Category: Dagiti Salmo

Kararag ti Maysa a Lakay

1 Immayak, OApo,

a pasalakniban iti sidongmo;

dimo kadi ipalubos ti pannakaparmekko!

2 Gapu ta nalintegka, tulongan ken alawennak!

Wen, ipangag ken isalakannak!

3 Sika koma ti natalged a bato a pagkamangak,

natibker a sarikedkeda mangsalaknib kaniak;

ta sika ti kamangko, sika ti salinongko.

4 Ispalennak, O Dios, iti pannakabalin dagiti nadangkes;

ispalennak iti ima dagiti nadawel ken managdakdakes.

5 Sika, O ApoDios, ti ayan ti namnamak,

manipud kinaubingko, sikan ti nagtalkak.

6 Sika ti nagtaklinak iti unos ti panagbiagko;

sinalaknibannak manipud pannakayanakko.

Idaydayawka iti amin a tiempo!

7 Kadagiti adu a tattao, nagbalin a pagtuladan ti biagko,

ta sika ti natibker a salaknibko.

8 Agmalmalem a sarsaritaek ti pannakaidaydayawmo,

ket ipadpaduyakyakko ti kinadayagmo.

9 Dinak kadi laksiden ita ta lakayakon;

dinak kadi baybay-an ita ta nakapuyakon!

10 Kayat dagiti kabusorko a patayendak

ket pagsasaritaanda ti panangisikatda kaniak.

11 Kunada, “Binaybay-anen ti Dios;

intay kamaten ken tiliwen,

ta awanen ti mangarayat kenkuana!”

12 O Dios, dinak koma adaywan!

Darasem, Diosko, ket umaynak tulongan!

13 Maibabain ken madadael koma

dagiti mangdarup kaniak!

Malalais ken maparmek koma

dagiti agpanggep a mangdangran kaniak!

14 Kanayon a mangnamnamaak kenka;

ket ad-addanto pay nga idaydayawka.

15 Saritaekto ti kinaimbagmo;

sawekto nga agmalmalem ti panangisalakanmo,

adunto pay laeng ti diak maawatan.

16 Idaydayawkonto ti pannakabalinmo, O ApoDios;

ipakaammokto ti kinalintegmo,

wen, ti laeng kinalintegmo.

17 Insuronak, O Dios, manipud pay kinaubingko,

ket agpapan ita, sarsaritaek pay laeng

dagiti nakaskasdaaw nga aramidmo.

18 Itan, ta lakayakon nga ub-ubanan,

O Dios, dinak kadi baybay-an,

tapno ti bileg ken pannakabalinmo

ipakaammok kadagiti sumarsaruno a kaputotan.

19 Dumanon sadi langit, ti kinalintegmo,

naindaklan a bambanag dagiti inaramidmo.

Awanen ti kas kenka; O Dios.

20 Riribuk ken rigat ti impalak-ammo kaniak,

ngem isublimto met laeng ti pigsak;

manipud iti tanem aonennak.

21 Ad-adda pay a kinatan-ok ti ipaaymo kaniak

kasta met ti pannakaliwliwak.

22 O Diosko, agarpaakto a mangidaydayaw kenka

gapu iti kinapudnom nga awan patinggana.

Sika a Santo ti Israel, idaydayawka iti panagtokarko iti lira.

23 Bayat ti panagtokarko, agpukkawakto a siraragsak;

agkantaakto a buyogan ti amin a kararuak,

agsipud ta insalakannak.

24 Agmalmalemto a saritaek a nalintegka

ta dagiti agpanggep a mangranggas kaniak

nalalais ken naparmekda.

Kararag a Pangidawdawat iti Ari

1 O Dios, isurom ti ari

a mangukom nga awan idumdumana;

ibingayam kadi iti hustisia nga adda kenka

2 tapno napudno ti panangiturayna kadagiti tattaom,

ket uray dagiti maidadanes

mairupirda ti kalinteganda.

3 Rumang-ay koma ti daga ket aglablabonan;

agturay koma ti kinalinteg iti daytoy a pagilian.

4 Iti panangukom ti ari,

kitaenna koma a dagiti napanglaw maikkanda iti hustisia;

dagiti marigrigat, tulonganna,

ket parmekenna dagiti mangirurumen kadakuada.

5 Agdaydayaw koma kenka dagiti tattaom iti awan patinggana,

kas ti panagpaut ti init ken ti bulan iti ayanda.

6 Arig koma ti ari iti tudo nga agtinnag iti tay-ak,

kas arbis a mangsibog iti daga a natikag.

7 Agari koma ti kinalinteg bayat ti panagbiagna,

adda koma rang-ay agingga nga awanen ti bulan.

8 Lumawantoti pagturayanna agingga iti ballasiw ti taaw,

manipud Karayan Eufrates dumanonto iti ungto ti daga.

9 Dagiti tattao ti let-ang agrukbabdanto kenkuana,

mapasagto iti tapok dagiti kabusorna.

10 Umayto dagiti ari ti Tarsis

ken dagiti purpuro ket itedda ti sagutda;

yegto dagiti ari ti Sheba ken Seba ti datonda.

11 Agrukbabto dagiti amin nga ari kenkuana,

agserbinto kenkuana dagiti amin a pagilian.

12 Arayatenna ti napanglaw nga umawag kenkuana,

kasta met dagiti makasapul ken nabaybay-an tulonganna ida.

13 Naasi kadagiti nakurapay ken nakapuy;

isalakanna ti biag dagiti makasapul.

14 Ispalenna ida iti pannakaidadanes ken kinaranggas;

ispalenna ida ta napateg kenkuana ti biagda.

15 Agbiag koma ti ari iti agnanayon!

Maikkan koma iti balitok ti Seba.

Kanayon koma ti pannakaikarkararagna.

Kanayon koma a maited ti bendision ti Dios kenkuana.

16 Umadu koma ti apit iti daga,

makumotan koma dagiti turod iti mula

kas kabunga dagiti adda idiay Libano.

Umadu koma dagiti tattao kadagiti siudad,

a kas iti kaadu ti ruruot iti tay-ak.

17 Pulos a dinto koma malipatan ti naganna;

agpaut koma a kas iti init ti kinalatakna.

Agdaydayaw koma dagiti amin a nasion kenkuana;

dawatenda koma a bendisionan ti Dios ida

a kas iti pannakabendision ti ari.

18 Idaydayawyo tiApo, ti Dios ti Israel!

Isu laeng ti makaaramid kadagitoy nakaskasdaaw a banag!

19 Idaydayawyo iti agnanayon ti nagloriaan a naganna;

ket mapno koma ti sangalubongan iti dayagna!

Amen! Amen!

20 Daytoy ti paggibusan dagiti kararag ni David nga anak ni Jesse.

Ti Kinalinteg ti Dios

1 Pudno unay a naimbag

ti Dios iti Israel!

Naimbag kadagiti nadalus ti panagpuspusona!

2 Ngem nagistayanak naitibkol, dandaniak naikaglis

3 ta inapalak ti nakitak nga irarang-ay

dagiti managdakdakes ken dagiti natangsit.

4 Awan tuok a sagabaenda;

napigsa ken nasalun-atda.

5 Dida agsagaba a kas kadagiti dadduma;

awan ti parikutda a bakbaklayenda

a kas kadagiti sabali a tattao.

6 Kinatangsit ngarud ti pannakakuentasda,

ket kinaranggas ti pannakakawesda.

7 Dakes ti agtaud iti pusoda,

kinikillo ti linaon ti panunotda.

8 Pagang-angawanda dagiti tattao ket dakes a bambanag ti saoda;

natangsitda ket agplanoda iti panangidadanesda.

9 Padpadaksenda ti Dios sadi langit;

ditoy daga, agbilinda a sitatangsit.

10 Uray dagiti tattao ti Dios sumurotda kadakuada,

ket sigagagarda a mamati iti amin a saoda.

11 Ipagarupda a dinto maammoan ti Dios ti aramidda,

ket ti Kangatoan dinanto matakuatan ida.

12 Kasta ti kasasaad dagiti managdakdakes;

aglablabonanda ket ad-adu pay ti urnongenda.

13 Awan kadi ti serserbina a nagtalinaedak

a nadalus ken nalinteg?

14 O Dios, agmalmalem nga agsagsagabaak,

ket binigat a dusdusaennak.

15 No sinaok koma ti kasta,

saanak a napudno kadagiti tattaom.

16 Inkagumaak nga ammirisen ti kaipapananda

uray no narigatko nga awaten

17 agingga a simrekak iti Templom

ket naammoak ti pagtungpalan dagiti managdakdakes.

18 Pudno nga ipanmo ida iti nagalis a disso

tapno matnagda iti awan duadua a pakadadaelanda.

19 Apagdarikmat ti pannakaikisapda;

nakabutbuteng ti paggibusanda.

20 Kasda la tagtagainep nga agpukaw iti agsapa;

no agriingka, O Apo, umsiem ti langada.

21 Idi napasakitanak ket nasugatan toy riknak,

22 arigko iti nakuneng nga animal

ket saanka a naawatan.

23 Nupay kasta, kanayon nga addaak

iti arpadmo ket kibkibinennak.

24 Idaldalannak, babaen kadagiti pamagbagam

ket iti kamaudiananna, awatennak babaen iti pammadayaw.

25 Adda aya masarakak sadi langit a kas kenka?

Yantangay ta addaka kaniak,

adda aya sabali a kayatko ditoy daga?

26 No agkapuy toy puso ken riknak,

ti Dios ti mangpakired kaniak.

Isu laeng ti agnanayon a masapulko.

27 Awan duadua a matayto dagiti mangtallikud kenka,

ket dagiti saan a napudno kenka, pukawemto ida.

28 Ngem ti kaaddak iti asidegmo ti ragsakko.

ApoDios, nagbalinka a natalged a kamangko

tapno ipakaammok ti amin nga aramidmo.

Kararag a Pagdawat iti Pannakaispal ti Entero a Nasion

1 Diosko, apay a linaksidnakami a namimpinsan?

Agnanayon kadi ti pungtotmo iti arbanmo?

2 Laglagipem dagiti tattaom a pinilim idi un-unana,

dagiti sinubbotmo nga agbalin a kukua.

Laglagipem ti Bantay Sion a taengmo.

3 Magnaka kadagitoy rebba iti agnanayon awan inggana;

amin nga adda iti Templo dinadael dagiti kabusor.

4 Iti uneg ti nasantoan a Templom,

nagdir-i dagiti kabusormo iti panagballigida;

inkabilda sadiay dagiti bandera ti panangabakda.

5 Kasda la agpukpukan iti kayo babaen iti wasayda.

6 Amin a nakitikitan a kayo

dinadaelda babaen iti wasay ken maso.

7 Rinakrakda ti Templom ket pinuoranda.

Tinulawanda ti lugar a pagdaydayawan kenka.

8 Inkeddengda nga ikisapdakami a padapada;

pinadapuda amin a nasantoan a paguummongan iti daga.

9 Awanen dagiti milagro a makitami;

awanen dagiti profeta.

No kaano nga aggibus ti agdama a kasasaadmi,

awan ti makaammo kadakami.

10 Kasano kabayag, O Dios,

a katkatawaandakami dagiti kabusormi?

Agnanayon kadi a lalaisenda ti naganmo?

11 Apay a saannakami a tulongan?

Apay a nakadalikepkepka lattan?

12 Ngem sika, O Dios, ti arimi manipud ugma;

namin-adu a nagballigika ditoy daga.

13 Babaeniti bilegmo, binisngaymo ti baybay,

ket binurakmo dagiti ulo ti dragon iti taaw.

14 Rinumekmodagiti ulo ti dragon a maaw-awagan Leviatan

ket impakanmo ti bangkayna kadagiti parsua iti let-ang.

15 Pinagpussuakmo dagiti ubbog ken waig;

pinagmagam dagiti dadakkel a karayan.

16 Pinarsuam ti aldaw ken rabii, ti init ken bulan.

17 Dagiti beddeng ti daga, sika ti nangipasdek;

intuyangmo ti tiempo ti pudot ken tiempo ti lam-ek.

18 Laglagipem, OApo, nga ang-angawendaka dagiti kabusormo;

maagda ket agsaoda iti maibusor iti naganmo.

19 Dimo baybay-an dagiti tattaom nga awan gawayna;

maidaddanesda, dimo koma liplipaten ida.

20 Laglagipem ti tulagmo kadakami,

ta nagsaknapen ti kinadawel ken kinaranggas

kadagiti nasipnget a lugar ti daga.

21 Dimo ipalubos a maibabain dagiti napanglaw ken nanumo;

idaydayawdaka koma dagiti mailupitlupit a tattao.

22 Bumangonka, O Dios, ket irupirmo ti kalintegam.

Laglagipem nga agmalmalem a katkatawaandaka dagiti awan diosna.

23 Dimo lipaten dagiti makapungtot nga ikkis dagiti kabusormo,

ti di agsarday a panagririaw dagiti sumupring kenka.

Ti Dios nga Ukom

1 Agyamankami kenka, O Dios,

wen, agyamankami.

Sika ti awaganmi,

ket dagiti nakaskasdaaw nga aramidmo saritaenmi.

2 Kuna ti Dios, “Iti tiempo nga intudingko,

diakto mangidumduma iti panangukomko.

3 Uray mapukawto ti daga ken amin a linaonna,

palagdaekto latta dagiti pamuonanna.

4 Ibagak kadagiti managdakdakes a dida agpalpalangguad.

5 Ibagak kadakuada a dida agpangpangas.”

6 Ti panangukom, saan nga aggapu iti daya wenno iti laud,

iti amianan wenno iti abagatan.

7 Ti Dios ti mangukom;

adda ipababana, adda met itan-okna.

8 Adda kopa nga iggem ni Yahweh;

napno iti naingel nga arak ti pungtotna.

Ibukbokna daytoy ket inumen dagiti managdakdakes,

inumenda agingga iti aridaedna.

9 Ngem saanakto a mamingga nga agsarsarita

maipapan iti Dios ni Jacob;

agkantaakto latta ti panagdayaw kenkuana.

10 Parmekennanto ti pannakabalin dagiti nadangkes,

ngem itedna ti ad-adu a pannakabalin kadagiti nalinteg.

Ti Sibaballigi a Dios

1 Nalatak ti Dios idiay Juda;

idiay Israel, madaydayaw ti naganna.

2 Adda idiay Salem ti balayna;

idiay Sion ti pagnanaedanna.

3 Sadiay tinukkolna dagiti pana dagiti kabusor,

dagiti kalasag ken kampilanda—

wen, amin nga armasda.

4 O Dios, anian a dayagmo,

anian a daeg ti panagsublim.

Naggapuka kadagiti bambantay

a nangparmekam kadagiti kabusormo.

5 Naagawen dagiti sinamsam

dagiti natured a mannakigubatda;

matmaturogdan iti turog ni patay;

awanen ti mangusar kadagiti armasda.

6 Idi nakapungtotka, O Dios ni Jacob,

napasag dagiti kabalio ken dagiti nagsakay.

7 Ngem sika, OApo, pagbutbutngandaka!

Siasino ti makaitured a tumakder

iti sangoanam no agpungtotka?

8 Manipud langit, impaulogmo ti sentensia;

nagbuteng ti daga ket adda kappia,

9 idi tumakderka a mangukom

tapno isalakanmo dagiti maidaddadanes ditoy daga.

10 Ti pungtot ti tao agbanag la a pakaidayawam;

ket dagiti nakalasat ngilinendanto dagiti fiestam.

11 Tungpalenyo dagiti kariyo itiApoa Diosyo.

Rebbeng dagiti tattao nga ipan dagiti sagutda kenkuana,

isu a pagbutngan dagiti tattao.

12 Pagpakumbabaenna dagiti natangsit a prinsipe,

ket butbutngenna dagiti ari.

Pannakaliwliwa iti Tiempo ti Riribuk

1 Yikkisko ti umasug iti Dios,

ipigsak ti umawag ket denggennak.

2 Agkararagak iti Apo

iti tiempo ti pannakariribukko;

agpatpatnag nga agkararagak a singangato dagiti imak

ngem awan pannakaliwliwak.

3 Lagipek ti Dios ket agasugak;

agammirisak ket maupayak.

4 Dina ipalubos a maalak ti turogko,

kasta unay ti danagko ket diak makasao.

5 Mapanunotko dagiti naikupin a panawen;

malagipko met dagiti limmabasen a tawen.

6 Agpatpatnag a nauneg dagiti pampanunotko;

agpampanunotak ket saludsodek itoy nakemko:

7 “Kanayonto la ngatan a ti Apo laksidennak?

Saanto ngata a mangaasi manen kaniak?

8 Limmammiis ngatan ti di agbalbaliw nga ayatna?

Saanna ngatan a tungpalen ti karina?

9 Nagpatingga ngatan ti kinamanagparaburna?

Pungtot kadin ti simmukat iti kinamanangngaasina?”

10 Ket kinunak, “Daytoy ti pagsakitan ti nakemko:

ti pannakabalin ti Dios, saanen a kas idi damo.”

11 Dagiti aramidmo, OApo, laglagipekto ida,

wen, dagiti impakitam a milagro idi un-unana.

12 Lagipekto dagiti amin a gapuanam;

utobekto dagiti aramidmo a naindaklan.

13 O Dios, nasantoan amin a gapuanam!

Awan dios a kas kenka a naindaklan.

14 Sika ti Dios nga agaramid kadagiti milagro;

impakitam kadagiti nasion ti bilegmo.

15 Babaen iti bilegmo, sinubbotmo dagiti bukodmo a tattao,

dagiti kaputotan da Jacob ken Jose.

16 Nakitadaka dagiti danum, O Dios, ket nagbutengda;

uray dagiti kaadalman a taaw nagpigergerda.

17 Imbuyat dagiti ulep ti tudo;

naggurruod iti tangatang

ket nagkimat iti agsasallupang.

18 Agallangogan ti uni ti gurruodmo,

ket ti lubong malawagan kadagiti kimatmo;

nagkintayeg ken nagpigerger ti daga.

19 Nagnaka iti baybay;

ti adalem a taaw binallasiwmo,

ngem saan a makita dagiti tugotmo.

20 Arigmo iti pastor a nangidalan kadagiti tattaom,

babaen iti panangidaulo da Moises ken Aaron.

Ti Kinapudno ti Dios kadagiti Nasukir a Tattaona

1 Dakayo a tattaok,

dumngegkay iti daytoy pannursurok,

ket ipamaysayo nga allingagen ti innak isao.

2 Pangngarigti innak aramaten;

ilawlawagko dagiti palimed idi ugma,

3 dagiti nangngeg ken naammoantayo

nga imbaga dagidi ammatayo.

4 Ditay ilimlimed ida kadagiti annaktayo,

no di ket isaritatayo kadagiti kaputotan a sumarsaruno

ti pannakabalin ken naindaklan a gapuanan tiApo,

agraman dagiti nakaskasdaaw nga aramidna.

5 Nangituyang iti linteg kadagiti Israelita;

nangipaulog iti bilin kadagiti kaputotan ni Jacob.

Imbilinna kadagiti kapuonantayo

nga isuroda dagitoy kadagiti annakda

6 tapno maammoan dagiti sumarsaruno a kaputotan a di pay nayanak,

ket isurodanto met kadagiti bukodda nga annak.

7 Iti kasta, agtalekda met iti Dios,

ket dida lipaten dagiti aramidna

no di ket kanayon a tungpalenda dagiti bilbilinna.

8 Saanda koma a kas kadagiti kapuonanda

a nasukir ken nasubeg a kaputotan.

Saan a natibker ti pammatida iti Dios,

ket saanda a nagtalinaed a napudno kenkuana.

9 Nagtagipana dagiti Efraimita,

ngem iti kaaldawan ti gubat, nagtatarayda.

10 Saanda a tinungpal ti katulagan ti Dios,

saanda a nagbiag a mayannurot iti lintegna.

11 Nalipatanda dagiti inaramidna,

dagiti milagro nga impakitana kadakuada.

12 Itiimatang dagiti kapuonanda nagaramid kadagiti milagro,

iti tanap ti Soan idiay Egipto.

13 Pinagbisngaynati baybay ket inlasatna ida;

pinagpangatona ti danum a kas pader bayat ti pannagnada.

14 Itialdaw, babaen iti ulep indalanna ida

iti rabii, ti naraniag nga apuy ti bagnosda.

15 Pinagrengngatnati dakkel a bato idiay let-ang

imminumda iti danum a kasla nagburayok manipud kaunggan.

16 Pinagubbogna ti dakkel a bato

ket nagayus ti danum a kasla karayan.

17 Ngem, nagbasolda latta iti Dios,

ket binusorda ti Kangatoan idiay let-ang.

18 Inggagaradaa sinuot ti anus ti Dios

babaen iti panagdawatda iti taraon a magustoanda.

19 Nagsaoda iti maibusor iti Dios ket kinunada,

“Maikkannatayo ngata ti Dios iti taraon ditoy let-ang?

20 Agpayso a dinugsolna ti dakkel a bato

ket pimsuak ti danum a nagayus a kasla karayan.

Ngem maikkannatayo ngata iti tinapay ken karne?”

21 Nakapungtot ni Yahweh idi nangngegna daytoy;

dinusana dagiti tattaona babaen iti apuy,

ket rimmubrob ti pungtotna kadakuada,

22 agsipud ta awan ti panagtalekda iti Dios,

ken awan pammatida a maisalakanna ida.

23 Nupay kasta, binilinna ti tangatang

ket linuktanna dagiti ruangan ti langit.

24 Pinagtudonakadakuada iti mana a kanenda,

wen, ti mana a nagtaud sadi langit.

25 Nanganda iti taraon dagiti anghel;

inted ti Dios ti aglaplapusanan a kanenda.

26 Binulosanna ti angin nga aggapu iti daya

ket babaen iti pannakabalinna, dimteng ti angin-abagat.

27 Intedna ti adu a tumatayab kadakuada

a kas kaadu ti darat iti baybay.

28 Nagtinnagda iti tengnga ti kampoda

ken iti aglikmut dagiti toldada.

29 Nangan dagiti tattao ket nabsogda,

ta intedna ti taraon a kayatda.

30 Ngem idi mangmanganda pay laeng,

ken saanda pay a natilmon ti kanenda,

31 nakapungtot ti Dios kadakuada

ket pinatayna dagiti maingel iti Israel

ken dagiti kapipigsaan nga agtutuboda.

32 Iti laksid dagitoy, intuloy dagiti tattao ti panagbasolda;

adu a milagro ti inaramidna, dida nagtalek kenkuana.

33 Ngarud, kasla anges ti kaababa ti aldawda,

ginudasna ida iti kellaat a didigra.

34 Tunggal adda dagiti papatayenna kadakuada,

isu metten ti panagbirok kenkuana dagiti dadduma,

agbabawida ket sipapasnekda nga agkararag kenkuana.

35 Malagipda a ti Dios isut’ bato a salaknibda;

ti Kangatoan ti mangisalakan kadakuada.

36 Ngem pasig nga ulbod ti sasawenda,

saan a naimpusoan amin nga ibagbagada.

37 Didanagtalinaed a napudno kenkuana,

ket dida tinungpal ti nagtutulaganda.

38 Nupay kasta, kinaasian ti Dios dagiti tattaona,

pinakawanna dagiti basolda ket dina pinukaw ida.

Namin-adu a tinengngelna ti ungetna

ken minedmedanna ti pungtotna.

39 Nalagipna a tattaoda laeng,

kas angin a lumabas a di agsublin.

40 Namin-adu a nagsukirda iti Dios idiay let-ang!

Masansan met a pagladingitenda.

41 Masansan a suotenda ti kinaanusna.

Saem ti impalak-amda iti Nasantoan ti Israel.

42 Nalipatanda ti dakkel a pannakabalinna

idi inispalna ida iti kabusorda,

43 idi inaramidna dagiti milagro ken nakaskasdaaw a pagilasinan,

ken ti aldaw nga adda idiay Egipto iti tanap ti Soan.

44 Pinagbalinnaa dara dagiti karayan ken waig dagiti Egipcio;

naawanan dagiti Egipcio iti danum nga inumen.

45 Nangibaoniti pinangen a ngilaw a namarigat kadakuada;

nangyeg kadagiti tukak a nangdadael kadagiti talonda;

46 nangibaonkadagiti arabas a nangan kadagiti apitda

ken dudon a nangdadael kadagiti mulada.

47 Dinadaelnadagiti ubasda babaen iti yelo,

inkisapna dagiti sikamoro iti bumayakabak a tudo.

48 Pinatayna dagiti bakada babaen iti yelo;

inkisapna dagiti karneroda babaen iti kimat.

49 Bimtak ti pungtot ken ungetna;

inyegna kadakuada ti nakaro a didigra

a dimteng a kas babaonen ni patay.

50 Saanna nga inggawid ti pungtotna

wenno inkaluya ida iti pakatayanda

no di ket pinatayna ida iti didigra.

51 Pinataynadagiti inauna nga annak a lallaki,

iti amin a familia ti Egipto.

52 Kaslakarnero nga inakayna dagiti tattaona;

indalanna ida a naglasat iti let-ang.

53 Indalannaida a sitatalged ket awan nagbutnganda,

ngem nalmes iti baybay dagiti kabusorda.

54 Impannaida iti nasantoan a dagana,

kadagiti kabambantayan a sinakupna.

55 Pinapanawnadagiti agnaed iti daga a papananda

sana biningbingay ti dagada kadagiti tribu ti Israel

ket intedna dagiti balbalayda kadagiti tattaona.

56 Ngemti Mannakabalin-amin a Dios, sinukirda;

saanda a tinungpal dagiti bilbilinna.

57 Nasukir ken mangliliputda a kas kadagiti kapuonanda;

saanda a maiturong a kas iti killo a pana.

58 Pinagpungtotda gapu kadagiti altarda

ket pinagimonda gapu iti didiosen a nagdaydayawanda.

59 Nagpungtot ti Dios idi makitana daytoy

ket linaksidna a namimpinsan ti Israel.

60 Binaybay-annati toldana idiay Silo

a nagnaedanna iti sidong dagiti tattao.

61 Pinalubosannadagiti kabusor a mangsamsam,

iti Lakasa ti Tulag a pakakitaan iti bileg ken dayagna.

62 Kinapungtotna dagiti bukodna a tattao,

binaybay-anna ida a pinapatay dagiti kabusorda.

63 Napasag iti paggugubatan dagiti agtutuboda,

ket awan ti nangasawa kadagiti babbalasangda.

64 Nauloyan iti kampilan dagiti papadida,

ket di napalubosan nga

agdung-aw dagiti baloda.

65 Kamaudiananna, bimmangon

ti Apo a kasla nakaturog;

kasla napigsa a lalaki a pinatured ti arak.

66 Pinaksiatna dagiti kabusorna;

agnanayon ken nakababain ti pannakaabakda.

67 Ngem linaksidna dagiti kaputotan ni Jose

saanna a pinili ti tribu ni Efraim.

68 Pinilina ketdi ti tribu ni Juda

ken ti Bantay Sion nga ay-ayatenna.

69 Binangonna sadiay ti Templona

nga umasping iti taengna sadi langit;

impasdekna a di maisin a kas iti daga,

natalged ingganat’ inggana.

70 Pinilinani David nga agbalin nga adipenna,

innalana iti pagpastoran kadagiti karnero

71 ken pagtaraknan kadagiti urbon.

Pinagbalinna nga ari ti Israel,

ken pastor dagiti tattao ti Dios.

72 Iti kasta, sipapasnek nga inaywanan ni David ida,

ket nainsiriban ti panangipangulona kadakuada.

Kararag iti Pannakaispal ti Nasion

1 ODios, rinaut dagiti

pagano ti daga dagiti tattaom.

Tinulawanda ti nasantoan a Templom.

Ket rinebbekda ti Jerusalem.

2 Impakanda ti bangkay

dagiti tattaom kadagiti tumatayab,

ken ti bangkay dagiti adipenmo kadagiti animal nga atap.

3 Pinagayusda ti dara dagiti tattao iti Jerusalem;

iti entero a Jerusalem kasla danum a nagayus ti dara

ket awan natda a mangitabon kadakuada.

4 Nagbalinkami nga ang-angaw kadagiti nasion iti likmutmi,

katkatawaan ken um-umsiendakami.

5 Agnanayon kadi, OApo, ti ungetmo kadakami;

kasla apuy a simged ti pungtotmo, saan kadin a maiddep?

6 Idissuormo ti pungtotmo kadagiti nasion a pagano,

dida agdaydayaw kenka, dida umawag iti naganmo.

7 Ngamin, pinapatayda dagiti tattaom;

dinadaelda ti pagiliam ket naglangalang.

8 Dinakam kadi dusaen

gapu iti basol dagiti kapuonanmi.

Darasem ti umay ket kaasiannakami

ta napukawmi aminen a namnamami.

9 Tulongannakam, O Dios ket isalakannakami;

ispalennakami ket pakawanem dagiti basbasolmi

tapno ti dayawmo maitandudo.

10 Amangan ketdi no kuna dagiti pagilian,

“Sadino ti ayan ti Diosda?”

Kayatmi a makita ti panangdusam kadakuada

gapu iti pannakapapatay dagiti adipenmo.

11 Denggem ti asug dagiti balud,

ket wayawayaam dagiti naikeddeng a matay

babaen iti bilegmo a naindaklan.

12 O Apo, balsem dagiti pagilian;

dusaem ida iti mamimpito gapu iti amin a panangumsida kenka.

13 Dakami a tattaom, dakami a karnero iti arbanmo,

agnanayon nga agyamankamto kenka,

ket idaydayawdakanto iti amin a tiempo.

Kararag a Pagdawat iti Pannakaisubli ti Pagilian

1 Ipangagnakamikadi,

O Pastor ti Israel;

denggennakami, sika a mangidaldalan iti arbanmo.

Sika a situtugaw iti tronom iti rabaw dagiti kerubim,

2 ipakitam ti ayatmo kadagiti tribu ti Efraim, Benjamin ken Manases.

Ipakitam kadi ti pigsam kadakami;

umaynakami kadi isalakan!

3 Isublinakami kadi, O Dios.

Iparangarangmo ti panagayatmo tapno maisalakannakami!

4 OApoa Dios a Mannakabalin-amin,

kasano pay kabayag nga agtalinaed ti pungtotmo kadakami?

Kasano pay kabayag samonto ipangag dagiti kararagmi?

5 Tinaraonannakam iti lua,

adu a lua ti impainummo kadakami.

6 Pinalubosam dagiti nasion a mangumsi kadakami

ket pagang-angawandakami.

7 O Mannakabalin-amin a Dios, isublinakami kadi.

Ipakitam ti asim tapno maisalakannakami.

8 Maysa nga ubas ti inruarmo idiay Egipto;

pinaksiatmo dagiti sabsabali a nasion

ket immulam iti dagada.

9 Dinalusam ti maysa a disso a pakaimulaanna,

nagpauneg dagiti ramutna.

Dimmakkel ti ubas ket nagsaknap iti entero a daga.

10 Lininonganna dagiti turod,

ken dagiti natayag a sedro.

11 Dimmanon dagiti sangana iti Taaw Mediterranean;

rimmungbo agingga iti nakadanon iti Karayan.

12 Apay a rinebbam dagiti aladna?

Nawayan dagiti aglabas

a mangpuros iti bungana.

13 Subsoben ken baddebaddekan dagiti alingo,

dagiti atap nga animal, sumrekdan nga agkaan.

14 Kaasiannakami, O Mannakabalin-amin a Dios.

Tannawagannakami manipud langit ket umaymo salakniban toy kaubasam.

15 Umaymo ispalen daytoy mula nga intukitmo,

daytoy naganus nga ubas a pinadakkelmo a nalangto.

16 Pinuoran dagiti kabusormi ket pinukanda;

ket iti pungtotmo, dadaelem ida.

17 Dagiti tattao a pinilim, taginayonen ken salaknibam.

Ti pinapigsam a nasion inka salakniban.

18 Saandakanton a panawan;

taginayonennakami ket idaydayawdaka.

19 OApoa Dios a Mannakabalin-amin, isublinakami kadi.

Iparangarangmo ti panagayatmo tapno maisalakankami.