Month: March 2020

Madadael ti Moab

1 Daytoyti kinuna ni Yahweh a Mannakabalin-amin maipapan iti Moab:

“Asi pay dagiti tattao ti Nebo—

nadadaelen ti ilida!

Naparmeken ti Kiriataim,

narban ti nabileg a sarikedkedna.

Naibabainen dagiti tattaona,

2 awanen ti dayag ti Moab.

Sinakup dagiti kabusor ti Hesbon,

ket nagtutulagda a dadaelenda ti nasion ti Moab!

Mapaulimekto ti ili a Dibon;

rautento dagiti kabusor.

3 Ipukkaw dagiti taga-Horonaim,

‘Anian a panagranggas!

Anian a panagdadael!’

4 “Nadadaelen ti Moab;

denggenyo dagiti ubbing nga agsasangit.

5 Denggenyo ti an-anug-ogda

iti sang-atan nga agpa-Luhit.

Denggenyo ti nasaem a sangsangit ti panagsagaba,

iti salogan nga agpa-Horonaim.

6 ‘Agtaraykayo! Isalakanyo ti bagiyo!’ kunada.

‘Agtaraykayo a kasla atap nga asno iti let-ang!’

7 “Moab, nagtalekka idi iti pigsa ken kinabaknangmo,

ngem uray sika maipanawkanto.

Maitalawto ni Kemos a didiosen,

agraman dagiti prinsipe ken papadina.

8 Awanto ti ili a makalisi iti pannakadadael;

agpadpadanto a madadael ti tanap ken ti patad.

Siak, ni Yahweh ti nagsao.

9 Ikkanyo ti Moab iti payak tapno agtalaw.

Aglangalangto dagiti il-ilina,

ket awanton ti agnaed kadakuada.”

(

10 Mailunod ti tao a saan a mangipapuso nga agtrabaho iti aramid ni Yahweh. Mailunod ti tao a saan a mangaramat iti kampilanna nga agpapatay!)

Madadael dagiti Siudad ti Moab

11 Kuna ni Yahweh, “Kanayon a natalged idi ti panagbiag ti Moab. Pulos a saan a naitalaw a kas balud. Kasla arak a nagarinsaed ket saan a nagargaraw. Saan a nayal-alis kadagiti burnay. Saan a nagbaliw ti ingelna ken ti sigud a ramanna.

12 “Ngem, dumtengen ti tiempo a panangibaonko kadagiti tattao a mangibukbok iti Moab a kasla arak. Ipakbodanto amin ti arak ket burakburakenda pay dagiti burnay a nagyananna.

13 Maupayto dagiti Moabita ken ni Kemos a didiosenda a kas iti pannakaupay dagiti Israelita ken ni Betel a didiosen a nagtalkanda.

14 Apay a kunayo a bannuarkayo, lallaki ti Moab,

natutured a soldado a natenneb iti gubat?

15 Nadadaelen ti Moab ken dagiti siudadna,

narangrangkayen dagiti kalaingan nga agtutubona.

Daytoy ti sao ti Ari, ni Yahweh a Mannakabalin-amin.

16 Asidegen ti panungpalan ti Moab;

dandanin ti pannakarbana.

17 “Sangitanyo dayta a nasion, dakayo a kaarrubana,

dakay amin a mangbigbig kenkuana.

Kunayo, ‘Nagpatinggan ti mannakabalin a turayna;

awanen ti dayag ken bilegna.’

18 Dakayo nga agnanaed idiay Dibon,

bumabakayo iti nadayag a saadyo, ket agdalupisakkayo iti tapok.

Adda ditoyen ti mangdadael iti Moab,

rinebbekna dagiti sarikedkedna.

19 Dakayo nga agnanaed idiay Aroer,

agtakderkayo iti igid ti kalsada ket aguraykayo;

saludsodenyo iti siasinoman nga aglibas no ania ti napasamak.

20 ‘Naparmeken ti Moab,’ kunadanto.

‘Sangitanyo ta naibabainen.

Ipakaammoyo kadagiti lugar iti igid ti Karayan Arnon

a nadadaelen ti Moab.’

21 “Dimtengen ti pannakaukom dagiti siudad iti tanap: ti Holon, Jaza, Mefat,

22 Dibon, Nebo, Bet-diblataim,

23 Kiriataim, Bet-gamul, Bet-meon,

24 Keriot ken Bozra. Dimtengen ti pannakaukom dagiti amin a siudad ti Moab nga adda iti adayo wenno asideg.

25 Naparmeken ti bileg ti Moab. Nadadaelen ti pannakabalinna. Siak, ni Yahweh, ti nagsao iti daytoy.”

Maparmek ti Moab

26 Kinuna ni Yahweh, “Bartekenyo ti Moab agsipud ta sinukirnak. Aglugnakto iti mismo a saruana ket katawaanto dagiti tattao.

27 Moab, malagipmo ti panangrabrabakmo idi kadagiti Israelita? Imbilangmo ida a kasla ketdin tiniliw ida ti bunggoy dagiti tulisan.

28 “Dakayo nga agnaed iti Moab, panawanyon dagiti il-iliyo! Inkay agnaed kadagiti rangrangkis! Tuladenyo ti kalapati nga agumok kadagiti rangrangkis.

29 Natangsit unay ti Moab! Nadamagko ti kinatangsit, kinapalangguad ken kinakuspag dagiti tattaona. Nangato ti pangipagpagarupanda iti bagida.

30 Siak, ni Yahweh, ammok ti kinapalangguadda. Awan serserbi ti kinapangasda ket saanto nga agbayag dagiti aramidda.

31 Iti kasta, dung-awakto ti entero a Moab ken dagiti tattao ti Kirheres.

32 Ad-addanto a dung-awak dagiti taga-Sibma ngem dagiti taga-Jazer. Siudad a Sibma, kaska la lanut a bumallasiw ti sangana iti Natay a Baybay ket dumanon idiay Jazer. Ngem ita, nadadaelen dagiti bungbungam iti kalgaw ken dagiti ubasmo.

33 Awanen ti ragsak ken rag-o iti nadam-eg a daga ti Moab. Saanen nga agayus ti arak ti pagpespesan iti arak. Awanen ti agaramid iti arak ken umkis iti rag-o.

34 “Agsangit dagiti tattao ti Hesbon ken Eleale. Mangngeg ti sangsangitda agingga idiay Jaaz. Mangngeg met dagiti adda idiay Zoar, idiay Horonaim ken idiay Baro nga Eglat. Nagmaga payen ti Waig Nimrim.

35 Pasardengekto dagiti tattao ti Moab nga agidatag iti daton a mapuoran kadagiti nangato a lugar, ken agidaton iti sakrifisio kadagiti didiosenda. Siak, ni Yahweh, ti agsasao.

36 “Iti kasta, agladingit toy pusok gapu iti Moab ken kadagiti tattao ti Kirheres; arigko iti maysa nga agtuktokar iti kanta ti pumpon agsipud ta napukaw aminen a sanikuada.

37 Nagpakuskos ti tunggal maysa ket nagibarbasda. Sinugsugatda dagiti imada. Nagarruatda iti nakersang a lupot a mangipakita iti panagbabawida.

38 Pasig a dung-aw ti mangngeg iti tuktok dagiti balbalay ken kadagiti kalkalsada ta binurakko ti Moab a kasla burnay nga awan mangipateg.

39 Narpuogen ti Moab. Agdung-awkayo! Inlingednan ti rupana gapu iti bain. Nadadaelen ket pagang-angawanen dagiti kabangibangna a nasion. Siak, ni Yahweh, ti agsasao.”

Saan a Makalisi ti Moab iti Pannakadusana

40 Inkari ni Yahweh nga addanto nasion a kasla agila a mangsippayot iti Moab.

41 Sakupennanto dagiti il-ili ken sarikedkedna. Iti dayta nga aldaw, agdanagto dagiti soldado ti Moab a kasla iti panagdanag ti agpasikal.

42 Madadaelto ti Moab ket saanton a nasion agsipud ta sinukirnak.

43 Pammutbuteng, abut ken palab-og ti naisagana kadagiti tattao ti Moab. Daytoy ti sao ni Yahweh.

44 Inkeddengkon ti pannakadadael ti Moab. Ti makalisi iti pammutbuteng matnagto iti abut. Ti makaruar iti abut, maipalab-ogto.

45 Agkamang idiay Hesbon dagiti nakakaasi a nagbakwit. Ngem uray ti siudad ti Hesbon nga inturayan idi ni Ari Sihon, maur-uramen. Napuoranen dagiti beddeng ken dagiti kabambantayan dagiti Moabita a naayat iti gubat.

46 Asi pay dagiti taga-Moab! Nadadaelen dagiti nagdaydayaw ken ni Kemos. Naitalaw dagiti annakda ket naipanda a kas balud iti sabali a daga.

47 Ngem iti masakbayan, parang-ayento manen ni Yahweh ti Moab. Amin dagitoy ket imbaga ni Yahweh a mapasamak iti Moab.

Ukomen ni Yahweh dagiti Ammonita

1 Daytoyti sao ni Yahweh a maibusor iti Ammon: “Ayan dagiti lallaki nga annak ti Israel? Awan kadi kadakuada ti mangsalaknib iti dagada? Apay a pinalubosanda dagiti agdaydayaw ken ni Milcom a mangtagikua iti sakup ti tribu ti Gad ket agnaedda sadiay?

2 Ngem dumtengen ti tiempo a pannakangngeg dagiti tattao ti Rabba iti ikkis ti gubat. Madadaelto ti siudad ken agbalin a rebrebba ket mapuoranto agingga a dumapu dagiti barbarriona. Kalpasanna, mapasublinto met laeng dagiti Israelita ti naagaw a dagada.

3 Agsangitkayo, dakayo a taga-Hesbon. Nadadaelen ti Ai a siudadyo. Agdung-awkayo, dakayo a babbai a taga-Rabba! Agpanes ken agsangitkayo. Agtaraykayo a diyo ammo ti turturongenyo, ta maitalawto ni didiosenyo a Milcom agraman dagiti papadi ken prin sipena.

4 “Apay nga agpasindayagkayo, babbai nga awanan pammati? Kumapkapsutkayon. Apay nga agtalgedkayo iti kinabaknangyo ket kunayo nga awan ti makaitured a dumarup kadakayo?

5 Yegkonto ti pagbutnganyo iti aglawlaw. Agtataraykayto amin a mangikaluya iti biagyo. Awanto ti mangurnos kadagiti soldadoyo.

6 “Ngem iti kamaudianna, parang-ayekto manen dagiti Ammonita. Siak, ni Yahweh, ti nagsao iti daytoy.”

Ti Panangukom ni Yahweh iti Edom

7 Daytoyti kinuna ni Yahweh a Mannakabalin-amin maipapan iti Edom: “Napukaw kadin dagiti taga-Edom ti husto a panagpampanunotda? Saanen aya a kabaelan dagiti masirib nga ibaga ti aramidenda? Napukawdan aya dagiti siribda?

8 Tattao ti Dedan, agsubli ken agtaraykayo! Inkay aglemmeng! Dadaelekto dagiti kaputotan ni Esau agsipud ta dimtengen ti tiempo a dusaek ida.

9 No agburas dagiti tattao iti ubas, mangiteddada iti bunga iti sanga ket dagiti agtakaw iti rabii, ti laeng kayatda ti alaenda.

10 Ngem linabusak a namimpinsan dagiti kaputotan ni Esau ket linukasak dagiti paglemlemmenganda tapno awanen pagkamanganda. Nadadaelen dagiti tattao ti Edom, dagiti kakabagianda ken dagiti kaarrubada. Awanen ti nabati.

11 Italekyo kaniak dagiti ul-ulila nga annakyo ta taripatoek ida. Mabalindak a pagtalkan dagiti babbai a balo nga adda iti sidongyo.

12 “No uminum iti kopa ti pannakadusa dagiti saan a rumbeng a madusa, dakayto la ketdin? Dusaenkayto a dusaen. Masapul nga uminumkayo iti kopa ti pannakadusa!

13 Siak a mismo ti agsapata nga agbalinto ti siudad ti Bozra a nakabutbuteng ken langalang. Pagang-angawanto dagiti tattao ket pagilunoddanto ti naganna. Agnanayonto a rebrebba ti amin a kabangibang a barriona. Siak, ni Yahweh, ti nagsao iti daytoy.”

14 Kinunak, “Edom, adda mensahe kaniak tiApo. Nangibaon iti mapan kadagiti nasion a mangipakaammo kadakuada nga ummongenda dagiti buyotda ket agsaganada a mangraut kenka.

15 Pagkapsutennakayto tiApoket awanto ti mangraem kadakayo.

16 Natangsitkayo! Daytoy ti mangallilaw kadakayo. Ipagarupyo nga adda agbuteng kadakayo ngem awan a pulos! Agnaedkayo kadagiti kabatoan a rangrangkis, iti tapaw dagiti bambantay; ngem uray no kas iti kangato ti umok ti agila ti pagnaedanyo, ipababanakayto tiApo. Daytoy ti sao tiApo.”

17 Kinuna ni Yahweh, “Nakaam-amakto ti pannakadadael ti Edom, ket makigtot ken agbutengto dagiti amin nga aglabas a makakita iti amin a napasamak kenkuana.

18 Madadaeltoti Edom a kas iti pannakadadael ti Sodoma ken Gomorra ken dagiti kabangibangda nga il-ili. Awanton ti agnaed sadiay. Daytoy ti sao ni Yahweh.

19 Umayakto a kas iti leon a rummuar iti nasamek a bakir a mapan iti nalangto a pagaraban iti abay ti Karayan Jordan. Kellaatekto a kamaten dagiti Edomita ket agtataraydanto a mangpanaw iti dagada. Iturayanto ida ti piliek a pangulo. Siasino ti kas kaniak? Siasino ti kumarit kaniak? Siasino ti agturay a bumusor kaniak?

20 “Ngarud, denggenyo ti planok a maibusor kadagiti Edomita ken kadagiti agnaed iti siudad ti Teman. Uray dagiti babassit nga annakda maitalawdanto ket makigtotto ti tunggal maysa.

21 Inton maparmek ti Edom, madayyegto ti daga iti daranudor ti pannakatnagna. Agiikkisto dagiti tattao ket dumanonto ti ikkisda idiay Baybay a Nalabaga.

22 Dumarupto ti kabusor a kasla agila a sumippayot manipud langit. Yukradnanto dagiti payakna a maibusor iti Bozra. Iti dayta nga aldaw, agdanagto dagiti soldado ti Edom, kas iti babai nga agpaspasikal.”

Ti Panangukom ni Yahweh iti Damasco

23 Daytoyti kinuna ni Yahweh maipapan iti Damasco: “Madanagan ken maringgoran dagiti tattao kadagiti siudad ti Hamat ken Arpad. Ngamin, nakangngegda iti dakes a damag. Kasla baybay ti butengda a nanglemmes kadakuada. Saanda a makatalna.

24 Agkakapsut dagiti taga-Damasco ket agtatarayda iti kigtotda. Marigatan ken madanaganda a kas iti agpasikal.

25 Namimpinsan a nabaybay-an dayta agdindinamag ken naragsaka siudad.

26 Ngarud, iti dayta nga aldaw, mapapatayto dagiti amin nga agtutubo a lallaki ken dagiti soldado kadagiti lansangan ti siudad.

27 Puorakto dagiti bakud ti Damasco ket dumapunto dagiti palasio ni Ari Benhadad. Daytoy ti kuna ni Yahweh a Mannakabalin-amin.”

Maukom ti Tribu ti Kedar ken ti Hazor

28 Daytoy ti kinuna ni Yahweh maipapan iti tribu ti Kedar ken dagiti agtuturay iti siudad ti Hazor a pinarmek ni Nebucadnesar nga ari ti Babilonia: “Rautenyo dagiti taga-Kedar. Dadaelenyo ti tribu dagiti taga-daya!

29 Alaenyo dagiti toldada, dagiti arbanda, dagiti kurtina ken dagiti amin nga alikamenda. Alaenyo dagiti kamelioda. Ibagayo kadagiti tattao nga adda nakabutbuteng iti amin nga aglawlawda.

30 “Tattao ti Hazor, pakdaarankayo! Siak ni Yahweh. Inkay aglemmeng iti adayo. Adda dakes a panggep ni Nebucadnesar nga ari ti Babilonia, ket kastoy ti kunana,

31 ‘Umaykayo! Rautentayo dagita a tattao nga agbibiag a sitatalna ken sitatalged. Awan rikep ken balunet dagiti ruangan ti siudadda ket awan salaknibda.’

32 “Samsamenyo dagiti kamelio ken amin a bakada. Iwarawarakto iti amin a lugar dagiti tattao nga agpukis iti ababa. Didigraekto ida iti amin a suli.

33 Agbalinto a disierto ti Hazor iti agnanayon, lugar a dagiti laeng atap nga animal ti agnaed. Awanton ti agnaed sadiay. Siak, ni Yahweh, ti nagsao iti daytoy.”

Ti Pannakaukom ti Elam

34 Idi mangrugi ti panagari ni Zedekias idiay Juda, nagsao kaniak tiApoa Mannakabalin-amin maipapan iti daga ti Elam.

35 Kinunana, “Parmekekto amin a lallaki a pumapana a nangpabileg iti Elam.

36 Paganginekto iti napigsa iti amin a suli idiay Elam. Iwarawarakto dagiti tattao iti amin a disso agingga a pagbakwitan dagiti tattao ti amin a lugar.

37 Pagbutngekto dagiti taga-Elam. Kabutengdanto dagiti kabusorda nga agpanggep a mangpapatay kadakuada. Idissuorkonto kadakuada ti napalalo a pungtotko. Ibaonkonto dagiti armada agingga a maikisapda.

38 Papatayekto dagiti ari ken dagiti pangulo ti Elam ket ipasdekkonto ti tronok sadiay.

39 Ngem iti kamaudiananna, parang-ayekto manen dagiti tattao ti Elam. Siak, ni Yahweh, ti nagsao iti daytoy.”

Ti Pannakaparmek ti Babilonia

1 Daytoyti impakaammo kaniak tiApomaipapan iti Babilonia ken kadagiti tattaona:

2 “Ipakaammom ti damag kadagiti nasion! Iwaragawagmo!

Itedmo ti pagilasinan ket iwarasmo ti damag!

Dimo ilimlimed!

Naparmeken ti Babilonia!

Naibabainen ni Bel!

Naburburaken ni Marduk a didiosenna!

Naibabainen dagiti imahen,

narumrumeken dagiti didiosenna.

3 “Immay ti maysa a nasion a taga-amianan tapno rautenna ti Babilonia ket paglangalangennanto. Agtatarayto nga agtalaw dagiti tattao ken dagiti animal, ket awanton ti agnaed sadiay.”

Ti Panagsubli ti Israel

4 Kuna ni Yahweh, “Inton dumteng dayta a tiempo, agsasangitto dagiti tattao ti Israel ken Juda a mangsapul kaniak a Diosda.

5 Agdamagdanto no sadino ti dalan nga agpa-Sion ket surotenda. Makitulagdanto kaniak iti mataginayon a tulag, ket pulos a didanto salungasingen.

6 “Mayarig dagiti tattaok kadagiti napukaw a karnero. Binaybay-an ida dagiti pastorda nga agkalkallautang kadagiti bambantay. Nagalla-allada a kasla karnero ket nalipatandan ti ayan ti balayda.

7 Darupen ida dagiti makasarak kadakuada. Kuna dagiti kabusorda, ‘Saan a dakes ti inaramidtayo ta nagbasolda itiApo. Nagtalek dagidi kapuonanda itiApoket rebbengda koma ti nagtalinaed a sipupudno kenkuana.’

8 “Panawanyoti Babilonia, dakayo nga Israelita! Pumanawkayo iti dayta a daga! Dakayo ti umuna a pumanaw!

9 Tignayek ti bunggoy dagiti nabileg a nasion iti amianan. Parautkonto kadakuada ti Babilonia. Agmaymaysadanto a manggubat iti siudad ket parmekendanto. Saan nga agmintis ti panagpanada a kas kadagiti nalaing a mangnganup.

10 Masamsamanto ti Babilonia. Alaento dagiti agsamsam ti amin a kaykayatda. Siak, ni Yahweh, ti agsasao.”

Maparmek ti Babilonia

11 Kuna ni Yahweh, “Dakayo a taga-Babilonia, sinamsamanyo ti nasionko. Agraragsak ken aglagtolagtokayo a sibaballigi, kaslakayo baka nga agir-irik iti trigo wenno kasla kabalio nga aggargaraigi,

12 ngem maibabain ken madadaelto ti siudadyo. Agbalinto ti Babilonia a kanumoan kadagiti amin a nasion. Agbalinto a let-ang. Natikagto nga awan ti danumna.

13 Gapu iti pungtotko, aglangalangto ti Babilonia ket awanto ti agnaed. Mabaybay-anto a narnarba ket makigtot ken masdaawto dagiti amin nga aglabas a makakita iti napasamak kenkuana.

14 “Dakayo a pumapana, agsaganakayo a manggubat iti Babilonia. Lawlawenyo. Ibiatyo amin a panayo iti Babilonia agsipud ta nagbasol ken ni Yahweh.

15 Ipukkawyo ti ikkis ti gubat iti entero a siudad. Simmukon ti Babilonia. Natibbag ken narpuogendagiti bakudna. Balsek dagiti taga-Babilonia. Balsenyo ngarud ida ket aramidenyo kadakuada ti kas iti inaramidda kadagiti sabsabali.

16 Diyo ipalubos nga agmula wenno agapit dagiti tattao. Mabutengto amin a ganggannaet sadiay iti armada a mangraut kadakuada ket agsublidanto kadagiti bukodda a daga.”

Agsubli ti Israel

17 Kuna ni Yahweh, “Mayarig dagiti Israelita iti arban ti karnero a kinamatkamat ken winarawara dagiti leon. Rinangrangkay nga immuna ida ti ari ti Asiria. Kalpasanna, nginutngotan ni Ari Nebucadnesar dagiti tultulangda.

18 Gapu iti daytoy, siak, ni Yahweh a Mannakabalin-amin a Dios ti Israel, dusaekto ni Ari Nebucadnesar ken ti pagilianna a kas iti panangdusak idi iti emperador ti Asiria.

19 Isublikto dagiti Israelita iti dagada. Agpennekdanto a mangan kadagiti agtubo idiay Bantay Carmel ken iti sakup ti Basan, kasta met kadagiti katurturodan ti Efraim ken Galaad.

20 Inton dumteng dayta a tiempo, awanton ti basol a masarakan iti Israel ken ti kinadakes idiay Juda agsipud ta pakawanekto dagiti inispalko a tattao. Siak, ni Yahweh, ti nagsao iti daytoy.”

Ukomen ti Dios ti Babilonia

21 Kuna ni Yahweh, “Rautenyo dagiti tattao iti Merataim ken Pekod. Patayen ken dadaelenyo ida.Aramidenyo amin nga ibilinko kadakayo.

22 Mangngeg ti daranudor ti gubat iti daga. Adda dakkel a pannakadadael.

23 Mayarig ti Babilonia iti dakkel a martilio a nangburak iti entero a lubong. Ita, natukkotukkolen dayta a martilio. Nakigtot dagiti amin a nasion iti napasamak iti Babilonia.

24 Babilonia, binusornak ket natnagka a dimo napuotan iti palab-og nga insaganak nga agpaay kenka.

25 Linuktakon ti pagiduldulinak kadagiti armasko. Iti pungtotko, inruarkon ida agsipud ta adda trabaho nga ileppasko iti Babilonia. Siak ni Yahweh aDiosa Mannakabalin-amin.

26 Darupenyo iti amin a suli ket rakrakenyo dagiti nakaidulinan dagiti trigona. Buntonenyo dagiti sinamsamyo! Rebbekenyo ti siudad! Dikayo mangibati iti uray ania.

27 Papatayenyo dagiti amin a soldadona! Pukawenyo ida! Nasentensiaan a madadael dagiti tattao ti Babilonia! Dimtengen ti tiempo a pannakadusada.”

(

28 Nagkamang idiay Sion dagiti nagtalaw idiay Babilonia ket imbagada ti panangibales tiApoa Diostayo iti dakes nga inaramid ti Babilonia iti Templona.)

29 “Ibagayokadagiti pumapana a rautenda ti Babilonia. Ibaonyo dagiti amin a makaammo nga agpana. Lakubenyo ti siudad! Diyo ipalubos nga adda makalibas. Ibalesyo kenkuana ti amin nga inaramidna kadagiti sabsabali agsipud ta sitatangsit a nangbusor kaniak, siak a Nasantoan ti Israel.

30 Ngarud, iti dayta nga aldaw, mapapatayto dagiti agtutubo a lallaki iti Babilonia kadagiti kalsada ti siudad. Mapasagto amin a soldadona.

31 “Natangsitka, Babilonia, isut’ gapuna a siak nga Apo aDiosa Mannakabalin-amin, busorenka. Dimtengen ti panangdusak kenka.

32 Maitibkol ken matumbakanto, sika a napalangguad a pagilian. Awanto ti tumulong kenka. Puorakto dagiti siudadmo ket mauramto dagiti amin nga adda iti lawlawmo.”

33 Kuna ni Yahweh a Mannakabalin-amin, “Maparparigat dagiti tattao ti Israel ken ti Juda. Guguardiaan ida a nalaing dagiti nangparmek kadakuada. Dida kayat a wayawayaan ida.

34 Ngem nabilegak a mangisalakan kadakuada. Yahweh a Mannakabalin-amin ti naganko. Isalakanko ida tapno yegko ti talna iti daga idinto a yegko ti riribuk kadagiti tattao ti Babilonia.”

35 Kuna ni Yahweh,

“Agdisso ti kampilan iti Babilonia!

Mapapatay dagiti tattaona,

dagiti agtuturay ken mamasiribna.

36 Mapapatay dagiti ulbod a profeta—

anian a kinamaagda.

Mapapatay dagiti soldadona—

anian a pannakakigtotda.

37 Mapapatay dagiti kabaliona;

marakrak dagiti luganna a pakigubat.

Mapapatay dagiti natangdanan a soldadona—

anian a kinakapuyda.

Mapukaw dagiti gamengna—maala ken masamsamda.

38 Agtikag ti dagana

ket agmaga dagiti karayanna.

Napno ti Babilonia iti nakabutbuteng nga imahen

a namagbalin a maag kadagiti tattao.

39 “Ngarud,agnaedto sadiay dagiti musang, ken dagiti atap nga animal, agraman dagiti narugit a tumatayab. Pulos nga awanton ti agnaed sadiay. Saanton a pagnaedan iti agnanayon nga awan inggana.

40 Dadaelektoti Babilonia a kas iti panangdadaelko idi iti Sodoma ken Gomorra ken kadagiti kabangibangda nga il-ili. Awanton ti agnaed sadiay. Ni Yahweh ti agsasao iti daytoy.

41 “Adtoy, umay dagiti tattao

nga aggapu iti amianan.

Iti pungto ti daga,

agsagsagana a makigubat ti maysa a nabileg a nasion.

42 Nagtagipana ken nagtagikampilanda,

naranggas ken awan asida.

Kasla daranudor ti taaw

ti dalagudog dagiti kabalio a nagsakayanda.

Sisasaganada a manggubat iti Babilonia.

43 Nadamag ti ari ti Babilonia ti kaaddada,

awanen ti bilegna.

Kasta unay ti butengna,

mariknana ti ut-ot a kas iti ut-ot ti agpasikal.

44 “Umayakto a kas iti leon a rummuar iti nasamek a bakir a mapan iti nalangto a pagaraban iti abay ti Karayan Jordan. Kellaatekto a kamaten dagiti taga-Babilonia ket agtataraydanto a mangpanaw iti siudadda. Iturayanto ida ti piliek a pangulo. Siasino ti kas kaniak? Siasino ti kumarit kaniak? Siasino ti agturay a bumusor kaniak?

45 Ngarud, denggenyo ti panggepko a maibusor iti siudad ti Babilonia ken kadagiti tattaona. Uray dagiti babassit nga annakda maitalawdanto ket makigtotto ti tunggal maysa.

46 Inton maparmek ti Babilonia, addanto napigsa nga ikkis ken daranudor a mangdayyeg iti entero a daga. Ti dung-awna mangngegto dagiti nasnasion.”

Manayonan ti Dusa ti Babilonia

1 Kuna ni Yahweh, “Mangyegak iti nadawel nga angina mangbasnot iti Babilonia ken kadagiti tattaona.

2 Mangibaonakto kadagiti ganggannaet a mangdadael iti dayta a daga, kas iti angin a mangitayab iti garami. Inton dumteng dayta nga aldaw a panagdadael, dumarupdanto iti amin a suli ket paglangalangendanto ti daga.

3 Diyo ikkan dagiti soldadona iti gundawayda a mangibiat iti pana wenno mangikabil iti kabalda. Dadaelenyo ti entero nga armada. Patayenyo pay dagiti agtutubo a lallaki.

4 Masugatdanto ket maidasayda agingga a matayda kadagiti kalsada ti siudadda.

5 Siak, ni Yahweh a Mannakabalin-amin, diak binaybay-an ti Israel ken Juda uray no nagbasolda kaniak a Nasantoan ti Israel.

6 Talawanyo ti Babilonia! Isalakanyo ti biagyo! Saankayo koma a matay gapu iti basol ti Babilonia. Agibalesakon ket dusaek a kas iti maiparbeng kenkuana.

7 Kaslabalitok a kopa ti Babilonia nga ig-iggamak. Binartekna ti entero a lubong. Ininum dagiti nasion ti arakna ket nagmauyongda.

8 Kellaat a natnag ti Babilonia ket nadadaelen! Dung-awanyo! Yalaanyo iti agas dagiti sugatna bareng no umimbag pay.

9 Kinunadagiti ganggannaet nga agnaed sadiay, ‘Pinadasmi a tulongan ti Babilonia ngem naladawen. Umaykayon! Panawantayon ket agawidtayo kadagiti dagdagatayo. Impakat ti Dios ti amin a pigsana a nangdusa iti Babilonia. Dinadaelna a namimpinsan.’”

10 Kuna ni Yahweh, “Ipukkaw daytoy dagiti tattaok, ‘Impakita tiApoa saantayo a nagbiddut. Intay ibaga kadagiti tattao ti Sion ti inaramid tiApoa Diostayo.’”

11 Gapu ta panggep ni Yahweh a dadaelen ti Babilonia, tinignayna dagiti ari ti Media. Kastoy ti panangibalesna iti pannakadadael ti Templona.

Imbilin dagiti dumarup nga ofisiales, “Asaenyo dagiti panayo! Isaganayo dagiti kalasagyo!

12 Ibayogyo ti pagilasinan ti pannakadarup dagiti bakud ti Babilonia. Nayonanyo dagiti guardia! Ipuestoyo dagiti agbantay kadagiti lugarda. Pagsaganaenyo dagiti agsaneb.”

Tinungpal ni Yahweh ti imbagana nga aramiden kadagiti taga-Babilonia.

13 Adudagiti karayan ken nabaknang a gameng ti Babilonia ngem dumtengen ti panungpalanna. Napugsaten ti linas ti biagna.

14 Insapata ni Yahweh a Mannakabalin-amin a mangyeg iti adu a tattao a kas iti pangen dagiti dudon a mangdarup iti Babilonia ket aggiikkisdanto iti balligida.

Kanta a Pagdayaw iti Dios

15 Pinarsua ni Yahweh ti daga babaen iti bilegna;

babaen iti siribna, inaramidna ti lubong

ken inyukradna dagiti langit.

16 No agbilin ni Yahweh,

agdaranudor dagiti dandanum iti tangatang;

pagulepenna manipud iti pungto ti daga.

Paggilapenna ti kimat iti tudo,

ket ibulosna ti angin iti pagiduldulinanna.

17 Maag ken nengneng dagiti amin a tattao;

maibabain dagiti agar-aramid iti imahen

gapu ta dagiti didiosen nga inaramidda,

saanda a pudno a dios ken awan biagda.

18 Awan serserbida ket rumbeng a malaisda;

madadaeldanto inton ukomen ida ni Yahweh.

19 Saan a kasta ti Dios ni Jacob;

isu ti nangaramid iti amin a banag,

pinilina ti Israel nga agbalin a tribuna.

Yahweh a Mannakabalin-amin ti naganna.

Ti Martilio ni Yahweh

20 Kuna ni Yahweh,

“Babilonia, sika ti martiliok,

sika ti igamko a pakigubat.

Inar-aramatka a pinangparmek kadagiti nasion:

sika ti pinagdadaelko kadagiti pagarian.

21 Pinagtumekka kadagiti kabalio ken kadagiti nagsakay:

pinaglasangka kadagiti lugan a pakigubat ken naglugan.

22 Inar-aramatka a nangpatay kadagiti lallaki ken babbai;

kadagiti lallakay ken ubbing,

kadagiti babbaro ken babbalasang.

23 Sika ti pinangwarak kadagiti agpaspastor ken arbanda,

kadagiti mannalon ken kadagiti kabalio a pagaradoda.

Sika ti pinangparmekko kadagiti agtuturay

ken nangato nga ofisiales.”

Ti Dusa ti Babilonia

24 Kuna ni Yahweh, “Makitadakto a mangbales iti Babilonia. Balsekto dagiti tattaona gapu kadagiti dakes nga inaramidda iti Jerusalem.

25 Babilonia, mayarigka iti bantay a mangdadael iti sangalubongan, ngem siak, ni Yahweh, ti kabusormo. Kabilen ket rumrumekenkanto iti daga. Padapuenkanto.

26 Awanto kadagiti batom ti mabalin nga usaren a pagpatakder. Mayarigkanto iti let-ang nga agnanayon a langalang. Daytoy ti sao ni Yahweh.

27 “Ikabilyo ti pagilasinan ti idadarup! Pagunienyo ti trumpeta tapno mangngeg dagiti nasion! Pagsaganaenyo dagiti nasion a manggubat iti Babilonia! Ibagayo a dumarup dagiti pagarian ti Ararat, Minni ken Askenaz. Mangtudingkayo iti mangidaulo iti panangraut. Iruaryo dagiti kabalio a kas iti pangen ti dudon ti kaaduda.

28 Pagsaganaenyo dagiti nasion a manggubat iti Babilonia. Pagsaganaenyo dagiti ar-ari ti Media agraman dagiti papangulo ken dagiti ofisialesda ken dagiti amin a daga nga iturayanda.

29 Agpigerger ken agkintayeg ti daga ta ipatungpalen ni Yahweh ti planona. Paglangalangennanto ti Babilonia ket awanto ti agnaed sadiay.

30 Nagsardengen a makigubat dagiti soldado ti Babilonia ket nagtalinaedda kadagiti sarikedkedda. Napukawdan ti turedda; awan dumadan kadagiti babbai. Narban dagiti ruangan ti siudad. Maur-uramen dagiti balbalay.

31 Agsasaruno ti agtaray a mangipadamag iti ari ti Babilonia a nakastreken dagiti kabusor iti amin a bakud ti siudad.

32 Sinakupen dagiti kabusor ti pagballasiwan iti karayan ket pinuorandan dagiti sarikedked. Kasta unay ti buteng dagiti soldado ti Babilonia.

33 Iti saan a mabayag, paraspasento ida dagiti kabusor, ket baddebaddekendanto ida a kasla irik iti pagirikan. Daytoy ti sao ni Yahweh a Mannakabalin-amin a Dios ti Israel.”

34 Rinangrangkay ti ari ti Babilonia

ti Jerusalem ket kinnanna.

Kasla dragon a nangalun-on kenkuana;

imbukbokna a kasla burnay ti amin a nagyan iti siudad.

Innalana ti kinaykayatna ket imbellengna ti natda.

35 Bay-an a kuna dagiti tattao ti Sion,

“Ikaro koma ti Babilonia ti ranggas

nga inaramidna kadatayo!”

Bay-an a kuna dagiti tattao ti Jerusalem,

“Ikaro koma ti Babilonia ti panagsagaba

nga impaayna kadatayo!”

Tulonganto ni Yahweh ti Israel

36 Iti kasta, kinuna ni Yahweh kadagiti tattao ti Jerusalem, “Siakto ti mangikalintegan kadakayo. Pagbayadekto dagiti kabusoryo gapu iti inaramidda kadakayo. Pamagaakto ti paggapuan ti danum ti Babilonia ket mamagaanto dagiti karayanna.

37 Agbalinto dayta a pagilian a nagrebbaan a taeng dagiti atap nga animal. Nakabutbutengto ti buyana. Awanto ti agtaeng sadiay, ket makigtotto dagiti amin a makakita iti napasamak kenkuana.

38 Agungorto a kasla leon dagiti taga-Babilonia. Agugadanto a kasla urbon ti leon.

39 Naagumda kadi? Isaganaakto ida iti padaya. Bartekekto agingga a kasta unay ti ragsakda. Maturogdanto ket didanto agriing.

40 Ipankonto ida iti pagpartian. Kasdanto la karnero, kalding ken kalakian a karnero. Siak, ni Yahweh, ti nagsao iti daytoy.”

Ti Nagbanagan ti Babilonia

41 Kuna ni Yahweh maipapan iti Babilonia: “Nasakupen ti siudad a daydayawen ti sangalubongan. Anian a nakabutbuteng ti Babilonia iti imatang dagiti pagilian!

42 Dimmakkel ti baybay ket linapunos dagiti nadawel a dalluyon ti Babilonia.

43 Nagbalin a nakabutbuteng a buya dagiti il-ilina. Kasdala let-ang nga awan danumna. Awan ti agnaed wenno agdaliasat kadakuada.

44 Dusaekto ni Bel a didiosen ti Babilonia. Pairuarkonto dagiti sinamsamna. Saanton a mapan agdaydayaw dagiti nasion kenkuana.

“Narban dagiti bakud ti Babilonia.

45 Tattao ti Israel, panawanyo dayta a lugar. Tumaray ti tunggal maysa tapno malisianna ti nakaro a pungtotko.

46 Dikay maupay wenno mabuteng gapu kadagiti madamdamagyo. Masukansukat ti damag iti tinawen—damag maipapan iti kinaranggas ditoy daga ken ar-ari nga aggiginnubat.

47 Iti kasta, dumtengto ti tiempo a panangpukawko kadagiti imahen ti Babilonia. Maibabainto ti entero a pagilian. Mapapatayto dagiti tattaona.

48 Intonumay dagiti taga-amianan a mangdadael iti Babilonia ket matnag ti siudad, agikkisto iti rag-o dagiti amin nga adda iti daga ken langit.

49 TiBabilonia ti gapu ti nakatayan dagiti tattao iti entero a lubong. Maparmeken agsipud ta isu ti gapu ti nakatayan ti adu nga Israelita. Siak, ni Yahweh, ti agsasao iti daytoy.”

Ti Mensahe ti Dios kadagiti Judio idiay Babilonia

50 Kuna ni Yahweh kadagiti tattaona iti Babilonia, “Nalisianyo ti patay! Inkayon! Dikay agtaktak! Nupay adayokayo, siak, ni Yahweh, ti panunotenyo. Laglagipenyo ti Jerusalem.

51 Kunayo, ‘Naibabain ken naumsikami. Awan a pulos gawaymi ta immay dagiti ganggannaet ket simrekda iti nasantoan a lugar iti Templo.’

52 Iti kasta, kunak a dumtengen ti tiempo a panangukomko kadagiti didiosen ti Babilonia. Agasugto dagiti nasugsugatan iti entero a daga.

53 Uray no makauli ti Babilonia iti tangatang ket agaramid iti nalagda a sarikedkedna sadiay, mangibaonakto latta kadagiti tattao a mangdadael kenkuana. Siak, ni Yahweh, ti nagsao iti daytoy.”

Madegdegan ti Dusa ti Babilonia

54 Kuna ni Yahweh,

“Denggenyo ti sangsangit idiay Babilonia,

dungdung-awanda ti pannakadadael ti pagilian.

55 Dadaelekon ti Babilonia,

pagsardengekon ti arimbangawna.

Kasla daranudor ti dalluyon

ti idadarup ti armada

ket agririawda a rumaut.

56 Umayda dadaelen ti Babilonia;

natiliwen dagiti soldadona,

ket natukkolen dagiti panada.

Siak ti Dios a mangdusa iti dakes,

aramidek iti Babilonia ti maiparbeng kenkuana.

57 Bartekekto dagiti agtuturay ken dagiti mamasiribna,

dagiti papangulo ken dagiti soldadona.

Maturogdanto ket didanton makariing.

Daytoy ti saok nga ari,

siak, ni Yahweh a Mannakabalin-amin.

58 Marbanto dagiti napuskol a bakud ti Babilonia,

ket mapuoranto dagiti nangato a ruanganna.

Awanto ti pagmamaayan ti trabaho dagiti tattao;

dumapunto ti nagbannogan dagiti nasion.

Siak, ni Yahweh a Mannakabalin-amin, ti nagsao iti daytoy.”

Maipan ti Mensahe ni Jeremias idiay Babilonia

59 Ni Seraias nga anak ni Nerias ken apoko ni Maaseyas ti personal a katulongan ni Ari Zedekias. Iti maikapat a tawen a panagari ni Zedekias iti Juda, napan ni Seraias idiay Babilonia. Sakbay ti ipapanna, binilin ni Jeremias.

60 Insuratko iti maysa a libro ti pakasaritaan ti amin a pannakadadael a dumtengto iti Babilonia, kasta met dagiti amin a banag maipapan iti dayta a daga.

61 Imbagak ken ni Seraias, “Inton makadanonka idiay Babilonia, pigsaamto nga ibasa kadagiti tattao dagiti amin a naisurat iti libro.

62 Kalpasanna, ikararagmo, ‘OApo, imbagam a dadaelem daytoy a lugar tapno awanton ti sibibiag a parsua nga agnaed, tao man wenno animal, ket aglangalangto iti agnanayon.’

63 Seraias,inton maibasamon daytoy a libro, mangigalutkanto iti bato a padagsenna samo ipurruak idiay Karayan Eufrates.

64 Kunamto, ‘Kastoyto ti mapasamak iti Babilonia—lumnedto ket dinton lumung-aw gapu iti panangdadael tiApokenkuana.’”

Daytoy ti paggibusan ti sao ni Jeremias.

Ti Pannakaparmek ti Jerusalem

1 Duapulo ket maysa ti tawen ni Zedekias idi maisaad nga ari ti Juda. Sangapulo ket maysa a tawen a nagari idiay Jerusalem. Hamutal ti nagan ti inana nga anak ni Jeremias a nagnaed iti ili ti Libna.

2 Dakes ti inar-aramid ni Zedekias iti imatang ni Yahweh a kas ken ni Jehoyakim idi.

3 Nakapungtot ni Yahweh kadagiti tattao ti Jerusalem ken Juda, isu a pinagtalawna ida iti imatangna.

Binusor ni Zedekias ti ari ti Babilonia.

4 Daytoyti gapuna nga iti maika-10 nga aldaw iti maika-10 a bulaniti maikasiam a tawen a panagari ni Zedekias idiay Juda, dimteng ni Nebucadnesar agraman dagiti amin nga armadana ket rinautda ti Jerusalem. Nagkampoda iti ruar ti siudad. Binangenanda ti aglawlawna.

5 Nalakub ti siudad agingga iti maika-11 a tawen a panagari ni Zedekias.

6 Iti dayta met la a tawen, iti maikasiam nga aldaw, iti maikapat a bulan,kimmaro ti bisin ket awan ti kanen dagiti tattao.

7 Nastrekdagiti kabusor ti siudad. Idi makita daytoy ti ari ken dagiti soldadona, naglibasda. Pinanawanda ti siudad iti rabii, uray no linikmut ida dagiti taga-Babilonia. Nagnada iti ruangan iti baet dagiti dua a bakud iti abay ti hardin ti ari ket nagturongda iti Tanap ti Jordan.

8 Ngem kinamat ida ti armada ti Babilonia ket tiniliwda ni Zedekias iti tanap nga asideg ti Jerico. Intarayan dagiti amin a soldadona.

9 Naidatag ni Zedekias ken ni Ari Nebucadnesar nga adda idi idiay Ribla iti sakup ti Hamat. Sadiay ti nangsentensiaan ni Nebucadnesar kenkuana.

10 Sadiay met ti nangpapatayan ti ari ti Babilonia kadagiti lallaki nga annak ni Zedekias iti imatangna. Pinapatayna pay dagiti ofisiales ti Juda.

11 Kalpasanna,pinasuatna dagiti mata ni Zedekias sana pinaipan a sikakawar idiay Babilonia. Nagtalinaed ni Zedekias iti pagbaludan agingga iti ipapatayna.

Ti Pannakadadael ti Templo

12 Iti maika-10 nga aldaw, iti maikalima a bulan,iti maika-19 a tawen a panagari ni Nebucadnesar iti Babilonia, sinerrek ni Nebuzaradan ti Jerusalem. Isu ti mammagbaga iti ari ken pangulo ti armada.

13 Pinuorannati Templo ken ti palasio ti ari, agraman ti amin a balbalay dagiti natan-ok a tattao idiay Jerusalem.

14 Rinebba dagiti soldadona ti bakud ti Jerusalem.

15 Innala ni Nebuzaradan dagiti tattao a natda iti siudad. Innalana pay dagiti simmuko idi iti ari ti Babilonia ken dagiti dadduma kadagiti trabahador. Pinaibaludna ida idiay Babilonia,

16 ngem imbatina dagiti dadduma a kapanglawan a pinagtrabahona iti kaubasan ken taltalon.

17 Binurakdagiti taga-Babilonia dagiti bronse nga adigi ken dagiti pagbatayan nga adda iti Templo agraman ti dakkel a bronse a palanggana ket inyawidda amin a bronse idiay Babilonia.

18 Innalada met dagiti pala ken dagiti pagkargaan iti dapu a maus-usar iti pannakadalus iti altar. Innalada pay dagiti alikamen a mausar iti pannakaisagana ti pagsilawan, dagiti malukong a pagtaya iti dara ti maidatag a daton a mapuoran, dagiti malukong a pagpuoran iti insenso ken dagiti amin a bronse nga alikamen a mausar iti Templo.

19 Innalada amin dagiti naaramid iti balitok ken pirak; dagiti babassit a malukong, dagiti palanggana a pagbunag iti beggang, dagiti malukong a pagyanan ti dara dagiti daton a mapuoran, dagiti pagkargaan iti dapu, dagiti pagbatayan ti silaw, dagiti palanggana a pagyanan ti insenso ken dagiti malukong a pagikargaan iti daton nga arak.

20 Innalada pay dagiti bronse nga alikamen a pinaaramid ni Ari Solomon nga agpaay iti Templo, dagiti dua nga adigi, dagiti batay, ti dakkel a palanggana ken dagiti 12 a sinan-toro a baka a nakaisadaganna. Nadagsenda unay ket saan a matimbang.

21-22 Agpada dagiti dua nga adigi: sagduduapulo ket pito a kadapan ti katayag ken sangapulo ket walo a kadapan ti kapuskol. Naglungog dagiti adigi ket tallo a pulgada ti kapuskol ti bronse. Adda bronse a naituon iti tuktok ti tunggal adigi. Pito ket gudua a kadapan ti katayagda. Nakitikitan ti aglawlaw ken naarkosan iti kasla granada. Bronse amin dagitoy.

23 Sangagasut a sinan-bunga ti granada ti adda kadagiti adigi ket 96 kadagitoy ti makita manipud iti daga.

Maipan dagiti Judio a kas Balud idiay Babilonia

24 Innala pay ni Nebuzaradan da Seraias a Kangatoan a Padi, Sofonias a padi a sumaruno iti saad ken dagiti tallo a kangatoan nga ofisiales iti Templo. Impanawna ida a kas balud.

25 Innalana met iti siudad ti nangipangulo idi kadagiti soldado, pito kadagiti personal a mammagbaga iti ari nga adda pay la iti siudad, ti sekretario ti kapitan a para-aywan kadagiti listaan dagiti soldado, ken innem a pulo a natatan-ok a lallaki.

26 Impan ida ni Nebuzaradan iti ari ti Babilonia nga adda idi idiay Ribla,

27 iti sakup ti Hamat. Sadiay, pinasaplit ken pinapapatay ida ti ari.

Naitalaw ngarud a kas balud dagiti tattao ti Juda iti dagada.

28 Dagitoy ti bilang dagiti tattao nga innala ni Ari Nebucadnesar: iti maikapito a tawen a panagarina, 3,023;

29 iti maika-18 a tawen, 832 a naggapu idiay Jerusalem;

30 iti maika-23 a tawen, 745 nga innala ni Nebuzaradan. Agdagup iti 4,600 dagiti amin a tattao a naipanaw a kas balud.

31 Iti tawen a pannakaisaad ni Evilmerodac nga ari idiay Babilonia, kinaasianna ni Ari Jehoyakin ket pinairuarna iti pagbaludan. Naaramid daytoy iti maika-25 nga aldaw iti maika-12 a bulan,iti maika-37 a tawen kalpasan ti pannakaipanaw ni Jehoyakin a kas balud.

32 Naimbag unay ni Evilmerodac ken ni Jehoyakin ket insaadna iti lugar a natantan-ok ngem dagiti dadduma a padana nga ari a naipan idiay Babilonia.

33 Napalubosan ni Jehoyakin a mangsukat iti kawesna a kas balud, ken makilanglang iti ari iti amin a panagbiagna.

34 Iti unos ti panagbiagna, naikkan kadagiti inaldaw a kasapulanna.