Month: March 2020

Ni Jeremias ken ni Profeta Hananias

1 Itidayta met la a tawen,iti maikalima a bulan iti maikapat a tawen a panagari ni Zedekias, kinasaonak ni profeta Hananias nga anak ni Azzur iti uneg ti Templo. Taga-Gabaon ni Hananias ken anak ni Azzur. Iti imatang dagiti papadi ken dagiti tattao, imbagana kaniak

2 a kinuna tiApoa Mannakabalin-amin a Dios ti Israel, “Pinarmekkon ti pannakabalin ti ari ti Babilonia.

3 Iti uneg ti dua a tawen, isublikto iti daytoy a lugar ti amin nga alikamen iti Templo nga impan ni Ari Nebucadnesar idiay Babilonia.

4 Isublikto ni Jeconias nga ari ti Juda ken anak ni Jehoyakim iti daytoy a lugar. Isublikto pay dagiti amin a tattao iti Juda a naipan a balud idiay Babilonia. Wen, parmekekto ti pannakabalin ti ari ti Babilonia. Siak, ni Yahweh, ti nagsao iti daytoy.”

5 Iti imatang dagiti papadi ken dagiti amin a tattao nga agtaktakder iti Templo, kinunak ken ni profeta Hananias,

6 “Sapay koma ta pumudno ti saom ket isubli tiApoiti daytoy a lugar ti amin nga alikamen ti Templo a naipan idiay Babilonia. Isublina met koma dagiti amin a tattao a naipanaw a kas balud.

7 Ngem denggem ti ibagak kenka ken kadagiti tattao.

8 Impadto dagiti profeta nga immun-una ngem iti panawenta nga umayto ti gubat, bisin ken angol kadagiti adu a nasion ken napipigsa a pagarian.

9 Ngem ti profeta a mangipadto iti kappia, mabigbig a pudno a profeta nga imbaon tiApono matungpal dagiti insaona.”

10 Inikkat ni Hananias ti sangol iti tengngedko sana tinukko-tukkol.

11 Kinunana iti sangoanan dagiti tattao, “Imbaga tiApoa kastoyto ti panangtukkolna iti sangol nga inkabil ni Ari Nebucadnesar iti tengnged dagiti amin a nasion. Aramidennanto daytoy iti uneg ti dua a tawen.” Kalpasanna, pimmanawak.

12 Iti saan unay a nabayag kalpasan daytoy, imbilin ni Yahweh

13-14 nga ibagak ken ni Hananias, “Kinuna tiApoa Mannakabalin-amin a Dios ti Israel a mabalinmo a tukkolen ti kayo a sangol ngem suktannanto iti landok. Mangikabilto iti landok a sangol kadagitoy a nasion ket agserbidanto ken ni Nebucadnesar nga ari ti Babilonia. Kinunana pay nga uray dagiti atap nga animal agserbidanto ken ni Nebucadnesar.”

15 Kinunak ken ni Hananias, “Denggem, Hananias! Saannaka nga imbaon tiApo. Al-allilawem dagitoy a tattao tapno patienda ti ulbod a sasaom.

16 Daytoy ti gapuna a kuna tiApoa pukawennaka. Sakbay a maturpos daytoy a tawen, mataykanto agsipud ta imbagam kadagiti tattao a sukirenda tiApo.”

17 Ket natay ni Hananias iti maikapito a bulan iti dayta met la a tawen.

Ti Surat ni Jeremias kadagiti Judio idiay Babilonia

1 Nagsuratakkadagiti pangulo a naikuyog kadagiti balud, kadagiti papadi, profeta ken amin nga impanaw ni Ari Nebucadnesar idiay Jerusalem ket impanna ida a kas balud idiay Babilonia.

2 Insuratko daytoy kalpasan ti pannakaipanaw ni Ari Jeconias,ni inana, dagiti ofisiales ti palasio, dagiti pangulo ti Juda ken Jerusalem, dagiti mammanday ken dagiti trabahador.

3 Intedko ti surat kada Elasa nga anak ni Safan ken Gemarias nga anak ni Hilkias. Isuda dagiti imbaon ni Ari Zedekias a mapan ken ni Nebucadnesar nga ari ti Babilonia. Daytoy ti nailanad iti surat,

4 “Kuna tiApoa Mannakabalin-amin a Dios ti Israel kadagiti amin a tattao nga impalubosna nga impanaw ni Nebucadnesar idiay Jerusalem ket impanna a kas balud idiay Babilonia:

5 ‘Agbalaykayo ket agsimpakayo. Agmulakayo ket kanenyo ti maapityo.

6 Mangasawa ken aganakkayo. Kalpasanna, pangasawaenyo dagiti annakyo tapno aganakda met. Umadukayo koma; diyo ipalubos a bumassit ti bilangyo.

7 Agserbikayo iti pagimbagan dagiti siudad a nangipanak kadakayo a kas balud. Agkararagkayo kaniak a maipaay kadakuada agsipud ta no narang-ay dagitoy a siudad, narang-aykayto met.

8 Siak, ni Yahweh a Dios ti Israel, ballaagankayo a dikay paallilaw kadagiti profeta a makipagtaeng kadakayo, wenno kadagiti tattao nga agkuna a maipadtoda ti mapasamakto iti masakbayan. Diyo patpatien dagiti tagtagainepda.

9 Aramatenda ti naganko a mangisao iti ulbod. Diak imbaon ida. Siak, ni Yahweh, ti agsasao.’

10 “KunatiApo, ‘Inton maturpos ti Babilonia ti pitopulo a tawenna, sarungkarankayto ket yawidkayo, kas inkarik kadakayo.

11 Siak laeng ti makaammo kadagiti planok a maipaay kadakayo, planok a mangparang-ay a saan ketdi a mangdidigra, plano a mangibanag iti namnamayo iti masakbayan.

12 Umawagkayto kaniak. Agkararagkayto ket sungbatankayto.

13 Sapulendaktoket masarakandakto, agsipud ta birokendakto iti amin a pusoyo.

14 Wen, kunak a masapulandak ket isublikayto iti dagayo. Ummongenkayto manipud kadagiti nadumaduma a daga ken kadagiti amin a lugar a nangiwaraak kadakayo ket isublikayto iti daga a naggapuanyo. Siak, ni Yahweh, ti agsasao.’

15 “Kunayo nga inikkannakayo tiApokadagiti profeta dita Babilonia.

16 Daytoy ti ibaga tiApomaipapan iti ari nga agturay a kas iti panagturay ni David ken maipapan kadagiti tattao iti daytoy a siudad, isuda a kakabagianyo a saan a naikuyog kadakayo a naipanaw a kas balud.

17 Kuna tiApoa Mannakabalin-amin, ‘Yegko ti gubat, bisin ken angol kadakuada, ket pagbalinek ida a kas igos a nalungsot a di mabalin a kanen.

18 Kamatekto ida babaen iti gubat, bisin ken angol. Iti kasta, makigtotto dagiti amin a nasion iti lubong iti makitada. Sadinoman a pangiwaraak kadakuada, makigtot ken agalinggagetto dagiti tattao a makakita iti napasamak kadakuada. Rabrabakento ida dagiti tattao ket usarendanto ti naganda a pagilunod.

19 Mapasamakto daytoy kadakuada agsipud ta dida tinungpal ti saok a pinaibagbagak kadakuada babaen kadagiti adipenko a profeta. Saanda a nangipangag.

20 Dakay amin a tattao a pinaipanko a balud idiay Babilonia, denggenyo ti saok.’

21 “Nagsao tiApoa Mannakabalin-amin a Dios ti Israel maipapan ken ni Ahab nga anak ni Kolaias ken ni Zedekias nga anak ni Maaseyas, isuda nga agsasao iti ulbod kadakayo iti naganna. Kinunana a yawatna ida iti pannakabalin ni Nebucadnesar nga ari ti Babilonia a mangpapatayto kadakuada iti imatangyo.

22 No adda kadagiti tattao a naipanaw iti Jerusalem a kas balud a naipan dita Babilonia ti agtarigagay a mangilunod iti siasinoman, kunananto, ‘Aramiden koma kenka tiApoti kas iti inaramidna kada Zedekias ken Ahab a sibibiag a pinuoran ti ari ti Babilonia.’

23 Daytoyto ti pagbanaganda ta dakes dagiti aramidda. Nakikamalalada, ket nagsaoda iti ulbod iti nagan tiApo. Maibusor daytoy iti pagayatanna. Ammona ti inaramidda, ket agsaksi iti maibusor kadakuada.Daytoy ti sao tiApo.”

Ti Surat ni Semaias

24-25 Inted kaniak tiApoa Mannakabalin-amin a Dios ti Israel ti mensahena nga agpaay ken ni Semaias a taga-Nehelam. Nagsurat idi ni Semaias kadagiti amin a tattao iti Jerusalem ken ni Sofonias nga anak ni padi Maaseyas ken kadagiti amin a papadi. Iti daytoy a surat, imbaga ni Semaias ken ni Sofonias:

26 “Pinagbalinnaka tiApoa padi a kas sukat ni Jehoyada, ket sikan ti pangulo nga ofisialiti Templo. Pagrebbengam a kawaran ken pabaklayan iti landok ti tunggal mauyong nga aginkukuna a profeta.

27 Apay a dimo binabalaw ni Jeremias a taga-Anatot idi agparparang a kas profeta kadagiti tattao?

28 Masapul a mababalaw ni Jeremias agsipud ta imbagana kadagiti tattao idiay Babilonia a maibaludda sadiay iti mabayag. Isut’ gapuna nga agbalayda koma, agsimpada ken kanenda ti apitda.”

29 Imbasa ni Sofonias daytoy a surat kaniak,

30 ket imbilin kaniak tiApo

31-32 nga ipadamagna kadagiti amin a balud idiay Babilonia ti imbaga ni Yahweh maipapan ken ni Semaias: “Siak, ni Yahweh, dusaekto ni Semaias ken amin a kaputotanna. Saanko nga imbaon ni Semaias ngem nagpammarang kadakayo a kas maysa a profeta. Inallilawnakayo a mamati iti ulbod a saona. Awanto ti kaputotanna a makipagnaed kadakayo. Saannanto a mauray dagiti naimbag nga ipaayko kadagiti tattaok. Ngamin, insurona ida nga agsukir kaniak. Siak, ni Yahweh, ti nagsao iti daytoy.”

Ti Kari ni Yahweh kadagiti Kaputotan ni Jacob

1-2 Kinuna kaniak ti Apo aDiosti Israel, “Isuratmo iti libro dagiti amin nga imbagak kenka.

3 Ngamin, dumtengen ti tiempo a panangisublik iti sigud a kasasaad dagiti tattaok iti Israel ken iti Juda. Isublikto ida iti daga nga intedko kadagidi kapuonanda tapno tagikuaendanto manen. Siak, ni Yahweh, ti agsasao.”

4 Kuna tiApokadagiti tattao iti Israel ken Juda,

5 “Nangngegmi ti nakabutbuteng nga ikkis,

ikkis a nakaal-alliaw,

saan nga ikkis ti talna.

6 Ita, panunotenyo daytoy!

Awan ti lalaki nga aganak,

ngem apay a makitak

ti tunggal lalaki a mangil-ilut iti tianna

a kas iti agpasikal a babai?

Apay a bumbumsag ti tunggal maysa?

7 Adda dumteng nga aldaw a nakabutbuteng.

Awan ti aldaw a makapada iti daytoy;

agrigatto dagiti tattaok,

ngem makalasatdanto.”

8 Kuna tiApoa Mannakabalin-amin, “Inton dumteng dayta nga aldaw, tukkolekto ti sangol iti tengngedda. Pugsatekto dagiti kawarda ket saanton a tagabuen ida dagiti ganggannaet.

9 Agserbidanto ketdi kaniak, siak, ni Yahweh a Diosda, ken iti ari nga isaadkonto a nagtaud iti maysa a kaputotan ni David.

10 “Dikayagbuteng, dakayo a tattaok;

dikay agamak, dakayo nga Israelita.

Isalakankayto iti dayta adayo a lugar,

iti dayta a daga a nakaibaludanyo.

Agawidkayto iti bukodyo a daga,

ket agbiagkayto a sitatalna.

Natalgedkayto ket awanto ti

mangbutbuteng kadakayo.

11 Umayakto kadakayo tapno isalakankayo.

Pukawekto a mamimpinsan dagiti amin a nasion

a nangiwarawaraak kadakayo,

ngem saankayto a dadaelen.

Dusaenkayto a dusaen,

ngem no dusaenkayo, dikayto unay parigaten.

Siak, ni Yahweh, ti nagsao iti daytoy.”

12 Kuna tiApokadagiti tattaona,

“Saan a maagasan dagiti sugatyo,

saan a mapaimbag dagiti dunoryo.

13 Awan ti mangaywan kadakayo;

awan agas ti gaddilyo,

awan namnama nga umimbagkayo.

14 Nalipatandakayo ti amin a kaayan-ayatyo;

saandakayon a pagan-ano.

Kaskayla kabusor a dinarupko,

nadagsen ti pannakadusayo,

agsipud ta adu dagiti basolyo,

ken napalalo ti kinadakesyo.

15 Saankayon nga agasug,

saanen a maep-ep ti ut-ot dagiti sugatyo.

Kastoy ti panangdusak kadakayo,

agsipud ta adu dagiti basolyo,

ken nakaro ti kinadakesyo.

16 Ngem ita, maalun-onto met dagiti mangalun-on kadakayo,

ket maipanawto a kas balud dagiti amin a kabusoryo.

Maparigatto met dagiti amin a mangparigat kadakayo,

ket masamsamanto met dagiti mangsamsam iti kinabaknangyo.

17 Paimbagenkayto manen,

paimbagekto dagiti sugatyo,

uray kuna dagiti kabusoryo,

‘Nabaybay-anen ti Sion,

awanen ti mangikankano kenkuana.’

Siak, ni Yahweh, ti nagsao iti daytoy.”

18 Kuna tiApo,

“Isublikto dagiti tattaok iti dagada,

kaasiakto ti tunggal familia.

Mabangonto manen ti Jerusalem,

ket maipatakderto manen ti palasiona.

19 Agkantanto iti pagdaydayaw dagiti agnaed sadiay;

agpukkawdanto gapu iti rag-oda.

Paraburakto ida ket umadunto ti bilangda;

bendisionakto ida ket maidaydayawdanto.

20 Isublikto ti sigud a pannakabalin ti nasion,

ket ipasdekko manen a nalagda;

dusaekto ti amin a mangidadanes kadakuada.

21-22 Agtaudto iti nasionda ti mangituray kadakuada,

agtaudto ti prinsipeda kadagiti tattaoda.

Ayabakto ket umasidegto kaniak,

ta awan ti umay a saan a naawis.

Isudanto dagiti tattaok,

ket siakto ti Diosda.

Siak, ni Yahweh, ti nagsao iti daytoy.”

23-24 Nadawel a bagio ti kayarigan ti pungtot ni Yahweh. Kasla allawig a bumtak iti ulo dagiti managdakdakes. Saan nga agsardeng no dina maibanag ti amin a panggepna nga aramiden. Iti masakbayan, nalawagto a maawatan daytoy dagiti tattaona.

Ti Isusubli ti Israel

1 Kuna ni Yahweh, “Dumtengen ti tiempo a siakto ti Dios ti amin a tribu ti Israel ket isudanto dagiti tattaok.

2 Kinaasiak dagiti nakalasat iti patay idiay let-ang. Idi tarigagayan dagiti Israelita ti aginana,

3 nagparangak kadakuadamanipud iti adayo. Tattao ti Israel, inay-ayatkayo ket itultuloyko nga ipakita ti napudno a panagayatko kadakayo.

4 Bangonenkayto manen. Alaenyonto manen dagiti panderetayo ket agsasalakayo a siraragsak.

5 Agmulakayto manen iti ubas kadagiti turturod ti Samaria ket kanento dagiti agmula ti bunga dagiti kaubasan.

6 Wen, dumtengen ti tiempo nga ipukkaw dagiti agbambantay nga adda kadagiti turod ti Efraim, ‘Umaykayon! Sumang-attayo idiay Sion ta mapantay itiApoa Diostayo.’”

7 Kuna ni Yahweh,

“Kantaanyo a sirarag-o ti Israel,

ti kangrunaan kadagiti nasion.

Ikantayo ti pagdaydayawyo ket kunayo,

‘Insalakan tiApodagiti tattaona;

inispalna dagiti amin a natda iti Israel.’

8 Alaekto ida manipud iti amianan;

yawidkonto ida manipud iti pungto ti daga.

Kumuyogto kadakuada dagiti bulsek ken dagiti pilay,

dagiti inna ken dagiti dandani agpasngay.

Dakkeldanto a nasion nga agsubli.

9 Agsangsangitto dagiti tattaok nga agsubli;

agkarkararagdanto bayat ti panangyawidko kadakuada.

Iturongkonto ida kadagiti agay-ayus a danum;

nasimpa a dalan ti pagnaanda tapno dida maitibkol.

Siak ti pannakaama ti Israel,

ket ni Efraim ti inauna nga anakko.”

10 Kuna ni Yahweh,

“Dumngegkayo kaniak, dakayo a nasion,

ipakaammoyo ti saok kadagiti adayo a purpuro.

Winarawarak dagiti tattaok

ngem ummongek ken bantayakto ida

a kas iti panangaywan

ti agpaspastor iti arbanna.

11 Winayawayaak dagiti Israelita,

ket inispalko ida iti pannakabalin

ti napigsa a nasion.

12 Umaydanto agkanta a sirarag-o iti tapaw ti Bantay Sion.

Maragsakandanto kadagiti sagsagutko

a trigo, arak, ken lana,

kadagiti karnero ken kadagiti baka.

Kasdanto hardin a nasayaat ti pannakasibogna,

addanto aminen a masapulda.

13 Agsalanto dagiti babbalasang ket agragsakdanto;

dagiti babbaro ken dagiti lallakay agrag-odanto.

Liwliwaekto ida ket agbalinto

a rag-o ti leddaangda,

agbalinto a ragsak ti ladingitda.

14 Pennekekto dagiti papadi iti naimas a taraon,

ket dagiti tattaok mapnekdanto iti imbag nga ipaayko kadakuada.

Daytoy ti sao ni Yahweh.”

Ti Panangngaasi ni Yahweh iti Israel

15 Kunani Yahweh,

“Idiay Rama mangngeg ti arimbangaw,

nasaem a sangsangit ken dungdung-aw.

Dungdung-awan ni Raquel dagiti annakna,

agsangsangit ket dina kayat ti maliwliwa,

ta nataydan amin a padapada.

16 Isardengyon ti agsangsangit,

ket punasenyo dagiti luayo.

Magunggonaanto

ti amin nga impaayyo kadagiti annakyo,

agsublidanto manipud iti daga dagiti kabusor.

17 Adda namnama iti masakbayanyo;

agsublinto dagiti annakyo iti bukodda a daga.

Siak, ni Yahweh, ti nagsao iti daytoy.

18 “Mangngegko dagiti Israelita a mangisangsangit,

‘OApo, kaskami la atap a toro,

ngem insuronakam nga agtulnog.

Yawidnakami iti dagami;

sisasaganakami nga agsubli kenka ngaApoa Diosmi.

19 Naglikudandaka ngem iti saan a mabayag,

kayatmi met la ti agsubli kenka.

Kalpasan ti panangdusam kadakami,

dinandanogmi ti barukongmi

a mangipakita iti panagbabawimi.

Nalalais ken naibabainkami,

ta nagbasolkami idi agtutubokami.’

20 “Israel, napategka nga anakko,

anakko a dungdungoek unay.

Tunggal baliksek ti naganmo,

maragsakanak a makalagip kenka.

Kail-iliwnaka toy pusok; kaasiankanto.

21 Mangikabilkayo iti pagilasinan, markaanyo ti dalan;

birokenyo manen daydi dalan a nagnaanyo.

Agsublikayo, dakayo nga Israelita,

agawidkayo kadagiti il-ili a pinanawanyo.

22 Kasano pay kabayag ti panagsarimadengyo,

dakayo a saan a napudno a tattao?

Pinarsuak ti maysa a baro a banag;

naidumduma a kas iti babai a mangsalaknib iti lalaki.”

Ti Irarang-ay dagiti Tattao ti Dios

23 Kastoy ti kuna ni Yahweh a Mannakabalin-amin a Dios ti Israel, “Inton isublik dagiti tattao iti dagada, kunadanto idiay Juda ken kadagiti il-ilina,

‘Bendisionan koma tiApoti nasantoan a turodti Jerusalem,

ti nasantoan a lugar a pagtaenganna.’

24 Agnaedto dagiti tattao idiay Juda ken iti amin nga il-ilina. Addanto dagiti mannalon ken dagiti agpaspastor agraman arbanda.

25 Pabaroekto ti pigsa dagiti nautoyan ket bussogekto dagiti napakapsutan iti bisin.

26 Iti kasta, kunanto dagiti tattao, ‘Naimas ti turogko ket napigsaak a bimmangon.’

27 “Siak, ni Yahweh, kunak a dumtengen ti tiempo a punnoek ti daga ti Israel ken Juda iti tao ken iti animal.

28 No kasano ti annadko idi a nangparut, nangrebba, nangparmek, nangdadael ken nangrakrak kadakuada, kastanto met ti annadko a mangimula ken mangpadakkel kadakuada.

29 Intonumay dayta a tiempo, saanton a kuna dagiti tattao,

‘Naalsem nga ubas ti kinnan dagiti kapuonan,

ngem dagiti annakda ti naalino.’

30 Nupay kasta, maalinonto ti siasinoman a mangan iti naalsem nga ubas, ket matayto ti tunggal maysa gapu iti basolna met laeng.”

31 Kunani Yahweh, “Dumtengen ti tiempo a mangaramidak iti baro a katulagak kadagiti Israelita ken kadagiti tattao ti Juda.

32 Saanto a kas iti pannakitulagko kadagidi kapuonanda idi iruarko ida idiay Egipto. Uray no arigko iti maysa nga asawa kadakuada, sinalungasingda ti katulaganmi.

33 Intondumteng dayta a tiempo, kastoyto ti pagtutulaganmi kadagiti Israelita: Ikabilkonto ti lintegko iti panunotda ket isuratkonto iti pusoda. Siakto ti Diosda ket isudanto dagiti tattaok.

34 Saantona masapul nga isuroda dagiti kaarruba ken kailianda a mangammo ken ni Yahweh. Ammodakto amin a tattao, natan-ok man wenno nanumo. Pakawanekto dagiti basolda, ket lipatekton dagiti dakes nga inaramidda. Siak, ni Yahweh, ti nagsao iti daytoy.”

35 Ited ni Yahweh ti init a silaw iti aldaw,

iti rabii, pagraniagenna ti bulan ken dagiti bituen.

Kiburenna ti baybay ket agdaranudor dagiti dalluyon;

ni Yahweh a Mannakabalin-amin ti naganna.

36 Inkarina nga agtalinaedto ti Israel iti agnanayon,

santo la mapukaw inton awanen urnos ti sangaparsuaan.

37 Iti aldaw a marukod koma ti langit

ken masukimat dagiti nakaibatayan ti daga,

isunto met ti aldaw a laksidenna dagiti Israelita,

gapu kadagiti amin nga inaramidda.

Daytoy ti sao ni Yahweh.

38 “Dumtengen ti tiempo,” kuna ni Yahweh, “a mabangonto manen ti entero a siudad manipud iti Torre ti Hananel agingga iti lugar a managan iti Ruangan iti Suli.

39 Agtuloy ti beddeng iti laud agingga iti turod ti Gareb ket agsikko iti Goa.

40 Nasantoanto kaniak ti entero a tanap a pakaitaneman dagiti natay ken pagibellengan iti basura. Nasantoanto met ti amin a talon iti surongen ti waig a Kidron agingga iti lugar a managan iti Ruangan ti Kabalio iti daya. Saanton a marakrak wenno madadael daytoy a siudad.”

Gumatang ni Jeremias iti Talon

1 Nagsaokaniak tiApoiti maika-10 a tawen a panagari ni Zedekias idiay Juda. Isu met idi ti maika-18 a tawen a panagari ni Nebucadnesar idiay Babilonia.

2 Iti dayta a tiempo, rarauten ti ari ti Babilonia ti Jerusalem, ket naipupokak iti paraangan ti korte iti palasio ti ari.

3 Pinaibaludnak sadiay ni Ari Zedekias ta pinabasolnak a nangiwarwaragawag a kastoy ti kinuna ni Yahweh, “Yawatko daytoy a siudad iti ari ti Babilonia

4 ket saanto a makalibas ni Ari Zedekias. Mayawatto iti ari ti Babilonia; makitananto iti rupanrupa ket makisaonto kenkuana.

5 Maipanto ni Zedekias idiay Babilonia ket agyanto sadiay agingga a sarungkarak. Uray no makigubat kadagiti taga-Babilonia, saanto nga agballigi. Siak, ni Yahweh, ti nagsao iti daytoy.”

6 Imbaga kaniak tiApo

7 nga umayto ni Hanamel nga anak ni ulitegko a Sallum ket kiddawennanto a gatangek ti talonna idiay Anatot. Adda kalintegak a manggatang ta siak ti kaasitgan a kabagianna.

8 Kas kinuna ni Yahweh, immaynak kinasao ni kasinsinko a Hanamel iti paraangan ti pagguardiaan ket kinunana, “Gatangem ti dagak idiay Anatot iti sakup ti Benjamin. Sika ti kaasitgan a kabagiak. Adda kalintegam a manggatang ken mangtagikua.” Ngarud, daytoy ti nakaammoak a pudno a nagsao kaniak ni Yahweh.

9 Ginatangko ngarud ti talon ni Hanamel ket tinimbangko ti kuarta a pagbayadko. Agpateg iti sangapulo ket pito a bagi ti pirak.

10 Finirmaak ti dokumento. Tinimbreak ken pinasaksiak. Tinimbangko ti kuarta.

11 Innalak dagiti dua a kopia dagiti dokumento ti naglakoan—ti naserraan a kopia a nakailanadan ti tulag ken ti silulukat a kopia.

12 Intedko dagitoy ken ni Baruc nga anak ni Nerias ken apoko ni Maaseyas. Intedko kenkuana iti sango ni Hanamel, dagiti saksi a nagfirma iti dokumento ken dagiti amin a Judio nga agtugtugaw iti paraangan ti korte.

13 Iti imatangda amin, kinunak ken ni Baruc,

14 “Binilinnaka tiApoa Mannakabalin-amin a Dios ti Israel nga alaem dagitoy a dokumento ket idulinmo iti burnay tapno mataginayonda.

15 Kinuna tiApoa Mannakabalin-amin a Dios ti Israel a magatangto manen dagiti balbalay, taltalon ken kaubasan iti daytoy a daga.”

Ti Kararag ni Jeremias

16 Nagkararagak kalpasan ti pannangtedko iti dokumento ti naglakoan ken ni Baruc nga anak ni Nerias. Inkararagko:

17 “ApoDios, pinarsuam ti daga ken ti langit babaen iti dakkel a pannakabalin ken bilegmo. Kabaelam nga aramiden dagiti amin a banag.

18 Impakitam ti di agbalbaliw nga ayatmo kadagiti rinibribu a tattao. Nupay kasta, dusaem dagiti tattao gapu iti basol dagiti ammada. Naindaklan ken nabilegka a Dios.Apoa Mannakabalin-amin ti naganmo.

19 Nainsiriban dagiti planom ket naindaklan dagiti aramidmo. Makitam dagiti aramid dagiti tattao ket gunggonaam ida kas mayannatup iti panagbiag ken aramidda.

20 Idiay Egipto, nagaramidka kadagiti milagro ken kadagiti nakaskasdaaw a banag. Agingga kadagitoy nga aldaw, agar-aramidka pay laeng kadagitoy iti Israel ken kadagiti dadduma a nasion. Iti kasta, ammodakan iti amin a lugar.

21 Babaen kadagiti milagro ken datdatlag a nagbutbutngan dagiti kabusormi, inusarmo ti pannakabalin ken pigsam a nangiruar kadagiti Israelita idiay Egipto.

22 Intedmo kadakuada daytoy nabaknang ken nadam-eg a daga kas inkarim kadagiti kapuonanda.

23 Ngem idi immayda iti daytoy a daga ket tinagikuada, dida nagtulnog kadagiti bilinmo wenno nagbiag a mayannurot kadagiti pannursurom. Awan tinungpalda kadagiti imbilinmo nga aramidenda. Daytoy ti gapuna nga inyegmo kadakuada amin dagitoy a pannakadadael.

24 “Nangbangon dagiti taga-Babilonia kadagiti pangbangenda iti siudad tapno sakupenda. Madaman a rarautenda. Babaen iti gubat, bisin ken angol, matnagto ti siudad iti pannakabalinda. OApo, nganngani matungpalen dagiti amin nga imbagam.

25 Ngem, ApoDios, sika ti nangbilin kaniak a gatangek ti talon iti imatang dagiti saksi uray no dandani sakupenen dagiti taga-Babilonia ti siudad.”

26 Kinuna kaniak tiApo,

27 “Siak ni Yahweh a Dios ti sangkataoan. Kabaelak nga aramiden ti amin a banag.

28 Yawatkodaytoy a siudad ken ni Nebucadnesar nga ari ti Babilonia ken iti armadana ket sakupen

29 ken puorandanto. Padapuendanto agraman dagiti balbalay dagiti tattao a nangpapungtot kaniak. Nagpuor ngamin dagiti tattao iti insenso iti tuktok ti balayda nga agpaay ken ni didiosen a Baal ken nagibukbokda kadagiti inumen a daton kadagiti didiosen.

30 Manipud iti mismo a panangrugi ti pakasaritaanda, pinagpungtotdak dagiti Israelita ken dagiti tattao ti Juda gapu iti dakes nga aramidda.

31 Pinagunget ken pinagpungtotnak daytoy a siudad manipud iti aldaw a pannakabangonna. Inkeddengkon a pukawen,

32 gapu kadagiti amin a dakes nga inaramid dagiti Israelita, dagiti tattao ti Juda, agraman ar-ari ken papanguloda, papadi ken profetada.

33 Naglikudandak, nupay diak nagsardeng a mangisursuro kadakuada. Dida latta mangikaskaso ken dida maisursuro.

34 Inkabildaketdi dagiti kagurak a didiosen iti Templo a nabangon iti naganko ket tinulawanda.

35 Nagbangondakadagiti altar nga agpaay ken ni Baal idiay Tanap ti Hinnom a pangpuoranda kadagiti annakda a daton ken ni didiosen a Moloc. Diak imbilin nga aramidenda daytoy. Di met simrek iti panunotko nga aramidenda daytoy a makarimon a banag a pagbasolan dagiti tattao ti Juda.”

Ikari ni Yahweh ti Namnama

36 Kinuna kaniak ti Apo aDiosti Israel, “Jeremias, imbagamon kadagiti tattao a matnagto daytoy a siudad iti pannakabalin ti ari ti Babilonia. Matnagto gapu iti gubat, bisin ken angol. Ita, denggem pay ti ibagak.

37 Alaekto dagiti tattao manipud kadagiti nasion a nangiwarawaraak idi kadakuada, gapu iti nakaro nga unget ken nabara a pungtotko. Ita, isublikto ida iti daytoy a daga. Pagnaedekto ida ditoy ket awanto ti pakaan-anoanda.

38 Isudanto dagiti tattaok ket siakto ti Diosda.

39 Ikkakto ida iti maymaysa a panggep iti biag: ti panagdayawda kaniak iti amin a tiempo para iti pagimbaganda ken iti pagimbagan dagiti kaputotanda.

40 Makitulagakto kadakuada ket agnanayonto daytoy a tulag: diakto sumardeng nga agaramid iti naimbag kadakuada. Isurokto ida nga agbuteng kaniak iti amin a pusoda tapno saandak a tallikudan.

41 Pagragsakakto ti agaramid kadakuada iti naimbag. Iti amin a puso ken kararuak, pagnaedekto ida iti agnanayon iti daytoy a daga.

42 “Kas iti panangidissuorko iti nakaro a didigra iti daytoy nga ili, kastanto met ti pannangtedko iti amin a naimbag nga inkarik kadakuada.

43 Ibagbaga dagiti tattao nga agbalinto a kasla let-ang daytoy a daga, nga awanto ti tao wenno animal nga agnaed ket maitedto ti daga kadagiti tattao ti Babilonia. Ngem magatangto manen dagiti talon iti daytoy a daga.

44 Gatangento dagitoy dagiti tattao. Mafirmaan, matimbrean ken mapatalgedanto dagiti dokumento. Maaramidto daytoy iti sakup ni Benjamin, kadagiti kabangibang a barrio ti Jerusalem, kadagiti il-ili ti Juda, kadagiti il-ili dagiti bantay, kadagiti il-ili nga adda iti arisadsad ti turturod ken iti abagatan a Juda. Isublikto dagiti tattao iti dagada. Siak, ni Yahweh, ti nagsao iti daytoy.”

Maikari manen ti Namnama

1 Idi sipupupokak pay laeng iti paraangan ti pagguardiaan, dimteng manen kaniak ti mensahe tiApo.

2 Nagsao kaniak ti Apo a nangbukel ken nangipasdek iti daga. Yahweh ti naganna. Kinunana:

3 “Awagannak ket sungbatankanto. Ibagakto kenka dagiti nakaskasdaaw ken naindaklan a banag a saanmo pay nga ammo.

4-5 Siak, ni Yahweh a Dios ti Israel, kunak a marakrakto dagiti balbalay iti Jerusalem ken ti palasio ti ari ti Juda, tapno mausarda iti iraraut dagiti taga-Babilonia. Addanto dagiti sumaranget kadakuada ket mapusekto ti siudad kadagiti bangkay dagiti tattao a papatayek gapu iti unget ken pungtotko. Binaybay-ak daytoy a siudad gapu kadagiti dakes nga aramid dagiti tattaona.

6 Ngem agasakto daytoy a siudad ken dagiti tattaona ket nasalun-atdanto manen. Iparangarangkonto kadakuada ti nabuslon a kappia ken kinatalged.

7 Parang-ayekto ti Juda ken ti Israel. Isublikto ida iti sigud a kasasaadda.

8 Dalusakto ida kadagiti biddutda. Pakawanekto dagiti basbasolda ken ti panagsukirda kaniak.

9 Pagtangsitkonton ti Jerusalem ket isunton ti gubbuayan ti ragsak ken dayawko. Agbuteng ken agkintayegto dagiti amin a nasion ditoy daga a makadamag kadagiti imbag nga ipaayko kadagiti tattao ti Jerusalem ken ti rang-ay nga yegko iti siudad.”

10 Kinuna tiApo, “Kunkuna dagiti tattao a kasla let-ang daytoy a disso. Awan tao wenno animal nga agnaed. Ket pudno ti ibagbagada. Awan tao ita kadagiti ili iti Juda wenno kadagiti kalsada iti Jerusalem. Awan tao wenno animal nga agnaed sadiay. Ngem kadagitoy a lugar, mangngegyonto manen dagiti ariwawa

11 tiragsak ken rag-o, ken dagiti naragsak a parambak ti kasar. Mangngegyonto ti kanta dagiti tattao a mangyeg iti Templok kadagiti datonda a pagyaman. Kunadanto,

‘Agyamankayo itiApoa Mannakabalin-amin,

agsipud ta isu naimbag,

ket agnanayon ti ayatna.’

Parang-ayekto daytoy a daga. Isublikto ti sigud a kasasaadna. Siak, ni Yahweh, ti nagsao iti daytoy.”

12 Kinuna tiApoa Mannakabalin-amin, “Iti daytoy a daga a mayarig iti let-ang ken awan tao wenno animal nga agnaed, addanto manen pagpaaraban dagiti agpaspastor kadagiti karneroda.

13 Kadagiti ili iti katurturodan, kadagiti arisadsad dagiti turturod ken iti abagatan a Juda, iti sakup ti Benjamin, kadagiti barrio iti kabangibang ti Jerusalem, ken kadagiti il-ili ti Juda, bilangento manen dagiti agpaspastor dagiti karneroda. Siak, ni Yahweh, ti nagsao iti daytoy.”

14 KinunatiApo, “Dumtengen ti tiempo a panangtungpalko iti karik kadagiti Israelita ken kadagiti Judio.

15 Iti dayta a tiempo, mangpiliakto iti agbalin nga ari nga agtaud iti kaputotan ni David. Aramidento dayta nga ari ti naimbag ken nalinteg iti entero a daga.

16 Inton dumteng dayta a tiempo, maispalto dagiti tattao ti Juda ket agbiagto a sitatalged dagiti umili iti Jerusalem. Daytoyto ti ipanaganda iti nasion ken siudadda, ‘Insalakannatayo tiApo.’

17 Siak,ni Yahweh, ikarik nga addanto latta kaputotan ni David nga agari iti Israel.

18 Addantolatta padi nga agtaud iti tribu ni Levi nga agserbi kaniak ken mangidatag kadagiti daton a mapuoran, kadagiti daton a makan ken kadagiti sakrifisio.”

19 Kinuna tiApokaniak,

20 “Nakitulagak iti aldaw ken rabii tapno agparangda a kanayon iti naikeddeng a tiempoda. Saan a masalungasing dayta a katulagan.

21 Kasta met a nakitulagak ken ni David nga adipenko nga addanto latta kaputotanna nga agbalin nga ari. Nakitulagak met kadagiti papadi iti kaputotan ni Levi nga agserbidanto a kanayon kaniak. Saan a mawaswas dagitoy a katulagan.

22 Paaduekto dagiti kaputotan ni David nga adipenko ken ti bilang dagiti papadi iti tribu ni Levi nga agserbi kaniak. Narigatto a bilangen ti kaaduda a kas iti karigat ti panangbilang kadagiti bituen wenno kadagiti darat iti igid ti baybay.”

23 Kinuna kaniak tiApo,

24 “Saanmo aya a nadlaw ti kunkuna dagiti tattao a linaksidko ti Israel ken Juda dagiti dua a familia a pinilik? Iti kasta, lalaisenda dagiti tattaok ken saandan nga ibilang ida a nasion.

25 Ngem siak, ni Yahweh, kas iti panangituyangko ti aldaw ken rabii, dagiti annuroten ti daga ken ti tangatang,

26 kastanto met ti panangtungpalko iti nakitulagak kadagiti kaputotan ni Jacob ken ni David nga adipenko. Pumiliakto iti maysa a kaputotan ni David a mangituray kadagiti kaputotan ni Abraham, ni Isaac ken ni Jacob. Kaasiakto dagiti tattaok ket parang-ayekto manen ida.”

Ti Mensahe a maipaay ken ni Zedekias

1 Nagsaokaniak tiApoidi madama ti panangraut ni Nebucadnesar nga ari ti Babilonia iti Jerusalem ken dagiti kabangibangna nga il-ili. Inkuyog ni Nebucadnesar ti armadana, kasta met dagiti armada dagiti nasion ken dagiti tattao nga iturayanna.

2 Kinuna kaniak ti Apo aDiosti Israel nga ibagak daytoy ken ni Ari Zedekias ti Juda, “Siak, ni Yahweh, yawatkonto daytoy a siudad iti ari ti Babilonia ket puorannanto.

3 Dikanto makalisi. Matiliw ken mayawatkanto kenkuana. Makitamto iti rupanrupa ket makasaomto a personal sakanto mapan idiay Babilonia.

4 Denggem, Ari Zedekias, ti ibaga ni Yahweh kenka. Saankanto a matay iti kampilan.

5 Natalnanto ti ipapataymo. Kas iti panangpuor dagiti tattao iti insenso idi itanemda dagidi ammam a nagari nga immun-una ngem sika, kastanto met ti panangpuorda iti insenso a maipaay kenka. Dung-awandakanto a kunkunada, ‘Natayen ti arimi!’ Siak, ni Yahweh, ti nagsao iti daytoy.”

6 Imbagak amin dagitoy ken ni Ari Zedekias idiay Jerusalem

7 idi rarauten ti ari ti Babilonia ti siudad. Gubgubaten pay ti armadana ti Laquis ken Azeka, dagiti kakaisuna a nabati a nasarikedkedan a siudad ti Juda.

Dagiti Tagabu nga Israelita

8 Adda katulagan idi nga inaramid ni Ari Zedekias kadagiti taga-Jerusalem a wayawayaanda

9 dagiti tagabuda. Nagnunumoan amin a tattao ken dagiti panguloda a wayawayaanda dagiti tagabuda a Hebreo, lalaki man wenno babai, tapno awan ti siasinoman nga adda tagabuna a padana nga Israelita.

10 Nagnunumoan amin dagiti tattao ken dagiti panguloda a wayawayaanda dagiti tagabuda. Pudno a winayawayaanda dagiti tagabuda,

11 ngem iti saan a nabayag, nagbaliw ti panunotda. Innalada dagiti tagabuda ket pinilitda a tinagabu manen ida.

12 Isut’ gapuna a kinuna tiApo

13 a Dios ti Israel nga ibagak kadagiti tattao, “Nakitulagak kadagidi kapuonanyo idi iruarko ida idiay Egipto a nakatagabuanda. Imbagak kadakuada

14 akada pito a tawen, wayawayaanda ti siasinoman a padada a Hebreo a nagserbi kadakuada iti innem a tawen. Ngem didak impangag wenno inkaskaso dagidi kapuonanyo.

15 Iti saan pay a nabayag, nagbabawikayo ket inaramidyo ti pakaragsakak. Nagnunumoanyo amin a wayawayaan dagiti padayo a Hebreo ket nagtutulagkayo iti imatangko iti uneg ti Templo a nabangon a pagdaydayawan iti naganko.

16 Ngem nagbabawikayo manen ket imbabaindak. Dakay amin, innalayo met laeng dagiti tagabu a winayawayaanyo ket pinilityo a tinagabu manen ida.

17 Iti kasta, siak, ni Yahweh, kunak kadakayo a saandak a tinungpal. Saanyo a winayawayaan dagiti padayo a Hebreo. Ala ngarud, ikkankayo iti wayawayayo; wayawaya a matay iti gubat, angol ken bisin. Pagbutngekto amin a nasion iti lubong gapu iti aramidko kadakayo.

18-19 Nakitulag kaniak dagiti pangulo ti Juda ken ti Jerusalem agraman dagiti ofisiales ti palasio, dagiti papadi ken dagiti amin a tattao iti daytoy a daga babaen ti pannagnada iti nagbaetan ti dua a kagudua ti toro a baka a pinagguduada. Ngem sinalungasingda ti nagtutulaganmi ket saanda a tinungpal dagiti alagadenna. Iti kasta, aramidekto kadagitoy a tattao ti kas iti inaramidda iti toro.

20 Yawatkonto ida kadagiti kabusorda, kadagiti agpanggep a mangpapatay kadakuada. Kanento dagiti tumatayab ken animal dagiti bangkayda.

21 Yawatkonto met ni Zedekias ken dagiti ofisialesna kadagiti kabusorda nga agpanggep a mangpatay kadakuada. Yawatkonto ida iti armada ti Babilonia a nagsardengen a manggubgubat kadakayo.

22 Ibilinkonto nga agsublida iti daytoy a siudad. Rauten, parmeken ken puorandanto. Pagbalinekto a kas iti let-ang dagiti il-ili ti Juda nga awan ti agnaed. Siak, ni Yahweh, ti nagsao iti daytoy.”

Ni Jeremias ken dagiti Recabita

1 Idia ni Jehoyakim nga anak ni Josias ti ari idiay Juda, kinuna tiApokaniak,

2 “Inka kasarita ti kapuonan dagiti Recabita. Kalpasanna, ipanmo ida iti maysa a kuarto ti Templo ket ikkam ida iti arak.”

3 Iti kasta, innalak ti amin a kameng dagiti Recabita—ni Jaazanias (nga anak ti sabali a Jeremias ken apoko ni Habasinias) ken amin a kakabsat ken annakna a lallaki.

4 Impanko ida iti Templo, iti kuarto dagiti annak ni Hanan nga anak ni Igdalias. Asideg daytoy iti kuarto dagiti ofisiales ket adda iti ngatoen ti kuarto ni Maaseyas nga anak ni Sallum. Maysa kadagiti kangatoan nga ofisial iti Templo ni Maaseyas.

5 Pinasangoak dagiti Recabita kadagiti baso ken harra a napno iti arak, ket imbagak nga uminumda.

6 Ngem insungbatda, “Saankami nga umin-inum iti arak. Ngamin, binilinnakami daydi Jonadab nga anak ni Recab a nagtaudanmi a pulos a dikam uminum iti arak, uray pay dagiti annakmi.

7 Imbilinna pay a saankami nga agbalay, wenno agtalon, agmula wenno gumatang iti kaubasan. Imbilinna nga agnaedkami iti tolda iti unos ti panagbiagmi tapno agbayagkami iti daga a pagnaedanmi a kas ganggannaet.

8 Tinungtungpalmi amin nga imbilin ni Jonadab. Pulos a dikami umin-inum iti arak, uray pay dagiti assawa ken annakmi.

9 Saankami nga agbangon iti balay ket awan ti kaubasan, talon wenno bin-imi.

10 Agnaedkami kadagiti tolda. Napasnekkami a nangtungpal iti amin a bilin ni amami a Jonadab.

11 Ngem idi rinaut ni Nebucadnesar nga ari ti Babilonia daytoy a daga, inkeddengmi ti umay agnaed ditoy Jerusalem tapno mapanawanmi ti armada ti Babilonia ken ti Siria. Daytoy ti gapuna nga agnaedkami ditoy Jerusalem.”

12-13 Kalpasanna, imbaga tiApoa Mannakabalin-amin a Dios ti Israel nga innak ibaga daytoy kadagiti tattao ti Juda ken Jerusalem: “Siak, ni Yahweh, saludsodek no apay a saandak nga impangag ken saanyo a tinungpal ti pannursurok.

14 Nagtulnog dagiti kaputotan ni Jonadab iti imbilinna a saanda nga uminum iti arak. Agpapan ita, awan kadakuada ti uminum iti arak. Saanko nga insardeng ti panagsaok kadakayo ngem saandak a tinungpal.

15 Saanko nga insardeng ti panangibaonko kadagiti adipenko a profeta. Imbagbagada kadakayo nga isardengyo ti dakes nga aramidyo ket agaramidkayo iti naimbag. Binallaagandakayo a saankayo nga agdaydayaw ken agserserbi kadagiti sabali a dios tapno agtultuloy ti panagnaedyo iti daga nga intedko kadagidi kapuonanyo. Ngem saandak nga impangag wenno inkaskaso.

16 Tinungpal dagiti kaputotan ni Jonadab dagiti bilbilin ti amada, ngem dakayo saandak a tinungpal.

17 Iti kasta, siak, ni Yahweh a Mannakabalin-amin a Dios ti Israel, idissuorkonto kadakayo a tattao ti Juda ken ti Jerusalem dagiti amin nga inkarik a pannakadadael. Aramidekto daytoy agsipud ta didak impangag ken didak sinungbatan idi inawagankayo.”

18 Ket imbagak kadagiti kaputotan ni Recab ti sao ni Yahweh a Mannakabalin-amin a Dios ti Israel, “Tinungpalyo ti bilin kadakayo ni Jonadab a kapuonanyo. Sinurotyo dagiti amin a pannursurona ket inaramidyo dagiti amin nga imbilinna kadakayo.

19 Iti kasta, siak, ni Yahweh a Mannakabalin-amin a Dios ti Israel, ikarik nga addanto latta lalaki nga agserbi kaniak iti kaputotan ni Jonadab nga anak ni Recab.”

Basaen ni Baruc ti Pagbasaan iti Templo

1 Idimaikapat a tawen a panagari ni Jehoyakim nga anak ni Josias idiay Juda, kinuna kaniak tiApo,

2 “Mangalaka iti pagsuratan ket isuratmo amin nga imbagak kenka a maibusor iti Israel, iti Juda ken kadagiti amin a nasion. Isuratmo amin nga imbagak kenka manipud idi damo a pannakisaok kenka, idi ni Josias ti ari, agingga ita.

3 Nalabit nga inton mangngeg dagiti tattao ti Juda dagiti amin a didigra a pinanggepko nga idissuor kadakuada, agbalbaliwda ket ikkatenda dagiti amin a dakes a kababalinda. Iti kasta, pakawanekto ti kinadakes ken basolda.”

4 Inayabak ngarud ni Baruc nga anak ni Nerias. Indiktarko kenkuana dagiti amin nga imbaga tiApokaniak, ket insuratna amin ida iti pagsuratan.

5 Kalpasanna, imbilinko kenkuana, “Saanakon a mapalubosan a sumrek iti Templo.

6 Ngem kayatko a mapanka sadiay inton sumaruno a panagayunar dagiti tattao ket ipigsam a basaen daytoy nalukot a pagbasaan a nangisuratam iti indiktarko kenka tapno mangngegda dagiti amin nga imbaga tiApokaniak. Aramidem daytoy iti lugar a mangngeg dagiti amin a tattao agraman dagiti taga-Juda a naggapu kadagiti il-ilida.

7 Mabalin nga agkararagdanto itiApoket idiandanton dagiti dakes nga aramidda, ta no saan agdissuor kadakuada ti napalalo a pungtot ken ungetna.”

8 Imbasa ni Baruc idiay Templo dagiti amin nga imbaga tiApokas imbilinko nga aramidenna.

9 Iti maikasiam a bulan ti maikalima a tawen a panagari idiay Juda ni Jehoyakim nga anak ni Josias, nagayunar dagiti tattao tapno magun-odda ti parabur ni Yahweh. Inaramid daytoy dagiti amin nga agnaed idiay Jerusalem ken amin a naggapu kadagiti il-ili ti Juda.

10 Kalpasanna, binasa ni Baruc ti nalukot a pagbasaan a nakailanadan iti amin nga insaok. Dumdumngeg dagiti tattao bayat ti panagbasana. Inaramidna daytoy iti Templo, iti kuarto ni Gemarias nga anak ni Safan a mammagbaga iti ari. Adda ti kuartona iti akingngato a tukad iti serkan ti Baro a Ruangan ti Templo.

Maibasa ti Nalukot a Pagbasaan kadagiti Ofisiales

11 Nangngeg ni Mikaias nga anak ni Gemarias ken apoko ni Safan ti panangbasa ni Baruc iti sao ni Yahweh a nailanad iti nalukot a pagbasaan.

12 Napan iti palasio ket simrek iti kuarto ti mammagbaga iti ari nga ayan dagiti ofisiales a madama nga agmimiting. Adda sadiay ni Elisama a mammagbaga iti ari, ni Delaias nga anak ni Semaias, ni Elnatan nga anak ni Acbor, ni Gemarias nga anak ni Safan, ni Zedekias nga anak ni Hananias ken dagiti amin nga ofisiales.

13 Impakaammo ni Mikaias dagiti amin a nangngegna nga imbasa ni Baruc kadagiti tattao.

14 Iti kasta, imbaon dagiti ofisiales ni Jehudi a mangibaga ken ni Baruc nga ipanna kadagiti ofisiales ti pagbasaan a binasana kadagiti tattao. (Ni Jehudi ti anak ni Netanias ken apoko ni Selemias, ken apoko ni Cusi iti tumeng.) Impan ni Baruc ti pagbasaan kadakuada.

15 “Agtugawka,” kinunada, “ket ibasam kadakami.”

Binasa ni Baruc ti nalukot a pagbasaan.

16 Kalpasan ti panangbasana, nagkikinnitada a sidadanag ket kinunada ken ni Baruc, “Masapul nga ibagami daytoy iti ari.”

17 Sinaludsodda kenkuana, “Ibagam man kadakami no kasano ti panangisuratmo kadagitoy. Indiktar kadi ni Jeremias kenka?”

18 “Wen,” insungbat ni Baruc. “Indiktar ni Jeremias ti amin nga insuratko iti daytoy a pagbasaan.”

19 Imbagada kenkuana, “Masapul nga aglemmengkayo, sika ken ni Jeremias, ket diyo ibaga iti siasinoman no sadino ti paglemmenganyo.”

Puoran ti Ari ti Nalukot a Pagbasaan

20 Inkabil dagiti ofisiales ti nalukot a pagbasaan iti kuarto ni Elisama a mammagbaga sada napan iti paraangan ti palasio ket imbagada amin iti ari.

21 Pinaala ti ari ti nalukot a pagbasaan ken ni Jehudi iti kuarto ni Elisama. Imbasa ni Jehudi iti ari ken kadagiti amin nga ofisiales nga agtatakder iti lawlawna.

22 Tiempo ti lam-ek idi ket agtugtugaw ti ari iti asideg ti paginudoan iti palasio a pagnanaedanna iti tiempo ti lam-ek.

23 Kada mabasa ni Jehudi ti tallo wenno uppat a binnatog, ragasen ti ari ti nabasa babaen iti bassit nga imuko sana ipurruak iti apuy ti paginudoan. Kasta a kasta ti naaramid agingga a napuoran ti entero a pagbasaan.

24 Ngem saan latta a nagbuteng wenno nagbabawi ti ari ken dagiti ofisialesna a nakangngeg iti amin a naibasa.

25 Nupay nagpakpakaasi da Elnatan, Delaias ken Gemarias a saanna a puoran ti pagbasaan, dina inkaskaso ida.

26 Kalpasanna, binilin ti ari ni prinsipe Jerameel, agraman ni Seraias nga anak ni Azriel, ken ni Selemias nga anak ni Abdeel a tiliwendakami ken ni Baruc a sekretariok. Ngem inlemmengnakami tiApo.

Mangsurat ni Jeremias iti Sabali a Nalukot a Pagbasaan

27 Kalpasan ti panangpuor ni Ari Jehoyakim iti nakaisuratan ti indiktarko ken ni Baruc, imbaga tiApokaniak

28 a mangalaak iti sabali a pagsuratan. Imbagana nga isuratko dagiti amin a nailanad iti umuna a pagbasaan.

29 Imbilinna nga ibagak iti ari, “Pinuoram ti pagbasaan. Sinaludsodmo ken ni Jeremias no apay nga insuratna nga umay ti ari ti Babilonia ket dadaelenna daytoy a daga ken papatayenna dagiti tattao ken animal.

30 Siak, ni Yahweh, kunak kenka, Ari Jehoyakim, nga awanto kadagiti kaputotam ti agari. Maipurruakto ti bangkaymo iti lugar a mainitan iti aldaw ken malinnaawan iti rabii.

31 Dusaenkanto ken dagiti kaputotam agraman dagiti ofisialesmo gapu kadagiti basolyo. Awan kadakayo kasta met kadagiti taga-Jerusalem ken taga-Juda, ti nangipangag kadagiti ballaagko kadakayo. Iti kasta, idissuorkonto kadakayo ti amin a didigra nga imbagak a mapasamakyonto.”

32 Nangalaak iti sabali a nalukot a pagbasaan. Intedko ken ni Baruc a sekretariok ket insuratna ti amin nga imbagak. Insuratna dagiti amin a nailanad iti umuna a nalukot a pagbasaan ken amin nga umasping a mensahe nga indiktarko.

Ti Dawat ni Zedekias ken ni Jeremias

1 Insaadni Nebucadnesar nga ari ti Babilonia ni Zedekias nga anak ni Josias a kas sukat ni Jeconias nga anak ni Jehoyakim a kas ari ti Juda.

2 Ngem saan nga impangag ni Zedekias wenno dagiti ofisiales wenno dagiti tattao ti mensahe nga imbaga kaniak ni Yahweh.

3 Imbaon ni Ari Zedekias ni Jehucal nga anak ni Selemias ken ni Sofonias a padi nga anak ni Maaseyas, nga umay kaniak ket kiniddawda nga agkararagak ken ni Yahweh a Diosmi para iti pagilianmi.

4 Diak pay naibalud idi ket nawayaak pay laeng a makilangen kadagiti tattao.

5 Madama idi ti panangdarup ti armada ti Babilonia iti Jerusalem ngem nagsanudda idi maammoanda a rimmuar ti armada ti Faraon idiay Egipto.

6 Kinuna ti Apo aDiosti Israel

7 nga ibagak ken ni Zedekias, “Adda iti dalan ti armada ti Egipto nga umay tumulong kenka ngem agawidto met laeng.

8 Agsublinto met dagiti taga-Babilonia. Rautendanto ti siudad. Parmeken ken puorandanto.

9 Siak, ni Yahweh, ballaaganka. Dimo allilawen ta bagim. Dimo ipagarup a saanen nga agsubli dagiti taga-Babilonia, ta umaydanto nga umay.

10 Uray no maparmekyo ti entero nga armada ti Babilonia a mangdarup kadakayo, ket dagitinto la nasugatan nga agid-idda kadagiti toldada ti matda, isudanto ti mangparmek iti daytoy a siudad ket puoranda agingga a dumapu.”

Matiliw ken Maibalud ni Jeremias

11 Gapu ta dumtengen ti armada ti Egipto, nagsanud ti armada dagiti taga-Babilonia manipud Jerusalem.

12 Ngarud, nagrubbuatak a rummuar idiay Jerusalem tapno innak iti sakup ti Benjamin ket alaek ti pannakabingayko iti sanikua ti familiami sadiay.

13 Ngem idi makadanonak iti Ruangan ti Benjamin, pinasardengnak ti ofisial dagiti soldado nga agbambantay sadiay. Isu ni Irijas nga anak ni Selemias ken apoko ni Hananias. Kinunana, “Tumiponka gayam kadagiti taga-Babilonia!”

14 “Saan!” insungbatko. “Saanak a tumipon kadakuada.”

Ngem dinak impangag ni Irijas. Tiniliwnak sanak indatag kadagiti ofisiales.

15 Nakapungtotda kaniak ket pinakabkabildak; kalpasanna, pinaipupokdak iti balay ni Jonatan a mammagbaga iti ari. Pinagbalinda a pagbaludan ti balayna.

16 Naipanak iti pagbaludan iti uneg ti daga ket nabayag a naipupokak sadiay.

17 Pinaayabannak ni Zedekias ket idi addaakon iti palasio, nagsaritakami a dudua. “Adda kadi ibaga tiApo?” sinaludsodna.

“Adda,” insungbatko. “Mayawatkanto iti pannakabalin ti ari ti Babilonia.”

18 Sinaludsodko, “Apay a pinaibaludnak? Ania aya ti basolko kenka wenno kadagiti ofisialesmo wenno kadagiti tattao?

19 Sadino ti ayan dagiti profetam a nagkuna a saan nga umay dagiti taga-Babilonia tapno darupendaka wenno daytoy a daga?

20 Ita, agdawatak kenka, Natan-ok nga Ari. Patgam koma ti dawatko. Saannak a paisublin iti balay ni Jonatan. No isublinak matayak la ketdi sadiay.”

21 Iti kasta, pinaipupoknak ni Zedekias iti paraangan ti pagguardiaan. Nagyanak sadiay, ket inaldaw a naikkanak iti tinapay no la ketdi adda tinapay idi kadagiti panaderia.