Category: Ezekiel

Dusaento ti Dios ti Jerusalem

1 Impangatonak ti espiritu ti Dios ket impannak iti akindaya a ruangan ti Templo. Iti asideg ti ruangan, nakitak ti 25 a lallaki, agraman dua kadagiti pangulo ti nasion, da Jaazanias nga anak ni Azzur ken Pelatias nga anak ni Benaias.

2 Kinuna ti Dios kaniak, “Anak ti tao, agplano dagitoy a tattao iti dakes ket saan a nasayaat ti pammagbagada iti daytoy siudad.

3 Kunada, ‘Iti saan a mabayag, agbangontayo manen kadagiti balbalay.Natalgedtayo ditoy siudad uray no arigtayo ti karne iti uneg ti kaldero.’

4 Ita ngarud, ibutaktakmo ti kinadakesda.”

5 Inturayannak ti espiritu tiApo, ket imbaga tiApokaniak nga ipakaammok daytoy a mensahe kadagiti tattao, “Dakayo nga Israelita, ammok ti sasawenyo ken no ania ti pangpanggepenyo.

6 Adu unay ti pinapatayyo a tattao iti daytoy a siudad, ket napno dagiti kalsada kadagiti bangkay.

7 “Ngarud, siak, ti Apo aDios, kastoy ti kunak kadakayo. Ala wen, mayarig ti siudad iti kaldero, ngem ania ti karne a mailuto? Dagiti bangkay dagiti pinapatayyo! Awankayto ditoy—ipurruakkayo iti ruar ti siudad!

8 Kabutengyo ti kampilan? Yegkonto dagiti lallaki a nagtagikampilan a mangdarup kadakayo.

9 Iruarkayo iti siudad, ket yawatkayo iti pannakabalin dagiti ganggannaet. Inkeddengko a mapapataykayo

10 ket mataykayto iti gubat iti bukodyo a daga. Iti kasta, maammoanto ti amin a siak ni Yahweh.

11 Dinakayto salakniban daytoy a siudad a kas iti panangsalaknib ti kaldero iti karne a linaonna. Dusaenkayto uray sadinoman nga ayanyo iti daga ti Israel.

12 Maammoanyonto a siak ni Yahweh, ket bayat ti panangsalimetmetyo kadagiti linteg dagiti kabangibang a nasion, sinalsalungasingyo dagiti lintegko ken sinuksukiryo dagiti bilinko.”

13 Idi agipadpadtoak, napasag ni Pelatias ket natay. Nagpaklebak ket impukkawko, “O Apo aDios, papatayem kadi ti tunggal maysa a natda iti Israel?”

Ti Kari ti Dios Kadagiti Napagtalaw

14 Nagsao tiApokaniak.

15 Kinunana, “Anak ti tao, sika ken dagiti padam nga Israelita a napagtalaw a kas balud ti sarsaritaen dagiti agnaed idiay Jerusalem. Kunada, ‘Adayo unay dagiti napagtalaw ket dida mabalin ti agdaydayaw itiApo. Dakami ti nangipatawidanna iti daytoy a daga.’

16 “Ita, ibagam daytoy kadagiti kaduam a napagtalaw. Siak ti nangibaon kadakuada nga agnaed kadagiti adayo a pagilian ket inwarawarak ida kadagiti nadumaduma a nasion. Nupay kasta, siakto ti agpaay a santuarioda bayat ti kaaddada iti sadinoman a pagilian a nakaipananda.

17 “Ibagam ngarud kadakuada ti saok, siak nga Apo aDios. Iruarkonto ida kadagiti nasion a nakaiwarawaraanda ket isublikto kadakuada ti daga ti Israel.

18 Inton dumtengda, masapul nga ikkatenda dagiti amin a narugit ken makarimon nga imahen a masarakanda.

19 Ikkaktoida iti baro a puso ken baro a panunot. Ikkatekto ti bimmato a pusoda ket sukatakto iti puso a natulnog.

20 Iti kasta, annurotendanto dagiti lintegko, ket tungpalendanto a sipapasnek dagiti bilinko. Isudanto dagiti tattaok, ket siakto ti Diosda.

21 Ngem dusaekto dagiti tattao a pagay-ayatda ti agdaydayaw kadagiti narugit ken makarimon nga imahen. Dusaekto ida gapu iti inaramidda. Siak, ti Apo aDios, ti agsasao.”

Panawan ti Dayag ti Dios ti Jerusalem

22 Timmayabdagiti nagpayak a parsua ket simmurot dagiti pilid kadakuada. Adda iti ngatoenda ti makapurar a lawag a mangipakita iti kaadda ti Dios ti Israel.

23 Kalpasanna, pinanawan ti makapurar a lawag ti siudad, ket napan iti tapaw ti bantay iti daya ti siudad.

24 Iti parmata, impangatonak ti espiritu ti Dios, sanak insubli iti ayan dagiti napagtalaw a kas balud idiay Babilonia. Kalpasanna, nagin-inut a napukaw ti parmata,

25 ket imbagak kadagiti napagtalaw ti amin nga imparangarang kaniak tiApo.

Ni Ezekiel a kas Naitalaw a Balud

1 Nagsao tiApokaniak.

2 Kinunana,“Anak ti tao, agnaedka iti sidong dagiti nasukir a tattao. Adda matada, ngem saanda a makakita; adda lapayagda, ngem saanda a makangngeg agsipud ta nasukirda.

3 “Ita, anak ti tao, agbalkotka a kasla napagtalaw a mapan iti adayo. Agrubbuatka sakbay a rumabii tapno makita ti tunggal maysa a pumanawka. Nalabit a makitadaka dagiti nasukir a tattao.

4 No nangato pay laeng ti init, isaganamon ti awitmo a maitalaw tapno makitadaka. Iti sumipnget, ipakitam kadakuada ti ipapanawmo a kas mapagtalaw a balud.

5 Iti imatangda, abutam ti bakud ti balaymo ket ditoy ti pangiruaram iti kargam.

6 Ipakitam ti panangibaklaymo kadagiti gargaretmo. Rummuarka a mapan iti nasipnget ket abbongam dagiti matam tapno dimo makita ti papanam. Pakaballaagan kadagiti Israelita ti aramidem.”

7 Tinungpalko ti imbilin tiApokaniak. Iti dayta nga aldaw idi agsipngeten, insaganak ti awitko a kasla mapagtalaw a balud ket binutbutak ti bakud. Kitkitaenda ti panangibaklayko iti awitko ket rimmuarak.

8 Kabigatanna, nagsao tiApokaniak.

9 Kinunana, “Anak ti tao, ita ta salsaludsoden dagiti nasukir nga Israelita no ania ti ar-aramidem,

10 ibagam kadakuada a siak ti Apo aDios. Kastoy ti kunak kadakuada. Agpaay daytoy a mensahe iti prinsipe nga agdama nga agturay iti Jerusalem ken amin a tattao nga agnanaed sadiay.

11 Ibagam kadakuada a ti inaramidmo ti pagilasinan iti mapasamakto kadakuada—maitalawdanto a kas balud iti sabali a daga.

12 Ibaklayto ti prinsipe a mangiturturay kadakuada dagiti gargaretna iti kasipngetan ket aglibasto a rummuar iti abut a naaramid a ruaranna. Abbongannanto dagiti matana tapno saanna a makita ti papananna.

13 Ngemisarwagkonto kenkuana ti iketko, ket matiliwto. Ipankonto iti siudad ti Babilonia a pakatayanna nupay dina makita dayta a daga.

14 Iwarawarakto iti amin a suli ti daga dagiti ofisiales ti palasiona, dagiti mamalbalakad kenkuana ken dagiti para-bantayna. Birokento ida dagiti tattao tapno papatayenda ida.

15 “Maammoandanto a siak ni Yahweh inton iwarawarak ida kadagiti nasion ken kadagiti sabali a pagilian.

16 Ipaluboskonto ti sumagmamano kadakuada a makalasat iti gubat, bisin ken sakit tapno mabigbigda a makarimon dagiti aramidda ken maammoanda a siak ni Yahweh.”

Ti Pagilasinan iti Agtigtigerger a Profeta

17 Nagsao tiApokaniak.

18 Kinunana, “Anak ti tao, agtigergerka no manganka ken agpigergerka iti buteng no uminumka.

19 Ibagam kadagiti amin nga umili a daytoy ti sao ti Apo aDioskadagiti taga-Jerusalem nga agnanaed pay la iti dagada: Agtigergerdanto no manganda ken agpigergerdanto iti buteng no uminumda. Aglangalangto ti daga gapu ta managdakdakes dagiti amin nga agnaed sadiay.

20 Madadaelto dagiti siudad a napno ita kadagiti tattao, ket agbalinto a let-ang ti pagilian. Iti kasta, mabigbigdanto a siak ni Yahweh.”

Matungpal a Matungpal ti Sao ni Yahweh

21 Nagsao tiApokaniak.

22 Kinunana, “Anak ti tao, apay nga ulit-uliten dagiti Israelita daytoy a pagsasao: ‘Aglabas ti tiempo, ket saan a pumayso dagiti padto’?

23 Ita, ibagam kadakuada a siak nga Apo aDios, kastoy ti kunak maipapan iti dayta. Gibusak dayta a pagsasao. Ket saanton a maisawang iti Israel. Ibagam ketdi kadakuada nga asidegen ti tiempo ket matungpalen dagiti padto!

24 “Awanton ti ulbod a parmata wenno makaallilaw a padto kadagiti Israelita.

25 Siak, ni Yahweh, kasaokto ida, ket matungpalto ti ibagak. Saanen a maitantan. Iti tiempoyo, dakay a nasukir a tattao, tungpalek ti imballaagko nga aramiden kadakayo. Nasaokon,” kuna ti Apo aDios.

26 Kinuna tiApokaniak,

27 “Anak ti tao, ipagarup dagiti Israelita a mabayag pay ti pannakatungpal dagiti padto ken parmatam. Kunada nga ipadpadtom ti mapasamakto iti adayo a masakbayan.

28 Ibagam ngarud kadakuada a siak nga Apo aDiosdaytoy ti kunak, Saanen a maitantan. Matungpal a matungpal ti imbagak. Siak, ti Apo aDios, ti agsasao.”

Padto a Maibusor kadagiti Lallaki a Sinan-Profeta

1 Nagsao tiApokaniak.

2 Kinunana, “Anak ti tao, babalawem dagiti profeta ti Israel, isuda nga agparparbo kadagiti bukodda a padto. Ibagam kadakuada a denggenda ti sao ni Yahweh.”

3 Kastoy ti kuna ti Apo aDios, “Nakakaasi ti pagbanagan dagitoy maag a profeta! Ipakaammoda dagiti ti bukodda a padto ken parboenda ti bukodda a parmata.

4 Dakayo nga Israelita, awan serserbi dagiti profetayo a kas kadagiti musang nga agnaed kadagiti rebrebba ti maysa a siudad.

5 Saanda a guardiaan dagiti paset a nakarbaan dagiti bakud wenno tarimaanen dagiti bakud isut’ gapuna a saan a masalakniban ti Israel no bumtak ti gubat inton dumteng ti aldaw tiApo.

6 Saan nga agpayso dagiti ipakaammoda a parmatada ken ulbod dagiti padtoda. Ibagbagada nga ipakaammoda ti mensahek ngem saanko nga imbaon ida. Namnamaenda ketdin a matungpal ti sasawenda!

7 Kunak kadakuada, ‘Saan nga agpayso dagiti parmata a nakitayo. Pasig nga ulbod dagiti padtoyo. Ibagayo a siak ti akinsao, ngem saanak a nagsao kadakayo.’”

8 Iti kasta, kuna ti Apo aDioskadakuada, “Busorenkayo gapu ta saan a pudno dagiti parmatayo ket kinaulbod dagiti ipakaammoyo.

9 Dandanin ti panangdusak kadakayo a profeta a saan a pudno dagiti parmatayo ken ulbod dagiti padtoyo. Awankayto sadiay inton agtataripnong dagiti tattaok tapno agikeddengda. Dinto mairaman ti naganyo iti listaan dagiti umili ti Israel. Dikayton agsubli iti dagayo. Iti kasta, maammoanyonto a siak ti Apo aDios.

10 “Al-allilawenyodagiti tattaok. Ibagbagayo nga adda urnos ken talna ngem agturay met ti riribuk. No nakapuy ti bakud a bangonen dagiti tattaok, saanyo a patibkeren no di ket palitadaanyo laeng.

11 Ibagam kadagiti profeta a marbanto ti bakudda, gapu ta yegkonto ti bumayakabak a tudo, agbagyonto iti yelo ket umayto ti napigsa nga angin.

12 Inton marpuog ti bakud ket saludsodento dagiti tattao no ania ti naitulong ti palitada nga inkabilda.”

13 “Ita, daytoy ti kuna ti Apo aDios, ‘Iti pungtotko, yegkonto ti napigsa nga angin, bumayakabak a tudo, ken yelo tapno madadael ti bakud.

14 Duprakek a mamimpinsan ti bakud a pinalitadaanda, agingga nga agparang dagiti bato a fondasionna. Magaburankayto inton marba, ket mataykayto. Iti kasta, mabigbigto ti tunggal maysa a siak ni Yahweh.’

15 “Ibuloskonto ti pungtotko iti dayta a bakud ken dagiti nagpalitada. Kalpasanna, kunakto kadakayo nga awanen ti bakud, kasta met dagiti nangpalitada—

16 dagiti profeta a nangipanamnama iti Jerusalem nga awan ti pagdanaganda idinto ta adu ti pagpeggadanda.” Daytoy ti kuna ti Apo aDios.

Padto a Maibusor kadagiti Babbai a Sinan-Profeta

17 Kinuna tiApo, “Ita, anak ti tao, sangoem dagiti babbai a kailiam nga agipakpakaammo iti bukodda a padto. Babalawem ti aramidda.

18 Ibagam ti kuna ti Apo aDioskadakuada:

“Nakakaasi ti pagbanaganyo, dakayo a babbai! Idaitanyo dagiti tattao iti lupot a maiputipot iti pungupungoanda nga usarenda a pagsalamangka. Yaramidanyo pay ida iti abungot ti ulo a pagsalamangka tapno maaddaanda iti pannakabalin iti biag dagiti tattao. Kayatyo nga iturayan ti biag ken patay dagiti tattaok nga agpaay iti pagimbaganyo.

19 Ibabaindak iti imatang dagiti tattaok tapno makagun-odkayo iti sangkabassit a sebada ken sumagmamano a tinapay. Kayatyo a papatayen dagiti tattao a saan a rumbeng a matay, ket palubosanyo nga agbiag dagiti saan a rumbeng nga agbiag. Iti kasta, agsaokayo iti ulbod kadagiti tattaok ket patiendakayo.”

20 Ita, daytoy ti kuna ti Apo aDios, “Diak kayat dagiti lupot a maiputipot kadagiti pungupungoan nga aramatenyo a pangtengngel iti biag ken patay. Rabsutek ida kadagiti imayo, ket palubosak a makalibas dagiti tattaok nga iturayanyo.

21 Pigisek dagiti atiddog nga abungotyo ket ispalek dagiti tattaok iti pannakabalinyo. Iti kasta, mabigbigyonto a siak ni Yahweh.

22 “Babaen kadagiti ulbod a sasawenyo, upayenyo dagiti nalinteg a tattao a diak kayat a pagladingiten. Lapdanyo dagiti managdakdakes a mangtallikud iti kinadakesda tapno maisalakanda.

23 Ngarud, agpatinggan dagiti saan a pudno a parmatayo ken dagiti makaallilaw a padtoyo. Ispalek dagiti tattaok iti pannakabalinyo tapno maammoanyo a siak ni Yahweh.”

Ti Dusa dagiti Agdaydayaw kadagiti Didiosen

1 Sinarungkarandak ti sumagmamano a panglakayen ti Israel ket nakiumanda kaniak maipapan iti pagayatan tiApo.

2 Kalpasanna, nagsao kaniak tiApo.

3 Kinunana, “Anak ti tao, inyawat dagitoy a tattao ti pusoda kadagiti imahen ket yaw-awan ida dagitoy a didiosen tapno agbasolda. Saanko ida a sungbatan iti pannakiumanda kaniak.

4 “Ita, kasaom ida ket ibagam a kastoy ti kunak nga Apo aDios: ‘Siasinoman nga Israelita a masulisog nga agdaydayaw kadagiti imahen a pakaigapuan ti panagbasolna ket kalpasanna makiuman iti maysa a profeta, siak ti sumungbat kenkuana; daytoy ti sungbat a maikari kadagiti ginasut a didiosen a pagdaydayawanna.

5 Dagitoy a didiosen ti nakaigapuan ti panangtallikud kaniak dagiti Israelita ngem sapay koma ta magun-odko manen ti kinapudnoda babaen iti sungbatko.’

6 “Ngarud, ibagam kadagiti Israelita a siak nga Apo aDios, kastoy ti kunak: Agsublikayo kaniak ket isardengyo ti agdaydayaw kadagiti makarimon a didiosenyo.

7 “No tallikudannak ti siasinoman nga Israelita wenno ganggannaet nga agnaed iti Israel ket agdaydayaw kadagiti didiosen a pakaigapuan ti panagbasolna sa kalpasanna makiuman iti profeta—siak, ni Yahweh, ti sumungbat kenkuana.

8 Busorek dayta a tao. Pagbalinek a pakaballaagan dagiti tattao. Ilaksidko iti taripnong dagiti tattaok tapno maammoanyo a siak ni Yahweh.

9 “No maallilaw ti maysa a profeta ket saan a pudno ti ipakaammona, siak ti nangallilaw kenkuana. Ilaksidko kadagiti tattao ti Israel.

10 Agpadpada ti dusa ti profeta ken ti makiuman kenkuana.

11 Aramidek daytoy tapno saandak a tallikudan dagiti Israelita ken saanda a tulawan ti bagida gapu kadagiti basolda. Iti kasta, isudanto ti agbalin a tattaok ket siak met ti Diosda.” Daytoy ti ibaga ti Apo aDios.

Da Noe, Danel ken Job

12 Nagsao tiApokaniak.

13 Kinunana, “Anak ti tao, no agbasol ti maysa a pagilian ket saan a napudno kaniak, dusaek ket dadaelek ti paggapuan ti taraonna. Ipanko ti bisin a mangpapatay a padapada kadagiti tattao ken animal.

14 Uray pay agnaed iti dayta a pagilian dagitoy tallo a lallaki, da Noe, Danelken Job, isuda laeng ti maispal gapu iti nalinteg a panagbiagda.” Daytoy ti kuna ti Apo aDios.

15 “Wenno nalabit a mangibulosak kadagiti narungsot nga animal tapno patayenda dagiti umili ket pagbalinenda a napeggad ti pagilian agingga nga awan ti agdaliasat sadiay,

16 uray no agnaed sadiay dagitoy tallo a lallaki, isapatak iti naganko nga Apo a sibibiag aDios, nga awan ti maisalakanda uray pay dagiti annakda. Ti laeng bagbagida ti maispalda ket agbalinto a maysa a let-ang ti pagilian.

17 “Wenno nalabit a mangyegak iti gubat iti dayta a pagilian a pangipanak kadagiti naranggas nga igam ket patayek amin dagiti tattao agraman dagiti animal,

18 uray no agnaed sadiay dagitoy tallo a lallaki, isapatak iti naganko nga Apo a sibibiag aDios, nga awan ti maispalda uray pay dagiti annakda no di la ti bukodda a biag.

19 “No mangyegak iti angol iti dayta a pagilian ket iti pungtotko, adu a tattao ken animal ti patayek gapu iti pungtotko

20 uray no agnaed sadiay da Noe, Danel ken Job, isapatak iti naganko nga Apo a sibibiag aDios, nga awanto ti maispalda uray dagiti annakda. Tinto laeng bagbagida ti maispal gapu iti kinaimbagda.”

21 Daytoyti sao ti Apo aDios: “Idissuorko ti uppat a kakaroan a pannusak iti Jerusalem—gubat, bisin, narungsot nga animal ken angol—a mangpapatay kadagiti tattao ken animal.

22 No addanto makalasat ket ispalenna dagiti annakna, kitaenyo ida inton umayda kadakayo. Makitayonto no kasano ti kinadakesda ket mamatikayto a nainkalintegan ti dusa nga ipatayko iti Jerusalem.

23 Wen, maammoanyonto nga adda rasonko iti amin nga inaramidko.” Daytoy ti kuna ti Apo aDios.

Ti Pangngarig maipapan iti Ubas

1 Nagsao tiApokaniak.

2 Kinunana, “Anak ti tao, ania ti pakaigiddiatan ti ubas iti kayo? Ania ti pakaigiddiatan ti sanga ti ubas kadagiti kayo ti kabakiran?

3 Adda kadi pakausaranna? Maaramidmo kadi a pasok a mabalin a pagibitinan?

4 No maisungrod ket mauram ti agsimmurdong ket agbalin nga uging ti tengngana, adda pay kadi pakaaramatanna?

5 Awan serserbi ti sanga sakbay a nauram. Ita ta nauram ket nagbalinen nga uging, ad-adda manen nga awan ti pakausaranna.”

6 Ita, kastoy ti sao ti Apo aDios, “Kas iti kayo ti ubas a maala iti kabakiran ket mapuoran, kastanto ti aramidek kadagiti tattao iti Jerusalem.

7 Dusaekto ida. Nalisianda ti maysa nga apuy ngem apuyto met laeng ti mangpapatay kadakuada. Inton dusaek ida, maammoanyonto a siak ni Yahweh.

8 Sinukirdak isut’ gapuna a pagbalinek a let-ang ti dagada.” Daytoy ti kuna ti Apo aDios.

Saan a Napudno ti Jerusalem

1 Nagsao manen tiApokaniak.

2 Kinunana, “Anak ti tao, ipabigbigmo iti Jerusalem dagiti makarimon nga aramidna.

3 Ibagam a daytoy ti sao ti Apo aDiosmaipapan kenkuana:

“Nayanakka iti daga ti Canaan. Maysa nga Amorreo ti amam ket Heteomet ti inam.

4 Idi naipasngayka, awan ti nangputed iti pusegmo wenno nangdigos kenka wenno nangrasras kenka iti asin wenno nangbungon kenka iti lampin.

5 Awan ti nangngaasi kenka a nangaramid kadagitoy. Idi maipasngayka, awan ti nangipateg kenka ket imbellengdaka iti kataltalonan.

6 “Nairana a limmabasak ket nakitak nga agkusaykusayka iti bukodmo a dara. Uray no nalapunoska iti dara diak impalubos a matayka.

7 Pinatanorka a kas iti nasalun-at a mula. Pimmigsa ken dimmakkelka ket nagbalinka a balasang. Napintas ti pannakabukel dagiti susom ket immatiddog dagiti buokmo ngem lamolamoka.

8 “Idi lumabasak manen, nakitak a dimtengen ti tiempo a makiinnayatka. Inabbongak ti lamolamo a bagim iti kagayko ket inkarik nga ayatenka. Wen, nakitulagak kenka nga asawaenka ket tinagikuaka.” Daytoy ti kuna ti Apo aDios.

9 “Dinigoska; binuggoak ti dara iti bagim ket sinapsapoanka iti lana ti olibo.

10 Kinawesanka iti nabordaan a pagan-anay. Inikkanka iti sapatos a naaramid iti kasayaatan a lalat. Inikkanka iti linen a dalungdongmo ken seda a kagaymo.

11 Inikkanka kadagiti alahas nga usarem—pulseras ken kuentas.

12 Inikkanka iti singsing ti agongmo ken aritos ken napintas a korona nga isaadmo iti ulom.

13 Naaddaanka kadagiti alahas a pirak ken balitok ket kanayon nga agkaweska iti nabordaan a linen ken seda a pagan-anay. Nangnanganka iti tinapay a naaramid iti kasayaatan nga arina. Adda diro ken lana ti olibo a taraonmo. Nagpaiduma ti pintasmo ket nagbalinka a reyna.

14 Nagdinamag ti pintasmo iti tunggal pagilian. Awan ti pagkurangan ti kinapintasmo ta pinagbalinka a nakapimpintas.” Daytoy ti kuna ti Apo aDios.

15 “Pinagpannakkelmo ti pintasmo. Inusarmo ti kinalatakmo a panggargari ket nagbalinka a kasla balangkantis iti siasinoman nga agtarigagay kenka.

16 Inaramatmo ti sumagmamano a pagan-anaymo a pinangarkosmo kadagiti lugar a pagdaydayawam, ket kas iti balangkantis a babaiintedmo ti bagim iti siasinoman a mayat kenka.

17 Innalam dagiti intedko kenka nga alahas a balitok ken pirak. Sinukogmo ida nga imahen dagiti lallaki ket nakikamalalaka kadakuada.

18 Inkawesmo kadagitoy nga imahen dagiti nabordaan a bado nga intedko kenka. Indatagmo kadakuada ti lana ti olibo ken ti insenso nga intedko kenka.

19 Inikkanka iti taraon—ti kasayaatan nga arina, lana ken diro—ngem indatagmo dagitoy a daton kadagiti didiosen.” Daytoy ti kuna ti Apo aDios.

20 “Kalpasanna, innalam dagiti annakta a lallaki ken babbai ket pinuoram ida a kas daton kadagiti imahen. Di pay la immanay aya ti panangtallikudmo kaniak,

21 ta innalam pay dagiti annakko ket indatonmo ida kadagiti didiosen?

22 Bayat ti nakababain a panagbiagmo a kas balangkantis a babai, nalipatam a namimpinsan ti kinaubingmo idi lamolamoka nga agkusaykusay iti daram.”

Ti Panagbiag ti Jerusalem a kas Balangkantis a Babai

23 Kinuna ti Apo aDios, “Asika pay ta dakes ti pagtungpalam. Kalpasan ti panangaramidmo kadagita a kinadakes,

24 iti igid ti tunggal kalsada, nangbangonka iti pagdaydayawan kadagiti imahen ket nakikamkamalalaka.

25 Inlubnakmo ti kinapintasmo. Indiayam ti bagim iti tunggal aglabas, ket inaldaw a nagbalangkantiska.

26 Nakikaiddaka kadagiti Egipcio a naderrep a kaarrubam, ket pinagpungtotnak iti pannakikamalalam.

27 “Inlayatkon ti imak a mangdusa kenka: ikkatek ti bingaymo kadagiti bendisionko. Inyawatka kadagiti Filisteo a manggurgura kenka ken marimon kadagiti narugit nga aramidmo.

28 “Gapu ta awan ti pannakapnekmo, intedmo pay ti bagim kadagiti taga-Asiria, ngem nawawka latta iti kinaderrep.

29 Namin-adu pay a nakikaidda kadagiti taga-Babilonia, kadagiti tattao nga agtagtagilako, ngem kaskasdi a dika napnek kadakuada.”

30 Daytoy ti kuna ti Apo aDios, “Inaramidmo amin dagitoy a kas awan bainna a balangkantis a babai.

31 Iti igid ti tunggal kalsada, nangbangonka kadagiti pagdaydayawan kadagiti imahen ken nakikamkamalalaam. Ngem saan a kuarta ti kalkalikagumam a kas kadagiti gagangay a balangkantis a babbai.

32 Mannakikamalala a babai, kaykayatmo pay ti makikaidda kadagiti ganggannaet ngem iti bukodmo nga asawa.

33 Ngem nakarkaroka pay ngem iti balangkantis a babai, ta saanka a patangdanan iti pannakikaiddam. Sika ketdi ti mangted iti pasuksok kadagiti kaayan-ayatmo nga umay manipud iti amin a suli ti lubong tapno makikaiddada kenka.

34 Maigiddiatka ngarud kadagiti dadduma a balangkantis a babbai. Awan ti nangpilit kenka nga agbalin a kasta. Saandaka a tinangdanan. Sika ketdi ti nagbayad kadakuada. Wen, naidumdumaka a balangkantis a babai.”

Ti Panangdusa ti Dios iti Jerusalem

35 Ita, Jerusalem, sika a balangkantis a babai, denggem ti sao tiApo.

36 Daytoy ti kuna ti Apo aDios, “Naglabuska ket kaska la balangkantis a babai a nangidiaya iti bagim kadagiti kaayan-ayatmo ken kadagiti amin a makarimon a didiosen. Pinapataymo dagiti annakmo a kas daton kadagiti didiosen.

37 Gapu iti daytoy, ummongekto dagiti amin a kaayan-ayatmo, dagiti impatpategmo ken dagiti ginurguram. Tiponekto amin ida iti lawlawmo, ket labusankanto tapno makitada a lamolamoka.

38 Dusaenkanto gapu iti pannakikamalala ken panagpapataymo. Iti pungtot ken ungetko, ikeddengkonto a mapapatayka.

39 Yawatkanto iti pannakabalinda. Rakrakendanto dagiti lugar a nakikamalalaam ken nagdaydayawam kadagiti didiosen. Alaendanto dagiti amin a kawesmo ken dagiti alahasmo, ket panawandakanto a lamolamo.

40 “Mangsugsogdanto kadagiti tattao a mangubor kenka, ket rangrangkayendakanto babaen kadagiti kampilanda.

41 Puorandanto dagiti balaymo agingga a dumapu. Dusaendakanto iti imatang ti adu a babbai. Pagsardengenkanton a makikamalala, ket dikanton mangted iti pasuksok kadagiti kaayan-ayatmo.

42 Agbaawton ti pungtotko, ket agulimekakton. Diakton agunget wenno agimon.

43 Nalipatam ti panangtaripatok kenka idi ubingka, ket pinagpungtotnak gapu kadagiti amin nga inaramidmo. Isut’ gapuna a dinusaka gapu kadagitoy. Apay a nakikamalalaka pay malaksid iti amin a makarimon nga inaramidmo?” Daytoy ti kuna ti Apo aDios.

No Ania ti Ina, kasta met ti Anakna a Babai

44 Kinuna tiApo, “Aramatento dagiti tattao daytoy a pagsasao maipapan kenka, Jerusalem: ‘No ania ti ina, kasta met ti anakna a babai.’

45 Pudno a sika ti babai nga anak ni inam. Karurodna ti asawana ken dagiti annakna. Kaska la kadagiti kakabsatmo a babbai a nanggura kadagiti assawada ken kadagiti annakda. Sika ken dagiti kakabsatmo, Heteo ti inayo, ket Amorreoti amayo.

46 “Inauna a kabsatmo ti Samaria iti amianan agraman dagiti barriona. Ti Sodoma iti abagatan agraman dagiti barriona ti inaudi a kabsatmo.

47 Ngem dika napnek a simmurot iti panagbiagda ken timmuladka kadagiti makarimon nga aramidda. Iti saan a nabayag, dakdakes ti amin nga aramidmo ngem ti amin nga inaramidda.”

48 Kuna ti Apo aDios, “Iti naganko a sibibiag a Dios, isapatak a saan nga inaramid ni kabsatmo a Sodoma agraman dagiti barriona ti inaramidmo ken ti inaramid dagiti barriom.

49 Napalangguadda idi—isu ken dagiti annakna a babbai agsipud ta adu ti taraonda ket nagbiagda a natalna ken naulimek. Nupay kasta, saanda a tinulongan dagiti napanglaw ken dagiti marigrigat.

50 Napalangguad ken natangken ti uloda, ket inaramidda dagiti kagurak, isu a dinadadaelko ida a kas maiparbeng.

51 “Nagbasol ti Samaria ngem awan pay kagudua laeng koma ti nagbasolam. Ad-adu ti makarimon nga inaramidmo ngem ti inaramidna. Kasla awan basol dagiti kakabsatmo a babbai no maidilig ti aramidda iti aramidmo.

52 Ita, masapul a sagabaem ti pannakaibabainmo. Nakarkaro ti basolmo ngem ti basol dagiti kakabsatmo, ket kasla awan basolda no maidiligda iti basolmo. Ita, agbainka ket sagabaem ti pannakaibabainmo, ta pagparangem dagiti kakabsatmo a kasla nadalusda.”

Maisubli ti Sigud a Kasasaad ti Sodoma ken Samaria

53 Kinuna tiApoiti Jerusalem, “Parang-ayekto manen ti Sodoma ken ti Samaria agraman dagiti barrioda. Uray sika, parang-ayenkanto met.

54 Ibainmonto ti bagim, ket ti pannakaibabainmo, ipakitananto kadagiti kakabsatmo ti kinarang-ayda.

55 Rumang-aydanto manen, ket agsublinto met ti sigud a kasasaadmo agraman dagiti barriom.

56 Dimo aya nagang-angawan ti Sodoma idi narang-ayka pay,

57 sakbay a naibutaktak ti dakes nga aramidmo? Ita, kaska met kenkuana—pagang-angawandaka dagiti Edomita, Filisteo ken dagiti dadduma a kaarubam a gumurgura kenka.

58 Masapul nga agsagabaka gapu kadagiti naalas ken nakababain nga inaramidmo.” Daytoy ti kuna tiApo.

Ti Tulag a Mataginayon

59 Kuna ti Apo aDios, “Ipatayko kenka ti pannusa a maitutop iti panangtallikudmo kadagiti karim ken panangsalungasingmo iti tulag.

60 Nupay kasta, bigbigek ti nagtulaganta idi ubingka pay, ket agtulagta iti mataginayon.

61 Malagipmonto ti inaramidmo, ket pagbabainamto inton mapasublim ti inauna ken inaudi a kakabsatmo. Pagbalinekto ida a kasla annakmo a babbai, nupay saan a paset daytoy ti nagtulaganta.

62 Pabaroekto ti nagtulaganta, ket maammoamto a siak ni Yahweh.

63 Pakawanekto ti amin a dakes nga aramidmo, ngem malagipmonto ida, ket dikanto makapagtimek gapu iti napalalo a bainmo.” Daytoy ti kuna ti Apo aDios.

Ti Pangngarig maipapan iti Dua nga Agila ken iti Ubas

1 Nagsao tiApokaniak.

2 Kinunana, “Anak ti tao, kasaom dagiti Israelita babaen iti pangngarig

3 tapno maammoanda ti ibagbagak kadakuada, siak ti Apo aDios: Adda idi dakkel nga agila a dimteng idiay Bantay Libano. Siuukrad dagiti atitiddog a payakna ken napipintas ken agduduma ti maris dagiti dutdotna. Nangtukkol iti murdong ti kayo a sedro,

4 ket impanna iti daga dagiti komersiante. Indissona iti siudad dagiti agtagtagilako.

5 Kalpasanna, nangala iti naganus a mula iti daga ti Israel, ket immulana iti nadam-eg a talon a kanayon a madanuman.

6 Dimmakkel ti mula, ket nagbalin a nababa nga ubas a nagsaknap dagiti sangana. Nagpangato dagiti sanga nga agturong iti agila; nagpauneg dagiti ramutna. Narukbos ti sanga ken bulong ti ubas.

7 “Adda sabali a dakkel nga agila nga addaan iti dadakkel a payak ken napupuskol a dutdot. Ita, inturong ti ubas dagiti ramutna iti agila kasta met dagiti bulongna bareng no ad-adu ti danum nga itedna ngem ti danum ti hardin a nakaimulaanna.

8 Ngem naimulan ti ubas iti talon a nadam-eg ken nasayaat ti pannakadanumna. Iti kasta, agtubo dagiti bulongna, agbunga ken agbalin a narukbos nga ubas.

9 “Siak nga Apo aDios, saludsodek, ‘Agbiag ken dumakkel kadi daytoy nga ubas? Dinto aya paruten ti immuna nga agila, rurosenna dagiti bungana, tukkolenna dagiti sangana, ket bay-anna a magango?’ Saan a masapul ti adu a pigsa wenno nabileg a nasion a pangparut kenkuana.

10 Agpayso a naimula, ngem agbiag ken dumakkel kadi? Saan ngata a malaylay no dalapusen ti angin nga aggapu iti daya? Dinto ngata malaylay iti lugar a nakaimulaanna?”

Mailawlawag ti Pangngarig

11 Kinuna tiApokaniak,

12 “Saludsodemkadagitoy nasukir a tattao no ammoda ti kayat a sawen ti pangngarig. Ibagam kadakuada nga immay ti ari ti Babilonia ditoy Jerusalem ket inyawidna idiay Babilonia ti ari ti Jerusalem agraman dagiti ofisialesna.

13 Nangala ti maysa kadagiti familia ti ari, nagtulagda ket pinagsapatana a dina salungasingen ti nagtulaganda. Innalana ti sumagmamano a natan-ok a lallaki a kas balud

14 tapno lapdanna nga umalsa manen dagiti tattao ken tapno masigurado a matungpal ti nagtulaganda.

15 Ngem immalsa ti ari ti Juda, ket nangibaon kadagiti pannakabagina a mapan idiay Egipto tapno mangalada kadagiti kabalio ken iti adu a soldado. Agballigi ngata ti ari? Maliklikanna ngata ti pannakadadaelna no kasta ti aramidna? Saan! Madusa a madusa no salungasingenna ti tulag.”

16 Kuna ti Apo aDios, “Iti naganko a sibibiag a Dios, isapatak a matayto daytoy nga ari idiay Babilonia agsipud ta sinalungasingna ti karina ken ti nagtulaganda iti ari ti Babilonia a nangisaad kenkuana iti trono.

17 Uray ti nabileg nga armada ti ari ti Egipto, dinanto matulongan a manggubat kadagiti taga-Babilonia inton agaramidda kadagiti sarikedked ken agkalida kadagiti abut tapno agpapatayda iti adu a tattao.

18 Sinalungasingna ti karina ken ti nakitulaganna. Inaramidna amin dagitoy, ket ita, dinto makalisi.”

19 Kuna ti Apo aDios, “Siak ti sibibiag a Dios, ket dusaekto ti ari ti Juda ta sinalungasingna ti tulag a sinapataanna a tungpalen iti naganko.

20 Isarwagkonto kenkuana ti iket ti maysa a mangnganup ket matiliwto. Ipankonto idiay Babilonia ket dusaekto sadiay ta saan a nagtalinaed a napudno kaniak.

21 Matayto iti gubat dagiti amin a kalaingan a soldadona, ket mawarawaranto dagiti makalasat iti amin a suli ti daga. Iti kasta, maammoamto a siak, ni Yahweh, ti nagsao.”

Ikari ti Dios ti Namnama

22 Kastoy ti kuna ti Apo aDios,

“Mangalaakto iti rawis ti natayag a sedro,

ket mangsip-akakto iti naganus a saringit.

Imulakto iti tapaw ti nangato a bantay,

23 iti kangatoan a bantay ti Israel.

Agsanganto ket agbunga;

agbalinto a narukbos a sedro.

Agumokto ti amin a kita ti tumatayab,

ket agapondanto iti sirokna.

24 Maammoanto amin a kayo ti daga a siak ni Yahweh.

Pukanek dagiti natatayag a kayo,

ket padakkelek dagiti kayo a babassit.

Pagangoek dagiti nalangto a kayo,

ket palangtoek manen dagiti kayo a nagango.

Siak, ni Yahweh, ti nagsao. Ibanagko ti imbagak nga aramiden.”

Akem ti Tunggal Maysa

1 Nagsao tiApokaniak.

2 Kinunana,“Ania ti kaipapanan daytoy a pagsasao dagiti tattao iti daga ti Israel?

‘Kinnan dagiti nagannak dagiti naalsem nga ubas,

Ngem dagiti ngipen dagiti annak ti naalino.’”

3 Kuna ti Apo aDios, “Iti naganko a sibibiag a Dios, ikarik a diyonton baliksen daytoy a proberbio iti Israel.

4 Kukuak ti biag ti tunggal tao, ti biag ti ama agraman ti biag ti anak; ti tao nga agbasol isu ti matay.

5 “Kas pangarigan adda tao a pudno a naimbag, nalinteg ken napudno.

6 Saan nga agdaydayaw kadagiti didiosen a pagdaydayawan dagiti Israelita wenno mangan kadagiti daton a naidatag kadagiti maiparit a pagdaydayawan. Dina gargarien ti asawa ti sabali a tao wenno kaiddaen ti babai a madama nga agkadawyan.

7 Saanna a sauren wenno takawan ti siasinoman. Isublina ti isalda ti umutang kenkuana. Pakanenna dagiti mabisin ken ikkanna iti bado ti lamolamo.

8 Saanna a paanakan ti ipautangna. Dina kayat ti agaramid iti dakes, ket risutenna a sililinteg ti aniaman a riri.

9 Agtulnogdayta a tao kadagiti bilinko ket tungpalenna a siaannad dagiti lintegko. Nalinteg daytoy a tao ket agbiagto,” kuna ti Apo aDios.

10 “Kas pangarigan adda anakna a mannanakaw ken mammapatay a mangaramid kadagiti banag

11 a saan a pulos nga inaramid ni amana. Mangan iti taraon a naidaton kadagiti maiparit a lugar a pagdaydayawan ken gargarienna ti asawa ti sabali a tao.

12 Saurenna dagiti napanglaw, agtakaw, saanna nga isubli ti naisalda kenkuana. Mapan kadagiti lugar a pagdaydayawan dagiti pagano ket agdaydayaw kadagiti makarimon a didiosen.

13 Paanakanna ti pautangna. Agbiag ngata dayta a tao? Saan! Inaramidna amin dagitoy makarimon a banag, ket awan duadua ti ipapatayna. Isunto ti akimbasol iti ipapatayna.

14 “Kas pangarigan adda anak daytoy a tao. Masaksianna ti kinadakes ni amana, ngem dina tuladen ti aramidna.

15 Saan nga agdaydayaw kadagiti didiosen a pagdaydayawan dagiti Israelita. Di met mangan iti taraon a naidaton kadagiti maiparit a lugar a pagdaydayawan. Saanna a gargarien ti asawa ti sabali a tao.

16 Saanna nga idadanes wenno takawan ti siasinoman. Isublina ti isalda kenkuana ti umutang. Ikkanna iti taraon dagiti mabisin ken badoanna dagiti lamolamo.

17 Dina kayat ti agaramid iti dakesken dina paanakan ti pautangna. Tungpalenna dagiti bilinko, ket annurotenna dagiti lintegko. Saanto a matay gapu kadagiti basol ni amana ngem agbiagto.

18 Nagsaur ken nagtakaw ni amana, ket pasig a dakes ti inaramidna iti amin. Iti kasta, natay gapu kadagiti basolna.

19 “Ngem saludsodenyo, ‘Apay a saan a madusa ti anak gapu kadagiti basol ti amana?’ Gapu ta inaramid ti anak ti nalinteg ken naimbag. Dina sinalungasing dagiti lintegko, ket siaannad a nangannurot kadakuada, isut’ gapuna nga agbiagto.

20 Titao nga agbasol, isunto ti matay. Saan nga agsagaba ti anak gapu kadagiti basbasol ni amana. Saan met nga agsagaba ti ama gapu kadagiti basol ti anakna. Magunggonaan ti naimbag a tao gapu iti naimbag nga aramidna. Agsagaba met ti dakes a tao gapu iti dakes nga aramidna.

21 “No isardeng ti managdakdakes ti panagbasolna, ket tungpalenna amin a lintegko, no aramidenna ti nalinteg ken naimbag, saanto a matay. Awan duadua nga agbiagto.

22 Mapakawanto dagiti amin a basolna, ket agbiagto gapu ta naimbag ti inaramidna.

23 Maragsakanak aya iti ipapatay ti managdakdakes?” kuna ti Apo aDios. “Saan! kaykayatko ketdi nga agbabawi iti dakes nga aramidna tapno agbiag.

24 “Ngem no isardeng ti nalinteg a tao dagiti naimbag nga aramidna, ket agaramid ketdi iti dakes ken nakababain nga aramid dagiti managdakdakes, agbiagto kadi? Saan. Awanto ti malagip kadagiti naimbag nga aramidna. Matayto gapu iti saanna a panagtalinaed a napudno ken gapu kadagiti basolna.

25 “Ngem kunayo, ‘Saan a nalinteg ti aramid ti Apo aDios.’ Denggendak, dakayo nga Israelita. Ipagarupyo kadi a saan a nalinteg ti aramidko? Dakayo ti saan a nalinteg ti aramidna.

26 No isardeng ti nalinteg a tao ti agaramid iti naimbag sa agaramid iti kinadakes ket matay, dagiti dakes nga aramidna ti pakaigapuan ti ipapatayna.

27 Ngem no isardeng ti managdakdakes ti dakes nga aramidna, ket aramidenna ti nalinteg ken naimbag, maisalakanna ti biagna.

28 Mabigbigna ti kinadakesna ket insardengna ti agbasol. Iti kasta, saanto a matay no di ket agtultuloy ti panagbiagna.

29 Dakayo nga Israelita, kunayo, ‘Saan a nalinteg ti aramid ti Apo aDios.’ Ipagarupyo kadi a saan a nalinteg ti aramidko? Dakayo ti saan a nalinteg ti aramidna.

30 “Ita, siak nga Apo aDios, kunak kadakayo nga Israelita nga ukomek ti tunggal maysa kadakayo kas mayannatup iti aramidna. Agbabawikayo ket isardengyo ti agaramid iti dakes; diyo ipalubos a dadaelennakayo ti basolyo.

31 Isardengyo ti amin a dakes nga aramidyo ket pabaroenyo ti nakem ken pusoyo. Apay nga ipalubosyo a mataykayto, dakayo nga Israelita?

32 Diakkayat a matay ti siasinoman,” kuna ti Apo aDios. “Isardengyo ti agbasol ket agbiagkayo.”

Dung-aw

1 Imbaga kaniak tiAponga ikantak daytoy a dung-aw a maipaay iti dua a prinsipe ti Israel:

2 Pudno a leon ti inam!

Pinadakkelna dagiti urbonna

iti bunggoy dagiti narungsot a leon.

3 Nangpatanor iti urbon ket

insurona nga aganup;

dimmakkel ket naglamut kadagiti tao.

4 Nadamag daytoy dagiti nasion,

ket tiniliwda iti palab-og.

Inkabilda iti tangkal,

ket impanda idiay Egipto.

5 Nagur-uray ti ina ti leon

agingga a napukaw ti namnamana.

Nangpatanor manen iti maysa kadagiti urbonna,

ket nagbalin a narungsot a leon.

6 Idi nakadakkelen, nakipagdakiwas kadagiti padana a leon;

nasursurona ti aganup ken aglamut iti tao.

7 Nagrakrak kadagiti sarikedked

ket nagdadael kadagiti ili.

Tunggal agungor, agbuteng dagiti tattao.

8 Nagmaymaysa dagiti nasion a manggubat kenkuana;

naggapu dagiti tattao iti amin a lugar.

Impakatda dagiti iketda,

ket tiniliwda ti leon iti siloda.

9 Inkabilda iti tangkal,

ket impanda iti ari ti Babilonia.

Impupokda sada binantayan a naimbag,

tapno saanen a mangngeg ti ungorna

kadagiti turod ti Israel.

10 Mayarig idi ni inam iti ubas

a naimula iti igid ti waig,

adu ti bulong ken bungana gapu iti kaadu ti danum.

11 Nalagda dagiti sanga ti ubas,

ket nagbalin a setro ti ari.

Timmayag ket nadanonna dagiti ulep.

Nakita ti amin ti rangpaya ken tayagna.

12 Ngem pinarut dagiti naranggas nga ima

ket impurruakda iti daga.

Nagango dagiti bungana,

gapu iti angin nga aggapu iti daya.

Nasip-ak dagiti sangana,

nagango ket napuoranda.

13 Ita, naimulan iti let-ang,

iti namaga ken natikag a daga.

14 Nauram ti puon ti ubas,

kasta met dagiti sanga ken bungana.

Awanen nalagda a sangana

a mabalin a maaramid a setro ti ari.

Maysa a dung-aw daytoy a namin-adu a naikankanta.

Ti Pagayatan ti Dios ken ti Panagsukir ti Tao

1 Iti maika-10 nga aldaw, iti maikalima a bulan, iti maikapito a tawen ti pannakaipanawmi, immay kaniak ti sumagmamano a panglakayen dagiti Israelita tapno ammoenda ti pagayatan tiApo. Nagtugawda iti sangoanak.

2 Nagsao tiApokaniak.

3 Kinunana, “Anak ti tao, ibagam kadagitoy a panglakayen a kastoy ti kunak, ni Yahweh a Dios: ‘Immaykayo kadi tapno ammoenyo ti pagayatak? Iti naganko, siak a sibibiag a Dios, isapatak a diak ipalubos nga agsaludsodkayo kaniak.’” Daytoy ti kuna ti Apo aDios.

4 “Anak ti tao, nakasaganaka kadi a mangukom kadakuada? Ukomem ngarud ida. Ipalagipmo dagiti makarimon nga inaramid dagiti kapuonanda.

5 Ibagamkadakuada ti kunak. Idi pinilik ti Israel, nagsapataak kadakuada. Imparangarangko ti bagik kadakuada idiay Egipto. Imbagak kadakuada: ‘Siak ni Yahweh a Diosyo.’

6 Insapatak iti daydi met la nga aldaw nga iruarko ida idiay Egipto ket ipanko ida iti insaganak a daga, daga a nabaknang ken nadam-eg ken daga a kasayaatan.

7 Imbagak kadakuada nga ibellengda dagiti makarimon a didiosen nga ipangpangrunada ket dida tulawan dagiti bagbagida kadagiti didiosen ti Egipto, ta siak ni Yahweh a Diosda.

8 Ngem sinukirdak ket didak impangag. Dida imbelleng dagiti makarimon nga imahenda wenno tinallikudan dagiti didiosen ti Egipto. Kayatko idi nga idissuor ti amin a pungtotko kadakuada idiay Egipto.

9 Ngem diak inaramid daytoy, ta diak kayat a madadael ti naganko; ngamin, imbagak kadagiti Israelita iti imatang dagiti tattao a pakipagnaedanda, nga iruarko ida iti Egipto.

10 “Ngarud, inruarko ida idiay Egipto ket inturongko ida idiay let-ang.

11 Intedkokadakuada dagiti bilbilinko ket insurok kadakuada dagiti linlintegko a makaited iti biag iti siasinoman a mangannurot kadakuada.

12 Pinagbalinkoti pannakangilin dagiti Aldaw a Panaginana a kas pakakitaan iti nagtutulaganmi tapno maammoanda a siak ni Yahweh a mamagsanto kadakuada.

13 Ngem uray idiay let-ang, nagsukirda kaniak. Sinalungasingda dagiti lintegko ket dida inannurot dagiti bilinko a makaited iti biag iti siasinoman a mangannurot kadakuada. Pulos a saanda a nginilin ti aldaw a panaginana. Sisasaganaak a mangidissuor kadakuada ti amin a pungtotko idiay let-ang tapno matayda.

14 Ngem diak inaramid daytoy ta diak kayat a madadael ti naganko iti imatang dagiti nasion a nakakita iti panangiruarko kadagiti Israelita idiay Egipto.

15 Ngarud,insapatak idiay let-ang a diak ipan ida iti daga nga intedko kadakuada, daga a nabaknang ken nadam-eg; daga a kasayaatan.

16 Insapatak daytoy ta dida inannurot dagiti bilinko, sinalungasingda dagiti lintegko ken dida nginilin ti aldaw a panaginana. Kinaykayatda ti agdaydayaw kadagiti didiosenda.

17 “Ngem kinaasiak ida. Napanunotko a diak patayen ida idiay let-ang.

18 Binallaagak ketdi dagiti annakda a dida annuroten dagiti linteg dagidi kapuonanda, dida tungpalen dagiti bilinda, dida tuladen dagiti ugalida ken dida agdaydayaw kadagiti didiosenda tapno dida matulawan.

19 Siak tiApoa Diosyo. Tungpalenyo dagiti linteg ken bilinko.

20 Ngilinenyo ti Aldaw a Panaginana kas nasantoan nga aldaw, tapno isut’ mangipakita iti nagtutulagantayo ken mangipalagip kadakayo a siak ni Yahweh a Diosyo.

21 “Ngem binusornak dayta a kaputotan. Sinalungasingda dagiti lintegko ket dida tinungpal dagiti bilin a makaited iti biag iti siasinoman a mangannurot kadakuada. Dida nginilin ti Aldaw a Panaginana. Kayatko idi nga idissuor ti amin a pungtotko kadakuada idiay let-ang ket papatayek amin ida.

22 Ngem diak inaramid daytoy ta diak kayat a madadael ti naganko iti imatang dagiti pagilian a nakakita iti panangiruarko kadagiti Israelita idiay Egipto.

23 Isut’gapuna a nagsapataak manen idiay let-ang. Insapatak nga iwarasko ida iti entero a lubong.

24 Inaramidko daytoy ta dida inannurot dagiti bilinko, sinalungasingda dagiti lintegko, dida nginilin ti Aldaw a Panaginana, ket nagdaydayawda kadagiti didiosen a nagdaydayawan met dagiti kapuonanda.

25 Kalpasanna, inikkak ida kadagiti saan a nasayaat a linteg ken bilin a di makaited iti biag.

26 Impalubosko a tulawanda dagiti bagbagida babaen kadagiti sagutda. Binay-ak ida a nagidaton kadagiti inauna nga annakda a lallaki. Inaramidko daytoy a pangdusak kadakuada ken pangipakitak a siak ni Yahweh.

27 “Ngarud, anak ti tao, ibagam kadagiti Israelita a daytoy ti kunak kadakuada. Adda pay sabali nga inaramid dagidi kapuonanda a pangpabain kaniak babaen iti panagtallikudda.

28 Impanko ida iti daga nga inkarik nga ited kadakuada. No makakitada idi kadagiti nangato a turod wenno narukbos a kaykayo, sadiay ti pagidatonanda ken pagpuoranda kadagiti sakrifisio a pakaigapuan ti panagpungtotko. Sadiay met ti pagipananda kadagiti arak a datonda.

29 Sinaludsodko kadakuada no ania dagiti nangato a lugar a pappapananda. Iti kasta, ‘Nangato a Disso a Pagdaydayawan’ti naganda agpapan ita.

30 Ibagam ngarud kadagiti Israelita a daytoy ti kunak: Apay a masapul nga aramidenyo dagiti makarimon nga inaramid dagidi kapuonanyo, iti panagdaydayawyo kadagiti didiosenda?

31 Agpapan ita, idatagyo dagiti isu met laeng a sagut ket tulawanyo dagiti bagbagiyo kadagiti isu met laeng a didiosen babaen iti panangidatagyo kadagiti annakyo kas daton a mapuoran. Kalpasanna, dakayo nga Israelita, umaykayo pay la kaniak nga agimtuod no ania ti pagayatak. Iti naganko ngaApoa sibibiag aDiosisapatak a diak ipalubos nga agsaludsodkayo kaniak iti uray ania.

32 Naikeddengyon a kayatyo ti agbalin a kas kadagiti dadduma a nasion, kas kadagiti tattao nga agnaed kadagiti sabali a pagilian ket agdaydayawkayo kadagiti kayo ken bato, ngem dinto mapasamak dayta.”

Ti Pannusa ken Pammakawan ti Dios

33 Kuna tiApo, “Iti naganko ngaApoa sibibiag aDios, ballaagankayo nga iti pungtotko, iturayankayto iti napigsa nga ima ken iti amin a pannakabalinko.

34 Ipakitakto kadakayo ti pannakabalin ken pungtotko inton ummongenkayo ket alaenkayo kadagiti pagilian a nakaiwarawaraanyo.

35 Ipankayto iti ‘Let-ang dagiti Nasion’ ket ukomenkayto sadiay iti rupanrupa.

36 No ania ti inaramidko kadagidi kapuonanyo iti let-ang ti Sinai, kasta met ti aramidek kadakayo,” kuna ti Apo aDios.

37 “Naingetto ti panangiturayko kadakayo tapno tungpalenyo ti tulag.

38 Ipanawkonto kadakayo dagiti nasukir ken managbasol. Pagtalawekto ida iti daga a pagnanaedanda ita ngem diakto ipalubos nga agsublida iti daga ti Israel. Iti kasta, maammoanyonto a siak ni Yahweh.”

39 Kinuna ti Apo aDios, “Ita, dakay amin nga Israelita, aramidenyo ti kaykayatyo; ituloyyo latta ti agserbi kadagiti didiosenyo. Ngem ballaagankayo a kalpasan daytoy, masapul nga agtulnogkayo kaniak ket diyo ibabain ti nasantoan a naganko babaen iti panagidatagyo iti sagut kadagiti didiosen.

40 Iti dayta a daga, iti nasantoan a bantayko, iti nangato a bantay ti Israel, agdaydayawkayto amin kaniak, dakay amin nga Israelita. Maragsakanakto kadakayo, ket namnamaek nga idatagyo kaniak dagiti datonyo, dagiti kasayaatan a sagutyo agraman dagiti nasantoan a sagutyo.

41 Awatek sadiay dagiti datonyo kalpasan a nairuarkayo manipud kadagiti pagilian a nakaiwarawaraanyo ket makitanto dagiti nasion a nasantoanak.

42 Inton isublikay iti Israel, iti daga nga inkarik nga ited kadagiti kapuonanyo, maammoanyonton a siak ni Yahweh.

43 Malagipyonton ti amin a nakababain nga inar-aramidyo ken ti panangtulawyo kadagiti bagbagiyo. Karurodyonto dagiti bagbagiyo gapu kadagiti amin a kinadakes nga inaramidyo.

44 Dakayo nga Israelita, maammoanyonto a siak tiApota diak ipatay ti dusa a kas maitutop kadagiti dakes ken naalas nga aramidyo, ngem salaknibak ti dayawko.” Daytoy ti kuna ti Apo aDios.

Ti Uram iti Abagatan

45 Nagsao tiApokaniak.

46 Kinunana, “Anak ti tao, sumangoka iti abagatan. Agsaoka iti maibusor iti abagatan, ket agipadtoka iti maibusor iti kabakiran ti abagatan.

47 Ibagam iti akin-abagatan a bakir a denggenna ti saok, ‘Kitaem, agpuorak ket uramek amin a nagango ken nalangto a kayom. Awanto ti makaiddep iti apuy. Agkayamkamto manipud abagatan agingga iti amianan, ket mariknanto ti tunggal maysa ti pudotna.

48 Makitanto ti amin a tao a siak ngaApoti nanguram, ket awanto ti makaiddep.’”

49 Ngem kinunak, “O Apo aDios, dimo ipaaramid dayta kaniak; agriririda ta pasig kano met a burburtia ti panagsarsaritak kadakuada.”