Author: admin

1 Intedni Yahweh dagiti sumaganad nga alagaden ken ni Moises.

2 Agbasol itiApoti siasinoman a di mangisubli iti naipadulin kenkuana wenno mangsaur iti padana a tao wenno agtakaw,

3 wenno mangyulbod a dina ammo ti maipapan iti aniaman a napukaw, ket isapatana a dina nasarakan.

4-5 No makabasol ti maysa a tao iti uray ania kadagitoy, masapul a bayadanna ti aniaman nga innalana iti sinasaur. Iti aldaw a naduktalan a nakabasol, masapul a bayadanna iti akinkukua ti gatad ti sinaurna. Manayonan pay iti apagkalima ti presio ti innalana.

6 Ipanna iti padi ti kalakian a karnero wenno kalding nga awan depektona a kas datonna itiApoa pagsupapak iti basolna. Magatadan ti datonna segun ti naituyang a pagtimbangan.

7 Idatag ti padi ti daton ket mapakawan dayta a tao iti aniaman a nagbasolanna.

Dagiti Daton a Mapuoran

8 Binilin ni Yahweh ni Moises

9 nga itedna ken ni Aaron ken kadagiti annakna dagiti alagaden kadagiti daton a mapuoran. Masapul a maikabil ti daton a mapuoran iti rabaw ti altar ket bay-an nga agpatpatnag sadiay nga adda sumsumged nga apuy.

10 Agaruat ti padi iti linen a kagay ken linen a sapin ket ikkatenna dagiti nalanit a dapu a nabati iti altar sana ikabil iti sikigan ti altar.

11 Sukatanna ti pagan-anayna sana ipan dagiti dapu iti lugar a maibilang a nadalus iti ruar ti kampo.

12 Masapul a sisesegged a kanayon ti apuy iti altar, ket di baybay-an a maiddep. Binigat a sungrodan ti padi, urnosenna dagiti daton iti rabawna, ket puoranna ti taba ti daton a pakikappia.

13 Masapul a sisesegged a kanayon ti apuy iti altar, ket di baybay-an a maiddep.

Dagiti Daton a Makan

14 Dagitoy ti alagaden kadagiti daton a makan. Maysa kadagiti padi nga annak ni Aaron ti mangidatag itiApoiti daton a makan iti sangoanan ti altar.

15 Mangrakem iti arina ken ikkanna iti lana ken insenso sana puoran iti altar a mangipakita a naidatag amin itiApo. Nabanglo ken makaay-ayo daytoy a daton itiApo.

16-17 Kanen ti padi ti amin a natda. Maaramid a tinapay nga awan lebadurana ket makan iti nasantoan a lugar, iti paraangan ti Tolda ti Dios. Inted tiApodaytoy kadakuada, kas bingayda kadagiti daton a makan. Sagrado unay daytoy a daton a kas iti daton gapu iti basol ken kadagiti daton a pagsupapak iti biddut.

18 Mabalin ti siasinoman kadagiti lallaki a kaputotan ni Aaron ti mangan iti daytoy a daton kas agnanayon a pannakabingayda iti makan a naidaton itiApo. Madangran ti siasinoman a mangsagid iti daytoy a daton, ta adda bileg ti kinasagradona.

19 Inted ni Yahweh ken ni Moises dagiti sumaganad nga alagaden

20 iti pannakaorden ti padi a nagtaud iti kaputotan ni Aaron. Iti aldaw a pannakaordenna, mangidatag iti sangakilo nga arina a kas datonna itiApo. (Kastoy met ti kaadu ti daton a makan a maidatag iti inaldaw.) Kagudua ti idatagna iti bigat ket kagudua met iti rabii.

21 Masapul a magamay iti lana ket maluto iti pariok, santo mapispisi ket maidatag a daton a makan kas nabanglo a daton itiApo.

22 Iti amin a tiempo iti masakbayan, masapul nga idatag daytoy a daton ti tunggal kaputotan ni Aaron nga agserbi a kas Kangatoan a Padi. Masapul a mapuoran a mamimpinsan a kas daton itiApo.

23 Saan a mabalin a kanen ti makan nga idaton ti padi; mapuoran amin.

Dagiti Daton gapu iti Basol

24 Imbilin ni Yahweh ken ni Moises

25 nga itedna ken ni Aaron ken kadagiti annakna dagiti sumaganad nga alagaden iti panagidatag kadagiti daton gapu iti basol. Masapul a maparti ti animal a maidaton gapu iti basol iti akin-amianan a paset ti altar, iti pagpartian kadagiti daton a mapuoran. Nasantoan unay daytoy a daton.

26 Iti nasantoan a lugar, iti paraangan ti Tolda ti Dios ti panganan ti padi iti karne ti animal nga indatonna.

27 Adda pannakabalin ti kinasanto ti karne ti animal ket madangran ti aniaman a maisagid wenno siasinoman a mangsagid. No adda lupot a maparsiakan iti dara ti animal, masapul a malabaan iti sagrado a lugar.

28 Masapul a mabuong met ti banga a pakalutoan ti karne. No bronse a banga ti pakalutoanna, masapul a marasrasan ken mabuggoan iti danum.

29 Mabalin ti siasinoman a lalaki iti familia dagiti papadi a mangan iti daytoy a daton; sagrado unay daytoy a daton.

30 Ngem no adda dara a maipan iti Tolda ti Dios tapno mausar iti seremonia ti pannakaikkat ti basol, saan a mabalin a sidaen ti animal; masapul a mapuoran.

Dagiti Daton a Pagsupapak kadagiti Biddut

1 Dagitoy dagiti alagaden iti pannakaidatag dagiti daton a pagsupapak kadagiti biddut. Nasantoan unay daytoy a daton.

2 Masapul a maparti ti animal iti pagpartian kadagiti daton a mapuoran, ket maibuyat ti darana kadagiti uppat a sikigan ti altar.

3 Maikkat amin a taba ket maidaton iti altar: ti nataba nga ipus, ti taba a nangbungon kadagiti lalaem,

4 dagiti bekkel ken dagiti tabada ken ti kasayaatan a paset ti dalem.

5 Puoran ti padi ti amin a taba iti altar a kas daton itiApo. Daton daytoy a pagsupapak iti biddut.

6 Mabalin a kanen daytoy ti siasinoman a lalaki iti familia dagiti papadi, ngem gapu ta nasantoan unay daytoy a daton, masapul a kanenda iti nasantoan a lugar.

7 Maymaysa nga alagaden ti maannurot iti daton gapu iti basol ken daton a pagsupapak iti biddut: ti padi a mangidatag iti daton ti akinkukua iti karne.

8 Kukua ti padi a mangidatag iti daton ti lalat ti animal a maidatag a daton a mapuoran.

9 Tunggal daton a makan a maluto iti urno wenno iti pariok kukua ti padi a nangidatag iti daytoy iti Dios.

10 Ngem kukua dagiti papadi a kaputotan ni Aaron ti amin a saan a maluto a daton a makan, nalaokan man iti lana wenno saan; agpapada ti bingay ti tunggal maysa.

Dagiti Daton a Pakikappia

11 Dagitoy dagiti alagaden kadagiti daton a pakikappia a maidatag itiApo.

12 No idatag daytoy ti tao a kas daton a pagyaman iti Dios, pakuyoganna ti mapuoran nga animal iti tinapay nga awan lebadurana; napuskol a tinapay a nagamay iti lana ti olibo wenno naingpis a kankanen a napulagidan iti lana ti olibo wenno kankanen a naaramid iti nagamay nga arina a nalaokan iti lana ti olibo.

13 Malaksid kadagitoy, mangidaton pay kadagiti nalebaduraan a tinapay.

14 Mangala iti maysa iti tunggal kita ti tinapay ket idatagna a naisangsangayan a daton itiApo; kukua daytoy ti padi a mangala iti dara ti animal ket iwarsina iti altar.

15 Masapul a sidaen ti karne ti animal iti aldaw a pannakaidatonna; awan a pulos ti maipabigat.

16 Ngem no maidatag ti daton a pakikappia a pangtungpal ti tao iti maysa a sapata wenno daton nga agtaud iti bukodna a nakem, saan a nasken a kanen amin iti dayta nga aldaw a pannakaidatagna. Mabalin a kanen ti mabati iti sumuno nga aldaw.

17 No adda pay la matda iti maikatlo nga aldaw, masapul a mapuoran.

18 Ngamin, saan nga awaten ti Dios ti daton no adda pay la mangan iti daytoy iti maikatlo nga aldaw. Agbalin a narugit iti imatang ti linteg ket madusa ti siasinoman a mangan iti daytoy.

19 No maisagid ti karne iti aniaman nga ibilang ti linteg a narugit, masapul a saan a sidaen no di ket mapuoran.

Mabalin ti siasinoman a nadalus iti imatang ti linteg ti mangan iti karne.

20 Ngem no ti tao a saan a nadalus iti imatang ti linteg ket mangan iti daytoy, saanen a maibilang a maysa kadagiti tattao ti Dios.

21 Kasta met ti siasinoman a mangsagid iti aniaman a maibilang a narugit. No mangan iti karne iti daytoy a daton, mailaksid kadagiti tattao ti Dios.

22 Inted ni Yahweh ken ni Moises dagitoy sumaganad nga alagaden

23 nga agpaay kadagiti Israelita: Maiparit a sidaen ti taba ti baka, karnero wenno kalding.

24 Mabalin nga usaren ti taba ti animal a natay nga awan gapgapuna wenno pinatay ti padana nga animal ngem saan a mabalin a kanen.

25 Mailaksid kadagiti tattao ti Dios ti siasinoman a mangan iti taba ti animal a mapuoran a nairanta a maidaton itiApo.

26 Itisadinoman a pagnaedan dagiti Israelita, maiparit a kanenda ti dara ti tumatayab wenno animal.

27 Mailaksid kadagiti tattao ti Dios ti siasinoman a mangan iti dara.

28 Inted ni Yahweh ken ni Moises dagitoy sumaganad nga alagaden nga

29 agpaay kadagiti Israelita. Siasinoman a mangidatag iti daton a pakikappia, masapul a mangilasin iti agpaay itiApoiti naisangsangayan a daton;

30 isu a mismo ti mangidatag a kas daton a mapuoran. Alaenna ti taba ti animal agraman ti barukongna ket idatagna a naisangsangayan a daton itiApo.

31 Puoran ti padi ti taba iti altar ngem maited kadagiti papadi ti barukong ti animal.

32 No maipapan iti makannawan a kammaudi a luppo ti animal, maited met a kas naisangsangayan a bingay

33 ti padi a mangidatag iti dara ken iti taba ti animal a daton a pakikappia.

34 Naisangsangayan a sagut ti barukong ken naidumduma a bingay ti makannawan a kammaudi a luppo; innala ida tiApokadagiti Israelita ket intedna kadagiti papadi. Daytoy ti masapul nga ited dagiti Israelita ken ni Aaron ken kadagiti annakna iti amin a kaputotan.

35 Daytoy ti paset ti daton a mapuoran a naidatag itiApoa naited ken ni Aaron ken kadagiti annakna idi agserbida a kas padi.

36 Iti dayta nga aldaw, imbilin tiApokadagiti Israelita nga itedda kadakuada daytoy a paset ti daton. Masapul nga annuroten dagiti Israelita daytoy nga alagaden iti agnanayon.

37 Dagitoy ngarud dagiti alagaden maipanggep iti daton a mapuoran, daton a makan, daton gapu iti basol, daton a pagsupapak iti biddut, daton iti pannakaorden ken daton a pakikappia.

38 Inted ni Yahweh dagitoy a bilin ken ni Moises iti Bantay Sinai, iti let-ang, iti aldaw nga imbilinna kadagiti Israelita nga idatagda dagiti datonda.

Maordenan ni Aaron ken dagiti Annakna

1 Kinuna ni Yahweh ken ni Moises,

2 “Ipanmo ni Aaron ken dagiti annakna iti ruangan ti Tolda. Itugotmo dagiti kawes dagiti papadi, ti lana a pagkonsagrar, ti bumaro a baka a maidaton gapu iti basol, ti dua a kalakian a karnero ken ti sangabasket a tinapay nga awan lebadurana.

3 Kalpasanna, ummongem ti entero a gimong sadiay.”

4 Tinungpal ni Moises ti bilin ni Yahweh kenkuana ket idi naguummong ti gimong

5 kinunana kadakuada, “Bilin tiApoti innak aramiden.”

6 Inayaban ni Moises ni Aaron ken dagiti annakna iti sangoanan ket binuggoanna ida kas mayannurot iti linteg.

7 Inyarruatna ken ni Aaron ti bado ken ti kagay a rutap ken ti barikes. Inyusongna kenkuana ti efod ket pinairutanna babaen iti barikes a napintas ti pannakaabelna.

8 Inyarruatna ti pektoral sana inkapet ti Urim ken Tummim.

9 Insaadna ti turban iti ulona ket iti parupana, inkabilna ti balitok a balangat a nasagradoan a pakakitaan ti pannakaidaton kas imbilin kenkuana ni Yahweh.

10 Kalpasanna, innala ni Moises ti lana ket inkonsagrarna ti Tolda ti Dios ken ti amin nga adda iti unegna; kastoy ti panangikonsagrarna ti amin ken ni Yahweh.

11 Nangala iti lana ket winarsianna iti namimpito ti altar ken dagiti alikamenna ken ti palanggana ken ti nagbatayanna tapno maikonsagrarda ken ni Yahweh.

12 Inordenanna ni Aaron babaen iti panangibukbokna iti lana iti ulona.

13 Kalpasanna, pinagpasangona dagiti annak ni Aaron; binadoanna ida, inkabilna ti barikes ti tunggal maysa ket inkapetna ti pannakakallugongda, kas imbilin ni Yahweh.

14 Innala ni Moises ti bumaro a baka a maidaton gapu iti basol. Impatay ni Aaron ken dagiti annakna ti imada iti ulo ti animal.

15 Pinarti ni Moises ti animal sa nangala iti dara ket babaen iti ramayna, pinulagidanna dagiti sinan-sara ti altar tapno maidaton ti altar. Imbuyatna iti puon ti altar ti natda a dara. Kastoy ti pannakaidaton iti altar ken ti pannakadalusna iti imatang ti linteg.

16 Inikkat ni Moises ti amin a taba dagiti lalaem, ti kasayaatan a paset ti dalem ken dagiti bekkel ken dagiti tabada sana pinuoran dagitoy iti rabaw ti altar.

17 Kas imbilin ni Yahweh, pinuoranna iti ruar ti kampo dagiti dadduma a paset ti baka agraman ti lalat, lasag ken bagbagis.

18 Innala ni Moises ti kalakian a karnero a maidaton a mapuoran ket impatay ni Aaron ken dagiti annakna ti imada iti ulo ti animal.

19 Pinatayna ti animal sana imbuyat ti darana iti uppat a sikigan ti altar.

20-21 Rinangrangkayna ti karnero, binuggoanna dagiti lalaem ken dagiti kammaudi a saka; pinuoranna ti ulo, ti taba ken dagiti dadduma a pasetna iti altar, kas imbilin ni Yahweh. Nabanglo dayta nga ayamuom ken ni Yahweh.

22 Innala ni Moises ti maikadua a kalakian a karnero a nairanta iti pannakaorden dagiti papadi. Impatay ni Aaron ken dagiti annakna ti imada iti ulo ti animal.

23 Pinarti ni Moises ti karnero ket nangala iti dara nga impulagidna iti kannawan a piditpidit ni Aaron, kadagiti akinkannawan a tangan ti ima ken sakana.

24 Pinagpasangona dagiti annak ni Aaron, ket impulagidna ti dara iti kannawan a piditpiditda, kadagiti tangan ti kannawan nga ima ken sakada. Imbuyatna ti natda a dara iti aglawlaw ti altar.

25 Innalana ti taba, ti nataba nga ipus, amin a taba a kimpet kadagiti lalaem, ti kasayaatan a paset ti dalem, dagiti bekkel agraman ti tabada, ken ti kannawan a kammaudi a saka.

26 Kalpasanna, nangala iti maysa a tinapay iti basket a nakaikabilan ti tinapay nga awan lebadurana a naidaton itiApo, maysa a tinapay a nagamay iti lana, ken maysa a naingpis a kankanen. Imparabawna dagitoy iti taba ken ti kannawan a kammaudi a saka.

27 Inkabilna amin dagitoy a taraon iti ima ni Aaron ken dagiti annakna ket indatagda a kas naisangsangayan a sagut itiApo.

28 Innalana met laeng dagitoy a makan kadakuada ket pinuoranna iti altar, iti rabaw ti daton a mapuoran, kas daton ti pannakaorden. Nabanglo daytoy nga ayamuom ken ni Yahweh.

29 Innala ni Moises ti barukong ti animal ket indatagna a kas naisangsangayan a sagut ken ni Yahweh. Daytoy ti bingay ni Moises iti karnero a naidaton iti pannakaorden. Natungpal ti amin nga imbilin ni Yahweh.

30 Nangala ni Moises iti lana a pagkonsagrar ken iti dara nga adda iti altar ket winarsianna ni Aaron ken dagiti annakna ken dagiti pagan-anayda. Kastoy ti panangikonsagrarna kadakuada ken kadagiti arruatenda ken ni Yahweh.

31 Kinuna ni Moises ken ni Aaron ken dagiti annakna, “Ipanyo ti karne iti ruangan ti Tolda ti Dios; angrenyo, ket sadiay, ipanganyo iti tinapay nga adda iti basket a nakaikabilan dagiti daton a nausar iti pannakaorden, kas imbilin tiApo.

32 Puoranyo ti aniaman a matda a tinapay wenno karne.

33 Dikay pumanaw iti ruangan ti Tolda no di malpas ti seremonia ti pannakaordenyo; agtalinaedkayo sadiay iti las-ud ti pito nga aldaw.

34 Imbilin tiAponga aramidentayo ti inaramidtayo ita nga aldaw tapno maikkat dagiti basolyo.

35 Agyankayo iti ruangan ti Tolda ti Dios iti aldaw ken rabii iti las-ud ti pito nga aldaw, ta no saanyo nga aramiden, mataykayo. Daytoy ti imbilin kaniak tiApo.”

36 Ngarud, inaramid ni Aaron ken dagiti annakna ti imbilin ni Yahweh ken ni Moises.

Agidatag ni Aaron kadagiti Daton

1 Iti aldaw kalpasan ti seremonia ti pannakaorden,inayaban ni Moises ni Aaron ken dagiti annakna ken dagiti pangulo ti Israel.

2 Kinunana ken ni Aaron, “Mangidatonka iti bumaro a baka ken kalakian a karnero nga awan depektoda. Maidatag ti baka a daton gapu iti basol ken ti karnero a kas daton a mapuoran.

3 Kalpasanna, ibagam kadagiti Israelita a mangalada iti kalakian a kalding a maidaton gapu iti basol, urbon ti baka a maysa ti tawenna, ken urbon ti karnero a maysa ti tawenna nga awan depektoda a maidatag a daton a mapuoran

4 ken toro a baka ken kalakian a karnero a maidatag a kas daton a pakikappia. Masapul nga idatagda itiApoa mapakuyogan iti daton a makan a nalaokan iti lana. Nasken nga aramidenda daytoy ta agparang tiApokadakuada ita nga aldaw.”

5 Impanda iti sangoanan ti Tolda ti Dios ti amin nga imbilin ni Moises ket naguummong sadiay ti sangkagimongan nga agdaydayaw ken ni Yahweh.

6 Kinuna ni Moises, “Imbilin tiAponga aramidenyo amin daytoy tapno agparang kadakayo ti makapurar a lawag a pakakitaan ti kaaddana.”

7 Kinunanaken ni Aaron, “Inka iti altar ket idatagmo ti daton a maipaay iti basol ken ti daton a mapuoran a mangikkat kadagiti basolmo ken kadagiti basol dagiti tattao. Idatagmo met ti daton a mangikkat kadagiti basbasol dagiti tattao, kas imbilin tiApo.”

8 Napan ni Aaron iti altar ket pinatayna ti bumaro a baka a datonna gapu iti basolna.

9 Impan kenkuana dagiti annakna ti dara ket insawsawna ti ramayna, impulagidna ti dara kadagiti sinan-sara ti altar ket imbuyatna ti natda iti puon ti altar.

10 Pinuoranna iti altar ti taba, dagiti bekkel ken ti kasayaatan a paset ti dalem kas imbilin ni Yahweh ken ni Moises.

11 Ngem iti ruar ti kampo ti nangpuoranna iti karne ken ti lalat.

12 Pinartina ti animal a bukodna a daton a mapuoran. Impan kenkuana dagiti annakna ti dara ket imbuyatna iti uppat a sikigan ti altar.

13 Inyawatda kenkuana ti ulo ken dagiti dadduma a paset ti animal ket pinuoranna ida iti altar.

14 Kalpasanna, binuggoanna dagiti lalaem ken dagiti kammaudi a saka sana pinuoran ida iti altar iti rabaw dagiti dadduma a daton a mapuoran.

15 Insarunona nga innala ti kalding a maidaton gapu iti basol dagiti tattao. Pinartina sana indaton a kas iti inaramidna iti bukodna a daton gapu iti basolna.

16 Innalana met ti animal a maidaton a mapuoran ket indatagna kas mayannurot kadagiti alagaden.

17 Indatagna ti daton a makan ket nangrakem iti arina sana pinuoran iti altar. (Mainayon daytoy iti inaldaw a daton a mapuoran.)

18 Pinataynati toro a baka ken ti kalakian a karnero a kas daton a pakikappia a maipaay kadagiti tattao. Inyeg dagiti annakna ti dara ket imbuyatna iti aglawlaw ti altar.

19 Inkabil ni Aaron dagiti taba ti baka ken karnero

20 iti rabaw dagiti barukong dagiti animal ket impanna amin ida iti altar. Pinuoranna ti taba iti altar

21 ket indatagna dagiti barukong ken dagiti kannawan a kammaudi a saka a naisangsangayan a sagut itiAponga agpaay kadagiti papadi kas imbilin ni Moises.

22 Idinaidatagen ni Aaron dagiti amin a daton, intayagna ti imana sana binendisionan dagiti tattao ket kalpasanna, bimmaba manipud iti altar.

23 Simrek da Moises ken Aaron iti Tolda ti Dios. Idi rummuarda, binendisionanda dagiti tattao ket nagparang ti makapurar a lawag a mangipakita iti kaadda ni Yahweh.

24 Pagammoan, simgiab ti apuy ni Yahweh ket inkisapna ti sibubukel a daton ken dagiti taba dagiti animal iti altar. Nagririaw dagiti tattao a nakakita iti daytoy ket nagpaklebda iti daga.

Ti Basol da Nadab ken Abiu

1 Nangala da Nadab ken Abiu nga annak ni Aaron iti saggaysada a pagpuoran iti insenso. Kinargaanda iti beggang, inikkanda iti insenso ket indatagda ken ni Yahweh. Ngem saan a nasantoan ti apuy nga inaramatda gapu ta saanda nga inaramid ti imbilin ni Yahweh kadakuada nga idatagda.

2 Pagammoan, nangibaon ni Yahweh iti apuy a nangpuor kadakuada agingga a natayda sadiay iti imatang ni Yahweh.

3 Kalpasanna, kinuna ni Moises ken ni Aaron, “Daytoy ti kayat a sawen tiApoidi kinunana, ‘Masapul a raemen dagiti amin nga agserserbi kaniak ti kinasantok. Iparangarangkonto ti dayagko kadagiti tattaok.’”Ngem nagulimek ni Aaron.

4 Inayaban ni Moises da Misael ken Elisafan nga annak ni Uzziel nga uliteg ni Aaron. Kinunana kadakuada, “Alaenyo dagiti bangkay dagiti kabagianyo iti nasagradoan a Tolda ket ipanyo ida iti ruar ti kampo.”

5 Ket napanda binagkat dagiti bangkay a sikakawes pay laeng sada impan iti ruar ti kampo, kas imbilin ni Moises.

6 Kinuna ni Moises ken ni Aaron ken kadagiti annakna nga Eleazar ken Itamar, “Diyo kusokusoen dagiti buokyo wenno ray-aben dagiti pagan-anayyo a mangipakita iti panagladingityo. No aramidenyo dayta, mataykayo ket kapungtot tiApoti entero a gimong. Ngem mapalubosan amin a padayo nga Israelita a mangdung-aw iti pannakapapatayda iti apuy nga inyeg tiApo.

7 Tapno saankayo a matay, dikay pumampanaw iti ruangan ti Tolda ti Dios gapu ta naikonsagrarkayo babaen iti lana tiApo.”

Tinungpalda ti imbaga ni Moises.

Dagiti Alagaden dagiti Papadi

8 Kinuna ni Yahweh ken ni Aaron,

9 “No sumrekka ken dagiti annakmo iti Tolda, kitaenyo a saankayo a nakainum iti arak wenno aniaman a makabartek amangan ta mataykayo. Linteg daytoy a masapul nga annuroten dagiti amin a kaputotanyo.

10 Rebbengna a paggiddiatenyo dagiti banag a kukua ti Dios ken dagiti gagangay a maaramat, dagiti nadalus iti imatang ti linteg ken dagiti saan a nadalus.

11 Rumbeng nga isuroyo kadagiti Israelita dagiti amin a linteg nga intedko ken ni Moises.”

12 Kinunani Moises ken ni Aaron ken kadagiti nabati nga annakna nga Eleazar ken Itamar, “Alaenyo ti natda iti daton a makan a naidatag itiApoket aramidenyo a tinapay nga awan lebadurana. Gapu ta nasantoan unay daytoy a daton, masapul a kanenyo iti abay ti altar.

13 Wen, kanenyo iti nasantoan a lugar, ta paset daytoy ti taraon a naidaton itiApoken nailasin nga agpaay kadakayo nga agaama. Daytoy ti imbilin kaniak tiApo.

14 Ngemmabalinyo a kanen, kasta met dagiti familiayo, ti barukong ken ti kammaudi a saka a naidatag a naisangsangayan a sagut ken naisangsangayan a maited itiAponga agpaay kadagiti papadi. Mabalinyo a kanen iti sadinoman a lugar a maibilang a nadalus. Naited dagitoy a daton kenka ken kadagiti annakmo a kas bingayyo iti daton a pakikappia nga idatag dagiti Israelita.

15 Yegda ti kammaudi a saka ken ti barukong iti tiempo a pannakapuor ti taba a maidaton itiApo. Agnanayon nga agpaay kadakayo dagitoy a paset, sika ken dagiti annakmo, kas imbilin tiApo.”

16 Dinamag ni Moises ti maipapan iti kalding a naidatag a daton gapu iti basol ket naammoanna a napuoranen ti animal. Nakapungtot kada Eleazar ken Itamar, isut’ gapuna a sinaludsodna,

17 “Apaya diyo kinnan ti daton gapu iti basol iti nasantoan a disso? Nasantoan unay daytoy a daton ket inted tiApokadakayo tapno maikkat ti basol dagiti umili.

18 Gapu ta saan a naipan ti darana iti nasagradoan a Tolda, rumbeng koma a kinnanyo ti sakrifisio sadiay, kas imbilinko.”

19 Insungbat ni Aaron, “Maragsakan ngata tiApono kanek ita nga aldaw ti daton gapu iti basol? Ita nga aldaw, indatag dagiti tattao itiApoti datonda gapu iti basol ken ti datonda a mapuoran ngem nagdissuor latta kaniak dagitoy nakaam-amak a banag.”

20 Napnek ni Moises iti palawag ni Aaron.

Dagiti Animal a Mabalin a Makan

1 Inted ni Yahweh kada Moises ken Aaron dagitoy nga alagaden

2 nga agpaay kadagiti Israelita. Mabalinyo a kanen ti aniaman nga animal iti rabaw ti daga

3 a nagpisi ti kukona ken agngatingat.

4-6 Ngem maiparit a sidaenyo ti kamelio, atap a koneho wenno amo a koneho. Maibilang dagitoy nga animal a narugit; agngatingatda ngem saan a nagpisi dagiti kukoda.

7 Dikay agsida iti baboy. Maibilangda a narugit; nagpisi ti kukoda ngem saanda nga agngatingat.

8 Diyo sidaen ti karne dagitoy nga animal wenno sagiden ti bangkayda; maibilangda a narugit.

9 Mabalinyo a sidaen ti amin a kita ti ikan nga adda pigar ken siksikna,

10 ngem maiparit a sidaenyo ti aniaman a sibibiag nga agnaed iti danum nga awan pigar ken siksikna.

11 Maibilang a narugit dagitoy ket diyo sidaen ida wenno sagiden ti bangkayda.

12 Dikay agsida iti aniaman nga agnaed iti danum nga awan pigar ken siksikna.

13-19 No maipapan kadagiti tumatayab, dikay agsida kadagitoy: agila, kullaaw, kali; gikgik, lumabaga a buitre, buitre, wak; abestrus, agila ti taaw, tikbaboy, kannaway, pelikano, kalamon abubilia; wenno panniki.

20 Maibilang a narugit dagiti amin a nagpayak nga insekto

21 malaksid dagiti aglagto.

22 Mabalinyo a sidaen ti dudon, kuriat, wenno paddudon.

23 Ngem maibilang a narugit dagiti amin a babassit nga insekto nga adda payakna ken agkarayam.

24-28 Maibilang a narugit agingga iti sardam ti tao a mangsagid iti bangkay dagiti sumaganad nga animal: amin nga adda kukona malaksid no nagpisi dagiti kuko ken agngatingat, ken amin nga uppat ti sakana nga addaan kadagiti natirad a kuko. Siasinoman a mangawit iti bangkay ti kastoy nga animal masapul a labaanna ti pagan-anayna ngem maibilang pay laeng a narugit ti tao agingga iti sardam.

29-30 Maibilang a narugit dagiti sangyo, marabutit, bao, alutiit.

31 Siasinoman a mangsagid kadakuada wenno kadagiti bangkayda maibilang a narugit agingga iti sumipnget.

32 Narugit ti aniaman a pagdissoan ti bangkayda a kas iti alikamen a kayo, pagan-anay, lalat, nakersang a lupot, uray ania ti pakaaramatanna. Masapul a maitaneb iti danum ngem maibilang a narugit latta agingga iti sumipnget.

33 Ket no matnagda iti banga, narugit amin a nagyanna ket masapul a buongen.

34 Narugit ti aniaman a taraon a matedtedan iti danum a naggapu iti banga, kasta met ti aniaman a mabalin nga inumen a naikarga.

35 Maibilang a narugit ti aniaman a pagdissoan dagiti bangkay; no urno wenno dalikan ti nagdissoanda, burakenyo.

36 Ngem maibilang a nadalus ti ubbog wenno pagurnongan iti danum a pakaisagidan dagiti bangkay uray no maibilang a narugit dagiti sabali a banag a pakaisagidanda.

37 No bin-i a maimula ti pagdissoan ti bangkay, agtalinaed a nadalus dayta a bin-i.

38 Ngem no nayuper ti bin-i ket agdisso ti bangkay iti dayta a bin-i, maibilang a narugit ti bin-i.

39 No matay ti animal a mabalin a sidaen, maibilang a narugit agingga iti rabii ti siasinoman a mangsagid iti bangkayna.

40 Ket ti siasinoman a mangan iti aniaman a paset ti animal, masapul a labaanna ti pagan-anayna ngem maibilang a narugit ti tao agingga iti sardam. Siasinoman a mangawit iti bangkay, masapul a labaanna ti pagan-anayna ngem maibilang a narugit dayta a tao agingga iti sumipnget.

41 Diyo sidaen ti aniaman kadagiti babassit nga animal nga aguyas iti daga,

42 dagiti agkarayam wenno magna nga addaan iti uppat wenno adu a saka.

43 Diyo pagbalinen ti bagiyo a maibilang a narugit babaen iti panagsidayo iti uray ania kadagitoy.

44 Siakni Yahweh a Diosyo; pagtalinaedenyo dagiti bagiyo a nasantoan gapu ta nasantoanak.

45 Siak ni Yahweh a nangiruar kadakayo idiay Egipto tapno agbalinak a Diosyo. Masapul a nasantoankayo agsipud ta nasantoanak.

46 Dagitoy ngarud dagiti linteg nga annuroten maipapan kadagiti animal, tumatayab, ken amin nga adda iti danum, ken amin nga agkarayam iti daga.

47 Masapul a mapaggiddiatyo ti nadalus ken ti saan a nadalus iti imatang ti linteg, dagiti animal a mabalin a sidaen ken dagiti saan a masida.

Ti Seremonia ti Pannakadalus ti Babai Kalpasan ti Panaganakna

1 Inted ni Yahweh ken ni Moises dagitoy nga alagaden

2 nga agpaay kadagiti Israelita. No lalaki ti ipasngay ti maysa nga ina, pito nga aldaw a maibilang a narugit kas iti pannakaibilangna bayat ti panagreglana.

3 Itimaikawalo nga aldaw, masapul a makugit ti ubing.

4 Palabsen pay ti babai ti 33 nga aldaw santo maibilang a nadalusan iti panagruar ti darana. Maiparit a sagidenna ti aniaman a nasantoan ket saan a makastrek iti nasagradoan a Tolda no di maturpos dagiti aldaw a pannakadalusna.

5 No met babai ti ipasngay ti maysa nga ina, maibilang a narugit iti las-ud ti 14 nga aldaw a kas iti pannakaibilangna bayat ti panagreglana. Palabsenna pay ti 66 nga aldaw santo maibilang a nadalusan iti panagruar ti darana.

6 No maturpos dagiti aldaw a pannakadalusna, lalaki man wenno babai ti anakna, masapul a mangidaton iti urbon ti karnero a maysa ti tawenna para iti daton a mapuoran ken maysa a sibong ti kalapati wenno pagaw para iti daton gapu iti basol. Ipanna dagitoy kadagiti papadi iti ruangan ti Tolda ti Dios.

7 Idatag ti padi dagitoy itiApoket aramidenna ti seremonia a mangikkat iti kinarugit; kalpasanna, maibilangton a nadalus. Daytoy ti rumbeng nga aramiden ti babai kalpasan ti panagpasngayna.

8 Nodi kabaelan ti babai ti mangidaton iti urbon a karnero, mangala iti dua a kalapati wenno pagaw; maysa ti daton a mapuoran ket daton gapu iti basol ti maysa. Annongen ti padi ti seremonia a mangikkat iti kinarugit ti babai ket maibilangton a nadalus.

Dagiti Linteg maipapan kadagiti Sakit ti Kudil

1 Inted ni Yahweh kada Moises ken Aaron dagitoy nga alagaden.

2 No adda gaddil ti maysa a tao wenno letteg, wenno busali a mabalin nga agtinnag a kukutel, masapul a maidatag iti padi, ni Aaron wenno maysa kadagiti annakna.

3 Kitaen a naimbag ti padi ti timmubo iti kudil. No pimmuraw ti dutdot iti nagtuboanna ket kasla naun-uneg ti gaddil ngem iti kudil ti lawlawna, makaakar a sakit ti kudil ti timmubo. Iti kasta, ipakaammo ti padi a saan a nadalus daytoy a tao iti imatang ti linteg.

4 Ngem no puraw ti gaddil ket saan a naun-uneg ngem iti kudil iti lawlawna ken saan a pimmuraw dagiti dutdot, isina ti padi ti tao kadagiti dadduma a tattao iti las-ud ti pito nga aldaw.

5 Iti maikapito nga aldaw, kitaen manen ti padi ti saksakiten ket no awan namalbaliwan ken saan a nagwaras, maipaing manen ti tao iti sabali pay a pito nga aldaw.

6 Iti maikapito nga aldaw, kitaen manen ti padi ket no saan a nagwaras ti saksakiten, ipakaammo ti padi a maibilang a nadalus ti tao iti imatang ti linteg; gaddil laeng ti timmubo kenkuana. Labaan ti tao ti pagan-anayna ket maibilangen a nadalus.

7 Ngem no agwaras ti gaddil kalpasan ti panangkita ti padi, masapul a dumatag manen ti tao iti padi.

8 No makita ti padi a nagwaras ti gaddil, ipakaammona a saan a nadalus ti tao iti imatang ti linteg; kukutel ti kimpet kenkuana.

9 Ti siasinoman nga addaan iti kukutel ket maidatag iti padi,

10 a mangeksamen kenkuana. No adda puraw a gaddil iti kudilna a mangpapuraw kadagiti dutdot ken napno iti nana,

11 kukutel daytoy. Ipakaammo ti padi a saan a nadalus ti tao iti imatang ti linteg; saan a masapul a maipaing ta nalawag a narugit iti imatang ti linteg.

12 No nagwarasen ti saksakiten iti entero a bagina, manipud saka agingga iti ulo,

13 agpakita manen iti padi. No makita ti padi a nagwaras ti sakit ti kudil, ipakaammona a nadalus ti tao iti imatang ti linteg. No pimmuraw ti entero a kudilna, nadalus iti imatang ti linteg.

14 Ngem no bumtak ti gaddil, saan a nadalus ti tao iti imatang ti linteg.

15 Kitaen manen ti padi ket no adda makitana a bimtak a gaddil, ipakaammona a saan a nadalus ti tao iti imatang ti linteg. Makaakar a sakit ti kudil ti bimtak a gaddil ket maibilang a narugit ti tao.

16 Ngem no umimbag ti gaddil ket pumuraw manen ti nagtubboanna, mapan ti tao iti padi

17 a mangkita manen kenkuana. No pimmuraw ti gaddil, nadalus ti tao iti imatang ti linteg ket ipakaammo ti padi a nadalusen.

18 No immimbag ti letteg ti maysa a tao

19 ket kalpasanna adda puraw wenno lumabaga-a-pumuraw a paset ti ayan ti letteg, masapul a mapan ti tao iti padi.

20 No makita ti padi a naun-uneg ti timmubo ngem iti kudil iti aglawlawna ken pimmuraw ti dutdot, ipakaammona a saan a nadalus ti tao iti imatang ti linteg. Makaalis a kukutel ti nagtubo a letteg.

21 Ngem no makita ti padi a saan a pimmuraw dagiti dutdot ken saan a naun-uneg ngem iti kudil iti aglawlaw nupay immolandis ti kolorna, ipaingna ti tao iti las-ud ti pito nga aldaw.

22 No agwaras ti letteg, ipakaammo ti padi a saan a nadalus ti tao iti imatang ti linteg; pudno nga adda sakitna.

23 Ngem no saan a mamalbaliw ken saan a nagwaras, piglat laeng a gapuanan ti letteg, ipakaammo ti padi a nadalus ti tao iti imatang ti linteg.

24-25 No maipapan iti tao a nasinit, eksamenen ti padi no lumabaga wenno lumabaga-a-pumuraw ti nasinit a paset. No pimmuraw dagiti dutdot iti nasinit a paset ket naun-uneg ngem ti aglawlaw a kudil, makaalis a sakit ti kudil ti timmubo iti nasinit a paset ket ipakaammo ti padi a narugit ti tao iti imatang ti linteg.

26 Ngem no saan a pimmuraw dagiti dutdot ket saan a naun-uneg ti nasinit ngem ti kudil iti lawlawna ngem immolandis, maipaing ti tao iti las-ud ti pito nga aldaw.

27 Kitaen manen ti padi iti maikapito nga aldaw, ket no agwarwaras, nalawag a makaalis a sakit ti kudil, ket ipakaammo ti padi a narugit ti tao iti imatang ti linteg.

28 Ngem no awan pamalbaliwan ti nasinit ket saan a nagwaras ken immolandis, saan a makaalis ti timmubo. Ipakaammo ti padi a nadalus ti tao iti imatang ti linteg gapu ta piglat laeng ti nasinit.

29 No adda gaddil ti ulo wenno timid ti maysa a tao,

30 masapul nga agpakita iti padi. No naun-uneg ti gaddil ngem iti aglawlaw a kudil ket duyaw ken narasay dagiti buok, makaakar a sakit ti kudil daytoy, ket ipakaammo ti padi a narugit ti tao iti imatang ti linteg.

31 Ngem no masarakan ti padi a saan a naun-uneg ti letteg ngem ti aglawlaw a kudil ket awan pay nagtubo a buok, ipaingna ti tao iti las-ud ti pito nga aldaw.

32 Iti maikapito nga aldaw, sukimatenna manen ti gaddil ket no saan a nagwaras sa awanen dagiti duyaw a buok ken saan a naun-uneg ngem ti aglawlaw a kudil,

33 kuskosan ti tao ti buok iti lawlaw ti gaddil. Ipaing manen ti padi ti tao iti pito nga aldaw.

34 Iti maikapito nga aldaw, kitaen manen ti padi ti gaddil. No saan a nagwaras ken saan a naun-uneg ngem ti kudil iti lawlawna, ipakaammona a nadalus ti tao iti imatang ti linteg. Labaan ti tao ti pagan-anayna ket maibilang a nadalusen.

35 Ngem no agwaras ti gaddil kalpasan ti pannakaipakaammo a nadalus ti tao iti imatang ti linteg,

36 eksamenen manen ti padi. No nagwaras ti gaddil, saan a masapul nga birokenna ti duyaw a buok, ta nalawag a saan a nadalus ti tao.

37 Ngem no, iti kapanunotan ti padi, saan a nagwaras ti gaddil ket agtubtubo ti nasalun-at a dutdot, kaipapananna a naimbagen ti gaddil ket ipakaammo ti padi a nadalus ti tao iti imatang ti linteg.

38 No aglabanglabang ti kudil ti maysa a tao, lalaki man wenno babai,

39 kitaen ti padi dayta a tao. No nalitem a puraw dagiti gaddil, mansa la ti kudil ti timmubo; nadalus ti tao iti imatang ti linteg.

40-41 No agparut ti buok iti sango wenno likud ti ulo, saan a dayta ti mamagbalin iti tao a narugit iti imatang ti linteg.

42 Ngem no agparang ti lumabaga-a-puraw a gaddil iti nakaparutan dagiti buok, makaalis a sakit ti kudil ti timmubo.

43 Eksamenen ti padi ket no adda lumabaga-a-puraw a gaddil,

44 ipakaammona a narugit ti tao iti imatang ti linteg ta adda makaakar a sakit ti kudil iti ulona.

45 No addaan ti maysa a tao iti kukutel, masapul nga agkawes iti pigispigis, bay-anna a wakray ti buokna, abbonganna ti akimbaba a paset ti rupana sana ipukkaw, “Narugitak, narugitak!”

46 Maibilang a narugit no saan nga umimbag ti sakit ti kudil, ket agyan iti ruar ti kampo, iti adayo kadagiti tattao.

Dagiti Linteg maipapan iti Ratik

47 No adda ratikiti pagan-anay, de lana man wenno linen,

48 wenno iti lupot a linen wenno de lana, wenno iti lalat wenno aniaman a naaramid iti lalat,

49 no bumerde wenno lumabaga, agwaras daytoy a ratik, ket masapul a maipakita iti padi.

50 Kitaenna a naimbag daytoy sana ipakni iti las-ud ti pito nga aldaw.

51 Iti maikapito nga aldaw, no makitana a nagwaras ti ratik, maibilang a narugit ti nagratik.

52 Puoran daytoy ti padi agsipud ta agwaras daytoy a ratik a masapul a madadael iti apuy.

53 Ngem no masarakan ti padi a saan a nagwaras ti ratik,

54 ibilinna a malabaan ket ipaknina daytoy iti pito pay nga aldaw.

55 Kalpasanna, sukimatenna manen, ket no saan a nagbalbaliw ti kolorna, uray no saan a nagwaras, maibilang latta a narugit. Masapul a puoran ti nagratik, adda man ti marunrunot a paset iti pammarang wenno iti ballikidna.

56 Ngem no kitaen manen ti padi ket nagusaw ti ratik, ray-abenna ti lupot wenno lalat.

57 Ngem no agparang manen ti ratik, masapul a mapuoranen ti pagan-anay ta agwarwarasen ti ratik.

58 No malabaan ti nagratik ket maikkat ti ratik, masapul a malabaan manen tapno maibilang a nadalus iti imatang ti linteg.

59 Daytoy ngarud ti linteg nga annuroten iti ratik iti pagan-anay a de lana man wenno linen, wenno aniaman a linen wenno de lana a lupot, wenno aniaman a naaramid iti lalat tapno maammoan dagitoy no narugit wenno saan.

Seremonia ti Pannakadalus No Umimbag ti Sakit ti Kudil

1 Inted ni Yahweh ken ni Moises

2 dagitoynga alagaden iti seremonia ti pannakadalus ti tao a naimbagan iti makaakar a sakit ti kudil. Iti aldaw a maipakaammo a nadalus iti imatang ti linteg, masapul a maidatag iti padi,

3 ket ipan ti padi iti ruar ti kampo sana eksamenen. No naimbagen ti sakit,

4 agpaala ti padi iti dua a tumatayab a maibilang a nadalus, agraman kayo a sedro, nalabaga a lupot ken sanga ti hisopo.

5 Kalpasanna, ibilin ti padi a maparti ti maysa a tumatayab iti ngatoen ti maysa a banga a nakargaan iti kasasakdo a danum ti ubbog.

6 Alaenna ti sabali a tumatayab agraman ti kayo a sedro, ti nalabaga a lupot ken ti sanga ti hisopo sana itaneb ida iti dara ti naparti a tumatayab.

7 Mamimpito a warsianna ti tao a madalusan iti sakit ti kudil, ket kalpasanna, ipakaammona a nadalusen ti tao. Ibulosto ti padi ti sibibiag a tumatayab iti kataltalonan.

8 Labaanto ti tao dagiti pagan-anayna, agpakalbo sa agdigos, ket kalpasanna, nadalusen iti imatang ti linteg. Mapalubosanen a sumrek iti kampo ngem agyan iti ruar ti toldana iti las-ud ti pito nga aldaw.

9 Iti maikapito nga aldaw, agpakalbo manen ti ulona, kasta met a kiskisanna ti barbas, ti kiday ken ti amin a dutdot ti bagina. Labaanna dagiti pagan-anayna sa agdigos, ket nadalusen iti imatang ti linteg.

10 Iti maikawalo nga aldaw, mangala iti tallo nga urbon ti karnero—dua kadagitoy ti kalakian nga agtawen iti maysa ken awan depektoda. Mangala pay iti tallo a kilo nga arina a nalaokan iti lana ti olibo, ken maysa a kakatlo ti litro a lana ti olibo.

11 Ipanto ti padi daytoy a tao ken dagiti datonna iti ruangan ti Tolda.

12 Kalpasanna, alaento ti padi ti maysa kadagiti kalakian a karnero agraman ti kakatlo ti litro a lana ket idatagna a kas daton a pagsupapak. Idatagnanto dagitoy a kas naisangsangayan a sagut itiApo.

13 Patayennanto ti karnero iti nasantoan a lugar a pagpatayan kadagiti animal a maidatag a daton gapu iti basol ken daton a mapuoran. Aramidenna daytoy ta ti daton a pagsupapak, kas iti daton gapu iti basol, agpaay iti padi ket nasantoan unay.

14 Mangalanto iti dara ti karnero ket ipulagidna iti kannawan a piditpidit ti tao a madalusan, iti tangan ti kannawan nga ima ken sakana.

15 Mangalanto ti padi iti lana ti olibo ket ibukbokna iti kannigid a dakulapna,

16 sana isawsaw ti kannawan a tammudona iti lana iti dakulapna ket mamimpito nga iwarisna iti sangoanan tiApo.

17 Mangalanto iti lana nga adda iti dakulapna ken iti dara ti karnero ket ipulagidna iti kannawan a piditpidit ti tao a madalusan, iti tangan ti kannawan nga ima ken sakana.

18 Ikabilnanto ti nabati a lana nga adda iti dakulapna iti ulo ti tao a madalusan. Kastoy ti panangannong ti padi iti seremonia ti pannakadalus.

19 Kalpasanna, idatagto ti padi ti daton gapu iti basol ket annongenna ti seremonia ti pannakadalus. Isarunona a patayen ti animal a daton a mapuoran,

20 ket idatagna agraman ti daton a makan iti rabaw ti altar. Kastoy ti panangannong ti padi iti seremonia ti pannakadalus, ket nadalus ti tao iti imatang ti linteg.

21 No napanglaw ti tao ket dina kabaelan nga idatag dagitoy, umanayen ti maysa a kalakian a karnero a datonna a pagsupapak iti pannakadalusna, maysa a naisangsangayan a sagut itiApo. Mangidatag laeng iti maysa a kilo nga arina a nalaokan iti lana ti olibo a kas daton a makan ken kakatlo ti litro a lana ti olibo.

22 Mangisagana met iti dua a kalapati wenno dua a pagaw. Maysa ti agpaay a daton gapu iti basol, ket ti maysa a daton a mapuoran.

23 Iti maikawalo nga aldaw ti pannakadalusna, ipannanto dagitoy iti padi iti ruangan ti Tolda ti Dios.

24 Alaento ti padi ti karnero ken ti lana ket idatagnanto ida a naisangsangayan a sagut itiApo.

25 Patayennanto ti karnero, ket mangala iti dara sana ipulagid iti piditpidit ti kannawan a lapayag ti tao, iti tangan ti kannawan nga ima ken sakana.

26 Mangipakbo ti padi iti lana iti kannigid a dakulapna

27 sana isawsaw ti kannawan a tammudona, ket iwarisna iti mamimpito iti imatang tiApo.

28 Pulagidannanto iti lana dagiti pinulagidanna met iti dara: ti kannawan a piditpidit ti tao, ti tangan ti kannawan nga ima ken sakana.

29 Ikabilnanto ti natda a lana nga adda iti dakulapna iti ulo ti tao; kastoy ti panangannongna iti seremonia ti pannakadalus.

30 Kalpasanna, idatagna ti maysa kadagiti kalapati wenno pagaw

31 a daton gapu iti basol ket ti maysa a daton a mapuoran agraman ti daton a makan. Kastoy ti panangannong ti padi iti seremonia ti pannakadalus.

32 Daytoy ti linteg a maipakat iti addaan iti kukutel a saan a makabael a mangidatag kadagiti naituding a daton para iti pannakadalusna.

Ti Ratik kadagiti Balbalay

33 Inted ni Yahweh kada Moises ken Aaron

34-35 dagitoy nga alagaden maipapan kadagiti balay a kinaptan ti agwaras a ratik. (Annuroten dagitoy dagiti Israelita kalpasan ti isasangpetda idiay Canaan, ti daga nga ited ni Yahweh kadakuada.) Siasinoman a makasarak iti ratik iti uneg ti balayna, masapul nga ipakaammona daytoy iti padi.

36 Sakbay a mapan ti padi a mangeksamen iti ratik, paikkatna pay ti amin nga adda iti balay ta no saan, maibilang a narugit ti amin nga adda iti unegna. Kalpasanna, sumrek iti balay,

37 ket sukimatenna ti ratik. No adda makitana a garitgaritan a kasla mangrunrunot iti diding, bumerde man wenno lumabaga,

38 pumanaw sana parikpan ti balay iti las-ud ti pito nga aldaw.

39 Iti maikapito nga aldaw, agsublinto ket eksamenenna manen. No nagwaras ti ratik,

40 palikkabna dagiti bato a kinaptan ti ratik ket maibellengda iti lugar a saan a nadalus iti ruar ti siudad.

41 Kalpasanna, pakarusannanto ti amin a diding ti balay ket ibellengda ti palitada iti saan a nadalus a lugar iti ruar ti siudad.

42 Mangaladanto kadagiti sabali a bato ket suktanda dagiti bato a nalikkab sada pabaroen ti palitada.

43 No agparang manen ti ratik kalpasan ti pannakalikkab dagiti bato ken pannakakarus ti balay ken pannakapalitadana,

44 mapanto kitaen ti padi. No nagwaras ti ratik, saan a nadalus ti balay.

45 Masapul a marebba, ket maipan dagiti bato, tarikayo ken amin a palitadana iti ruar ti siudad iti lugar a saan a nadalus.

46 Maibilang a narugit agingga iti sardam ti siasinoman a sumrek iti balay bayat ti pannakarikepna.

47 Siasinoman nga agidda wenno mangan sadiay, masapul a labaanna dagiti pagan-anayna.

48 Ngem no makita ti padi nga awanen ti ratik kalpasan ti pannakapalitada ti balay, ipakaammonanto a nadalus ti balay iti imatang ti linteg, agsipud ta naan-anay a naikkaten ti ratik.

49 Mangalanto iti dua a tumatayab, sumagmamano a kayo ti sedro, nalabaga a lupot ken hisopo a pangdalus iti balay.

50 Patayenna ti maysa a tumatayab iti ngatoen ti damili a malukong a nakargaan iti kasakdo a danum ti ubbog.

51 Kalpasanna, alaennanto ti kayo ti sedro, ti hisopo, ti nalabaga a lupot ken ti sibibiag a tumatayab, ket itanebna ida iti dara ti tumatayab a naparti ken iti danum a naggapu iti ubbog. Warisannanto ti balay iti mamimpito.

52 Kastoyto ti panangdalusna iti balay babaen iti panangaramatna iti dara ti tumatayab, danum a naggapu iti ubbog, ti sibibiag a tumatayab, kayo ti sedro, hisopo ken ti nalabaga a lupot.

53 Ibulosnanto ti nabiag a tumatayab iti ruar ti siudad ken iti kataltalonan. Kastoy ti panangannong ti padi iti seremonia ti pannakadalus ti balay, ket agbalinto a nadalus iti imatang ti linteg.

54 Dagitoy dagiti linteg a maipakat iti makaakar a sakit ti kudil;

55-56 gaddil, letteg wenno dagiti aniaman a limteg; ratik kadagiti lupot wenno balay.

57 Dagitoy a linteg ti mangikeddeng no maibilang a narugit wenno nadalus ti maysa a banag.

Dagiti Narugit nga Agruar iti Mabagbagi ti Tao

1 Inted ni Yahweh kada Moises ken Aaron dagitoy nga alagaden

2 nga agpaay kadagiti Israelita. No adda agruar iti bagi ti maysa a lalaki, maibilang a narugit ti agruar,

3 agaruyot man wenno matiped.

4 Maibilang a narugit ti aniaman a pagtugawan wenno pagiddaanna.

5 Siasinoman a mangsagid iti nagiddaan

6 wenno agtugaw iti nagtugawan ti lalaki, masapul a labaanna ti pagan-anayna ken agdigos. Agtalinaed a narugit agingga iti sardam.

7 Siasinoman a mangsagid iti lalaki, masapul a labaanna ti pagan-anayna ken agdigos. Agtalinaed a narugit agingga iti sumipnget.

8 No matupraan dayta a lalaki ti siasinoman a maibilang a nadalus, masapul a labaan dayta a tao ti pagan-anayna ket agdigos. Agtalinaed a narugit agingga iti sumipnget.

9 Narugit ti aniaman a pasanga wenno tugaw a pagtugawan ti lalaki.

10 Narugit agingga iti rabii ti siasinoman a makasagid iti nagtugawanna. Siasinoman a mangbagkat iti aniaman a nagtugawan dayta a lalaki, masapul a labaanna ti pagan-anayna ket agdigos. Agtalinaed a narugit agingga iti sumipnget.

11 No ti tao nga adda agruar iti mabagbagina ket sagidenna ti maysa a tao a dina buggoan nga umuna dagiti imana, masapul a labaan ti tao a nasagid ti pagan-anayna ket agdigos. Agtalinaed a narugit agingga iti sumipnget.

12 Masapul a maburak ti banga a sagiden dayta a tao. Masapul met nga ugasan ti malukong a kayo a sagidenna.

13 No umimbag ti lalaki nga adda agruar iti bagina, masapul a palabsenna ti pito nga aldaw sananto labaan ti pagan-anayna ken agdigos iti agay-ayus nga ubbog, ket nadaluston iti imatang ti linteg.

14 Iti maikawalo nga aldaw, mangala iti dua a kalapati wenno dua a pagaw ket ipanna iti ruangan ti Tolda ti Dios sana ited iti padi.

15 Idatag ti padi ti maysa a tumatayab a daton gapu iti basol ket ti maysa a daton a mapuoran. Kastoy ti panangannongna iti seremonia ti pannakadalus ti kasta a tao.

16 No agparuar iti kissit ti lalaki, masapul nga agdigos, ket agtalinaed a narugit agingga iti sumipnget.

17 Masapul a malabaan ti lupot wenno lalat a pagdissoan ti kissit. Agtalinaed a narugit dagitoy agingga iti sardam.

18 No agkanaig ti lalaki ken ti babai, masapul nga agdigosda kalpasanna ket agtalinaedda a narugit agingga iti sumipnget.

19 No agregla ti babai, pito nga aldaw a maibilang a narugit. Maibilang met a narugit agingga iti sumipnget ti siasinoman a mangsagid kenkuana.

20 Narugit ti amin a pagiddaan wenno pagtugawanna bayat ti panagreglana.

21-23 Ti siasinoman a makasagid iti pagiddaan wenno aniaman a nagtugawanna masapul a labaanna ti pagan-anayna ket agdigos. Agtalinaed a narugit agingga iti sardam.

24 No adda lalaki a makikaidda kenkuana no madama nga agregla, maalisan iti kinarugitna. Pito nga aldaw a maibilang a narugit. Narugit met ti aniaman a pagiddaanna.

25 No agbulos ti dara ti babai iti tiempo a saanna a panagregla wenno agbulos ti darana iti mabaybayag ngem ti panagreglana, maibilang a narugit kas iti pannakaibilangna a narugit bayat ti panagreglana.

26 Narugit ti aniaman a pagiddaanna wenno pagtugawanna bayat daytoy a tiempo.

27 Maibilang met a narugit ti tao a makasagid iti nagiddaan wenno nagtugawan ti babai. Masapul a labaanna ti pagan-anayna ken agdigos. Agtalinaed a narugit agingga iti sumipnget.

28 No agsardengen ti panagbulos ti darana, palabsenna ti pito nga aldaw ket maibilangton a nadalus.

29 Iti maikawalo nga aldaw, mangipan iti dua a kalapati wenno dua a pagaw iti padi iti ruangan ti Tolda ti Dios.

30 Idatag ti padi ti maysa a tumatayab a kas daton gapu iti basol ken ti maysa a kas daton a mapuoran. Kastoy ti panangannongna iti seremonia ti pannakadalus ti babai.

31 Imbaga ni Yahweh ken ni Moises a ballaaganna dagiti Israelita maipapan iti kinarugitda iti imatang ti Linteg tapno saan a matulawan ti Tolda ti Dios nga adda iti tengnga ti kampo. Mapapatayda no aramidenda dagiti maibilang a narugit.

32 Dagitoy dagiti alagaden iti lalaki nga adda agruar iti bagina wenno agparuar iti kissit;

33 iti babai bayat ti panagreglana wenno iti lalaki a mangkaidda iti babai a maibilang a narugit.