Category: Exodo

Dagiti Linteg maipapan kadagiti Tagabu

1 “Ipaulogmo dagitoy a linteg kadagiti Israelita:

2 Nogumatangkayo iti lalaki a tagabu a Hebreo, agserbinto kadakayo iti innem a tawen. Iti maikapito a tawen, mawayawayaanto nga awan bayadanna.

3 No awan asawana idi magatang, pumanawto met nga awan asawana. Ngem no adda asawana idi magatang, pumanawto agraman ti asawana.

4 No ikkan ti amongna iti asawa ket aganak, kukua ti amongna ti asawana ken ti tunggal anakna. Ti lalaki laeng ti pumanawto.

5 Ngem no dina kayat gapu ta ay-ayatenna ti amongna, ti asawa ken dagiti annakna, ket dina kayat ti mawayawayaan,

6 ipanto ngarud ti amongna iti lugar a pagdaydayawan. Sadiay, pagtakderento ti amongna iti ruangan wenno iti baotek ti ruangan ket tebbengannanto. Ket tagabunanto agingga’t tungpal biagna.

7 “No ilako ti maysa nga ama ti anakna a babai a kas tagabu, saanto a mawayawayaan daytoy a kas iti pannakawayawaya ti tagabu a lalaki.

8 No mailako iti agpanggep a mangasawa kenkuana ngem dinto kayat ti lalaki, masapul a sakaen met laeng ti amana. Awan kalintegan ti amongna a mangilako kenkuana kadagiti ganggannaet ta saan a nasayaat ti panangtratarna kenkuana.

9 No gumatang ti maysa a tao iti babai a tagabu nga ipaasawana iti anakna, masapul nga ibilangna a kas bukodna nga anak.

10 No mangasawa dayta a lalaki iti sabali, masapul nga ituloyna nga ited ti sigud a taraon, kawes ken kalinteganna.

11 No dina tungpalen dagitoy a pagrebbengan, masapul a wayawayaanna ti babai ket saanen a masapul nga agbayad ti babai iti pannakawayawayana.

Dagiti Linteg maipapan iti Kinaranggas

12 “Siasinomana mangkabil iti maysa a tao a pakaigapuan ti ipapatayna, rumbeng met a mapapatay.

13 Nodina inggagara wenno pinanggep a patayen, mabalinna ti mapan agkamang iti lugar nga itudingkonto ket awanto ti pakaan-annoanna sadiay.

14 Ngem no makapungtot ti maysa a tao ket igagarana a patayen ti sabali, masapul a mapapatay uray no agkamang iti altarko.

15 “Siasinoman a mangkabil iti ama wenno inana, rumbeng a mapapatay.

16 “Siasinomana mangkidnap iti maysa a tao tapno ilako wenno tagabuenna, rumbeng a mapapatay.

17 “Siasinomana mangilunod iti ama wenno iti inana, rumbeng a mapapatay.

18 “No adda agapa ket madunor ti maysa babaen iti bato wenno gemgemna, saan a madusa no saan a matay ti dinangranna. Ngem no maidalit ti nadangran,

19 ket mabalinna ti bumangon ken magna uray no agsarukod, bayadan ti nakadunor dagiti aldaw a napukawna ken taripatoenna agingga nga umimbag.

20 “Siasinoman a mangpang-or iti tagabuna, lalaki man wenno babai, rumbeng a madusa no matay a dagus ti pinang-orna.

21 Ngem no saan a matay ti tagabu kalpasan ti maysa wenno dua nga aldaw, saan a madusa ti amo ta umdasen a dusana ti pannakapukaw ti tagabuna.

22 “No adda agkakabil a lallaki ket masaktanda ti maysa a masikog a pakaigapuan ti pannakaalisna ngem awanen ti sabali a dunorna, mamulta ti nakadunor iti gatad nga ikeddeng ti asawa ti nadangran, kas mayannurot iti inkeddeng ti ukom.

23 Ngem no madunor ti babai, madusa ti nangdangran: biag iti biag,

24 mataiti mata, ngipen iti ngipen, ima iti ima, saka iti saka,

25 puor iti puor, sugat iti sugat, dunor iti dunor.

26 “No kabilen ti maysa a tao ti tagabuna, lalaki man wenno babai ket nabuldinganna, rebbengna a wayawayaan ti tagabu a kas bayad ti matana.

27 Ket no natuppolanna ti tagabu, rebbengna a wayawayaan a kas bayad ti ngipenna.

Pagrebbengan dagiti Agtagikua

28 “No matay ti siasinoman a sangdoen ti baka, masapul a maubor ti baka agingga a matay ket saan a sidaen ti karnena; nupay kasta, saan a madusa ti akimbaka.

29 Ngem no sumasangdo ti baka ken napakdaaran ti akinkukua ngem dina ipupok, ket matay ti tao a sinangdona, maubor ti baka agingga a matay; mapapatay pay ti akinkukua.

30 Ngem no mapalubosan nga agmulta ti akimbaka tapno maispal ti biagna, bayadanna ti amin a naikeddeng a pagbayad.

31 No ubing a lalaki wenno babai ti mapatay ti baka, daytoy met laeng a linteg ti masurot.

32 No tagabu a lalaki wenno babai ti mapatayna, agbayad ti akimbaka iti 30 a bagi ti pirak iti among ti tagabu ket mabato ti baka agingga a matay.

33 “No ikkaten ti maysa a tao ti kalub ti abut a pagurnongan iti danum wenno agkali iti sabali sa dina kaluban ket adda baka wenno asno a matnag ditoy,

34 masapul a bayadanna ti animal. Itedna ti kuarta iti akinkukua iti abut ket alaenna ti natay nga animal.

35 No ti baka ti maysa a tao patayenna ti baka ti sabali, mailako ti sibibiag a baka sada pagguduaan ti naglakoanda. Pagguduaanda met ti natay nga animal.

36 Ngem no ugali ti baka ti sumangdo ngem saan nga ipupok ti akimbaka, masapul a sukatanna iti sibibiag a baka, ket kukuana metten ti natay nga animal.

Dagiti Linteg iti Panagbayad

1 “No takawen ti maysa a tao ti maysa a baka wenno karnero ken partienna wenno ilakona, lima a baka ti isukatna iti maysa a baka ken uppat met a karnero ti isukatna iti maysa a karnero.

2-4 Masapul a bayadanna ti tinakawna. No awan ti pagbayadna, isu ti mailako. No ti natakaw nga animal, baka man wenno asno wenno karnero, ket masarakan a sibibiag iti ikutna, dua ti isukatna.

“No matiliwan ti mannanakaw nga agtaktakaw iti rabii iti maysa a balay ket mapapatay, awan sungsungbatan ti pimmatay. Ngem no mapasamak daytoy iti aldaw, makabasol ti pimmatay.

5 “No ipaarab ti maysa a tao dagiti animalna ket makabulosda sada mapan araben ti mulati sabali a tao, masapul nga isukatna dagiti kasayaatan nga apit iti bukodna a talon wenno kaubasan.

6 “No agpuor ti maysa a tao iti talonna ket agkayamkam ti apuy a mangsilmut kadagiti ruot iti talon ti sabali ket mapuoran dagiti dumakdakkel a trigo wenno dagiti pempen a dawa, masapul a bayadan ti nagpuor ti amin a nadadael.

7 “No italek ti maysa a tao ti kuarta wenno aniaman a sanikuana iti sabali a tao ket matakaw dagitoy iti balay ti nagpaidulinanna, doble ti pagbayad ti matiliwan a nangtakaw.

8 No saan a masarakan ti nagtakaw, maidatag ti nagpaidulinanna iti Dios ket isapatana a dina tinakaw dagiti sanikua.

9 “Amin a kaso a pakaseknan iti sanikua, baka man wenno asno wenno karnero wenno pagan-anay wenno aniaman a napukaw, maipanda iti imatang ti Dios. Maidatag iti pagdaydayawan dagiti mangibaga a kukuada ti sanikua, ket ti siasinoman a sentensiaan ti Dios, doble ti bayadanna iti pudno nga agtagikua.

10 “No umanamong ti maysa a tao nga aywananna ti asno wenno baka wenno karnero wenno uray ania nga animal ti sabali a tao, ket matay ti animal wenno masugatan wenno maitalaw, no awan ti makasaksi iti naaramid, masapul nga

11 agsapata ti nagan tiApoiti disso a pagdaydayawan a dina tinakaw ti animal. No saan a natakaw ti animal, ibilang ti akinkukua a kas pukawna ket saan a masapul nga agbayad ti nangaywan.

12 Ngem no matakaw ti animal, masapul nga agbayad ti agaywan.

13 No pinatay dagiti narungsot nga animal, masapul nga ipakita ti agaywan ti narangrangkay nga animal a kas pammaneknek. Saan a nasken a bayadanna ti pinatay dagiti narungsot nga animal.

14 “No buloden ti maysa a tao ti animal ti sabali ket masugatan wenno matay a saan a nakita ti akinkukua, masapul a bayadanna ti animal.

15 Ngem no mapasamak ti kasta iti imatang ti akinkukua, saan a masapul nga agbayad ti nangbulod. No naabangan ti animal, umdas ti abangna a pagbayadna iti natay nga animal.

Linlinteg iti Moralidad ken Relihion

16 “Nosulisogen ti maysa a lalaki ti balasang a birhen a saan a naitulag a mayasawa ket kaiddaenna, masapul nga ikasarna ti babai kalpasan iti pannangtedna iti sab-ong.

17 Ngem no madi ti ama ti babai nga ipaasawa ti anakna, masapul nga ited ti lalaki ti naituding a gatad ti sab-ong; yawatna daytoy iti ama ti babai.

18 “Papatayenyoti babai a manggagamud.

19 “Papatayenyoti siasinoman a makikaidda iti animal.

20 “Papatayenyoti siasinoman nga agidaton iti uray ania a didiosen, ta siak laeng, ni Yahweh, ti pagidatonan.

21 “Diyoranggasan wenno idadanes ti ganggannaet. Laglagipenyo a ganggannaetkayo met idi idiay Egipto.

22 Diyo irurumen ti uray siasinoman a balo wenno ulila.

23 No aramidenyo ti kasta, siak, ni Yahweh, ipangagkonto ti asug dagiti agpatulong kaniak.

24 Sumgedto ti pungtotko ket patayenkayto iti gubat. Mabalonto dagiti assawayo ket maulilanto dagiti annakyo.

25 “Noumutang kadakayo ti siasinoman a napanglaw a tattaok, diyo tultuladen ti usurero a paanakanna ti ipautangna.

26 Noalaenyo ti kagay ti siasinoman a kas pangigawidyo iti utangna, masapul nga isubliyo sakbay a lumnek ti init;

27 ta dayta laeng ti pagimengna pangpapudot iti bagina. Anianto pay ti pagturogna? Inton umasug kaniak a patulongan, ipangagkonto agsipud ta manangngaasiak.

28 “Dikayagsao iti maibusor iti Diosket diyo ilunod ti siasinoman a panguloyo.

29 “Itedyo kaniak a dagus dagiti daton nga agtaud iti apit, iti arak ken iti lanayo no tiempo ti panagited.

“Itedyo kaniak ti inauna nga anakyo a lalaki,

30 agraman ti inauna a kalakian dagiti baka ken karneroyo; agyan pay laeng ti urbon iti inana iti las-ud ti pito nga aldaw ket maidaton kaniak iti maikawalo nga aldaw.

31 “Dakayodagiti tattaok, isu a dikay agsida iti karne ti animal a pinatay dagiti narungsot nga ayup. Itedyo ketdi dagitoy kadagiti aso.

Ti Hustisia ken ti Umisu a Panangikeddeng

1 “Dikayagiwaras iti sao nga awan kinapudnona. Dikay tulongan ti tao a nagbasol babaen iti panagsaksiyo iti ulbod.

2 Diyo suroten ti kaaduan no agaramidda iti dakes wenno agulbodda tapno dadaelenda ti hustisia.

3 Ngemdiyo ipakita nga ayonanyo ti napanglaw bayat ti pannakaidarumna.

4 “Nomakitayo a nakabulos ti baka wenno asno ti kabusoryo, tiliwenyo ket isubliyo kenkuana.

5 No nakusbo ti asnona gapu iti nadagsen nga awitna, diyo baybay-an ngem tulonganyo ketdi a mangpatakder.

6 “Nomaisaklang ti napanglaw, diyo ipaidam ti hustisia kenkuana.

7 Dikay agpabasol no awan pammaneknekyo. Diyo papatayen ti tao a nalinteg ken awan basolna. Dusaek ti siasinoman nga agaramid iti kasta a kinadakes.

8 Dikay umawat iti pasuksok, ta ti pasuksok pagbulsekenna ti tao ket dina makita ti nalinteg ken dadaelenna ti kalintegan dagiti awan basolna.

9 “Diyoidadanes ti ganggannaet. Ammoyo ti rikna ti maysa a ganggannaet ta ganggannaetkayo met idi idiay Egipto.

Ti Maikapito a Tawen ken ti Maikapito nga Aldaw

10 “Mulaanyoti dagayo iti las-ud ti innem a tawen ket urnongenyo ti maapit.

11 Ngem iti maikapito a tawen, diyo mulmulaan ket diyo met ap-apiten ti aniaman nga agtubo. Bay-anyo nga agpaay kadagiti napanglaw ti aniaman nga agtubo ket baginto met dagiti atap nga animal ti matda. Kasta met ti aramidenyo kadagiti mulayo nga ubas ken olibo.

12 “Innemnga aldaw nga agtrabahokayo, ngem aginanakayo iti maikapito nga aldaw tapno makainana dagiti tagabu ken ganggannaet nga agtartrabaho kadakayo, kasta met dagiti baka ken asnoyo.

13 “Ipangagyo ti amin nga imbagak kadakayo. Dikay agkararag kadagiti didiosen wenno baliksen la koma dagiti naganda.

Dagiti Tallo a Kangrunaan a Fiesta

14 “Tallo a fiesta ti rambakanyo iti tinawen kas pammadayaw kaniak.

15 Itibulan ti Abib, ti bulan nga ipapanawyo idi idiay Egipto, rambakanyo ti Fiesta ti Tinapay nga Awan Lebadurana. Kas imbilinko kadakayo, tinapay laeng nga awan lebadurana ti kanenyo iti las-ud ti pito nga aldaw bayat ti fiesta. Dikay umay agdaydayaw kaniak no awan ti idatonyo.

16 “Rambakanyoti Fiesta ti Panagapit babaen iti panangidatonyo ti umuna a maapit kadagiti talonyo.

“Rambakanyo ti Fiesta ti Abong-abong iti panaggibus ti tawen, inton burasenyo ti bunga dagiti kaubasan ken minuyonganyo.

17 Tunggal tawen, kadagitoy a fiesta, masapul nga umay dagiti amin a lallaki tapno agdaydayawda kaniak ngaApoa Diosyo.

18 “Diyo pakuyogan iti tinapay nga adda lebadurana ti dara ti animal nga idatonyo kaniak. Diyo met ipabigat ti taba dagiti animal a maidatag kaniak kadagitoy a fiesta.

19 “Yegyoiti balay ni Yahweh a Diosyo ti bunga ti umuna nga apit ti talonyo tunggal tawen.

“Diyo lutoen ti urbon a karnero wenno kalding iti gatas ti inana.”

Dagiti Kari ken Balakad

20 “Ibaonko ti maysa nga anghel nga umun-una ngem dakayo tapno salaknibannakayo iti panagdaliasatyo ken ipannakayo iti lugar nga insaganak.

21 Ipangagyo ket tungpalenyo ti amin nga ibagana. Diyo sukiren gapu ta siak ti nangibaon kenkuana ket dinto mapakawan ti siasinoman nga agsukir.

22 Ngem no ipangagyo ket aramidenyo ti amin nga ibagak, gubatek dagiti amin a kabusoryo.

23 Idalannakayto ti anghelko. Ipannakayo iti daga dagiti Amorreo, Heteo, Perezeo, Cananeo, Heveo ken Jebuseo ket dadaelekto ida.

24 Dikay agrukbab wenno agdaydayaw kadagiti didiosenda. Diyo tuladen dagiti ar-aramidenda. Dadaelenyo dagiti didiosenda ket rebbaenyo dagiti nasantoan a bato nga adigida.

25 No agdaydayawkayo kaniak, ni Yahweh a Diosyo, ikkankayo iti makan ken danum ken ilisikayo kadagiti amin a kita ti sakit.

26 Iti dagayo, awanto ti babai a maalisan ket awanto met ti lupes. Ikkankayto iti atiddog a biag.

27 “Gapu iti aramidek, agbutengto kaniak dagiti amin a bumusor kadakayo ket kiburekto dagiti kagubatyo. Pagsanudekto amin a kabusoryo ket itarayandakayto.

28 Kellaatekto dagiti kabusoryo ket agtataraydanto amin nga agkakaribuso.Paksiatekto dagiti Heveo, Cananeo, ken Heteo inton sumungadkayo.

29 Saankonto pay laeng a pagtalawen amin ida iti uneg ti maysa a tawen tapno saan a mabaybay-an ti daga ken saan nga umadu unay dagiti atap nga animal a pagpeggadanyo.

30 In-inutekto a papanawen ida agingga nga umadukayo ket kabaelanyo a tagikuaen ti daga.

31 Mangruginto ti beddengyo iti Baybay a Nalabagaagingga iti Baybay a Mediterranean ken manipud let-ang agingga iti Karayan Eufrates. Ikkankayto iti pannakabalin a mangparmek kadagiti taga-sadiay ket pagtalawenyonto ida iti isusungadyo.

32 Dikay makitulag kadakuada wenno kadagiti didiosenda.

33 Diyo ipalubos nga agnaed dagitoy a tattao iti pagilianyo. No ipalubosyo nga agnaedda, pagbasolendakayto iti maibusor kaniak. No agdaydayawkayo kadagiti didiosenda, isunto ti pakaigapuan ti pannakadadaelyo.”

Mapatalgedan ti Tulag

1 Kinuna ni Yahweh ken ni Moises, “Sumang-atka ditoy bantay. Itugotmo da Aaron, Nadab, Abiu ken ti pitopulo kadagiti panglakayen ti Israel. Inton adayokayo pay laeng iti ayanko, agkurnokayo iti panagdaydayaw.

2 Sikanto laeng ti umasideg. Dinto umasideg dagiti kakadduam. Ket saan met a mapalubosan dagiti tattao a sumang-at iti bantay.”

3 Napan imbaga ni Moises kadagiti tattao ti amin a bilin ken alagaden nga inted ni Yahweh. Sangsangkamaysada amin a simmungbat, “Aramidenmi ti amin nga imbaga tiApo.”

4 Insurat ni Moises dagiti amin a bilin ni Yahweh.

Iti agsapa iti sumuno nga aldaw, nangbangon iti altar iti arisadsad ti bantay ken nangipatakder iti 12 a baton-lagip a mangibagi kadagiti 12 a tribu ti Israel.

5 Kalpasanna, binilinna ti sumagmamano nga agtutubo a lallaki a mangpuor kadagiti animal a kas sagut ken ni Yahweh ken mangidatag iti sumagmamano a toro a baka a kas daton a pakikappia.

6 Inkabil ni Moises kadagiti palanggana ti kagudua ti dara dagiti napapatay nga animal ket insuyatna iti altar ti nabati.

7 Innalana ti libro ti tulag a nakailanadan dagiti bilin ni Yahweh sana binasa iti napigsa. Kinuna dagiti tattao, “Agtulnogkami itiApoket tungpalenmi amin nga imbilinna.”

8 Innalani Moises ti dara nga adda kadagiti palanggana ket winarisanna dagiti tattao. Kinunana, “Daytoy ti dara a mangpatalged iti pannakitulag tiApokadakayo idi intedna amin dagitoy a bilin.”

9 Simmang-at da Moises, Aaron, Nadab, Abiu ken ti 70 kadagiti panglakayen ti Israel iti bantay.

10 Nakitada ti Dios ti Israel. Adda iti babaen ti sakana ti umasping iti pagnaan a nabaldosaan iti safiro ken asul a kas iti tangatang.

11 Saan nga inan-ano ti Dios dagitoy a panglakayen iti Israel. Nakitada ti Dios. Kalpasanna, nagpapangan ken nagiinumda.

Ni Moises iti Tapaw ti Bantay Sinai

12 Kinuna ni Yahweh ken ni Moises, “Sumang-atka iti bantay ket umayka iti ayanko. Agyanka ditoy ket itedkonto kenka dagiti dua a tapi a bato a nakailanadan dagiti linteg ken bilin nga insuratko nga annuroten dagiti tattao.”

13 Nagsagana ni Moises ken ni Josue a katulonganna ket simmang-at ni Moisesiti nasantoan a bantay.

14 Kinuna ni Moises kadagiti panglakayen, “Urayendakami ditoy agingga nga agsublikami. Mabati da Aaron ken Hur. Isuda ti papanan ti siasinoman nga adda parikutna.”

15 Simmang-at ni Moises ket adda ulep a nangkumot iti Bantay Sinai.

16-17 Bimmaba iti rabaw ti bantay ti makapurar a lawag a mangipakdaar iti kaadda ni Yahweh. Iti panagkita dagiti Israelita, ti lawag ket kasla apuy a gumilgil-ayab iti tapaw ti bantay. Innem nga aldaw a kinumotan ti ulep ti bantay. Iti maikapito nga aldaw, manipud iti ulep, inawagan ni Yahweh ni Moises.

18 Simrekni Moises iti ulep iti isasang-atna iti bantay. Nagyan idiay iti las-ud ti 40 nga aldaw ken rabii.

Sagsagut para iti Santuario

1-2 Kinuna ni Yahweh ken ni Moises, “Ibagam kadagiti Israelita a mangipaayda iti sagut kaniak. Awatem ti aniaman a sagut nga ited ti siasinoman.

3 Dagitoy ti idatonda: balitok, pirak ken bronse;

4 di pay naabel a de lana, a natayengteng nga asul, ube ken nalabaga ti marisda; nafino a linen, lupot a naaramid iti dutdot ti kalding;

5 nakorte a lalat ti kalakian a karnero, nafino a lalat, ken kayo ti akasia.

6 Mangidatonda met iti lana para kadagiti pagsilawan, dagiti bangbanglo a mailaok iti lana a pagkonsagrar ken iti naayamuom nga insenso;

7 dagiti nangina a bato a karnelia ken dadduma a nangina a bato a pagtampok iti efodken pektoral ti Kangatoan a Padi.

8 Masapul a yaramidandak dagiti tattao iti santuario tapno agnaedak kadakuada.

9 Aramidenyo ti tabernakulo ken ti amin nga alikamenna kas mayannurot iti plano nga ipakitak kenka.

Ti Lakasa ti Tulag

10 “Ibagam kadagiti tattao a mangaramidda iti Lakasa nga akasia; 45 a pulgada ti kaatiddog, 27 a pulgada ti kaakaba ken 27 a pulgada ti kangatona.

11 Kalupkopam iti puro a balitok iti uneg ken ruarna. Paikingam iti balitok iti aglikmut.

12 Yaramidam iti uppat a pagyusokan a balitok ket ikabilmo ida kadagiti sakana a sagdudua iti agsumbangir.

13 Mangaramidka kadagiti assiw nga akasia a kalupkopam iti balitok.

14 Ikabilyo dagiti assiw kadagiti pagyusokan iti agsumbangir ti Lakasa.

15 Diyo ikkaten dagiti assiw iti pagyusokan.

16 Ikabilmo iti uneg ti Lakasa dagiti dua a tapi a bato a nakailanadan dagiti bilin nga itedkonto kenka.

17 “Mangaramidkaiti kalubna iti puro a balitok: 45 a pulgada ti kaatiddog ken 27 a pulgada ti kaakabana.

18 Mangaramidka iti dua a sinan-kerubimiti napitpit a balitok,

19 maysa iti agsumbangir a pungto. Aramidem dagitoy a sangsangkanayon iti kalub.

20 Agsinnangoda a nakaukrad dagiti payakda iti ngatoenda tapno malinongan ti kalub. Situturong dagiti rupada iti kalub.

21 Ikabilmo iti uneg ti Lakasa dagiti dua a tapi a bato samonto iparabaw ti kalub a simbolo ti trono ti kaasi.

22 Sadiayto ti pangsarakak kadakayo. Iti ngatoen ti kalub ken iti nagbaetan dagiti dua a sinan-kerubim nga adda iti rabaw ti Lakasa, itedkonto kenka ti amin a bilinko nga annuroten dagiti Israelita.

Ti Lamisaan dagiti Tinapay a Maidaton iti Dios

23 “Mangaramidka iti lamisaan nga akasia 36 a pulgada ti kaatiddog, 18 a pulgada ti kaakaba ken 27 a pulgada ti kangatona.

24 Kalupkopam iti puro a balitok ket paikingam iti balitok ti aglikmutna.

25 Pagdawadawem iti aglikmut iti tallo a pulgada ti kaakabana ket paikingam iti balitok.

26 Mangaramidka iti uppat a balitok a pagyusokan ket ikapetmo kadagiti uppat a suli nga ayan dagiti sakana.

27 Ikabilmo dagiti pagkursongan ti assiw iti lamisaan iti asideg ti agdawadaw.

28 Akasia dagiti aramidem nga assiw a makalupkopan iti balitok.

29 Agaramidka kadagiti lunglongan a puro a balitok a pinggan, tasa, pitser, ken malukong a mausar kadagiti daton nga arak.

30 Maikabilti lamisaan iti sango ti Lakasa ti Tulag ket iti rabaw ti lamisaan, masapul nga adda latta ti tinapay a maidaton kaniak.

Ti Kandelero

31 “Mangaramidka iti kandelero a puro a balitok. Aramidem ti puon ken ungkayna iti napanday a balitok. Sangsangkanayon iti kandelero dagiti arkosna a kimmopa a sabong ken busel.

32 Innem ti sangana—tallo iti agsumbangir—

33 ket masapul nga addaan ti tunggal sanga iti tallo a kimmopa a sabong a masukog a kas iti sabong ti almendras.

34 Yaramidam met ti ungkay ti kandelero iti uppat a kimmopa a sabong a kas kadagiti naikabit kadagiti sanga.

35 Masapul nga adda busel iti baba ti tunggal maysa kadagiti tallo a paris a sangsanga.

36 Sangsangkanayon dagiti busel ken dagiti sanga ken ti kandelero; maaramidda iti puro a napanday a balitok.

37 Mangaramidka iti pito a pagsilawan a maikabil iti kandelero ket isaadmo tapno agpasango ti lawagda.

38 Mangaramidka kadagiti sipit ken pagarsangan a puro a balitok.

39 Usarem ti 35 a kilogramo a puro a balitok a pangaramidmo iti kandelero ken amin dagitoy nga arruaten.

40 Kitaemta aramidem dagitoy a kas mayannurot iti plano a naipakita kenka idiay bantay.

Ti Tolda ti Dios

1 “Aramidem ti akin-uneg a paset ti santuario, ti Tolda ti Dios,iti sangapulo a kurtina a naabel iti nalamuyot a linen ken de lana nga asul, ube ken nalabaga. Pabordaam dagitoy kadagiti imahen dagiti kerubim.

2 Pagpapadaem ti rukod ti tunggal kurtina: 12 a metro ti kaatiddogna ken dua a metro ti kaakaba.

3 Lima a kurtina ti pagsasaipem iti maysa a naig; kasta met ti aramidem kadagiti dadduma a kurtina.

4 Yaramidam iti pagyusokan nga asul a lupot iti pingir iti akinruar dagiti dua a bengbeng a napagsasaip.

5 Ikkam iti 50 a pagyusokan iti umuna a kurtina iti umuna a naig. Kasta met ti aramidem iti maudi a kurtina iti maikadua a naig.

6 Mangaramidka iti 50 a balitok a kawit a mamagkamang kadagitoy dua a naig tapno sangsangkanayonda.

7 “Mangaramidka iti linong ti Tolda ti Dios iti sangapulo ket maysa a pedaso a lupot a naabel iti dutdot ti kalding.

8 Pagpapadaem ti rukodda: 13 a metro ti kaatiddog ken dua a metro ti kaakaba.

9 Pagsasaipem ti lima a pedaso; kasta met ti aramidem kadagiti innem a pedaso. Kulpiem ti maikanem a pedaso tapno agdawatdaw iti sango ti Tolda ti Dios.

10 Ikkam iti 50 a pagyusokan ti pingir ti maudi a pedaso iti maysa a naig; kasta met iti sabali a naig.

11 Mangaramidka iti 50 a bronse a kawit ket yusongmo kadagiti pagyusokan a mamagkamang kadagiti dua a naig tapno mabukel ti maysa nga abbong.

12 Aguy-oy ti kagudua ti pedaso ti tolda iti likud ti Tolda ti Dios.

13 Aguy-oy met kadagiti sikigan ti Tolda ti Dios ti kagudua a yarda a surok ti pedaso iti agsumbangir ti kaatiddog ti tolda tapno abbonganna ti tabernakulo.

14 Mangaramidka iti dua nga abbong, maysa iti napalabbaga a lalat ti kalakian a karnero ket ti maysa iti nafino a lalat nga agpaay nga akinruar nga abbong.

15 “Akasia dagiti aramidem a bastidor ti tabernakulo.

16 Sangapulo ket lima a kadapan ti kaatiddog ken 27 a pulgada ti kaakaba ti tunggal bastidor.

17 Ikkam iti dua nga agpada a sunta a mamagkamang kadagiti bastidor. Suntaam ti amin a bastidor.

18 Mangaramidka iti 20 a bastidor a maikabil iti bangirna ti abagatan.

19 Mangaramidka met iti 40 a pirak a pagbatayan dagiti bastidor; dua a pagbatayan ti tunggal bastidor ket dagitoy ti pagsaadan dagiti suntana.

20 Duapulo a bastidor ti aramidem para iti bangirna iti amianan.

21 Mangaramidka pay iti 40 a pirak a pagbatayan; dua a pagbatayan iti tunggal tabla.

22 Para iti likudan ti Tolda iti bangirna iti laud, mangaramidka iti innem a bastidor

23 ken dua a bastidor a maikabil kadagiti nagsulian.

24 Agkakamang dagiti pasuli a bastidor iti umuna a pagyusokan, manipud iti baba agingga iti tuktok. Kastoy ti pannakaaramid dagiti dua a bastidor iti dua a suli.

25 Iti kasta, addanto walo a bastidor, agraman dagiti 16 a pirak a pagbatayanda, dua ti pagbatayan ti tunggal bastidor.

26 “Mangaramidka iti 15 a balunet a kayo nga akasia, lima para kadagiti bastidor iti maysa a bangir ti Tolda,

27 lima para kadagiti bastidor iti sabali a bangir, ken lima para kadagiti bastidor iti bangirna iti laud, iti likudan.

28 Masapul nga aglayon ti nagtengnga a balunet a naikapet iti nagtengngaan dagiti bastidor manipud iti maysa a pungto ti Tolda agingga iti sabali a pungto.

29 Kalupkopam dagiti bastidor iti balitok ket kaptam iti balitok nga argolia a mangtengngel kadagiti balunet a nakalupkopan met iti balitok.

30 Bangonem ti Tolda ti Dios a kas mayannurot iti plano a naipakita kenka iti bantay.

31 “Mangaramidka iti kurtina iti nafino a linen a naabel iti delana nga asul, ube ken nalabaga. Bordaam kadagiti imahen dagiti kerubim.

32 Ibitinmo ti kurtina kadagiti uppat a poste a kayo nga akasia a nakalupkopan iti balitok; adda kawitda ken naisaad kadagiti uppat a pirak a pagbatayan.

33 Ibitinmoti kurtina kadagiti naintar a kawit nga adda iti baba ti Tolda ket ikabilmo ti Lakasa ti Tulag a nakaidulinan dagiti tapi a bato iti likudan ti kurtina. Adda ti kurtina iti nagbaetan ti Nasantoan a Disso ken ti Kasasantoan a Disso.

34 Ikabilmo ti kalub iti rabaw ti Lakasa ti Tulag.

35 Iti Nasantoan a Disso, yapiringmo ti lamisaan iti Tolda iti bangirna iti amianan ken ti kandelero iti bangirna iti abagatan.

36 “Yaramidam met ti ruangan ti Tolda iti kurtina a gapuanan ti agborborda ken naaramid iti nafino a linen a naabel iti delana nga asul, ube ken nalabaga.

37 Yaramidam ti kurtina iti lima a poste nga akasia a makalupkopan iti balitok, ken makaptan kadagiti balitok a kawit. Mangaramidka iti lima a bronse a pagbatayan dagitoy a poste.

Ti Altar

1 “Mangaramidka iti altar a kayo nga akasia. Kuadrado ti altar: 7 1/2 a kadapan ti kaatiddogna, 7 1/2 a kadapan ti kaakaba, ken 4 1/2 a kadapan ti kangatona.

2 Ikkam kadagiti sinan-saranga agdawadaw kadagiti uppat a sulina ket sangsangkanayonda iti altar a makalupkopan met iti bronse.

3 Mangaramidka kadagiti bronse nga alikamen ti altar: dagiti palanggana a pagikkan kadagiti dapu ti napuoran a taba, dagiti pala, malukong, pagadaw ken pagikkan iti beggang.

4 Agaramidka met iti bronse a barandilias ket kabitam ti tunggal sulina iti argolia a pagbaklayan.

5 Ikapetmo ti barandilias iti sirok ti agdawadaw a paset ti altar tapno danonenna ti gudua ti kangato ti altar.

6 Mangaramidka kadagiti assiw nga akasia a makalupkopan iti bronse.

7 No awitenyo ti altar, yusokyo dagiti assiw kadagiti argolia iti tunggal sulina.

8 Tabla ti aramidem nga altar ket awan nagyan iti unegna, kas mayannurot iti plano nga impakitak kenka iti bantay.

Bakud ti Tolda ti Dios

9 “Kas bakud ti Tolda ti Dios, agaramidka kadagiti kurtina iti nafino a linen. Iti bangirna iti abagatan, 50 a yarda ti kaatiddog dagiti kurtina,

10 a maibitin kadagiti duapulo a bronse a poste a maipatakder kadagiti duapulo a bronse a pagbatayan. Pirak dagiti kawit dagiti poste ken dagiti pasikkilda.

11 Kasta met ti aramidem iti bangirna iti amianan ti bakud.

12 Iti bangirna iti laud, 25 a yarda ti kaatiddog dagiti kurtina nga addaan sangapulo a poste ken sangapulo a pagbatayan.

13 Iti bangirna iti daya, nga ayan ti ruangan, 25 a yarda ti kalawa ti mabakudan.

14-15 Iti agsumbangir ti pagserkan, 7 1/2 a yarda ti kaatiddog dagiti kurtina ken addaan iti tallo a poste ken tallo a pagbatayan.

16 Iti mismo a ruangan, adda kurtina a 10 a yarda ti kaatiddog. Nabordaan daytoy ken naaramid iti nafino a linen ken naabel iti de lana nga asul, ube ken nalabaga. Maibitinto iti uppat a poste a maisaad iti uppat a pagbatayan.

17 Agkakamang dagiti amin a poste iti aglikmut ti paraangan babaen iti pasikkil a pirak. Pirak met dagiti kawitda ngem bronse dagiti pagbatayanda.

18 Lima pulo a yarda ti kaatiddog ti paraangan, 25 a yarda ti kalawana, 2 1/2 a yarda ti kangatona. Nafino a linen ti aramidem a kurtina ket bronse dagiti pagbatayan.

19 Pasig a bronse dagiti alikamen ti Tolda agraman dagiti pasok ti Tolda ken ti bengbeng.

Ti Pannakaaywan ti Pagsilawan

20 “Ibilinmo kadagiti Israelita a mangyegda kenka kadagiti kasayaatan a puro a lana ti olibo para iti pagsilawan tapno rinabii a sigagangat.

21 Ikabil ni Aaron ken dagiti annakna daytoy a pagsilawan iti Tolda ti Dios, iti ruar ti kurtina nga adda iti sango ti Lakasa ti Tulag. Sadiay, iti imatang ni Yahweh, agpatpatnag a sigagangat. Aramiden dagiti Israelita ken dagiti kaputotanda daytoy iti agnanayon.

Dagiti Kawes dagiti Papadi

1 “Ayabam ni Aaron a kabsatmo agraman da Nadab, Abiu, Eleazar ken Itamar nga annakna. Ilasinmo ida kadagiti Israelita tapno agserbida kaniak a kas papadi.

2 Yaramidam ni Aaron kadagiti kawes ti padi tapno nadayag ken natan-ok iti imatang dagiti tattao.

3 Bilinem dagiti amin a dumadait nga inikkak iti laing nga agdait nga aramidenda dagiti kawes ni Aaron a maidaton nga agserbi kaniak a kas padi.

4 Dagitoy ti daitenda: pektoral, efod, kagay, nabordaan a tunika, mitra ken barikes. Yaramidanda ni Aaron ken dagiti annakna kadagiti nasagradoan a kawes tapno makapagserbida kaniak a kas padi.

5 Balitok, asul, ube ken nalabaga a de lana, ken nafino a linen ti usaren dagiti sastre.

6 “Balitok, asul, ube ken nalabaga, ken nafino a linen a nabordaan ti aramidenda nga efod.

7 Paikkam iti dua a terante a pakaikaptanna ken agsilpo ti pungtoda.

8 Maysa a barikes a napintas ti pannakaabelna a naaramid iti isu met la a material ti maikapet iti efod tapno sangsangkamaysada a piesa.

9 Mangalaka iti dua a bato a karnelia ket ikitikitmo kadagitoy ti nagan dagiti annak ni Jacob,

10 segun ti panagsasarunoda a nayanak. Saggi-innem a nagan ti maikitikit iti tunggal bato.

11 Ipaaramidmo daytoy iti nalaing a platero; maimontar dagiti bato iti balitok.

12 Ikabilmo dagitoy bato kadagiti terante ti efod a pakakitaan kadagiti tribu ti Israel. Iti kastoy, awiten ni Aaron dagiti naganda iti abagana tapno, siak, ni Yahweh, kanayon a malagipko dagiti tattaok.

13 Mangaramidka met iti dua a pagmontaran a balitok

14 ken dua a kawar iti puro a balitok. Taliam daytoy a kawar a kas kordon ket igalutmo kadagiti pagmontaran.

Ti Pektoral

15 “Mangaramidka iti pektoral nga usaren ti Kangatoan a Padi tapno maammoan ti pagayatan ti Dios. Kas iti efod, masapul a maaramid met iti asul, ube ken nalabaga a de lana, ken nafino ti pannakaabelna a linen.

16 Kuadrado, 9 a pulgada ti kaatiddog ken 9 a pulgada ti kaakabana ken makupin iti nagtenggaanna.

17 Imontarmo iti daytoy ti uppat nga intar a napateg a bato. Iti umuna a batog, imontarmo ti rubi, topasio ken garnet;

18 iti maikadua, esmeralda, safiro ken diamante;

19 iti maikatlo, hasinto, agate ken amatista,

20 ken iti maikapat, berilio, karnelia ken jaspe. Maimontar dagitoy iti balitok.

21 Iti tunggal bato maikitikit ti nagan dagiti annak ni Jacob a mangibagi kadagiti sangapulo ket dua a tribu ti Israel.

22 Mangaramidka iti kawar a puro a balitok. Taliem a kas kordon ket ikabitmo iti pektoral.

23 Mangaramidka met iti dua nga argolia a balitok ket ikapetmo kadagiti akingngato a suli ti pektoral,

24 ket igalutmo dagiti kordon a balitok kadagiti dua nga argolia.

25 Igalutmo met dagiti dua a murdong ti kordon a balitok kadagiti dua a pagmontaran. Iti kasta, maikamangda iti sango iti terante ti efod.

26 Mangaramidka met iti dua nga argolia a balitok a maikapet kadagiti akimbaba a suli ti pektoral, iti akin-uneg a pingir iti asideg ti efod.

27 Mangaramidka pay iti dua nga argolia a balitok a maikapet iti akimbaba a paset iti sango dagiti dua a terante ti efod, iti asideg ti nagtupian ken ngatoen ti napintas ti pannakaabelna a barikes.

28 Galutam dagiti argolia ti pektoral ken dagiti argolia ti efod iti asul a kordon, tapno agsaad ti pektoral iti ngatoen ti barikes ket saan nga agsina.

29 “No sumrek ni Aaron iti Nasantoan a Disso, aramatenna ti pektoral a nakaikitikitan dagiti nagan dagiti tribu ti Israel tapno, siak, ni Yahweh, kanayon a malagipko dagiti tattaok.

30 Ikapetmoiti pektoral ti Urim ken Tummimtapno awiten ida ni Aaron no dumatag iti nasantoan nga imatangko. Tunggal sumrek iti Nasantoan a Disso, masapul nga aramatenna daytoy a pektoral tapno maammoanna ti kayatko kadagiti Israelita.

Dagiti Dadduma a Kawes dagiti Papadi

31 “Asul a de lana ti aramidem a kagay a rutap ti efod.

32 Putolam tapno pakayusokan ti ulo. Palikmutam ti putol iti inabel nga arubite tapno saan a nalaka a mapisang.

33-34 Itimet aglikmut ti gayadan ti kagay, bitinam kadagiti sinan-bunga ti granada a de lana nga asul, ube ken nalabaga, ken baetbaetam iti kampanilia a balitok.

35 Usaren ni Aaron daytoy a kagay iti panagserbina a kas padi. No sumrek iti Nasantoan a Disso tapno dumatag kaniak wenno rummuar sadiay, mangngeg ti uni dagiti kampanilia. Iti kasta, saan a mapapatay ni Aaron.

36 “Mangaramidka iti arkos a puro a balitok a nakaikitikitan iti daytoy: ‘Naidaton ken ni Yahweh.’

37 Singdanam daytoy iti asul ket ikapetmo iti parupa ti mitra.

38 Ikabil ni Aaron daytoy iti mugingna, tapno siak, ni Yahweh, awatek dagiti amin nga idaton kaniak dagiti Israelita uray agbiddut dagiti tattao iti aniaman nga idatagda.

39 “Mangabelka iti tunika a nafino a linen nga agpaay ken ni Aaron. Nafino a linen ti aramidem a mitra ken barikes a nabordaan.

40 “Aramidem dagiti tunika, barikes ken kallugong dagiti annak ni Aaron tapno nadayag ken natan-okda iti imatang dagiti tattao.

41 Ikawesmo dagitoy ken ni kabsatmo nga Aaron ken kadagiti annakna. Kalpasanna, ordenam ida babaen iti pananglanam iti uloda tapno agserbida kaniak a kas papadi.

42 Yaramidam ida iti sapin a linen a dumanon iti luppo tapno saanda a lamolamo.

43 Masapul a kanayon nga usaren ni Aaron dagitoy ken dagiti annakna no sumrekda iti Toldak wenno umasidegda iti altar nga agserbi a kas padi iti Nasantoan a Disso tapno dida agbasol ket mapapatayda. Agnanayon daytoy nga alagaden ni Aaron ken dagiti kaputotanna.

Ti Seremonia ti Pannakaorden ni Aaron ken dagiti Annakna

1 “Kastoy ti panangordenmo ken ni Aaron ken kadagiti annakna nga agserbi kaniak a kas papadi. Mangalaka iti bumaro a baka ken dua a kalakian a karnero nga awan depektona.

2 Mangalaka met ti kasayaatan nga arina ti trigo nga awan lebadurana ket agaramidka kadagiti tinapay nga adda lanana ken awan lanana, agraman kadagiti naiingpis a bibingka a mapulagidan iti lana.

3 Ibasketmo dagitoy ket idatonmo agraman ti baka ken dagiti dua a karnero.

4 “Ipanmo ni Aaron ken dagiti annakna iti ruangan ti Tolda ti Dios ket digosem ida kas alagaden ti linteg.

5 Kalpasanna, ikawesmo ken ni Aaron dagiti arwaten ti padi—ti tunika, ti efod, ti kagay a mairutap iti efod, ti pektoral agraman ti barikes.

6 Ikabilmo ti turban iti ulona ket igalutmo ti nasagradoan nga arkos a nakaikitikitan ti ‘Naidaton itiApo.’

7 Alaem ti lana a pagkonsagrar ket patedtedam ti ulo ni Aaron tapno makonsagrar.

8 “Yegmo dagiti annakna ket kawesam ida iti tunika.

9 Ikabilmo dagiti barikesda ken dagiti kallugongda. Kastoy ti panangordenmo ken ni Aaron ken dagiti annakna. Agserbidanto kaniak ken dagiti kaputotanda a kas papadi iti agnanayon.

10 “Ipanmo ti baka iti sangoanan ti Tolda ti Dios ket ibagam ken ni Aaron ken kadagiti annakna nga ipatayda dagiti imada iti ulona.

11 Partiem ti baka iti nasantoan nga imatangko iti pagserkan ti Tolda.

12 Mangalaka iti darana, ket isawsawmo ta tammudom samo ipulagid kadagiti sinan-sara ti altar. Kalpasanna, ibuyatmo ti natda a dara iti puon ti altar.

13 Alaem ti amin a taba a nangbungon kadagiti lalaem, ti taba iti dalem ken dagiti dua a bekkel agraman tabada. Puoram dagitoy iti rabaw ti altar a daton kaniak.

14 Ngem puoram ti lasag, kudil ken dagiti lalaem ti baka iti ruar ti kampo. Daytoy ti daton a mangikkat kadagiti basol dagiti papadi.

15 “Alaem ti maysa kadagiti kalakian a karnero ket ibagam ken ni Aaron ken kadagiti annakna nga ipatayda dagiti imada iti ulona.

16 Partiem ket ibuyatmo ti darana kadagiti sikigan ti altar.

17 Rangrangkayem ti karnero. Buggoam dagiti lalaemna ken dagiti sakana ket iparabawmo dagitoy kadagiti narangrangkay a paset agraman ulona.

18 Puoramti sibubukel a karnero iti rabaw ti altar a kas daton a makan. Maragsakanak iti nabanglo nga ayamuom daytoy a daton.

19 “Alaem ti maysa pay a karnero—ti karnero a maaramat iti pannakaidaton. Ibagam ken ni Aaron ken kadagiti annakna nga ipatayda dagiti imada iti ulona.

20 Patayem ket mangalaka iti darana samo ipulagid kadagiti kannawan a piditpiditda ken kadagiti kannawan a tangan ti ima ken sakada. Ibuyatmo ti natda a dara iti sikigan ti altar.

21 Mangalaka iti dara nga adda iti rabaw ti altar ken lana a pagkonsagrar ket iwarsim ken ni Aaron ken iti kawesna kasta met kadagiti annakna ken kadagiti kawesda. Kastoy ti pannakaikonsagrar ni Aaron, dagiti annakna ken dagiti kawesda.

22 “Ikkatem ti taba ti karnero, ti nataba nga ipusna, ti taba a nangbalkot kadagiti lalaem, ti taba iti dalem, dagiti dua a bekkel agraman dagiti tabada ken ti akinkannawan a luppo.

23 Manipud iti basket a yan dagiti tinapay a naidaton kaniak, mangalaka iti maysa a tinapay nga adda lanana, maysa a tinapay nga awan lanana ken maysa a bibingka.

24 Ipaiggemmo dagitoy ken ni Aaron ken kadagiti annakna ket idatonda kaniak a kas naisangsangayan a sagut.

25 Kalpasanna, alaem dagitoy kadakuada samo puoran iti altar, iti rabaw ti daton a mapuoran a kas daton a makan a maidatag kaniak. Maragsakanak iti ayamuom daytoy a daton.

26 “Alaem ti barukong daytoy a karnero ket idatonmo kaniak a kas naisangsangayan a sagut. Kukuam daytoy a paset ti animal.

27 No maordenan ti maysa a padi idatonda kaniak ti barukong ken ti luppo ti karnero a mausar iti seremonia ti pannakaorden, maidatonda kaniak a kas naisangsangayan a sagut daytoy ket mailasinda para kadagiti papadi.

28 Agnanayon a bilinko a no mangidatag dagiti tattaok iti datonda a pakikappia, kukua dagiti papadi dagiti barukong ken luppo ti animal. Daytoy ti sagut dagiti tattao kaniak, ni Yahweh.

29 “Inton matay ni Aaron, maited dagiti pagan-anayna a kas padi kadagiti annakna tapno usarenda iti pannakaordenda a kas papadi.

30 Pito nga aldaw nga usaren ti anak ni Aaron a sumukat kenkuana a padi dagiti kawes no sumrek iti Tolda ti Dios tapno agserbi iti Nasantoan a Disso.

31 “Alaem ti karnero a nausar iti pannakaorden ni Aaron ken dagiti annakna ket angrem iti nasagradoan a lugar.

32 Iti ruangan ti Tolda ti Dios ti pangananda iti karne ken iti tinapay nga adda iti basket.

33 Masapul a kanenda dagiti naaramat iti seremonia ti pannakapakawan bayat ti pannakaordenda. Dagiti laeng papadi ti mangan iti daytoy agsipud ta nasantoan.

34 No adda matda a karne wenno tinapay agingga iti bigat, masapul a mapuoran. Saan a kanen agsipud ta nasantoan.

35 “Pito nga aldaw nga annongem ti pannakaorden ni Aaron ken dagiti annakna iti wagas nga imbilinko kenka.

36 Inaldaw a masapul a mangidatonka iti toro a baka a kas sakrifisio tapno mapakawan ti basol. Daytoy ti mangdalus iti altar iti imatang ti linteg. Kalpasanna, lanaam ti altar tapno agbalin a nasantoan.

37 Inaldaw nga aramidem daytoy iti las-ud ti pito nga aldaw. Iti kasta, naan-anayton a nasantoan ti altar, ket siasinoman wenno aniaman a mangsagid iti altar, madangranto babaen iti pannakabalin ti kinasantona.

Ti Sagut a Maidaton iti Inaldaw

38 “Dagitoyto ti inaldaw nga idatagmo iti altar iti agnanayon: dua nga urbon ti karnero a maysa ti tawenda.

39 Idatonmo ti maysa iti agsapa ket ti sabali iti sumipnget.

40 Pakuyogam ti umuna a daton iti maysa a kilogramo a nafino nga arina ti trigo a nalaokan iti sangalitro a puro a lana ti olibo, agraman maysa a litro nga arak a kas daton nga inumen.

41 Pakuyogam met ti maikadua a daton iti isu met laeng ti kaadu ti arina, lana ti olibo ken arak a kas iti maidatag iti bigat. Daytoy ti daton a makan a maidatag kaniak, ni Yahweh, ket maragsakanak iti ayamuomna.

42 Iti amin a tiempo iti masakbayan, maidatag daytoy daton a mapuoran iti imatangko iti ruangan ti Tolda ti Dios. Sadiay ti pangsarakak kadagiti tattaok ken pakiumanak kenka.

43 Sadiay ti pangsarakak kadagiti Israelita ket agbalinto a sagrado dayta a lugar gapu iti kaaddak.

44 Pagbalinekto a sagrado ti Tolda ti Dios agraman ti altar, ket ikonsagrarko ni Aaron ken dagiti annakna tapno agserbida kaniak a kas papadi.

45 Agtaengakto iti sidong dagiti Israelita ket siakto ti Diosda.

46 Maammoandanto a siak ni Yahweh a Diosda a nangiruar kadakuada idiay Egipto tapno agnaedak iti sidongda. Siak ni Yahweh a Diosda.

Ti Altar ti Insenso

1 “Mangaramidka iti altar nga akasia a pagpuoran iti insenso.

2 Kuadrado ti altar ket 18 a pulgada ti kaatiddog ken kaakabana ken 36 a pulgada ti kangatona. Ikkam iti sinan-saraiti tunggal sulina ket sangkanayonda iti altar.

3 Kalupkopam iti puro a balitok ti rabawna, dagiti uppat a sikiganna ken dagiti sinan-sara. Paikingam ti aglikmut iti balitok.

4 Yaramidam iti dua a balitok nga argolia ket ikapetmo iti baba dagiti agsumbangir nga ikingna a pakayusokan dagiti assiw a pangawit iti altar.

5 Aramidem dagitoy nga assiw iti kayo nga akasia ket kalupkopam ida iti balitok.

6 Ikabilmo daytoy nga altar iti ruar ti kurtina iti sango ti Lakasa ti Tulag. Daytoy ti lugar a pangsarungkarak kadakayo.

7 Tunggal bigat a mapan estimaren ni Aaron dagiti pagsilawan, masapul nga agpuor iti nabanglo nga insenso iti rabawna.

8 Kasta manen ti aramidenna iti sumipnget no gangtanna dagiti pagsilawan. Agtultuloyto nga agnanayon ti pannakapuor ti insenso.

9 Diyo idaton iti rabaw ti altar ti maiparit nga insenso, ti daton nga animal a mapuoran wenno ti daton a makan ket diyo ibukbok iti rabawna ti daton nga inumen.

10 Maminsan iti tunggal tawen nga aramiden ni Aaron ti seremonia ti pannakadalus ti altar: kadagiti sinan-sara ipulagidna ti dara ti animal a maidaton gapu iti basol. Masapul a maaramid daytoy iti tinawen iti amin a tiempo. Masapul a naan-anay a sagrado daytoy nga altar a naidaton kaniak, ni Yahweh.”

Ti Buis nga agpaay iti Tolda ti Dios

11 Kinuna ni Yahweh ken ni Moises,

12 “Inton alaem ti bilang dagiti tattao ti Israel, masapul a mangited kaniak ti tunggal tao iti kuarta a gatad ti biagna tapno awan dakes a mapasamak kenkuana bayat ti pannakaala ti sensus.

13 Amina mairaman iti sensus ket masapul a bayadanna ti naituding a gatad, kas mayannurot iti naituyang a pagtimbangan. Agbayad ti tunggal maysa nga agpaay a daton ken ni Yahweh.

14 Tunggal maysa a mailista nga agtawen iti duapulo wenno nasursurok pay, masapul a bayadanna kaniak daytoy a gatad.

15 Nabaknang man wenno napanglaw—agpada ti itedda a gatad a kas pangsubbot iti biagda.

16 Kolektaem daytoy a kuarta kadagiti Israelita, ket isu ti magasto kadagiti kasapulan iti Tolda. Daytoy ti buis a pagbayadda iti biagda, ket laglagipek a salakniban ida.”

Ti Bronse a Palanggana

17 Kinuna ni Yahweh ken ni Moises,

18 “Mangaramidkaiti bronse a palanggana nga adda bronse a batayna. Ikabilmo iti nagbaetan ti Tolda ti Dios ken ti altar ket kargaam iti danum.

19 Daytoy ti usaren ni Aaron ken dagiti annakna a pangbuggo kadagiti ima ken sakada

20 sakbay a sumrekda iti Tolda ti Dios wenno umasidegda iti altar a mangidatag iti daton a makan. Iti kasta, saanda a mapapatay.

21 Masapul a buggoanda dagiti ima ken sakada tapno saanda a matay. Annurotenda daytoy nga alagaden iti agnanayon, isuda ken dagiti kaputotanda.”

Ti Lana a Pagkonsagrar

22 Kinunani Yahweh ken ni Moises,

23 “Mangalaka iti kasayaatan a bangbanglo: Innem a kilogramo a tubbog ti mirra, sagtatallo a kilogramo a nabanglo a sinamon ken nabanglo a kanela,

24 ken innem a kilogramo a kasia (matimbang amin dagitoy segun ti naituyang a pagtimbangan). Laokam iti uppat a litro a lana ti olibo.

25 Mangaramidka iti nasagradoan a lana a pagkonsagrar, ket templaem a kas iti bangbanglo.

26 Aramatem daytoy a pangkonsagrar iti Tolda ti Dios, iti Lakasa ti Tulag,

27 iti lamisaan ken amin nga alikamenna, iti kandelero ken amin nga alikamenna, iti altar a pagpuoran iti insenso,

28 iti altar a pakapuoran dagiti daton ken amin nga alikamenna ken iti pagbuggoan agraman ti pagbatayanna.

29 Kastoy ti panangikonsagrarmo kadagitoy nga alikamen tapno agbalinda a naan-anay a nasagradoan ket ti siasinoman wenno aniaman a mangsagid kadagitoy, madangranto babaen iti kinasantona.

30 “Kalpasanna, ikonsagrarmo ni Aaron ken dagiti annakna ket ordenam ida a papadi nga agserbi kaniak.

31 “Ibagam daytoy kadagiti Israelita, ‘Masapul a mausar daytoy nasantoan a lana a pagkonsagrar iti panagserbi kaniak iti amin a tiempo.

32 Diyo ibukbok daytoy iti gagangay a tao ket diyo tuladen ti kastoy a pannakaaramidna. Nasagradoan daytoy ket masapul nga ibilangyo a nasagradoan.

33 Saanen a maibilang a taok ti siasinoman a mangaramid iti kastoy wenno mangusar iti siasinoman a tao a saan a padi.’”

Ti Insenso

34 Kinuna ni Yahweh ken ni Moises, “Mangalaka kadagiti nabanglo a rekado: estakte, onitsa, galbanum ken puro nga olibanum; pagpapadaem ti kaadu ti tunggal maysa.

35 Aramidem dagitoy nga insenso a matempla a kas bangbanglo. Asinam tapno agtalinaed a puro ken sagrado.

36 Mangmekmekka iti insenso samo ipan iti Tolda ti Dios iti imatangko ket iwarakiwakmo iti sangoanan ti Lakasa ti Tulag. Ibilangmo daytoy nga insenso a naan-anay ti kinasagradona.

37 Diyo tuladen ti kastoy a pannakatempla iti insenso nga agpaay kadakayo. Ibilangyo daytoy a nasantoan a naidaton kaniak.

38 No adda mangaramid iti kastoy tapno aramatenna a bangbanglo, saanen a maibilang a maysa kadagiti tattaok.”