Categories
Amos

Amos 4

1 Dumngegkayo iti daytoy, dakayo a babbai a taga-Samaria a lumuklukmeg a kas kadagiti mabmabsog a baka ti Basan, dakayo a mangparparigat kadagiti nakapsut, dakayo a mangidadanes kadagiti napanglaw ken mangbilin kadagiti assawayo a yegandakayo iti naingel nga inumen!

2 Gapu ta nasantoan ni ApoDios, insapatana, “Umayto dagiti aldaw a guyodendakayto nga ipanaw a kas ikan a nabanniitan.

3 Iguyoddakayto iti kaasitgan a rengngat ti bakud ket ipurruakdakayto.”

Saan a Kayat ti Israel ti Paisuro

4 Kuna ni ApoDios, “Dakayo nga Israelita, inkayo iti nasantoan a disso idiay Betel, ket paaduenyo sadiay ti salungasingyo! Inkay idiay Gilgal, ket ipapasyo ti agbasol. Mangitugotkayo kadagiti animal nga idatonyo iti tunggal bigat ken kadagiti apagkapulloyo iti tunggal maikatlo nga aldaw.

5 Idatagyo ti tinapayyo a kas daton a pagyaman ket ipalangguadyo dagiti daton a nagtaud iti nakemyo. Daytoy ti pagay-ayatyo nga aramiden.

6 “Siak ti nangyeg iti bisin iti amin a siudadyo, isut’ gapuna a naawanankayo idi iti kanen, ngem dikayo nagsubli kaniak.

7 Diak pinagtudo idi masapul unay ti mulayo ti danum. Pinagtudok iti maysa a siudad, ngem diak pinagtudo iti sabali. Nagtudo iti maysa a talon ngem nagmaga ti sabali.

8 Agkakapsut iti waw dagiti tattao iti sumagmamano a siudad a napan iti kabangibang a siudad tapno agsapul iti danum ngem awan makaanay nga inumen. Kaskasdi latta a saankayo a nagsubli kaniak.

9 “Inyegko ti makasinit nga angin a nangpagango kadagiti mulayo. Inibus dagiti dudon ti amin a kaubasan ken minuyonganyo, dagiti kayoyo nga igos ken olibo. Ngem kaskasdi a dikay nagsubli kaniak.

10 “Dinidigrakayo a kas iti panangdidigrak iti Egipto. Pinatayko dagiti agkabannuagyo iti gubat ket intalawko dagiti kabalioyo. Pinagbangsitko dagiti kampoyo ket nabuyok ti inang-angotyo. Ngem saankayo latta a nagsubli kaniak.

11 “Dinadaelkoti sumagmamano kadakayo a kas iti panangdadaelko iti Sodoma ken iti Gomorra. Dakayo a nakalasat, kaskayo la sumsumged a bislak a naikkat iti apuy tapno saan a mauram. Ngem kaskasdi a saankayo a nagsubli kaniak,” kuna ni Yahweh.

12 “Dusaenkayo ngarud, tattao ti Israel, ket gapu ta aramidek daytoy, agsaganakayo a sumango iti panangukomko!”

13 Ti Dios ti nangaramid kadagiti bantay;

isu ti nangparsua kadagiti angin.

Ipakaammona iti tao ti panunotna;

pagbalinenna a rabii ti aldaw.

Magna iti alimpatok ti daga.

Daytoy ti naganna:

Ti Dios ngaApoa Mannakabalin-amin!

Categories
Amos

Amos 5

Maawis nga Agbabawi ti Israel

1 Tattao ti Israel, denggenyo ti idung-awko kadakayo:

2 Natnagen ti birhen nga Israel, ket saanen a bumangon.

Pulos a saan a bumangonen!

Napasag iti bukodna a daga

ket awan ti mangpatakder kenkuana a tumakder.

3 Kuna ni ApoDios, “Sangaribu a mannakigubat ti ibaon ti maysa a siudad ti Israel, ngem 100 laeng ti agsubli. Sabali a siudad ti mangibaon iti 100 a mannakigubat, ngem 10 laeng ti agsubli.”

4 Kuna ni Yahweh kadagiti Israelita, “Umaykayo kaniak ket agbiagkayo.

5 Dikay mapan agdaydayaw idiay Beerseba. Didak biroken idiay Betel—awanto ti pagbalbalinan ti Betel. Dikay mapan idiay Gilgal—maitalawto a kas balud iti sabali a daga dagiti tattao sadiay.”

6 Umasidegkayo itiApo, ket agbiagkayo. Amangan no sumgiab a kas apuy ti pungtotna kadagiti Israelita—apuy a manguram kadagiti taga-Betel, ket awanto ti makaiddep.

7 Asikayto pay, dakayo a mangbalballikug iti hustisia ken mangilupitlupit kadagiti tattao.

8 InaramidtiApodagiti bituen,

ti Pleiades ken ti Orion.

Pagbalinenna ti sipnget a bigat

ken ti aldaw a rabii.

Ayabanna ti danum ti taaw

ket ibuyatna iti daga.

Apoti naganna.

9 Yegna ti pannakadadael dagiti mannakabalin

ken dagiti sarikedkedda.

10 Dakayo a tattao, guraenyo ti mangikalintegan iti maisaklang ken agsao iti amin a kinapudno iti pangukoman.

11 Gapu ta idadanesyo dagiti napanglaw ket takawenyo ti trigoda, dikayto makapagnaed kadagiti napintas a balay a bato nga inaramidyo wenno makainum iti arak a naggapu iti napintas a kaubasan nga imulayo.

12 Ammok a nakaam-amak dagiti basolyo. Ammok met nga adu dagiti dakes nga inaramidyo. Idadanesyo ti naimbag a tao, agawatkayo iti pasuksok ket ikkatenyo ti kalintegan dagiti napanglaw a mangtunton iti kalinteganda iti pangukoman.

13 Dakes dagiti kasta a tiempo ket nasaysayaat nga agulimek ti manakem a tao.

14 Ikagumaanyo ti agaramid iti naimbag, saan nga iti dakes, tapno agbiagkayo; ket kas kunkunayo, awan duadua nga addanto kadakayo ti Apo aDiosa Mannakabalin-amin.

15 Guraenyo ti dakes. Ayatenyo ti naimbag. Ipakatyo ti kinahustisia kadagiti pangukoman. Nalabit a maasianto tiApokadagiti tattao a natda a sibibiag pay laeng iti daytoy a nasion.

16 Ngarud, kuna ti ApoDiosa Mannakabalin-amin, “Addanto panagdung-aw ken panagsangit iti nasaem kadagiti kalsada iti siudad. Maayabanto dagiti tattao ti away tapno makipagdung-awda kadagiti natangdanan nga agdung-aw.

17 Addanto dung-aw iti amin a kaubasan. Mapasamakto amin dagitoy ta umaykayo dusaen.” Daytoy ti sao tiApo.

18 Nakabutbuteng ti pagbanaganyo, dakayo nga agur-uray iti yaay ti aldaw tiApo! Apay a tarigagayanyo dayta nga aldaw? Adda kadi imbag nga itedna kadakayo! Aldawto ti sipnget, saan a lawag.

19 Mayarigto iti maysa a tao nga itartarayanna ti maysa a leon ket adda oso a masabatna! Wenno mayarigto iti agkamang iti maysa a balay sana isadag ti imana iti diding ket kagaten ti maysa nga uleg!

20 Yegto ti aldaw tiApoti sipnget, saan a lawag. Nalidemto nga aldaw nga awan a pulos ti raniagna.

21 KunatiApo, “Kagurak dagiti nasantoan a fiestayo; diak maragsakan iti panagrarambakyo.

22 Uray no idatagyo ti daton a mapuoran ken daton a makan, saankonto nga awaten ida. Saankonto met nga awaten dagiti pinalukmegyo nga animal a yegyo a kas daton a pagyaman.

23 Isardengyo dagiti naariwawa a kantayo. Diak kayat a denggen ti uni dagiti arpayo.

24 Ipaayyo ketdi ti hustisia a kas ayus ti waig ken ti kinalinteg a kas karayan a di maatianan.

25 “Tattaoti Israel, bayat ti 40 a tawen a panagyanyo idiay let-ang, diak dinawat nga idatagandak iti daton ken sakrifisio.

26 Ngem ita, gapu ta nagdaydayawkayo kadagiti imahen da Sakkut nga ari a didiosen, ken Kaiwan, ti bituen a didiosenyo, masapul nga awitenyo dagitoy

27 inton ipanawkayo a kas balud iti maysa a daga iti labes ti Damasco,” kuna ni Yahweh; Mannakabalin-amin a Dios ti naganna.

Categories
Amos

Amos 6

Ti Pannakadadael ti Israel

1 Nakabutbutengto ti pagbanaganyo, dakayo a nanam-ay ti biagna dita Sion ken dakayo a mangipagarup a natalgedkayo dita Samaria—dakayo a papangulo iti daytoy agdindinamag a pagilian ti Israel, dakayo a kamangan dagiti tattao no masapulda ti tulong!

2 Inkayo kitaen ti siudad ti Calne sakayto mapan iti agdindinamag a siudad ti Hamat. Kalpasanna, agtaruskay idiay Gat a siudad dagiti Filisteo. Nasaysayaat kadi dagitoy a pagarian ngem dagiti pagarian ti Juda ken ti Israel? Nalawlawa kadi ti dagada ngem ti dagayo?

3 Diyo kayat nga annugoten nga addanto dumteng nga aldaw ti didigra ngem dagiti aramidyo yas-asidegna dayta nga aldaw!

4 Asikayo pay, dakayo nga agid-idda kadagiti napipintas ken nalamuyot a sofa ken agsidsida iti karne ti urbon a karnero ken baka.

5 Pagay-ayatyo ti agputar iti kanta a kas ken ni David idi, ket tokarenyo iti arpa.

6 Aginumkayo iti binurburnay nga arak, ket sapsapoanyo ti bagiyo kadagiti kanginaan a bangbanglo, ngem saankayo nga agladingit iti pannakadadael ti Israel.

7 Ngarud, dakayto ti umuna a maitalaw a maipan iti sabali a daga. Aggibuston dagiti parambak ken padayayo.

8 Ti ApoDiosa Mannakabalin-amin ti nangisapata iti daytoy: “Kagurak ti kinatangsit dagiti Israelita. Busorek dagiti palasioda. Yawatkonto iti kabusor ti siudadda ken amin a linaonna.”

9 No sangsangapulo la a tao ti nabati iti maysa a familia, mataydanto amin.

10 No umay ti kabagian ti maysa kadagiti natay tapno iruarna dagiti bangkay, ipukkawna iti siasinoman a nabati pay iti balay, “Adda pay kadi tao dita?”

Adda sumungbat, “Awan!”

Iti kasta, kunanto ti kabagian ti natay, “Agulimekka! Alluadanta ta dita balbaliksen ti nagan tiApo.”

11 Inton agbilin tiApo, mawarwaranto dagiti balay, dadakkel man wenno babassit.

12 Makataray kadi dagiti kabalio kadagiti dadakkel a batbato? Pagaradoen kadi ti baka iti taaw? Saan! Apay ngarud a pinagbalinyo ti hustisia a sabidong? Apay a pinagbalinyo a dakes ti naimbag?

13 Kasta unay ti panangipasindayagyo iti panangsakupyo iti ili ti Lodebar.Itangtangsityo a pinarmekyo ti Karnaimiti bukodyo a pigsa?

14 Ti met laengApoa Dios a Mannakabalin-amin ti agkuna: “Tattao ti Israel, mangibaonakto iti ganggannaet a pagilian a mangsakup iti pagilianyo. Parigatendakayto manipud iti Bessang ti Hamat iti amianan agingga iti waig ti Araba iti abagatan.”

Categories
Amos

Amos 7

Ti Parmata maipapan kadagiti Dudon

1 Daytoy ti impakita kaniak ti Apo aDios: Naimatangak ti panangpataudna iti pinangen a dudon kalpasan ti pannakaparaspas ti garami a bingay ti ari, ket agtubo manen dagiti ruot.

2 Iti parmatak, nakitak nga inibus dagiti dudon ti amin a mula iti daga, ket kinunak: “O Apo aDios, pakawanem dagiti tattaom! Kasano a makalasatda? Bassitda unay ken awan gawayda.”

3 Saan nga intuloy tiApoti panggepna. “Saanto a mapasamak ti nakitam,” kinunana.

Ti Parmata maipapan iti Apuy

4 Daytoy ti parmata nga impakita kaniak ti Apo aDios: Nakitak ti panagsaganana a mangdusa kadagiti tattaona babaen iti apuy. Nasilmutan ti nalawa a taaw iti uneg ti daga, ket agkayamkamen ti apuy iti rabaw ti daga.

5 Ket kinunak, “O Apo aDios, pangngaasim ta isardengmon! Kasano a makalasat dagiti tattaom? Bassitda unay ken awan gawayda.”

6 Saan nga intuloy tiApoti panggepna. “Uray daytoy, saanto met a mapasamak,” kinunana.

Ti Parmata maipapan iti Tinnag

7 Impakita kaniak tiApoti sabali a parmata: Nakitak nga agtaktakder iti abay ti maysa a bakud. Adda ig-iggamanna a tinnag a nausar iti pannakabangon ti bakud.

8 “Ania ti makitam, Amos?” sinaludsodna.

“Maysa a tinnag,” insungbatko.

Ket kinunana, “Aramatek daytoy a pangipakitak a mayarig dagiti tattaok iti bakud a nabangon a di naisurot iti tinnag. Diak pakawanenen ida.

9 Madadaelto dagiti lugar a pagdaydayawan dagiti kaputotan ni Isaac. Marakrakto dagiti nasantoan a disso ti Israel. Gibusakto ti familia ni Ari Jeroboam.”

Da Amos ken Amazias

10 Nagipulong ni Amazias a padi ti Betel ken ni Jeroboam nga ari ti Israel. Kinunana: “Isiksikatnaka ni Amos kadagiti Israelita. Madadaelto ti pagilian gapu kadagiti ibagbagana.

11 Kunkunana a mataykanto iti paggugubatan, ket maitalawto dagiti tattao ti Israel sada maipan iti sabali a daga.”

12 Kinuna ni Amazias ken ni Amos, “Sika a profeta! Agsublika idiay Juda ket sadiay ti panggedam babaen iti panangaskasabam.

13 Saankan nga agipadto ditoy Betel agsipud ta ditoy ti santuario ti ari ken templo ti pagilian.”

14 “Saanak a patangtangdanan a profeta,” insungbat ni Amos. “Maysaak nga agpaspastor ken agay-aywan kadagiti sikamoro.

15 Ngem innalanak tiApoiti trabahok nga agpaspastor, ket imbilinna nga umayak agipadto kadagiti tattaona nga Israelita.

16 Ita, denggem ti sao tiApo. Pasardengennak nga agipadto. Pasardengennak a mangballaag kadagiti Israelita.

17 Gapu ta paritannak, Amazias, kastoy met ti kuna kenka tiApo: ‘Agbalinto ti asawam a balangkantis iti siudad. Matayto dagiti annakmo iti paggugubatan. Mabingbingayto ti dagam ket maitedto kadagiti sabali. Mataykanto iti ganggannaet a daga. Maitalawto nga awan duadua dagiti Israelita ket maipanda iti sabali a daga.’”

Categories
Amos

Amos 8

Ti Parmata maipapan iti Sangabasket a Frutas

1 Daytoy ti parmata nga impakita kaniak ti Apo aDios: Nakitak ti maysa a basket a napno iti frutas.

2 Sinaludsod tiApo, “Amos, ania ti makitam?”

“Sangabasket a frutas,” insungbatko.

Kinuna tiApo, “Dimtengen ti panungpalandagiti tattaok nga Israelita. Dusaekon ida. Saankon a baliwan ti pangngeddengko.

3 Iti dayta nga aldaw, agbalinto a dung-aw dagiti kankanta iti palasio. Agkaiwaranto dagiti bangkay. Maibellengdanto iti ruar nga awan arimekmek.”

Ti Pannakadusa ti Israel

4 Denggenyo daytoy, dakayo a mangilupitlupit kadagiti marigrigat ken agpanggep a mangdadael kadagiti napanglaw iti pagilian.

5 Kunayo iti bagiyo, “Kaano nga agtapos ti luttuad tapno mailakomi dagiti bukbukel? Kaanonto ti panaggibus ti Aldaw a Panaginana tapno mailakomi dagiti trigomi? Nanginanto ti panagilakomi. Usarenminto dagiti saan a husto a pagsukatan, ket padagsenanminto dagiti timbangan tapno masaur dagiti aggatgatang.

6 Nanginanto ti pangilakoanmi iti awan serserbina a trigo. Agbirokkaminto iti napanglaw a tao, daydiay saan a makabayad iti utangna, uray gatad la ti sangaparis a sapatos, ket gatangenmi a kas tagabu.”

7 Insapata ti Apo aDiosti Israel, “Pulos a diakto malipatan dagiti dakes nga aramidda.

8 Iti kasta, aggingginedto, ket agdanagto ti amin a tattao iti pagilian. Agkintayegto ti entero a pagilian; ngumato ken bumaba a kas iti Karayan Nile.

9 Iti dayta nga aldaw, palnekekto ti init iti agmatuon, ket agsipngetto ti daga iti aldaw. Siak, ti Apo aDios, ti nangibaga iti daytoy.

10 Pagbalinekto a pagdudung-awan dagiti pagrarambakanyo. Pagbalinekto met a sangsangit dagiti naragsak a kankantayo. Pagkawesenkayto iti nakersang a lupot ket kuskosanyonto dagiti uloyo. Mayarigkayto kadagiti nagannak a mangdungdung-aw iti kakaisuna nga anakda. Nasaemto dayta nga aldaw agingga iti kamaudianan.

11 “Umayen ti tiempo a panangyegko iti bisin iti daga. Saanto a tinapay ti pakabisinan dagiti tattao. Saanto a danum ti pakawawanda. Mabisin ken mawawdanto iti mensahe nga aggapu ken ni Yahweh. Siak, ti Apo aDiosti nangibaga iti daytoy.

12 Agkalkallautangto dagiti tattao manipud iti Natay a Baybay agingga iti Taaw Mediterranean, sa aglikmut manipud iti daya agingga iti laud. Sapulendanto a sipapasnek ti sao ni Yahweh, ngem didanto masarakan.

13 Iti dayta nga aldaw, matalimudawto iti waw uray pay dagiti napipintas a babbalasang ken napipigsa a babbaro.

14 Dagiti agsapata iti sangoanan dagiti didiosen ti Samaria, isuda nga agkuna, ‘Iti nagan ti dios ti Dan’ ken ‘Iti nagan ti dios ti Beerseba’—matumbanto dagitoy a tattao ket saandanton a makabangon.”

Categories
Amos

Amos 9

Dagiti Panangukom ni Yahweh

1 Nakitak tiAponga agtaktakder iti abay ti altar. Imbilinna: “Masoem ti tuktok dagita nga adigi ti Templo agingga a magunggon dagiti fondasion. Duprakem ida ket bay-am a matupakan dagiti tattao. Papatayekto iti gubat dagiti natda kadakuada. Awanto ti makalibas. Awanto ti makalisi.

2 Uray no agkalida iti dalanda a mapan iti lubong dagiti natay, tiliwekto ida. Uray no umulida sadi langit, ibabakto ida.

3 No aglemmengda iti tapaw ti Bantay Carmel, birokekto ida ket tiliwek ida. No ilemmengandak iti lansad ti taaw, bilinekto ti dragon ti taawa mangalun-on kadakuada.

4 No italaw ida a kas balud dagiti kabusorda, papapataykonto ida iti kampilan. Diak tulongan ida, ket inkeddengkon a patayen ida.”

5 Ni ApoDiosa Mannakabalin-amin sagidenna ti daga ket agginggined;

agdung-aw ti amin nga agnaed sadiay.

Kas iti Karayan Nile, dumakkel ken ages-es ti entero a lubong.

6 Agaramid ni Yahweh iti balayna idiay langit;

ikabilna ti tangatang iti ngatoen ti daga.

Ayabanna dagiti danum iti taaw, ket ibuyatna ida iti rabaw ti daga.

Ni Yahweh ti naganna.

7 Kuna tiApo, “Dakayo nga Israelita, agpada ti pannakilangenko kadakayo ken kadagiti taga-Etiopia. Inruarko dagiti Filisteo idiay Creta ken dagiti taga-Siria idiay Kir, kas iti panangiruarko kadakayo idiay Egipto.

8 Siak, ti Apo aDios, sipsiputak daytoy managbasol a pagarian ti Israel; pukawekto iti rabaw ti daga. Ngem saankonto a dadaelen amin a kaputotan ni Jacob.

9 “Ibilinko a mayakayak ti Israel a kas iti bukel. Wen, yakayakekto ida iti ayan dagiti nasion tapno maikkat ti amin nga awan serserbina kadakuada.

10 Matayto iti paggugubatan ti amin a managbasol kadagiti tattaok—wen, amin nga agkuna, ‘Dinto ipalubos ti Dios a maan-anotayo.’”

Ti Pannakabangonto manen ti Israel

11 KunatiApo, “Umayen ti aldaw a bangonek manen ti pagarian ni David a mayarig iti narba a balay. Tarimaanekto dagiti bakudna, ket patakderekto manen. Bangonekto a kas met la iti kasasaadna idi.

12 Tagikuaento dagiti Israelita ti nabati a daga ti Edom ken ti amin a pagilian a kukuak idi.” Kastoy ti sao tiApoa mangibanagto iti daytoy.

13 Kuna tiApo, “Umayen dagiti aldaw

a madama pay la ti ani,

ngem tiempo manen ti panagarado.

Madama pay laeng ti panagaramid iti arak,

tiempo manen ti panagpurruak.

Agtedtedto dagiti bantay iti nasam-it nga arak

ket agayusto kadagiti turod.

14 Isublikto dagiti tattaok iti dagada.

Bangonendanto manen dagiti nadadael a siudadda

ket agnaeddanto sadiay.

Agmuladanto iti ubas,

ket inumendanto ti arakna.

Agmuladanto kadagiti minuyongan,

ket kanendanto ti apitda.

15 Ipasdekkonto dagiti tattaok iti daga nga intedko kadakuada,

ket didanto maipanawen.”

TiApoa Diosyo ti nagsao iti daytoy.

Categories
Obadias

Obadias 1

1 Daytoyti padto ni Obadias ti sao ni ApoDiosmaipapan iti nasion ti Edom.

Dusaento ti Dios ti Edom

Imbaon ni Yahweh dagiti adipenna

a mapan kadagiti nasion,

ket nangngegmi ti imbagana,

“Agsaganakayo! Intayo gubaten ti Edom!”

2 Kuna ni Yahweh iti Edom,

“Pagbalinenkanto a nakapuy,

ket lalaisendakanto dagiti amin.

3 Inallilawnaka ti kinapalangguadmo.

Nasarikedkedan iti pasig a bato ti kabeseram;

adda kadagiti nangato a bantay ti balaymo.

Gapu iti daytoy kunam iti bagim,

‘Adda aya makabael a mangipababa kaniak?’

4 Uray no agbalayka iti kas kangato

ti umok ti agila,

ket kasla adda iti ayan dagiti bituen,

ipababakanto latta.

5 “No umay dagiti mannanakaw iti rabii,

dagiti la kayatda ti alaenda.

No agburas dagiti tattao iti ubas,

adda latta ibatida.

Ngem inkisapdakayo a namimpinsan dagiti kabusoryo.

6 Dakayo a kaputotan ni Esau,

nasamsamen dagiti gamengyo.

7 Liniputandakayo dagiti amin a kakaduayo;

pinaksiatdakayo iti mismo a pagilianyo.

Pinarmekdakayon dagiti tattao

a nakikappia idi kadakayo.

Dagiti gagayyemyo a kinasangoyo iti panganan

nangikabilda iti pangipalab-oganda kadakayo,

ket kunada, ‘Sadino ti ayan ti kinasiribna?’

8 “Iti aldaw a panangdusak iti Edom,

dadaelekto dagiti mamasirib a tattaona,

ket pukawekto ti amin a kinasiribda.

9 Agbutengto dagiti mannakigubat a taga-Teman,

ket matayto dagiti amin a soldado iti Edom.

No Apay a Madusa ti Edom

10 “Gapu ta tinakawam ken pinapataymo

dagiti kakabsatmo a kaputotan ni Jacob,

madadael ken maibabainkanto iti agnanayon.

11 Iti aldaw a panangrebba dagiti kabusor,

kadagiti ruangan dagiti kakabsatmo,

nagbuybuya latta ti inaramidmo.

Mayarig ti kinadakesmo iti kinadakes dagita

a nangitalaw kadagiti kinabaknang ti Jerusalem,

ket nagbibingayanda.

12 Saanka koma a nagragsak

gapu iti daksanggasat a napagteng

dagiti kakabsatmo idiay Juda.

Saanka koma a nagrag-o

iti aldaw a pannakadadaelda.

Saanmo koma a kinatawaan ida

iti aldaw a panagrigatda.

13 Saanka koma a simrek

iti siudad dagiti tattaok

tapno agragsakka iti panagsagabada.

Dimo koma sinamsam ti kinabaknangda

iti aldaw ti pannakadidigrada.

14 Saanka koma a nagyan

kadagiti nagsasangalan ti dalan

tapno tiliwem dagiti agpanggep nga aglibas.

Saanmo koma nga inyawat ida kadagiti kabusor

iti aldaw a panagsagabada.

Ukomento ti Dios dagiti Nasion

15 “Asidegen ti aldaw inton siak, ni Yahweh,

ukomek dagiti amin a pagilian.

Edom, maaramidto met kenka

ti kas iti inaramidmo.

Lak-amemto met ti impalak-ammo.

16 Ininum dagiti tattaok

ti napait a kopa ti pannakadusa

iti nasantoan a turodko.

Uminumto met dagiti amin a kabangibang a nasion

iti napapait pay a kopa ti pannakadusa;

arub-obendanto amin ket agpukawdanto.

Ti Panagballigi ti Israel

17 “Ngem addanto dagiti makalasat idiay Sion,

ket agbalinto ti bantay a nasantoan a disso.

Tagikuaento manen dagiti tattao ni Jacob

ti daga a kukuada.

18 Kaslanto apuy dagiti tattao da Jacob ken Jose;

dadaelendanto dagiti tattao ni Esau,

ket ikisapdanto ida a kas iti panangikisap ti apuy iti garami.

Awanto ti makalasat a kaputotan ni Esau.

Siak, ni Yahweh, ti nagsao.

19 “Umayto dagiti agnaed iti akin-abagatan ti Juda

ket sakupenda ti Edom.

Dagiti adda kadagiti akinlaud nga arisadsad dagiti turod

parmekendanto ti Filistia.

Tagikuaento dagiti Israelita ti daga ti Efraim ken Samaria;

matnagto ti Galaad iti ima dagiti tattao ti Benjamin.

20 Agsublinto ti napagtalaw nga armada ti akin-amianan nga Israel,

ket parmekennanto ti Fenisia

agingga iti Sarepta iti akin-amianan a paset.

Dagiti napagtalaw a taga-Jerusalem nga adda idiay Sardis

parmekendanto dagiti ili

iti akin-abagatan a paset ti Juda.

21 Dagiti maingel a lallaki ti Jerusalem

rautendanto ti Edom ket iturayanda.

Agarinto a mismo ni Yahweh.”

Categories
Jonas

Jonas 1

Itarayan ni Jonas ni Yahweh

1 Itimaysa nga aldaw, nagsao ni Yahweh ken ni Jonas nga anak ni Amittai.

2 Kinunana, “Inka idiay Nineve, ket ballaagam dayta agdindinamag a siudad, ta naipadamag kaniak ti kinadakes dagiti tattao.”

3 Ngem nagrubbuat ketdi ni Jonas ket sabali ti tinurongna tapno itarayanna ni Yahweh. Napan idiay Joppe ket nakasarak iti barko nga agturong idiay Tarsis.Kalpasan ti panagbayadna iti pletena, limmugan a kaduana dagiti tripulante tapno mapan sadiay, ket iti kasta, maadaywanna ni Yahweh.

4 Ngem imbulos ni Yahweh ti napigsa nga angin iti taaw. Napigsa ti bagio ket kasla marba ti barko.

5 Nagbuteng dagiti tripulante ket immawag ti tunggal maysa iti diosna. Tapno lumag-an ti barko, intappuakda dagiti karga.Ngem adda ni Jonas iti akimbaba a kadsaaran ti barko iti maysa a suli, ket nargaan ti turogna.

6 Sadiay ti nakasarakan kenkuana ti kapitan ti barko. “Apay a matmaturogka?” kinuna ti kapitan. “Bumangonka ketdi ket agpatulongka iti diosmo bareng no kaasiannatayo ket saantayo a matay.”

7 Iti kasta, kinuna dagiti tripulante iti tunggal maysa, “Agbibinnunottayo tapno maammoantayo no siasino ti mapabasol iti daytoy didigra a dimteng kadatayo.” Nagbibinnunotda ket rimmuar ti nagan ni Jonas.

8 Kinunada kenkuana, “Ita, ibagam kadakami no siasino ti mapabasol iti daytoy! Ania ti ar-aramidem ditoy? Taga-anoka? Ania ti ilim ken ania a tribu ti nagtaudam?”

9 Kinuna ni Jonas, “Maysaak a Hebreo. Agdaydayawak itiApoa Dios ti langit a namarsua iti taaw ken iti daga.”

10 Imbaga ni Jonas kadakuada nga itartarayanna ni Yahweh.

Idi naammoanda daytoy, nagbuteng dagiti tripulante ket kinunada, “Nakabutbuteng daytoy nga inaramidmo!”

11 Idi dumawel latta ti taaw bayat ti panaglabas ti oras, kinuna dagiti tripulante ken ni Jonas, “Ania ti aramidenmi kenka tapno sumardeng ti bagio?”

12 “Itappuakdak tapno agkalma,” insungbat ni Jonas. “Ammok a siak ti nakaigapuan ti idadateng kadakayo daytoy nadawel a bagio.”

13 Nupay kasta, kayat dagiti tripulante nga ipaigid ti barko. Inkabilda ti amin a kabaelanda nga aggaud ngem awan ti maaramidda ta pumigpigsa ti angin.

14 Isut’ gapuna nga immasugda ken ni Yahweh, “OApo, dawatenmi kenka a dinakami patayen a kas dusami gapu ta patayenmi daytoy a tao! Sika, OApo, ti makaammo iti daytoy. Sika ti akin-aramid.”

15 Kalpasanna, binagkatda ni Jonas sada intappuak iti taaw. Nagkalma a dagus ti bagio.

16 Kasta unay ti panagbuteng dagiti tripulante ken ni Yahweh ket nagidatagda iti daton ken nagkarida nga agserbi kenkuana.

17 Binilinni Yahweh ti maysa a dakkel nga ikan a mangalun-on ken ni Jonas. Tallo nga aldaw ken tallo a rabii nga adda ni Jonas iti tian ti ikan.

Categories
Jonas

Jonas 2

Ti Kararag ni Jonas

1 Kalpasanna, iti uneg ti tian ti ikan, nagkararag ni Jonas ken ni Yahweh a Diosna:

2 “Iti rigatko, OApo, immawagak kenka,

ket impangagnak.

Immasugak manipud iti tukot ti lubong dagiti natay,

ket nangngegmo ti timekko.

3 Intappuaknak ngamin iti kaadalman,

wen, iti lansad ti taaw.

Nalawlawak iti danum,

ket sinabbuagandak dadakkel a dalluyonmo.

4 Impagarupko a napagtalawak iti imatangmo,

ket diakton makita ti nasantoan a Templom.

5 Linikmutnak ti danum ket maangsanakon;

namimpinsan a linapunosnak ti taaw,

ket nakumotan ti ulok iti ruot.

6 Naipanak iti mismo a puon dagiti bantay,

iti daga a ti ruanganna naibalunet iti agnanayon.

Ngem iti daytoy a yuyeng, inaonmo ti biagko,

OApoa Diosko!

7 “Idi mariknak a matayakon,

nagkararagak kenka, OApo,

ket manipud iti nasantoan a Templom

nangngegmo ti asugko.

8 Tinallikudandaka dagiti agdaydayaw

kadagiti awan serserbina a didiosen.

9 Ngem siak, agkantaakto iti pagdaydayaw kenka;

mangidatagakto kenka iti daton,

ket tungpalekto ti karik kenka.

Aggapu itiApoti pannakaisalakan!”

10 Kalpasanna, binilin ni Yahweh ti ikan, ket impugsona ni Jonas iti kadaratan iti igid ti baybay.

Categories
Jonas

Jonas 3

Agtungpal ni Jonas iti Bilin ni Yahweh

1 Nagsao manen ni Yahweh ken ni Jonas.

2 Kinunana, “Inka iti dayta agdindinamag a siudad ti Nineve, ket ipakaammom kadagiti tattao ti insaok kenka.”

3 Nagtungpal a dagus ni Jonas ket napan idiay Nineve. Nalawa daytoy a siudad. Tallo nga aldaw a sursoren ti masakupanna.

4 Rinugianni Jonas a sinursor ti siudad. Kalpasan ti agmalmalem a pannagnana, impakdaarna: “Uppat a pulo nga aldaw manipud ita, madadaelto ti Nineve!”

5 Namati dagiti taga-Nineve iti mensahe ti Dios. Ngarud, inkeddengda a masapul nga agayunar ti tunggal maysa ket nagkawes dagiti amin a tao iti nakersang a lupot, natan-ok man wenno nanumo, a mangipakita iti panagbabawida.

6 Idi madamag daytoy ti ari ti Nineve, timmakder iti tronona sana inuksob ti pagan-anayna. Nagkawes met iti nakersang a lupot ket nagtugaw iti nabunton a dapu.

7 Kalpasanna, impakaammona kadagiti tattao ti Nineve, “Daytoy ti bilin ti ari ken dagiti ofisialesna: Awan ti mangan iti uray ania. Maiparit a mangan wenno uminum ti amin a tao, animal ken karnero.

8 Masapul nga agkawes amin a tattao ken animal iti nakersang a lupot. Masapul nga agkararag ti tunggal maysa iti Dios. Nasken a laksiden ti tunggal maysa ti dakes a kababalin ken kinaranggasna.

9 Nalabit a baliwan ti Dios ti panunotna, ket saanen nga agpungtot tapno ditay matay!”

10 Nakita ti Dios ti inaramidda. Nakitana ti panangtallikudda kadagiti dakes nga ugalida. Isut’ gapuna a nagbaliw ti panunotna ket dina dinusa ida a kas iti imbagana.