Category: Isaias

Parmata iti Pannakatnag ti Babilonia

1 Daytoy ti pakdaar maipapan iti Babilonia.

Kas iti alipugpog a lumasat iti let-ang, dumtengto ti didigra nga aggapu iti nakabutbuteng a daga.

2 Adda nakitak a parmata dagiti nakaam-ames a pasamak, maysa a parmata maipapan iti panangliput ken pannakadadael.

Dakay a soldado ti Elam, rumautkayo! Dakayo a soldado ti Media, lakubenyo dagiti siudad! Gibusan ti Dios ti panagsagaba nga inyeg ti Babilonia.

3 Gapu iti nakita ken nangngegko iti parmata, nalapunosak iti buteng. Nakariknaak iti ut-ot a kasla iti ut-ot ti agpasikal.

4 Maul-ulawak ket agtigtigergerak iti buteng. Segseggaak ti idadateng ti rabii ngem pasig a buteng ti inyegna.

5 Iti parmatak, adda padaya a naisagana. Nayaplag dagiti alfombra a pagtugawan dagiti sangaili. Agpapangan ken agiinumda. Pagammoan, adda bilin a naipukkaw: “Dakayo nga ofisiales, isaganayo dagiti kalasagyo!”

6 Kinuna ti Apo kaniak, “Mangibaonka iti agbantay, ket ibagam kenkuana nga ipakaammona ti makitana.

7 No makakita kadagiti lallaki a sumungad a sagdudua a nakakabalio, ken lallaki a nagsakay kadagiti asno ken kamelio, ibagam a siputanna ida a naimbag.”

8 Ipukkaw ti agbambantay, “Apo, aldaw ken rabii nga addaak iti lugarko nga agguguardia.”

9 Pagammoan,adtoyen dagiti lallaki a nakakabalio a sagdudua ket ipakaammo ti agbambantay, “Naparmeken ti Babilonia! Agkaiwaran dagiti naburakburak nga imahen dagiti didiosen a nagdaydayawanda.”

10 Dakay a kailiak, nairikkayo a kas iti trigo. Ngem ita, impakaammokon kadakayo ti naimbag a damag a nangngegko itiApoa Mannakabalin-amin a Dios ti Israel.

Sungbat kadagiti Tattao ti Edom

11 Daytoy ti pakdaar maipapan iti Edom.

Manipud Edom adda umawag kaniak, “Guardia, atiddog pay kadi ti rabii? Mabayag pay kadi ti panagbannawagna?”

12 Kunak, “Agbannawagen, ngem umayto met la ti rabii. No kayatmo manen ti agsaludsod, agsublika ket agsaludsodka latta.”

Pakdaar maipapan iti Arabia

13 Daytoy ti pakdaar maipapan iti Arabia.

Tattao ti Dedan, dakayo nga agbibiahe a nabunggo-bunggoy, ken agkampo iti namaga a pagilian ti Arabia,

14 painumenyo dagiti tattao a mawaw nga umay kadakayo. Dakay a tattao iti Tema, ikkanyo iti taraon dagiti umay agkamang kadakayo.

15 Itartarayan dagiti tattao dagiti kampilan a sisasagana a mangpapatay kadakuada, dagiti pana a sisasagana a maibiat kadakuada ken dagiti amin a peggad ti gubat.

16 Kalpasanna, kinuna tiApokaniak, “Iti las-ud ti makatawen, agpatingganto ti pannakabalin dagiti tribu ti Kedar.

17 Dagiti pumapana ti katuredan a lallaki ti Kedar, ngem manmanonto kadakuada ti matda. Daytoy ti saok, ni Yahweh a Dios ti Israel.”

Pakdaar maipapan iti Jerusalem

1 Daytoy ti pakdaar maipapan iti Tanap ti Parmata.

Ania kadi ti mapaspasamak? Apay nga immulikayo kadagiti tuktok dagiti balbalay?

2 Kumaribuso ti entero a siudad. Umariwawa dagiti tattao.

Dagiti soldadom a natay saanda a natay iti kampilan wenno napasag iti paggugubatan.

3 Nagtataray dagiti amin a pangulom ket natiliwda sakbay nga adda imbiatda a pana.

4 Ita, dakayo a tattao, bay-andak nga agsangit iti nasaem. Didak liwliwaen ta adu ti natay kadagiti tattaok.

5 Tiempo ita ti panagbuteng, pannakaparmek ken pannakariribuk iti Tanap ti Parmata, ket ti Dios, ti ApoDiosa Mannakabalin-amin, ti nangibaon kadagitoy nga umay kadatayo. Narban dagiti bakud ti siudadtayo, ket dagiti ikkis dagiti tattao nga agpatulong nagallangogan kadagiti turturod.

6 Immay dagiti mannakigubat a taga-Elam. Sikakabalio ken nakaarmasda kadagiti pana. Sisasagana dagiti kalasag dagiti soldado a naggapu iti daga ti Kir.

7 Napno dagiti nadam-eg a tanap ti Juda kadagiti lugan a pakigubat, ket dagiti soldado a sikakabalio nagyanda iti sangoanan dagiti ruangan ti Jerusalem.

8 Narban dagiti amin a sarikedked ti Juda.

Idi napasamak dayta, inruarmo dagiti armasmo iti nakaidulinanda.

9-10 Nasarakam dagiti paset dagiti bakud ti Jerusalem a masapul a matarimaan. Binilangmo dagiti balbalay iti Jerusalem ket rinakrakmo dagiti dadduma a balay tapno alaem dagiti batoda a pangtarimaan kadagiti bakud ti siudad. Tapno makaurnongka iti danum iti uneg ti siudad,

11 nangaramidka iti tangke iti uneg ti siudad tapno adda pagurnongan iti danum nga aggapu iti daan a waig. Ngem dimo inkankano ti Dios a nangplano kadagitoy iti nabayagen a tiempo, ken nangaramid iti daytoy.

12 Ay-ayabannakay idi tiApoDiosa Mannakabalin-amin tapno agsangit ken agdung-awkayo, kuskosanyo dagiti uloyo ken agarruatkayo iti nakersang a lupot.

13 Ngemnagkakatawakayo ken nagrarambakkayo ketdi. Nagpartikayo kadagiti karnero ken baka a sindayo, ket nagiinumkayo iti arak. Kinunayo, “Mangan ken uminumtayo ketdi, ta inton bigat mataytayo.”

14 Kinuna kaniak tiApoDiosa Mannakabalin-amin, “Saan a mapakawan daytoy a kinadakesda bayat ti panagbiagda.” Daytoy ti sao ti ApoDiosa Mannakabalin-amin.

Maballaagan ni Sebna

15 Imbaonnak tiApoDiosa Mannakabalin-amin a mapan ken ni Sebna a mayordomo iti balay ti ari tapno ibagak daytoy kenkuana:

16 “Ania ti pangipagarupam iti bagim? Apay a nagkalika iti bukodmo a tanem iti bakras ti kabatoan a turod?

17 Mabalin a nalatakka a tao, ngem pidutennakanto tiApoket ipurruaknakanto iti adayo.

18 Pidutennakanto a kas iti bola sanaka ipurruak iti dakdakkel a pagilian. Mataykanto sadiay, iti abay dagiti lugan a pakigubat a pinagtangtangsitmo. Sika ti pakaibabainan ti familia ni apom.

19 Ipababanakanto tiApo. Ikkatennakanto iti nangato a saadmo.”

20 Kinuna tiApoken ni Sebna, “Inton mapasamak dayta, paayabakto ni adipenko nga Eliakim nga anak ni Hilkias.

21 Ikaweskonto kenkuana ti kawesmo a kas ofisial ket ibarikeskonto kenkuana ti barikesmo. Itedkonto kenkuana ti amin a pannakabalin nga adda idi kenka. Isunto ti pannakaama dagiti tattao iti Jerusalem ken iti Juda.

22 Itedkontokenkuana ti naan-anay a turay iti babaen ti ari a kaputotan ni David. Addanto kenkuana dagiti tulbek ti ofisina. Aniaman a luktanna, awan ti makaiserra. Aniaman a serraanna, awan ti makalukat.

23 Ipatakderkonto a kas iti natibker a pasok, ket isunto ti pakaidayawan ti entero a familiana.

24 “Ngem agbalinto a dadagsenna dagiti amin a kakabagian ken familiana. Agbitindanto kenkuana a kas kadagiti banga ken malukong a nakabitin iti pasok.

25 Inton mapasamak dayta, lumukayto ti pasok a natibker ti pannakaipalokna ket matuang. Daytanto ti kanibusanan ti amin a naibitin kenkuana.” Daytoy ti imbaga tiApo.

Ballaag maipapan iti Fenisia

1 Daytoyti pakdaar maipapan iti Tiro.

Umkiskay iti ladingit, dakayo nga aglaylayag iti taaw! Nadadaelen ti Tiro a pagaw-awidanyo. Narban dagiti balbalayna ken dagiti pantalanna. Inton agsubli dagiti barkoyo nga aggapu idiay Chipre, maammoanyo ti damag.

2 Aglimdokayo, dakayo nga agtagtagilako a taga-Sidon! Imbaonyo dagiti tattaoyo

3 nga aglayag iti baybay tapno aggatang ken aglakoda kadagiti trigo a naapit idiay Egipto ken tapno agkomersioda kadagiti amin a nasion.

4 Sika, siudad ti Sidon, naibabainkan. Laksidendaka ti baybay ken dagiti lansad ti taaw. Kunada, “Awan ti annakko. Awan ti tinagibik nga annak a lallaki wenno babbai.”

5 Uray dagiti Egipcio, maklaat ken agladingitdanto inton madamagda a nadadaelen ti Tiro.

6 Umkiskay iti ladingit, dakay a tattao ti Fenisia!Padasenyo ti agkamang idiay Tarsis!

7 Daytoy kadi ti naragsak a siudad ti Tiro a nabangon idi un-unana? Daytoy kadi ti siudad a nangibaon kadagiti tattao iti ballasiw ti taaw tapno agbangonda kadagiti ilida?

8 Siasino ti nangyeg kadagitoy iti Tiro, dayta natan-ok a siudad, a dagiti komersiantena isuda dagiti madaydayaw unay a tattao ditoy daga?

9 Inaramid daytoy tiApoa Mannakabalin-amin tapno gibusanna ti kinapalangguadda gapu iti inaramidda ken tapno ibabainna dagiti natan-ok a tattaoda.

10 Inkay talonen ti daga, dakayo a tattao nga agnanaed iti sakup ti Tarsis! Awanen ti mangsalaknib kadakayo.

11 Inlayat tiApoti imana iti baybay, ket pinarmekna dagiti pagarian. Imbilinna a madadael dagiti kangrunaan a lugar a paglakoan idiay Fenisia.

12 Siudad ti Sidon, nagpatinggan ti ragragsakmo. Maparparigat dagiti tattaom, ket uray no agkamangda idiay Chipre saandanto a natalged sadiay.

(

13 Dagiti taga-Babilonia,saan a dagiti taga-Asiria, ti nangipalubos kadagiti atap nga animal a mangdadael iti Tiro. Dagiti taga-Babilonia ti nangbangon kadagiti torre a pagwanawanan. Rinebbada dagiti sarikedked ti Tiro, ket binaybay-anda ti siudad a nadadael.)

14 Umkiskayo iti ladingit, dakayo nga aglaylayag iti taaw! Nadadaelen ti siudad a nagtaltalkanyo.

15 Dumtengto ti tiempo nga awanto ti makalagip iti Tiro iti las-ud ti pitopulo a tawen, ti kapaut ti panagbiag ti maysa nga ari. Inton aggibus dagita a tawen, mayarigto ti Tiro iti balangkantis a babai iti kanta:

16 Alaem ti arpam, ket sursorem ti ili,

sika a nalipatan a balangkantis a babai!

Agtokarka ken kantaem manen dagiti kantam

tapno umay manen kenka dagiti lallaki.

17 Inton malpas ti 70 a tawen, talliawento manen tiApoti siudad ti Tiro. Agsublinto ti Tiro ti sigud a panggedanna ket agserbinto a patangdanan kadagiti amin a pagarian ditoy lubong.

18 Maidatonto itiApoti kuarta a matgedanna iti negosiona. Dinanto urnongen wenno idulin ti kuartana ngem maigatangto iti taraon ken kawes dagiti agdaydayaw itiApo.

Ti Panangdusa ni Yahweh iti Daga

1 Dadaelento tiApoti daga ket baybay-annanto nga aglangalang. Gusogusoennanto ti rabaw ti daga ket warawaraennanto dagiti tattaona.

2 Agpapadanto ti pagtungpalan ti tunggal maysa—dagiti papadi ken dagiti tattao, dagiti tagabu ken dagiti appoda, dagiti aggatgatang ken dagiti agtagtagilako, dagiti agpapautang ken dagiti umut-utang.

3 Madadaelto ti daga ket aglangalang. Insao daytoy tiApoket matungpalto.

4 Agmaga ti daga ket agtikag. Agangrag ken aglaylay ti lubong. Agpada nga agkapsut ti langit ken daga.

5 Tinulawan dagiti tattao ti daga gapu ta sinalungasingda dagiti linteg ti Dios ket dida nagtungpal iti agnanayon a tulag.

6 Iti kasta, adda lunod a mangdadael iti daga, ket agsagsagaba dagiti tattao gapu iti kinadakesda. Bassit dagiti matda a sibibiag.

7 Malaylay dagiti ubas, ket kumirang ti arak. Naladingiten dagiti amin a naragsak idi,

8 ket nagsardengen dagiti naragsak a tokar dagiti arpa ken tamborda.

9 Awanen dagiti naragsak a kankanta no adda agiinum iti arak. Saanen a naimas ti arak.

10 Nariribuk ken awan urnos ken talna iti siudad. Imbalunet dagiti tattao dagiti balbalayda tapno awan ti makastrek.

11 Agpukpukkaw dagiti tattao kadagiti kalsada gapu ta awanen ti arak. Napukawen a namimpinsan ti ragragsak iti daga.

12 Narba ti entero a siudad, ket narakraken dagiti ruanganna.

13 Kastoyto ti mapasamak iti amin a pagilian iti entero a lubong. Kaslanto iti pannakalpas a mawagwag dagiti bunga ti olibo iti tunggal kayo ken maburas ti maudi nga ubas iti puonna.

14 Agkantanto dagiti nakalasat gapu iti ragsakda. Manipud iti Laud, itan-okdanto tiApo,

15 ket idaydayawto met dagiti adda iti Daya. Idaydayawto dagiti tattao nga agnaed iti igid ti baybay ni Yahweh a Dios ti Israel.

16 Manipud iti kaadayoan a paset ti lubong, mangngegtayto dagiti kanta a pangidaydayaw iti Israel, ti nalinteg a nasion.

Ngem awan ti pangnamnamaak! Kaslaak la marunrunot a kandela! Ngamin, dumegdeg a dumegdeg ti panangliput dagiti traidor!

17 Dumngegkayo, dakayo nga agnaed ditoy daga. Adda dagiti pagbutngan, palab-og, abut ken bateng nga agur-uray kadakayo.

18 Ti agpanggep a mangliklik iti pagbutngan, matnagto iti abut. Ti makalisi iti abut, matiliwto iti palab-og. Maibuyatto manipud langit ti bumayakabak a tudo ket madayyegto dagiti fondasion ti daga.

19 Agrenggat ken agungapto ti daga, ket agpisi.

20 Kas iti nabartek, agibar-ibarto ti daga ket agpallayogto a kas iti kalapaw iti tiempo ti bagio. Gapu iti dagsen dagiti basol a bakbaklayenna, marsuodto ti lubong ket pulos a dinton bumangon.

21 Iti dayta nga aldaw, dusaento tiApodagiti pannakabalin iti ngato ken dagiti agtuturay iti daga.

22 Ipisokto ti Dios dagiti ar-ari a kas kadagiti balud iti uneg ti abut. Ipupoknanto ida iti pagbaludan agingga a dumteng ti tiempo a pannakadusada.

23 Agsipngetto ti bulan ket saanton nga aglawag ti init, agsipud ta agarinton tiApoa Mannakabalin-amin. Agturayto idiay Jerusalem, iti Bantay Sion, ket makitanto dagiti pangulo dagiti tattao ti dayagna.

Kanta a Pagdaydayaw

1 OApo, sika ti Diosko;

itan-okka ket idaydayawko ti naganmo.

Nakaskasdaaw dagiti inaramidmo;

sipupudnoka a nangtungpal

kadagiti planom idi un-unana nga aldaw.

2 Rinebbam dagiti siudad,

ket rinippuogmo dagiti sarikedkedda.

Awanen dagiti palasio

a binangon dagiti kabusormi.

3 Idaydayawdakanto dagiti nabileg a pagilian;

kabutengdakanto dagiti naranggas a nasion.

4 Nagkamang kenka dagiti napanglaw ken nakakaasi,

ket awan nakaan-anoanda iti tiempo ti riribuk.

No agbagio, ikkam ida iti salinongda,

ket iti makasinit a pudot, linongam ida.

Dumarup dagiti naranggas a tattao

a kasla bagio iti tiempo ti lam-ek,

5 ken kas tikag iti namaga a daga.

Ngem pinagulimekmo dagiti kabusormi, OApo;

pasardengem dagiti pukkaw ti naranggas a tattao,

kas iti panangpalammiis ti ulep iti napudot nga aldaw.

Mangisagana ni Yahweh iti Padaya

6 Ditoy Bantay Sion, mangisagananto tiApoa Mannakabalin-amin iti padaya nga agpaay kadagiti amin a nasion ditoy lubong. Maidasarto dagiti agkakabaknang a taraon ken agkakaimas nga arak.

7 Iti daytoy a bantay, ikkatennanto ti ulep ni ladingit nga adda iti ngatoen dagiti amin a nasion.

8 PukawennantotiApoa Dios ni patay iti agnanayon! Punasennanto amin a lua ti tunggal maysa ket ikkatennanto ti pakaibabainan a sinagaba dagiti tattaona iti sangalubongan. TiApoa mismo ti nagsao.

9 Inton mapasamak daytoy, kunanto ti tunggal maysa, “Isu ti Diostayo! Nagtalektayo kenkuana ket inispalnatayo. Isu tiApo. Nagtalektayo kenkuana. Naragsak ken napnoantayo iti rag-o agsipud ta insalakannatayo!”

Ti Panangdusa ni Yahweh iti Moab

10 SalaknibantotiApoti Bantay Sion, ngem maibaddebaddekto dagiti tattao ti Moab a kas iti pannakaibaddebaddek ti garami iti takki.

11 Ikagumaandanto ti maispal a kasda la aglanglangoy, ngem ipababanto ida ti Dios ket saanto a makagunay dagiti imada.

12 Rebbaento tiApodagiti sarikedked ti Moab agraman dagiti nangato a bakudna ket tuangennanto ida iti tapok.

Pagballigien ti Dios dagiti Tattaona

1 Iti dayta nga aldaw, kastoyto ti ikanta dagiti tattao ti Juda:

Nalagda ti siudadmi!

Ti Dios a mismo ti mangsalaknib kadagiti bakudna!

2 Luktanyo dagiti ruangan,

pastrekenyo ti nasion a nalinteg,

ti nasion a natibker ti pammatina.

3 Sika, OApo, ti mangted iti naan-anay a talna

kadagiti natibker ti panggepna

ken kadagiti agtalek kenka.

4 Agtalekkayo nga agnanayon itiApo;

kanayon a salaknibannatayo.

5 Impababana dagiti napalangguad,

dinadaelna ti natalged a siudadda;

rinebbana agraman dagiti bakudna.

6 Dagiti naidadanes payatpayatendan,

ket magnadan iti rabawna.

7 OApo, pasayaatem ti dalan dagiti nalinteg;

nasimpa ti dalan a pagdaliasatanda.

8 Tungpalenmi ti pagayatam

ket agtalekkami kenka;

awanen sabali tartarigagayanmi no di sika.

9 Iti rabii, tarigagayanka iti amin a pusok;

no ukomem ti daga ken dagiti tattaona,

masursurodanto ti kaipapanan ti hustisia.

10 Uray naasika kadagiti managdakdakes,

pulos a dida masursuro ti agaramid iti naimbag.

Uray ditoy a daga nga ayan dagiti nalinteg,

agaramidda latta iti dakes;

dida kayat a bigbigen ti kinatan-okmo.

11 Diammo dagiti kabusormo a dusaem ida;

OApo, ibabainmo ida,

ket bay-am nga agsagabada.

Ipalak-ammo ti dusa nga insaganam kadakuada.

Ipakitam no kasano ti panagayatmo kadagiti tattaom.

12 OApo, sika ti mangted iti talna kadakami;

amin a magun-odmi

bunga dagiti aramidmo.

13 OApoa Diosmi,

inturayandakami dagiti sabali a tattao,

ngem siksika laeng ti bigbigenmi ngaApo.

14 Nataydan ket saandanton nga agbiag;

saanton a bumangon dagiti al-aliada

ta dinusa ken dinadaelmo ida.

Awanen ti makalagip kadakuada.

15 OApo, pinadakkelmo ti pagilianmi;

pinalawam ti daga a masakupanna,

ket daytoy ti nangted iti dayaw kenka.

16 Dinusam dagiti tattaom, OApo,

ket idi marigatanda, immasugda kenka.

17 Sika, OApo, ti gapu ti panagasugmi;

arigmi iti agpasikal nga agpukkaw gapu iti rigatna.

18 Nariknami ti ut-ot ken rigat,

ngem awan met ti impasngaymi.

Awan inabakmi nga itedmi iti dagami;

pulos nga awan ti nagappuananmi.

19 Agbiagto manen dagiti natay kadagiti tattaomi!

Agbiagto dagiti bangkayda!

Agriingto dagiti matmaturog iti tanemda;

bumangondanto a mangikankanta iti ragsakda!

Kas iti pannakapabang-ar ti daga gapu iti linnaaw,

kasta met ti panangpagungar ni Yahweh

kadagiti nabayagen a natay.

Ti Pannakaukom ti Israel ken ti Pannakawayawayana

20 Dakay a tattaok, sumrekkayo kadagiti balbalayyo ket serraanyo dagiti ridaw. Aglemmengkayo pay laeng agingga nga agbaaw ti pungtot ti Dios.

21 Manipud iti nailangitan a taengna, umay tiApoa mangdusa kadagiti tattao ditoy daga gapu kadagiti basolda. Maibutaktakto dagiti pammapatay a naaramid iti nalimed ket dinton ilemmeng ti daga dagiti napapatay.

1 Itidayta nga aldaw, usarento tiApoti nabileg ken makapatay a kampilanna a pangdusa iti Leviatan, dayta agkalkalawikiw ken agtirtiritir a dragon, ket gudasenna dayta nakabutbuteng a parsuanga agnaed iti taaw.

2 Iti dayta nga aldaw, kunanto tiApomaipapan iti napintas a kaubasanna,

3 “Siak ti mangtartaripato iti daytoy a kaubasan. Sibsibogak. Aldaw-rabii a guardiaak tapno awan ti mangan-ano.

4 Saankon a kapungtot ti kaubasan. No koma siitsiitan a mula ken kalkalunay ti busbusorek, puorak ida a mamimpinsan.

5 Ngem no kayat dagiti kabusor dagiti tattaok a salaknibak ida, makikappiada kaniak. Wen, makikappiada kaniak.”

6 Iti dayta nga aldaw, kaslanto kayo nga agramut dagiti Israelita a kaputotan ni Jacob, ket agbusel ken agsabongdanto. Mapnonto ti lubong iti bungada.

7 Saan a nakaro ti panangdusa ti Dios iti Israel a kas iti panangdusana kadagiti kabusorna. Saan nga adu ti napukawna a tattao a kas iti napukawda.

8 Kas pinangdusana kadagiti tattaona, pinapanawna ida iti dagada, ket naitalawda idi intayab ida ti nadawel nga angin-daya.

9 Ngem dinto mapakawan dagiti basol ti Israel agingga a matumtumek dagiti amin a bato kadagiti altar dagiti pagano ken awanen mabati nga adigi ni Asera wenno altar a pagpuoran iti insenso.

10 Nadadaelen ti nasarikedkedan a siudad. Pinanawan dagiti tattao ket mayarig iti let-ang nga awan ti matatao. Nagbalin a pagpastoran a mabalin a paginanaan ken pagaraban dagiti baka.

11 Nalaylay ken natuktukkol dagiti sanga dagiti kayo ket alaen dagiti babbai a pagsungrodda. Gapu ta awan ti naawatan dagiti tattao, saanto a kaasian ida ti Dios a namarsua kadakuada ket dinanto paraburan ida.

12 Iti dayta nga aldaw, ummongento a mismo tiApodagiti tattaona, manipud Karayan Eufrates agingga iti beddeng ti Egipto. Saggaysaennanto ida nga alaen, kas iti pannakailasin ti trigo manipud iti taep.

13 Inton dumteng dayta nga aldaw, mapaguninto ti maysa a trumpeta a pangayab kadagiti amin nga Israelita a naipan idiay Asiria ken Egipto. Agsublidanto nga agdaydayaw itiApoiti nasantoan a bantaynaidiay Jerusalem.

Ballaag iti Akin-amianan a Pagarian

1 Asi pay ti pagarian ti Israel! Agkupkupasen ti dayagna a kas iti pintas dagiti sabong a korona dagiti nabartek a pangulona. Nasayaat ti pannakabangbanglo dagiti natangig nga uloda ngem addada sadiay a napasag gapu iti nakaro a pannakabartekda.

2 Adda nabileg ken mannakabalin nga isagsagana ti Apo a mangdarup kadakuada. Umayto a kas kadagiti agtinnag a yelo, kas iti bumayakabak a tudo, kas iti napegges ken nadawel a layus a manglapunos iti daga.

3 Maibaddebaddekto ti kinatangsit dagita nabartek a papangulo.

4 Awanton ti agpukpukaw a dayag dagita natangsit a pangulo. Mayarigdanto kadagiti umuna a bunga ti igos a mapuros ken makan apaman nga agluomda.

5 Dumtengen ti aldaw nga agbalinto tiApoa Mannakabalin-amin a kas nadayag a korona a sabsabong kadagiti makalasat a tattaona.

6 Ikkannanto dagiti ukom iti sirib tapno nalinteg ti ipaulogda a sentensia. Paturdennanto dagiti guardia tapno maparmekda dagiti kabusor a mangraut kadagiti ruangan ti siudad.

Ni Isaias ken dagiti Nabartek a Profeta ti Juda

7 Kasta unay met ti bartek dagiti profeta ken dagiti papadi ket urayda la maibasbasing. Gapu iti adu nga arak a nainumda, urayda la maitiktikleb a dida ammo ti ar-aramidenda. Kasta unay ti bartek dagiti profeta, isu a dida maawatan dagiti parmata nga ipakita ti Dios. Nabartek met dagiti papadi ket dida maibanag dagiti kaso a maidatag kadakuada.

8 Agkaiwara ti sarua kadagiti lamisaan ket awan ti paset a nadalus.

9 Kastoy ti kunkunada a maibusor kaniak: “Siasino ti ipagarup dayta a tao nga isursurona? Siasino ti makasapul iti mensahena? Agpaay laeng kadagiti kapuspusot a maladaga!

10 Padpadasennatayo nga isuro iti tunggal letra, tunggal linia, tunggal leksion.”

11 Nodidak ipangag, aramaten ti Dios dagiti tattao a ganggannaet ti pagsasaoda a mangisuro kadakayo.

12 Indiayana kadakay amin ti inana ken liwliwa ngem diyo impangag.

13 Daytoy ti gapuna nga isuronakayo tiApoiti tunggal letra, tunggal linia, tunggal leksion. Iti kasta, matuangkayto tunggal magnakayo. Masugatankayto, maipalab-ogkayto ket matiliwkayto a maibalud.

Maysa a Pasuli a Bato para iti Sion

14 Ita, dakayo a natangsit nga agtuturay ditoy Jerusalem, a mangituray kadagitoy a tattao, denggenyo ti ibagbaga tiApo.

15 Ipalpalangguadyoa nakitulagkayo ken ni patay ket adda nagnunumoanyo iti lubong dagiti natay. Mangnamnamakayo a dikayto maan-ano inton dumteng ti didigra, gapu ta agtalekkayo kadagiti ulbod ken allilaw tapno maispalkayo.

16 Ita,kastoy ti sao ni ApoDios: “Mangikabilak iti Sion iti natibker ken nalagda a fondasion. Isaadko ti natangken a pasuli a bato a pakaisuratan dagitoy a balikas, ‘Naanus ti addaan iti natibker a pammati.’

17 Kinalintegto ti pagrukodan ti fondasion ket ti kinapudno ti agserbi a tinnagna.” Bagio ken layus ti mangyanudto iti amin a kinaulbod a talged ken kamangyo.

18 Mawaswasto ti nagtutulaganyo iti patay ket mapunasto ti nagnunumoanyo iti lubong dagiti natay. Inton dumteng ti didigra, maparukmakayto.

19 Ulit-ulitennakayto a pagsagabaen ket binigatto nga agsubli. Aldaw ken rabii a masapul nga ibturanyo ti ipalak-amna. Tunggal adda ipakaammo ti Dios, yegna ti baro a panagbuteng.

20 Ngamin, mapasamakto kadakayo ti kunkuna ti pagsasao: At-atiddog ti agidda ngem ti pagiddaan, basbassit ti ules ngem ti agules.

21 Takas iti inaramidna idiay Bantay Perazim ken iti tanap ti Gabaon, tumakderto tiApoa mangiparikna ti pungtotna tapno ibanagna ti panggepna nga aramiden, uray no kasla naidumduma ti aramidna. Leppasennanto ti trabahona ket nakaskasdaawto dayta a trabaho.

22 Diyo katawaan ti iballaagko kadakayo. No katawaanyo, narigrigatto pay ti panaglisiyo. Nangngegko ti pangngeddeng tiApoa Mannakabalin-amin: dadaelenna ti entero a pagilian.

Ti Kinasirib ti Dios

23 Denggenyo ti sasawek. Ipangagyo ti ibagbagak kadakayo.

24 Awan ti mannalon nga agnanayon a mangar-arado ken mangisagsagana iti talon a mulaanna.

25 No naisagananan, imulana dagiti bukel a kas kadagiti bukel ti anis ken kumino. Agmula kadagiti agbabatog a trigo ken sebada ket iti igid ti talon agmula iti dadduma a kita ti bukel.

26 Ammona nga aramiden ti trabahona ta insuro ti Dios.

27 Saanna nga usaren ti nadagsen a pang-or a pangruros kadagiti bukel ti anis ken kumino. Usarenna ketdi ti nalag-an a runo a kalkalainganna ti kadakkelna.

28 Saanna a dadaelen dagiti binukel ti trigo iti aglablabes a panangirikna. Ammona nga iriken ti trigo babaen ti panangipatulidna iti karison a saan a marumek dagiti binukel.

29 Agtaud amin daytoy a kinasirib itiApoa Mannakabalin-amin. Nainsiriban dagiti plano ti Dios ket kanayon nga agballigida.

Ti Pagbanagan ti Siudad ni David

1 Asika pay, Ariel,ti siudad a nagkampoan ni David! Maysa wenno dua pay a tawen a pannakangilin dagiti fiesta ken ramrambak.

2 Kalpasanna, idissuorko iti siudad a maaw-awagan iti “altar ti Dios.” Addanto sangsangit ken dungdung-aw ket agbalinto ti mismo a siudad a kas altar a pagpuoran kadagiti sakrifisio!

3 Rautenkanto ket agaramidak iti panglakub iti lawlawmo.

4 Mayarigkanto iti al-alia a marigatan nga agsao manipud iti uneg ti daga. Kaslanto maap-apput ti ngiwatmo nga agsao manipud iti tapok.

5 Maitayabto a kasla tapok dagiti amin a ganggannaet a mangraut kenka. Mayanginto a kasla arutang dagiti nakabutbuteng nga armadada. Kellaat ken diyonto mapakpakadaan

6 nga ispalenkayo. Aramatekto dagiti nadawel nga allawig ken ginggined. Mangyegakto iti napipigsa nga angin ken gumilgil-ayab nga apuy.

7 Ket agpukawto a kasla tagtagainep dagiti amin nga armada dagiti pagilian a mangraut iti Ariel, agraman dagiti amin nga armas ken alikamenda a pakigubat. Wen, agpukawdanto a kas iti arapaap iti rabii.

8 Mayarigdanto amin iti mabisin a tao nga agtagtagainep a mangmangan ngem agriing met a mabisin. Kaslanto iti tao a matmatay iti waw nga agtagtagainep nga umin-inum ngem agriing a namaga ti karabukobna. Wen, kastoyto ti mapasamak kadagiti pagilian a nagtitipon a mangraut iti Bantay Sion.

Awan ti Mangipangag kadagiti Ballaag

9 Ala, itultuloyyo latta ti kinamaagyo! Ala, itultuloyyo ti panagimbubulsekyo! Agbartekkayo uray awan ti nainumyo nga arak! Agbasingbasingkayo uray pulos nga awan ti arak a natilmonyo!

10 PinagyepyepnakayotiApotapno umay ti nargaan a turogyo. Dagiti koma profeta ti pannakamata dagiti tattao ngem kinullaapan tiApodagiti matada.

11 Mailemmengto kadakayo ti kaipapanan dagiti amin a parmata; kaslanto iti nailanad iti naserraan a pagbasaan. No ipanmo iti tao a makaammo nga agbasa ket dawatem nga ibasana kenka, kunananto a dina mabasa ta naserraan.

12 No itedmo iti tao a dina ammo ti agbasa ket dawatem a basaenna, kunananto a dina ammo ti agbasa.

13 Kinunati Apo, “Ibagbaga dagitoy a tattao nga agdaydayawda kaniak ngem barengbareng ti saoda ket adayo ti pusoda kaniak. Awan mamaay ti panagdaydayawda, ta alagaden ken linteg laeng ti tao ti inkabesada.

14 Ngarud,makigtotdanto inton agsasaruno a yegko ti saan a mapakpakadaan a didigra. Agbanagto a maag dagiti masirib ket awanto ti imbag nga ipaay kadakuada ti kinasikapda.”

Namnama iti Masakbayan

15 Asi pay dagiti mangilemmeng kadagiti panggepda itiApo! Ibanagda dagiti panggepda iti nalimed ket ipagarupda nga awan ti makakita kadakuada wenno makaammo iti ar-aramidenda.

16 Ballikugendadagiti amin a banag. Ania ti nasnasken, ti agdamdamili wenno ti damili? Mabalin kadi a sawen ti inaramid ti maysa a tao iti nangaramid kenkuana, “Saannak nga inaramid?” Wenno kunana kenkuana, “Dimo ammo ti ar-aramidem?”

17 Kas iti pagsasao, “Iti saan a mabayag, agbalinto a talon ti nasamek a kabakiran, ket ti talon agbalin manen a kabakiran.”

18 Inton dumteng dayta nga aldaw, mangngegto ti tuleng ti maibasa kenkuana a libro ket makakitanton a nalawag dagiti bulsek a nagbibiag iti sipnget.

19 Masarakanto manen dagiti napanglaw ken napakumbaba a tattao ti ragsak nga ited ti Nasantoan a Dios ti Israel.

20 Isunton ti kanibusanan dagiti mangparparigat kadagiti padada a tao ken mangipakita iti gurada iti Dios. Mapukawto aminen a managbasol.

21 Dadaelento ti Dios dagiti mamadpadakes, dagiti manglapped iti pannakadusa dagiti managdakdakes ken dagiti agsaksaksi iti ulbod tapno saan a matuntonan ti naimbag a tao ti kalinteganna.

22 Ita ngarud, kastoy ti kuna tiApoa Dios ti Israel a nangispal ken ni Abraham iti riribuk, “Dakayo a tattaok, awanton ti rumbeng a pagbainan wenno pagbutenganyo.

23 Inton makitayo dagiti annak nga iparaburko kadakayo, bigbigenyonto a siak ti Nasantoan a Dios ti Israel. Padayawan ken raemendakto.

24 Makaawatto dagiti maag ket agragsakto a paisuro dagiti kanayon nga agtantanabutob.”

Awan ti Maitulong ti Egipto

1 Kuna tiApo: “Asi pay dagiti nasukir nga agtuturay iti Juda. Surotenda dagiti plano a diak inaramid, ket makitulagda kadagiti pagilian a saanko a pagayatan. Agtutuon dagiti basbasolda.

2 Mapanda agpatulong iti Egipto a dida makiuman kaniak. Kayatda a salakniban ida ti Egipto, isut’ gapuna nga agtalekda iti ari ti Egipto.

3 Ngem awanto ti pannakabalin ti ari a mangtulong kadakuada ket agtungpalto iti didigra ti pannalaknib ti Egipto.

4 Uray no nakadanonen dagiti pannakabagida kadagiti siudad ti Zoan ken Hanes idiay Egipto,

5 agbabawinto dagiti tattao ti Juda iti panagtalekda iti dayta a nasion a di makatulong kadakuada no masapulda ti tulong.”

6 Daytoy ti pakaammo ti Dios maipapan kadagiti animal iti tay-ak ti abagatan: “Agdaliasat dagiti pannakabagi ti Juda iti napeggad a lugar a pagnaedan dagiti leon, karasaen ken agtaytayab a dragon. Kargaanda dagiti asno ken kamelioda iti agkakangina a sagut nga agpaay iti nasion nga awan ti maitulongna kadakuada.

7 Awan serserbi ti tulong nga ited ti Egipto. Isut’ gapuna a pinanaganak ti Egipto iti ‘Dragon a saan a Mangan-ano!’”

Dagiti Nasukir a Tattao

8 Imbaga kaniak ti Dios nga ilanadko iti maysa a libro ti pudno a kababalin dagiti tattao tapno agpaay daytoy a mataginayon a pammaneknek iti kinadakesda.

9 Kankanayon nga agsukirda iti Dios, kankanayon nga agulbodda, kankanayon a dida kayat ti dumngeg kadagiti pannursuro tiApo.

10 Ibagada nga agulimek dagiti profeta. Kunada, “Diyo ibaga kadakami no ania ti rumbeng. Ibagayo ti kayatmi a denggen. Diyo pukawen dagiti arapaapmi.

11 Aglisikayo ket didakami bibiangan. Dimi kayat a denggen ti sasaoyo maipapan iti ‘Nasantoan a Dios ti Israel.’”

12 Ngem kastoy ti kuna ti Nasantoan a Dios ti Israel: “Diyo ikankano ti ibagbagak kadakayo ket agtalekkayo iti ranggas ken allilaw.

13 Nakabasolkayo. Mayarigkay iti nangato a bakud a nagrekka manipud ngato aginggat’ baba. Pagammoan la ta mapasagkayo.

14 Maburburakkayto a kasla iti banga a mawarawara a mamimpinsan ket pulos nga awan dakkel a pasetna a mabalin a pagadaw iti beggang wenno pagtako iti danum iti bubon.”

15 Kuna ni ApoDios, ti Nasantoan a Dios ti Israel, kadagiti tattao: “Agsublikayo. No agtalek ken makikappiakayo kaniak, masarakanyonto ti pigsa ken talged.” Ngem diyo kayat nga aramiden daytoy!

16 Panggepyo ketdi ti agsakay kadagiti napardas a kabalio tapno itarayanyo dagiti kabusoryo. Ket tumutop ti aramidenyo—masapul nga aglibaskayo! Ipagarupyo a napardas dagiti kabalioyo ngem naparpardas pay dagiti mangkamkamat kadakayo!

17 No makakitakayo iti maysa a kabusor, agtaray ti sangaribu kadakayo ket limanto la a kabusor ti umdas a mamagtaray kadakayo amin. Awanto ti mabati iti armadayo malaksid ti palo ti bandera a nabaybay-an iti tapaw ti maysa a turod!

18 Nupay kasta, agur-uray tiApoa mangngaasi kadakayo. Wen, agur-uray a mangparabur kadakayo gapu ta kanayon a maiparbeng ti aramidna. Nagasat ti tao nga agtalek itiApo.

Bendisionan ni Yahweh dagiti Tattaona

19 Dakayo nga agnaed iti Jerusalem, dikayton agsangit. Manangngaasi tiApoket no umasugkayo nga agpatulong kenkuana, ipangagnakayo.

20 Paglak-amennakayo ti Apo iti rigat, ngem addanto latta a mangisuro kadakayo ket dinto masapulen a birokenyo.

21 No sumiasikayo iti dalan, mangngegyonto ti timekna iti likudanyo nga agkuna, “Daytoy ti dalan a pagnaanyo.”

22 Alaenyonto dagiti imahen dagiti didiosenyo a nakalupkopan iti pirak ken dagiti nadigos iti balitok ket ibellengyonto ida a kas rugit. Kunayonto, “Awan serserbiyon!”

23 Tunggal agmulakayo, pagtudoento ti Apo tapno dumakkel dagiti mulayo ket nawadwadto ti apityo ken adunto ti araben dagiti animalyo.

24 Kasayaatan ken kalangtoan a ruot ti kanento dagiti pagar-aradoyo a baka ken asno.

25 Iti aldaw a masakup dagiti sarikedked dagiti kabusoryo ket mapapatay dagiti tattaoda, agayusto dagiti danum kadagiti ubbog manipud kadagiti bambantay ken turturod.

26 Kaslanto raniag ti init ti raniag ti bulan. Mamimpitonto met ti karaniag ti init ngem ti sigud a raniagna, kas iti agtitipon a raniagna iti pito nga aldaw. Mapasamakto amin dagitoy inton bedbedan ken agasan tiApodagiti sugat nga impalak-amna kadagiti tattaona.

Ti Panangdusa ti Dios iti Asiria

27 Manipud iti adayo, adtoyen nga umay ti dayag ken pannakabalin tiApo! Sumungsungaden! Apuy ken asuk ti mangipakita iti pungtotna. Agsao ket kasla gumilgil-ayab nga apuy dagiti balikasna.

28 Paunaenna ti angin a kasla layus a mangyanud iti amin. Lapunosenna dagiti nasion agingga a madadaelda ket gibusanna dagiti dakes a panggepda.

29 Ngem dakayo a tattao ti Dios, naragsakkayto ket agkakantakayo a kas iti panagkakantayo iti rabii ti nasagradoan a fiesta. Naragsakkayto a kas kadagiti mapan iti Templo tiApo, ti Mangsalaknib iti Israel, isuda a matoktokaran kadagiti flauta iti pannagnada nga agturong sadiay.

30 Ipangngegto tiApoti nadayag a timekna iti amin a tao ket ipariknananto ti bileg ti pungtotna. Addanto apuy, bumayakabak a tudo ken yelo.

31 Agbutengto dagiti Asirio inton mangngegda ti timek ni Yahweh ket mariknada ti bileg ti panangdusana kadakuada.

32 Tunggal dissoan ida tiApo, agtambor ken agarpanto dagiti tattaona. Ti Dios a mismo ti manggubat kadagiti Asirio.

33 Idi un-unana, addan naisagana a lugar a pakapuoran iti ari ti Asiria. Nauneg ken nalawa daytoy a disso a nakatuontuonan ti adu a kayo. Ket arigto iti gumilgil-ayab nga asufre ti anges tiApoa mangpasged kadagiti kayo.