Categories
Exodo

Exodo 16

Ti Mana ken dagiti Tukling

1 Manipud Elim, nagrubbuat ti entero a bunggoy dagiti Israelita. Iti maika-15 nga aldaw iti maikadua a bulan kalpasan ti ipapanawda idiay Egipto, dimtengda iti let-ang ti Sin nga adda iti nagbaetan ti Elim ken Sinai.

2 Nagreklamoda iti maibusor kada Moises ken Aaron idiay let-ang.

3 “Pinataynakami la koman tiApoidi idiay Egipto,” kinunada. “Sadiay, agum-umakam idi a mangan iti karne ken dadduma pay a taraon. Ngem inyegdakami ditoy let-ang tapno patayendakam iti bisin.”

4 Kinunani Yahweh ken ni Moises, “Pagtudoekto iti taraon nga agpaay kadakayo amin. Masapul a rummuar dagiti tattao nga agurnong iti umdas a kanenda iti tunggal aldaw. Kastoy ti panangsuotko kadakuada no tungpalenda met laeng dagiti bilinko.

5 Iti maikanem nga aldaw, masapul a doblienda ti masansan nga urnongenda iti inaldaw ket isaganada.”

6 Iti kasta, kinuna da Moises ken Aaron kadagiti Israelita, “Ita a rabii, maammoanyo a tiApoti nangiruar kadakayo idiay Egipto.

7 Inton agsapa no bigat, makitayonto ti dayag tiApo. Nangngegna ti panagsaoyo iti maibusor kenkuana. Wen, isu ti nagsaoanyo iti dakes ta ipatpatungpalmi laeng dagiti bilinna.”

8 Innayon pay ni Moises, “Iti rabii, mangted tiApoiti karne a sidayo. Iti bigat, ikkannakayo iti tinapay ingganat’ mapnekkayo agsipud ta nangngegna ti nakaro a panagsaoyo iti maibusor kenkuana. No agreklamokayo kadakami, awan sabali a pagreklamoanyo no di tiApo.”

9 Kinuna ni Moises ken ni Aaron, “Ibagam kadagiti amin a tattao a dumatagda itiApota nangngegna dagiti reklamoda.”

10 Idi madama a kasasao ni Aaron dagiti tattao, timmaliawda iti let-ang ket pagammoan nagparang ti dayag ni Yahweh iti ulep.

11 Kinuna ni Yahweh ken ni Moises,

12 “Nangngegko ti reklamo dagiti Israelita. Ibagam kadakuada, nga iti sumipnget, addanto karne a sidada, ket iti agsapa, agum-umadanto a mangan iti tinapay. Iti kasta, maammoandanto a siak ni Yahweh a Diosda.”

13 Iti rabii, dimteng ti adu a pogo ket pinunnoda ti kampo. Iti agsapa, naaplagan iti linnaaw ti aglawlaw iti kampo.

14 Idi awanen ti linnaaw, adda dagiti naingpis a banag a kasla nagbalay a danum iti rabaw ti daga.

15 Idimakita dagiti Israelita, dida ammo no ania dagitoy ket nagsisinnaludsodda, “Ania dagitoy?”

“Daytoy ti taraonyo nga inted tiApo,” kinuna ni Moises kadakuada.

16 “Imbilin tiAponga agurnong ti tunggal maysa iti umdas a kanenna. Maysa a kasukatti agpaay iti tunggal kameng ti familiana.”

17 Inaramid daytoy dagiti Israelita. Adda dagiti nagala iti adu. Adda met dagiti bassit ti innalana.

18 Idisukatenda, saan a nagsobra dagiti nagurnong iti adu ket saan met a nagkurang dagiti bassit ti innalana. Nagurnong ti tunggal maysa iti apag-isu a masapulna.

19 Kinuna ni Moises kadakuada, “Awan ti agidulin iti tinapay nga agpaay iti sumuno nga aldaw.”

20 Ngem adda dagiti saan a nangipangag ken ni Moises. Nagibatida iti para bigat ngem inigges ken nabangles ket nakaunget ni Moises kadakuada.

21 Tunggal agsapa, agala dagiti tattao iti umdas a kasapulan ti tunggal maysa. Ngem no pumudot ti init, marunaw dagiti saan a naala.

22 Iti maikanem nga aldaw, agurnongda iti mamindua ti kaadu ti makan—dua a kasukat ti tunggal tao. Napan amin a pangulo dagiti umili ken ni Moises ket impadamagda daytoy kenkuana.

23 Kinunani Moises kadakuada, “Kuna tiApoa nasantoan nga aldaw a panaginana inton bigat. Naidaton daytoy kenkuana. Imbilinna a lutoenyo ti kayatyo a lutoen—yorno wenno ipaburekyo. Idulinyo ti teddayo para iti sumuno a bigat.”

24 Inaramidda ti imbilin ni Moises. Saan a nabangles wenno inigges dagiti natda nga indulinda.

25 Iti sumuno nga aldaw, kinuna ni Moises, “Kanenyo daytoy ita nga aldaw agsipud ta daytoy ti Aldaw a Panaginana a maipaay itiApo. Awan ti masarakanyo a makan iti ruar ti kampo.

26 Iti las-ud ti innem nga aldaw, agurnongkayo iti makan ngem iti maikapito, awanto ti maalayo.”

27 Iti maikapito nga aldaw, adda latta dagiti mapan nagala iti makan ngem awan nasarakanda.

28 Kinuna ngarud ni Yahweh ken ni Moises, “Inton-ano ti panagsardengyo a mangsukir kadagiti bilinko?

29 Laglagipenyo a siak ni Yahweh, inikkankayo iti Aldaw a Panaginana. Isut’ gapuna nga iti maikanem nga aldaw, ikkankayo iti kanenyo nga umanay iti dua nga aldaw. Agyan ti tunggal maysa iti balayna iti maikapito nga aldaw. Awan ti rummuar.”

30 Iti kasta, naginana dagiti tattao iti maikapito nga aldaw.

31 Manati impanagan dagiti Israelita iti dayta a taraon. Mayarig iti bassit a bukel a puraw ket kasla kankanen nga adda dirona.

32 Kinuna ni Moises, “Imbilin tiApoa mangidulintayo iti mana tapno makitanto dagiti kaputotantayo no ania ti taraon nga impakanna kadatayo iti let-ang kalpasan nga inruarnatayo idiay Egipto.”

33 Kinunani Moises ken ni Aaron, “Mangalaka iti putik. Kargaam iti maysa a kasukatiti mana samo ikabil iti sango tiApoket maidulin tapno makitanto dagiti kaputotanyo.”

34 Kas imbilin ni Yahweh ken ni Moises, inkabil ni Aaron ti putik iti sangoanan ti Lakasa ti Tulag tapno maidulin.

35 Uppata pulo a tawen a mana ti kinkinnan dagiti Israelita agingga a dimtengda iti daga ti Canaan ket nagnaedda sadiay.

36 (Omer ti pagsukatanda idi nga apagkasangapulo iti efa a dandani dua a litro ti kaibatoganna.)

Categories
Exodo

Exodo 17

Ti Danum nga Aggapu iti Bato

1 Pimmanawti amin nga Israelita iti let-ang ti Sin. Nagalis-alisda iti nadumaduma a disso kas bilin ni Yahweh. Nagkampoda idiay Refidim ngem awan ti danum sadiay a mabalin nga inumen dagiti tattao.

2 Iti kasta, pinabasolda ni Moises. “Ikkannakam iti inumen,” kinunada.

“Apay a pabasolendak?” kinuna ni Moises. “Apay a suotenyo tiApo?”

3 Ngem mawaw unay dagiti tattao ket intuloyda ti nagreklamo. Kinunada, “Apay ngamin nga inruarnakami idiay Egipto? Tapno patayennakami iti waw, agraman dagiti annakmi ken dagiti animalmi?”

4 Immawag ni Moises ken ni Yahweh. Kinunana, “Ania ti aramidek kadagitoy a tattao? Kayatdakon a batoen.”

5 Kinuna ni Yahweh ken ni Moises, “Mangikuyogka iti sumagmamano a pangulo ti Israel ket umun-unakayo a magna ngem dagiti tattao. Itugotmo ti sarukod nga imbautmo idi iti Karayan Nile.

6 Agtakderakto iti imatangyo iti bato iti Bantay Horeb. Ibautmo ti sarukodmo iti bato ket agpussuakto iti danum nga inumen dagiti tattao.”

Kasta ti inaramid ni Moises iti imatang dagiti pangulo ti Israel.

7 Napanaganan ti disso iti Massa ken Meribagapu ta nakisuppiat dagiti Israelita ken sinuotda ni Yahweh idi saludsodenda, “Adda met la tiApokadatayo wenno awan?”

Ti Pannakigubat kadagiti Amalekita

8 Dimteng dagiti Amalekita ket ginubatda dagiti Israelita idiay Refidim.

9 Kinuna ni Moises ken ni Josue, “Pumilika kadagiti lallaki a kaduam a mapan manggubat kadagiti Amalekita inton bigat. Agtakderakto iti tapaw ti turod a nakaiggem iti sarukod nga inted ti Dios.”

10 Inaramid ni Josue ti imbilin ni Moises ket napanna ginubat dagiti Amalekita. Simmang-at met da Moises, Aaron ken Hur iti turod.

11 No nakangato dagiti takiag ni Moises, mangab-abak dagiti Israelita, ngem no ibabana, dagiti met Amalekita ti mangab-abak.

12 Idi maktangan dagiti takiag ni Moises, nangala da Aaron ken Hur iti bato sada inkabil a nagtugawanna idinto a nagsinsinanda nga impangato dagiti imana. Iniggamanda dagiti imana agingga a limnek ti init.

13 Kastoy ti panangparmek ni Josue kadagiti Amalekita.

14 Kalpasanna,kinuna ni Yahweh ken ni Moises, “Isuratmo ti pakasaritaan ti napasamak tapno saan a malipatan. Ibagam ken ni Josue nga ikisapkonto dagiti Amalekita.”

15 Nangbangon ni Moises iti altar a pinanagananna iti Yahweh-nissi.

16 Kinunana, “Ipangatom ti bandera.Saanto nga agsardeng ni Yahweh a manggubat kadagiti Amalekita!”

Categories
Exodo

Exodo 18

Bisitaen ni Jetro ni Moises

1 Nadamag ni Jetro, ti padi ti Midian ken katugangan ni Moises, ti amin nga impaay ti Dios ken ni Moises ken kadagiti Israelita idi inruar ni Yahweh ida idiay Egipto.

2 Itikasta, napan ni Jetro ken ni Moises. Intugotna ti asawa ni Moises, isu ni Sefora a nabati idi,

3 agramanda Gersom ken Eliezer nga annakda ken Moises. (Napanaganan ti maysa iti Gersomgapu ta kinuna idi ni Moises, “Ganggannaetak idi iti sabali a daga.” Napanaganan met ti maysa iti Eliezer

4 gapu ti kinuna ni Moises, “Ti Dios ni amak ti timmultulong kaniak ket inlisinak idi patayennak koma ti ari ti Egipto.”)

5 Dimteng da Jetro, Sefora ken dagiti dua nga annak ni Moises iti bantay ti Dios iti let-ang a nagkampoan ni Moises.

6 Pinakaammoanna ni Moises iti kaaddada isut’ gapuna a

7 rimmuar ni Moises a nangsabat iti katuganganna. Kinablaawanna sana inagkan. Nagpinnakomustada iti kasasaad ti salun-at ti tunggal maysa sada simrek iti tolda ni Moises.

8 Imbaga ni Moises ken ni Jetro ti amin nga inaramid ni Yahweh iti ari ken iti amin nga Egipcio tapno ispalenna dagiti Israelita. Imbagana met kenkuana ti rigat a naglasatan dagiti tattao iti dalan ken no kasano ti panangilasat ni Yahweh kadakuada.

9 Naragsakan ni Jetro a nakangngeg iti amin dagitoy

10 ket kinunana, “Madaydayaw tiApoa nangisalakan kadakayo kadagiti Egipcio ken iti ari! Madaydayaw tiApoa nangispal kadagiti tattao iti panangtagabu dagiti Egipcio.

11 Ita, ammokon a nabilbileg tiApongem dagiti amin a didiosen gapu iti panangispalna kadagiti Israelita iti kinaranggas dagiti Egipcio.”

12 Nangidatag ni Jetro iti daton a mapuoran ken sabsabali pay a sakrifisio a maipaay iti Dios. Kimmuyog kenkuana ni Aaron ken dagiti amin a panglakayen ti Israel a napan iti nasagradoan a pannangan a naisagana a pagdaydayaw iti Dios.

Ti Pannakadutok dagiti Hues

13 Iti sumuno nga aldaw, makumikom ni Moises iti panangrisutna kadagiti riri dagiti tattao. Nagmalmalem a napan kenkuana dagiti tattao.

14 Idi makita ni Jetro a katuganganna ti amin nga asikasoen ni Moises, sinaludsodna, “Ania daytoy ar-aramidem para kadagiti tattao? Apay a bukbukodam ti mangasikaso kadagitoy ket agmalmalem nga umay ditoy dagiti tattao tapno makiumanda kenka?”

15 Kinuna ni Moises, “Masapul nga aramidek daytoy agsipud ta umayda ammoen kaniak ti bilin ti Dios.

16 No adda agriri, umayda kaniak, ikeddengko no siasino kadakuada ti husto ket ibagak dagiti bilin ken linteg ti Dios.”

17 “Saan a husto ti ar-aramidem,” imbalakad ni Jetro.

18 “Parparigatem laeng ta bagim, kasta met dagiti tattao. Dimo mabukodan daytoy a trabaho.

19 Denggem ti naimbag nga ibalakadko ket tulongannakanto ti Dios. Masapul a sika ti dumatag iti Dios a kas pannakabagi dagiti tattao ket yumanmo kenkuana dagiti parikutda.

20 Masapul nga isurom kadakuada dagiti bilin ti Dios ket ilawlawagmo no kasano ti rumbeng a panagbiagda ken no ania ti nasken nga aramidenda.

21 Ngem saan la a dayta. Pumilika met kadagiti makabael a lallaki. Dutokam ida a kas pangulo dagiti tattao; adda mangipangulo kadagiti rinibu, kadagiti ginasut, kadagiti saglilimapulo, ken kadagiti sagsasangapulo. Masapul a managbutengda iti Dios, mapagtalkan ken di mapasuksokan.

22 Agserbida a kas permanente a hues kadagiti tattao. Mabalin nga idatagda kenka dagiti narikut a kaso, ngem isuda ti makaammo a mangibanag kadagiti babassit a riri. Nalaklakanto ti trabahom ket mapalag-anankanto iti panangtulongda kenka.

23 No aramidem daytoy, kas ibilin ti Dios, dikanto marigatan ket agawidto dagiti tattao a naibanag dagiti parikutda.”

24 Tinungpal ni Moises ti imbalakad ni Jetro.

25 Nangpili kadagiti makabael a lallaki kadagiti amin nga Israelita. Dinutokanna ida a kas pangulo dagiti rinibu, dagiti ginasut, dagiti saglilimapulo, ken dagiti sagsasangapulo.

26 Nagserbida a kas permanente a hues kadagiti tattao. Ni Moises ti pangidataganda kadagiti narikut a kaso ngem isuda ti mangibanag kadagiti babassit a riri.

27 Kalpasanna, nagpakada ni Jetro ken ni Moises ket nagsubli iti ilina.

Categories
Exodo

Exodo 19

Dagiti Israelita idiay Bantay Sinai

1-2 Pimmanaw dagiti Israelita iti Refidim ket iti umuna nga aldaw iti maikatlo a bulan kalpasan ti ipapanawda idiay Egipto, dimtengda iti let-ang ti Sinai. Nagkampoda iti arisadsad ti Bantay Sinai, ket

3 simmang-at ni Moises iti bantay tapno makiuman iti Dios.

Inawagan ni Yahweh ni Moises manipud iti bantay ket imbagana kenkuana ti sawenna kadagiti Israelita a kaputotan ni Jacob:

4 “Nakitayo ti inaramidko kadagiti Egipcio ken no kasano ti panangawitko kadakayo—kaslaak la agila a nangitayab kadagiti sibong a nangipan kadakayo ditoy.

5 Ita,no agtulnogkayo kaniak ket salimetmetanyo ti tulagko, dakayonto dagiti tattaok. Kukuak ti entero a daga, ngem dakayto dagiti napili a tattaok,

6 tattaoa naikonsagrar nga agpaay laeng kaniak ket agserbikayonto kaniak a kas papadi.”

7 Simmalog ngarud ni Moises ket inayabanna dagiti amin a panglakayen dagiti tattao. Imbagana kadakuada ti amin nga imbilin ni Yahweh.

8 Sangsangkamaysa a simmungbat dagiti amin a tattao a tungpalenda ti amin nga imbaga ni Yahweh. Ket impakaammo ni Moises ken ni Yahweh ti insungbat dagiti tattao.

9 Kinuna ni Yahweh ken ni Moises, “Umayakto kenka iti napuskol nga ulep tapno mangngeg dagiti tattao a makisasaoak kenka ket mamatida kenkan manipud ita.”

Imbaga ni Moises ken ni Yahweh ti insungbat dagiti tattao

10 ket kinuna ni Yahweh kenkuana, “Inka kadagiti tattao ket ibagam a dalusanda dagiti bagida ita ken inton bigat tapno agsaganada nga agdaydayaw. Masapul a labaanda dagiti pagan-anayda

11 ket sisasaganadanton iti maikatlo nga aldaw. Iti dayta nga aldaw, bumabaakto iti Bantay Sinai tapno makitadak dagiti amin a tattao.

12 Mangikabilkantoiti beddeng iti aglikmut ti bantay a pagpatinggaan dagiti tattao. Ibagam kadakuada a dida sumang-at wenno umasideg iti bantay. No adda bumaddek iti bantay, masapul a mapapatay:

13 Maubor wenno mapana agingga a matay ket maiparit ti mangsagid kenkuana. Kasta ti aramidenyo iti tao wenno iti animal; masapul a mapapatay. Ngem inton mapuyot ti tangguyob, sumang-atton dagiti tattao iti bantay.”

14 Simmalog ni Moises iti bantay ket pinagsaganana dagiti tattao nga agdaydayaw. Isu a linabaanda dagiti pagan-anayda,

15 ket imbagana kadakuada, “Nakasaganakayton iti maikatlo nga aldaw. Dikay pay la makikaidda iti assawayo.”

16 Itiagsapa iti maikatlo nga aldaw, naggurruod ken nagkimat iti bantay. Nagparang ti napuskol nga ulep. Immaweng ti nakapigpigsa nga uni ti trumpeta. Nagpigerger dagiti amin a tattao iti kampo gapu iti buteng.

17 Indauloan ida ni Moises a rimmuar iti kampo tapno sabtenda ti Dios. Nagtakderda iti arisadsad ti bantay.

18 Nakumotan ti Bantay Sinai iti asuk gapu ta bimmaba sadiay ni Yahweh babaen iti apuy. Nagpangato ti asuk a kas iti asuk ti urno ket kasta unay ti panagkintayeg ti bantay.

19 Pimmigsa a pimmigsa ti uni ti trumpeta. Nagsao ni Moises ket sinungbatan ti Dios babaen iti panangibulosna iti gurruod.

20 Bimmaba ni Yahweh iti tapaw ti Bantay Sinai, ket inayabanna ni Moises a sumang-at. Napan ni Moises iti tapaw,

21 ket kinuna ni Yahweh kenkuana, “Sumalogka ket ballaagam dagiti tattao a dida labsan ti beddeng nga umay kumita kaniak. No labsanda, adunto kadakuada ti matay.

22 Uray dagiti papadi nga umasideg kaniak, masapul a dalusanda dagiti bagbagida, ta no saan, dusaek ida.”

23 Kinuna ni Moises ken ni Yahweh, “Saan a mabalin a sumang-at dagiti tattao gapu ta imbilinmo kadakami nga ibilangmi a nasagradoan ti bantay ken mangikabilkami iti beddeng iti likmutna.”

24 Ngem kinuna ni Yahweh kenkuana, “Sumalogka ket inka alaen ni Aaron. Ngem saan a labsan dagiti papadi ken dagiti tattao ti beddeng nga umasideg kaniak ta dusaek ida no aramidenda ti kasta.”

25 Simmalog ngarud ni Moises ket imbagana kadagiti tattao ti sinao tiApo.

Categories
Exodo

Exodo 20

Dagiti Sangapulo a Bilin

1 Nagsao ti Dios ket adtoy dagiti balikasna:

2 “Siak ni Yahweh a Diosyo a nangiruar kadakayo idiay Egipto, iti daga a nakatagabuanyo.

3 “Dika agdaydayaw iti sabali a dios no di laeng siak.

4 “Dikaagaramid iti agpaay kenka a kinitikitan a ladawan wenno aniaman a kapadpada ti parsua iti langit wenno iti daga wenno iti danum nga adda iti uneg ti daga.

5 Dikaagrukbab wenno agdaydayaw iti uray ania a kinitikitan a ladawan agsipud ta siak, ni Yahweh a Diosmo, ket managimonak. Dusaek dagiti gumura kaniak, agraman dagiti annakda agingga iti maikatlo ken maikapat a kaputotan.

6 Ngem ipakitak ti panagayatko iti rinibu a kaputotan dagiti agayat kaniak ken mangtungpal kadagiti bilinko.

7 “Dimoaramaten ti naganko iti dakes a panggep gapu ta, siak, ni Yahweh a Diosmo, dusaek ti siasinoman a barengbareng ti panangusarna iti naganko.

8 “Ngilinemti Aldaw a Panaginana ket ibilangmo a nasantoan.

9 Innemnga aldaw ti panagtrabahom,

10 ngem aginanaka iti maikapito nga aldaw a maipaay kaniak. Dika agtrabaho iti dayta nga aldaw—sika wenno dagiti annakmo wenno dagiti tagabum wenno dagiti animalmo wenno dagiti ganggannaet nga agnaed iti pagiliam.

11 Itilas-ud ti innem nga aldaw, siak, ni Yahweh, inaramidko ti langit, daga, dagiti baybay agraman dagiti amin a linaonda, ngem naginanaak iti maikapito nga aldaw. Isut’ gapuna a siak, ni Yahweh, binendisionak ti Aldaw a Panaginana ket intuyangko nga aldaw a nasantoan.

12 “Dayawemda amam ken inam tapno napaut ti panagbiagmo iti daga nga itedko kenka.

13 “Dikamamapatay.

14 “Dikamakikamalala.

15 “Dikaagtakaw.

16 “Dikaagsaksi iti ulbod a maibusor iti padam a tao.

17 “Dimoaguman ti balay ti sabali a tao. Dimo aguman ti asawana, dagiti tagabuna, dagiti bakana, dagiti asnona wenno ti aniaman a sanikuana.”

Ti Buteng dagiti Tattao

18 Idimangngeg dagiti tattao ti gurruod ken ti tangguyob, idi makitada ti kimat ken ti umas-asuk a bantay, nagpigergerda iti buteng ket immadayoda.

19 Kinunada ken ni Moises, “No sika ti makisao kadakami, dumngegkami. Ngem saan koma a ti Dios amangan no mataykami.”

20 “Dikay agbuteng,” kinuna ni Moises. “Immaynakayo la suoten ti Dios tapno kanayon a tungpalenyo ti saona ket dikay agbasol.”

21 Nupay kasta, nagtalinaed dagiti tattao a nakatakder iti adayo ket ni la Moises ti immasideg iti napuskol nga ulep a yan ti Dios.

Dagiti Annuroten iti Altar

22 Imbilin ni Yahweh ken ni Moises nga ibagana daytoy kadagiti Israelita: “Nakitayo ti pannakisaok kadakayo manipud langit.

23 Dikay agaramid kadagiti didiosenyo a pirak wenno balitok a pagdaydayawanyo a kas iti panagdayawyo kaniak.

24 Yaramidandak iti altar a daga ket sadiay ti pangpuoranyo kadagiti datonyo para iti kappia ken kadagiti karnero ken baka a sakrifisioyo para iti panagkakadua.Umaykayto bendisionan iti sadinoman a lugar nga itudingko a pagdaydayawanyo kaniak.

25 Noyaramidandak iti altar a bato, diyo usaren dagiti natikapan a bato agsipud ta no aramatenyo dagiti paetyo, matulawan ti altar nga aramidenyo.

26 Dikay agaramid iti altar nga adda agdanna ta makita ti kinalamolamoyono umulikayo.”

Categories
Exodo

Exodo 21

Dagiti Linteg maipapan kadagiti Tagabu

1 “Ipaulogmo dagitoy a linteg kadagiti Israelita:

2 Nogumatangkayo iti lalaki a tagabu a Hebreo, agserbinto kadakayo iti innem a tawen. Iti maikapito a tawen, mawayawayaanto nga awan bayadanna.

3 No awan asawana idi magatang, pumanawto met nga awan asawana. Ngem no adda asawana idi magatang, pumanawto agraman ti asawana.

4 No ikkan ti amongna iti asawa ket aganak, kukua ti amongna ti asawana ken ti tunggal anakna. Ti lalaki laeng ti pumanawto.

5 Ngem no dina kayat gapu ta ay-ayatenna ti amongna, ti asawa ken dagiti annakna, ket dina kayat ti mawayawayaan,

6 ipanto ngarud ti amongna iti lugar a pagdaydayawan. Sadiay, pagtakderento ti amongna iti ruangan wenno iti baotek ti ruangan ket tebbengannanto. Ket tagabunanto agingga’t tungpal biagna.

7 “No ilako ti maysa nga ama ti anakna a babai a kas tagabu, saanto a mawayawayaan daytoy a kas iti pannakawayawaya ti tagabu a lalaki.

8 No mailako iti agpanggep a mangasawa kenkuana ngem dinto kayat ti lalaki, masapul a sakaen met laeng ti amana. Awan kalintegan ti amongna a mangilako kenkuana kadagiti ganggannaet ta saan a nasayaat ti panangtratarna kenkuana.

9 No gumatang ti maysa a tao iti babai a tagabu nga ipaasawana iti anakna, masapul nga ibilangna a kas bukodna nga anak.

10 No mangasawa dayta a lalaki iti sabali, masapul nga ituloyna nga ited ti sigud a taraon, kawes ken kalinteganna.

11 No dina tungpalen dagitoy a pagrebbengan, masapul a wayawayaanna ti babai ket saanen a masapul nga agbayad ti babai iti pannakawayawayana.

Dagiti Linteg maipapan iti Kinaranggas

12 “Siasinomana mangkabil iti maysa a tao a pakaigapuan ti ipapatayna, rumbeng met a mapapatay.

13 Nodina inggagara wenno pinanggep a patayen, mabalinna ti mapan agkamang iti lugar nga itudingkonto ket awanto ti pakaan-annoanna sadiay.

14 Ngem no makapungtot ti maysa a tao ket igagarana a patayen ti sabali, masapul a mapapatay uray no agkamang iti altarko.

15 “Siasinoman a mangkabil iti ama wenno inana, rumbeng a mapapatay.

16 “Siasinomana mangkidnap iti maysa a tao tapno ilako wenno tagabuenna, rumbeng a mapapatay.

17 “Siasinomana mangilunod iti ama wenno iti inana, rumbeng a mapapatay.

18 “No adda agapa ket madunor ti maysa babaen iti bato wenno gemgemna, saan a madusa no saan a matay ti dinangranna. Ngem no maidalit ti nadangran,

19 ket mabalinna ti bumangon ken magna uray no agsarukod, bayadan ti nakadunor dagiti aldaw a napukawna ken taripatoenna agingga nga umimbag.

20 “Siasinoman a mangpang-or iti tagabuna, lalaki man wenno babai, rumbeng a madusa no matay a dagus ti pinang-orna.

21 Ngem no saan a matay ti tagabu kalpasan ti maysa wenno dua nga aldaw, saan a madusa ti amo ta umdasen a dusana ti pannakapukaw ti tagabuna.

22 “No adda agkakabil a lallaki ket masaktanda ti maysa a masikog a pakaigapuan ti pannakaalisna ngem awanen ti sabali a dunorna, mamulta ti nakadunor iti gatad nga ikeddeng ti asawa ti nadangran, kas mayannurot iti inkeddeng ti ukom.

23 Ngem no madunor ti babai, madusa ti nangdangran: biag iti biag,

24 mataiti mata, ngipen iti ngipen, ima iti ima, saka iti saka,

25 puor iti puor, sugat iti sugat, dunor iti dunor.

26 “No kabilen ti maysa a tao ti tagabuna, lalaki man wenno babai ket nabuldinganna, rebbengna a wayawayaan ti tagabu a kas bayad ti matana.

27 Ket no natuppolanna ti tagabu, rebbengna a wayawayaan a kas bayad ti ngipenna.

Pagrebbengan dagiti Agtagikua

28 “No matay ti siasinoman a sangdoen ti baka, masapul a maubor ti baka agingga a matay ket saan a sidaen ti karnena; nupay kasta, saan a madusa ti akimbaka.

29 Ngem no sumasangdo ti baka ken napakdaaran ti akinkukua ngem dina ipupok, ket matay ti tao a sinangdona, maubor ti baka agingga a matay; mapapatay pay ti akinkukua.

30 Ngem no mapalubosan nga agmulta ti akimbaka tapno maispal ti biagna, bayadanna ti amin a naikeddeng a pagbayad.

31 No ubing a lalaki wenno babai ti mapatay ti baka, daytoy met laeng a linteg ti masurot.

32 No tagabu a lalaki wenno babai ti mapatayna, agbayad ti akimbaka iti 30 a bagi ti pirak iti among ti tagabu ket mabato ti baka agingga a matay.

33 “No ikkaten ti maysa a tao ti kalub ti abut a pagurnongan iti danum wenno agkali iti sabali sa dina kaluban ket adda baka wenno asno a matnag ditoy,

34 masapul a bayadanna ti animal. Itedna ti kuarta iti akinkukua iti abut ket alaenna ti natay nga animal.

35 No ti baka ti maysa a tao patayenna ti baka ti sabali, mailako ti sibibiag a baka sada pagguduaan ti naglakoanda. Pagguduaanda met ti natay nga animal.

36 Ngem no ugali ti baka ti sumangdo ngem saan nga ipupok ti akimbaka, masapul a sukatanna iti sibibiag a baka, ket kukuana metten ti natay nga animal.

Categories
Exodo

Exodo 22

Dagiti Linteg iti Panagbayad

1 “No takawen ti maysa a tao ti maysa a baka wenno karnero ken partienna wenno ilakona, lima a baka ti isukatna iti maysa a baka ken uppat met a karnero ti isukatna iti maysa a karnero.

2-4 Masapul a bayadanna ti tinakawna. No awan ti pagbayadna, isu ti mailako. No ti natakaw nga animal, baka man wenno asno wenno karnero, ket masarakan a sibibiag iti ikutna, dua ti isukatna.

“No matiliwan ti mannanakaw nga agtaktakaw iti rabii iti maysa a balay ket mapapatay, awan sungsungbatan ti pimmatay. Ngem no mapasamak daytoy iti aldaw, makabasol ti pimmatay.

5 “No ipaarab ti maysa a tao dagiti animalna ket makabulosda sada mapan araben ti mulati sabali a tao, masapul nga isukatna dagiti kasayaatan nga apit iti bukodna a talon wenno kaubasan.

6 “No agpuor ti maysa a tao iti talonna ket agkayamkam ti apuy a mangsilmut kadagiti ruot iti talon ti sabali ket mapuoran dagiti dumakdakkel a trigo wenno dagiti pempen a dawa, masapul a bayadan ti nagpuor ti amin a nadadael.

7 “No italek ti maysa a tao ti kuarta wenno aniaman a sanikuana iti sabali a tao ket matakaw dagitoy iti balay ti nagpaidulinanna, doble ti pagbayad ti matiliwan a nangtakaw.

8 No saan a masarakan ti nagtakaw, maidatag ti nagpaidulinanna iti Dios ket isapatana a dina tinakaw dagiti sanikua.

9 “Amin a kaso a pakaseknan iti sanikua, baka man wenno asno wenno karnero wenno pagan-anay wenno aniaman a napukaw, maipanda iti imatang ti Dios. Maidatag iti pagdaydayawan dagiti mangibaga a kukuada ti sanikua, ket ti siasinoman a sentensiaan ti Dios, doble ti bayadanna iti pudno nga agtagikua.

10 “No umanamong ti maysa a tao nga aywananna ti asno wenno baka wenno karnero wenno uray ania nga animal ti sabali a tao, ket matay ti animal wenno masugatan wenno maitalaw, no awan ti makasaksi iti naaramid, masapul nga

11 agsapata ti nagan tiApoiti disso a pagdaydayawan a dina tinakaw ti animal. No saan a natakaw ti animal, ibilang ti akinkukua a kas pukawna ket saan a masapul nga agbayad ti nangaywan.

12 Ngem no matakaw ti animal, masapul nga agbayad ti agaywan.

13 No pinatay dagiti narungsot nga animal, masapul nga ipakita ti agaywan ti narangrangkay nga animal a kas pammaneknek. Saan a nasken a bayadanna ti pinatay dagiti narungsot nga animal.

14 “No buloden ti maysa a tao ti animal ti sabali ket masugatan wenno matay a saan a nakita ti akinkukua, masapul a bayadanna ti animal.

15 Ngem no mapasamak ti kasta iti imatang ti akinkukua, saan a masapul nga agbayad ti nangbulod. No naabangan ti animal, umdas ti abangna a pagbayadna iti natay nga animal.

Linlinteg iti Moralidad ken Relihion

16 “Nosulisogen ti maysa a lalaki ti balasang a birhen a saan a naitulag a mayasawa ket kaiddaenna, masapul nga ikasarna ti babai kalpasan iti pannangtedna iti sab-ong.

17 Ngem no madi ti ama ti babai nga ipaasawa ti anakna, masapul nga ited ti lalaki ti naituding a gatad ti sab-ong; yawatna daytoy iti ama ti babai.

18 “Papatayenyoti babai a manggagamud.

19 “Papatayenyoti siasinoman a makikaidda iti animal.

20 “Papatayenyoti siasinoman nga agidaton iti uray ania a didiosen, ta siak laeng, ni Yahweh, ti pagidatonan.

21 “Diyoranggasan wenno idadanes ti ganggannaet. Laglagipenyo a ganggannaetkayo met idi idiay Egipto.

22 Diyo irurumen ti uray siasinoman a balo wenno ulila.

23 No aramidenyo ti kasta, siak, ni Yahweh, ipangagkonto ti asug dagiti agpatulong kaniak.

24 Sumgedto ti pungtotko ket patayenkayto iti gubat. Mabalonto dagiti assawayo ket maulilanto dagiti annakyo.

25 “Noumutang kadakayo ti siasinoman a napanglaw a tattaok, diyo tultuladen ti usurero a paanakanna ti ipautangna.

26 Noalaenyo ti kagay ti siasinoman a kas pangigawidyo iti utangna, masapul nga isubliyo sakbay a lumnek ti init;

27 ta dayta laeng ti pagimengna pangpapudot iti bagina. Anianto pay ti pagturogna? Inton umasug kaniak a patulongan, ipangagkonto agsipud ta manangngaasiak.

28 “Dikayagsao iti maibusor iti Diosket diyo ilunod ti siasinoman a panguloyo.

29 “Itedyo kaniak a dagus dagiti daton nga agtaud iti apit, iti arak ken iti lanayo no tiempo ti panagited.

“Itedyo kaniak ti inauna nga anakyo a lalaki,

30 agraman ti inauna a kalakian dagiti baka ken karneroyo; agyan pay laeng ti urbon iti inana iti las-ud ti pito nga aldaw ket maidaton kaniak iti maikawalo nga aldaw.

31 “Dakayodagiti tattaok, isu a dikay agsida iti karne ti animal a pinatay dagiti narungsot nga ayup. Itedyo ketdi dagitoy kadagiti aso.

Categories
Exodo

Exodo 23

Ti Hustisia ken ti Umisu a Panangikeddeng

1 “Dikayagiwaras iti sao nga awan kinapudnona. Dikay tulongan ti tao a nagbasol babaen iti panagsaksiyo iti ulbod.

2 Diyo suroten ti kaaduan no agaramidda iti dakes wenno agulbodda tapno dadaelenda ti hustisia.

3 Ngemdiyo ipakita nga ayonanyo ti napanglaw bayat ti pannakaidarumna.

4 “Nomakitayo a nakabulos ti baka wenno asno ti kabusoryo, tiliwenyo ket isubliyo kenkuana.

5 No nakusbo ti asnona gapu iti nadagsen nga awitna, diyo baybay-an ngem tulonganyo ketdi a mangpatakder.

6 “Nomaisaklang ti napanglaw, diyo ipaidam ti hustisia kenkuana.

7 Dikay agpabasol no awan pammaneknekyo. Diyo papatayen ti tao a nalinteg ken awan basolna. Dusaek ti siasinoman nga agaramid iti kasta a kinadakes.

8 Dikay umawat iti pasuksok, ta ti pasuksok pagbulsekenna ti tao ket dina makita ti nalinteg ken dadaelenna ti kalintegan dagiti awan basolna.

9 “Diyoidadanes ti ganggannaet. Ammoyo ti rikna ti maysa a ganggannaet ta ganggannaetkayo met idi idiay Egipto.

Ti Maikapito a Tawen ken ti Maikapito nga Aldaw

10 “Mulaanyoti dagayo iti las-ud ti innem a tawen ket urnongenyo ti maapit.

11 Ngem iti maikapito a tawen, diyo mulmulaan ket diyo met ap-apiten ti aniaman nga agtubo. Bay-anyo nga agpaay kadagiti napanglaw ti aniaman nga agtubo ket baginto met dagiti atap nga animal ti matda. Kasta met ti aramidenyo kadagiti mulayo nga ubas ken olibo.

12 “Innemnga aldaw nga agtrabahokayo, ngem aginanakayo iti maikapito nga aldaw tapno makainana dagiti tagabu ken ganggannaet nga agtartrabaho kadakayo, kasta met dagiti baka ken asnoyo.

13 “Ipangagyo ti amin nga imbagak kadakayo. Dikay agkararag kadagiti didiosen wenno baliksen la koma dagiti naganda.

Dagiti Tallo a Kangrunaan a Fiesta

14 “Tallo a fiesta ti rambakanyo iti tinawen kas pammadayaw kaniak.

15 Itibulan ti Abib, ti bulan nga ipapanawyo idi idiay Egipto, rambakanyo ti Fiesta ti Tinapay nga Awan Lebadurana. Kas imbilinko kadakayo, tinapay laeng nga awan lebadurana ti kanenyo iti las-ud ti pito nga aldaw bayat ti fiesta. Dikay umay agdaydayaw kaniak no awan ti idatonyo.

16 “Rambakanyoti Fiesta ti Panagapit babaen iti panangidatonyo ti umuna a maapit kadagiti talonyo.

“Rambakanyo ti Fiesta ti Abong-abong iti panaggibus ti tawen, inton burasenyo ti bunga dagiti kaubasan ken minuyonganyo.

17 Tunggal tawen, kadagitoy a fiesta, masapul nga umay dagiti amin a lallaki tapno agdaydayawda kaniak ngaApoa Diosyo.

18 “Diyo pakuyogan iti tinapay nga adda lebadurana ti dara ti animal nga idatonyo kaniak. Diyo met ipabigat ti taba dagiti animal a maidatag kaniak kadagitoy a fiesta.

19 “Yegyoiti balay ni Yahweh a Diosyo ti bunga ti umuna nga apit ti talonyo tunggal tawen.

“Diyo lutoen ti urbon a karnero wenno kalding iti gatas ti inana.”

Dagiti Kari ken Balakad

20 “Ibaonko ti maysa nga anghel nga umun-una ngem dakayo tapno salaknibannakayo iti panagdaliasatyo ken ipannakayo iti lugar nga insaganak.

21 Ipangagyo ket tungpalenyo ti amin nga ibagana. Diyo sukiren gapu ta siak ti nangibaon kenkuana ket dinto mapakawan ti siasinoman nga agsukir.

22 Ngem no ipangagyo ket aramidenyo ti amin nga ibagak, gubatek dagiti amin a kabusoryo.

23 Idalannakayto ti anghelko. Ipannakayo iti daga dagiti Amorreo, Heteo, Perezeo, Cananeo, Heveo ken Jebuseo ket dadaelekto ida.

24 Dikay agrukbab wenno agdaydayaw kadagiti didiosenda. Diyo tuladen dagiti ar-aramidenda. Dadaelenyo dagiti didiosenda ket rebbaenyo dagiti nasantoan a bato nga adigida.

25 No agdaydayawkayo kaniak, ni Yahweh a Diosyo, ikkankayo iti makan ken danum ken ilisikayo kadagiti amin a kita ti sakit.

26 Iti dagayo, awanto ti babai a maalisan ket awanto met ti lupes. Ikkankayto iti atiddog a biag.

27 “Gapu iti aramidek, agbutengto kaniak dagiti amin a bumusor kadakayo ket kiburekto dagiti kagubatyo. Pagsanudekto amin a kabusoryo ket itarayandakayto.

28 Kellaatekto dagiti kabusoryo ket agtataraydanto amin nga agkakaribuso.Paksiatekto dagiti Heveo, Cananeo, ken Heteo inton sumungadkayo.

29 Saankonto pay laeng a pagtalawen amin ida iti uneg ti maysa a tawen tapno saan a mabaybay-an ti daga ken saan nga umadu unay dagiti atap nga animal a pagpeggadanyo.

30 In-inutekto a papanawen ida agingga nga umadukayo ket kabaelanyo a tagikuaen ti daga.

31 Mangruginto ti beddengyo iti Baybay a Nalabagaagingga iti Baybay a Mediterranean ken manipud let-ang agingga iti Karayan Eufrates. Ikkankayto iti pannakabalin a mangparmek kadagiti taga-sadiay ket pagtalawenyonto ida iti isusungadyo.

32 Dikay makitulag kadakuada wenno kadagiti didiosenda.

33 Diyo ipalubos nga agnaed dagitoy a tattao iti pagilianyo. No ipalubosyo nga agnaedda, pagbasolendakayto iti maibusor kaniak. No agdaydayawkayo kadagiti didiosenda, isunto ti pakaigapuan ti pannakadadaelyo.”

Categories
Exodo

Exodo 24

Mapatalgedan ti Tulag

1 Kinuna ni Yahweh ken ni Moises, “Sumang-atka ditoy bantay. Itugotmo da Aaron, Nadab, Abiu ken ti pitopulo kadagiti panglakayen ti Israel. Inton adayokayo pay laeng iti ayanko, agkurnokayo iti panagdaydayaw.

2 Sikanto laeng ti umasideg. Dinto umasideg dagiti kakadduam. Ket saan met a mapalubosan dagiti tattao a sumang-at iti bantay.”

3 Napan imbaga ni Moises kadagiti tattao ti amin a bilin ken alagaden nga inted ni Yahweh. Sangsangkamaysada amin a simmungbat, “Aramidenmi ti amin nga imbaga tiApo.”

4 Insurat ni Moises dagiti amin a bilin ni Yahweh.

Iti agsapa iti sumuno nga aldaw, nangbangon iti altar iti arisadsad ti bantay ken nangipatakder iti 12 a baton-lagip a mangibagi kadagiti 12 a tribu ti Israel.

5 Kalpasanna, binilinna ti sumagmamano nga agtutubo a lallaki a mangpuor kadagiti animal a kas sagut ken ni Yahweh ken mangidatag iti sumagmamano a toro a baka a kas daton a pakikappia.

6 Inkabil ni Moises kadagiti palanggana ti kagudua ti dara dagiti napapatay nga animal ket insuyatna iti altar ti nabati.

7 Innalana ti libro ti tulag a nakailanadan dagiti bilin ni Yahweh sana binasa iti napigsa. Kinuna dagiti tattao, “Agtulnogkami itiApoket tungpalenmi amin nga imbilinna.”

8 Innalani Moises ti dara nga adda kadagiti palanggana ket winarisanna dagiti tattao. Kinunana, “Daytoy ti dara a mangpatalged iti pannakitulag tiApokadakayo idi intedna amin dagitoy a bilin.”

9 Simmang-at da Moises, Aaron, Nadab, Abiu ken ti 70 kadagiti panglakayen ti Israel iti bantay.

10 Nakitada ti Dios ti Israel. Adda iti babaen ti sakana ti umasping iti pagnaan a nabaldosaan iti safiro ken asul a kas iti tangatang.

11 Saan nga inan-ano ti Dios dagitoy a panglakayen iti Israel. Nakitada ti Dios. Kalpasanna, nagpapangan ken nagiinumda.

Ni Moises iti Tapaw ti Bantay Sinai

12 Kinuna ni Yahweh ken ni Moises, “Sumang-atka iti bantay ket umayka iti ayanko. Agyanka ditoy ket itedkonto kenka dagiti dua a tapi a bato a nakailanadan dagiti linteg ken bilin nga insuratko nga annuroten dagiti tattao.”

13 Nagsagana ni Moises ken ni Josue a katulonganna ket simmang-at ni Moisesiti nasantoan a bantay.

14 Kinuna ni Moises kadagiti panglakayen, “Urayendakami ditoy agingga nga agsublikami. Mabati da Aaron ken Hur. Isuda ti papanan ti siasinoman nga adda parikutna.”

15 Simmang-at ni Moises ket adda ulep a nangkumot iti Bantay Sinai.

16-17 Bimmaba iti rabaw ti bantay ti makapurar a lawag a mangipakdaar iti kaadda ni Yahweh. Iti panagkita dagiti Israelita, ti lawag ket kasla apuy a gumilgil-ayab iti tapaw ti bantay. Innem nga aldaw a kinumotan ti ulep ti bantay. Iti maikapito nga aldaw, manipud iti ulep, inawagan ni Yahweh ni Moises.

18 Simrekni Moises iti ulep iti isasang-atna iti bantay. Nagyan idiay iti las-ud ti 40 nga aldaw ken rabii.

Categories
Exodo

Exodo 25

Sagsagut para iti Santuario

1-2 Kinuna ni Yahweh ken ni Moises, “Ibagam kadagiti Israelita a mangipaayda iti sagut kaniak. Awatem ti aniaman a sagut nga ited ti siasinoman.

3 Dagitoy ti idatonda: balitok, pirak ken bronse;

4 di pay naabel a de lana, a natayengteng nga asul, ube ken nalabaga ti marisda; nafino a linen, lupot a naaramid iti dutdot ti kalding;

5 nakorte a lalat ti kalakian a karnero, nafino a lalat, ken kayo ti akasia.

6 Mangidatonda met iti lana para kadagiti pagsilawan, dagiti bangbanglo a mailaok iti lana a pagkonsagrar ken iti naayamuom nga insenso;

7 dagiti nangina a bato a karnelia ken dadduma a nangina a bato a pagtampok iti efodken pektoral ti Kangatoan a Padi.

8 Masapul a yaramidandak dagiti tattao iti santuario tapno agnaedak kadakuada.

9 Aramidenyo ti tabernakulo ken ti amin nga alikamenna kas mayannurot iti plano nga ipakitak kenka.

Ti Lakasa ti Tulag

10 “Ibagam kadagiti tattao a mangaramidda iti Lakasa nga akasia; 45 a pulgada ti kaatiddog, 27 a pulgada ti kaakaba ken 27 a pulgada ti kangatona.

11 Kalupkopam iti puro a balitok iti uneg ken ruarna. Paikingam iti balitok iti aglikmut.

12 Yaramidam iti uppat a pagyusokan a balitok ket ikabilmo ida kadagiti sakana a sagdudua iti agsumbangir.

13 Mangaramidka kadagiti assiw nga akasia a kalupkopam iti balitok.

14 Ikabilyo dagiti assiw kadagiti pagyusokan iti agsumbangir ti Lakasa.

15 Diyo ikkaten dagiti assiw iti pagyusokan.

16 Ikabilmo iti uneg ti Lakasa dagiti dua a tapi a bato a nakailanadan dagiti bilin nga itedkonto kenka.

17 “Mangaramidkaiti kalubna iti puro a balitok: 45 a pulgada ti kaatiddog ken 27 a pulgada ti kaakabana.

18 Mangaramidka iti dua a sinan-kerubimiti napitpit a balitok,

19 maysa iti agsumbangir a pungto. Aramidem dagitoy a sangsangkanayon iti kalub.

20 Agsinnangoda a nakaukrad dagiti payakda iti ngatoenda tapno malinongan ti kalub. Situturong dagiti rupada iti kalub.

21 Ikabilmo iti uneg ti Lakasa dagiti dua a tapi a bato samonto iparabaw ti kalub a simbolo ti trono ti kaasi.

22 Sadiayto ti pangsarakak kadakayo. Iti ngatoen ti kalub ken iti nagbaetan dagiti dua a sinan-kerubim nga adda iti rabaw ti Lakasa, itedkonto kenka ti amin a bilinko nga annuroten dagiti Israelita.

Ti Lamisaan dagiti Tinapay a Maidaton iti Dios

23 “Mangaramidka iti lamisaan nga akasia 36 a pulgada ti kaatiddog, 18 a pulgada ti kaakaba ken 27 a pulgada ti kangatona.

24 Kalupkopam iti puro a balitok ket paikingam iti balitok ti aglikmutna.

25 Pagdawadawem iti aglikmut iti tallo a pulgada ti kaakabana ket paikingam iti balitok.

26 Mangaramidka iti uppat a balitok a pagyusokan ket ikapetmo kadagiti uppat a suli nga ayan dagiti sakana.

27 Ikabilmo dagiti pagkursongan ti assiw iti lamisaan iti asideg ti agdawadaw.

28 Akasia dagiti aramidem nga assiw a makalupkopan iti balitok.

29 Agaramidka kadagiti lunglongan a puro a balitok a pinggan, tasa, pitser, ken malukong a mausar kadagiti daton nga arak.

30 Maikabilti lamisaan iti sango ti Lakasa ti Tulag ket iti rabaw ti lamisaan, masapul nga adda latta ti tinapay a maidaton kaniak.

Ti Kandelero

31 “Mangaramidka iti kandelero a puro a balitok. Aramidem ti puon ken ungkayna iti napanday a balitok. Sangsangkanayon iti kandelero dagiti arkosna a kimmopa a sabong ken busel.

32 Innem ti sangana—tallo iti agsumbangir—

33 ket masapul nga addaan ti tunggal sanga iti tallo a kimmopa a sabong a masukog a kas iti sabong ti almendras.

34 Yaramidam met ti ungkay ti kandelero iti uppat a kimmopa a sabong a kas kadagiti naikabit kadagiti sanga.

35 Masapul nga adda busel iti baba ti tunggal maysa kadagiti tallo a paris a sangsanga.

36 Sangsangkanayon dagiti busel ken dagiti sanga ken ti kandelero; maaramidda iti puro a napanday a balitok.

37 Mangaramidka iti pito a pagsilawan a maikabil iti kandelero ket isaadmo tapno agpasango ti lawagda.

38 Mangaramidka kadagiti sipit ken pagarsangan a puro a balitok.

39 Usarem ti 35 a kilogramo a puro a balitok a pangaramidmo iti kandelero ken amin dagitoy nga arruaten.

40 Kitaemta aramidem dagitoy a kas mayannurot iti plano a naipakita kenka idiay bantay.