Category: Exodo

Matagabu dagiti Israelita idiay Egipto

1 Dagitoyti nagan dagiti annak ni Jacob a kimmuyog kenkuana a napan idiay Egipto agraman dagiti familiada:

2 Ruben, Simeon, Levi, Juda,

3 Issacar, Zabulon, Benjamin,

4 Dan, Neftali, Gad ken Aser.

5 Pitopulo ti dagup dagiti annak a nagtaud ken ni Jacob. Adda idin ni Jose nga anakna idiay Egipto.

6 Natay sadiay ni Jose, kasta met amin a kakabsatna ken amin daydi a kaputotan.

7 Nupaykasta, napardas ti panagadu dagiti Israelita, isu a pimmigsada ket nagwaras dagiti kaputotanda iti entero nga Egipto.

8 Naglabasti tiempo. Nagturay idiay Egipto ti baro nga ari nga awan ti ammona maipapan ken ni Jose.

9 “Kitaenyo,” kinuna ti ari kadagiti iturayanna. “Agpeggadtayo ta nakaad-adu ken nabileg unayen dagiti Israelita.

10 Masapulnga agaramidtayo iti pamuspusan tapno malapdan ti panagaduda. Ta no adda gubat, amangan no kumapponda kadagiti kabusor a manggubat kadatayo, ket aglibasda a pumanawiti dagatayo.”

11 Iti kasta, nangdutokda kadagiti narungsot a kapatas a mangparigat kadagiti Israelita nga agtrabaho iti nadagdagsen pay ngem iti sigud nga ar-aramidenda. Binangon dagiti Israelita ti Pitom ken Rameses, dua a siudad a pagidulinan iti makan.

12 Ngem no kasano ti panangparparigat dagiti Egipcio kadakuada, immad-aduda ketdi ket nagwarasda. Isut’ gapuna a kinabuteng ida dagiti Egipcio.

13 Naranggas ti panangtagabuda kadagiti Israelita.

14 Rimmigat ti biagda. Pinilitda ida nga agtrabaho kadagiti talonda ken agipasdek kadagiti patakderda. Dida naasian kadakuada.

15-16 Kinasao ti ari ti Egipto dagiti partera a Hebreo ket imbilinna kadakuada, “No paanakenyo dagiti Hebreo, patayenyo ti maladaga no lalaki. Ngem no babai, bay-anyo nga agbiag.”

Maysa kadagitoy a partera ti agnagan iti Zifra ket Pua ti nagan met ti sabali.

17 Ngem managbuteng dagiti partera iti Dios ket saanda a tinungpal ti bilin ti ari. Binay-anda nga agbiag dagiti maladaga a lallaki.

18 Pinaayaban ngarud ti ari dagiti partera. Sinaludsodna, “Apay a kasta ti ar-aramidenyo? Apay a palpalubosanyo nga agbiag dagiti lallaki a maladaga?”

19 “Sabali ngamin dagiti babbai a Hebreo, apo,” insungbatda. “Saanda a kas kadagiti babbai nga Egipcio. Nalakada nga aganak. Sakbay nga adda sumangpet a partera, naipasngayen ti ubing.”

20-21 Gapu ta managbuteng dagiti partera iti Dios, binendisionanna dagitoy, ket naikkanda iti bukodda a familia.

Immad-adu ken bimmilbileg dagiti Israelita.

22 Imbilinti ari ti Egipto kadagiti amin nga iturayanna nga ibellengda iti karayan Nile ti amin a kaippasngay a lallaki a Hebreo, ngem palubosanda nga agbiag dagiti babbai.

Ti Pannakayanak ken Pannakaispal ni Moises

1 Iti daydi a panawen, adda lalaki a nagtaud iti kaputotan ni Levi a nangasawa iti katribuanna.

2 Nagsikogti babai ket nangipasngay iti lalaki. Idi makitana a nalungpo ti ubing, inlemmengna iti las-ud ti tallo a bulan.

3 Ngem idi dinan mailemmeng, nangala iti basket a naaramid iti runo ket pinastaanna iti alketran tapno saan a makastrek ti danum. Inkargana ti ubing iti uneg ti basket sana inkabil iti karunoan iti igid ti karayan.

4 Iti saan unay nga adayo, nagtakder ti manang ti ubing tapno makitana ti mapasamak iti adingna.

5 Iti saan a mabayag, simmalog ti babai nga anak ti ari ti Egipto tapno agdigos iti karayan. Nakitana ti basket iti karunoan ket pinaalana iti maysa kadagiti babbai nga agserserbi kenkuana nga agpagnapagna iti igid ti karayan.

6 Idi luktan ti prinsesa ti basket, nakitana ti maysa nga ubing nga agsangsangit ket naasian. “Anak ti Hebreo daytoy!” kinunana.

7 Immasideg ti manang ti ubing ket kinunana, “Apo, kayatmo kadi nga isapulanka iti Hebreo a mangtagibi iti dayta nga ubing?”

8 “Sige, isapulannak,” insungbatna. Napan ngarud ti balasitang ket inayabanna ti ina ti maladaga.

9 Kinuna ti anak ti ari iti ina, “Alaem daytoy nga ubing. Tagibiem a kas anakko ket tangdanankanto.”

Innala ti ina ti maladaga ket tinagibina.

10 Idimakadakkel bassit ti ubing, impanna iti prinsesa a nangibilang iti ubing a kas anakna. “Gapu ta inaonko iti danum daytoy nga ubing, panaganak iti Moises,”kinuna ti prinsesa.

Agpakni ni Moises idiay Midian

11 Itimaysa nga aldaw, idi maysan nga agtutubo ni Moises, sinarungkaranna dagiti kadaraanna a Hebreo. Naimatanganna ti pannakaparparigatda. Nadagsen ti trabahoda. Nakitana ti maysa nga Egipcio a mangkabkabil iti maysa a Hebreo.

12 Inwaras ni Moises ti panagkitana ket idi awan makitana a sabali a tao, pinatayna ti Egipcio sana inkali ti bangkay iti kadaratan.

13 Iti sumuno nga aldaw, nagsubli ni Moises ket nakitana ti dua a Hebreo nga aggubgubal. “Apay a kabkabilem ti padam a Hebreo?” kinunana iti nakabasol.

14 “Apay? Siasino kadi ti nangisaad kenka a mangituray ken mangukom kadakami?” insungbatna. “Patayennak met kadi a kas iti panangpataymo iti Egipcio?”

Nagdanag ni Moises ket kinunana iti nakemna, “Naammoanda gayamen ti inaramidko.”

15 Idimadamag daytoy ti ari, kayatna a patayen ni Moises, ngem nakalibas ni Moises ket napan nagnaed idiay Midian.

Iti maysa nga aldaw, idi agtugtugaw ni Moises iti asideg ti maysa a bubon,

16 dimteng ti pito a babbai tapno sumakdoda. Annak ida ni Jetro a padi ti Midian. Pinunnoda dagiti pagkargaan ti danum tapno painumenda dagiti karnero ken kalding ni amada.

17 Ngem adda dagiti agpaspastor a dimteng ket pinapanawda dagiti babbai. Inarayat ida ni Moises sana pinainum dagiti animalda.

18 Idi nagawidda, sinaludsod ni amada, “Apay a nasapakayo a simmangpet?”

19 Kinunada, “Adda dagiti agpaspastor a nangpapanaw kadakami iti pagpainuman. Ngem tinulongannakami ti maysa nga Egipcio. Insakduannakami ken pinainumna pay dagiti animal.”

20 “Sadino ti ayanna?” sinaludsodna. “Apay a pinanawanyo? Inkay ayaban ta makipangan kadatayo.”

21 Inkeddeng ni Moises ti agnaed sadiay. Impaasawa ni Jetro kenkuana ni Sefora nga anakna.

22 Nangipasngay ni Sefora iti maysa a lalaki. Gapu ta ganggannaet ni Moises iti sabali a daga, pinanagananna iti Gersomti anakna.

23 Limmabas ti adu a tawen. Natay ti ari ti Egipto, ngem nagtuloy latta ti pannakaparigat dagiti Israelita gapu iti pannakatagabuda. Immasugda a patulongan iti Dios

24 ketimpangagna ida; nalagipna ti tulagna ken ni Abraham, ni Isaac ken ni Jacob.

25 Nakitana ti kasasaad dagiti Israelita ket naasian kadakuada.

Ayaban ti Dios ni Moises

1 Ay-aywanan idi ni Moises dagiti karnero ken kalding ni Jetro a katuganganna a padi ti Midian. Impanna ti arban iti labes ti let-ang ket dimteng idiay Horeba bantay ti Dios.

2 Sadiay,nagparang kenkuana ti anghel ni Yahweh a kas gumilgil-ayab nga apuy nga aggapu iti tengnga ti bassit a kayo. Nakita ni Moises a sumsumged ti kayo ngem saan a marunot.

3 Kinunana iti nakemna, “Nakaskasdaaw daytoy. Apay ngata a saan a mauram ti kayo? Umasidegak man ta kitaek.”

4 Idi makita ni Yahweh nga umas-asideg ni Moises, inawaganna manipud iti tengnga ti kayo. “Moises, Moises!” kinunana.

“Adtoyak,” insungbat ni Moises.

5 “Dika umas-asideg,” kinuna ti Dios. “Ikkatem ta pallokam ta nasantoan ti daga a pagtaktakderam.

6 Siak ti Dios ti amam—da Abraham, Isaac ken Jacob.” Liningdan ni Moises ti rupana ta mabuteng a kumita iti Dios.

7 Kinuna ni Yahweh, “Nakitak ti nakakaasi a kasasaad dagiti tattaok idiay Egipto. Nangngegko ti panagdawatda iti tulong gapu iti pannakaparparigatda. Wen, ammok dagiti sagsagabaenda.

8 Bimmabaak tapno ispalek ida kadagiti Egipcio. Iruarko ida iti dayta a daga ket ipanko ida iti daga a nadam-eg ken nalawa. Nabaknang ken nabunga daytoy a daga a pagnanaedan ita dagiti Cananeo, Heteo, Amorreo, Perezeo, Heveo ken Jebuseo.

9 Wen, nangngegko ti asug dagiti tattaok ket makitak ti panangparparigat dagiti Egipcio kadakuada.

10 Ita, ibaonka iti ari tapno iruarmo dagiti tattaok nga Israelita manipud Egipto.”

11 Kinuna ni Moises iti Dios, “Nanumoak laeng a tao. Kasano a mapanak iti ari tapno iruarko dagiti Israelita iti Egipto?”

12 “Addaakto kenka,” insungbat ti Dios, “ket daytoyto ti pagilasinan a siak ti nangibaon kenka: Inton mairuarmo dagiti tattaok iti Egipto, agdaydayawkayto kaniak ditoy a bantay.”

13 Kinunani Moises, “Inton innak kadagiti Israelita ket ibagak kadakuada nga imbaonnak ti Dios dagiti kapuonanda, ket saludsodenda ti naganmo, ania ti ibagak?”

14 Kinunati Dios, “Siak ti siak. Daytoy ti ibagamto kadagiti Israelita, ‘Imbaonnak ti mangawag iti bagina iti SIAK.’

15 Ibagamto kadagiti Israelita, a siak ni Yahweh a Dios dagiti kapuonanyo, ti Dios da Abraham, Isaac ken Jacob, imbaonka kadakuada. Daytoy ti naganko iti agnanayon. Isunto ti pangawag kaniak dagiti amin a kaputotan.

16 Inka ummongen dagiti pangulo ti Israel ket ibagam kadakuada a nagparang kenka ni Yahweh a Dios dagiti kapuonanyo, ti Dios da Abraham, Isaac ken Jacob. Ibagam a naimatanganna ti kasasaadyo ken ti ar-aramiden dagiti Egipcio kadakayo.

17 Inkeddengko nga iruarko ida idiay Egipto ket ipanko ida iti daga dagiti Cananeo, Heteo, Amorreo, Perezeo, Heveo ken Jebuseo. Nadam-eg ken nabunga dayta a daga.

18 “Ipangagto dagiti tattaok ti saom. Kalpasanna, kakuyogmonto dagiti pangulo ti Israel a mapan iti ari ti Egipto ket kunayonto kenkuana, ‘Nakisao kadakami ni Yahweh a Dios dagiti Hebreo. Palubosannakami koma a mapan idiay let-ang iti tallo nga aldaw tapno agidatagkami iti daton ken ni Yahweh a Diosmi.’

19 Ammok a dinakayto palubosan ti ari malaksid no mapilit.

20 Ngem usarekto ti pannakabalinko ket dusaekto ti Egipto; nakabutbutengto dagiti aramidek sadiay. Kalpasan dayta, palubosannakayton.

21 “Itan-okkontodagiti tattaok tapno raemen ida dagiti Egipcio ket inton pumanawda, saandanto nga ima-ima.

22 Mapanto ti tunggal babai nga Israelita iti babai nga agnaed iti balay ti kaarrubana nga Egipcio ket dumawat iti pagan-anay ken alahas a pirak ken balitok. Yarruatdanto dagitoy kadagiti annakyo. Kastoyto ti panangalada iti kinabaknang dagiti Egipcio.”

Maikkan ni Moises iti Bileg nga Agaramid iti Milagro

1 Simmungbat ni Moises ken ni Yahweh, “No ibagak kadakuada a nagparangkayo kaniak ket didanto mamati, anianto ti aramidek?”

2 “Ania ta ig-iggamam?” sinaludsod ni Yahweh.

“Sarukod, apo,” insungbat ni Moises.

3 Kinuna ni Yahweh, “Ipurruakmo iti daga.” Nagtungpal ni Moises ket nagbalin nga uleg ti sarukod. Nagsanud ni Moises manipud iti uleg.

4 Kinuna ni Yahweh, “Ipusem a piduten.” Tiniliw ni Moises ti uleg babaen iti ipusna ket nagbalin manen a sarukod.

5 “Aramidem daytoy,” kinuna ni Yahweh, “tapno mamatida a nagparang kenka ni Yahweh a Dios dagiti kapuonanda, ti Dios da Abraham, Isaac ken Jacob.”

6 Kinuna manen ni Yahweh ken ni Moises, “Yunegmo ta imam iti badom.” Nagtungpal ni Moises ket idi iruarna ti imana, nalapunos iti kukutel ket pimmuraw a kas niebe.

7 Kinuna ni Yahweh, “Isuksokmo manen ta imam iti badom.”

Kasta ti inaramid ni Moises. Idi iruarna ti imana, awanen ti kukutel ket nagsubli manen a kas iti dati.

8 Kinuna ni Yahweh, “No didakanto patien wenno dida maguyugoy a mamati iti umuna a milagro, mamatidanto iti daytoy maikadua.

9 Ket no didakanto pay la patien uray no imparangmo dagitoy dua a milagro, mangalakanto iti danum iti Karayan Nile samo ibuyat iti namaga a daga. Agbalinto a dara ti danum.”

10 Kinuna ni Moises ken ni Yahweh, “Saan, apo, saannak nga ibaon. Ni kaanoman saanak a nalaing nga agsao, ket diak met nagbalin a bumibitla manipud pay itay rugiam ti makisao kaniak. Nabannayat ket natabbed toy dilak.”

11 Kinuna ni Yahweh kenkuana, “Siasino ti mangted iti ngiwat ti tao? Siasino ti adda pannakabalinna a mamagtuleng wenno mamagumel iti maysa a tao? Siasino ti mangted iti panagkitana wenno mamagbulsek kenkuana? Saan kadi a siak ni Yahweh?

12 Ala, inkan. Tulongankanto nga agsao ket ibagakto ti sawem.”

13 Ngem kinuna ni Moises, “Saan, apo. Pangngaasim ta mangibaonka laengen iti sabali.”

14 Nakapungtot ni Yahweh ken ni Moises. “Ket ni Aaron a kabsatmo a Levita?” sinaludsodna. “Ammok a nalaing nga agsao. Kinapudnona, umaynaka sabtenen ket maragsakanto a makakita kenka.

15 Kasaom ket ibagam kenkuana ti sawenna. Tulongankayto nga agsao. Ibagakto ti aramidenyo.

16 Isunto ti pannakangiwatmo ket agbalinkanto a kas iti Dios a mangibaga no ania ti sawenna kadagiti tattao.

17 Itugotmo ta sarukodmo ta daytanto ti pagaramidmo kadagiti milagro.”

Agsubli ni Moises idiay Egipto

18 Nagawid ni Moises iti balay ni Jetro a katuganganna ket kinunana kenkuana, “Palubosannak koma nga agsubli kadagiti kakabagiak idiay Egipto, ta kitaek no addada pay a biag.” Pinalubosan ni Jetro.

“Dios ti kumuyog kenka,” kinuna ni Jetro idi agrubbuat ni Moises.

19 Idi adda pay laeng ni Moises idiay Midian, kinuna ni Yahweh kenkuana, “Agsublika idiay Egipto. Natay aminen a nagpanggep a mangpatay kenka.”

20 Impasakay ngarud ni Moises ti asawana ken dagiti annakna iti asno tapno mapanda idiay Egipto. Intugotna ti sarukod nga imbilin ti Dios nga alaenna.

21 Kinuna manen ni Yahweh ken ni Moises, “Ita ta agsublikan idiay Egipto, aramidem dagiti amin a milagro iti sangoanan ti ari. Intedko kenka ti pannakabalin a mangaramid kadagitoy. Ngem patangkenekto ti pusona tapno dina ipalubos a pumanaw dagiti tattao.

22 Kunamto kenkuana a kastoy ti sao ni Yahweh: ‘Ni Israel ti inauna nga anakko a lalaki.

23 Ibagakkenka a palubosam a pumanaw tapno agdaydayaw kaniak ngem dimo pinalubosan. Ita, patayek ti inauna nga anakmo a lalaki.’”

24 Iti pagkamkampoan iti dalan nga agpa-Egipto, napan ni Yahweh ket panggepna a patayen ni Moises.

25-26 Nangala ni Sefora iti natadem a bato ket kinugitna ti anakna sana insagid ti nageppas a kudil kadagiti dapanni Moises. Gapu iti seremonia ti pannakakugit, kinunana ken ni Moises, “Asawaka babaen iti dara.”

Iti kasta, pinalubosan ni Yahweh nga agbiag ni Moises.

27 Kabayatanna, kinuna ni Yahweh ken ni Aaron, “Inka sabten ni Moises idiay let-ang.”

Napanna sinabat ni Moises iti bantay ti Dios ket inagkanna idi agkitada.

28 Imbaga ni Moises ken ni Aaron ti amin nga imbaga ni Yahweh idi ibaonna, kasta met ti amin a milagro nga imbilinna nga aramidenna.

29 Nagkuyog da Moises ken Aaron a napan idiay Egipto ket inummongda amin a pangulo dagiti Israelita.

30 Imbaga ni Aaron kadakuada ti amin a kinuna ni Yahweh ken ni Moises. Inaramid met ni Moises ti amin a milagro iti imatang dagiti tattao.

31 Namatida. Idi nangngegda a sinarungkaran ida ni Yahweh ket nakitana ti pannakaparparigatda, nagdumogda sada nagdaydayaw.

Mapan da Moises ken Aaron iti Ari ti Egipto

1 Kalpasanna napan da Moises ken Aaron iti ari ti Egipto ket kinunada kenkuana, “Kastoy ti kuna tiApoa Dios ti Israel: ‘Palubosam dagiti tattaok a mapan idiay let-ang tapno rambakanda ti fiesta a pangpadayaw kaniak.’”

2 Sinaludsod ti ari, “Siasino tiApo? Apay koma a dumngegak kenkuana tapno palubosak dagiti Israelita? Diak am-ammo tiApo, ket diak palubosan dagiti Israelita.”

3 Kinunada kenkuana, “Nagparang kadakami ti Dios dagiti Hebreo. Ipalubosmo koma nga agdaliasatkami idiay let-ang iti tallo nga aldaw tapno agidatonkami itiApoa Diosmi. No saan, patayennakami iti sakit wenno gubat.”

4 Kinuna ti ari kada Moises ken Aaron, “Kayatyo a sawen, taktakenyo dagiti tattao kadagiti trabahoda? Pagsublienyo dagita a tagabu nga agtrabaho.”

5 Kinuna pay ti ari, “Dakayo, ad-adukayo payen ngem dagiti Egipcio. Ket ita, kayatyon ti agsardeng nga agtrabaho?”

6 Iti dayta met la nga aldaw, imbilin ti ari kadagiti mangimaton kadagiti tagabu ken kadagiti kapatas:

7 “Manipud ita, diyon ikkan dagiti tattao iti garami a pagaramidda iti ladrilio. Bay-anyo nga isuda ti mapan mangala iti usarenda.

8 Ngem paaramidyo met laeng kadakuada ti sigud a bilang ti ladrilio. Kurang ti trabahoda, isut’ gapuna nga agasugda nga agkuna, ‘Palubosandakami a mapan agidaton iti Diosmi.’

9 Nayonanyo ti trabahoda ket ad-adda manen nga ingetanyo ida tapno awan tiempoda a dumngeg iti inuulbod a sasao.”

10 Rimmuar dagiti mangimaton kadagiti tagabu ken dagiti kapatas. Kinunada kadagiti Israelita, “Imbaga ti ari a saankayon a maikkan iti garami.

11 Dakayo kanon ti agbirok iti garami ngem masapul a saan a maksayan ti bilang ti ladrilio nga aramidenyo iti inaldaw.”

12 Nagwaras dagiti Israelita iti entero a daga ti Egipto tapno agbirokda iti garami.

13 Saan a sinardengan dagiti mangimaton iti panangdagdagda kadakuada nga aramidenda ti isu met la a bilang ti ladrilio iti inaldaw, kas iti sigud nga ar-aramidenda idi maik-ikkanda iti garami.

14 Ngem agkurang ti bilang ti ladrilio a maaramid iti inaldaw. Gapu iti daytoy, kinabkabil dagiti mangimaton dagiti kapatas a nadutokan nga agaywan iti trabaho.

15 Iti kasta, nagreklamo dagiti kapatas. Napanda iti ari ket kinunada kenkuana, “Apay nga ikaskastoynakami, Natan-ok nga Ari?

16 Awan la ngaruden ti maited a garami, ngem mabilinkami latta nga agaramid iti ladrilio! Ita, kabkabilendakami. Dagiti tattaoyo ti akimbasol.”

17 Insungbat ti ari, “Sadutkayo ket diyo kayat ti agtrabaho, isu a dawatenyo a palubosankayo a mapan agidaton itiApo.

18 Inkay ketdi agtrabahon! Awan ti garami a maited kadakayo ngem masapul nga aramidenyo ti isu met laeng a bilang ti ladrilio.”

19 Nabigbig dagiti kapatas nga agpeggad ti kasasaadda iti naibaga kadakuada a di maksayan ti bilang ti ladrilio nga aramidenda iti inaldaw.

20 Bayat ti ipapanawda, nasabatda da Moises ken Aaron a mangur-uray kadakuada.

21 Kinunada kadagiti dua, “Nakita tiApoti inaramidyo ket dusaennakayo koma ta dakayo ti gapuna a guraennakami ti ari ken dagiti ofisialesna. Inikkanyo ida iti pambaran a mangpatay kadakami.”

Agreklamo ni Moises ken ni Yahweh

22 Kimmamang manen ni Moises ken ni Yahweh ket kinunana, “Apo, apay a parparigatem dagiti tattaom? Apay nga imbaonnak ditoy?

23 Manipud napanak iti ari tapno ibagak kenkuana ti saom, indadanesna dagiti tattaom ket pulos nga awan pay inaramidyo tapno matulonganda.”

1 Kinuna ni Yahweh ken ni Moises, “Ita, makitam ti aramidek iti ari. Pilitek a mangpalubos kadagiti tattaok. Kinapudnona, pilitek a pagtalawenna ida iti dagana.”

Ayaban Manen ti Dios ni Moises

2 Kinunati Dios ken ni Moises, “Siak ni Yahweh.

3 Nagparangak a kas Dios a Mannakabalin-aminkada Abraham, Isaac ken Jacob, ngem diak impakaammo kadakuada ti nasantoan a naganko a Yahweh.

4 Nakitulagak pay kadakuada: Inkarik nga itedko kadakuada ti daga a Canaan a nagnaedanda a kas ganggannaet.

5 Ita, nangngegko ti asug dagiti Israelita a tagtagabuen dagiti Egipcio ket nalagipko ti pannakitulagko.

6 Ngarud, ibagam daytoy kadagiti Israelita, ‘Siak ni Yahweh. Ispalenkayto ket wayawayaankayto iti pannakatagabuyo kadagiti Egipcio. Ipariknak kadakuada ti dagsen ti mannakabalin nga imak; nakabutbutengto ti panangdusak kadakuada ket isalakankayto.

7 Pagbalinenkayto a tattaok ket siakto ti Diosyo. Maammoanyonto a siak ni Yahweh a Diosyo inton wayawayaankayo iti pannakatagabuyo idiay Egipcio.

8 Ipankayto iti daga nga insapatak nga ited kada Abraham, Isaac ken Jacob. Itedkonto a kukuayo. Siak ni Yahweh.’”

9 Imbaga ni Moises daytoy kadagiti Israelita ngem dida patien ta napukawen ti namnamada gapu iti nakaro a pannakatagabuda.

10 Kinuna ni Yahweh ken ni Moises,

11 “Inka ibaga iti ari ti Egipto a masapul nga ipalubosna a pumanaw dagiti Israelita iti dagana.”

12 Ngem kinuna ni Moises ken ni Yahweh, “Didakto pay ipangag dagiti Israelita, ipangagnakto ketdin ti ari? Saanak a nalaing nga agsao.”

13 Imbilin ni Yahweh kada Moises ken Aaron nga ibagada kadagiti Israelita ken iti ari nga isuda a dua ti nabilin a mangiruar kadagiti Israelita idiay Egipto.

Ti Kapuonan da Moises ken Aaron

14 Uppat ti lallaki nga annak ni Ruben nga inauna nga anak ni Jacob: Hanoc, Pallu, Hezron ken Carmi. Isuda ti kapuonan dagiti familia a naipanagan kadakuada.

15 Innem ti annak ni Simeon: Jemuel, Jamin, Ohad, Jakin, Zohar ken Saul nga anak ti maysa a Cananea; isuda ti kapuonan dagiti sangkafamiliaan a naipanagan kadakuada.

16 Talloti annak ni Levi: Gerson, Cohat ken Merari. Isuda ti kapuonan dagiti familia a naipanagan kadakuada. Nagbiag ni Levi iti 137 a tawen.

17 Dua ti annak ni Gerson: Libni ken Simei ket adu ti kaputotanda.

18 Uppat ti annak ni Cohat: Amram, Izar, Hebron ken Uzziel. Nagbiag ni Cohat iti 133 a tawen.

19 Dua ti annak ni Merari: Mali ken Musi. Dagitoy ti familia ni Levi agraman dagiti kaputotanda.

20 Inasawa ni Amram ni Jocabed a kabsat ni amana. Inyanak ni Jocabed da Moises ken Aaron. Nagbiag ni Amram iti 137 a tawen.

21 Tallo ti annak ni Izar: Kora, Nefeg ken Zikri.

22 Tallo met ti annak ni Uzziel: Misael, Elisafan ken Sitri.

23 Inasawa ni Aaron ni Eliseba nga anak ni Aminadab ken kabsat ni Naason; inyanakna da Nadab, Abiu, Eleazar ken Itamar.

24 Tallo ti annak ni Kora: Asir, Elcana ken Abiasaf; isuda ti kapuonan dagiti benneg dagiti sangkafamiliaan ni Kora.

25 Inasawa ni Eleazar nga anak ni Aaron ti maysa kadagiti annak ni Futiel; inyanakna ni Finees. Dagitoy dagiti ulo ti familia ken dagiti kafamilia iti tribu ni Levi.

26 Da Aaron ken Moises ti nagkunaan ni Yahweh, “Iruaryo dagiti tribu ti Israel iti Egipto.”

27 Isuda ti nangibaga iti ari ti Egipto a wayawayaanna dagiti Israelita.

Ti Bilin ni Yahweh kada Moises ken Aaron

28 Idi nagsao ni Yahweh ken ni Moises idiay Egipto,

29 kinunana, “Siak ni Yahweh. Ibagam iti ari ti Egipto dagiti amin nga ibagak kenka.”

30 Ngem insungbat ni Moises ken ni Yahweh, “Ammoyo a diak nalaing nga agsao; kasano a denggennak ti ari?”

1 Kinuna ni Yahweh ken ni Moises, “Pagbalinenka a pannakabagi ti Dios iti sangoanan ti ari, ket ninto Aaron a kabsatmo ti pannakangiwatmo nga agsao kenkuana.

2 Ibagam ken ni Aaron ti amin nga ibilinko kenka ket dawatennanto iti ari a palubosanna dagiti Israelita a pumanaw iti dagana.

3-4 Ngempatangkenekto ti puso ti ari, ket dinakayto denggen uray no mano ti nakabutbuteng a banag ti aramidek idiay Egipto. Kalpasanna, idissuorkonto ti nadagsen a dusa iti Egipto ket iruarkonto dagiti tribu dagiti tattaok iti dayta a daga.

5 Inton dusaek dagiti Egipcio ket iruarko dagiti Israelita iti pagilianda, maammoandanton a siak ni Yahweh.”

6 Tinungpal da Moises ken Aaron ti imbilin tiApo.

7 Agtawen iti 80 ni Moises ket 83 met ni Aaron idi makisaoda iti ari.

Ti Sarukod ni Aaron

8 Kinuna ni Yahweh kada Moises ken Aaron,

9 “No ibaga ti ari a mangipakitakayo iti milagro a pammaneknek a naibaonkayo, ibagam ken Aaron nga ipurruakna ti sarukodna iti sangoanan ti ari ket agbalinto nga uleg.”

10 Napan da Moises ken Aaron iti ari. Kas imbilin ni Yahweh, impurruak ni Aaron ti sarukodna iti sangoanan ti ari ken dagiti ofisialesna ket nagbalin nga uleg.

11 Inayaban ti ari dagiti mamasirib ken dagiti salamangkerona ket babaen iti salamangkada, inaramidda met ti inaramid ni Aaron.

12 Impurruakda dagiti sarukodda. Nagbalin met nga uleg dagiti sarukod ngem inalun-on ida ti sarukod ni Aaron.

13 Nupay kasta, nagtalinaed a natangken ti puso ti ari ket, kas kinuna ni Yahweh, dina impangag ida.

Agbalin a Dara ti Danum

14 Kinunani Yahweh ken ni Moises, “Nasubeg la unay ti ari, ket dina kayat a papanawen dagiti tattao.

15 Inton bigat, alaem ti sarukod a nagbalin nga uleg ket inka idiay Karayan Nile. Urayem ti ari iti igid ti danum.

16 Ibagam kenkuana nga imbaonnaka ni Yahweh a Dios dagiti Hebreo tapno kiddawek a palubosanna dagiti tattaok a mapan agdaydayaw kaniak idiay let-ang. Ibagam kenkuana nga agingga ita, dipay nangipangpangag.

17 Ibagamnga imbagak a maammoannanto a siak ni Yahweh babaen iti parnuayenna a didigra. Ibagamto kenkuana a yablatmonto ti sarukod iti danum ti karayan; agbalinto a dara ti danum.

18 Ibagam a matayto dagiti lames; agbuyokto ti karayan, ket karugitto dagiti Egipcio nga inumen ti danumna.”

19 Kinuna ni Yahweh ken ni Moises, “Ibagam ken ni Aaron nga ilayatna ti sarukodna kadagiti dandanum ti Egipto: kadagiti karayan, kanal ken dan-aw. Agbalinto a dara dagiti danum ket addanto dara iti entero a daga uray pay kadagiti burnay ken pagkargaan iti danum.”

20 Tinungpal da Moises ken Aaron ti imbilin ni Yahweh. Iti sangoanan ti ari ken dagiti ofisialesna, inyablat ni Aaronti sarukodna iti karayan ket nagbalin a dara ti danumna.

21 Natay dagiti lames, ket gapu ta kasta unay ti buyok ti karayan, saan a mainum dagiti Egipcio ti danumna. Nagbalin met a dara ti amin a danum iti entero nga Egipto.

22 Ngem nagsalamangka dagiti salamangkero ti Egipto; kasta met ti inaramidda. Ad-adda manen a timmangken ti puso ti ari. Dina impangag da Moises ken Aaron a kas iti kinuna ni Yahweh.

23 Nagawid ketdi iti palasiona ket dina pulos inkaskaso uray pay daytoy.

24 Kabayatanna, nagkali dagiti amin nga Egipcio iti igid ti karayan tapno adda pangalaanda iti inumenda ta dida mainum ti aggapu iti karayan.

25 Pito nga aldaw ti limmabas manipud inyeg ni Yahweh ti didigra iti karayan.

Agwaras dagiti Tukak

1 Kalpasanna, kinuna ni Yahweh ken ni Moises, “Inka ibaga iti ari a kastoy ti kuna ni Yahweh, ‘Palubosam dagiti tattaok tapno umayda agdaydayaw kaniak.

2 No agkedkedka, mangyegak iti adu a tukak a pangdidigra iti entero a pagiliam.

3 Mapnonto ti karayan iti tukak. Sumang-atdanto ket serkenda ti palasiom, ti kuartom ken ti katrem. Sumrekdanto met kadagiti balay dagiti ofisialesmo ken dagiti tattaom, agraman dagiti paglutlutoam ken dagiti pagmasmasaam iti tinapay.

4 Kalay-atendakanto, kasta met dagiti tattaom ken dagiti amin nga ofisialesmo.’”

5 Kinuna pay ni Yahweh ken ni Moises, “Ibagam ken ni Aaron nga ilayatna ti sarukodna kadagiti karayan, kanal ken dan-aw, tapno sumang-at dagiti tukak ket agsaknapda iti daga ti Egipto.”

6 Kasta ti inaramid ni Aaron iti sarukodna kadagiti dandanum ti Egipto. Simmang-at dagiti tukak ket nagsaknapda iti entero a pagilian.

7 Ngem babaen iti salamangka dagiti salamangkero, kastoy met ti inaramidda ket timmakdang dagiti tukak.

8 Pinaayaban ti ari da Moises ken Aaron, ket kinunana, “Idawatyo itiAponga ikkatenna dagitoy a tukak ket palubosakon dagiti tattaoyo a mapan agidaton itiApo.”

9 Kinuna ni Moises iti ari, “Mapadayawanak a mangikararag kenka. Maikkatto dagiti tukak ket idiayto laeng karayan ti pakasarakan kadakuada. Kaanonto ti kayatmo a panagdawdawatko?”

10 “Inton bigat,” insungbat ti ari.

Kinuna ni Moises, “Matungpal ti kiddawmo tapno maammoam nga awan ti kapada tiApoa Diosmi.

11 Mapukawton dagiti tukak iti ayanmo, iti ayan dagiti ofisialesmo ket awanton ti mabati malaksid kadagiti adda iti Karayan Nile.”

12 Iti kasta, pimmanaw da Moises ken Aaron ket dinawat ni Moises ken ni Yahweh nga ikkatenna dagiti tukak nga inyegna iti ari.

13 Pinatgan ni Yahweh ti dawat ni Moises. Natay dagiti tukak kadagiti balbalay, paraangan ken taltalon.

14 Binumbunton dagiti natay a tukak nga inummong dagiti Egipcio ket nagadiwara ti buyokda iti Egipto.

15 Ngem idi makita ti ari nga awanen dagiti tukak, timmangken manen ti pusona ket dina impangag da Moises ken Aaron, kas kinuna ni Yahweh.

Agruar dagiti Timel

16 Kalpasanna, kinuna ni Yahweh ken ni Moises, “Ibagam ken ni Aaron nga ibautna ti sarukodna iti daga tapno agbalin a timel dagiti tapok iti entero nga Egipto.”

17 Imbaut ni Aaron ti sarukodna iti daga. Nagbalin a timel dagiti tapok iti amin nga Egipto ket kimpetda kadagiti tattao ken animal.

18 Pinadas met dagiti salamangkero nga inusar ti salamangkada tapno agruar dagiti timel, ngem dida nabaelan. Tinimel amin a tattao ken animal.

19 Kinunadagiti salamangkero iti ari, “Aramid ti Dios daytoy.” Ngem natangken latta ti ulo ti ari ket dina impangag da Moises ken Aaron, kas iti kinuna ni Yahweh.

Agsaknap dagiti Ngilaw

20 Kalpasanna, kinuna ni Yahweh ken ni Moises, “Inton agsapa, urayem ti ari idiay karayan ket ibagam kenkuana a kastoy ti kuna ni Yahweh, ‘Palubosam a pumanaw dagiti tattaok tapno umayda agdaydayaw kaniak.

21 Ballaaganka a no dimo kayat, dusaenka babaen iti panangibaonko iti pinangen a ngilaw kadagiti ofisialesmo ken kadagiti tattaom. Mapnonto iti ngilaw dagiti balbalay dagiti Egipcio ket agsaknapdanto iti daga.

22 Ngem ilisikto ti daga ti Gosen a pagnaedan dagiti tattaok, ket awanto ti ngilaw sadiay. Aramidek daytoy tapno maammoam a siak, ni Yahweh, ti mannakabalin iti daytoy a daga.

23 Ilasinkontodagiti tattaok kadagiti tattaom. Maaramidto daytoy a milagro inton bigat.’”

24 Inaramid ni Yahweh daytoy, ket pinangen a ngilaw ti napan iti palasio ti ari, kadagiti balbalay dagiti ofisialesna ken iti entero nga Egipto. Nadadael ti pagilian gapu kadagiti ngilaw.

25 Gapu itoy, pinaayaban ti ari da Moises ken Aaron ket kinunana, “Ala, inkay agidaton iti Diosyo ngem ditoy laeng sakup ti Egipto ti pangaramidanyo.”

26 “Saan a mabalin a ditoy Egipto,” kinuna ni Moises. “Kaguradakanto dagiti Egipcio no makitadakami nga agidatag kadagiti animal a makarimon kadakuada. No usarenmi dagitoy nga animal a pagidatonmi itiApoa Diosmi iti lugar a pakakitaanda kadakami, makaguradanto, ket batoendakami agingga a mataykami.

27 Masapul nga iti let-ang ti pagidataganmi iti daton itiApoa Diosmi, a kas iti imbilinna kadakami, ket tallo nga aldaw nga agbiahekami a mapan sadiay.”

28 Kinuna ti ari, “Palubosankayo a mapan agidaton itiApoa Diosyo iti let-ang ngem saankayo nga umadayo unay. Ikarkararagandak.”

29 Kinuna ni Moises, “Apaman a makapanawak, dawatek itiAponga ikkatenna dagiti ngilaw tapno inton bigat, awandanton kenka, kadagiti ofisialesmo ken kadagiti tattaom. Ngem dinakam allilawen manen. Dimo lapdan dagiti tattao a mapan agidatag iti daton itiApo.”

30 Pimmanaw ni Moises ket nagkararag ken ni Yahweh.

31 Pinatgan ni Yahweh ti dawatna. Pinanawan dagiti ngilaw ti ari, dagiti ofisialesna ken dagiti tattaona. Awan ti uray maysa a ngilaw a natda.

32 Ngem kaskasdi latta a timmangken ti puso ti ari ket dina pinalubosan a pumanaw dagiti tattao.

Matay dagiti Animal

1 Kinuna ni Yahweh ken ni Moises, “Inka iti ari ket kunam a paibaga ni Yahweh, ti Dios dagiti Hebreo, a palubosanna a pumanaw dagiti Israelita tapno umayda agdaydayaw kaniak.

2 No lapdannakayo manen,

3 yegko a pangdusak kenkuana ti maysa nga angol a mangikisap kadagiti animalna—dagiti kabalio, asno, kamelio, baka, karnero ken kalding.

4 Ilasinkonto dagiti animal dagiti Israelita kadagiti animal dagiti Egipcio. Awanto ti matay nga animal dagiti Israelita.

5 Siak, ni Yahweh, intudingko ti oras ket mapasamakto daytoy inton bigat.”

6 Iti sumuno nga aldaw, tinungpal ni Yahweh ti imbagana. Natay amin nga animal dagiti Egipcio, ngem awan natay nga animal dagiti Israelita.

7 Dinamag ti ari no ania ti napasamak ket naammoanna nga awan ti natay nga uray maysa nga animal dagiti Israelita. Ngem kaskasdi a natangken ti pusona ket dina pinalubosan dagiti tattao.

Agletteg dagiti Tattao ken Animal

8 Kalpasanna, kinuna ni Yahweh kada Moises ken Aaron, “Mangrakemkayo iti dapu iti urno. Ipurruakto ni Moises daytoy iti ngato iti imatang ti ari.

9 Kaslanto tapok nga agwaras iti entero nga Egipto ket pataudennanto dagiti letteg nga agbalin a gaddil kadagiti tattao ken animal iti amin a lugar.”

10 Nangaladaiti dapu sada napan nagtakder iti sango ti ari. Impurruak ni Moises ti dapu iti ngato ket nagtubo ti letteg kadagiti tattao ken kadagiti animal. Nalapunosda iti letteg.

11 Kas kadagiti dadduma nga Egipcio, nagsagaba met dagiti salamangkero iti gaddil. Nalapunos ti bagida iti gaddil ket saanda nabalinan ti sumango ken ni Moises.

12 Ngem pinatangken ni Yahweh ti ulo ti ari. Dina latta impangag da Moises ken Aaron a kas kinuna ni Yahweh ken ni Moises.

Agtudo iti Yelo

13 Kinuna ni Yahweh ken ni Moises, “Inton bigat, sapaem ti mapan iti ari. Ibagam kenkuana a kastoy ti bilin ni Yahweh, ti Dios dagiti Hebreo, a palubosanna dagiti tattaok tapno umayda agdaydayaw kaniak.

14 Ta itan, saan laeng nga isu ti dusaek no di pay ket dagiti ofisialesna ken dagiti tattao iti sakupna tapno maammoanna nga awan ti kapadak iti entero a lubong.

15 No kinayatko nga inyeg ti didigra a sakit kenkuana ken kadagiti tattaona, natayda koma amin itan.

16 Ngemsaanko nga inaramid ti kasta tapno ipakitak kadakuada ti pannakabalinko tapno agsaknap ti kinalatakko iti entero a daga.

17 Ngem natangsit latta ket dina kayat a pumanaw dagiti tattaok.

18 Iti kasta, pagtudoekto iti yelo iti kastoy nga oras inton bigat. Daytoyto ti kakaroan a panagtudo iti yelo iti pakasaritaan ti Egipto.

19 Ibagam kenkuana a pailinongna dagiti animalna ken kasta met nga aglinong dagiti tattao nga adda iti ruar ta matay dagiti amin a matinnagan.”

20 Nagbuteng ti sumagmamano nga ofisiales ti ari gapu iti sao ni Yahweh ket pinaglinongda dagiti tagabu ken animalda.

21 Ngem adda saan a nangikankano iti ballaag ni Yahweh ket binaybay-anda dagiti tagabu ken animalda iti ruar.

22 Kinuna ni Yahweh ken ni Moises, “Ilayatmo ta imam iti langit tapno agtinnag ti yelo kadagiti tattao, animal ken amin a mula iti entero nga Egipto.”

23 Intag-ay ni Moises ti sarukodna. Nagkimat ken naggurruod ket nagtinnag ti yelo iti Egipto. Inyeg tiApo

24 tikasta unay a yelo a napakuyogan iti agkanabsiit a kimat. Daytoy pay la ti kapigsaan a bagio ti yelo a dimteng iti pagilian manipud nabangon a nasion.

25 Iti entero nga Egipto, natinnagan dagiti amin nga adda iti ruar, agraman dagiti tattao ken dagiti animal. Nadadael amin a mula iti away ket naspak amin a kaykayo.

26 Ti laeng deppaar ti Gosen a pagnaedan dagiti Israelita ti awan nagtinnag a yelo.

27 Pinaayaban ti ari da Moises ken Aaron ket kinunana kadakuada, “Bigbigek itan a siak ti nagbasol! Nalinteg tiApo. Siak ken dagiti tattaok ti nakabasol.

28 Ikararagandakami itiApota madidigrakami la unayen iti gurruod ken yelo. Ikarik a palubosankayon a pumanaw; saankayon nga agyan ditoy.”

29 Kinuna ni Moises kenkuana, “Apaman a makaruarak iti siudad, agkararagakto itiApo. Sumardengton ti gurruod ket awanton ti agtinnag a yelo, tapno maammoam a tiApoti akinkukua iti daga.

30 Ngem ammok a sika ken dagiti ofisialesmo diyo pay la kabuteng tiApoa Dios.”

31 Nadadael dagiti linoken dagiti sebada agsipud ta natangkenanen ti dawa dagiti sebada ken nakabuselen dagiti lino.

32 Ngem saan a naan-ano dagiti trigo ken sentenota maladaw a matangkenan dagiti dawada.

33 Pinanawan ni Moises ti ari. Rimmuar iti siudad ket intayagna dagiti imana a nagkararag itiApo. Simmardeng ti gurruod ken tudo ket awanen ti nagtinnag a yelo.

34 Idi makita ti ari ti napasamak, nagbasol manen ket nagtalinaed a natangken ti pusona, kasta met dagiti ofisialesna.

35 Dina pinalubosan a pumanaw dagiti Israelita kas imbaga ni Yahweh ken ni Moises.

Ti Yaay dagiti Dudon

1 Kinuna ni Yahweh ken ni Moises, “Inka iti ari. Pinatangkenko ti pusona, kasta met dagiti ofisialesna tapno ipakitak kadakuada daytoy a pannakabalinko.

2 Inaramidko dagitoy a milagro tapno masaritamto kadagiti annakmo ken appokom no kasano ti panamagbalinko a maag dagiti Egipcio ket iti kasta, maammoanyonto amin a siak ni Yahweh.”

3 Napan da Moises ken Aaron iti ari ket kinunada kenkuana, “Kastoy ti paibaga tiApoa Dios dagiti Hebreo, ‘Kasano pay ti kabayag ti dimo panagpakumbaba kaniak? Palubosam a pumanaw dagiti tattaok tapno umayda agdaydayaw kaniak.

4 No madika latta, yegko inton bigat dagiti dudon iti pagiliam.

5 Kasta unayto ti kaaduda ket agsaknapdanto agingga a saan a makita ti daga gapu iti kapuskolda. Ibusendanto ti amin a saan a dinadael ti yelo, uray pay dagiti natda a puon ti kayo.

6 Serkendanto dagiti palasiom ken dagiti balay dagiti ofisialesmo ken amin a tattaom. Narangranggasdanto ngem ti aniaman a nakita dagidi kapuonanyo.’” Pimmanaw ni Moises apaman a naisaona daytoy.

7 Kinuna kenkuana dagiti ofisiales ti ari, “Kaanonto nga isardeng daytoy a tao ti panangriribukna kadatayo? Palubosam idan tapno mapanda agdaydayaw itiApoa Diosda. Dimo kadi makita a madadaelen ti Egipto?”

8 Iti kasta, naidatag manen da Moises ken Aaron iti ari.

Kinunana kadakuada, “Mabalinyon ti mapan agdaydayaw itiApoa Diosyo. Ngem siasino dagiti mapan?”

9 Insungbat ni Moises, “Mapankami amin, agraman dagiti annakmi ken dagiti babbaket ken lallakay. Itugotmi dagiti karnero, kalding, ken dagiti bakami. Masapul nga inkami amin ta mangipaaykami iti maysa a parambak itiApo.”

10 Kinuna ti ari kadakuada, “Isapatak itiApoa diak ipalubos nga itugotyo dagiti babbai ken dagiti ubbing! Nalawag a panggepyo ti umalsa.

11 Saan a mabalin! Dagiti laeng lallaki ti mapan agdaydayaw itiApono dayta ti kalikagumanyo.” Apaman a nasaona daytoy, napapanaw da Moises ken Aaron iti saklang ti ari.

12 Kinuna ni Yahweh ken ni Moises, “Yunnatmo ta imam iti daga ti Egipto tapno tumaud dagiti dudon. Umaydanto ibusen ti amin a mula a natda idi nagtinnag dagiti yelo.”

13 Inlayat ni Moises ti sarukodna iti daga ti Egipto. Pinataud ni Yahweh ti angin manipud iti daya ket nagmalmalem ken nagpatpatnag a nagpuypuyopoy. Kabigatanna, inyeg ti angin dagiti dudon.

14 Pinangenpangendaa dimteng ket nagdissoda iti amin a lugar iti pagilian. Daytoy pay la ti kapuskolan a pangen ti dudon a timmaud ket awanen ti kastoy a kaadu, uray iti masakbayan.

15 Uray la ngimmisit ti daga iti kaaduda; inibusda amin a tedda ti yelo, agraman dagiti bunga dagiti kayo. Awan ti bulong a natda iti kayo wenno mula iti entero nga Egipto.

16 Dinardaras ti ari a pinaayaban da Moises ken Aaron ket kinunana kadakuada, “Nakabasolak itiApoa Diosyo, kasta met kadakayo.

17 Pangngaasiyo ta pakawanenyo ti basolko, uray ita laeng. Idawdawatyo itiApoa Diosyo nga ikkatenna kaniak daytoy makapatay a dusa.”

18 Pimmanaw ni Moises ket nagkararag ken ni Yahweh.

19 Binaliwan ni Yahweh ti turongen ti angin a naggapu iti daya. Pinagbalinna a nakapigpigsa a naggapu iti laud a nangitayab kadagiti dudon ket impanna ida iti Baybay a Nalabaga.Pulos nga awan ti natda a dudon iti entero a daga ti Egipto.

20 Ngem pinatangken ni Yahweh ti puso ti ari ket dina impalubos a pumanaw dagiti Israelita.

Agsipnget ti Daga

21 Kinunani Yahweh ken ni Moises, “Ingatom ta imam tapno makumotan ti entero nga Egipto iti nakaro a sipnget nga uray la agar-arikap dagiti tattao.”

22 Ingngatoni Moises ti imana ket nagsipnget ti entero nga Egipto. Tallo nga aldaw a nakumotan ti pagilian iti napuskol a sipnget.

23 Saan a makapagkikinnita dagiti Egipcio, isu nga awan ti rimmuar iti balayna kabayatan dayta a tiempo. Ngem nalawag ti lugar a pagnaedan dagiti Israelita.

24 Inayaban ti ari ni Moises. Ket kinunana kadakuada, “Mabalinyon ti mapan agdaydayaw itiApo. Itugotyo dagiti babbai ken ubbingyo, ngem mabati dagiti karnero, kalding ken bakayo.”

25 Kinuna ni Moises, “No kasta ngarud, masapul nga ikkannakami kadagiti animal a puoranmi nga idaton itiApoa Diosmi.

26 Ngem kasapulan nga ikuyogmi dagiti animalmi; awan ti uray maysa a mabati. Ket pilienmi dagiti animal a pagdaydayaw itiApoa Diosmi. Dimi pay ammo no ania dagiti idatonmi agingga a makadanonkami iti lugar a pagdaydayawanmi kenkuana.”

27 Pinatangken ni Yahweh ti puso ti ari ket dina impalubos a pumanaw dagiti Israelita.

28 Kinuna ti ari ken ni Moises, “Pumanawka ditoy ket saankan nga agpakpakita kaniak! Papapatayka iti kanito nga agpakitaka kaniak.”

29 “Matungpal ti bilinyo,” kinuna ni Moises, “saandakton a makita.”