakemna.

17 Ipakitaa kanayon ti maysa a gayyem ti panagayatna. Nayanak ti kabsat a tumulong iti tiempo ti rigat.

18 Ti laeng tao nga awan nakemna ti mangikari a bayadanna ti utang ti kaarrubana.

19 Ti panagayat iti basol kasla iti panagayat iti riribuk. No kanayonka a napangas,agbirbirokka iti riri.

20 Ti tao nga agpanunot ken agsao iti dakes awan ti namnamaenna a naimbag no di pasig a didigra.

21 Bin-ig a ladingit ken sennaay ti lak-amen ti maysa nga ama a minamaag dagiti aramid ti anakna.

22 Agtalinaedka a naragsak no nasalun-atka. Main-inutka a matay no kanayon a nalidayka.

23 Awaten ti nakillo nga ukom ti pasuksok a maited kenkuana iti nalimed, ket saanen a maipakat ti hustisia.

24 Ammo ti manakem ti tumutop nga aramidenna. Adu ti irugi ti awan nakemna ngem pulos nga awan ti maibanagna.

25 Ti maag nga anak pagladingitenna ti amana; nasaem a sensennaay ti ipalak-amna iti inana.

26 Saan a rumbeng a multaen ti tao nga awan basolna; maballikug ti hustisia no madusa dagiti naimbag a tattao.

27 Saan a kanayon nga agsao ti tao nga agtalek iti bagina. Ti tao nga agulimek adda naan-anay a sirmatana.

28 Ngamin,uray ti maag maibilang a masirib no agulimek ket saan nga agun-uni.

1 Ti tao a dina ammo ti makilangen iti padana a tao ti la bagina ti pampanunotenna; kontraenna amin a naimbag a pangngeddeng.

2 Awan aniamanna iti maag no maawatanna wenno saan ti maysa a banag; kayatna laeng nga ipakita ti kinalaingna.

3 Agkuyog ti basol ken pannakaibabain. No mapukawmo ti dayawmo, sumukat ti pannakaumsi.

4 Dagiti sao ti tao mabalin a paggubbuayan ti kinasirib; adalem a kas iti taaw ken nalitnaw a kas iti agay-ayus a karayan.

5 Saan a rumbeng nga ayonan ti nakabasol gapu ta no kasta ti maaramid, saanen a maited ti hustisia kadagiti awan basolna.

6 No irugi ti maag ti makisuppiat, isarsarakna la ti pannakakabilna.

7 No agsao ti maag, dadaelenna ti mismo a bagina; dagiti saona ti mangsilo kenkuana.

8 Kasla naimas a taraon ti pammadpadakes—magustoantayo nga ipauneg!

9 Dakes ti nasadut, kas iti tao nga agdaddadael.

10 Mayarig tiApoiti nalagda a torre a mabalin a kamangan ti nalinteg ket awan ti pakaan-anoanna.

11 Ipagarup dagiti nabaknang a masalaknibanda gapu kadagiti sanikuada, kas iti nangato ken natibker a bakud a mangsalaknib iti siudad.

12 Saan a maraem ti maysa a tao no saan a napakumbaba; ti natangsit a tao agturong iti pannakadadael.

13 Dumngegkasakbay a sumungbatka. No dimo aramiden ti kasta, maibilangka a nengneng ken mangpabpabain.

14 Ti pigsa ti pakinakem ti tao nga agbiag isut’ mangpakired kenkuana no masakit; ngem no mapukaw daytoy, mapukawna metten ti kakaisuna a namnamana.

15 Sigagagar ken sisasagana nga agsursuro dagiti masirib a tattao.

16 Tapno nalaka a maam-ammom ti natan-ok a tao, ikkam iti sagut.

17 Kasla pudno ti amin a sao ti umuna a mangikalintegan iti bagina iti pangukoman agingga nga iparang met ti bangir ti kalinteganna.

18 No agdinnarum dagiti maingel a tattao, mabalin a ti nasagradoan a binnunot ti mangibanag iti kasoda.

19 Tulongam ni kabsatmo ket salaknibannakanto a kasla nabileg a bakud ti siudad, ngem no makiapaka kenkuana, dinakanto pastreken iti balayna.

20 Apitemto ti bunga ti amin nga insawangmo.

21 Mabalin a makaited iti biag wenno pakadadaelan ti padam a tao ti saom. Isut’ gapuna nga awatem ti ibunga dagiti saom.

22 Mangasawakaket naimbag a banag ti masarakam; daytoy ti pakakitaan a pinaraburannaka tiApo.

23 Nadayaw ti panagsao ti napanglaw, ngem ti nabaknang, sumungbat a sigugubsang.

24 Adda tattao nga agpammarang a gayyem, ngem adda gayyem a nadekdekket pay ngem ti kakabsat.

1 Nasaysayaat ti napanglaw a natakneng ti panagbiagna ngem ti naulbod a maag.

2 Saan a naimbag ti addaan iti regta a di mabuyogan iti ammo. No dika makaan-anus maisagmakka iti riribuk.

3 Adda tattao a mangdadael kadagiti bagbagida babaen kadagiti minamaag nga aramidda sada pabasolen tiApo.

4 Kanayon a makasarak dagiti nabaknang iti baro a gagayyemda, ngem mapukaw ti napanglaw ti sumagmamano a gayyemna.

5 Madusaka no agsaoka iti ulbod iti pangukoman; saankanto a makalisi.

6 Tarigagayan ti amin ti parabur dagiti natan-ok a tattao, ket gayyem ti kaaduan ti naparabur a tao.

7 Ti napanglaw saan a pagan-ano uray dagiti kakabsatna; di mapilaw nga awan ti gayyemna. Uray ania ti aramidenna, awan ti maawisna a gayyemna.

8 Tulongam ti bagim ket adalem ti amin a mabalinmo a sursuroen; laglagipem ti inadalmo ket rumang-aykanto.

9 Awan duadua ti pannakadusa ti siasinoman nga agsao iti ulbod iti pangukoman; saan a makalisi ti kasta a tao.

10 Ti nalabon a panagbiag saan a maiparbeng kadagiti maag. Kasta met a di met rumbeng nga iturayan dagiti tagabu dagiti prinsipe.

11 No manakemka, saanka a nalaka nga agpungtot. No adda makaaramid iti saan a nasayaat kenka, pakaidayawam no palabsem ti biddutna.

12 Mayarig iti ngernger ti leon ti pungtot ti maysa nga ari, ngem ti paraburna kas iti segseggaan a tudo.

13 Pakadadaelan ti ama ti maag nga anak, ket ti naunget ken managreklamo nga asawa a babai kasla danum nga agtedtedted.

14 Mabalin a tawiden ti maysa a tao ti balay ken ti kuarta dagiti nagannak kenkuana, ngem tiApolaeng ti makaited kenkuana iti manakem nga asawa.

15 Itultuloymo latta ti agsadut; maturogka iti kaykayatmo, ngem agbisinkanto.

16 Tungpalem dagiti bilin ti Dios ket napautto ti biagmo; no dimo ikankano ida, mataykanto.

17 No ikkam ti napanglaw, kasla ni Yahweh ti nangtedam ket subadannakanto tiApo.

18 Disiplinaem dagiti annakmo ita ta ubbingda pay nga adda pagnaan ti pannursuro. No dimo disiplinaen ida, tultulongam ida a mangdadael kadagiti bagbagida.

19 No managpungtot ti maysa a tao, bay-am a sagabaenna ti dusa ti aramidna. No naminsan a naispalmo, masapul nga ispalemto manen.

20 No dumngegka iti pammagbaga ket siaayatka nga umawat iti pannursuro, addanto aldaw a sumiribka.

21 Mabalin a planoen ti tao ti amin a banag, ngem ti pagayatan ni Yahweh ti matungpal.

22 Nakababain ti tao a buklis;nasaysayaat ti napanglaw ngem ti naulbod.

23 Agtulnogka itiApono ket napautto ti biagmo, natalged ken awan ti pakaan-anoam.

24 Adda dagiti tattao a napalalo ti sadutda ket dida pay kayat a subuan dagiti ngiwatda.

25 Rumbeng a madusa dagiti natangsit tapno makasursuro dagiti maag; no masiribka, makasursuroka no mababalawka.

26 Ti la tao nga awan babainna ken naalas ti aramidna ti mangranggas iti amana ken mangpapanaw iti inana.

27 Anak, no isardengmo ti agsursuro, malipatamton ti sigud nga ammom.

28 Awan ti hustisia no pinanggep ti maysa a saksi a dangran ti sabali. Pagay-ayat dagiti nakillo ti agaramid iti dakes.

29 Awan duadua a masaplit ti maag a mangipagarup a nalinteg ti bagina.

1 No makaadum ti uminum iti arak, nangalawngawka ket agbalinka a maag. Maysa a kinamaag ti agbartek.

2 Agbutengka iti makapungtot nga ari a kas iti panagbutengmo iti ngumerngernger a leon; agpeggad ti biagmo no pagpungtotem ti ari.

3 Mabalin nga irugi ti siasinoman a maag ti aniaman a suppiat; nadaydayaw ti mangliklik iti panagsusuppiat.

4 Awanto ti apiten ti mannalon a nasadut a mangarado iti talonna no dumteng ti tumutop a tiempo.

5 Mayarig iti danum ti nauneg a bubon ti pampanunoten ti maysa a tao, ngem kabaelan a yaon ti tao nga addaan iti sirmata.

6 Adu ti mangipagarup iti bagida a napudno ken mapagtalkanda, ngem sadino ti pakasarakan iti kasta a tao?

7 Nagasat dagiti annak no natakneng ti amada ken nalinteg ti aramidna.

8 Agtugaw a mangukom ti ari ket awan ti dakes a mailinged kenkuana.

9 Adda ngata tao a makaibaga a nadalus ti konsensiana, a tinallikudannan dagiti basolna?

10 Kagura tiApodagiti agusar iti saan a husto a timbangan ken pagsukatan.

11 Uray ti maysa nga ubing ipakitana ti kinasiasinona babaen iti aramidna; maibagam no nalinteg ken naimbag.

12 Inikkannatayo tiApoiti mata a pagkita ken iti lapayag a pagdengngeg.

13 Pumanglawka no ti la matmaturog ti ar-aramidem. No nagagetka, adunto ti taraonmo.

14 Kanayon nga agreklamo ti gumatgatang iti kinangato ti presio, ngem no makapanawen, iparammagna ti laingna a timmawar iti ginatangna.

15 No ammom ti sasawem, addaanka iti napatpateg ngem balitok wenno alahas.

16 Siasinoman a maag unay a mangikari a mangbayad iti utang ti maysa a ganggannaet, masapul a maigawid ti sanikuana tapno masigurado ti panagbayadna.

17 Mabalin a naimas a taraon ti magun-odmo iti kinasuitik, ngem iti saan a mabayag, mayarig iti darat a maipamelmel kenka.

18 Agkiddawka iti nasayaat a pammagbaga ket agballigika; dika agdarasudos a mapan iti paggugubatan no awan ti planom.

19 Awan palimed a mailemmeng ti mannanao; adaywam ti tao a nalaing a sumao.

20 No ilunodmo dagiti nagannak kenka, aggibus ti biagmo a kas iti pagsilawan a maiddep iti kasipngetan.

21 No nalaka ti pananggun-odmo iti sanikuam, basbassitto ti imbag a maitedna kenka iti kamaudianan.

22 Dimo ibales ti dakes a naaramid kenka. Agtalekka itiApoa mangispal kenka.

23 Kagura tiApodagiti agaramat kadagiti saan a husto a timbangan ken pagsukatan.

24 Inkeddeng tiApoti pagnaantayo; kasano ngarud a maawatan ti tao ti bukodna a biag?

25 Agpanunotka a nalaing sakbay nga ikarim a mangidatagka iti daton iti Dios, amangan no agbabawika.

26 Maammoanto ti masirib nga ari ti agar-aramid iti dakes, ket awanto ti asina a mangdusa iti nagbiddut.

27 Inted ni Yahweh kadatayo ti panunot ken konsensiatayo; ditay mailemmeng ti kinasiasinotayo.

28 Agtalinaed ti ari iti panagturayna, no la ket napudno, nalinteg ken awan idumdumana.

29 Bigbigentayo ti pigsa ti kinaagtutubo ket raementayo ti uban ti nataengan.

30 No dadduma, masapul ti nasaem a padas tapno balbaliwantayo dagiti wagastayo.

1 Nalaka nga idalan tiApoti panunot ti ari, a kas iti kalaka ti panangiturongna iti ayus ti waig.

2 Mabalin nga ipagarupmo a naimbag amin nga aramidmo, ngem laglagipem a tingitingen tiApodagiti panggepmo.

3 Aramidem ti naimbag ken nainkalintegan; ad-adda a maragsakan ni Yahweh iti dayta ngem ti panangidatagmo iti daton.

4 Kinatangsit ken kinapalangguad ti mangituray kadagiti managdakdakes ket maibilang a basol dagitoy.

5 Agplanoka a siaannad ket maaddaankanto iti nawadwad; no gangganatem ti aramidmo, agkurangkanto iti kasapulan.

6 Mabiit a mapukaw ti sanikua a nagun-odmo iti sinasaur, ket mayarig iti silo a mangiturong kenka iti ngiwat ni patay.

7 Matnag dagiti managdakdakes iti kinaranggasda. Dida kayat ti agaramid iti nalinteg.

8 Nakillo ti dalan dagiti adda basolna; naimbag ti aramid dagiti nalinteg.

9 Nasaysayaatti agnaed iti tuktok ti balay, ngem ti makidenna iti mannakisubang nga asawa.

10 Kanayon a mawaw dagiti managdakdakes nga agaramid iti dakes; awan a pulos ti asida iti padada a tao.

11 No madusa ti maysa a tao a mangipagarup a ti la bagina ti naimbag, uray pay ti nengneng sumirib. Makaadal ti masirib iti maisuro kenkuana.

12 Ammo ti nalinteg a Dios ti mapaspasamak iti balbalay dagiti managdakdakes, ket yegna ti pakadadaelanda.

13 No dimo ipangag ti asug ti napanglaw, saankanto met a maipangag inton sika ti umawag.

14 No kapungtotnaka ti maysa a tao, sagutam iti nalimed ket agbaaw ti pungtotna.

15 No maipakat ti hustisia, maragsakan dagiti naimbag a tattao, ngem maladingitan dagiti managdakdakes.

16 Ur-urayen ni patay ti maysa a tao a sumina iti naimbag a dalan.

17 No naayatka iti ragragsak, arak ken agkakaimas a taraon, pulos a dika bumaknang.

18 Sagabaen dagiti managdakdakes ti rigat a panggepda nga ipalak-am kadagiti naimbag a tattao.

19 Naim-imbag ti agbiag a maymaysa iti let-ang ngem ti makikabbalay iti naunget ken managreklamo nga asawa.

20 Agbiag iti kinabaknang ken kinanam-ay dagiti masirib, ngem ti maag busbosenna a sipapardas ti natgedanna.

21 No naasi ken nalintegka, napautto ti panagbiagmo; raemendakanto dagiti tattao ket kalangendakanto a nasayaat.

22 Ti nasikap a heneral kabaelanna a sakupen ti maysa a siudad a salsalakniban dagiti napipigsa a lallaki, ket dadaelenna dagiti bakud a pagtaltalkanda.

23 Annadam ti panagsaritam no kayatmo nga awan ti pakaisagsagmakam.

24 Ipakitam kaniak ti maysa a tao a mangipagarup a ti bagina ti kasayaatan, ket ipakitak kenka ti maysa a tao a natangsit, napalangguad, ken dina bigbigen ti kabaelan ti sabali.

25 Ti nasadut a tao a dina kayat ti agtrabaho, patayenna met la ti bagina.

26 Awan ti sabali nga aramidna no di la ti panangpampanunotna iti kayatna a tagikuaen. Nupay kasta, mangted a sibubuslon ti nalinteg.

27 KaguratiApodagiti managdakdakes nga agidatag kadagiti daton kenkuana, nangruna no dakes ti panggepda.

28 Awan ti mamati iti pammaneknek ti naulbod; ngem maawat ti sao ti tao a mangpanunot a naimbag kadagiti bambanag.

29 Ammo ti nalinteg ti ar-aramidenna saan a kas iti managdakdakes nga aginkukuna ket ipanna ti amin a kabaelanna nga agpamarang.

30 No makapungtot kenka tiApo, saannaka a matulongan ti kinasirib, kinalaing ken sirmatam.

31 Mabalinmo nga isagana dagiti kabalio a pakigubat, ngem tiApoti mangted iti balligi.

1 Nasaysayaat a piliem ti naimbag a nagan ngem ti kinabaknang.

2 Awan paggiddiatan ti nabaknang ken ti napanglaw, agsipud ta agpadpadada a pinarsua tiApo.

3 Makita ti manakem ti dumteng a riribuk ket liklikanna, ngem sarakusoken ti saan nga agpampanunot a tao ket agbabawi kalpasanna.

4 Agbutengka itiApo, agpakumbabaka, ket magun-odmonto ti kinabaknang, dayaw ken atiddog a biag.

5 No ipatpategmo ti biagmo, lissiam dagiti palab-og iti dalan a pakatnagan dagiti managdakdakes.

6 Iruammoti ubing iti umno a dalan ket uray inton lumakayen dinanto panawan.

7 Tagabu dagiti nabaknang dagiti napanglaw. Umutangka ket tagabunaka ti nagpautang kenka.

8 No agmulaka iti bukel ti kinakillo, rumusing ti didigra, ket aggibusto ti panangidadanesmo iti sabali a tao.

9 Agparaburka ket ibingayam dagiti napanglaw iti taraonmo. Mabendisionankanto iti daytoy nga aramidmo.

10 Lisiam ti tao a mangipagarup nga isu la ti nalaing, ket sumardeng ti suppiat, panagaapa ken panangpabpabain.

11 No nadalus ti pusom ket nasayaat ti panagsaom, agbalinto a gayyemmo ti ari.

12 Salakniban tiApoti kinapudno babaen iti saanna a panangkanunong iti sao dagiti naulbod.

13 Agyan ti nasadut a tao iti uneg ti balay. Kunana a no rummuar amangan no tukmaan ti maysa a leon.

14 Maysa a palab-og ti pannakikamalala. Ipalab-ogna dagiti tattao a kapungtot tiApo.

15 Gagangay nga agaramid dagiti ubbing iti kinamaag ken dagiti awan serserbina a bambanag, ngem ti panagbaut ti mangisuro kadakuada nga agaramid iti naimbag.

16 No sagutam dagiti nabaknang wenno idadanesmo dagiti napanglaw tapno bumaknangka, agbalinkanto met la a napanglaw.

Dagiti Tallopulo a Nainsiriban a Pagsasao

17 Dumngegka ket isuroka kadagiti sao dagiti masirib. Adalem dagiti pannursuroda.

18 Maaddaankanto iti ragsak no malagipmo ida ken mabalinmonto met nga isasao ida.

19 Kayatko nga agtalekka itiApo, isut’ gapuna nga ibagak dagitoy kenka itan.

20 Nangisuratak iti 30 a pagsasao nga agpaay kenka. Mangted ti tunggal maysa kadakuada iti ammo ken naimbag a pammagbaga,

21 ket isurodaka no ania ti napaypayso a kinapudno. Kalpasanna, no maibaonka a mangbirok iti kinapudno, yawidmonto ti tumutop a sungbat.

-1-

22 Dimo gundawayan dagiti napanglaw gapu laeng ta kabaelam nga aramiden; dimo gundawayan dagiti awan gawayna a naidarum iti pangukoman.

23 Ikalinteganto tiApoida, ket pukawennanto ti biag dagiti dakes ti panggepna kadakuada.

-2-

24 Dika makigayyem kadagiti tattao a napudot ti ulona ken nalaka nga agpungtot.

25 Amangan no masursurom ti kababalinda ket dikanton makapagbalbaliw.

-3-

26 Dika agkari a sika ti sumungbat iti utang ti sabali.

27 No dimo mabayadan, alaendanto uray pay ti iddam.

-4-

28 Dimo yalis ti daan a mohon nga insaad dagiti kapuonam.

-5-

29 Ipakitaannak iti tao a napintas ti trabahona ket ipakitak kenka ti tao a nasaysayaat ngem ti kaaduan ken maikari a makikadua kadagiti ari.

-6-

1 No makilanglangka iti natan-ok a tao, dimo liplipatan ti kinasiasinona.

2 No nalaingka a mangan, timbengem ti pannanganmo.

3 Dimo aguman dagiti naimas a taraon nga ipasangona, ta mabalin nga al-allilawennaka.

-7-

4 Agpanunotka a nalaing ket dimo bannogen ta bagim iti tarigagaymo a bumaknang.

5 Mabalin a mapukaw ti kuartam iti apagdarikmat a kasla ketdin naaddaan iti payak ket tumayab a kasla agila.

-8-

6 Dika makilanglang iti nakirmet a tao wenno aguman dagiti naimas a taraon nga idasarna.

7 “Mangalaka pay,” kunana ngem aginkukuna laeng. No ania ti pampanunotenna, isu ti pudno a kinataona.

8 Isarruamto ti kinnanmo ket awanto ti serserbi ti panagpatiray-okmo.

-9-

9 Dika agsao iti nainsiriban iti maysa a maag, ta dina ammo nga ipateg ti sao.

-10-

10 Dimo yalis ti daan a mohon ti daga wenno sakupen ti talon a kukua dagiti ulila.

11 TiApoti napigsa a mangikaluya kadakuada ket isunto ti mangirupir iti kalinteganda a maibusor kenka.

-11-

12 Ipasnekmo ti dumngeg iti sursuro ken tagikuaem ti pudno nga adal.

-12-

13 Dika bumdeng a mangdisiplina iti ubing. Saanna nga ipatay ti panangbautmo kenkuana.

14 Kinapudnona, mabalin a daytoy ti pakaisalakanan ti biagna.

-13-

15 Anakko, no agbalinka a masirib, maragsakanakto la unay.

16 Agrag-oakto no mangngegka nga agsao kadagiti nainsiriban a balikas.

-14-

17 Dimo apalan dagiti managbasol: ti panagraemmo itiApoti ad-adda koma a pakaseknam.

18 No kasta ti aramidem, nasayaatto ti masakbayam.

-15-

19 Dumngegka, anakko; agsiribka ket panunotem a naimbag ti panagbiagmo.

20 Dika kumuyog kadagiti mammartek wenno kadagiti narawet.

21 Agbalinto a marigrigat dagiti mammartek ken dagiti buklis. No mangan ken maturog laeng ti aramidmo, agrutayrutaykanto.

-16-

22 Ipangagmo ni amam a nangputot kenka ken dimo uyawen ti kinabaket ni inam.

23 Kinapudno, kinasirib, sursuro ken naimbag a nakem—maikarida a paggastoan ngem napategda unay ket dimo kayat nga ilako.

24 Maragsakan unay ti ama ti nalinteg nga anak. Mabalinmo a pagpannakkel ti masirib nga anakmo.

25 Pagtangsitdaka koma dagiti nagannak kenka. Ipaaymo dayta a ragsak iti inam.

-17-

26 Anakko, tantandaanam ti saok ket pagulidanam ti panagbiagko.

27 Nakabutbuteng a palab-og ti kayarigan dagiti balangkantis ken dakes a babbai.

28 Kasda la mannanakaw nga agsaneb ket isuda ti pakaigapuan ti pananggulib dagiti lallaki kadagiti assawada.

-18-

29-30 Ipakitam kaniak ti tao a nalaing nga uminum ti arak, ti tao a mangpadas kadagiti nasanger nga inumen, ket ipakitak kenka ti maysa a tao a naliday ken mangay-ay iti bagina, kanayon a makiringgor ken managreklamo. Nalablabbaga ti matana ket adda dagiti dunorna a nalisianna koma.

31 Dika pasulisog iti arak, uray no kasta unay ti labbagana, ket nasin-aw iti uneg ti kopa ken nalamuyot a tilmonen.

32 Ngem iti kabigatanna, kaska la kinagat ti nagita nga uleg.

33 Kalpasanna, agparang kenka dagiti nakabutbuteng a buya ket saan a nalawag ti panagpanunotmo ken panagsaom.

34 Kaska la adda iti taaw a mayallo-allon, maul-ulawka ket kaska la adda iti palo ti maibagbagio a barko.

35 Kunamto, “Kinabildak sa. Pinang-ordak ngata ngem diak malagip. Apay a diak makariing? Uminumak pay maminsan.”

-19-

1 Dimo apalan dagiti managdakdakes ket dimo tarigagayan ti makigayyem kadakuada.

2 Ta pampanunotenda laeng ti mangriribuk, ket tunggal agsaoda adda mapasakitan.

-20-

3 Mabangon dagiti balbalay iti kinasirib ken pannakaawat.

4 No sadino ti ayan ti pannakaammo mapunno dagiti kuartona kadagiti agkakapateg ken agkakapintas a bambanag.

-21-

5 Nasaysayaat ti masirib ngem ti napigsa;wen, naim-imbag ti ammo ngem ti pigsa.

6 Kinaagpaysona, masapul nga adda naannad a panagplano sakbay a mapanka iti paggugubatan, ket no ad-adu ti naimbag a pammagbaga, dakdakkel ti namnama ti panagballigi.

-22-

7 Saan a maawatan ti maag dagiti nainsiriban a pagsasao. Saanna a mabalin ti makipartisipar kadagiti importante a pagsasaritaan.

-23-

8 No kanayon nga agpanggepka iti dakes, agdindinamagkanto a manangriribuk.

9 Basol ti aniaman a panggep ti maag. Kagura dagiti tattao ti tao a mangipagarup nga isu laeng ti nalaing.

-24-

10 No nakapuyka iti tiempo ti riribuk, awan duadua a nakapsutka.

-25-

11 Dika bumdeng a mangispal iti tao a mapapatay nga awan gapgapuna.

12 Nalabit a kunam nga awan bibiangmo, ngem ammo ti Dios ti adda iti panunotmo ket ammona dagiti panggepmo, ta kanayon a sipsiputannaka. Supapakanna dagiti tattao kadagiti aramidda.

-26-

13 Anakko, manganka iti diro ta pagsayaatam. Kas iti diro a maala iti rara a nasam-it iti panagramanmo,

14 kasta met a ti ammo ken sirib pagsayaatan ti kararua. Ikagumaam ti maaddaan iti kinasirib ket naraniagto ti masakbayam.

-27-

15 Dimo panggepen a takawan ti nalinteg a tao wenno agawen ti balayna. Dakes ti kasta nga aramid.

16 Uray no mamin-ano a matuang ti nalinteg, bumangon latta. Ngem dadaelen ti didigra ti managdakdakes.

-28-

17 Dika agragsak no madidigra ti kabusormo ket dika met agrag-o no maitibkol.

18 Ammo tiApo, ket dina kayat ti aramidmo. Dinanto pay ket patuloyenen a dusaen.

-29-

19 Dimo ipalubos a mariribukka gapu kadagiti managdakdakes ken dimo apalan ida.

20 Awan ti masakbayan ti dakes a tao, ket awan namnamaenna.

-30-

21 Anakko, agbutengka itiApoken agraemka iti ari. Dika makibiang kadagiti mangsukir kadakuada.

22 Saan a mamin-ano a madadael dagiti kakasta a tattao. Ammom kadi ti didigra a mabalin nga idissuor ti Dios wenno ti ari?

Dadduma Pay a Nainsiriban a Pagsasao

23 Sao met dagiti masirib a tattao dagitoy:

Saan a nasayaat a mangidumduma ti ukom.

24 No ikeddengna a nakabasol ti awan basolna, ilunod ken guraento ti tunggal maysa.

25 Ngem rumang-ay ken nasayaatto ti pakasarsaritaan dagiti ukom a mangdusa kadagiti nakabasol.

26 Ti mangted iti tumutop a sungbat, arigna iti panangagek iti bibig.

27 Sakbay nga agbalay ken mangasawaka, isaganam pay nga umuna ti talonmo ken sumapulka iti panggeddam.

28 Dika agsaksi iti maibusor iti kaarrubam no awan ti gapuna wenno agsao iti maibusor kenkuana.

29 Dimo kunaen, “Aramidek kenkuana ti inaramidna kaniak tapno makabalesak!”

30 Nagnaak iti talon ken kaubasan ti nasadut ken maag a tao.

31 Nasaknapandan kadagiti sisiitan ken nagkaruotanen. Nargaay metten ti bakudda a bato.

32 Kinitak daytoy ken pinampanunotko, ket daytoy ti naadalko:

33 Ala,agiddaka; maturogka latta. Agdalikepkepka ken aginanaka,

34 ngem bayat ti pannaturogmo, dumteng kenka ti kinapanglaw a kas iti idadateng ti siaarmas a mannanakaw.