Category: Exodo

Dagiti Mangaramid kadagiti Alikamen ti Tolda ti Dios

1 Kinuna ni Yahweh ken ni Moises,

2 “Pinilik ni Bezalel nga anak ni Uri ken apoko ni Hur a kameng ti tribu ti Juda.

3 Pinunnok iti pannakabalinko,ket ita, maysa nga eksperto iti amin a kita ti aramid iti arte.

4 Masirib nga agaramid kadagiti disenio ket kabaelanna a sukogen iti balitok, pirak ken bronse;

5 agkorte kadagiti napateg a bato a maimontar; ken agkitikit kadagiti kayo ken dadduma pay a kita ti naarte a trabaho.

6 Tinudengak met a tumulong kenkuana ni Oholiab nga anak ni Ahisamac, a kameng iti tribu ti Dan. Inikkak met iti naidumduma a kabaelan dagiti amin nga eksperto iti trabaho tapno maaramidda dagiti imbilinko a maaramid:

7 ti Tolda ti Dios, ti Lakasa ti Tulag ken ti kalubna, amin nga alikamen ti Tolda,

8 ti lamisaan ken ti amin nga alikamenna, ti kandelero a puro a balitok ken amin nga alikamenna, ti altar a pagpuoran iti insenso,

9 ti altar a pagpuoran kadagiti daton ken amin nga alikamenna, ti pagbuggoan ken ti batayna.

10 Isuda ti agaramid kadagiti arruaten ni Aaron ken dagiti annakna iti panagserbida a kas padi.

11 Aramidenda met ti lana a pagkonsagrar ken ti nabanglo nga insenso a maaramat iti Nasantoan a Disso. Aramidenda amin dagitoy nga alikamen nga awan surok ken kurangna kas imbilinko kenka.”

Ti Aldaw a Panaginana

12 Binilin ni Yahweh ni Moises

13 nga ibagana daytoy kadagiti Israelita, “Ngilinenyo ti Aldaw a Panaginana, ta daytoy ti agserbi a pagilasinan kadakayo iti agnanayon, a siak, ni Yahweh, pinilikayo nga agbalin a tattaok.

14 Nasagradoan ti Aldaw a Panaginana ket masapul a ngilinenyo. Mapapatay ti saan a mangngilin iti aldaw a panaginana ket mapagtalaw ti siasinoman nga agtrabaho iti dayta nga aldaw.

15 Agtrabahokayoiti innem nga aldaw, ngem naisangsangayan ti maikapito, ta naidaton kaniak. Mapapatay ti siasinoman nga agtrabaho iti dayta nga aldaw.

16 Masapul a ngilinen dagiti Israelita ti aldaw a panaginana a kas pagilasinan iti tulag.

17 Agserbidaytoy a palagip kaniak ken iti entero nga Israel ket agtalinaed iti agnanayon. Ngamin, siak ni Yahweh, pinarsuak ti langit ken ti daga iti las-ud ti innem nga aldaw ket naginanaak iti maikapito nga aldaw.”

18 Idi nalpasen ti pannakisao ni Yahweh ken ni Moises iti Bantay Sinai, intedna kenkuana dagiti dua a tapi a bato a nangisuratan a mismo ti Dios kadagiti bilbilin.

Ti Balitok a Sinan-toro a Baka

1 Nabayagni Moises iti bantay. Gapu ta di met la sumalogen, napan dagiti tattao ken ni Aaron ket kinunada kenkuana, “Saanmi nga ammo ti napasamak iti dayta a Moises a nangiruar kadakami idiay Egipto. Yaramidannakami ngarud iti diosa mangidalan kadakami.”

2 Kinuna ni Aaron kadakuada, “Ummongenyo ngarud dagiti balitok nga aritos dagiti assawa ken annakyo, ket yegyo kaniak.”

3 Inikkat dagiti tattao dagiti aritosda sada impan ken ni Aaron.

4 Linunagni Aaron dagiti aritos sana imbukbok iti sukogan ket inaramidna a sinan-toro a baka.

Kinuna dagiti tattao, “Israel, daytoy ti diostayo a nangiruar kadatayo idiay Egipto.”

5 Kalpasanna, nangaramid ni Aaron iti altar iti sango ti balitok a sinan-toro a baka sana impakaammo, “Inton bigat, agfiestatayo a kas pammadayaw itiApo.”

6 Kabigatanna,nagidatagda kadagiti animal sada pinuoran a kas sakrifisio. Sabali pay dagiti pinartida a sindada a kas daton a maipaay a panagkakadua. Nagpapangan ken nagiinum dagiti tattao. Naglabes ti ragragsakda, nagbabartekda ket nagkakaidda dagiti lallaki ken babbai.

7 Kinuna ni Yahweh ken ni Moises, “Dagdagusem ti sumalog ta nagbasol dagiti tattaom nga inruarmo idiay Egipto ket tinallikudandak.

8 Binaybay-andan ti dalan nga imbilinko a surotenda. Nangsukogda iti sinan-toro ti baka manipud iti nalunag a balitok ket inaramidda a pagdaydayawan ken pagidatonan kadagiti sakrifisio. Kunkunada a daytoy ti diosda a nangiruar kadakuada idiay Egipto.

9 Am-ammok dagitoy a tattao ket ammok met ti kinasukirda.

10 Ita, saanka a makibiang, ta gumilgil-ayab ti pungtotko kadakuada ket dadaelek ida. Ket sikanto ti pagtaudan ti maysa a dakkel a pagilian.”

11 Ngemnagpakpakaasi ni Moises ken ni Yahweh a Diosna ket kinunana, “Apo, apay a kapungtotmo dagiti tattaom, isuda a winayawayaam idiay Egipto babaen iti naindaklan a pannakabalinmo?

12 No dadaelem ida, kunanto dagiti Egipcio nga inruarmo dagiti Israelita idiay Egipto gapu ta panggepmo a pukawen ida iti kabambantayan. Pagbaawem ti pungtotmo ket dimo idissuor daytoy a didigra kadagiti tattaom.

13 Laglagipemda Abraham, Isaac ken Jacob nga adipenmo. Laglagipem ti kari a sinapataam kadakuada a paaduem ti kaputotanda a kas iti kaadu dagiti bituen ti langit ket itedmo amin daytoy a daga nga inkarim a tagikuaenda iti agnanayon.”

14 Nagbabawi ni Yahweh ket dina indissuor ti didigra nga impangtana nga ipalak-am kadagiti tattaona.

15 Nagsubli ni Moises ket simmalog iti bantay. Iggemna dagiti dua a tapi a bato a nakaisuratan dagiti bilin.

16 Mismo a ti Dios ti nangaramid kadagiti tapi ket inkitikitna dagiti bilin iti agsumbangirda.

17 Nangngeg ni Josue ti ariwawa dagiti tattao ket kinunana ken ni Moises, “Mangngegko ti ikkis dagiti aggugubat iti kampo.”

18 Kinuna ni Moises, “Saan nga ikkis dagiti nagballigi wenno dung-aw dagiti naparmek ti mangngegko no di ket kankanta.”

19 Addan ni Moises iti arisadsad ti bantay. Idi asidegen iti kampo ket makitana ti sinan-toro a baka ken dagiti tattao nga agsasala, simged ti pungtotna. Sadiay, imbarsakna dagiti tapi nga ig-iggamanna ket naburburakda.

20 Innalana ti inaramidda a sinan-urbon ti baka, linunagna, tinumtumekna ket inlaokna iti danum sana impainum kadagiti Israelita.

21 Kinunana ken ni Aaron, “Ania aya ti inaramid kenka dagitoy a tattao ta pinalubosam ida nga agaramid iti nadagsen a basol?”

22 Insungbat ni Aaron, “Dinak koma kapungtot, apo. Ammom a napigsa ti tarigagayda nga agaramid iti dakes.

23 Kinunada kaniak, ‘Dimi ammo ti napasamak iti dayta a Moises a nangiruar kadakam idiay Egipto. Yaramidannakami ngarud iti dios a mangidalan kadakami.’

24 Imbagak kadagiti adda alahasna a balitok nga itedda kaniak dagitoy. Tinunawko dagiti alahas ket daytoy sinan-toro a baka ti nagbalinanna.”

25 Naammiris ni Moises a pinalubosan ni Aaron dagiti tattao nga aglablabesda ket nagbalinda a maag iti imatang dagiti kabusorda.

26 Nagtakder ngarud ni Moises iti ruangan ti kampo ket impukkawna, “Umay ditoy ti amin a sumurot itiApo!” Napan dagiti amin a Levita iti yanna,

27 ket kinunana kadakuada, “Imbilin tiApoa Dios ti Israel nga alaenyo ti kampilanyo sayo dakiwasen ti entero a kampo, manipud ditoy agingga iti sabali a ruangan ket patayenyo amin a makitayo—kakabsatyo man wenno gagayyemyo wenno kaarrubayo.”

28 Nagtungpal dagiti Levita ket pinapatayda ti agarup 3,000 a lallaki iti dayta nga aldaw.

29 Kinuna ni Moises kadagiti Levita, “Ita nga aldaw, indatonyo dagiti bagbagiyoa kas papadi iti panagserbi itiApogapu iti panangpapatayyo kadagiti annakyo ken dagiti kakabsatyo. Ngarud, inted tiApoti bendisionna kadakayo.”

30 Kabigatanna, kinuna ni Moises kadagiti tattao, “Nadagsen unay ti nagbasolanyo. Ngem ita, innak itiApoiti bantay bareng no maipamuspusak ti pannakapakawanyo.”

31 Nagsubli ni Moises ken ni Yahweh ket kinunana, “Nadagsen ti basol dagitoy a tattao! Nangaramidda iti dios a balitok ket nagdaydayawda kenkuana.

32 Ipakpakaasika pakawanem koma ida. No dimo pakawanen ida, pangngaasim ta ikkatem ti naganko iti libro a nangisuratam kadagiti nagan dagiti tattaom.”

33 Kinuna ni Yahweh ken ni Moises, “Dagiti laeng nagan ti nakabasol kaniak ti punasek iti librok.

34 Dumtengto ti aldaw a dusaek dagitoy a tattao gapu iti basolda. Inkan ket ipanguloam ida a mapan iti lugar nga imbagak kenka. Laglagipem nga idalannakanto ti anghelko.”

35 Iti kasta, dinusa ni Yahweh dagiti tattao ket pinagsakitna ida gapu ta pinilitda ni Aaron a mangaramid iti sinan-toro ti baka.

Ti Bilin a Pumanawda iti Bantay Sinai

1 Kinunani Yahweh ken ni Moises, “Pumanawkayo ditoy, sika ken dagiti tattao nga inruarmo idiay Egipto, ket inkay iti daga nga inkarik kada Abraham, Isaac ken Jacob nga ited kadagiti kaputotanda.

2 Mangibaonak iti anghel a mangidalan kadakayo ket papanawekto dagiti Cananeo, Amorreo, Heteo, Perezeo, Heveo ken Jebuseo.

3 Inkay iti nabaknang ken nadam-eg a daga. Ngem gapu ta nasukirkayo, diak makikuyog kadakayo amangan no patayenkay iti dalan.”

4 Idi mangngeg daytoy dagiti tattao, nagleddaangda ket saandan a nagarruat iti alahas.

5 Binilin ngamin ni Yahweh ni Moises nga ibagana kadagiti Israelita: “Nasukirkayo a tattao ket no makikuyogak la ngata kadakayo iti uray apagkanito, pukawenkayo a mamimpinsan. Ita, ikkatenyo dagiti alahasyo tapno ammok ti aramidek kadakayo.”

6 Manipud idin, kalpasan ti ipapanawda idiay Bantay Sinai, saanen a nagal-alahas dagiti Israelita.

Ti Tolda a Pakiumanan

7 Tunggal agkampo dagiti Israelita, alaen ni Moises ti nasagradoan a Tolda sana ipatakder iti pangadaywen bassit iti ruar ti kampo. Pinanaganan ni Moises daytoy iti “Tolda a Pakiumanan” ket sumrek iti tolda ti siasinoman a makiuman ken ni Yahweh.

8 Tunggal mapan ni Moises iti tolda, agtakder dagiti tattao iti ruangan ti toldada ket kitkitaenda ni Moises agingga a makastrek iti tolda.

9 Apaman a makastrek, bumaba met ti monmon ti ulep iti ruangan ti Tolda; makisao ni Yahweh ken ni Moises manipud iti ulep.

10 Apaman a makita dagiti tattao ti ulep iti ruangan ti Tolda, agrukbabda.

11 Makisao ken ni Moises iti sangonsango a kas iti pannakisao ti maysa a tao iti gayyemna. Agsubli met laeng ni Moises iti kampo ngem agbati iti uneg ti Tolda ti agtutubo a katulongan ni Moises, ni Josue nga anak ni Nun.

Ikari ti Dios a Kumuyog kadagiti Tattaona

12 Kinuna ni Moises ken ni Yahweh, “Pudno nga imbagam nga idalanko dagitoy a tattao a mapan iti daga ngem dimo imbaga no siasino ti ibaonmo a tumulong kaniak. Kinunam pay nga am-ammonak unay ket maragsakanka kaniak.

13 No pudno daytoy, ibagam kaniak dagiti panggepmo tapno makapagserbiak kenka ket agtultuloy a maragsakanka kaniak. Laglagipem met a pinilim a tagikuaen daytoy a nasion.”

14 Kinuna ni Yahweh, “Kuyogenka ket ikkak ti inana ti panunotmo.”

15 “No dika kumuyog kadakami,” kinuna ni Moises, “dinakam ngarud papanawen ditoy.

16 Kasano nga adda makaammo a maragsakanka kaniak ken kadagiti tattao no dinakami met kuyogen? Ngem no kuyogennakami, maipakita a naisalsaluminakami kadagiti amin a tattao ditoy daga.”

17 Kinuna ni Yahweh ken ni Moises, “Aramidek ti imbagam gapu ta am-ammoka unay ket maragsakanak kenka.”

18 Indawat ni Moises, “Pangngaasim ta ipakitam kaniak ti makasisirap a lawag a pagilasinan ti kaaddam.”

19 “Ipakitakkenka ti amin a kinadayagko, ket baliksek ti nasagradoan a naganko, a Yahweh,” insungbat ni Yahweh. “Paraburak ken kaasiakto ti kayatko a kaasian.

20 Ngem diak ipakita kenka ti rupak gapu ta matay ti siasinoman a makakita iti rupak.

21 Adda bato iti abayko a mabalinmo a pagtakderan.

22 No lumabas ti makasisirap a lawag a mangipakita iti kaaddak, ikabilka iti rengngat ti bato ket lingdanka iti imak agingga a makalabasak.

23 Kalpasanna, ikkatek ti imak ket makitamto ti likudak ngem saan a ti rupak.”

Dagiti Sabali a Tapi ti Bato

1 Kinuna ni Yahweh ken ni Moises, “Mangaramidka iti dua a tapi ti bato a kas kadagidi immuna ket isuratkonto kadagitoy dagiti naisurat kadagidi tapi a binurakmo.

2 Agsaganaka a sumang-at iti Bantay Sinai inton agsapa ket kitaennakto iti tapawna.

3 Siksika laeng ti sumang-at. Awan ti siasinoman a tao a makita iti uray ania a disso iti bantay. Diyo met ipalubos nga adda karnero wenno baka nga agarab iti arisadsadna.”

4 Nangaramid ngarud ni Moises iti dua a tapi a bato, ket iti agsapa ti sumuno a bigat, insang-atna dagitoy iti Bantay Sinai, kas imbilin kenkuana ni Yahweh.

5 Bimmaba ni Yahweh iti maysa nga ulep nagtakder iti abay ni Moises, ket binalikasna ti naganna Yahweh.

6 Nagnani Yahweh iti sangoanan ni Moises ket kinunana, “Siak ni Yahweh a Dios a managayat ken manangngaasi. Saanak a nalaka nga agpungtot. Nadungngo ken napudnoak.

7 Tungpalek ti karik iti rinibribu a kaputotan,ket pakawanek ti kinadakes, panagsalungasing ken basol. Ngem dusaek a dusaen dagiti annak ken appoko agingga iti maikatlo ken maikapat a kaputotan gapu kadagiti basol dagiti ammada.”

8 Dinagdagus ni Moises nga inrukob ti ulona iti daga ket nagdaydayaw.

9 Kinunana, “Apo, no pudno met laeng a maragsakanka kaniak, dawatek a kuyogennakami. Nasukir dagitoy a tattao, ngem pakawanennakami koma kadagiti kinadakesmi ket awatennakami a kas tattaom.”

Mapabaro ti Tulag

10 Kinuna ni Yahweh ken ni Moises, “Ita, makitulagak kadagiti Israelita. Agaramidakto kadagiti milagro a di pay napasamak ditoy lubong wenno iti uray ania a pagilian. Makitanto dagiti amin a tattao dagiti naindaklan a banag a kabaelak nga aramiden agsipud ta agaramidak kadagiti nakaskasdaaw a banag nga agpaay kadakayo.

11 Tungpalenyo dagiti bilin nga itedko ita nga aldaw. Iti isusungadyo, papanawekto dagiti Amorreo, Cananeo, Heteo, Perezeo, Heveo ken Jebuseo.

12 Dikay makitultulag kadagiti tattao a madanonyo sadiay, ta daytoyto ti pangrugian ti pannakadadaelyo.

13 Rebbaenyoketdi dagiti altarda, dadaelenyo dagiti nasagradoan a bato nga adigida ken dagiti kaykayo a simbolo ti didiosenda nga Asera.

14 “Dikay agdaydayaw iti sabali a dios, ta siak, ni Yahweh, diak ipalubos nga adda kasalisalko.

15 Dikay makitultulag kadagiti tattao sadiay, agsipud ta tunggal agdaydayaw ken agidatonda kadagiti didiosenda, awisendakayto ket masulisogkayto a mangan kadagiti taraon a naidaton.

16 Amangan ketdi no mangasawa dagiti lallaki nga annakyo kadagitoy ganggannaet a babbai a mangisungsong kadakuada a mangtallikud kaniak ket agdaydayawda kadagiti didiosenda.

17 “Dikaymangsukog kadagiti didiosen a pagdaydayawanyo.

18 “Rambakanyoti Fiesta ti Tinapay nga awan Lebadurana. Kas imbilinko, mangankay iti tinapay nga awan lebadurana iti las-ud ti pito nga aldaw iti Abib ta iti daytoy a bulan, pimmanawkayo idi idiay Egipto.

19 “Kukuakti amin nga inauna a lalaki, tao man wenno dingngoenyo.

20 Ngemmasapul a subbotenyo ti inauna nga anak ti asno babaen iti pannangtedyo iti maysa a karnero a kas sukatna. No diyo subboten ti asno, rungdoenyo ti tengngedna. Subbotenyo ti amin nga inauna nga anakyo.

“Saankayo nga umay kaniak no awan datonyo.

21 “Agtrabahokayiti innem nga aldaw, ngem aginanakayo iti maikapito, uray no panagaarado wenno panagaani.

22 “Rambakanyoti Fiesta ti Panagapit iti damo a panaganiyo iti trigo, kasta met ti Fiesta ti Abong-abong inton burasenyo dagiti bungbunga ti mulayo.

23 “Mamitlo iti makatawen nga umay dagiti amin a lallaki nga adda kadakayo tapno agdaydayawda kaniak, ni Yahweh a Dios ti Israel.

24 Kalpasan ti panangpapanawko kadagiti tattao iti isusungadyo ket palawaek ti sakupyo, awanto ti agpanggep a mangraut iti pagilianyo bayat ti pannakarambak dagiti tallo a fiesta.

25 “Diyopakuyogan ti tinapay nga adda lebadurana iti dara ti animal nga idatonyo kaniak a sakrifisio. Diyo ipabigat ti uray ania a paset ti animal a pinatayyo iti Fiesta ti Paskua.

26 “Tinawena yegyo iti balay ni Yahweh ti umuna a trigo a maapityo.

“Diyo lutoen ti urbon a karnero wenno urbon a kalding iti gatas ti inana.”

27 Kinuna ni Yahweh ken ni Moises, “Isuratmo dagiti imbagak ta dagitoy ti alagaden ti pannakitulagko kenka ken iti Israel.”

28 Uppat a pulo nga aldaw ken rabii a nagyan sadiay ni Moises a kaduana ni Yahweh. Saan a nangnangan wenno immin-inum. Insuratna kadagiti tapi a bato ti linaon ti tulag—dagiti Sangapulo a Bilin.

Sumalog ni Moises manipud Bantay Sinai

29 Simmalogni Moises manipud iti Bantay Sinai a siiiggem kadagiti tapi a bato a nakailanadan dagiti Sangapulo a Bilin. Gapu iti pannakisaona ken ni Yahweh, agranraniag ti rupana ngem saanna nga ammo.

30 Idi makita ni Aaron ken dagiti Israelita nga agranraniag ti rupana, nagbutengda nga umasideg kenkuana.

31 Ngem inayaban ida ni Moises, isu a napan kenkuana ni Aaron ken dagiti amin a pangulo ti ili ket kinasaona ida.

32 Kalpasanna, linawlaw dagiti amin nga Israelita ket impakaammona kadakuada dagiti amin a bilin nga imbaga ni Yahweh kenkuana iti Bantay Sinai.

33 Idi malpasen ti panagsaona kadakuada, inabungotanna ti rupana.

34 Tunggal sumrek ni Moises iti Tolda a Pakiumanan a makisao ken ni Yahweh, ikkatenna ti abungotna. No rummuar, ipakaammona kadagiti Israelita dagiti amin a naibilin kenkuana

35 ket makitada nga agranraniag ti rupana. Abungotanna met laeng ti rupana agingga a mapan makisao manen ken ni Yahweh.

Dagiti Alagaden iti Aldaw a Panaginana

1 Inummong ni Moises dagiti amin nga Israelita ket kinunana kadakuada, “Daytoy ti imbilin tiAponga aramidenyo:

2 Agtrabahokayoiti innem nga aldaw, ngem ngilinenyo ti maikapito, ta nasantoan nga aldaw a panaginana a maidaton kaniak, ni Yahweh. Mapapatay ti siasinoman nga agtrabaho iti dayta nga aldaw.

3 Uray ti panamasged laeng iti apuy ti uneg ti balayyo, maiparit iti Aldaw a Panaginana.”

Dagiti Daton a maipaay iti Santuario

4 Kinuna ni Moises kadagiti amin nga Israelita, “Daytoy ti imbilin tiApo:

5 Mangidatagkay iti daton itiApo. Siasinoman nga agtarigagay a mangted, yegna dagitoy: balitok, pirak, wenno bronse;

6 de lana nga asul, ube ken nalabaga; nafino a linen; lupot a naabel iti dutdot ti kalding;

7 nakorte a lalat ti toro a karnero; nafino a lalat ti kalding; kayo ti akasia;

8 lana ti pagsilawan; bangbanglo a paglaok iti lana a pagkonsagrar ken iti nabanglo nga insenso;

9 napateg a karnelia ken napapateg a bato a maimontar iti efod ken iti pektoral ti Kangatoan a Padi.

Dagiti Alikamen a maipaay iti Tolda ti Dios

10 “Masapul nga umay dagiti amin a nalaing a trabahador kadakayo ket aramidenda amin nga imbilin tiApo:

11 ti Tolda ti Dios, ti Tolda agraman ti akin-uneg ken akinruar nga abbongna, dagiti kawit ken dagiti bastidorna, dagiti balunetna, dagiti poste agraman dagiti pagbatayanna,

12 ti Lakasa ti Tulag ken dagiti assiwna, ti kalub ken ti kurtina a panglinged.

13 Aramidenda met ti lamisaan ken dagiti assiw ken amin nga alikamenna, ti pagikabilan iti tinapay a maidaton iti Dios,

14 ti kandelero ti pagsilawan agraman dagiti alikamenna, dagiti pagsilawan agraman lana a segdenda.

15 Aramidenda ti altar a pagpuoran iti insenso agraman dagiti assiwna, ti lana a pagkonsagrar, ti nabanglo nga insenso ken ti kurtina ti ruangan ti Tolda ti Dios,

16 ti altar a pagpuoran kadagiti daton agraman ti bronse a barandiliasna, dagiti assiw ken amin nga alikamenna, ti pagbuggoan ken ti pagbatayanna,

17 dagiti kurtina ti paraangan agraman dagiti poste ken pagbatayanna, ti kurtina iti pagserkan iti paraangan;

18 dagiti pasok ken dagiti tali ti Tolda ken ti paraangan,

19 dagiti nadayag a kawes dagiti papadi nga agserbi iti Nasantoan a Disso—dagiti nasagradoan a kawes ni Aaron a padi ken dagiti annakna.”

Sagsagut dagiti Tattao

20 Pimmanaw dagiti Israelita,

21 ket nangyeg iti sagut dagiti amin a mayat a tumulong iti pannakabangon ti Tolda ti Dios. Inyegda ti amin a kasapulan iti panagdaydayaw ken dagiti maaramid a kawes dagiti papadi.

22 Nagisagut ti amin a mayat a tumulong, lalaki man wenno babai. Adda nagited iti gargantilias, aritos, singsing, kuentas ken amin a kita ti alahas a balitok ket indatonda dagitoy ken ni Yahweh.

23 Nangted dagiti addaan iti de lana nga asul, ube wenno nalabaga; nafino a linen; lupot a naabel iti dutdot ti kalding; napalabaga a lalat ti karnero wenno nafino a lalat.

24 Amin nga addaan iti pirak ken bronse a mabalinna nga isagut ket impanda dagitoy itiApokasta met dagiti addaan iti kayo nga akasia a mabalin a mausar iti patakder.

25 Adda dagiti babbai a nagtibbi iti de lana nga asul, ube, nalabaga ken nafino a linen ket indatagda dagitoy.

26 Adda met dagiti nagtibbi iti dutdot ti kalding.

27 Nagidaton dagiti pangulo kadagiti napateg a bato a karnelia ken dadduma nga alahas a maimontar iti efod ken pektoral,

28 agraman bangbanglo ken lana dagiti pagsilawan, lana a pagkonsagrar ken iti nabanglo nga insenso.

29 Tunggal Israelita nga adda maitulongna ket indatagna ti sagut ken ni Yahweh para iti trabaho a paaramid ni Yahweh ken ni Moises.

Dagiti Agtrabaho iti Tolda ti Dios

30 Kinuna ni Moises kadagiti Israelita, “Pinili tiAponi Bezalel nga anak ni Uri ken apoko ni Hur a nagtaud iti tribu ti Juda.

31 Pinunnona iti bukodna a pannakabalinket nalaing iti amin a kita ti trabaho iti arte.

32 Masirib nga agaramid kadagiti disenio a sukogenna manipud iti balitok, pirak ken bronse;

33 agtabas ken agimontar iti napateg a bato; ken agkitikit iti kayo ken iti amin a kita ti aramid iti arte.

34 Inted tiApokenkuana, kasta met ken ni Oholiab nga anak ni Ahisamac iti tribu ti Dan, ti sirib a mangisuro iti trabahoda kadagiti dadduma.

35 Inikkanna ida iti naidumduma a sirib nga agaramid kadagiti ar-aramiden dagiti kumikitikit, dagiti dibuhista, dagiti umaabel iti de lana nga asul, ube, nalabbaga ken nafino a linen ken dadduma a lupot. Kabaelanda ti amin a kita ti trabaho ket nalaingda a dibuhista.

1 “Da Bezalel ken Oholiab, agraman dagiti amin nga inikkan tiApoiti sirib ken laing, isuda ti agaramid kadagiti amin a kasapulan iti pannakaibangon ti santuario. Masapul nga aramiden ti amin kas imbilin tiApo.”

Ited dagiti Tattao ti Adu a Sagut

2 Inayaban ni Moises da Bezalel, Oholiab ken amin nga inikkan ni Yahweh iti sirib ken laing agraman dagiti mayat a tumulong ket pinairugina kadakuada ti trabaho.

3 Inted ni Moises kadakuada dagiti insagut dagiti Israelita a maipaay iti pannakabangon ti santuario ngem intultuloy dagiti Israelita ti binigat a pannangtedda kadagiti sagutda.

4 Napan dagiti trabahador ken ni Moises,

5 ket imbagada kenkuana, “Ad-adun ngem ti kasapulan ti yeg dagiti tattao a maipaay iti trabaho nga imbilin tiApoa maaramid.”

6 Ngarud, imbilin ni Moises iti entero a kampo a maisardengen ti panagited kadagiti sagut nga agpaay iti santuario. Isu nga awanen ti nagited iti sagut.

7 Nupay kasta, adu unayen ti naipan sadiay a pangleppas iti amin a trabaho.

Maaramid ti Tolda ti Dios

8 Dagiti kalaingan a trabahador ti nangaramid iti Tolda ti Dios. Naaramid daytoy iti sangapulo a pessat a lupot iti tinali a nafino a linen ken naabel iti asul, ube ken nalabaga a de lana, ken nabordaan kadagiti ladawan dagiti kerubim.

9 Agpapada ti rukod ti tunggal pessat: 12 a metro ti kaatiddog ken dua a metro ti kaakaba.

10 Pinagsasaipda ti lima a pessat iti maysa a naig; kasta met ti inaramidda kadagiti lima a pessat.

11 Nangaramidda kadagiti pagyusokan iti lupot nga asul iti akinruar a pingir ti tunggal naig.

12 Saglilimapulo a pagyusokan ti naikapet iti tunggal naig.

13 Nangaramidda iti 50 a kawit a balitok a namagkamang kadagiti dua a naig, isu a sangsangkanayon ti Tolda ti Dios.

14 Kalpasanna, inaramidda ti abbong ti Tolda iti sangapulo ket maysa a pessat ti lupot a naabel iti dutdot ti kalding.

15 Agpapada ti rukod ti tunggal pessat: 13 a metro ti kaatiddog ken dua a metro ti kaakaba.

16 Pinagsasaipda ti lima kadagitoy iti maysa a naig; kasta met ti inaramidda kadagiti innem.

17 Saglilimapulo a pagyusokan ti inkapetda iti pingir ti maudi a pessat iti umuna a naig ken iti pingir ti sabali a naig.

18 Nangaramidda iti 50 a kawit a bronse a pangikamangda kadagiti dua a naig tapno agbalin a maysa nga abbong.

19 Nangaramidda pay iti dua nga abbong, maysa iti napalabbaga a lalat ti karnero ket ti maysa iti nafino a lalat a mayaplag iti rabawna.

20 Nangaramidda kadagiti bastidor ti Tolda manipud iti kayo nga akasia.

21 Sangapulo ket lima a kadapan ti kaatiddog ti tunggal bastidor ket 27 a pulgada ti kalawana.

22 Adda dua nga agpada a sunta ti tunggal bastidor tapno agkakamangda. Sinuntaanda ti amin a bastidor.

23 Nangaramidda iti 20 a bastidor para iti paset ti bangirna iti abagatan ti tolda,

24 ken ti 40 a pirak a pagbatayanda, dua a pagbatayan ti bastidor a mangtengngel iti dua a suntana.

25 Nangaramidda met iti duapulo a bastidor para iti bangirna iti amianan,

26 agraman ti 40 a pirak a pagbatayan, dua a pagbatayan ti tunggal bastidor.

27 Innem a bastidor ti inaramidda nga agpaay iti paset ti bangirna iti laud;

28 ken dua a bastidor nga agpaay kadagiti suli iti likudan ti Tolda.

29 Nagkamang dagitoy pasuli a bastidor iti baba agingga iti tuktok nga yan ti umuna a pagkursongan. Kastoy ti pannakaaramid dagiti dua a bastidor iti dua a suli.

30 Adda ngarud walo a bastidor ken 16 a pirak a pagbatayan; dua a pagbatayan iti tunggal tabla.

31 Nangaramidda iti 15 a balunet iti kayo nga akasia; lima a balunet nga agpaay kadagiti bastidor iti maysa a sikigan ti Tolda;

32 lima nga agpaay kadagiti bastidor iti sabali a sikigan ken lima nga agpaay kadagiti bastidor iti paset iti bangirna iti laud.

33 Inkabilda ti akintengnga a balunet a mamagkakamang kadagiti bastidor manipud iti maysa a sikigan agingga iti sabali.

34 Kinalupkopanda dagiti bastidor iti balitok ket inkapetda ti balitok a pagyusokan a mangtengngel kadagiti balunet a nakalupkopan met iti balitok.

35 Nangaramidda iti kurtina iti nafino a linen, ken naabel iti asul, ube ken nalabaga a de lana ken nabordaan kadagiti ladawan dagiti kerubim.

36 Nangaramidda iti uppat a poste iti kayo nga akasia a pakaibitinan ti kurtina ket kinalupkopanda iti balitok; balitok dagiti inkapetda a kawit. Nangaramidda met iti uppat a pirak a pagbatayan dagiti poste.

37 Para iti pagserkan iti Tolda, nangaramidda iti kurtina iti nafino a linen ken naabel iti asul, ube ken nalabaga a de lana ken nabordaan,

38 agraman iti lima a poste a naikkan kadagiti kawit. Kinalupkopanda iti balitok dagiti tuktok dagiti poste ken dagiti pasikkil. Nangaramidda iti lima a bronse a pagbatayan dagiti poste.

Maaramid ti Lakasa ti Tulag

1 Inaramid ni Bezalel ti Lakasa ti Tulag manipud iti kayo nga akasia. Uppat a pulo ket lima a pulgada ti kaatiddog, 27 a pulgada ti kaakaba ken 27 a pulgada ti kangatona.

2 Puro a balitok ti inkalupkopna iti uneg ken iti ruarna ket balitok met ti impaikingna iti aglikmut.

3 Inyaramidanna iti uppat a pagyusokan a balitok a pagawitan sana inkapet kadagiti uppat a sakana; dua a pagyusokan iti agsumbangir.

4 Nangaramid kadagiti assiw nga akasia, kinalupkopanna ida iti balitok,

5 ket inyusongna dagiti assiw kadagiti pagyusokan iti agsumbangir ti Lakasa.

6 Nangaramid iti kalub iti puro a balitok; 45 a pulgada ti kaatiddog ken 27 a pulgada ti kaakabana.

7 Nangaramid iti dua a kerubim iti napanday a balitok;

8 maysa iti agsumbangir a pungto. Inaramidna ida a sangsangkanayon iti kalub.

9 Siuukrad dagiti payak dagiti kerubim iti ngatoenda; agsinsinnangoda ket linlinonganda ti kalub.

Ti Lamisaan dagiti Tinapay a Maidaton iti Dios

10 Akasia ti inaramid ni Bezalel a lamisaan: 36 a pulgada ti kaatiddog, 18 a pulgada ti kaakaba ken 27 a pulgada ti kangatona.

11 Puro a balitok ti inkalupkopna ket balitok met ti impaikingna iti aglikmut.

12 Pinagdawadawna iti tallo a pulgada ti kaakaba iti aglikmut sana pinaikingan iti balitok.

13 Inyaramidanna iti uppat a balitok a pagyusokan a pangawit iti lamisaan sana inkapet kadagiti uppat a suli a yan dagiti sakana

14 iti asideg ti agdawadaw.

15 Akasia dagiti assiw nga inaramidna a kinalupkopanna iti balitok.

16 Puro a balitok dagiti inaramidna a mausar iti lamisaan: dagiti pinggan, kopa, pitser ken dagiti malukong a pakaikargaan kadagiti daton nga inumen.

Ti Kandelero

17 Inaramid ni Bezalel ti kandelero iti puro a balitok. Pinanday met a balitok ti inaramidna a puon ken ungkayna. Sangsangkanayon iti kandelero dagiti arkosna a kimmopa a sabong ken busel.

18 Innem ti sangana: tallo iti agsumbangir.

19 Iti tunggal sanga, adda kimmopa a sabong a kas iti sukog ti almendras agraman busbusel ken petalo.

20 Adda uppat a kimmopa a sinan-sabong ti almendras ken dagiti busel ti ungkay ti kandelero.

21 Adda busel ti sabong iti baba ti tunggal maysa kadagiti tallo a paris a sanga.

22 Sangsangkanayon dagiti busel ken dagiti sanga iti kandelero; naaramidda iti napanday a puro a balitok.

23 Nangaramid iti pito a pagsilawan para iti kandelero, agraman dagiti puro a balitok a pagarsang ken pagyarsangan.

24 Agdagup iti 35 a kilo a puro a balitok ti inusarna iti kandelero agraman dagiti alikamenna.

Ti Altar a Pagpuoran iti Insenso

25 Akasia ti inaramid ni Bezalel nga altar a pagpuoran iti insenso. Kuadrado ti altar: 18 a pulgada ti kaatiddog, kasta met ti kalawana ken 36 a pulgada ti kangatona. Sangsangkanayon iti altar dagiti sinan-sara kadagiti uppat a sulina.

26 Kinalupkopanna ti rabawna, dagiti uppat a sikiganna ken dagiti sinan-sarana iti puro a balitok. Pinaikinganna iti balitok ti aglikmut.

27 Inyaramidanna iti dua a balitok a pakaiyusokan dagiti assiw ket inkapetna iti baba dagiti iking iti agsumbangir.

28 Akasia dagiti inaramidna nga assiw a kinalupkopanna iti balitok.

Ti Lana a Pagkonsagrar ken ti Insenso

29 Nangaramidni Bezalel iti nasagradoan a lana a pagkonsagrar ken iti nabanglo nga insenso a natempla a kas iti bangbanglo.

Ti Altar a Pagpuoran kadagiti Daton

1 Akasia ti inaramid ni Bezalel nga altar a pagpuoran kadagiti daton. Kuadrado ti altar: 7 1/2 a kadapan ti kaatiddog ken kalawana, ken 4 1/2 a kadapan ti kangatona.

2 Inikkanda kadagiti sinan-saradagiti uppat a suli ket sangsangkamaysada iti altar. Kinalupkopanna amin iti bronse.

3 Bronse dagiti amin nga inaramidna nga alikamen ti altar: dagiti palanggana, pala, kawit, malukong ken palanggana a pagikkan iti beggang.

4 Nangaramid iti bronse a barandilias ket inkabilna iti sirok ti pagdawadawan ti altar, a dumanon iti kagudua ti kangatona.

5 Nangaramid iti uppat a pagkursongan sana inkapet kadagiti uppat a suli ti altar.

6 Inaramidna dagiti assiw iti kayo nga akasia, ket kinalupkopanna iti bronse,

7 sana inyusong kadagiti pagyusokan iti agsumbangir ti altar. Naaramid ti altar kadagiti tabla ket awan nagyan ti unegna.

Ti Bronse a Palanggana

8 Inaramidni Bezalel ti bronse a palanggana ken ti pagbatayanna manipud kadagiti bronse a pagsarmingan dagiti babbai nga agserserbi iti ruangan ti Tolda ti Dios.

Ti Bakud ti Tolda ti Dios

9 Inaramidna ti paraangan ti Tolda ti Dios nga inalikubkobna iti nalamuyot a linen a kurtina. Iti bangirna iti abagatan, 50 a yarda ti kaatiddog dagiti kurtina.

10 Bronse dagiti duapulo a poste ken dagiti duapulo a batayda. Pirak dagiti kawit iti tunggal poste ken dagiti pakaibitinanda.

11 Agpada ti rukod ti paraangan iti bangirna iti amianan

12 ken iti laud, 25 a yarda ti kaatiddog dagiti kurtina a naibitin iti sangapulo a poste a naipasdek iti sangapulo a pagbatayan. Pirak dagiti kawit ti tunggal poste ken dagiti pakaibitinanda.

13 Iti bangirna iti daya a yan ti pagserkan, 25 a yarda ti kalawa ti paraangan.

14-15 Iti agsumbangir ti pagserkan, adda 7 1/2 a yarda a kurtina nga addaan iti tallo a poste ken tallo a pagbatayan.

16 Naaramid iti nalamuyot a tinali a linen ti amin a kurtina iti aglikmut ti paraangan.

17 Bronse dagiti pagbatayan dagiti poste. Pirak met dagiti kawit, dagiti pakaibitinan ken ti naikalupkop kadagiti tuktok ti poste. Napagkakamang dagiti amin a poste ti paraangan babaen kadagiti pirak a pasikkil.

18 Nabordaan ti kurtina ti ruangan ti paraangan ket naaramid iti de lana nga asul, ube, nalabaga ken nalamuyot a tinali a linen. Sangapulo a yarda ti kaatiddog ken 2 1/2 a yarda ti kagayadna a kas iti kurtina ti paraangan.

19 Naibitin iti uppat a poste a naisaad met iti uppat a pagbatayan. Pirak dagiti kawitda, ti naikalupkop iti tuktokda ken dagiti pakaibitinanda.

20 Bronse dagiti amin a pasok ti Tolda ken dagiti pasok ti aglikmut ti paraangan.

Dagiti Metal a Mausar iti Tolda ti Dios

21 Daytoy ti listaan dagiti metal a nausar iti Tolda ti Dios a nakaikabilan dagiti dua a tapi a bato a nakailanadan dagiti Sangapulo a Bilin. Pinaaramid ni Moises daytoy kadagiti Levita a nagtrabaho iti panangidaulo ni Itamar nga anak ni Aaron a padi.

22 Ni Bezalel nga anak ni Uri ken apoko ni Hur iti tribu ti Juda ti nangaramid kadagiti amin nga imbilin ni Yahweh.

23 Ni Oholiab nga anak ni Ahisamac iti tribu ti Dan ti nagpaay a katulongan ni Bezalel. Agkitkitikit ni Oholiab, dibuhista ken agab-abel iti de lana nga asul, ube ken nalabaga ken iti nalamuyot a linen.

24 Agdagsen iti 1,000 a kilo ti amin a balitok a naidaton itiApoken nausar iti pannakaaramid ti santuario. Nausar ditoy ti pagtimbangan ti templo.

25 Agdagsendagiti pirak a naparuar iti pannakasensus dagiti umili iti 3,430 a kilo, segun iti pagtimbangan ti templo.

26 Daytoyti dagup ti binayadan dagiti amin a nasensus; inted ti tunggal maysa ti naituding a gatad, segun iti pagtimbangan ti templo. Agdagup iti 603,550 a lallaki dagiti nailista iti sensus nga agtawen iti 20 wenno nasursurok pay.

27 Nausar ti 3,400 a kilo a pirak iti pannakaaramid dagiti 100 a pagbatayan iti santuario ken dagiti kurtina—34 a kilo iti tunggal pagbatayan.

28 Iti nabati a 30 a kilo a pirak, inaramid ni Bezalel dagiti pagibitinan ti kurtina, dagiti kawit dagiti poste ken ti naikalupkop iti tuktokda.

29 Agdagsen iti 2,425 a kilo dagiti bronse a naidaton itiApo.

30 Dagitoy dagiti naaramid a pagbatayan iti pagserkan iti Tolda ti Dios, ti bronse nga altar agraman bronse a barandiliasna, dagiti amin nga alikamen ti altar,

31 dagiti pagbatayan ti bengbeng iti likmut ti tolda ken ti pagserkanna ken dagiti amin a pasok iti Tolda ti Dios ken dagiti pasok iti aglikmutna.

Dagiti Kawes dagiti Papadi

1 De lana nga asul, ube ken nalabaga ti naaramid a kawes dagiti papadi nga agserbi iti Nasantoan a Disso. Inaramidda ti kawes ni Aaron a kas padi, kas imbilin ni Yahweh ken ni Moises.

2 Inaramidda ti efod iti nafino a linen de lana nga asul, ube ken nalabaga; ken panait a balitok.

3 Nangpitpitda iti balitok agingga nga immingpis ket rinagragasda nga inyabel iti de lana nga asul, ube ken nalabaga ken ti nabordaan a nalamuyot a linen.

4 Inaramidda ti terante ti efod a maikapet iti agsumbangir a sikiganna tapno agkamang.

5 Napintas ti pannakaabel ti barikes a naikamang iti efod ket sangsangkanayonda; naaramid daytoy iti isu met laeng a material, kas imbilin ni Yahweh ken ni Moises.

6 Tinabasda dagiti napateg a bato a karnelia sada immontar kadagiti balitok a pagitampokan. Naikitikit kadagiti bato dagiti nagan dagiti 12 nga annak ni Jacob.

7 Iti terante ti efod ti nakaikabitan dagitoy a mangibagi kadagiti 12 a tribu ti Israel, kas imbilin ni Yahweh ken ni Moises.

Ti Pektoral

8 Inaramidda ti pektoral iti isu met la a material a naaramat iti efod ken isu met la a borda.

9 Kuadrado ti pektoral a nagkulpi iti tengnga; siam a pulgada ti kaatiddog, kasta met ti kaakabana.

10 Minontaranda iti uppat nga intar iti napapateg a bato; iti umuna nga intar, immontarda ti rubi, topasio ken granate;

11 iti maikadua, esmeralda, safiro ken diamante;

12 iti maikatlo, hasinto, agata ken amatista;

13 ket iti maikapat, berilio, karnelia ken jaspe. Naimontar dagitoy iti balitok.

14 Iti tunggal bato, naimontar ti maysa a nagan dagiti annak ni Jacob a mangibagi kadagiti 12 a tribu ti Israel.

15 Nangtalida iti pinitpit a puro a balitok a kordon para iti pektoral.

16 Nangaramidda iti dua a balitok a pagmontaran ken dua a balitok a pagyusokan nga inkapetda kadagiti suli ti pektoral, iti akingngato a pasetna.

17 Inggalutda ti murdong dagiti kordon a balitok kadagiti dua a balitok a pagyusokan.

18 Inggalutda met ti maysa a murdong ti tunggal kordon kadagiti pagmontaran ket kastoy ti pannakaikamangda iti sango kadagiti terante ti efod.

19 Nangaramidda iti dua a pagyusokan a balitok ket inkapetda kadagiti akimbaba a suli ti pektoral iti akin-uneg a gayadan a dumna iti efod.

20 Nangaramidda pay iti dua a pagkursongan a balitok ket inkapetda iti akimbaba a paset ti sango dagiti dua a terante iti asideg ti nagtupian ken ngatoen ti naabel a barikes ti efod.

21 Babaen iti asul a kordon, pinagkamangda dagiti pagyusokan ti pektoral ken dagiti pagyusokan ti efod iti ngatoen ti barikes tapno agsaad ti pektoral iti barikes ket saanda nga agsina. Inaramidda daytoy kas imbilin ni Yahweh ken ni Moises.

Dagiti Dadduma a Kawes ti Padi

22 Puro a de lana nga asul ti inabelda a kagay a rutap ti efod.

23 Tapno saan a mapisang ti putol ti kagay, adda indaitda nga arubite a lebleb iti lawlawna.

24-26 Iti aglikmut ti gayadan ti kagay, nangikabilda kadagiti sinan-bunga ti granada manipud iti de lana nga asul, ube ken nalabaga ken naingpis a tinali a linen a binaetbaetanda kadagiti puro a balitok a kampanilia, kas imbilin ni Yahweh ken ni Moises.

27 Inaramidda dagiti abito ni Aaron ken dagiti annakna,

28 kasta met ti turban, dagiti kallugong, dagiti linen a sapin,

29 ti napintas ti pannakaabelna a linen a barikes ken de lana nga asul, ube ken nalabaga a nabordaan kas imbilin ni Yahweh ken ni Moises.

30 Puro a balitok ti inaramidda nga insignia, ti nasagradoan a pakakitaan ti pannakaidaton. Inkitikitda dagitoy a balikas: “Naidaton ken ni Yahweh.”

31 Inggalutda daytoy iti turban babaen iti asul a kordon kas imbilin ni Yahweh ken ni Moises.

Ti Pannakaileppas ti Trabaho

32 Nalpas ti amin a trabaho iti Tolda ti Dios. Inaramid dagiti Israelita ti amin kas imbilin ni Yahweh ken ni Moises.

33 Impanda ken ni Moises ti Tolda agraman dagiti amin nga alikamenna, dagiti kawit, dagiti bastidor, dagiti balunet, dagiti poste ken dagiti batayna;

34 ti napalabaga nga abbong a lalat ti karnero, ti abbong a nafino a lalat, ti panglinged a kurtina,

35 ti Lakasa ti Tulag a nakaikabilan dagiti tapi a bato, dagiti assiw ken ti kalub ti Lakasa,

36 ti lamisaan ken amin nga alikamenna, ti tinapay a maidaton iti Dios,

37 ti kandelero a puro a balitok ken dagiti pagsilawanna; dagiti pagsilawan ken amin nga alikamenna; ti lana ti pagsilawan;

38 ti altar a balitok; ti lana a pagkonsagrar; ti nabanglo nga insenso; ti kurtina iti pagserkan ti Tolda;

39 ti bronse nga altar agraman ti bronse a barandiliasna, dagiti assiwna, ken dagiti amin nga alikamenna, ti palanggana a pagbuggoan agraman ti pagbatayanna;

40 dagiti kurtina ti paraangan, dagiti poste ken dagiti pagbatayanda; ti kurtina ti pagserkan ti paraangan, dagiti talina, dagiti pasok ti Tolda ken dagiti amin nga alikamen iti panagserbi iti Tolda ti Dios,

41 ken dagiti nadayag a kawes dagiti papadi nga agserbi iti Nasantoan a Disso; dagiti nasagradoan a kawes ni Aaron a padi ken dagiti kawes dagiti annakna.

42 Inaramid dagiti Israelita dagiti amin a trabaho, kas imbilin ni Yahweh ken ni Moises.

43 Sinaggaysa a sinukimat ni Moises ti amin ket nakitana a mayannurot dagitoy iti imbilin ni Yahweh. Iti kasta, binendisionanna amin ida.

Mabangon ken Maidaton ti Tolda ti Dios

1 Kinuna ni Yahweh ken ni Moises,

2 “Iti umuna nga aldaw ti umuna a bulan, bangonemto ti Tolda ti Dios.

3 Ikabilmo iti unegna ti Lakasa ti Tulag a nakaikabilan dagiti Sangapulo a Bilin ket ibitinmo met ti kurtina iti sangona.

4 Yunegmo ti lamisaan samo iparabaw dagiti alikamenna. Yunegmo met ti kandelero ket ikabilmo dagiti pagsilawanna.

5 Ikabilmo ti balitok nga altar a pagpuoran iti insenso iti sango ti Lakasa ti Tulag. Ibitinmo ti kurtina iti ruangan ti Tolda ti Dios.

6 Ikabilmo ti altar a pagpuoran iti daton iti sango ti Tolda.

7 Ikabilmo ti palanggana a pagbuggoan iti nagbaetan ti Tolda ti Dios ken ti altar ket kargaam iti danum.

8 Ikabilmo dagiti kurtina a mangalikubkob iti paraangan, ket kurtinaam ti ruanganna.

9 “Kalpasanna, alaem ti nasagradoan a lana samo warisan ti Tolda ken amin nga alikamenna tapno maikonsagrarda ket agbalinda a nasagradoan.

10 Isarunom nga ikonsagrar ti altar babaen iti panangwarismo iti lana tapno agbalin a naan-anay a sagrado.

11 Kastoy met ti panangikonsagrarmo iti palanggana a pagbuggoan ken ti pagbatayanna.

12 “Ipanmo ni Aaron ken dagiti annakna iti ruangan ti Tolda ti Dios ket digosem ida kas mayannurot iti seremonia.

13 Kalpasanna, yarruatmo ken ni Aaron ti kawesna a kas padi. Sapsapoam ni Aaron iti lana ket ikonsagrarmo tapno agbalin a padi nga agserbi kaniak.

14 Paasitgem met dagiti annakna; yaruatmo kadakuada dagiti tunika.

15 Ket ikonsagrarmo ida a kas iti amada tapno mabalinda ti agserbi kaniak a kas padi. Iti pannakakonsagrarda, agbalinda a padi ken dagiti kaputotanda iti agnanayon.”

16 Tinungpal ni Moises ti amin nga imbilin kenkuana ni Yahweh.

17 Nabangon ti Tolda ti Dios iti umuna nga aldaw ti umuna a bulan iti maikadua a tawen kalpasan ti ipapanawda idiay Egipto.

18 Insaad ni Moises dagiti pagbatayanna, impatakderna dagiti bastidor, inkapetna dagiti balunet ken binangonna dagiti poste.

19 Inyukradna ti abbong iti rabaw ti Tolda ket imparabawna ti akinruar nga abbong, kas imbilin ni Yahweh.

20 Innalana dagiti tapi a bato ket inkabilna iti Lakasa ti Tulag. Inyusokna dagiti assiw sana kinaluban ti Lakasa.

21 Kalpasanna, inkabilna ti Lakasa iti uneg ti Tolda. Imbitinna ti kurtina ket kastoy ti pannakalinged ti Lakasa, kas imbilin ni Yahweh.

22 Inkabilna ti lamisaan iti uneg ti Tolda, iti bangirna iti amianan iti ruar ti kurtina

23 ket imparabawna ti tinapay a naidaton ken ni Yahweh, kas imbilinna kenkuana.

24 Inkabilna ti kandelero iti uneg ti Tolda iti batog ti lamisaan iti bangirna iti abagatan.

25 Insaadna dagiti pagsilawan iti kandelero iti sangoanan ni Yahweh, kas imbilinna kenkuana.

26 Inkabilna ti balitok nga altar iti uneg ti Tolda iti sangoanan ti kurtina,

27 ket pinuoranna ti nabanglo nga insenso, kas imbilin ni Yahweh.

28 Imbitinna ti kurtina iti ruangan ti Tolda.

29 Iti sangoanan ti kurtina, inkabilna ti altar a pagpuoran kadagiti sakrifisio. Iti rabaw ti altar, indatonna dagiti sakrifisio a sibubukel a mapuoran ken ti daton a makan, kas imbilin ni Yahweh kenkuana.

30 Inkabilna ti palanggana iti nagbaetan ti Tolda ken ti altar sana kinargaan iti danum.

31 Ditoy ti pagbuggoan da Moises, Aaron ken dagiti annakna kadagiti ima ken sakada.

32 Agbuggoda tunggal sumrekda iti Tolda ti Dios wenno umasidegda iti altar kas imbilin ni Yahweh ken ni Moises.

33 Binangon ni Moises ti bengbeng iti aglikmut ti Tolda ken ti altar ket imbitinna ti kurtina iti pagserkan ti paraangan. Inleppas ni Moises ti amin a trabaho.

Ti Ulep iti Ngatoen ti Tolda ti Dios

34 Kalpasanna,nagdisso ti ulep a nangkumot iti Tolda ti Dios ket napunno iti makasisirap a lawag ni Yahweh.

35 Gapu iti daytoy, saan a makastrek ni Moises iti Tolda.

36 Sa la yalis dagiti Israelita ti kampoda no agpangato ti ulep manipud iti Tolda.

37 No saan nga umalis ti ulep, saanda met nga umalis iti pagkampoanda.

38 Iti amin a panagdaliasat dagiti Israelita, kumuykuyog latta ti ulep ti dayag ni Yahweh ken ti gumilgil-ayab nga apuy. Iti aldaw, adda ti ulep iti ngatoen ti Tolda ket iti rabii, adda ti apuy iti isu met la a lugar a makita dagiti tattao.