Category: Isaias

Ikkan ti Dios ti Israel iti Namnama

1 Kuna ti Dios,

“Agulimekkayo ket denggendak,

dakay a dagdaga iti adayo.

Agsaganakayo a mangidatag iti kasoyo iti pangukoman.

Addanto gundawayyo nga agsao.

Agsasangotay ita ket kitaentayo

no siasino ti adda kalinteganna.

2 “Siasino ti nangsugsog

iti maysa a taga-Daya?

Siasino ti mamagballigi kenkuana

iti sadinoman a papananna?

Siasino ti mangted iti bilegna

a mangparmek kadagiti ari ken nasnasion?

Patapokenna ida babaen iti kampilanna.

Warawaraen ida dagiti panana

a kas kadagiti taep nga itayab ti angin.

3 Kamatenna ida nga awan manglapped kenkuana;

napardas ket kasla di agdisso

dagiti dapanna iti daga.

4 Siasino ti akin-aramid iti daytoy?

Siasino ti nangikeddeng

iti pannagna ti historia?

Siak, ni Yahweh, addaak idi punganay,

wen, addaakto iti kamaudianan.

5 “Nakita dagiti tattao

iti adayo a dagdaga ti inaramidko.

Agamakda ket agpigpigergerda iti buteng,

isu nga aguummongda amin ket umayda.

6 Agtitinnulong ken agpipinnaregta

dagiti nalaing a trabahador.

7 Kuna ti karpintero iti mammanday,

‘Mayat ti aramidmo.’

Ti mangpitpit kadagiti paset ti ladawan

paregtaenna ti mangilansa a mamagkakamang.

Adda agkuna, ‘Nasayaat ti pannakalanangna’—

ket ilansada ti imahen tapno di matumba.

8 “Ngemsika, Israel nga adipenko,

sika, Jacob a pinilik,

dagiti kaputotan ni Abraham a gayyemko.

9 Innalakayo kadagiti pungto ti daga;

inayabankayo kadagiti kaadayoan a sulina,

ket kinunak kadakayo, ‘Dakayo ti adipenko.’

Saankayo a linaksid no di ket pinilikayo.

10 Dikay agbuteng—addaak kadakayo!

Siak ti Diosyo—

diyo ipalubos nga adda mangbutbuteng kadakayo.

Papigsaen ken tulongankayo;

salakniban ken isalakankayo.

11 “Dagiti gumurgura kadakayo,

maparmekdanto ket ammodanto ti rikna ti pannakaibabainda.

Matayto dagiti manggubat kadakayo,

ket mapukawdanto iti rabaw ti daga.

12 Birokenyonto dagiti kabusoryo

ngem diyonto masarakan ida.

Dagiti manggubat kadakayo

awanto ti kapaypay-anda.

13 Siak ni Yahweh a Diosyo;

Papigsaenkayo ket kunak kadakayo,

‘Dikay agbuteng, tulongankayo.’”

14 Kuna ni Yahweh,

“Israel, uray no bassit ken nakapuyka,

saanka nga agbuteng ta tulonganka.

Siak a Nasantoan a Dios ti Israel,

siak ti mannubbotmo.

15 Pagbalinenka a kasla pagirikan,

nga addaan kadagiti ngipen a baro ken natatadem.

Irikemto dagiti bantay ket dadaelem ida;

margaayto dagiti turod ket tumapokda.

16 Ipurruakmonto ida iti ngato ket mayanginda;

ti bagio ti mangiwarwara kadakuada.

Ngem naragsakkanto ta siak ti Diosmo;

siak a Nasantoan a Dios ti Israel, idaydayawnakto.

17 “Inton agbirok dagiti tattaok iti danum gapu iti rigatda,

inton mamagaan ti karabukobda iti wawda,

siak, ni Yahweh, ipangagkonto ti kararagda;

siak a Dios ti Israel, diakto baybay-an ida.

18 Pagayusekto’t karkarayan kadagiti turod a natikag;

pataudekto dagiti ubbog nga agayus kadagiti tanap.

Pagbalinekto a libtong ti let-ang,

ket pagayusekto a kas ubbog ti namaga a daga.

19 Iti let-ang, pagtuboekto dagiti sedro,

kasta met dagiti akasia, arrayan ken olibo.

Agbalinto a kabakiran ti natikag a daga,

kabakiran a pagtuboan ti saleng, aruo ken parwa.

20 Makitanto daytoy dagiti tattao

ket maammoanda a siak, ni Yahweh, ti akin-aramid.

Maawatanda a ti Nasantoan a Dios ti Israel

ti nangaramid iti daytoy.”

Kariten ni Yahweh dagiti Didiosen

21 TiAponga ari ti Israel, kunana:

“Dakayo a didiosen dagiti pagilian, idatagyo ti darumyo.

Iparangyo dagiti kasayaatan a pammaneknekyo!

22 Umaykayo ket ipakaammoyo ti mapasamakto

tapno maammoanmi no kaano a dumtengda.

Ilawlawagyo iti pangukoman dagiti pasamak

idi punganay ket ibagayo kadakami no ania ti kaipapananda.

23 Tapno mapaneknekanmi a dioskayo,

ibagayo no ania ti mapasamak iti masakbayan!

Agaramidkayo iti naimbag

wenno mangyegkayo iti didigra;

pagamken ken ikkandakam iti panagbuteng.

24 Awan serserbiyo, dakayo ken dagiti aramidyo;

makarimon dagiti agdaydayaw kadakayo!

25 “Nangpiliak iti lalaki nga agnaed iti daya;

manipud iti amianan, umayto rumaut.

Payatpayatenna dagiti agtuturay a kasda la pitak;

arigna iti agdamdamili a mangibaddebaddek iti damilienna.

26 Siasino kadakayo ti nangibaga

idi un-unana a mapasamakto ti kasta?

Siasino ti nangipakaammo a kastoy ti mapasamakto

tapno kunami a pudno ti imbagayo?

Awan ti nasasao ti siasinoman kadakayo;

awan ti makaibaga nga adda imbagayo!

27 Siak, ni Yahweh, ti immuna a nangipadamag iti Sion.

Nangibaonak iti nangipakaammo iti Jerusalem:

‘Sumangpet dagiti tattaom! Addadan!’

28 Idi kitaek dagiti didiosen,

awan ti nasao ti uray maysa kadakuada;

awan nakasungbat iti saludsodko.

29 Awan serserbi amin dagitoy a didiosen;

pulos nga awan maaramidda—

nakapsut ken awan ti mabalin dagitoy nga imahen.”

Ti Adipen ni Yahweh

1 KunatiApo,

“Adtoy ti adipenko nga itan-okko—

ti pinilik ken ti pakaay-ayoak.

Intedko ti Espirituk kenkuana

ket yegnanto ti hustisia kadagiti pagilian.

2 Dinto agpukkaw, dinanto ipigsa ti timekna,

ket dinto agbitla kadagiti kalsada.

3 Naasinto kadagiti nakapsut,

ket tulongannanto dagiti awan gawayna.

Yegnanto ti agnanayon a hustisia

iti amin a tattao.

4 Dinanto pukawen ti namnama wenno ti turedna,

ket ipasdeknanto ti kinalinteg iti daga.

Sigagagar dagiti adayo a daga

a mangur-uray iti pannursurona.”

5 Pinarsuati Dios dagiti langit, inukradna ida;

sinukogna ti daga ken amin a parsua iti rabawna;

inikkanna iti biag ken anges dagiti agnaed iti daga.

Ita, kuna tiApoa Dios iti adipenna:

6 “Siak,ni Yahweh, inayabanka;

inikkanka iti pannakabalin

tapno kitaem a maipakat ti hustisia iti daga.

Sika ti pannakabagik a makitulagto kadagiti amin a tattao;

pannakabagika a mangyeg iti lawag kadagiti pagilian.

7 Luktamto ti panagkita dagiti bulsek,

ket wayawayaamto dagiti naipisok

iti nasipnget a pagbaludan.

8 “Siak ni Yahweh, dayta ti naganko.

Awan ti didiosen a mairanud iti dayagko;

diak ipalubos dagiti imahen

a mairaman iti pannakaidaydayawko.

9 Natungpalen dagiti impadtok idi un-unana.

Ita, baro a bambanag ti ibagak

kadakayo sakbay a mapasamakda.”

Kanta a Pagdaydayaw

10 Kantaanyo tiApoiti baro a kanta;

dakayo iti lubong,

kantaenyo ti pagdaydayaw kenkuana!

Idaydayawyo, dakayo nga aglayag iti baybay;

idaydayawyo, dakayo amin a parsua iti taaw!

Agkantakayo, dakayo nga adayo a daga,

ken amin nga agnaed sadiay!

11 Idaydayaw koma ti let-ang

ken dagiti ilina ti Dios;

idaydayaw met koma dagiti tattao ti Kedar.

Umkis koma iti rag-o dagiti agnaed iti siudad ti Sela;

manipud kadagiti tapaw dagiti bambantay agikkisda koma!

12 Dagiti agnaed iti adayo a daga

idaydayaw ken itan-okda koma ni Yahweh!

13 Rummuar ni Yahweh a kas maingel a tao,

sisasagana ken sigagagar a makiranget.

Agpukkaw a mangipakdaar iti gubat;

ipakitana kadagiti kabusorna ti bilegna.

Ikari ti Dios a Tulonganna dagiti Tattaona

14 Kuna ti Dios,

“Nabayagen a nagulimekak;

diak sinungbatan dagiti tattaok.

Ngem dimtengen ti tiempo a panagtignayko;

agikkisak a kas iti agpasikal.

15 Dadaelekto dagiti turod ken bantay,

malaylayto dagiti ruot ken kayo.

Pagbalinekto a let-angdagiti karayan,

ket pagmagaekto dagiti dan-aw.

16 “Idalankonto dagiti bulsek a tattaok

kadagiti dalan a dida pay nagnaan.

Pagbalinekto a lawag ti sipnget nga ayanda;

pasayaatekto dagiti lasong-lasong a disso.

Aramidek dagitoy nga awan duadua.

17 Maipababa ken maibabainto

dagiti amin nga agtalek iti sinan-dios

ken mangibilang kadagiti kinitikitan

nga imahen a didiosenda.”

Saan a Makasursuro ti Israel

18 Kuna tiApo,

“Dumngegkayo, dakay a tuleng,

kumitakayo a naimbag, dakay a bulsek!

19 Adda aya nabulbulsek ngem ti adipenko?

Adda aya natultuleng ngem ti ibaonko?

20 Israel, adun a bambanag ti nakitam

ngem pulos nga awan aniamanda kenka.

Addaanka iti lapayag a pagdengngegmo

ngem ibagam man ti kaipapanan ti nangngegmo?”

21 Maysa a Dios tiApoa sigagagar a mangisalakan,

isu nga intan-okna dagiti linteg ken pannursurona,

ket tinarigagayan a tungpalen ida dagiti tattaona.

22 Ngem nasamsam dagiti sanikuada,

naipisokda kadagiti nasipnget a bartolina,

ket naipupokda kadagiti pagbaludan.

Natakaw ken naagaw dagiti sanikuada,

ngem awan ti nangispal kadakuada.

23 Adda kadi mayat a dumngeg iti daytoy?

Manipud ita, ipasnekyo kadi ti dumngeg?

24 Siasino ti nangyawat iti Israel kadagiti agsamsam?

Ti met laApoa nakabasolantayo!

Ditay nagbiag a mayannurot iti pagayatanna

wenno nagtulnog kadagiti pannursurona.

25 Iti kasta, indissuorna kadatayo ti pungtotna,

ket sinagabatayo ti kinadawel ti gubat.

Kasla apuy ti ungetna a nanguram iti Israel

ngem ditay ammo idi ti mapaspasamak;

pulos a saantayo a nagnakem.

Ispalen ti Dios dagiti Tattaona

1 Israel, kuna tiApoa

namarsua kenka,

“Saanka nga agbuteng—salaknibanka.

Inawagak ti naganmo—kukuaka.

2 No aglasatka kadagiti adalem a karayan,

addaakto kenka;

dinakanto parmeken dagiti pakariribukam.

No magnaka iti apuy, dikanto mauram;

dikanto maan-ano kadagiti nakaro a pakasuotam.

3 Ta siak ni Yahweh a Diosmo,

ti Nasantoan a Dios ti Israel a mangisalakan kenka.

Yawatkonto ti Egipto tapno mawayawayaanka;

yawatkonto ti Etiopia ken ti Seba.

4 Yawatkonto dagiti nasion

tapno maisalakan ti biagmo.

Napategka ngamin kaniak

gapu ta itan-okka ken ay-ayatenka.

5 Dika agbuteng ta addaak kenka!

“Pagawidekto dagiti tattaom

manipud iti kaadayoan a paset ti daya ken laud.

6 Bilinekto ti amianan a palubosanna ida,

ibagakto iti abagatan a dina igawid ida.

Palubosanyo nga agsubli dagiti tattaok

manipud kadagiti adayo a daga,

manipud iti amin a suli ti lubong agawidda.

7 Isuda dagiti tattaok;

pinarsuak ida tapno idaydayawdak.”

Ti Israel ti Mangsaksi ken ni Yahweh

8 Kuna ti Dios,

“Idatagyo dagiti tattaok iti pangukoman.

Adda matada ngem bulsekda;

adda lapayagda ngem tulengda!

9 Ayabanyo dagiti pagilian iti pangukoman.

Siasino kadagiti didiosenda ti makaipadto

iti mapasamak iti masakbayan?

Siasino kadakuada ti nangipakpakauna

kadagiti mapaspasamak iti agdama?

Itugot man dagitoy a didiosen dagiti saksida

tapno paneknekanda nga adda kalinteganda,

tapno saksianda ti kinapudno ti saoda.

10 “Dakayo nga Israelita, dakayo ti saksik;

pinilikayo a nasion nga agserbi kaniak

tapno maam-ammodak ken mamatikayo,

ket maawatanyo a sisiak ti Dios.

Malaksid kaniak, awan ti sabali a Dios;

awan ti immun-una ngem siak,

ket awanto met ti sumaruno.

11 “Siak ni Yahweh,

siak la ti makaisalakan kadakayo.

12 Impakpakaunak idi ti mapasamak,

ket kalpasanna, immayak timmulong kadakayo.

Awan ti didiosen a nakaaramid iti daytoy;

dakayo ti mangsaksi kaniak.

13 Siak ti Dios, ket agnanayonak a Dios.

Awan ti makaliklik iti pannakabalinko,

awan ti makabalbaliw iti aramidko.”

Agtalaw dagiti Israelita idiay Babilonia

14 Kastoy ti kuna tiApo, ti nasantoan a Dios ti Israel, a mangisalakan kadakayo:

“Tapno maisalakankayo, mangibaonakto

iti armada a mangraut iti Babilonia.

Rebbaekto dagiti ruangan ti siudad,

ket agbalinto a sangsangit ti dir-i dagiti tattaona.

15 Siak ni Yahweh, ti Nasantoan a Diosyo.

Pinarsuaka, Israel, ket siak ti ariyo.”

16 Idi un-unana, nangaramid tiApoiti dalan iti baybay,

maysa a pagnaan iti nadawel a danum.

17 Inturongna ti nabileg nga armada iti pakadadaelanna,

armada a buklen dagiti lugan a pakigubat

ken dagiti nagkabalio.

Limnedda ket didan limmung-aw;

naiddepda a kasla silaw ti pabelo!

18 Ngem kuna tiApo:

“Lipatenyo dagiti napalabas a pasamak;

diyo panunotenen dagiti naaramid idi un-unana.

19 Kitaenyo ti baro a banag nga aramidek.

Mangrugin nga agparang—makitayo itan!

Mangaramidak iti dalan iti let-ang;

sadiay, ikkankayto kadagiti ubbog ti danum.

20 Uray dagiti atap nga animal itan-okdakto;

idaydayawdakto dagiti abestrus ken lobo

inton pagayusek dagiti karayan iti let-ang

tapno adda inumen dagiti pinilik a tattao.

21 Isuda dagiti tattao a pinarsuak nga agpaay kaniak—

ket ikankantadanto ti pakaidaydayawak!”

Ti Basol ti Israel

22 Kuna tiApo,

“Ngem saan a siak ti nagdaydayawam;

naumaka kaniak, sika, Israel.

23 Saanka a nangidatag iti karnero

a mapuoran a kas daton kaniak.

Saan a siak ti pinadayawam

kadagiti sakrifisio nga indatonmo.

Dika pinadagsenan iti panagdawatko iti sagutmo;

dika rininggor iti panagkiddawko

iti mapuoran nga insenso.

24 Dinak inggatangan iti insenso,

wenno pinennek iti taba dagiti animalmo.

Pinadagsenannak ketdi kadagiti basolmo;

naumaak kadagiti dakes nga inar-aramidmo.

25 “Ngem siak ti Dios a mangikkat kadagiti basolmo,

ket aramidek daytoy gapu iti kinadiosko.

Diakton isingir dagiti basbasolmo.

26 Inta iti pangukoman, idatagmo dagiti pammabasolmo;

ilawlawagmo ti rasonmo a mangipaneknek nga adda kalintegam!

27 Nagbasol daydi immuna a kapuonam;

nagbasol kaniak dagidi pangulom.

28 Tinulawan dagiti agtuturaymoti santuario.

Daytoy ti gapuna nga inyegko

ti pannakadadael iti Israel;

impalubosko a maibabain dagiti tattaok.”

Ni Yahweh ti Maymaysa a Dios

1 Kuna tiApo:

“Denggennak, Israel, sika nga adipenko;

dakayo a pinilik a tattao,

dakayo a kaputotan ni Jacob.

2 Siak ni Yahweh a namarsua kenka;

manipud nangrugi ti biagmo tinultulonganka.

Dika agbuteng; sika ti adipenko,

dakayo dagiti pinilik a tattao nga ipatpategko.

3 “Ibuyatkonto ti danum iti namaga a daga;

pataudekto dagiti karayan iti let-ang.

Ibukbukkonto ti Espirituk kadagiti annakmo;

bendisionakto dagiti kaputotam.

4 Lumangtodanto a kas iti ruot

a nasayaat ti padanumna,

kas lidlidda iti igid dagiti waig.

5 “Kunanto ti tunggal maysa, ‘Kukuanak tiApo.’

Umaydanto tumipon kadagiti Israelita.

Imarkadanto ti nagan tiApoiti imada,

ket ibilangto ti tunggal tao ti bagina

a maysa kadagiti tattao ti Dios.”

6 Kastoyti kuna tiApoa Mannakabalin-amin,

ni Yahweh a mangituray ken mangsalaknib iti Israel:

“Siak ti umuna ken siak ti maudi;

awan sabali a Dios no di la siak.

7 Adda kadi makaaramid iti inaramidko?

Adda kadi makailawlawag iti amin a mapasamak

iti masakbayan manipud idi mangrugi

agingga nga aggibus ti tiempo?

8 Dikay agbuteng, dakay a tattaok!

Ammoyo a manipud idi un-unana agingga ita,

impakpakaunak dagiti amin a mapasamak,

ket dakayo ti mangsaksi kaniak!

Adda kadi sabali pay a Dios?

Adda kadi mannakabalin a Dios a diak pay nadamdamag?”

Minamaag ti Panagdaydayaw kadagiti Kinitikitan a Ladawan

9 Awan ti serserbi dagiti amin nga agar-aramid kadagiti imahen. Awan mamaay dagiti didiosen nga ipatpategda unay. Bulsek ken ignorante dagita nga agdaydayaw kadagitoy a didiosen. Maibabaindanto.

10 Bambannog laeng ti agaramid iti ladawan a pagdaydayawan a kas maysa a dios!

11 Malalaisto ti amin nga agdaydayaw iti ladawan. Tao laeng a kas kadatayo dagiti agar-aramid kadagiti ladawan. Umayda koma ket mausigda—agbutengdanto ket maibabainda.

12 Mangala ti platero iti metal ket sukogenna iti apuy. Alaen ti napigsa nga imana ti martilio ket pitpitenna ti metal agingga a masukog. Mabisinan, mawaw ken mabannog ti platero.

13 Rukoden ti karpintero ti kayo. Mangala iti tisa ket agaramid iti ladawan ti imahen. Alaenna dagiti rimmientana sana kitikitan agingga a masukog ti imahen. Aramidenna ti imahen ti maysa a tao, nataer a lalaki a maikabil iti templo.

14 Mabalin a mangpukan iti sedro nga usarenna wenno mangpili iti kayo a lugo wenno parwa iti kabakiran. Wenno agmula iti kayo a laurel ket agpannuray iti tudo a mangpadakkel iti kayo.

15 Usarenti tao ti dadduma a paset ti kayo a pagtungona. Aramidenna ti dadduma a kas imahen. Ti dadduma pasgedanna a paginudoanna ken panglutoanna iti tinapay. Ket ti dadduma aramidenna nga imahen a pagdaydayawanna a kas didiosenna.

16 Puoranna ti dadduma. Pagtunoanna iti karne a sidana ket mabsog. Aginudo ket kunana, “Nagsayaat ket ti baranan. Nagpintasen nga apuy!”

17 Ti nabati iti kayo, aramidenna nga imahen. Agdumog ket pagdaydayawanna. Pagkararaganna ket kunana, “Sika ti diosko—isalakannak!”

18 Nakuneng unay dagiti kakasta a tattao. Dida ammo ti ar-aramidenda. Dida kayat a kitaen ken panunoten ti kinapudno.

19 Awan nakem ti agar-aramid iti imahen. No adda panunotna, mabalinna a kuna, “Pinuorak ti dadduma a paset ti kayo, ket naglutoak iti tinapay iti beggangna. Nagtunoak iti karne a sindak. Ti dadduma inaramidko nga imahen nga isu ita ti pagdaydayawak, idinto ta sangkaputed laeng a kayo.”

20 Awan duma daytoy iti pannangan iti dapu. Inyaw-awan ti minamaag a panunotna, ket pulos a saanen a matulongan. Dina ammo a saan a pudno a dios ti imahen nga ig-iggamanna.

Ni Yahweh a Namarsua ken Mangisalakan

21 Kuna tiApo,

“Laglagipem dagitoy, sika, Israel;

laglagipem a sika ti adipenko.

Pinarsuaka tapno agserbika kaniak,

ket dikanto liplipatan.

22 Pinunasko dagiti basbasolmo,

kasla ulep a pinukawko.

Agsublika ngarud kaniak

ta siak ti mangisalakan kenka.”

23 Agpukkawkayo iti rag-o, dakay a langlangit!

Agpukkawkayo, dakay a nauneg a paset ti daga!

Agpukkawkayo iti rag-o, dakay a bambantay,

dakay a kaykayo iti kabakiran!

Insalakan tiApodagiti tattaona nga Israelita,

ket iti kasta, impakitana ti kinatan-okna.

24 “Siak ni Yahweh a namarsua ken mangisalakan kenka;

siak ni Yahweh a namarsua iti isu amin a banag.

Sisiak ti nangyukrad kadagiti langit;

idi aramidek ti daga, awan timmulong kaniak.

25 Pagbalineka maag dagiti mammuyon,

ket diak patuloyen ti padto dagiti mammadles.

Ipakitak a saan a pudno

ti sao dagiti mamasirib,

ket iparangko a minamaag ti kinasiribda.

26 Ngem no adda ipadto ti adipenko,

no mangibaonak iti mangipakaammo kadagiti panggepko,

ikagumaak a matungpal dagita a plano ken padto.

Ibagak iti Jerusalem

nga addanto manen

tattao nga agnaed sadiay.

Ibagak met kadagiti siudad ti Juda

a mabangondanto manen.

Manipud kadagiti rebrebba, tumakderto dagitoy a siudad.

27 Bilinek ti taaw ket agmaga.

28 Kunakken ni Ciro,

‘Sika ti tudingak nga agturay,

aramidemto ti kayatko nga aramidem;

ibilinmonto a mabangon manen ti Jerusalem

ken maisaad ti fondasion ti Templo.’”

Dutokan ni Yahweh ni Ciro

1 Ni Ciro ti ari a pinili ni Yahweh!

Dinutokanna a mangparmek kadagiti nasion,

imbaonna a mangparukma kadagiti nabileg nga ari;

ilukatto ni Yahweh kenkuana dagiti ruangan dagiti siudad.

Kuna ni Yahweh ken ni Ciro,

2 “Siakto ti mangisagana iti dalanmo.

Simpaekto dagiti bambantay ken turturod.

Rakrakekto dagiti bronse a ruangan;

tukkolekto dagiti landok a balunetda.

3 Ikkankanto kadagiti gameng

nga aggapu kadagiti nasipnget, nalimed a lugar.

Iti kasta, maammoamto a siak ni Yahweh,

ket pinilinaka ti Dios ti Israel.

4 Dutokanka a tumulong kadagiti Israelita,

dagiti tattao a pinilik nga adipenko.

Inikkanka iti naindaklan a pammadayaw,

nupay dinak am-ammo.

5 “Siak ni Yahweh, awan ti sabali a dios.

Itedkonto ti pigsa a masapulmo,

nupay dinak am-ammo.

6 Aramidek daytoy tapno maammoan amin a tattao

iti amin a suli ti lubong

a siak ni Yahweh,

ken awan ti sabali a Dios.

7 Paaddaek ti lawag ken ti sipnget;

yegko ti bendision ket idissuorko ti didigra.

Siak, ni Yahweh, ti agaramid amin kadagitoy.

8 Itedkonto ti balligi manipud langit kas iti tudo;

aglukatto ti daga a mangawat kenkuana,

ket agsabongto iti wayawaya ken hustisia.

Siak, ni Yahweh, ti akinnakem

a mapasamak amin dagitoy.”

Ni Yahweh ti Namarsua ken Kangatoan nga Agturay

9 Asipay ti makisuppiat iti nangdamili kenkuana,

ta maysa laeng a banga kadagiti adu a banga.

Saludsodenna kadi iti agdamdamili

no ania ti ar-aramidenna?

Pagduaduaanna kadi

ti kabaelan ti nangdamili kenkuana?

10 Adda kadi makaitured nga agkuna

kadagiti nagannak kenkuana,

“Apay nga inaramiddak a kastoy?”

11 Ni Yahweh a Nasantoan a Dios ti Israel

ken mangbukel iti masakbayan, kunana:

“Ania koma ti bibiangmo maipapan kadagiti annakko?

Ania ti kalintegam a mangibaga ti rumbeng nga aramidek?

12 Siak ti nangaramid iti daga ken namarsua

iti sangkataoan nga agnaed kenkuana.

Inyukradko dagiti langit babaen iti bilegko;

inurnosko ti init, ti bulan ken dagiti bituen.

13 Tinignayko ni Ciro a mangtungpal iti panggepko,

ken mangpalinteg iti amin a banag.

Simpaekto dagiti amin a dalan a pagnaanna;

bangonennanto manen ti siudadko a Jerusalem,

ket wayawayaannanto dagiti tattaok a naibalud.

Awan nangtangdan wenno nangpasuksok kenkuana

tapno aramidenna daytoy.”

Daytoy ti sao ni Yahweh a Mannakabalin-amin.

14 Kuna ni Yahweh iti Israel,

“Kukuamto ti kinabaknang ti Egipto ken Etiopia,

tagabuemto dagiti natatayag a tattao ti Seba;

sikakawardanto a sumursurot kenka.

Agrukbabdanto kenka ket kunada,

‘Adda ti Dios kenka, is-isu laeng ti Dios.

15 Ti Dios ti Israel,

maysa a Dios a saan a makita;

isalakanna dagiti tattaona.

16 Maibabainto dagiti amin nga agar-aramid iti imahen;

malalaisdanto amin.

17 Ngem insalakan ni Yahweh ti Israel,

ket agnanayon ti balligina;

pulos a dinto maibabain dagiti tattaona.’”

18 Pinarsua ni Yahweh dagiti langit—

isu laeng ti pudno a Dios!

sinukog ken inaramidna ti daga—

inaramidna a natibker ken mataginayon awan inggana.

Saanna nga inaramid nga awan serserbina,

no di ket pagnaedan dagiti tattao.

Isu ti agkuna,

“Siak ni Yahweh,

ket awanen ti sabali a Dios.

19 Saanak a nagsao iti nalimed,

saanko met nga inlimed ti panggepko.

Diak imbilin kadagiti Israelita

a birokendak iti lugar a gusoguso.

Siak ni Yahweh, ket pudno ti ibagak;

ipakaammok no ania ti nalinteg.”

Ni Yahweh ken dagiti Didiosen ti Babilonia

20 Kuna ni Yahweh,

“Aguummongkayo, dakayo a tattao dagiti nasion,

dakayo amin a nakalasat idi matnag ti pagarian,

idatagyo dagiti bagbagiyo tapno mausigkayo.

Nengneng dagiti mangilibut

kadagiti imahen a didiosenda a kayo,

ken agkararag kadagiti didiosen

a saan a makaisalakan kadakuada!

Pulos nga awan ti ammo dagitoy a tattao!

21 Umaykayo ket idatagyo dagiti kasoyo iti pangukoman,

bay-anyo nga agiinnuman dagiti naidarum.

Siasino ti nangipadto idi un-unana,

a daytoyto ti mapasamak?

Saan aya a siak, ni Yahweh,

ti Dios a mangisalakan kadagiti tattaona?

Awanen ti sabali a Dios, malaksid kaniak.

22 “Agsublikayo kaniak tapno maisalakankayo,

dakay a tattao iti entero a daga.

Siak ti Dios, awan ti sabali.

23 Pudnoti ikarik ket saan a mabaliwan.

Sipapasnekak a mangikari

nga agparintumengto dagiti amin a tao iti sangoanak,

ket isapatada a napudnoda kaniak.

24 “Kunadanto a siak lat’ pagtaudan

ti balligi ken pigsa;

ngem maibabainto amin a gumura kaniak.

25 Siak, ni Yahweh, ti mangisalakanto kadagiti amin a kaputotan ni Jacob,

ket idaydayawdakto.

1 “Daytoy ti kanibusanan dagiti didiosen ti Babilonia!

Nagdaydayawan idi dagiti tattao dagiti didiosen a Bel ken Nebo.

Ngem ita, naikargada kadagiti asno,

ket dadagsen ida dagiti nabannog nga animal!

2 Daytoy ti kanibusanan dagiti didiosen ti Babilonia.

Saan a maisalakan dagiti imahen ti mismo a bagbagida,

naagaw ken naitalawda.

3 “Denggendak, dakay a kaputotan ni Jacob,

dakay amin a natda kadagiti tattaok.

Inay-aywanankayo manipud pannakayanakyo.

4 Siak ti Diosyo ket aywanankayto

agingga a duduogankayo.

Pinarsuakayo ket aywanankayto;

tulongan ken ikanawakayto.

5 “Siasino ti pangidiliganyo kaniak,” kuna ni Yahweh.

“Adda aya sabali a kapadak?

6 Luktan dagiti tattao dagiti supotda

ket ibukbokda dagiti balitok;

timbangenda dagiti pirak.

Manangdanda iti platero nga agaramid

iti didiosen a pagrukbaban ken pagdaydayawanda.

7 Baklayen ken awitenda;

isaadda iti nairanta a pagyananna,

ket adda sadiay, di makagaraw iti lugarna.

No adda agkararag kenkuana dina masungbatan,

ket no dumteng ti didigra dina met maisalakan.

8 “Laglagipenyo daytoy, dakayo a managbasol;

panunotenyo a naimbag dagiti inaramidko.

9 Laglagipenyo dagiti napasamak idi un-unana;

bigbigenyo a siak laeng ti Dios,

ket awan ti sabali a kas kaniak.

10 Manipud idi punganay, ti maaramid innak impadto;

nabayagen nga imbagak ti mapasamakto.

Impakaammok a matungpalto a matungpal dagiti panggepko.

11 Mangayabak iti kali nga aggapu iti Daya;

sumippayotto a kas maysa a sawi,

ket aramidenna ti pinanggepko.

Nasaokon ket maaramidto.

12 “Denggendak, dakay a nasukir a tattao,

dakay a mangipagarup nga adayo pay ti balligi.

13 Yasidegko ti aldaw ti panagballigi—

saan unayen a mabayag.

Saanto a mataktak ti panagballigik;

isalakankonto ti Jerusalem,

ket itedkonto ti dayaw ti Israel sadiay.”

Ti Pannakaukom ti Babilonia

1 Kunani Yahweh,

“Bumabaka iti tronom, Babilonia,

ket agtugawka iti tapok iti daga.

Mayarigka idi iti maysa a birhen,

maysa a siudad a di pay naparmek.

Saankan a nalibnos, nagkupasen pintasmo!

Maysakan a tagabu!

2 Alaem ti gilingan ket aggilingka iti arina!

Ikkatem ta dalungdongmo,

uksobem ta napintas a bado ket ballasiwem dagiti karayan.

3 Makitadanto ti kinalamolamom a kas babai a tagabu,

maimatangandanto ti pannakaipababa ken pannakaibabainmo.

Agibalesakto ket awan ti makaatipa.”

4 Wayawayaannatayo ti Nasantoan a Dios ti Israel—

Yahweh a Mannakabalin-amin ti naganna!

5 Kuna ni Yahweh iti Babilonia,

“Agtugawka iti naulimek ken nasipnget a lugar;

didakanton awagan iti reyna dagiti pagilian!

6 Nakaungetak kadagiti tattaok,

ket diak imbilang idan a kukuak.

Inyawatko ida iti pannakabalinmo,

ket saanmo a kinaasian ida,

uray dagiti duduogan pinarigatmo ida.

7 Impagarupmo nga agnanayonto a reynaka,

ket dimo impapuso dagitoy a bambanag;

dimo pinanunot no anianto ti pagbanagan ti amin.

8 “Denggem,sika a naayat iti ragragsak,

sika a mangipagarup a natalged

ken awan pakaan-anoam.

Kunam a naindaklanka a kas iti Dios,

nga awan ti sabali a kas kenka.

Impagarupmo a dika mabalo,

wenno saan a matay dagiti annakmo.

9 Ngem iti apagkanito, iti maysa la nga aldaw,

mapasamakto kenka dagitoy dua a banag.

Uray aramidem amin a panagsalamangkam,

matayto dagiti annakmo ket mabalokanto.

10 “Impagarupmo a natalgedka iti kinadakesmo;

kinunam nga awan ti makakita kenka.

Inyaw-awannaka ti sirib ken ti ammom,

ket kinunam iti bagim, ‘Mannakabalinak,

awan ti nalalaing ngem siak!’

11 Agdissuorto kenka ti didigra;

dimonto mapasardeng babaen iti panagsalamangkam.

Kellaatto a dumteng kenka ti pannakadadael,

pannakadadael a dimo impagarup!

12 “Itultuloymo latta

ti panagsalamangka ken panaganitom;

inaramatmo dagitoy manipud kinaubingmo.

Nalabit a matulongandakanto,

nalabit a makigtotmo dagiti kabusormo.

13 Awan bilegmo uray pay bagbagaandaka.

Bay-am nga umay dagiti astrologo a mangisalakan kenka—

dagiti tattao a mangad-adal kadagiti bituen,

dagiti mamaglalasin iti beddeng dagiti langit.

Bay-am nga ibagada dagiti amin a mapasamak kenka

iti tunggal bulan.

14 “Arigdanto kadagiti garami a mapuoran!

Didanto pay maisalakan dagiti bagbagida,

ta napudot unay ti gil-ayab,

saan a kas iti apuy a paginudoan.

15 Daytoy ti pangiturongan kenka ti pammagbaga

dagitoy nga astrologo a nakium-umanam

bayat ti panagbiagmo.

Panawandakanto ket mapandanto iti kaykayatda;

awanto ti mabati a mangisalakan kenka.”

Ti Dios ti Apo ti Masakbayan

1 Denggenyo daytoy,

O balay ni Jacob,

dakay a maawagan iti Israel,

dakay a kaputotan ni Juda.

Agsapatakayo iti nagan tiApo,

ket kunayo nga agdaydayawkayo iti Dios ti Israel,

ngem saan a pudno ti sasawenyo.

2 Ket kaskasdi a natangsitkay a mangibaga

nga umilikay iti nasantoan a siudad,

ket agtalekkay iti Dios ti Israel

ngaApoa Mannakabalin-amin ti naganna.

3 Kuna tiApoiti Israel,

“Nabayagen nga impadtok ti mapasamakto;

ket kellaat nga inaramidko!

4 Ammok a nasukirkayo,

a natangkenkayo a kas landok,

kaskayo la bronse a di makillo.

5 Nabayagen nga impadtok ti masakbayanyo,

impakaammok dagiti mapasamak sakbay a maaramidda,

tapno diyo kuna a gapuanan ida dagiti didiosen ken imahenyo.

6 “Pimmayso dagiti amin nga impakaunak;

annugotenyo a pudno dagiti padtok.

Ita, ibagak a dumteng dagiti baro a bambanag,

a diak pay impakaammo kadakayo a paspasamak.

7 Ita laeng nga ipalubosko a matungpalda;

awan kastoy a napasamak idi.

No adda, mabalinyo la koma a kunaen

nga ammoyo amin ti maipapan kadagitoy.

8 Ammok a dikay mapagtalkan,

ket manipud pannakayanakyo

agdindinamagen ti kinasukiryo.

Saanyo pay a nangngegan

wenno naammoan daytoy ta dagiti lapayagyo nasullatanda manipud un-unana.

9 “Tapno madaydayaw ti naganko,

tiptipdek ti panagungetko;

igawgawidko ket saankayto a dadaelen.

10 Ginugorankayo iti apuy ti panagsagaba,

kas iti pannakagugor ti pirak iti urno;

ngem natakuatak nga awan serserbiyo.

11 Ti aramidek, aramidek gapu kaniak—

diakto ipalubos a maibabain ti naganko,

wenno adda sabali a mangala iti dayagko

a nairanta a siak laeng ti pagpaayanna.”

Ni Ciro ti Pangulo a Pinili ni Yahweh

12 Kuna ni Yahweh,

“Denggendak,Jacob ken Israel nga inayabak!

Siak ti Dios, ti umuna, ti maudi, ti maymaysa a Dios!

13 Impasdekko dagiti fondasion ti daga;

inyukradko dagiti langlangit.

No awagak ti langit ken daga,

umayda a dagus ket dumatagda.

14 “Aguummongkayo, dakay amin, ket denggendak!

Awan kadagiti didiosen ti makaipadto

a ti pinilik a tao rautenna ti Babilonia;

aramidennanto ti kayatko nga aramidenna.

15 Siak ti nagsao ken nangayab kenkuana,

inyegko ti balligina.

16 “Umasidegkayo kaniak ket denggenyo ti ibagak.

Manipud idi damo, awan inlimlimedko a sao

inkagumaak a matungpal amin nga imbagak.”

(Ita, inted ni ApoDiosti pannakabalinna, ket imbaonnak.)

Ti Plano ni Yahweh kadagiti Tattaona

17 Ti Nasantoan a Dios ti Israel,

ni Yahweh a nangisalakan kadakayo, kunana:

“Siak ni Yahweh a Diosyo,

ti mangisuro kadakayo iti pagimbaganyo

ken mangidalan iti rumbeng a papananyo.

18 “No impangagyo dagiti bilinko,

nagayus koma ti bendision nga agpaay kadakayo,

kas iti waig a di maibus ti danumna.

Nagtulid koma nga immay kadakayo ti balligi

kas iti panagtulid dagiti dalluyon nga agpaigid.

19 Kas koma kadagiti darat

ti kaadu dagiti kaputotanyo,

diak koma impalubos a madadaelda.”

20 Panawanyoti Babilonia ket agbalinkayo a siwawaya!

Idir-iyo a siraragsak ti damag,

ket ipakaammoyo iti amin a lugar:

“Insalakan tiApoti Israel nga adipenna!”

21 Idi indalan tiApodagiti tattaona

iti napudot ken natikag a let-ang,

saanda a nagsagaba iti waw.

Pinagrengngatna ti bato ket pimsuak ti danum

tapno adda inumenda.

Wen, pinagrengngatna ti bato,

ket pimsuak ti danum.

22 “Awanti talna kadagiti managdakdakes,” kuna tiApo.

Ti Silaw kadagiti Nasion

1 Denggendak,dakay a purpuro,

dakay a tattao nga agnaed iti adayo!

Pinilinak tiAposakbay a nayanakak,

ket dinutokannak nga adipenna.

2 Pinagbalinnadagiti saok a kas natadem a kampilan;

babaen kadagiti imana, sinalaknibannak!

Pinagbalinnak a kasla pana,

natirad ken sisasagana a maibiat.

3 Kinunana kaniak, “Israel, sika ti adipenko.

Gapu kenka, idaydayawdakto dagiti tattao.”

4 Kinunak, “Awan serserbi ti nagbambannogak.

Impanko ti amin a pigsak

ngem awan ti nagapuanak.”

Nupay kasta, agtalekak itiApo

a mangpalinteg iti amin a banag;

gunggonaannakto gapu iti aramidko.

5 Dinutokannak tiAposakbay a nayanakak;

pinagbalinnak nga adipenna

tapno isublik dagiti tattaona,

tapno isublik dagiti nawarawara nga Israelita.

Ikkannak ni Yahweh iti pammadayaw,

isu ti gubuayan ti pigsak.

6 KinunatiApokaniak,

“Adda nangnangruna a trabaho

nga ipaaramidko kenka nga adipenko!

Saanmonto la nga isubli

ti kinatan-ok dagiti Israelita a nakalasat,

ngem pagbalinenkanto pay

a silaw kadagiti pagilian—

tapno maisalakan ti sangalubongan.”

7 Kuna ti Nasantoan a Dios

ken mangisalakan iti Israel

iti tao a mauy-uyaw unay,

gurguraen dagiti nasion

ken adipen dagiti agtuturay:

“Makitadakanto dagiti ar-ari

ket tumakderda a mangipakita

iti panagraemda kenka.

Makitanto met daytoy dagiti prinsipe,

ket agtameddanto a mangpadayaw kenka.”

Matungpalto daytoy

gapu ta pinili tiApoti adipenna;

tungpalen ti nasantoan a Dios ti Israel dagiti karina.

Ti Pannakabangon Manen ti Jerusalem

8 KunatiApokadagiti tattaona,

“Inton dumteng ti tiempo nga isalakankayo,

paraburankayto, ket sungbatakto ti asugyo.

Aywanan ken salaknibankayto ket aramatenkayto

iti pannakitulagko kadagiti amin a tattao.

Pagnaedenkayto manen

iti naglangalang a dagayo.

9 Kunakto kadagiti balud, ‘Rummuarkayo!’

Kunakto met kadagiti adda iti nasipnget,

‘Agparangkayo!’

Mayarigdanto kadagiti karnero

nga agar-arab iti katurturodan;

10 pulosa didanto mawaw wenno mabisinan.

Didanto agsagaba iti pudot ti init ken ti let-ang;

ta idalanto ida ti mangay-ayat kadakuada.

Iturongnanto ida kadagiti ubbog ti danum.

11 “Agaramidak iti dalan ti kabambantayan,

mangisaganaak iti pagnaan dagiti tattaok.

12 Dumteng dagiti tattaok manipud iti adayo a lugar;

aggapuda iti laud ken iti amianan,

kasta met iti Aswaniti abagatan.”

13 Agkantakayo, dakay a langlangit!

Ipukkawmo ti rag-om, sika a daga!

Agkanta koma dagiti bambantay!

Liwliwaento tiApodagiti tattaona;

kaasiannanto ida nga agsagsagaba.

14 Ngem kinuna dagiti tattao ti Jerusalem,

“Binaybay-annatayo tiApo!

Nalipatannatayon!”

15 Iti kastoy, daytoy ti sungbat tiApo,

“Mabalin aya a lipatan ti ina ti bukodna nga anak?

Dina aya ayaten ti maladaga nga impasngayna?

Uray no malipatan ti ina ti anakna,

ni kaanoman dikanto lipatan.

16 Jerusalem, ni kaanoman dikanto malipatan,

insuratko ti naganmo kadagiti dakulapko.

17 “Asidegen ti yaay dagiti mangtarimaan kenka,

ket pumanawen dagiti nangdadael kenka.

18 Iwarasmo ti panagkitam,

ket kitaem ti mapaspasamak.

Aguurnong dagiti tattaom—agsasangpetdan.

Isapatak iti naganko a sibibiag a Dios,

a pagpannakkelmonto dagiti tattaom

kas iti nobia a mangipannakkel kadagiti alahasna.

19 “Nadadael ken naglangalang ti pagiliam,

ngem ita, saanen nga umanay a pagnaedan.

Dagiti nangdadael kenka,

mapapanawdanto iti bukodmo a daga.

20 Dagiti tattaom a nayanak

iti daga a nakaipananda a kas balud,

addanto aldaw a panagkunada kenka,

‘Nailet unay daytoy a lugar a yantayo,

masapultayo ti nalawlawa a pagnaedan.’

21 Iti kasta, kunamto iti bagim,

‘Siasino ti nangted kaniak kadagitoy nga ubbing?

Natay dagiti annakko,

ket diak naganaken.

Naitalawak a kas balud ket nayadayoak—

siasino ngarud ti nangpadakkel kadakuada?

Maymaysaak a nabati,

naggapuan ngarud dagitoy nga ubbing?’”

22 Kuna ni ApoDioskadagiti tattaona:

“Bilinekto dagiti nasion,

ket isublidanto dagiti annakmo.

23 Dagitinto ar-ari ti pannakaamam;

ket dagitinto reyna ti pannakainam.

Agrukbabdanto iti sangoanam,

sipapakumbabadanto nga agraem kenka.

Iti kasta, maammoanyonto a siak ni Yahweh;

awanto ti mapaay a dumawat iti tulongko.”

24 Maagawmo aya iti soldado ti sinamsamna?

Maispalmo aya dagiti balud iti nauyong nga agturay?

25 Kastoy ti sungbat tiApo,

“Kastanto ti mapasamak.

Maitalawto dagiti balud ti mannakigubat,

maagawto ti sinamsan ti nauyong nga agturay.

Gubatekto dagiti manggubat kenka,

ket ispalekto dagiti annakmo.

26 Pagpipinnatayekto dagiti mangidadanes kenka;

agpapasdanto nga agpapatay ken agunget.

Maammoanto ti sangkataoan a siak, ni Yahweh,

ti mangisalakan ken mangsubbot kenka.

Maammoandanto a siak ti mannakabalin a Dios ti Israel.”

1 KunatiApo:

“Insinak aya dagiti tattaok ket pinapanawko ida

a kas iti panangisina ti lalaki iti asawana?

Ayanna ngarud ti kasuratan ti panagsinami?

Inlakoka aya a kas balud

a kas iti tao a mangilako

kadagiti annakna a kas tagabu?

Saan, naipanawkayo a kas balud gapu kadagiti dakes nga aramidyo;

napagtalawkayo gapu kadagiti basolyo.

2 “Apay a di nagtignay dagiti tattaok

idi napanak kadakuada tapno isalakanko ida?

Apay a dida simmungbat idi immawagak?

Awan kadi ti bilegko a mangisalakan kadakuada?

Mabalinko a bilinen ti taaw tapno agmaga;

mapagbalinko a let-ang dagiti karayan

ket matay dagiti ikan

gapu iti kaawan ti danumda.

3 Mapagsipngetko ti langit

a kasla adda natay a dungdung-awanna.”

Ti Panagtulnog ti Adipen ni Yahweh

4 Insuronak ni ApoDiositi sawek

tapno mapapigsak ti nabannog.

Binigat a paggagarennak a dumngeg

iti isurona kaniak.

5 Inikkannak tiApoiti pannakaawat,

ket diak nagsukir wenno simmina kenkuana.

6 Kadagitimangsaplit kaniak, intayak ti bukotko;

binay-ak ida a mangpabain kaniak,

impalubosko a parutenda dagiti barbasko

ken tupraanda ti rupak.

7 Ngem diak maan-ano iti panangpabainda kaniak,

ta tultulongannak ni ApoDios.

Pinapuskolko ti rupak tapno makaibturak.

Ammok a saanakto a maibabain,

8 agsipudta asideg ti Dios kaniak,

ket ipaduyakyaknanto nga awan basolko.

Siasino ti makaitured a mangidarum kaniak?

No adda, dumatagkami iti pangukoman

ket yulina ti darumna.

9 Ni ApoDiosti tumulong kaniak—

siasino ngarud ti makapaneknek a nagbasolak?

Agpukawto dagiti mangidarum kaniak;

main-inutdanto a marunot

a kas iti sinanga a lupot!

10 Dakay nga agbuteng itiApo

ken agtungpal kadagiti sao ti adipenna—

nalabit a nasipnget ti pagnaanyo

ngem agtalekkayo itiApo,

agpannuraykayo iti Diosyo.

11 Dakayo nga agpanggep a mangdadael

iti padayo a tao

ti panggepyonto met laeng ti pakadadaelanyo!

TiApoti mangdusanto kadakayo;

nakaay-ay-ayto ti pagbanaganyo.