Author: admin

Ni David ken ni Siba

1 Idimakaadayo bassit ni David iti tapaw ti turod, pagammoan ta sinabat ni Siba nga adipen ni Mefiboset. Adda dua nga asnona a nagkarga iti dua gasut a tinapay, sangagasut a karaay a pasas, sangagasut a kapurpuros a frutas ken maysa a supot a lalat a napno iti arak.

2 Sinaludsod ti ari kenkuana, “Ania ti pangipaayam kadagitoy, Siba?”

Insungbat ni Siba, “Agpaay dagiti asno a pagsakayan ti familiam, Natan-ok nga Ari. Agserbi kadagiti soldado dagiti tinapay ken dagiti frutas, ket inumenda met ti arak no mabannogda iti let-ang.”

3 “Sadinoti ayan ni Mefiboset, ti apoko ni Saul nga apom?” sinaludsod kenkuana ti ari.

“Nagbati idiay Jerusalem ta kapkapnekanna nga isubli dagiti Israelita kenkuana ti pagarian daydi apongna a Saul,” insungbat ni Siba.

4 Kinuna ti ari ken ni Siba, “Kukuamon dagiti amin a sanikua ni Mefiboset.”

“Siak ti adipenmo,” kinuna ni Siba. “Sapay koma ta maikariak iti panagtalekmo.”

Ni David ken ni Simei

5 Idi dumteng ni Ari David idiay Bahurim, maysa kadagiti kakabagian ni Saul, ni Simei nga anak ni Gera, ti simmabat a mangilunlunod kenkuana bayat ti isusungadna.

6 Binatobatona ni David ken dagiti ofisialesna nupay nalikmut ni David kadagiti tattao ken guardia-na.

7 Inlunod ni Simei a kunana, “Pumanawka! Pumanawka! Mammapatay! Kriminal!

8 Inagawmo ti pagarian ni Saul, ket ita, dusdusaennaka tiApoiti panangpapataymo iti adu a kameng ti familia ni Saul. Inteden tiApoti pagarian ken ni Absalom nga anakmo. Iti kamaudianna, nagbayadka met la ti utangmo, ta mammapatayka!”

9 Kinuna ni Abisai nga anak ni Zeruyas, “Natan-ok nga Ari, apay nga ipalubosmo nga ilunodnaka daytoy natay nga aso? Palubosannak man ta innak putolan!”

10 Ngem kinuna ni David kada Abisai ken Joab a kabsatna, “Saankayo a makibiang, dakayo nga annak ni Zeruyas. Ilunlunodnak ta dayta ti bilin tiApo. Awan ti kalintegan ti siasinoman nga agsaludsod no apay a kasta ti aramidenna.”

11 Kinuna ni David ken ni Abisai ken kadagiti ofisialesna, “Kayatnak a patayen ti anakko, ket dikay ngarud masdaaw iti ar-aramiden daytoy a Benjaminita. Imbilin tiAponga ilunodnak, isu a baybay-anyo ket palubosanyo nga aramidenna.

12 Nalabit a makita tiApoti panagtutuokkoket bendisionannak a supapak dagitoy a pannakailunodko.”

13 Intuloy ni David ken dagiti tattaona ti nagna idinto a napan ni Simei iti bakras ti turod. Agilunlunod, agipurpuruak iti bato ken tapok bayat ti pannagnana.

14 Nabannog ti ari ken dagiti kakaduana idi makadanonda idiay Jordanket naginanada sadiay.

Ni Absalom idiay Jerusalem

15 Simrek ni Absalom ken dagiti amin nga Israelita idiay Jerusalem; kaduada ni Ahitofel.

16 Idi masabat ni Cusai a matalek a gayyem ni David, impukkawna, “Agbiag ni Absalom! Agbiag ti Ari!”

17 Sinaludsod ni Absalom, “Kastoy kadi ti panangipakitam iti kinapudnom ken ni David a gayyemmo? Apay a dika simmurot kenkuana?”

18 Simmungbat ni Cusai, “Kasano a sumurotak kenkuana? Kayatko ti agpaay iti pinili tiApo, kadagitoy a tattao ken kadagiti amin nga Israelita. Sumurotak kenka.

19 Saan kadi a rumbeng laeng a pagserbiak ti anak ti apok? Kas iti panagserbik iti amam, ita, agserbiak met kenka.”

20 Kinuna ni Absalom ken ni Ahitofel, “Ita ta addatayo ditoy, ania ti maibalakadmo nga aramidentayo?”

21 Kinuna ni Ahitofel, “Kaiddaem dagiti kamalala ni amam nga imbatina a mangaywan iti palasio. Inton madamag dagiti amin nga Israelita a nagbalinka a kabusor ni amam, ad-addanto a tumured dagiti pasurotmo.”

22 Nangbangondangarud iti tolda a para ken ni Absalom iti tuktok ti palasio. Ket kinaidda ni Absalom dagiti kamalala ni amana tapno makita dagiti amin nga Israelita.

23 Kadagidi a panawen, patien dagiti tattao ti aniaman a balakad ni Ahitofel. Ibilangda ti saona a kas sao ti Dios. Tungpalen met da David ken Absalom ti balakadna.

Allilawen ni Cusai ni Absalom

1 Iti saan a nabayag kalpasan daytoy a pasamak, kinuna ni Ahitofel ken ni Absalom, “Palubosannak a pumili iti 12,000 a tattao, ta kamatenmi ni David ita a rabii.

2 Darupek inton nabannog ken naupayen. Maklaatto ket agtatarayto dagiti amin a tattaona. Tinto la ari ti papatayek.

3 Kalpasanna, isublikto kenka dagiti amin a tattaona a kas iti panagsubli ti nobia iti asawana. Maymaysa laeng a tao ti kayatmo a patayen.Saanto a maan-ano dagiti tattao.”

4 Naallukoy ni Absalom ken dagiti amin a pangulo dagiti Israelita iti daytoy a balakad.

5 Kinuna ni Absalom, “Ayabanyo ni Cusai ket denggentayo met no ania ti masaona.”

6 Idi dimteng ni Cusai, imbaga ni Absalom kenkuana ti sao ni Ahitofel. Sinaludsodna, “Tungpalenmi kadi ti patigmaan ni Ahitofel? No saan, ibagam ti aramidenmi!”

7 Simmungbat ni Cusai, “Saan a nasayaat ita ti patigmaan ni Ahitofel.

8 Ammom a beterano a mannakigubat ni amam ken dagiti tattaona. Narungsotda a kas iti ina nga oso a natakaw dagiti urbonna. Nairuam ni amam iti gubat ket saan a matmaturog iti ayan dagiti tattaona iti rabii.

9 Kinapudnona, uray kadagitoy a kanito, mabalin nga aglemlemmeng iti maysa a rukib wenno iti sabali a lugar. Apaman a darupen ni David dagiti tattaom ket adda makadamag iti daytoy, kunadanto a naparmek dagiti tattaom.

10 Uray ti soldado a natured a kas iti leon, tumakrotto, ta ammo dagiti amin nga Israelita a maingel iti gubat ni amam ket mannakigubat dagiti tattaona.

11 Kastoy ti balakadko: ummongem amin nga Israelita manipud Dan agingga iti Beerseba. Aduda a kas iti darat iti igid ti baybay, ket sika a mismo ti mangidaulo kadakuada iti paggugubatan.

12 Sarakentayo ni amam iti sadinoman a yanna, ket darupentayo sakbay a maammoanna no ania ti mapaspasamak. Saanto a makalasat, kasta met dagiti tattaona.

13 No agkamang iti maysa a siudad, mangipanto dagiti tattaotayo kadagiti tali ket guyodenda ti siudadsada itappuak iti maysa a derraas. Awanto ti uray maysa a bato a mabati iti tapaw ti turod.”

14 Kinuna ni Absalom ken amin nga Israelita, “Nasaysayaat ti patigmaan ni Cusai ngem ti patigmaan ni Ahitofel.” Inkeddeng tiApoa saan a masurot ti nasayaat a patigmaan ni Ahitofel tapno dumteng ti didigra ken ni Absalom.

Mapakdaaran ni David ket Aglibas

15 Imbaga ni Cusai kada Zadok ken Abiatar a papadi ti impatigmaan ni Ahitofel ken ni Absalom ken kadagiti papangulo dagiti Israelita. Imbagana met ti impatigmaanna ken ni Absalom.

16 Innayon pay ni Cusai, “Ita, dagdagusenyo ti mangibaon iti mapan ken ni David ket ballaaganyo a saan nga umian kadagiti pagballasiwan iti karayan iti let-ang ngem darasenna ketdi ken dagiti tattaona ti bumallasiw iti Jordan tapno dida matiliw ken mapapatay.”

17 Iti ruar ti Jerusalem, agur-uray ni Jonatan nga anak ni Abiatar ken ni Ahimaas nga anak ni Zadok iti ubbog ti Enrogel gapu ta saanda a kayat a makitada ida iti siudad. Masansan a mapan kadakuada ti maysa nga adipen a babai ket ipakaammona ti aniaman a mapaspasamak iti siudad. Mapanda met ipulong ken ni Ari David ti naibaga kadakuada.

18 Ngem iti maysa nga aldaw, adda ubing a lalaki a nakakita kadakuada, ket impulongna ken ni Absalom. Dinagdagusda ngarud ti napan naglemmeng iti balay ti maysa a tao idiay Bahurim. Adda bubon iti asideg ti balayna, ket bimmabada sadiay.

19 Nangala ti asawa ti lalaki iti maysa a kalub sana kinaluban ti ngarab ti bubon. Winarasanna iti bukel ti inkalubna tapno awan ti makadlaw.

20 Dimteng dagiti ofisiales ni Absalom iti balay ti babai ket sinaludsodda kenkuana no sadino ti ayan da Ahimaas ken Jonatan. Insungbatna a bimmallasiw dagiti dua iti karayan. Nagbirok dagiti ofisiales ngem idi dida masarakan da Jonatan ken Ahimaas, nagsublida idiay Jerusalem.

21 Idi nakapanawen dagiti ofisiales, rimmuar da Ahimaas ken Jonatan iti bubon ket napanda nagipadamag ken ni Ari David. Imbagada kenkuana ti plano ni Ahitofel a maibusor kenkuana sada kinuna, “Darasem ti bumallasiw iti karayan.”

22 Binallasiw ngarud ni David ken dagiti amin a tattaona ti Jordan. Aglawagen idi makaballasiw.

23 Idi makita ni Ahitofel a saan a nasurot ti patigmaanna, sinilyaanna ti asnona ket nagawid iti ilina. Intedna ti maudi a bilinna kadagiti kabbalayna sa nagbitay. Naitabon iti lugar a pagitantaneman ti familiana.

24 Idi nakaballasiwen da Absalom ken dagiti tattaona iti Jordan, nakadanonen ni David iti ili ti Mahanaim. (

25 Ni Amasa ti dinutokan ni Absalom a mangsukat ken ni Joab a mangipangulo iti armada. Ni Jeter nga Ismaelitati amana; ni Abigail nga anak ni Naas ken kabsat ni Zeruyas nga ina ni Joab ti inana.)

26 Nagkampo ni Absalom ken dagiti Israelita iti daga ti Galaad.

27 Idi dumteng da David iti Mahanaim, sinabat ni Sobi nga anak ni Naas a taga-siudad ti Rabba idiay Ammon, ni Nakir nga anak ni Ammiel a taga-Lodebar ken ni Barzillai a taga-Rogelim idiay Galaad.

28-29 Nangyegda kadagiti malukong, banga ken pagiddaan, kasta met kadagiti taraon nga agpaay ken ni David ken kadagiti tattaona: trigo, sebada, iniruban, bukel ti utong, patani,diro, keso, mantikilia, ken sumagmamano a karnero. Ammoda a mabisin, mawaw ken nabannogen da David ken dagiti tattaona iti let-ang.

Maparmek ken Mapapatay ni Absalom

1 Pinagtitipon ni Ari David dagiti amin a tattaona sana binunggo-bunggoy ida iti sagsangaribu ken sagsangagasut. Nangdutok iti maysa nga ofisial iti tunggal bunggoy.

2 Kalpasanna, imbaonna ida iti tallo a grupo. Saggaysa ti bunggoy nga indauloan ni Joab, ni Abisai a kabsatna ken ni Ittai a taga-Gat. Imbaga ti ari kadagiti tattaona, “Kumuyogak kadakayo.”

3 “Agbatika laengen iti siudad,” kinunada. “No kapilitan nga agsanud ken agtataraykami wenno uray matay ti kagudua kadakami—awan ti pategna iti kabusor. Ngem 10,000 a tattao ti kaibatogam. Nasaysayaat no mabatika ta patulodannakam iti tulong no kasapulan.”

4 “Aramidek ti aniaman nga ipagarupyo a nasayaat,” insungbat ti ari. Kalpasanna, nagtakder iti abay ti ruangan bayat ti ilalabas dagiti tattaona a nabunggo-bunggoy iti sagsangaribu ken sagsangagasut.

5 Imbilinna kada Joab, Abisai ken Ittai: “Ipagpapagapuyo kaniak a diyo dangran ni agtutubo nga Absalom.” Nangngeg dagiti amin a soldado ti bilin ni David kadagiti ofisialesna.

6 Nagturong ti armada ni David iti tay-ak ket nakirangetda kadagiti Israelita iti kabakiran ni Efraim.

7 Naparmek dagiti Israelita. Nakaro ti sinagabada iti pannakaparmekda: napapatay ti 20,000 a tattao iti dayta nga aldaw.

8 Nagsaknap ti gubat iti away ket ad-adu ti natay iti kabakiran ngem iti paggugubatan.

9 Pagammoan, nasabat ni Absalom ti sumagmamano a soldado ni David. Sisasakay ni Absalom iti mulo ket idi lumasat ti animal iti sirok ti maysa a dakkel a lugo, naisalat ti ulo ni Absalom kadagiti sanga ti kayo. Naglaylayon a nagtaray ti mulo ngem nabati a sibibitin ni Absalom.

10 Maysa a tao ni David ti nakakita iti napasamak ket impadamagna ken ni Joab, “Apo, nakitak ni Absalom a sibibitin iti maysa a lugo.”

11 Insungbat ni Joab, “Nakitam ni Absalom? Apay a dimo pinatay a dagus? Gunggonaanka koma iti sangapulo a bagi ti pirak ken maysa a sinturon.”

12 Ngem kinuna ti lalaki, “Uray no ikkannak iti sangaribu a bagi ti pirak, diak la ketdi dangran ti anak ti ari. Nangngegmi amin a binilinnakayo ti ari—dakayo kada Abisai ken Ittai: ‘Diyo dangran ni agtutubo nga Absalom; ipagpagapuyo kaniak.’

13 Ngem no sinukirko ti bilin ti ari ket pinatayko ni Absalom, madamagto ti ari—ta awan duadua a madamagna ti amin—ket dinakto met la salakniban.”

14 “Diak dadaelenen ti tiempok kenka,” kinuna ni Joab. Nangala iti tallo a gayang ket induyokna iti barukong ni Absalom nupay sibibiag pay laeng a sibibitin iti kayo a lugo.

15 Kalpasanna, sangapulo met a soldado ni Joab ti nanglawlaw ken ni Absalom ket inuloyanda.

16 Imbilin ni Joab ti pannakapuyot ti trumpeta tapno agsardeng ti gubat ket nagsubli dagiti soldadona iti panangsunsonda kadagiti Israelita.

17 Innalada ti bangkay ni Absalom. Impisokda iti nauneg nga abut iti kabakiran sada ginaburan iti dadakkel a bato. Nagtataray met dagiti Israelita a nagkamang kadagiti balbalayda.

18 Idi sibibiag pay ni Absalom, nangipatakder iti baton-lagip iti Tanap ti Ari gapu ta awan ti lalaki nga anakna a mangtaginayon iti naganna. Iti kasta, impasurotna iti naganna ket agingga ita, maaw-awagan iti Baton-lagip ni Absalom.

Maipadamag ken ni David ti Ipapatay ni Absalom

19 Kalpasanna, kinuna ni Ahimaas nga anak ni Zadok, “Palubosannak ta innak a dagus ipadamag iti ari ti panangispal kenkuana tiApokadagiti kabusorna.”

20 “Saanka a mapan,” kinuna ni Joab. “Awan ti naimbag a damag nga ipakaammom ita nga aldaw. Mabalinmo ti mapan iti sabali nga aldaw ngem saan nga ita agsipud ta natay ti anak ti ari.”

21 Kinuna ni Joab iti tagabuna a taga-Etiopia, “Inka ibaga iti ari ti nakitam ita nga aldaw.” Nagkurno ti tagabu ket kalpasanna, nagtaray a napan.

22 Impapilit ni Ahimaas, “Uray ania ti mapasamak, pangngaasim ta idanonko met ti damag.”

“Apay a kayatmo ti mapan, anakko?” kinuna ni Joab. “Awanto met la ti magunggonam.”

23 “Uray ania ti mapasamak,” kinuna manen ni Ahimaas, “kayatko ti mapan.”

“Sige, inka ngaruden,” kinuna ni Joab.

Nagtaray ni Ahimaas a napan iti kalsada, linasatna ti Tanap ti Jordan ket iti saan a mabayag, linabsanna ti taga-Etiopia.

24 Agtugtugaw idi ni David iti nagbaetan ti ruangan a sumrek iti siudad ken ti ruangan a rummuar ti siudad. Immuli ti agwanwanawan iti tuktok ti bakud ket nagtakder iti atep ti pagserkan. Timman-aw ket nakitana ti lalaki nga agtartaray a maymaysana.

25 Nagpukkaw ket imbagana iti ari ti nakitana. “No is-isuna,” kinuna ti ari, “adda naimbag a damag nga umayna ipakaammo.” Umasideg nga umasideg ti agtartaray a lalaki.

26 Bayat ti yaasideg ti agtartaray, nakita ti agwanwanawan nga adda sabali a lalaki nga agtartaray nga is-isuna ket impukkawna iti guardia ti ruangan, “Kitaem! Adda man umay a sabalin!”

Insungbat ti ari, “Mangyeg met daytoy iti naimbag a damag.”

27 Kinuna ti agwanwanawan, “Awan duadua a ni Ahimaas ti umuna a lalaki; kasta ti panagtarayna.”

“Naimbag dayta a tao,” kinuna ti ari, “ket mangyeg iti naimbag a damag.”

28 Kinablaawan ni Ahimaas ti ari, nagrukob iti sangoananna sana kinuna, “Madaydayaw tiApoa Diosmo a nangparmek kadagiti tattao nga immalsa a maibusor kenka.”

29 “Kumusta ni agtutubo nga Absalom? Awan met la nakaan-anoanna?” sinaludsod ti ari.

“Apo, itay imbaonnak ni Joab, adda nadlawko a dakkel a riribuk ngem diak ammo no ania daydiay,” insungbat ni Ahimaas.

30 Imbaga ti ari, “Aglisika pay laeng.”

Ket napan nagtakder ni Ahimaas iti disso a naibaga kenkuana.

31 Dimteng ti taga-Etiopia ket kinunana iti ari, “Adda naimbag a damag nga ipakaammok kenka, Natan-ok nga Ari. Ita nga aldaw, pinagballiginaka tiApoket pinarmekna dagiti amin nga immalsa a maibusor kenka!”

32 “Kumusta ni agtutubo nga Absalom? Awan met la nakaan-anoanna?” sinaludsod ti ari.

Insungbat ti taga-Etiopia, “Sapay koma ta lak-amen dagiti kabusormo, apo, ken amin nga immalsa a maibusor kenka ti linak-am daytoy nga agtutubo.”

33 Kasta unay ti ladingit ti ari. Immuli iti kuarto iti ngatoen ti pagserkan ket nagsangit sadiay. Bayat ti pannagnana, insangitna, “Ay, anakko! Absalom nga anakko, Absalom nga anakko! Siak la koma ti natayen a saan ketdi a sika. Ay, anakko, Absalom! Ay, anakko!”

Babalawen ni Joab ni David

1 Naipadamag ken ni Joab nga agsangsangit ket agdungdung-aw ni Ari David gapu ken ni anakna nga Absalom.

2 Iti dayta nga aldaw, ti ragsak ti panagballigi nagbalin a ladingit iti entero nga armada gapu ta nadamagda a dungdung-awan ti ari ti anakna.

3 Nagar-arudokda a nagsubli iti siudad; kasdala tattao a naparmek iti paggugubatan.

4 Inabbongan ti ari ti rupana ket insangitna iti napigsa, “Absalom nga anakko! Ay, Absalom nga anakko!”

5 Napan ni Joab iti balay ti ari ket kinunana kenkuana, “Ita nga aldaw, imbabainmo dagiti amin a tattaom—dagiti nangispal iti biagmo, ti biag dagiti annakmo, assawa ken kamalalam.

6 Busorem dagiti mangay-ayat kenka idinto a tulongam dagiti manggurgura kenka. Nalawag nga impakitam nga awan serserbi kenka dagiti ofisialesmo ken dagiti tattaom. Makitak a naragragsakka no sibibiag ita ni Absalom ket nataykam amin.

7 Ita, inka papigsaen ti pakinakem dagiti tattaom. No madika, isapatak iti nagan tiAponga awan ti mabati kenka agingga iti bigat. Daytanto ti kakaroan a didigra a sagabaem iti unos ti panagbiagmo.”

8 Timmakder ti ari ket napan nagtugaw iti asideg ti ruangan ti siudad. Nadamag dagiti tattaona nga adda sadiay ti ari ket naguummongda iti likmutna.

Agsubli ni David idiay Jerusalem

Kabayatanna, nagtataray a nagawid dagiti Israelita, ket nagkamang ti tunggal maysa iti balayna.

9 Iti entero a pagilian, nagsusuppiat dagiti amin nga Israelita. “Inispalnatayo ni Ari David kadagiti kabusortayo,” kinunada iti tunggal maysa. “Inispalnatayo kadagiti Filisteo ket ita, intarayanna ni Absalom ket pinanawanna ti pagilian.

10 Inkonsagrartayo ni Absalom a kas ari ngem natay iti paggugubatan. Ngarud, apay nga awan ti mangpasubli ken ni Ari David?”

11 Nadamag ni Ari David ti pagsasaritaan dagiti Israelita.Iti kasta, imbaonna da Zadok ken Abiatar a papadi tapno saludsodenda daytoy kadagiti pangulo ti Juda: “Apay a dakayo ti maudi a tumulong iti panagsubli ti ari iti palasiona?

12 Kakabagiankayo; maymaysa a dara ti agtartaray kadagiti urattayo. Apay a dakayo ti maudi a mangisubli kaniak?”

13 Binilin pay ida ni David nga ibagada ken ni Amasa, “Kabagianka. Manipud ita, sika ti dutokak a mangipangulo iti armada a sukat ni Joab. Uray dusaennak ti Dios no diak aramiden daytoy!”

14 Nagun-od ni David ti naan-anay a panagtalek dagiti amin a taga-Juda ket pinaayabanda nga agsubli ti ari agraman dagiti amin nga ofisialesna.

15 Nagsubli ti ari iti Karayan Jordan ket iti dalanna, sinabat dagiti tattao ti Juda a napan idiay Gilgal tapno kaduaenda a bumallasiw.

16 Nagdardarasa napan idiay ni Simei nga anak ni Gera a Benjaminita a taga-Bahurim tapno sabtenna ni Ari David.

17 Kaduana ti 1,000 a tattao a nagtaud iti tribu ni Benjamin. Simmabat met ni Ziba a babaonen ti familia ni Saul; kinakuyogna dagiti 15 nga annakna ken dagiti 20 nga adipenna. Dimtengda idiay Jordan sakbay ti idadateng ti ari.

18 Binallasiwdati karayan tapno iballasiwda ti bunggoy ti ari ken aramidenda ti aniaman a kayatna a maaramid.

Kaasian ni David ni Simei

Bayat ti panagsagana ti ari a bumallasiw, nagpakleb ni Simei iti sakaannanna

19 ket kinunana, “Natan-ok nga Ari, pangngaasim ta lipatemon ti dakes nga inaramidko iti dayta nga aldaw nga ipapanawmo idiay Jerusalem. Lipatem koman a mamimpinsan.

20 Apo, ammok a nakabasolak ket daytoy ti gapuna a siak ti immuna kadagiti tribu ti amianan nga immay simmabat iti Natan-ok nga Ari ita nga aldaw.”

21 Nagsao ni Abisai nga anak ni Zeruyas. Kinunana, “Rumbeng a mapapatay ni Simei gapu ta inlunodna ti tao a pinili tiApo.”

22 Ngem kinuna ni David ken ni Abisai ken ni Joab a kabsatna, “Siasino kadi ti nagdawat iti kapanunotanyo? Mangyegkay kadi iti buong-ti-ulo? Siak ti ari ti Israel ket awan ti Israelita a mapapatay ita nga aldaw.”

23 Kinunana ken ni Simei, “Ikarik kenka a saanka a mapapatay.”

Kaasian ni David ni Mefiboset

24 Simmalogmet ni Mefiboset nga apoko ni Saul tapno sabtenna ti ari a nagsubli a sibibiag. Manipud pimmanaw ti ari, saan pay a binuggoan ni Mefiboset dagiti sakana wenno nagibarbas; saanna pay a sinukatan ti pagan-anayna.

25 Idi dumteng iti panaggapunaidiay Jerusalem tapno sabtenna ni David, kinuna ti ari kenkuana, “Mefiboset, apay a dika kimmuyog kaniak?”

26 Insungbatna, “Natan-ok nga Ari, ammom a pilayak. Imbagak iti adipenko a silyaanna ti asnok tapno makikuyogak kenkuana. Ngem inallilawnak.

27 Saan a pudno ti imbagana kenka maipapan kaniak. Natan-ok nga Ari, mayarigka iti anghel ti Dios; aramidem ngarud ti ammom a nasayaat.

28 Rumbeng, Natan-ok nga Ari, ti panangpapataymo kadagiti amin a kameng ti familia ni amak ngem pinalubosannak a mangan iti lamisaanmo. Awanen ti kalintegak nga agdawat iti aniaman a parabur iti ari.”

29 Insungbat ti ari, “Saanen a nasken nga agsaoka pay. Inkeddengkon a pagbingayanyo ken ni Siba ti sanikua ni Saul.”

30 “Uray kukua aminen ni Siba,” kinuna ni Mefiboset. “Umdasen a nagsubli a sikakaradkad ti Natan-ok nga Ari.”

Bendisionan ni David ni Barzillai

31 ManipudRogelim, simmalog met ni Barzillai a taga-Galaad tapno kaduaenna ti ari a bumallasiw iti Jordan.

32 Lakay unayen ni Barzillai; agtawen iti 80. Nakabakbaknang ket isu ti nangnangted iti taraon ti ari bayat ti kaaddana idiay Mahanaim.

33 Kinuna idi ti ari kenkuana, “Sumurotka kaniak idiay Jerusalem ket siakto ti makaammo kenka.”

34 Ngem insungbat ni Barzillai, “Bassiten ti natda a tawen a panagbiagko. Ania pay la ti surotak iti Natan-ok nga Ari idiay Jerusalem?

35 Walopulo ti tawenkon ket awanen ti tarigagayko iti ragragsak. Diakon mananam ti imas ti kanen ken inumek. Diakon mangngeg ti timek dagiti kumakanta. Agbalinak la a dadagsen kenka, Natan-ok nga Ari.

36 Diak maikari iti kasta a gunggona. Kumuyogak la bassit kenka iti labes ti Jordan.

37 Kalpasanna, palubosannak nga agawid ket matayak iti asideg ti tanem dagiti nagannak kaniak. Adtoy ni Kimham nga anakko nga agserbi kenka. Ikuyogmo, Natan-ok nga Ari, ket aramidem ti ammom a nasayaat kenkuana.”

38 Insungbat ti ari, “Ikuyogko ni Kimham ket ipaayko kenkuana ti aniaman a kayatmo ket aramidek met kenka ti aniaman a dawatem.”

39 Sakbay a bimmallasiw ni David ken dagiti amin a tattaona ti Jordan, inagkanna ni Barzillai ket binendisionanna. Ket nagawid ni Barzillai.

Agsuppiat ti Juda ken Israel gapu iti Ari

40 Nagturong ti ari idiay Gilgal kalpasan ti ibaballasiwna iti Jordan. Kaduana dagiti amin a tattao ti Juda ken kagudua ti bilang dagiti tattao ti Israel, agraman ni Kimham.

41 Kalpasanna, napan kenkuana dagiti amin nga Israelita ket kinunada kenkuana, “Natan-ok nga Ari, apay nga impagarup dagiti kakabagiam—dagiti tattao ti Juda—nga adda kalinteganda a mangala kenka ket kuyogendaka, ti familiam, dagiti tattaom, a bumallasiw iti Jordan?”

42 Insungbat dagiti tattao ti Juda, “Inaramidmi daytoy gapu ta asideg a kabagianmi ti ari. Apay nga agpungtotkayo gapu iti daytoy? Saan nga isu ti naggasto iti kinkinnanmi. Awan met ti uray ania nga intedna kadakami.”

43 Insungbat dagiti Israelita, “Maminsangapulo nga ad-adu ti kalinteganmi ken ni Ari David ngem ti kalinteganyo uray no kabagianyo. Apay a nababa ti panagkitayo kadakami? Diyo liplipatan a dakami ti immuna a nakapanunot iti panagsubli ti ari.”

Ngem nauy-uyong dagiti taga-Juda a nangirupir iti kalinteganda ngem dagiti Israelita.

Ti Yaalsa ni Siba

1 Nairananga adda idiay Gilgal ti maysa a tao nga awan dayawna. Isu ni Siba a nagtaud iti tribu ti Benjamin ken anak ni Bikri. Pinagunina ti trumpeta ket impukkawna, “Agawidtayon, padak nga Israelita! Awan bingaytayo ken ni David. Awan tawidtayo iti anak ni Jesse!”

2 Ngarud, pinanawan dagiti Israelita ni David. Simmurotda ken ni Siba. Ngem nagtalinaed a napudno dagiti taga-Juda ken ni David ket simmurotda kenkuana idiay Jerusalem.

3 Idisumangpet ni David iti palasiona idiay Jerusalem, innalana dagiti sangapulo a sabali nga assawana nga imbatina a mangaywan iti palasio. Pinagnaedna ida iti sabali a balay ket pinaguardiaanna ida. Saannan a kinaidda ida ngem intedna ti amin a masapulda. Nagtalinaedda sadiay a kasla balo iti unos ti panagbiagda.

4 Kinuna ti ari ken ni Amasa, “Ummongem dagiti tattao ti Juda ket umaykayto amin inton maminsan nga aldaw.”

5 Napan inayaban ni Amasa ida ngem saan a nagsubli iti aldaw nga intuding ti ari a panagsublina.

6 Iti kasta, kinuna ti ari ken ni Abisai, “Dakdakkelto ti parikut a yeg ni Siba kadatayo ngem ni Absalom. Alaem dagiti tattaok ket sapulenyo amangan no aglemmeng iti maysa a nasarikedkedan a siudad ket malibasannatayo.”

7 Ngarud, pimmanaw dagiti tattao ni Joab, dagiti guardia ti ari ken dagiti dadduma a soldado idiay Jerusalem tapno sapulenda ni Siba. Kaduada ni Abisai.

8 Idi dumtengda iti dakkel a bato idiay Gabaon, sinabat ni Amasa ida. Nakaarruat ni Joab iti kawes a pakigubat a nabariksan ken nakaigalutan ti sikakaluban a kampilan. Bayat ti yaasidegna, natnag ti igam.

9 Kinuna ni Joab ken ni Amasa, “Komustaka, gayyemko?” Iti makannawan nga ima ni Joab, iniggamanna ti barbas ni Amasa tapno agkanna.

10 Saan a nadlaw ni Amasa ti kampilan nga ig-iggaman ni Joab ket induyok ni Joab ti igam iti tian ni Amasa. Rimmuar dagiti bagis ni Amasa ket natay a dagus; saanen a pinidua a dinuyok ni Joab.

Intuloy da Joab ken Abisai a kabsatna ti nangsarak ken ni Siba.

11 Nagtakder ti maysa kadagiti soldado ni Joab iti abay ti bangkay ni Amasa ket kinunana, “Siasinoman a kadua ni Joab ken ni David, surotenna ni Joab.”

12 Naiwalang iti tengnga ti dalan ti bangkay ni Amasa a nadigos iti dara. Idi makita ti agtutubo a kadua ni Joab nga agsardeng ti tunggal maysa a kumita iti bangkay, ginuyodna ti bangkay ket impanna iti talon sana kinumotan iti ules.

13 Apaman a naikkat ti bangkay iti dalan, sinurot dagiti amin a tattao ni Joab tapno kamatenda ni Siba.

14 Limmasat ni Siba iti amin a daga a masakupan ti amin a tribu ti Israel ket dimteng iti siudad ti Abel Bet Maaca. Naguummong dagiti amin a kabagian ni Bikriket simmurotda kenkuana a simrek iti siudad.

15 Nadamag dagiti tattao ni Joab nga adda ni Siba iti siudad. Napanda ngarud linakub ti Abel Bet Maaca. Linikmutda ti akinruar a bakud iti nabunton a daga. Tapno marba ti bakud, rinugianda met ti nagkali iti puonna.

16 Adda masirib a babai iti siudad a nagpukkaw manipud iti bakud. “Dumngegkayo! Dumngegkayo!” kinunana. “Ibagayo ken ni Joab nga umay ditoy. Kayatko a kasarita.”

17 Napan ni Joab ket sinaludsod ti babai, “Sika kadi ni Joab?”

“Wen, siak,” kinunana. “Ania ti masapulmo?”

Kinunana, “Dumngegka kaniak, apo.”

“Dumdumngegak,” kinuna ni Joab.

18 Kinuna ti babai, “Idi un-unana nga aldaw, masansan a kunada, ‘Inka ammoen idiay Abel ti sungbat ti parikutmo.’ Kasta ti inar-aramidda.

19 Naindaklan ti siudadmi; maysa kadagiti natalna ken napudno iti Israel. Apay a kayatmo a dadaelen? Kayatmo kadi a dadaelen ti kukua tiApo?”

20 “Saan,” insungbat ni Joab. “Diak dadaelen wenno pukawen ti siudadyo.

21 Saan a kasta ti panggepmi. Adda birbirokenmi a tao nga agnagan Siba nga anak ni Bikri ken nagtaud iti katurturodan ti Efraim. Immalsa a maibusor ken ni Ari David. Isukom kadakami dayta a tao ket panawanmi ti siudad.”

“Ipurruakmi kenka ti ulona,” kinuna ti babai.

22 Kalpasanna, napan kadagiti tattao ti siudad ket gapu ta masirib, immanamongda iti panggepna. Pinutolanda ni Siba sada impurruak ti ulo ken ni Joab nga adda iti ruar ti bakud. Pinuyot ni Joab ti trumpeta a kas pagilasinan dagiti tattaona a pumanaw iti siudad. Ket nagawidda. Nagsubli ni Joab idiay Jerusalem tapno dumatag iti ari.

Dagiti Ofisiales ni David

23 Ni Joab ti pangulo ti armada ti Israel. Ni Benaias nga anak ni Jehoyada ti pangulo dagiti guardia ni David.

24 Ni Adoniram ti mangimaton iti inkapilitan a panagtrabaho. Ni Jehosafat nga anak ni Ahilut ti agay-aywan kadagiti papeles ti pagilian.

25 Ni Siva ti sekretario ti ari. Da Zadok ken Abiatar ti papadi.

26 Ket ni Ira a taga-ili ti Jair ti maysa kadagiti papadi ni David.

Mapapatay dagiti Kaputotan ni Saul

1 Bayat ti panagturay ni David, adda nakaro a bisin a nagpaut iti tallo a tawen. Daytoy ti gapuna a nakiuman ni David ken ni Yahweh ket kinuna, “Nakabasol ni Saul ken ti familiana iti pammapatay. Adu ti pinapatayda a tattao ti Gabaon.” (

2 Saannga Israelita dagiti tattao ti Gabaon. Bassitda a puli dagiti Amorreo nga insapata a salakniban dagiti Israelita. Ngem inkagumaan ni Saul a pukawen ida gapu iti bumarbara a panagayatna iti Israel ken iti Juda.)

3 Ngarud, pinaayaban ni David dagiti tattao ti Gabaon ket kinunana kadakuada, “Ania ti maipaayko kadakayo? Kayatko a supapakan iti naimbag daydi dakes a naaramid kadakayo tapno ikararagandakami ket mabendisionan dagiti tattao tiApo.”

4 Insungbatda, “Saan a marisut iti pirak wenno balitok ti ririmi ken ni Saul ken ti familiana. Dimi met marisut babaen iti panangpataymi iti maysa nga Israelita.”

“Ania ngarud ti kayatyo nga ipaayko kadakayo?” kinuna ni David.

5 Insungbatda, “Panggep idi ni Saul nga ikisapnakami a mamimpinsan iti Israel.

6 Ngarud, yawatmo kadakami ti pito a lallaki a kaputotan ni Saul ket bitayenmi ida iti imatang tiApoidiay Gabaa nga ili ni Saul, ti ari a pinili tiApo.” Pinatgan ni David ti dawatda.

7 Ngemgapu iti nasagradoan a kari a nagsinnapataanda ken ni Jonatan, inispal ni David ti anak ni Jonatan, ni Mefiboset nga apoko ni Saul.

8 Nupaykasta, innalana da Armoni ken Mefiboset nga annak ni Saul ken ni Rispa nga anak ni Aia. Innalana met dagiti lima nga annak ni Merab nga anak ni Saul. Ni Adriel nga anak ni Barzillai a taga-Mola ti ama dagiti lima.

9 Inyawat ni David ida kadagiti tattao ti Gabaon a nangbitay kadakuada iti bantay iti imatang ni Yahweh. Naggigiddan a natay dagiti pito. Napasamak daytoy idi mangrugi ti panagapit iti sebada.

10 Saan a pimmanaw ni Rispa nga anak ni Aia ken sabali nga asawa ni Saul iti lugar nga ayan dagiti bangkay. Nangala iti nakersang a lupot ket inaramidna a paglinongan iti rabaw ti kabatoan. Nagyan sadiay manipud panangrugi ti panagani agingga a dimteng ti tudtudo. Binantayanna dagiti bangkay tapno saan a tuktoken dagiti tumatayab iti aldaw wenno rangrangkayen dagiti atap nga animal iti rabii.

11 Idi madamag ni David ti inaramid ni Rispa,

12 napanidiay Galaad ket innalana kadagiti tattao ti Jabes dagiti tultulang da Saul ken Jonatan nga anakna. (Tinakawda idi dagiti tultulang iti pagmimitingan ti Bet-san a nangibitinan dagiti Filisteo kadagiti bangkay iti daydi aldaw a panangparmekda ken ni Saul idiay Bantay Gilboa.)

13 Innala ni David dagiti tultulang da Saul ken Jonatan agraman dagiti tultulang dagiti pito a lallaki a nabitay.

14 Inkalida dagiti tultulang da Saul ken Jonatan iti tanem ni Kis nga ama ni Saul idiay Sela iti sakup ti tribu ti Benjamin. Natungpal amin nga imbilin ti ari ket manipud idin, impangag ni Yahweh dagiti kararagda a maipaay iti pagilian.

Makigubat dagiti Tattao kadagiti Higante a Filisteo

15 Rimsua manen ti panaggubat dagiti Filisteo ken dagiti Israelita. Impanguloan ni David dagiti tattaona iti pannakirangetda kadagiti Filisteo. Bayat ti pannakirangetda, nabannog ni David.

16 Impagarup ti maysa a higante, ni Isbibenob, a kabaelanna a patayen ni David. Nakaiggem ni Isbibenob iti bronse a gayang nga agdagsen iti pito ket gudua a libra ket sibabarikes iti baro a kampilan.

17 Ngemnapan tinulongan ni Abisai nga anak ni Zeruyas ni David. Dinarupna ti Filisteo ket pinapatayna. Manipud idin, saanen a simmurot ni David iti paggugubatan, ta pinagkari dagiti tattaona a saanen a kumuyog kadakuada. “Sika ti kakaisuna a namnama ti Israel ket dimi kayat a mapukawdaka,” kinunada.

18 Kalpasan daytoy, naggubat manen dagiti Filisteo ken dagiti Israelita. Iti daytoy a gubat a napasamak idiay Gob, pinatay ni Sebecai a taga-Husa ti maysa a higante nga agnagan iti Saf.

19 Iti manen sabali a pannakigubatda kadagiti Filisteo idiay Gob, pinatay ni Elhanan nga anak ni Jaira taga-Betlehem ni Goliat a taga-Gat. Adda gayang ni Goliat a kasla kapuskol ti poste ti pagablan ti putanna.

20 Iti sabali manen a gubat idiay Gat, adda higante a pagay-ayatna ti makigubgubat. Innem ti ramay ti tunggal imana ken innem met ti ramay ti tunggal sakana.

21 Kinaritna dagiti Israelita ket pinatay ni Jonatan nga anak ni Samma a kabsat ni David.

22 Kaputotan dagiti higante ti Gat dagitoy uppat. Pinatay ida ni David ken dagiti tattaona.

Ti Kanta ni David iti Panagballigina

1 Daytoy ti kanta ni David nga agpaay ken ni Yahweh kalpasan ti panangispal kenkuana ni Yahweh iti pannakabalin ni Saul ken kadagiti dadduma a kabusorna:

2 Ni Yahweh ti Salakanko;

isu ti napigsa a sarikedkedko.

3 Ti Diosko ti mangsalaknib kaniak

ket awanto ti pakaan-anoak.

Kas maysa a kalasag, salaknibannak,

ikaluya ken aywanannak.

4 Umawagak ken ni Yahweh,

ket isalakannak kadagiti kabusorko.

Madaydayaw tiApo!

5 Dagiti dalluyon ni patay sinabbuagandak

ti layus ni pannakadadael inyanudnak.

6 Dagiti tali ni patay pinulipolandak,

nangikabil ni tanem iti pakaipalab-ogak.

7 Iti pannakariribukko, immawagak ken ni Yahweh;

immasugak iti tulong iti Diosko.

Idiay templona, nangngegna ti timekko,

ket inimdenganna ti panagpatulongko.

8 Nagginggined ken nagunggon ti daga;

nadayeg ken nagindayon ti fondasion ti langit

agsipud ta nakapungtot ti Dios!

9 Rimmuar ti asuk iti agongna;

kasta met ti sumsumgiab nga apuy

ken dumardarang a beggang iti ngiwatna.

10 Linuktanna ti tangatang ket bimmaba;

adda nangisit nga ulep iti babaen dagiti sakana.

11 Nakasakay iti bukot ti kerubin,

napardas a nagdaliasat iti payak ti angin.

12 Binungonna ti bagina iti sipnget,

nalikmut iti napuskol nga ulep a napno iti danum.

13 Iti masangoananna, adda kimat

a nangpataud kadagiti yelo ken dumardarang a beggang.

14 Naggurruod tiApoiti tangatang,

ket nangngeg ti timek ti Kangatoan.

15 Imbiatna dagiti panana,

ket winarawarana dagiti kabusorna;

pinagkimatna, ket pinagtatarayna ida.

16 Nagparang ti lansad ti taaw;

nawaknitan dagiti fondasion ti daga,

idi binabalaw ni Yahweh dagiti kabusorna,

ket binugkawanna ida iti pungtotna.

17 Manipud langit, ginaw-atnak ni Yahweh ket iniggamannak,

kadagiti adalem a danum inalawnak.

18 Inarayatnak kadagiti nabileg a kabusorko

ken kadagiti gumurgura kaniak—

napipigsada ket diak kabaelan ida!

19 Dinarupdak idi mariribukak,

ngem ni Yahweh sinalaknibannak.

20 Tinulongannak iti nagpeggadak;

insalakannak ta maragsakan kaniak.

21 Gunggonaannak ni Yahweh gapu ta nalintegak;

bendisionannak ta awan nakabasolak.

22 Ti linteg ni Yahweh tinungpalko;

saanko a binusor iti Diosko.

23 Inannurotko dagiti amin a lintegna,

diak sinalungasing ti bilinna.

24 Ammona nga awan biddutko,

nga inadaywak ti kinadakes.

25 Iti kasta, gunggonaannak gapu ta nalintegak,

ta ammona nga awan nakabasolak.

26 OApo, agparangka a napudnoka kadagiti napudno kenka;

naimbagka kadagiti awan pagkuranganna.

27 Kadagiti nadalus, agparangka a nadalus,

ngem naungetka kadagiti nadangkok.

28 Isalakanmo dagiti napakumbaba,

ngem dagiti natangsit ipababam ida.

29 OApo, sika ti silawko.

Lawagam ti kinasipngetko.

30 Papigsaennak a sumaranget kadagiti kabusorko;

ikkannak iti bileg a mangduprak iti sarikedkedda.

31 Daytoy a Dios awan pakapilawan ti aramidna;

mapagtalkan dagiti saona!

Kasla maysa a kalasag

nga agpaay kadagiti amin a kumamang kenkuana.

32 Siasino ti Dios no saan laeng a ni Yahweh?

Ket siasino ti bato no saan a ti Diostayo?

33 Daytoy a Dios ti nabileg a taklinko;

Aramidenda a natalged ti pagnaak.

34 Kadagitibambantay, aywanannak;

kas iti ugsa, papartakennak.

35 Sanayennak a makigubat

tapno mabiatko ti bai a gambang.

36 Salakniban ken isalakannak, OApo,

intan-oknak babaen iti tulongmo.

37 Dimo impalubos a matiliwak

ket pulos a diak naitublak.

38 Kamatek dagiti kabusorko ket tiliwek ida;

diak sumardeng agingga a madadaelda.

39 Padsoek ida ket dida makabangon;

mapasagda iti sangoanak.

40 Ikkannak iti pigsa a makigubat

ket tulongannak a mangparmek kadagiti kabusorko.

41 Pagtarayem dagiti kabusorko nga umadayo kaniak;

pukawek dagiti gumura kaniak.

42 Agpaarayatda ngem awan makaikanawa kadakuada;

umawagda ken ni Yahweh ngem dina sungbatan ida.

43 Tumekek ida a kas tapok;

payatpayatek ida a kas pitak kadagiti kalsada.

44 Insalakannak kadagiti immalsa a tattao,

pinagturaynak kadagiti nasion;

nagserbi kaniak dagiti diak am-ammo a tattao.

45 Agtamed kaniak dagiti ganggannaet;

agtulnogda no mangngegdak.

46 Mapukawda ti namnamada,

agtigergerda a rummuar iti sarikedkedda.

47 Agbiag tiApo! Madaydayaw ti Salaknibko!

Ti Dios ti Salakanko! Ipakaammoyo ti kinatan-okna!

48 Tulongannak a mangparmek kadagiti kabusorko,

ken mangparukma kadagiti tattao tapno iturayak ida

49 ket isalakannak kadagiti gumura kaniak.

Pagballigiennak ket parmekek dagiti kabusorko;

salaknibannak kadagiti naranggas a tattao.

50 Isut’gapuna, OApo, idaydayawkanto iti imatang dagiti nasion;

ikantakto dagiti pagdaydayawko kenka.

51 Ited ti Dios dagiti naindaklan a balligi iti arina;

agnanayon nga ipakitana ti di agbalbaliw nga ayatna iti pinilina,

ni David ken kadagiti kaputotanna.

Dagiti Maudi a Balikas ni David

1 Nagbalin a naindaklan ni David nga anak ni Jesse. Isu ti pinili ti Dios ni Jacob nga agbalin nga ari. Nalaing nga agputar kadagiti napipintas a kanta iti Israel. Dagitoy dagiti maudi a balikasna:

2 Agsao kaniak ti espiritu ni Yahweh;

adda kadagiti bibigko ti saona.

3 Nagsao ti Dios ti Israel,

kinuna kaniak ti Bato ti Israel:

“Ti ari a nalinteg ti panagturayna,

ti mangituray nga agbuteng iti Dios

4 mayarig iti init nga agbannawag,

no awan ulep,

ti init a mamagrusing kadagiti ruot kalpasan ti tudo.”

5 Kastoy ti panangbendision ti Dios kadagiti kaputotak,

ta nakitulag kaniak iti agnanayon,

maysa a tulag a di masalungasing,

maysa a kari a pulos a di mabaliwan.

Daytoy la a banag ti tarigagayak;

daytoy ti balligik

ket awan duadua nga ibanag ti Dios.

6 Ngem mayarig dagiti awanan dios kadagiti maibelleng a sisiit;

awan makasagid kadakuada nga ima-ima.

7 Masapul nga agaramatka iti landok wenno pika;

mamimpinsanto a mapuoranda.

Dagiti Maingel a Soldado ni David

8 Adtoy dagiti nagnagan dagiti agdindinamag a soldado ni David: umuna ni Joseb Bassebet a taga-Takemon ken pangulo ti “Dagiti Tallo.”Gayang ti inaramatna iti pannakigubatnakadagiti 800 a lallaki ket pinatayna amin ida iti naminsan laeng a ranget.

9 Ni Eleazar nga anak ni Dodo iti kapuonan ti Aho ti maikadua kadagiti agdindinamag a tallo. Iti naminsan, kinaritda ken ni David dagiti Filisteo a naguummong a makigubat. Nagsanud dagiti Israelita

10 ngem saan a simmurot ni Eleazar; maymaysa a nakiranget agingga a simkil ti imana ket dinan maibbatan ti kampilanna. Iti dayta nga aldaw, naindaklan ti panagballigi ni Yahweh. Kalpasan ti gubat, nagsubli dagiti Israelita iti yan ni Eleazar ket inikkatda dagiti kabal kadagiti natay a soldado.

11 Ni Samma nga anak ni Age a taga-Harar ti maikatlo kadagiti agdindinamag a tallo. Idiay Lehi ti naguummongan idi dagiti Filisteo a makigubat. Adda talon a namulaan iti patani iti dayta a lugar. Intarayan dagiti Israelita dagiti Filisteo

12 ngem saan a nagsanud ni Samma. Nagtakder iti tengnga ti talon, sinalaknibanna ket pinatayna dagiti Filisteo. Naindaklan ti panagballigi ni Yahweh iti dayta nga aldaw.

13 Idi umasideg ti panagani, simmalog ti tallo kadagiti “Tallopulo a Mamaingel” a napan iti Rukib ti Adullam nga yan idi ni David. Nagkampo idi ti maysa a bunggoy dagiti Filisteo iti Tanap ti Refaim.

14 Iti dayta a tiempo, adda ni David iti maysa a nasarikedkedan a turod ket maysa a bunggoy dagiti Filisteo ti nangsakup iti Betlehem.

15 Mailiw unay ni David ket kinunana, “Adda koma la mapan mangala iti danum nga inumek iti bubon iti abay ti ruangan ti Betlehem!”

16 Sinarakusok dagiti tallo nga agdindinamag a soldado ti kampo dagiti Filisteo, simmakdoda iti bubon ket impanda ti danum ken ni David. Ngem saan nga ininum ni David. Imbuyatna ketdi a kas daton itiApo

17 sana kinuna, “OApo, saanko a mabalin nga inumen daytoy! Kasko la inumen ti dara dagitoy a lallaki a nangipusta iti biagda!” Isut’ gapuna a dina kayat nga inumen ti danum.

Dagitoy dagiti aramid dagiti tallo nga agdindinamag a soldado a mangipakita iti kinaturedda.

18 Ni Abisai a kabsat ni Joab (ni Zeruyas ti inada) ti pangulo dagiti “Tallopulo a Mamaingel.” Inaramatna ti gayangna a nakiranget iti 300 a lallaki ket pinatayna ida; nagdindinamag met a kas kadagiti “Tallopulo.”

19 Isu ti kamainglan kadagiti “Tallopulo”ket nagbalin a panguloda ngem saan unay a nalatak a kas kadagiti “Tallo.”

20 Maysa met nga agdindinamag a soldado ni Benaias nga anak ni Jehoyada a taga-Kabzeel. Adu ti inaramidna a mangipakita iti kinaturedna agraman ti panangpatayna iti dua a mamaingel a soldado a Moabita. Iti naminsan a nagtudo iti niebe, napan iti maysa a rukib ket pinatayna ti maysa a leon.

21 Pinatayna ti maysa a nabaked nga Egipcio a siaarmas iti gayang. Pang-or ti armas ni Benaias a nangdarup iti Egipcio. Inagawna ti gayang ti Egipcio ket daytoy ti pinangpatayna kenkuana.

22 Dagitoy dagiti aramid ni Benaias a mangipakita iti kinaturedna. Isu ti maysa kadagiti “Dagiti Tallopulo.”

23 Isu ti agdindinamag kadakuada amin ngem saan a nalatak a kas kadagiti “Tallo.” Isu ti dinutokan ni David a pangulo dagiti guardiana.

24-39 Dagiti dadduma a kameng dagiti “Tallopulo a Mamaingel.”

Ni Asael a kabsat ni Joab

Ni Elhanan nga anak ni Dodo a taga-Betlehem

Ni Samma ken ni Elika a taga-Harod

Ni Helez a taga-Pelet

Ni Ira nga anak ni Ikkes a taga-Tekoa

Ni Abiezer a taga-Anatot

Ni Mebunnai a taga-Husa

Ni Zalmon a taga-Aho

Ni Maharai a taga-Netofa

Ni Heleb nga anak ni Baana a taga-Netofa

Ni Ittai nga anak ni Ribai a taga-Gabaa idiay Benjamin

Ni Benaias a taga-Piraton

Ni Hiddai a taga-tanap iti asideg ti Gaas

Ni Abialbon a taga-Araba

Ni Asmabet a taga-Bahurim

Ni Elisaba a taga-Saalbon

Dagiti annak ni Jasen

Ni Jonatan

Ni Samma a taga-Harar

Ni Ahiam nga anak ni Sarar a taga-Harar

Ni Eleifelet nga anak ni Ahasbai a taga-Maaca

Ni Eliam nga anak ni Ahitofel a taga-Gilo

Ni Hezro a taga-Carmel

Ni Paarai a taga-Arab

Ni Igal nga anak ni Natan a taga-Soba

Ni Bani a taga-Gad

Ni Zelek a taga-Ammon

Ni Naharai a taga-Beerot (isu ti para-awit iti armas ni Joab nga anak ni Zeruyas)

Ni Ira ken ni Gareb a taga-Jattir

Ni Urias a Heteo.

Agdagup amin iti 37 dagiti agdindinamag a soldado.

Pasensus ni David ti Israel ken Juda

1 Iti naminsan, nakaunget ni Yahweh iti Israel ket sinugsoganna ni David a mangyeg iti didigra kadagiti Israelita. Kinuna ni Yahweh kenkuana, “Inka sensusen dagiti tattao ti Israel ken Juda.”

2 Ngarud, binilin ni David ni Joab ken dagiti pangulo ti armada:“Inkayo sursoren ti amin a tribu ti Israel, manipud Dan agingga idiay Beerseba ket bilangenyo dagiti tattao. Kayatko a maammoan no mano ti bilangda.”

3 Ngem insungbat ni Joab, “Natan-ok nga Ari, sapay koma ta paaduen tiApoa Diosmo iti maminsangagasut dagiti tattao ti Israel. Sapay koma ta addakanto pay la a biag inton aramidenna daytoy. Ngem apay a kayat ti Natan-ok nga Ari nga aramiden daytoy?”

4 Nupay kasta, ti sao ti ari ti natungpal ket inaramid ni Joab ken dagiti ofisialesna ti bilinna. Pimmanawda iti ayanna ket napanda binilang dagiti Israelita.

5 Binallasiwda ti Jordan ket nagkampoda iti abagatan ti Aroer, ti siudad iti tengnga ti tanap, iti sakup ti Gad.Manipud sadiay, nagpa-amiananda a napan iti Jazer,

6 sa idiay Galaad ken idiay Kades iti daga dagiti Heteo.Napanda idiay Dan ket manipud Dan nanglikawda a napaniti laud ti Sidon.

7 Kalpasanna, nagpa-abagatanda a napan iti nasarikedkedan a siudad ti Tiro sa kadagiti amin a siudad dagiti Heveo ken Cananeo ket kamaudianna, idiay Beerseba, iti akin-abagatan a paset ti Juda.

8 Kalpasan ti siam a bulan ken 20 nga aldaw, nagsublida idiay Jerusalem; sinursorda ti entero a pagilian.

9 Indatagda iti ari ti dagup dagiti lallaki a mabalin nga agsoldado: 800,000 idiay Israel ken 500,000 idiay Juda.

10 Ngem kalpasan ti panagpasensus ni David, nariribuk ti konsensiana ket kinunana ken ni Yahweh, “Nagbasolak iti nadagsen iti panangaramidko iti daytoy! Pangngaasim ta pakawanennak. Minamaag unay ti inaramidko.”

11-12 Kinuna ni Yahweh ken ni Gad a profeta ni David, “Inka ibaga ken ni David nga ikkak iti tallo a pagpilian. Aramidek ti aniaman a pilienna.” Iti sumuno a bigat, kalpasan ti ibabangon ni David,

13 napan kenkuana ni Gad sana imbaga ti sao ni Yahweh ket sinaludsodna, “Ania ti kayatmo kadagitoy? Tallo a tawen a panagbisin iti dagam wenno tallo a bulan nga itartarayam dagiti kabusormo wenno tallo nga aldaw nga adda angol iti dagam? Panunotem a nalaing ket ibagam ti sungbatmo nga idanonko itiApo?”

14 Insungbat ni David, “Narikut ti sasaadek! Ngem diak kayat a dusaendak dagiti tattao. Yantangay ta manangngaasi tiApo, bay-am nga isu ti mangdusa kadatayo.”

15 Ngarud, nangyeg ni Yahweh iti angol iti Israel a nangrugi iti dayta a bigat ket nagpatingga iti intudingna a tiempo. Manipud Dan agingga idiay Beerseba, 70,000 nga Israelita ti natay.

16 Idi dandani dadaelen ti anghel ni Yahweh ti Jerusalem, imbabawi ni Yahweh ti panangdusana kadagiti tattao ket kinunana iti anghel nga agpappapatay kadakuada, “Huston! Isardengmon!”

Adda idi ti anghel ti abay ti pagirikan ni Arauna a Jebuseo.

17 Nakita ni David ti anghel, ket kinunana ken ni Yahweh, “Siak ti nagbasol. Siak ti nagaramid iti dakes. Ania aya ti inaramid dagitoy nanumo a tattao? Siak ken ti familiak ti rumbeng a dusaem.”

18 Iti dayta met la nga aldaw, napan ni Gad ken ni David ket kinunana, “Inka iti pagirikan ni Arauna ket mangbangonka sadiay iti altar nga agpaay itiApo.”

19 Tinungpal ni David ti bilin ni Yahweh ket napan a kas imbaga ni Gad kenkuana.

20 Idi makita ni Arauna a dumteng ti ari ken dagiti ofisialesna, rukob iti sangoanan ni David

21 ket sinaludsodna, “Natan-ok nga Ari, apay nga addaka ditoy?”

Insungbat ni David, “Umayko gatangen ti pagirikam a pangbangonak iti altar tiApotapno agsardeng ti didigra.”

22 “Alaem, Natan-ok nga Ari,” kinuna ni Arauna, “ket idatonmo itiApoti aniaman a kayatmo. Adtoy dagiti baka a mapuoran a kas daton iti altar; dagitoy dagiti sangolda ken dagiti pagirik a maaramat a pagsungrod.”

23 Inted amin ni Arauna iti arisana kinuna kenkuana, “Sapay koma ta awaten tiApoa Diosmo ti datonmo.”

24 Ngem insungbat ti ari, “Saan, gatangek. Diak mangidatag itiApokadagiti daton a pulos nga awan imbayadko.” Ket ginatangna ti pagirikan ken dagiti baka iti 50 a bagi ti pirak.

25 Nangbangon iti altar nga agpaay ken ni Yahweh ket nangidatag kadagiti daton a mapuoran ken kadagiti daton a pakikappia. Impangag ni Yahweh ti kararagna ket simmardeng ti didigra iti Israel.