Category: Dagiti Salmo

Kararag iti Rabii

1 Umawagak kenka, OApo;

darasem kadi ti tumulong kaniak.

Denggennak kadi no umawagak kenka.

2 Awatemkoma kadi toy

kararagko a kas maysa nga insenso

ken toy sitatag-ay nga imak a kas maysa a daton iti rabii.

3 Paguardiaam kadi, OApo, ti ngiwatko,

ket paaywanam ti ruangan dagiti bibigko.

4 Ilisinak kadi iti tarigagay nga agaramid iti dakes,

wenno makikadua kadagiti tattao nga agaramid iti kinakillo.

Diakto koma dumar-ay kadagiti fiestada.

5 Mabalinnak a dusaen ken babalawen a sikakaasi ti naimbag a tao,

ngem diak itulok a lanaan ti managdakdakes ti ulok,

ta kanayon nga ikarkararagko ti maibusor kadagiti dakes nga aramidna.

6 Inton maitinnag dagiti turayenda manipud kadagiti rangkis

awatento dagiti tattao a pudno dagiti innak insao.

7 Kas iti kayo a mabalbalsig ken masigsigit,

kasta koma a maiwarawara dagiti tulangda iti ngarab ti tanem.

8 Ngem siak, O Apok a Kangatoan,

agtalekak latta kenka.

Birokek ti panangsalaknibmo;

dimo kadi ipalubos a matayak.

9 Ilisinak kadi kadagiti impakatda a pangsilo kaniak;

wen, kadagiti palab-og dagiti managdakdakes.

10 Sapay koma ta matnag dagiti managdakdakes iti mismo a palab-ogda,

idinto a saanak a maan-ano.

Kararag a Pagdawat iti Tulong

1 Agdawatakiti tulong itiApo;

agpakpakaasiak kenkuana.

2 Yumanko kenkuana dagiti amin a sakit ti nakemko.

Ibagak kenkuana dagiti amin a parikutko.

3 Ammona ti rumbeng nga aramidek,

no mapukawko ti namnamak.

Nangikabil dagiti kabusorko

iti pangsiloda kaniak.

4 Tumalliawak iti sikigak,

ket makitak nga awan tumulong kaniak.

Awan mangsalaknib

ken mangisakit kaniak.

5 OApo, umasugak kenka iti tulong.

Sika, OApo, ti salaknibko,

ditoy a biag sika laeng ti masapulko.

6 Ipangagmo koma ti asugko,

ta awanen a pulos ti namnamak.

Isalakannak kadagiti kabusorko

a napigpigsa nga adayo ngem siak.

7 Ispalennak iti pakarigatak,

ket idaydayawkanto iti gimong dagiti tattaom,

agsipud ta naimbagka kaniak.

Kararag a Pagdawat iti Tulong

1 Denggem, OApo, ti kararagko;

ipangagmo toy asugko.

Nalinteg ken mapagtalkanka;

patgam ngarud ti dawatko kenka.

2 Dinakkadi ukomen nga adipenmo;

awan ti saan a nagbasol iti imatangmo.

3 Sinarsaraknak ti kabusorko,

ket namimpinsan a pinarmeknak.

Iti nasipnget a pagbaludan, impisoknak,

ket awan dumak kadagiti natay idi un-unana.

4 Isut’ gapuna a ti anusko awanen,

ket ti namnamak napukawen.

5 Malagipko dagiti naglabas nga aldaw,

ut-utobek dagiti amin nga inaramidmo,

ket dagiti amin a gapuanam adda iti panunotko.

6 Ingatok dagiti imak nga agkararag kenka

kasla natikag a daga toy kararuak a mawaw kenka.

7 OApo, inka kadin ipangag ti dawatko;

ti amin a namnamak napukawko.

Dinak kadi ilemmengan

amangan no maipadaak kadagiti bumaba

iti lubong dagiti natay.

8 Agtalekak kenka; binigat nga ipalagipmo kaniak

ti di agbalbaliw nga ayatmo.

Dumanon kenka dagiti kararagko;

isurom kadi kaniak ti rumbeng a dalanko.

9 Kenka, OApo, kumamangak,

pangngaasim kadi ta salaknibannak;

ispalennak iti ima dagiti kabusorko.

10 Sika ti Diosko;

isuronak a mangaramid iti pagayatam.

Naimbagka koma kaniak,

ket iturongnak iti natalged a dalan.

11 Kas inkarim, OApo, isalakannak;

gapu iti kinaimbagmo,

ispalennak kadagiti pakariribukak.

12 Gapu ta ay-ayatennak, patayem dagiti kabusorko;

pukawem dagiti mangparparigat kaniak ta siak ti adipenmo.

Agyaman ti Ari iti Dios iti Panagballigina

1 Madaydayaw tiApo,

isu a bato a salaknibko;

iti pannakibakal, sansanayennak,

ket isagananak a makigubat.

2 Isu ti salaknib ken sarikedkedko,

ti salinong ken salakanko,

ti natalged a kamangko.

Pinagbalinnak a mangituray kadagiti tattaomi.

3 OApo, ania ti tao ta isu ketdi ti pampanunotem?

Ania aya ti anak ti tao

ta isu ketdi ti asikasoem?

4 Mayarig ti tao iti pul-oy ti angin;

dagiti aldawna lumabas a kas anniniwan.

5 Luktam ti tangatang, OApo, ta bumaba ka;

sagidem dagiti bambantay ket umasukda.

6 Pagkimatem ket warawaraem dagiti mangbusor kenka;

ibiatmo dagiti panam tapno agtatarayda.

7 Manipud ngato nga ayanmo, gaw-atennak,

iti adalem a danum, alawennak,

iti bileg dagiti ganggannaet, isalakannak.

8 Pasig nga ulbod ti sasawenda,

ket uray ti ulbod sapataanda.

9 O Dios, kantaanka, iti baro a kanta

agtokarak iti arpa ket kantaanka.

10 Ta dagiti ar-ari pagballigiem,

ket ni David nga adipenmo, ispalem.

11 Ikanawanak kadagiti naranggas a kabusorko;

ispalennak kadagiti ganggannaet a tattao.

Pasig nga ulbod ti sasawenda,

ket uray ti ulbod sapataanda.

12 Agtutubo dagiti lallaki nga annakmi;

sapay koma ta kasda la mula a dumakkel ken pumigsa.

Dagiti babbai nga annakmi, kasda la koma estatua

a kadagiti suli ti palasio, mayarkosda.

13 Mapno koma dagiti kamaligmi iti amin a kita ti maapitmi.

Dagiti karneromi kadagiti pagpastoran,

aganakda koma iti inar-arban.

14 Dagiti bakbakami, agaduda koma;

awan koma ti maalisan wenno matay kadakuada.

Awan koma met ikkis ti panagbuteng kadagiti kalsadami.

15 Nagasat ti ili a pangibukbokanna iti bendisionna;

wen, nagasat ti ili a tiApoti Diosna.

Kanta a Pagdaydayaw

1 O Diosko ken Arik,

ipakaammok a naindaklanka;

agyamanak kenka iti agnanayon awan inggana.

2 Inaldawto nga agyamanak kenka;

idaydayawkanto iti agnanayon nga awan inggana.

3 Naindaklan tiApo,

ket maikari a naindaklan ti pannakaidaydayawna;

saan a matukod ti kinatan-okna.

4 Maidaydayawto dagiti aramidmo iti tunggal kaputotan;

ipakaammodanto dagiti gapuanam a naindaklan.

5 Masarsaritanto ti dayag ken daegmo,

ket ut-utobekto dagiti

nakaskasdaaw nga aramidmo.

6 Ipakdaar dagiti tattao

dagiti nakaskasdaaw nga aramidmo,

ket ipakaammokto ti kinaindaklanmo.

7 Saritaendanto ti amin a kinaimbagmo;

ikantadanto ti kinamanangngaasim.

8 Managparabur ken manangngaasi tiApo.

Saan a nalaka nga agpungtot,

ket di met maibus ti kinamanagayatna.

9 Naimbag tiApoiti tunggal maysa,

ket nadungngo kadagiti amin a pinarsuana.

10 Idaydayawdaka dagiti amin a parsuam, OApo,

ket agyaman kenka dagiti bukodmo a tattao.

11 Ti dayag ti pagariam ti sawenda,

ket ti bilegmo ti saritaenda,

12 tapno maammoan ti tunggal maysa

ti naindaklan nga aramidmo

ken ti kinadaeg ti pagariam.

13 Agnanayon ti panagarim;

agpaut ti panagturaymo iti amin a kaputotan.

Tungpalen tiApoti amin a karina;

manangngaasi iti amin nga aramidna.

14 Tulonganna dagiti adda parikutna

ket dagiti naidasay, bangonenna.

15 Mangnamnama kenka ti amin a parsua,

ket ikkam ida iti kanen no masapulda.

16 Mangtedka a sibubuslon kadakuada,

ket itedmo ti kasapulan ti tunggal maysa.

17 Nalinteg tiApoiti amin a dalanna

ken naasi iti amin nga aramidna.

18 Asideg tiApokadagiti amin nga umawag kenkuana;

wen, kadagiti napudno nga agdawat iti tulongna.

19 Itedna ti kasapulan dagiti agraem kenkuana;

denggenna ti asugda, ket isalakanna ida.

20 Salaknibanna dagiti amin nga agayat kenkuana,

ngem dagiti amin a managdakdakes, dadaelenna.

21 Kanayonto nga idaydayawko tiApo;

itan-ok koma ti amin a parsua

ti nasantoan a naganna

iti agnanayon nga awan inggana.

Pagdaydayaw iti Dios a Mangisalakan

1 Madaydayaw tiApo!

Kararuak, idaydayawmo tiApo!

2 Idaydayawko tiApoiti unos ti panagbiagko;

kantaak ti Diosko kadagiti salmo agingga a mauyos ti angesko.

3 Dika agtalek kadagiti agtuturay

awan ti tao a makaisalakan kenka.

4 No matayda, agsublidan iti tapok a naggapuanda;

iti dayta nga aldaw, aggibusen dagiti planoda.

5 Nagasat ti tao a ti Dios ni Jacob ti katulonganna

ken mangnamnama itiApoa Diosna,

6 anamarsua iti langit ken daga,

iti taaw ken amin a linaonda.

Salimetmetanna ti kinapudno iti agnanayon.

7 Isu ti mangted iti hustisia kadagiti mairurumen

ken mangted iti taraon kadagiti mabisin.

Wayawayaan tiApodagiti balud;

8 luktanna ti mata dagiti bulsek.

Itan-okna dagiti mailupitlupit;

ay-ayatenna dagiti nalinteg a tattaona.

9 Salaknibanna dagiti ganggannaet nga agnaed iti dagatayo;

dagiti balo ken ulila, saranayenna.

Ngem lapdanna ti panggep dagiti managdakdakes.

10 Agnanayon ti panagturay tiApo;

wen, O Sion, agarinto ti Diosmo iti amin a tiempo.

Madaydayaw tiApo!

Pagdaydayaw iti Dios a Mannakabalin-amin

1 Madaydayaw tiApo!

Nasayaat a kantaen

ti pagdayaw iti Diostayo!

Nasayaat ken rumbeng

ti mangidaydayaw kenkuana!

2 Bangonen manen tiApoti Jerusalem;

isublina dagiti naitalaw a tattaona.

3 Dagiti naupay, paragsakenna,

ket bedbedanna dagiti sugatda.

4 Dagiti bituen, intudingna ti bilangda,

ket awaganna ti tunggal maysa iti naganda.

5 Naindaklan ken mannakabalin ti Apotayo;

saan a matukod ti kinasiribna.

6 Itan-okna ti napakumbaba,

ngem ti managdakdakes, ibaddekna.

7 Agkantakayo iti panagyaman itiApo.

Agarpakayo nga agdaydayaw iti Diostayo.

8 Kumotanna ti tangatang iti ulep;

itedna ti tudo nga agpaay iti daga,

ket pagtuboenna ti ruot kadagiti turod.

9 Ikkanna dagiti animal iti kanenda

ken dagiti sibong ti wak no umarikiakda.

10 Saan a maay-ayo iti napigsa a kabalio;

awan serserbi kenkuana ti tured ti soldado.

11 Ngem maay-ayo kadagiti agbuteng kenkuana,

kadagiti agtalek iti napudno nga ayatna.

12 O Jerusalem, agdaydayawka itiApo.

O Sion, agdaydayawka iti Diosmo.

13 Palagdaenna dagiti ruangan ti balaymo,

ket bendisionanna dagiti tattaom.

14 Pagtalinaedenna ti kappia kadagiti beddengmo

ket pennekennaka iti kasayaatan a trigo a paraburna.

15 Bilinenna ti daga

ket napardas a matungpal ti saona.

16 Yaplogna ti niebe a kas iti ules,

iwarasna iti yelo a kas iti tapok.

17 Kasla bato ti yelo a pagtinnagenna;

awan ti makaibtur iti lam-ek a yegna.

18 Marunaw ti yelo no agbilin,

ket agayus ti danum no yegna ti angin.

19 Ipakaammona ti saona ken ni Jacob,

dagiti alagaden ken paglinteganna iti Israel.

20 Saanna nga inaramid daytoy kadagiti sabali a pagilian,

saanna nga ipakaammo kadakuada dagiti lintegna.

Madaydayaw tiApo!

Maawagan ti Sangaparsuaan a Mangidaydayaw iti Dios

1 Madaydayaw tiApo!

Idaydayawyo tiApomanipud langit,

dakayo nga agnaed kadagiti nangato a disso!

2 Idaydayawyo, dakayo nga anghelesna;

idaydayawyo, dakayo a nailangitan nga armadana.

3 Idaydayawyo, init ken bulan;

idaydayawyo, dakay a rumimatrimat a bituen!

4 Idaydayawyo, dakay a kangatoan a langit;

idaydayawyo, dakay a danum

iti ngatoen ti tangatang!

5 Agdaydayawda koma amin iti nagan tiApo,

ta idi nagsao, naparsuada.

6 Babaen iti bilinna, impasdekna ida

iti ayanda nga agnanayon awan inggana,

ket dida mabalin ti agsalungasing.

7 Idaydayawyo tiApomanipud iti daga,

dakay a dragon ti taaw ken mangliwengliweng a danum,

8 dakay a kimat ken yelo,

niebe ken angep, napigsa nga angin,

amin nga agtungpal iti bilinna!

9 Idaydayawyo, dakay a bantay ken turod,

amin a kayo nga agbunga ken amin a bakir.

10 Idaydayawyo, dakayo nga animal nga amo ken atap,

aguy-uyas a parsua ken amin a tumatayab.

11 Idaydayawyo tiApo,

dakayo nga ari ken amin a tattao,

dakayo a prinsipe ken ukom iti amin a daga!

12 Uray dakayo a babbaro ken babbalasang,

lallakay ken ubbing!

13 Idaydayawda koma tiApo,

ta natantan-ok ngem ti amin ti naganna,

ta ringbawan ti dayagna ti langit ken ti daga.

14 Pinagbalinna a nabileg ti pagilianna,

isut’ gapuna nga idaydayaw ti amin a tattaona,

ti Israel a napateg kenkuana.

Madaydayaw tiApo!

Himno a Pagdaydayaw

1 Madaydayaw tiApo!

Kantaanyo tiApoiti baro a kanta;

idaydayawyo iti taripnong

dagiti napudno a tattaona!

2 Agragsakka, Israel, gapu iti Namarsua kenka;

agrag-okayo, tattao ti Sion, gapu iti ariyo!

3 Agsasalakayo a mangidaydayaw kenkuana;

agtambor ken agtokarkayo iti arpa.

4 Ta pagragsakan tiApodagiti tattaona;

dagiti maidadanes pagballigienna.

5 Agragsak koma dagiti tattao ti Dios iti balligida,

ket agkakantada iti parambakda.

6 Idaydayawdakoma ti Dios babaen iti panagdir-ida

a siiiggem kadagiti natadem a kampilanda.

7 Tapno dagiti pagilian parmekenda,

ket dusaenda dagiti tattaoda.

8 Tapno kawaranda dagiti arida,

kasta met dagiti panguloda.

9 Tapno dusaenda dagiti pagilian, kas imbilin ti Dios.

Daytoy ti dayag dagiti napudno nga adipenna.

Madaydayaw tiApo!

Panangidaydayaw ken ni Yahweh

1 Madaydayaw tiApo!

Idaydayawyo ti Dios iti Templona!

Wen, idaydayawyo ti nailangitan a bilegna.

2 Idaydayawyo gapu kadagiti naindaklan a gapuananna;

idaydayawyo gapu iti di matukod a kinatan-okna!

3 Idaydayawyo a buyogan iti trumpeta;

wen, idaydayawyo a danggayan ti lira ken arpa!

4 Idaydayawyo kadagiti tambor ken salsala;

idaydayawyo kadagiti arpa ken flauta!

5 Idaydayawyo kadagiti aweng ti piangpiang;

wen, idaydayawyo babaen iti napigsa nga aweng dagiti piangpiang!

6 Idaydayawyo tiApo,

dakay amin a sibibiag a parsua!

Madaydayaw tiApo!