Author: admin

Ti Tolda ti Dios

1 “Aramidem ti akin-uneg a paset ti santuario, ti Tolda ti Dios,iti sangapulo a kurtina a naabel iti nalamuyot a linen ken de lana nga asul, ube ken nalabaga. Pabordaam dagitoy kadagiti imahen dagiti kerubim.

2 Pagpapadaem ti rukod ti tunggal kurtina: 12 a metro ti kaatiddogna ken dua a metro ti kaakaba.

3 Lima a kurtina ti pagsasaipem iti maysa a naig; kasta met ti aramidem kadagiti dadduma a kurtina.

4 Yaramidam iti pagyusokan nga asul a lupot iti pingir iti akinruar dagiti dua a bengbeng a napagsasaip.

5 Ikkam iti 50 a pagyusokan iti umuna a kurtina iti umuna a naig. Kasta met ti aramidem iti maudi a kurtina iti maikadua a naig.

6 Mangaramidka iti 50 a balitok a kawit a mamagkamang kadagitoy dua a naig tapno sangsangkanayonda.

7 “Mangaramidka iti linong ti Tolda ti Dios iti sangapulo ket maysa a pedaso a lupot a naabel iti dutdot ti kalding.

8 Pagpapadaem ti rukodda: 13 a metro ti kaatiddog ken dua a metro ti kaakaba.

9 Pagsasaipem ti lima a pedaso; kasta met ti aramidem kadagiti innem a pedaso. Kulpiem ti maikanem a pedaso tapno agdawatdaw iti sango ti Tolda ti Dios.

10 Ikkam iti 50 a pagyusokan ti pingir ti maudi a pedaso iti maysa a naig; kasta met iti sabali a naig.

11 Mangaramidka iti 50 a bronse a kawit ket yusongmo kadagiti pagyusokan a mamagkamang kadagiti dua a naig tapno mabukel ti maysa nga abbong.

12 Aguy-oy ti kagudua ti pedaso ti tolda iti likud ti Tolda ti Dios.

13 Aguy-oy met kadagiti sikigan ti Tolda ti Dios ti kagudua a yarda a surok ti pedaso iti agsumbangir ti kaatiddog ti tolda tapno abbonganna ti tabernakulo.

14 Mangaramidka iti dua nga abbong, maysa iti napalabbaga a lalat ti kalakian a karnero ket ti maysa iti nafino a lalat nga agpaay nga akinruar nga abbong.

15 “Akasia dagiti aramidem a bastidor ti tabernakulo.

16 Sangapulo ket lima a kadapan ti kaatiddog ken 27 a pulgada ti kaakaba ti tunggal bastidor.

17 Ikkam iti dua nga agpada a sunta a mamagkamang kadagiti bastidor. Suntaam ti amin a bastidor.

18 Mangaramidka iti 20 a bastidor a maikabil iti bangirna ti abagatan.

19 Mangaramidka met iti 40 a pirak a pagbatayan dagiti bastidor; dua a pagbatayan ti tunggal bastidor ket dagitoy ti pagsaadan dagiti suntana.

20 Duapulo a bastidor ti aramidem para iti bangirna iti amianan.

21 Mangaramidka pay iti 40 a pirak a pagbatayan; dua a pagbatayan iti tunggal tabla.

22 Para iti likudan ti Tolda iti bangirna iti laud, mangaramidka iti innem a bastidor

23 ken dua a bastidor a maikabil kadagiti nagsulian.

24 Agkakamang dagiti pasuli a bastidor iti umuna a pagyusokan, manipud iti baba agingga iti tuktok. Kastoy ti pannakaaramid dagiti dua a bastidor iti dua a suli.

25 Iti kasta, addanto walo a bastidor, agraman dagiti 16 a pirak a pagbatayanda, dua ti pagbatayan ti tunggal bastidor.

26 “Mangaramidka iti 15 a balunet a kayo nga akasia, lima para kadagiti bastidor iti maysa a bangir ti Tolda,

27 lima para kadagiti bastidor iti sabali a bangir, ken lima para kadagiti bastidor iti bangirna iti laud, iti likudan.

28 Masapul nga aglayon ti nagtengnga a balunet a naikapet iti nagtengngaan dagiti bastidor manipud iti maysa a pungto ti Tolda agingga iti sabali a pungto.

29 Kalupkopam dagiti bastidor iti balitok ket kaptam iti balitok nga argolia a mangtengngel kadagiti balunet a nakalupkopan met iti balitok.

30 Bangonem ti Tolda ti Dios a kas mayannurot iti plano a naipakita kenka iti bantay.

31 “Mangaramidka iti kurtina iti nafino a linen a naabel iti delana nga asul, ube ken nalabaga. Bordaam kadagiti imahen dagiti kerubim.

32 Ibitinmo ti kurtina kadagiti uppat a poste a kayo nga akasia a nakalupkopan iti balitok; adda kawitda ken naisaad kadagiti uppat a pirak a pagbatayan.

33 Ibitinmoti kurtina kadagiti naintar a kawit nga adda iti baba ti Tolda ket ikabilmo ti Lakasa ti Tulag a nakaidulinan dagiti tapi a bato iti likudan ti kurtina. Adda ti kurtina iti nagbaetan ti Nasantoan a Disso ken ti Kasasantoan a Disso.

34 Ikabilmo ti kalub iti rabaw ti Lakasa ti Tulag.

35 Iti Nasantoan a Disso, yapiringmo ti lamisaan iti Tolda iti bangirna iti amianan ken ti kandelero iti bangirna iti abagatan.

36 “Yaramidam met ti ruangan ti Tolda iti kurtina a gapuanan ti agborborda ken naaramid iti nafino a linen a naabel iti delana nga asul, ube ken nalabaga.

37 Yaramidam ti kurtina iti lima a poste nga akasia a makalupkopan iti balitok, ken makaptan kadagiti balitok a kawit. Mangaramidka iti lima a bronse a pagbatayan dagitoy a poste.

Ti Altar

1 “Mangaramidka iti altar a kayo nga akasia. Kuadrado ti altar: 7 1/2 a kadapan ti kaatiddogna, 7 1/2 a kadapan ti kaakaba, ken 4 1/2 a kadapan ti kangatona.

2 Ikkam kadagiti sinan-saranga agdawadaw kadagiti uppat a sulina ket sangsangkanayonda iti altar a makalupkopan met iti bronse.

3 Mangaramidka kadagiti bronse nga alikamen ti altar: dagiti palanggana a pagikkan kadagiti dapu ti napuoran a taba, dagiti pala, malukong, pagadaw ken pagikkan iti beggang.

4 Agaramidka met iti bronse a barandilias ket kabitam ti tunggal sulina iti argolia a pagbaklayan.

5 Ikapetmo ti barandilias iti sirok ti agdawadaw a paset ti altar tapno danonenna ti gudua ti kangato ti altar.

6 Mangaramidka kadagiti assiw nga akasia a makalupkopan iti bronse.

7 No awitenyo ti altar, yusokyo dagiti assiw kadagiti argolia iti tunggal sulina.

8 Tabla ti aramidem nga altar ket awan nagyan iti unegna, kas mayannurot iti plano nga impakitak kenka iti bantay.

Bakud ti Tolda ti Dios

9 “Kas bakud ti Tolda ti Dios, agaramidka kadagiti kurtina iti nafino a linen. Iti bangirna iti abagatan, 50 a yarda ti kaatiddog dagiti kurtina,

10 a maibitin kadagiti duapulo a bronse a poste a maipatakder kadagiti duapulo a bronse a pagbatayan. Pirak dagiti kawit dagiti poste ken dagiti pasikkilda.

11 Kasta met ti aramidem iti bangirna iti amianan ti bakud.

12 Iti bangirna iti laud, 25 a yarda ti kaatiddog dagiti kurtina nga addaan sangapulo a poste ken sangapulo a pagbatayan.

13 Iti bangirna iti daya, nga ayan ti ruangan, 25 a yarda ti kalawa ti mabakudan.

14-15 Iti agsumbangir ti pagserkan, 7 1/2 a yarda ti kaatiddog dagiti kurtina ken addaan iti tallo a poste ken tallo a pagbatayan.

16 Iti mismo a ruangan, adda kurtina a 10 a yarda ti kaatiddog. Nabordaan daytoy ken naaramid iti nafino a linen ken naabel iti de lana nga asul, ube ken nalabaga. Maibitinto iti uppat a poste a maisaad iti uppat a pagbatayan.

17 Agkakamang dagiti amin a poste iti aglikmut ti paraangan babaen iti pasikkil a pirak. Pirak met dagiti kawitda ngem bronse dagiti pagbatayanda.

18 Lima pulo a yarda ti kaatiddog ti paraangan, 25 a yarda ti kalawana, 2 1/2 a yarda ti kangatona. Nafino a linen ti aramidem a kurtina ket bronse dagiti pagbatayan.

19 Pasig a bronse dagiti alikamen ti Tolda agraman dagiti pasok ti Tolda ken ti bengbeng.

Ti Pannakaaywan ti Pagsilawan

20 “Ibilinmo kadagiti Israelita a mangyegda kenka kadagiti kasayaatan a puro a lana ti olibo para iti pagsilawan tapno rinabii a sigagangat.

21 Ikabil ni Aaron ken dagiti annakna daytoy a pagsilawan iti Tolda ti Dios, iti ruar ti kurtina nga adda iti sango ti Lakasa ti Tulag. Sadiay, iti imatang ni Yahweh, agpatpatnag a sigagangat. Aramiden dagiti Israelita ken dagiti kaputotanda daytoy iti agnanayon.

Dagiti Kawes dagiti Papadi

1 “Ayabam ni Aaron a kabsatmo agraman da Nadab, Abiu, Eleazar ken Itamar nga annakna. Ilasinmo ida kadagiti Israelita tapno agserbida kaniak a kas papadi.

2 Yaramidam ni Aaron kadagiti kawes ti padi tapno nadayag ken natan-ok iti imatang dagiti tattao.

3 Bilinem dagiti amin a dumadait nga inikkak iti laing nga agdait nga aramidenda dagiti kawes ni Aaron a maidaton nga agserbi kaniak a kas padi.

4 Dagitoy ti daitenda: pektoral, efod, kagay, nabordaan a tunika, mitra ken barikes. Yaramidanda ni Aaron ken dagiti annakna kadagiti nasagradoan a kawes tapno makapagserbida kaniak a kas padi.

5 Balitok, asul, ube ken nalabaga a de lana, ken nafino a linen ti usaren dagiti sastre.

6 “Balitok, asul, ube ken nalabaga, ken nafino a linen a nabordaan ti aramidenda nga efod.

7 Paikkam iti dua a terante a pakaikaptanna ken agsilpo ti pungtoda.

8 Maysa a barikes a napintas ti pannakaabelna a naaramid iti isu met la a material ti maikapet iti efod tapno sangsangkamaysada a piesa.

9 Mangalaka iti dua a bato a karnelia ket ikitikitmo kadagitoy ti nagan dagiti annak ni Jacob,

10 segun ti panagsasarunoda a nayanak. Saggi-innem a nagan ti maikitikit iti tunggal bato.

11 Ipaaramidmo daytoy iti nalaing a platero; maimontar dagiti bato iti balitok.

12 Ikabilmo dagitoy bato kadagiti terante ti efod a pakakitaan kadagiti tribu ti Israel. Iti kastoy, awiten ni Aaron dagiti naganda iti abagana tapno, siak, ni Yahweh, kanayon a malagipko dagiti tattaok.

13 Mangaramidka met iti dua a pagmontaran a balitok

14 ken dua a kawar iti puro a balitok. Taliam daytoy a kawar a kas kordon ket igalutmo kadagiti pagmontaran.

Ti Pektoral

15 “Mangaramidka iti pektoral nga usaren ti Kangatoan a Padi tapno maammoan ti pagayatan ti Dios. Kas iti efod, masapul a maaramid met iti asul, ube ken nalabaga a de lana, ken nafino ti pannakaabelna a linen.

16 Kuadrado, 9 a pulgada ti kaatiddog ken 9 a pulgada ti kaakabana ken makupin iti nagtenggaanna.

17 Imontarmo iti daytoy ti uppat nga intar a napateg a bato. Iti umuna a batog, imontarmo ti rubi, topasio ken garnet;

18 iti maikadua, esmeralda, safiro ken diamante;

19 iti maikatlo, hasinto, agate ken amatista,

20 ken iti maikapat, berilio, karnelia ken jaspe. Maimontar dagitoy iti balitok.

21 Iti tunggal bato maikitikit ti nagan dagiti annak ni Jacob a mangibagi kadagiti sangapulo ket dua a tribu ti Israel.

22 Mangaramidka iti kawar a puro a balitok. Taliem a kas kordon ket ikabitmo iti pektoral.

23 Mangaramidka met iti dua nga argolia a balitok ket ikapetmo kadagiti akingngato a suli ti pektoral,

24 ket igalutmo dagiti kordon a balitok kadagiti dua nga argolia.

25 Igalutmo met dagiti dua a murdong ti kordon a balitok kadagiti dua a pagmontaran. Iti kasta, maikamangda iti sango iti terante ti efod.

26 Mangaramidka met iti dua nga argolia a balitok a maikapet kadagiti akimbaba a suli ti pektoral, iti akin-uneg a pingir iti asideg ti efod.

27 Mangaramidka pay iti dua nga argolia a balitok a maikapet iti akimbaba a paset iti sango dagiti dua a terante ti efod, iti asideg ti nagtupian ken ngatoen ti napintas ti pannakaabelna a barikes.

28 Galutam dagiti argolia ti pektoral ken dagiti argolia ti efod iti asul a kordon, tapno agsaad ti pektoral iti ngatoen ti barikes ket saan nga agsina.

29 “No sumrek ni Aaron iti Nasantoan a Disso, aramatenna ti pektoral a nakaikitikitan dagiti nagan dagiti tribu ti Israel tapno, siak, ni Yahweh, kanayon a malagipko dagiti tattaok.

30 Ikapetmoiti pektoral ti Urim ken Tummimtapno awiten ida ni Aaron no dumatag iti nasantoan nga imatangko. Tunggal sumrek iti Nasantoan a Disso, masapul nga aramatenna daytoy a pektoral tapno maammoanna ti kayatko kadagiti Israelita.

Dagiti Dadduma a Kawes dagiti Papadi

31 “Asul a de lana ti aramidem a kagay a rutap ti efod.

32 Putolam tapno pakayusokan ti ulo. Palikmutam ti putol iti inabel nga arubite tapno saan a nalaka a mapisang.

33-34 Itimet aglikmut ti gayadan ti kagay, bitinam kadagiti sinan-bunga ti granada a de lana nga asul, ube ken nalabaga, ken baetbaetam iti kampanilia a balitok.

35 Usaren ni Aaron daytoy a kagay iti panagserbina a kas padi. No sumrek iti Nasantoan a Disso tapno dumatag kaniak wenno rummuar sadiay, mangngeg ti uni dagiti kampanilia. Iti kasta, saan a mapapatay ni Aaron.

36 “Mangaramidka iti arkos a puro a balitok a nakaikitikitan iti daytoy: ‘Naidaton ken ni Yahweh.’

37 Singdanam daytoy iti asul ket ikapetmo iti parupa ti mitra.

38 Ikabil ni Aaron daytoy iti mugingna, tapno siak, ni Yahweh, awatek dagiti amin nga idaton kaniak dagiti Israelita uray agbiddut dagiti tattao iti aniaman nga idatagda.

39 “Mangabelka iti tunika a nafino a linen nga agpaay ken ni Aaron. Nafino a linen ti aramidem a mitra ken barikes a nabordaan.

40 “Aramidem dagiti tunika, barikes ken kallugong dagiti annak ni Aaron tapno nadayag ken natan-okda iti imatang dagiti tattao.

41 Ikawesmo dagitoy ken ni kabsatmo nga Aaron ken kadagiti annakna. Kalpasanna, ordenam ida babaen iti pananglanam iti uloda tapno agserbida kaniak a kas papadi.

42 Yaramidam ida iti sapin a linen a dumanon iti luppo tapno saanda a lamolamo.

43 Masapul a kanayon nga usaren ni Aaron dagitoy ken dagiti annakna no sumrekda iti Toldak wenno umasidegda iti altar nga agserbi a kas padi iti Nasantoan a Disso tapno dida agbasol ket mapapatayda. Agnanayon daytoy nga alagaden ni Aaron ken dagiti kaputotanna.

Ti Seremonia ti Pannakaorden ni Aaron ken dagiti Annakna

1 “Kastoy ti panangordenmo ken ni Aaron ken kadagiti annakna nga agserbi kaniak a kas papadi. Mangalaka iti bumaro a baka ken dua a kalakian a karnero nga awan depektona.

2 Mangalaka met ti kasayaatan nga arina ti trigo nga awan lebadurana ket agaramidka kadagiti tinapay nga adda lanana ken awan lanana, agraman kadagiti naiingpis a bibingka a mapulagidan iti lana.

3 Ibasketmo dagitoy ket idatonmo agraman ti baka ken dagiti dua a karnero.

4 “Ipanmo ni Aaron ken dagiti annakna iti ruangan ti Tolda ti Dios ket digosem ida kas alagaden ti linteg.

5 Kalpasanna, ikawesmo ken ni Aaron dagiti arwaten ti padi—ti tunika, ti efod, ti kagay a mairutap iti efod, ti pektoral agraman ti barikes.

6 Ikabilmo ti turban iti ulona ket igalutmo ti nasagradoan nga arkos a nakaikitikitan ti ‘Naidaton itiApo.’

7 Alaem ti lana a pagkonsagrar ket patedtedam ti ulo ni Aaron tapno makonsagrar.

8 “Yegmo dagiti annakna ket kawesam ida iti tunika.

9 Ikabilmo dagiti barikesda ken dagiti kallugongda. Kastoy ti panangordenmo ken ni Aaron ken dagiti annakna. Agserbidanto kaniak ken dagiti kaputotanda a kas papadi iti agnanayon.

10 “Ipanmo ti baka iti sangoanan ti Tolda ti Dios ket ibagam ken ni Aaron ken kadagiti annakna nga ipatayda dagiti imada iti ulona.

11 Partiem ti baka iti nasantoan nga imatangko iti pagserkan ti Tolda.

12 Mangalaka iti darana, ket isawsawmo ta tammudom samo ipulagid kadagiti sinan-sara ti altar. Kalpasanna, ibuyatmo ti natda a dara iti puon ti altar.

13 Alaem ti amin a taba a nangbungon kadagiti lalaem, ti taba iti dalem ken dagiti dua a bekkel agraman tabada. Puoram dagitoy iti rabaw ti altar a daton kaniak.

14 Ngem puoram ti lasag, kudil ken dagiti lalaem ti baka iti ruar ti kampo. Daytoy ti daton a mangikkat kadagiti basol dagiti papadi.

15 “Alaem ti maysa kadagiti kalakian a karnero ket ibagam ken ni Aaron ken kadagiti annakna nga ipatayda dagiti imada iti ulona.

16 Partiem ket ibuyatmo ti darana kadagiti sikigan ti altar.

17 Rangrangkayem ti karnero. Buggoam dagiti lalaemna ken dagiti sakana ket iparabawmo dagitoy kadagiti narangrangkay a paset agraman ulona.

18 Puoramti sibubukel a karnero iti rabaw ti altar a kas daton a makan. Maragsakanak iti nabanglo nga ayamuom daytoy a daton.

19 “Alaem ti maysa pay a karnero—ti karnero a maaramat iti pannakaidaton. Ibagam ken ni Aaron ken kadagiti annakna nga ipatayda dagiti imada iti ulona.

20 Patayem ket mangalaka iti darana samo ipulagid kadagiti kannawan a piditpiditda ken kadagiti kannawan a tangan ti ima ken sakada. Ibuyatmo ti natda a dara iti sikigan ti altar.

21 Mangalaka iti dara nga adda iti rabaw ti altar ken lana a pagkonsagrar ket iwarsim ken ni Aaron ken iti kawesna kasta met kadagiti annakna ken kadagiti kawesda. Kastoy ti pannakaikonsagrar ni Aaron, dagiti annakna ken dagiti kawesda.

22 “Ikkatem ti taba ti karnero, ti nataba nga ipusna, ti taba a nangbalkot kadagiti lalaem, ti taba iti dalem, dagiti dua a bekkel agraman dagiti tabada ken ti akinkannawan a luppo.

23 Manipud iti basket a yan dagiti tinapay a naidaton kaniak, mangalaka iti maysa a tinapay nga adda lanana, maysa a tinapay nga awan lanana ken maysa a bibingka.

24 Ipaiggemmo dagitoy ken ni Aaron ken kadagiti annakna ket idatonda kaniak a kas naisangsangayan a sagut.

25 Kalpasanna, alaem dagitoy kadakuada samo puoran iti altar, iti rabaw ti daton a mapuoran a kas daton a makan a maidatag kaniak. Maragsakanak iti ayamuom daytoy a daton.

26 “Alaem ti barukong daytoy a karnero ket idatonmo kaniak a kas naisangsangayan a sagut. Kukuam daytoy a paset ti animal.

27 No maordenan ti maysa a padi idatonda kaniak ti barukong ken ti luppo ti karnero a mausar iti seremonia ti pannakaorden, maidatonda kaniak a kas naisangsangayan a sagut daytoy ket mailasinda para kadagiti papadi.

28 Agnanayon a bilinko a no mangidatag dagiti tattaok iti datonda a pakikappia, kukua dagiti papadi dagiti barukong ken luppo ti animal. Daytoy ti sagut dagiti tattao kaniak, ni Yahweh.

29 “Inton matay ni Aaron, maited dagiti pagan-anayna a kas padi kadagiti annakna tapno usarenda iti pannakaordenda a kas papadi.

30 Pito nga aldaw nga usaren ti anak ni Aaron a sumukat kenkuana a padi dagiti kawes no sumrek iti Tolda ti Dios tapno agserbi iti Nasantoan a Disso.

31 “Alaem ti karnero a nausar iti pannakaorden ni Aaron ken dagiti annakna ket angrem iti nasagradoan a lugar.

32 Iti ruangan ti Tolda ti Dios ti pangananda iti karne ken iti tinapay nga adda iti basket.

33 Masapul a kanenda dagiti naaramat iti seremonia ti pannakapakawan bayat ti pannakaordenda. Dagiti laeng papadi ti mangan iti daytoy agsipud ta nasantoan.

34 No adda matda a karne wenno tinapay agingga iti bigat, masapul a mapuoran. Saan a kanen agsipud ta nasantoan.

35 “Pito nga aldaw nga annongem ti pannakaorden ni Aaron ken dagiti annakna iti wagas nga imbilinko kenka.

36 Inaldaw a masapul a mangidatonka iti toro a baka a kas sakrifisio tapno mapakawan ti basol. Daytoy ti mangdalus iti altar iti imatang ti linteg. Kalpasanna, lanaam ti altar tapno agbalin a nasantoan.

37 Inaldaw nga aramidem daytoy iti las-ud ti pito nga aldaw. Iti kasta, naan-anayton a nasantoan ti altar, ket siasinoman wenno aniaman a mangsagid iti altar, madangranto babaen iti pannakabalin ti kinasantona.

Ti Sagut a Maidaton iti Inaldaw

38 “Dagitoyto ti inaldaw nga idatagmo iti altar iti agnanayon: dua nga urbon ti karnero a maysa ti tawenda.

39 Idatonmo ti maysa iti agsapa ket ti sabali iti sumipnget.

40 Pakuyogam ti umuna a daton iti maysa a kilogramo a nafino nga arina ti trigo a nalaokan iti sangalitro a puro a lana ti olibo, agraman maysa a litro nga arak a kas daton nga inumen.

41 Pakuyogam met ti maikadua a daton iti isu met laeng ti kaadu ti arina, lana ti olibo ken arak a kas iti maidatag iti bigat. Daytoy ti daton a makan a maidatag kaniak, ni Yahweh, ket maragsakanak iti ayamuomna.

42 Iti amin a tiempo iti masakbayan, maidatag daytoy daton a mapuoran iti imatangko iti ruangan ti Tolda ti Dios. Sadiay ti pangsarakak kadagiti tattaok ken pakiumanak kenka.

43 Sadiay ti pangsarakak kadagiti Israelita ket agbalinto a sagrado dayta a lugar gapu iti kaaddak.

44 Pagbalinekto a sagrado ti Tolda ti Dios agraman ti altar, ket ikonsagrarko ni Aaron ken dagiti annakna tapno agserbida kaniak a kas papadi.

45 Agtaengakto iti sidong dagiti Israelita ket siakto ti Diosda.

46 Maammoandanto a siak ni Yahweh a Diosda a nangiruar kadakuada idiay Egipto tapno agnaedak iti sidongda. Siak ni Yahweh a Diosda.

Ti Altar ti Insenso

1 “Mangaramidka iti altar nga akasia a pagpuoran iti insenso.

2 Kuadrado ti altar ket 18 a pulgada ti kaatiddog ken kaakabana ken 36 a pulgada ti kangatona. Ikkam iti sinan-saraiti tunggal sulina ket sangkanayonda iti altar.

3 Kalupkopam iti puro a balitok ti rabawna, dagiti uppat a sikiganna ken dagiti sinan-sara. Paikingam ti aglikmut iti balitok.

4 Yaramidam iti dua a balitok nga argolia ket ikapetmo iti baba dagiti agsumbangir nga ikingna a pakayusokan dagiti assiw a pangawit iti altar.

5 Aramidem dagitoy nga assiw iti kayo nga akasia ket kalupkopam ida iti balitok.

6 Ikabilmo daytoy nga altar iti ruar ti kurtina iti sango ti Lakasa ti Tulag. Daytoy ti lugar a pangsarungkarak kadakayo.

7 Tunggal bigat a mapan estimaren ni Aaron dagiti pagsilawan, masapul nga agpuor iti nabanglo nga insenso iti rabawna.

8 Kasta manen ti aramidenna iti sumipnget no gangtanna dagiti pagsilawan. Agtultuloyto nga agnanayon ti pannakapuor ti insenso.

9 Diyo idaton iti rabaw ti altar ti maiparit nga insenso, ti daton nga animal a mapuoran wenno ti daton a makan ket diyo ibukbok iti rabawna ti daton nga inumen.

10 Maminsan iti tunggal tawen nga aramiden ni Aaron ti seremonia ti pannakadalus ti altar: kadagiti sinan-sara ipulagidna ti dara ti animal a maidaton gapu iti basol. Masapul a maaramid daytoy iti tinawen iti amin a tiempo. Masapul a naan-anay a sagrado daytoy nga altar a naidaton kaniak, ni Yahweh.”

Ti Buis nga agpaay iti Tolda ti Dios

11 Kinuna ni Yahweh ken ni Moises,

12 “Inton alaem ti bilang dagiti tattao ti Israel, masapul a mangited kaniak ti tunggal tao iti kuarta a gatad ti biagna tapno awan dakes a mapasamak kenkuana bayat ti pannakaala ti sensus.

13 Amina mairaman iti sensus ket masapul a bayadanna ti naituding a gatad, kas mayannurot iti naituyang a pagtimbangan. Agbayad ti tunggal maysa nga agpaay a daton ken ni Yahweh.

14 Tunggal maysa a mailista nga agtawen iti duapulo wenno nasursurok pay, masapul a bayadanna kaniak daytoy a gatad.

15 Nabaknang man wenno napanglaw—agpada ti itedda a gatad a kas pangsubbot iti biagda.

16 Kolektaem daytoy a kuarta kadagiti Israelita, ket isu ti magasto kadagiti kasapulan iti Tolda. Daytoy ti buis a pagbayadda iti biagda, ket laglagipek a salakniban ida.”

Ti Bronse a Palanggana

17 Kinuna ni Yahweh ken ni Moises,

18 “Mangaramidkaiti bronse a palanggana nga adda bronse a batayna. Ikabilmo iti nagbaetan ti Tolda ti Dios ken ti altar ket kargaam iti danum.

19 Daytoy ti usaren ni Aaron ken dagiti annakna a pangbuggo kadagiti ima ken sakada

20 sakbay a sumrekda iti Tolda ti Dios wenno umasidegda iti altar a mangidatag iti daton a makan. Iti kasta, saanda a mapapatay.

21 Masapul a buggoanda dagiti ima ken sakada tapno saanda a matay. Annurotenda daytoy nga alagaden iti agnanayon, isuda ken dagiti kaputotanda.”

Ti Lana a Pagkonsagrar

22 Kinunani Yahweh ken ni Moises,

23 “Mangalaka iti kasayaatan a bangbanglo: Innem a kilogramo a tubbog ti mirra, sagtatallo a kilogramo a nabanglo a sinamon ken nabanglo a kanela,

24 ken innem a kilogramo a kasia (matimbang amin dagitoy segun ti naituyang a pagtimbangan). Laokam iti uppat a litro a lana ti olibo.

25 Mangaramidka iti nasagradoan a lana a pagkonsagrar, ket templaem a kas iti bangbanglo.

26 Aramatem daytoy a pangkonsagrar iti Tolda ti Dios, iti Lakasa ti Tulag,

27 iti lamisaan ken amin nga alikamenna, iti kandelero ken amin nga alikamenna, iti altar a pagpuoran iti insenso,

28 iti altar a pakapuoran dagiti daton ken amin nga alikamenna ken iti pagbuggoan agraman ti pagbatayanna.

29 Kastoy ti panangikonsagrarmo kadagitoy nga alikamen tapno agbalinda a naan-anay a nasagradoan ket ti siasinoman wenno aniaman a mangsagid kadagitoy, madangranto babaen iti kinasantona.

30 “Kalpasanna, ikonsagrarmo ni Aaron ken dagiti annakna ket ordenam ida a papadi nga agserbi kaniak.

31 “Ibagam daytoy kadagiti Israelita, ‘Masapul a mausar daytoy nasantoan a lana a pagkonsagrar iti panagserbi kaniak iti amin a tiempo.

32 Diyo ibukbok daytoy iti gagangay a tao ket diyo tuladen ti kastoy a pannakaaramidna. Nasagradoan daytoy ket masapul nga ibilangyo a nasagradoan.

33 Saanen a maibilang a taok ti siasinoman a mangaramid iti kastoy wenno mangusar iti siasinoman a tao a saan a padi.’”

Ti Insenso

34 Kinuna ni Yahweh ken ni Moises, “Mangalaka kadagiti nabanglo a rekado: estakte, onitsa, galbanum ken puro nga olibanum; pagpapadaem ti kaadu ti tunggal maysa.

35 Aramidem dagitoy nga insenso a matempla a kas bangbanglo. Asinam tapno agtalinaed a puro ken sagrado.

36 Mangmekmekka iti insenso samo ipan iti Tolda ti Dios iti imatangko ket iwarakiwakmo iti sangoanan ti Lakasa ti Tulag. Ibilangmo daytoy nga insenso a naan-anay ti kinasagradona.

37 Diyo tuladen ti kastoy a pannakatempla iti insenso nga agpaay kadakayo. Ibilangyo daytoy a nasantoan a naidaton kaniak.

38 No adda mangaramid iti kastoy tapno aramatenna a bangbanglo, saanen a maibilang a maysa kadagiti tattaok.”

Dagiti Mangaramid kadagiti Alikamen ti Tolda ti Dios

1 Kinuna ni Yahweh ken ni Moises,

2 “Pinilik ni Bezalel nga anak ni Uri ken apoko ni Hur a kameng ti tribu ti Juda.

3 Pinunnok iti pannakabalinko,ket ita, maysa nga eksperto iti amin a kita ti aramid iti arte.

4 Masirib nga agaramid kadagiti disenio ket kabaelanna a sukogen iti balitok, pirak ken bronse;

5 agkorte kadagiti napateg a bato a maimontar; ken agkitikit kadagiti kayo ken dadduma pay a kita ti naarte a trabaho.

6 Tinudengak met a tumulong kenkuana ni Oholiab nga anak ni Ahisamac, a kameng iti tribu ti Dan. Inikkak met iti naidumduma a kabaelan dagiti amin nga eksperto iti trabaho tapno maaramidda dagiti imbilinko a maaramid:

7 ti Tolda ti Dios, ti Lakasa ti Tulag ken ti kalubna, amin nga alikamen ti Tolda,

8 ti lamisaan ken ti amin nga alikamenna, ti kandelero a puro a balitok ken amin nga alikamenna, ti altar a pagpuoran iti insenso,

9 ti altar a pagpuoran kadagiti daton ken amin nga alikamenna, ti pagbuggoan ken ti batayna.

10 Isuda ti agaramid kadagiti arruaten ni Aaron ken dagiti annakna iti panagserbida a kas padi.

11 Aramidenda met ti lana a pagkonsagrar ken ti nabanglo nga insenso a maaramat iti Nasantoan a Disso. Aramidenda amin dagitoy nga alikamen nga awan surok ken kurangna kas imbilinko kenka.”

Ti Aldaw a Panaginana

12 Binilin ni Yahweh ni Moises

13 nga ibagana daytoy kadagiti Israelita, “Ngilinenyo ti Aldaw a Panaginana, ta daytoy ti agserbi a pagilasinan kadakayo iti agnanayon, a siak, ni Yahweh, pinilikayo nga agbalin a tattaok.

14 Nasagradoan ti Aldaw a Panaginana ket masapul a ngilinenyo. Mapapatay ti saan a mangngilin iti aldaw a panaginana ket mapagtalaw ti siasinoman nga agtrabaho iti dayta nga aldaw.

15 Agtrabahokayoiti innem nga aldaw, ngem naisangsangayan ti maikapito, ta naidaton kaniak. Mapapatay ti siasinoman nga agtrabaho iti dayta nga aldaw.

16 Masapul a ngilinen dagiti Israelita ti aldaw a panaginana a kas pagilasinan iti tulag.

17 Agserbidaytoy a palagip kaniak ken iti entero nga Israel ket agtalinaed iti agnanayon. Ngamin, siak ni Yahweh, pinarsuak ti langit ken ti daga iti las-ud ti innem nga aldaw ket naginanaak iti maikapito nga aldaw.”

18 Idi nalpasen ti pannakisao ni Yahweh ken ni Moises iti Bantay Sinai, intedna kenkuana dagiti dua a tapi a bato a nangisuratan a mismo ti Dios kadagiti bilbilin.

Ti Balitok a Sinan-toro a Baka

1 Nabayagni Moises iti bantay. Gapu ta di met la sumalogen, napan dagiti tattao ken ni Aaron ket kinunada kenkuana, “Saanmi nga ammo ti napasamak iti dayta a Moises a nangiruar kadakami idiay Egipto. Yaramidannakami ngarud iti diosa mangidalan kadakami.”

2 Kinuna ni Aaron kadakuada, “Ummongenyo ngarud dagiti balitok nga aritos dagiti assawa ken annakyo, ket yegyo kaniak.”

3 Inikkat dagiti tattao dagiti aritosda sada impan ken ni Aaron.

4 Linunagni Aaron dagiti aritos sana imbukbok iti sukogan ket inaramidna a sinan-toro a baka.

Kinuna dagiti tattao, “Israel, daytoy ti diostayo a nangiruar kadatayo idiay Egipto.”

5 Kalpasanna, nangaramid ni Aaron iti altar iti sango ti balitok a sinan-toro a baka sana impakaammo, “Inton bigat, agfiestatayo a kas pammadayaw itiApo.”

6 Kabigatanna,nagidatagda kadagiti animal sada pinuoran a kas sakrifisio. Sabali pay dagiti pinartida a sindada a kas daton a maipaay a panagkakadua. Nagpapangan ken nagiinum dagiti tattao. Naglabes ti ragragsakda, nagbabartekda ket nagkakaidda dagiti lallaki ken babbai.

7 Kinuna ni Yahweh ken ni Moises, “Dagdagusem ti sumalog ta nagbasol dagiti tattaom nga inruarmo idiay Egipto ket tinallikudandak.

8 Binaybay-andan ti dalan nga imbilinko a surotenda. Nangsukogda iti sinan-toro ti baka manipud iti nalunag a balitok ket inaramidda a pagdaydayawan ken pagidatonan kadagiti sakrifisio. Kunkunada a daytoy ti diosda a nangiruar kadakuada idiay Egipto.

9 Am-ammok dagitoy a tattao ket ammok met ti kinasukirda.

10 Ita, saanka a makibiang, ta gumilgil-ayab ti pungtotko kadakuada ket dadaelek ida. Ket sikanto ti pagtaudan ti maysa a dakkel a pagilian.”

11 Ngemnagpakpakaasi ni Moises ken ni Yahweh a Diosna ket kinunana, “Apo, apay a kapungtotmo dagiti tattaom, isuda a winayawayaam idiay Egipto babaen iti naindaklan a pannakabalinmo?

12 No dadaelem ida, kunanto dagiti Egipcio nga inruarmo dagiti Israelita idiay Egipto gapu ta panggepmo a pukawen ida iti kabambantayan. Pagbaawem ti pungtotmo ket dimo idissuor daytoy a didigra kadagiti tattaom.

13 Laglagipemda Abraham, Isaac ken Jacob nga adipenmo. Laglagipem ti kari a sinapataam kadakuada a paaduem ti kaputotanda a kas iti kaadu dagiti bituen ti langit ket itedmo amin daytoy a daga nga inkarim a tagikuaenda iti agnanayon.”

14 Nagbabawi ni Yahweh ket dina indissuor ti didigra nga impangtana nga ipalak-am kadagiti tattaona.

15 Nagsubli ni Moises ket simmalog iti bantay. Iggemna dagiti dua a tapi a bato a nakaisuratan dagiti bilin.

16 Mismo a ti Dios ti nangaramid kadagiti tapi ket inkitikitna dagiti bilin iti agsumbangirda.

17 Nangngeg ni Josue ti ariwawa dagiti tattao ket kinunana ken ni Moises, “Mangngegko ti ikkis dagiti aggugubat iti kampo.”

18 Kinuna ni Moises, “Saan nga ikkis dagiti nagballigi wenno dung-aw dagiti naparmek ti mangngegko no di ket kankanta.”

19 Addan ni Moises iti arisadsad ti bantay. Idi asidegen iti kampo ket makitana ti sinan-toro a baka ken dagiti tattao nga agsasala, simged ti pungtotna. Sadiay, imbarsakna dagiti tapi nga ig-iggamanna ket naburburakda.

20 Innalana ti inaramidda a sinan-urbon ti baka, linunagna, tinumtumekna ket inlaokna iti danum sana impainum kadagiti Israelita.

21 Kinunana ken ni Aaron, “Ania aya ti inaramid kenka dagitoy a tattao ta pinalubosam ida nga agaramid iti nadagsen a basol?”

22 Insungbat ni Aaron, “Dinak koma kapungtot, apo. Ammom a napigsa ti tarigagayda nga agaramid iti dakes.

23 Kinunada kaniak, ‘Dimi ammo ti napasamak iti dayta a Moises a nangiruar kadakam idiay Egipto. Yaramidannakami ngarud iti dios a mangidalan kadakami.’

24 Imbagak kadagiti adda alahasna a balitok nga itedda kaniak dagitoy. Tinunawko dagiti alahas ket daytoy sinan-toro a baka ti nagbalinanna.”

25 Naammiris ni Moises a pinalubosan ni Aaron dagiti tattao nga aglablabesda ket nagbalinda a maag iti imatang dagiti kabusorda.

26 Nagtakder ngarud ni Moises iti ruangan ti kampo ket impukkawna, “Umay ditoy ti amin a sumurot itiApo!” Napan dagiti amin a Levita iti yanna,

27 ket kinunana kadakuada, “Imbilin tiApoa Dios ti Israel nga alaenyo ti kampilanyo sayo dakiwasen ti entero a kampo, manipud ditoy agingga iti sabali a ruangan ket patayenyo amin a makitayo—kakabsatyo man wenno gagayyemyo wenno kaarrubayo.”

28 Nagtungpal dagiti Levita ket pinapatayda ti agarup 3,000 a lallaki iti dayta nga aldaw.

29 Kinuna ni Moises kadagiti Levita, “Ita nga aldaw, indatonyo dagiti bagbagiyoa kas papadi iti panagserbi itiApogapu iti panangpapatayyo kadagiti annakyo ken dagiti kakabsatyo. Ngarud, inted tiApoti bendisionna kadakayo.”

30 Kabigatanna, kinuna ni Moises kadagiti tattao, “Nadagsen unay ti nagbasolanyo. Ngem ita, innak itiApoiti bantay bareng no maipamuspusak ti pannakapakawanyo.”

31 Nagsubli ni Moises ken ni Yahweh ket kinunana, “Nadagsen ti basol dagitoy a tattao! Nangaramidda iti dios a balitok ket nagdaydayawda kenkuana.

32 Ipakpakaasika pakawanem koma ida. No dimo pakawanen ida, pangngaasim ta ikkatem ti naganko iti libro a nangisuratam kadagiti nagan dagiti tattaom.”

33 Kinuna ni Yahweh ken ni Moises, “Dagiti laeng nagan ti nakabasol kaniak ti punasek iti librok.

34 Dumtengto ti aldaw a dusaek dagitoy a tattao gapu iti basolda. Inkan ket ipanguloam ida a mapan iti lugar nga imbagak kenka. Laglagipem nga idalannakanto ti anghelko.”

35 Iti kasta, dinusa ni Yahweh dagiti tattao ket pinagsakitna ida gapu ta pinilitda ni Aaron a mangaramid iti sinan-toro ti baka.

Ti Bilin a Pumanawda iti Bantay Sinai

1 Kinunani Yahweh ken ni Moises, “Pumanawkayo ditoy, sika ken dagiti tattao nga inruarmo idiay Egipto, ket inkay iti daga nga inkarik kada Abraham, Isaac ken Jacob nga ited kadagiti kaputotanda.

2 Mangibaonak iti anghel a mangidalan kadakayo ket papanawekto dagiti Cananeo, Amorreo, Heteo, Perezeo, Heveo ken Jebuseo.

3 Inkay iti nabaknang ken nadam-eg a daga. Ngem gapu ta nasukirkayo, diak makikuyog kadakayo amangan no patayenkay iti dalan.”

4 Idi mangngeg daytoy dagiti tattao, nagleddaangda ket saandan a nagarruat iti alahas.

5 Binilin ngamin ni Yahweh ni Moises nga ibagana kadagiti Israelita: “Nasukirkayo a tattao ket no makikuyogak la ngata kadakayo iti uray apagkanito, pukawenkayo a mamimpinsan. Ita, ikkatenyo dagiti alahasyo tapno ammok ti aramidek kadakayo.”

6 Manipud idin, kalpasan ti ipapanawda idiay Bantay Sinai, saanen a nagal-alahas dagiti Israelita.

Ti Tolda a Pakiumanan

7 Tunggal agkampo dagiti Israelita, alaen ni Moises ti nasagradoan a Tolda sana ipatakder iti pangadaywen bassit iti ruar ti kampo. Pinanaganan ni Moises daytoy iti “Tolda a Pakiumanan” ket sumrek iti tolda ti siasinoman a makiuman ken ni Yahweh.

8 Tunggal mapan ni Moises iti tolda, agtakder dagiti tattao iti ruangan ti toldada ket kitkitaenda ni Moises agingga a makastrek iti tolda.

9 Apaman a makastrek, bumaba met ti monmon ti ulep iti ruangan ti Tolda; makisao ni Yahweh ken ni Moises manipud iti ulep.

10 Apaman a makita dagiti tattao ti ulep iti ruangan ti Tolda, agrukbabda.

11 Makisao ken ni Moises iti sangonsango a kas iti pannakisao ti maysa a tao iti gayyemna. Agsubli met laeng ni Moises iti kampo ngem agbati iti uneg ti Tolda ti agtutubo a katulongan ni Moises, ni Josue nga anak ni Nun.

Ikari ti Dios a Kumuyog kadagiti Tattaona

12 Kinuna ni Moises ken ni Yahweh, “Pudno nga imbagam nga idalanko dagitoy a tattao a mapan iti daga ngem dimo imbaga no siasino ti ibaonmo a tumulong kaniak. Kinunam pay nga am-ammonak unay ket maragsakanka kaniak.

13 No pudno daytoy, ibagam kaniak dagiti panggepmo tapno makapagserbiak kenka ket agtultuloy a maragsakanka kaniak. Laglagipem met a pinilim a tagikuaen daytoy a nasion.”

14 Kinuna ni Yahweh, “Kuyogenka ket ikkak ti inana ti panunotmo.”

15 “No dika kumuyog kadakami,” kinuna ni Moises, “dinakam ngarud papanawen ditoy.

16 Kasano nga adda makaammo a maragsakanka kaniak ken kadagiti tattao no dinakami met kuyogen? Ngem no kuyogennakami, maipakita a naisalsaluminakami kadagiti amin a tattao ditoy daga.”

17 Kinuna ni Yahweh ken ni Moises, “Aramidek ti imbagam gapu ta am-ammoka unay ket maragsakanak kenka.”

18 Indawat ni Moises, “Pangngaasim ta ipakitam kaniak ti makasisirap a lawag a pagilasinan ti kaaddam.”

19 “Ipakitakkenka ti amin a kinadayagko, ket baliksek ti nasagradoan a naganko, a Yahweh,” insungbat ni Yahweh. “Paraburak ken kaasiakto ti kayatko a kaasian.

20 Ngem diak ipakita kenka ti rupak gapu ta matay ti siasinoman a makakita iti rupak.

21 Adda bato iti abayko a mabalinmo a pagtakderan.

22 No lumabas ti makasisirap a lawag a mangipakita iti kaaddak, ikabilka iti rengngat ti bato ket lingdanka iti imak agingga a makalabasak.

23 Kalpasanna, ikkatek ti imak ket makitamto ti likudak ngem saan a ti rupak.”

Dagiti Sabali a Tapi ti Bato

1 Kinuna ni Yahweh ken ni Moises, “Mangaramidka iti dua a tapi ti bato a kas kadagidi immuna ket isuratkonto kadagitoy dagiti naisurat kadagidi tapi a binurakmo.

2 Agsaganaka a sumang-at iti Bantay Sinai inton agsapa ket kitaennakto iti tapawna.

3 Siksika laeng ti sumang-at. Awan ti siasinoman a tao a makita iti uray ania a disso iti bantay. Diyo met ipalubos nga adda karnero wenno baka nga agarab iti arisadsadna.”

4 Nangaramid ngarud ni Moises iti dua a tapi a bato, ket iti agsapa ti sumuno a bigat, insang-atna dagitoy iti Bantay Sinai, kas imbilin kenkuana ni Yahweh.

5 Bimmaba ni Yahweh iti maysa nga ulep nagtakder iti abay ni Moises, ket binalikasna ti naganna Yahweh.

6 Nagnani Yahweh iti sangoanan ni Moises ket kinunana, “Siak ni Yahweh a Dios a managayat ken manangngaasi. Saanak a nalaka nga agpungtot. Nadungngo ken napudnoak.

7 Tungpalek ti karik iti rinibribu a kaputotan,ket pakawanek ti kinadakes, panagsalungasing ken basol. Ngem dusaek a dusaen dagiti annak ken appoko agingga iti maikatlo ken maikapat a kaputotan gapu kadagiti basol dagiti ammada.”

8 Dinagdagus ni Moises nga inrukob ti ulona iti daga ket nagdaydayaw.

9 Kinunana, “Apo, no pudno met laeng a maragsakanka kaniak, dawatek a kuyogennakami. Nasukir dagitoy a tattao, ngem pakawanennakami koma kadagiti kinadakesmi ket awatennakami a kas tattaom.”

Mapabaro ti Tulag

10 Kinuna ni Yahweh ken ni Moises, “Ita, makitulagak kadagiti Israelita. Agaramidakto kadagiti milagro a di pay napasamak ditoy lubong wenno iti uray ania a pagilian. Makitanto dagiti amin a tattao dagiti naindaklan a banag a kabaelak nga aramiden agsipud ta agaramidak kadagiti nakaskasdaaw a banag nga agpaay kadakayo.

11 Tungpalenyo dagiti bilin nga itedko ita nga aldaw. Iti isusungadyo, papanawekto dagiti Amorreo, Cananeo, Heteo, Perezeo, Heveo ken Jebuseo.

12 Dikay makitultulag kadagiti tattao a madanonyo sadiay, ta daytoyto ti pangrugian ti pannakadadaelyo.

13 Rebbaenyoketdi dagiti altarda, dadaelenyo dagiti nasagradoan a bato nga adigida ken dagiti kaykayo a simbolo ti didiosenda nga Asera.

14 “Dikay agdaydayaw iti sabali a dios, ta siak, ni Yahweh, diak ipalubos nga adda kasalisalko.

15 Dikay makitultulag kadagiti tattao sadiay, agsipud ta tunggal agdaydayaw ken agidatonda kadagiti didiosenda, awisendakayto ket masulisogkayto a mangan kadagiti taraon a naidaton.

16 Amangan ketdi no mangasawa dagiti lallaki nga annakyo kadagitoy ganggannaet a babbai a mangisungsong kadakuada a mangtallikud kaniak ket agdaydayawda kadagiti didiosenda.

17 “Dikaymangsukog kadagiti didiosen a pagdaydayawanyo.

18 “Rambakanyoti Fiesta ti Tinapay nga awan Lebadurana. Kas imbilinko, mangankay iti tinapay nga awan lebadurana iti las-ud ti pito nga aldaw iti Abib ta iti daytoy a bulan, pimmanawkayo idi idiay Egipto.

19 “Kukuakti amin nga inauna a lalaki, tao man wenno dingngoenyo.

20 Ngemmasapul a subbotenyo ti inauna nga anak ti asno babaen iti pannangtedyo iti maysa a karnero a kas sukatna. No diyo subboten ti asno, rungdoenyo ti tengngedna. Subbotenyo ti amin nga inauna nga anakyo.

“Saankayo nga umay kaniak no awan datonyo.

21 “Agtrabahokayiti innem nga aldaw, ngem aginanakayo iti maikapito, uray no panagaarado wenno panagaani.

22 “Rambakanyoti Fiesta ti Panagapit iti damo a panaganiyo iti trigo, kasta met ti Fiesta ti Abong-abong inton burasenyo dagiti bungbunga ti mulayo.

23 “Mamitlo iti makatawen nga umay dagiti amin a lallaki nga adda kadakayo tapno agdaydayawda kaniak, ni Yahweh a Dios ti Israel.

24 Kalpasan ti panangpapanawko kadagiti tattao iti isusungadyo ket palawaek ti sakupyo, awanto ti agpanggep a mangraut iti pagilianyo bayat ti pannakarambak dagiti tallo a fiesta.

25 “Diyopakuyogan ti tinapay nga adda lebadurana iti dara ti animal nga idatonyo kaniak a sakrifisio. Diyo ipabigat ti uray ania a paset ti animal a pinatayyo iti Fiesta ti Paskua.

26 “Tinawena yegyo iti balay ni Yahweh ti umuna a trigo a maapityo.

“Diyo lutoen ti urbon a karnero wenno urbon a kalding iti gatas ti inana.”

27 Kinuna ni Yahweh ken ni Moises, “Isuratmo dagiti imbagak ta dagitoy ti alagaden ti pannakitulagko kenka ken iti Israel.”

28 Uppat a pulo nga aldaw ken rabii a nagyan sadiay ni Moises a kaduana ni Yahweh. Saan a nangnangan wenno immin-inum. Insuratna kadagiti tapi a bato ti linaon ti tulag—dagiti Sangapulo a Bilin.

Sumalog ni Moises manipud Bantay Sinai

29 Simmalogni Moises manipud iti Bantay Sinai a siiiggem kadagiti tapi a bato a nakailanadan dagiti Sangapulo a Bilin. Gapu iti pannakisaona ken ni Yahweh, agranraniag ti rupana ngem saanna nga ammo.

30 Idi makita ni Aaron ken dagiti Israelita nga agranraniag ti rupana, nagbutengda nga umasideg kenkuana.

31 Ngem inayaban ida ni Moises, isu a napan kenkuana ni Aaron ken dagiti amin a pangulo ti ili ket kinasaona ida.

32 Kalpasanna, linawlaw dagiti amin nga Israelita ket impakaammona kadakuada dagiti amin a bilin nga imbaga ni Yahweh kenkuana iti Bantay Sinai.

33 Idi malpasen ti panagsaona kadakuada, inabungotanna ti rupana.

34 Tunggal sumrek ni Moises iti Tolda a Pakiumanan a makisao ken ni Yahweh, ikkatenna ti abungotna. No rummuar, ipakaammona kadagiti Israelita dagiti amin a naibilin kenkuana

35 ket makitada nga agranraniag ti rupana. Abungotanna met laeng ti rupana agingga a mapan makisao manen ken ni Yahweh.

Dagiti Alagaden iti Aldaw a Panaginana

1 Inummong ni Moises dagiti amin nga Israelita ket kinunana kadakuada, “Daytoy ti imbilin tiAponga aramidenyo:

2 Agtrabahokayoiti innem nga aldaw, ngem ngilinenyo ti maikapito, ta nasantoan nga aldaw a panaginana a maidaton kaniak, ni Yahweh. Mapapatay ti siasinoman nga agtrabaho iti dayta nga aldaw.

3 Uray ti panamasged laeng iti apuy ti uneg ti balayyo, maiparit iti Aldaw a Panaginana.”

Dagiti Daton a maipaay iti Santuario

4 Kinuna ni Moises kadagiti amin nga Israelita, “Daytoy ti imbilin tiApo:

5 Mangidatagkay iti daton itiApo. Siasinoman nga agtarigagay a mangted, yegna dagitoy: balitok, pirak, wenno bronse;

6 de lana nga asul, ube ken nalabaga; nafino a linen; lupot a naabel iti dutdot ti kalding;

7 nakorte a lalat ti toro a karnero; nafino a lalat ti kalding; kayo ti akasia;

8 lana ti pagsilawan; bangbanglo a paglaok iti lana a pagkonsagrar ken iti nabanglo nga insenso;

9 napateg a karnelia ken napapateg a bato a maimontar iti efod ken iti pektoral ti Kangatoan a Padi.

Dagiti Alikamen a maipaay iti Tolda ti Dios

10 “Masapul nga umay dagiti amin a nalaing a trabahador kadakayo ket aramidenda amin nga imbilin tiApo:

11 ti Tolda ti Dios, ti Tolda agraman ti akin-uneg ken akinruar nga abbongna, dagiti kawit ken dagiti bastidorna, dagiti balunetna, dagiti poste agraman dagiti pagbatayanna,

12 ti Lakasa ti Tulag ken dagiti assiwna, ti kalub ken ti kurtina a panglinged.

13 Aramidenda met ti lamisaan ken dagiti assiw ken amin nga alikamenna, ti pagikabilan iti tinapay a maidaton iti Dios,

14 ti kandelero ti pagsilawan agraman dagiti alikamenna, dagiti pagsilawan agraman lana a segdenda.

15 Aramidenda ti altar a pagpuoran iti insenso agraman dagiti assiwna, ti lana a pagkonsagrar, ti nabanglo nga insenso ken ti kurtina ti ruangan ti Tolda ti Dios,

16 ti altar a pagpuoran kadagiti daton agraman ti bronse a barandiliasna, dagiti assiw ken amin nga alikamenna, ti pagbuggoan ken ti pagbatayanna,

17 dagiti kurtina ti paraangan agraman dagiti poste ken pagbatayanna, ti kurtina iti pagserkan iti paraangan;

18 dagiti pasok ken dagiti tali ti Tolda ken ti paraangan,

19 dagiti nadayag a kawes dagiti papadi nga agserbi iti Nasantoan a Disso—dagiti nasagradoan a kawes ni Aaron a padi ken dagiti annakna.”

Sagsagut dagiti Tattao

20 Pimmanaw dagiti Israelita,

21 ket nangyeg iti sagut dagiti amin a mayat a tumulong iti pannakabangon ti Tolda ti Dios. Inyegda ti amin a kasapulan iti panagdaydayaw ken dagiti maaramid a kawes dagiti papadi.

22 Nagisagut ti amin a mayat a tumulong, lalaki man wenno babai. Adda nagited iti gargantilias, aritos, singsing, kuentas ken amin a kita ti alahas a balitok ket indatonda dagitoy ken ni Yahweh.

23 Nangted dagiti addaan iti de lana nga asul, ube wenno nalabaga; nafino a linen; lupot a naabel iti dutdot ti kalding; napalabaga a lalat ti karnero wenno nafino a lalat.

24 Amin nga addaan iti pirak ken bronse a mabalinna nga isagut ket impanda dagitoy itiApokasta met dagiti addaan iti kayo nga akasia a mabalin a mausar iti patakder.

25 Adda dagiti babbai a nagtibbi iti de lana nga asul, ube, nalabaga ken nafino a linen ket indatagda dagitoy.

26 Adda met dagiti nagtibbi iti dutdot ti kalding.

27 Nagidaton dagiti pangulo kadagiti napateg a bato a karnelia ken dadduma nga alahas a maimontar iti efod ken pektoral,

28 agraman bangbanglo ken lana dagiti pagsilawan, lana a pagkonsagrar ken iti nabanglo nga insenso.

29 Tunggal Israelita nga adda maitulongna ket indatagna ti sagut ken ni Yahweh para iti trabaho a paaramid ni Yahweh ken ni Moises.

Dagiti Agtrabaho iti Tolda ti Dios

30 Kinuna ni Moises kadagiti Israelita, “Pinili tiAponi Bezalel nga anak ni Uri ken apoko ni Hur a nagtaud iti tribu ti Juda.

31 Pinunnona iti bukodna a pannakabalinket nalaing iti amin a kita ti trabaho iti arte.

32 Masirib nga agaramid kadagiti disenio a sukogenna manipud iti balitok, pirak ken bronse;

33 agtabas ken agimontar iti napateg a bato; ken agkitikit iti kayo ken iti amin a kita ti aramid iti arte.

34 Inted tiApokenkuana, kasta met ken ni Oholiab nga anak ni Ahisamac iti tribu ti Dan, ti sirib a mangisuro iti trabahoda kadagiti dadduma.

35 Inikkanna ida iti naidumduma a sirib nga agaramid kadagiti ar-aramiden dagiti kumikitikit, dagiti dibuhista, dagiti umaabel iti de lana nga asul, ube, nalabbaga ken nafino a linen ken dadduma a lupot. Kabaelanda ti amin a kita ti trabaho ket nalaingda a dibuhista.