Category: Dagiti Salmo

Kararag a Pagdawat iti Pammakawan

1 Gapuiti di agbalbaliw

nga ayatmo

kaasiannak kadi, O Diosko.

Gapu iti kinamanangngaasim, punasem kadi dagiti basolko.

2 Ugasam a mamimpinsan ti kinadakesko,

ket dalusannak kadagiti basbasolko!

3 Bigbigek a nagbiddutak,

ket kadagiti basbasolko silalagipak.

4 Nagbasolakkenka, wen, sika laeng ti nagbasolak,

nagaramidak iti dakes iti imatangmo.

Iti kasta, nalinteg ti panangukommo kaniak,

ket nainkalintegan ti pannakadusak.

5 Adtoy a naipasngayak iti kinadakes,

ket iti basol nainawak.

6 Tarigagayam ti kinapudno ken nadalus a puso;

punnoem ti panunotko iti siribmo.

7 Ugasannak iti basolko tapno nadalusak;

buggoannak ket napudpudawakto ngem kapas.

8 Kayatko a mangngeg ti rag-o ken ragsak;

agragsakak manen nupay rinumek ken tinuktukkolnak.

9 Dimo koma ikaskaso dagiti basolko;

punasem amin a kinadakesko.

10 Parsuaem kaniak, O Dios, ti nadalus a puso,

ket ikkannak iti baro ken napudno nga espiritu;

11 dinak pagtalawen iti imatangmo;

dimo ipanaw kaniak ti Espiritu Santo.

12 Isublim kaniak ti rag-o ti panangisalakanmo,

ket ikkannak iti natulnog nga espiritu.

13 Iti kasta, isurokto dagiti bilinmo kadagiti managbasol

tapno agsublida kenka.

14 O Dios, ispalem ti biagko,ket isalakannak;

iti kasta, naragsakakto a mangipakaammo iti kinalintegmo.

15 Apo, luktam dagiti bibigko

ket ipaduyakyakkonto ti pannakaidaydayawmo.

16 Dimo kayat dagiti daton a sakrifisio;

ta no kayatmo koma, isuda ti idatonko;

dika met maay-ayo iti daton a mapuoran.

17 O Dios, ti napakumbaba nga espiritu ti sakrifisiok kenka;

dimonto laksiden ti puso a napakumbaba ken nagbabawi.

18 Kaasiam ti Sion, O Dios, ket tulongam,

bangonem dagiti narba a bakud ti Jerusalem.

19 Iti kasta, maragsakankanto kadagiti tumutop a sakrifisio,

ken amin a mapuoran a daton,

ket mapuoranto dagiti toro a baka iti altarmo.

Ti Pangngeddeng ti Dios ken ti Kaasina

1 Apaya pagpasindayagmo, tao a maingel, ti kinaulpitmo kadagiti nalinteg a tattao?

Saan nga agbalbaliw ti ayat ti Dios.

2 Agmalmalem nga agpampanunotka iti pannakadadael,

ti dilam kasla labahas a natadem.

Ti agparbo iti ulbod kanayonem.

3 Ad-adda nga ayatem ti dakes ngem ti naimbag;

kaykayatmo ti agulbod ngem ti agsao iti pudno.

4 Pagay-ayatmo ti mamadpadakes, sika nga ulbod.

5 Ngem agnanayonto ti pannakadadaelmo;

manipud iti toldam, ti Dios rabsutennakanto;

ikkatennakanto iti daga dagiti sibibiag.

6 Makitanto dagiti nalinteg ket agbutengdanto;

ngem katawaandakanto a kunkunada,

7 “Kitaenyo ti tao a di nagkamang iti Dios,

nagtalek iti adu a sanikuana,

nagtalged iti kinabaknangna!”

8 Ngem siak, mayarigak iti nalangto nga olibo iti balay ti Dios.

Agtalekak iti di agbalbaliw nga ayatna iti agnanayon nga awan ingganna.

9 Kanayon nga agyamanak kenka, O Dios, gapu iti inaramidmo.

Itan-okkanto iti sango dagiti tattaom

ket ipakdaarkonto ti kinaimbagmo.

Ti Kinadakes ti Tao

1 Kunadagiti maag,

“Awan Dios.”

Rinukerda amin, ket dakes unay dagiti aramidda;

awan uray maysa ti naimbag ti aramidna.

2 Manipud langit, tannawagan ti Dios ti sangkataoan,

ta kitaenna no adda masirib,

ken no adda agdaydayaw kenkuana.

3 Ngem timmalikudda amin,

dakesda amin a padapada;

awan naimbag uray maysa.

4 “Awan kad ammo dagiti agaramid iti dakes?

Pagbiaganda ti pananggundawayda kadagiti tattaok,

ket pulos a dida agkararag kaniak.”

5 Ngem napalalo ti panagbutengda;

saan pay a napasamak ti kastoy kadakuada!

Ngamin, iwarawaranto ti Dios dagiti tultulang ti kabusor ti ilina.

Nailaksidda isut’ gapuna a parmeken ti Israel ida.

6 Aggapu koma iti Sion ti pannakaisalakan ti Israel!

Inton parang-ayen manen ti Dios dagiti tattaona,

agrag-onto ti kaputotan ni Jacob,

agragsakto dagiti tattao ti Israel.

Kararag iti Pannakasalaknib kadagiti Kabusor

1 Isalakannak,O Dios,

babaen iti pannakabalinmo;

wayawayaannak babaen iti bilegmo!

2 Denggem, O Dios, toy kararagko;

timudem dagitoy balikasko!

3 Dagiti natangsit a tattao umaydak rauten;

dagiti naranggas a tattao panggepdak a patayen,

tattao a saan a mangikankano iti Dios.

4 Ngem ti Dios ti tumulong kaniak,

ti Apo ket salaknibannak!

5 Agballatekto kadagiti kabusorko ti mismo a kinadakesda.

Agsipud ta mapagtalkan ti Dios, dadaelennanto ida.

6 Siraragsakakto a mangipaay iti datonko kenka;

OApo, agyamanakto kenka ta naimbagka.

7 Inispalnak kadagiti amin a parikutko,

ket nakitak ti pannakaparmek dagiti kabusorko.

Kararag a Pagdawat iti Tulong

1 O Dios, denggem ti kararagko;

dimo pagintutulngan toy dawatko!

2 Timudennak kadi, ket sungbatannak;

mautoyanakon kadagiti pakarikutak.

3 Madanaganak kadagiti pammutbuteng dagiti kabusorko;

mariribukak iti panangidadanes dagiti dakes a tattao.

Parikut ti yegda kaniak;

kapungtot ken kaguradak.

4 Toy pusok matuohan unay,

nagtupak kaniak dagiti alliaw ni patay.

5 Malmesak iti buteng ket agtigtigergerak;

wen, ti alinggaget lapunosennak.

6 Kunak, “Kalapatiak la koma a nagpayak!

Agtayabak a sumapul iti paginanaak!

7 Wen, innak iti adayo a disso,

ket iti let-ang ti pagtaengak.

8 Iti napigsa nga angin ken bagio,

agdardarasak a bumirok iti paglinongak.”

9 Dadaelem ida, Apo, ket dimo pagkikinnaawaten ida;

damsak ken riribuk iti siudad ti innak makita.

10 Aldaw-rabii a lawlawlawenda,

ket agsaknap ti dakes ken riribuk iti unegna.

11 Adda pannakadadael iti amin a sulina;

agsaknap ti panangidadanes ken panangliput kadagiti kalsada.

12 No koma kabusor ti manglalais kaniak,

maibturak; wen, maibturak.

No koma kagurgurak ti mangab-abi kaniak,

mailemmengak; wen, mailemmengak.

13 Ngem, gayyem, sika met gayam,

sika a kapulpulapol ken nasinged a pagayam!

14 Masansan idi nga agpimpinnatigmaanta;

iti Templo, agkuykuyogta a mapan agdaydayaw.

15 Dagiti kabusorko kellaatda koma a matay;

sibibiagda koma a mapan iti lubong dagiti natay.

Ta dakes ti adda iti taeng ken iti pusoda.

16 Ngem iti biangko, agpatulongak kenApoDios,

ket isalakannakto.

17 Umararawak kenkuana

iti agsapa, agmatuon ken rabii,

ket ipangagnanto ti timekko.

18 Subbotennakto kadagiti

gubat a pakidangadangak;

adu unay ti bumusor kaniak.

19 Ti Dios a nagturay manipud un-unana,

denggennakto ket parmekennanto ida;

awan maaramidda ta dida agbuteng kenkuana.

20 Dinarup ti sigud a kaduak dagiti gagayyemna;

sinalungasingna ti nagtutulaganda.

21 Nalamlamuyot ngem mantikilia dagiti balikasna,

ngem adda gura iti pusona;

makabang-ar dagiti saona a kasla sapsapo a lana,

ngem sumugatda a kasla natadem nga espada.

22 Ikamangmo dagiti parikutmo itiApo, ket ikaluyanakanto;

dina ipalubos a maparmek ti naimbag a tao.

23 Ngem sika, O Dios, igarangugungmonto iti abut dagita a mammapatay ken ulbod

sakbay a madanonda ti kagudua ti panagbiagda;

ngem no siak, agtalekak latta kenka.

Kararag iti Pannakasalaknib kadagiti Kabusor

1 Kaasiannakkadi, O Dios,

ta dardarupendak dagiti tattao;

kanayon nga idadanesdak dagiti kabusorko!

2 Wen, agmalmalem a rautendak!

Nagadu ketdin dagiti bumusor kaniak!

3 OApoa Kangatoan, no adda pagbutngak,

sika ti pagkammatalkak.

4 Agtalekak iti Dios ket awan pagbutngak;

agdaydayawak kenkuana gapu iti inkarina.

Awan ti mabalin nga aramiden ti tao kaniak.

5 Agmalmalem a riribukendak dagiti kabusorko;

pampanunotenda latta ti pannakaranggasko!

6 Aguummongda iti nalemmeng a disso,

ket sipsiputanda ti amin a gunayko;

agur-urayda a mangpapatay kaniak.

7 Iti pungtotmo, O Dios, dusaemida;

parmekem dagita a tattao gapu iti kinadakesda!

8 Ammom no kasano ti pannakariribukko;

naimatangam met ti panagtedted dagiti luluak.

Saanda aya a nailista iti bukodmo a libro?

9 Iti aldaw a yaawagko kenka,

mapasanudto dagiti kabusorko.

Daytoy ti ammok: adda ti Dioskaniak—

10 ni Yahweh a ti karina idaydayawko.

11 Agtalekak kenkuana, ket awan pagbutngak.

Awan ti mabalin nga aramiden ti tao kaniak!

12 Tungpalekto ti inkarik kenka, O Dios;

ipaaykonto kenka ti daton a pagyaman,

13 agsipud ta inispalnak iti patay,

ket dimo impalubos a maparmekak

tapno magnaak iti imatang ti Dios,

iti silaw nga agraniag kadagiti sibibiag.

Kararag a Pagdawat iti Tulong

1 Kaasiannak,O Dios; wen, kaasiannak,

ta sika ti pagkamangak.

Iti salinong dagiti payakmo, salaknibannak,

agingga a makalabas amin a peggad.

2 Ti Dios a Kangatoan isut’ asugak,

iti Dios a mangted iti amin a kasapulak.

3 Manipud langit, sungbatannak ket isalakannak;

parmekennanto dagiti mangdardarup kaniak.

Ipaayto ti Dios ti di agbalbaliw nga ayat ken kinapudnona kaniak.

4 Adda dagiti kabusor iti aglawlawko;

arigda leon a mangalun-on iti tao.

Kasla gayang ken pana dagiti ngipenda,

kasla natadem a kampilan ti dilada.

5 Ipakitam ti kinatan-okmo, O Dios, iti tangatang,

ken ti dayagmo a mangpunno iti entero a daga.

6 Nangipakat dagiti kabusorko iti iket a pangsilo kaniak

ket kasta unay ti butengko.

Nagkalida iti palab-og iti pagnaak,

ngem isuda met laeng ti natnag.

7 Naan-anay ti panagtalekko kenka, O Dios,

agdaydayawak kenka ket agkantaak!

8 Agriingka, O kararuak!

Agriingkayo, salterio ken arpak

ket riingek ti bannawag!

9 Idaydayawkanto kadagiti tattao, O Apo,

Ikantakto ti pagyamanko kenka.

10 Tumukno sadi langit ti di agbalbaliw nga ayatmo;

dumanon ti kinapudnom iti tangatang.

11 Ipakitam ti kinatan-okmo, O Dios, iti tangatang,

ken ti dayagmo a mangpunno iti entero a daga.

Kararag iti Pannakadusa dagiti Kabusor

1 Dakayo nga agtuturay,

nalinteg met la ti pangngeddengyo?

Nalinteg met la ti panangukomyo kadagiti tattao?

2 Saan! Ti la panagaramid

iti dakes ken panagranggas ti pampanunotenyo!

Pasig a kinaranggas ti kayatyo nga aramiden iti daga.

3 Manipud pay pannakaipasngayda,

dagiti managdakdakes nayaw-awandan;

manipud pay pannakayanakda, ulboddan.

4 Kasda la uleg a napno iti gita;

apputenda ti lapayagda, kasla tuleng a kobra

5 a dina mangngeg ti timek ti mangkaykayaw iti uleg,

wenno iti balbaliksen ti nalaing a salamangkero.

6 Pusiem dagiti ngipenda, O Dios;

bag-utem dagiti saong dagitoy narungsot a leon.

7 Mapukawda koma a kas danum ti ages-es-es a karayan,

malaylayda koma a kas ruruot a mapayatpayatan iti dalan.

8 Maipadada koma a kas kadagiti bisukol nga agbalin a pitak,

wenno maladaga a natay, saanna man la nakita ti lawag.

9 Kasda la koma ruot a pagammoan la ta magapas;

iti napalalo a pungtot ti Dios,

maipalaisdanto uray addada pay a biag.

10 Inton madusa dagiti managbasol, agragsakto ti nalinteg;

agdigosto dagiti sakana iti dara dagiti managdakdakes.

11 Kunanto dagiti tattao,

“Pudno a magunggonaan dagiti nalinteg;

awan duadua nga adda Dios a mangukom iti lubong!”

Kararag a Pagdawat iti Pannakaispal

1 Isalakannakkadagiti

kabusorko, O Diosko;

salaknibannak kadagiti mangdarup kaniak!

2 Ispalennak kadagiti dakes a tattao;

ikanawanak kadagiti mammapatay!

3-4 Kitaem! Agur-urayda a mangisikat kaniak;

agtitimpuyog dagiti naranggas tapno busorendak.

Sipapardasda nga agturong iti pagsanebanda

nupay awan basol wenno salungasingko

wenno aniaman a labsingko.

5 Agriingka, OApoDios a Mannakabalin,

ket umaynak tulongan; sika a mismo ti kumita, O Dios ti Israel!

Bumangonka ket dusaem dagiti nasion;

dagiti managdakdakes ken mangliliput dimo kaasian!

6 Rinabii nga agsublida iti siudad;

kasda la aso nga agtagtaguob bayat ti panagdakiwasda.

7 Denggem ti panagtabtabbaawda!

Kasla kampilan dagiti balikas a rummuar iti ngiwatda,

ta ipagarupda nga awan ti makangngeg kadakuada.

8 Ngem sika, OApo, katkatawaam ida;

pagang-angawam dagiti amin a nasion!

9 Agtalekak iti pigsam ket, awan ti pakaan-anoak;

sika, O Dios, ti pagkamangak.

10 Umayto ti mangay-ayat kaniak a Diosko;

ipakitananto ti pannakaparmek dagiti kabusorko.

11 Dimo patayen ida, O Dios,

tapno di manglipat dagiti tattaok.

Babaen iti pigsam, warawaraem ken dadaelem ida.

Sika ti salaknibmi, O Apo!

12 Pasig a basol ti balbaliksenda;

matiliwda koma iti kinatangsitda!

Agsipud ta agilunod ken agulbodda,

13 dadaelem ida iti pungtotmo;

wen, dadaelem ida agingga a mapukawda.

Iti daytoy, maammoan a ti Dios ti agturay iti Israel,

ket ti amin a daga ti sakupen ti pagturayanna!

14 Rinabii nga agsubli dagiti kabusorko iti siudad;

kasda la aso nga agtagtaguob bayat ti panagdakiwasda.

15 Wen, arigda aso nga agbirbirok iti kanenda,

ket agririda no bassit ti masarakanda.

16 Ngem agkantaakto iti maipapan iti bilegmo;

wen, binigat nga ikantak ti di agbalbaliw nga ayatmo.

Ta sika ti sarikedked ken salinongko no adda rigatko.

17 Idaydayawkanto, sika a salaknibko;

ta sika, O Dios, a mangay-ayat kaniak ti sarikedkedko.

Kararag a Pagdawat iti Pannakaispal

1 Binaybay-annakami,

O Dios, ket pinarmeknakami;

kinapungtotnakami—ngem ita, agsublika koma kadakami!

2 Pinaggingginedmo ti daga, ket nagrengngat;

agasam dagiti sugatna tapno umimbag!

3 Pinagsagabam dagiti tattaom iti kasta unay a rigat;

inikkannakam iti makabartek nga arak.

4 Binallaagam dagiti agbuteng kenka,

tapno maitarayanda ti pannakadadaelda.

5 Ipangagmo kadi ti kararagmi;

isalakannakami babaen iti bilegmo

tapno maispal dagiti ay-ayatem a tattao.

6 Manipud iti santuariona,kinuna ti Dios,

“Kalpasan ti balligi,

bingayekto ti Sikem ken ti tanap ti Succot

sakonto ibunong kadagiti tattaok.

7 Ti Galaad ken ti Manases kukuak ida;

helmetko ti Efraim, setrok ti Juda.

8 Ngem usarekto ti Moab a kas palangganak;

kas pakakitaan a kukuak,

ipurruakkonto iti Edom ti sandaliasko.

Impagarup kadi dagiti Filisteo a maparmekdak

ket aggiikkisdanto iti inda panangabak kaniak?”

9 Siasino, O Dios, ti mangipan kaniak iti nasarikedkedan a siudad?

Siasino ti mangiturong kaniak idiay Edom a pagkamangak?

10 O Dios, pudno kadi a linaksidnakami?

Saanka kadin a kumuyog kadagiti armadami?

11 Tulongannakami a sumaranget iti kabusor,

ta awan serserbi ti tulong ti tao.

12 Babaen iti tulong ti Dios, agballigitayto;

isunto ti mangparmek kadagiti kabusortayo.