Category: 2 Ar-ari

Ni Manases nga Ari ti Juda

1 Sangapulo ket dua ti tawen ni Manases idi maisaad nga ari iti Juda ket 55 a tawen a nagturay idiay Jerusalem. Ni Hepsiba ti inana.

2 Saana naragsakan kenkuana ni Yahweh ta tinuladna dagiti makarimon nga aramid dagiti nasion a pinagtalaw ni Yahweh sakbay a dimteng dagiti Israelita.

3 Binangon manen ni Manases dagiti pagdaydayawan dagiti pagano a dinadael idi ni Hezekias nga amana. Nagaramid kadagiti altar nga agpaay iti pagdaydayawan ken ni didiosen a Baal ket nangaramid iti imahen ni Asera a diosa a kas iti inaramid idi ni Ahab nga ari ti Israel. Nagdaydayaw met ni Manases kadagiti bituen.

4 Nagbangonkadagiti altar dagiti pagano iti uneg ti Templo a kinuna ni Yahweh a rumbeng a pagdaydayawan dagiti tattao kenkuana.

5 Nagpaaramid kadagiti altar a pagdaydayawan kadagiti bituen a nabangon kadagiti dua a paraangan ti Templo.

6 Indatagna ti lalaki nga anakna a daton a mapuoran. Namuybuyon ken namadpadles ket nakiuman kadagiti baglan ken espiritu. Agkakadakes iti imatang ni Yahweh dagiti inaramidna ket nagpungtot ni Yahweh.

7 Inkabilnati imahen ni Asera a diosa iti Templo—daytoy ti templo a sarsaritaen ni Yahweh idi kinunana kada David ken ni Solomon nga anakna: “Ditoy Jerusalem, iti daytoy a Templo, ti lugar a pinilik kadagiti amin a sakup dagiti 12 a tribu ti Israel a pagdaydayawan kaniak dagiti tattao.

8 Ket no tungpalen dagiti Israelita ti sibubukel a Linteg nga inted kadakuada ni Moises nga adipenko, diakto ipalubos a mapapanawda iti daga nga intedko kadagidi kapuonanda.”

9 Ngem saan nga impangag dagiti tattao ti Juda ni Yahweh ket insungsong ni Manases ida nga agbasol. Nadagdagsen ti basolda ngem dagiti nasion a pinagtalaw ni Yahweh idi dumteng dagiti tattaona iti daga.

10 Kinuna ni Yahweh babaen kadagiti adipen ken profetana,

11 “Inaramid ni Ari Manases dagiti makarimon a banag; dakdakes ti inaramidna ngem dagiti inaramid dagiti Cananeo. Insungsongna dagiti tattao nga agbasol gapu kadagiti imahen a pagdaydayawanna.

12 Ngarud, siak a Dios ti Israel, idissuorkonto ti didigra iti Jerusalem ken iti Juda ket urayto la maikuleng ti amin a makadamag iti daytoy.

13 Dusaek ti Jerusalem a kas iti inaramidko iti Samaria; dusaek a kas ken ni Ahab nga ari ti Israel ken kadagiti kaputotanna. Sagadekto ti Jerusalem agingga nga awan mabati a tattao ket nadalusto a kas iti pinggan a nadalusan ken naipakleb.

14 Baybay-akto dagiti makalasat a tattao ket yawatkonto ida kadagiti kabusorda. Maparmekdanto ket agsamsamto dagiti kabusorda iti dagada.

15 Aramidekto daytoy gapu ta nagbasbasol dagiti tattao ket pinagpungtotdak manipud idi rimmuar dagiti kapuonanda idiay Egipto agingga ita.”

16 Adu a tattao nga awan basolna ti pinatay ni Manases ket nagayus dagiti kalsada ti Jerusalem iti darada. Inaramidna daytoy malaksid la iti panangisungsongna kadagiti tattao ti Juda nga agdaydayaw kadagiti didiosen, a nakaigapuan ti panagbasolda ken ni Yahweh.

17 Nailanad itiPakasaritaan dagiti Ari ti Judati dadduma a pasamak iti panagturay ni Manases, agraman dagiti basolna.

18 Natay ni Manases ket naitabon iti hardin ti palasio, ti hardin ni Uzza. Ni Amon nga anakna ti simmukat kenkuana nga ari.

Ni Amon nga Ari ti Juda

19 Duapulo ket dua ti tawen ni Amon idi maisaad a kas ari ti Juda ket dua a tawen a nagturay idiay Jerusalem. Ni Mesullemet nga anak ni Haruz a taga-Jotba ti inana.

20 Kas ken ni amana a Manases, dakes ti inaramidna iti imatang ni Yahweh.

21 Tinuladna ni amana ket nagdaydayaw met kadagiti didiosen a nagdaydayawanna.

22 Linaksidna ni Yahweh a Dios dagidi kapuonanna ket sinukirna ti bilin ni Yahweh.

23 Nagtutulag dagiti ofisiales ket pinapatayda ni Amon iti uneg ti palasio.

24 Ngem pinapatay dagiti tattao ti Juda dagiti nangpatay ken ni Amon ket insaadda ni Josias nga anakna nga ari.

25 Nailanad itiPakasaritaan dagiti Ari ti Judati dadduma a pasamak iti panagturay ni Amon.

26 Naitabon ni Amon iti hardin ni Uzza ket ni Josias nga anakna ti simmukat kenkuana nga ari.

Ni Josias nga Ari ti Juda

1 Waloti tawen ni Josias idi maisaad a kas ari iti Juda, ket 31 a tawen a nagturay idiay Jerusalem. Ni Jedida nga anak ni Adaias a taga-Bozkat ti inana.

2 Nalinteg iti imatang ni Yahweh ti inar-aramid ni Josias. Tinuladna ni Ari David a kapuonanna—napasnek ti panangtungpalna kadagiti amin a linteg ti Dios.

Masarakan ti Libro ti Linteg

3 Iti maika-18 a tawen a panagturay ni Josias, imbaonna ti sekretario ti palasio, ni Safan nga anak ni Azalia ken apoko ni Mesullam a mapan iti Templo. Kinunana kenkuana,

4 “Inka ken ni Hilkias a Nangato a Padi ket ammoem ti dagup ti kuarta nga inur-or dagiti papadi nga agserserbi iti pagserkan ti Templo.

5 Ibagam nga itedna ti kuarta kadagiti mangimaton iti pannakatarimaan ti Templo. Masapul a tangdananda

6 dagiti karpintero, dagiti agbangbangon ken dagiti agkabkabiti ken gumatangda iti kayo ken bato a mausar iti panagtarimaan.

7 Matalekdagiti mangipangulo iti trabaho ket saan a masapul nga itedda ti listaan ti paggastoanda.”

8 Indanon ni Safan ti bilin ti ari ken ni Hilkias ket imbaga kenkuana ni Hilkias a nasarakanna ti Libro ti Linteg iti Templo. Inted ni Hilkias ti libro ket binasa ni Safan.

9 Kalpasanna, nagsubli ni Safan iti ari ket imbagana, “Innala dagiti adipenmo ti kuarta nga adda iti Templo ket intedda kadagiti mangimaton iti trabaho sadiay.”

10 Sana innayon, “Adda libro nga inted ni Hilkias kaniak.” Ket imbasana iti napigsa ti libro iti ari.

11 Idi mangngeg ti ari ti linaon ti libro, rinay-abna ti pagan-anayna gapu iti ladingitna.

12 Pinaayabanna ni Hilkias, Safan, ni Ahikam nga anakna, ni Akbor nga anak ni Micaias, ken ni Asaias a maysa nga ofisial ti ari ket imbilinna kadakuada:

13 “Inkay makiuman itiApogapu kaniak ken gapu kadagiti amin a tattao ti Juda maipapan kadagiti pannursuro iti daytoy a libro. Napalalo ti pungtot tiApokadatayo gapu ta saan nga inaramid dagiti kapuonantayo dagiti nailanad iti daytoy a libro a masapul a maaramid.”

14 Napan nakiuman da Hilkias, Ahikam, Akbor, Safan ken Asaias iti maysa a babai nga agnagan iti Hulda, maysa a profeta nga agnaed iti baro a paset ti Jerusalem. (Ni Sallum nga asawana, nga anak ni Tikva ken apoko ni Harhas ti agay-aywan kadagiti pagan-anay ti Templo.) Imbagada kenkuana ti napasamak.

15 Pinagsublina ida tapno ipakaammoda iti ari

16 daytoy sao ni Yahweh: “Dusaek ti Jerusalem ken dagiti amin a tattaona, kas nailanad iti libro a binasa ti ari.

17 Gimmil-ayab ti pungtotko iti daytoy a lugar, ta linaksiddak dagiti tattao ket nagidatonda kadagiti didiosen. Pinagpungtotdak gapu iti amin nga inaramidda; pulos a dinto agbaaw ti pungtotko.

18 No maipapan iti ari, kastoy ti saok, siak, ni Yahweh a Dios ti Israel: Impangagmo ti naisurat iti libro

19 ket nagbabawika. Nagpakumbabaka iti imatangko. Rinay-abmo ti pagan-anaymo ket nagsangitka idi maammoam ti pangtak a mangdusa iti Jerusalem ken dagiti tattaona. Pagbalinek dayta a lugar a nakabutbuteng a buya, maysa a disso nga usaren dagiti tattao ti naganna a pagilunod. Ngem nangngegko ti kararagmo

20 ket dimonto makita ti didigra nga idissuorko iti Jerusalem. Mataykanto a sitatalna.”

Nagsubli dagiti naibaon ket imbagada ken ni Ari Josias ti imbaga ni Hulda.

Pagsardengen ni Josias ti Panagdaydayaw kadagiti Didiosen

1 Pinaayaban ni Ari Josias dagiti amin a pangulo ti Juda ken Jerusalem

2 ket napanda amin iti Templo, agraman dagiti papadi ken dagiti profeta ken amin nga umili ti Jerusalem, napanglaw man wenno nabaknang. Iti imatangda, imbasa ti ari ti amin a nailanad iti libro a nasarakan iti Templo.

3 Nagtakder ti ari iti abay ti adigi ket nakitulag ken ni Yahweh. Inkarina nga agtulnog kenkuana, tungpalenna ti amin a linteg ken bilinna iti amin a puso ken kararuana ket ipatungpalna dagiti sagudayen ti tulag kas nailanad iti libro. Sangsangkamaysa met dagiti tattao a nagkari a dida salungasingen ti tulag.

4 Kalpasanna,imbilin ni Josias ti pannakapuor ti amin nga alikamen a maus-usar iti panagdaydayaw ken ni Baal a didiosen, ken ni Asera a diosa, ken kadagiti bituen. Nagtungpal ni Hilkias a Nangato a Padi, dagiti papadi a katulonganna ken dagiti guardia iti pagserkan ti Templo ket inikkatda dagitoy iti Templo sada impan iti ruar ti siudad iti asideg ti Tanap ti Kidron. Napuoran amin dagiti alikamen ket naipan ti dapuda idiay Betel.

5 Inikkat ni Josias iti akem dagiti papadi nga inordenan dagiti ari ti Juda a mangidatag kadagiti sakrifisiokadagiti altar dagiti pagano kadagiti siudad ti Juda ken kadagiti lugar iti asideg ti Jerusalem—amin a papadi a nagidatag kadagiti sakrifisio ken ni Baal, iti init, iti bulan, kadagiti planeta ken kadagiti bituen.

6 Inikkatna iti Templo ti nasagradoan nga adigi a naidaton ken ni Asera ket impanna iti Tanap ti Kidron iti ruar ti siudad. Pinuoranna ti adigi, rinumrumekna ti uging agingga a timmapok ket inwarakiwakna iti sementerio ti ili.

7 Dinadaelna dagiti kuarto a pagnaedan dagiti balangkantis ti templo. (Sadiay ti pagablan dagiti babbai kadagiti pagan-anay a mausar iti panagdaydayaw iti diosa, ni Asera.)

8 Impanna idiay Jerusalem dagiti papadi nga adda kadagiti siudad ti Juda. Dinadaelna dagiti altar a pagidatdataganda kadagiti sakrifisio, manipud Geba agingga idiay Beerseba. Rinakrakna met dagiti altar iti asideg ti ruangan a binangon ni Josue, ti agturay iti siudad, nga adda iti makannigid iti dakkel a ruangan no sumrekka iti siudad.

9 Saan a napalubosan dagita a papadi nga agserbi iti Templo ngem mabalinda ti mangan iti tinapay nga awan lebadurana nga agpaay kadagiti padada a padi.

10 Dinadaelmet ni Ari Josias ti Tofet, ti lugar a pagdaydayawan dagiti pagano iti Tanap ti Hinnom tapno awan mangpuor iti anakna a daton ken ni didiosen a Molec.

11 Inikkatna pay dagiti kabalio nga indaton dagiti ari ti Juda a pagdaydayawan iti init ket pinuoranna dagiti lugan a pakigubat a maar-aramat iti daytoy a panagdaydayaw. (Adda dagitoy iti paraangan ti templo, iti asideg ti ruangan a saan nga adayo iti kuarto ni Natan Melek, maysa a nangato nga ofisial.)

12 Rinakrakni Ari Josias dagiti altar a binangon dagiti ari ti Juda, iti ngatoen ti kuarto ni Ari Ahaz, agraman dagiti altar nga inaramid ni Ari Manases kadagiti dua a paraangan ti Templo. Rinumrumekna dagitoy nga altar agingga a timmapokda ket impurruakna ida iti Tanap ti Kidron.

13 Dinadaelni Josias dagiti altar nga inaramid ni Ari Solomon iti dayaen ti Jerusalem iti abagatan ti Bantay Olibo a pagdaydayawan kadagiti makarimon a didiosen—Asera, ti diosa ti Sidon; Kemos, ti dios ti Moab ken Molec, ti dios ti Ammon.

14 Binurburak ni Ari Josias dagiti adigi, tinumbana ti adigi a naidaton ken ni Asera a diosa sana ginaburan kadagiti tultulang ti tao ti nakaipatakderanda.

15 Rinakrakpay ni Josias ti lugar a pagdaydayawan idiay Betel. Daytoy daydi impatakder ni Ari Jeroboam nga anak ni Nebat a nangisungsong iti Israel nga agbasol. Dinadael ni Josias ti altar, rinumrumekna dagiti batonaagingga a nagbalin a tapok. Pinuoranna met ti adigi a naidaton iti panagdaydayaw ken ni Asera.

16 Idimakita ni Josias ti sumagmamano a tantanem iti tapaw ti turod, pinaikkatna dagiti tultulang. Pinuoranna daytoy iti rabaw ti altar tapno matulawan, ket iti kasta natungpal ti nabayagen nga impakaammo ti profeta bayat ti fiesta idi agtaktakder ni Ari Jeroboam iti abay ti altar.

Nakita ni Ari Josias ti tanem ti profeta a nangipakaammo iti daytoy.

17 “Siasinoti akintanem iti dayta?” sinaludsodna.

“Ti profeta a naggapu idiay Juda a nangipadto iti amin nga inaramidmo iti daytoy nga altar,” kinuna dagiti taga-Betel.

18 Kinuna ni Josias, “Bay-anyo. Diyo an-anoen dagiti tulangna.”

Saan ngarud a naan-ano dagiti tulangna, kasta met dagiti tulang ti profeta a naggapu idiay Samaria.

19 Iti amin a siudad ti Israel, dinadael ni Ari Josias dagiti amin a lugar a pagdaydayawan dagiti pagano a binangon dagiti ari ti Israel a nakaigapuan ti panagpungtot ni Yahweh. Inaramidna kadagitoy nga altar ti kas iti inaramidna idiay Betel.

20 Pinapatayna dagiti pagano a papadi iti rabaw dagiti altar a pagserserbianda ket nagpuor kadagiti tulang ti tao iti tunggal altar. Kalpasanna, nagsubli idiay Jerusalem.

Rambakan ni Josias ti Fiesta ti Paskua

21 Imbilin ni Ari Josias kadagiti tattao a rambakanda ti Fiesta ti Paskua a pammadayaw ken ni Yahweh a Diosda, kas nailanad iti Libro ti Tulag.

22 Awan ti kasta a fiesta a rinambakan ti uray siasino nga ari ti Israel wenno Juda manipud idi tiempo dagiti ukom a nangituray iti pagilian.

23 Ita, iti maika-18 a panagturay ni Josias, narambakan ti Fiesta ti Paskua idiay Jerusalem.

Dagiti Dadduma a Reforma nga Intuyang ni Josias

24 Tapno maipaannurot dagiti linteg a nailanad iti libro a nasarakan ni Hilkias a Nangato a Padi iti Templo, pinapanaw ni Ari Josias dagiti amin a makium-uman kadagiti espiritu ken mammadles. Pinaikkatna amin a didiosen kadagiti balbalay, dagiti imahen ken amin a pagdaydayawan dagiti pagano idiay Jerusalem ken Juda.

25 Awanen ti kas kenkuana nga ari a sinarunona a nagserbi ken ni Yahweh iti amin a puso, kararua ken pigsa iti panagtungpalna iti amin a Linteg ni Moises. Awan metten ti ari a kas kenkuana kalpasan ti panagturayna.

26 Simged ti nakaro a pungtot ni Yahweh iti Juda gapu kadagiti inaramid ni Manases idi ket di pay nagbaaw agpapan ita.

27 Kinuna ni Yahweh, “Aramidek iti Juda ti kas iti inaramidko iti Israel: Pukawek dagiti tattao ti Juda iti imatangko ket laksidek ti Jerusalem, ti pinilik a siudad, ken ti Templo nga imbagak a pagdaydayawanda kaniak.”

Matay ni Josias

28 Nailanad itiPakasaritaan dagiti Ari ti Judati dadduma a pasamak iti panagturay ni Ari Josias.

29 Bayat ti panagturay ni Josias, impanguloan ni Neco nga ari ti Egipto ti maysa nga armada a mapan iti Karayan Eufrates tapno tulonganna ti ari ti Asiria. Pinadas ni Ari Josias a pasardengen ti armada ti Egipto idiay Megiddo ngem natay iti paggugubatan.

30 Inlugan dagiti ofisialesna ti bangkayna iti lugan a pakigubat ket inyawidda idiay Jerusalem; sadiay, intabonda kadagiti pagitantaneman kadagiti ari.

Ni Joacaz nga anakna ti insaad dagiti tattao a sumukat kenkuana nga ari.

Ni Joacaz nga Ari ti Juda

31 Duapulo ket tallo ti tawen ni Joacaz idi maisaad nga ari ti Juda ket nagturay idiay Jerusalem iti tallo a bulan. Ni Hamutal nga anak ni Jeremias a taga-siudad ti Libna ti inana.

32 Kas kadagiti kapuonanna, nagbasol ken ni Yahweh.

33 Naggibus ti panagturayna idi intalaw ni Neco nga ari ti Egipto ket imbaludna idiay Ribla, iti daga ti Hamat. Pinagbayad ni Neco ti Juda iti 3,750 a kilo a pirak ken dandani tallopulo ket uppat a kilo a balitok a kas buis ti pagilian.

34 Insaadnani Eliakim nga anak ni Josias a kas ari a sumukat ken ni amana ket binalbaliwanna ti naganna iti Joakim. Impan ni Ari Neco ni Joacaz idiay Egipto ket sadiay ti nakatayanna.

35 Inted ni Ari Joakim ti pirak ken balitok a kas buis iti ari ti Egipto. Tapno maitedna ti gatad, pinagbuisna dagiti tattao kas mayannurot iti kinabaknangda.

Ni Joakim nga Ari ti Juda

36 Agtaweniti 25 ni Joakim idi maisaad nga ari idiay Juda, ket 11 a tawen a nagturay idiay Jerusalem. Ni Zebida nga anak ni Pedaias a taga ili ti Ruma ti inana.

37 Dakes ti inar-aramidna iti imatang ni Yahweh a kas kadagidi kapuonanna.

1 Bayatti panagturay ni Joakim, rinaut ni Ari Nebucadnesar ti Juda. Tallo a tawen a naipapilit a pinaiturayan ken ni Nebucadnesar ngem kalpasanna immalsa.

2 Nangibaon ni Yahweh kadagiti nakaarmas a bunggoy a taga-Babilonia, Siria, Moab ken Ammon a mangraut ken ni Joakim tapno dadaelenda ti Juda kas imbaga ni Yahweh kadagiti adipenna a profeta.

3 Imbilin ni Yahweh daytoy tapno mapukaw dagiti tattao ti Juda iti imatangna gapu kadagiti amin a basol ni Ari Manases

4 ken nangnangruna ti panangpapatayna kadagiti tattao nga awan basolna. Saan a mapakawan ni Yahweh ni Manases gapu iti dayta nga inaramidna.

5 Nailanad itiPakasaritaan dagiti Ari ti Judati dadduma a pasamak iti panagturay ni Joakim.

6 Natay ni Joakim ket ni Jehoyakin nga anakna ti simmukat kenkuana a kas ari.

7 Saanen a rimmuar iti ilina ti ari ti Egipto ken ti armadana. Ngamin, sinakup ti ari ti Babilonia ti amin a daga ti Egipto, manipud Karayan Eufrates agingga iti akin-amianan a beddeng ti Egipto.

Ni Jehoyakin nga Ari ti Juda

8 Sangapulo ket walo ti tawen ni Jehoyakin idi agari idiay Juda. Tallo a bulan a nagturay idiay Jerusalem. Ni Nehusta nga anak ni Elnatan a taga-Jerusalem ti inana.

9 Kas kadagiti kapuonanna, dakes ti inar-aramid ni Jehoyakin iti imatang ni Yahweh.

10 Bayat ti panagturayna, rimmaut ti armada ti Babilonia nga impanguloan dagiti ofisiales ni Ari Nebucadnesar. Linakubda ti Jerusalem.

11 Bayat ti pannakalakub ti siudad, dimteng ni Ari Nebucadnesar iti siudad

12 ketsimmuko ni Ari Jehoyakin, agraman ti inana, dagiti annakna, dagiti ofisialesna ken dagiti ofisiales ti palasio. Iti maikawalo a tawen a panagturay ni Nebucadnesar, innalana a balud ni Jehoyakin.

13 Innala ni Nebucadnesar ti amin a gameng iti Templo ken iti palasio ket impanna dagitoy idiay Babilonia. Kas impakaammo ni Yahweh, binurburak ni Nebucadnesar dagiti balitok nga alikamen nga inaramid ni Ari Solomon a maar-aramat iti Templo.

14 Intalaw ni Nebucadnesar dagiti tattao ti Jerusalem a kas balud. Impanawna dagiti amin a prinsipe, dagiti amin a nalatak a tattao—10,000 amin. Impanawna pay dagiti karpintero, agraman dagiti mammanday. Dagiti laeng kapanglawan a tattao ti imbatina idiay Juda.

15 Intalawni Nebucadnesar ni Jehoyakin ket imbaludna idiay Babilonia, agraman ti ina ni Jehoyakin, dagiti assawana, dagiti ofisialesna ken dagiti nalatak a tattao ti Juda.

16 Impan ni Nebucadnesar dagiti kangrunaan a tattao idiay Babilonia—7,000 ti dagupda ken 1,000 a karpintero, agraman dagiti mammanday, isuda amin a makabael nga agsoldado.

17 Insaadni Nebucadnesar ti uliteg ni Jehoyakin, ni Matanias, nga ari ti Juda. Sinuktanna ti naganna iti Zedekias.

Ni Zedekias nga Ari ti Juda

18 Agtawenni Zedekias iti 21 idi agari, ket 11 a tawen a nagturay idiay Jerusalem. Ni Hamutal nga anak ni Jeremias a taga-siudad ti Libna ti inana.

19 Dakes ti inar-aramid ni Zedekias iti imatang ni Yahweh a kas ken ni Ari Joakim.

20 Nakapungtotni Yahweh kadagiti tattao ti Jerusalem ken Juda isut’ gapuna a linaksidna ida iti imatangna.

Matnag ti Jerusalem

1 Binusorni Zedekias ni Nebucadnesar nga ari ti Babilonia. Iti kasta, dimteng ni Nebucadnesar ken ti entero nga armada ket rinautda ti Jerusalem iti maika-10 nga aldaw ti maika-10 a bulan iti maikasiam a tawen a panagturay ni Zedekias. Nagkampoda iti ruar ti siudad, binangenanda iti aglikmut

2 ket linakubda ti siudad agingga iti maika-11 a tawen ti panagturay ni Zedekias.

3 Iti maikasiam nga aldaw iti maikapat a bulan iti isu met la a tawen, idi nakaro ti bisin ket awanen ti makan dagiti tattao,

4 narakrakti maysa a paset ti bakud ti siudad. Uray no linakub dagiti taga-Babilonia, nakalibas amin a soldado ni Zedekias iti rabii. Nagnada iti hardin ti palasio, linasatda ti ruangan a namagsilpo kadagiti dua a bakud sada nagtataray a nagturong iti Tanap ti Jordan.

5 Ngem kinamat ti armada ti Babilonia ni Ari Zedekias ket tiniliwda iti tanap iti asideg ti Jerico. Nawarawara dagiti tattaona.

6 Naipan ni Zedekias ken ni Ari Nebucadnesar nga adda idi idiay Ribla ket sadiay ti nangsentensiaan ti ari.

7 Itiimatang ni Zedekias, napapatay dagiti lallaki nga annakna ket nasuat met dagiti matana, kas imbilin ni Nebucadnesar. Kinawaranda ti ari sada impan idiay Babilonia.

Madadael ti Templo

8 Iti maikapito nga aldaw iti maikalima a bulan iti maika-19 a tawen a panagturay ni Ari Nebucadnesar iti Babilonia, sinerrek ni Nebuzaradan a mammagbaga iti ari ken pangulo ti armada, ti Jerusalem.

9 Pinuorannati Templo, ti palasio ken dagiti balbalay dagiti amin a nalatak a tattao ti Jerusalem.

10 Rinebba dagiti soldadona ti bakud ti siudad.

11 Kalpasanna, impanna idiay Babilonia dagiti tattao a nagtalinaed iti siudad, dagiti nabati a karpinteroken dagiti simmuko iti ari ti Babilonia.

12 Ngem imbatina idiay Juda dagiti kapanglawan a tattao nga awan sanikuana ket pinagtrabahona ida kadagiti kaubasan ken taltalon.

13 Binurakburakdagiti taga-Babilonia dagiti bronse nga adigi ken dagiti batay nga adda iti Templo, agraman ti dakkel a bronse a tangke. Impanda amin a bronse idiay Babilonia.

14 Impanawdamet dagiti pala, dagiti pagikabilan iti dapu a mausar iti pannakadalus ti altar, dagiti maus-usar iti pannakataripato dagiti pagsilawan, dagiti malukong a mausar a pagtaya kadagiti dara dagiti maidatag a daton, dagiti malukong a pagpuoran iti insenso ken amin a bronse nga alikamen.

15 Impanawda amin nga alikamen a balitok wenno pirak, agraman dagiti babassit a malukong ken dagiti palanggana a pagkargaan iti beggang.

16 Nadagsen ket saan a matimbang dagiti dua a bronse nga adigi, dagiti batay ken ti dakkel a tangke a pinaaramid idi ni Ari Solomon nga agpaay iti Templo.

17 Agpada dagiti dua nga adigi: 27 a kadapan ti tunggal maysa; adda met bronse a paratok ti tunggal maysa nga uppat ket gudua a kadapan ti kangatona. Iniket a bronse a naarkosan iti bronse a granada ti naipalikmut iti tunggal paratok.

Maipan dagiti Tattao ti Juda idiay Babilonia

18 Kadagiti tiniliw ni Nebuzaradan, mairaman ni Seraias a Nangato a Padi, ni Sefanias, ti padi a sumaruno a kangatoan, ken dagiti tallo a kangrunaan nga ofisiales ti Templo.

19 Tiniliwna met ti nangipangulo kadagiti soldado iti gubat, lima kadagiti mammagbaga iti ari nga adda pay laeng iti siudad, ti katulongan ti pangulo a mangay-aywan kadagiti papeles dagiti soldado ken 60 a nalatak a tattao.

20 Indatag ida ni Nebuzaradan iti ari ti Babilonia nga adda idi iti siudad ti Ribla

21 iti daga ti Hamat. Sadiay, pinarparigat ida ti ari ket kalpasanna, pinapapatayna ida.

Iti kasta, naitalaw dagiti tattao ti Juda ket naipanda iti sabali a pagilian.

Ni Gedalias a Gobernador ti Juda

22 Insaadni Ari Nebucadnesar ni Gedalias nga anak ni Ahikam ken apoko ni Safan a kas gobernador ti Juda. Dinutokanna a mangaywan kadagiti saan a naipan idiay Babilonia.

23 Idi madamag daytoy dagiti ofisiales ken mannakigubat a taga-Juda a saan a simmuko, napanda timmipon ken ni Gedalias idiay Mizpa. Dagitoy dagiti ofisiales: Ismael nga anak ni Netanias, Johanan nga anak ni Karea, Seraias nga anak ni Tanhumet a taga-Netofa ken Jezanias a Maacatita.

24 Kinuna ni Gedalias kadakuada, “Awanto ti pakaan-anoanyo. Dikay agbuteng kadagiti ofisiales a taga-Babilonia. Agnaedkayo ditoy ket agserbikayo iti ari ti Babilonia.”

25 Ngemiti maikapito a bulan iti dayta a tawen, dimteng idiay Mizpa ni Ismael nga anak ni Netanias ken apoko ni Elisama a nagtaud iti naarian a familia. Kaduana ti sangapulo a lallaki, dinarupda ni Gedalias ket pinapatayda agraman dagiti Israelita ken taga-Babilonia a kaduana sadiay.

26 Gapuiti buteng dagiti Israelita kadagiti taga-Babilonia, pimmanawda amin, napanglaw man wenno saan, agraman dagiti ofisiales ti armada ket napanda nagkamang idiay Egipto.

Mawayawayaan ni Jehoyakin iti Pagbaludan

27 Iti tawen a pannakaisaad ni Evilmerodac nga ari ti Babilonia, impakitana ti panangngaasina ken ni Ari Jehoyakin babaen iti panangwayawayana kenkuana iti pagbaludan. Napasamak daytoy iti maika-27 nga aldaw iti maika-12 a bulan iti maika-37 a tawen a pannakaitalaw ni Jehoyakin a kas balud.

28 Naasi unay ni Evilmerodac kenkuana ket insaadna iti natantan-ok a pagsaadan ngem kadagiti dadduma nga ari a naipan a balud idiay Babilonia.

29 Ngarud, napalubosan ni Jehoyakin a mangsukat iti pagan-anayna a kas balud ken makipangan iti lamisaan iti ari iti unos ti panagbiagna.

30 Inaldaw a naikkan kadagiti kasapulanna.