Category: Dagiti Salmo

Kanta iti Fiesta

1 Idir-iyo ti ragsakyo iti Dios a salaknibtayo;

iti Dios ni Jacob ikantayo ti pagdayawyo.

2 Agkantakayo a buyogan iti pandereta,

danggayanyo iti naaweng a lira ken arpa.

3 Pagunienyoti trumpeta no agfiestatayo,

tunggal dumteng ti lutuad, kasta met ti kabus.

4 Ta iti Israel, linteg daytoy a naipaulog,

maysa a bilin ti Dios ni Jacob.

5 Imbilinna ken Jose daytoy nga annongen

idi mapan Egipto nga inna gubaten.

Mangngegko ti timek ti diak am-ammo,

6 “Inikkatko ti nadagsen nga awit iti abagam;

innalak ti basket nga ig-iggamam.

7 Idiadda rigatmo, immawagka kaniak ket inlisika;

manipud gurruod a paglemlemmengak, sinungbatanka,

sinuotka idi addaka iti ubbog ti Meriba.

8 Denggem, O ilik, ti ballaagko kenka.

O Israel, ipangagnak la koma!

9 Awantoti sabali a dios iti nagtengngaanyo,

wen, saankayto nga agrukbab iti sabali a dios.

10 Siak ni Yahweh a Diosmo

a nangiruar kenka idiay Egipto;

agngangaka laeng ket itedko ti taraonmo.

11 “Ngem didak impangag dagiti tattaok;

saan a nagtulnog kaniak ti Israel.

12 Gapu iti kinasukirda binaybay-ak ida

nga agaramid iti aniaman a kayatda.

13 No dumngeg la koma kaniak ti ilik,

no agtulnog ti Israel kaniak,

14 nalaka a parmekek dagiti kabusorna,

ket abakek amin a bumusor kenkuana.

15 Agrukbab a sibubuteng dagiti gumurgura kaniak,

ket saan nga agpatingga ti pannakadusada.

16 Ngem taraonankanto iti kasayaatan a trigo,

ket pennekenkanto iti kasam-itan a diro.”

Ti Dios ti Kangatoan nga Agturay

1 Agtugaw ti Dios a mangukom iti nailangitan a taripnong;

iti ummong dagiti dios, ipaulogna ti pangngeddengna:

2 “Isardengyon ti nakillo a panangukomyo,

saanyo nga ayonan dagiti dakes a tattao!

3 Salaknibanyo ti kalintegan dagiti ulila ken nakurapay,

itedyo ti karbengan dagiti nakakaasi ken awanan gaway.

4 Alawenyo dagiti nakapuy ken marigrigat,

ikanawayo ida kadagiti managdakdakes.

5 “Dikay makaaw-awat ken awan ammoyo!

Napalalo ti kinasukiryo,

ket nagpukawen ti hustisia ditoy lubong.

6 Imbagakkadakayo a dioskayo,

annaknakay amin ti Kangatoan.

7 Nupay kasta, mataykayto a kas kadagiti tattao,

kas iti siasinoman a prinsipe, matnagkayto.”

8 Umayka, O Dios, ket iturayam ti lubong;

kukuam amin a nasion.

Kararag iti Pannakaparmek dagiti Kabusor

1 O Dios, agtignayka kadin;

dika kadi agulimek, dika agmayeng.

2 Kitaem ket umalsan dagiti kabusormo,

makigubaten dagiti gumurgura kenka.

3 Adda nalimed a panggepda kadagiti tattaom,

isikatda dagiti salsalaknibam.

4 “Umaykayo,” kunada, “ket dadaelentayo ti nasionda,

tapno mapukawen ti Israel, malipatanen ti naganna.”

5 Nagtutulagda a sangsangkamaysada a mangbusor kenka:

6 dagiti Edomita ken dagiti Ismaelita,

dagiti Moabita ken dagiti Agareno;

7 dagiti taga-Gebal, Ammon ken Amalec;

ken dagiti taga-Filistia ken Tiro.

8 Timmipon met kadakuada ti Asiria

tapno dagiti kaputotan ni Lot kaduaenda.

9 Ipalak-ammokadakuada ti impaaymo kadagiti Midianita,

kada Sisera ken Jabin iti Karayan Kison.

10 Pinarmekmo ida idiay Endor,

ket nagrupsa ti bangkayda iti daga.

11 Aramidemkadagiti panguloda

ti kas iti inaramidmo kada Oreb ken Zeeb;

parmekem dagiti amin nga agtuturayda

kas iti panangparmekmo kada Zeba ken Salmunna

12 isuda a nagkuna, “Tagikuaentayo ti daga ti Dios.”

13 O Diosko, inwarawaram ida a kas tapok,

kas taep nga ipalais ti angin.

14 Kas iti apuy a manguram iti kabakiran,

kas iti gil-ayab a mangpasged kadagiti turod,

15 kamatem ngarud ida babaen iti bagiom,

ket pagalinggagetem ida babaen iti alipugpogmo.

16 Lapunosem ida iti bain, OApo,

tapno bigbigenda ti pannakabalinmo.

17 Agnanayon koma a maparmek ken mabutbutengda;

matayda koma a naan-anay ti pannakaibabainda.

18 Maammoanda koma a siksika laeng tiApo,

Yahweh ti naganmo,

ti Kangatoan iti entero a daga.

Iliw iti Balay ti Dios

1 Anian a nagpintas ti Templom,

OApoa Mannakabalin-amin!

2 Kasta unay ti gagarko a mapan sadiay!

Kayatko ti sumrek iti Templo ni Yahweh.

Kantaak iti Dios a sibibiag;

agkantaak a siraragsak iti amin a puso ken kararuak.

3 Agumok dagiti billit ken ti sallapingaw,

ket aywananda dagiti sibongda iti asideg dagiti altarmo,

OApoa Mannakabalin-amin, Arik ken Diosko.

4 Naragsak dagiti agnaed iti balaymo.

Kanayon nga agkankantada iti pagdaydayaw kenka.

5 Naragsak dagiti tattao a sika ti pagtaudan ti pigsada,

a mailiw a mapan agdaydayaw idiay Bantay Sion.

6 Bayat ti panangdaliasatda iti natikag a tanap ti Baca,

agburayok dagiti ubbog iti dayta a daga,

agtinnag ti nasapa a tudo ket dagiti waig aglipiasda.

7 Pumigsada a pumigsa bayat ti pannagnada;

makitadanto ti Dios dagiti dios idiay Sion.

8 OApoa Dios a Mannakabalin-amin,

denggem ti kararagko,

dumngegka, O Dios ni Jacob.

9 Bendisionam ti arimi, O Dios,

ti ari a pinilim.

10 Naim-imbag ti maysa nga aldaw a kaaddak iti Templom,

ngem ti sangaribu nga aldaw iti sabali a disso.

Kaykayatko ti agbantay iti ruangan ti balay ti Dios,

ngem ti agtaeng iti balay dagiti managdakdakes.

11 OApoken Diosmi, arigmo iti init ken kalasag;

mangipaayka iti parabur ken dayaw.

Dimo ipaidam ti nasayaat a banag

kadagiti agaramid iti naimbag.

12 OApoa Mannakabalin-amin, nagasat ti tao nga agtalek kenka.

Kararag a Pagdawat iti Pagsayaatan ti Pagilian

1 OApo, pinaraburam ti dagam,

pinarang-aymo manen ti Israel.

2 Dagiti tattaom, pinakawanmo ida;

pinunasmot’ basbasol ken amin a biddutda.

3 Pinagbaawmo a namimpinsan

ti pungtot ken ungetmo kadakuada.

4 O Dios a mangisalakan kadakami,

lipatem kadin ti guram ket talliawennakami.

5 Agnanayon kadi a kapungtotnakami?

Dinto kadi agpatinggan ti ungetmo?

6 Papigsaennakami, dakami a tattaom,

ket idaydayawdakanto.

7 Iparangmo kadi ti di agbalbaliw nga ayatmo, OApo,

tulongannakami tapno maisalakannakami.

8 Dengdenggek ti sasawen tiApoa Dios;

ikarina nga ited ti talna kadatayo a tattaona,

no ditay sublian dagiti minamaag nga aramidtayo.

9 Pudno a sisasagana a mangisalakan

kadagiti agraem kenkuana

ket agtalinaedto ti dayagna iti dagatayo.

10 Agmaymaysanto sadiay ti ayat ken ti kinapudno,

ket agtiponto ti kinalinteg ken ti kappia.

11 Agpangatonto ti kinapudno ti tao manipud ditoy daga,

ket ti kinalinteg ti Dios tumannawagto manipud langit.

12 Paraburannatayto tiApo,

ket umadunto ti apit ti dagatayo.

13 Magnanto ti kinalinteg iti sangoanan tiApo

ket isaganana ti dalan a pagnaanna.

Kararag a Pagdawat iti Tulong ti Dios

1 Denggennak kadi, OApo,

ket sungbatannak, ta napanglaw ken awan kabaelak.

2 Isalakannak iti patay ta sika ti Diosko;

ispalem toy adipenmo nga agtalek kenka.

3 OApo, kaasiannak koma;

agmalmalem nga agkararagak kenka.

4 Paragsakem toy adipenmo, O Apo,

ta sika ti pagkararagak.

5 Naimbag ken mamakawanka,

aglaplapusanan ti di agbalbaliw nga ayatmo

kadagiti amin nga umawag kenka.

6 Ipangagmo, OApo, toy kararagko;

denggem toy asugko a dumawat iti tulongmo.

7 Umawagak kenka iti tiempo ti pannakariribukko,

agsipud ta sungbatam toy kararagko.

8 Awan ti dios a kas kenka, O Apo,

awan ti makaaramid iti maaramidmo.

9 Umaytodagiti amin a nasion a pinarsuam,

ket agrukbabdanto iti sangoanam.

Idaydayawdanto ti naganmo.

10 Mannakabalinka, ket nakaskasdaaw dagiti aramidmo;

siksika laeng ti Dios, awanen sabali.

11 Isuronak ti kayatmo nga aramidek, OApo,

ket agtulnogak kenka a sipupudno;

isuronak nga agserbi kenka a sipapasnek.

12 Agyamanak iti amin a pusok, O Apo a Diosko;

agnanayon nga ipakaammok ti naganmo.

13 Nagdakkel ketdin ti panagayatmo kaniak!

Iti kaunggan tanem inaonmo toy kararuak.

14 O Dios, umaydak darupen dagiti natangsit a tattao;

kayatdak a papatayen ti bunggoy a di kenka mangikankano.

15 Ngem sika, O Apo, naasi ken managayatka a Dios;

naparaburka, napudno ken naanus.

16 Taliawennak ket kaasiannak;

papigsaen ken isalakannak,

ta agserbiak kenka a kas iti inak.

17 Ikkannak, O0Apo, ti pakakitaan iti kinaimbagmo.

Mabainanto dagiti gumurgura kaniak

a makakita a liniwliwa ken tinulongannak.

Pammadayaw ti Jerusalem

1 Binangon tiApoti siudadna iti nasantoan a bantay.

2 Ad-adda ti panagayat tiApoiti Sion

ngem iti aniaman a siudad ti Israel.

3 Denggem, O Siudad ti Dios,

dagiti nakaskasdaaw nga ibagana maipapan kenka:

4 “No ilistak dagiti nasion nga agtulnog kaniak,

iramanko ti Rahabken Babilonia.

Ket dagiti tattao ti Filistia, Tiro ken Etiopia,

ibilangko nga iti Jerusalem ti pagnaedanda.”

5 No maipapan iti Sion, maibagbaganto

a nagtaud dagiti amin a nasion kenkuana,

ket papigsaento ti Kangatoan.

6 Mangaramidto tiApoiti listaan dagiti tattao,

ket ibilangna amin ida nga umili ti Jerusalem.

7 Agsala ken ikantadanto,

“Ti Sion ti pagtaudan ti amin a bendisiontayo.”

Kararag a Pagdawat iti Tulong

1 Agmalmalem nga umaw-awagak, OApoa Diosko,

ket iti rabii, umayak iti saklangmo.

2 Ipangagmo koma toy kararagko;

denggem toy panagdawatko iti tulongmo.

3 Nakaad-adu a rigat ti nagpasarak

ket ita asidegakon ken patay.

4 Naibusanakon iti pigsa;

naibilangakon a natay a kas kadagiti dadduma.

5 Nabaybay-anak iti lugar dagiti natay;

kaslaak kadagiti napapatay nga addan iti tanemda,

isuda a nalipatamon a namimpinsan,

ket saanmo idan a matulongan.

6 Intapuaknak iti yuyeng ti tanem,

iti abut a kasipngetan ken kaunggan.

7 Agdissuor kaniak ti nakaro a pungtotmo,

ket lapunosendak dagiti dalluyonmo.

8 Inyadayom dagiti gagayyemko kaniak;

pinagbalinnak a makarimon kadakuada,

ket diak makaruar ditoy nakaipupokak.

9 Nakapsuten ti panagkitak gapu ti panagsagabak.

Kenka, OApo, inaldaw nga umawagak,

agkararagak a silalayag dagiti imak.

10 Agiparangka aya iti milagro kadagiti natay?

Bumangonda aya tapno agdaydayawda kenka?

11 Iti tanem, saritaenda aya ti napudno nga ayatmo?

Iti lugar a pakadadaelan, saritaenda aya ti kinamatalekmo?

12 Iti kasipngetan, makita aya

dagiti karkarna nga aramidmo?

Iti daga ni lipat, mabigbig

aya ti kinaimbagmo?

13 OApo, umawagak a patulongan kenka;

agkararagak kenka iti tunggal agsapa.

14 Apay, OApo, a laksidennak?

Apay nga ilingedmo ta rupam kaniak?

15 Kakaasi ken agngangabitak ken patay sipud pay idi ubingak;

inibturak dagiti panggugormo ket itan mautoyanak.

16 Ti rungsotmo naglasat kaniak,

ket dagiti pangdidigram dinadaeldak.

17 Agmalmalem a kasda la layus a manglawlaw kaniak;

linakubdak ket awan ti paglisiak.

18 Uray dagiti nadekket a gagayyem inyadayom kaniak;

ti laeng sipnget ti nabati a kaduak.

Kanta iti Tiempo ti Pannakariribuk ti Nasion

1 OApo, kanayon nga ikantak ti di agbalbaliw nga ayatmo;

ipakaammok ti kinapudnom iti amin a tiempo.

2 Ammok a ti ayatmo mataginayon,

agpaut a kas iti langit ti kinapudnom.

3 Kinunam, “Nakitulagak iti pinilik a tao,

inkarik ken David nga adipenko:

4 ‘Addantolatta agari nga agtaud kenka,

Taginayonekto dagiti

kaputotam iti awan inggana.’”

5 OApo, ikanta dagiti langit dagiti nakaskasdaaw nga aramidmo;

dagiti nasantoan a parsua ikantada ti kinapudnom.

6 Siasino ti kas kenka sadi langit, OApo;

awan nailangitan a parsua a kaaspingmo.

7 Dioska a pagraraeman dagiti parsua a nailangitan;

naindaklan ken pagbutbutngandaka dagiti adda iti sangoanam.

8 OApoa Dios a Mannakabalin-amin,

awan ti mannakabalin a kas kenka;

kadagiti amin a banag, OApo, matalekka.

9 Iturayam ti nadawel a baybay;

pagtalnaem dagiti dadakkel a dalluyonna.

10 Imbaddekmo ti dragon a Rahabket pinapataymo,

winarawaram dagiti kabusormo iti nabileg nga imam.

11 Kukuam ti langit agraman ti daga,

pinarsuam ti lubong ken amin a linaonna.

12 Insaadmo ti amianan ken ti abagatan;

kantaandaka ti Tabor

ken Hermon gapu iti ragsakda.

13 Anian a kinabilegmo!

Anian a nagdakkel ti pannakabalinmo!

14 Nabangon ti pagariam iti kinalinteg ken kinahustisia;

iti amin nga aramidmo,

makita ti ayat ken kinapudnom.

15 Nagasat dagiti agdaydayaw kenka kadagiti kankanta,

isuda nga agbibiag iti silaw ti ayatmo.

16 Agragsakda nga agmalmalem gapu kenka,

ket idaydayawdaka iti kinaimbagmo.

17 Sika ti mangted iti dakkel a balligimi;

ti ayatmo ti pagtaudan ti pigsami.

18 Sika ti nangpili iti mangsalaknib kadakami;

sika a Santo ti Israel ti nangted iti arimi.

Ti Kari ti Dios ken ni David

19 Iti maysa a parmata idi un-unana, imbagam kadagiti napudno nga adipenmo,

“Insaadko ti balangatiti nalatak a soldado;

intedko ti trono iti maysa a napili kadagiti tattao.

20 Insaadkonga ari ni David nga adipenko;

babaen iti nasantoan a lana inkonsagrarko.

21 Kanayonto nga adda kenkuana ti bilegko,

ket papigsaento ti pannakabalinko.

22 Saanto nga agballigi ti

kabusor a mangparmek kenkuana,

dinto abaken dagiti managdakdakes.

23 Rumekekto ti kabusorna iti imatangna,

ket papatayekto amin a gumura kenkuana.

24 Napudnoakto kenkuana, dinto aggibus ti ayatko;

kankanayon nga itedkonto ti balligina.

25 Palawaekto ti pagarian nga inna iturayan

manipud Mediterranean agingga iti Karayan.

26 Kunananto kaniak, ‘Sika ti Diosko, sika ti amak.

Sika ti Bato a mangisalakan kaniak.’

27 Ibilangkontonga inauna nga anakko;

isunto ti kangatoan kadagiti amin nga ari.

28 Tungpalekto ti inkarik,

ket agnanayonto ti tulagko kenkuana.

29 Addanto latta agari a kaputotanna;

agpautto a kas iti langit ti pagarianna.

30 “Ngem no salungasingen ti kaputotanna ti lintegko,

ket dida agbiag a kas mayannurot kadagiti bilbilinko,

31 no dida ikankano dagiti alagaden nga intuyangko

ket dida annuroten dagiti bilbilinko,

32 dusaekto ida gapu kadagiti basolda,

saplitekto ida gapu kadagiti labsingda.

33 Ngem dinto aggibus ti napudno a panagayatko kenkuana,

diakto met paglikudan ti karik kenkuana.

34 Diakto waswasen ti tulagko,

diakto ibabawi ti karik kenkuana.

35 “Iti nasantoan a naganko,

insapatak a diakto agulbod ken David.

36 Addanto latta agari a kaputotanna,

ket agpautto a kas iti init ti pagarianna.

37 Mataginayonto ti tronona a kas iti bulan,

mataginayonto a kas iti tangatang.”

Unnoy iti Pannakaparmek ti Ari

38 Ngem nagpungtotka iti ari a pinilim;

linaksidmo ket pinanawam.

39 Winaswasmo ti tulagmo iti adipenmo,

ket imbarsakmo ti koronana iti daga.

40 Rinebbam dagiti bakud ti siudadna,

ket dinuprakmo dagiti sarikedkedna.

41 Amin nga aglabas takawenda ti sanikuana,

ket lalaisen dagiti amin a kaarubana.

42 Pinagballigim dagiti kabusorna;

pinagragsakmo dagiti gumurgura kenkuana.

43 Pinagbalinmo nga awan serbi dagiti armasna,

ket binaybay-am a maabak iti paggugubatan.

44 Inikkatmo ti setrona,iti imana

ket impurruakmo ti tronona iti daga.

45 Pinaababam dagiti aldaw ti kinaagtutubona,

ket inyegmo ti naan-anay a pannakaibabainna.

Kararag iti Pannakaisalakan

46 Agnanayon aya, OApo, nga ilingedmo ta rupam?

Kasano ti kapaut ti pungtotmo a sumged a kas apuy?

47 Laglagipem, OApo, nga ababa ti biagko;

laglagipem a matay dagiti pinarsuam a tattao.

48 Adda aya tao a saan a matay?

Ania ti aramidenna tapno malisianna ti tanem?

49 Yanna, O Apo, dagiti pakakitaan iti ayatmo?

Yandan dagiti inkarim ken David?

50 Dimo kad lipaten ti pannakaum-umsik nga adipenmo,

ti panagibturko kadagiti pananguyawdagiti tattao.

51 Anian a pananglais dagiti kabusormo iti pinilim nga ari!

Um-umsienda iti sadinoman a papananna, OApo.

52 Madaydayaw tiApoiti agnanayon!

Amen! Amen!

Agnanayon ti Dios ngem Ababa ti Biag ti Tao

1 Sika, O Apo, ti nagkamanganmi iti amin a kaputotan.

2 Sakbay a pinarsuam dagiti bantay,

wenno ti panangpaaddam iti lubong,

agnanayonkan a Dios, wen, Dios iti awan inggana.

3 Ibagam iti tao nga agsubli iti nagtaudanna;

isublim iti tapok a kasisigudna.

4 Tisangaribu a tawen kenka,

mayarigda iti maysa nga aldaw.

Kasla kalman a napalabas,

kas nabiit a panagbantay iti rabii.

5 Ipanawmo dagiti tattao

a kasla tagtagainep a lumabas.

Mayarigda kadagiti ruot a tumubo iti bigat;

6 dumakkel ken lumangtoda,

ngem iti rabii, malaylay ken magangoda.

7 Ikisapnakami iti pungtotmo;

mabutengkami iti ungetmo.

8 Impanayagmo dagiti labsingmi iti sangoanam,

makitam dagiti nalimed a basolmi.

9 Umababa dagiti aldawmi gapu iti pungtotmo;

agpukaw ti biagmi a kas iti sennaay.

10 Pitopulo la a tawen ti panagbiagmi,

wenno walopulo, no nasalun-atkami.

Nupay kasta, tuok ken ladingit ti yegda;

agpatingga ti biag ket awankamton.

11 Siasino ti nakarikna

iti naan-anay a bileg ti pungtotmo?

Siasino ti makaammo

iti buteng a yeg ti ungetmo?

12 Isuronakami a mangbilang

kadagiti aldawmi tapno agbalinkami a masirib.

13 Mabayag pay aya, OApo,

ti panangtaliawmo kadakami?

Kaasiam kadi dagiti adipenmo!

14 Binigat koma a pennekennakami

iti di agbalbaliw nga ayatmo,

tapno agkanta ken naragsakkami

iti unos ti panagbiagmi.

15 Ikkannakami ita iti adu

a ragsak, a kas iti adu a ladingit nga inyegmo,

bayat dagiti tawen a panagsagabami.

16 Ipakitam kadi kadakami nga

adipenmo dagiti nakaskasdaaw nga aramidmo.

Ipakitam met kadagiti kaputotanmi ti nadayag a pannakabalinmo.

17 Bendisionannakami kadi,

O Apo a Diosmi.

Pagballigiennakam iti amin nga aramidmi!