Category: Ezra

Ibilin ni Ciro nga Agsubli dagiti Judio

1 Itiumuna a tawen a panagturay ni Ciro nga emperadorti Persia, tinignay ni Yahweh ti ari tapno mangipaulog iti bilin a maibasa iti entero a pagarianna. Naaramid daytoy tapno matungpal ti sao ni Yahweh babaen ken ni profeta Jeremias.

2 “Daytoyti bilin ni Ciro nga Emperador ti Persia. TiApoa Dios ti langit ti nangisaad kaniak nga agturay iti entero a lubong. Imbagana kaniak a mangbangonak iti templo nga agpaay kenkuana idiay Jerusalem iti Juda.

3 Sapay koma ta adda ti Dios kadakayo amin a tattaona. Inkayo idiay Jerusalem, ket bangonenyo manen ti Templo tiApoa Dios ti Israel, ti Dios a pagdaydayawan idiay Jerusalem.

4 No adda kadagiti tattaona a napagtalaw a kas balud ti makasapul iti tulong iti panagsublina, masapul a tulongan dagiti kaarrubana. Ikkanda iti pirak ken balitok, dadduma a masapsapul agraman animal a para-awit ken sagsagut a maidatag iti Templo ti Dios idiay Jerusalem.”

5 Tinignay ti Dios ti puso dagiti papangulo ti familia iti tribu da Juda ken Benjamin, kasta met dagiti papadi ken Levita, agraman dagiti dadduma a tattao. Iti kasta, nagrubbuatda a mapan mangbangon manen iti Templo ni Yahweh idiay Jerusalem.

6 Timmulong dagiti amin a kaarrubada ket nangtedda iti adu a kasapulan: pirak nga al-alikamen, balitok, abasto, animal a para-awit, agraman napapateg a bambanag ken sagsagut a maidatag iti Templo.

7 Insubli pay ni Ciro dagiti malukong ken kopa nga innala idi ni Ari Nebucadnesar iti Templo idiay Jerusalem ken inkabilna iti templo dagiti didiosenna.

8 Inyawatna ida ken ni Mitredat a pangulo ti tesoreria ti pagarian. Nangaramid ni Mitredat iti listaan dagitoy para ken ni Sesbasar a gobernador ti Juda.

9-10 Dagitoy ti naited:

malukong a balitok a maaramat

iti panagidaton 30

malukong a pirak a maaramat

iti panagidaton 1,000

dadduma pay a malukong 29

babassit a malukong

a balitok 30

babassit a malukong

a pirak 410

dadduma pay nga

alikamen 1,000

11 Agdagup amin iti 5,400 dagiti balitok ken pirak a malukong ken dadduma pay nga alikamen nga intugot ni Sesbasar ken dagiti napagtalaw a kas balud idi pimmanawda idiay Babilonia tapno agsublida idiay Jerusalem.

Dagiti Nagsubli a Napagtalaw

1 Adu kadagiti napagtalaw a kas balud ti pimmanaw iti probinsia ti Babilonia ket nagsublida idiay Jerusalem ken Juda. Tunggal maysa napan iti ilina. Manipud intalaw ida ni Nebucadnesar, nagtalinaeden dagiti familiada a kas balud idiay Babilonia.

2 Impanguloan ida da Zerubbabel, Josue, Nehemias, Seraias, Reelaias, Mardokeo, Bilsan, Mispar, Bigvai, Rehum ken Baana.

Daytoy ti listaan dagiti familia ti Israel ken ti bilang ti tunggal familia:

3-20 Paros 2,172

Safatias 372

Aras 775

Pahat Moab (kaputotan da Jesua ken Joab) 2,812

Elam 1,254

Zattu 945

Zaccai 760

Bani 642

Bebai 623

Azgad 1,222

Adonikam 666

Bigvai 2,056

Adin 454

Ater (managan pay iti Hezekias) 98

Bezai 323

Jora 112

Hasum 223

Gibbar 95

21-35 Nagsubli met dagiti tattao a dagiti kapuonanda nagnaed kadagitoy nga il-ili:

Betlehem 123

Netofa 56

Anatot 128

Asmabet 42

Kiriat Jearim, Kefira ken Beerot 743

Rama ken Geba 621

Mikmas 122

Betel ken Ai 223

Nebo 52

Magbis 156

Ti sabali nga Elam 1,254

Harim 320

Lod, Hadid ken Ono 725

Jerico 345

Senaa 3,630

36-39 Daytoy ti listaan dagiti familia dagiti papadi a nagsubli:

Jedaias (kaputotan ni Jesua) 973

Immer 1,052

Pasur 1,247

Harim 1,017

40 Kadagiti familia dagiti Levita:

da Jesua ken Kadmiel (kaputotan ni Hodavias) 74

41 kantores ti templo (kaputotan ni Asaf) 128

42 guardia iti templo (kaputotan da Sallum, Ater, Talmon, Akkub, Hatita ken Sobai) 139

43-54 Kadagiti familia dagiti agserserbi iti templo, dagitoy ti nagsubli:

Siha, Hasufa, Tabbaot,

Keros, Siaha, Padon,

Lebana, Hagaba, Akkub,

Hagab, Samlai, Hanan,

Giddel, Gahar, Reayas,

Resin, Nekoda, Gazzam,

Uzza, Pasea, Besai,

Asna, Meunim, Nefisim,

Bakbuk, Hakufa, Harhur,

Baslut, Mehida, Harsa,

Barkos, Sisera, Tema,

Nesias ken Hatifa.

55-57 Dagitoy ti nagsubli a familia dagiti adipen ni Solomon:

Sotai, Hasoferet, Peruda,

Jaala, Darkon, Giddel,

Sefatias, Hattil, Pokeret Hazzebaim ken Ami.

58 Agdagup iti 392 dagiti agserserbi iti templo ken dagiti adipen ni Solomon.

59-60 Adda met 652 a nagsubli kadagiti kaputotan da Delaias, Tobias ken Nekoda. Naggapuda kadagiti il-ili a Tel Mela, Tel Harsa, Kerub, Addan ken Immer. Ngem dida mapaneknekan nga adda darada nga Israelita.

61-62 Dagitoy dagiti nagsubli a familia dagiti papadi a di makapaneknek iti nagtaudanda: Habaias, Hakkoz ken Barzillai. (Anak ni Barzillai a Galaadita ti inasawa ti kapuonan a nagtaud iti familia ni Barzillai; tinawidna ti nagan ni katuganganna.)

Gapu ta awan maiparangda a pakakitaan iti nagtaudanda, saanda a naawat a papadi.

63 Imbagakadakuada ti gobernador a Judio a maiparit a manganda kadagiti naidaton iti Dios, ket sadanto la mapalubosan no adda padi a makaammo a mangaramat iti Urim ken Tummim.

64-67 Ti dagup dagiti nagsubli 42,360

Dagiti adipenda a lallaki ken babbai 7,337

Dagiti kantores a lallaki ken babbai 200

Kabalio 736

Mulo 245

Kamelio 435

Asno 6,720

68 Idi dumtengda iti Templo ni Yahweh idiay Jerusalem, nangted ti sumagmamano kadagiti papangulo dagiti familia iti sagut nga itulongda iti pannakapatakder manen ti Templo iti sigud a nakabangonanna.

69 Intedda ti amin a maipaayda iti dayta a trabaho: 514 a kilo a balitok, 2,850 a kilo a pirak, ken 100 a pagan-anay dagiti papadi.

70 Nagnaeddagiti papadi, Levita ken sumagmamano a tattao idiay Jerusalem ken dagiti kabangibangna. Kadagiti kabangibang nga ili ti nagyanan dagiti musiko, dagiti para-bantay iti templo, ken dagiti agserserbi iti templo. Napan dagiti dadduma nga Israelita kadagiti sigud nga ilida.

Maisubli ti Panagdaydayaw iti Templo

1 Iti maikapito a bulan, nakasublin dagiti Israelita kadagiti siudad ken il-ilida. Kalpasanna, naguummongda amin idiay Jerusalem.

2 Binangondamanen ti altar ti Dios ti Israel tapno adda pagidataganda kadagiti daton a mapuoran, kas mayannurot iti Linteg ni Moises, ti tao ti Dios. Impanguloan ida ni Josue nga anak ni Josadac, ken dagiti papadi agraman ni Zerubbabel nga anak ni Salatiel.

3 Uraymabutengda kadagiti tattao iti dayta a daga, binangonda latta ti altar iti sigud a nagsaadanna. Kalpasanna, nagidatagda kadagiti daton a mapuoran iti bigat ken iti malem.

4 Rinambakandamet ti Fiesta dagiti Abong-abong kas naibilin. Inaldaw a nagidatagda kadagiti daton a mapuoran kas naituding iti dayta nga aldaw.

5 Kastamet a nagidatagda kadagiti inaldaw a daton a mapuoran, daton iti Fiesta ti Lutuad ken kadagiti dadduma pay a panaggigimong a panagdaydayaw dagiti tattao ken ni Yahweh. Nagidatagda met kadagiti daton ken ni Yahweh kadagiti daton a nagtaud iti bukodda a nakem.

6 Manipud iti umuna nga aldaw iti maikapito a bulan, nangrugi dagiti tattao a nagidatag ken ni Yahweh kadagiti daton a mapuoran uray di pay narugian a mabangon manen ti Templo.

Mairugi ti Pannakabangon manen ti Templo

7 Nangted dagiti tattao iti kuarta a pagtangdan kadagiti kantero ken kadagiti karpintero. Nagpaitulodda met iti taraon, mainum ken lana ti olibo a maipan idiay siudad ti Tiro ken Sidon a sukat dagiti kayo ti sedro ti Libano a maipaanud iti taaw a maipan idiay Joppe. Naaramid amin dagitoy babaen iti palubos ni Ciro nga ari ti Persia.

8 Iti kasta, iti maikadua a bulan ti maikadua a tawen kalpasan ti panagsubli dagiti Israelita iti nakabangonan idi ti Templo idiay Jerusalem, inrugida ti trabaho. Nagtitinnulong da Zerubbabel, Josue, amin a kakailianda, agraman dagiti papadi ken Levita. Kinapudnona, timmulong amin dagiti Israelita a nagsubli idiay Jerusalem. Dagiti amin a Levita nga agtawen iti 20 wenno nasursurok ti mangimaton iti panagtrabaho iti Templo.

9 Timmulong a nangimaton dagiti nagtaud iti familia ni Hodavias:ni Jesus a Levita agraman dagiti annak ken kakabagianna, ken ni Kadmiel ken dagiti annakna. (Tinulongan ida dagiti Levita iti familia ni Henadad.)

10 Idiirugida nga isaad ti fondasion ti Templo, nagtakder dagiti papadi iti naituding a lugarda. Nagkawesda iti pagan-anay dagiti papadi, ken nakaiggemda amin iti trumpeta. Nakaiggem met iti piangpiang dagiti Levita a nagtaud iti familia ni Asaf. Indaydayawda ni Yahweh kas mayannurot iti bilin nga impaulog idi ni Ari David.

11 Inkankantadati pagdaydayaw ken pagyaman ken ni Yahweh ket inul-ulitda nga inkanta daytoy:

“Naimbag tiApo, ket agnanayon

ti ayatna iti Israel.”

Impan ti tunggal maysa ti amin a kabaelanna a nangipukpukkaw iti panagdaydayawna ken ni Yahweh, ta nairugin ti pannakaisaad ti fondasion ti Templo.

12 Adu kadagiti lallakay a papadi ken Levita, agraman dagiti papangulo dagiti familia ti nakakita iti immuna a templo. Nagsasangitda iti napigsa idi maimatanganda a maikabkabil ti fondasion. Ngem nagririaw dagiti dadduma gapu iti ragsakda.

13 Saan mapaggiddiat dagiti naragsak a riaw ken ti panagsangsangit, ta uray iti adayo, mangngeg dagiti dir-i.

Dagiti Sumuppiat iti Pannakabangon ti Templo

1 Nadamag dagiti kabusor dagiti tattao ti Juda ken Benjamin a bangbangonen manen dagiti nagsubli nga Israelita a napagtalaw a kas balud ti Templo ni Yahweh a Dios ti Israel.

2 Napandangarud ken ni Zerubbabel ken kadagiti papangulo dagiti familia ket kinunada: “Tulongandakayo a mangbangon iti templo. Agdaydayawkam iti isu met laeng a Dios a pagdaydayawanyo. Nagidatdatagkami kenkuana kadagiti daton manipud imbaonnakami nga agnaed ditoy ni Esarhadon nga ari ti Asiria.”

3 Ngem imbaga da Zerubbabel, Josue ken dagiti papangulo dagiti familia, “Saanmi a masapul ti tulongyo iti panangbangonmi iti templo tiApoa Diosmi. Dakam a mismo ti mangbangon, ta kasta ti imbilin ni Ciro nga emperador ti Persia.”

4 Gapu iti daytoy, pinadas dagiti umili iti dayta a daga a pasardengen ti pannakabangon ti templo. Inupay ken binutbutengda dagiti Judio.

5 Pinasuksokanda pay dagiti ofisiales ti gobierno ti Persia tapno saan nga ituloy dagiti Israelita ti panggepda. Kasta ti inar-aramidda bayat ti panagturay ni Emperador Ciro agingga iti panagturay ni Emperador Dario.

Dagiti Bumusor iti Pannakatarimaan ti Jerusalem

6 Idimangrugi ti panagturay ni Emperador Xerxes, nangidatag dagiti kabusor dagiti tattao nga agnaed iti Juda ken Jerusalem kadagiti naisurat a darumda kadakuada.

7 Bayat ti panagturay ni Artaxerxes nga emperador ti Persia, indarum ida da Bislam, Mitredat, Tabeel ken dagiti kakaduada. Nailanad dagiti pammabasolda iti maysa a surat a naiturong iti emperador. Arameo ti naaramat iti surat ket maipatarus iti pagsasao ti Persia no maibasa.

8 Nagsurat met da Rehum a gobernador ken Simsai a sekretario ti probinsia. Kastoy ti suratda ken ni Emperador Artaxerxes maipapan iti Jerusalem:

9 “Naggapu daytoy a surat kada Rehum a gobernador, Simsai a sekretario ti probinsia ken dagiti kakaduana, dagiti ukom ken amin nga ofisiales a sigud nga umili iti Erec, Babilonia, ken Susa iti pagilian ti Elam,

10 ken dagiti dadduma a tattao nga impanaw ni nabileg ken naindaklan nga Asurbanipal ket pinagnaedna ida iti siudad ti Samaria ken iti probinsia ti Laud-ti-Eufrates.”

11 Daytoy ti linaon ti surat:

“Patgenmi nga Emperador Artaxerxes: Surat daytoy dagiti adipenmo iti probinsia ti Laud-ti-Eufrates.

12 “Kayatmi nga ipakaammo kenka, Natan-ok nga Emperador, nga agnaeden iti Jerusalem dagiti Judio a naggapu kadagiti nadumaduma a sakupmo. Bangbangonenda manen dayta managdakdakes ken nasukir a siudad. Tartarimaanendan dagiti pamuon ket dandanidan malpas ti bakud.

13 Natan-ok nga Emperador, no mabangon manen dayta a siudad ket malpasda dagiti bakudna, dinton kayat dagiti tattao ti agbayad iti buis ket bumassit ti mapastrek ti pagarian.

14 Ita, gapu ta adda pagrebbenganmi kenka, Natan-ok nga Emperador, dimi kayat a mapasamak daytoy, isu nga isingasingmi a

15 mangipaulogka iti bilin a masukimat dagiti libro nga indulin dagiti kapuonam. No aramidem daytoy, matakuatamto a nasukir dayta a siudad. Manipud idi un-unana, parikuten dagiti ar-ari ken agtuturay iti probinsia. Narigat nga iturayan dagiti umili iti dayta a siudad. Dayta ti gapuna a nadadael ti Jerusalem.

16 Ngarud, kapkapnekanmi a no mabangon manen dayta a siudad ken malpas dagiti bakudna, saanmonton a maiturayan ti probinsia ti Laud-ti-Eufrates.”

Ti Sungbat ti Emperador

17 Daytoy ti sungbat ti emperador nga impatulodna:

“Patgek a gobernador Rehum, Simsai a sekretario ken dagiti kakaduayo nga agnaed iti Samaria ken kadagiti dadduma a paset ti probinsia ti Laud-ti-Eufrates. Kablaawankayo.

18 “Naipatarus ti impatulodyo a surat ket naibinsabinsada kaniak.

19 Imbilinko a maisayangkat ti maysa a panagsukimat ket natakuatak a manipud idi un-unana, nagsukir ti Jerusalem iti turay ti ari. Naammoak nga adu ti nasukir a tattao iti dayta a siudad. Nalaingda a mangpataud iti riribuk.

20 Mamaingel nga ari ti nagturay iti Jerusalem, ket inturayanda ti entero a probinsia ti Laud-ti-Eufrates. Nagsingirda iti buis ken kuarta a nagtaud iti nadumaduma a pamastrekan.

21 Mangipaulogkayo ngarud iti bilin a sumardeng dagiti Judio a mangbangon manen iti dayta a siudad agingga nga adda sabali a bilinko.

22 Tungpalenyo a dagus daytoy tapno saan a madegdegan ti pannakadangran ti pagarian.”

23 Apaman a naibasa daytoy a surat ni Emperador Artaxerxes ken ni Rehum, Simsai ken kadagiti kakaduada, nagdardarasda a napan idiay Jerusalem. Pinilitda dagiti Judio nga isardengda ti trabahoda.

24 Naisardengidi ti pannakabangon ti Templo ket saan a nasagsagid agingga iti maikadua a tawen a panagturay ni Dario nga emperador ti Persia.

Maituloy ti Trabaho iti Templo

1 Itidayta a tiempo, dua a profeta, da Haggeo ken Zacarias nga anak ni Iddo, ti nangikasaba kadagiti sao ti Dios ti Israel kadagiti Judio nga agnaed iti Juda ken Jerusalem.

2 Idimangngeg da Zerubbabel nga anak ni Salatiel ken ni Josue nga anak ni Josadac dagitoy a mensahe, inrugida manen a bangonen ti Templo. Tinulongan dagiti dua a profeta ida.

3 Napan a dagus idiay Jerusalem ni Tattenai a gobernador ti Laud-ti-Eufrates ken ni Setar Bozenai agraman dagiti padada nga ofisiales ket sinaludsodda, “Siasino ti nangbilin kadakayo a bangonenyo manen daytoy a Templo ket ikabilyo dagiti alikamenna?”

4 Sinaludsoddapay ti nagnagan dagiti tumultulong iti pannakabangon ti Templo.

5 Ngem bambantayan ti Dios dagiti papangulo a Judio ket inkeddeng dagiti ofisiales ti Persia a baybay-anda pay la ida agingga a makapagsuratda ken ni Emperador Dario ken maawatda ti sungbatna.

6 Kastoy ti impadamagda iti emperador:

7 “Patgenmi nga Emperador Dario: Sapay koma ta natalna ti panagturaymo.

8 “Kayatmi nga ipakaammo, Natan-ok nga Emperador, a napankam iti probinsia ti Juda ket natakuatanmi a mabangbangon manen ti Templo ti Naindaklan a Dios. Dadakkel a bato ti aramaten dagiti tattao ket kayo dagiti pasanggir a maikamang iti bakud. Nagagetda nga agtrabaho ket adu ti malpas iti inaldaw.

9 “Sinaludsodmi kadagiti panguloda no siasino ti nangbilin kadakuada a mangbangon manen iti Templo ken mangikabil kadagiti alikamenna.

10 Dinamagmi pay ti nagnaganda tapno maipakaammomi kenka no siasino dagiti mangidadaulo iti trabaho.

11 Insungbatda nga adipen ida ti Dios ti langit ken daga, ket bangbangonenda manen ti Templo. Maysa kano a mannakabalin nga ari ti Israel ti nangbangon iti daytoy ken nangikabil kadagiti amin nga alikamenna. Adun a tawen ti napalabas manipud pannakaipatakderna.

12 Gaputa pinagpungtot dagidi kapuonanda ti Dios ti langit, inyawatna ida iti pannakabalin ni Nebucadnesar nga ari ti Babilonia a maysa a Caldeo. Nadadael ti Templo ket naipan dagiti tattao a kas balud idiay Babilonia.

13 Kalpasanna,kunada nga idi umuna a tawen a panagturay ni Ciro nga emperador ti Babilonia, impaulogna ti bilin a mabangon manen ti Templo.

14 Kunada pay a pinaisubli ni Ciro dagiti alikamen a balitok ken pirak nga innala ni Nebucadnesar iti Templo idiay Jerusalem ket impanna iti templo idiay Babilonia. Inyawat ni Emperador Ciro dagitoy nga alikamen iti maysa a tao nga agnagan Sesbasar a dinutokanna a gobernador ti Juda.

15 Imbaga ti emperador kenkuana nga alaenna dagiti alikamen ket isublina iti Templo idiay Jerusalem. Imbagana pay a bangonenna manen ti Templo iti lugar a nakaisaadanna idi.

16 Iti kasta, napan ni Sesbasar ket insaadna ti fondasion. Manipud idi agingga ita, nagtultuloy ti trabaho ngem saan pay a nalpas.

17 Ngarud, no pagayatam, Natan-ok nga Emperador, pasukimatmo koma dagiti libro ti pagarian ti Babilonia tapno maammoan no adda wenno awan ti bilin nga impaulog ni Emperador Ciro a mabangon manen ti Templo ti Jerusalem. Ipakaammomto kadakami ti pagayatam maipapan iti daytoy a banag.”

Ti Bilin ni Emperador Ciro

1 Impaulog ngarud ni Emperador Dario ti bilin a masukimat dagiti libro ti pagarian a naidulin idiay Babilonia.

2 Ngem iti siudad ti Ecbatana, iti probinsia ti Media, ti nakasarakanda iti maysa a nalukot a pagbasaan. Kastoy ti nailanad:

3 “Iti umuna a tawen a panagturay ni Emperador Ciro, imbilinna a mabangon manen ti Templo idiay Jerusalem a kas lugar a pakaidatagan dagiti sagut ken daton a mapuoran. Siam a pulo a kadapan ti kangato ket 90 a kadapan ti kaakaba ti Templo.

4 Iti pannakabangon dagiti bakud, adda maibaet a kayo iti tunggal tallo a katuon a batbato. Aggapunto iti tesoreria ti pagarian ti amin a magasto.

5 Kasta met a dagiti balitok ken pirak nga alikamen nga innala ni Ari Nebucadnesar iti Templo ti Jerusalem nga impanna idiay Babilonia, maisublida iti sigud a lugarda iti Templo ti Jerusalem.”

Ibilin ni Emperador Dario a Maituloy ti Trabaho

6 Kastoy ti sungbat ni Emperador Dario:

“Kadakayo, Tattenai a gobernador iti Laud-ti-Eufrates, Setar Bozenai ken dagiti padayo nga ofisiales iti probinsia.

“Adaywanyo ti Templo.

7 Dikay bumibiang iti pannakabangonna. Palubosanyo ti gobernador ti Juda ken dagiti papangulo a Judio a mangbangon manen iti Templo ti Dios iti sigud a nakabangonanna.

8 Maysa pay, ibilinko nga aramidenyo ti annongenyo kadagiti papangulo maipapan iti pannakabangon manen ti Templo. Itedyo a dagus dagiti amin a magastoda tapno saan a mataktak ti trabaho. Aggapu iti pondo ti pagarian ti mabusbos a buis a nasingir iti Laud-ti-Eufrates.

9 Masapul nga itedyo iti inaldaw ti amin a masapul dagiti papadi dita Jerusalem. Itedyo ti aniaman nga ibagada a masapulda: dagiti bumaro a baka, karnero wenno urbon ti karnero a mapuoran a daton iti Dios ti langit, agraman trigo, asin, arak wenno lana ti olibo.

10 Masapul a maaramid daytoy tapno makaidatagda kadagiti daton a pakaragsakan ti Dios ti langit, ken mabalinda a dawaten ti pammendisionna kaniak ken kadagiti annakko.

11 No adda mangsalungasing iti daytoy a bilin, maikkat ti maysa a pasanggir ti balayna, mapatirad ti murdong ti pasanggir a maiduyok iti bagina. Marakrak ti balayna ket agbalin a gabsuon ti rugit.

12 Sapay koma ta parmeken ti Dios a nangpili iti Jerusalem a lugar a pagdaydayawan dagiti tattao kenkuana ti siasinoman nga ari wenno nasion a mangsalungasing iti daytoy a bilin wenno agpanggep a mangdadael iti Templo. Masapul a matungpal nga awan ti pagkuranganna daytoy impaulogko a bilin. Emperador Dario.”

Maikonsagrar ti Templo

13 Tinungpal da Gobernador Tattenai, Setar Bozenai ken dagiti padada nga ofisiales ti amin a bilin ti emperador.

14 Napardasti trabaho dagiti papangulo a Judio iti pannakabangon ti Templo ta pinapigsa ida da profeta Haggeo ken profeta Zacarias. Nalpasda ti Templo kas imbilin ti Dios ti Israel ken kas imbilin dagiti emperador ti Persia—da Ciro, Dario ken Artaxerxes.

15 Nalpasda iti maikatlo nga aldaw ti bulan a maaw-awagan iti Adar, iti maikanem a tawen a panagturay ni Emperador Dario.

16 Siraragsak dagiti amin nga Israelita a nangikonsagrar iti Templo—dagiti papadi, dagiti Levita ken dagiti amin a nagsubli a napagtalaw a kas balud.

17 Iti pannakaikonsagrar ti templo, nangidatonda iti 100 a toro a baka, 200 a karnero ken 400 nga urbon ti karnero. Nangidatagda pay iti 12 a kalding a daton gapu iti basol—maysa ti agpaay iti tunggal tribu ti Israel.

18 Binunggo-bunggoyda dagiti papadi ken dagiti Levita nga agserbi iti Templo idiay Jerusalem, kas mayallubog iti alagaden a nailanad iti Libro ni Moises.

Ti Fiesta ti Paskua

19 Itisumuno a tawen, iti maika-14 nga aldaw ti umuna a bulan, narambakan ti Fiesta ti Paskua.Rinambakan daytoy dagiti Israelita a nagsubli manipud iti sabali a pagilian a nakaibellenganda.

20 Dinalusan dagiti amin a papadi ken dagiti Levita ti bagbagida ket naibilangda amin a nadalus iti imatang ti linteg. Pinartida dagiti animal a daton iti Fiesta ti Paskua nga agpaay kadagiti nagsubli, kadagiti padada a papadi ken agpaay kadakuada.

21 Nangan dagiti nagsubli nga Israelita. Nangan met dagiti amin a tattao a nangbaybay-a kadagiti ugali dagiti pagano nga agnanaed sadiay ken dimmar-ay tapno agdaydayawda ken ni Yahweh a Dios ti Israel.

22 Pito nga aldaw a rinambakanda a siraragsak ti Fiesta ti Tinapay nga awan Lebadurana. Naragsakda gapu ta tinignay ni Yahweh ti emperador ti Asiria tapno tulonganna ida iti pannakabangon manen ti Templo ti Dios ti Israel.

Mapan ni Ezra idiay Jerusalem

1 Naglabas ti adu a tawen. Ni Artaxerxes ti emperador ti Persia idi dimteng idiay Jerusalem ti maysa a tao nga agnagan Ezra. Nagtaud ni Ezra iti kapuonan ni Aaron a nangato a padi. Kastoy ti panagsasaruno dagiti kapuonanna: ni Ezra anak ni Seraias nga anak ni Azarias nga anak ni Hilkias;

2 ni Hilkias anak ni Sallum nga anak ni Zadok nga anak ni Ahitub;

3 ni Ahitub anak ni Amarias nga anak ni Azarias nga anak ni Merayot;

4 ni Merayot anak ni Zerahias nga anak ni Uzzi nga anak ni Bukki;

5 ni Bukki anak ni Abisua nga anak ni Finees nga anak ni Eleazar; ni Eleazar anak ni Aaron.

6-7 Masirib ni Ezra ket naan-anay ti ammona maipapan iti linteg nga inted ni Yahweh a Dios ti Israel ken ni Moises. Gapu ta binendisionan ti Dios, inted kenkuana ti emperador ti amin a dawatenna. Iti maikapito a tawen a panagturay ni Artaxerxes, napan ni Ezra idiay Jerusalem. Kinaduana ti maysa a bunggoy dagiti Israelita a buklen dagiti papadi, Levita, kantores iti templo, guardia ti templo ken dagiti trabahador.

8-9 Pimmanawda idiay Babilonia iti umuna nga aldaw ti umuna a bulan, ket kaasi ti Dios, dimtengda idiay Jerusalem iti umuna nga aldaw ti maikalima a bulan.

10 Bayat ti panagbiagna, inggaed ni Ezra nga inadal ken tinungpal dagiti linteg ken alagaden nga ipaannurot ni Yahweh kadagiti Israelita ket insurona dagitoy kadakuada.

Ti Dokumento a Naited ken ni Ezra

11 Daytoy ti dokumento nga inted ni Emperador Artaxerxes ken ni Ezra, ti padi a masirib ken naan-anay ti ammona maipapan kadagiti linteg ken bilin nga inted tiApoiti Israel:

12 “Naggapu daytoy ken ni Emperador Artaxerxesket agpaay ken ni Ezra a padi ken masirib iti linteg ti Dios ti langit.

13 Ibilinko a mapalubosan amin nga Israelita iti pagariak, papadi man wenno Levita, a mayat a kumuyog kenka a mapan idiay Jerusalem.

14 Siak nga emperador, agraman dagiti pito a mammagbaga kaniak, ibaonka a mangkita iti agdama a kasasaad ti Jerusalem ken ti Juda. Kitaem no maan-annurot met laeng ti linteg nga intalek kenka ti Diosmo.

15 Masapul nga itugotmo dagiti balitok ken pirak a kayatmi nga ited a kas sagut iti Dios ti Israel a ti Templona adda idiay Jerusalem. Siak ken dagiti mammagbaga kaniak, itedmi daytoy a sagut.

16 Alaem met dagiti amin a pirak ken balitok a maurnongmo iti entero a probinsia, agraman dagiti sagut nga ited dagiti Israelita ken dagiti papadida nga agpaay iti Templo ti Diosda idiay Jerusalem.

17 “Gastoem ti kuarta iti rumbeng a pakausaranna. Gumatangkanto kadagiti toro a baka, kalakian a karnero, urbon ti karnero, daton a makan ken arak a mainum ket idatonmonto ida iti altar iti Templo idiay Jerusalem.

18 Mabalinyo a gastoen iti aniaman a kayatyo kadagiti kakaduam dagiti amin a pirak ken balitok a masobrayo, kas mayannurot iti pagayatan ti Diosyo.

19 Masapul nga idatagmo iti Dios idiay Jerusalem dagiti alikamen a naited kenka nga agserbi iti panagdaydayaw iti Templo.

20 Alaemto iti tesoreria ti pagarian ti kuarta a masapulmo a paggatang iti dadduma pay a masapul ti Templo.

21 “Kadakayo amin a tesorero iti probinsia iti Laud-ti-Eufrates, ibilinko nga itedyo a dagus ti aniaman a dawaten kadakayo ni Ezra a padi ken masirib iti linteg ti Dios ti langit.

22 Mangtedkay iti saan a nasursurok ngem iti tallo a tonelada a pirak, 26 a kaban a trigo, 550 a galon nga arak, 550 a galon a lana ti olibo, ken amin nga asin a masapulna.

23 Ikagumaanyo nga ited amin a sapulen ti Dios ti langit nga agserbi iti Templona. Aramidenyo amin a kabaelanyo tapno saannak a kapungtot ti Dios kasta met dagiti ari a sumaruno kaniak.

24 Maiparit nga agsingirkay iti buis kadagiti papadi, Levita, musiko, guardia, agtartrabaho, wenno siasinoman nga agserserbi iti daytoy a Templo.

25 “Sika, Ezra, yantangay ta naparaburanka iti sirib, mangdutokka kadagiti administradores ken ukom a mangituray kadagiti amin a tattao nga agnanaed iti Laud-ti-Eufrates nga agbibiag a mayallubog iti linteg ti Diosyo. Masapul nga isurom dayta a linteg kadagiti saan pay a makaammo.

26 Madusa a dagus ti siasinoman a saan nga agtungpal kadagiti linteg ti Diosyo wenno kadagiti linteg ti pagarian; mapapatay wenno mapagtalaw wenno masamsam dagiti sanikuana wenno maibalud.”

Idaydayaw ni Ezra ti Dios

27 Kinuna ni Ezra, “Madaydayaw tiApoa Dios dagiti kapuonantayo! Tinignayna ti ari tapno siaayat a mangdayaw iti Templo tiApoidiay Jerusalem iti kastoy a wagas.

28 Kaasi niApoDios, nagun-odko ti parabur ti ari, dagiti mammagbaga kenkuana ken dagiti amin a mamaingel nga ofisialesna. Inikkannak tiApoa Diosko iti kired ti nakem ket adu a papangulo dagiti tribu ti Israel ti naallukoyko a kumuyog kaniak nga agsubli.”

Dagiti Nagsubli a Napagtalaw a kas Balud

1 Daytoy ti listaan dagiti ulo dagiti familia a naipan a kas balud idiay Babilonia. Kimmuyogda ken ni Ezra a nagsubli idiay Jerusalem idi ni Artaxerxes ti emperador:

2-14 ni Gersom iti familia ni Finees;

ni Daniel iti familia ni Itamar;

ni Hattus nga anak ni Sekanias iti familia ni David;

ni Zacarias iti familia ni Paros, agraman ti 150 a lallaki a kabagianna (adda listaan ti familia a nagtaudanda);

ni Elieoenai nga anak ni Zerahias iti familia ni Pahat Moab, agraman ti 200 a lallaki;

ni Sekanias nga anak ni Jahaziel iti familia ni Zattu, agraman ti 300 a lallaki;

ni Ebed nga anak ni Jonatan iti familia ni Adin, agraman ti limapulo a lallaki;

ni Jesaias nga anak ni Atalias iti familia ni Elam, agraman ti 70 a lallaki;

ni Zebadias nga anak ni Micael iti familia ni Sefatias, agraman ti 80 a lallaki;

ni Obadias nga anak ni Jehiel iti familia ni Joab, agraman ti 218 a lallaki;

ni Selomit nga anak ni Josifias iti familia ni Bani, agraman ti 160 a lallaki;

ni Zacarias nga anak ni Bebai iti familia ni Bebai, agraman ti 28 a lallaki;

ni Johanan nga anak ni Jakkatan iti familia ni Azgad, agraman ti 110 a lallaki;

da Elifelet, Jeuel ken Semaias iti familia ni Adonikam, agraman ti 60 a lallaki (naud-udida a nagsubli);

da Utai ken Zakkur iti familia ni Bigvai, agraman ti 70 a lallaki.

Makasarak ni Ezra kadagiti Levita nga Agserbi iti Templo

15 Inummongko ti entero a bunggoy iti igid ti karayan nga agturong iti ili ti Ahava. Nagkampokami sadiay iti tallo nga aldaw. Nasarakak nga adda papadi iti grupoda ngem awan ti Levita.

16 Pinaayabak ti siam kadagiti papangulo: da Eliezer, Ariel, Semaias, Elnatan, Jarib, Elnatan, Natan, Zacarias ken Mesullam ken dua a mamaestro: da Joiarib ken Elnatan.

17 Imbaonko ida ken ni Iddo a pangulo ti gimong idiay Casifia tapno kiddawenda kenkuana ken kadagiti kaduana nga agserserbi iti Templo a mangibaonda iti agserbi iti Templo ti Dios.

18 Babaen iti kaasi ti Dios, imbaonda ni Serebias, tao a makabael, maysa a Levita a nagtaud iti familia ni Mali. Kimmuyog kenkuana ti 18 kadagiti annak ken kakabsatna.

19 Imbaonda pay da Hasabias ken Jesaias iti familia ni Merari agraman ti 20 kadagiti kakabagianda.

20 Malaksid kadagitoy, adda pay 220 nga agtartrabaho iti Templo, isuda a dinutokan idi ni David ken dagiti ofisialesna ti familiada a tumulong kadagiti Levita. Nailista amin ti naganda.

Ipanguloan ni Ezra dagiti Tattao nga Agayunar ken Agkararag

21 Iti igid ti Karayan Ahava, imbilinko nga agayunarkami amin ket agpakumbabakam iti imatang ti Diosmi ken dawatenmi nga idalannakami iti panagdaliasatmi ket salaknibannakami ken dagiti annakmi, agraman dagiti sanikuami.

22 Nakababain koma no dimmawatak iti ari iti maysa a bunggoy dagiti mannakigubat a nakakabalio a mangsalaknib kadakami kadagiti kabusormi, agsipud ta imbagak kenkuana a bendisionan ti Diosmi dagiti amin nga agtalek kenkuana, ket guraen ken dusaenna ti siasinoman a mangtallikud kenkuana.

23 Nagayunar ken nagkararagkami ngarud iti Dios tapno salaknibannakami ket impangagna dagiti kararagmi.

Dagiti Sagut a Maipaay iti Templo

24 Kadagiti kangrunaan a papadi, pinilik da Serabias, Hasabias ken sangapulo pay a papadi.

25 Tinimbangko dagiti pirak, balitok ken dagiti alikamen nga inted idi ti ari, dagiti mammagbaga kenkuana, dagiti ofisialesna ken dagiti Israelita tapno mausar iti Templo ket intedko ida kadagiti papadi.

26-27 Dagitoy ti intedko kadakuada:

pirak – 25 a tonelada

100 nga alikamen a pirak – 150 a libra

balitok – 7,500 a libra

20 a malukong a balitok – 270 nga onsa

2 a malukong a bronse a kas iti pateg dagiti balitok a malukong.

28 Kinunak kadagiti pinilik: “Nasagradoankay itiApoa Dios dagidi kapuonanyo kasta met dagiti alikamen a pirak ken balitok a naited kenkuana a kas sagut a nagtaud iti nakem dagiti tattao.

29 Aywananyo ida a naimbag agingga a makadanonkay iti Templo. Timbangenyo ida kadagiti kuarto dagiti papadi, sa itedyo kadagiti pangulo dagiti papadi ken kadagiti pangulo dagiti Levita ken kadagiti pangulo dagiti Israelita iti Jerusalem.”

30 Inaywanan ngarud dagiti papadi ken Levita dagiti pirak, balitok, ken dagiti alikamen a naipan iti Templo iti Jerusalem.

Agsubli dagiti Napagtalaw a kas Balud

31 Iti maika-12 nga aldaw iti umuna a bulan, pimmanawkami iti Karayan Ahava ket nagturongkami idiay Jerusalem. Kimmuyog ti Diosmi ket inkanawanakam iti panangdarup dagiti kabusor ken iti pannakasanebmi iti dalan.

32 Idi sumangpetkam idiay Jerusalem, naginanakami iti tallo nga aldaw.

33 Iti maikapat nga aldaw, napankam iti Templo. Tinimbangmi ti pirak, ti balitok ken dagiti alikamen sami inyawat ida ken ni Meremot, ti padi nga anak ni Urias. Kaduana ni Eleazar nga anak ni Finees ken dua a Levita, ni Josabad nga anak ni Jesua ken ni Noadias nga anak ni Binnui.

34 Natimbang ken nabilang amin a naited, ken nailistada a saggaysa.

35 Nagidatag dagiti amin a nagsubli a napagtalaw a kas balud kadagiti daton a mapuoran iti Dios ti Israel. Para iti amin nga Israel, 12 a toro a baka ti indatagda ken 96 a kalakian a karnero, 77 nga urbon ti karnero ken 12 a kalding ti naidaton para iti pannakadalusda iti basol. Napuoran amin dagitoy nga animal a kas daton itiApo.

36 Innalada pay ti dokumento nga inted ti emperador kadakuada ket intedda kadagiti gobernador ken ofisiales ti Laud-ti-Eufrates. Ket inted met dagitoy ti tulongda kadagiti tattao ken iti panagdaydayaw iti Templo.

Ti Pannakiasawa dagiti Judio kadagiti Saan a Judio

1 Kalpasan amin dagitoy, immay kaniak ti sumagmamano a pangulo nga Israelita ket imbagada a makipulpulapol dagiti Israelita, dagiti papadi ken dagiti Levita kadagiti tattao iti aglawlaw a pagilian. Kapulpulapolda dagiti tattao ti Canaan, Ammon, Moab ken Egipto, wenno kadagiti Heteo, Perezeo, Jebuseo ken Amorreo. Tultuladenda met dagiti makarimon nga aramid dagitoy a tattao.

2 Nangasawa dagiti Judio kadagiti ganggannaet a babbai, isut’ gapuna a namulitan dagiti nasantoan a tattao ti Dios. Dagiti papangulo ken ofisiales ti kangrunaan a nagbasol.

3 Idi mangngegko daytoy, rinay-abko ti pagan-anayko gapu iti ladingitko. Pinarutko dagiti buok ken barbasko, ket nagtugawak a nasneban iti leddaang.

4 Nagtugawak sadiay a sililiday agingga iti rabii a panagidatag kadagiti daton. Inaribungbongandak dagiti tattao, dagiti amin a mabuteng iti imbaga ti Dios ti Israel maipapan kadagiti basol dagiti nagsubli a napagtalaw a kas balud.

5 Idi dumtengen ti oras ti panagidaton iti rabii, timmakderak iti ayanko a nagladladingit. Siaaruatak pay laeng iti naray-ab a pagan-anayko. Nagparintumengak ket inkararagko ken ni Yahweh a Diosko:

6 “O Dios, mabainak unay a mangitangad iti rupak kenka. Nangatngaton ngem ti ulomi dagiti agrurutap a basolmi, ket tumuknoda sadi langit.

7 Manipud pay iti tiempo dagiti kapuonanmi, adu unayen ti basolmi a tattaom. Gapu iti daytoy, natnagkam iti pannakabalin dagiti ganggannaet nga ari—dakami, dagiti arimi ken dagiti papadimi. Napapatay, natakawan ken naitalawkami a kas balud, ket naibabainkam iti kasta unay agingga ita.

8 OApoa Diosmi, kinaasiannakam iti apagbiit, ket impalubosmo nga adda dagiti makalibas kadakami ken agbiag a sitatalged iti daytoy nasantoan a lugar. Inlisinakam iti pannakatagabu ket inikkannakami iti baro a biag.

9 Tagabukami idi ngem dimo impalubos nga agtalinaedkam iti pannakatagabu. Gapu kenka, naasian kadakami dagiti ari ti Persia ket pinalubosannakami nga agbiag ken mangbangon manen iti nadadael a Templom, ken tapno agbiagkami a natalged iti Juda ken Jerusalem.

10 “Ngem ita, O Dios, ania pay ti masaomi kalpasan amin dagitoy a napasamak? Sinalungasingmi manen dagiti bilin

11 nga intedmo kadakami babaen kadagiti adipenmo a profeta. Imbagada kadakami a saan a nadalus ti daga nga inkam tagikuaen agsipud ta pinunno dagiti agnanaed sadiay kadagiti narugit ken makarimon nga aramid.

12 Imbagadapay a no kayatmi a tagikuaen ti daga, no kayatmi a maipatawid kadagita kaputotanmi, dikam mangasawa kadagita a tattao ken dimi tultulongan ida a rumang-ay wenno agballigi.

13 Kalpasan amin dagitoy a napasamak kadakami a dusami gapu kadagiti basol ken labsingmi, ammomi a sika a Diosmi, dinusanakam iti nalaglag-an ngem ti rumbeng koma a dusami, ket impalubosmo nga agbiagkami.

14 Ania pay ti pambaranmi a mangsalungasing manen kadagiti bilbilinmo ket makiasawakami kadagitoy managdakdakes a tattao? No aramidenmi daytoy, awan duadua a kapungtotnakami unay ket ikisapnakami a mamimpinsan. Iti kasta, awan ti makalasat kadakami.

15 OApoa Dios ti Israel, nalintegka; nagbasolkami, ngem impalubosmo a makalasatkami. Ipudnomi kenka dagiti basolmi. Awan ti kalinteganmi a dumatag iti saklangmo.”

Maisina dagiti Assawa a Saan a Judio

1 Sidudumog ni Ezra iti sangoanan ti Templo, ket agsangsangit a nangipudno kadagitoy a basbasol. Kabayatan ti panagkararagna, linawlaw ti adu nga Israelita—lallaki, babbai ken ubbing—nga agsangsangit met iti nasaem.

2 Kinuna kenkuana ni Secanias nga anak ni Jehiel iti familia ni Elam, “Nagbasolkami iti Dios ta nangasawakami kadagiti babbai a ganggannaet, ngem uray no kasta, adda pay la namnama ti Israel.

3 Ita, ikarimi a sipapasnek iti Diostayo a papanawenmi dagiti babbai ken dagiti annakmi kadakuada. Tungpalenmi ti balakadmo ken ti balakad dagiti dadduma nga agtungtungpal kadagiti bilin ti Dios. Aramidenmi ti mayannurot iti linteg ti Dios.

4 Rebbengmo ti aggunay. Ibagam ti rumbeng a maaramid, ket sumurotkami kenka.”

5 Pinagsapata ni Ezra dagiti pangulo dagiti papadi, pangulo dagiti Levita ken dagiti amin a tattao nga aramidenda ti insingasing ni Secanias.

6 Kalpasanna, pimmanaw ni Ezra iti sangoanan ti Templo ket napan iti kuarto ni Jehohanan nga anak ni Eliasib. Pinalabasna ti rabii sadiaya pulos a saan a nangan ken imminum. Nagpatpatnag a dinungdung-awanna dagitoy nga Israelita gapu ta tinallikudanda ti Dios.

7 Iti entero a Jerusalem ken Juda, adda naiwaragawag a bilin kadagiti nagsubli a napagtalaw nga aguummongda idiay Jerusalem.

8 Naipakaammo pay a madusa ti siasinoman a saan a makadar-ay iti las-ud ti tallo nga aldaw, babaen ti bilin dagiti ofisiales ken dagiti panglakayen, masamsam dagiti sanikuana ket mapukawna ti kalinteganna a kas miembro ti komunidad.

9 Iti uneg ti tallo nga aldaw, iti maika-20 nga aldaw iti maikasiam a bulan, dimteng dagiti amin a lallaki nga agnanaed iti sakup ti Juda ken Benjamin. Naguummongda iti plasa ti templo idiay Jerusalem. Agtudtudo idi iti napigsa. Agtigtigerger ti tunggal maysa gapu iti lamiis ti panawen ken gapu iti butengda iti nakaayabanda.

10 Timmakder ni Ezra a padi ket kinunana kadakuada, “Nagsalungasingkayo babaen iti panangasawayo kadagiti babbai a ganggannaet. Gapu iti daytoy, pinadakkelyo ti basol ti Israel.

11 Ita ngarud, ipudnoyo dagiti basbasolyo itiApoa Dios dagiti familiayo, ket aramidenyo ti pakaragsakanna. Adaywanyo dagiti ganggannaet nga agnanaed iti dagayo ket isinayo dagiti ganggannaet nga assawayo.”

12 Impukkaw dagiti tattao, “Aramidenmi ti aniaman nga ibagam.”

13 Ngem innayonda, “Adu unay dagiti tattao ket napigsa pay ti tudo; dimi maanusan ti agyan ditoy ruar. Maysa pay, saan a mabiit nga aramiden daytoy ta nakadagdagsen ti nagbasolanmi.

14 Bay-am a dagiti ofisialesmi ti mangilungalong iti pannakarisut daytoy a kaso. Ikkam ti tunggal maysa nga addaan iti asawa a ganggannaet iti gundaway a dumatag iti naituding a tiempo, agraman dagiti papangulo ken ukom iti siudad a pagnanaedanna. Iti kasta, maikkat ti pungtot ti Dios.”

15 Awan ti simmupring iti daytoy a plano malaksid ni Jonatan nga anak ni Asael ken ni Jazeyas nga anak ni Tikva. Kimmanunong da Mesullam ken Sabbetai a Levita kadakuada.

16 Inaramid dagiti nagsubli a napagtalaw a kas balud ti naisingasing. Nangpili ni Ezra a padi kadagiti lallaki a nagtaud kadagiti pangulo dagiti familia ket inlistada dagiti naganda. Iti umuna nga aldaw ti maika-10 a bulan, rinugianda ti panagusig.

17 Kalpasan ti tallo a bulan, nausig amin a kaso dagiti lallaki nga adda asawana a ganggannaet.

Dagiti Lallaki nga adda Asawana a Ganggannaet

18 Daytoy ti listaan dagiti nagasawa kadagiti ganggannaet a babbai:

Dagiti papadia nailista segun ti familiada:

Iti familia ni Josue ken dagiti kakabsatna nga annak ni Josadac: Maasias, Eliezer, Jarib ken Gedalias.

19 Inkarida nga isinada dagiti assawada, ket nangidatonda iti kalakian a karnero a pakapakawanan dagiti basbasolda.

20 Iti familia ni Immer: Hanani ken Zebadias.

21 Iti familia ni Harim: Maasias, Elias, Semaias, Jehiel ken Uzzias.

22 Iti familia ni Pasur: Elioenai, Maasias, Ismael, Netanel, Josabad ken Elasa.

23 Dagiti Levita:

Josabad, Simei, Kelaias (managan pay Kelita), Petahias, Juda ken Eliezer.

24 Dagiti musiko:

Eliasib.

Dagiti guardia ti Templo:

Sallum, Telem ken Uri.

25 Dagiti dadduma nga Israelita:

Iti familia ni Paros: Ramias, Izzias, Malkija, Mijamin, Eleazar, Malkija ken Benaias.

26 Iti familia ni Elam: Mattanias, Zacarias, Jehiel, Abdi, Jeremot ken Elias.

27 Iti familia ni Zattu: Elioenai, Eliasib, Mattanias, Jeremot, Zabad ken Aziza.

28 Iti familia ni Bebai: Jehohanan, Hananias, Zabbai ken Atlai.

29 Iti familia ni Bani: Mesullam, Malluk, Adaias, Jasub, Seal ken Jeremot.

30 Iti familia ni Pahat Moab: Adna, Kelal, Benaias, Maasias, Mattanias, Bezalel, Binnui ken Manases.

31-32 Iti familia ni Harim: Eliezer, Issijas, Malkija, Semaias, Simeon, Benjamin, Malluk ken Semarias.

33 Iti familia ni Hasum: Mattenai, Mattatta, Zabad, Elifelet, Jeremai, Manases ken Simei.

34-37 Iti familia ni Bani: Maadai, Amram, Uel, Benaias, Bedeias, Keluhi, Vanias, Meremot, Eliasib, Mattanias, Mattenai ken Jaasu.

38-42 Iti familia ni Binnui: Simei, Selemias, Natan, Adaias, Maknadebai, Sasai, Sarai, Azarel, Selemias, Semarias, Sallum, Amarias ken Jose.

43 Iti familia ni Nebo: Jeiel, Mattitias, Zabad, Zebina, Jaddai, Joel ken Benaias.

44 Ganggannaet ti assawa amin dagitoy a lallaki. Insinada dagiti assawada ket pinapanawda ida agraman dagiti annakda.