Category: 2 Samuel

Ni David ken ni Batseba

1 Idimangrugi ti tawen, iti tiempo a mapan makigubat dagiti ari, imbaon ni David ti armada ti Israel. Babaen iti panangipangulo ni Joab ken dagiti ofisialesna, pinarmekda dagiti Ammonita ket linakubda ti siudad ti Rabba. Ngem nagbati ni David idiay Jerusalem.

2 Iti maysa a mumalem, kalpasan ti pannaturog ni David immuli iti tuktok ti palasio ket nagpagnapagna. Manipud iti ayanna, natannawaganna ti maysa a babai nga agdigdigos. Nakapimpintas ti babai.

3 Nangibaon ngarud iti mapan mangdamag no siasino ti babai. Naammoanna nga isu ni Batseba nga anak ni Eliam ken asawa ni Urias a Jeteo.

4 Pinaala ni David ni Batseba. Indatag dagiti naibaon ti babai kenkuana ket kinaiddana. (Kalkalpas ni Batseba a nangannong iti binulan a seremonia ti pannakadalusna gapu iti panagreglana.) Kalpasan ti panagkaiddada iti ari, nagawid ni Batseba.

5 Nagsikog ni Batseba, isu a nangibaon iti mangibaga iti kasasaadna ken ni David.

6 Dinagdagus a pinaibaga ni David ken ni Joab a pagawidenna ni Urias a Jeteo ket imbaon ngarud ni Joab ni Urias a mapan iti ari.

7 Idi sumangpet ni Urias, nagdamag ni David maipapan ken ni Joab ken ti buyot ken no ania ti kasasaad ti gubat.

8 Kinunana pay ken ni Urias, “Agawidkan ta aginanaka bassit.”

Kalpasan ti ipapanaw ni Urias, pinatulodan ni David iti maysa a sagut idiay balayna.

9 Ngem saan a nagawid ni Urias. Naturog ketdi iti ruangan ti palasio iti ayan dagiti guardia ti ari.

10 Naammoan ni David a saan a nagawid ni Urias ket sinaludsodna kenkuana, “Apay a dika agawid? Nabayag nga awanka iti balaymo.”

11 Simmungbat ni Urias, “Adda dagiti soldado ti Israel ken Juda iti paggugubatan, ket adda met kadakuada ti Lakasa ti Tulag. Adda ni Joab a pangulok ken dagiti ofisialesna nga agkamkampo iti tay-ak. Kasano nga agawidak a mangan ken uminum ket kaiddaek ti asawak? Isapatak iti nagan dagiti amin a nasagradoan a banag a diak maaramid daytoy.”

12 Kinuna ni David ken ni Urias, “Agyanka pay ditoy ita nga aldaw ket palubosankanto nga agawid inton bigat.” Ngarud, nagtalinaed ni Urias idiay Jerusalem iti dayta nga aldaw. Iti sumuno nga aldaw,

13 inawis ni David a makipangan kenkuana ket binartekna. Ngem saan manen a nagawid ni Urias. Iti dayta a rabii, inyaplagna ti ulesna ket naturog iti kuarto dagiti guardia iti palasio.

14 Kabigatanna, nagsurat ni David ken ni Joab, ket impaw-itna ken ni Urias.

15 Kastoy ti linaon ti surat: “Ibaonmo ni Urias iti paggugubatan, iti disso a kapigsaan ti gubat. Kalpasanna, agsanudkayo ket baybay-anyo a matay.”

16 Ngarud, bayat ti pananglakub ni Joab iti siudad, imbaonna ni Urias iti disso nga ammona a napigsa dagiti kabusor.

17 Rimmuar dagiti kabusor ket nakirangetda kadagiti soldado ni Joab. Natay ti sumagmamano kadagiti ofisiales ni David, agraman ni Urias.

18 Nangibaon ni Joab iti mangipadamag ken ni David maipapan iti amin a mapaspasamak iti gubat.

19 Binilinna ti naibaon: “Inton maipadamagmon iti ari ti amin a banag maipapan iti gubat,

20 nalabit nga agpungtotto ket kunananto kenka, ‘Apay a nakirangetkayo kadakuada iti asideg ti siudad? Diyo kad ammo nga agibiatda manipud kadagiti bakud?

21 Diyoaya malagip no kasano a natay ni Abimelec nga anak ni Gideon? Idiay Tebez, adda babai a nangipuruak iti gilingan a bato manipud iti tuktok ti bakud; natupakan ni Abimelec ket natay. Apay nga immasidegkay iti bakud?’ Kastoyto ti isungbatmo: ‘Natay met ni Urias nga ofisialmo.’”

22 Napan ti naibaon ket imbagana ken ni David ti imbilin ni Joab.

23 Kinunana, “Nabilbileg dagiti kabusor ngem dakami, ket rimmuarda iti siudad a makirupak kadakami iti tay-ak. Ngem pinagsanudmi ida agingga iti ruangan ti siudad.

24 Manipud iti tuktok ti bakud, pinanadakami ket natay ti sumagmamano kadagiti ofisialesmo agraman ni ofisialmo nga Urias.”

25 Kinuna ni David iti naibaon, “Papigsaem ti nakem ni Joab. Ibagam kenkuana a saan a mariribuk ta awan ti makaammo no siasino ti matay iti paggugubatan. Ibagam kenkuana a mangisagana iti nabilbileg nga armada a mangdarup iti siudad ket sakupenyo.”

26 Idi madamag ni Batseba a napapatay ti asawana, dinung-awanna.

27 Apaman a nalpas ti tiempo a panangdung-awna iti asawana, pinaala ni David ni Batseba, ket nagbalin nga asawana. Nagpasngay ni Batseba iti lalaki. Ngem saan a naragsakan ni Yahweh iti inaramid ni David.

Ti Mensahe ni Natan ken ti Panagbabawi ni David

1 Imbaonni Yahweh ni profeta Natan ken ni David. Napan ni Natan ken ni David ket imbagana, “Adda dua a lallaki nga agnaed iti maymaysa nga ili. Ti maysa nabaknang ket ti maysa napanglaw.

2 Adu ti baka ken karnero ti baknang,

3 idinto ta maymaysa nga urbon ti karnero ti napanglaw, a ginatangna. Tinarakenna ti karnero ket dimmakkel iti balayna a kadua dagiti annakna. Imbilangna ti karnero a kas anakna a babai. Pakanenna iti bukodna a taraon, painumenna iti bukodna a kopa ken masansan a saklotenna.

4 Iti naminsan, adda dimteng a sangaili ti baknang ngem dina kayat a partien ti maysa kadagiti animalna nga ipasango iti sangailina. Innalana ketdi ti karnero ti napanglaw ket pinartina nga impasango iti sangailina.”

5 Kasta unay ti pungtot ni David iti nabaknang ket kinunana, “Isapatak iti nagan tiApoa sibibiag a masapul a mapapatay ti kasta a tao!

6 Masapul a bayadanna iti mamimpat ti kaadu ti innalana gapu iti dakes nga inaramidna.”

7 Kinuna ni Natan ken ni David: “Sika dayta a tao! Kastoy ti kuna tiApoa Dios ti Israel, ‘Pinagbalinka nga ari ti Israel, ket inispalka iti pannakabalin ni Saul.

8 Intedko kenka ti pagarianna ken dagiti assawana. Pinagbalinka nga ari ti Israel ken Juda. No saan pay a makaanay daytoy, dinoblek pay koma ti itedko kenka.

9 Apay a sinukirmo dagiti bilinko? Apay nga inaramidmo daytoy a kinadakes? Pinapapataymo ni Urias iti paggugubatan. Impalubosmo a papatayen dagiti Ammonita, ket kalpasanna, innalam ti asawana!

10 Ita, gapu ta sinukirnak ket innalam ti asawa ni Urias, kanayonto nga adda matay iti kampilan nga agtaud iti kaputotam.

11 Isapatakkenka a pataudekto ti maysa iti bukodmo a familia a mangyeg iti riribuk kenka. Alaekto dagiti assawam ket itedko ida iti sabali a tao. Kaiddaennanto ida uray iti tengnga ti aldaw.

12 Nagbasolka iti nalimed, ngem ipalubosko a maaramid daytoy iti tengnga ti aldaw tapno makita dagiti amin nga Israelita.’”

13 Kinuna ni David, “Nagbasolak itiApo.”

Simmungbat ni Natan, “Pakawanennaka tiApoiti basolmo; saanka a matay.

14 Ngem gapu ta sinukirmo tiApo, matayto ti agbalin nga anakmo.”

15 Kalpasanna, nagawid ni Natan.

Matay ti Anak ni David

Kas kinuna ni Yahweh, nagsakit iti nakaro ti anak ni David nga impasngay ni Batseba nga asawa ni Urias.

16 Nagkararag ni David iti Dios tapno umimbag ti ubing. Saan a nangan iti uray ania, ket tunggal rabii mapan iti kuartona ket agpatpatnag nga agid-idda iti datar.

17 Napan dagiti ofisiales iti palasiona ket pinadasda a pabangonen ngem dina kinayat. Saanna a kayat ti makilanglang kadakuada.

18 Kalpasan ti makadomingo, natay ti ubing, ket mabuteng dagiti ofisiales a mangipadamag kenkuana. Kinunada, “Idi sibibiag pay ti ubing, dinatay impangag ni David no kasaotayo. Kasano ti panangibagatayo kenkuana a natayen ti ubing? Amangan no makapanunot nga agaramid iti dakes.”

19 Idi madlaw ni David nga agiinnarasaasda, ammona a natayen ti ubing. Iti kasta, sinaludsodna kadakuada, “Natay kadin ti ubing?”

“Wen, apo, natayen,” insungbatda.

20 Bimmangon ni David, nagdigos, nagsagaysay ken sinukatanna ti pagan-anayna. Napan iti balay ni Yahweh ket nagdaydayaw sadiay. Nagsubli iti palasio, dimmawat iti taraon, ket nangan.

21 Kinuna dagiti ofisialesna, “Dimi maawatan daytoy. Idi sibibiag pay ti ubing, sinangsangitam ket dika nangnangan. Ngem apaman a natay, bimmangonka ket nanganka.”

22 “Wen,” kinuna ni David. “Idi sibibiag pay ti ubing, nagayunarak ket nagsangsangitak idi bareng no kaasiannak tiApoket paimbagenna ti anakko.

23 Ngem ita ta natayen ti ubing, apay pay la nga agayunarak? Mapagbiagko pay kadi ti ubing? Addanto aldaw a sumarunoak kenkuana iti ayanna ngem pulos a dinton agsubli kaniak.”

Mayanak ni Solomon

24 Liniwliwa ni David ni Batseba ket nagkaiddada nga agassawa. Nagpasngay ni Batseba iti lalaki a pinanaganan ni David iti Solomon. Inay-ayat ni Yahweh ti ubing,

25 ket binilinna ni profeta Natan a panagananna ti ubing iti Jedidia,agsipud ta inay-ayat ni Yahweh ti ubing.

Sakupen ni David ti Rabba

26 Kabayatanna, intultuloy ni Joab ti pananggubatna iti Rabba, ti kangrunaan a siudad ti Ammon. Idi dandanina masakup ti Rabba,

27 nangibaon kadagiti mapan mangibaga ken ni David iti daytoy, “Dinarupko ti Rabba ket sinakupko ti paggapuan ti danum ti siudad.

28 Ummongem ngarud dagiti amin a soldadom, darupenyo ti siudad ket sakupenyo. Diak kayat a siak ti maidayaw iti pannakasakupna.”

29 Inummong ngarud ni David dagiti amin a soldadona. Napan idiay Rabba, dinarupna ket nagballigi a nangparmek iti siudad.

30 Adda balitok a korona ni Molec a dios dagiti Ammonita. Agdagsen iti 75 a libra ti korona, ken napattokan iti napateg a bato. Innala ni David ti napateg a bato ket inkabilna iti koronana. Adu ti sinamsamna iti siudad.

31 Pinagtalawna dagiti umili iti siudad; adda dagiti pinagtrabahona a kas kantero, mammanday ken karpintero, ket adda met dagiti pinilitna nga agaramiditi ladrilio. Kastoy ti inaramidna kadagiti tattao iti amin nga ili ti Ammon. Kalpasanna, nagsubli ni David ken dagiti amin a soldadona idiay Jerusalem.

Ni Amnon ken ni Tamar

1 Adda napintas a babai a kabsat ni Absalom nga anak ni David. Isu ni Tamar. Nagayat kenkuana ni Amnon a maysa kadagiti annak ni David iti sabali a babai.

2 Kasta unay ti panagayatna kenkuana, ket urayna la insaksakit, ta narigat a matagikuana ni Tamar. Kas maysa a birhen, saan a mapalubosan a makilangen iti lalaki.

3 Ngem adda gayyem ni Amnon nga agnagan iti Jonadab nga anak ni Samma a kabsat ni David. Nasikap unay ni Jonadab.

4 Kinuna ni Jonadab ken ni Amnon, “Anaknaka ti ari, ngem apay nga inaldaw a makitaka a malmalday?”

“Agayatak unay ken ni Tamar a kabsatko iti ama ken kabsat ni Absalom,” insungbat ni Amnon.

5 Kinuna ni Jonadab ken ni Amnon, “Agiddaka iti katre ket aginsasakitka. Inton umaynaka sarungkaran ni amam, ipakpakaasimto kenkuana nga ibaonna ni Tamar tapno ilutoannaka iti kankanen. Kayatmo a makita ti panaglutona ket dawatem pay nga isu ti mangsubo kenka.”

6 Naginsasakit ngarud ni Amnon ket napan nagidda.

Sinarungkaran ni Ari David ni Amnon. Kinuna ni Amnon kenkuana, “Pangngaasim ta ibagam nga umay ditoy ni Tamar tapno yaramidannak iti kankanen. Kayatko a makita ti panaglutona ket isu metten ti mangpakan kaniak.”

7 Iti kasta, pinaibaga ni David ken ni Tamar, “Inka iti balay ni Amnon, ket isaganaam iti kanenna.”

8 Napan ni Tamar ket nadanonna ni Amnon a nakaidda. Nangala iti arina sana linuto sadiay a makitkita ni Amnon.

9 Kalpasanna, innalana ti pariok, inadawna dagiti kankanen sana impasango ken ni Amnon. Ngem madi a mangan ni Amnon. Binilinna ni Tamar a paruarenna dagiti adda iti kuarto. Idi nakapanawda aminen,

10 kinunana iti kabsatna, “Yegmo dagiti kankanen ditoy katrek ket suboannak.” Innala ni Tamar dagiti kankanen ket inyasidegna ida ken ni Amnon.

11 Ngem idi yawatna dagiti kankanen, ginammatan ni Amnon sana kinuna, “Umayka ta agkaiddata.”

12 “Saan,” insungbat ni Tamar, “dinak piliten; ta naalas nga aramid dayta. Saan a maipalubos iti entero nga Israel.

13 Anianto pay ti rupak iti publiko? Ket sika, mamimpinsan a maibabainkanto iti Israel. Pangngaasim ta kasaom ti ari. Ammok a saan nga agkedked ti panagasawata.”

14 Ngem dina impangag ni Tamar ket gapu ta napigpigsa ngem isu, impaiddana sana rinames.

15 Kalpasan ti panangramesna ken ni Tamar, rimsua ti napalalo a gurana iti babai. Nakarkaro ti gurana ngem ti nariknana a panagayatna idi kenkuana. “Pumanawkan!” kinunana kenkuana.

16 “Saan,” insungbat ni Tamar. “Dakdakkel a basol ti panangpapanawmo kaniak ngem ti panangramesmo kaniak.”

Ngem saan nga impangag ni Amnon ni Tamar.

17 Inayaban ni Amnon ti adipenna sana kinuna, “Paruarem daytoy a babai samo balunetan ti ruangan.”

18 Pinapanaw ti adipen ni Tamar sana binalunetan ti ruangan.

Siaarruat idi ni Tamar iti kawes nga atiddog ti manggasnati kawes ti saan pay a naasawaan a prinsesa kadagidi nga aldaw.

19 Winarakiwakan ni Tamar ti ulona iti dapu. Rinay-abna ti kawesna sana intakkab ti imana iti rupana ket agsangsangit a nagawid.

20 Idi makita ni Absalom a kabsatna, sinaludsodna, “Pinilitnaka kadi ni Amnon? Pangngaasim ta dika unay agladingit. Agulimekka laengen ta kabsatmo iti ama.” Nagyan ngarud ni Tamar nga agladladingit iti balay ni kabsatna.

21 Kasta unay ti pungtot ni Ari David idi madamagna ti amin a napasamak. Ngem dina kayat a dusaen ni Amnon agsipud ta inauna nga anakna ket ay-ayatenna unay.

22 Kasta unay met ti gura ni Absalom ken ni Amnon gapu iti inaramidna ket manipud idin, saannan a kinasasao ti kabsatna.

Agibales ni Absalom

23 Napalabas ti dua a tawen. Iti maysa nga aldaw a pappapukisan ni Absalom dagiti karnerona idiay Baal Hazor iti asideg ti Efraim, inawisna dagiti amin a lallaki nga annak ti ari.

24 Dimmatag ni Absalom ken ni Ari David. “Natan-ok nga Ari, pappapukisak dagiti karnerok,” kinunana. “Pangngaasim ta umayka agraman dagiti ofisialesmo.”

25 “Saan, anakko,” insungbat ni David. “Adu unayen a pakaringgoram no umaykam amin.” Pinilit ni Absalom, ngem kaskasdi a madi ti ari, ket dinawatna nga agawid ti anakna.

26 Kinuna ni Absalom, “No dikayo makaumay, dumar-ay koma ngarud ni Amnon.”

“Apay a masapul a dumar-ay?” sinaludsod ti ari.

27 Ngem sipapasnek ni Absalom a nagawis, isut’ gapuna a pinalubosan ti ari ni Amnon ken dagiti dadduma a prinsipe a kumuyog kenkuana.

Nangisagana ni Absalom iti padaya a maikari iti maysa nga ari.

28 Binilinna dagiti adipenna, “Urayenyo a mabartek ni Amnon. Inton kasta unayen ti bartekna, patayenyon. Awan ti pagbutnganyo; siak ti akimbilin iti daytoy. Papigsaenyo ti nakemyo ket dikay agsarimadeng.”

29 Tinungpal dagiti adipen ti bilin ni Absalom, ket pinatayda ni Amnon. Ngarud, dinagdagus dagiti annak ti ari ti naglibas a nakasakay kadagiti muloda.

30 Adda pay laeng dagiti annak ti ari iti dalan idi naipadamag ken ni David a pinatay ni Absalom dagiti amin nga annakna.

31 Timmakder ti ari, rinay-abna ti pagan-anayna ket nagpakleb iti daga. Rinay-ab met dagiti amin nga adipenna nga adda sadiay dagiti pagan-anayda.

32 Ngem kinuna ni Jonadab nga anak ni Samma a kabsat ni David, “Natan-ok nga Ari, saanda a pinapatay dagiti amin nga annakmo. Ni la Amnon ti natay. Naikeddengen ni Absalom ti panangpapatayna ken ni Amnon manipud pay panangrames ni Amnon ken ni Tamar a kabsatna.

33 Ngarud, dimo koma patpatien ti damag a natay dagiti amin nga annakmo. Ni la Amnon ti napapatay.”

34 Kabayatanna, nakalibas ni Absalom.

Apag-isu met a kumita ti guardia, ket naimatanganna ti maysa a bunggoy ti tattao a sumalsalog iti turod manipud iti dalan nga agpa-Horonaim.Napan iti ari ket imbagana ti nakitana.

35 Kinuna ni Jonadab ken ni Ari David, “Adtoyen a sumangpet dagiti annakmo kas imbagak.”

36 Apaman a naisaona daytoy, dimteng dagiti annak ti ari ket nagsasangitda. Nagsangit met iti nasaem ni David ken dagiti ofisialesna.

37-38 Nagtalawni Absalom ket nagkamang ken ni Talmai nga anak ni Amiud nga ari ti Gesur. Tallo a tawen a nagyan sadiay. Nabayag a dinung-awan ti ari ni Amnon.

39 Idi nailiwliwagen ti ari ti ipapatay ni Amnon, simken ti iliwna ken ni Absalom nga anakna.

Ipamuspusan ni Joab ti Panagsubli ni Absalom

1 Ammo ni Joab nga anak ni Zeruyas a mailiw unay ni Ari David ken ni Absalom.

2 Pinaayabanna ngarud ti maysa a masirib a babai nga agnaed idiay Tekoa. Idi sumangpet ti babai, kinuna ni Joab kenkuana, “Agpaneska ket agparangka a kasla nagminatay. Bay-am a kusokuso ti buokmo. Ipakitam a kasla nabayagen nga agdungdung-awka.

3 Kalpasanna, inka iti ari ket ibagam kenkuana ti ibagak kenka.” Imbaga ni Joab no ania ti sawen ti babai.

4 Dimmatag ti babai ken ni David, nagpakleb iti daga a mangipakita iti panagraemna kenkuana. Kinunana, “Tulongannak kadi, Natan-ok nga Ari.”

5 “Ania ti masapulmo?” sinaludsod ti ari.

“Natan-ok nga Ari, maysaak a napanglaw a balo,” kinuna ti babai.

6 “Adda dua nga annakko a lallaki. Iti naminsan nga addada iti away, nagapada. Awan ti naganawa kadakuada ket pinatay ti maysa ti kabsatna.

7 Ita, apo ari, nagmaymaysa dagiti kakabagiak a bimmusor kaniak. Kayatda nga alaen ti anakko tapno papatayenda met gapu iti panangpapatayna iti kabsatna. No patayenda ti anakko, sisiak laeng ti mabati. Pukawenda ti kakaisuna a namnamak ti biag; awan ti mabati a kaputotan ti asawak tapno mataginayon ti naganna.”

8 “Agawidkan,” kinuna ti ari. “Siak ti makaammo iti dayta.”

9 “Natan-ok nga Ari,” kinuna ti babai, “no aniaman ti aramidem, siak ken ti familiak ti akimbasol. Saan koma nga agbasol ti ari ken ti familiana.”

10 Kinuna ti ari, “No adda pay mangbutbuteng kenka, yamangmo kaniak ket dinakanto ringringgorenen.”

11 “Natan-ok nga Ari,” kinuna ti babai, “ikararagmo koma itiApoa Diosmo a saan nga ituloy dagiti kabagiak ti panggepda nga agibales ket patayenda ti anakko. Ta no ituloyda ti panggepda, makaaramidda iti nadagdagsen a basol.”

“Isapatak iti nagan tiApoa sibibiag nga awan ti pakaan-anoan ti anakmo,” insungbat ti ari.

12 Intuloy ti babai, “Adda pay koma ibagak, Natan-ok nga Ari.”

“Ibagam latta,” kinuna ti ari.

13 Kinuna ti babai ken ni David, “Apay nga inaramidmo ti kasta a kinadakes kadagiti tattao ti Dios? Saanmo nga impalubos nga agsubli ti anakmo. Ket inukommo ti mismo a bagim babaen iti saom.

14 Mataytayto amin; arigtay iti danum a saanen a maurnong kalpasan ti pannakaibuyatna. Uray ti Dios dina pasublien ti biag dagiti natay, ngem maipamuspusan ti ari a pasublien ti anakna a napagtalaw.

15 Immayko imbaga daytoy kenka, Natan-ok nga Ari, agsipud ta binutbutengdak dagiti tattao. Napanunotko a no ipudnok daytoy kenka, mabalin a dumngegka ket tulongannak.

16 Impagarupko nga ipangagnak ket ispalennak iti agpanggep a mangpatay kadakami nga agina tapno maisinakami a dua iti Israel ken iti impatawid ti Dios kadagiti tattaona.

17 Kinunakpay iti bagik a natalgedakto gapu iti karim, apo. Ngamin, mayarig ti ari iti anghel ti Dios ket mapaggiddiatna ti naimbag ken dakes.Sapay koma ta adda kenka tiApoa Diosmo.”

18 Simmungbat ti ari, “Agsaludsodak kenka, ket ibagam ti pudno.”

“Wen, Natan-ok nga Ari,” kinuna ti babai, “agsaludsodka latta.”

19 Sinaludsod ti ari iti babai, “Sinugsogannaka kadi ni Joab?”

Simmungbat ti babai, “Isapatak iti nagan dagiti amin a nasagradoan a banag a diak mabalin a liklikan a sungbatan ti saludsodmo. Wen, pudno a ni ofisialmo a Joab ti nangisuro iti amin nga aramiden ken sawek.

20 Ngem inaramidna daytoy tapno marisut daytoy a parikut. Natan-ok nga Ari, masiribka a kas iti anghel ti Dios ket ammom amin a mapaspasamak iti daga.”

21 Kalpasanna, kinuna ti ari ken ni Joab, “Inkeddengko nga aramiden ti kayatmo a maaramid. Inka alaen ni agtutubo nga Absalom, ket yegmo ditoy.”

22 Nagrukob ni Joab iti daga iti sangoanan ni David kas panangipakitana iti panagraemna. Kinunana, “Bendisionannaka koma ti Dios, Natan-ok nga Ari. Ita, ammok a nagun-odko ti panagtalekmo gapu ta pinatgam ti nanumo a dawatko.”

23 Dinagdagus ni Joab ti napan idiay Gesur ket inyawidna ni Absalom idiay Jerusalem.

24 Ngem imbilin ti ari a saan nga agyan ni Absalom iti palasio. Kinunana, “Diak kayat a makita ti rupa ni Absalom.” Iti kasta, nagnaed ni Absalom iti balayna ket saan a dimmatag iti ari.

Agkinnaawatan da Absalom ken David

25 Iti entero nga Israel, awan lalaki a nalatlatak ngem ni Absalom gapu iti kinataerna. Awan pamilawan kenkuana manipud ulo agingga iti dapanna.

26 Nakapuspuskol unay ti buokna, ket masapul a putdanna iti maminsan iti makatawen ta nadagsen unay no umatiddog. Agdagsen iti agarup lima a libra iti timbangan ti ari.

27 Uppat ti annak ni Absalom—tallo a lallaki ken maysa a babai nga agnagan iti Tamar a nakapimpintas.

28 Dua a tawen a nagyan ni Absalom idiay Jerusalem ket pulos a dina nakita ti ari.

29 Kalpasanna, pinaayaban ni Absalom ni Joab tapno ibaonna a makisao iti ari, ngem madi ni Joab a mapan ken ni Absalom. Pinaayabanna manen ngem dina kayat ti mapan kenkuana.

30 Daytoy ti gapuna a kinuna ni Absalom kadagiti adipenna, “Inkayo puoran ti talon ni Joab. Agabay ti talonmi ket namulaan iti sebada.” Napanda ngarud pinuoran ti talon.

31 Dinagdagus ni Joab ti napan iti balay ni Absalom ket kinunana kenkuana, “Apay a pinuoran dagiti adipenmo ti talonko?”

32 “Gapu ta saanka nga immay idi pinaayabanka,” insungbat ni Absalom. “Kayatko idi nga inka makisarita iti ari ket ibagam daytoy kenkuana: ‘Apay a pinaalanak pay laeng idiay Gesur? Nasaysayaat koma no nagyanak sadiay.’” Intuloy ni Absalom, “Inka iti ari ta ibagam a kayatko ti makisarita kenkuana. No kas pangarigan ta nagbasolak, nakasaganaak a mapapatay.”

33 Iti kasta, napan ni Joab ken ni Ari David ket imbagana ti sao ni Absalom. Pinaayaban ti ari ni Absalom. Idi dumatag ni Absalom, nagrukob iti sangoanan ni David. Inungngoan ti ari ti anakna a mangipakita iti panangawatna kenkuana.

Panggep ni Absalom ti Umalsa

1 Kalpasan daytoy, nangisagana ni Absalom iti bukodna a lugan a pakigubat ken kabkabalio agraman guardiana a 50 a lallaki.

2 Masapa a bumangon ket mapan agtakder iti asideg ti ruangan ti siudad. No lumabas ti maysa a tao nga addaan iti kaso a kayatna a parisut iti ari, ayabanna ket saludsodenna no taga-ano. Kalpasan ti panangibagana iti tribu a nagtaudanna,

3 kuna ni Absalom, “Makitak nga adda kalintegam, ngem awan ti pannakabagi ti ari a mangasikaso kenka.”

4 Ket inayonna, “No maysaak la koma nga ukom! Awatek ti siasinoman a dumatag kaniak nga addaan kaso wenno parikut ket kitaek a maikkan iti hustisia.”

5 No umasideg kenkuana ti tao tapno kumablaaw, arakupenna sana agkan.

6 Kastoy ti aramiden ni Absalom iti tunggal Israelita a mapan agdarum iti ari, ket nagun-odna ti panagtalekda kenkuana.

7 Uppata tawen ti napalabas. Kinuna ni Absalom ken ni Ari David, “Apo, pangngaasim ta palubosannak a mapan idiay Hebron tapno tungpalek ti sinapataak itiApo.

8 Idi addaak idiay Gesur iti Siria, inkarik itiApoa no makapagsubliak idiay Jerusalem, innakto agdaydayaw kenkuana idiay Hebron.”

9 “Inka ngarud,” kinuna ti ari. Iti kasta, napan ni Absalom idiay Hebron.

10 Ngem nangibaon kadagiti tattao a mapan iti amin a tribu ti Israel tapno ibagada daytoy, “Apaman a mangngegyo ti uni ti trumpeta ipukkawyo, ‘Nagbalin ni Absalom nga ari idiay Hebron!’”

11 Adda 200 a tattao nga inawis ni Absalom ket kimmuyogda kenkuana manipud idiay Jerusalem; pulos nga awan ti ammoda maipapan iti panggepna.

12 Bayat ti panagidatag ni Absalom kadagiti daton, nangibaon kadagiti mapan idiay Gilo tapno ayabanda ni Ahitofel, maysa kadagiti mamalbalakad ken ni David. Pimmigsa ti yaalsa ket immadu dagiti tattao ni Absalom.

Pumanaw ni David idiay Jerusalem

13 Idiay Jerusalem, simmangpet ti maysa a naibaon ket impadamagna ken ni David ti panangbigbig dagiti tattao ken ni Absalom a kas ari iti Israel.

14 Kinuna ni David kadagiti amin nga ofisialesna nga adda idiay Jerusalem, “Masapul a pumanawtayo a dagus. Agpeggadtayo no ditay itarayan ni Absalom. Agdardarastay amangan no makamakamnatayo; parmekennatayo ken papatayenna amin nga adda iti siudad.”

15 Insungbatda, “Natan-ok nga Ari, nakasaganakami a mangaramid iti aniaman nga ibagam.”

16 Iti kasta, pimmanaw ti ari a kinuyog ti familiana, ken dagiti ofisialesna. Nabati ti 10 kadagiti kamalalana a mangaywan iti palasio.

17 Idi makadanonda iti maudi a balay ti siudad, nagsardeng ti ari ken dagiti amin a kakaduana.

18 Nagtakderdagiti amin nga ofisialesna iti abayna bayat ti ilalabas iti sangoananna dagiti guardia ti palasio. Limmabas met dagiti 600 a soldado a naggapu idiay Gat a simmurot kenkuana.

19 Kinuna ti ari ken ni Ittai a panguloda, “Apay a sumurotka kadakami? Agsublika ket makipagyanka iti baro nga ari. Maysaka a ganggannaet a napagtalaw iti bukodmo a pagilian.

20 Nabiitka pay a nagnaed ditoy ket saan a masapul nga agalla-allaka a kas kadakami. Diak pay ammo no sadino ti papanak. Agsublika ket alaem dagiti kailiam. Sapay koma ta naasi ken napudno tiApokenka.”

21 Ngem kinuna ni Ittai, “Natan-ok nga Ari, isapatak kenka iti nagan tiApoa sibibiag, a sumurotak iti sadinoman a papanam uray pay pakatayak.”

22 “Nasayaat! Magnakayo ngaruden,” kinuna ti ari. Iti kasta, intuloy ni Ittai ti nagna agraman dagiti tattaona ken dagiti annakda.

23 Nagsangit dagiti umili iti napigsa idi pumanaw dagiti pasurot ni David. Binallasiw ti ari ti waig ti Kidron, agraman dagiti tattaona ket nagkukuyogda a nagturong iti let-ang.

24 Adda sadiay ni Zadok a padi; kaduana dagiti Levita a mangaw-awit iti nasagradoan a Lakasa ti Tulag. Indissodaket saanda a binagkat agingga a nakapanaw amin a tattao iti siudad. Adda met sadiay ni Abiatar a padi.

25 Pinaayaban ti ari ni Zadok ket kinunana kenkuana, “Isublim ti Lakasa ti Tulag iti siudad. No magun-odko ti parabur tiApo, addanto aldaw a palubosannak nga agsubli tapno makitak ti Lakasa ti Tulag ken ti pagyananna.

26 Ngem no saan, aramidenna latta ti kaykayatna kaniak.”

27 Kinuna pay ti ari ken ni Zadok, “Kitaem,agsublikayo a dua ken ni Abiatar a kaduayo ken ni Ahimaas nga anakmo ken ni Jonatan nga anakna. Agannadkayo!

28 Agyanak pay laeng iti pagballasiwan ti karayan iti let-ang ket urayek ti ipadamagmo.”

29 Innala da Zadok ken Abiatar ti Lakasa ti Tulag, nagsublida idiay Jerusalem ket nagyanda pay laeng sadiay.

30 Agsangsangit ni David a simmang-at idiay Bantay Olibo. Sakasaka ket naabungotan ti ulona kas mangipakita iti ladingitna. Siaabungot met dagiti amin a sumursurot kenkuana ket agsangsangitda met a simmang-at.

31 Idi naibaga ken ni Davida timmipon ni Ahitofel kadagiti immalsa nga impanguloan ni Absalom, inkararagna daytoy: “Pangngaasim, OApo, ta pagbalinem nga awan serserbi ti pammagbaga ni Ahitofel.”

32 Idi makadanon ni David iti tapaw ti turod, iti paset nga adda lugar a pagdaydayawan, sinabat ti matalek a gayyemna, ni Cusai nga Arkita. Naray-ab ti pagan-anay ni Cusai ken tapoktapok ti ulona.

33 Kinuna ni David kenkuana, “Awan maitulongmo no sumurotka kaniak.

34 Ngem matulongannak no agsublika iti siudad ket ibagam ken ni Absalom nga agserbika a sipupudno kenkuana a kas iti panagserbim kaniak nga amana. Aramidem amin a kabaelam a mangsuppiat iti aniaman a balakad ni Ahitofel.

35 Addanto sadiay da Zadok ken Abiatar a papadi. Ibagamto kadakuada ti amin a mangngegmo iti palasio.

36 Kaduada dagiti annakda, da Jonatan ken Ahimaas, ket isuda ti ibaonmonto a mangyeg kaniak iti damag.”

37 Napan ngarud ni Cusai a gayyem ni David idiay Jerusalem. Apag-isu a sumangpet idi ni Absalom iti siudad.

Ni David ken ni Siba

1 Idimakaadayo bassit ni David iti tapaw ti turod, pagammoan ta sinabat ni Siba nga adipen ni Mefiboset. Adda dua nga asnona a nagkarga iti dua gasut a tinapay, sangagasut a karaay a pasas, sangagasut a kapurpuros a frutas ken maysa a supot a lalat a napno iti arak.

2 Sinaludsod ti ari kenkuana, “Ania ti pangipaayam kadagitoy, Siba?”

Insungbat ni Siba, “Agpaay dagiti asno a pagsakayan ti familiam, Natan-ok nga Ari. Agserbi kadagiti soldado dagiti tinapay ken dagiti frutas, ket inumenda met ti arak no mabannogda iti let-ang.”

3 “Sadinoti ayan ni Mefiboset, ti apoko ni Saul nga apom?” sinaludsod kenkuana ti ari.

“Nagbati idiay Jerusalem ta kapkapnekanna nga isubli dagiti Israelita kenkuana ti pagarian daydi apongna a Saul,” insungbat ni Siba.

4 Kinuna ti ari ken ni Siba, “Kukuamon dagiti amin a sanikua ni Mefiboset.”

“Siak ti adipenmo,” kinuna ni Siba. “Sapay koma ta maikariak iti panagtalekmo.”

Ni David ken ni Simei

5 Idi dumteng ni Ari David idiay Bahurim, maysa kadagiti kakabagian ni Saul, ni Simei nga anak ni Gera, ti simmabat a mangilunlunod kenkuana bayat ti isusungadna.

6 Binatobatona ni David ken dagiti ofisialesna nupay nalikmut ni David kadagiti tattao ken guardia-na.

7 Inlunod ni Simei a kunana, “Pumanawka! Pumanawka! Mammapatay! Kriminal!

8 Inagawmo ti pagarian ni Saul, ket ita, dusdusaennaka tiApoiti panangpapataymo iti adu a kameng ti familia ni Saul. Inteden tiApoti pagarian ken ni Absalom nga anakmo. Iti kamaudianna, nagbayadka met la ti utangmo, ta mammapatayka!”

9 Kinuna ni Abisai nga anak ni Zeruyas, “Natan-ok nga Ari, apay nga ipalubosmo nga ilunodnaka daytoy natay nga aso? Palubosannak man ta innak putolan!”

10 Ngem kinuna ni David kada Abisai ken Joab a kabsatna, “Saankayo a makibiang, dakayo nga annak ni Zeruyas. Ilunlunodnak ta dayta ti bilin tiApo. Awan ti kalintegan ti siasinoman nga agsaludsod no apay a kasta ti aramidenna.”

11 Kinuna ni David ken ni Abisai ken kadagiti ofisialesna, “Kayatnak a patayen ti anakko, ket dikay ngarud masdaaw iti ar-aramiden daytoy a Benjaminita. Imbilin tiAponga ilunodnak, isu a baybay-anyo ket palubosanyo nga aramidenna.

12 Nalabit a makita tiApoti panagtutuokkoket bendisionannak a supapak dagitoy a pannakailunodko.”

13 Intuloy ni David ken dagiti tattaona ti nagna idinto a napan ni Simei iti bakras ti turod. Agilunlunod, agipurpuruak iti bato ken tapok bayat ti pannagnana.

14 Nabannog ti ari ken dagiti kakaduana idi makadanonda idiay Jordanket naginanada sadiay.

Ni Absalom idiay Jerusalem

15 Simrek ni Absalom ken dagiti amin nga Israelita idiay Jerusalem; kaduada ni Ahitofel.

16 Idi masabat ni Cusai a matalek a gayyem ni David, impukkawna, “Agbiag ni Absalom! Agbiag ti Ari!”

17 Sinaludsod ni Absalom, “Kastoy kadi ti panangipakitam iti kinapudnom ken ni David a gayyemmo? Apay a dika simmurot kenkuana?”

18 Simmungbat ni Cusai, “Kasano a sumurotak kenkuana? Kayatko ti agpaay iti pinili tiApo, kadagitoy a tattao ken kadagiti amin nga Israelita. Sumurotak kenka.

19 Saan kadi a rumbeng laeng a pagserbiak ti anak ti apok? Kas iti panagserbik iti amam, ita, agserbiak met kenka.”

20 Kinuna ni Absalom ken ni Ahitofel, “Ita ta addatayo ditoy, ania ti maibalakadmo nga aramidentayo?”

21 Kinuna ni Ahitofel, “Kaiddaem dagiti kamalala ni amam nga imbatina a mangaywan iti palasio. Inton madamag dagiti amin nga Israelita a nagbalinka a kabusor ni amam, ad-addanto a tumured dagiti pasurotmo.”

22 Nangbangondangarud iti tolda a para ken ni Absalom iti tuktok ti palasio. Ket kinaidda ni Absalom dagiti kamalala ni amana tapno makita dagiti amin nga Israelita.

23 Kadagidi a panawen, patien dagiti tattao ti aniaman a balakad ni Ahitofel. Ibilangda ti saona a kas sao ti Dios. Tungpalen met da David ken Absalom ti balakadna.

Allilawen ni Cusai ni Absalom

1 Iti saan a nabayag kalpasan daytoy a pasamak, kinuna ni Ahitofel ken ni Absalom, “Palubosannak a pumili iti 12,000 a tattao, ta kamatenmi ni David ita a rabii.

2 Darupek inton nabannog ken naupayen. Maklaatto ket agtatarayto dagiti amin a tattaona. Tinto la ari ti papatayek.

3 Kalpasanna, isublikto kenka dagiti amin a tattaona a kas iti panagsubli ti nobia iti asawana. Maymaysa laeng a tao ti kayatmo a patayen.Saanto a maan-ano dagiti tattao.”

4 Naallukoy ni Absalom ken dagiti amin a pangulo dagiti Israelita iti daytoy a balakad.

5 Kinuna ni Absalom, “Ayabanyo ni Cusai ket denggentayo met no ania ti masaona.”

6 Idi dimteng ni Cusai, imbaga ni Absalom kenkuana ti sao ni Ahitofel. Sinaludsodna, “Tungpalenmi kadi ti patigmaan ni Ahitofel? No saan, ibagam ti aramidenmi!”

7 Simmungbat ni Cusai, “Saan a nasayaat ita ti patigmaan ni Ahitofel.

8 Ammom a beterano a mannakigubat ni amam ken dagiti tattaona. Narungsotda a kas iti ina nga oso a natakaw dagiti urbonna. Nairuam ni amam iti gubat ket saan a matmaturog iti ayan dagiti tattaona iti rabii.

9 Kinapudnona, uray kadagitoy a kanito, mabalin nga aglemlemmeng iti maysa a rukib wenno iti sabali a lugar. Apaman a darupen ni David dagiti tattaom ket adda makadamag iti daytoy, kunadanto a naparmek dagiti tattaom.

10 Uray ti soldado a natured a kas iti leon, tumakrotto, ta ammo dagiti amin nga Israelita a maingel iti gubat ni amam ket mannakigubat dagiti tattaona.

11 Kastoy ti balakadko: ummongem amin nga Israelita manipud Dan agingga iti Beerseba. Aduda a kas iti darat iti igid ti baybay, ket sika a mismo ti mangidaulo kadakuada iti paggugubatan.

12 Sarakentayo ni amam iti sadinoman a yanna, ket darupentayo sakbay a maammoanna no ania ti mapaspasamak. Saanto a makalasat, kasta met dagiti tattaona.

13 No agkamang iti maysa a siudad, mangipanto dagiti tattaotayo kadagiti tali ket guyodenda ti siudadsada itappuak iti maysa a derraas. Awanto ti uray maysa a bato a mabati iti tapaw ti turod.”

14 Kinuna ni Absalom ken amin nga Israelita, “Nasaysayaat ti patigmaan ni Cusai ngem ti patigmaan ni Ahitofel.” Inkeddeng tiApoa saan a masurot ti nasayaat a patigmaan ni Ahitofel tapno dumteng ti didigra ken ni Absalom.

Mapakdaaran ni David ket Aglibas

15 Imbaga ni Cusai kada Zadok ken Abiatar a papadi ti impatigmaan ni Ahitofel ken ni Absalom ken kadagiti papangulo dagiti Israelita. Imbagana met ti impatigmaanna ken ni Absalom.

16 Innayon pay ni Cusai, “Ita, dagdagusenyo ti mangibaon iti mapan ken ni David ket ballaaganyo a saan nga umian kadagiti pagballasiwan iti karayan iti let-ang ngem darasenna ketdi ken dagiti tattaona ti bumallasiw iti Jordan tapno dida matiliw ken mapapatay.”

17 Iti ruar ti Jerusalem, agur-uray ni Jonatan nga anak ni Abiatar ken ni Ahimaas nga anak ni Zadok iti ubbog ti Enrogel gapu ta saanda a kayat a makitada ida iti siudad. Masansan a mapan kadakuada ti maysa nga adipen a babai ket ipakaammona ti aniaman a mapaspasamak iti siudad. Mapanda met ipulong ken ni Ari David ti naibaga kadakuada.

18 Ngem iti maysa nga aldaw, adda ubing a lalaki a nakakita kadakuada, ket impulongna ken ni Absalom. Dinagdagusda ngarud ti napan naglemmeng iti balay ti maysa a tao idiay Bahurim. Adda bubon iti asideg ti balayna, ket bimmabada sadiay.

19 Nangala ti asawa ti lalaki iti maysa a kalub sana kinaluban ti ngarab ti bubon. Winarasanna iti bukel ti inkalubna tapno awan ti makadlaw.

20 Dimteng dagiti ofisiales ni Absalom iti balay ti babai ket sinaludsodda kenkuana no sadino ti ayan da Ahimaas ken Jonatan. Insungbatna a bimmallasiw dagiti dua iti karayan. Nagbirok dagiti ofisiales ngem idi dida masarakan da Jonatan ken Ahimaas, nagsublida idiay Jerusalem.

21 Idi nakapanawen dagiti ofisiales, rimmuar da Ahimaas ken Jonatan iti bubon ket napanda nagipadamag ken ni Ari David. Imbagada kenkuana ti plano ni Ahitofel a maibusor kenkuana sada kinuna, “Darasem ti bumallasiw iti karayan.”

22 Binallasiw ngarud ni David ken dagiti amin a tattaona ti Jordan. Aglawagen idi makaballasiw.

23 Idi makita ni Ahitofel a saan a nasurot ti patigmaanna, sinilyaanna ti asnona ket nagawid iti ilina. Intedna ti maudi a bilinna kadagiti kabbalayna sa nagbitay. Naitabon iti lugar a pagitantaneman ti familiana.

24 Idi nakaballasiwen da Absalom ken dagiti tattaona iti Jordan, nakadanonen ni David iti ili ti Mahanaim. (

25 Ni Amasa ti dinutokan ni Absalom a mangsukat ken ni Joab a mangipangulo iti armada. Ni Jeter nga Ismaelitati amana; ni Abigail nga anak ni Naas ken kabsat ni Zeruyas nga ina ni Joab ti inana.)

26 Nagkampo ni Absalom ken dagiti Israelita iti daga ti Galaad.

27 Idi dumteng da David iti Mahanaim, sinabat ni Sobi nga anak ni Naas a taga-siudad ti Rabba idiay Ammon, ni Nakir nga anak ni Ammiel a taga-Lodebar ken ni Barzillai a taga-Rogelim idiay Galaad.

28-29 Nangyegda kadagiti malukong, banga ken pagiddaan, kasta met kadagiti taraon nga agpaay ken ni David ken kadagiti tattaona: trigo, sebada, iniruban, bukel ti utong, patani,diro, keso, mantikilia, ken sumagmamano a karnero. Ammoda a mabisin, mawaw ken nabannogen da David ken dagiti tattaona iti let-ang.

Maparmek ken Mapapatay ni Absalom

1 Pinagtitipon ni Ari David dagiti amin a tattaona sana binunggo-bunggoy ida iti sagsangaribu ken sagsangagasut. Nangdutok iti maysa nga ofisial iti tunggal bunggoy.

2 Kalpasanna, imbaonna ida iti tallo a grupo. Saggaysa ti bunggoy nga indauloan ni Joab, ni Abisai a kabsatna ken ni Ittai a taga-Gat. Imbaga ti ari kadagiti tattaona, “Kumuyogak kadakayo.”

3 “Agbatika laengen iti siudad,” kinunada. “No kapilitan nga agsanud ken agtataraykami wenno uray matay ti kagudua kadakami—awan ti pategna iti kabusor. Ngem 10,000 a tattao ti kaibatogam. Nasaysayaat no mabatika ta patulodannakam iti tulong no kasapulan.”

4 “Aramidek ti aniaman nga ipagarupyo a nasayaat,” insungbat ti ari. Kalpasanna, nagtakder iti abay ti ruangan bayat ti ilalabas dagiti tattaona a nabunggo-bunggoy iti sagsangaribu ken sagsangagasut.

5 Imbilinna kada Joab, Abisai ken Ittai: “Ipagpapagapuyo kaniak a diyo dangran ni agtutubo nga Absalom.” Nangngeg dagiti amin a soldado ti bilin ni David kadagiti ofisialesna.

6 Nagturong ti armada ni David iti tay-ak ket nakirangetda kadagiti Israelita iti kabakiran ni Efraim.

7 Naparmek dagiti Israelita. Nakaro ti sinagabada iti pannakaparmekda: napapatay ti 20,000 a tattao iti dayta nga aldaw.

8 Nagsaknap ti gubat iti away ket ad-adu ti natay iti kabakiran ngem iti paggugubatan.

9 Pagammoan, nasabat ni Absalom ti sumagmamano a soldado ni David. Sisasakay ni Absalom iti mulo ket idi lumasat ti animal iti sirok ti maysa a dakkel a lugo, naisalat ti ulo ni Absalom kadagiti sanga ti kayo. Naglaylayon a nagtaray ti mulo ngem nabati a sibibitin ni Absalom.

10 Maysa a tao ni David ti nakakita iti napasamak ket impadamagna ken ni Joab, “Apo, nakitak ni Absalom a sibibitin iti maysa a lugo.”

11 Insungbat ni Joab, “Nakitam ni Absalom? Apay a dimo pinatay a dagus? Gunggonaanka koma iti sangapulo a bagi ti pirak ken maysa a sinturon.”

12 Ngem kinuna ti lalaki, “Uray no ikkannak iti sangaribu a bagi ti pirak, diak la ketdi dangran ti anak ti ari. Nangngegmi amin a binilinnakayo ti ari—dakayo kada Abisai ken Ittai: ‘Diyo dangran ni agtutubo nga Absalom; ipagpagapuyo kaniak.’

13 Ngem no sinukirko ti bilin ti ari ket pinatayko ni Absalom, madamagto ti ari—ta awan duadua a madamagna ti amin—ket dinakto met la salakniban.”

14 “Diak dadaelenen ti tiempok kenka,” kinuna ni Joab. Nangala iti tallo a gayang ket induyokna iti barukong ni Absalom nupay sibibiag pay laeng a sibibitin iti kayo a lugo.

15 Kalpasanna, sangapulo met a soldado ni Joab ti nanglawlaw ken ni Absalom ket inuloyanda.

16 Imbilin ni Joab ti pannakapuyot ti trumpeta tapno agsardeng ti gubat ket nagsubli dagiti soldadona iti panangsunsonda kadagiti Israelita.

17 Innalada ti bangkay ni Absalom. Impisokda iti nauneg nga abut iti kabakiran sada ginaburan iti dadakkel a bato. Nagtataray met dagiti Israelita a nagkamang kadagiti balbalayda.

18 Idi sibibiag pay ni Absalom, nangipatakder iti baton-lagip iti Tanap ti Ari gapu ta awan ti lalaki nga anakna a mangtaginayon iti naganna. Iti kasta, impasurotna iti naganna ket agingga ita, maaw-awagan iti Baton-lagip ni Absalom.

Maipadamag ken ni David ti Ipapatay ni Absalom

19 Kalpasanna, kinuna ni Ahimaas nga anak ni Zadok, “Palubosannak ta innak a dagus ipadamag iti ari ti panangispal kenkuana tiApokadagiti kabusorna.”

20 “Saanka a mapan,” kinuna ni Joab. “Awan ti naimbag a damag nga ipakaammom ita nga aldaw. Mabalinmo ti mapan iti sabali nga aldaw ngem saan nga ita agsipud ta natay ti anak ti ari.”

21 Kinuna ni Joab iti tagabuna a taga-Etiopia, “Inka ibaga iti ari ti nakitam ita nga aldaw.” Nagkurno ti tagabu ket kalpasanna, nagtaray a napan.

22 Impapilit ni Ahimaas, “Uray ania ti mapasamak, pangngaasim ta idanonko met ti damag.”

“Apay a kayatmo ti mapan, anakko?” kinuna ni Joab. “Awanto met la ti magunggonam.”

23 “Uray ania ti mapasamak,” kinuna manen ni Ahimaas, “kayatko ti mapan.”

“Sige, inka ngaruden,” kinuna ni Joab.

Nagtaray ni Ahimaas a napan iti kalsada, linasatna ti Tanap ti Jordan ket iti saan a mabayag, linabsanna ti taga-Etiopia.

24 Agtugtugaw idi ni David iti nagbaetan ti ruangan a sumrek iti siudad ken ti ruangan a rummuar ti siudad. Immuli ti agwanwanawan iti tuktok ti bakud ket nagtakder iti atep ti pagserkan. Timman-aw ket nakitana ti lalaki nga agtartaray a maymaysana.

25 Nagpukkaw ket imbagana iti ari ti nakitana. “No is-isuna,” kinuna ti ari, “adda naimbag a damag nga umayna ipakaammo.” Umasideg nga umasideg ti agtartaray a lalaki.

26 Bayat ti yaasideg ti agtartaray, nakita ti agwanwanawan nga adda sabali a lalaki nga agtartaray nga is-isuna ket impukkawna iti guardia ti ruangan, “Kitaem! Adda man umay a sabalin!”

Insungbat ti ari, “Mangyeg met daytoy iti naimbag a damag.”

27 Kinuna ti agwanwanawan, “Awan duadua a ni Ahimaas ti umuna a lalaki; kasta ti panagtarayna.”

“Naimbag dayta a tao,” kinuna ti ari, “ket mangyeg iti naimbag a damag.”

28 Kinablaawan ni Ahimaas ti ari, nagrukob iti sangoananna sana kinuna, “Madaydayaw tiApoa Diosmo a nangparmek kadagiti tattao nga immalsa a maibusor kenka.”

29 “Kumusta ni agtutubo nga Absalom? Awan met la nakaan-anoanna?” sinaludsod ti ari.

“Apo, itay imbaonnak ni Joab, adda nadlawko a dakkel a riribuk ngem diak ammo no ania daydiay,” insungbat ni Ahimaas.

30 Imbaga ti ari, “Aglisika pay laeng.”

Ket napan nagtakder ni Ahimaas iti disso a naibaga kenkuana.

31 Dimteng ti taga-Etiopia ket kinunana iti ari, “Adda naimbag a damag nga ipakaammok kenka, Natan-ok nga Ari. Ita nga aldaw, pinagballiginaka tiApoket pinarmekna dagiti amin nga immalsa a maibusor kenka!”

32 “Kumusta ni agtutubo nga Absalom? Awan met la nakaan-anoanna?” sinaludsod ti ari.

Insungbat ti taga-Etiopia, “Sapay koma ta lak-amen dagiti kabusormo, apo, ken amin nga immalsa a maibusor kenka ti linak-am daytoy nga agtutubo.”

33 Kasta unay ti ladingit ti ari. Immuli iti kuarto iti ngatoen ti pagserkan ket nagsangit sadiay. Bayat ti pannagnana, insangitna, “Ay, anakko! Absalom nga anakko, Absalom nga anakko! Siak la koma ti natayen a saan ketdi a sika. Ay, anakko, Absalom! Ay, anakko!”

Babalawen ni Joab ni David

1 Naipadamag ken ni Joab nga agsangsangit ket agdungdung-aw ni Ari David gapu ken ni anakna nga Absalom.

2 Iti dayta nga aldaw, ti ragsak ti panagballigi nagbalin a ladingit iti entero nga armada gapu ta nadamagda a dungdung-awan ti ari ti anakna.

3 Nagar-arudokda a nagsubli iti siudad; kasdala tattao a naparmek iti paggugubatan.

4 Inabbongan ti ari ti rupana ket insangitna iti napigsa, “Absalom nga anakko! Ay, Absalom nga anakko!”

5 Napan ni Joab iti balay ti ari ket kinunana kenkuana, “Ita nga aldaw, imbabainmo dagiti amin a tattaom—dagiti nangispal iti biagmo, ti biag dagiti annakmo, assawa ken kamalalam.

6 Busorem dagiti mangay-ayat kenka idinto a tulongam dagiti manggurgura kenka. Nalawag nga impakitam nga awan serserbi kenka dagiti ofisialesmo ken dagiti tattaom. Makitak a naragragsakka no sibibiag ita ni Absalom ket nataykam amin.

7 Ita, inka papigsaen ti pakinakem dagiti tattaom. No madika, isapatak iti nagan tiAponga awan ti mabati kenka agingga iti bigat. Daytanto ti kakaroan a didigra a sagabaem iti unos ti panagbiagmo.”

8 Timmakder ti ari ket napan nagtugaw iti asideg ti ruangan ti siudad. Nadamag dagiti tattaona nga adda sadiay ti ari ket naguummongda iti likmutna.

Agsubli ni David idiay Jerusalem

Kabayatanna, nagtataray a nagawid dagiti Israelita, ket nagkamang ti tunggal maysa iti balayna.

9 Iti entero a pagilian, nagsusuppiat dagiti amin nga Israelita. “Inispalnatayo ni Ari David kadagiti kabusortayo,” kinunada iti tunggal maysa. “Inispalnatayo kadagiti Filisteo ket ita, intarayanna ni Absalom ket pinanawanna ti pagilian.

10 Inkonsagrartayo ni Absalom a kas ari ngem natay iti paggugubatan. Ngarud, apay nga awan ti mangpasubli ken ni Ari David?”

11 Nadamag ni Ari David ti pagsasaritaan dagiti Israelita.Iti kasta, imbaonna da Zadok ken Abiatar a papadi tapno saludsodenda daytoy kadagiti pangulo ti Juda: “Apay a dakayo ti maudi a tumulong iti panagsubli ti ari iti palasiona?

12 Kakabagiankayo; maymaysa a dara ti agtartaray kadagiti urattayo. Apay a dakayo ti maudi a mangisubli kaniak?”

13 Binilin pay ida ni David nga ibagada ken ni Amasa, “Kabagianka. Manipud ita, sika ti dutokak a mangipangulo iti armada a sukat ni Joab. Uray dusaennak ti Dios no diak aramiden daytoy!”

14 Nagun-od ni David ti naan-anay a panagtalek dagiti amin a taga-Juda ket pinaayabanda nga agsubli ti ari agraman dagiti amin nga ofisialesna.

15 Nagsubli ti ari iti Karayan Jordan ket iti dalanna, sinabat dagiti tattao ti Juda a napan idiay Gilgal tapno kaduaenda a bumallasiw.

16 Nagdardarasa napan idiay ni Simei nga anak ni Gera a Benjaminita a taga-Bahurim tapno sabtenna ni Ari David.

17 Kaduana ti 1,000 a tattao a nagtaud iti tribu ni Benjamin. Simmabat met ni Ziba a babaonen ti familia ni Saul; kinakuyogna dagiti 15 nga annakna ken dagiti 20 nga adipenna. Dimtengda idiay Jordan sakbay ti idadateng ti ari.

18 Binallasiwdati karayan tapno iballasiwda ti bunggoy ti ari ken aramidenda ti aniaman a kayatna a maaramid.

Kaasian ni David ni Simei

Bayat ti panagsagana ti ari a bumallasiw, nagpakleb ni Simei iti sakaannanna

19 ket kinunana, “Natan-ok nga Ari, pangngaasim ta lipatemon ti dakes nga inaramidko iti dayta nga aldaw nga ipapanawmo idiay Jerusalem. Lipatem koman a mamimpinsan.

20 Apo, ammok a nakabasolak ket daytoy ti gapuna a siak ti immuna kadagiti tribu ti amianan nga immay simmabat iti Natan-ok nga Ari ita nga aldaw.”

21 Nagsao ni Abisai nga anak ni Zeruyas. Kinunana, “Rumbeng a mapapatay ni Simei gapu ta inlunodna ti tao a pinili tiApo.”

22 Ngem kinuna ni David ken ni Abisai ken ni Joab a kabsatna, “Siasino kadi ti nagdawat iti kapanunotanyo? Mangyegkay kadi iti buong-ti-ulo? Siak ti ari ti Israel ket awan ti Israelita a mapapatay ita nga aldaw.”

23 Kinunana ken ni Simei, “Ikarik kenka a saanka a mapapatay.”

Kaasian ni David ni Mefiboset

24 Simmalogmet ni Mefiboset nga apoko ni Saul tapno sabtenna ti ari a nagsubli a sibibiag. Manipud pimmanaw ti ari, saan pay a binuggoan ni Mefiboset dagiti sakana wenno nagibarbas; saanna pay a sinukatan ti pagan-anayna.

25 Idi dumteng iti panaggapunaidiay Jerusalem tapno sabtenna ni David, kinuna ti ari kenkuana, “Mefiboset, apay a dika kimmuyog kaniak?”

26 Insungbatna, “Natan-ok nga Ari, ammom a pilayak. Imbagak iti adipenko a silyaanna ti asnok tapno makikuyogak kenkuana. Ngem inallilawnak.

27 Saan a pudno ti imbagana kenka maipapan kaniak. Natan-ok nga Ari, mayarigka iti anghel ti Dios; aramidem ngarud ti ammom a nasayaat.

28 Rumbeng, Natan-ok nga Ari, ti panangpapataymo kadagiti amin a kameng ti familia ni amak ngem pinalubosannak a mangan iti lamisaanmo. Awanen ti kalintegak nga agdawat iti aniaman a parabur iti ari.”

29 Insungbat ti ari, “Saanen a nasken nga agsaoka pay. Inkeddengkon a pagbingayanyo ken ni Siba ti sanikua ni Saul.”

30 “Uray kukua aminen ni Siba,” kinuna ni Mefiboset. “Umdasen a nagsubli a sikakaradkad ti Natan-ok nga Ari.”

Bendisionan ni David ni Barzillai

31 ManipudRogelim, simmalog met ni Barzillai a taga-Galaad tapno kaduaenna ti ari a bumallasiw iti Jordan.

32 Lakay unayen ni Barzillai; agtawen iti 80. Nakabakbaknang ket isu ti nangnangted iti taraon ti ari bayat ti kaaddana idiay Mahanaim.

33 Kinuna idi ti ari kenkuana, “Sumurotka kaniak idiay Jerusalem ket siakto ti makaammo kenka.”

34 Ngem insungbat ni Barzillai, “Bassiten ti natda a tawen a panagbiagko. Ania pay la ti surotak iti Natan-ok nga Ari idiay Jerusalem?

35 Walopulo ti tawenkon ket awanen ti tarigagayko iti ragragsak. Diakon mananam ti imas ti kanen ken inumek. Diakon mangngeg ti timek dagiti kumakanta. Agbalinak la a dadagsen kenka, Natan-ok nga Ari.

36 Diak maikari iti kasta a gunggona. Kumuyogak la bassit kenka iti labes ti Jordan.

37 Kalpasanna, palubosannak nga agawid ket matayak iti asideg ti tanem dagiti nagannak kaniak. Adtoy ni Kimham nga anakko nga agserbi kenka. Ikuyogmo, Natan-ok nga Ari, ket aramidem ti ammom a nasayaat kenkuana.”

38 Insungbat ti ari, “Ikuyogko ni Kimham ket ipaayko kenkuana ti aniaman a kayatmo ket aramidek met kenka ti aniaman a dawatem.”

39 Sakbay a bimmallasiw ni David ken dagiti amin a tattaona ti Jordan, inagkanna ni Barzillai ket binendisionanna. Ket nagawid ni Barzillai.

Agsuppiat ti Juda ken Israel gapu iti Ari

40 Nagturong ti ari idiay Gilgal kalpasan ti ibaballasiwna iti Jordan. Kaduana dagiti amin a tattao ti Juda ken kagudua ti bilang dagiti tattao ti Israel, agraman ni Kimham.

41 Kalpasanna, napan kenkuana dagiti amin nga Israelita ket kinunada kenkuana, “Natan-ok nga Ari, apay nga impagarup dagiti kakabagiam—dagiti tattao ti Juda—nga adda kalinteganda a mangala kenka ket kuyogendaka, ti familiam, dagiti tattaom, a bumallasiw iti Jordan?”

42 Insungbat dagiti tattao ti Juda, “Inaramidmi daytoy gapu ta asideg a kabagianmi ti ari. Apay nga agpungtotkayo gapu iti daytoy? Saan nga isu ti naggasto iti kinkinnanmi. Awan met ti uray ania nga intedna kadakami.”

43 Insungbat dagiti Israelita, “Maminsangapulo nga ad-adu ti kalinteganmi ken ni Ari David ngem ti kalinteganyo uray no kabagianyo. Apay a nababa ti panagkitayo kadakami? Diyo liplipatan a dakami ti immuna a nakapanunot iti panagsubli ti ari.”

Ngem nauy-uyong dagiti taga-Juda a nangirupir iti kalinteganda ngem dagiti Israelita.

Ti Yaalsa ni Siba

1 Nairananga adda idiay Gilgal ti maysa a tao nga awan dayawna. Isu ni Siba a nagtaud iti tribu ti Benjamin ken anak ni Bikri. Pinagunina ti trumpeta ket impukkawna, “Agawidtayon, padak nga Israelita! Awan bingaytayo ken ni David. Awan tawidtayo iti anak ni Jesse!”

2 Ngarud, pinanawan dagiti Israelita ni David. Simmurotda ken ni Siba. Ngem nagtalinaed a napudno dagiti taga-Juda ken ni David ket simmurotda kenkuana idiay Jerusalem.

3 Idisumangpet ni David iti palasiona idiay Jerusalem, innalana dagiti sangapulo a sabali nga assawana nga imbatina a mangaywan iti palasio. Pinagnaedna ida iti sabali a balay ket pinaguardiaanna ida. Saannan a kinaidda ida ngem intedna ti amin a masapulda. Nagtalinaedda sadiay a kasla balo iti unos ti panagbiagda.

4 Kinuna ti ari ken ni Amasa, “Ummongem dagiti tattao ti Juda ket umaykayto amin inton maminsan nga aldaw.”

5 Napan inayaban ni Amasa ida ngem saan a nagsubli iti aldaw nga intuding ti ari a panagsublina.

6 Iti kasta, kinuna ti ari ken ni Abisai, “Dakdakkelto ti parikut a yeg ni Siba kadatayo ngem ni Absalom. Alaem dagiti tattaok ket sapulenyo amangan no aglemmeng iti maysa a nasarikedkedan a siudad ket malibasannatayo.”

7 Ngarud, pimmanaw dagiti tattao ni Joab, dagiti guardia ti ari ken dagiti dadduma a soldado idiay Jerusalem tapno sapulenda ni Siba. Kaduada ni Abisai.

8 Idi dumtengda iti dakkel a bato idiay Gabaon, sinabat ni Amasa ida. Nakaarruat ni Joab iti kawes a pakigubat a nabariksan ken nakaigalutan ti sikakaluban a kampilan. Bayat ti yaasidegna, natnag ti igam.

9 Kinuna ni Joab ken ni Amasa, “Komustaka, gayyemko?” Iti makannawan nga ima ni Joab, iniggamanna ti barbas ni Amasa tapno agkanna.

10 Saan a nadlaw ni Amasa ti kampilan nga ig-iggaman ni Joab ket induyok ni Joab ti igam iti tian ni Amasa. Rimmuar dagiti bagis ni Amasa ket natay a dagus; saanen a pinidua a dinuyok ni Joab.

Intuloy da Joab ken Abisai a kabsatna ti nangsarak ken ni Siba.

11 Nagtakder ti maysa kadagiti soldado ni Joab iti abay ti bangkay ni Amasa ket kinunana, “Siasinoman a kadua ni Joab ken ni David, surotenna ni Joab.”

12 Naiwalang iti tengnga ti dalan ti bangkay ni Amasa a nadigos iti dara. Idi makita ti agtutubo a kadua ni Joab nga agsardeng ti tunggal maysa a kumita iti bangkay, ginuyodna ti bangkay ket impanna iti talon sana kinumotan iti ules.

13 Apaman a naikkat ti bangkay iti dalan, sinurot dagiti amin a tattao ni Joab tapno kamatenda ni Siba.

14 Limmasat ni Siba iti amin a daga a masakupan ti amin a tribu ti Israel ket dimteng iti siudad ti Abel Bet Maaca. Naguummong dagiti amin a kabagian ni Bikriket simmurotda kenkuana a simrek iti siudad.

15 Nadamag dagiti tattao ni Joab nga adda ni Siba iti siudad. Napanda ngarud linakub ti Abel Bet Maaca. Linikmutda ti akinruar a bakud iti nabunton a daga. Tapno marba ti bakud, rinugianda met ti nagkali iti puonna.

16 Adda masirib a babai iti siudad a nagpukkaw manipud iti bakud. “Dumngegkayo! Dumngegkayo!” kinunana. “Ibagayo ken ni Joab nga umay ditoy. Kayatko a kasarita.”

17 Napan ni Joab ket sinaludsod ti babai, “Sika kadi ni Joab?”

“Wen, siak,” kinunana. “Ania ti masapulmo?”

Kinunana, “Dumngegka kaniak, apo.”

“Dumdumngegak,” kinuna ni Joab.

18 Kinuna ti babai, “Idi un-unana nga aldaw, masansan a kunada, ‘Inka ammoen idiay Abel ti sungbat ti parikutmo.’ Kasta ti inar-aramidda.

19 Naindaklan ti siudadmi; maysa kadagiti natalna ken napudno iti Israel. Apay a kayatmo a dadaelen? Kayatmo kadi a dadaelen ti kukua tiApo?”

20 “Saan,” insungbat ni Joab. “Diak dadaelen wenno pukawen ti siudadyo.

21 Saan a kasta ti panggepmi. Adda birbirokenmi a tao nga agnagan Siba nga anak ni Bikri ken nagtaud iti katurturodan ti Efraim. Immalsa a maibusor ken ni Ari David. Isukom kadakami dayta a tao ket panawanmi ti siudad.”

“Ipurruakmi kenka ti ulona,” kinuna ti babai.

22 Kalpasanna, napan kadagiti tattao ti siudad ket gapu ta masirib, immanamongda iti panggepna. Pinutolanda ni Siba sada impurruak ti ulo ken ni Joab nga adda iti ruar ti bakud. Pinuyot ni Joab ti trumpeta a kas pagilasinan dagiti tattaona a pumanaw iti siudad. Ket nagawidda. Nagsubli ni Joab idiay Jerusalem tapno dumatag iti ari.

Dagiti Ofisiales ni David

23 Ni Joab ti pangulo ti armada ti Israel. Ni Benaias nga anak ni Jehoyada ti pangulo dagiti guardia ni David.

24 Ni Adoniram ti mangimaton iti inkapilitan a panagtrabaho. Ni Jehosafat nga anak ni Ahilut ti agay-aywan kadagiti papeles ti pagilian.

25 Ni Siva ti sekretario ti ari. Da Zadok ken Abiatar ti papadi.

26 Ket ni Ira a taga-ili ti Jair ti maysa kadagiti papadi ni David.