Author: admin

Categories
Zacarias

Zacarias 12

Ti Pannakaisalakan ti Jerusalem iti Masakbayan

1 Daytoy ti sao tiApomaipapan iti Israel, tiApoa nangyukrad iti langit ken nangipasdek iti daga ken nangted iti biag ti tao. Kunana:

2 “Pagbalinekto ti Jerusalem a kasla kopa ti arak. Uminumto dagiti nasion iti likmutna ket agbasingbasingdanto a kasla nabartek. Inton lakubenda ti Jerusalem, malakubto met dagiti dadduma a siudad ti Juda.

3 Ngem iti dayta nga aldaw, pagbalinekto ti Jerusalem a nadagsen a bato a narigat a magaraw ket masugatanto iti nasaem ti siasinoman a mangbagkat kenkuana. Agmaymaysanto dagiti amin a pagilian ti lubong a mangraut kenkuana.

4 Iti dayta a tiempo, kigtotekto dagiti kabalioda ket pagmauyongekto dagiti nagsakay kadakuada. Bantayakto dagiti tattao ti Juda ngem pagbulsekekto ti amin a kabalio dagiti kabusorda.

5 Kunanto dagiti kapuonan ti Juda, ‘TiApoa Mannakabalin-amin a Dios ti mangted iti pigsa kadagiti tattaona nga agnaed iti Jerusalem.’

6 “Iti dayta a tiempo, pagbalinekto dagiti kapuonan ti Juda a kasla apuy iti kabakiran wenno talon a natangkenan iti dawa. Dadaelendanto dagiti amin a pagilian iti lawlawda. Awanto ti pakaan-anoan dagiti tattao ti Jerusalem iti uneg ti siudad.

7 “Siak, ni Yahweh, umunanto a pagballigiek dagiti armada ti Juda tapno saan a maartapan ti dayaw dagiti kaputotan ni David ken dagiti agnaed iti Jerusalem ti dayaw ti Juda.

8 Iti dayta a tiempo, salaknibanto tiApodagiti agnaed iti Jerusalem. Uray ti kakapsutan kadakuada, pumigsanto a kas ken ni David. Idalanto ida dagiti kaputotan ni David a kas iti mismo a Dios, kas iti anghel tiApo.

9 Iti dayta a tiempo, dadaelekto ti amin a pagilian nga agpanggep a mangraut iti Jerusalem.

10 “Punnoektodagiti kaputotan ni David ken dagiti tattao ti Jerusalem iti espiritu a mamagbalin kadakuada a manangngaasi ken managkararag. Kitaendanto ti natay gapu iti panangduyokda kenkuana ket dung-awandanto a kas iti pimmusay a kakaisuna nga anak. Agdung-awdanto iti nasaem a kasla kadagiti tattao a natay ti inauna nga anakda.

11 Iti dayta a tiempo, nasaemto ti panagdung-aw idiay Jerusalem a kas iti panangdung-aw ken ni didiosen a Baal iti tanap ti Megiddo.

12-14 Tunggal familia iti pagilian, agdung-awto nga is-isuna: Ti familia a nagtaud iti kaputotan ni David; ti familia iti kaputotan ni Natan; ti familia iti kaputotan ni Levi; ti familia iti kaputotan ni Simei, ken dagiti dadduma a familia. Agdung-awto nga is-isuna ti tunggal familia, agraman lallaki a mailasin kadagiti babbai.

Categories
Zacarias

Zacarias 13

1 Kuna ni Yahweh a Mannakabalin-amin, “Inton dumteng dayta a tiempo, addanto ubbog a maluktan nga agpaay kadagiti kaputotan ni David ken dagiti tattao iti Jerusalem tapno maugasan ti basol ken kinarugitda.

2 Iti dayta a tiempo, pukawekto dagiti imahen iti pagilian, ket awanton ti makalagip kadakuada. Paksiatekto dagiti agkuna a profetada ket pukawek ti tarigagay nga agdaydayaw kadagiti didiosen.

3 No addanto pay laeng mangipapilit nga agipadto, kunanto dagiti nagannak kenkuana a masapul a matay ta imbagana a nagsao iti nagan ni Yahweh ngem pasig met nga ulbod ti insaona. No agipadto, patayento dagiti mismo a nagannak kenkuana.

4 Inton dumteng dayta a tiempo, awanto ti profeta a mangipalangguad kadagiti parmatana wenno agkawes wenno agparang a kas profeta tapno allilawenna dagiti tattao.

5 Ngem kunananto, ‘Saanak a profeta. Maysaak a mannalon. Nagtaltalonak manipud pay idi ubingak.’

6 Ket no adda agsaludsod, ‘Ania ngarud dagitoy sugat iti barukongmo?’ isungbatnanto, ‘Naalak iti balay ti gayyemko.’”

Maibilin ti Pannakapapatay ti Pastor ti Dios

7 Kunani Yahweh a Mannakabalin-amin: “Tumakderka, kampilan, ket darupem ti agpaspastor a katulongak. Papatayem tapno mawarawara dagiti karnero. Darupek dagiti tattaok

8 ket iti entero a daga, duanto nga apagkatlo kadagiti tattao ti matay.

9 Paglasatekto iti apuy dagiti nakalasat nga apagkatlo. Gugorakto ida a kas iti pannakagugor ti pirak iti apuy. Gugorakto ida a kas iti pannakagugor ti balitok. Kalpasanna, agkararagdanto kaniak ket ipangagkonto ida. Ibagakto kadakuada nga isuda dagiti tattaok ket ipudnodanto a siak ti Diosda.”

Categories
Zacarias

Zacarias 14

Ti Jerusalem ken dagiti Pagilian

1 Dumtengen ti aldaw a panagtugaw tiApoa kas ukom. Dumtengto dagiti agsamsam iti siudad ti Jerusalem ket mabingbingayto dagiti nasamsam iti imatangmo.

2 Ummongento tiApodagiti amin a pagilian tapno darupenda ti Jerusalem. Maparmekto ti siudad. Masamsamanto dagiti balbalay. Maramesto dagiti babbai. Maitalawto ti kagudua ti bilang dagiti agnaed iti siudad ngem mabatinto dagiti dadduma.

3 Kalpasanna, rummuarto tiApoket makirangetto a kas kadagiti napalabas a tiempo; gubatennanto dagidiay a pagilian.

4 Iti dayta nga aldaw, agtakderto tiApoiti tapaw ti Bantay Olivo iti daya ti Jerusalem. Maguduanto ti bantay ket addanto nalawa a tanap iti baetna a mangrugi iti daya nga agpa-laud. Umalisto nga agpa-amianan ti kaguduana ket agpa-abagatanto met ti sabali a kagudua.

5 Aglibaskayto ket magnakay iti daytoy a tanap a nanggudua iti bantay. Agtataraykayto a kas kadagidi kapuonanyo idi dimteng ti ginggined iti tiempo ni Uzzias nga ari ti Juda. Umayto tiApoa Diosko ket ikuyogna dagiti amin nga angheles.

6 Inton dumteng dayta a tiempo, awanton ti lam-ek wenno panagbalay ti danum.

7 Agnanayonto nga aldaw a saan met a gagangay nga aldaw ken rabbi. No kaano a mapasamak daytoy, ni laeng Yahweh ti makaammo.

8 Intondumteng dayta nga aldaw, addanto nabiag a danum nga aggapu iti Jerusalem. Agturongto ti kaguduana iti Natay a Baybay ket ti kaguduana iti Taaw Mediterranean. Saanto nga agpatingga ti panagayusna, uray iti kalgaw wenno tudtudo.

9 Kalpasanna, agarinto ni Yahweh iti entero a lubong. Agdaydayawto ti tunggal maysa kenkuana a kas Dios ket maymaysanto ti naganna nga ammoda.

10 Nasimpanton ti deppaar manipud Geba iti amianan agingga iti Rimmon iti abagatan. Nangatngatonto ti Jerusalem ngem dagiti daga iti lawlawna. Sakupento ti siudad manipud iti Ruangan ni Benjamin agingga iti Ruangan ti Suli, iti nagtakderan ti sigud a ruangan, ken manipud iti Torre ni Hananel agingga kadagiti pagpespesan iti ubas a kukua ti ari.

11 Natalgedtondagiti tattao nga agnaed sadiay, ket saandanton nga agpeggad a madadael.

12 Idissuorto ni Yahweh ti nakabutbuteng a sakit kadagiti pagilian a manggubat iti Jerusalem. Marunotto ti lasagda idinto a sibibiagda pay. Malungsotto dagiti mata ken dagiti dilada.

13 Iti dayta nga aldaw, riribuken ken pagbutngento ida ni Yahweh. Gammatanto ti maysa a tao ti adda iti abayna ket kabilenna.

14 Makigubatto dagiti tattao ti Juda a mangsalaknib iti Jerusalem. Alaendanto a kas samsam ti sanikua dagiti amin a nasion—balitok, pirak ken adu a pagan-anay.

15 Addanto met nakaro a sakit nga agdissuor kadagiti kabalio, mulo, kamelio ken asno—kadagiti amin nga animal nga adda iti kampo dagiti kabusor.

16 Kalpasanti pannakaparmek dagiti kabusor, tinawen a sumang-atto idiay Jerusalem dagiti amin a nakalasat tapno agdaydayawda ken ni Yahweh a Mannakabalin-amin a kas ari ken tapno rambakanda ti Fiesta dagiti Abong-abong.

17 No adda nasion a saan a sumang-at idiay Jerusalem tapno agdaydayaw ken ni Yahweh a Mannakabalin-amin a kas ari, saanto nga agtudo iti dagada.

18 No saan a kayat dagiti Egipcio a rambakan ti Fiesta dagiti Abong-abong, sagabaendanto met ti sakit nga idissuor ni Yahweh kadagiti nasion a saan a mapan makipagrambak.

19 Daytoyto ti dusa a maipatay iti Egipto ken kadagiti dadduma a nasion no dida rambakan ti Fiesta dagiti Abong-abong.

20 Iti dayta a tiempo, uray kadagiti kilingkiling a maibitin kadagiti kabalio maisuratto: “Naidaton itiApo.” Agbalinton dagiti banga nga adda iti Templo a nasagradoan a kas kadagiti malukong iti sango ti altar.

21 Mailasinto ti amin a banga iti Jerusalem ken iti Juda tapno maaramat iti panagdaydayaw ken ni Yahweh a Mannakabalin-amin. Usarento dagiti agidaton ti banga a paglutoan iti karne ti idatagda. Inton dumteng dayta a tiempo, awanton ti agtagtagilako iti Templo ni Yahweh a Mannakabalin-amin.

Categories
Malakias

Malakias 1

1 Daytoy ti mensahe ni Yahweh nga impakaammona ken ni Malakias nga ibagana kadagiti Israelita.

Ti Ayat ni Yahweh iti Israel

2 Kunani Yahweh kadagiti tattaona, “Inay-ayatkayo.” Ngem isungbatda, “Kasano ti panangipakitam nga inay-ayatnakami?”

Isungbat ni Yahweh, “Agkabsat da Esau ken Jacob, ngem inay-ayatko ni Jacob ken dagiti kaputotanna,

3 ket ginurak ni Esau ken dagiti kaputotanna. Dinadaelko ti katurturodan a pagilian ni Esau ket binaybay-ak ti dagana a pagtaengan dagiti atap nga animal.”

4 No kuna dagiti Edomita a kaputotan ni Esau, “Nadadael dagiti ilimi ngem bangonenminto manen ida,” daytoy ti sungbat ni Yahweh a Mannakabalin-amin, “Bangonenda latta ida ngem rebbaekto manen. Awaganto dagiti tattao ida iti ‘Ti managdakdakes a pagilian’ ken ‘Ti pagilian a kapungtot tiApoiti agnanayon.’”

5 Makitanto a mismo daytoy dagiti Israelita ket kunadanto, “Mannakabalin tiApouray pay iti ruar ti daga ti Israel!”

Babalawen ni Yahweh dagiti Papadi

6 Kuna tiApoa Mannakabalin-amin kadagiti papadi, “Raemen ti anak ti amana. Raemen met ti adipen ti apona. Siak ti amayo, ngem apay a didak dayawen? Siak ti apoyo, ngem apay a didak raemen? Lalaisendak, ngem saludsodenyo pay laeng, ‘Kasano ti pananglaismi kenka?’

7 Kastoy ti pananglaisyo kaniak—agidatonkayo iti awan pategna a taraon iti altarko, ket saludsodenyo, ‘Kasano ti dimi panangipakita a saankami nga agraem kenka?’ Ibagak kadakayo—babaen iti panangipakitayo iti pananglaisyo iti altarko.

8 Ipagarupyokadi a naimbag ti panangidatagyo kaniak iti bulsek, pilay wenno masakit nga animal? Padasenyo man ti mangted ti kasta nga animal iti gobernadoryo. Maragsakan ngata? Itedna ngata ti masapulyo?”

9 Ita, dakayo a papadi, padasenyo man ti agdawat iti Dios tapno kaasiannatayo. Dina ipangag ti kararagyo ket dakayo ti akimbasol.

10 Kuna tiApoa Mannakabalin-amin, “Adda koma maysa kadakayo a mangirikep iti ruangan ti Templo tapno dikay makastrek a mangpasged iti awan serserbina nga apuy iti altarko. Diak maragsakan kadakayo, ket diak awaten dagiti daton nga idatagyo kaniak.

11 Agraem kaniak dagiti amin a tattao ditoy lubong. Iti sadinoman a disso, agpuorda iti insenso a maipaay kaniak ket agidatagda kadagiti makaay-ayo a daton. Isuda amin raemendak.

12 Ngem didak raemen no ibagayo nga awan serserbi ti altarko, ken no laisenyo ti taraon nga idatonyo sadiay.

13 Kunayo, ‘Naumakamin kadagitoy!’ ket musiigandak. Mangidatagkayo iti tinakaw nga animal a kas datonyo kaniak wenno pilay wenno masakit. Ipagarupyo kadi nga awatek dagitoy?

14 Mailunod koma ti manangallilaw a mangidaton kaniak iti awan serserbina nga animal idinto nga inkarina a mangidatag kaniak iti nasayaat nga animal nga aggapu iti arbanna. Naindaklanak nga ari! Kabutengdak dagiti amin a tao iti amin a pagilian.”

Categories
Malakias

Malakias 2

1 Kuna tiApoa Mannakabalin-amin kadagiti papadi, “Agpaay daytoy a bilin kadakayo:

2 Masapul a dayawendak babaen iti aramidyo. No didak ipangag ket diyo ipapuso ti ibagak, ilunodkayo. Ilunodko dagiti amin nga awatenyo a pagbiagyo. Kinapudnona, inlunodkon dagitoy gapu ta yaleng-alengyo dagiti bilinko.

3 Dusaekto dagiti kaputotanyo. Idumudomkayto kadagiti takki dagiti animal a datonyo. Ipurruakkayto nga iraman kadakuada.

4 Itikasta, maammoanyonto nga impaulogko daytoy a bilin kadakayo tapno saan a mawaswas ti nagtutulaganmi kadagiti papadi a kaputotan ni Levi.

5 “Ititulagmi, inkarik nga ikkan ida iti biag ken napintas a kasasaad tapno agraemda kaniak! Kadagidi nga aldaw, pudno a nagraem ken nagbutengda kaniak.

6 Ti naimbag ti insuroda a saan ketdi a ti dakes. Nagbiagda a mayannatup iti pagayatak. Saan la a naimbag ti inaramidda ngem tinulonganda pay ti adu tapno isardengda ti panagbasolda.

7 Pagrebbengan dagiti papadi nga isuro ti pudno a pannakaammo iti Dios. Gapu ta isuda ti babaonen ni Yahweh a Mannakabalin-amin, rumbeng nga isuda ti papanan dagiti tattao tapno masursuroda ti pagayatak.

8 “Ngem dakayo a papadi, simmiasikayo iti nalinteg a dalan. Adu ti nagbasol gapu iti pannursuroyo. Tinallikudanyo ti nagtutulagantayo.

9 Balsenkayo ngarud ket pagbalinenkayo a dakes iti imatang dagiti Israelita tapno laisendakayo, gapu ta diyo suroten ti pammagbagak ken saanyo a pagpapadaen ti amin a tao iti panangisuroyo iti pagayatak.”

Ti Saan a Kinapudno dagiti Tattao iti Dios

10 Saan kadi a maymaysa ti amatayo? Saan kadi nga isu met la a Dios ti namarsua kadatayo? Apay ngarud a saantayo a tungpalen ti karitayo iti tunggal maysa? Apay a laisentayo ti nagtulagan ti Dios ken dagiti kapuonantayo?

11 Tinallikudan dagiti tattao ti Juda ti karida iti Dios ket nakaal-alliaw ti inaramidda idiay Jerusalem ken iti entero a pagilian. Tinulawanda ti Templo nga ipatpateg tiApo. Nangasawa dagiti lallaki kadagiti babbai nga agdaydayaw kadagiti ganggannaet a didiosen.

12 Dadaelen koma tiApoti siasinoman nga agaramid iti daytoy. Mailaksid koma ti kasta a tao iti pagiliantayo, kadagiti tattao nga agidatag iti daton itiApoa Mannakabalin-amin.

13 Ar-aramidenyo pay daytoy: Agsangit ken agdung-awkayo iti altar tiApoket lapunosenyo iti lua gapu ta dina awatenen dagiti idatonyo kenkuana.

14 Saludsodenyo no apay a dina awatenen dagiti datonyo. Gapu ta ammona a saan a tinungpal ti tunggal maysa ti karina iti babai nga inasawana idi agtutubo pay. Kinataktakunaynayyo ida ket diyo tinungpal ti kariyo kadakuada uray no insapatayo iti Dios nga agtalinaedkayo a napudno kadakuada.

15 Saannakayo kadi a pinagmaymaysa ti Dios iti bagi ken iti espiritu? Ania ti panggep ti Dios iti panagmaymaysana kadakayo? Tapno maaddaankayo iti annak a pudno a tattao ti Dios! Agalluadkayo ngarud: Diyo liputan ti babai nga inasawayo idi agtutubokayo.

16 “Kagurak ti panagsina ti agassawa,” kuna ti Apo aDiosti Israel. “Diak kayat nga isina ti lalaki ti asawana. Kinaranggas nga aramid daytoy iti asawa. Agannadkayo ngarud ket diyo paglikudan ti kariyo nga agtalinaed a napudno iti asawayo.”

Asidegen ti Aldaw a Panangukom

17 Nauman tiApokadagiti sasaoyo. Ngem saludsodenyo, “Ania ti nakaumaanna kadakami?” Babaen iti panagkunayo a naimbag iti imatang tiApoa Mannakabalin-amin dagiti amin nga agaramid iti dakes. Kinapudnona, kunayo a maragsakan kadakuada. Wenno babaen iti panagsaludsodyo, “Sadino ti ayan ti Dios a makunkuna a nalinteg?”

Categories
Malakias

Malakias 3

1 Kastoyti sungbat tiApoa Mannakabalin-amin, “Ibaonkonto ti babaonek a mangisagana iti dalanko. Ket kellaatto nga umay ni Yahweh a sapsapulenyo iti Templona. Umayto ti babaonen a segseggaanyo ket ipakaammonanto ti tulagko.”

2 Ngemsiasinonto ti makaibtur iti aldaw a yaayna? Siasinonto ti makalasat inton agparang? Mayarigto iti apuy a manggugor iti landok ken kaslanto naingel a sabon.

3 Umayto a mangukom, ket dalusannanto dagiti papadi a kas iti pannakagugor ti pirak ken ti balitok tapno idatagda itiApoti umisu a daton.

4 Maragsakanto tiApokadagiti daton dagiti tattao ti Juda ken Jerusalem, kas iti panagragsakna kadagiti daton iti napalabas.

5 Kuna tiApoa Mannakabalin-amin, “Umaykayto ukomen. Dagusekto ti mangidatag kadagiti pammaneknek a maibusor kadagiti managsalamangka, kadagiti mannakikamalala, kadagiti agsaksi iti ulbod, kadagiti mangsaur iti tangdan dagiti mangmangged, kadagiti manggundaway kadagiti balo, ulila ken ganggannaet, kadagiti amin a saan nga agraem kaniak.

Ti Pannangted iti Apagkapullo

6 “Siak,ni Yahweh, ket saanak nga agbalbaliw. Ngarud, dakayo a kaputotan ni Jacob, saankayo pay a napukaw a namimpinsan.

7 Kas kadagidi kapuonanyo, tinallikudanyo met dagiti lintegko ket diyo tinungpal ida. Agsublikayo kaniak, ket agsubliak met kadakayo. Ngem saludsodenyo, ‘Ania ti aramidenmi tapno makapagsublikami kenka?’

8 Saludsodek met: Rumbeng kadi a takawan ti maysa a tao ti Dios? Saan! Ngem taktakawandak. Kasano? Iti diyo pannangted iti naan-anay nga apagkapullo ken iti daton.

9 Nailunodkayo amin gapu ta sasaurennak ti entero a pagilian.

10 Yegyoti amin nga apagkapullo iti Templo tapno adu ti taraon sadiay. Padasendak ket ilukatkonto dagiti pagidulinan ti gameng sadi langit ket ibuyatkonto kadakayo ti nawadwad a bendision.

11 Diakto ipalubos nga iggesen dagiti apityo ket adunto ti ubas ti kaubasanyo.

12 Ibilangdakayto a nagasat dagiti amin a pagilian agsipud ta nasayaatto a pagyanan ti dagayo.”

Ikari ti Dios a Kaasianna dagiti Tattaona

13 Kuna ni Yahweh, “Makasugat ti panagsasaoyo kaniak, ngem kunayo, ‘Ania ti sinasaomi maipapan kenka?’

14 Kinunayo, ‘Awan mamaay ti panagserbi iti Dios. Awan ti magunggonami iti panangtungpalmi iti ibagana wenno iti panangipakitami itiApoa Mannakabalin-amin a pagbabawianmi dagiti inaramidmi.

15 Kas makitami, dagiti natangsit a tattao ti naragsak. Saan laeng a rumang-ay dagiti agar-aramid iti dakes, ngem suotenda pay ti anus ti Dios kadagiti dakes nga aramidda ket saanda a maan-ano.’”

16 Kalpasanna, nagsasarita dagiti tattao nga agbuteng ken ni Yahweh. Dimngeg ni Yahweh ket impangagna ida. Iti sangoananna, naisurat iti maysa a libro ti pakalaglagipan kadagiti agbuteng ken agdayaw ken ni Yahweh.

17 “Agbalindanto a tattaok,” kuna ni Yahweh a Mannakabalin-amin. “Inton aldaw nga aggunayak, kukuakto ida. Kaasiakto ida a kas iti panangngaasi ti ama iti anak nga agserserbi kenkuana.

18 Makitanto manen dagiti tattaok ti paggiddiatan ti mapasamak iti tao a nalinteg ken ti managdakdakes, ti agserbi kaniak ken ti saan.”

Categories
Malakias

Malakias 4

Ti Umay nga Aldaw ni Yahweh

1 Kuna ni Yahweh a Mannakabalin-amin, “Umayen ti aldaw a mauram dagiti amin a natangsit ken managdakdakes a tattao. Iti dayta nga aldaw, mauramdanto a kasla arutang ket pulos nga awanto ti mabati kadakuada.

2 Ngem kadakayo nga agtungpal kaniak, kaslanto init a lumgak ti pannakabalinko a mangisalakan ken mangyeg iti pannakapaimbag. Rumuarkayto a siraragsak a kas kadagiti urbon ti baka a naipupok.

3 Inton aldaw a panagtignayko, parmekenyonto dagiti managdakdakes ket arigdanto iti tapok a baddebaddekenyo.

4 “Laglagipenyo dagiti pannursuro ni Moises nga adipenko. Diyo liplipatan dagiti linteg ken bilin nga intedko kenkuana idiay Bantay Horeb a tungpalen dagiti amin nga Israelita.

5 “Ngemsakbay a dumteng ti naindaklan ken nakaal-alliaw nga aldaw ni Yahweh, ibaonkonto ni profeta Elias kadakayo.

6 Pagkakappiaennanto dagiti amma ken dagiti annak, ta no saan, siak ti umay ket dadaelek ti pagilianyo.”

Categories
San Mateo

San Mateo 1

Ti Kapuonan ni Jesu-Cristo

1 Daytoy ti libro ti kapuonan ni Jesu-Cristo a nagtaud iti kaputotan ni David, a nagtaud met iti kaputotan ni Abraham.

2-6a Manipud ken ni Abraham agingga ken ni Ari David, adtoy dagiti nailista a kaputotan: Abraham, Isaac, Jacob, Juda ken dagiti kakabsatna; sumaruno da Fares ken Zara nga annak ni Tamar; Esrom, Aram, Aminadab, Naason, Salmon, Boaz nga anak ni Rahab, Obed nga anak ni Ruth, Jesse ken ni Ari David.

6b-11 Dagitikaputotan manipud ken ni David agingga idi napagtalaw dagiti Israelita a kas balud ket naipanda idiay Babilonia: David, Solomon (putot ni David iti asawa idi ni Urias), Roboam, Abias, Asa,Josafat, Joram, Ozias, Joatam, Acaz, Hezekias, Manases, Amon,Josias, ken ni Jeconias agraman dagiti kakabsatna.

12-16 Dagiti kaputotan kalpasan ti pannakaipan dagiti Israelita idiay Babilonia agingga iti pannakayanak ni Jesus: Jeconias, Salatiel, Zorobabel, Abiud, Eliakim, Azor, Sadoc, Akim, Eliud, Eleazar, Matan, Jacob, Jose nga asawa ni Maria nga ina ni Jesus a maawagan iti Cristo.

17 Ngarud, adda 14 a kaputotan manipud ken Abraham agingga ken ni David. Sangapulo ket uppat met ti kaputotan manipud ken ni David agingga a naipan dagiti Israelita idiay Babilonia. Adda met 14 a kaputotan manipud pannakaipanda idiay Babilonia agingga iti pannakayanak ti Cristo.

Mayanak ni Jesu-Cristo

18 Kastoyti pakasaritaan ti pannakayanak ni Jesu-Cristo: Naitulag ni Maria nga inana a mayasawa ken ni Jose. Ngem sakbay ti panagkasarda, naammoan a masikogen ni Maria babaen iti pannakabalin ti Espiritu Santo.

19 Agsipud ta nasingpet a lalaki ni Jose a nakaitulaganna, ket dina kayat a maibabain ni Maria, pinanggepna nga isina a sililimed.

20 Ngem idi pampanunotenna daytoy, nagparang kenkuana ti anghel ti Apo iti maysa a tagtagainep. Kinunana, “Jose nga anak ni David, dika agamak a mangikasar ken ni Maria, ta aramid ti Espiritu Santo ti sikogna.

21 Ipasngaynantoti maysa a lalaki ket panaganamto iti Jesus, agsipud ta isalakannanto dagiti tattaona kadagiti basbasolda.”

22 Naaramid amin daytoy tapno matungpal ti insao ti Apo babaen iti profeta:

23 “Agsikogtoti birhen a balasang. Ipasngaynanto ti maysa a lalaki, ket mapanagananto iti Immanuel a kayatna a sawen, ‘Adda kadatayo ti Dios.’”

24 Idi makariing ni Jose, tinungpalna ti imbaga ti anghel ket inkasarna ni Maria.

25 Ngemsaanna a dinennaan ni Maria sakbay a nangipasngay iti anak a lalaki a pinanaganan ni Jose iti Jesus.

Categories
San Mateo

San Mateo 2

Sumarungkar dagiti Mamasirib

1 Nayanak ni Jesus iti ili a Betlehem idiay Judea, idi ni Herodes ti agdama nga ari. Saan a nabayag kalpasan ti pannakayanakna, adda mamasirib a lallaki a taga-daya a napan idiay Jerusalem.

2 “Sadino ti ayan ti ubing a nayanak nga ari dagiti Judio?” sinaludsodda. “Nakitami ti bituenna a nagparang idiay daya ket immaykami agdaydayaw kenkuana.”

3 Idi madamag daytoy ni Ari Herodes, napalalo ti pannakariribukna, kasta met ti tunggal maysa a taga-Jerusalem.

4 Pinaayabanna ngarud dagiti panguloen a papadi ken mamaestro iti Linteg ket sinaludsodna kadakuada no sadino ti pakayanakan ti Cristo.

5 “Iti ili a Betlehem idiay Judea,” insungbatda, “ta daytoy ti insurat ti profeta:

6 ‘Sika,Betlehem, iti daga ti Juda,

Saanka a maudi kadagiti ili iti Juda;

Ta tumaudto kenka ti maysa a pangulo

A mangaywan iti ilik nga Israel.’”

7 Inayaban ngarud ni Herodes dagiti sangaili ket kinasaritana ida iti nalimed. Sinaludsodna kadakuada no kaano ti panagparang ti bituen.

8 Iti kasta, imbaonna ida idiay Betlehem ket imbilinna kadakuada, “Inkay sapulen a naimbag ti ubing; no masapulanyo, ipakaammoyonto kaniak tapno innak met agdaydayaw kenkuana.”

9-10 Pimmanawda ket idi addada iti dalan, nakitada manen daydi bituen a nagparang idiay daya. Idi makitada, anian a ragsakda, anian a rag-oda! Indaldalanna ida agingga a nagsardeng iti ngatoen ti balay a yan ti ubing.

11 Simrekda iti balay ket nakitada ti ubing ken ni Maria nga inana. Nagparintumengda a nagrukbab kenkuana. Kalpasanna, inruarda dagiti sagsagutda a balitok, insenso ken mirra ket indatonda kenkuana.

12 Idi agawidda iti ilida, sabalin a dalan ti nagnaanda ta iti tagtagainep, pinakdaaran ida ti Dios a didan agsubli ken ni Herodes.

Agpaknida idiay Egipto

13 Kalpasan ti ipapanaw dagiti mamasirib, nagparang ken ni Jose ti maysa nga anghel ti Apo, iti maysa a tagtagainep. Kinunana, “Bumangonka; inka ipakni dagiti agina idiay Egipto. Agyankayo sadiay agingga’t ibagak a pumanawkayo. Ta sapulento ni Herodes ti ubing tapno papapatayna.”

14 Bimmangon ni Jose, innalana dagiti agina ket nagrubbuatda iti dayta a rabii a napan idiay Egipto.

15 Nagyandasadiay agingga’t ipapatay ni Herodes.

Naaramid daytoy tapno matungpal ti insao ti Apo babaen iti profeta, “Manipud Egipto inayabak ti anakko.”

Ti Pannakapapatay dagiti Ubbing

16 Napalalo a pungtot ni Herodes idi madlawna a sinikapan dagiti mamasirib. Iti kasta, imbilinna a mapapatay amin nga ubbing a lallaki nga agtawen iti dua wenno nababbaba iti ili a Betlehem ken kadagiti kabangibangna. Naibatay daytoy nga aramid iti kinuna dagiti sangaili maipapan iti panagparang ti bituen.

17 Natungpal ngarud ti impadto ni profeta Jeremias:

18 “IdiayRama, nangngeg ti panagikkis,

Dungdung-aw ken nasaem a sangsangit;

Dungdung-awan ni Raquel dagiti annakna,

Agsangsangit ket dina kayat ti maliwliwa,

Ta natayda amin a padapada.”

Agsublida manipud Egipto

19 Kalpasan a natay ni Herodes, nagparang iti tagtagainep ti maysa nga anghel ti Apo ken ni Jose idiay Egipto.

20 “Bumangonka,” kinuna ti anghel. “Yawidmon dagiti agina iti daga ti Israel. Natayen dagiti nagpanggep a mangpapatay iti ubing.”

21 Bimmangon ngarud ni Jose. Innalana dagiti agina ket nagsublida idiay Israel.

22 Ngem idi nadamag ni Jose a ni Arkelao nga anak ni Herodes ti simmukat nga ari ti Judea, nagbuteng a mapan sadiay. Babaen iti tagtagainep, napakdaaran manen ni Jose ket napan iti probinsia ti Galilea.

23 Nagtaengiti ili a maawagan iti Nazaret. Iti kasta, natungpal ti kinuna dagiti profeta, “Maawaganto iti Nazareno.”

Categories
San Mateo

San Mateo 3

Mangaskasaba ni Juan a Mammuniag

1 Iti dayta a tiempo, napan ni Juan a Mammuniag idiay let-ang ti Judea ket nangaskasaba.

2 “Agbabawikayokadagiti basbasolyo,” kinunana, “agsipud ta asidegen ti Pagarian ti langit.”

3 NiJuan ti kayat a sawen ni profeta Isaias idi kinunana,

“Idiay let-ang, adda mangipukpukkaw:

‘Isaganayo ti dalan ti Apo,

Pasayaatenyo ti pagnaanna!’”

4 Naabela dutdot ti kamelio ti kawes ni Juan. Sinturon a lalat ti barikesna. Dudon ken diro ti taraonna.

5 Napan kenkuana dagiti tattao a naggapu idiay Jerusalem ken entero a probinsia ti Judea, agraman amin a dagdaga iti agsumbangir iti karayan Jordan.

6 Nagbabawida a silalatak kadagiti basbasolda ket binuniagan ida ni Juan idiay karayan Jordan.

7 Idimakita ni Juan dagiti adu a Fariseo ken Saduceo tapno agpabuniagda kenkuana, kinunana kadakuada: “Dakayo a kaputotan ti uleg, siasino ti nangibaga a malisianyo ti dusa a dandanin idissuor ti Dios?

8 Ipakitayo babaen iti aramidyo a nagbabawikayon kadagiti basbasolyo.

9 Diyoipagarup a makalisikayo iti panagkunayo, ‘Uray ta amami ni Abraham.’ Ibagak kadakayo a kabaelan ti Dios a pagbalinen dagitoy a bato nga annak ni Abraham.

10 Naisagananti wasay a pangpukan kadagiti kayo agingga iti ramut; mapukan ket maipuor amin a kayo a di agbunga iti nasayaat.

11 Buniagankayo iti danum kas pakakitaan ti panagbalbaliwyo. Ngem ti umay a sumarsaruno kaniak buniagannakayto iti Espiritu Santo ken iti apuy. Dakdakkel ti pannakabalinna ngem siak; diak pay maikari a mangbitbit iti sandaliasna.

12 Addakenkuana ti bigao a pangtaep iti irik. Urnongen ken idulinnanto ti irikna iti kamalig; ngem puorannanto ti taep iti apuy a di maiddep.”

Mabuniagan ni Jesus

13 Dimteng ni Jesus idiay Jordan a naggapu idiay Galilea tapno pabuniagan ken ni Juan.

14 Ngem kayat a lapdan ni Juan ket kinunana ken Jesus, “Siak koma ti rebbengna a buniagam, ngem apay nga umayka kaniak?”

15 “Bay-am a maaramid ita daytoy tapno matungpalta ti amin a pagayatan ti Dios,” insungbat ni Jesus.

Immanamong ngarud ni Juan.

16 Apaman a nabuniagan ni Jesus, simmang-at a dagus manipud iti danum ket adtoy, naglukat kenkuana ti langit. Nakitana ti Espiritu ti Dios a bumabbaba a kas maysa a kalapati ket nagdisso kenkuana.

17 Ketkinuna ti maysa a timek a naggapu sadi langit, “Daytoy ti dungdungngoek nga Anak a pakaragsakak unay.”