Author: admin

1 Linaondaytoy a libro ti mensahe ni Yahweh ken ni Mikias a taga-Moreset idi panawen ti panagari da Jotam, Ahaz ken Hezekias iti Juda. Dagitoy ti impakaammo ni Yahweh kenkuana maipapan iti Samaria ken Jerusalem.

Dung-aw para iti Samaria ken iti Jerusalem

2 Dumngegkayo, dakay amin a tattao;

denggenyo daytoy, dakay amin nga agnaed iti daga!

Agsaksi ti Apo aDiositi maibusor kadakayo;

agsao manipud iti nasantoan a templona.

3 Rummuar iti nasantoan a taengna;

umulog ket magna iti tapaw dagiti bantay.

4 Margaay dagiti bantay a payatanna;

malunagda a kas allid,

ket agayusda a kas danum

nga agtinnag iti derraas.

5 Mapasamak amin dagitoy agsipud ta nagbasol dagiti Israelita ket tinallikudanda ti Dios. Siasino ti akimbasol iti panagtallikud ti Israel? Dagiti tattao ti Samaria! Siasino ti nagdaydayaw kadagiti didiosen idiay Juda? Dagiti tattao ti Jerusalem!

6 Ngarud, kastoy ti kuna tiApo, “Pagbalinek ti Samaria a nagrebbaan iti away nga ubas laeng ti mabalin nga imula. Igabsuonko dagiti narba a bato ti siudad kadagiti tanap tapno agparang dagiti fondasionna.

7 Maburburak dagiti napateg nga imahen sadiay, ket mapuoran dagiti amin nga indaton dagiti agserserbi kadagiti didiosen, ken maiwarawara a kas rugit dagiti amin nga imahen. Nagtaud dagitoy kadagiti tangdan dagiti agserserbi kadagiti didiosen, ket ita, maipanda met kadagiti agserserbi kadagiti didiosen iti sabali a lugar.”

8 Kinuna ni Mikias, “Gapu iti daytoy, agasug ken agdung-awak. Magnaak a sakasaka ken lamolamo a mangipakita iti ladingitko. Agtaguobak a kas iti atap nga aso ken agdung-awak a kas iti abestrus.

9 Ngamin, saan a maagasan ti sugat ti Samaria. Dandani sagabaenen daytoy ti Juda ket dimmanonen kadagiti ruangan ti Jerusalem a pagnaedan dagiti tattaok.”

Sumungad dagiti Kabusor iti Jerusalem

10 Diyo ibagbaga kadagiti kabusortayo idiay Gat ti pannakaparmektayo. Diyo ipakita kadakuada ti panagsangityo. Tattao iti ili ti Afra, ipakitayo ti ladingityo babaen iti panagtulidyo iti tapok!

11 Tattao ti Safir, inkayo iti sabali a daga. Inkayo a silalamolamo ket nakababain ti kasasaadyo. Awan ti makaruar a sibibiag kadagiti umili ti Zaanan. Inton mangngegyo ti panagdung-aw dagiti tattao ti Bet-ezel, maammoanyo nga awan pagkamangan sadiay.

12 Agur-uray a sigagagar iti tulong dagiti tattao ti Marot, gapu ta indissuor tiApoti didigra iti asideg ti Jerusalem.

13 Dakayo a tattao ti Lakis, ipakoyo dagiti kabalioyo kadagiti lugan a pakigubat. Dakayo ti nangisungsong nga agbasol ti Jerusalem, ta tinuladyo ti dakes nga aramid ti Israel.

14 Ita, dakayo a taga-Juda, agpakadakay iti ili ti Moreset-Gat. Awan ti tulong a mauray dagiti ari ti Israel nga aggapu iti ili ti Akzib.

15 Tattao ti Maresa, imbaga tiApoa yawatnakayo iti kabusor a mangsakup iti iliyo. Mapanto aglemmeng dagiti pangulo ti Israel iti rukib ti Adullam.

16 Tattao ti Juda, pakuskosanyo dagiti uloyo a mangipakita iti ladingityo. Dung-awanyo dagiti patpatgenyo nga annak. Wen, kuskosanyo dagiti uloyo a kas iti ulo ti tumatayab a buitre, ta maipanaw dagiti annakyo a kas balud iti sabali a daga.

Ti Pagbanagan dagiti Mangidaddadanes kadagiti Napanglaw

1 Nakabutbutengto ti pagbanagan dagiti agpatpatnag nga agpanggep nga agaramid iti dakes! Nasapada nga agriing tapno ibanagda dagiti planoda apaman nga adda gundawayda.

2 No adda talon a kayatda, alaenda latta. No adda balay a tarigagayanda, agawenda. Awan ti saanda a samsamen, familia man wenno sanikua.

3 Isut’ gapuna a kuna tiApo, “Adda didigra nga isagsaganak nga idissuor kadakayo ket awanto ti makalasat. Dikayton magna a sipapalangguad inton dumteng ti aldaw a panagsagabayo.

4 Inton dumteng dayta a tiempo, aramatento dagiti tattao ti napasamak kadakayo a kas pangngarig ti didigra. Ikantadanto daytoy nasaem a kanta:

“Nadadaelkami a namimpinsan.

Innala ni Yahweh ti dagami,

ket intedna kadagiti nangitalaw kadakami a kas balud!”

5 Ngarud, awanto kadakayo ti umawat iti daga a pannakabingayna inton aldaw ti pannakaibunongda kadagiti tattao tiApo.

6 Kasabaandak dagiti tattao, ket kunada, “Dinakami man kaskasabaan. Dimo ibagbaga dagita. Dinakamto ibabain ti Dios.

7 Nailunod aya dagiti Israelita? Naibus kadin ti anus tiApo? Maaramidna aya dagita? Nasayaat ti saona kadagiti agaramid iti naimbag.”

8 Isungbat tiApo, “Ngem pagbalinenyo dagiti bagbagiyo a kabusor dagiti tattaok. Agawenyo ti kagay dagiti nasingpet a tattao a naggapu iti paggugubatan a mangipagarup nga awanen ti pagpeggadanda.

9 Pagtalawenyo dagiti babbai kadagiti tattaok kadagiti taeng nga ipatpategda. Rinabsutyo ti bendision nga impaayko kadagiti annakda.

10 Tumakderkayo ket pumanawkayo; saan a paginanaan daytoy a lugar. Gapu iti basol, nakaam-amak a pannakadadael ti mapagtengyo.

11 “Kaykayat dagitoy a tattao ti profeta a mangiwarwaras iti ulbod ken mangal-allilaw ket kunana, ‘Ipadtok nga agayus kadakayo ti arak ken naingel nga inumen.’

12 “Ngem ummongenkayto, dakay amin nga Israelita, dakay amin a natda. Pagmaymaysaenkayto a kas kadagiti karnero a mayapon iti koral. Kas iti kaadu ti arban iti pagpaaraban, mapnonto manen ti dagayo iti adu a tattao.”

13 Luktanto ti Dios ti ruangan ket iruarna ida. Agdadarisondanto iti ruangan ti siudad ket rummuarda a siwawaya. Ninto Yahweh nga arida ti mangidalan kadakuada.

Babalawen ni Mikias dagiti Pangulo ti Israel

1 Denggendak, dakayo nga agturay iti Israel. Rumbeng koma a dakayo ti mangipakat iti hustisia,

2 ngem saan met, ta guraenyo ti naimbag ket ayatenyo ti dakes. Lalatenyo a sibibiag dagiti tattaok. Ilapenyo ti lasagda kadagiti tulangda.

3 Lamutenyo dagiti tattaok. Lapgisenyo ti kudilda, tukkolenyo dagiti tultulangda ket tadtadenyo ida a kas iti karne a maipisok iti kaldero.

4 Dumtengto ti tiempo nga umasugkayo itiApongem dinakayto ipangag. Dinanto denggen dagiti kararagyo, ta dakes ti inaramidyo.

5 Al-allilawen dagiti profeta dagiti tattaok. Ikarida nga adda talna no la ket mabayadanda. Ngem no saanda a maikkan iti kuarta, butbutngenda dagiti tattao ket ibagada nga adda dumteng a gubat. Kastoy ti kuna tiApokadagitoy a profeta,

6 “Gapu ta yaw-awanyo dagiti tattaok, awanton dagiti parmatayo ket diyonton kabaelan ti agipadto. Dakayo a profeta, dandanin aggibus ti aldawyo. Lumneken ti init kadakayo.”

7 Maibabainto dagiti mangibaga iti mapasamak iti masakbayan ta saan a matungpal dagiti ipadtoda. Maupaydanto agsipud ta saan ida a sungbatan ti Dios.

8 Ngem no maipapan kaniak, punnoennak ti espiritu tiApoken iti pannakabalinna, ipakaammona kaniak ti hustisia ket paturdennak a mangibutaktak iti basol dagiti Israelita.

9 Denggendak, dakayo nga agtuturay iti Israel, dakayo a manggura iti kinahustisia ken mangkillo iti nalinteg.

10 Bangonenyo ti Jerusalem a siudad ti Dios babaen iti panagpapatay ken kinadakes.

11 Agawat dagiti agtuturay iti siudad iti pasuksok. Agpatangdan dagiti papadi no ilawlawagda ti linteg. Agdawat dagiti profeta iti kuarta no agipadtoda. Ibagada nga adda kadakuada tiApo. Kunada, “Di met aya adda kadatayo tiApo? Awan ti dumteng a didigra kadatayo.”

12 Ngarud,gapu kadakayo, maaradonto ti Sion a kas iti maysa a talon. Marebbekto ti Jerusalem ket agbalin a nagrebbaan. Agbalinto met a kabakiran ti bantay nga ayan ti Templo.

Ti Sangalubongan a Kappia iti Panagturay ni Yahweh

1 Iti masakbayan, agbalinto

a kangatoan a bantay

ti bantay nga ayan ti Templo ni Yahweh.

Agdadarisonto dagiti adu a nasion a mapan sadiay.

2 Adunto a tao ti mapan ket kunada,

“Sumang-attayo iti bantay tiApo;

intay iti Templo ti Dios ti Israel.

Ammoentayo ti kayatna nga aramidentayo;

surotentayo ti dalan a pinilina.

Manipud Sion agsao kadagiti tattaona;

aggapu idiay Jerusalem ti pannursurona.”

3 Pagkakappiaennantodagiti agsusuppiat a nasion,

dagiti nabibileg a pagilian

nga adda iti asideg wenno iti adayo.

Pandayendanto nga arado dagiti kampilanda,

ket aramidendanto a kumpay dagiti gayangda.

Saanton nga aggugubat dagiti pagilian;

didanton agsagana a makigubat.

4 Agbiagtoa sitatalna ti tunggal maysa

iti kaubasanna ken kadagiti kayona nga igos,

ket awanto ti pagbutnganna.

Inkari daytoy tiApoa Mannakabalin-amin.

5 Agdaydayaw ken agtulnog ti tunggal nasion iti diosna, ngem agdaydayaw ken agtulnogtayo itiApoa Diostayo iti agnanayon nga awan inggana.

Agsubli dagiti Israelita

6 Kuna tiApo, “Umayen ti tiempo nga ummongek dagiti tattao a naipan iti sabali a daga, isuda a nagsagaba iti pannusak.

7 Awan ti kabaelanda ket adayoda iti dagada, ngem ipamuspusak a mangabaroanan manen dagiti natda agingga nga agbalinda a nabileg a nasion. Iturayakto ida idiay Bantay Sion manipud iti dayta a tiempo agingga iti agnanayon.”

8 Sika, Jerusalem, nga ayan ti Dios a mangbambantay kadagiti tattaona, sikanto manen ti kangrunaan a siudad ti pagarian a sigud a pagturayam.

9 Apay nga aganug-ogka? Apay a kaska la agpasikal a makarikna iti ut-ot? Gapu kadi ta awan ti arim ken natayen dagiti mamalbalakad kenka?

10 Agtiritirkayo iti ut-ot ket agasugkayo,dakayo a tattao ti Jerusalem, a kas iti babai a dandani agpasngay. Ita, masapul a panawanyo ti siudad ket inkayo agnaed iti away. Masapul nga inkayo idiay Babilonia. Sadiayto ti pakaispalanyo, ket isalakannakayto tiApokadagiti kabusoryo.

11 Adu a nasion ti nagmaymaysa a mangdarup kenka. Kunada, “Masapul a madadael ti Jerusalem! Kitaentayo ti pannakarebba daytoy a siudad!”

12 Ngem saan nga ammo dagitoy a nasion ti pampanunoten tiApo. Dida ammo a panggepna nga ummongen ida tapno madusada, kas iti pannakaummong ti mairik a trigo.

13 Kuna tiApo, “Tattao ti Jerusalem, inkayo dusaen dagiti kabusoryo! Pagbalinenkayo a kas iti napigsa a toro a baka a limmandok ti sarana ken bimronze ti kukona. Ibaddebaddekyo dagiti adu a nasion agingga a marumrumekda. Idatagyonto kaniak dagiti inagawda a kinabaknang; wen, siak nga Apo ti entero a lubong.”

1 Tattao ti Jerusalem, aglemmengkayo kadagiti sarikedked! Nalakubtayon! Darupendan ti pangulo ti Israel!

Ikari ti Dios a Mangted iti Agturay a Taga-Betlehem

2 KunatiApo, “Betlehem iti Efrata, sika ti maysa kadagiti kabassitan nga ili ti Juda. Ngem pataudek kenka ti maysa a mangituray iti Israel a nagtaud ti kapuonanna idi ugma.”

3 Ngarud, yawatto ni Yahweh dagiti tattaona kadagiti kabusorda agingga nga ipasngay ti babai ti anakna a lalaki. Kalpasanna, agsublinto dagiti kadaraanna a naitalaw a kas balud ket maitiponda kadagiti kailianda.

4 Inton umay, iturayannanto dagiti tattaona babaen iti bileg nga aggapu itiApoken ti dayag tiApoa Dios. Natalgedto ti panagbiag dagiti tattaona agsipud ta bigbigento dagiti tattao iti sangalubongan ti kinatan-okna,

5 ket yegnanto ti kappia.

Pannakawayawaya ken Pannakadusa

No rauten dagiti taga-Asiria ti pagiliantayo ket rebbaenda dagiti sarikedkedtayo, ipasangotayo a mangsaranget kadakuada dagiti kapigsaan a pangulotayo.

6 Parmekendantoti Asiria, ti daga ni Nimrod, babaen kadagiti kampilanda. Ispalendataytokadagiti taga-Asiria inton sakupenda ti dagatayo.

7 Addanto dagiti makalasat kadagiti kaputotan ni Jacob. Mayarigdanto iti makapabang-ar a linnaaw nga aggapu itiApoa maipaay kadagiti adu a nasion, kas iti arbis a mangbisibis kadagiti agtubtubo a mula. Agpannuraydanto iti Dios, saan nga iti tao.

8 Addadanto kadagiti sidong dagiti nasnasion. Mayarigdanto iti leon nga agbirbirok iti taraonna iti bakir wenno iti pagpastoran. Sumrek iti ayan dagiti karnero ket tukmaan ken rangrangkayenna ida. Awan ti mangisalakan kadakuada.

9 Parmekento dagiti natda a kaputotanna dagiti kabusorda ket ikisapdanto ida amin.

10 Kuna tiApo, “Iti dayta a tiempo, italawkonto dagiti kabalioyo ket dadaelekto amin a luganyo a pakigubat.

11 Rebbekekto dagiti siudad iti dagayo ket rebbaekto dagiti sarikedkedyo.

12 Dadaelekto dagiti anting-anting nga ar-aramatenyo. Pukawekto amin a mammadlesyo.

13 Dadaelekto dagiti imahen ken dagiti nasagradoan nga adigi a bato a pagdaydayawanyo. Dikayton agdaydayaw kadagiti inaramidyo met laeng.

14 Duprakekto dagiti imahen ni Asera a didiosen iti dagayo, ket dadaelekto dagiti siudadyo.

15 Iti nakaro a pungtotko, balsekto dagiti nasion a di nagtulnog kaniak.”

Ti Pammabasol ni Yahweh iti Israel

1 Denggenyo ti darum tiApoa maibusor iti Israel! Tumakderka, OApo, ket idatagmo ti pammabasolmo a saksian dagiti bantay ken dagiti turod.

2 Denggenyo ti pammabasol tiApo, dakayo a bantay, dakayo nga agnanayon a fondasion ti daga. Idarum tiApodagiti tattaona. Adda kasona a maibusor iti Israel.

3 Kuna tiApo, “Tattaok, ania aya ti naaramidko kadakayo. Kasano a nagbalinak a dadagsenyo? Sumungbatkayo!

4 Inruarkayidiay Egipto. Winayawayaankayo iti pannakatagabuyo. Imbaonko da Moises, Aaron ken Miriam a mangipangulo kadakayo.

5 Tattaok,lagipenyo ti panggep idi ni Balak nga ari ti Moab nga aramiden kadakayo ken ti sungbat kenkuana ni Balaam nga anak ni Beor. Lagipenyo dagiti napasamak iti dalan manipud siudad ti Acacia agingga idiay Gilgal. Lagipenyo dagitoy ket mabigbigyo no ania ti inaramidko a pangisalakan kadakayo.”

Ti Pagayatan ni Yahweh

6 Ania ti itedko itiApoa Dios ti langit inton dumatagak nga agdaydayaw kenkuana? Mangitugotak kadi kadagiti kasayaatan nga urbon ti baka a puorak a kas daton kenkuana?

7 Maragsakan kadi tiApono ikkak iti rinibu a karnero wenno saan nga agpatingga a karayan ti lana ti olibo? Idatagko kadi a kas daton ti inauna nga anakko a pagikarok kadagiti basolko?

8 Saan! Inlawlawag kadakayo tiApono ania ti naimbag. Daytoy ti dawatenna kadatayo: aramidentayo ti nalinteg, ipakitatayo ti di agbalbaliw a panagayat, ken agtulnogtayo a sipapakumbaba iti Diostayo.

9 Maibilang a kinasirib ti panagbuteng itiApo. Aw-awaganna ti siudad. Kunana, “Dumngegkayo, dakayo a tattao a natipontipon iti siudad.

10 Iti uneg dagiti balbalay dagiti managdakdakes, adda dagiti sanikua a sinaurda. Agar-aramatda kadagiti saan a husto a pagtimbangan; kagurak daytoy nga aramid.

11 Mapakawanko aya dagiti agusar iti saan a husto a pagsukatan ken timbangan?

12 Naranggas dagiti babaknang ket gundawayanda dagiti napanglaw. Naulbod dagiti tattao.

13 Ngem ita, rugiankana dusaen ken dadaelen gapu kadagiti basolmo.

14 Mangankanto ngem dikanto mabsog; kinapudnona, mariknamto pay laeng ti bisinmo. No adda ipaknim a sanikua dimonto masalakniban. Madadaelto iti gubat ti aniaman nga idulinmo.

15 Agmulakanto ngem saan a sika ti agapit. Agpespeskanto iti olibo ngem saan a sika ti mangaramat iti lanana. Agaramidkanto iti arak ngem saan a sika ti uminum.

16 Maaramiddagitoy ta tultuladem dagiti dakes nga ugali ni Ari Omri ken ni Ari Ahab nga anakna. Itultuloymo dagiti pagannurotanda. Ngarud, yegkonto ti pannakadadaelmo ket pagang-angawandanto dagiti amin a tattaom. Lalaisendakayto dagiti amin a tattao.”

Ti Dakes a Kababalin ti Israel

1 Awanen ti namnama! Kaslaak la iti mabisin a tao nga awan ti masarakanna a bunga ti kayo ken ubas iti kaubasan. Naburas aminen dagiti ubas ken dagiti naimas nga igos.

2 Awanen ti uray maysa a nalinteg a tao a masarakan iti pagilian. Awanen ti napudno iti Dios. Agur-uray ti tunggal maysa iti gundawayna a mangpapatay iti padana a tao. Anupen ti tunggal maysa ti kailianna.

3 Nalaingda amin nga agaramid iti dakes. Dumawat dagiti ofisiales ken dagiti hues iti pasuksok. Ikeddeng ti mararaem a tao ti kayatna. Iti kasta, agtutulagda amin nga agaramid iti dakes.

4 Uray ti kasayaatan ken kalintegan kadakuada mayarigda iti siitsiitan a mula.

Ita, dimtengen ti aldaw a dusaen ti Dios ida, kas imballaagna kadagiti profeta nga agbambantay kadakuada. Ita, dida ammon ti aramidenda.

5 Dikay agtalek iti kaarruba wenno iti gayyemyo. Uray iti asawam annadam ti sawem kenkuana.

6 Kadagitoya tiempo, saanen a raemen dagiti annak a lallaki dagiti ammada. Sukiren dagiti annak a babbai dagiti innada. Apaen dagiti manugang a babbai dagiti katuganganda a babbai. Dagiti kabusor ti maysa a tao isuda dagiti kamkameng ti familiana.

7 Ngem agpannurayak itiApo. Mangnamnamaak kenkuana a mangisalakan kaniak. Ipangagnak ti Diosko.

Yeg ni Yahweh ti Pannakaisalakan

8 Dakayo a kabusor, dikay agragsak iti dakes a napasamak kadakami. Natuangkami ngem bumangonkami manen. Addakam ita iti kasipngetan ngem ikkanakami tiApoiti silaw.

9 Nagbasolkami itiApo, isut’ gapuna nga ibturanmi iti apagbiit ti pungtotna. Ngem iti kamaudiananna, ikaluyanakami. Ikalintegannakami kadagiti naipalak-am kadakami. Ipannakami iti lawag. Makitaminto ti panangisalakanna!

10 Makitanto daytoy dagiti kabusorko ket maibabaindanto—dagiti nangang-angaw kadakami a kunkunada, “Sadino ti ayan tiApoa Diosyo?” Makitaminto ti pannakaparmek ken pannakapayatpayatdaa kasla pitak kadagiti kalsada.

11 Tattao ti Jerusalem, dumtengen ti tiempo a bangonenyo manen dagiti bakud ti siudad. Lumawanto ti sakupyo.

12 Agsublinto dagiti tattaoyo. Aggapudanto iti amin a lugar: Asiria iti daya, Egipto iti abagatan, iti sakup ti Karayan Eufrates, kadagiti ballasiw ti taaw ken adayo a bambantay.

13 Ngem aglangalangto ti daga gapu iti kinadakes dagiti tattao nga agnanaed kenkuana.

Kaasian ni Yahweh ti Israel

14 Aywanam dagiti pinilim a tattao, OApo. Ipastormo ida a kas iti arban. Nupay agwaywayasda iti let-ang, nalikmutda iti nadam-eg a daga. Ipanmo ida iti nalangto a pagaraban ti Basan ken Galaad a kas idi un-unana.

15 Ipakitaannakami kadagiti milagro, OApo, a kas iti inaramidmo idi inruarnakami idiay Egipto.

16 Makitanto daytoy dagiti nasion ket didanto agballigi uray kasano ti pigsada. Didanto makasao wenno makangngeg.

17 Kasladanto uleg nga aguyas iti tapok, kas kadagiti agkarkarayam a parsua nga agtigtigerger iti butengda a rummuar iti paglemlemmenganda. Dumatagdanto a sibubuteng itiApoa Diostayo.

18 Awan ti dios a kas kenka, OApo. Pakawanem dagiti basol dagiti tattao a nakalasat. Dika koma agpungtot iti agnanayon, no di ket ipakitam kadakami ti di agbalbaliw nga ayatmo.

19 Kaasiannakami manen. Payatpayatem dagiti basolmi ket ipanmo ida iti lansad ti taaw.

20 Ipakitam ti kinapudnom ken ti di agbalbaliw nga ayatmo kadagiti tattaom nga Israelita a kaputotan ni Abraham ken ni Jacob, kas inkarim kadagidi kapuonanmi idi punganay.