Category: Dungdung-aw

Dagiti Ladingit a Linak-am ti Jerusalem

1 Naglidayenti kasasaad ti Jerusalem!

Adu idi ti taona ngem ita nabaybay-anen.

Raraemen idi ti lubong, ngem ita kasla maysan a balo.

Katan-okan idi kadagiti siudad ngem nagbalin a tagabu.

2 Agpatpatnag nga agsangsangit, agar-arubos dagiti luana.

Kadagiti nangay-ayat kenkuana, awanen natda a mangliwliwa.

Liniputan dagiti gagayyemna, nagbalinda amin a kabusorna.

3 Awan gawayna a tagabu dagiti tattao ti Juda.

Napilitda a naitalaw kadagiti pagtaenganda.

Agnaeddan iti sabali a dagdaga.

Ket awan ti disso a mabalinda a kuna a kukuada.

Linawlaw ida dagiti kabusorda ket awan ti paglisianda.

4 No dumteng dagiti nasantoan nga aldaw,

Awanen ti umay iti Templo nga agdaydayaw.

Agsagsagaba dagiti babbai a para-kanta sadiay,

Awanen ti maaramid dagiti papadi no di agsennaay.

Kadagiti ruangan ti siudad awanen tattao.

Ket agsagsagaba ti Sion iti napalalo.

5 Nagballigi dagiti kabusorna,

Adda ti Jerusalem iti pannakabalinda.

Pinagsagaba ni Yahweh gapu kadagiti adu a basolna.

Uray dagiti annakna natiliwda ket naipanawda.

6 Napukawen ti kinadayag ti Jerusalem.

Ugsa nga agtartaray ti kayarigan dagiti pangulona.

Itartarayanda dagiti mangan-anup kadakuada.

Awanen kanenda ken dida makainana ket maibusen ti pigsada.

7 Nadadaelen ti Jerusalem ket itan agmaymaysa.

Malagipna ti napukaw a kinapintasna.

Idi parmeken dagiti kabusor, awan timmulong kenkuana.

Kinatkatawaan dagiti kabusor ti pannakatnagna.

8 Napukawen ti dayawna, lamolamo ken lalaisenda.

Agasug ket sibabain a mangilemmeng iti rupana.

Tinulawanna ti bagina gaput’ nadagsen a basolna.

9 Nalaka idi a makita ti kinarugitna.

Ngem dina inkankano ti pagbanaganna.

Nakaal-alliaw ti pannakaparmekna, awan makaliwliwa kenkuana.

Nagballigi dagiti kabusorna,

ket agdawat ken ni Yahweh iti panangngaasina.

10 Sinamsam ti kabusor ti amin a gamengna.

Nakitana ti iseserrekda iti mismo a Templo,

ti lugar nga iparit ni Yahweh a serken dagiti Hentil.

11 Agasug dagiti tattaona nga agsapsapul iti kanenda.

Isukatda dagiti gamengda iti taraon tapno agbiagda.

“Kitaennak, OApo,” isangit ti siudad.

“Kitaennak nga agsagsagaba.”

12 “Kitaendak!” ipukkawna iti amin a lumabas.

“Dinusanak tiApoiti aldaw ti pungtotna.

Awan pakayaspingan ti ladingitko nga impalak-amna.

13 “Intinnagna ti apuy a gimmil-ayab iti unegko.

Impakatna ti silo a nangitublak kaniak.

Kalpasanna, binaybay-annak ket kanayon a matutuokak.

14 “Nakita ti Apo dagiti basolko, pinagtitiponna ida.

Inyukkorna iti tengngedko ket kimmapuyak gapu iti dagsenda.

Inyawatnak kadagiti kabusorko, awan gawayko kadakuada.

15 “Amin a kapigsaan a soldadok kinatawaan tiApo.

Nangibaon iti armada a mangdadael kadagiti agtutubo.

Imbaddebaddekna dagiti tattaok, kasda la ubas

nga ipayatpayatna iti pagpespesan ti arak.

16 “Isut’ gapuna nga agar-arubos dagiti luluak.

Awan makaliwliwa ken makaparegta kaniak.

Pinarmeknakami ti kabusor;

awanen natda a sanikua dagiti tattaok.

17 “Nagpatulongak ngem awan ti tumulong kaniak.

Nangayab tiApokadagiti kabusor tapno lawlawendak.

Narugit a nisnis ti nangibilanganda kaniak.

18 “Nagsukirak ngem nalinteg ti inaramid tiApo.

Denggendak, tattao iti amin a disso, kitaenyo ti panagtutuokko.

Naitalaw a kas balud dagiti annakko nga agtutubo.

19 “Inayabak dagiti kaduak ngem didak kayat a tulongan.

Natay dagiti papadi ken agtuturay kadagiti kalsada

iti panagbirbirokda iti taraon a pagbiagda.

20 “Kitaem, OApo, ti panagsagabak, iti panagtuok ti kararuak!

Madudog ti pusok iti ladingit gapu kadagiti basbasolko.

Iti kalsada, adda panagdung-aw gapu iti kampilan;

iti uneg dagiti balay, adda met panagpapatay.

21 “Denggemdagiti asugko, awan mangliwliwa kaniak.

Maragsakan dagiti kabusorko gapu iti indissuormo a didigra.

Yegmoti aldaw nga inkarim;

pagsagabaem dagiti kabusorko a kas iti bukodko a panagsagaba.

22 “Ukomem ida gapu kadagiti amin a kinadakesda.

Dusaem ida a kas iti panangdusam kaniak gapu kadagiti basolko.

Nasaem toy pusok, agasugak iti panagtutuokko.”

Ti Panangdusa ti Apo iti Jerusalem

1 Pinagsipnget ti Apo ti Sion gapu iti pungtotna.

Pinagbalinna a rebrebba

ti nailangitan a dayagna.

Iti aldaw ti pungtotna, binaybay-anna uray pay ti pagbatayan dagiti sakana.

2 Dinadael ti Apo amin nga il-ili ti Juda,

dina kinaasian ti uray maysa kadakuada.

Rinakrakna dagiti sarikedked

a nangsalaknib iti daga.

Inyegna ti pannakaibabain

ti pagarian ken dagiti ofisialesna.

3 Winarawarana ti bileg ti Israel gapu iti pungtotna.

Dina kayat ti tumulong kadatayo idi dumteng dagiti kabusor.

Kasla apuy a nagdissuor kadatayo ket dinadaelna amin ket nagbalinda a dapu.

4 Mayarig tiApoiti kabusor

a nangipaturong kadagiti panana kadatayo.

Pinapatayna dagiti amin

a pagtangtangsit ken pagragsakantayo.

Ditoy Jerusalem, nariknatayo ti gumilgil-ayab a pungtotna.

5 Kasla maysa a kabusor ti Apo a nangdadael iti Israel.

Dinadaelna dagiti sarikedked ken dagiti palasiona.

Inyegna ti di agpatingga a ladingit kadagiti tattao ti Juda.

6 Binurakburakna ti Templo

a nagdaydayawantayo kenkuana.

Ginibusan ni Yahweh dagiti aldaw a nasantoan ken Aldaw a Panaginana.

Agpada ti ari ken padi a nakarikna

ti bileg ti pungtotna.

7 Linaksid ti Apo ti altarna ket pinanawanna ti nasantoan a Templona.

Pinalubosanna ti kabusor

a mangrebba kadagiti bakudna.

Nagpupukkawda iti panagballigida

iti disso a nagdaydayawantay a siraragsak.

8 Inkeddengen tiApoa marpuog dagiti bakud ti Sion.

Rinukodna ida tapno awan duadua ti pannakadadaelda.

Agpapadan a narpuog dagiti pagwanawanan ken bakud.

9 Nagaburan dagiti ruangan;

natukkotukkol dagiti balunetda.

Napagtalaw a kas balud ti ari agraman dagiti ofisialesna.

Saanen a maisuro ti Linteg;

awanen ti parmata dagiti profeta nga aggapu ken ni Yahweh.

10 Naulimek dagiti lallakay iti Jerusalem.

Agtutugawda iti daga.

Tapoktapok dagiti uloda

ket nakersang a lupot ti kawesda.

Nakadumog dagiti babbalasitang ket mulmulenglenganda ti daga.

11 Limtegen dagiti matak iti kasasangit;

mariribuk ti kararuak.

Napakapsutanak iti ladingit

gapu iti pannakadadael dagiti kailiak.

Matalimudaw dagiti ubbing ken maladaga

kadagiti kalsada iti siudad.

12 Umasugda kadagiti innada

gapu iti bisin ken wawda.

Mapasagda kadagiti kalsada

a kasda la nasugatan.

Main-inutda a matay

iti saklot dagiti innada.

13 O Jerusalem, siudad nga ipatpategko,

ania ti maibagak?

Kasano ti panangliwliwak kenka?

Awan pay ti nagsagaba iti kastoy.

Di matukod a kas iti taaw ti pannakadidigram;

awan ti namnama a maimbaganka.

14 Pasig nga ulbod ti imbagbaga dagiti profetam;

naallilawka kadagiti inkaskasabada;

pulos a dida imbutaktak ti basolmo.

Inyaw-awandaka ket impagarupmo

a saanen a nasken nga agbabawika.

15 Iti dalan a lumabas iti siudad,

iwitwitiwit dagiti tattao ti im-imada

a mangipakita iti pananglaisda.

Agwingiwingda ket katawaanda

ti narba a Jerusalem.

Kastoy ti ikatawada,

“Daytoy kadi ti kunada a napintas a siudad?

Daytoy kadi ti pagtangtangsit ti lubong?”

16 Laisendaka dagiti amin a kabusormo,

napnoanda iti gura a mangmulagat kenka.

Aglibbi ken guy-guyabandaka a kunada,

“Dinadaelmin ti siudad!

Daytoy ti tiempo nga inur-uraymi ket itan nakitami.”

17 Iti kamaudianna, inaramid tiApoti impangtana:

awan asina a nangdadael kadatayo,

kas imballaagna idi un-unana.

Pinagballigina dagiti kabusortayo,

pinagragsakna ida gapu iti pannakaparmektayo.

18 O Jerusalem, bay-am dagiti bakudmo nga umasug iti Apo.

Palubosam nga agayus dagiti luam

a kas karayan iti aldaw ken rabii.

Bannogem dayta bagim

iti panagsangsangit ken panagladladingit.

19 Bumangonka nga umidda iti rabii,

ket umasugka iti Apo.

Yebkasmo ti adda dita pusom,

ket dawatem a kaasianna dagiti annakmo—

dagiti annakmo a matmatay iti bisin

iti amin a nagsulian ti kalsada.

20 Kitaem, OApo, kitaem dagiti parparigatem!

Rumbeng kadi a sidaen dagiti inna

dagiti annak nga inay-ayatda?

Rumbeng kadi a mapapatay dagiti papadi ken profeta

iti uneg ti santuariom?

21 Kadagiti kalsada, agkaiwara’t bangbangkay

dagiti ubbing ken nataengan,

dagiti agtutubo a babbai ken lallaki,

isuda a napapatay iti kampilan.

Awan asim a nangpapatay kadakuada

iti aldaw ti pungtotmo.

22 Inawismo dagiti kabusorko

a mangaramid iti nakabutbuteng

a panagrarambak iti likmutko.

Awan ti makalibas uray maysa iti dayta aldaw ti pungtotmo.

Pinapatayda dagiti annakko

a pinadakkel ken inay-ayatko.

Pannakadusa, Panagbabawi ken Panangnamnama

1 Napadasak ken ammok ti rikna ti tao a dusaen ti Dios.

2 Inturongnak iti kasipngetan.

3 Awan asina a nangkabkabil kaniak.

4 Dinerderna dagiti lasagko,

ket tinukko-tukkolna dagiti tulangko.

5 Impupoknak iti pagbaludan

ti nakaro a rigat ken tuok.

6 Pinilitnak nga agnaed

iti agnanayon a sipnget ni patay.

7 Impupoknak a sikakawar,

awan pagruaran ti bakud a binangonna iti likmutko.

8 Umkisak a dumawat iti tulong,

ngem dinak ipangag ti Dios.

9 Binangenanna iti bato ti dalanko,

pinagbalinna dagiti danak a killo-killo.

10 Arigna iti oso a nangpadpadaan kaniak,

kasla leon a nangtukma kaniak.

11 Kinamatkamatnak iti kalsada agingga a simmiasiak;

tiniliwnak a rinangrangkay sanak binaybay-an.

12 Insaganana ti bai

ket siak ti nangituronganna kadagiti panana.

13 Simmalput iti pusok dagiti imbiatna a pana.

14 Agmalmalem a katkatawaandak dagiti tattao;

siak ti sarsaritaenda iti panaggaangawda.

15 Awan intedna kaniak a taraon ken inumen

no di pasig a panagsagaba a nasaem.

16 Indumdumodumnak iti daga,

intimtim-ognak kadagiti bato

agingga a napusi dagiti ngipenko.

17 Nalipatakon ti rikna ti nasalun-at,

ti addaan talna ken ragsak.

18 Awanen ti dayagko,

napukawen ti namnamak itiApo.

19 Lagipem ti tuok ken panagalla-allak,

ti sabidong ken ti apro nga impalak-ammo.

20 Kanayon a lagipek ket mautoyanak.

21 Nupay kasta, tumaud ti namnamak

no malagipko daytoy:

22 Saan nga agpatingga ti ayat ni Yahweh,

agnanayon ti panangngaasina.

23 Mapabaroda iti tunggal bigat.

Ania ketdin a kinamatalekmo.

24 Ti laengApoti adda kaniak;

ngarud, isu ti pangitalkak iti namnamak.

25 Naimbag tiApokadagiti agbirok kenkuana.

26 Ngarud, nasayaat unay ti aguray a siaanus—

aguraytay iti panangisalakanna.

27 Nasayaat a sursuroen ti maysa a tao

ti panaganus bayat ti kinaagtutubona.

28 No agsagabatayo, masapul nga agmaymaysatayo,

ket aganustayo a siuulimek.

29 Saantayo koma nga agreklamo

ta mabalin nga adda pay la namnama.

30 Uray no maparigat ken mapabainantayo

awatenyo ti amin a mapagtengtayo.

31 Manangngaasi unay ti Apo;

saan nga agnanayon a laksidennatayo.

32 Nalabit a pagladingitennatayo

ngem nabileg, di agbalbaliw ti ayatna kadatayo.

33 Dina pagragsakan ti panangpaldaang

wenno panangparigatna kadatayo.

34 Ammo ti Apo no napukaw ti namnamatayo

iti uneg ti pagbaludan.

35 Ammona no saan a maited ti kalintegantayo

nga intedna kadatayo.

36 Ammona no maballikug ti hustisia iti pangukoman.

37 Ti la pagayatan ti Apo ti kanayon a matungpal.

38 Agpada a tumaud ti naimbag ken dakes iti panagbilinna.

39 Apay nga agreklamotayo no madusatayo

gapu kadagiti basoltayo?

40 Sukimatentayo ti wagas ken dalantayo

ket agsublitayo itiApo.

41 Luktantayo ti pusotayo iti Dios sadi langit

ket ikararagtayo:

42 “Nagbasol ken nagsukirkami kenka, OApo,

ket dinakami pay pinakawan agpapan ita.

43 “Kinamat ken pinapataynakami;

awanen ti asim gapu iti pungtotmo.

44 Napuskol nga ulep ti pungtotmo

ket saan a malasat ti kararagmi.

45 Pinagbalinnakami a pagbasuraan ti lubong.

46 “Lalaisen ken pabpabainandakami ti amin a kabusormi.

47 Nagpasaranmi ti didigra ken pannakadadael

napeggad ken nakabutbuteng ti panagbiagmi.

48 Kasla karayan nga agayus ti luluak

gapu iti pannakadadael dagiti tattaok.

49 “Di agsarday ti panagarubos ti luluak

50 agingga a tumannawag tiApoket imatangannatayo.

51 Maladingitanak no makitak ti napasamak

kadagiti babbai iti siudad.

52 “Mayarigak iti billit a siniloan dagiti kabusor—

isuda nga awan panggapuanda a gumura kaniak.

53 Inggarangugongdak iti nasipnget nga abut

sada sinerraan iti bato.

54 Rinugian ti danum ti manglapunos kaniak,

impagarupko a dimtengen ti kanibusanak.

55 “Manipud iti abut, immawagak kenka, OApo;

56 impangagnak idi nagpakpakaasiak a denggennak.

57 Sinungbatannak ket imbagam nga awan pagbutngak.

58 “O Apo, tinulongannak ket inispalnak.

59 Paborannak iti pangngeddengmo;

ammom dagiti dakes nga inaramidda kaniak.

60 Ammom ti pananggura kaniak dagiti kabusorko

ken ti panangisikatda iti biagko.

61 “Nangngegmo, OApo, nga imbabaindak.

Ammom amin a gandatda a mangpatay kaniak.

62 Agmalmalem a sarsaritaen ken isiksikatdak.

63 Manipud bigat agingga iti rabii a pagang-angawandak.

64 “Dusaem ida, OApo, gapu iti inaramidda;

65 ilunodmo ida ket pukawem ti namnamada!

66 Kamatem ida ket ikisapmo ida iti rabaw ti daga!”

Ti Jerusalem Kalpasan ti Pannakatnagna

1 Napukawen ti rimat ti nasudi a balitokmi!

Agkaiwara iti kalsada dagiti bato ti Templo.

2 Idi, napateg a kas balitok kadakami

dagiti agtutubo a lallaki ti Sion;

ita, maibilangdan a gagangay a banga.

3 Uray ti lobo, pasusoenna dagiti urbonna.

Ngem mayarig dagiti tattaok kadagiti abestrus

a naranggas kadagiti annakda.

4 Bay-anda dagiti maladagada a matay iti bisin ken waw.

Dumawat dagiti ubbing iti kanenda,

ket awan ti mangted kadakuada.

5 Matmatay iti bisin kadagiti kalsada

dagiti tattao a naimas idi ti taraonna.

Dagiti dimmakkel iti nanam-ay a panagbiag

agsuksukainda iti basura nga agbirok iti kanenda.

6 Nadagdagsenti pannakadusa dagiti tattaok

ngem dagiti agnaed iti Sodoma

a kellaat a pinukaw ti Dios.

7 Saan a natulawan dagiti prinsipemi;

awan rugitda a kas iti niebe.

Nakired ken napigsada

ket nabusnag ken nasalun-atda.

8 Ita, gapu iti limmitemen a rupada,

awanen makabigbig kadakuada kadagiti kalsada.

Wen, natayda ket limmitemen ti rupada.

Nagango a kas kayo ti kudilda

a kimmayetket iti tultulangda.

9 Nagasgasat dagiti natay iti gubat

ngem dagiti naud-udi a pimmusay

a nain-inut a natay iti bisinda

ta awan ti taraon a pagbiagda.

10 Nakabutbutenga buya ti inyeg ti didigra

a nagdissuor kadagiti tattaok.

Linuto dagiti naayat nga inna

dagiti mismo nga annakda tapno adda kanenda.

11 Binulosan ni Yahweh ti naan-anay a pungtotna;

pinuoranna ti Sion agingga a dimmapu iti daga.

12 Awan ti mamati,

uray pay dagiti agtuturay

kadagiti ganggannaet a nasion, nga adda makastrek

kadagiti ruangan ti Jerusalem.

13 Ngem kasta ti napasamak!

Nagbasol dagiti papadi ken profetana

ket inyegda ti ipapatay dagiti awan basolna.

14 Adda dagiti pangulona kadagiti kalsada;

kasda la bulsek nga agalla-alla.

Kasta unay ti pannakadaripespesda iti dara

ket maariek dagiti tattao a mangsagid kadakuada.

15 “Umadayokayo!” ipukkaw dagiti tattao.

“Natulawankayo! Didakam sagsagiden.”

Nagalla-allada ngarud kadagiti pagilian;

awan a pulos ti nangpasangbay kadakuada.

16 Awan pangaramatan kadakuada tiApo;

isu met la ti nangwarawara kadakuada.

Dina binigbig dagiti papadi ken papangulomi.

17 Nagsapulkam iti tulong ngem awan nasarakanmi

agingga a naumakami.

Inur-uraymi ti tulong ti maysa a nasion

nga awan ti maitedna kadakami.

18 Sipsiputannakami ti kabusor;

dikam makapagna uray pay kadagiti kalsada.

Naggibusen dagiti aldawmi, dimtengen ti kanibusananmi.

19 Naparpardas ngem ti sippayot ti agila

ti panangkamatda kadakami.

Inanupdakami kadagiti katurturodan,

sinanebdakami iti let-ang.

20 Tiniliwda ti gubbuayan ti biagmi,

ti ari a pinili ni Yahweh,

ti ari a nagtalkanmi a mangikanawa kadakami

iti amin a rumaut iti sakupmi.

21 Agkatawakayo latta, tattao ti Edom ken Uz;

agragsakkayo ita ta adda pay panawenyo.

Umayto met ti pannakadidigrayo.

Agbasingbasingkayonto iti bartekyo.

Maibabain gapu ta lamolamokayo.

22 Nalpasen a nadusa ti Sion gapu kadagiti basolna;

wayawayaannatayon tiApoiti pannakaibaludtayo iti sabali a daga.

Ngem dusaennakayto tiApo, dakayo nga Edomita.

Ibutaktaknanto dagiti basbasolyo!

Kararag a Pagdawat iti Kaasi

1 Lagipem, OApo, ti napasamak kadakami;

talliawennakami ket kitaem ti pannakaibabainmi.

2 Innala dagiti ganggannaet ti sanikuami,

ganggannaet ti agnanaeden iti taengmi.

3 Pinapatay ti kabusor dagiti ammami,

ket nabalon dagiti innami.

4 Masapul a bayadanmi ti danum nga inumenmi,

masapul a gatangenmi ti kayo a pagsungrodmi.

5 Kaskami la asno wenno kamelio a maparparigat,

nabannogkamin ngem maiparit nga aginanakami.

6 Tapno makaalakami iti makaanay a taraon a pagbiagmi,

napankam idiay Egipto ken Asiria a nagdawatanmi.

7 Nagbasol dagidi kapuonanmi ket ita awandan,

ngem dakami ti agsagaba kadagiti basolda.

8 Dagiti tagabu ti mangituray kadakami,

awan ti makaispal kadakami iti imada.

9 Agdakdakiwas dagiti mammapatay kadagiti away;

no agsapulkami iti taraonmi, ipustami ti biagmi.

10 Uraykami la aggurigor iti bisinmi,

makasinit a kas iti urno ti kudilmi.

11 Mismo nga iti Bantay Sion ti nakaramesan dagiti assawami;

iti tunggal away ti Juda, pinilitda dagiti annakmi a babbai.

12 Tiniliw ken binitayda dagiti pangulomi,

saanda a rinaem dagiti panglakayenmi.

13 Mapilit nga aggiling a kas tagabu dagiti agtutubo,

makusbo dagiti ubbing a lallaki iti dagsen ti awitda a kayo.

14 Saanen a dumar-ay dagiti panglakayen iti taripnongda,

dagiti agtutubo saanen a mangngeg ti panagtokarda.

15 Napukawen ti ragsak ti panagbiagmi,

ladingit ti naisukat iti panagsasalami.

16 Awanen ti nabati iti amin a pagtangtangsitmi,

nagbasolkami ket ita, agsagsagabakami.

17 Nadagsen dagiti barukongmi,

nakudrep ti panagkitami gapu iti kasasangitmi.

18 Ngamin, napanawanen ti Bantay Sion,

awanen matagtagitao.

Agdakdakiwas sadiay dagiti atap nga aso.

19 Ngem sika, OApo, arika iti agnanayon.

Agturayka iti agnanayon nga awan inggana.

20 Apay a binaybay-annakami iti nabayag?

Malagipnakaminto ngata pay laeng?

21 Isublinakami kenka, OApo! Isublinakami!

Isublim kadi daydi sigud a dayagmi.

22 Wenno linaksidnakami kadin a namimpinsan?

Ti pungtotmo saan kadin a mabaawan?