Author: admin

Categories
Exodo

Exodo 36

1 “Da Bezalel ken Oholiab, agraman dagiti amin nga inikkan tiApoiti sirib ken laing, isuda ti agaramid kadagiti amin a kasapulan iti pannakaibangon ti santuario. Masapul nga aramiden ti amin kas imbilin tiApo.”

Ited dagiti Tattao ti Adu a Sagut

2 Inayaban ni Moises da Bezalel, Oholiab ken amin nga inikkan ni Yahweh iti sirib ken laing agraman dagiti mayat a tumulong ket pinairugina kadakuada ti trabaho.

3 Inted ni Moises kadakuada dagiti insagut dagiti Israelita a maipaay iti pannakabangon ti santuario ngem intultuloy dagiti Israelita ti binigat a pannangtedda kadagiti sagutda.

4 Napan dagiti trabahador ken ni Moises,

5 ket imbagada kenkuana, “Ad-adun ngem ti kasapulan ti yeg dagiti tattao a maipaay iti trabaho nga imbilin tiApoa maaramid.”

6 Ngarud, imbilin ni Moises iti entero a kampo a maisardengen ti panagited kadagiti sagut nga agpaay iti santuario. Isu nga awanen ti nagited iti sagut.

7 Nupay kasta, adu unayen ti naipan sadiay a pangleppas iti amin a trabaho.

Maaramid ti Tolda ti Dios

8 Dagiti kalaingan a trabahador ti nangaramid iti Tolda ti Dios. Naaramid daytoy iti sangapulo a pessat a lupot iti tinali a nafino a linen ken naabel iti asul, ube ken nalabaga a de lana, ken nabordaan kadagiti ladawan dagiti kerubim.

9 Agpapada ti rukod ti tunggal pessat: 12 a metro ti kaatiddog ken dua a metro ti kaakaba.

10 Pinagsasaipda ti lima a pessat iti maysa a naig; kasta met ti inaramidda kadagiti lima a pessat.

11 Nangaramidda kadagiti pagyusokan iti lupot nga asul iti akinruar a pingir ti tunggal naig.

12 Saglilimapulo a pagyusokan ti naikapet iti tunggal naig.

13 Nangaramidda iti 50 a kawit a balitok a namagkamang kadagiti dua a naig, isu a sangsangkanayon ti Tolda ti Dios.

14 Kalpasanna, inaramidda ti abbong ti Tolda iti sangapulo ket maysa a pessat ti lupot a naabel iti dutdot ti kalding.

15 Agpapada ti rukod ti tunggal pessat: 13 a metro ti kaatiddog ken dua a metro ti kaakaba.

16 Pinagsasaipda ti lima kadagitoy iti maysa a naig; kasta met ti inaramidda kadagiti innem.

17 Saglilimapulo a pagyusokan ti inkapetda iti pingir ti maudi a pessat iti umuna a naig ken iti pingir ti sabali a naig.

18 Nangaramidda iti 50 a kawit a bronse a pangikamangda kadagiti dua a naig tapno agbalin a maysa nga abbong.

19 Nangaramidda pay iti dua nga abbong, maysa iti napalabbaga a lalat ti karnero ket ti maysa iti nafino a lalat a mayaplag iti rabawna.

20 Nangaramidda kadagiti bastidor ti Tolda manipud iti kayo nga akasia.

21 Sangapulo ket lima a kadapan ti kaatiddog ti tunggal bastidor ket 27 a pulgada ti kalawana.

22 Adda dua nga agpada a sunta ti tunggal bastidor tapno agkakamangda. Sinuntaanda ti amin a bastidor.

23 Nangaramidda iti 20 a bastidor para iti paset ti bangirna iti abagatan ti tolda,

24 ken ti 40 a pirak a pagbatayanda, dua a pagbatayan ti bastidor a mangtengngel iti dua a suntana.

25 Nangaramidda met iti duapulo a bastidor para iti bangirna iti amianan,

26 agraman ti 40 a pirak a pagbatayan, dua a pagbatayan ti tunggal bastidor.

27 Innem a bastidor ti inaramidda nga agpaay iti paset ti bangirna iti laud;

28 ken dua a bastidor nga agpaay kadagiti suli iti likudan ti Tolda.

29 Nagkamang dagitoy pasuli a bastidor iti baba agingga iti tuktok nga yan ti umuna a pagkursongan. Kastoy ti pannakaaramid dagiti dua a bastidor iti dua a suli.

30 Adda ngarud walo a bastidor ken 16 a pirak a pagbatayan; dua a pagbatayan iti tunggal tabla.

31 Nangaramidda iti 15 a balunet iti kayo nga akasia; lima a balunet nga agpaay kadagiti bastidor iti maysa a sikigan ti Tolda;

32 lima nga agpaay kadagiti bastidor iti sabali a sikigan ken lima nga agpaay kadagiti bastidor iti paset iti bangirna iti laud.

33 Inkabilda ti akintengnga a balunet a mamagkakamang kadagiti bastidor manipud iti maysa a sikigan agingga iti sabali.

34 Kinalupkopanda dagiti bastidor iti balitok ket inkapetda ti balitok a pagyusokan a mangtengngel kadagiti balunet a nakalupkopan met iti balitok.

35 Nangaramidda iti kurtina iti nafino a linen, ken naabel iti asul, ube ken nalabaga a de lana ken nabordaan kadagiti ladawan dagiti kerubim.

36 Nangaramidda iti uppat a poste iti kayo nga akasia a pakaibitinan ti kurtina ket kinalupkopanda iti balitok; balitok dagiti inkapetda a kawit. Nangaramidda met iti uppat a pirak a pagbatayan dagiti poste.

37 Para iti pagserkan iti Tolda, nangaramidda iti kurtina iti nafino a linen ken naabel iti asul, ube ken nalabaga a de lana ken nabordaan,

38 agraman iti lima a poste a naikkan kadagiti kawit. Kinalupkopanda iti balitok dagiti tuktok dagiti poste ken dagiti pasikkil. Nangaramidda iti lima a bronse a pagbatayan dagiti poste.

Categories
Exodo

Exodo 37

Maaramid ti Lakasa ti Tulag

1 Inaramid ni Bezalel ti Lakasa ti Tulag manipud iti kayo nga akasia. Uppat a pulo ket lima a pulgada ti kaatiddog, 27 a pulgada ti kaakaba ken 27 a pulgada ti kangatona.

2 Puro a balitok ti inkalupkopna iti uneg ken iti ruarna ket balitok met ti impaikingna iti aglikmut.

3 Inyaramidanna iti uppat a pagyusokan a balitok a pagawitan sana inkapet kadagiti uppat a sakana; dua a pagyusokan iti agsumbangir.

4 Nangaramid kadagiti assiw nga akasia, kinalupkopanna ida iti balitok,

5 ket inyusongna dagiti assiw kadagiti pagyusokan iti agsumbangir ti Lakasa.

6 Nangaramid iti kalub iti puro a balitok; 45 a pulgada ti kaatiddog ken 27 a pulgada ti kaakabana.

7 Nangaramid iti dua a kerubim iti napanday a balitok;

8 maysa iti agsumbangir a pungto. Inaramidna ida a sangsangkanayon iti kalub.

9 Siuukrad dagiti payak dagiti kerubim iti ngatoenda; agsinsinnangoda ket linlinonganda ti kalub.

Ti Lamisaan dagiti Tinapay a Maidaton iti Dios

10 Akasia ti inaramid ni Bezalel a lamisaan: 36 a pulgada ti kaatiddog, 18 a pulgada ti kaakaba ken 27 a pulgada ti kangatona.

11 Puro a balitok ti inkalupkopna ket balitok met ti impaikingna iti aglikmut.

12 Pinagdawadawna iti tallo a pulgada ti kaakaba iti aglikmut sana pinaikingan iti balitok.

13 Inyaramidanna iti uppat a balitok a pagyusokan a pangawit iti lamisaan sana inkapet kadagiti uppat a suli a yan dagiti sakana

14 iti asideg ti agdawadaw.

15 Akasia dagiti assiw nga inaramidna a kinalupkopanna iti balitok.

16 Puro a balitok dagiti inaramidna a mausar iti lamisaan: dagiti pinggan, kopa, pitser ken dagiti malukong a pakaikargaan kadagiti daton nga inumen.

Ti Kandelero

17 Inaramid ni Bezalel ti kandelero iti puro a balitok. Pinanday met a balitok ti inaramidna a puon ken ungkayna. Sangsangkanayon iti kandelero dagiti arkosna a kimmopa a sabong ken busel.

18 Innem ti sangana: tallo iti agsumbangir.

19 Iti tunggal sanga, adda kimmopa a sabong a kas iti sukog ti almendras agraman busbusel ken petalo.

20 Adda uppat a kimmopa a sinan-sabong ti almendras ken dagiti busel ti ungkay ti kandelero.

21 Adda busel ti sabong iti baba ti tunggal maysa kadagiti tallo a paris a sanga.

22 Sangsangkanayon dagiti busel ken dagiti sanga iti kandelero; naaramidda iti napanday a puro a balitok.

23 Nangaramid iti pito a pagsilawan para iti kandelero, agraman dagiti puro a balitok a pagarsang ken pagyarsangan.

24 Agdagup iti 35 a kilo a puro a balitok ti inusarna iti kandelero agraman dagiti alikamenna.

Ti Altar a Pagpuoran iti Insenso

25 Akasia ti inaramid ni Bezalel nga altar a pagpuoran iti insenso. Kuadrado ti altar: 18 a pulgada ti kaatiddog, kasta met ti kalawana ken 36 a pulgada ti kangatona. Sangsangkanayon iti altar dagiti sinan-sara kadagiti uppat a sulina.

26 Kinalupkopanna ti rabawna, dagiti uppat a sikiganna ken dagiti sinan-sarana iti puro a balitok. Pinaikinganna iti balitok ti aglikmut.

27 Inyaramidanna iti dua a balitok a pakaiyusokan dagiti assiw ket inkapetna iti baba dagiti iking iti agsumbangir.

28 Akasia dagiti inaramidna nga assiw a kinalupkopanna iti balitok.

Ti Lana a Pagkonsagrar ken ti Insenso

29 Nangaramidni Bezalel iti nasagradoan a lana a pagkonsagrar ken iti nabanglo nga insenso a natempla a kas iti bangbanglo.

Categories
Exodo

Exodo 38

Ti Altar a Pagpuoran kadagiti Daton

1 Akasia ti inaramid ni Bezalel nga altar a pagpuoran kadagiti daton. Kuadrado ti altar: 7 1/2 a kadapan ti kaatiddog ken kalawana, ken 4 1/2 a kadapan ti kangatona.

2 Inikkanda kadagiti sinan-saradagiti uppat a suli ket sangsangkamaysada iti altar. Kinalupkopanna amin iti bronse.

3 Bronse dagiti amin nga inaramidna nga alikamen ti altar: dagiti palanggana, pala, kawit, malukong ken palanggana a pagikkan iti beggang.

4 Nangaramid iti bronse a barandilias ket inkabilna iti sirok ti pagdawadawan ti altar, a dumanon iti kagudua ti kangatona.

5 Nangaramid iti uppat a pagkursongan sana inkapet kadagiti uppat a suli ti altar.

6 Inaramidna dagiti assiw iti kayo nga akasia, ket kinalupkopanna iti bronse,

7 sana inyusong kadagiti pagyusokan iti agsumbangir ti altar. Naaramid ti altar kadagiti tabla ket awan nagyan ti unegna.

Ti Bronse a Palanggana

8 Inaramidni Bezalel ti bronse a palanggana ken ti pagbatayanna manipud kadagiti bronse a pagsarmingan dagiti babbai nga agserserbi iti ruangan ti Tolda ti Dios.

Ti Bakud ti Tolda ti Dios

9 Inaramidna ti paraangan ti Tolda ti Dios nga inalikubkobna iti nalamuyot a linen a kurtina. Iti bangirna iti abagatan, 50 a yarda ti kaatiddog dagiti kurtina.

10 Bronse dagiti duapulo a poste ken dagiti duapulo a batayda. Pirak dagiti kawit iti tunggal poste ken dagiti pakaibitinanda.

11 Agpada ti rukod ti paraangan iti bangirna iti amianan

12 ken iti laud, 25 a yarda ti kaatiddog dagiti kurtina a naibitin iti sangapulo a poste a naipasdek iti sangapulo a pagbatayan. Pirak dagiti kawit ti tunggal poste ken dagiti pakaibitinanda.

13 Iti bangirna iti daya a yan ti pagserkan, 25 a yarda ti kalawa ti paraangan.

14-15 Iti agsumbangir ti pagserkan, adda 7 1/2 a yarda a kurtina nga addaan iti tallo a poste ken tallo a pagbatayan.

16 Naaramid iti nalamuyot a tinali a linen ti amin a kurtina iti aglikmut ti paraangan.

17 Bronse dagiti pagbatayan dagiti poste. Pirak met dagiti kawit, dagiti pakaibitinan ken ti naikalupkop kadagiti tuktok ti poste. Napagkakamang dagiti amin a poste ti paraangan babaen kadagiti pirak a pasikkil.

18 Nabordaan ti kurtina ti ruangan ti paraangan ket naaramid iti de lana nga asul, ube, nalabaga ken nalamuyot a tinali a linen. Sangapulo a yarda ti kaatiddog ken 2 1/2 a yarda ti kagayadna a kas iti kurtina ti paraangan.

19 Naibitin iti uppat a poste a naisaad met iti uppat a pagbatayan. Pirak dagiti kawitda, ti naikalupkop iti tuktokda ken dagiti pakaibitinanda.

20 Bronse dagiti amin a pasok ti Tolda ken dagiti pasok ti aglikmut ti paraangan.

Dagiti Metal a Mausar iti Tolda ti Dios

21 Daytoy ti listaan dagiti metal a nausar iti Tolda ti Dios a nakaikabilan dagiti dua a tapi a bato a nakailanadan dagiti Sangapulo a Bilin. Pinaaramid ni Moises daytoy kadagiti Levita a nagtrabaho iti panangidaulo ni Itamar nga anak ni Aaron a padi.

22 Ni Bezalel nga anak ni Uri ken apoko ni Hur iti tribu ti Juda ti nangaramid kadagiti amin nga imbilin ni Yahweh.

23 Ni Oholiab nga anak ni Ahisamac iti tribu ti Dan ti nagpaay a katulongan ni Bezalel. Agkitkitikit ni Oholiab, dibuhista ken agab-abel iti de lana nga asul, ube ken nalabaga ken iti nalamuyot a linen.

24 Agdagsen iti 1,000 a kilo ti amin a balitok a naidaton itiApoken nausar iti pannakaaramid ti santuario. Nausar ditoy ti pagtimbangan ti templo.

25 Agdagsendagiti pirak a naparuar iti pannakasensus dagiti umili iti 3,430 a kilo, segun iti pagtimbangan ti templo.

26 Daytoyti dagup ti binayadan dagiti amin a nasensus; inted ti tunggal maysa ti naituding a gatad, segun iti pagtimbangan ti templo. Agdagup iti 603,550 a lallaki dagiti nailista iti sensus nga agtawen iti 20 wenno nasursurok pay.

27 Nausar ti 3,400 a kilo a pirak iti pannakaaramid dagiti 100 a pagbatayan iti santuario ken dagiti kurtina—34 a kilo iti tunggal pagbatayan.

28 Iti nabati a 30 a kilo a pirak, inaramid ni Bezalel dagiti pagibitinan ti kurtina, dagiti kawit dagiti poste ken ti naikalupkop iti tuktokda.

29 Agdagsen iti 2,425 a kilo dagiti bronse a naidaton itiApo.

30 Dagitoy dagiti naaramid a pagbatayan iti pagserkan iti Tolda ti Dios, ti bronse nga altar agraman bronse a barandiliasna, dagiti amin nga alikamen ti altar,

31 dagiti pagbatayan ti bengbeng iti likmut ti tolda ken ti pagserkanna ken dagiti amin a pasok iti Tolda ti Dios ken dagiti pasok iti aglikmutna.

Categories
Exodo

Exodo 39

Dagiti Kawes dagiti Papadi

1 De lana nga asul, ube ken nalabaga ti naaramid a kawes dagiti papadi nga agserbi iti Nasantoan a Disso. Inaramidda ti kawes ni Aaron a kas padi, kas imbilin ni Yahweh ken ni Moises.

2 Inaramidda ti efod iti nafino a linen de lana nga asul, ube ken nalabaga; ken panait a balitok.

3 Nangpitpitda iti balitok agingga nga immingpis ket rinagragasda nga inyabel iti de lana nga asul, ube ken nalabaga ken ti nabordaan a nalamuyot a linen.

4 Inaramidda ti terante ti efod a maikapet iti agsumbangir a sikiganna tapno agkamang.

5 Napintas ti pannakaabel ti barikes a naikamang iti efod ket sangsangkanayonda; naaramid daytoy iti isu met laeng a material, kas imbilin ni Yahweh ken ni Moises.

6 Tinabasda dagiti napateg a bato a karnelia sada immontar kadagiti balitok a pagitampokan. Naikitikit kadagiti bato dagiti nagan dagiti 12 nga annak ni Jacob.

7 Iti terante ti efod ti nakaikabitan dagitoy a mangibagi kadagiti 12 a tribu ti Israel, kas imbilin ni Yahweh ken ni Moises.

Ti Pektoral

8 Inaramidda ti pektoral iti isu met la a material a naaramat iti efod ken isu met la a borda.

9 Kuadrado ti pektoral a nagkulpi iti tengnga; siam a pulgada ti kaatiddog, kasta met ti kaakabana.

10 Minontaranda iti uppat nga intar iti napapateg a bato; iti umuna nga intar, immontarda ti rubi, topasio ken granate;

11 iti maikadua, esmeralda, safiro ken diamante;

12 iti maikatlo, hasinto, agata ken amatista;

13 ket iti maikapat, berilio, karnelia ken jaspe. Naimontar dagitoy iti balitok.

14 Iti tunggal bato, naimontar ti maysa a nagan dagiti annak ni Jacob a mangibagi kadagiti 12 a tribu ti Israel.

15 Nangtalida iti pinitpit a puro a balitok a kordon para iti pektoral.

16 Nangaramidda iti dua a balitok a pagmontaran ken dua a balitok a pagyusokan nga inkapetda kadagiti suli ti pektoral, iti akingngato a pasetna.

17 Inggalutda ti murdong dagiti kordon a balitok kadagiti dua a balitok a pagyusokan.

18 Inggalutda met ti maysa a murdong ti tunggal kordon kadagiti pagmontaran ket kastoy ti pannakaikamangda iti sango kadagiti terante ti efod.

19 Nangaramidda iti dua a pagyusokan a balitok ket inkapetda kadagiti akimbaba a suli ti pektoral iti akin-uneg a gayadan a dumna iti efod.

20 Nangaramidda pay iti dua a pagkursongan a balitok ket inkapetda iti akimbaba a paset ti sango dagiti dua a terante iti asideg ti nagtupian ken ngatoen ti naabel a barikes ti efod.

21 Babaen iti asul a kordon, pinagkamangda dagiti pagyusokan ti pektoral ken dagiti pagyusokan ti efod iti ngatoen ti barikes tapno agsaad ti pektoral iti barikes ket saanda nga agsina. Inaramidda daytoy kas imbilin ni Yahweh ken ni Moises.

Dagiti Dadduma a Kawes ti Padi

22 Puro a de lana nga asul ti inabelda a kagay a rutap ti efod.

23 Tapno saan a mapisang ti putol ti kagay, adda indaitda nga arubite a lebleb iti lawlawna.

24-26 Iti aglikmut ti gayadan ti kagay, nangikabilda kadagiti sinan-bunga ti granada manipud iti de lana nga asul, ube ken nalabaga ken naingpis a tinali a linen a binaetbaetanda kadagiti puro a balitok a kampanilia, kas imbilin ni Yahweh ken ni Moises.

27 Inaramidda dagiti abito ni Aaron ken dagiti annakna,

28 kasta met ti turban, dagiti kallugong, dagiti linen a sapin,

29 ti napintas ti pannakaabelna a linen a barikes ken de lana nga asul, ube ken nalabaga a nabordaan kas imbilin ni Yahweh ken ni Moises.

30 Puro a balitok ti inaramidda nga insignia, ti nasagradoan a pakakitaan ti pannakaidaton. Inkitikitda dagitoy a balikas: “Naidaton ken ni Yahweh.”

31 Inggalutda daytoy iti turban babaen iti asul a kordon kas imbilin ni Yahweh ken ni Moises.

Ti Pannakaileppas ti Trabaho

32 Nalpas ti amin a trabaho iti Tolda ti Dios. Inaramid dagiti Israelita ti amin kas imbilin ni Yahweh ken ni Moises.

33 Impanda ken ni Moises ti Tolda agraman dagiti amin nga alikamenna, dagiti kawit, dagiti bastidor, dagiti balunet, dagiti poste ken dagiti batayna;

34 ti napalabaga nga abbong a lalat ti karnero, ti abbong a nafino a lalat, ti panglinged a kurtina,

35 ti Lakasa ti Tulag a nakaikabilan dagiti tapi a bato, dagiti assiw ken ti kalub ti Lakasa,

36 ti lamisaan ken amin nga alikamenna, ti tinapay a maidaton iti Dios,

37 ti kandelero a puro a balitok ken dagiti pagsilawanna; dagiti pagsilawan ken amin nga alikamenna; ti lana ti pagsilawan;

38 ti altar a balitok; ti lana a pagkonsagrar; ti nabanglo nga insenso; ti kurtina iti pagserkan ti Tolda;

39 ti bronse nga altar agraman ti bronse a barandiliasna, dagiti assiwna, ken dagiti amin nga alikamenna, ti palanggana a pagbuggoan agraman ti pagbatayanna;

40 dagiti kurtina ti paraangan, dagiti poste ken dagiti pagbatayanda; ti kurtina ti pagserkan ti paraangan, dagiti talina, dagiti pasok ti Tolda ken dagiti amin nga alikamen iti panagserbi iti Tolda ti Dios,

41 ken dagiti nadayag a kawes dagiti papadi nga agserbi iti Nasantoan a Disso; dagiti nasagradoan a kawes ni Aaron a padi ken dagiti kawes dagiti annakna.

42 Inaramid dagiti Israelita dagiti amin a trabaho, kas imbilin ni Yahweh ken ni Moises.

43 Sinaggaysa a sinukimat ni Moises ti amin ket nakitana a mayannurot dagitoy iti imbilin ni Yahweh. Iti kasta, binendisionanna amin ida.

Categories
Exodo

Exodo 40

Mabangon ken Maidaton ti Tolda ti Dios

1 Kinuna ni Yahweh ken ni Moises,

2 “Iti umuna nga aldaw ti umuna a bulan, bangonemto ti Tolda ti Dios.

3 Ikabilmo iti unegna ti Lakasa ti Tulag a nakaikabilan dagiti Sangapulo a Bilin ket ibitinmo met ti kurtina iti sangona.

4 Yunegmo ti lamisaan samo iparabaw dagiti alikamenna. Yunegmo met ti kandelero ket ikabilmo dagiti pagsilawanna.

5 Ikabilmo ti balitok nga altar a pagpuoran iti insenso iti sango ti Lakasa ti Tulag. Ibitinmo ti kurtina iti ruangan ti Tolda ti Dios.

6 Ikabilmo ti altar a pagpuoran iti daton iti sango ti Tolda.

7 Ikabilmo ti palanggana a pagbuggoan iti nagbaetan ti Tolda ti Dios ken ti altar ket kargaam iti danum.

8 Ikabilmo dagiti kurtina a mangalikubkob iti paraangan, ket kurtinaam ti ruanganna.

9 “Kalpasanna, alaem ti nasagradoan a lana samo warisan ti Tolda ken amin nga alikamenna tapno maikonsagrarda ket agbalinda a nasagradoan.

10 Isarunom nga ikonsagrar ti altar babaen iti panangwarismo iti lana tapno agbalin a naan-anay a sagrado.

11 Kastoy met ti panangikonsagrarmo iti palanggana a pagbuggoan ken ti pagbatayanna.

12 “Ipanmo ni Aaron ken dagiti annakna iti ruangan ti Tolda ti Dios ket digosem ida kas mayannurot iti seremonia.

13 Kalpasanna, yarruatmo ken ni Aaron ti kawesna a kas padi. Sapsapoam ni Aaron iti lana ket ikonsagrarmo tapno agbalin a padi nga agserbi kaniak.

14 Paasitgem met dagiti annakna; yaruatmo kadakuada dagiti tunika.

15 Ket ikonsagrarmo ida a kas iti amada tapno mabalinda ti agserbi kaniak a kas padi. Iti pannakakonsagrarda, agbalinda a padi ken dagiti kaputotanda iti agnanayon.”

16 Tinungpal ni Moises ti amin nga imbilin kenkuana ni Yahweh.

17 Nabangon ti Tolda ti Dios iti umuna nga aldaw ti umuna a bulan iti maikadua a tawen kalpasan ti ipapanawda idiay Egipto.

18 Insaad ni Moises dagiti pagbatayanna, impatakderna dagiti bastidor, inkapetna dagiti balunet ken binangonna dagiti poste.

19 Inyukradna ti abbong iti rabaw ti Tolda ket imparabawna ti akinruar nga abbong, kas imbilin ni Yahweh.

20 Innalana dagiti tapi a bato ket inkabilna iti Lakasa ti Tulag. Inyusokna dagiti assiw sana kinaluban ti Lakasa.

21 Kalpasanna, inkabilna ti Lakasa iti uneg ti Tolda. Imbitinna ti kurtina ket kastoy ti pannakalinged ti Lakasa, kas imbilin ni Yahweh.

22 Inkabilna ti lamisaan iti uneg ti Tolda, iti bangirna iti amianan iti ruar ti kurtina

23 ket imparabawna ti tinapay a naidaton ken ni Yahweh, kas imbilinna kenkuana.

24 Inkabilna ti kandelero iti uneg ti Tolda iti batog ti lamisaan iti bangirna iti abagatan.

25 Insaadna dagiti pagsilawan iti kandelero iti sangoanan ni Yahweh, kas imbilinna kenkuana.

26 Inkabilna ti balitok nga altar iti uneg ti Tolda iti sangoanan ti kurtina,

27 ket pinuoranna ti nabanglo nga insenso, kas imbilin ni Yahweh.

28 Imbitinna ti kurtina iti ruangan ti Tolda.

29 Iti sangoanan ti kurtina, inkabilna ti altar a pagpuoran kadagiti sakrifisio. Iti rabaw ti altar, indatonna dagiti sakrifisio a sibubukel a mapuoran ken ti daton a makan, kas imbilin ni Yahweh kenkuana.

30 Inkabilna ti palanggana iti nagbaetan ti Tolda ken ti altar sana kinargaan iti danum.

31 Ditoy ti pagbuggoan da Moises, Aaron ken dagiti annakna kadagiti ima ken sakada.

32 Agbuggoda tunggal sumrekda iti Tolda ti Dios wenno umasidegda iti altar kas imbilin ni Yahweh ken ni Moises.

33 Binangon ni Moises ti bengbeng iti aglikmut ti Tolda ken ti altar ket imbitinna ti kurtina iti pagserkan ti paraangan. Inleppas ni Moises ti amin a trabaho.

Ti Ulep iti Ngatoen ti Tolda ti Dios

34 Kalpasanna,nagdisso ti ulep a nangkumot iti Tolda ti Dios ket napunno iti makasisirap a lawag ni Yahweh.

35 Gapu iti daytoy, saan a makastrek ni Moises iti Tolda.

36 Sa la yalis dagiti Israelita ti kampoda no agpangato ti ulep manipud iti Tolda.

37 No saan nga umalis ti ulep, saanda met nga umalis iti pagkampoanda.

38 Iti amin a panagdaliasat dagiti Israelita, kumuykuyog latta ti ulep ti dayag ni Yahweh ken ti gumilgil-ayab nga apuy. Iti aldaw, adda ti ulep iti ngatoen ti Tolda ket iti rabii, adda ti apuy iti isu met la a lugar a makita dagiti tattao.

Categories
Levitico

Levitico 1

Dagiti Daton a Mapuoran

1 Inayaban ni Yahweh ni Moises manipud iti Tolda ti Dios ket intedna dagitoy nga alagaden

2 dagiti Israelita no agidatonda.

No adda mangidatag iti daton a mapuoran, mabalin a maysa kadagiti bakana, wenno karnero, wenno kaldingna.

3 No maysa kadagiti bakana ti idatagna a kas sakrifisio, mangted iti toro nga awan pakapilawanna ket ipanna iti ruangan ti Tolda ti Dios tapno awaten ni Yahweh.

4 Ipatayna ti imana iti ulo ti animal ket maawatto a kas daton a mangikkat kadagiti basbasolna.

5 Patayennanto ti toro sadiay, ket idatag dagiti papadi a kapuonan ni Aaron ti dara ti animal ken ni Yahweh sada ibuyat kadagiti igid ti altar nga adda iti ruangan ti Tolda.

6 Lalatenna ti animal sana rangrangkayen.

7 Urnosen dagiti papadi dagiti kayo a pagsungrod iti rabaw ti altar sada aronan.

8 Iparabawdanto dagiti narangrangkay a paset ti animal iti apuy, agraman ti ulo ken ti taba.

9 Buggoan ti mangidaton dagiti lalaem ken dagiti kammaudi a saka ti animal. Paggigiddanento ti padi a puoran dagiti daton iti rabaw ti altar, kas nabanglo a daton itiApo.

10 No karnero wenno kalding ti maidaton, masapul a kalakian ken awan depektona ti idatagna.

11 Patayennanto daytoy iti akin-amianan a paset ti altar, ket ibuyat dagiti papadi ti dara ti animal kadagiti uppat a sikigan ti altar.

12 Kalpasan ti panangrangrangkayna, iparabaw ti padi dagiti amin a paset ti animal agraman ti ulo ken ti taba iti sumsumged a kayo iti altar.

13 Mabuggoan nga umuna dagiti lalaem ken dagiti kammaudi a saka ti animal ket mapuoranda iti altar. Makaay-ayo ken nabanglo daytoy a daton ken ni Yahweh.

14 No tumatayab ti datonna a mapuoran, masapul a pagaw wenno sibong ti kalapati ti idatagna.

15 Ipanto ti padi iti altar, tiritirenna sana pulsoten ti tengnged ti tumatayab ket puoranna sadiay ti ulo. Maipaaruyot ti darana iti sikigan ti altar.

16 Ikkatenna ti kinarakaran ken dagiti nagyanna sana ibelleng iti akindaya a paset ti altar a pakaikabilan iti dapu.

17 Pisangenna ti bagi ti tumatayab, ngem dina isinsina dagiti payakna sananto puoran ti sibubukel a tumatayab iti rabaw ti altar. Makaay-ayo ken nabanglo daytoy a daton itiApo.

Categories
Levitico

Levitico 2

Dagiti Daton a Makan

1 No adda mangidatag iti daton a makan itiApo, umuna pay nga aramidenna nga arina a nafino. Ikkanna daytoy iti lana ti olibo ken insenso

2 sana ipan kadagiti papadi a kapuonan ni Aaron. Mangrakem ti padi iti arina ken iti lana ken amin nga insenso sana puoran iti rabaw ti altar a mangipakita a naidatonna amin itiApo. Makaay-ayo ken nabanglo daytoy a daton itiApo.

3 Kukua dagiti papadi ti natda iti daton a makan. Sagrado unay daytoy agsipud ta paset ti naidaton itiApo.

4 No tinapay a naluto iti urno ti maidaton, masapul nga awan lebadurana ti maidatag. Mabalin a napuskol a tinapay a nalaokan iti lana ti olibo wenno naiingpis a kankanen a napulagidan iti lana ti olibo.

5 No tinapay a naluto iti pariok ti maidaton, masapul a maaramid iti arina a nalaokan iti lana ti olibo, ngem awan ti lebadurana.

6 Mapispisi ti tinapay sa mabuyatan iti lana no maidatag a kas daton a makan.

7 No tinapay a naluto iti kaserola ti maidaton, masapul a maaramid iti arina ken lana ti olibo.

8 Idatonmo daytoy itiApo, ket yawatmo iti padi a mangipan iti altar.

9 Mangalanto ti padi iti sangkabassit a mangipakita a naidatag amin itiApo, ket puoranna iti altar. Nabanglo ken makaay-ayo daytoy a daton itiApo.

10 Kukua dagiti papadi ti natda iti daton. Sagrado unay daytoy agsipud ta naggapu iti naidaton itiApo.

11 Masapul nga awan lebadurana dagiti makan nga idatonyo itiApo. Diyo laokan iti lebadura wenno diro ti makan nga idatonyo itiApo.

12 Masapul a maidaton itiApoti umuna a trigo a maapityo iti tunggal tawen, ngem diyo puoran iti altar.

13 Asinanyo dagiti amin a daton a makan, agsipud ta ti asin ti mangibagi iti tulagyo iti Dios. (Masapul nga asinam dagiti amin nga idatonmo.)

14 No mangidatagkayo itiApoiti daton nga agtaud kadagiti umuna a maapit iti trigo, masapul nga iniruban wenno nalebbek a trigo.

15 Ikkanyo iti lana ti olibo ken insenso.

16 Puoran ti padi ti paset ti nalebbek a trigo ken ti lana a mangipakita a naidaton amin, kasta met ti amin nga insenso a kas daton itiApo.

Categories
Levitico

Levitico 3

Dagiti Daton a Pakikappia

1 No adda mangidatag iti maysa kadagiti bakana a kas daton a pakikappia, masapul a toro wenno kabaian nga awan depektona.

2 Ipatayna ti imana iti ulo ti animal ket patayenna iti ruangan ti Tolda ti Dios. Ibuyatto dagiti papadi a kaputotan ni Aaron ti dara ti animal kadagiti uppat a sikigan ti altar.

3 Puorandanto dagitoy a paset ti animal a kas daton itiApo: amin a taba dagiti lalaem,

4 dagiti bekkel ken dagiti kimpet a taba ken ti kasayaatan a paset ti dalem.

5 Amin dagitoy, puoran dagiti papadi iti rabaw ti altar agraman dagiti daton a mapuoran. Nabanglo ken makaay-ayo daytoy a daton itiApo.

6 No karnero wenno kalding ti daton a pakikappia, mabalin a kalakian wenno kabaian, ngem masapul nga awan depektona.

7 No karnero ti idatag ti maysa a tao,

8 ipatayna ti imana iti ulo ti animal ket patayenna iti sangoanan ti Tolda ti Dios. Ibuyat dagiti papadi ti dara ti animal kadagiti uppat a sikigan ti altar.

9 Maidatonto itiApodagitoy a paset ti animal: ti taba, ti entero a nataba nga ipus a naputed iti asideg ti duri, dagiti amin a taba a nangbalkot kadagiti lalaem,

10 dagiti bekkel ken dagiti kimpet a taba ken ti kasayaatan a paset ti dalem.

11 Puoranto ti padi amin dagitoy iti rabaw ti altar a kas daton itiApo

12 No kalding ti idatag ti tao,

13 ipatayna ti imana iti ulo ti animal, ket patayenna iti sangoanan ti Tolda ti Dios. Ibuyat dagiti papadi ti dara ti animal kadagiti uppat a sikigan ti altar.

14 Maidatonto itiApodagitoy a paset ti animal: dagiti amin a taba dagiti lalaem,

15 dagiti bekkel ken dagiti kimpet a taba ken ti kasayaatan a paset ti dalem.

16 Puoranto ti padi amin dagitoy iti rabaw ti altar a kas nabanglo a daton itiApo. Kukua tiApodagiti amin a taba.

17 Awan ti Israelita a mapalubosan nga agsida iti taba wenno dara. Agnanayon daytoy nga alagaden a masapul a tungpalenda iti sadinoman a pagnaedanda.

Categories
Levitico

Levitico 4

Dagiti Daton gapu kadagiti Basol a Di Inggagara

1 Imbilin ni Yahweh ken ni Moises

2 nga ibagana daytoy kadagiti Israelita. No adda agbasol ket salungasingenna ti uray ania kadagiti linteg tiApoa dina inggagara, masapul a tungpalenna dagiti sumaganad nga annuroten.

3 No ti Kangatoan a Padi ti agbasol a pakairamanan met dagiti tattao, masapul a mangidatag iti bumaro a baka nga awan depektona ket idatonna itiApogapu iti basolna.

4 Ipanna ti baka iti ruangan ti Tolda, ipatayna ti imana iti ulo ti animal, ket patayenna sadiay iti imatang tiApo.

5 Mangala iti dara ti animal ket ipanna iti uneg ti Tolda.

6 Isawsawna ti ramayna iti dara sana warsian iti mamimpito ti sangoanan ti nasagradoan a kurtina ti santuario.

7 Pulagidanna iti dara dagiti sinan-sara ti altar a pagpuoran iti insenso iti Tolda. Ibuyatna ti natda a dara iti puon ti altar a pagidatagan iti daton a mapuoran nga adda iti ruangan ti Tolda.

8 Ikkatenna amin a taba ti baka, ti taba dagiti lalaem,

9 dagiti bekkel ken dagiti kimpet a taba ken ti kasayaatan a paset ti dalem.

10 Alaen ti padi daytoy a taba ket puoranna iti altar dagiti daton a mapuoran, kas iti aramidenna iti taba dagiti animal a daton a pakikappia.

11 Ngem alaenna ti lalat ti animal, amin a lasagna, ti ulo, dagiti saka, dagiti lalaem, agraman dagiti bagis.

12 Ipanna amin dagitoy iti ruar ti kampo, iti lugar a nadalus iti imatang ti linteg, iti pagibellengan iti dapu, ket puoranna ida iti rabaw dagiti kayo a pagsungrod.

13 No ti entero nga Israel ti agbasol ket dida ammo a sinalungasingda ti maysa kadagiti bilin tiApo,

14 apaman a maammoan ti basolda, masapul a mangyeg ti sangkagimongan iti bumaro a baka a kas daton gapu iti basol. Ipanda ti animal iti Tolda ti Dios.

15 Ipatay dagiti pangulo ti sangkagimongan dagiti imada iti ulo ti animal, ket sadiay ti pakapatayanna.

16 Mangalanto ti Kangatoan a Padi iti dara ti baka sana ipan iti Tolda ti Dios.

17 Isawsawna ti ramayna iti dara sa mamimpito a warsianna ti sangoanan ti kurtina.

18 Pulagidanna iti dara dagiti sinan-sara ti altar a pagpuoran iti insenso iti uneg ti Tolda. Ibuyatna ti natda a dara iti puon ti altar a pagidatagan iti daton a mapuoran nga adda iti ruangan ti Tolda.

19 Kalpasanna, alaenna ti amin a taba ti baka sana puoran iti rabaw ti altar.

20 Aramidennanto iti daytoy a baka ti kas iti inaramidna iti baka a naidatag gapu iti basol, ket kalpasan ti panangannongna iti seremonia a pangikkat iti basol, napakawanen dagiti tattao.

21 Ipanna ti baka iti ruar ti kampo ket puoranna a kas iti inaramidna iti baka a naidaton gapu iti basolna. Daytoy ti daton a mangikkat iti basol ti sangkagimongan.

22 No maysa nga agturay ti agbasol ket dina ammo a sinalungasingna ti maysa kadagiti bilin tiApo,

23 apaman a maibaga kenkuana ti basolna, mangidaton iti kalakian a kalding nga awan depektona.

24 Ipatayna ti imana iti ulo ti animal sana patayen iti akin-amianan a paset ti altar, iti pagpatayan kadagiti daton a mapuoran. Daytoy ti daton a mangikkat iti basol.

25 Isawsaw ti padi ti ramayna iti dara ti animal, pulagidanna iti dara dagiti sinan-sara ti altar, ket ibuyatna ti natda iti puon ti altar.

26 Kalpasanna, puoranna amin a taba ti animal iti altar, kas iti inaramidna iti taba dagiti animal a naidaton a pakikappia. Kastoy ti pannakaidatag ti daton gapu iti basol tapno mapakawan ti agturay.

27 Nomaysa kadagiti kadawyan a tattao ti agbasol ket dina ammo a sinalungasingna ti maysa kadagiti bilin tiApo,

28 apaman a maibaga kenkuana ti basolna, masapul a mangidatag iti kabaian a kalding nga awan depektona.

29 Ipatayna ti imana iti ulo ti animal sana patayen iti akin-amianan a paset ti altar, iti pagpatayan kadagiti animal a maidatag a daton a mapuoran.

30 Isawsaw ti padi ti ramayna iti dara ti animal, pulagidanna iti dara dagiti sinan-sara ti altar, ket ibuyatna ti natda iti puon ti altar.

31 Kalpasanna, ikkatenna ti amin a taba ti animal kas iti inaramidna iti taba dagiti animal a naidaton a pakikappia. Puoranna dagitoy iti altar kas nabanglo a daton itiApo. Kastoy ti pannakaidatag iti daton gapu iti basol tapno mapakawan dayta a tao.

32 No karnero ti idatag ti maysa a tao a kas daton gapu iti basol, masapul a kabaian nga awan ti depektona.

33 Ipatayna ti imana iti ulo ti animal sana patayen iti akin-amianan a paset ti altar, iti pagpatayan kadagiti animal a maidatag a kas daton a mapuoran.

34 Isawsaw ti padi ti ramayna iti dara ti animal, pulagidanna iti dara dagiti sinan-sara ti altar, ket ibuyatna ti natda a dara iti puon ti altar.

35 Kalpasanna, ikkatenna ti amin a taba ti animal kas iti panangikkatna iti taba dagiti animal a naidaton a pakikappia. Puoranna dagitoy iti altar a maigiddan iti daton a mapuoran a naidatag itiApo. Kastoy ti pannakaidatag iti daton gapu iti basol tapno mapakawan dayta a tao.

Categories
Levitico

Levitico 5

Dadduma a Basol a Pakasapulan iti Daton

1 Masapul a maidatag ti daton gapu kadagitoy a basbasol:

No maayaban ti maysa iti pangukoman tapno saksianna ti maysa a pasamak a nakita wenno ammona ngem dina kayat ti agsao, masapul nga ikarona ti basolna.

2 No adda makasagid iti aniaman a maibilang a narugit, kas iti natay nga animal, maibilang a narugit ken makabasol apaman a mabigbigna ti inaramidna.

3 No adda makasagid iti aniaman a maibilang a narugit a nagtaud iti tao, uray ania, makabasol apaman a mabigbigna ti inaramidna.

4 No barengbareng ti panagsapata ti maysa a tao—agaramid man iti dakes wenno naimbag—makabasol apaman a mabigbigna ti inaramidna.

5 No nakabasol ti maysa a tao, masapul nga ipudnona ti basolna,

6 ket kas multana mangidaton itiApoiti kabaian a karnero wenno kalding. Ti padi ti mangidatag iti daton gapu iti basol dayta a tao.

7 No saan a kabaelan ti maysa a tao ti mangidaton iti karnero wenno kalding, mangidaton iti dua a kalapati wenno dua a sibong ti kalapati a kas multana—maysa ti daton gapu iti basol, ket ti maysa daton a mapuoran.

8 Idaton nga umuna ti padi ti daton gapu iti basol. Rungdoenna ti tengnged ti tumatayab ngem dina isinsina ti ulona.

9 Iwarisna ti dadduma a dara daytoy iti sikigan ti altar idinto nga ibuyatna ti natda iti puon ti altar. Daytoy ti daton a mangikkat iti basol.

10 Kalpasanna, idatagna ti maikadua a tumatayab a kas daton a mapuoran kas mayannurot kadagiti alagaden. Kastoy ti pannakaidatag ti daton gapu ti basol tapno mapakawan dayta a tao.

11 No saan a kabaelan ti maysa a tao ti mangidaton iti dua a kalapati wenno dua a sibong ti kalapati, mangidatag iti sangakilo nga arina a kas daton gapu iti basolna. Dina ikkan iti lana ti olibo wenno insenso, agsipud ta daytoy ti daton gapu iti basol.

12 Ipanna daytoy iti padi a mangala met iti sangarakem a mangipakita a naidatag amin itiApo. Puoranna ti rinakemna iti altar a kas daton a mangikkat iti basol.

13 Kastoy ti pannakaidatag iti daton gapu iti basol tapno mapakawan dayta a tao. Kas ti daton a makan, kukua ti padi ti natda nga arina.

Dagiti Daton a Pagsupapak kadagiti Biddut

14 Inted ni Yahweh dagitoy nga alagaden ken ni Moises.

15 No adda agbasol a dina ammo gapu iti dina pannangted kadagiti pagbayad a nasagradoan itiApo, mangidatag iti kalakian a karnero wenno kalding nga awan depektona, a datonna a pagsupapak itiApo. Magatadan ti animal segun ti naituyang a pagtimbangan.

16 Masapul a bayadanna ti saanna a naited ket nayonanna pay iti apagkalima. Itedna iti padi a mangidatag iti animal a daton gapu iti basol tapno mapakawan dayta a tao.

17 No adda mangsalungasing iti aniaman a bilin tiApo, uray dina ammo a kasta ti inaramidna, makabasol ket masapul nga agmulta.

18 Masapul a mangidaton iti kalakian a karnero wenno kalakian a kalding nga awan depektona. Magatadan ti animal segun ti naituyang a pagtimbangan. Ti padi ti mangidatag iti daton tapno mapakawan ti nagbasol.

19 Daytoy ti daton nga agpaay iti basol gapu ta nagbasol dayta a tao itiApo.