Author: admin

Dagiti Daton iti Fiesta ti Baro a Tawen

1 Iti umuna nga aldaw ti maika-7 a bulan, aguummongkayo nga agdaydayaw ket awan ti agtrabaho. Iti dayta nga aldaw, mapuyot dagiti trumpeta.

2 Mangidatagkayo iti daton a mapuoran a nabanglo itiApo: maysa a bumaro a baka, maysa a kalakian a karnero ken pito a kalakian nga urbon ti karnero a maysa ti tawenda ken awan depektoda.

3 Pakuyoganyo daytoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero

4 ken maysa a kilo iti tunggal urbon ti karnero.

5 Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

6 Idatagyo daytoy agraman ti inaldaw a daton a mapuoran iti umuna nga aldaw ti bulan agraman ti daton a makan. Idatagyo met ti inaldaw a daton a mapuoran agraman ti daton a makan ken ti daton nga arak. Mapuoran daytoy a mangted iti nabanglo nga ayamuom itiApo.

Dagiti Daton iti Aldaw a Pannakapakawan ti Basol

7 Aguummongkayonga agdaydayaw iti maika-10 nga aldaw iti maika-7 a bulan; dikay mangan ken agtrabaho.

8 Mangidatagkayo iti daton a mapuoran a nabanglo itiApo. Adtoy dagiti idatonyo: maysa a bumaro a baka, maysa a kalakian a karnero ken pito nga urbon a karnero a maysa ti tawenda ken awan depektoda.

9 Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero

10 ken maysa a kilo iti tunggal urbon ti karnero.

11 Mangidatagkayo met iti kalakian a kalding a daton a mangpunas iti basol, malaksid laeng iti daton a kalding iti seremonia ti pannakadalus dagiti tattao ken dagiti inaldaw a daton agraman ti daton a makan ken ti daton nga arak.

Dagiti Daton iti Fiesta dagiti Abong-abong

12 Aguummongkayonga agdaydayaw iti maika-15 nga aldaw iti maika-7 a bulan. Pito nga aldaw a rambakanyo daytoy a fiesta a pammadayaw itiApoket dikay agtrabaho.

13 Iti daytoy umuna nga aldaw, mangidatagkayo iti daton a makan a nabanglo itiApo: 13 a bumaro a baka, dua a kalakian a karnero ken 14 nga urbon a karnero a maysa ti tawenda ken awan ti depektoda.

14 Pakuyoganyo dagitoy iti daton a makan a nagamay iti lana ti olibo: tallo a kilo nga arina iti tunggal baka, dua a kilo iti tunggal karnero

15 ken maysa a kilo iti tunggal urbon ti karnero, agraman dagiti naituding a daton nga arak.

16 Mangidatagkayo met iti kalakian a kalding a daton a mangpunas iti basol. Idatagyo dagitoy a mainayon iti inaldaw a daton a mapuoran agraman naituding a daton a makan ken ti daton nga arak.

17 Iti maikadua nga aldaw, mangidatagkayo iti 12 a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

18-19 Ipakuyogyo nga idaton dagiti amin a daton a naituding a maidatag iti umuna nga aldaw.

20 Iti maikatlo nga aldaw, mangidatagkayo iti 11 a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

21-22 Ipakuyogyo nga idaton dagiti amin a daton a naituding a maidatag iti umuna nga aldaw.

23 Iti maikapat nga aldaw, mangidatagkayo iti sangapulo a bumaro a baka, dua a kalakian a karnero, ken 14 nga urbon ti karnero a maysa ti tawenda ken awan ti depektoda.

24-25 Ipakuyogyo dagiti amin a daton a naituding ti umuna nga aldaw.

26 Iti maikalima nga aldaw, mangidatagkayo iti siam a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

27-28 Ipakuyogyo nga idaton dagiti amin a daton a naituding a maidatag iti umuna nga aldaw.

29 Iti maika-6 nga aldaw, mangidatagkayo iti walo a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

30-31 Ipakuyogyo nga idaton dagiti amin a daton a naituding a maidatag iti umuna nga aldaw.

32 Iti maika-7 nga aldaw, mangidatagkayo iti pito a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti pakapilawanda.

33-34 Ipakuyogyo nga idaton dagiti amin a daton a naituding a maidatag iti umuna nga aldaw.

35 Iti maika-8 nga aldaw, aguummongkayo nga agdaydayaw ket dikay agtrabaho.

36 Mangidatagkayo iti daton a mapuoran a kas daton a makan a nabanglo itiApo: maysa a bumaro a baka, maysa a kalakian a karnero ken pito nga urbon ti karnero a maysa ti tawenda ken awan ti depektoda.

37-38 Ipakuyogyo dagiti amin a daton a naituding iti umuna nga aldaw.

39 Dagitoy dagiti annurotenyo kadagiti daton a mapuoran, daton a makan, daton nga arak ken daton a pakikappia nga idatagyo itiApotunggal rambakanyo dagiti naituding a fiesta. Mairaman ditoy dagiti daton a pangtungpal iti kariyo wenno kas daton nga agubbog iti nakemyo.

40 Imbaga ni Moises kadagiti Israelita ti amin nga imbilin kenkuana tiApo.

Dagiti Alagaden iti Panagkari

1 Inted ni Moises dagiti sumaganad a bilin kadagiti pangulo dagiti tribu ti Israel.

2 Noagkari ti maysa a tao nga adda itedna itiApowenno isapatana a dina aramiden ti maysa a banag, masapul a tungpalenna ti karina ket aramidenna ti amin nga imbagana.

3 No maysa a balasang nga adda pay la iti sidong dagiti nagannak kenkuana ti agkari wenno agsapata itiApo,

4 masapul nga aramidenna ti inkari wenno insapatana, malaksid no madi ti amana apaman a maammoanna.

5 Ngem no iparit ti amana a tungpalenna ti karina apaman a maammoanna, saan a maipapilit a tungpalenna. Awan ti sungsungbatanna itiApoagsipud ta imparit ti amana a matungpal ti karina.

6 No balasang ti agkari, inggagarana man wenno dina napuotan, wenno ikarina a dina aramiden ti maysa a banag ket kalpasanna makiasawa,

7 masapul nga aramidenna ti karina wenno sinapataanna, malaksid no madi ti asawana apaman a maammoanna daytoy.

8 Ngem no iparit ti asawana a tungpalenna ti sapatana apaman a maammoanna, saan a mapilit a mangtungpal iti karina. Pakawanento tiApo.

9 Masapul a tungpalen ti balo a babai, wenno ti babai a naisina iti asawana, ti insapatana nga aramidenna ken ti insapatana a dina aramiden.

10 No agkari wenno agsapata ti naasawaan a babai,

11 masapul nga aramidenna amin nga insapata wenno inkarina, malaksid no madi ti asawana no maammoanna.

12 Ngem no paritan ti asawana a tungpalenna ti karina no maammoanna, saan a mapilit a mangtungpal iti karina. Pinaritan ti asawana a mangtungpal iti karina; pakawanento tiApo.

13 Adda kalintegan ti asawana a mangpatalged wenno mangwaswas iti kari wenno sapata ti babai.

14 Ngem no awan ti masao ti asawana iti aldaw a maammoanna ti karina, masapul nga aramidenna ti amin nga inkarina. Pinatalgedanna ti sapata iti saanna a panangiparit kalpasan a maammoanna daytoy.

15 Ngem no waswasenna ti kari kalpasan ti sumagmamano nga aldaw a pannakaammona, isu ti agsagaba iti dusa ti babai iti dina panangtungpal iti karina.

16 Dagitoy dagiti alagaden nga inted ni Yahweh ken ni Moises maipapan kadagiti sapata ti naasawaan a babai wenno ti awan asawana a babai nga agnanaed iti balay ni amana.

Gubaten ti Israel ti Midian

1 Kinuna ni Yahweh ken ni Moises,

2 “Sakbay a matayka, balsem pay nga umuna dagiti Midianita gapu iti inaramidda kadagiti Israelita.”

3 Ngarud, imbaga ni Moises kadagiti tattao, “Agsaganakayo a makigubat; rautenyo dagiti Midianita ket balsenyo ida gapu iti inaramidda itiApo.

4 Tunggal tribu ti Israel, mangibaon iti 1,000 a makigubat.”

5 Napili ngarud ti 1,000 a lallaki iti tunggal tribu. Agdagup iti 12,000 dagiti napili a makigubat.

6 Imbaon ni Moises ida a makigubat iti babaen ni Finees nga anak ni Eleazar a padi; inkuyogna dagiti nasagradoan nga alikamen ken dagiti trumpeta a pagpakdaar.

7 Rinautda ti Midian kas imbilin ni Yahweh ken ni Moises. Pinatayda amin a lallaki

8 agraman dagiti lima nga ari ti Midian: Evi, Rekem, Zur, Hur ken Reba. Pinapatayda met ni Balaam nga anak ni Beor.

9 Impanaw dagiti Israelita dagiti babbai ti Midian agraman dagiti annakda. Sinamsamda dagiti baka ken animal dagiti Midianita ken amin a sanikuada

10 sada pinuoran amin a siudad ken kampoda.

11 Inyawidda dagiti amin a sinamsamda, dagiti balud ken dagiti animal ket

12 impanda dagitoy kada Moises, Eleazar ken iti sangkagimongan ti Israel a nagkampo kadagiti tanap ti Moab iti ballasiw ti Jordan a sumango iti Jerico.

Agsubli ti Armada

13 Idi sumangpet ti armada, sinabat ida da Moises, Eleazar ken amin a papangulo iti sangkagimongan iti ruar ti kampo.

14 Kasta unay ti pungtot ni Moises kadagiti pangulo dagiti bunggoy dagiti rinibu ken dagiti bunggoy dagiti ginasut a soldado a nagsubli manipud iti paggugubatan.

15 Sinaludsodna kadakuada, “Apay a diyo pinapatay dagiti amin a babbai?

16 Diyokadi ammo ti inaramid dagiti babbai a namati kadagiti bilin ni Balaam? Insungsongda dagiti tattao a mangtallikud itiApoidi addada idiay Peor. Isuda ti nakaigapuan ti panagdissuor ti didigra kadagiti tattao tiApo.

17 Ngarud, patayenyo dagiti amin nga agtutubo a lallaki ken amin a babbai a nakikaidda iti lalaki.

18 Ngem yawidyo dagiti amin a babbai a di pay nakikaidda iti lalaki.

19 Ita, dakayo nga adda pinatayna wenno nakasagid iti bangkay, agyankayo iti ruar ti kampo iti las-ud ti pito nga aldaw. Iti maikatlo ken iti maika-7 nga aldaw, annongenyo ti seremonia ti pannakadalusyo ken dagiti babbai nga innalayo.

20 Annongenyo met ti seremonia ti pannakadalus dagiti amin a kawes ken amin a naaramid iti lalat, dutdot ti kalding wenno kayo.”

21 Kinuna ni Eleazar a padi kadagiti naggapu iti paggugubatan, “Dagitoy dagiti alagaden nga inted tiApoken ni Moises.

22-23 Masapul a magugoran dagiti amin nga alikamen a saan a mauram a kas iti balitok, pirak, bronse, landok, lata wenno buli babaen iti panaglasatda iti apuy. Maugasan dagiti amin a dadduma nga alikamen iti danum a nairanta a maaramat iti pannakadalus.

24 Iti maika-7 nga aldaw, labaanyo dagiti pagan-anayyo; kalpasanna, maibilangkayonton a nadalus ket mabalinyonton ti sumrek iti kampo.”

Ti Pannakabingay dagiti Nasamsam iti Gubat

25 Kinuna ni Yahweh ken ni Moises,

26 “Bilangenyo ken ni Eleazar a padi ti amin a nasamsam, agraman dagiti balud ken dagiti animal. Tumulong kadakayo dagiti pangulo ti sangkagimongan.

27 Guduaenyo dagiti amin a nasamsam. Kukua dagiti napan nakigubat ti maysa a kagudua ket kukua dagiti amin a tattao ti maysa a kagudua.

28 Iti pannakabagi dagiti soldado, mangilasinkayo iti agpaay itiApo: maysa iti tunggal 500 a balud, kasta met kadagiti baka, asno, karnero ken kalding.

29 Itedyo dagitoy ken ni Eleazar a padi a naisangsangayan a sagut itiApo.

30 Iti bingay dagiti tattao, mangalakayo iti maysa iti tunggal 50 a balud, kasta met kadagiti baka, asno, karnero ken kalding. Itedyo dagitoy kadagiti Levita nga agay-aywan iti Tolda ti Dios.”

31 Tinungpal da Moises ken Eleazar ti bilin ni Yahweh.

32-35 Daytoy ti listaan ti sinamsam dagiti soldado, malaksid laeng dagiti innalada nga agpaay kadakuada: 675,000 a karnero ken kalding, 72,000 a baka, 61,000 nga asno ken 32,000 a babbalasang.

36-40 Agdagup iti 337,500 a karnero ken kalding ti bingay dagiti soldado ket 675 ti daton ken ni Yahweh; 36,000 a baka ti bingay dagiti soldado ket 72 ti daton ken ni Yahweh; 30,500 nga asno ti bingay dagiti soldado ket 61 ti daton ken ni Yahweh; 16,000 a babbalasang ti bingay dagiti soldado ket 32 ti daton ken ni Yahweh.

41 Ngarud, inted ni Moises ken ni Eleazar dagiti buis a naisangsangayan a pannakabagi ni Yahweh kas imbilin ni Yahweh.

42-46 Agdagup iti 337,500 a karnero ken kalding, 36,000 a baka, 30,500 nga asno ken 16,000 a babbalasang ti bingay ti sangkagimongan. Kasta met ti bingay dagiti soldado.

47 Iti bingay dagiti tattao, nangala ni Moises iti maysa iti tunggal 50 a balud ken animal ket kas imbilin ni Yahweh, intedna ida kadagiti Levita nga agay-aywan iti Tolda ti Dios.

48 Napan ken ni Moises dagiti ofisiales a nangipangulo iti armada

49 ket imbagada, “Apo, binilangmi dagiti soldado nga impanguloanmi ket awan ti uray maysa kadakuada ti naksay.

50 Intugotmi dagiti sinamsammi nga alahas a balitok, kas iti putipot ti takiag, pulseras, singsing, aritos ken kuentas nga innalami. Idatagmi dagitoy itiApoa kas bayad ti biagmi tapno salaknibannakami.”

51 Inawat da Moises ken Eleazar amin dagitoy nga alahas a balitok.

52 Agdagup iti nasurok a 200 a kilo ti inted dagiti ofisiales.

53 Saan nga inted dagiti soldado dagiti sinamsamda.

54 Impan da Moises ken Eleazar dagiti balitok iti Tolda ti Dios a daton dagiti Israelita ken ni Yahweh.

Dagiti Tribu iti Daya ti Jordan

1 Adu ti baka dagiti tribu da Reuben ken Gad. Idi makitada ti daga ti Jazer ken Galaad a napintas a pagpastoran,

2 napanda ken ni Moises, Eleazar ken dagiti dadduma a pangulo dagiti tattao ket kinunada,

3-4 “Napintas a pagaraban ti baka dagiti ili ti Atarot, Dibon, Jazer, Nimra, Hesbon, Eleale, Sibma, Nebo ken Beon. Daytoy ti lugar a pinarmek tiApoa pagnaedan dagiti Israelita. Adu ti bakami

5 ket itedyo koma daytoy a daga a kas bingaymi. Pangngaasiyo ta didakam pagnaeden iti ballasiw ti Karayan Jordan.”

6 Insungbat ni Moises, “Kayatyo ti agyan ditoy idinto ta mapan makigubat dagiti padayo nga Israelita?

7 Apay nga upayenyo ida a bumallasiw iti Karayan Jordan tapno mapanda iti daga nga inted tiApokadakuada?

8 Kastati inaramid dagidi kapuonanyo idiay Kades Barnea idi imbaonko ida a mangwanawan iti daga.

9 Dimmanonda iti Tanap ti Escol ket nakitada ti daga ngem idi nagsublida inupayda dagiti tattao a mapan iti daga nga inted kadakuada tiApo.

10 Itidayta nga aldaw, nakapungtot tiApoket insapatana:

11 ‘Gapu ta dida nagtalinaed a napudno kaniak, awanto ti agtawen iti 20 wenno nasursurok a rimmuar iti Egipto a sumrek iti daga nga inkarik kada Abraham, Isaac ken Jacob.’

12 Awanto ti makastrek sadiay, malaksid ni Caleb nga anak ni Jefone a Kenezeo ken ni Josue nga anak ni Nun; nagtalinaedda a napudno itiApo.

13 Nakapungtot tiApokadagiti tattao ket pinagalla-allana ida iti let-ang iti las-ud ti 40 a tawen agingga a natay dayta a kaputotan a nagbasol kenkuana.

14 Ita, kayatyo a tuladen ti inaramid dagiti kapuonanyo. Kayatyo kadi nga agdissuor manen ti pungtot tiApoiti Israel? Dakeskayo la unay, dakayo a baro a kaputotan!

15 Dakayo iti tribu ni Ruben ken Gad, no diyo kayat ti sumurot ita itiApo, baybay-anna manen dagitoy a tattao iti let-ang ket dakayo ti akimbasol iti pannakadadaelda amin.”

16 Immasidegda ken ni Moises ket kinunada, “Mangbangonkami pay kadagiti pagaponan dagiti karneromi ken nasarikedkedan nga ili a pagnaedan dagiti familiami.

17 Kalpasanna, sisasaganakamton a kumuyog kadagiti padami nga Israelita iti paggugubatan ken mangipangulo iti iraraut agingga a maipanmi ida iti daga a naituding kadakuada. Kabayatanna, mabalin dagiti familiami ti agnaed ditoy kadagiti nasarikedkedan nga ili ket dinto an-anoen ida dagiti tattao iti daytoy a daga.

18 Dikamto agsubli no saan a matagikua dagiti dadduma nga Israelita ti daga a naipatawid kadakuada.

19 Saankaminton a makibingay iti daga iti ballasiw ti Jordan gapu ta adda bingaymin iti dayaen ti Jordan.”

20 Insungbat ni Moises, “No pudno ti saoyo, agsaganakayo ngarud a makigubat iti imatang tiApo.

21 Masapul a ballasiwen dagiti amin a soldadoyo ti Karayan Jordan ket babaen iti panangidalan tiApo, rautenda dagiti kabusortayo agingga a parmeken ida tiApo

22 ket tagikuaenna ti daga. Kalpasanna, mabalinyon ti agsubli gapu ta tinungpalyo ti rebbengenyo itiApoken kadagiti padayo nga Israelita. Bigbigento tiApoa kukuayo daytoy a daga iti daya ti Jordan.

23 Ngem no diyo tungpalen ti kariyo, ipakpakaunak nga agbasolkayo itiApo. Uray kitaenyo, awan duadua a madusakayto gapu iti basolyo.

24 Sige, bangonenyo dagiti iliyo ken dagiti pagaponan dagiti karneroyo ngem tungpalenyo ti inkariyo.”

25 Kinuna dagiti lallaki iti tribu da Gad ken Ruben, “Apo, tungpalenmi ti bilinmo.

26 Agbati kadagiti ili ti Galaad dagiti assawa ken annakmi ken dagiti baka ken karneromi.

27 Ngem sisasaganakami amin a makigubat iti babaen ti panangidalan tiApo. Bumallasiwkami iti Jordan a mapan makigubat kas iti kinunam.”

28 Ngarud,imbilin ni Moises kada Eleazar, Josue, ken kadagiti dadduma a pangulo ti Israel,

29 “No ballasiwen dagiti tattao iti tribu da Gad ken Ruben ti Karayan Jordan a sisasagana a makigubat iti panangidalan tiApoket no babaen iti tulongda, maparmekyo ti daga, itedyo ngarud ti daga ti Galaad a tagikuaenda.

30 Ngem no dida bumallasiw tapno tulongandakayo a makigubat, masapul a makibingayda kadakayo iti daga ti Canaan.”

31 Kinuna dagiti lallaki iti tribu da Gad ken Ruben, “Apo, tungpalenmi ti imbilin tiApo.

32 Iti babaen ti panangidalanna, bumallasiwkami iti Jordan a mapan iti daga ti Canaan ket makigubatkami tapno mapagtalinaedmi ti dagami ditoy daya ti Jordan.”

33 Iti kasta, inted ni Moises kadagiti tribu da Gad ken Ruben ken iti kagudua ti tribu ni Manases ti amin a daga a sakup ni Sihon nga ari dagiti Amorreo ken ni Og nga ari ti Basan, agraman dagiti kabangibang nga ili ken away.

34 Binangon manen ti tribu ni Gad dagiti nasarikedkedan nga ili ti Dibon, Atarot, Aroer,

35 Atrot Sofan, Jazer, Jogbeha,

36 Bet Nimra, ken Bet Haran.

37 Binangon manen ti tribu ni Ruben dagiti ili ti Hesbon, Eleale, Kiriataim,

38 Nebo, Baal Meon (nabaliwan daytoy a nagan) ken Sibma. Inikkanda ti baro a nagan dagiti ili a binangonda manen.

39 Rinaut dagiti kaputotan ni Makir nga anak ni Manases ti daga ti Galaad. Sinakupda ti daga ket pinagtalawda dagiti Amorreo nga agnaed sadiay.

40 Inted ni Moises ti daga ti Galaad kadagiti kapuonan ni Makir ket nagnaedda sadiay.

41 Rinaut ken sinakup ni Jair iti tribu ni Manases ti sumagmamano a barrio ket pinanagananna ida iti Barbarrio ni Jair.

42 Rinaut ken sinakup ni Noba ti Kenat ken dagiti barriona ket pinanagananna ti ili iti Noba nga impasurot iti naganna.

Dagiti Nagkampoan ti Israel manipud Egipto agingga idiay Moab

1 Nailanad iti daytoy a listaan dagiti nagan dagiti lugar a nagkampoan dagiti Israelita kalpasan ti ipapanawda idiay Egipto iti babaen ti panangipangulo da Moises ken Aaron.

2 Insurat ni Moises ti nagan ti lugar a pagkampoanda, kas imbilin ni Yahweh.

3 Pimmanaw dagiti Israelita idiay Egipto iti maika-15 nga aldaw iti umuna a bulan ti tawen, ti aldaw kalpasan ti umuna a Fiesta ti Paskua. Babaen iti panangaywan ni Yahweh, pimmanawda iti siudad ti Rameses iti imatang dagiti Egipcio.

4 Madama idi nga itabtabonda dagiti annakda nga inauna a pinatay ni Yahweh. Iti panangaramid ni Yahweh iti daytoy, impakitana a nabilbileg ngem dagiti didiosen ti Egipto.

5 Pimmanaw dagiti Israelita iti Rameses ket nagkampoda idiay Succot.

6 Manipud iti Succot, napanda iti Etam iti igid ti let-ang.

7 Manipud iti Etam, nagsublida idiay Pihahirot iti dayaen ti Baal Sefon sada nagkampo iti asideg ti Migdol.

8 Manipud iti Pihahirot, bimmallasiwda iti Nalabaga a Baybay sada nagturong iti let-ang. Kalpasan ti tallo nga aldaw a pannagnada iti let-ang ti Etam, nagkampoda idiay Mara.

9 Manipud iti Mara, napanda idiay Elim a nagkampoanda agsipud ta adda 12 nga ubbog ken 70 a palma sadiay.

10 Pimmanawda iti Elim ket nagkampoda iti asideg ti Nalabaga a Baybay.

11 Idiay let-ang ti Sin ti simmaruno a nagkampoanda.

12 Kalpasanna, nagkampoda idiay Dofka

13 sa idiay Alus.

14 Pimmanawda idiay Alus ket napanda idiay Refidim, iti lugar nga awan danum nga inumenda.

15-37 Manipud Refidim agingga idiay Bantay Hor, nagkampoda kadagitoy a lugar: iti Let-ang ti Sinai, Kibrot Hataava, Hazerot, Ritma, Rimmon Perez, Libna, Rissa, Kehelata, Bantay Sefer, Harada, Makelot, Tahat, Tera, Mitka, Hasmona, Moserot, Bene Jaakan, Hor Haggidgad, Jotbata, Abrona, Eziongeber, ti let-ang ti Zin (kayatna a sawen, Kades) ken Bantay Hor iti igid ti daga ti Edom.

38-39 Kasimbilin ni Yahweh, simmang-at ni Aaron a padi iti Bantay Hor. Natay sadiay ni Aaron iti umuna nga aldaw iti maikalima a bulan iti maika-40 a tawen kalpasan ti ipapanaw dagiti Israelita idiay Egipto. Agtawen idi iti 123 ni Aaron.

40 Nadamagti ari ti Arad iti akin-abagatan a Canaan a sumungad dagiti Israelita.

41-49 Manipud Bantay Hor agingga iti tanap ti Moab, nagkampo dagiti Israelita kadagitoy a lugar: Zalmona, Punon, Obot, dagiti rebba ti Abarim iti sakup ti Moab, Dibon Gad, Almon Diblataim, Bantay Abarim iti asideg ti Bantay Nebo, ken iti tanap ti Moab iti ballasiw ti Karayan Jordan a sumango iti Jerico, iti nagbaetan ti Bet Jesimot ken ti Tanap ti Acacia.

Ti Bilin ni Yahweh kadagiti Israelita sakbay a Bumallasiwda

50 Idi addada iti tanap ti Moab iti ballasiw ti Jordan iti sangoanan ti Jerico, inted ni Yahweh ken ni Moises

51 dagitoy nga alagaden dagiti Israelita: “Inton makaballasiwkayon iti Jordan ket addakayon iti Canaan,

52 masapul a papanawenyo dagiti amin nga agnaed iti dayta a daga. Dadaelenyo dagiti bato ken metal a didiosenda ken amin a lugar a pagdaydayawanda.

53 Sakupenyo ti daga ket agnaedkayo sadiay agsipud ta itedko dayta kadakayo.

54 Bingbingayenyoti daga babaen iti binnunot ket itedyo kadagiti nadumaduma a tribu ken kaputotan. Nalawa ti bingay ti dakkel a tribu ket bassit met ti bingay ti bassit a kapuonan.

55 Ngem no diyo pagtalawen dagiti agnaed iti daga, mayarigto dagiti mabati a kas puling kadagiti matayo ken kas sisiit kadagiti bakrangyo ket gubatendakayto.

56 Panggepko a dadaelen ida ngem no diyo pagtalawen ida, dakayo ti dadaelek a saan ket nga isuda.”

Dagiti Beddeng ti Daga

1 Inted ni Yahweh ken ni Moises

2 dagitoy nga alagaden nga agpaay kadagiti Israelita: “Inton sakupenyo ti Canaan nga itedko kadakayo, dagitoyto ti beddeng ti dagayo:

3 Mangrugi ti akin-abagatan a beddeng iti let-ang ti Zin agingga iti beddeng ti Edom. Mangrugi iti akindaya a paset ti akin-abagatan a pungto ti Natay a Baybay.

4 Agsikko ti beddeng nga agpa-abagatan nga agturong iti Bessang ti Akrabbim ket dumanon iti Zin agingga iti abagatan idiay Kades Barnea. Agtuloy iti amianan-a-laud agingga iti Hazar Addar sa aglayon iti Azmon.

5 Sadiay, agsikko nga agturong iti tanap iti beddeng ti Egipto agingga idiay Mediterranean.

6 “Ti Taaw Mediterranean ti akinlaud a beddeng.

7 “Mangrugi ti akin-amianan a beddeng iti Taaw Mediterranean agingga iti Bantay Hor

8 ket aglayon iti Bessang ti Hamat. Aglayon iti Zedad

9 sa idiay Zifron ket agpatingga idiay Hazar Enan.

10 “Mangrugi ti akindaya a beddeng iti Hazar Enan agingga iti Sefam.

11 Agpa-abagatan nga agturong idiay Harbel, iti dayaen ti Ain sa aglayon kadagiti katurturodan iti akindaya nga igid ti Dan-aw ti Galilea.

12 Aglayon iti igid ti Karayan Jordan agingga iti Natay a Baybay. Daytoy ti beddeng ti dagayo iti aglawlaw.”

13 Imbagani Moises kadagiti Israelita, “Daydiay ti daga nga ited tiApokadagiti siam ket kagudua a tribu; mabingbingay babaen iti binnunot.

14 Addan daga a naited kadagiti tribu da Ruben ken Gad ken ti kagudua a tribu ni Manases

15 iti ballasiw ti Jordan iti bangirna iti daya a kasumbangir ti Jerico.”

Dagiti Pangulo a Nangbingbingay iti Daga

16 Kinuna ni Yahweh ken ni Moises,

17 “Tarawidwidan da Eleazar a padi ken Josue nga anak ni Nun ti pannakabingbingay iti daga.

18 Mangpilika met iti tunggal tribu iti maysa a pangulo a tumulong kadakuada.

19 Dagitoy dagiti natudingan: ni Caleb nga anak ni Jefone, iti tribu ni Juda;

20 ni Semuel nga anak ni Amiud, iti tribu ni Simeon;

21 ni Elidad nga anak ni Kislon, iti tribu ni Benjamin;

22 ni Bukki nga anak ni Jogli, iti tribu ni Dan;

23 ni Haniel nga anak ni Efod, iti tribu ni Manases;

24 ni Kemuel nga anak ni Ziftan, iti tribu ni Efraim;

25 ni Elizafan nga anak ni Parnak, iti tribu ni Zabulon;

26 ni Paltiel nga anak ni Azan, iti tribu ni Issacar;

27 ni Ahihud nga anak ni Selomi, iti tribu ni Aser;

28 ken ni Padahel nga anak ni Amiud, iti tribu ni Neftali.”

29 Dagitoy dagiti dinutokan ni Yahweh a mangbingay iti sanikua nga agpaay kadagiti Israelita iti daga ti Canaan.

Dagiti Siudad a Maited kadagiti Levita

1 Idiaddada iti tanap ti Moab iti ballasiw ti Jordan iti asideg ti Jerico, kinuna ni Yahweh ken ni Moises,

2 “Ibagam kadagiti Israelita nga ibingayanda dagiti Levita iti daga nga inawatda. Ikkanda ida kadagiti bukodda a siudad ken iti pagpastoranda iti asideg dagiti siudad.

3 Agnaedto dagiti Levita kadagitoy a siudad ket agpaayto kadagiti baka ken dadduma nga animalda dagiti pagpastoran.

4 Mangrugi dagitoy a pagpaaraban iti bakud dagiti siudad ket agpatingga iti 450 a metro iti ruar iti aglawlaw ti tunggal siudad.

5 Masapul a marukod tapno adda 900 a metro kuadrado a lugar iti aglawlaw ket adda ti siudad iti tengnga.

6 Ikkanyo dagiti Levita iti innem a siudad a pagkamangan ti tao a pumatay a dina inggagara. Malaksid kadagitoy, ikkanyo pay ida iti 42 a siudad.

7 Agdagup amin dagitoy a siudad iti 48 agraman dagiti pagpastoranda.

8 Ti kalawa ti daga iti tunggal tribu ti pakaibatayan no mano a siudad ti maited kadagiti Levita.”

Dagiti Siudad a Pagkamangan

9 Imbilinni Yahweh ken ni Moises

10 nga ibagana daytoy kadagiti Israelita: “Inton makaballasiwkayon iti Karayan Jordan ket sumrekkayo iti daga ti Canaan,

11 mangpilikayo kadagiti siudad a mabalin a pagkamangan ti maysa a tao a makapatay a dina inggagara.

12 Sadiay, saanto a suroten ti kabagian ti napapatay nga agpanggep a mangbales kenkuana. Saan a mapapatay ti naidarum iti pammapatay no saan a mausig iti imatang dagiti tattao.

13 Mangpilikayo iti innem a siudad,

14 tallo iti daya ti Jordan ket tallo met iti daga ti Canaan.

15 Agserbinto dagitoy a siudad a pagkamangan dagiti Israelita wenno dagiti ganggannaet a temporario wenno permanente nga agnaed iti maysa nga ili. Mabalin nga agpakni ti maysa a makapapatay a dina inggagara iti maysa kadagitoy a siudad.

16-18 “Ngem no landok wenno bato wenno kayo ti usaren ti maysa a tao a pangpatay iti sabali, maibilang a mammapatay ket masapul a mapapatay.

19 Ti kaasitgan a kabagian ti natay ti akin-akem a mangpatay iti mammapatay iti sadinoman a pakasarakanna kenkuana.

20 “No adda gura ti maysa a tao iti padana a tao ket mapatayna babaen iti panangiduron wenno panangbarsak

21 wenno panangdanogna kenkuana maibilang a mammapatay ket masapul a mapapatay. Adda kalintegan ti kaasitgan a kabagian ti natay a mangpapatay kenkuana iti sadinoman a pakasarakanna.”

22 “Ngem ti siasinoman a makapatay a dina inggagara, babaen man iti panangiduronna iti tao a dina kagurgura wenno panangbarsakna kenkuana;

23 wenno adda ibatona ket mapuntaanna a dina nakita ti maysa a tao a dina panggep a dangran ket dina kabusor dayta a tao,

24 ipaulog ti sangkagimongan ti sentensia a mangpabor iti nakapatay.

25 Saanna a baybay-an iti ima ti kabagian ti napapatay nga agpanggep a mangpatay kenkuana. Isublida ti tao iti siudad a pagkamangan a nagpaknianna ket agtalinaed sadiay agingga iti ipapatay ti Kangatoan a Padi.

26 No aglibas iti siudad a nagkamanganna,

27 ket patayen ti kabagian ti natay, saan a maibilang a pammapatay daytoy a panagibales.

28 Masapul nga agtalinaed iti siudad a pagkamangan ti tao a nakapapatay ket sananto la mabalin ti agawid kalpasan ti ipapatay ti Kangatoan a Padi.

29 Agpaay daytoy nga alagaden kadakayo ken kadagiti kaputotanyo iti sadinoman a pagnaedanyo.

30 “Masapulti dua wenno nasursurok a saksi tapno masentensiaan ken mapapatay ti naidarum iti pammapatay; saan nga umanay ti maysa a saksi tapno masentensiaan ti maysa a tao iti pammapatay.

31 Mapapatay ti siasinoman a makabasol iti pammapatay ket dina mabalin a subboten ti biagna babaen iti kuarta; rumbeng a mapapatay met.

32 Diyo ipalubos nga agbayad ti napan iti siudad a pagkamangan tapno mabalinna ti agawid iti balayna sakbay ti ipapatay ti Kangatoan a Padi.

33 No aramidenyo daytoy, tulawanyo ti daga a pagnanaedanyo. Gapu iti pammapatay, matulawan ti daga ket saan a madalusan no saan a maiparukpok ti dara ti tao a pimmatay.

34 Diyo tulawan ti daga a pagnanaedanyo agsipud ta siak ngaApomakipagnaedak kadagiti Israelita.”

Ti Tawid dagiti Babbai a Naasawaan

1 Naguummong dagiti pangulo iti tunggal familia iti kaputotan ni Galaad nga anak ni Makir ken apoko ni Manases nga anak ni Jose. Dimmatagda ken ni Moises ken kadagiti dadduma a pangulo

2 ketkinunada, “Binilinnakayo tiApoa bingayenyo ti daga babaen iti binnunot ket ibunongyo kadagiti Israelita. Imbilinna pay nga itedyo ti sanikua ni Selofehad a kabagianmi kadagiti annakna a babbai.

3 Ngem laglagipenyo a no makiasawada iti saanda a katribuan, alaen dayta a tribu ti dagada ket bumassit ti tawidmi.

4 Inton dumteng ti Tawen a Panagisubli ket maisubli dagiti amin a nailako a sanikua kadagiti sigud nga akinkukua, mainayonto ti bingay dagiti annak ni Selofehad iti daga ti tribu a nakayasawaanda. Iti kasta, agnanayon a kukuadan ti daga ket maibilang a pukaw ti tribumi.”

5 Ngarud, inted ni Moises daytoy a bilin ni Yahweh kadagiti Israelita. Kinunana, “Pudno ti kuna dagiti tattao iti tribu ni Manases.

6 Ibilin ngarud tiApoa nawaya dagiti annak ni Selofehad a makiasawa iti siasinoman no la ket katribuanda.

7 Saan a mabalin nga alaen ti sabali a tribu ti daga ti sabali a tribu.

8 Ket ti babai nga adda tawidna a daga iti tribuna, masapul a makiasawa iti katribuanna tapno pagtitinnawidan dagiti Israelita ti sanikua dagiti kapuonanda.

9 Saan a mabalin a mayakar ti bingay ti tribu iti sakup ti sabali a tribu. Agtalinaed a kukua ti tribu ti bukodna a daga.”

10-11 Tinungpal da Maala, Tirza, Hogla, Milca ken Noa nga annak ni Selofehad ti bilin tiApoken ni Moises. Nakiasawada kadagiti kakasinsinda

12 a kameng iti tribu ni Manases nga anak ni Jose ket nagtalinaed ti sanikuada iti tribu ti amada.

13 Dagitoy dagiti alagaden ken linteg nga inted ni Yahweh ken ni Moises nga agpaay kadagiti Israelita iti tanap ti Moab iti ballasiw ti Jordan iti batog ti Jerico.