Author: admin

Categories
Levitico

Levitico 26

Mabendisionan dagiti Natulnog

1 Kinunani Yahweh, “Dikay agaramid kadagiti imahen wenno mangipasdek kadagiti estatua, adigi a bato wenno nasukog a bato a pagrukbaban. Siak ni Yahweh a Diosyo.

2 Ngilinenyo dagiti fiestaken raemenyo ti nasagradoan a lugar a pakadaydayawak. Siak ni Yahweh.

3 “Noannurotenyo dagiti lintegko ken tungpalenyo dagiti bilinko,

4 pagtudoekto iti umisu a panawen tapno adda maapit iti daga ken agbunga dagiti kayo.

5 Nawadwadto ti apityo ket agap-apitkayto pay laeng iti trigo uray no panagburasen iti ubas; agburburaskayto pay laeng iti ubas uray no panagmumulan iti trigo. Addanto amin a taraon a kayatyo a kanen ket natalgedto ti panagbiagyo iti dagayo.

6 “Agturayto ti kappia iti daga ket mabalinyonto ti maturog nga awan ti pagbutnganyo. Pukawekto dagiti narungsot nga animal iti daga ket awanton ti gubat sadiay.

7 Parmekenyonto dagiti kabusoryo;

8 kabaelanto ti lima kadakayo a parmeken ti sangagasut ket ti sangagasut mabalindanto a parmeken ti sangapulo ribu.

9 Bendisionankayto ket paraburankayto iti adu nga annak; tungpalekto ti karik iti tulagantayo.

10 Nawadwadto unay ti apityo ket umanayto a taraonyo iti makatawen; wen, adunto pay la ti sobrayo, ket masapul nga ibellengyo ti nabati iti baak nga apit a pempenyo tapno adda pangikabilan iti baro nga apit.

11 Makipagnaedakto kadakayo iti Toldak ket pulos a dikayto tallikudan.

12 Kaduakaytoiti sadinoman a papananyo; siakto ti Diosyo ket dakayto dagiti tattaok.

13 Siak, ni Yahweh a Diosyo, ti nangiruar kadakayo idiay Egipto tapno saankayon a matagabu. Inikkatko ti sangol a nangimameg kadakayo, isu a mabalinyo ti magna nga awan ti kabainyo.”

Ti Dusa ti Nasukir

14 Kinunani Yahweh, “No diyo tungpalen dagiti bilinko,

15 no diyo ipangag dagiti bilin ken lintegko ket salungasingenyo ti tulagko,

16 kellaatto nga idissuorko dagiti didigra kadakayo—dagiti saan a maagasan a sakit ken gurigor a mamagbulsek kadakayo a pakaigapuan ti main-inut a pannakagudas ti biagyo. Diyonto pakairanudan dagiti immulayo gapu ta kanento dagiti kabusoryo.

17 Busorenkayto tapno parmekendakayto dagiti kabusoryo; iturayandakayto dagiti manggurgura kadakayo. Iti butengyo, agtataraykayto uray no awan mangkamkamat kadakayo.

18 “No iti laksid amin dagitoy ket didak pay la ipangag, mamimpitonto ti kadagsen ti dusa nga ipatayko kadakayo kadagiti basolyo.

19 Ikkatekto ti kinatangsityo; awanto ti tudo ket natikag ken natangkento ti dagayo a kas iti landok.

20 Awanto ti serserbi ti pagbambannoganyo, agsipud ta awanto ti maapit kadagiti dagayo ken dinto agbunga dagiti mulayo a kayo.

21 “No itultuloyyo latta ti mangsukir kaniak ket didak ipangag, nayonakto manen iti mamimpito ti dusayo.

22 Bulosakto dagiti narungsot nga animal nga umay kadakayo, ket patayendanto dagiti annakyo ken rangrangkayendanto dagiti animalyo. Bassitto la ti matda kadakayo agingga nga awan matagtagitao kadagiti kalsadayo.

23 “No kalpasan amin dagitoy a dusa ket didak pay la ipangag no di ket itultuloyyo ti mangsukir kaniak,

24 busorenkayto ket mamimpitonto a nadagdagsen ngem ti immuna ti dusa nga ipatayko kadakayo.

25 No salungasingenyo ti tulagantayo, yegkonto ti gubat a pangdusak kadakayo; no agkamangkayo kadagiti siudadyo, mangyegakto kadagiti sakit a di maagasan ket kapilitanto a sumukokayo kadagiti kabusoryo.

26 Kissayakto ti taraonyo agingga a maymaysanto la nga urno ti paglutoan ti sangapulo a babbai iti amin a tinapay nga adda kadakuada; in-inutendanto nga ited ti kanenyo, ngem saankayonto a mabsog.

27 “No iti laksid amin dagitoy, itultuloyyo latta ti mangsukir kaniak ket didak ipangag,

28 bumtakto ti pungtotko kadakayo ket mamimpitonto a nadagdagsen ngem ti immuna nga idissuorko kadakayo a dusa.

29 Kasta unayto ti panagbisinyo ket kanenyonto dagiti mismo nga annakyo.

30 Dadaelekto dagiti lugar a pagdaydayawanyo kadagiti turod, rebbaekto dagiti altar a pagpupuoranyo iti insenso ket ipurruakkonto dagiti bangkayyo kadagiti natumba a didiosenyo. Iti kasta unay a gurak,

31 rebbaekto dagiti siudadyo, dadaelekto dagiti lugar a pagrukrukbabanyo ket diakto awaten dagiti idatonyo.

32 Dadaelekto a maminpinsan ti dagayo ket urayto la makigtot dagiti kabusor a makakita iti napasamak. Sakupendanto ti daga.

33 Yegkonto ti gubat kadakayo ket iwarawarakayto kadagiti nadumaduma a pagilian. Awanton ti matagtagitao iti dagayo ket aglangalangto dagiti siudadyo.

34-35 Iti kasta, adunto a tawen nga aginana ti daga; wen, aginananto bayat ti pannakabaludyo iti daga dagiti kabusoryo.

36 “Dakayo nga adda iti daga dagiti kabusoryo, natakrotkayto ket agtataraykayo uray karasakas laeng ti bulong a mayang-angin ti mangngegyo. Kasla kamkamatendakayto iti paggugubatan ket mapasagkayto uray no awan ti kabusor iti asidegyo.

37 Agdidinnungparkayto uray no awan ti mangkamkamat kadakayo ket diyonto kabaelan a sarangten ti kabusoryo.

38 Mataykayto iti daga a nakaibellenganyo ket alun-onennakayto ti daga dagiti kabusoryo.

39 Dakayo a sumagmamano a makalasat iti daga dagiti kabusoryo, main-inutkayto a mapukaw gapu iti basolyo ken gapu iti basol dagidi kapuonanyo.

40 “Ngem ipudnonto dagiti kaputotanyo dagiti basbasolda ken dagiti basbasol dagidi kapuonanda a nangsalungasing ken nangbusor kaniak

41 a nakaigapuan ti panangbusorko kadakuada ket imbellengko ida iti daga dagiti kabusorda. Inton agpakumbaba dagiti kaputotanyo ket naikarodan ti dusa ti basolda ken ti panangsukirda,

42 lagipektoti tulagko kada Jacob, Isaac ken Abraham ket pabaroekto ti karik nga itedko ti daga kadagiti tattaok.

43 Ngem umuna pay a mapapanaw dagiti tattao tapno naan-anay nga aginana ti daga ken masapul nga ikaroda ti naan-anay a dusa iti pananglaksidda kadagiti linteg ken bilinko.

44 Ngem uray no kasta, diakto baybay-an wenno dadaelen a mamimpinsan ida bayat ti kaaddada pay laeng iti daga dagiti kabusorda. Ta no kasta ti mapasamak, mawaswas ti pannakitulagko kadakuada. Siak ni Yahweh a Diosda.

45 Pabaroekto ti tulagko kadagidi kapuonanda idi impakitak ti bilegko kadagiti amin a pagilian babaen iti panangiruarko kadagiti tattaok idiay Egipto tapno siak ni Yahweh, agbalinak a Diosda.”

46 Dagitoy ti amin a linteg ken bilin nga inted ni Yahweh ken ni Moises idiay Bantay Sinai nga annuroten dagiti Israelita.

Categories
Levitico

Levitico 27

Dagiti Annuroten kadagiti Sagut a Maited ken ni Yahweh

1 Inted ni Yahweh ken ni Moises

2 dagiti sumaganad nga alagaden nga agpaay kadagiti Israelita. No naited ti maysa a tao itiApoa kas pagtungpal iti naisangsangayan a kari, mabalin a mawayawayaan babaen iti pannakaited dagitoy a gatad a kas bayad,

3-7 segun ti naituyang a pagtimbangan:

–nataengan a lalaki, agtawen iti duapulo agingga iti innem a pulo: limapulo a bagi ti pirak

–nataengan a babai: tallopulo a bagi ti pirak

–agtutubo a lalaki, agtawen iti lima agingga iti duapulo: duapulo a bagi ti pirak

–agtutubo a babai: sangapulo a bagi ti pirak

–maladaga a lalaki, lima a tawen nga agpababa: lima a bagi ti pirak

–maladaga a babai: tallo a bagi ti pirak

–lakay nga agtawen iti nasursurok ngem innem a pulo: sangapulo ket lima a bagi ti pirak

–baket nga agtawen iti nasurok nga innem a pulo: sangapulo a bagi ti pirak

8 No napanglaw ti nagkari ket dina kabaelan a bayadan ti naituyang a gatad, idatagna iti padi ti tao a nagkari ket ikeddeng ti padi ti nababbaba a gatad, segun ti kabaelanna nga ibayad.

9 No animal a mabalin nga idaton itiApoti naikari, maibilang ngarud a nasantoan ti amin a sagut a maited itiApo,

10 ket saan a mabalin a suktan dayta a tao iti sabali nga animal. No sukatanna, kukua tiApodagiti dua nga animal.

11 No animal a maibilang a narugit ket saan a mabalin nga idaton itiApo, ipan ti tao daytoy iti padi.

12 Ituding ti padi ti gatad ti animal, kas maibatay iti kalidadna ket saanen a mabaliwan.

13 No kayat ti tao a gatangen ti animal, masapul nga itedna ti naituding a gatadna a manayonan iti apagkalima ti gatad ti animal.

14 No balay ti maidaton itiApo, ikeddeng ti padi ti gatadna segun ti klase ti balay, ket saanen a mabaliwan ti naituding a gatadna.

15 No kayat a gatangen met laeng ti nangidaton iti balay, bayadanna ti naituding a gatad ket nayonanna iti apagkalima ti gatad ti balay.

16 No idaton ti maysa a tao ti maysa a paset ti dagana itiApo, maikeddeng ti gatadna segun ti kaadu ti bukel a maimula. Sangapulo a bagi ti pirak ti gatad ti 20 a kilo ti bin-i ti sebada.

17 No idatonna ti talon ti Tawen ti Panagisubli kadagiti Sanikua, saan a maksayan ti naikeddeng a gatad.

18 Ngem no naladladaw ngem iti daytoy ti panangidatonna, pattapattaen ti padi ti gatad ti talon segun ti bilang dagiti nabati a tawen sakbay ti Tawen ti Panagisubli kadagiti Sanikua ket ikeddengna ti nalaklaka a gatad.

19 No kayat ti tao a nangidaton a sakaen ti daga, masapul a bayadanna ti naikeddeng a gatad a manayonan iti apagkalima ti gatad ti daga.

20 No ilakona ti talon a dina umuna a subboten itiApo, mapukawna ti kalinteganna a manggatang manen.

21 Iti sumaruno a Tawen ti Panagisubli kadagiti Sanikua, agbalin ti daga a kukua tiApoiti agnanayon; tagikuaen dagiti papadi.

22 No maidaton itiApoti nagatang a talon,

23 pattapattaen ti padi ti gatadna segun ti bilang ti tawen sakbay ti Tawen ti Panagisubli kadagiti Sanikua, ket masapul nga itedna ti gatad iti dayta met la nga aldaw; kukua tiApoti kuarta.

24 Iti Tawen ti Panagisubli kadagiti Sanikua, maisubli ti talon iti sigud nga akinkukua wenno kadagiti kaputotanna.

25 Maibatay ti amin a gatad iti naituyang a pagtimbangan.

26 Sigud a kukua tiApoti inauna nga anak dagiti animal isut’ gapuna a saan a mabalin a maited kenkuana a daton iti bukod a nakem. Kukua tiApoti urbon ti baka, karnero wenno kalding

27 ngem ti inauna nga anak ti animal a maibilang a narugit mabalin a masubbot segun ti naituding a gatad a mainayon iti apagkalima iti gatadna. No saan a masubbot, mabalin nga ilako iti siasinoman iti naikeddeng a gatad.

28 Saana mabalin nga ilako wenno subboten ti naidaton itiApoa saan a naibaga no ania a gapu,tao man, animal wenno daga. Kukua tiApodaytoy iti agnanayon.

29 Saan a mabalin a subboten, uray ti tao a naidatag a daton a di naibaga no ania a gapu; masapul a mapapatay.

30 KukuatiApoti amin nga apagkapullo a maapit iti daga, trigo man wenno frutas.

31 No kayat ti tao a subboten ti apagkapullo, masapul nga itedna ti naituding a gatad a manayonan iti apagkalima ti gatad dagitoy.

32 Kukua tiApoti maysa iti tunggal sangapulo a taraken nga animal. No mabilang dagiti animal, kukua tiApoti tunggal maikasangapulo nga animal.

33 Saan a mabalin ti akinkukua nga urnosen dagiti animal tapno mapili dagiti saan a nasayaat nga animal ken dina met mabalin a sukatan ti animal a napili. No suktanna ti maikasangapulo nga animal iti sabali nga animal, kukua tiApodagiti dua nga animal ket dida mabalin a subboten.

34 Dagitoy dagiti bilin nga inted ni Yahweh ken ni Moises idiay Bantay Sinai nga agpaay nga annuroten dagiti Israelita.

Categories
Numero

Numero 1

Ti Umuna a Pannakasensus dagiti Israelita

1 Itiumuna nga aldaw ti maikadua a bulan iti maikadua a tawen kalpasan ti ipapanaw dagiti Israelita idiay Egipto, nagsao ni Yahweh ken ni Moises iti Tolda ti Diosidiay Let-ang ti Sinai. Kinunana,

2 “Bilangenyo ken ni Aaron dagiti Israelita segun ti familia ken kapuonan a nagtaudanda. Ilistayo ti nagan ti amin a lallaki

3 nga agtawen iti duapulo wenno nasursurok a mabalin nga agsoldado.

4 Agpatulongkayo iti pangulo ti kapuonan ti tunggal tribu.”

5-16 Dagitoy dagiti napili iti entero a gimong para iti daytoy a trabaho. Papanguloda iti kapuonan ken turayen dagiti tribu:

Ruben Elizur nga anak ni Sedeur
Simeon Selumiel nga anak ni Zurisadai
Juda Naason nga anak ni Aminadab
Issacar Netanel nga anak ni Suar
Zabulon Eliab nga anak ni Helon
Efraim Elisama nga anak ni Amiud
Manases Gamaliel nga anak ni Pedasur
Benjamin Abidan nga anak ni Gideoni
Dan Ahiezer nga anak ni Amisadai
Aser Pagiel nga anak ni Okran
Gad Eliasaf nga anak ni Deuel
Neftali Ahira nga anak ni Enan

17-18 Babaen iti tulong dagitoy sangapulo ket dua a lallaki, inummong da Moises ken Aaron ti entero a gimong iti umuna nga aldaw ti maikadua a bulan ket inrehistroda dagiti amin a tattao segun ti kapuonan ken familia a nagtaudanda. Nailista ti nagan ken nabilang dagiti agtawen iti duapulo ken nasursurok

19 kas imbilin ni Yahweh. Idiay Let-ang ti Sinai ti nangsensusan ni Moises kadagiti tattao.

20-46 Nailista ti nagan dagiti lallaki a mabalin nga agsoldado nga agtawen iti duapulo wenno nasursurok kas mayannurot iti familia a nagtaudanda. Nangrugi ti listaan iti tribu ni Ruben nga inauna nga anak ni Jacob. Dagitoy ti dagupda:

Ruben 46,500
Simeon 59,300
Gad 45,650
Juda 74,600
Issacar 54,400
Zabulon 57,400
Efraim 40,500
Manases 32,200
Benjamin 35,400
Dan 62,700
Aser 41,500
Neftali 53,400
Dagup: 603,550

47 Saan a nairaman dagiti Levita a nailista kadagiti dadduma a tribu

48 gapu ta kinuna ni Yahweh ken ni Moises,

49 “Inton sensusem dagiti mabalin nga agsoldado, dimo iraman ti tribu ni Levi.

50 Dutokam ketdi dagiti Levita nga agaywan iti Tolda ti Dios ken amin nga alikamenna. Isuda ti para-bagkat iti tolda ken kadagiti alikamenna. Agserbida iti unegna ket agkampoda iti lawlawna.

51 Tunggal yalisyo ti kampoyo, lasangenda ti tolda sadanto man met laengen sangalen iti baro a pagkampoanyo. Mapapatay ti siasinoman a saan a Levita nga umasideg iti tolda.

52 Agkampo dagiti dadduma nga Israelita a nabunggo-bunggoy a kas iti armada, tunggal tao iti grupona ken iti babaen ti banderana.

53 Ngem agkampo dagiti Levita iti lawlaw ti Tolda ti Dios tapno guardiaanda ket iti kasta awan ti umasideg a pakaigapuan ti panagdissuor ti pungtotko iti gimong ti Israel.”

54 Inaramid ngarud dagiti Israelita dagiti amin nga imbilin ni Yahweh ken ni Moises.

Categories
Numero

Numero 2

Ti Urnos dagiti Tribu No Agkampoda

1 Inted ni Yahweh kada Moises ken Aaron dagiti sumaganad nga alagaden.

2 No agkampo dagiti Israelita, agkampo ti tunggal maysa iti babaen iti wagayway ti bunggoyna ken iti bandera ti kapuonanna. Maipatakder dagiti toldada iti lawlaw ti Tolda a Paguummongan.

3-9 Iti akindaya, agkampo dagiti adda iti babaen ti wagayway ti Juda iti grupoda nga ipanguloan dagiti panguloda. Kastoy ti urnosda:

Juda Naason nga anak ni Aminadab 74,600
Issacar Netanel nga anak ni Suar 54,400
Zabulon Eliab nga anak ni Helon 57,400
Dagup: 186,400

Ti bunggoy ti Juda ti umuna nga agluas.

10-16 Iti akin-abagatan, agkampo dagiti adda iti babaen ti wagayway ti Ruben iti grupoda nga ipanguloan dagiti panguloda. Kastoy ti urnosda:

Ruben Elizur nga anak ni Sedeur 46,500
Simeon Selumiel nga anak ni Zurisadai 59,300
Gad Eliasaf nga anak ni Deuel 45,650
Dagup: 151,450

Ti bunggoy ti Ruben ti sumaruno nga agluas.

17 Sumaruno met nga agluas dagiti Levita a mangawit iti Tolda ti Dios. Agyanda iti nagbaetan dagiti umuna a dua a bunggoy ken iti maudi a dua a bunggoy. Magna ti tunggal bunggoy iti isu met la nga urnos a kas iti urnosda no agkampoda; addada iti lugarda ken iti babaen ti wagaywayda.

18-24 Iti akinlaud, agkampo dagiti adda iti babaen ti wagayway ti Efraim iti grupoda nga ipanguloan dagiti panguloda. Kastoy ti urnosda:

Efraim Elisama nga anak ni Amiud 40,500
Manases Gamaliel nga anak ni Pedasur 32,200
Benjamin Abidan nga anak ni Gideoni 35,400
Dagup: 208,100

Ti bunggoy ti Efraim ti maikatlo nga agluas.

25-31 Iti akin-amianan, agkampo dagiti adda iti babaen ti wagayway ti Dan iti grupoda nga ipanguloan dagiti panguloda. Kastoy ti urnosda:

Dan Ahiezer nga anak ni Amisadai 62,700
Aser Pagiel nga anak ni Okran 41,500
Neftali Ahira nga anak ni Enan 53,400
Dagup: 157,600

Ti bunggoy ti Dan ti maudi nga agluas.

32 Agdagup iti 603,550 dagiti Israelita a nailista kadagiti bunggoy, segun ti grupo ti tunggal maysa.

33 Kas imbilin ni Yahweh ken ni Moises, saan a nairaman dagiti Levita a nailista kadagiti dadduma nga Israelita.

34 Ngarud, inaramid dagiti Israelita ti amin nga imbilin ni Yahweh ken ni Moises. Nagkampo ti tunggal tribu iti babaen ti bukodna a wagayway ket nagluasda segun ti tribu ken familia a nagtaudanda.

Categories
Numero

Numero 3

Dagiti Annak ni Aaron

1 Daytoy ti familia da Aaron ken Moises idi makisao ni Yahweh ken ni Moises idiay Bantay Sinai.

2 Uppatti annak ni Aaron: Nadab nga inauna, Abiu, Eleazar ken Itamar.

3 Naikonsagrarda ket naordenanda a kas papadi

4 ngemnatay da Nadab ken Abiu idi nangidatagda iti saan a nasagradoan nga apuy ken ni Yahweh idiay Let-ang ti Sinai. Awan ti annakda, isu a nagakem da Eleazar ken Itamar a kas papadi bayat ti panagbiag ni Aaron.

Madutokan dagiti Levita nga Agserbi kadagiti Papadi

5 Kinuna ni Yahweh ken ni Moises,

6 “Ipanmo ken ni Aaron a padi dagiti kameng ti tribu ni Levi ket dutokam ida a katulonganna.

7 Tulonganda ni Aaron ken agserbida iti entero a gimong iti sangoanan ti Tolda ti Dios iti tabernakulo.

8 Aywananda amin nga alikamen ti Tolda ket aramidenda dagiti annongda kadagiti Israelita.

9 Ti laeng akem dagiti Levita isu ti panagserbida ken ni Aaron ken kadagiti annakna.

10 Dutokam ni Aaron ken dagiti annakna a mangakem kadagiti pagrebbengan ti kinapadi; mapapatay ti siasinoman nga agannong a padi a saan a kaputotan ni Aaron.”

11 Kinuna ni Yahweh ken ni Moises,

12-13 “Agpaaykaniak dagiti Levita. Idi pinatayko dagiti amin nga inauna nga anak a lalaki dagiti Egipcio, indatonko a kas kukuak ti inauna nga anak a lalaki iti Israel, tao man wenno animal. Ita, kukuak dagiti Levita a kas sukat dagiti inauna nga annak ti Israel. Siak ni Yahweh.”

Ti Pannakasensus dagiti Levita

14 Iti Let-ang ti Sinai, imbilin ni Yahweh ken ni Moises

15 a sensusenna dagiti Levita segun ti kapuonanda ken familia a nagtaudanda ket ilistana ti amin a lalaki nga adda makabulannan wenno nasursurok pay.

16 Ket nagtungpal ni Moises.

17-20 Tallo ti annak ni Levi: Gerson, Coat ken Merari a nagtaudan dagiti familia a nangtawid kadagiti naganda. Dua ti annak ni Gerson: Libni ken Simei; uppat ti annak ni Coat: Amram, Izhar, Hebron ken Uzziel; ket dua met ti annak ni Merari: Mali ken Musi. Isuda ti kapuonan dagiti familia a nangtawid kadagiti naganda.

21 Dua a familia ti mangbukel iti kaputotan ni Gerson: dagiti Libnita ken Simita.

22 Agdagup iti 7,500 dagiti lallaki nga adda makabulandan wenno nasursurok pay.

23 Agkampo daytoy a kapuonan iti likudan ti Tolda iti bangirna ti laud.

24 Ipanguloan ida ni Eliasaf nga anak ni Lael.

25 Aywananda Tolda ti Dios, iti akin-uneg a linongna, ti akinruar nga abbongna, ti kurtina ti ruangan,

26 dagiti bengbeng a nanglikmut iti paraangan iti lawlaw ti Tolda ken ti altar ken ti kurtina ti pagserkan ti paraangan. Aramidenda ti amin a trabaho a mainaig kadagitoy nga alikamen.

27 Uppat a familia ti mangbukel iti kaputotan ni Coat: dagiti Amramita, Isharita, Hebronita ken Uzzielita.

28 Agdagup iti 8,600 dagiti lallaki nga adda makabulandan wenno nasursurok pay.

29 Agkampo daytoy a kapuonan iti bangirna ti abagatan ti Tolda

30 iti panangipangulo ni Elisafan nga anak ni Uzziel.

31 Isuda ti agaywan iti Lakasa ti Tulag, ti lamisaan, ti kandelero, dagiti altar, dagiti alikamen nga aramaten dagiti papadi iti Nasantoan a Disso ken ti kurtina ti ruangan ti Kasasantoan a Disso. Aramidenda ti amin a trabaho a mainaig kadagitoy nga alikamen.

32 Ni Eleazar nga anak ni Aaron a padi ti kangatoan a turayen dagiti Levita. Isu ti mangimaton kadagiti agserserbi iti Nasantoan a Disso.

33 Dua a familia ti mangbukel iti kaputotan ni Merari: dagiti Malita ken Musita.

34 Agdagup iti 6,200 dagiti lallaki nga adda makabulandan wenno nasursurok pay.

35 Agkampo daytoy a kapuonan iti amianan ti Tolda. Ni Zuriel nga anak ni Abihail ti panguloda.

36 Aywananda dagiti maus-usar iti Tolda a kas kadagiti bastidor, dagiti balunetna, adigi, pagbatayan ken amin a kawitna. Aramidenda ti amin a trabaho a mainaig kadagitoy nga alikamen.

37 Aywananda pay dagiti adigi, pagbatayan, pasok ken tali nga agpaay iti akinruar a paraangan.

38 Agkampo ni Moises ken Aaron ken dagiti annakna iti sango ti Tolda ti Dios iti bangirna ti daya. Isuda ti makaammo iti pannakaibanag dagiti akem iti Nasantoan a Disso iti nagan dagiti Israelita. Mapapatay ti siasinoman a mangaramid kadagiti annongenda.

39 Agdagup iti 22,000 ti amin a lallaki a Levita nga adda makabulanna wenno nasursurok pay nga inlista ni Moises segun ti kapuonanda, kas imbilin tiApo.

Dagiti Levita ti Suno dagiti Inauna nga Annak a Lallaki

40-41 Kinuna ni Yahweh ken ni Moises, “Kukuak ti amin nga inauna nga annak a lallaki ti Israel. Ngarud, ilistam ti nagan ti amin nga inauna a lallaki nga Israelita nga adda makabulanna wenno nasursurok pay. Ngem kas sunoda, tagikuaek dagiti amin a Levita! Siak ni Yahweh! Tagikuaek met dagiti animal dagiti Levita a kas suno ti amin nga inauna nga annak dagiti animal.”

42 Ket inlista ni Moises ti amin nga inauna nga annak a lallaki

43 nga adda makabulanna wenno nasursurok pay; agdagupda iti 22,273.

44 Kinuna tiApoken ni Moises,

45 “Ita, idatonmo kaniak dagiti Levita a kas suno ti amin nga inauna nga annak dagiti Israelita ken dagiti animal dagiti Levita a kas suno dagiti amin nga inauna nga annak dagiti animal dagiti Israelita.

46 Ad-adu dagiti inauna nga annak dagiti Israelita ngem dagiti annak dagiti Levita. Agdagup iti 273 ti pagad-aduanda ket masapul a masubbot dagitoy.

47 Bayadam ti tunggal maysa iti lima a bagi ti pirak segun ti naituding a pagtimbangan

48 ket itedmo daytoy a kuarta ken ni Aaron ken dagiti annakna.”

49 Nagtungpal ni Moises ket innalana

50 ti 1,365 a bagi ti pirak

51 sana inted ken ni Aaron ken dagiti annakna.

Categories
Numero

Numero 4

Ti Annongen dagiti Levita iti Kapuonan ni Coat

1 Imbaga ni Yahweh ken ni Moises

2 a sensusenna dagiti Levita iti kapuonan ni Coat segun ti kapuonan ken familiada

3 ket ilistana dagiti amin a lallaki manipud dagiti agtawen iti 30 agingga iti 50 a mabalin nga agserbi iti Tolda ti Dios.

4 Adda pannakaibiang ti panagserbida kadagiti kasantoan a banag.

5 No umalis dagiti Israelita iti pagkampoanda, sumrek ni Aaron ken dagiti annakna iti Tolda, ikkatenda ti kurtina iti sango ti Lakasa ti Tulag sada yabbong iti lakasa.

6 Arpawanda ti lakasa iti nalamuyot a lalat, parabawanda iti lupot nga asul sada yusok dagiti assiw.

7 Arpawanda iti asul a lupot ti lamisaan a pakaikabilan ti tinapay a maidaton ken ni Yahweh sada iparabaw dagiti pinggan, dagiti malukong ti insenso, dagiti malukong dagiti daton ken dagiti harra a pagyanan ti arak a maidaton. Masapul nga adda latta tinapay iti lamisaan.

8 Abbonganda amin dagitoy iti nalabaga a lupot, arpawanda iti nalamuyot a lalat sada yusok dagiti assiw.

9 Mangalada iti asul a lupot ket abbonganda ti kandelero agraman dagiti pagsainganna, pagarsang, pagyarsangan ken amin a pagyanan ti lana ti olibo.

10 Balkotenda ti kandelero ken amin nga alikamenna iti nalamuyot a lalat ket ikabilda iti nasangal a pagawitan.

11 Abbonganda ti balitok nga altar iti asul a lupot, balkotenda iti nalamuyot a lalat sada yusok dagiti assiw.

12 Alaenda amin nga alikamen a maaramat iti Nasantoan a Disso, bungonenda iti asul a lupot, arpawanda iti nalamuyot a lalat ket ikabilda iti nasangal a pagawitan.

13 Ikkatenda dagiti nalanit a dapu iti altar sada aplagan iti purpura a lupot.

14 Iparabawda ti amin nga alikamen a maar-aramat iti altar; kas iti pagikkan iti beggang, pagadaw, pala ken palanggana. Kalpasanna, arpawanda iti nalamuyot a lalat ket yusokda dagiti assiw.

15 Inton orasen ti yaalisda, umay ti kapuonan ni Coat a mangawit kadagiti nasagradoan nga alikamen ken amin a ramramit dagitoy ngem kalpasan laeng a nabalkoten dagitoy ni Aaron ken dagiti annakna. Maiparit kadagiti kaputotan ni Coat a sagidenda dagiti nasagradoan nga alikamen ta matayda no sagidenda.

Dagitoy ti awitenda tunggal mayakar ti Tolda a Paguummongan.

16 Aywanan ni Eleazar nga anak ni Aaron ti sibubukel a Tolda ket isu ti makaammo iti lana dagiti pagsilawan, ti insenso, dagiti daton a makan ken ti lana a pagkonsagrar, ken amin nga adda iti tolda a naidaton ken ni Yahweh.

17 Kinuna ni Yahweh kada Moises ken Aaron,

18 “Diyo ipalubos a matay dagiti kaputotan ni Coat

19 iti yaasidegda kadagitoy kasasagradoan a banag. Tapno saanda a matay, umay ni Aaron ken dagiti annakna ket itudingna ti aramiden ti tunggal maysa ken no ania ti rebbengna nga awiten.

20 Ngem no sumrek dagiti Coatita iti Tolda ket kitaenda dagiti papadi a mangisagsagana iti pannakayalis dagiti nasagradoan a banag,matayda.”

Dagiti Annong dagiti Levita iti Kapuonan ni Gerson

21 Imbaga ni Yahweh ken ni Moises

22 a pasensusna dagiti Levita iti kapuonan ni Gerson segun ti familia a nagtaudanda

23 ket mailista ti amin a lallaki, manipud dagiti agtawen iti 30 wenno nasursurok pay agingga iti 50 a mabalin nga agserbi iti Tolda ti Dios.

24 Akemda ti mangawit kadagiti sumaganad:

25 ti Tolda a Paguummongan, ti akin-uneg a linongna, ti akinruar nga abbongna, ti nalamuyot a lalat nga arpawna, ti kurtina ti pagserkan,

26 dagiti kurtina ken dagiti tali ti paraangan iti lawlaw ti Tolda ken ti altar, dagiti kurtina iti pagserkan ti paraangan ken amin a masapsapul iti pannakaipatakder dagitoy. Aramidenda dagiti amin a trabaho a nasken kadagitoy.

27 Ikagumaan da Moises ken Aaron a kitaenda nga aramiden nga aramiden dagiti Gersonita dagiti amin a pagrebbenganda ken tungpalenda amin a maipaannong kadakuada.

28 Dagitoy dagiti annongen dagiti Gersonita iti Tolda ti Dios babaen iti panangimaton ni Itamar nga anak ni Aaron a padi.

Dagiti Pagrebbengan dagiti Levita iti Kapuonan ni Merari

29 Imbaga ni Yahweh ken ni Moises a sensusenna dagiti Levita iti kapuonan ni Merari segun ti familiada

30 ket ilistana ti amin a lallaki nga agtawen iti 30 agingga iti 50 a mabalin nga agserbi iti Tolda a Paguummongan.

31 Isuda ti para-awit kadagiti nasangal a pagawitan, balunet, adigi ken pagbatayan ti Tolda,

32 dagiti adigi, pagbatayan, pasok ken tali ti bakud iti aglikmut ti Tolda, agraman dagiti amin a masapsapul iti pannakaipatakderda. Naituding iti tunggal tao dagiti annongna nga awiten.

33 Dagitoy ti pagrebbengan dagiti kaputotan ni Merari iti panagserbida iti Tolda ti Dios babaen iti panangimaton ni Itamar nga anak ni Aaron.

Ti Pannakasensus dagiti Levita

34-48 Kas imbilin ni Yahweh, sinensus da Moises, Aaron ken dagiti pangulo ti gimong dagiti tallo a kaputotan dagiti Levita: Coat, Gerson ken Merari. Inaramidda daytoy kas mayannurot iti sangakabbalayan ken familiada. Nailista ti amin a lallaki, manipud dagiti agtawen iti 30 ken nasursurok agingga iti 50 a mabalin nga agserbi iti Tolda a Paguummongan: Tribu Bilang Coat 2,750 Gerson 2,630 Merari 3,200 Dagup: 8,580

49 Nairehistro ti amin kas imbilin ni Yahweh ken kas imbilinna ken ni Moises, naituding ti pagrebbengan ti tunggal maysa nga agserbi wenno agbagkat.

Categories
Numero

Numero 5

Dagiti Tattao a Maibilang a Narugit

1 Kinuna ni Yahweh ken ni Moises,

2 “Bilinem dagiti Israelita a pagtalawenda iti kampo ti amin nga agkukutel wenno agtuttutot iti aniaman a paset ti bagida ken amin a narugit iti imatang ti linteg gapu iti panangsagidda iti bangkay.

3 Iruaryo dagitoy a tattao a maibilang a narugit tapno dida tulawan ti kampo a pakipagnaedak kadagiti tattaok.”

4 Nagtungpal dagiti Israelita ket pinagtalawda amin ida iti kampo.

Ti Alagaden no adda Agsalungasing

5 Intedni Yahweh ken ni Moises

6 dagiti sumaganad nga alagaden nga agpaay kadagiti Israelita. No adda agaramid iti dakes iti padana a tao, salungasingenna tiApoket makabasol.

7 Masapul nga ipudnona ti basolna, bayadanna ti maikeddeng a gatad ket nayonanna pay iti apagkalima a paset daytoy. Maited ti pagbayadna iti nakabasolanna.

8 Ngem no natay ti tao ket awan ti asideg a kabagianna, maidatag ti pagbayad itiApotapno agpaay iti padi, agraman kalakian a karnero a mausar iti seremonia ti pannakadalus gapu iti basolna.

9 Maysa pay, kukua ti padi a pangyawatanda ti amin a naisangsangayan a sagut dagiti Israelita itiApo.

10 Alaen ti padi dagiti daton a maited kenkuana.

Linteg maipapan kadagiti Naimon nga Assawa a Lalaki

11 Imbilin ni Yahweh ken ni Moises

12-14 nga itedna dagitoy nga alagaden kadagiti Israelita. Kas pagarigan lipliputan ti maysa a babai ti asawana babaen iti pannakikaiddana iti sabali a lalaki. Ngem saan a mapaneknekan ti lalaki gapu ta awan ti saksi ket dina matiliwan ti asawana iti akto. Wenno kas pagarigan agatap ti lalaki nga adda dakes nga aramid ti asawana idinto a napudno kenkuana ti babai.

15 Kadagitoy a banag, masapul nga idatag ti lalaki ti asawana iti padi. Mangitugot met iti sangakilo nga arina a sebada a naituding a daton. Ngem dina laokan daytoy a daton iti lana ti olibo wenno ikkan iti insenso agsipud ta maidatag gapu iti panagatap, maysa a daton a mangkiddaw a madusa ti babai no nakabasol.

16 Pagtakderen ti padi ti babai iti sango ti altar.

17 Mangikabil ti padi iti nasantoan a danum iti maysa a bakka sana laokan iti daga manipud iti datar ti Tolda ti Dios.

18 Wakrayenna ti buok ti babai ket ikabilna kadagiti imana ti daton nga arina. Iggaman ti padi ti bakka a nakaikargaan ti napait a danum a mangyeg iti lunod.

19 Kalpasanna, pagsapataenna ti babai: “No dimo liniputan ti asawam, dimo sagabaen ti lunod a yeg daytoy a danum.

20 Ngem no adda dakes nga aramidmo,

21 dusaennaka koma tiApotapno maballaagan dagiti kailiam. Kumbet koma ti mabagbagim ket bumsog ti tianmo.

22 Sumrek koma daytoy a danum iti tianmo a pakaigapuanna a bumsog ken pakaigapuan ti panagkebbet ti mabagbagim.”

Kastoyto ti sungbat ti babai, “Sapay koma ta kasta; kasta koma ti aramiden tiApo.”

23 Isurat ti padi dagitoy a lunod iti maysa a pagsuratan nga itanebna iti napait a danum tapno mapunas ti naisurat.

24 Ipainumnanto iti babai ti napait a danum ti lunod. Ket umunegto kenkuana ti danum a mangyeg iti nakaro a panagsagaba.

25 Alaen ti padi ti daton nga arina kadagiti ima ti babai, itayagna a kas pangidatonna itiApoket idatagna iti altar.

26 Kalpasanna, mangrakem iti daton ket puoranna iti altar. Kamaudianna, ipainumna ti danum iti babai.

27 No liniputanna ti asawana, marikna ti babai ti nakaro nga ut-ot gapu iti ininumna, bumsog ti tianna ket kumbet ti mabagbagina. Makarimonto ti naganna kadagiti kailianna.

28 Ngem no awan ti basolna, awan ti pakaan-anoanna ket mabalinnanto ti aganak.

29-30 Daytoy ti linteg a maannurot no agimon ti lalaki ket atapenna a makikakaidda ti asawana iti sabali a lalaki. Maayaban ti babai nga agtakder iti sango ti altar ket aramiden ti padi daytoy a seremonia.

31 Awan basol ti asawa a lalaki ngem ti nagbasol a babai ti masapul a madusa.

Categories
Numero

Numero 6

Linteg maipapan kadagiti Agbalin a Nazireo

1 Binilin ni Yahweh ni Moises

2 nga ipaulogna dagitoy nga alagaden kadagiti Israelita. No adda naisangsangayan a sapata ti maysa a lalaki wenno babai nga agbalin a Nazireoket idatonna ti bagina itiApo,

3 masapula di uminum iti arak wenno aniaman a makabartek. Maiparit kenkuana ti aniaman nga inumen a nagtaud iti ubas wenno mangan iti ubas wenno pasas.

4 Iti las-ud ti tiempo ti sapatana, saan a mangan iti aniaman a naggapu iti ubas, uray pay iti bukel wenno ukisna.

5 Bayat ti panagbalinna a Nazireo, saan nga agpukis wenno agibarbas. Bay-anna nga umatiddog ti buok wenno barbasna tapno di masalungasing ti sapata a pannakaidatonna itiApo.

6-7 Ti buokna ti pagilasinan a naidaton iti Dios ket masapul a dina tulawan ti bagina iti yaasidegna iti bangkay, uray ti bangkay ti amana, inana, wenno kabsatna.

8 Bayat ti panagtalinaedna a Nazireo, naidaton itiApo.

9 No adda tao a kellaat a matay iti abay ti maysa a Nazireo, matulawan ti naidaton a buokna; masapul nga aguray iti pito nga aldaw sa agpakalbo ken agibarbas tapno maibilang a nadalus iti imatang ti linteg.

10 Iti maikawalo nga aldaw, mangipan iti dua a kalapati wenno dua a pagaw iti ruangan ti Tolda ti Dios.

11 Idatag ti padi ti maysa a tumatayab a daton gapu iti basol ken ti maysa a kas daton a mapuoran—daytoy ti seremonia ti pannakadalusna gapu iti pannakasagidna iti bangkay. Iti dayta met la nga aldaw, idatonna manen ti buokna

12 itiApo, kasta met ti tiempona a kas Nazireo. Saan a maibilang daydi tiempona a pannakaidatonna ta natulawan ti buokna. Kas daton a pagsupapak, mangidatag iti karnero a maysa ti tawenna.

13 Nomaturpos dagiti aldaw ti sapatana a kas Nazireo, aramidenna dagitoy sumaganad: Mapan iti ruangan ti Tolda ti Dios

14 ket mangidaton iti tallo a karnero nga awan depektoda; maysa a kalakian a maysa ti tawenna a kas daton a mapuoran; maysa a kabaian a maysa ti tawenna a daton gapu iti basol ken maysa a kalakian a daton a pakikappia.

15 Malaksid dagitoy, mangidaton pay iti sangabasket a tinapay nga awan lebadurana ken naaramid iti arina a nalaokan iti lana ti olibo, ken naiingpis a kankanen a napulagidan iti lana ti olibo. Mangitugot met kadagiti daton a makan ken arak.

16 Idatag ida ti padi itiApoket idatagna ti daton a maipaay iti basol ken ti daton a mapuoran.

17 Idatonna ti kalakian a karnero a daton a pakikappia, agraman ti sangabasket a tinapay ken dagiti daton a makan ken arak.

18 Mapan ti Nazireo iti ruangan ti Tolda ti Dios ket kuskosanna ti buokna; kalpasanna, ipurruakna ti buok iti apuy a pakapupuoran ti daton a pakikappia.

19 Alaen ti padi ti naanger nga abaga ti karnero, agraman maysa a tinapay ken maysa a kankanen sana ikabil kadagiti ima ti Nazireo.

20 Isaruno ti padi nga idatag dagitoy a kas naisangsangayan a sagut itiApo. Nasagradoanda a daton para iti padi, agraman ti barukong ken saka ti karnero nga ituding ti linteg a kukua ti padi. Kalpasanna, mabalinen ti Nazireo ti uminum iti arak.

21 Dagitoy ti alagaden nga agpaay kadagiti Nazireo. Ngem no ikari ti Nazireo ti mangted iti daton a nayon ti daton a rebbengna nga ited, masapul a tungpalenna ti inkarina.

Ti Pamendision ti Padi

22 Imbilin ni Yahweh ken ni Moises

23 nga ibagana ken ni Aaron ken kadagiti annakna nga aramatenda dagitoy a balikas no bendisionanda dagiti Israelita:

24 Bendisionannakayo koma tiApoket aywanannakayo;

25 Kaasiannakayo koma tiApoket paraburannakayo;

26 Kitaennakayo koma a siaayat tiApoket ikkannakayo iti talna.

27 Kinuna ni Yahweh, “Kastoy ti panangaramatda iti naganko iti pamendisionda kadagiti tattao ti Israel, ket paraburakto ida.”

Categories
Numero

Numero 7

Dagiti Daton dagiti Pangulo

1 Iti aldaw a nalpas ni Moises a binangon ti Tolda ti Dios, kinonsagrar ken indatonna ti Tolda ken amin nga alikamenna, agraman ti altar ken amin nga alikamenna.

2-3 Inyeg dagiti pangulo dagiti familia ti Israel dagiti datonda ken ni Yahweh. Panglakayen ida dagiti tribu ti Israel ken nangimaton iti sensus. Dagitoy ti datonda: innem a kariton ken 12 a baka—maysa a lugan ti tunggal dua a pangulo ken saggaysada a baka. Idi maitedda dagitoy,

4 kinuna ni Yahweh ken ni Moises,

5 “Awatem dagitoy a sagut para iti trabaho iti Tolda ti Dios; itedmo ida kadagiti Levita kas mayannurot iti pagrebbenganda.”

6 Ngarud, inted ni Moises dagiti kariton ken baka kadagiti Levita.

7 Dua a kariton ken uppat a baka ti intedna kadagiti Gersonita,

8 ken uppat a kariton ken walo a baka kadagiti Merarita para iti trabahoda babaen iti panangimaton ni Itamar nga anak ni Aaron.

9 Ngem awan intedna kadagiti Coatita, gapu ta masapul a baklayenda dagiti nasagradoan a banag a naipaaywan kadakuada.

10 Iti aldaw a pannakaidaton ti altar, nangyeg dagiti papangulo kadagiti datonda. Indatagda dagitoy iti sango ti altar

11 ket kinuna ni Yahweh ken ni Moises, “Ibagam kadakuada a tunggal aldaw iti las-ud ti 12 nga aldaw, maysa a pangulo ti mangidatag kadagiti sagutna iti pannakaidaton ti altar.”

12-83 Kastoy ti panagsasaganadda a nagidatag iti daton: Aldaw Tribu Pangulo Umuna Juda Naason nga anak ni Aminadab Maikadua Issacar Netanel nga anak ni Suar Maikatlo Zabulon Eliab nga anak ni Helon Maikapat Ruben Elizur nga anak ni Sedeur Maikalima Simeon Selumiel nga anak ni Zurisadai Maikanem Gad Eliasaf nga anak ni Deuel Maikapito Efraim Elisama nga anak ni Amiud Maikawalo Manases Gamaliel nga anak ni Pedasur Maikasiam Benjamin Abidan nga anak ni Gideoni Maika-10 Dan Ahiezer nga anak ni Amisadai Maika-11 Aser Pagiel nga anak ni Okran Maika-12 Neftali Ahira nga anak ni Enan

Agpapada ti indaton ti tunggal maysa: maysa a pirak a malukong nga agdagsen iti 1 1/5 a kilo ken maysa a pirak a palanggana nga agdagsen iti 800 a gramo, segun ti gagangay a pagtimbangan ket agpadada a napno iti arina a nagamay iti lana para iti daton a makan; maysa a balitok a pinggan nga agdagsen iti 110 a gramo a napno iti insenso; maysa a bumaro a baka, maysa a kalakian a karnero, ken maysa ti tawenna a karnero, a daton a mapuoran; maysa a kalding a daton gapu iti basol; ken dua a toro a baka, lima a kalakian a karnero, lima a kalding ken lima a karnero a maysa ti tawenna, a daton a pakikappia.

84-88 Adtoy dagiti pagdagupan dagiti sagut dagiti sangapulo ket dua a papangulo nga agpaay iti pannakaidaton ti altar:

12 a pirak a malukong ken 12 a pirak a palanggana; agdagsenda iti 27.6 a kilo

12 a balitok a pinggan nga agdagsen iti 1.32 a kilo ken napno iti insenso

12 a baka, 12 a kalakian a karnero ken 12 a karnero a maysa ti tawenna, agraman dagiti daton a makan a maipasurot kadagitoy, para iti daton a mapuoran

22 a kalding para iti daton gapu iti basol

24 a baka, 60 a kalakian a karnero, 60 a kalding, 60 a karnero a maysa ti tawenna, para iti daton a pakikappia.

89 Tunggal sumrek ni Moises iti Tolda a Paguummongan tapno makisao ken ni Yahweh, mangngegna nga agsasao kenkuana iti ngatoen ti kalub ti Lakasa ti Tulag, iti baet dagiti dua a kerubim.

Categories
Numero

Numero 8

Ti Pannakaisaad dagiti Pagsilawan

1 Kinunani Yahweh ken ni Moises,

2 “Ibagam ken ni Aaron a no isaadna dagiti pito a pagsilawan iti kandelero, masapul a lawaganda ti sango ti kandelero.”

3 Nagtungpal ni Aaron ket inkabilna dagiti pagsilawan tapno lawaganda ti sango ti kandelero.

4 Naaramid ti kandelero iti napitpit a balitok, manipud puon agingga kadagiti ungkayna, kas mayannurot iti pagtuladan nga impakita ni Yahweh ken ni Moises.

Ti Pannakaidaton dagiti Levita

5 Kinuna ni Yahweh ken ni Moises,

6 “Ilasinmo dagiti Levita kadagiti dadduma nga Israelita ket aramidem ti seremonia ti pannakadalusda

7 iti kastoy a wagas: warsiam ida iti danum a pagdalus ket pakiskisam ti entero a bagida ken palabaam ti pagan-anayda. Kalpasanna, agbalindan a nadalus iti imatang ti linteg.

8 Mangalada iti bumaro a baka ken ti naituding a daton a makan nga arina a nagamay iti lana ti olibo; mangalaka iti sabali a baka a maidaton gapu iti basol.

9 Ummongem ti entero a gimong ti Israel ket idatagmo dagiti Levita iti sangoanan ti Tolda.

10 Ipatay dagiti Israelita dagiti imada iti ulo dagiti Levita;

11 kalpasanna, idaton ni Aaron dagiti Levita a naisangsangayan a sagut dagiti Israelita tapno agserbida kaniak.

12 Ipatay dagiti Levita ti imada iti ulo dagiti dua a baka; maysa ti maidatag a daton gapu iti basol ket ti maikadua kas daton a mapuoran kas annongen ti seremonia ti pannakadalus dagiti Levita.

13 “Idatonmo dagiti Levita a naisangsangayan a sagut kaniak ket dutokam ni Aaron ken dagiti annakna a mangimaton kadakuada.

14 Kastoy ti panangilasinmo kadagiti Levita kadagiti dadduma nga Israelita tapno agbalinda a kukuak.

15 Kalpasan ti panangdalusmo kadakuada kas mayannurot iti linteg ken panangidatonmo ida, mangrugidan nga agserbi iti Tolda.

16 Innalak ida a kas suno ti amin nga inauna nga annak a lallaki dagiti Israelita ket siak laeng ti akinkukua kadakuada.

17 Idipinatayko ti amin nga inauna nga annak idiay Egipto, indatonko a kas kukuak ti amin nga inauna nga anak iti Israel, annak man dagitoy ti tao wenno animal.

18 Alaek dagiti Levita a kas sukat dagiti inauna nga annak dagiti Israelita.

19 Ikabilko dagiti Levita iti babaen ni Aaron ken dagiti annakna, kas sagut dagiti Israelita, tapno agserbida iti Tolda a Paguummongan. Tumulongda iti pannakaidaton kadagiti sagut a mangikkat kadagiti basol dagiti Israelita tapno mayadayoda iti didigra nga agdissuor kadakuada no umasidegda iti Nasantoan a Disso.”

20 Indaton ngarud da Moises, Aaron ken amin nga Israelita dagiti Levita kas imbilin ni Yahweh ken ni Moises.

21 Dinalusan dagiti Levita dagiti bagida kas mayannurot iti linteg ken linabaanda dagiti pagan-anayda ket indaton ida ni Aaron a kas naisangsangayan a sagut ken ni Yahweh. Inannongna pay ti seremonia ti pannakadalusda.

22 Inaramid dagiti tattao ti imbilin ni Yahweh ken ni Moises maipapan kadagiti Levita. Ngarud, mabalinen dagiti Levita ti agserbi iti Tolda ti Dios iti babaen ni Aaron ken dagiti annakna.

23 Kinuna ni Yahweh ken ni Moises,

24 “No agtawenen ti Levita iti 25, mangrugin nga agserbi iti Tolda a Paguummongan

25 ket no madanonnan ti 50, agretiron.

26 Kalpasan dayta, mabalinna ti tumulong kadagiti padana a Levita kadagiti annongda iti Tolda ngem dina mabalin ti agaramid iti aniaman a panagserbi a maymaysana. Kastoy ti panangitudingmo iti annong dagiti Levita.”