Category: Eclesiastes

Awan Serserbi ti Biag

1 Daytoy dagiti sao ti Mannursuro, ti anak ni David a nagari idiay Jerusalem.

2 Awan serserbi ti amin a banag. Awan serserbida, kinuna ti Mannursuro. Awan serserbi ti biag; wen, awan amin serserbina.

3 Iti unos ti panagbiagmo, agtrabaho ken agbannogka ngem ania ti pakakitaan iti amin nga aramidmo?

4 Tumaud ken lumabas dagiti kaputotan ngem agtalinaed ti daga nga awan pagbaliwanna.

5 Lumgak ken lumnek pay laeng ti init; agsubli iti naggapuanna ket masapul a mangrugi manen.

6 Agpa-abagatan ti angin, agpa-amianan—agrikusrikos sa agsubli manen.

7 Agturong iti taaw ti amin a karayan, ngem saan a mapno ti taaw. Agsubli ti danum iti pangrugian dagiti karayan ket mangrugi manen.

8 Agtungpal iti pannakautoy ti amin a banag ket narigat a sapulen dagiti balikas a mangyebkas iti daytoy. Saan a mapnek ti matatayo kadagiti makitana; saan met a mapnek ti lapayag kadagiti mangngegna.

9 Maulit-ulit laeng dagiti pasamak. Ti naaramid idin, maaramidto manen. Awan ti baro a banag iti entero a lubong.

10 Awan ti makapagkuna nga adda baro a banag. Awan! Ngem napasamak amin daytoy idi adayo pay a mayanaktayo.

11 Awan ti makalagip iti napasamak iti napalabas. Kadagiti aldaw a mapasungad awanto ti makalagip kadagiti mapasamak ita ken iti masakbayan.

Dagiti Padas ti Mannursuro

12 Siak ti Mannursuro a nangituray iti Israel manipud iti Jerusalem.

13 Inkeddengko nga usigen ken adalen dagiti amin a mapaspasamak ditoy lubong.

Intuding kadatayo ti Dios ti nasaem a kinadaksanggasat.

14 Naimatangak ti amin a napasamak iti daytoy a lubong, ket nasarakak nga awan kapaypay-anda; mayarig iti panangkamat iti angin.

15 Dimo malinteg ti killo. Dimo mabalin a bilangen ti awan.

16 Kinunakiti bagik, “Nagbalinak a naindaklan a tao. Nasirsiribak nga adayo ngem iti siasinoman a sinarunok iti trono ti Jerusalem. Ammok ti pudno a kaipapanan ti kinasirib ken pannakaammo.”

17 Inkeddengko nga adalen ti paggiddiatan ti pannakaammo ken kinamaag, kinasirib ken kinamauyong. Ngem natakuatak a kasko la kamkamaten ti angin.

18 Ad-adu ti pakariribukam no nasirsiribka; ad-adu met ti sagabaem no adu ti maammoam.

1 Inkeddengko a pagustoak ti bagik ket ammoek no ania ti ragsak. Ngem natakuatak nga uray daytoy awan serserbina.

2 Nasarakak a kinamaag ti panagkatawa, ket awan imbag a maited kenka ti ragragsak.

3 Gapu iti tarigagayko a sumirib, napanunotko ti agragsak babaen iti arak ket aglinglingayak. Impagarupko a daytoy ti kasayaatan nga aramiden dagiti tattao bayat ti ababa a panagbiagda ditoy daga.

4 Naindaklandagiti nagapuanak. Nangbangonak kadagiti balbalay nga agpaay kaniak ket nagmulaak iti ubas.

5 Minulaak dagiti hardin ken minuyongan iti amin a kita ti agbunga a kayo.

6 Nagkaliak kadagiti bubon a pangpadanumko kadakuada.

7 Adua tagabu ti ginatangko ket adda dagiti tagabu a nayanak iti balayko. Ad-adu ti pangen ken arbanko ngem ti siasinoman a nagnaed iti Jerusalem.

8 Nagurnongakmet iti pirak ken balitok a naggapu kadagiti pagiduldulinan ti gameng dagiti daga nga inturayak. Adu dagiti kumakanta a lallaki ken babbai a manglinglingay kaniak. Adda amin kaniak dagiti babbai a tarigagayan ti maysa a lalaki.

9 Wen,natan-okak; natantan-okak ngem ti uray siasinoman a nagnaed iti Jerusalem. Pulos a dinak pinaay ti kinasiribko.

10 Nagun-odko amin a tinarigagayak. Inaramidko ti amin a kinaykayatko a pagragsakan. Wen, impannakkelko amin nga inaramidko ket daytoy ti gunggonak.

11 Ngem idi ammirisek ti amin nga inaramidko ken no kasano ti rigatko a nagtrabaho, nabigbigko nga awan kaipapanan dagitoy. Mayarig iti panangkamkamat iti angin—awan serserbina.

12 Ania pay koma ti mabalin nga aramiden ti maysa nga ari no di ti inar-aramid dagiti sinarunona a nagturay?

Iti kasta, inrugik nga inutob ti kaipapanan ti agbalin a masirib, darasudos wenno maag.

13 Ammok met ketdi a nasaysayaat ti kinasirib ngem ti kinamaag a kas iti lawag a nasaysayaat ngem iti sipnget.

14 Ammo dagiti masirib ti pagturonganda, ngem dagiti maag saanda nga ammo ti pagbanaganda. Ngem ammok met a maymaysa ti pagtungpalantayo amin.

15 Kinunak iti bagik, “Mapasamak met kaniak ti mapasamak kadagiti maag. Ania ngarud ti serserbi ti kinasiribko?” “Awan,” insungbatko. “Pulos nga awan.”

16 Awan ti makalagip kadagiti masirib ken awan met ti makalagip kadagiti maag. Kadagiti umay nga aldaw, malipatandatayto. Masapul a mataytay amin, maag man wenno masirib.

17 Ngarud, imbilangko nga awan serbi ti biag kaniak, agsipud ta awan sabali nga inyegna no di laeng panagsagaba. Awan serserbina ti amin; kinamkamatko ti angin.

18 Awan ti kaipapanan kaniak ti amin nga inaramidko ken nagbambannogak agsipud ta ammok nga ibatikto iti sumukat kaniak.

19 Nalabit a masirib wenno maag ti sumukat—siasino ti makaammo? Uray kasta, kukuananto amin a nagbambannogak, amin a nateggedak ditoy lubong gapu iti kinasiribko. Awan ti serserbina daytoy.

20 Ngarud, pagbabawiak dagiti amin a nagbannogak.

21 Aramidem ti maysa a banag iti amin a kinasirib, pannakaammo ken kinalaingmo ngem kalpasanna, ibatimto a tawiden ti tao a di nagbannog. Awan serserbina daytoy ket saan a nainkalintegan!

22 Ania ti magunggona ti tao iti amin nga aramidna, pagbannogan ken panagagawana iti daytoy a lubong?

23 Aminnga aramidenna iti unos ti panagbiagna awan ti magunggonana no di saem ken ladingit. Uray iti rabii, saan nga agtalna ti panunotmo. Awan serserbina amin daytoy.

24 Awanenti nasaysayaat nga aramiden ti maysa a tao no di mangan ken uminum ket nanamenna ti nagbambannoganna. Uray daytoy, nabigbigko nga agtaud iti Dios.

25 No awan ti Dios, kasano a maaddaanka iti taraon wenno mabalinmo ti agragsak?

26 Ikkanti Dios iti sirib, ammo ken ragsak dagiti kaay-ayona, ngem pagtrabahoenna dagiti managbasol; mangged ken agsalimetmetda tapno maited ti matgedanda kadagiti kaay-ayona. Awan serserbina amin. Mayarig iti panangkamat iti angin.

Adda Tiempo ti Amin a Banag

1 Adda tiempo nga ituding ti Dios a pannakapasamak ti amin a banag ditoy lubong.

2 Itudingna ti tiempo ti pannakayanak ken tiempo ti pannakatay;

tiempo ti panagmula ken tiempo ti panagparut;

3 tiempo ti panagpapatay ken tiempo ti panagagas;

tiempo ti panagrebba ken tiempo ti panagbangon.

4 Itudingna ti tiempo ti panagladingit ken tiempo ti panagragsak;

tiempo ti panagdung-aw ken tiempo ti panagsala;

5 tiempo ti panagurnong iti bato ken tiempo ti panagiwara,

tiempo ti panaginnarakup ken tiempo ti panaginnadayo.

6 Itudingna ti tiempo ti panagbirok ken tiempo ti panagpukaw;

tiempo ti panagidulin ken tiempo ti panagibelleng;

7 tiempo ti panagrakrak ken tiempo ti panagtarimaan;

tiempo ti panagulimek ken tiempo ti panagsao.

8 Ikeddengna ti tiempo ti ayat ken tiempo ti gura;

tiempo ti gubat ken tiempo ti kappia.

9 Ania ti magun-od ti tao iti amin nga aramidna?

10 Ammok ti gasat nga insaad ti Dios a maipaay kadatayo.

11 Intudingna ti tumutop a tiempo a maipaay iti amin a banag. Inikkannatayo iti tarigagay a mangammo iti masakbayan, ngem pulos a dinatay ikkan iti pannakapnek a mangawat iti naan-anay a kaipapanan dagiti aramidna.

12 Iti kasta, naamirisko nga awanen ti naim-imbag nga aramiden ti tao no di agragsak ken aramidenna ti amin a kabaelanna bayat ti panagbiagna.

13 Masapul a mangan ken uminumtayo amin ket lak-amentayo ti nagbannogantayo ta sagut ti Dios dagitoy.

14 Ammok a mataginayon ti amin nga aramiden ti Dios. Dimo mabalin a nayonan wenno kissayan. Ket aramiden amin ti Dios daytoy tapno agbuteng dagiti tattao kenkuana.

15 Napasamak idin ti aniaman a mapasamak wenno mabalin a mapasamak. Nakem ti Dios a maulit-ulit ti pannakapasamak ti maysa a banag.

Ti Kinaawan Hustisia ditoy Lubong

16 Saan la a daytoy. Nadlawko pay nga iti daytoy a lubong, masarakam ti kinadakes iti lugar a rumbeng nga adda hustisia ken kinalinteg.

17 Kinunak iti bagik, “Agpadpada nga ukomen ti Dios ti nalinteg ken ti managbasol, agsipud ta naituding ti tiempo a maipaay iti amin a pasamak ken iti amin nga aramid.”

18 Kinunak pay a susuotennatayo ti Dios tapno ipakitana kadatayo nga awan ti nakaidumaantayo kadagiti animal.

19 Ngamin, agpada ti pagtungpalan dagiti tattao ken dagiti animal. Matayda nga agpadpada. Agpadada a kita ti parsua. Awan pangatiwan ti tao iti animal ta awan ti kaipapanan ti biag kadakuada.

20 Agturong ti amin iti maymaysa a lugar. Nagtaudda iti tapok ket agbalindanto met la a tapok.

21 Kasano nga adda makaammo nga agpangato ti espiritu ti tao ket agpababa ti espiritu ti animal?

22 Naamirisko ngarud nga awanen ti naim-imbag nga aramiden ti tao no di ti pananglak-amna iti bunga ti nagbannoganna ket agragsak. Awanen ti sabali a mabalinna nga aramiden. Kalpasan ti ipapatayna, awanton ti pakaammoanna no anianto ti mapasamak.

1 Makitak manen dagiti amin a pannakairurumen a maar-aramid ditoy lubong. Agsasangit dagiti mailupitlupit ket awan ti tumulong kadakuada. Awan tumulong kadakuada gapu ta adda bileg kadagiti mangidadanes kadakuada.

2 Apalak dagiti natay ken pimmusayen; napimpintas ti kasasaadda ngem dagiti sibibiag pay.

3 Nupay kasta, nagasgasat pay ngem dagitoy dua ti di nayanak a di pay nakaimatang kadagiti dakes nga aramid iti daytoy a lubong.

4 Natakuatak met no apay nga igaed dagiti tattao ti agtrabaho tapno agballigida: gapu ta apalanda dagiti sanikua dagiti kaarrubada. Ngem awan ti serserbina. Mayarig iti panangkamkamat iti angin.

5 Kunada a maag ti maysa a tao no agdalikepkep ket baybay-anna ti bagina a mabisinan agingga a matay.

6 Mabalin a kasta, ngem nasaysayaat ti sangkabassit nga adda natalna a pakinakem ngem ti trabaho a trabaho a kasmo la kamkamaten ti angin.

7 Adda pay nadlawko a banag nga awan serserbina ditoy a biag.

8 Adtoy ti maysa a tao nga agbibiag a maymaysa. Awan anakna, awan kabsatna a lalaki, trabaho a trabaho, ngem saan a mapnek iti kinabaknangna. Siasino ti itartrabahoanna? Dina ikkan ti bagina iti gundawayna nga agragsak. Awan met serserbi daytoy ket maysa a nakalkaldaang a panagbiag.

9 Naim-imbag ti dua ngem ti maymaysa, agsipud ta no duada nasaysayaat ti trabahoda.

10 No matuang ti maysa, mabalin a bataken ti kaduana. Ngem no agmaymaysa ti tao ket matuang, daksanggasat laeng ta awan tumulong kenkuana.

11 No nalam-ek, mabalin a maturog nga agkaidda ti dua a tao ket mapapudot ti tunggal maysa, ngem kasano a pumudotka no maymaysaka?

12 Mabalin a parmeken ti dua a tao dagiti mangraut kadakuada, ngem no maymaysaka awan ti gawaymo. Narigat a pugsaten ti tinallo a tali.

13-14 Nalabit nga agbalin nga ari ti maysa a napanglaw wenno maisaad iti trono ti maysa a naggapu iti pagbaludan, ngem inton lumakay, no maag la unay a dina kayat ti pabagbagaan, saan a nasaysayaat ngem ti agtutubo a napanglaw ngem masirib.

15 Pinampanunotko ti maipapan iti amin a tattao ditoy lubong, ket nabigbigko nga adda latta agtutubo a mangalanto iti lugar ti ari.

16 Nalabit a saan a sumardeng ti panagadu dagiti tattao nga iturayan ti maysa nga ari; inton pumusayen, awanto ti agyaman iti gapuananna. Awan serserbina. Mayarig iti panangkamkamat iti angin.

1 Agannadka no mapanka iti balay ti Dios. Inka sadiay tapno agsursuroka. Nasaysayaat dayta ngem ti agidatonka iti sakrifisio a kas kadagiti maag a di makailasin iti naimbag ken dakes.

2 Panunotem nga umuna ti isaom ket dika agdarasudos nga agkari iti Dios. Adda ti Dios sadi langit ket addaka ditoy daga; isut’ gapuna a dimo lablabsen ti panagsaom.

3 No adu ti pakaringgoram, ad-adda nga agtagtagainepka iti dakes. No adu ti saom, ad-adda a makaisaoka iti minamaag.

4 Ngarud,no adda ikarim iti Dios, dagdagusem a tungpalen. Saan a masapul ti Dios ti maysa a maag. Tungpalem ti inkarim nga aramiden.

5 Dika la agkarkarin no dimo met tungpalen.

6 Dimo ipalubos a dagiti bukodmo a sao ti pakaigapuan ti panagbasolmo. Saan a nasayaat nga ibagam iti imbaon ti Dios a nailaw-anka a nagkari. Apay a pagpungtotem ti Dios? Apay nga ikkam iti gundawayna a mangdadael iti amin a gapuanam?

7 Iti laksid ti amin a tagtagainepmo, amin nga awan serserbina a trabaho ken adu a sao, masapul nga agbutengka latta iti Dios.

Awan Serserbi ti Biag

8 Dika masdaaw no makitam nga idadanes ti gobierno dagiti napanglaw ket ipaidamna kadakuada ti hustisia ken dagiti kalinteganda. Salakniban ti tunggal agturay dagiti ofisiales iti babaenna; ket salakniban ida dagiti nangatngato nga agturay.

9 Uray ti maysa nga ari agpannuray iti apit.

10 No naagumka iti kuarta, awanto ti pannakapnekmo. No tarigagayam ti bumaknang, dimo maala amin a kayatmo. Awan serserbina.

11 No nabaknangka, ad-adu ti ngiwat a masapul a pakanem. Awan ti magunggonam no di laeng ti pannakaammom a nabaknangka.

12 Mabalin nga adda wenno saan nga umanay ti taraon ti trabahador, ngem naimas ti turogna iti agpatnag. Ngem saan a makaturog ti baknang gapu iti panangpampanunotna iti adu a sanikuana.

13 Adda nakitak a kinadakes ditoy lubong: Idulin dagiti tattao ti kuartada para iti tiempo a pannakasapulda;

14 kalpasanna, mapukaw dayta iti saan a nasayaat a pannakainegosiona ket awan ti mabati nga ipatawidda kadagiti annakda.

15 Awanintugottayo idi naipasngaytayo ditoy lubong ket awanto met maitugottayo inton mataytayo. Wen, lamolamotayonto a pumanaw nga awan maitugottayo kadagiti nagbannogantayo.

16 Saan a nainkalintegan! Pumanawtayo a kas iti isasangpettayo. Agtrabahotayo, kayattayo a tiliwen ti angin ket ania ti maganabtayo?

17 Agbiagtayo iti sipnget ken ladingit—mariribukan, makapungpungtot ket masaksakit.

18 Adtoy ti natakuatak: ti kasayaatan nga aramiden ti tao isut’ pannangan ken panaginum ket lak-amenna ti nagbannoganna bayat ti ababa a panagbiagna nga inted ti Dios. Daytoy ti gasat ti tao.

19 No paraburan ti Dios ti maysa a tao iti kinabaknang ken sanikua ket ipalubosna a lak-amenna dagitoy, rumbeng nga agyaman ket lak-amenna ti nagbannoganna. Sagut ti Dios daytoy.

20 Gapu ta impalubos ti Dios nga agragsak ti tao, saanna a pakadanagan ti kaababa ti panagbiagna.

1 Naimatangak iti daytoy a lubong ti maysa a kinadakes a bakbaklayen ti tao.

2 Paraburan ti Dios ti tao iti sanikua, kinabaknang ken dayaw. Itedna amin a tarigagayanna. Ngem dina ipalubos a lak-amenna dagitoy, ta sabali a tao ti aglak-am. Awan serserbina daytoy ket saan a nainkalintegan.

3 Uray no maaddaan ti tao iti sangagasut nga annak ken napaut ti panagbiagna, ngem awan met ti ragsakna, ken saan a nasayaat ti pannakaipumponna, kunak a naim-imbag ti kasasaad ti maysa a maladaga a natay a nayanak.

4 Saan a pagimbagan dayta a maladaga ti pannakaipasngayna. Agpukaw iti kasipngetan ket sadiay malipatan.

5 Dina makita ti lawag ti aldaw ket awan ammona maipapan iti biag. Ngem nasarakannan ti panaginana.

6 Nasaysayaat ngem ti tao a saan a naragsak uray no agbiag iti dua ribu a tawen. Total, maymaysa a lugar ti pagtungpalanda.

7 Aramiden ti maysa a tao ti amin a trabahona tapno adda laeng kanenna ngem awanto latta ti pannakapnekna.

8 Kasano a nasaysayaat ti kasasaad ti masirib ngem ti maag? Ania ti imbag a lak-amen ti napanglaw no ammona a sarangten ti biag?

9 Awan serserbina; mayarig iti panangkamat iti angin. Nasaysayaat a mapnekka iti adda kenka ngem ti kanayon nga agtarigagayka iti sabali a banag.

10 Nabayagen a naikeddeng ti amin a mapasamak ket ammotayo amin a di kabaelan ti maysa a taoti makisuppiat iti napigpigsa ngem isu.

11 No atiddog ti pannakisuppiatmo, ad-adda nga awan serbina. Awan imbag a maipaayna kenka.

12 Kasano ti pannakaammo ti siasinoman no ania ti kasayaatan a banag nga agpaay iti maysa a tao iti daytoy ababa, awan serserbina a biagna—biag nga agpukaw a kas iti anniniwan? Siasino ti makaibaga no ania ti mapasamak iti lubong kalpasan ti ipapatayna?

Pampanunot maipapan iti Biag

1 Naim-imbagti nasayaat ti pakasarsaritaanna ngem ti nangina a bangbanglo. Nasaysayaat met ti aldaw a pannakataymo ngem ti aldaw a pannakayanakmo.

2 Naim-imbag ti mapan iti balay nga adda agdudung-aw ngem ti mapan iti balay nga adda agrarambak agsipud ta masapul a laglagipen dagiti sibibiag nga ur-urayennatayo amin ni patay.

3 Naim-imbag ti ladingit ngem ti katawa. Nalabit a palidayenna ti rupam ngem patademenna ti pannakaawatmo.

4 Maag ti maysa a tao a kanayon a mangpampanunot iti maipapan iti ragsak. Maipapan iti patay ti pampanunoten ti masirib.

5 Naim-imbag ti panangtubngar ti masirib kenka ngem ti panangdayaw kenka dagiti maag.

6 Mayarig ti katawa dagiti maag iti panagrissik ti mapupuoran a siitsiitan a mula. Awan serserbi daytoy.

7 No agkusit ti masirib, minamaag ti aramidna. No umawatka iti pasuksok, madadael ti katataom.

8 Nasaysayaat ti panaggibus ti maysa a banag ngem ti panangrugina.

Naim-imbag ti anus ngem ti kinatangsit.

9 Tenglemti pungtotmo. Kinamaag ti panagipempen iti gura.

10 Dimo kunaen, “Apay a nasaysayaat nga adayo ti kasasaad idi un-unana?” Saan a nainsiriban daytoy a saludsod.

11 Masapul a masirib ti tunggal maysa nga agbiag. Naimbag a kas iti panangawat iti tawid

12 ket ikkannaka iti talged a kas iti ipaay ti kuarta. Daytoy ti pagimbagan ti addaan sirib—salaknibannaka.

13 Panunotem ti maipapan kadagiti inaramid ti Dios. Kasano a palintegem ti banag a kinillo ti Dios?

14 No sumayaat ti kasasaadmo, agragsakka ket no dumteng ti pakariribukan, laglagipem daytoy: agtaud iti Dios ti ragsak ken riribuk. Dimo ammo no ania ti sumaruno a mapasamak.

15 Awan mamaay ti panagbiagko, ngem iti daytoy, naimatangak ti amin. Mabalin a matay ti maysa a tao, ket at-atiddog ti biag ti sabali a tao uray no dakes.

16 Dimo labsen ti kinaimbag wenno kinasiribmo. Apay a patayem ti bagim?

17 Ngem dimo met palaloan ti agdakes wenno agmamaag. Apay a matayka a masapa?

18 Dika unay aglablabes. No agdayaw ken agbutengka iti Dios, agballigika met laeng.

19 Dakdakkel ti maited ti sirib iti maysa a tao ngem ti maited ti sangapulo a turayen iti maysa a siudad.

20 Awan nalinteg a tao ditoy daga a di agbiddut ken kanayon a naimbag ti aramidna.

21 Dimo ikaskaso ti amin a sawen dagiti tattao, amangan no mangngegmo ti adipenmo a mangilunlunod kenka,

22 ket sika a mismo, ammom nga ilunlunodmo met dagiti sabsabali.

23 Inaramatko ti kinasiribko a mangusig amin kadagitoy. Imbagak iti bagik a masapul a sumiribak ngem diak kabaelan.

24 Siasino ti makaibaga iti kaipapanan ti biag? Saan a matukod, narigat a maawatan.

25 Ngem impamaysak a gun-oden iti pannakaammo ken panagadal. Inkeddengko a biroken ti kinasirib ken dagiti sungbat dagiti saludsodko ken ammoen ti kinadakes ken kinamaag ti kinanengneng.

26 Nasarakak ti nabilbileg ken nasasaem ngem patay—maysa a babai. Kasla iket ti ayatna a mangsilo kenka, kasla kawar ti imana a mangkayetket kenka. Malisian ti nalinteg a tao daytoy a babai, ngem tiliwen ti babai ti managbasol.

27 Wen, kinuna ti Mannursuro, nain-inut a naammoak daytoy bayat ti panangsapsapulko kadagiti sungbat dagiti saludsodko.

28 Nagsapsapulak pay iti dadduma a sungbat ngem awan nasarakak. Nasarakak ti maysa a lalaki iti tunggal sangaribu a mabalinko a raemen ngem awan ti uray maysa a babai.

29 Daytoy la ti naadalko: nalinteg ti tao a pinarsua ti Dios, ngem ti tao ti mangparnuay iti adu a parikutna.

1 Ti la masirib ti makaammo iti pudno a kaipapanan ti maysa a banag. Ti kinasirib ti mangtignay kenkuana nga umisem ket pukawenna ti rupangetna.

Panagtulnog iti Ari

2 Tungpalem ti ibaga ti ari ket amirisem nga umuna ti ikarim iti Dios.

3 Maaramid ti ari ti amin a kayatna, isut’ gapuna a pumanawka iti sangoananna. Dika agyan iti kasta a napeggad a lugar.

4 Naturay ti ari ket awan ti makalapped iti aramidenna.

5 Awan pakaan-anoam no la ket tungpalem dagiti bilinna ket ammo ti masirib ti tumutop a tiempo ken ti rumbeng nga aramidenna.

6 Adda tumutop a tiempo ken naimbag a pamuspusan a panangaramid iti amin ngem bassit unay ti ammotayo!

7 Awan kadatayo ti makaammo no ania ti mapasamak, ken awan mangibaga kadatayo.

8 Awan ti tao a makalisi ken ni patay, wenno mangitantan iti aldaw ti ipapatayna. Maysa a gubat dayta a ditay maliklikan. Ditay mabalin ti agsaur tapno makalibastayo.

Ti Managdakdakes ken ti Nalinteg

9 Nakitak amin daytoy idi am-amirisek ti kaipapanan ti amin a mapaspasamak ditoy lubong; wen, ditoy lubong a pagnaedan ti sumagmamano a tattao nga adda pannakabalinna ket masapul nga agsagaba dagiti dadduma iti babaenda.

10 Wen, nakitak dagiti managdakdakes a naipumpon ken naitanem. Ngem idi pumanaw dagiti tattao iti kamposanto, indaydayawda dagiti managdakdakes iti mismo a siudad a nangaramidanda iti dakes. Awan serserbina.

11 Apay a sisasagana dagiti tattao nga agaramid iti kinadakes? Gapu ta saan a madusa a dagus ti agbasol.

12 Uray maminggasut nga agaramid ti managbasol iti dakes, agbiag pay laeng. Wen, ammok ti kunada, “No agbutengka iti Dios, naimbagto latta amin,

13 ngem saan a nasayaat ti pagbanagan ti managbasol. Mayarig iti anniniwan ti biagna ket masapa a matay, agsipud ta saan nga agbuteng iti Dios.”

14 Ngem kinamaag daytoy. Kitaem ti mapaspasamak ditoy lubong: No dadduma, maipatay kadagiti nalinteg ti dusa nga agpaay koma kadagiti nakillo; ket dagiti nakillo ti umawat iti gunggona dagiti nalinteg. Kunak nga awan serserbina.

15 Ngarud, patiek unay a rumbeng nga agragsak ti tao. Mangan, uminum ken aglang-ay laeng ti aramidenna iti daytoy a biag. Daytoy ti mabalinna nga aramiden iti baet ti panagtrabahona bayat ti inted ti Dios a panagbiagna ditoy lubong.

16 Tunggal padasek ti agbalin a masirib ket ammoek ti mapaspasamak iti lubong, nabigbigko a mabalinmo ti siririing iti agpatnag ken agmalem

17 ngem pulos a dimo maawatan ti ar-aramiden ti Dios. Uray no kasano ti panangpadasmo, dimonto matakuatan. Mabalin a kuna dagiti masirib nga ammoda, ngem saanda nga ammo.

1 Nabayag ken napasnek ti panangpampanunotko iti maipapan amin kadagitoy ket naawatak nga adda iti pannakabalin ti Dios ti tignay ken aramid dagiti masirib ken nalinteg a tattao, uray ti ayat ken ti gurada. Awan ti makaammo iti uray ania a banag iti masangoananna.

2 Awan ti pagdumaanna. Maymaysa ti panungpalan ti nalinteg ken ti managdakdakes, ti naimbag ken ti dakes, ti relihioso ken ti saan a relihioso, ti agidatag iti daton ken ti saan nga agidatag iti daton. Saan a nasaysayaat ti kasasaad ti naimbag a tao ngem ti managbasol. Saan a nasaysayaat ti kasasaad ti tao nga agsapata ngem ti saan nga agsapata.

3 Padapada ti mapagteng ti amin ket biddut daytoy a kas iti aniaman a mapasamak ditoy lubong. Bayat ti panagbiag dagiti tattao, napno ti panunotda iti kinadakes ken kinamauyong ket pagammoan la ta matayda.

4 Ngem adda namnama ti siasinoman a sibibiag iti lubong dagiti sibibiag. Nasaysayaat ti sibibiag nga aso ngem ti natay a leon.

5 Wen, ammo dagiti sibibiag a mataydanto ngem awan ammo dagiti natay. Awanen ti nayon ti gunggonada; nalipatandan a namimpinsan.

6 Idi natayda, natay metten dagiti ayatda, dagiti gurada, dagiti riknada. Saandan a makipartisipar iti aniaman a mapasamak ditoy lubong.

7 Sige, manganka ket agragsakka. Uminumka iti arak ket aglinglingayka. Ipalubos daytoy ti Dios.

8 Naisem ken naragsakka koma a kanayon.

9 Nanamem ti biag iti sidong ti babai nga ay-ayatem, bayat ti panagbiagmo ditoy lubong, iti awan serserbina a biag nga inted kenka ti Dios. Aglang-ayka gapu ta dayta laeng ti magunggonam kadagiti pakaringgoram.

10 Iti aniaman nga aramidmo, ipakatmo ti amin a kabaelam, gapu ta iti daga dagiti natay a papanam, dikanto agtrabaho wenno agpanunot ken awanto ti banag a pangusaram iti ammom wenno kinasiribmo.

11 Adda pay natakuatak: Iti daytoy a lubong, saan a kanayon a mangabak dagiti napardas nga agtaray ket saan met a kanayon a mangabak iti gubat dagiti natutured. Saan nga amin a masirib makabirok iti panggedanna. Saan nga amin a nasaririt bumaknang ket saan nga amin a makabael a tao maisaad iti nangato nga akem. Dumteng ti dakes a gasat iti tunggal maysa.

12 Dimo ammo no kaanonto ti idadateng ti naituding a tiempom. Kas iti tumatayab a pagammoan la ta masiloan, kas iti ikan a matiliw iti iket, maipalab-ogtayo a ditay mapupuotan no dumteng ti dakes a tiempo.

Pampanunot iti Kinasirib ken Kinamaag

13 Adda pay sabali a nakitak a napintas a pagarigan no kasano ti pannakaibilang ti kinasirib ditoy lubong.

14 Adda bassit nga ili a bassit ti agnaed. Dinarup ti maysa a mannakabalin nga ari. Linawlawna ti ili ket insaganana a rebbaen dagiti bakud a serkanna.

15 Adda maysa a tao sadiay; napanglaw ngem masirib. Naisalakanna koma ti ili, ngem awan ti nakalagip kenkuana.

16 Kanayon nga ibagbagak a nasaysayaat ti kinasirib ngem ti kinapigsa ngem awan ti mangipagarup a masirib ti maysa a napanglaw wenno mangikaso iti sawenna.

17 Nasaysayaat a denggen dagiti naalumamay a balikas ti masirib ngem ti pukkaw ti maysa nga agturay iti taripnong dagiti maag.

18 Ad-adu ti pagimbagan ti kinasirib ngem ti igam, ngem adu a kinaimbag ti mabalin a dadaelen ti maysa a biddut.

1 Pagbuyoken dagiti natay a ngilaw ti sangabotelia a bangbanglo, ket ti bassit a kinanengneng pukawenna ti katan-okan a kinasirib.

2 Gagangay a naimbag ti aramiden ti masirib. Gagangay met a killo ti aramid ti maag.

3 Ti kinakuneng ti maag, madlaw uray dagiti ganggannaet a masabatna iti dalan. Ipakaammona iti tunggal maysa ti kinamaagna.

4 No kaungetnaka ti agturay kenka, dika agikkat iti trabahom. Mabalin a mapakawan dagiti nadagsen a biddut no agulimekka.

5 Adtoy ti nakitak a pannakailupitlupit ditoy lubong, pannakailupitlupit a pinataud dagiti agtuturay.

6 Maisaad dagiti nengneng kadagiti nangato a pagrebbengan, ket awan ti mangbigbig kadagiti nabaknang.

7 Adda dagiti tagabu a nakitak a nagsakay kadagiti kabalio idinto a kasla tagabu a magmagna dagiti natan-ok a tattao.

8 Noagkalika iti abut, matnagka iti abut. Serkem ti bakud ket kagatennaka ti uleg.

9 No agtrabahoka iti pagkalian iti bato, madunorka iti bato. Agbalsigka ket masugatka iti panagbalsigmo.

10 No namudel ti wasaymo ket dimo asaen, masapul a pigpigsaam ti panangusarmo. Nasaysayaat ti agplano nga umuna.

11 Awan ti serserbina nga ammom a paamoen ti uleg no ipalubosmo a kagatennaka nga umuna.

12 Pakaidayawan ti masirib dagiti saona, ngem pakadadaelan ti maag dagiti balikasna.

13 Irugina ti agsao iti minamaag ket gibusanna iti minamauyong.

14 Sao a sao ti maag.

Awan ti makaammo no ania ti sumaruno a mapasamak. Awan met ti makaibaga no anianto ti mapasamak kalpasan ti ipapataytayo.

15 Ti laeng tao a nengneng a di makaammo iti dalanna nga agawid ti agtrabaho agingga a mapaksuyan.

16 Agpeggad ti pagilian no agubing-ubing ti arina, ken pagay-ayat dagiti pangulona ti agramrambak iti agpatpatnag.

17 Ngem nagasat ti pagilian no iturayan ti maysa nga ari a kabaelanna ti agdesision nga is-isuna ken addaan papangulo a mangan iti tumutop a tiempo, a makaigawid iti bagbagida ken saanda nga agbartek.

18 No nasadut ti tao a mangtarimaan iti atep ti balayna, agtedted ti atep ket marpuog ti pagtaenganna.

19 Pagragsakennaka ti panagrambak ket liwliwaennaka ti arak ngem dimo magun-od dagitoy no awan kuartam.

20 Dimo babalawen ti ari uray iti panunotmo laeng, ket dimo babalawen ti nabaknang uray iti uneg ti kuartom. Mabalin nga awiten ti tumatayab ti saom ket ibutaktakna ti imbagam.