Category: Isaias

Ti Panangsalaknib ti Dios iti Jerusalem

1 Asi pay dagiti mapan agpatulong iti Egipto! Agtalekda iti adu ken nabileg nga armada ti Egipto—kabkabalio, luglugan a pakigubat ken soldado. Ngem dida agtalek ken ni Yahweh a ti Nasantoan a Dios ti Israel. Saanda nga agpatulong kenkuana.

2 Ammona ti ar-aramidenna! Idissuorna ti didigra. Ibanagna dagiti pammutbutengna a pangdusa kadagiti managdakdakes ken kadagiti mangsalsalaknib kadakuada.

3 Tattao laeng dagiti Egipcio—saanda a dios! Saan a datdatlag dagiti kabalioda. No agtignay tiApo, marpuog ti nabileg a nasion kasta met ti nakapsut a nasion a tinulonganna. Agpadpadada a madadael.

4 Kinuna kaniak tiApo, “Uray no kasano ti panagpukkaw ken panagriaw dagiti agpaspastor, dida mabugaw ti leon a nakatukma iti animal a lamutenna. Kasta met nga awan ti makalapped kaniak, siak, ni Yahweh a Mannakabalin-amin, iti panangsalaknibko iti Bantay Sion.

5 Kas iti panagam-ampayag ti tumatayab iti batog ti umokna tapno salaknibanna dagiti sibongna, kasta met a siak ni Yahweh a Mannakabalin-amin, ikanawak ti Jerusalem ket salaknibak.”

6 Kinuna ti Dios, “Tattao ti Israel, nagbasolkayo kaniak ket binusordak. Ngem ita, agsublikayo kaniak!

7 Umayen ti tiempo a panangibellengyo kadagiti imahen dagiti didiosenyo a naaramid iti pirak ken balitok.

8 Gubat ti mangdadaelto iti Asiria, ngem saan nga iti bileg ti tao. Agtatarayto dagiti Asirio manipud iti paggugubatan ket agbalinto a tagabu dagiti agtutubo a lallaki.

9 Kasta unayto ti buteng ti emperadorda nga aglibas, kasta met dagiti ofisiales ket baybay-andanto dagiti wagaywayda.” Daytoy ti sao tiApoa madaydayaw idiay Jerusalem ken sumsumged sadiay ti apuyna a mangpuor kadagiti daton.

Ti Nalinteg nga Ari

1 Dumtengto ti aldaw nga agturayto ti maysa a natakneng nga ari. Tumaudto dagiti papangulo a nalinteg.

2 Mayarigto ti tunggal maysa kadakuada iti pagkamangan no dumteng ti angin ken paglinongan no agbagio. Kasladanto karayan nga agay-ayus iti let-ang. Mayarigdanto iti anniniwan ti higante a bato iti natikag a daga.

3 Sikikita ken siaallingagdanto kadagiti pakasapulan dagiti tattao.

4 Naanusdanto ket ammodanto ti ar-aramidenda ken naimpapusoan ti saoda.

5 Awanto ti mangipagarup a mararaem ti maag wenno mangibaga a mapagtalkan ti nasabrak a tao.

6 Minamaag ti sao ti maag ket ti la dakes ti pampanunotenna nga aramiden. Maibusor iti Dios ti sao ken aramidna ket saanna a pakanen ti mabisin wenno painumen ti mawaw.

7 Dakes a tao ket dakes met dagiti aramidna. Isikatna a dadaelen dagiti napanglaw babaen kadagiti allilaw ken lapdanna ida a mangtunton iti kalinteganda.

8 Ngem ti natakneng, nalinteg ti aramidna ket pagtakderanna ti aniaman a nainkalintegan.

Pannakaukom ken Pannakaisubli ti Sigud a Kasasaad

9 Denggenyo ti ibagak, dakayo a babbai a nanam-ay ti panagbiagna ken awan ti pakadanaganna.

10 Nalabit nga awan ti pagkuranganyo ita, ngem inton kastoy a tiempo inton umay a tawen, agdanagkayto ta awanto ti ubas a burasenyo.

11 Nanam-ay ti panagbibiagyo ken awan ti pakadanaganyo. Ngem ita, agtigergerkay iti buteng! Aguksobkayo ket agbidangkayo iti nakersang a lupot.

12 Danogenyo ti barukongyo kas panangipakitayo iti ladingityo. Ngamin, nadadaelen dagiti nabunga a talon ken dagiti kaubasan.

13 Agtubtubon dagiti siitsiitan a mula ken kalkalunay iti daga dagiti tattaok. Sangitanyo dagiti amin a balbalay a naragsak idi dagiti agnaed, kasta met ti naarimbangaw a siudad.

14 Agpapanawto amin a tattao iti siudad. Uray ti palasio mabaybay-anto. Madadaelto dagiti balbalay ken pagwanawanan a salaknibda ket agtalinaeddanto a rebrebba iti agnanayon. Sadiayto ti ayuyang dagiti atap nga asno ken pagaraban dagiti karnero.

15 Ngem ibaonto manen ti Dios ti espirituna kadatayo. Nadam-egto manen ti natikag a daga ket nawadwadto ti maapit kadagiti taltalon.

16 Addanto kinalinteg ken hustisia iti entero a daga.

17 Gapu ta aramidento ti tunggal maysa ti rumbeng, addanto agnanayon a kappia ken talged.

18 Natalna ken natalgedto ti pagtaengan dagiti tattao ti Dios. Awanto ti pakaringgoranda. (

19 Ngem agtudonto iti yelo kadagiti kabakiran ket marakrakto ti siudad.)

20 Naragsakto ti tunggal maysa gapu iti kaadu ti padanum dagiti mulada, ken gapu kadagiti natalged a pagaraban dagiti asno ken baka iti amin a disso.

Kararag a Pagdawat iti Tulong

1 Asi pay dagiti kabusortayo! Nagagaw ken nangliputda idinto ta awan ti nangag-agaw iti sanikuada ken nangliput kadakuada. Ngem agpatingganto ti panagagaw ken panagliputda, ket mismo nga isudanto dagiti biktima ti panagtakaw ken panagliput.

2 Kaasiannakami, OApo. Sika ti pangnamnamaanmi. Salaknibannakam iti inaldaw, ken isalakannakami iti tiempo ti rigat.

3 No tulongannakami a makiranget, agtataray dagiti nasion manipud iti arimbangaw ti gubat, ket mawarawarada.

4 Maagaw dagiti sanikuada ket maipanawda a kas samsam.

5 Nagtan-ok ketdin tiApo! Iturayanna ti amin. Isaknapna iti Jerusalem ti kinalinteg ken kinaimbag.

6 Ikkanna iti talged ti nasion. Kanayon a salaknibanna dagiti tattaona, ket ikkanna ida iti sirib ken ammo. Kapatgan a gamengda ti panagdayawda a sibubuteng itiApo.

7 Agdawdawat dagiti natured a lallaki iti tulong! Agsangsangit iti nasaem dagiti naibaon a manggun-od iti kappia.

8 Napeggad dagiti dakkel a dalan ket awan ti agdaliasat sadiay. Mawaswas dagiti katulagan, ket masalungasing dagiti nagnunumoan. Awanen ti mararaem a tao.

9 Awanen dagiti mula ket nabaybay-anen ti daga. Nalaylay dagiti bakir ti Libano ken nagbalin a kasla let-ang ti nadam-eg a tanap ti Saron. Agregreg dagiti bulong dagiti kayo idiay Basan ken Bantay Carmel.

Ballaagan ni Yahweh dagiti Kabusorna

10 Kuna tiApokadagiti nasion, “Ita, agtignayakon! Ipakitak ti kinabilegko.

11 Awan serserbi dagiti planoyo, ket awan mamaay ti amin nga aramidyo. Mayarig ti espirituk iti apuy a mangdadael kadakayo.

12 Mapuorankayto agingga nga agbanagkayto a kas iti apug, kas kadagiti siitsiitan a mula a mapuoran agingga a dumapu.

13 Dakayo nga adda iti asideg ken dakayo nga adda iti adayo, denggenyo ti saok maipapan kadagiti inaramidko ket bigbigenyo ti pannakabalinko.”

14 Agtigtigerger iti buteng dagiti managbasol a tattao ti Sion. Kunada, “Kasla apuy a sumsumged nga agnanayon ti panangukom ti Dios. Adda kadi makalasat kadatayo iti kasta nga apuy?”

15 Makalasatka no sawem ken aramidem ti nalinteg. Dimo aramaten ti pannakabalinmo a mangsaur kadagiti napanglaw. Dika met umawat iti pasuksok. Dika makikadua kadagiti agpanggep nga agpapatay wenno kadagiti agaramid iti dadduma a kinadakes.

16 Agballigikanto no aramidem dagitoy, ket natalgedkanto a kas iti adda iti uneg ti natibker a sarikedked. Addanto taraon a kanem ken danum nga inumem.

Ti Nadayag a Masakbayan

17 Makitamto manen ti maysa nga ari a sidadayag a mangituray iti daga a dumanon iti amin a suli.

18 Lagipto laengen ti sigud a panagbutengmo kadagiti ganggannaet nga agsingsingir iti buis ken kadagiti espia.

19 Dimonton makita dagiti natangsit a ganggannaet a dimo maawatan ti pagsasaona.

20 Kitaem ti Sion, ti siudad a pagramrambakantayo kadagiti naituding a fiestatayo. Kitaem ti Jerusalem! Natalgedto a lugar a pagnaedan. Arignanto iti tolda a pulos a di magaraw, a dagiti pasokna saan a mabag-ut ken saan a magsat dagiti talina.

21 Ipakitanto tiApoti dayagna kadatayo. Agnaedtayto iti igid dagiti nalawa a karayan ken waig, ngem awanto ti barko dagiti kabusor nga aglayag kadakuada.

22-23 Awan serserbi dagiti tali dagita a barko. Saan a maukrad dagiti layagda! Maitalawto ti amin a kinabaknang ti armada ti kabusor. Adunto unay ti masamsam ket uray dagiti pilay addanto mabingayda. TiApoti aritayto. Iturayan ken salaknibannatayto.

24 Awanto ti uray maysa nga agnaed iti dagatayo nga agagal iti sakit, ket mapakawanto dagiti amin a basbasol.

Dusaen ti Dios dagiti Kabusorna

1 Umaykayo, dakay a tattao ti amin a nasion! Umasidegkayo ket dumngegkayo. Umay koma ti entero a daga agraman dagiti amin nga agnaed kenkuana ket dumngegda.

2 Kapungtot ni Yahweh dagiti amin a nasion ken dagiti amin nga armadada. Impaulogna ti sentensia ti pannakadadaelda.

3 Saanto a maikali dagiti bangkayda, ngem maiwalangdanto nga agrupsa ken agbuyok. Lumabaganto dagiti bambantay gapu iti dara.

4 Tumapoktoti init, ti bulan ken dagiti bituen. Agpukawto ti langit a kas iti malukot a pagbasaan, ket agtinnagto dagiti bituen a kas iti panagtinnag dagiti bulong ti ubas wenno igos.

5 InsaganantiApoti kampilanna sadi langit, ket ita, agdisso kadagiti tattao ti Edom a sinentensiaanna a madadael.

6 Agaruyotto ti kampilanna iti dara ken taba, kas iti dara ken taba dagiti karnero ken kalding a maidaton. Idatagto tiApodaytoy a daton idiay siudad ti Bosra. Adunto ti papatayenna idiay Edom.

7 Mapasagto dagiti tattao a kas kadagiti atap a baka ken dagiti bumaro a baka. Agayusto ti dara iti daga, ket malapunosto iti taba.

8 Daytoyto ti tiempo a panangispal tiApoiti Sion, ta balsennanto dagiti kabusor ti Sion.

9 Agbalinto nga alketran dagiti karayan ti Edom, ket agbalinto nga asufre ti daga. Sumgedto a kas alketran ti entero a pagilian.

10 Sumgedtoiti aldaw ken rabii, ket agnanayonto nga agas-asuk. Aglangalangto ti daga iti amin a tiempo, ket awanton a pulos ti magna iti rabawna.

11 Dagiti kullaaw ken wak ti agyanto iti daga. Pagbalinento manen tiApoa langalang ken gusoguso ti Edom.

12 Awanto ti ari a mangituray iti pagilian, ket mapukawto dagiti amin a pangulo.

13 Agtubonto dagiti sisiitan ken kalkalunay kadagiti amin a palasio ken kadagiti nabakudan nga il-ili. Agnaedto kadagitoy a lugar dagiti atap nga aso ken kullaaw.

14 Agbalinto dayta a lugar nga ayuyang dagiti atap nga animal, ket agpipinnukkawto dagiti demonio. Umayto ti pagbutbutngan iti rabii nga agsapul iti paginanaanna.

15 Agumokto sadiay dagiti kullaaw, agitlog, agukop ken aywananda dagiti annakda. Aguummongto sadiay dagiti buitre.

16 Sukimatenyo ti libro tiApoket basaenyo ti kunana. Addanto amin dagitoy ket awanto ti uray maysa nga awan ti kaparehana. Kasta ti imbilin tiApo, ket ti Espiritu met laeng ti mamagtitipon kadakuada.

17 Isunto ti mangbingbingay iti daga, ket ikkannanto ti tunggal maysa iti bingayna. Agnaeddanto iti daga iti amin a tiempo, ket kukuadanto iti agnanayon nga awan inggana.

Ti Dalan ti Kinasanto

1 Agragsakto ti let-ang,

ket agukradto dagiti sabong iti naglangalang a daga.

2 Agkantanto ti let-ang ket umkisto iti ragsakna;

napintasto a kas iti Bantay Libano,

nadam-egto a kas kadagiti taltalon ti Carmel ken ti Saron.

Makitanto ti amin ti dayag tiApo;

makitadanto ti kinatan-ok ken pannakabalinna.

3 Papigsaenyodagiti nabannog nga ima,

patibkerenyo dagiti agkutukot a tumeng.

4 Ibagayo kadagiti amin a naupay:

“Dikay agbutbuteng, tumuredkayo!

Umaynakay ispalen ti Diosyo,

ket umayna balsen dagiti kabusoryo.”

5 Makakitantondagiti bulsek,

ket makangngegton dagiti tuleng.

6 Aglagto ken agsalanto dagiti pilay,

ket agkantanto dagiti umel gapu iti rag-o.

Agayusto ti danum iti let-ang;

7 agbalinto a dan-aw ti dumardarang a kadaratan,

ket agubbogto ti namaga a daga.

Dagiti ruruot agbalindanto a tanubong ken runo

iti lugar a taeng idi dagiti atap nga aso.

8 Sadiay, addanto dakkel a kalsada,

maawaganto iti “Nasantoan a Dalan.”

Saanto a magna sadiay dagiti managbasol;

awanto ti maag a mangyaw-awan kadagiti agdaliasat sadiay.

9 Awanto ti agnaed a leon

wenno ti narungsot nga animal nga agdaliasat sadiay.

Iti dayta a dalan,

magnanto dagiti sinubbot tiApo.

10 Naragsakdanto a dumanon idiay Jerusalem;

agkankanta ken agpukpukkawdanto gapu iti ragsakda.

Naragsakdanto iti awan inggana,

agnanayonto nga awan ti leddaang ken ladingitda.

Panggep dagiti Taga-Asiria a Rauten ti Jerusalem

1 Idi maika-14 a tawen a panagturay ni Hezekias nga ari ti Juda, rimmaut ni Senakerib nga emperador ti Asiria. Sinakupna amin a nasarikedkedan a siudad ti Juda.

2 Kalpasanna, binaonna ti kangatoan nga ofisialna a mapan idiay Jerusalem tapno kiddawenna ti isusuko ni Hezekias. Nangitugot ti ofisial iti dakkel nga armada ket nagrubbuatda idiay Lakis. Sinakupna ti dalan nga ayan dagiti agar-aramid iti lupot, iti asideg ti kanal a pagayusan ti danum nga aggapu iti akingngato a bassit a dan-aw.

3 Rimmuar ti tallo a taga-Juda a nangsabat kenkuana: ni Eliakim a mayordomo iti palasio ken anak ni Hilkias, ni Sebna a sekretario ti palasio, ken ni Joas a para-aywan kadagiti libro ti palasio ken anak ni Asaf.

4 Imbaga ti ofisial a taga-Asiria a kayat a maammoan ti emperador no ania ti pagpampannakkel ni Ari Hezekias.

5 Sinaludsodna, “Ipagarupmo kadi a mabalin a pakigubat ti sao a saan ketdi a ti sirib ti armada ken ti bilegna? Siasino ti namnamaem a tumulong kenka a manggubat iti Asiria?

6 Namnamaema tulongannaka ti Egipto, ngem arigna dayta iti panangusar iti runo a kas sarukod. Matukkol ket salputenna ti ima. Kastoy ti kayarigan ti ari ti Egipto no adda agtalek kenkuana.”

7 Intuloy ti ofisial a taga-Asiria, “Wenno kayatmo a sawen nga agtalekka itiApoa Diosmo? Isu ti akinkukua kadagiti pagdaydayawan ken kadagiti altar a dinadael ni Hezekias, sana imbaga kadagiti tattao ti Juda ken iti Jerusalem a maysa la nga altar ti pagdaydayawanda.

8 Makitulagak kenka iti nagan ti emperador. Ikkanka iti 2,000 kabalio no la ket makasarakka ti kasta a kaadu ti lallaki nga agsakay kadakuada.

9 Dimo kabaelan a sarangten ti uray maysa kadagiti kababaan nga ofisial ti Asiria. Nupay kasta, namnamaem kadi nga ikkannaka ti Egipto kadagiti lugan a pakigubat ken kadagiti agkabalio a mannakigubat?

10 Ipagarupmo aya a rinaut ken dinadaelko ti pagariam a dinak tinulongan tiApo? Isu a mismo ti nangbilin kaniak a rautek ken dadaelek ti dagam.”

11 Kinuna da Eliakim, Sebna ken Joas iti ofisial, “Pangngaasim ta agsaoka kadakami iti Arameo. Maawatanmi. Dika agsao iti Hebreo ta dumdumngeg dagiti amin a tattao nga adda iti rabaw ti bakud.”

12 Ngem kinuna ti ofisial, “Ipagarupyo aya nga imbaonnak ti emperador kadakayo ken iti ariyo tapno dakayo laeng ti pangibagaak kadagitoy a bambanag? Saan! Kasasaok pay dagiti tattao nga agtutugaw iti rabaw ti bakud, isuda a naikeddeng a mangan iti takkida ken uminum iti isboda a kas met ti aramidenyonto.”

13 Timmakder ti ofisial ket impukkawna iti Hebreo, “Denggenyo ti paibaga ti emperador ti Asiria!

14 Ballaagannakayo: dikay paallilaw ken ni Hezekias. Dinakay maisalakan ni Hezekias.

15 Diyo ipalubos a guyoguyennakayo nga agtalek itiApo. Ipagarupna nga awan duadua nga isalakannakayo tiApoket dina ipalubos a sakupen ti armada ti Asiria ti siudadyo.

16 Diyo patpatien ni Hezekias. Ibilin ti emperador ti Asiria a rummuarkayo ket sumukokayo. Mapalubosankayto amin a mangan iti ubas iti kaubasanyo, ken igos iti kayoyo ken uminum iti danum nga agtaud kadagiti bubonyo.

17 Urayenyo ti panangipan kadakayo ti emperador iti sabali a daga nga umasping iti dagayo nga addaan iti kaubasan a pagtaudan ti arak ken trigo a maaramid a tinapay.

18 Dikay paallilaw ken ni Hezekias iti panangibagbagana nga isalakannakayo tiApo. Adda kadin didiosen dagiti sabali a pagilian a nakaisalakan iti pagilianna iti pannakabalin ti emperador ti Asiria?

19 Sadino ti ayan itan dagiti didiosen ti Hamat ken Arpad? Ayan dagiti didiosen ti Sefarvaim? Awan ti nakaispal iti Samaria!

20 Kaano ti panangispal ti uray siasino kadagitoy a didiosen iti pagilianna iti pannakabalin ti emperadormi? Ania ngarud ti panggapuanyo a mangipagarup a maisalakan tiApoti Jerusalem?”

21 Awan ti naguni kadagiti tattao ta kasta ti imbilin ni Ari Hezekias kadakuada.

22 Kalpasanna, rinay-ab da Eliakim, Sebna ken Joas ti pagan-anayda iti ladingitda sada napan impakaammo iti ari ti imbaga ti ofisial a taga-Asiria.

Pabagbagaan ti Ari ken ni Isaias

1 Apaman a naammoan ni Ari Hezekias ti impadamag dagiti ofisialesna, rinay-abna ti pagan-anayna gapu iti ladingitna. Nagkawes iti nakersang a lupot sa napan iti Templo ni Yahweh.

2 Binaonna ni Eliakim a mayordomo, ni Sebna a sekretario ken dagiti lallakay a papadi a mapan ken ni profeta Isaias nga anak ni Amoz. Nakakawesda met iti nakersang a lupot.

3 Daytoy ti pinaibaga ti ari ken ni Isaias: “Aldaw a panagsagaba ita. Madusdusa ken maibabaintayo. Kaslatay iti babai a dandani agpasngay ngem nakapsut unayen.

4 Imbaon ti emperador ti Asiria ti kangatoan nga ofisialna a nanglais iti sibibiag a Dios. Sapay koma ta mangngeg tiApoa Diosmo dagitoy a panglais ket dusaenna dagiti nagsao. Ngarud, ikararagam dagiti makalasat a tattaotayo.”

5 Idi maawat ni Isaias ti pakaammo ni Ari Hezekias,

6 kastoy ti pinaibagana iti ari: “Kuna tiApoa dika agdanag kadagiti panglalais kenka dagiti taga-Asiria.

7 Pataudento tiApoti maysa a damag a panggapuan ti emperador nga agsubli iti bukodna a pagilian ket papapataynanto sadiay.”

Mabutbuteng Manen dagiti Taga-Asiria

8 Nadamag ti ofisial a taga-Asiria a pimmanaw ti emperador idiay Lakis ket gubgubatenna ti kabangibang a siudad ti Libna. Iti kasta, napan sadiay tapno makiuman kenkuana.

9 Nadamag dagiti taga-Asiria a rauten ida ti armada ti Egipto nga impanguloan ni Tirhaka nga ari ti Etiopia. Idi maammoan daytoy ti emperador, nagsurat ken ni Hezekias nga ari

10 ti Juda. Kinunana: “Imbaga kenka ti Dios a pagtaltalkam a dikanto matnag iti pannakabalinko. Ngem saanka koma a maallilaw.

11 Awan duadua a nadamagmon ti aramiden ti emperador ti Asiria iti aniaman a pagilian nga ikeddengna a dadaelen. Ipagarupmo kadi a makalisika?

12 Dinadael dagidi kapuonak dagiti siudad ti Gozan, Haran, ken Resef. Pinapatayda met dagiti tattao ti Beteden a nagnaed idiay Telasar. Awan kadagiti didiosenda ti nakaisalakan kadakuada.

13 Sadino ti ayan ti ari ti Hamat, ti ari ti Arpad, ti ari ti Sefarvaim, ti ari ti Hena ken ti ari ti Ivva?”

14 Inawat ni Hezekias ti surat nga inted dagiti naibaon ket binasana. Kalpasanna, napan iti Templo sana inkabil ti surat iti imatang ni Yahweh.

15 Inkararagna:

16 “OApoa Mannakabalin-amin a Dios ti Israel, sika a nakatugaw iti ngatoen dagiti kerubim, sika laeng ti Dios a mangituray iti amin a pagarian ditoy lubong. Pinarsuam ti langit ken ti daga.

17 Dumngegka ngarud, OApo, ket kitaem ti mapaspasamak kadakami. Denggem ti amin a sao ni Senakerib a pangumsi kenka, sika a sibibiag a Dios.

18 Ammomi amin, OApo, nga adu a nasion ti dinadael dagiti emperador ti Asiria ket pinaglangalangda dagiti dagada.

19 Pinuoranda dagiti didiosen dagita a nasion—saanda a pudno a dios no di ket kayo ken bato laeng a ladawan nga aramid ti tao.

20 Ita, OApoa Diosmi, ispalennakami kadagiti taga-Asiria tapno maammoan dagiti amin a pagilian ditoy lubong a siksika ti Dios.”

Ti Sungbat ni Isaias iti Ari

21 Impakaammo ni Isaias ken ni Ari Hezekias a kas sungbat ti kararag ti ari,

22 kinuna ni Yahweh, “Senakerib, katawaannaka ti siudad ti Jerusalem ket pagang-angawannaka.

23 Siasino ti ipagarupmo a linalais ken inum-umsim? Awan ti panagraemmo kaniak, siak a Nasantoan a Dios ti Israel.

24 Imbaonmo dagiti adipenmo tapno ipalangguadda kaniak nga inaramatmo dagiti luganmo a pakigubat a pinangparmek kadagiti kangatoan a bantay ti Libano. Impangpangasmo a pinukanmo sadiay dagiti katayagan a sedro ken dagiti kapintasan a parwa ket kunam a nadanonmo ti kasamekan a paset dagiti bakir.

25 Impalangguadmo a nagkalika kadagiti bubon ket imminumka iti danum dagiti ganggannaet a daga. Imbagam a binaddebaddek dagiti soldadom ti Karayan Nile agingga a nagmaga.

26 “Dimo aya nadamag a nabayagen a naplanok dagitoy? Ita, tinungpalkon. Intedko kenka ti pannakabalin a mangdadael kadagiti nasarikedkedan a siudad agingga a nagbalinda a gabgabsuon dagiti maburburak a batbato.

27 Awan gaway dagiti tattao nga agnaed sadiay. Nakigtot ken nailabegda. Kasdala iti mula iti talon wenno ruot nga agtubtubo iti tuktok ti balay a basnotan ti dumardarang nga angin-daya.

28 “Ngem ammok ti amin maipapan kenka. Ammok ti aramidem ken papanam. Ammok ti gumilgil-ayab a pungtotmo kaniak.

29 Nangngegko ti maipapan iti dayta a pungtot ken kinatangsitmo. Ita, taldenganka ket busalanka saka isubli iti naggapuam. Ipagnaka iti isu met la dalan a nagnaam nga immay.”

30 Kalpasanna, kinuna ni Isaias ken ni Ari Hezekias, “Daytoy ti pagilasinan iti mapasamakto: Ita ken iti sumaruno a tawen, dagitinto la maapit kadagiti balang a trigo ti kanem. Ngem iti maikatlo a tawen, mabalinmonton ti agmula ken agapit iti trigo ken agmula iti ubas ken mangan kadagiti bungana.

31 Rumang-ayto dagiti nakalasat iti nasion ti Juda. Mayarigdanto iti mula nga umuneg ti ramutna ket adunto ti bungana.

32 Addanto tattao a makalasat idiay Jerusalem ken iti Bantay Sion, agsipud ta inkeddeng tiApoa Mannakabalin-amin a mapasamak daytoy.

33 “Kastoy ti kinuna tiApomaipapan iti emperador ti Asiria, ‘Saanto a sumrek iti daytoy a siudad wenno mangibiat iti uray maysa a pana iti irarautna. Awanto ti soldado a nakaiggem iti kalasag ti umasideg iti Jerusalem ket awanto ti patakder a mabangon a panglakub iti siudad.

34 Agsublinto iti naggapuanna ket magnanto iti isu met laeng a dalan a nagnaanna nga immay a saan a bimmaddek iti daytoy a siudad. Siak, ni Yahweh, ti agsasao.

35 Salaknibak daytoy a siudad ket isalakanko gapu iti dayawko ken gapu iti karik ken ni David nga adipenko.’”

36 Napan ti anghel ni Yahweh iti kampo dagiti taga-Asiria ket pinatayna ti 185,000 a mannakigubat. Iti parbangon iti sumuno nga aldaw, napasagda amin sadiay!

37 Pimmanaw ni Senakerib nga emperador ti Asiria ket nagsubli idiay Nineve.

38 Iti maysa nga aldaw, idi agdaydayaw ni Senakerib iti templo ni Nisroc a didiosenna, pinatay ti dua kadagiti annakna, da Adramelec ken Sarezer, sada naglibas a napan iti daga ti Ararat. Ni Esarhadon a maysa kadagiti annakna ti simmukat kenkuana nga emperador.

Agsakit ken Umimbag ni Ari Hezekias

1 Iti dayta met la a tiempo, nagsakit ni Ari Hezekias ket dandani matay. Sinarungkaran ni profeta Isaias nga anak ni Amoz ket imbagana kenkuana, “Kuna tiApoa masapul nga urnosem ti amin agsipud ta saankan nga umimbag. Agsaganaka iti ipapataymo.”

2 Simmango ni Hezekias iti diding ket indawatna:

3 “OApo, laglagipem a nagserbiak kenka a sipapasnek ken sipupudno ket inkagumaak nga aramiden ti kayatmo nga aramidek.” Ket rinugianna ti nagsangit iti nasaem.

4-5 Binilin ni Yahweh ni Isaias nga agsubli ken ni Hezekias ket ibagana kenkuana, “Siak ni Yahweh a Dios ni David a kapuonam, nangngegko ti kararagmo ken nakitak dagiti luam. Ikkanka pay iti sangapulo ket lima a tawen a panagbiagmo.

6 Ispalenka ken daytoy a siudad ti Jerusalem iti pannakabalin ti ari ti Asiria ket ituloyko a salakniban ti siudad.”

21 Imbaga ni Isaias iti ari nga agpalebbek iti bunga ti igos sana itapal iti letteg ni Hezekias tapno umimbag.

22 Sinaludsod ni Hezekias, “Ania ti pagilasinan a mangipaneknek a makapanakto iti Templo?”

7 Insungbat ni Isaias, “Ikkannaka tiApoiti pagilasinan a mangipaneknek a tungpalenna ti karina.

8 Iti pagorasan iti init nga inaramid ni Ari Ahaz, pagsubliento tiApoti anniniwan iti sangapulo a gerger.” Ket nagsubli ti anniniwan iti sangapulo a gerger iti pagorasan.

9 Kalpasan ti yiimbag ni Hezekias, pinutarna daytoy a kanta a pagdaydayaw:

10 Impagarupko nga iti kabambannuagak

innakon iti lubong dagiti natay,

ket sadiaykon aginggat’ panungpalan.

11 Impagarupko a ditoy lubong dagiti sibibiag

saankon a makita tiApo

wenno uray maysa a sibibiag a tao.

12 Nakeltay toy biagko ket nagpatingga,

kas iti naakas a tolda.

Napessat a kas iti lupot iti pagablan,

ket impagarupko a ginibusanen ti Dios ti biagko.

13 Nagpatpatnag a nagsangitak iti ut-ot,

kasla tuktukkolen ti leon dagiti tultulangko.

Impagarupko a ginibusanen ti Dios ti biagko.

14 Nakapuy ken di makasngaw ti timekko,

kaslaak kalapati iti panagas-asugko.

Nabannog dagitoy matak a tumangtangad iti langit;

OApo, ispalennak kadagitoy amin a rigat.

15 Ngem ania ti masaok? Inaramid daytoy tiApo.

Nasakit ti nakemko ket diak makaturog.

Nagsao kaniak ket inaramidna daytoy.

16 O Apo, agbiagak a maipaay kenka; wen, sika laeng ti pagpaayak.

Isublim ti napukaw a pigsak

tapno umatiddog pay daytoy biag.

17 Agbalinto a talna ti sakit ti nakemko.

Ispalemti biagko iti amin a peggad;

pakawanem amin a basbasolko.

18 Awan ti mangidaydayaw kenka iti lubong dagiti natay;

dagiti pimmusay dida makapagtalek iti kinapudnom.

19 Dagiti sibibiag ti mangidaydayaw kenka

a kas iti panangidaydayawko kenka ita.

Ipakaammo dagiti amma

kadagiti annakda ti kinapudnom.

20 Pinaimbagnak, OApo!

Agarpakamto ket ikantami ti pagdaydayaw kenka.

Iti uneg ti templom, agkantakamto

iti pagdaydayaw iti unos ti panagbiagmi.

Dagiti Naibaon a Taga-Babilonia

1 Iti dayta met la a tiempo, nadamag ni Merodak Baladan nga ari ti Babilonia ken anak ni Baladan a nagsakit ni Ari Hezekias. Iti kasta, pinatulodanna iti surat ken sagut.

2 Inawat ni Hezekias dagiti naibaon ket impakitana kadakuada ti kinabaknangna—dagiti pirak ken balitokna, dagiti bangbanglo ken lana ken amin nga armasna a pakigubat. Impakitana dagiti amin nga adda kadagiti pagiduldulinanna ken dagiti amin nga adda iti pagarianna.

3 Napan ni profeta Isaias ken ni Ari Hezekias ket sinaludsodna, “Taga-ano dagiti lallaki ken ania ti imbagada kenka?”

Insungbat ni Ari Hezekias, “Naggapuda iti adayo a daga—idiay Babilonia.”

4 “Ania ti nakitada iti palasio?” sinaludsod ni Isaias.

“Nakitada amin. Impakitak ti amin nga adda iti pagiduldulinak,” insungbat ni Ari Hezekias.

5-6 Imbaga ngarud ni Isaias iti ari, “Kuna tiApoa Mannakabalin-amin a dumtengen ti tiempo a maipan idiay Babilonia ti amin nga adda iti palasiom, dagiti inurnong dagiti kapuonam manipud idi agingga ita. Awanto a pulos ti mabati.

7 Maitalawtoti dadduma kadagiti annakmo ket agbalindanto nga eunoko nga agserbi iti palasio ti ari ti Babilonia.”

8 Impagarup ni Ari Hezekias a kayat a sawen daytoy ti kaadda ti kappia ken talged bayat ti panagbiagna, isut’ gapuna nga insungbatna, “Napintas ti sao tiAponga imbagam kaniak.”

Dagiti Balikas a Mangted iti Namnama

1 “Liwliwaenyo dagiti tattaok,” kuna ti Diostayo.

“Wen, liwliwaenyo ida.

2 Paregtaenyo dagiti tattao ti Jerusalem.

Ibagayo kadakuada nga umdasen ti nabayag a panagsagsagabada,

ket napakawanen dagiti basbasolda.

Naan-anay ti panangdusak kadakuada

gapu kadagiti amin a basolda.”

3 Addatimek a mangipukpukkaw:

“Iti let-ang, mangisaganakay iti dalan tiApo!

Dalusanyo ti dalan iti let-ang

a pagnaan ti Diostayo!

4 Gaburanyo dagiti amin a tanap;

palanasenyo amin a bambantay.

Pagbalinenyo a patad dagiti turod,

palantagenyo dagiti lasonglasong a lugar.

5 Maiparangarangto ti dayag tiApo,

ket makitanto ti amin a tattao.

TiApoa mismo ti nangikari iti daytoy.”

6 Addatimek a mangipukkaw, “Ipakaammom!”

Saludsodek: “Ania ti ipakaammok?”

“Ipakaammom a mayarig iti ruot ti amin a tao,

agpautda a kas iti balang a sabong.

7 Magango ti ruot, malaylay ti sabong

no dalapusen ida ti angin nga ibaon ni Yahweh.

Kinapudnona, mayarig laeng ti tao iti ruot.

8 Wen, magango ti ruot ken malaylay ti sabong,

ngem mataginayon ti sao ti Diostayo!”

9 Inka iti tapaw ti nangato a bantay, O Jerusalem;

ipakaammom ti naimbag a damag!

Pigsaam ti agpukkaw, Sion;

iwaragawagmo ti naimbag a damag!

Agsaoka ket saanka nga agamak.

Ibagam kadagiti il-ili ti Juda

nga umayen ti Diosda!

10 Umayni ApoDiostapno agturay iti amin a bilegna,

itugotna dagiti tattao nga insalakanna.

11 Aywanannantoti arbanna

a kas iti agpaspastor iti animalna.

Ummongennanto dagiti urbon ti karnero

ket sakruyenna ida;

siaanusto a mangidalan kadagiti innada.

Awan Umasping iti Dios ti Israel

12 Adda kadi makasukat iti linaon ti taaw kadagiti dakulapna

wenno makarukod iti langit babaen iti panangdanganna?

Adda aya makaikarga iti amin a daga iti maysa a tasa

wenno makatimbang kadagiti bantay ken turod?

13 Addakadi makaibaga itiApoiti aramidenna?

Adda kadi makaisuro wenno makabalakad kenkuana?

14 Siasino ti nakiumanan ti Dios

tapno maaddaan iti lawag?

Siasino ti nangisuro kenkuana iti pudno a dalan?

Siasino ti nakaadalanna iti wagas ti pannakaawat?

15 Itiimatang tiApo, awan serserbi dagiti nasion;

mayarigda laeng iti sangkatedted a danum,

dagiti adayo a puro nalag-anda a kas iti tapok.

16 Di umanay dagiti animal ti Libano

a maidatag a kas daton iti Diostayo;

nakurang a pagsungrod dagiti kayo sadiay!

17 Awan serserbi dagiti nasion iti imatangna,

awan kapaypay-anda amin a sangapada.

18 Siasinoti pakaipadaan ti Dios?

Mabalinmo kadi nga iladawan ti langana?

19 Saan a kas iti imahen

a nakalupkopan iti balitok

ken naimontar iti pirak.

20 Pumiliti tao iti kayo a di bakabaken no dina kabaelan ti pirak wenno balitok.

Sumapul iti kumikitikit

ket paaramidna a didiosen nga adda pagsaadanna tapno di matuang.

21 Diyo kadi ammo? Diyo aya nadamag?

Awan kadi nangibaga kadakayo idi un-unana?

Diyo kadi nangngeg no kasano a nangrugi ti lubong?

22 Pinarsua ti agtugtugaw iti tronona

iti ngatoen ti timbukel ti daga;

kasla dudon ti kababassit dagiti tattao iti baba!

Inukradna ti langit a kas iti kurtina,

kas iti tolda a pagnaedan.

23 Rippuogenna dagiti nabileg nga agtuturay,

ket pagbalinenna ida nga awan serserbina.

24 Mayarigda kadagiti naganus a mula

nga apagtubo ken apagramut.

No mangyeg tiApoiti angin

magangoda ket kasda la arutang a maitayab.

25 Siasino ti pakaipadaan ti Nasantoan a Dios?

Adda kadi umasping kenkuana?

26 Tumangadkayoiti tangatang!

Siasino ti nangparsua

kadagiti bituen a makitayo?

Ti mangidalan kadakuada a kasla armada,

ammona no mano ti bilangda,

ket awaganna ti nagan ti tunggal maysa!

Dakkel unay ti bileg ken pannakabalinna,

awan ti mapukaw uray maysa kadakuada!

27 Apay nga agririka, Israel?

Apay a kunam a di ammo tiApodagiti parikutmo

ket saan a pasayaaten ti Dios ti kasasaadmo?

28 Diyo kadi ammo? Diyo aya nadamag?

TiApoti agnanayon a Dios;

pinarsuana ti entero a lubong.

Pulos a di mabannog wenno kumapsut;

awan makatukod iti pampanunotenna.

29 Papigsaenna dagiti nakapuy ken nabannog.

30 Uray dagiti agkabannuag kumapsutda,

ket dagiti agtutubo mapaksuyanda.

31 Ngem dagiti agpannuray itiApo

mapabaronto ti pigsada.

Agtayabdanto a kasla iti agila;

saandanto a mabannog no agtarayda,

saandanto a kumapsut no magnada.