Month: March 2020

1 Inton dumteng dayta a tiempo, pitonto a babbai ti manggammat iti maysa a lalaki ket kunada, “Mataraonan ken makawesanmi ti bagimi, ngem pangngaasim ta ibagam a sika ti asawami tapno dikam maibabain gapu iti kaawan asawami.”

Maipasdek Manen ti Jerusalem

2 Dumtengen ti tiempo a padakkelen ken pasantaken ni Yahweh ti amin a mula ken kayo iti daga. Pagtangsit ken pagragsakanto dagiti natda nga Israelita dagiti maapit iti daga.

3 Maawaganto iti nasantoan dagiti amin a nabati idiay Jerusalem, dagiti pinili ti Dios a makalasat.

4 Usarento ni Yahweh ti pannakabalinna a mangukom ken mangdalus iti nasion ket mapakawan ti basol ti Jerusalem ken maikkat ti dara a naibuyat sadiay.

5 Kalpasanna,mangyegto ni Yahweh iti ulep ken asuk ken naraniag nga apuy iti ngatoen ti Bantay Sion ken dagiti amin a naurnong sadiay. Agparangto ti ulep iti aldaw ket ti asuk ken apuy iti rabii. Kumotan ken salaknibanto ti dayag ti Dios ti entero a siudad.

6 Agserbinto ti dayagna a linong ti siudad iti pudot ti aldaw, ket pagbalinennanto a natalged a disso, maysa a pagkamangan no agtudo ken agbagio.

Ti Kanta maipapan iti Kaubasan

1 Dumngegkayota kantaek daytoy a kanta,

kanta ti gayyemko ken ti kaubasanna:

Adda idi kaubasan ti gayyemko

iti nakadamdam-eg a turod.

2 Kinalina ti daga ket inikkatna amin a batona;

napili ken kasayaatan nga ubas dagiti immulana.

Nangbangon iti torre a pagbantayanna,

ket nagkali iti abut a pagpespesanna.

Inurayna ti panagbunga dagiti mulana

ngem naalsem amin dagiti ubas idi maluomda.

3 Ita, kuna ti gayyemko, “Dakayo nga agnaed iti Jerusalem ken Juda, ania ti makunayo maipapan kaniak ken iti kaubasak?

4 Inaramidko amin a pagsayaatan ti kaubasak. Apay ngarud a nagbunga iti naalsem a saan a kas iti nasam-it a ninamnamak?

5 “Kastoy ti aramidek iti kaubasak. Ikkatek dagiti mula a pannakaaladna. Rebbaek ti bakudna ket bay-ak nga araben ken payatpayaten dagiti atap nga animal.

6 Bay-ak nga agkaruotan. Diak arbasan dagiti ubas wenno kalian dagiti puonda. Bay-ak a kumotan dagiti sisiitan a mula ken kalkalunay. Diak ipalubos a matudoanda.”

7 Ti Israel ti kaubasan ni Yahweh a Mannakabalin-amin;

dagiti taga-Juda ti ubas nga immulana.

Ninamnamana a naimbag ti aramidenda,

ngem panagpapatay ketdi ti inaramidda.

Ninamnamana a nalinteg ti aramidenda,

ngem immawag iti hustisia dagiti indadanesda!

Ti Dakes nga Aramid dagiti Tattao

8 Asikayo pay, dakayo nga aggatgatang iti balbalay ken taltalon a nayon dagiti sigud a balbalay ken taltalonyo. Iti saan a mabayag, awanton ti pagyanan ti padayo a tao ket dakdakayton ti agnaed iti daga.

9 Nangngegko ti sao tiApoa Mannakabalin-amin. Kinunana, “Agrakayanto dagitoy dadakkel ken napipintas a balbalay ket awanto ti nagyanda.

10 Sangagalonto la nga arak ti maala iti uppat a hektaria a kaubasan. Sangasalupto laeng a trigo ti maapit iti sangapulo a salup a bukel a maimula.”

11 Asikayopay, dakayo a nasapa a bumangon ket rugianyon ti aginum iti arak agingga a marabrabiyankayo. Kasta unay ti pannakabartekyo.

12 Adda arpa, pandereta, flauta ken arak kadagiti fiestayo. Ngem diyo maawatan ti ar-aramiden tiApo

13 ket maitalawkayto a kas balud. Matayto iti bisin dagiti panguloyo, ket matayto iti waw dagiti kaaduan.

14 Kayat ida nga alun-onen ti lubong dagiti natay, ket silulukat ti ngiwatna kadakuada. Alun-onenna dagiti natan-ok a tattao ti Jerusalem agraman dagiti naariwawa nga umili.

15 Maibabainto ti tunggal maysa ket maipababanto ti amin a napalangguad.

16 Ngem ipakita ni Yahweh a Mannakabalin-amin ti kinatan-okna babaen iti panangaramidna iti nalinteg. Iparangarangna ti kinasantona babaen iti panangukomna kadagiti tattaona.

17 Kadagiti rebba dagiti siudad, agarabto dagiti urbon a karnero ken addanto pagaraban dagiti urbon ti kalding.

18 Asikayo pay, dakayo a mangguyguyod iti kinadakes a kasla tali a naikawar kadakayo.

19 Kunayo, “Aramiden koma a dagus tiApoti ibagana nga aramidenna tapno makitayo. Ibanag koman ti Nasantoan a Dios ti Israel dagiti panggepna. Kitaentayo no ania ti pampanunotenna.”

20 Asikayo pay, dakayo a mangibilang a naimbag ti dakes ket ti dakes, naimbag! Ibilangyo a sipnget ti lawag ket ti lawag, sipnget. Ibilangyo a nasam-it ti napait ket ti napait, nasam-it.

21 Asikayo pay, dakayo a mangibilang a masirib ken nasikapkayo!

22 Asikayo pay, dakayo a nalatak iti panaginum iti arak! Natured ken bannuarkayo maipapan iti panagtempla iti arak!

23 Ngem pasuksokandakayo laeng, wayawayaanyon ti nakabasol ket lapdanyo ti awan basolna a mangtunton iti kalinteganna.

24 Ngarud, kas iti panagkaretket ti garami ken ti nagango a ruot no mapuoranda, malungsotto dagiti ramutyo ket malaylayto dagiti buselyo agingga a mayanginda gapu ta linaksidyo ti insuro kadatayo tiApoa Mannakabalin-amin, ti Nasantoan a Dios ti Israel.

25 Kapungtot tiApodagiti tattaona ket inlayatna ti imana tapno dusaenna ida. Magunggonto dagiti bantay ket kaslanto rugit dagiti bangkay dagiti tattao nga agkaiwara kadagiti kalsada. Ngem uray no maaramid daytoy, dinto agbaaw ti pungtot tiApoket silalayatto latta ti imana a mangdusa.

26 Mangibayog ni Yahweh iti bandera a pangayab iti maysa a nasion nga adda iti adayo. Agsultip a mangayab kadagiti tattao iti ungto ti daga. Adtoyen nga umayda a sipapardas.

27 Awan mabannog kadakuada; awan ti maitibkol. Awan ti agdungsa wenno makaturog. Awan ti nalukay a barikes; awan mapugsat a kordon ti sandalias.

28 Natitirad dagiti panada ket nakasagana dagiti baida. Natangken a kas iti bato ti kuko ti saka dagiti kabalioda ket kasla alipugpog ti panagpuligos dagiti pilid ti luganda.

29 Agpukpukkaw dagiti mannakigubat. Kasda la leon nga agung-ungor a nakapatay iti animal ket itartarayda tapno awan ti mangagaw iti matukmaanda.

30 Inton dumteng dayta nga aldaw, ngerngerandanto ti Israel. Napigsanto ti ngerngerda a kas iti daranudor ti baybay. Kitaenyo daytoy a pagilian! Nakumotan iti sipnget ken panagsagaba! Inalun-on ti sipnget ti lawag.

Ayaban ti Dios ni Isaias nga Agbalin a Profeta

1 Iditawen a pannakatay ni Ari Uzzias, nakitak ti Apo. Situtugaw iti nangato a tronona. Agsaringgayad ti gayadan ti kagayna iti entero a Templo.

2 Iti likmutna, sitatakder dagiti umap-apuy a parsua.Innem ti payak ti tunggal maysa—dua ti nangabbong iti rupa, dua iti bagi, ket ti dua usarenda nga agtayab.

3 Ipukpukkawdaiti tunggal maysa:

“Santo, santo, santo!

Nasantoan tiApoa Mannakabalin-amin!

Napno ti lubong iti dayagna.”

4 Gapuiti pigsa ti timekda, nadayeg ti fondasion ti Templo. Napno ti mismo a Templo iti asuk.

5 Kinunak, “Asiak pay! Awanen ti namnamak! Dakes amin nga agaon iti ngiwatko ket agnaedak iti sidong dagiti tattao a narugit ken dakes ti tunggal ibalikasda. Nupay kasta, nakitak kadagiti mismo a matak ti Ari, tiApoa Mannakabalin-amin!”

6 Timmayab nga immay kaniak ti maysa kadagiti parsua. Siiiggem iti beggang a sinipitna iti altar.

7 Insagidna ti beggang kadagiti bibigko ket kinunana, “Naisagid daytoy kadagiti bibigmo ket ita, nadalusankan ket napakawanen dagiti basolmo.”

8 Nangngegko a kinuna ni Yahweh, “Siasino ti ibaonko? Siasino ti ibaontayo?”

Insungbatko, “Adtoyak! Ibaonnak!”

9 Kinunana,“Inka ibaga daytoy a mensahe kadagiti tattao: ‘Uray no ipasnekyo ti dumngeg, diyo maawatan. Uray ipasnekyo ti kumita, diyo ammo ti mapaspasamak.’”

10 Ket kinunana kaniak, “Pagkunengem ti panunot dagitoy a tattao, pagtulengem ken pagbulsekem ida tapno dida makakita wenno makangngeg wenno makaawat. Ta no saanmo nga aramiden, amangan no agsublida kaniak ket maimbaganda.”

11 Sinaludsodko, “Kasano ti kabayagna a kastoy, O Apo?”

Insungbatna, “Agingga a madadael dagiti siudad ket awanen agnaed. Agingga nga awanen agnaed kadagiti balbalay. Agingga nga aglangalang a mamimpinsan ti daga.

12 Pagtalawekto dagiti tattao ket aglangalang ti entero a daga.

13 Uray maysa iti sangapulo a tattao ti mabati iti daga, madadaelto met. Mayarigto iti napukan a lugo a ti laeng puonna ti matda.”

(Ti puon ti mangipakita iti baro a pangrugian dagiti tattao ti Dios.)

Ti Mensahe a maipaay ken ni Ari Ahaz

1 Rimsuati gubat bayat ti panagturay iti Juda ni Ari Ahaz nga anak ni Jotam ken apoko ni Uzzias. Rinaut da Rezin nga ari ti Siria ken Peka nga anak ni Remalias nga ari ti Israel ti Jerusalem ngem dida naparmek ti siudad.

2 Idi maipadamag iti ari ti Juda nga addan dagiti armada ti Siria iti sakup ti Israel, kasta unay ti butengna, kasta met amin a tattaona ket nagpigergerda a kas kadagiti kayo a daldalapusen ti angin.

3 Kinuna ni Yahweh ken ni Isaias, “Itugotmo ni Sear Jasubnga anakmo ket inkay sabten ni Ari Ahaz. Masarakanyonto ti ari iti dalan a pagtartrabahoan dagiti agar-aramid iti lupot, iti pungto ti kanal a pagayusan ti danum nga aggapu iti akingngato a dan-aw.

4 Ibagam kenkuana nga agsiput, saan a maringgoran ket saan nga agbuteng wenno mariribukan. Ibagam kenkuana a saan a napeggad ti pungtot ni Ari Rezin ken dagiti Sirio a tattaona ken ni Ari Peka. Mayarig laeng ti pungtotna iti asuk ti dua a sumsumged a kayo.

5 Nagtulag ti ari ti Siria ken ari ti Israel.

6 Rantada a sakupen ti Juda, butbutngenda dagiti tattao tapno kumapponda kadakuada ket isaadda ti anak ni Tabeel nga agturay a kas ari.

7 “Ngem siak, ni Yahweh, ipakaammok a pulos a saan a mapasamak daytoy.

8 Apay? Gapu ta saan a napigpigsa ti Siria ngem ti Damasco a kabesera a siudadna. Saan met a napigpigsa ti Damasco ngem ni Ari Rezin. No maipapan iti Israel, iti 65 a tawen maparigatto iti kasta unay ket saanton a maysa a nasion.

9 Saan a napigpigsa ti Israel ngem ti Samaria a kabesera a siudadna. Saan met a napigpigsa ti Samaria ngem ni Ari Peka.

“No saan a napigsa ti pammatiyo, pulos a dikayto agbayag.”

Ti Pagilasinan iti Immanuel

10 Sabali manen a mensahe ti impakaammo ni Yahweh ken ni Ahaz:

11 “Agkiddawka itiApoa Diosmo ti pagilasinan. Mabalin nga aggapu iti pagilasinan iti yuyeng ti lubong dagiti natay wenno idiay ngato sadi langit.”

12 Insungbat ni Ahaz, “Saanak nga agkiddaw iti pagilasinan. Saanko a suoten tiApo.”

13 Iti daytoy, kinuna ni Isaias, “Dumngegka, ita, sika a kaputotan ni Ari David. Dika aya mapnek a mangibus iti anus ti tao ta ibusem pay ti anus ti Dios?

14 Ngarud,tiApoa mismo ti mangted kenka iti pagilasinan. Adtoy, agsikogto ti maysa nga agtutubo a balasang.Aganakto iti lalaki ket panagananna iti Immanuel.

15 Inton dakkelen ket ammonan a liklikan ti dakes ken pilien ti naimbag, gatas ken diroti taraonnanto.

16 Uray iti sakbay ti idadateng dayta a tiempo, aglangalangton dagiti daga nga iturayan dagita dua nga ari a pagbutbutnganyo.

17 “Yegto tiApokenka, kadagiti tattaom ken iti entero a familiam, dagiti aldaw dagiti didigra a nakarkaro ngem dagidi didigra a dimteng manipud simmina ti pagarian ti Israel iti Juda—yegnanto kadakayo ti ari ti Asiria!

18 “Inton dumteng dayta a tiempo, agsultipto tiApoa kas pagilasinan dagiti Egipcio ket umaydanto a kasla pangen ti ngilaw. Aggapudanto kadagiti kaadayoan a sanga ti Karayan Nile. Umayto met dagiti taga-Asiria ket kasdanto la pangen ti uyokan.

19 Sakupendanto dagiti kabatbatoan a tanap, dagiti rukib kadagiti kabatoan ket agsaknapdanto iti amin a siitsiitan a mula ken pagpaaraban.

20 “Inton dumteng dayta a tiempo, manangdanto tiApoiti barbero iti ballasiw ti Eufrates—ti ari ti Asiria!—ket kuskosannanto ti uloyo, ibarbasannakayto ken kiskisannanto dagiti sakayo.

21 “Inton dumteng dayta nga aldaw, uray no maymaysa ti baka ti maysa a mannalon ken dudua ti kaldingna,

22 adunto ti maitedda a gatas ket addanto amin a kasapulanna. Wen, addanto gatas ken diro a taraon dagiti amin a natda iti daga.

23 “Inton dumteng dayta nga aldaw, agtubonto dagiti siitsiitan a mula ken kalkalunay kadagiti nasayaat a kaubasan a namulaan iti rinibu a kapuon ti ubas ken agpateg ti tunggal kaubasan iti sangaribu a bagi ti pirak.

24 Awanto ti makaitured a mapan sadiay malaksid no adda armasna a bai ken pana. Wen, agbalinto a nasamek a kasisiitan ti entero a daga.

25 Amin a katurturodan a namulmulaan idi, agbalindanto a nasamek a kasisiitan ket mabutengton ti tao a mapan sadiay. Pagarabanton dagiti baka ken karnero.”

Maipasngay ti Anak ni Isaias

1 Kinuna ni Yahweh kaniak, “Mangalaka iti dakkel a pagsuratan ket isuratmo iti dadakkel a letra:‘Maher-salal-has-baz.’

2 Mangalaka iti dua a mapagtalkan a lallaki nga agserbi a saksi, ni Urias a padi ken ni Zacarias nga anak ni Jeberekias.”

3 Iti saan a nabayag kalpasanna, nagsikog ti asawak. Idi maipasngay ti lalaki nga anakmi, imbaga kaniak ni Yahweh a ti naganna ket “Maher-salal-has-baz.”

4 Sakbay a mabalikas ti ubing ti “Ina” ken “Ama,” italawto ti ari ti Asiria ti amin a sanikua ti Damasco ken ti amin a sinamsam ti Samaria.

Umayen ti Ari ti Asiria

5 Nagsao manen kaniak tiApo.

6 Kinunana, “Gapu ta linaksid dagitoy a tattao ti nalinak a danum ti Waig Siloaken agtigergerdaiti sango ni Ari Rezin ken Ari Peka,

7 siak nga Apo, yegkonto ti emperador ti Asiria ken dagiti amin a soldadona a mangraut iti Juda. Dumarupdanto a kas iti danum nga aggapu iti Karayan Eufrates no dumakkel ti karayan a manglapunos iti amin a teppangna.

8 Layusendanto ti Juda; ngumatodanto a kasla danum agingga iti abaga ket malapunos ti amin.”

Immanuel! Siuukrad dagiti payakna a mangsalaknib iti daga.

9 Sibubutengkayo nga aguummong, dakayo a nasion! Dumngegkayo, dakayo nga adda iti adayo a daga. Uray no agsaganakayo a makigubat, agbutengkayto! Wen, agsaganakayo ngem agbutengkayo!

10 Agplanokayo ngem dinto agballigi dagiti panggepyo. Agsaokayo iti kaykayatyo! Ngem awanto ti serserbina ta adda kadakami ti Dios.

Pakdaaran ni Yahweh ti Profeta

11 Babaen iti dakkel a pannakabalin ni Yahweh, pinakdaarannak a saanak a magna iti dalan a pagpagnaan dagiti tattao. Kinunana,

12 “Saankaa makiraman kadagiti dakes a panggep dagiti tattao ket saanka met nga agbuteng kadagiti banag a kabutengda.

13 Laglagipem a siak, ni Yahweh a Mannakabalin-amin, nasantoanak; siak ti masapul a kabutengmo.

14 Gapuiti kinasantok a mangabbukay iti panagdaydayaw, mayarigak iti bato a pakaitibkolan dagiti tattao; kaslaak la palab-og a pakaitinnagan dagiti tattao kadagiti pagarian ti Juda ken Israel ken dagiti agnaed iti Jerusalem.

15 Adunto ti maitibkol ken matnag. Matnagdanto ket marumrumekda. Maipalab-ogdanto.”

Maiparit ti Makiuman kadagiti Natay

16 Dakayo nga adalak, salluadan ken taginayonenyo dagiti mensahe nga inted kaniak tiApo.

17 InlemmengantiApodagiti tattaona ngem agtalekak kenkuana ket isu ti pangnamnamaak.

18 Adtoykamikadagiti annakko nga inted kaniak tiApoa Mannakabalin-amin a naisaad ti tronona idiay Bantay Sion. Imbaonnakami a kas sibibiag a mensahe kadagiti Israelita.

19 Ibaganto dagiti tattao a makiumankayo kadagiti mammadles ken mammuyon nga agar-arasaas ken agtantanamitim. Addanto agkuna, “Makiumankayo kadagiti mammadles ken mammuyon nga agar-arasaas ken agtantanamitim.” Ngem saan kadi a ti Dios ti pakiumanan dagiti tattao? Rumbeng kadi a makiumanda kadagiti natay nga agpaay kadagiti sibibiag?

20 Kastoyto ti isungbatyo kadakuada, “Ipangagyo ti isursuro kadakayo tiApo! Diyo ipangag dagiti makiuman kadagiti natay ta awan magunggonayo iti ibagada kadakayo.”

Tiempo ti Rigat

21 Maupay ken mabisbisinanto dagiti tattao nga agalla-alla iti daga. Gapu iti bisin ken pungtotda, ilunoddanto ti arida ken ti Diosda. Uray tumangaddanto sadi langit

22 wenno mulenglenganda ti daga, awanto ti makitada no di pasig a rigat ken sipnget, ti nakabutbuteng a sipnget a pakaituronganda.

Ti Ari nga Agturayto

1 Pulosnga awanto ti pamuspusanda tapno malisianda daytoy a tiempo ti rigat. Naibabain idi ti daga dagiti tribu ti Zabulon ken Neftali. Ngem iti masakbayan, maitan-okto daytoy a daga manipud Mediterranean nga agpadaya iti daga ti ballasiw ti Jordan agingga iti Galilea a taeng dagiti ganggannaet.

2 Dagititattao a nagna iti kasipngetan

nakitada ti lawag a nagpaidumat’ raniagna!

Nagnaedda iti daga dagiti anniniwan

ngem ita agraniag kadakuada ti lawag.

3 Kasta unay ti ragsakda, O Apo;

inyegmo ti rag-oda.

Gapu iti inaramidmo, agragsakda

a kas kadagiti tattao a naragsak no agan-anida

wenno bingbingayenda dagiti sinamsamda.

4 Inikkatmo ti sangol a dadagsenda,

tinukkolmo ti pang-or a nangparigat kadakuada.

Pinarmekmo ti pagilian

a nangidadanes ken nanggundaway kadagiti tattaom

a kas iti panangparmekmo iti armada ti Midian idi un-unana.

5 Mapuoranto dagiti amin a botas

ken dagiti daradara a pagan-anay

dagiti soldado a rimmaut.

6 Naipasngay kadatayo ti maysa nga ubing!

Adda ubing a lalaki a naited kadatayo!

Ket isunto ti mangituray kadatayo!

Maawaganto iti, “Nakaskasdaw a Mammagbaga,”

“Mannakabalin a Dios,” “Agnanayon nga Ama,”

“Prinsipe ti Kappia.”

7 Dumakkeltoa dumakkel ti bilegna a kas ari;

addanto latta kappia iti pagarianna.

Isunto ti sumukat ken ni Ari David nga agturay.

Ibataynanto ti turayna iti kinapudno

ken kinalinteg manipud ita ingganat’ inggana.

Aramiden nga aramiden amin daytoy tiApoa Mannakabalin-amin.

Ti Panangdusa ni Yahweh iti Israel

8 Impatay ti Apo ti dusa iti pagarian ti Israel, kadagiti kaputotan ni Jacob.

9 Maammoanto dagiti amin nga Israelita ken dagiti agnaed iti siudad ti Samaria nga inaramidna daytoy. Ita, natangsit ken napalangguadda. Kunada,

10 “Narban dagiti patakder a naaramid iti ladrilio ngem agipatakderkaminto iti sukatda a naaramid iti bato. Naikkaten dagiti awanan a sikamoro ngem suktanminto ida iti kasayaatan a sedro.”

11 Sinugsogan tiApodagiti kabusordatapno rautenda ida.

12 Iti daya ken iti laud, sisasagana ti Siria ken ti Filistia a mangalun-on iti Israel. Uray no kasta, saan nga agbaaw ti pungtot tiApoket silalayat pay laeng ti imana a mangdusa.

13 Saan a nagbabawi dagiti Israelita. Uray no dinusa ida tiApoa Mannakabalin-amin, saanda a nagsubli kenkuana.

14 Iti las-ud ti maysa nga aldaw, dusaento tiApodagiti pangulo ti Israel agraman dagiti tattaona. Isinananto iti ulo ken ipus, ti sanga ken bulong.

15 Dagiti lallakay ken mararaem isuda ti ulo. Dagiti profeta a mangisursuro iti kinaulbod isuda ti ipus!

16 Dagiti pangulo dagiti Israelita ti nangallilaw ken nangyaw-awan a namimpinsan kadakuada.

17 Iti kasta, saanto nga ipalubos ti Apo nga adda makalasat nga agtutubo a lalaki. Awanto ti balo a babai ken ulila a kaasianna. Ngamin, awanan Dios dagiti tattao ken managdakdakesda. Dakes ti sawen ti tunggal maysa. Ngem uray no kasta, saanto nga agbaaw ti pungtot tiApoket silalayat pay laeng ti imana a mangdusa.

18 Mayarig ti kinadakes dagiti tattao iti apuy a manguram kadagiti siitsiitan a mula ken kalkalunay. Sumged a kas apuy iti bakir a pagtaudan dagiti umasimbuyok nga asuk.

19 Gapu ta makapungtot tiApoa Mannakabalin-amin, kasla iti apuy ti pannusana nga agkayamkam iti entero a daga a mangdadael kadagiti tattao, ket ikaluya ti tunggal maysa ti bagina.

20 Iti amin a paset ti pagilian, kanen dagiti tattao ti aniaman a makan a magammatanda ngem pulos a saanda a mabsog. Kanenda uray dagiti bukodda nga annak!

21 Aggugubat dagiti tattao ti Manases ken Efraim ngem agmaymaysada a mangraut iti Juda. Uray no kasta, saan nga agbaaw ti pungtot tiApoket silalayat pay laeng ti imana a mangdusa.

1 Asikayo pay, dakayo nga agaramid iti linteg a mangparigat kadagiti tattaok.

2 Kasta ti pamuspusanyo tapno saan a magun-od dagiti napanglaw ti kalinteganda ket dida matunton ti hustisia. Kasta ti pamay-anyo tapno maalayo ti sanikua dagiti balo a babbai ken ul-ulila.

3 Anianto ti aramidenyo inton dusaennakayo ti Dios? Anianto ti aramidenyo inton idissuorna kadakayo ti didigra nga aggapu iti adayo a daga? Sadinonto ti pagkamanganyo nga umawag iti tulong? Sadinonto ti pangilemmenganyo iti kinabaknangyo?

4 Mataykayto iti paggugubatan wenno maulod-ulodkayto a mayadayo a kas balud. Uray no kasta, saan nga agbaaw ti pungtot tiApoket silalayat pay laeng ti imana a mangdusa.

Aramaten ti Dios ti Ari ti Asiria

5 KinunatiApo, “Kakaasika, Asiria! Aramatenka a kas pang-or a pangdusa kadagiti kapungtotko a tattao.

6 Imbaonka a mangraut iti nasion a saan nga agbuteng iti Dios, kadagiti tattao a namagpungtot kaniak. Imbaonko ida nga agsamsam, agtakaw ken mangibaddebaddek kadagiti tattao a kas tapok kadagiti kalsada.”

7 Ngem adda nadawel a panggep ti emperador ti Asiria. Inkeddengna a dadaelen ti adu a nasion.

8 Ipangpangasna: “Ari amin a pangulo ti buyotko!

9 Pinarmekko dagiti siudad ti Calno ken Carkemis, kasta met dagiti siudad ti Hamat ken Arpad. Pinarmekko pay ti Samaria ken Damasco.

10 Dinusak dagiti pagarian nga agdaydayaw kadagiti imahen nga ad-adu ngem ti adda iti Jerusalem ken Samaria.

11 Dinadaelko ti Samaria ken amin nga imahen a pagdaydayawan dagiti tattao. Kastanto met ti aramidek iti Jerusalem ken kadagiti imahen a pagdaydayawanda sadiay.”

12 Ngem kuna ti Apo, “Inton malpasko ti ar-aramidek idiay Bantay Sion ken idiay Jerusalem, dusaekto ti emperador ti Asiria gapu iti kinatangsit ken kinapalangguadna.”

13 Ipasindayag ti emperador ti Asiria: “Sisiak ti nangaramid kadagitoy. Napigsaak, masiribak ken nasikapak. Inikkatko dagiti beddeng dagiti nasion ket innalak dagiti sanikua nga inurnongda. Kaslaak la toro a baka a nangibaddebaddek kadagiti tattao nga agnaed sadiay.

14 Mayarig dagiti nasion ti lubong iti umok ti tumatayab ket linaklakak a kinaut dagiti sanikuada a kaslaak la nagpidut iti itlog. Awan ti payak a nagpayakpak a nangkigtot kaniak. Awan ti nagkiak a nangpaadayo kaniak!”

15 Ngem kuna tiApo, “Mabalin kadi nga ibaga ti wasay a natantan-ok ngem iti agwasay? Napatpateg kadi ti ragadi ngem ti agragadi? Saan a ti pang-or ti mangiggem iti tao. Ti tao ti mangiggem iti pang-or.”

16 Idissuorto tiApoa Mannakabalin-amin ti sakit a pangdusa kadagiti tattao a nabuslonen ti taraonna. Addanto apuy a sumsumged kadagiti bagida.

17 Ti Dios a silaw ti Israel, agbalinto nga apuy. Wen, agbalinto nga apuy ti nasantoan a Dios ti Israel, apuy nga iti las-ud ti maysa nga aldaw uramenna ti amin, uray dagiti siitsiitan a mula ken kalkalunay.

18 Madadaelto a mamimpinsan dagiti nasamek a kabakiran ken nadam-eg a pagtatalonan a kas iti panangdadael ti nadagsen a sakit iti maysa a tao.

19 Bassitto ti matda a kayo ket mabalinto a bilangen ti uray maysa la nga ubing.

Ti Panangdusa ni Yahweh iti Agsubli

20 Dumtengen ti tiempo a dinton agtalek dagiti nakalasat nga Israelita iti pagilian a dandani nangdadael kadakuada. Agtalekdanto a sipupudno itiApo, ti Nasantoan a Dios ti Israel.

21 Addanto sumagmamano nga Israelita nga agsubli iti nabileg a Diosda.

22 Urayno adu ita dagiti Israelita a kas iti kaadu ti darat ti baybay, bassitto laeng ti agsubli. Adda pannakadadael nga agur-uray kadagiti tattao ket tumutop a madusada.

23 Wen, idissuorto tiApoDiosa Mannakabalin-amin ti pannakadadael ti entero a pagilian kas imbagana.

Dusaento ti Yahweh ti Asiria

24 Kuna tiApoDiosa Mannakabalin-amin kadagiti tattao nga agnaed idiay Sion, “Dikay agbuteng kadagiti taga-Asiria, uray no parigatendakayo a kas iti inaramid idi dagiti Egipcio.

25 Iti saan a mabayag, agpatingganton ti panangdusak kadakayo ket kalpasanna dadaelekto ida.

26 Siak, ni Yahweh a Mannakabalin-amin, saplitekto ida a kas iti panangsaplitko kadagiti tattao ti Midian idiay Bato ti Oreb. Pagsagabaekto ti Asiria a kas iti inaramidko iti Egipto.

27 Inton dumteng dayta a tiempo, wayawayaankayto iti pannakabalin ti Asiria, ket maikkatton ti sangol nga inkabilda kadagiti tengngedyo.”

Ti Iraraut dagiti Kabusor

28 Sinakupen ti armada dagiti kabusor ti siudad ti Aiyat.Nalabsandan ti Migron! Imbatida dagiti gargaretda idiay Mikmas!

29 Linasatda ti bessang ket umianda idiay Geba! Mabuteng dagiti tattao iti ili ti Rama ket nagtataray dagiti umili ti Gabaa a nakayanakan ni Ari Saul.

30 Agpukkawkayo, dakayo a tattao ti Gallim! Dumngegkayo, dakayo a tattao ti Laisa! Sumungbatkayo, dakayo a tattao ti Anatot!

31 Agtatalawen dagiti tattao ti Madmena ken Gebim tapno maisalakanda ti biagda.

32 Ita nga aldaw, adda dagiti kabusor iti ili ti Nob ket ilaylayatda dagiti gemgemda iti Bantay Sion, iti siudad ti Jerusalem.

33 Pukanento ida tiApoa Mannakabalin-amin, kas iti pannakapukan dagiti sangsanga ti kayo. Ipababanto ni Yahweh ti katayagan ken kangatoan kadakuada ket ibabainnanto ida.

34 Pukanento tiApoida a kas iti panangpukan ti wasay kadagiti kayo iti tengnga ti bakir. Uray dagiti kasayaatan a kayo ti Libano mapukanda!

Ti Natalna a Pagarian

1 Addantosaringit a tumaud iti puon ni Jesse. Manipud iti ramutna, addanto sanga nga agbunga.

2 Ti Espiritu ni Yahweh ti mangted kenkuana

iti kinasirib, pannakaammo ken kabaelan a mangituray kadagiti tattaona.

Maammoannanto ti pagayatan ni Yahweh ket agbuteng kenkuana

3 ken maragsakanto iti panagserbina.

Saanna nga ibatay ti panangukomna iti makita wenno mangngegna.

4 Nalintegtoti panangukomna kadagiti napanglaw;

salaknibannanto ti kalintegan ti awan gawayna.

Agbilinto ket madusa ti daga;

matayto dagiti managdakdakes a tattao.

5 Iturayannantodagiti tattaona

iti kinalinteg ken kinatakneng.

6 Aglalangentoa sikakappia

dagiti lobo ken dagiti karnero.

Agkakaiddanto dagiti leopardo ken dagiti urbon a kalding.

Dagiti urbon a baka ken urbon a leon agkakapangandanto,

ket babassitto nga ubbing ti mangaywan kadakuada.

7 Agkakapanganto dagiti baka ken oso:

agkaiddanto a sitatalna dagiti urbonda.

Manganto dagiti leon iti garami a kas kadagiti baka.

8 Ti maladaga awanto ti pakaan-anoanna

uray no agay-ayam iti asideg ti karasaen.

9 IdiaySion a nasagradoan a bantay ti Dios,

awanto ti agdangran wenno agdadael.

Kas iti panagsaknap ti danum iti baybay,

agsaknapto iti daga ti pannakaammo ken ni Yahweh.

Agsubli dagiti Tattao a Napagtalaw iti Dagada

10 Itidayta nga aldaw, maibayogto ti ramut ni Jesse ket maibilangto a pagilasinan dagiti nasion. Aguummongdanto iti naarian a siudadna ket ipaaydanto ti pammadayaw kenkuana.

11 Inton dumteng dayta nga aldaw, aramatento manen ti Apo ti pannakabalinna. Yawidnanto dagiti nakalasat a tattaona a nabati idiay Asiria, Egipto, Patros, Etiopia, Elam, Babilonia, Hamat ken kadagiti pagilian kadagiti igid ti baybay ken kadagiti purpuro.

12 Mangibayogto ti Apo iti bandera a mangipakita kadagiti nasion nga ummongenna manen dagiti nawarawara a tattao ti Israel ken Juda ket alaenna ida kadagiti amin a suli ti daga.

13 Saanton nga apalan ti pagarian ti Israel ti Juda ket saanto metten a kabusor ti Juda ti Israel.

14 Agmaymaysadanto a mangraut kadagiti Filisteo iti laud, ket samsamendanto dagiti sanikua dagiti tattao nga agnaed iti daya. Parmekendanto dagiti tattao ti Edom ken Moab ket agtulnogto kadakuada dagiti tattao ti Ammon.

15 Pamagaantoni Yahweh ti gulfo ti Egipto ket yegnanto ti napudot nga angin a mangpamaga iti Eufrates. Pitonto laeng a babassit a waig ti ibatina tapno makaballasiw dagiti tattao.

16 Addanto nalawa a kalsada nga aggapu idiay Asiria a pagnaan dagiti tattaona nga Israelita a nakalasat sadiay, kas iti kaadda ti dalan a nagnaan dagidi kapuonanda idi pumanawda idiay Egipto.

Kanta a Pagyaman

1 Dumtengto ti aldaw nga ikanta ti tunggal tao:

“Idaydayawka, OApo;

nupay nakapungtotka kaniak

bimmaaw ti pungtotmo ket ita, liwliwaennak.

2 TiDios ti mangisalakan kaniak,

agtalekak kenkuana ket awan pagbutngak.

TiApoti mangted iti bileg ken pigsak,

wen, isu ti mangisalakan kaniak.

3 Kas iti mawaw a siraragsak a mangtako iti danum,

kasta met dagiti tattao ti Dios no isalakanna ida.”

4 Dumtengto ti aldaw nga ikanta dagiti tattao:

“Agyamankayo itiApo! Agpatulongkayo kenkuana!

Ibagayo kadagiti amin a nasion ti inaramidna!

Ipakaammoyo kadakuada ti kinatan-okna!

5 Kantaanyo tiApo,

gapu kadagiti naindaklan nga inaramidna.

Iti entero a lubong,

ipadamagyo ti natan-ok a gapuananna.

6 Agpukkaw ken agkanta koma dagiti amin nga agnaed iti Sion!

Naindaklan ti Nasantoan a Dios ti Israel,

ket agnaed iti sidong dagiti tattaona.”

Dusaento ti Dios ti Babilonia

1 Adtoyti mensahe ti Dios maipapan iti Babilonia nga impakaammona ken ni Isaias nga anak ni Amoz.

2 Iti tapaw ti natikag a bantay, ibayogyo ti bandera a mangipakaammo iti gubat! Pukkawanyo dagiti mannakigubat ket ingatoyo dagiti imayo a pagilasinanda iti idadarupda kadagiti ruangan ti natangsit a siudad.

3 Inayaban tiApodagiti maingel ken matalek a soldadona a mangiwayat iti gubat a pangdusa kadagiti tattao a kapungtotna.

4 Denggenyo ti arimbangaw iti tapaw dagiti bantay—ti ariwawa ti nakaad-adu a tattao, ti ariwawa dagiti nasion ken pagarian nga aguummong! Pagsagsaganaen ni Yahweh dagiti armada dagiti soldadona a makigubat.

5 Aggapuda kadagiti adayo a pagilian, kadagiti pungto ti daga. Iti pungtot tiApo, umayna dadaelen ti entero a daga.

6 Agdung-awkayo!Asidegen ti aldaw tiApo, aldaw a panangidissuor ti Mannakabalin-amin iti pannakadadael!

7 Malpayto ti ima ti tunggal maysa ket mapukawto ti turedda.

8 Agkullayawdanto iti buteng ket agrigatdanto a kas iti agpasikal. Sibubutengdanto nga agkikinnita ket makitanto iti rupada ti pannakalapunosda iti bain.

9 Dumtengen ti aldaw tiApo. Wen, dumtengen ti naranggas nga aldaw a panagbettak ti pungtotna. Pagbalinennanto a let-ang ti daga ket pukawennanto dagiti amin a managbasol.

10 Saantonga agraniag dagiti bituen ken dadduma pay a grupo dagiti bituen iti tangatang. Nasipngetto ti init no sumingising ket dinto agsilnag ti bulan.

11 Kuna tiApo, “Dusaekto ti lubong gapu iti kinadakesna, kasta met dagiti managbasol gapu iti kinakilloda. Ipababakto dagiti natangsit ken naranggas.

12 Manmanonto a kas iti balitok dagiti makalasat.

13 Pagkintayegekto ti langit ket mayalisto ti daga iti ayanna iti dayta nga aldaw inton siak, ni Yahweh a Mannakabalin-amin, ipakitak ti pungtotko.

14 “Agtatarayto dagiti ganggannaet nga agnanaed idiay Babilonia ket agsublida kadagiti ilida. Mawarawaradanto a kas kadagiti ugsa a kamkamaten dagiti aganup. Mayarigdanto kadagiti karnero nga awan ti pastorda.

15 Maduyokto agingga a matay ti siasinoman a matiliw.

16 Buybuyaendanto a marumrumek dagiti maladagada, masamsam dagiti sanikuada ken marames dagiti assawada, ngem awanto ti maaramidda.”

17 Kuna tiApo, “Sugsogakto dagiti taga-Mediaa mangraut iti Babilonia. Saanda a pagan-ano ti pirak ket saanda a masulisog iti balitok.

18 Babaen kadagiti panada, papatayendanto dagiti agtutubo a lallaki. Awanto ti kaasianda a maladaga ket patayendanto amin nga ubbing.

19 TiBabilonia ti kapintasan a pagarian. Isu ti pagtangtangsit dagiti tattaona. Ngem siak, ni Yahweh, dadaelekto ti Babilonia a kas iti inaramidko iti Sodoma ken Gomorra!

20 Awanton a pulos ti agnaed sadiay. Awanton ti Arabo a mangipatakder iti toldana wenno agpaspastor a mangipaarab iti arbanna sadiay.

21 Pagnaedantodagiti animal ti let-ang ket sadiayto ti pagumokan dagiti kullaaw. Agnaedto sadiay dagiti abestrus ket agtaraytarayto dagiti atap a kalding kadagiti nadadael a patakder.

22 Agallangoganto dagiti pagwanawanan ken dagiti palasio iti taul ken taguob dagiti lobo ken aso ti bakir. Adtoyen ti naituding a tiempo ti Babilonia. Dandanin aggibus dagiti aldawna.”