Author: admin

Categories
Nahum

Nahum 3

1 Asi pay ti Nineve, ti siudad

nga ulbod ken mammapatay!

Napno iti kinabaknang a sinamsam ken inagaw.

2 Denggenyo ti kanabsiit ti saplit,

ti karadakad dagiti pilid,

ti dalagudog dagiti kabalio,

ti darison dagiti lugan a pakigubat.

3 Dumarup dagiti nakakabalio,

sumilap dagiti kampilan, gumilap dagiti gayang!

Ginabsuon dagiti bangkay,

di mabilang dagiti natay.

Maitikleb dagiti tattao

kadagiti agkaiwara a naidasay.

4 Madusdusan ti balangkantis a Nineve,

makagargari ken makapatay ti pintasna.

Kinayawanna dagiti nasion,

ket ginargarina ida.

5 Kuna ni Yahweh a Mannakabalin-amin,

“Dusaenkanto, Nineve!

Labusankanto tapno makitadaka dagiti pagilian

ket maimatanganda ti amin a pakaibabainam.

6 Ipakitakto kenka ti gurak,

ket gaburankanto iti rugit;

maalliawto dagiti tattao a kumita kenka.

7 Itarayandakanto ti amin a kumita kenka.

Kunadanto, ‘Narban ti Nineve.

Siasino ti makipagrikna kenkuana?

Siasinonto ti mayat a mangliwliwa kenkuana?’”

8 Nineve, nasaysayaatka kadi ngem ti Tebes a kabesera ti Egipto? Adda met karayanna a mangsalaknib kenkuana a kas iti bakud—ti Karayan Nile ti sarikedkedna.

9 Awan patingga ti pannakabalinna, inturayanna ti Sudan ken Egipto. Kaduana idi ti Libia.

10 Ngem kaskasdi a naitalaw a kas balud dagiti taga-Tebes. Nakabkabil agingga a natay dagiti annakda iti amin a nagsulian ti kalsada. Naipanaw a sikakawar dagiti mararaem a tattaona, ket nagbibingayan dagiti nangitalaw kadakuada.

11 Uray sika, Nineve, mabartek ken agwasangwasangkanto. Agbirokkanto met iti pagkamangam manipud kadagiti kabusormo.

12 Mayarigto dagiti amin a sarikedkedmo kadagiti igos a naluomen ti bungada. No magunggonda, agtinnag dagiti bungada iti ngiwat ti mangan!

13 Kasla babbai dagiti soldadom, ket awan gaway ti pagiliam kadagiti kabusormo. Mauramto dagiti balunet dagiti ruanganmo.

14 Sumakdoka iti danum a pangsagana iti pannakalakub, ket pabilgem dagiti sarikedkedmo. Lutlotem ti daga, ket isaganam dagiti pagsukogan a pagaramid kadagiti ladrilio.

15 Uray agan-anoka, mauram wenno mapapataykanto iti paggugubatan. Maikisapkanto a kas kadagiti mula nga ibusen dagiti dudon.

Immaduka a kas iti pangen ti dudon!

16 Ad-adu dagiti pagtagtagilakoem ngem dagiti bituen sadi langit. Ngem ita, awandan a kas kadagiti dudon a tumayab ken pumanaw.

17 Dagiti ofisialesmo kasda la pangen ti dudon a kumpet iti bakud no nalam-ek. Ngem no aginiten, tumayabda ket awan ti makaammo iti pagturonganda.

18 Sika, ari ti Asiria, natayen dagiti gobernadormo, ket matmaturogen iti agnanayon dagiti natan-ok a tattaom! Nawarawara dagiti tattaom kadagiti bambantay, ket awanen ti mangyawid kadakuada.

19 Saanen a maagasan dagiti dunormo, ket saanen a maimbagan dagiti sugatmo. Maragsakanto dagiti amin a makadamag, iti pannakadadaelmo ket agsipatdanto iti ragsakda. Adda aya nakalibas iti saan nga agpatingga a kinaranggasmo?

Categories
Habakuk

Habakuk 1

1 Daytoy ti mensahe nga impakaammo ni Yahweh ken ni profeta Habakuk.

Agasug ni Habakuk gapu iti Kaawan ti Kinalinteg

2 OApo, kasano pay kabayag ti panagdawatko iti tulongmo sakbay nga ipangagnak ket isalakannakami iti kinaranggas?

3 Apay nga ipakitam kaniak ti adu a rigat ken kinadakes? Nalikmutak iti pannakadadael ken kinaranggas. Adda panagaapa ken panagriringgor iti amin a lugar.

4 Awan ti maaramid ti linteg ken awan serserbina. Pulos a saan a matungpal ti hustisia. Ilupitlupit dagiti managdakdakes dagiti nalinteg; iti kasta, maballikug ti hustisia.

Ti Sungbat ni Yahweh

5 Kinunani Yahweh kadagiti tattaona: “Siputanyo dagiti nasion iti lawlawyo, ket masdaawkayo iti makitayo. Addanto aramidek ket diyonto patien no maibaga kadakayo.

6 Pagturayekdagiti taga-Babilonia, dagiti tattao a naranggas ken darasudos. Agdakiwasda iti entero a daga tapno parmekenda dagiti sabali a pagilian.

7 Isaknapda ti danag ken buteng ket iti kinatangsitda, aramidenda ti kaykayatda.

8 “Naparpardas a tumaray dagiti kabalioda ngem dagiti leopardo, ket narangranggasda ngem dagiti mabisin a lobo. Aggapu iti adayo dagiti nakakabalio a tattaoda. Agkur-ay dagiti kabalioda. Umayda a kasla agila a mangsippayot iti kanenda.

9 “Naranggas ti idadarup dagiti armadada, ket mabuteng dagiti tattao iti isusungadda. Saan a mabilang a kas iti darat ti kaadu dagiti baludda.

10 Laisenda dagiti ari ket katawaanda dagiti natan-ok nga ofisiales. Awan ti sarikedked a makalapped kadakuada. Buntuonenda ti daga iti abayna sada parmeken.

11 Kalpasanna, lumabasda a kas angin ket awandan, dagitoy nailunod a lallaki a pannakadiosda ti bilegda.”

Agasug manen ni Habakuk ken ni Yahweh

12 OApo, sikan ti Dios manipud idi punganay. Sika ti Diosko a nasantoan ken agnanayon. OApoa Diosko ken mangaywan kaniak, pinilim dagiti taga-Babilonia ket pinapigsam ida tapno mabalindakam a dusaen.

13 Ngem kasano a maibturam dagitoy mangliliput ken managdakdakes a tattao? Nasantoan unay dagiti matam ket dida maibturan a kitaen ti dakes. Dimo kayat a kitaen dagiti tattao nga agaramid iti dakes. Apay ngarud nga agulimekka idinto ta dadaelenda dagiti tattao a nalinlinteg ngem isuda?

14 Apay nga ibilangmo dagiti tattao a kas ikan wenno kas pangen ti igges?

15 Kasla ikan dagiti tattao a banniitan dagiti taga-Babilonia. Guyodenda ida iti iket ket agririawda iti ragsak gapu iti nakalapanda.

16 Agdaydayawda ken agidatonda pay kadagiti iketda agsipud ta dagiti iketda ti mangted kadakuada kadagiti kasayaatan a taraon.

17 Itultuloyda kadi nga usaren dagiti kampilanda ket awan asida a mangdadael kadagiti nasion?

Categories
Habakuk

Habakuk 2

Ti Sungbat ni Yahweh ken ni Habakuk

1 Umuliak iti torrek a pagwanawanan ket urayek ti ibaga tiApoa sawek ken no ania ti isungbatna iti asugko.

2 Ket daytoy ti sungbat tiApo, “Isuratmo iti tapi a damili ti ipakaammok kenka tapno nalaka a basaen.

3 Isuratmoagsipud ta saan pay a mapasamak. Ngem dandanin dumteng ti tiempo, ket mapasamakto ti ipakitak kenka. Kasla mabayag ti idadatengna ngem urayem. Awan duadua a mapasamak iti tiempo nga inkeddengko ket saanto nga agtaktak.

4 Daytoyti mensahe: ‘Saanto a makalasat dagiti managdakdakes, ngem agbiagto ti nalinteg babaen iti pammatina.’”

Ti Daksanggasat a Pagbanagan ti Managdakdakes

5 Mangallilaw ti kinabaknang. Napalangguad dagiti naagum ken darasudosda a tattao. Kasda la iti patay a pulos a di mapnek. Isut’ gapuna nga agsasaruno dagiti nasion a parmekenda nga agpaay kadakuada.

6 Laisen dagiti naparmek a tattao dagiti nangparmek kadakuada ket ipakitada ti gurada kadakuada. Kunadanto: “Agalakayo iti saanyo a kukua, ngem nailunodkayo. Kaano ti panagpatingga ti panangpabaknangyo iti bagiyo babaen iti panangsuitikyo kadagiti nakautang kadakay iti kuarta?”

7 Ngem diyonto mapupuotan a dakayo a nangparmek kadagiti dadduma, makautangkayto met ket kapilitan nga agbayadkayto iti interes. Umayto dagiti kabusor ket pagtigergerendakayto. Samsamandakayto.

8 Sinamsamanyo dagiti tattao iti adu a nasion, ngem samsamandakayto met dagiti nakalasat, gapu kadagiti panagpapatay ken kinaranggas nga inaramidyo kadagiti tattao iti lubong ken kadagiti siudadda.

9 Nakabutbuteng ti pagbanagam! Bimmaknang ti familiam gapu kadagiti tinakawmo ket pinadasmo a pagbalinen a natalged ti balaymo tapno saan a maan-ano iti ranggas ken peggad.

10 Ngem naibabain ti familiam gapu kadagiti dakes a pinanggepmo. Gapu iti adu a dinadaelmo a pagilian, inyegmo met laeng ti pannakadadaelmo.

11 Uray dagiti bato iti diding, umkisda a bumusor kenka. Tumulad met dagiti pasanggir ti balay.

12 Nakabutbuteng ti pagbanagam! Impasdekmo ti maysa a siudad babaen iti kinadakes, ket binangonmo babaen iti panagpapatay.

13 Agbambannog dagiti nasion a pinarmekmo iti awan serserbina, ket mauram dagiti amin a binangonda. Inaramid daytoy ni Yahweh a Mannakabalin-amin.

14 Ngemmapnonto ti daga iti pannakaammo iti dayag ni Yahweh a kas iti pannakapunno dagiti taaw iti danum.

15 Nakabutbuteng ti pagbanagam! Gapu iti pungtotmo, inrurumen ken imbabainmo dagiti kaarrubam. Pinagbasingbasingmo ida a kasda la nabartek.

16 Maibabainkanto iti kasta unay imbes a maidaydayawka. Mabartek ken agibar-ibarkanto met. Ipainumto kenka tiApoti bukodmo a kopa ti pannakadusa, ket agsagabakanto iti pannakaibabain.

17 Pinukanmo dagiti kayo iti bakir ti Libano, ket ita, mapukanka met. Pinataymo dagiti animal iti bakir, ket ita, butbutngendaka dagiti animal. Mapasamakto daytoy gapu kadagiti panagpapatay ken kinaranggas nga impaaymo kadagiti tattao iti daga ken kadagiti siudadna.

18 Ania ti serbi ti didiosen? Aramid laeng ti tao, ket awan ti maibagana kenka no di la pasig nga ulbod. Ania ti pagimbagan a maited ti panagtalek ti nangaramid iti dayta a didiosen—maysa a didiosen a di pay makasao?

19 Asika pay! Kunam iti maysa a kayo, “Agriingka!” wenno iti maysa a bato, “Bumangonka!” Adda aya maipaltiing kenka ti maysa nga imahen? Mabalin a nakalupkopan iti pirak ken balitok, ngem awan biagna.

20 Adda tiApoiti nasantoan a Templona. Agulimek koma ti tunggal maysa ditoy daga iti sangoananna.

Categories
Habakuk

Habakuk 3

Ti Kararag ni Habakuk

1 Kararag daytoy ni profeta Habakuk:

2 OApo, nadamagko dagiti inaramidmo,

ket kasta unay ti siddaawko.

Aramidem met kadi ita

dagiti naindaklan a gapuanam?

Mangngaasika kadi

uray no makapungtotka?

3 Umay manen ti Dios manipud Teman;

umay ti Nasantoan a Dios

manipud kadagiti turod ti Paran.

Abbongan ti dayagna ti tangatang;

mapno ti daga iti pannakaidaydayawna.

4 Umay a buyogen ti raniag ti kimat;

tumpuar ti lawag iti imana,

a nakailemmengan ti pannakabalinna.

5 Ibaonna ti sakit iti sangoananna;

bilinenna a sumaruno ti patay.

6 Agginggined ti daga no agsardeng;

agkintayeg dagiti nasion no tumalliaw.

Margaay dagiti agnanayon a bantay;

lumned dagiti agnanayon a turod,

dagiti turod a nagnaanna idi un-unana.

7 Nakitak a nagbuteng dagiti taga-Cusan,

ket nagtigerger dagiti taga-Midian.

8 Pinagpungtotdaka kadi dagiti karayan, OApo?

Ti kadi baybay ti nangpaunget kenka?

Nagsakayka kadagiti ulep;

dagiti ulep a mangyeg iti bagio ti nagluganam,

idi yegmo ti balligi kadagiti tattaom.

9 Nagsaganaka a mangusar iti baim,

sisasaganaka a mangibiat kadagiti panam.

Inugisam ti daga kadagiti karayan.

10 Nakitadaka dagiti bantay ket nadayyegda;

nagtinnag ti napigsa a tudo.

Nagdaranudor dagiti danum iti uneg ti daga,

ket dimmakkel dagiti dalluyonda.

11 Iti gilap ti bumanesbes a panam

ken ti rimat ti sumilsilap a gayangmo,

nagintek ti init ken ti bulan.

12 Sipupungtotka a nagdaliasat iti daga,

siuungetka a nangbaddebaddek kadagiti nasion.

13 Napanmo insalakan dagiti tattaom

ken ti pinilim nga arim.

Pinapataymo ti pangulo dagiti managdakdakes,

ket inkisapmo a namimpinsan dagiti pasurotna.

14 Sinalput dagiti panam ti pangulo ti armadana,

idi immay ti armada a kas bagio a mangwarawara kadakami,

a siraragsak a kas kadagiti sililimed

a mangidadanes kadagiti napanglaw.

15 Sikakabalioka a nangbaddebaddek iti baybay,

ket nagburek ti nadawel a danum.

16 Mangngegko amin dagitoy ket agkintayegak;

agtigerger dagiti bibigko iti buteng.

Agkapsut ti bagik,

ket agkutukot dagiti tumengko.

Anusak nga urayen ti idadateng ti tiempo

a panangdusa ti Dios kadagiti mangraut kadakami.

17 Uray no awan ti bunga dagiti igos,

ken awan ti bunga dagiti ubas;

uray no awan maapit nga olibo

ken awan maapit kadagiti talon;

uray no matay dagiti amin a karnero,

ken awan nagyan ti pagaponan dagiti baka;

18 agrag-oakto latta itiApo

agragsakakto iti Dios a salakanko.

19 PapigsaennaktiApo.

Pasiglatennak a kas iti ugsa

ken papagnaennak kadagiti nangato

ken natalged a disso.

Categories
Sofonias

Sofonias 1

1 Daytoyti mensahe ni Yahweh nga imbagana ken ni Sofonias idi ni Josias nga anak ni Amon ti ari ti Juda. (Nagtaud ni Sofonias iti familia ni Ari Hezekias a kapuonan da Amarias, Gedalias ken Cusi.)

Ti Aldaw ti Panangukom ni Yahweh

2 Kinuna ni Yahweh, “Dadaelekto ti amin nga adda iti daga,

3 amin a tattao ken animal, tumatayab ken ikan. Ipamuspusak ti pannakatnagdagiti managdakdakes. Pukawekto ti sangkataoan iti rabaw ti daga ket awanto ti makalasat. Ni Yahweh ti nagsao iti daytoy.

4 “Dusaekto dagiti tattao iti entero a Juda ken Jerusalem. Pukawekto ti maudi a pakakitaan iti panagdaydayaw ken ni didiosen a Baal sadiay, ket awanto ti makalagip uray dagiti papadi nga agserserbi kenkuana.

5 Dadaelekto ti siasinoman a mapan iti tuktok ti balay nga agdaydayaw iti init, iti bulan ken kadagiti bituen. Dadaelekto pay dagiti agdaydayaw kaniak ken mangisapata iti kinapudnoda kaniak ngem pagsapatada met ti nagan ni didiosen a Milcom.

6 Pukawekto dagiti saanen a sumurot kaniak, dagiti saan nga umay wenno paidalan kaniak.”

7 Umasidegen ti aldaw a panagtugaw tiApoa kas ukom. Agulimekkayo iti imatangna. Agsagsagana tiApoa mangisakrifisio kadagiti tattaona ket inawisna dagiti kabusor a mangdadael iti Juda.

8 Kuna tiApo, “Iti dayta nga aldaw a panagparti, dusaekto dagiti ofisiales, dagiti annak ti ari ken amin a tumultulad kadagiti ugali dagiti ganggannaet.

9 Dusaekto dagiti agdaydayaw a kasla kadagiti pagano, dagiti agtakaw ken agpapatay tapno pusekenda ti templo ti diosda kadagiti sinamsamda.”

10 Kuna tiApo, “Iti dayta nga aldaw, mangngegyonto ti ikkis nga aggapu iti Ruangan ti Ikan idiay Jerusalem. Mangngegyonto ti sangsangit dagiti tattao iti baro a paset ti siudad. Matimudyonto ti napigsa a daranudor ti pannakarba kadagiti turod.

11 Inton mangngegyo daytoy, agsangit ken agdung-awkayo, dakayo nga agnaed iti akimbaba a paset ti siudad, gapu ta matayto amin nga agtagtagilako!

12 “Iti dayta a tiempo, mangalaakto iti silaw ket sukimatek ti Jerusalem. Dusaekto dagiti tattao a pulos nga awan ti pannakipagriknada iti padada a tao ken mangipagarup a natalgedda ken agkuna iti bagida, ‘Awan ti aramiden ti Dios, naimbag man wenno dakes.’

13 Masamsamto ti kinabaknangda. Madadaelto dagiti balbalayda. Didanto agnaed kadagiti balay a patpatakderenda wenno uminum iti arak ti ubas nga imulmulada.”

14 Asidegen ti naindaklan nga aldaw ni Yahweh—asideg unayen ket sipapardas nga umay! Nasaemto dayta nga aldaw, ta uraydagiti katurdan a soldado agsangitdanto iti kaawanen namnamada.

15 Aldaw ti pungtot dayta nga aldaw, aldaw ti rigat ken riribuk, aldaw ti panagdadael ken panagrakrak, aldaw ti sipnget ken lidem, aldaw ti ulep ken bagio,

16 aldaw ti uni ti trumpeta a mangipakdaar iti gubat, aldaw ti ikkis dagiti mannakigubat a mangraut kadagiti nasarikedkedan a siudad ken nangato a pagwanawanan.

17 Kuna tiApo, “Yegkonto dagiti kakasta a didigra iti sangkataoan ket urayto la kasla bulsek nga agkarkarawa a magna ti tunggal maysa. Nagbasolda kaniak ket kasla danum a maibuyatto ti darada; agkaiwaranto iti daga dagiti agruprupsa a bangkayda.”

18 Iti aldaw a panangiparang tiApoiti pungtotna, saanto a maisalakan ida uray ti amin a pirak ken balitokda. Madadaelto ti entero a daga iti apuy ti pungtotna. Yegnanto ti kanibusanan—wen, ti apagdarikmat a kanibusanan ti amin nga agnaed iti daga.

Categories
Sofonias

Sofonias 2

Dawat nga Agbabawi dagiti Tattao

1 Dakayo a nasion a dina ammo ti agbain, agriingkayo

2 sakbay a malaylaykayo ket mataykayo a kas iti sabong, sakbay nga agdissuor kadakayo ti gumilgil-ayab a pungtot tiApo, sakbay a dumteng ti aldaw a panangiparangna iti pungtotna.

3 Agkamangkayo itiApo, dakayo a napakumbaba a tattao iti daga nga agtulnog kadagiti bilinna. Agaramidkay iti naimbag ket agpakumbabakay iti imatang tiApo. Nalabit a malisianyonto ti pannakadusa iti dayta nga aldaw a panangiparangarang tiApoiti pungtotna.

Ti Kanibusanan dagiti Pagilian a Kabangibang ti Israel

4 Awantoti mabati iti siudad ti Gaza. Awanton matagtagitao iti Askelon. Mapaksiatto dagiti taga-Asdod sakbay ti tengnga ti aldawket maitalawto dagiti taga-Ekron.

5 Dakayo a Filisteo, dakayo nga agnaed iti igid ti baybay, saanyo a maliklikan ti pannakadusayo. Intuyangen tiApoti sentensiayo. Dadaelennakayo ket awanto ti uray maysa a matda kadakayo.

6 Agkaruotanto ti dagayo iti igid ti baybay. Aglangalangto a pagaraban ti karnero.

7 Sakupento dagiti nakalasat a taga-Juda ti dagayo. Ipaarabdanto dagiti arbanda sadiay ket maturogdanto kadagiti balbalay iti Askelon. Addanto kadakuada tiApoa Diosda ket parang-ayennanto manen ida.

8 KunatiApoa Mannakabalin-amin, “Nangngegko ti panangum-umsi ken pananglalais dagiti Moabita ken Ammonita kadagiti tattaok. Ipaspasindayagda ti panggepda a mangagaw iti dagada.

9 Isapatakiti naganko a sibibiag a Dios ti Israel a madadaelto ti Moab ken Ammon a kas iti pannakadadael idi ti Sodoma ken Gomorra. Agbalindanto a pagaramidan iti asin. Agkaruotan ken nagrebbaandanto iti agnanayon. Mapanto agsamsam dagiti makalasat a tattaok iti pagilianda ket alaendanto ti dagada.”

10 Kastoyto ti pannakadusa dagiti tattao ti Moab ken Ammon gapu iti kinatangsit ken kinapasindayagda ken gapu iti pananglalaisda kadagiti tattao tiApoa Mannakabalin-amin.

11 Nakabutbutengto ti ipalak-amna kadakuada. Pukawennanto amin a didiosen ditoy daga. Kalpasanna, agdaydayawto kenkuana ti amin a nasion, tunggal maysa iti bukodna a daga.

12 Uraydakayo a taga-Etiopia, patayennakayto met tiApo.

13 UsarentotiApoti pannakabalinna a mangdadael iti Asiria. Pagbalinennanto a langalang ti Nineve. Agbalinto a natikag a lugar.

14 Sadiayto ti pagaponan dagiti arban ken amin a kita ti animal. Agnaedto dagiti kullaaw kadagiti rebba a patakderna ket mangngegto ti pukkawda kadagiti tawa. Aguninto dagiti wakkadagiti agdan. Maikkatto dagiti tarikayo a sedro dagiti balbalay.

15 Daytoyto ti mapasamak iti siudad a natangsit unay gapu iti pannakabalinna. Ipagarupna a natalged ket awan ti pakaan-anoanna. Ipagarup dagiti tattaona a ti siudadda ti kabilgan iti lubong. Aglangalangto ket agbalinto nga apon dagiti atap nga animal. Agalinggagetto ti siasinoman a magna sadiay.

Categories
Sofonias

Sofonias 3

Ti Basol ken Pannakasubbot ti Jerusalem

1 Saan a malisian ti Jerusalem ti pannakadusana, dayta dakes ken nasukir a siudad a mangidaddadanes kadagiti bukodna a tattao.

2 Saanna nga impangag ni Yahweh wenno inawat ti panangdisiplinana. Saan a nagtalek ken ni Yahweh wenno immawag iti tulongna.

3 Mayarig kadagiti mabisin a leon dagiti ofisialesna. Kasla mabisin a lobo dagiti ukomna—agumda unay ta alun-onenda ti matukmaanda ket awan uray tulang nga ipabigatda.

4 Iresponsable ken mangliliput dagiti profetana. Tulawan dagiti papadina ti banag a nasantoan ket ballikugenda ti linteg ti Dios para iti bukodda a pagimbagan.

5 Ngem adda pay laeng ni Yahweh iti siudad. Aramidenna ti naimbag ket pulos a di agaramid iti dakes. Binigat nga awan duadua a yegna ti hustisia kadagiti tattaona. Ngem awan babain dagiti managdakdakes sadiay. Kankanayon nga agaramidda iti dakes.

6 Kuna ni Yahweh, “Pinukawko dagiti pagilian, dinadaelko dagiti siudadda ket binaybay-ak a rebba dagiti bakud ken sarikedkedda. Napanawan dagiti siudadda. Awanen matagtagitao kadagiti kalsadada ket awanen ti agnaed sadiay.

7 Impagarupko idi nga agbutengton kaniak dagiti tattaok ket awatenda ti panangdisiplinak kadakuada. Impagarupko a dida malipatanti dusa nga inyegko a pangisuro kadakuada. Ngem iti saan a mabayag, ad-adda ketdi a dimmakesda.”

8 Kuna ni Yahweh, “Aguraykayo. Urayenyo ti aldaw a panagtakderko a kas ukom a mangidarum kadagiti nasion. Inkeddengko nga ummongen dagiti pagilian ken pagarian tapno ipariknak kadakuada ti napalalo a pungtotko. Madadaelto ti entero a daga iti gumilgil-ayab nga apuy ti pungtotko.

9 “Aramidek a siakto laeng ti pagdaydayawan dagiti pagilian a saan ketdi a kadagiti sabali a didiosen ket agtulnogdanto amin kaniak.

10 Uray dagiti naiwaraswaras a tattaok nga adda idiay adayo nga Etiopia, umaydanto tapno agidatonda kaniak.

11 Iti dayta a tiempo, dakayo a tattaok, saanton a masapul nga agbainkayo iti panagsukiryo kaniak. Ikkatekto dagiti natangsit ken napasindayag ket saankayonton nga agsukir kaniak iti nasantoan a turodko iti Jerusalem.

12 Addanto ibatik a tattao sadiay, tattao a nanumo ken napakumbaba. Umaydanto agpatulong kaniak.

13 Dintonagaramid iti dakes dagiti makalasat a tattao ti Israel. Didanton mangallilaw wenno agulbod. Narang-ay ken natalgeddanto ket awanton ti kabutengda.”

Kanta ti Rag-o

14 Agkanta ken agriawkayo iti rag-o, dakayo nga Israelita!

Agragsakka iti amin a pusom, Jerusalem!

15 Impanawen tiApodagiti gumurgura kenka;

inikkatna amin a kabusormo.

Adda kenka tiAponga ari ti Israel;

awan itan ti gapu ti pagbutngam.

16 Dumtengen ti tiempo nga ibagada iti Jerusalem,

“Dika agbuteng, siudad ti Jerusalem!

Dimo ipalubos a malpay dagiti imam!

17 Adda tiApoa Diosmo iti dennam;

ti bilegna ti mangted kenka iti balligi.

Agrag-onto ket sika ti pagragsakanna,

Ikkannakanto iti baro a biagta ay-ayatennaka.

Agkantanto a siraragsak gapu kenka,

18 naragsak a kas kadagiti tao a makifiesta.”

Kuna tiApo,

“Ginibusakon ti pangta ti pannakadusam

ket inikkatko ti pannakaibabainmo.

19 Umayen dayta nga aldaw!

Dusaekto amin a mangilupitlupit kenka.

Arayatekto dagiti amin a pilay

ket yawidkonto dagiti naitalaw a tattao.

Pagbalinekto a dayaw ti pannakaibabainda

ket raemento ida ti entero a lubong.

20 Umayen dayta nga aldaw!

Yawidkonto dagiti naiwarawara a tattaom,

Pagbalinenka nga agdindinamag ken madaydayaw

kadagiti amin a tattao ditoy daga.

Makitamto ti pannakaisubli

ti sigud a kinarang-aymo.”

TiApoti nangibaga iti daytoy.

Categories
Haggeo

Haggeo 1

Ti Bilin ni Yahweh a Mabangon manen ti Templo

1 Itimaikadua a tawen a panagturay ni Dario a kas emperador ti Persia, iti umuna nga aldaw ti maikanem a bulan, kinasao ni Yahweh ni profeta Haggeo. Maiturong ti mensahe iti gobernador ti Juda, ni Zerubbabel nga anak ni Salatiel, ken iti Nangato a Padi, ni Josue nga anak ni Josadac.

2 Kinuna ni Yahweh a Mannakabalin-amin ken ni Haggeo, “Kuna dagitoy a tattao a saan pay a tiempo a bangonen manen ti Templo.”

3 Kalpasanna, inted ni Yahweh daytoy a mensahe kadagiti tattao babaen ken ni profeta Haggeo,

4 “Dakayo a tattaok, rumbeng kadi nga agnaedkayo kadagiti napintas a balbalayyo idinto nga agrakrakaya ti Templok?

5 Diyo kadi makita ti mapaspasamak kadakayo?

6 Adu ti immulayo a trigo ngem bassit ti inapityo. Adda kanenyo ngem saan nga umanay a mangbussog kadakayo. Adda arak nga inumenyo ngem saan nga umdas a mangbartek kadakayo. Adda kawesyo ngem saan nga umanay a pagimengyo. Bassit ti mateggedan ti mangmangged. Saan nga umanay a pagbiagna.

7 Diyo kadi maawatan no apay a mapaspasamak dagitoy?

8 Ita, inkayo kadagiti turod. Agpukankayo iti kayo ket bangonenyo manen ti Templo tapno maragsakanak ket agdaydayawkayo kaniak a kas rebbengna.

9 “Nangnamnamakayo nga adu ti maapit ngem bassit ti apityo. Idi inyawidyo ti inapityo, pinatayabko. Apay a kasta ti inaramidko? Gapu ta agrakrakaya ti Templok idinto a maringgoran ti tunggal maysa kadakayo a mangbangbangon iti bukodna a balay.

10 Daytoy ti gapuna nga awan tudo ket awan ti agtubo.

11 Pinagtikagko ti pagilian. Nagmaga dagiti turturod, taltalon, kaoliboan ken kaubasan. Gapu iti tikag, agsagaba ti amin a mula, tao, animal ken amin a kayatyo nga imula.”

Tungpalen dagiti Tattao ti Bilin ni Yahweh

12 Impangag da Zerubbabel, Josue ken amin a tattao a nagsublimanipud idiay Babilonia a nakaibellenganda a kas balud ti sao ni Yahweh a Diosda. Nagbutengda ket tinungpalda ni profeta Haggeo a babaonen ni Yahweh.

13 Kalpasanna, impakaammo ni Haggeo ti mensahe ni Yahweh kadagiti tattao: “Ikarik a dikay baybay-an.”

14 Tinignay ni Yahweh ti tunggal maysa nga agtrabaho iti Templo: da Zerubbabel a gobernador ti Juda, ni Josue a Nangato a Padi ken dagiti tattao a nagsubli.

15 Rinugianda a trinabaho ti templo ni Yahweh a Mannakabalin-amin a Diosda iti maika-24 nga aldaw iti maikanem a bulan iti maikadua a tawen ti panagturay ni Dario a kas emperador.

Categories
Haggeo

Haggeo 2

Ti Dayag ti Baro a Templo

1 Iti maika-21 nga aldaw iti maikapito a bulan iti dayta a tawen, nagsao manen ni Yahweh ken ni profeta Haggeo.

2 Imbagana kenkuana a kasaona ni Zerubbabel a gobernador ti Juda, ni Josue a Nangato a Padi ken dagiti umili ket kinunana kadakuada,

3 “Addakadi makalagip pay laeng iti sigud a kinadayag ti Templo? Ania ti panagkitayo itan? Kasla awanen ti serserbina.

4 Uray no kasta, saankayo koma a maupay. Irugiyon ti trabaho, ta addaak kadakayo.

5 Idirummuarkayo idiay Egipto, inkarik a dikay baybay-an. Addaak pay laeng kadakayo, isut’ gapuna a dikay agbuteng.

6 “Itisaan a mabayag, gunggonek ti langit, ti lubong ken ti taaw.

7 Parmekekto ti amin a nasion. Mayegto ditoy ti gamengda ket mapnonto ti Templo iti kinabaknang.

8 Kukuak amin a pirak ken balitok ditoy lubong.

9 Nadaydayagto ti baro a Templo ngem ti immuna. Iti daytoy a lugar, parang-ayek dagiti tattaok ket ikkak ida iti talna.”

Ni Yahweh a Mannakabalin-amin ti nagsao iti daytoy.

Makiuman ti Profeta kadagiti Papadi

10 Iti maikadua a tawen a panagturay ni Dario a kas emperador, iti maika-24 nga aldaw iti maikasiam a bulan, nagsao manen ni Yahweh a Mannakabalin-amin ken ni profeta Haggeo.

11 Kinunana, “Saludsodem kadagiti papadi no ania ti ikeddengda maipapan iti daytoy:

12 Kas pangarigan mangala ti maysa a tao iti naidaton a karne ket sab-okenna iti gayadan ti kagayna. No isagidna ti kagayna iti tinapay wenno naluto a makan wenno arak wenno lana wenno aniaman a taraon, mapasanto met kadi ti nakaisagidanna?”

“Saan,” insungbat dagiti papadi idi sinaludsod daytoy ni Haggeo.

13 Sinaludsodni Haggeo, “No natulawan ti maysa a tao gapu ta nakasagid iti bangkay, ket sagidenna ti uray ania kadagitoy a taraon, matulawan met kadi dagiti taraon?”

“Wen,” insungbat dagiti papadi.

14 Kinuna ngarud ni Haggeo, “Imbaga tiApoa kasta met ti maaramid kadagiti tattao iti daytoy a nasion, ken kadagiti amin nga apitda; matulawan ti aniaman nga idatonda iti altar.”

Ikari ni Yahweh ti Bendisionna

15 Kuna ni Yahweh, “Diyo kadi makita ti napasamak kadakayo? Sakbay nga inrugiyo a bangonen manen ti Templo,

16 mapankayo iti pempen ti trigo ket namnamaenyo a makaalakayo iti 20 a salup ngem sangapulo a salup ti masarakanyo. Mapankayo iti tangke ti arak tapno tumakokayo iti 50 a galon, ngem 20 laeng a galon ti maalayo.

17 Inyegko ti dumardarang nga angin ken uraro tapno madadael ti amin a mulayo ngem kaskasdi a dikayo nagbabawi.

18 Iti daytoy maika-24 nga aldaw iti maikasiam a bulan, ita ta naipasdeken dagiti fondasion ti Templo, panunotenyo a naimbag ti mapasamak manipud ita.

19 Awanen ti natda a trigo. Saan pay a nagbunga dagiti ubas, igos, granada ken olibo. Ngem manipud ita, bendisionankayo.”

Ti Kari ni Yahweh ken ni Zerubbabel

20 Iti dayta met la nga aldaw, iti maika-24 nga aldaw ti bulan, kinuna manen ni Yahweh ken ni Haggeo:

21 “Ibagam ken ni Zerubbabel a gobernador ti Juda a dandanikon pagkintayegen ti langit ken ti daga

22 ket rebbaek dagiti pagarian ken gibusak ti pannakabalinda. Parmekek dagiti lugan a pakigubat ken dagiti nagsakay. Matayto dagiti kabalio ket agpipinnatayto dagiti nagsakay.

23 Iti dayta nga aldaw, alaenkanto, sika, Zerubbabel nga adipenko, ket isaadka nga agturay iti naganko. Sika ti pinilik.” Ni Yahweh a Mannakabalin-amin ti nagsao iti daytoy.

Categories
Zacarias

Zacarias 1

Ibaga ni Yahweh kadagiti Tattaona nga Agsublida Kenkuana

1 Daytoyti mensahe tiAponga impakaammona ken ni profeta Zacarias iti maikawalo a bulan iti maikadua a tawen a panagturay ni Dario a kas emperador ti Persia. (Ni Zacarias ti anak ni Barakias ken apoko ni Iddo.)

2 Imbaga tiApoa Mannakabalin-amin ken ni Zacarias nga ipakaammona daytoy kadagiti tattao, “Siak, ni Yahweh, kasta unay idi ti pungtotko kadagidi kapuonanyo.

3 Ngem ita, kunak kadakayo, ‘Agsublikayo kaniak ket agsubliak met kadakayo.

4 Diyo tuladen dagidi kapuonanyo. Idi un-unana, impakaammo kadakuada dagiti profeta ti saok. Binallaaganda ida nga idiandan dagiti dakes ken managbasol a panagbiagda. Ngem didak impangag wenno tinungpal.

5 Ita, natayen dagidi kapuonanyo ken dagiti profeta.

6 Babaen kadagiti adipenko a profeta, nangtedak kadagiti kapuonanyo kadagiti ballaag ken bilin. Saanda a nangikaskaso ket sinagabada ti dusa ti kinasukirda. Nagbabawida met laeng ket binigbigda a dinusak ida kas maikari kadakuada ken kas inkeddengko nga aramiden.’”

Ti Parmata maipapan kadagiti Kabalio

7 Iti maikadua a tawen a panagturay ni Dario a kas emperador, iti maika-24 nga aldaw iti maika-11 a bulan (ti bulan ti Sebat), imbaga kaniak tiApodaytoy a mensahe iti maysa a parmata iti rabii.

8 Nakitakti maysa nga anghel tiApoa nagsakay iti nalabaga a kabalio. Nagsardeng iti ummong dagiti nasamek a kayo iti maysa a tanap. Iti likudanna, adda dagiti sabali pay a kabalio—nalabaga, puraw ken garitgaritan.

9 “Ania ti kaipapanan dagitoy a kabalio, apo?” sinaludsodko.

“Ipakitak kenka no ania ti kaipapanan dagitoy,” insungbatna.

10 “Imbaon tiApoida tapno wanawananda ti daga.”

11 Impadamagda daytoy iti anghel, “Sinursormi ti entero a daga ket nasarakanmi nga awan ti arimekmekna ken awan gaway dagiti tattao.”

12 Kinuna ti anghel, “OApoa Mannakabalin-amin, 70 a tawenen a kapungpungtotmo ti Jerusalem ken dagiti siudad ti Juda. Kaanonto a kaasiam ida?”

13 Makaliwliwa ken makaabbukay dagiti balikas nga insungbat tiApoiti anghel.

14 Ket imbaga kaniak ti anghel nga ipakaammok ti sao tiApoa Mannakabalin-amin: “Ipatpategko unay ti Jerusalem ket mariribukak iti nasantoan a siudadko.

15 Napalalo ti pungtotko kadagiti pagilian nga agnamnam-ay iti kappia ken talna. Idi medmedmedak ti pungtotko kadagiti tattaok, dinegdegan dagitoy a nasion ti panagsagabada.

16 Ngarud, nagsubliak iti Jerusalem tapno kaasiak ti siudad. Mabangonto manen ti Templok ket matarimaan manen ti siudad.”

17 Imbaga pay ti anghel nga ipakaammok daytoy: “Kuna tiApoa Mannakabalin-amin a rumang-ayto manen dagiti siudadna. Liwliwaennanto manen ti Jerusalem ket pagbalinennanto manen ti siudad a kukuana.”

Ti Parmata maipapan kadagiti Sara

18 Iti sabali a parmata, nakitak ti uppat a sara.

19 Sinaludsodko iti anghel a makisasao kaniak no ania ti kaipapananda. Insungbatna, “Iladawanda dagiti nabileg a pagilian ti lubong a nangwarawara kadagiti tattao ti Juda, Israel ken Jerusalem.”

20 Kalpasanna, impakita tiApokaniak ti uppat a mammanday a siiiggem kadagiti martilio.

21 Sinaludsodko no ania ti umayda aramiden.

Insungbatna, “Immayda tapno butbutngen ken parmekenda dagiti pagilian a nangparukma a namimpinsan iti daga ti Juda ken nangwarawara kadagiti tattaona.”