Category: Dagiti Salmo

Ti Panangidaydayaw ken ni Yahweh

1 Madaydayaw tiApo.

Iti amin a pusok, agyamanakto itiApo

iti taripnong dagiti tattaona.

2 Nakaskasdaaw dagiti aramid ni Yahweh;

ti amin a maay-ayo kadakuada utobenda tapno maawatanda.

3 Nadaeg ken nadayag dagiti aramidna;

agnanayon ti kinalintegna.

4 Saan nga ipalubos tiApoa lipatenyo

dagiti nakaskasdaaw nga aramidna;

managparabur ken manangngaasi tiApo.

5 Taraonanna dagiti agbuteng kenkuana;

silalagip a kanayon iti katulaganna.

6 Imparangna kadagiti tattaona ti pannakabalinna

idi intedna kadakuada ti daga dagiti ganggannaet.

7 Napudno ken nalinteg ti amin nga aramidna;

mapangnamnamaan amin a bilbilinna.

8 Agpautda nga agnanayon awan inggana;

naaramidda iti kinapudno ken kinalinteg.

9 Winayawayaanna dagiti tattaona;

nangaramid iti katulagan nga agnanayon nga awan inggana.

Nasantoan ken mannakabalin ti naganna.

10 Tipanagbuteng ken ni Yahweh

ti pangrugian ti kinasirib.

Ikkanna iti pannakaawat

dagiti amin nga agtungpal kenkuana.

Mataginayon ti pannakaidaydayawna!

Nagasat ti Tao nga Agbuteng ken ni Yahweh

1 Madaydayaw tiApo!

Nagasat ti tao nga agbuteng ken ni Yahweh,

a maragsakan a mangtungpal kadagiti bilbilinna.

2 Nabilegto dagiti annakna iti daga;

mabendisionanto dagiti kaputotanna.

3 Nasanikua ken nabaknang ti familiana,

ket agnanayonto ti kinalintegna.

4 Uray iti sipnget, agraniag ti silaw kadagiti naimbag a tattao,

kadagiti naparabur, naasi ken nalinteg.

5 Nagasat ti tao a naparabur iti panagpautangna;

ken awan dakes a pakasarsaritaanna.

6 Awanto a pulos ti pakaan-anoanna,

ket saanto a malipatan uray kaanoman.

7 Dinto agbuteng a makangngeg

kadagiti dakes a damag.

Natibker ti pammatina,

ket agtalek ken ni Yahweh.

8 Saan nga agdanag wenno agbuteng,

di agduadua a makitananto a maparmek ti kabusorna.

9 Mangteda sibubuslon kadagiti adda kasapulanna,

saanto nga agpatingga ti panangngaasina;

mannakabalin ken raraemento dagiti tattao.

10 Makita daytoy dagiti managdakdakes,

ket makapungtotda.

Agngarrietda ket pumanawda kalpasanna;

mapukaw a mamimpinsan ti namnamada.

Pagdayaw iti Kinaimbag ni Yahweh

1 Madaydayaw tiApo!

Dakayo nga adipen tiApo,

idaydayawyo ti naganna.

2 Madaydayaw koma ti naganna ita ken iti

agnanayon nga awan inggana.

3 Manipud daya agingga iti laud

maidaydayaw ti nagan tiApo!

4 Iturayan tiApoti amin a pagilian,

ket ti dayagna ringbawanna ti tangatang.

5-6 Awan ti kas itiApoa Diostayo.

Agnaed iti nangato a disso,

a mangtannawag kadagiti langit ken ti daga.

7 Manipud iti tapok, bangonenna dagiti napanglaw;

aonenna dagiti nakurapay manipud iti bunton ti rugit.

8 Pagtugawenna ida iti denna dagiti prinsipe;

wen, kadagiti prinsipe dagiti tattaona.

9 Ikkanna iti balay ti lupes nga asawa,

pagbalinenna a naragsak nga ina.

Madaydayaw tiApo!

Kanta a Panglagip iti Iruruar Idiay Egipto

1 Idirummuar dagiti Israelita idiay Egipto,

idi pumanaw dagiti kaputotan ni Jacob

iti dayta ganggannaet a daga,

2 nagbalin ti Juda a santuario ti Apo,

nagbalin ti Israel a sanikuana.

3 Kimmitati baybay ket timmaray;

nagsardeng ti panagayus ti Karayan Jordan.

4 Nagkulagtit a kasla kalding dagiti bantay,

limmagto a kasla karnero dagiti turod.

5 Ania ti napasamak, Baybay?

Apay a timmarayka?

Jordan, apay a nagsardengka nga agayus?

6 Bambantay, apay a nagkulagtitkayo a kasla kalding?

Turturod, apay a limmagtokayo a kasla karnero?

7 Agkintayegka, daga, iti imatang tiApo;

wen, iti imatang ti Dios ni Jacob.

8 Pinagbalinnaa dan-aw dagiti kabatoan,

ken pinagubbogna dagiti mulinaw a bato.

Ti Pudno a Dios

1 Sika laeng, OApo,

ti pakaitdan ti naindaklan a pammadayaw;

dimi matagikua ta sika laeng ti pagpaayanna

gapu iti di agbalbaliw nga ayatmo

ken iti kinapudnom.

2 Saan a rumbeng a saludsoden dagiti pagilian,

“Sadino ti ayan ti Diosda?”

3 Adda sadi langit ti Diosmi;

aramidenna ti aniaman a kayatna.

4 Pirakken balitok dagiti didiosenda

nga inaramid dagiti tattao.

5 Adda ngiwatda, ngem dida makasao;

adda matada, ngem dida makakita.

6 Adda lapayagda, ngem dida makangngeg;

adda agongda, ngem dida makaangot.

7 Adda imada, ngem dida makarikna;

adda sakada, ngem dida makapagna;

awan timek a sumngaw iti karabukobda.

8 Dagiti nagaramid ken amin nga agtalek kadakuada,

umaspingda kadagiti didiosen a pinartuatda.

9 O Israel, agtalekkayo itiApo,

Isu ti tulong ken salaknibyo.

10 Agtalekkay itiApo,

dakayo amin a papadi ti Dios!

Tulongan ken salaknibannakayo.

11 Agtalekkayo itiApo,

dakayo nga agbuteng kenkuana!

Isu ti tulong ken salaknibyo.

12 Silalagip tiApokadatayo,

ket bendisionannatayto.

Bendisionannanto ti Israel

ken dagiti amin a papadi ti Dios.

13 Aminnga agbuteng kenkuana, bendisionannanto,

natan-ok man wenno nanumo.

14 Paaduennakayo koma tiApo—

dakayo ken dagiti kaputotanyo.

15 Bendisionannakayo koma tiApo

a nangaramid iti langit ken daga.

16 Ti langit kukua ni Yahweh,

ngem intedna ti daga kadagiti tattao.

17 Dagiti natay, dida makapagdayaw ken ni Yahweh

wenno dagiti napanen iti naulimek a daga.

18 Ngem datayo a sibibiag ti mangidaydayaw kenkuana,

ita ken iti agnanayon nga awan inggana.

Madaydayaw tiApo!

Pagyaman ti Tao a Naispal ken Patay

1 Ay-ayatek tiApo, ta ipangagnak;

denggenna dagiti kararagko.

2 Yallingagna kaniak dagiti lapayagna

tunggal umawagak kenkuana.

3 Pinulipolandak dagiti tali ni patay;

natnagak kadagiti palab-og ni tanem;

napnoak iti buteng ken danag.

4 Iti kasta, immawagak itiApo,

“Agpakpakaasiak, OApo, nga ispalennak!”

5 Managparabur ken managayat tiApo;

wen, manangngaasi ti Diostayo.

6 Salakniban tiApodagiti awan gawayna;

inispalnak idi nagpeggadak.

7 O kararuak, agtalgedka,

ta naimbag tiApokenka.

8 Inispalnak tiApoiti ngarab ni patay;

pinagsardengna dagiti luluak,

ket linapdanna ti pannakaitibkolko.

9 Ngarud, iti imatang tiApomagnaak

iti lubong dagiti sibibiag.

10 Saana mapukaw ti pammatik uray idi kinunak,

“Naan-anay ti panagsagabak.”

11 Uray idi mabutbutengak, kinunkunak,

“Awan ti mapagtalkan a tao.”

12 Ania ti mabalinko a pangsubad itiApo

kadagiti imbag nga impaayna kaniak?

13 Mangidatagakto iti daton nga inumen

a pagyamanko kenkuana iti panangisalakanna kaniak.

14 Iti imatang dagiti amin a tattaona,

tungpalekto ti inkarik kenkuana.

15 Maseknan unay tiApo

no matay ti maysa kadagiti pinilina.

16 Adipennak, OApo,

agserbiak kenka kas iti panagserbi daydi nanangko.

Intedmo kaniak ti wayawaya.

17 Iruknoykonto kenka ti daton a pagyaman,

ket idatagkonto kenka ti kararagko.

18-19 Iti taripnong dagiti amin a tattaom,

iti paraangan ti balay tiApoidiay Jerusalem,

tungpalekto ti inkarik kenkuana.

Madaydayaw tiApo!

Panagdaydayaw ken ni Yahweh

1 IdaydayawyotiApo,

dakayo amin a nasion!

Itan-okyo, dakay amin a tattao!

2 Naindaklan ti di agbalbaliw nga ayatna kadatayo,

ket ti kinapudnona awan inggana.

Madaydayaw tiApo!

Kararag a Pagyaman iti Panagballigi

1 AgyamankayoitiApo,

agsipud ta isu ket naimbag,

agnanayon ti napudno nga ayatna.

2 Kuna ngarud dagiti Israelita,

“Agnanayon ti di agbalbaliw nga ayatna.”

3 Kuna ngarud dagiti papadi ti Dios,

“Agnanayon ti di agbalbaliw nga ayatna.”

4 Kuna ngarud dagiti amin nga agbuteng itiApo,

“Agnanayon ti di agbalbaliw nga ayatna.”

5 Immawagak itiApoidi marigatanak;

impangagnak ket winayawayaannak.

6 Itikaadda kaniak tiApo, awan ti panagbutengko;

ania ti maaramid kaniak ti tao?

7 Adda kaniak tiApotapno tulongannak,

ket mabuyakto ti pannakaparmek dagiti kabusorko.

8 Nasaysayaat ti agkamang ken ni Yahweh,

ngem ti agtalek iti tao.

9 Nasaysayaat ti agkamang ken ni Yahweh,

ngem ti agtalek kadagiti pangulo.

10 Linawlawdak dagiti adu a kabusorko

ngem pinarmekko ida babaen iti pannakabalin tiApo.

11 Linikmutdak, wen, addada iti amin a suli,

ngem pinarmekko ida babaen iti pannakabalin tiApo.

12 Kasda la alimbubuyog a nangaribungbong kaniak;

simgiabda a kas iti kayo a siitan;

iti nagan tiApoinkisapko ida.

13 Dinarupdak ket dandani naparmekak;

ngem tinulongannak tiApo.

14 TiApoti pigsa ken kantak;

isu ti mangisalakan kaniak.

15 Denggenyo ti naragsak a dir-i ti panagballigi,

kadagiti tolda dagiti tattao ti Dios:

“Aramid daytoy ti kannawan nga ima tiApo!

16 Ti bilegna ti namagballigi kadatayo;

wen, ti nabileg a pannakabalinna iti gubat.”

17 Saanakto a matay no di ket agbiagak,

tapno ipakaammok dagiti aramid tiApo.

18 Nupay nakaro ti panangdusana kaniak,

saanna nga impalubos a matayak.

19 Luktanyo ti ruangan ti kinalinteg,

ta sumrekak nga agyaman itiApo!

20 Daytoy ti ruangan tiApo;

dagiti laeng nalinteg ti makastrek.

21 Agyamanak kenka, OApo, ta impangagnak,

ken sika ti nangisalakan kaniak.

22 Tibato nga imbelleng dagiti agipatpatakder,

nagbalin a kangrunaan a pasuli.

23 Aramid daytoy tiApo,

anian a nakaskasdaaw iti imatangtayo!

24 Daytoy ti aldaw nga inaramid tiApo.

Agragsak ken agrambaktayo.

25 OApo, isalakannakami;

dawatenmi kenka a pagballigiennakami.

26 Nagasatti umay iti nagan tiApo!

Bendisionandakayo manipud iti balayna.

27 TiApoisut’ Dios, ket inikkannatay iti silaw.

Agiggemkayo kadagiti sangsanga,

ket aglibutkayo a mapan iti altar.

28 Sika ti Diosko ket agyamanak kenka;

ipaduyakyakko ti kinatan-okmo.

29 Agyamankay itiApo,

agsipud ta isu ket naimbag;

agnanayon ti napudno nga ayatna.

Ti Linteg ni Yahweh

1 Nagasat dagiti awan mulit ti panagbiagna,

nga agbibiag kas mayannurot iti linteg tiApo!

2 Nagasat dagiti mangtungpal kadagiti bilinna,

wen, nagasat dagiti agtulnog kenkuana iti amin a pusoda.

3 Pulos nga awan dakes nga aramidenda;

magnada kadagiti dalan tiApo.

4 Intedmo kadakami, OApo, dagiti linlintegmo,

ket imbilinmo a tungpalenmi ida a siiinget.

5 Sapay koma ta agtalinaedak a napudno

a mangannurot kadagiti ipaalagadmo!

6 Pulos nga awanto ti pannakaibabainko,

no tungpalek dagiti amin a bilinmo.

7 Agdaydayawakto kenka iti nadalus a puso,

no masursurok dagiti nalinteg a pangngeddengmo.

8 Tungpalek dagiti linlintegmo;

dinak koma baybay-an uray inton kaano.

Panagtungpal iti Linteg ni Yahweh

9 Kasano a pagtalinaeden ti agtutubo

ti nadalus a panagbiagna?

Babaen iti panagtungpalna

kadagiti bilinmo.

10 Iti amin a pusok, ikagumaak ti agserbi kenka;

dinak koma baybay-an a mayaw-awan

iti panangtungpalko kadagiti bilinmo.

11 Idulinko dagiti lintegmo iti pusok

tapno saanak nga agbasol kenka.

12 Idaydayawka, OApo;

isurom kaniak dagiti daldalanmo.

13 Ulitek nga iwaragawag iti napigsa

dagiti amin a linteg nga inka inted.

14 Naragsakak a mangtungpal kadagiti bilinmo,

a kas iti panangikutko iti sanikua nga adu.

15 Adalek dagiti pannursurom,

ket imutektekak dagiti pammagbagam.

16 Maragsakanak kadagiti lintegmo;

saankonto a lipaten dagiti bilinmo.

Ragsak a Masarakan iti Linteg ni Yahweh

17 Paraburannak kadi, siak nga adipenmo,

tapno agbiagak ket tungpalek dagiti pannursurom.

18 Luktam dagiti matak tapno maimatangak

dagiti nakaskasdaaw a kinapudno iti lintegmo.

19 Ganggannaetak laeng ditoy rabaw ti daga;

dimo kad ilinged kaniak dagiti bilinmo.

20 Iti amin a tiempo, mailiw unay toy kararuak

kadagiti pangngeddengmo.

21 Tubngarem dagiti natangsit a tattao;

mailunod dagiti mangsalungasing kadagiti bilinmo.

22 Yadayonak iti panangibabain ken panangumsida,

gapu ta tinungpalko dagiti lintegmo.

23 Uray no agtutulag dagiti pangulo a mangisikat kaniak,

dagiti pannursurom adalen toy adipenmo.

24 Paragsakendak a kanayon dagiti pammagbagam;

isuda dagiti mangbalbalakad kaniak.

Nasged a Panagtungpal iti Linteg ni Yahweh

25 Toy kararuak naidasag iti tapok;

batakennak ngarud kas mayannurot iti saom.

26 Impudnok amin nga inaramidko ket impangagnak;

isurom ngarud kaniak dagiti ipaalagadmo.

27 Isuronak tapno maawatak dagiti linlintegmo,

ket adalek dagiti nakaskasdaaw nga aramidmo.

28 Nalapunosak iti liday ket maidasayak;

papigsaennak kadi kas inkarim.

29 Yadayom kadi kaniak dagiti killo a wagas

ket paraburannak nga agbiag iti lintegmo.

30 Inkeddengko ti agtulnog;

inannurotko dagiti pangngeddengmo.

31 Sinursurotko dagiti pannursurom, OApo;

saanmo koma nga ipalubos a maibabainak.

32 Tungpalek a sigagagar dagiti bilinmo

gapu ta nayonam ti pannakaawatko.

Kararag a Pagdawat iti Pannakaawat

33 Isurom kaniak, OApo,

ti kaipapanan dagiti linlintegmo,

ket tungpalek ida iti amin a tiempo.

34 Ilawlawagmo kaniak ti lintegmo, ket tungpalek;

iti amin a pusok, annurotek.

35 Pagtalinaedennak nga agtungpal kadagiti bilinmo,

ta isuda ti pakasarakak iti ragsak.

36 Ikkannak iti tarigagay nga agtungpal kadagiti bilinmo

a saan ket nga iti ibabaknangko.

37 Dimo ipalubos a mingmingak dagiti ubbaw a bambanag

kas mayannurot iti inkarim, ikkannak iti biag.

38 Tungpalem ti karim kaniak nga adipenmo;

wen, ti karim kadagiti agbuteng kenka.

39 Isalakannak kadagiti pakapabainan a kabutengko,

nakaskasdaaw unay dagiti pangngeddengmo.

40 Mailiwak unay kadagiti bilbilinmo,

biagennak kadi babaen iti kinalintegmo.

Panagtalek iti Linteg ni Yahweh

41 Ipakitam, OApo, no kasano ti panagayatmo kaniak;

kas mayannurot iti inkarim, isalakannak.

42 Iti kasta, masungbatak dagiti mangpabain kaniak,

agsipud ta agtalekak iti saom.

43 Tulongannak a kanayon nga agsao iti pudno

agsipud ta ti namnamak adda kadagiti pangngeddengmo.

44 Kanayonto a tungpalek ti lintegmo;

wen, tungpalek nga agnanayon awan inggana.

45 Agbiagakto a siwawaya,

ta inannurotko dagiti ipaalagadmo.

46 Ipakaammokto dagiti bilinmo kadagiti ari,

ket pulos nga awanto ti pannakaibabainko.

47 Maragsakanak nga agtungpal kadagiti bilinmo,

agsipud ta ayatek ida iti amin a pusok.

48 Raemek ken ayatek dagiti bilinmo,

ket utobekto dagiti pannursurom.

Panagtalged iti Linteg ni Yahweh

49 Lagipem ti karim kaniak nga adipenmo,

isut’ nangted kaniak iti namnama.

50 Uray iti panagsagabak, naliwliwaak,

agsipud ta ti saom inikkannak iti biag.

51 Inumsidak dagiti natangsit a tattao,

ngem saanak a simmina iti lintegmo.

52 Malagipko dagiti pannursurom idi un-unana,

ket mabang-aranak, OApo.

53 No makitak dagiti managdakdakes a mangsalungasing iti linteg

toy pungtotko kadakuada sumged.

54 Bayat ti ababa a panagbiagko ditoy daga

ikankantak dagiti bilbilinmo.

55 Iti rabii, OApo, sika ti malaglagipko,

ket tungpalek ti lintegmo.

56 Naipaay kaniak daytoy a bendision

gapu iti panagtungpalko kadagiti bilinmo.

Panangipateg iti Linteg ni Yahweh

57 Sika laeng, OApo, ti masapulko;

ikarik a tungpalen dagiti lintegmo.

58 Iti amin a pusok, agpakpakaasiak kenka;

kas inkarim, kaasiannak koma.

59 Usiseg dagiti wagasmo

ket sumurotak iti panangidalanmo.

60 Saanak nga agtaktak,

dagdagusek a tungpalen dagiti bilinmo.

61 Impakat dagiti managdakdakes ti pakatnagak,

ngem diak latta malipatan ti lintegmo.

62 Iti tengnga ti rabii agriingak nga agdaydayaw kenka,

gapu kadagiti nalinteg a pangngeddengmo.

63 Gayyemnak dagiti amin nga agtulnog kenka,

wen, kaduadak dagiti agtungpal iti lintegmo.

64 Napno ti daga, OApo,

iti di agbalbaliw nga ayatmo,

isurom kadi kaniak dagiti bilinmo.

Ti Kinapateg ti Linteg ni Yahweh

65 Ti karim, OApo, tinungpalmo,

ket naimbagka unay kaniak nga adipenmo.

66 Ikkannak kadi iti sirib ken pannakaammo,

gapu ta agtalekak kadagiti bilinmo.

67 Sakbay a dinusanak, nayaw-awanak

ngem ita, tungpalekon ti saom.

68 Naimbag ken nadungngoka;

isurom kaniak dagiti bilinmo.

69 Padpadaksendak dagiti natangsit a tattao,

ngem iti amin a pusok, tungpalek dagiti ipaalagadmo.

70 Saan a makaaw-awat dagitoy a tattao,

ngem masarakak ti rag-o iti lintegmo.

71 Nagimbagak ti panangdusam kaniak,

gapu ta nasursurok dagiti bilinmo.

72 Napatpateg kaniak dagiti linteg nga intuyangmo,

ngem iti balitok ken pirak a rinibribu.

Awan Idumduma ti Linteg ni Yahweh

73 Pinarsuanak ket ay-aywanannak;

ikkannak iti pannakaawat tapno masursurok dagiti lintegmo.

74 Maragsakan a kumita kaniak

dagiti agbuteng kenka,

gapu ta mangnamnamaak a matungpal ti karim.

75 Ammok, OApo,

a nalinteg dagiti pangngeddengmo,

ket dinusanak ta napudnoka kaniak.

76 Liwliwaennak kadi ti napudno nga ayatmo,

kas iti inkarim kaniak nga adipenmo.

77 Kaasiannak kadi tapno agbiagak

gapu ta ti lintegmo ti pagragsakak.

78 Maibabain koma dagiti natangsit

a mamadpadakes kaniak nga awan gapgapuna,

ngem no siak, ammirisek dagiti pammagbagam.

79 Umay koma kaniak dagiti agraem kenka—

Amin a makaammo kadagiti bilinmo.

80 Aramidek ti amin a kabaelak

nga agtungpal kadagiti bilbilinmo

tapno saanak a maibabain.

Kararag a Pagdawat iti Pannakaisalakan

81 Mautoyanak nga agur-uray iti panangisalakanmo,

ngem ti saom ti kakaisuna a namnamak.

82 Nasakiten dagiti matak nga agur-uray iti inkarim,

ket kunak, “Kaanonto nga umayka tumulong kaniak?”

83 Awan dumak iti naibelleng a pagikabilan iti arak,

awan serserbik ngem diak malipatan dagiti bilinmo.

84 Kasano pay kabayag nga agur-urayak?

Kaanonto ti panangdusam kadagiti mangidadanes kaniak?

85 Dagiti natangsit a tattao,

isuda a di agtulnog iti lintegmo,

nangkalida kadagiti abut a pakaipalab-ogak.

86 Mapagtalkan dagiti amin a bilbilinmo;

tulongannak no idadanesdak dagiti naulbod.

87 Dandanida kinettel ti biagko,

ngem diak binaybay-an dagiti bilinmo.

88 Ispalennak kadi ken patay gapu iti di agbalbaliw nga ayatmo

tapno annurotek dagiti lintegmo.

Pammati iti Linteg ni Yahweh

89 Agpaut iti agnanayon ti saom, OApo,

naipasdek a mataginayon sadi langit.

90 Agpaut ti kinapudnom iti awan inggana,

kas iti pannakataginayon ti impasdekmo a daga.

91 Agingga ita, agtalinaed ti amin gapu iti bilinmo,

agsipud ta agserbida amin kenka.

92 No saan a ti lintegmo ti paggapuan ti ragsakko,

natayak koman gapu iti panagsagabak.

93 Saankonto a baybay-an dagiti ipaalagadmo,

ta gapu kadakuada, tinaginayonmo toy biagko.

94 Kukuanak, isalakannak kadi,

ta inkagumaak a tinungpal dagiti bilinmo.

95 Agur-uray dagiti managdakdakes a mangpapatay kaniak,

ngem pampanunotek a naimbag dagiti lintegmo.

96 Naadalko a ti amin adda paggibusanda,

ngem ti bilinmo agnanayon, awan patinggana.

Panagayat iti Linteg ni Yahweh

97 Anian a panagayatko iti lintegmo!

Agmalmalem nga ut-utobek.

98 Kanayon nga adda kaniak dagiti bilinmo;

pagbalinendak a nasirsirib ngem dagiti kabusorko.

99 Addaanak iti nasaysayaat

a pannakaawat ngem dagiti mamaestrok,

gapu ta ammirisek dagiti pannursurom.

100 Nasirsiribak ngem dagiti lallakay,

agsipud ta tungtungpalek dagiti bilinmo.

101 Diak kayat a masursuro ti dakes a wagas

gapu ta kayatko a tungpalen ti saom.

102 Diak binaybay-an dagiti pannursurom,

ta sika met laeng ti nangisuro kaniak.

103 Nagsam-iten dagiti ipaalagadmo,

wen, nasamsam-itda ngem ti diro.

104 Simmiribak gapu kadagiti lintegmo,

ket kagurak ti dalan ti kinakillo.

Lawag nga Aggapu iti Linteg ni Yahweh

105 Ti saom ti silaw a mangidalan kaniak,

maysa a lawag iti dana a pagnaak.

106 Tungpalek ti sinapataak a karik

a mangsurot kadagiti nalinteg a pannursurom.

107 Nadagsen unay dagiti sagabaek, OApo;

kas mayannurot iti karim, papigsaem ti biagko.

108 Awatem kadi, OApo, ti kararagko a pagyaman,

ket isuronak kadagiti bilinmo.

109 Sisasaganaak a kanayon a mangipusta iti biagko,

saanko a malipatan ti lintegmo.

110 Nangipakat dagiti managdakdakes iti silo,

ngem diak sinalungasing dagiti bilbilinmo.

111 Agnanayon a sanikuak dagiti bilinmo,

isuda ti ragsak toy puso.

112 Inkeddengkon a tungpalen dagiti lintegmo;

annurotek ida aginggat’ maudi nga angesko.

Kinatalged iti Linteg ni Yahweh

113 Kagurak dagiti saan a napudno kenka,

ngem ipatpategko ti lintegmo.

114 Sika ti salinged ken kalasagko,

mangnamnamaak iti karim.

115 Adaywandak, dakay a managdakdakes,

tapno matungpalko dagiti bilin ti Diosko.

116 Papigsaennak kas inkarim tapno agbiagak;

saanmo koma nga upayen ti namnamak.

117 Kibinennak tapno diak maan-ano,

ket surotek a kanayon dagiti bilinmo.

118 Laksidem dagiti di agtungpal kadagiti lintegmo,

ta awan serserbi dagiti panggepda.

119 Ibilangmo a basura ti amin a managdakdakes,

isut’ gapuna nga ipatpategko dagiti pannursurom.

120 Agtigtigergerak gapu iti amakko kenka,

ket kabutengko dagiti pangngeddengmo.

Panagtulnog iti Linteg ni Yahweh

121 Inaramidko ti tumutop ken naimbag;

dinak baybay-an iti ima dagiti mangidadanes kaniak.

122 Ikarim a tulongam toy adipenmo,

dimo kad ipalubos a dagiti natangsit idadanesdak.

123 Nasakiten dagiti matak iti panagur-urayko,

iti inkarim kaniak a panangisalakanmo.

124 Kitaennak kadi kas mayannurot iti di agbalbaliw nga ayatmo,

ket isurom kaniak dagiti bilinmo.

125 Siak ti adipenmo; ikkannak iti pannakaawat

tapno ammok dagiti pannursurom.

126 Tiempon nga agtignayka, OApo,

ta salsalungasingen dagiti tattao ti lintegmo.

127 Ipatpategko dagiti bilbilinmo;

ipangpangrunak ngem ti puro a balitok.

128 Iti kasta, surotek amin a pannursurom,

kagurak amin nga aramid nga ulbod.

Tarigagay nga Agtungpal iti Linteg ni Yahweh

129 Nakaskasdaaw dagiti pannursurom;

ngarud, tungpalek ida iti amin a pusok.

130 Ti pannakailawlawag dagiti pannursurom, mangted iti lawag,

ket pasiribenna dagiti nanumo.

131 Agal-alak iti pannakautoyko

a manegsegga kadagiti bilbilinmo.

132 Taliawennak kadi ket kaasiannak,

kas iti ar-aramidem kadagiti agayat kenka.

133 Kas inkarim, dimo ipalubos a matnagak;

dimo ipalubos a ti dakes iturayannak.

134 Subbotennak kadagiti mangidadanes kaniak tapno matungpalko dagiti bilinmo.

135 Agraniag koma ti rupam iti biagko,

ket isuronak kadagiti lintegmo.

136 Kas karayan nga agayus dagiti luak,

gapu kadagiti tattao a mangsukir iti lintegmo.

Awan Idumduma ti Linteg ni Yahweh

137 Nalintegka, OApo,

ket nalinteg met dagiti pangngeddengmo.

138 Nalinteg unay dagiti ipaalagadmo,

natalgedda ken napudno.

139 Sumged ti pungtotko a kas apuy iti unegko,

gapu ta binaybay-an dagiti

kabusorko dagiti bilinmo.

140 Naan-anay ti pannakasuot ti karim,

ket ay-ayaten unay toy adipenmo.

141 Uray no mauy-uyawak ken nanumo

diak lipaten dagiti ipaalagadmo.

142 Agnanayon nga awan inggana ti kinalintegmo,

ket pudno dagiti pannursurom.

143 Riribuk ken sennaay ti manglapunos kaniak,

ngem dagiti bilinmo ti pagragsakak.

144 Umno amin a pannursurom ken awan inggana;

ikkannak iti pannakaawat tapno agbiagak.

Kararag a Pagdawat iti Pannakaispal

145 Umawagak kenka, OApo, iti amin a pusok.

Ipangagnak kadi, ket tungpalekto dagiti bilinmo.

146 Umawagak kenka; isalakannak kadi,

ket taginayonek dagiti lintegmo.

147 Sakbay a bumigat dumawatak kenka iti tulong;

mangnamnamaak iti pannakatungpal ti saom.

148 Saanak a maturog, agpatpatnagak a siririing

a mangam-amiris, mangut-utob iti karim.

149 Ipangagnak kadi, OApo,

kas mayallubog iti di agbalbaliw nga ayatmo.

Ipakitam ti asim ket taginayonem ti biagko.

150 Umasidegen dagiti naranggas a mangidadanes kaniak;

adtoyen dagiti di agtungpal iti lintegmo.

151 Ngem asidegka kaniak, OApo,

ket agnanayon awan inggana ti amin a bilinmo.

152 Idi un-unana, naammoak

a dagiti pannursurom inrantam ida nga agtalinaed iti agnanayon.

Panagdawat iti Pannakaisalakan

153 Kitaem kadi ti panagsagabak ket isalakannak,

gapu ta diak binaybay-an ti lintegmo.

154 Ikalintegannak kadi ket wayawayaannak;

kas mayannurot iti karim, isalakannak.

155 Saan a maisalakan dagiti managdakdakes,

gapu ta dida tungpalen dagiti lintegmo.

156 Ngem naindaklan ti panangngaasim, OApo;

ikkannak iti biag a mayallubog iti hustisiam.

157 Adu dagiti kabusorko ken mangidadanes kaniak,

ngem diak baybay-an dagiti lintegmo.

158 Marurodak a makakita kadagiti mangliliput,

agsipud ta dida tungpalen dagiti bilinmo.

159 Kitaem kadi, OApo,

ti ayatko kadagiti pannursurom.

Taginayonem ti biagko

kas mayannurot iti di agbalbaliw nga ayatmo.

160 Naibatay ti lintegmo iti kinapudno,

ket mataginayon ti amin a nalinteg a pangngeddengmo.

Panangipateg iti Linteg ni Yahweh

161 Awan panggapuan dagiti agtuturay a mangidadanes kaniak

ngem iti amin a pusok, pagraemak dagiti saom.

162 Maragsakanak gapu kadagiti karim,

kaslaak la iti makasarak iti napateg a gameng.

163 Guraek ken laisek ti amin a kinaulbod,

ngem ay-ayatek ti lintegmo.

164 Mamimpito iti inaldaw nga agdaydayawak kenka,

gapu kadagiti nalinteg a pangngeddengmo.

165 Naan-anay ti talged dagiti agayat iti lintegmo.

Awan ti makabalin a mangitibkol kadakuada.

166 Ur-urayek, OApo, ti panangisalakanmo,

ket tungpalek dagiti bilinmo.

167 Tungpalek dagiti ipaalagadmo;

ay-ayatek ida iti amin a pusok.

168 Tungpalek dagiti bilbilin ken pannursurom;

makitam dagiti amin nga aramidko.

Kararag a Pagdawat iti Tulong

169 Dumanon koma kenka ti asugko, OApo!

Ikkannak kadi iti pannakaawat kas inkarim.

170 Ipangagmo koma ti kararagko;

isalakannak kadi kas inkarim.

171 Kanayon a yebkasko ti pagdaydayawko kenka,

gapu ta isursurom kaniak dagiti bilinmo.

172 Agkantaak iti maipapan iti lintegmo,

gapu ta nalinteg dagiti bilinmo.

173 Madadaanka kadi a tumulong kaniak,

ta tungtungpalek dagiti bilinmo.

174 Segseggaak, OApo, ti panangisalakanmo!

Pagragsakak ti lintegmo.

175 Ikkannak kadi iti biag tapno idaydayawka;

masarakak koma ti tulong kadagiti pannursurom.

176 Nayaw-awanak a kasla napukaw a karnero,

umaynak koma ngarud biroken nga adipenmo,

ta diak nalipatan dagiti lintegmo.

Kararag a Pagdawat iti Tulong

1 Idi marigatanak, immawagak itiApo,

ket impangagna dagiti ararawko.

2 Isalakannak, OApo,

kadagiti ulbod ken manangallilaw a tattao.

3 Anianto ti aramiden ti Dios kadakayo a naulbod?

Anianto ti panangdusana kadakayo?

4 Dusaennakayto iti natirad a pana ti mannakigubat

a mapakuyogan iti dumardarang a beggang.

5 Asiak pay ta ganggannaetak idiay Mesek,

ket agnaedak kadagiti tolda idiay Kedar!

6 Nabayag unayen ti pannakipagnaedko

kadagiti tattao a manggura iti talna.

7 No agsaoak maipapan iti kappia,

gubat met ti kayatda.