Category: Dagiti Salmo

Ni Yahweh ti Mangaywan Kadatayo

1 Itangadko dagiti matak kadagiti bantay,

sadino ti paggapuan ti tulong a maipaay kaniak?

2 Ti tulong nga umay kaniak aggapu itiApo

a nangaramid iti langit ken daga.

3 Saanna nga ipalubos a maitibkolka;

kanayon a siririing ti mangsalaknib kenka.

4 Saan a mairidep wenno maturog ti mangaywan iti Israel!

5 Aywanannaka tiApo;

salaknibannaka, adda iti sibaymo.

6 Dinakanto dangran ti init iti aldaw

wenno ti bulan iti rabii.

7 Ilisinakanto tiApoiti amin a peggad;

aywanannakanto tapno awan pakaan-anoam.

8 Salaknibannakanto tiApoiti sadinoman a papanam,

manipud ita iti agnanayon awan inggana.

Panangidayaw iti Jerusalem

1 Naragsakanak idi kinunada kaniak,

“Intayo iti balay tiApo!”

2 Ket ita, addakamin ditoy nga agtatakder,

iti las-ud dagiti ruangan ti Jerusalem.

3 Naisublin ti sigud a kasasaad ti siudad;

nasayaat ti urnosna ken sangsangkamaysa.

4 Ditoy ti umayan dagiti tribu;

wen, dagiti tribu ti Israel

tapno agyamanda ken ni Yahweh

kas imbilinna kadakuada.

5 Naipasdek ditoy dagiti trono dagiti ari

a pangukomanda kadagiti tattaoda.

6 Idawdawatyo nga adda koma kappia iti Jerusalem:

“Sapay koma ta rumang-ay dagiti agayat kenka!

7 Sapay koma ta adda kappia iti uneg dagiti bakudmo

talged kadagiti bukodmo a palasio!”

8 Gapu kadagiti kakabagiak ken gagayyemko,

kunak iti Jerusalem, “Sapay koma ta adda talnam!”

9 Gapu iti balay tiApoa Diostayo,

ikarkararagko ti kinarang-aymo.

Kararag a Pagdawat iti Kaasi

1 Tumangadak kenka, OApo;

tumangadak dita langit a pagturayam.

2 Kas iti lalaki nga adipen

nga agpannuray iti apona a lalaki,

ken iti babai a babaonen nga agpannuray iti apona a babai,

kasta met ti panagpannuraymi kenka,

OApoa Diosmi, agingga a kaasiannakami.

3 Kaasiannakami kadi, OApo; wen, kaasiannakami,

ta kasta unay ti pannakaum-umsimi.

4 Dimi maibturanen ti pananglalais dagiti nabaknang

ken panangab-abi dagiti natangsit.

Ti Dios a Mangisalakan kadagiti Tattaona

1 Ania ngata no dinatay tinulongan tiApo?

Sumungbatka, Israel:

2 “No dinatay tinulongan tiApo

idi dimmarup dagiti kabusor,

3 inalun-ondatayo koma a sibibiag

iti napalalo a pungtotda kadatayo.

4 Nayanud ken nalmestayo

koman iti nadawel a layus,

5 wen, nayanudtayo koman iti napegges nga ayus.”

6 Agyamantay itiApoa di nangipalubos

nga alun-onendatayo dagiti kabusor!

7 Kaslayo la billit a nakabulos iti silo dagiti mangnganup;

napugsaten ti silo ket nawayatayon!

8 TiApoti tumulong kadatayo,

isu a namarsua iti langit ken daga.

Ti Kinatalged dagiti Tattao ti Dios

1 Dagiti agtalek itiApo

arigda iti Bantay Sion

a saan a magunggon, no di ket mataginayon.

2 Kas iti kaadda dagiti bantay iti likmut ti Jerusalem,

kasta met ti kaadda tiApoiti likmut dagiti tattaona,

manipud ita inggat inggana.

3 Ti setro ti kinadakes dinto agtalinaed iti daga dagiti nalinteg

amangan no agaramidda met iti dakes.

4 OApo, kaasiam dagiti naimbag,

ken dagiti nalinteg ti panagpuspusoda.

5 Ngem inton dusaem dagiti dakes ti aramidna,

dusaem met dagiti killo ti panagbiagna.

Adda koma kappia iti Israel!

Kararag a Pagdawat iti Pannakaisalakan

1 Kaskam la agtagtagainep idi

isublinakami tiApoidiay Jerusalem.

2 Kasta unay a katkatawami,

agkakantakami gapu iti rag-o.

Iti kasta, kinuna dagiti sabali a pagilian,

“Impaay tiApokadakuada dagiti bambanag a naindaklan!”

3 Wen, impaayna kadakami dagiti dadakkel a banag,

ket anian a ragsakmi!

4 OApo, isublinakami kadi iti sigud a kinarang-aymi,

kas iti panagayus manen dagiti karayan a nagmaga.

5 Dagiti naglulua bayat ti panagmulada,

agapitdanto koma a siraragsak.

6 Dagiti napan nagbunobon nagsangsangitda a siaawit iti bin-i,

ngem agsublidanto nga agkankanta iti rag-o

a siaawit kadagiti apitda.

Pagdaydayaw iti Kinaimbag ti Dios

1 No saan a ni Yahweh ti mangbangon iti balay,

awan serserbi ti bannog dagiti mangpatakder.

No saan a ni Yahweh ti mangsalaknib iti siudad,

awan serserbi ti panagwanawan dagiti guardia.

2 Awan serserbi ti panagagawa iti panagbiag,

ti nasapa nga ibabangon ken naladaw a pannaturog,

ta ited ni Yahweh ti kasapulan dagiti ay-ayatenna

bayat ti pannaturogda.

3 Dagiti annak sagut ni Yahweh ida,

bunga ken gunggona ti maysa nga ina.

4 Dagiti lallaki nga annak ti agkabannuag a lalaki

kasda la pana iti ima ti mannakigubat.

5 Nagasat ti tao nga adu ti panana a kakasta;

ni kaanoman dinto maparmek inton sangoenna

iti pangukoman dagiti kabusorna.

Ti Gunggona ti Panagtulnog ken ni Yahweh

1 Nagasat dagiti agbuteng ken itiApo;

wen, nagasat dagiti agbiag kas mayannurot iti pagayatanna.

2 Lak-amemto ti bunga ti nagbannogam,

ket naragsak ken narang-aykanto.

3 Agbalinto ti asawam a kas nabunga nga ubas iti balaymo.

Agbalinto met dagiti annakmo a kas kadagiti narukbos nga olibo iti likmut ti lamisaanmo.

4 Kastoyto ti pannakabendision ti tao

nga agtulnog itiApo.

5 Ikararagko a bendisionannaka koma tiApomanipud Sion;

makitam koma a narang-ay ti Jerusalem

iti amin nga aldaw ti biagmo!

6 Napaut koma ti biagmo

tapno makitam dagiti appokom!

Adda koma talna iti Israel!

Kararag a Maikontra kadagiti Kabusor ti Israel

1 Ibagam, O Israel, no kasano ti panangidadanes kenka dagiti kabusormo

manipud pay kinaubingmo.

2 “Nakaro ti panangidadanes kaniak dagiti kabusorko

manipud pay kinaubingko,

ngem pulos a didak naparmek.

3 Nauneg ti panangsugatda iti bukotko,

ket pinagbalinda a kas talon a naarado.

4 Ngem nalinteg tiApo;

winayaannak iti pannakatagabu.”

5 Maparmek ken maibabainto koma

dagiti amin a gumurgura iti Sion.

6 Mayarigda koma iti ruot iti tuktok ti balay,

ruot a magango apaman nga agtubo.

7 Awan manggapas wenno mangreppet

a mangala ken mangitalaw.

8 Awan ti lumabas a mangibaga,

“Sapay koma ta bendisionannaka tiApo!

Iti nagan tiApo, bendisionandaka.”

Kararag a Pagdawat iti Tulong

1 Manipud kaunggan ti panagtuokko,

umawagak kenka, OApo!

2 O Apo, denggem kadi toy asugko,

ipangagmo kadi ti panagpatulongko.

3 OApo, no tutopam dagiti basbasolmi,

siasino ti makalisi iti pannusam?

4 Ngem pakawanennakami,

tapno agbutengkami ken agdayawkam kenka.

5 Sigagagarak a manguray iti tulong tiApo,

ket mangnamnamaak iti saona.

6 Ur-urayek ti Apo;

ad-adda pay ti panangseggak ngem ti panangsegga

dagiti agbambantay iti idadateng ti bigat.

7 O Israel, agtalekka itiApo,

ta saan nga agbalbaliw ti ayatna,

ket kanayon a siaayat a mangisalakan.

8 Isalakannantodagiti Israelita

kadagiti amin a basbasolda.