Category: Isaias

Balikas a Pangliwliwa iti Sion

1 Kuna tiApo,

“Denggendak, dakay a mayat a maisalakan,

dakayo nga umay agpatulong kaniak:

Lagipenyo ti bato a nagtaudanyo,

panunotenyo ti abut a nakaaonanyo.

2 Lagipenyo ni Abraham a kapuonanyo

ken ni Sara a nangipasngay kadakayo.

Idi ayabak ni Abraham, awan putotna

ngem binendisionak ket inikkak kadagiti annak;

pinaaduk dagiti kaputotanna.

3 “Kaasiakto ti Sion,

ken amin nga agnaed kadagiti rebrebbana.

Uray no let-ang ti dagana,

pagbalinekto a minuyongan,

kas iti inaramidko idiay Eden.

Addanto sadiay ti rag-o ken ragsak;

addanto met dagiti kanta a pangidaydayaw

ken pagyaman kaniak.

4 “Denggendak, dakay a tattaok,

ipangagyo ti innak ibaga:

Ipakaammok ti pannursurok kadagiti nasion;

agbalinto ti hustisiak a lawag kadakuada.

5 Darasekto nga isalakan ida;

asidegen ti panagballigik.

Siakto a mismo ti mangituray kadagiti pagilian.

Ur-urayen dagiti adayo a daga ti yaayko,

segseggaanda ti panangisalakanko kadakuada.

6 Tumangadkayo iti langit, kitaenyo ti daga!

Kaslanto asuk nga agpukaw ti langit;

marunotto ti daga a kas iti daan a pagan-anay,

ket matayto a kasla ngilaw dagiti amin a tattaona.

Ngem agpautto iti agnanayon nga awan inggana

ti panangisalakan a yegko;

agnanayonto ti pannakabalinko a mangispal.

7 “Denggendak, dakay a makaammo iti nalinteg,

dakay a mangipapuso iti pannursurok.

Dikay agbuteng no lalaisen

ken um-umsiendakayo dagiti tattao;

8 main-inutdanto a marunot

a kas iti sinanga a lupot!

Ngem agpautto iti agnanayon

ti panangisalakan a yegko;

agpautto iti amin a tiempo

ti pannakabalinko a mangisalakan.”

9 Agriingka, O takiag tiApo, ket tulongannakami!

Aramatem ti bilegmo ket isalakannakami;

aramatem a kas iti inaramidmo kadagiti nagkauna a tiempo,

idi rinangrangkaymo ni Rahab.

10 Sika pay ti nangpamaga iti taaw,

ket nangaramidka iti dalan nga aglasat iti danum

tapno makaballasiw dagiti tattao nga insalakanmo.

11 Siraragsakto a makadanon

idiay Jerusalem dagiti inispalmo;

agkakanta ken agpukpukkawdanto iti rag-o.

Naragsakdanto iti agnanayon nga awan inggana.

Pulos nga awanton ti ladingit ken leddaangda.

12 Kuna tiApo,

“Siak ti mangpapigsa kadakayo.

Apay a kabutengyo ti tao

a kasla ruot a mabiit a matay?

13 Nalipatanyo kadin tiApo?

Isu ti nangparsua kadakayo,

isu ti nangyukrad iti langit

ken nangipasdek iti fondasion ti daga.

Apay a kanayon nga agbutengkayo

iti pungtot dagiti mangidadanes,

ken sisasagana a mangdadael kadakayo?

Didakay an-anoen ti pungtotda!

14 Mawayawayaanton dagiti balud;

atiddogto ti biagda,

addanto amin a taraon a masapulda.

15 “Siak ni Yahweh a Diosyo;

kiburek ti baybay

ket pagdaranudorek dagiti dalluyonna.

Yahweh a Mannakabalin-amin ti naganko!

16 Inyukradkoti langit,

ket impasdekko ti fondasion ti daga.

Kunak iti Jerusalem, ‘Dakayo ti tattaok!

Intedko kadakayo ti pannursurok,

ket siak a mismo ti mangsalaknib kadakayo.’”

Aggibus ti Panagsagaba ti Jerusalem

17 Jerusalem,agriingka!

Agmurmurayka ket bumangonka!

Ininummo ti kopa ti pannakadusa

nga impainum tiApokenka gapu iti pungtotna;

inarub-obmo ket nagbasingbasingka!

18 Awan ti mangidalan kenka,

awan kadagiti tattaom

ti mangibin kenka.

19 Dua a didigra ti nagdissuor kenka;

immay ti gubat a nangdadael iti dagam

ket nagbisin dagiti tattaom.

Awan ti mangngaasi kenka.

20 Iti nagsulian ti tunggal kalsada,

mapasag dagiti tattaom iti kapsutda;

kasda la ugsa a natiliw iti silo ti mangnganup.

Nariknada ti bara ti pungtot ti Dios.

21 Dakay nga agsagsagaba iti Jerusalem,

dakayo nga agbasingbasing a kasla nabartek,

22 salaknibannakayo tiApoa Diosyo ket kunana:

“Alaek ti iggemyo a kopa nga intedko kadakayo gapu iti pungtotko.

Dinton masapul nga inumenyo

ti arak a mamagbasingbasing kadakayo.

23 Itedkonto kadagiti nangparparigat kadakayo,

kadagiti nangipaidda kadakayo kadagiti kalsada,

ket kaskayo la rugit a binaddebaddekanda.”

Wayawayaanto ti Dios ti Jerusalem

1 Jerusalem,bumilegka ket ipakitam

ti kinatan-okmo manen!

Nasantoan a siudad ti Dios,

yarruatmo ti nadaeg a kawesmo!

Dinton sumrek kadagiti ruanganmo

dagiti saan a mamati iti Dios.

2 Wayawayaam ta bagim, Jerusalem.

Bumangonka iti ayanmo a tapok,

ket agtugawka iti tronom.

Ikkatenyo dagiti kawaryo,

dakay a balud nga annak ti Sion!

3 Kuna tiApoaDioskadagiti tattaona, “Awan kuarta a naibayad idi nailakokayo a kas tagabu. Awanto met ti maibayad iti pannakawayawayayo.

4 Idi napankayo nagnaed a kas ganggannaet idiay Egipto, napankayo a kas pagayatanyo. Nupay kasta, pinilitnakayo nga intalaw ti Asiria ket awan ti naibayad kadakayo.

5 Kastamet la ti napasamak idiay Babilonia. Naibaludkayo ngem awan ti naibayad iti pannakawayawayayo. Agpangas ken agpalangguad dagiti mangituray kadakayo, ket kanayon nga iparangarangda ti pananglaisda kaniak.

6 Ngem dumtengto ti tiempo a mabigbigyo a siak, ni Yahweh, ti agsasao kadakayo.”

7 Nagpintasketdin nga imatangan

ti naibaon a sumungsungad iti bantay!

Umayna ipakaammo kadagiti kabambantayan

ti naimbag a damag ti kappia!

Ipakaammona ti balligi ket kunana,

“Agarin ti Diosmo, Sion!”

8 Agpukpukkaw dagiti guardia ti siudad,

sangsangkamaysada nga umkis iti ragsak!

Makitada a silalatak

ti panagsubli ni Yahweh iti Sion!

9 Agdir-ikayo gapu iti rag-o,

dakayo a narpuog a disso ti Jerusalem!

Ispalento tiApoti siudadna,

ket liwliwaennanto dagiti tattaona.

10 Aramaten tiApoti bilegna a nasantoan;

isalakanna dagiti tattaona,

ket makita ti sangalubongan.

11 Pumanawkayo,pumanawkayo iti Babilonia,

dakay a mangaw-awit kadagiti nasagradoan nga alikamen!

Diyo sagiden ti aniaman a maiparit;

pasantoenyo dagiti bagbagiyo, ket panawanyo ti siudad.

12 Ita, saan a nasken nga aggangganatkayo;

saan a masapul nga aglibaskayo.

Agyanto tiApoa Diosyo iti sangoananyo,

bantayannakayto iti likudanyo.

Ti Agsagsagaba nga Adipen

13 Kuna ni Yahweh,

“Agballiginto ti adipenko iti aramidna;

maitan-ok ken maidaydayawto iti kasta unay.

14 Adu a tao ti nakigtot idi makitada;

limmaad ket kasla saan a tao ti langana.

15 Ngemita, adunto a nasion ti masdaaw kenkuana,

ket saanto a makasao dagiti ari gapu iti siddaawda.

Makita ken maawatandanto

ti pulos a dida pay naammoan.”

1 Isungbatdagiti tattao:

“Adda ngata mamati iti ipadamagmi ita?

Siasino ngata ti makabigbig

iti pannakabalin tiApoiti daytoy?

2 Nagayatan tiApoa dumakkel ti adipenna

a kas maysa a mula a nagramut iti namaga a daga.

Awan takneng ken daegna

tapno maawisnakami.

Awan ti makaay-ayo a buyana

tapno makayawankami.

3 Inuy-uyaw ken saanmi nga inawat,

inibturanna ti rigat ken panagsagaba.

Awan kimmita kenkuana—

dimi inkaskaso a kasla awan serserbina.

4 “Ngemsinagabana dagiti sagabaentayo koma,

ti rigat a datayo koma ti naglak-am imbaklayna.

Impagaruptayo a ti rigat a naglabasanna

maysa a dusa nga impatay ti Dios kenkuana.

5 Ngemnasugat gapu kadagiti basbasoltayo,

nasaplit gapu kadagiti dakes nga aramidtayo.

Nawayawayaantayo gapu iti dusa a sinagabana,

naagasantayo gapu iti pannakasapsaplitna.

6 Mayarigtayamin iti karnero a napukaw,

nagturong ti tunggal maysa iti kinaykayatna.

Ngem impabaklay tiApokenkuana

ti dusa a maipatay koma kadatayo.

7 Naparparigatngem inibturanna a sipapakumbaba;

pulos a saan a nagsao, awan imbalikasna.

Kasla urbon ti karnero a maipan iti pagpartian,

kas iti karnero a mapukisan,

pulos a saan a nagsao, awan insawangna.

8 Natiliw ken naikeddeng a madusa,

ket naipanaw a mapapatay;

awan ti nangay-ay iti gasatna.

Napapatay gapu kadagiti basol ti sangkataoan.

9 Naitanema naitipon kadagiti managdakdakes,

naitabon iti denna dagiti babaknang,

idinto a pulos nga awan dakes nga inaramidna

wenno ulbod a sinaona.”

10 Kuna tiApo,

“Nagayatak ti panagsagabana;

maysa a daton ti ipapatayna

a mangyeg iti pannakapakawan ti basol.

Iti kasta, makitananto dagiti kaputotanna,

ket atiddogto ti panagbiagna;

isunto ti maaramat iti panagballigi ti panggepko.

11 Agrag-onto manen kalpasan ti panagtutuokna;

maammoannanto nga adda serbi ti panagsagabana.

Isu ti nalinteg nga adipenko,

awitennanto ti dusa dagiti adu,

ket gapu kenkuana pakawanekto ida.

12 Ikkaktongarud iti natan-ok a saad,

saad a maipaay kadagiti natan-ok

ken nabileg a tattao.

Siaayat a nangted iti biagna,

ket naibilang kadagiti managdakdakes.

Innalana ti lugar dagiti adu a managbasol,

ket sinagabana ti dusa a maipatay kadakuada.”

Ti Ayat ni Yahweh iti Israel

1 Jerusalem,kaska la babai nga awan idi ti anakna;

ngem ita, mabalinmon ti agkanta ken umkis iti rag-o.

Ad-adunto ti anakmo

ngem ti babai a di pinanawan ti asawana.

2 Palawaem ti tolda a pagtaengam,

silpoam dagiti talina

ket palagdaem dagiti pasokna.

3 Palawaemto ti masakupan dagiti beddengmo;

mapasublinto dagiti tattaom ti daga

a pagnanaedan ita dagiti nasion.

Adunto a tattao ti agnaed

kadagiti siudad a langalang ita.

4 Dika agbuteng—dikanton maibabain;

saankanton a malalais.

Malipatamton ti kinagulibmo

a kas asawa idi ubingka pay.

Malipatamton ti nakaay-ay-ay

a kasasaadmo a kas balo.

5 Kaslanto maysa nga asawa

ti pannakilangen kenka ti Namarsua—

Apoa Mannakabalin-amin ti naganna.

Isalakannakanto ti Nasantoan a Dios ti Israel—

isu ti agturay iti entero a lubong.

6 Israel, arigmo iti ubing pay nga asawa;

nabaybay-anka ket napalalo ti ladingitmo.

Ngem ayabannaka manen tiApoket kunana:

7 “Iti apagkanito, binaybay-anka;

iti nasged nga ayatko,

isublika iti arpadko.

8 Iti apagdarikmat, simged ti pungtotko

ket pinanawanka.

Ngem ipakitakto kenka ti agnanayon nga ayatko.”

Kastoy ti kuna tiApo

a mangisalakan kenka.

9 “Iditiempo ni Noe,

inkarik a diakton layusen ti daga.

Ita, ikarik a saankanton a kapungtot;

dikanton ungtan wenno dusaen.

10 Mabalina margaay dagiti turod ken bantay,

ngem dinto agpatingga ti panagayatko kenka.

Salluadakto iti agnanayon

ti tulagko iti pannakikappia.”

Kastoy ti sao tiApoa mangipatpateg kenka.

Ti Baro a Jerusalem

11 KunatiApo,

“Nakaay-ay-ay ken agsagsagabaka,

O Jerusalem, siudad nga awan ti mangliwliwa.

Bangonek manen dagiti fondasionmo,

agkakapateg a bato ti pangtarimaanko.

12 Rubi ti usarekto

a pangbangon kadagiti torrem.

Agraniag a kas apuy dagiti batbato

nga aramatek kadagiti ruanganmo.

Napateg a batbato ti pangbangonko kadagiti bakudmo!

13 “Siaktoti mangisuro kadagiti tattaom;

paraburakto ida ket rumang-ayda,

addanto kappia iti sidongda.

14 Patibkerrennaka ti kinalinteg ken hustisia.

Awanton ti mangidadanes

ken mamutbuteng kenka.

15 No addanto mangdarup kenka,

awan ti pammalubosko.

Maparmekto ti siasinoman

a mangraut kenka!

16 “Parsuaek ti mammanday,

isu a mangpasged iti apuy

ket agpanday kadagiti armas.

Siak met la ti mangparsua iti mannakigubat

nga agpapatay babaen iti armas.

17 Ngem awanto ti armas a makasugat kenka,

ket no adda pakaidarumam,

addanto latta sungbatmo a nakasagana.

Salaknibakto dagiti adipenko,

ket pagballigiekto ida.”

Daytoy ti sao tiApo.

Ti Panangngaasi ti Dios

1 KunatiApo,

“Umaykayo, dakay amin a mawaw—

adtoy ti danum!

Umaykayo, dakayo nga awan kuartana—

gumatangkay iti taraon ket mangankayo!

Umaykayo gumatang iti arak ken gatas—

gumatangkay ngem awan ti bayadanyo.

2 Apaya gastosenyo ti kuartayo

iti taraon a saan a makan?

Apay a gastoenyo ti sueldoyo,

ket kaskasdi nga awan pannakapnekyo?

Denggendak ket aramidenyo ti ibagak

tapno maramananyo ti kaimasan a makan.

3 “Ipangagdakita, dakay a tattaok,

ket umaykayo kaniak;

umaykayo ket maaddaankayto iti biag.

Makitulagak kadakayo iti agnanayon a tulag,

ket itedkonto kadakayo dagiti bendision

nga inkarik ken ni David.

4 Pinagbalinko a pangulo ken agturay kadagiti nasion;

inaramatko a mangipakita kadakuada ti bilegko.

5 Ayabamto dagiti ganggannaet a nasion;

saandaka idi nga am-ammo,

ngem ita, agtataraydan nga umay tumipon kenka.

Siak, ni Yahweh a Diosmo,

ti Nasantoan a Dios ti Israel,

ti mangaramidto kadagitoy,

ket ikkankanto iti dayaw ken dayag.”

6 Birokenyo tiApo, ita ta masarakan pay,

umawagkayo kenkuana,

ita ta asideg pay.

7 Masapul nga isardeng dagiti managdakdakes

ti wagas ti panagbiagda,

ket baliwanda ti panagpampanunotda.

Agsublida koma itiApoa Diostayo,

isu a manangngaasi ken madadaan a mamakawan.

8 Kuna tiApo,

“Ti panunotko saan a kas iti panunotyo,

ket ti aramidko saan a kas kadagiti aramidyo.

9 No kasano a nangatngato ti langit ngem ti daga,

kasta met a nangatngato ti wagas ken panunotko

ngem ti wagas ken panunotyo.

10 “Mayarigti saok iti tudo ken niebe

a mangsibog iti daga.

Pagtuboenda dagiti mula;

mangtedda iti bukel a bin-i ken taraon.

11 Kastanto met dagiti sao nga ibalikasko,

aramidendanto nga aramiden dagiti tarigagayko,

magun-oddanto ti panggep a nangibaonak kadakuada.

12 “Naragsakkayto a pumanaw iti Babilonia;

sitatalnakayto a mairuar iti siudad.

Agkakantanto dagiti bambantay ken turturod,

agpukkawto dagiti kaykayo gapu iti rag-o.

13 Agtubonto dagiti saleng

a saan ket a dagiti sisiitan.

Agtubonto met dagiti arrayan

a saan ket a dagiti kalkalunay.

Daytoyto ti pagilasinan nga agpaut iti agnanayon,

maysa a baton nga agpaay kaniak, ni Yahweh,

gapu iti inaramidko.”

Maibilang dagiti Amin a Nasion a Tattao ti Dios

1 Kuna tiApokadagiti tattaona, “Isalakankayo iti mabiit. Aramidenyo ngarud ti nalinteg ken naimbag.

2 Bendisionakto dagiti mangngilin ken saan a mangtulaw iti Aldaw a Panaginana. Bendisionakto dagiti saan nga agaramid iti dakes.”

3 Saan koma a kuna ti ganggannaet a nakitipon kadagiti tattao ni Yahweh, “Dinak palubosan tiApoa makipagdaydayaw kadagiti tattaona.”

Saan koma a kuna ti nakapon a tao a gapu ta dina mabalin ti maaddaan iti anak, saan a maibilang kadagiti tattao ti Dios.

4 Kunani Yahweh iti kasta a tao, “No ngilinem ti Aldaw a Panaginana, no aramidem ti makaparagsak kaniak ken saluadam a sipupudno ti tulagko,

5 malaglagipto ti naganmo iti Templok. Napapautto ti pannakalagipna iti sidong dagiti tattaok ngem no adda koma annakmo. Ni kaano man dikanto malipatan.”

6 Kadagiti ganggannaet a maibilang a kamkameng dagiti tattaona, nga agayat ken agserbi kenkuana, a mangngilin iti Aldaw a Panaginana ken mangsalluad a sipupudno iti nakitulaganna, kuna tiApo,

7 “Ipankaytoidiay Sion a nasantoan a bantayko.Paragsakenkayto iti balayko a pagkararagan ket awatekto dagiti daton nga idatagyo iti altarko. Managanto ti Templok iti balay a pagkararagan nga agpaay kadagiti tattao iti amin a pagilian.”

8 Inkari ni ApoDioskadagiti tattaona nga Israelita, isuda nga inyawidna manipud iti nakaibellenganda a kas balud, nga ad-adunto pay dagiti yegna a tattao a tumipon kadakuada.

Maukom dagiti Dakes a Pangulo ti Israel

9 Inayaban tiApodagiti ganggannaet a pagilian nga umay a kas narungsot nga animal a mangalun-on kadagiti tattaona.

10 Kunana, “Bulsek dagiti amin a papangulo, isuda a rumbeng koma a mangballaag kadagiti tattaok! Awan ammoda. Kasda la para-bantay nga aso a saan nga agtaul. Agid-iddada nga agar-arapaap laeng. Magustoanda unay ti maturog!

11 Mayarigda kadagiti narawet nga aso a pulos a di mapnek. Saan a makaaw-awat dagitoy a pangulo. Aramiden ti tunggal maysa ti kaykayatna ket birokenna ti bukodna a pagimbagan.

12 Kuna dagitoy a bartek: ‘Mangalatayo iti arak ket agpapastayo nga uminum. Kastoyto manen inton bigat ket ad-adunto pay!’”

Maukom ti Israel gapu kadagiti Didiosen

1 Matay dagiti naimbag a tattao ket awan ti makaawat wenno mangitaltalek. Ngamin, no matayda, maipanawda tapno mayadayoda iti didigra.

2 Iti ipapatay dagiti nadalus ti biagna, masarakanda ti talna ken inana.

3 Umaykayo ditoy tapno maukomkayo, dakayo a narugit a managbasol! Awan dumayo kadagiti agan-anito, mannakikamalala ken balangkantis a babbai.

4 Siasino ti rabrabakenyo? Dakayo nga ulbod, siasino ti uy-uyawenyo?

5 Agdaydayawkayo kadagiti didiosen ti nalabon nga apit babaen iti panagkakaiddayo iti sirok dagiti nasagradoan a kayoyo. Idatonyo dagiti annakyo ket puoranyo ida kadagiti rukib iti asideg dagiti waig.

6 Mangalakayo sadiay kadagiti nalinis a bato sayo pagdaydayawan a kas didiosen. Agibukbokkayo iti arak a kas daton kadakuada ket yeganyo ida kadagiti daton a makan. Ipagarupyo kadi a maragsakanak kadagitoy nga ar-aramidenyo?

7 Inkayo kadagiti tapaw dagiti bantay tapno agidatagkayo kadagiti daton ken makikaiddakayo sadiay.

8 Ikabilyo dagiti naalas a didiosenyo iti asideg ti ruanganyo. Linipat ken tinallikudandak. Aglamolamokayo ket umulikayo kadagiti dadakkel a katreyo a kaduayo dagiti bayadanyo a makikaidda kadakayo. Ket sadiay, ipapasyo ti kinaderrepyo.

9 Agbangbanglo ken agsapsapokayo iti lana ket inkay agdaydayaw ken ni didiosen a Moloc. Mangibaonkayo kadagiti mapan agsursor iti adayo, uray pay iti lubong dagiti natay, tapno ibirokandakayo kadagiti didiosen a pagdaydayawanyo.

10 Bannogenyo dagiti bagbagiyo nga agbirbirok kadagiti sabali a didiosen ngem dikay agsardeng nga agbirok. Ipagarupyo a dagiti naalas a didiosenyo ti pagtaudan ti pigsayo, isu a pulos a dikay mapaksuyan.

11 Kuna tiApo, “Siasino dagitoy a didiosen a mamagbuteng kadakayo tapno iti kasta, agulbodkayo kaniak ket lipatendak a mamimpinsan? Insardengyo kadin ti panagdaydayawyo kaniak agsipud ta nabayag a nagulimekak?

12 Ipagarupyo a nasayaat ti aramidyo, ngem ibutaktakkonto ti kinadakesyo ket didakayto matulongan dagiti didiosenyo.

13 No umawagkayo iti tulong, paisalakankayo man kadagiti didiosenyo! Itayabto ida ti pul-oy ti angin! Ngem agnaedto iti daga dagiti agtalek kaniak ket agdaydayawdanto kaniak iti Templok.”

Ikari ti Dios ti Tulong ken Pannakapaimbag

14 Kuna tiApo, “Bay-anyo nga agsubli kaniak dagiti tattaok. Ikkatenyo dagiti amin a lapped iti pagnaanda! Aramidenyo ti dalan ket isaganayo!

15 “Siak ti nangato ken Nasantoan a Dios nga agbiag iti agnanayon. Agnaedak iti nangato ken nasantoan a lugar ngem makipagnaedak met kadagiti tattao a napakumbaba ken nakakaasi, tapno mapasublik ti panagtalek ken namnamada.

16 Siak ti nangted iti biag dagiti tattaok. Saan nga agtultuloy nga usigek ida ket saan met nga agpaut iti agnanayon ti pungtotko kadakuada.

17 Nakapungtotak kadakuada gapu iti basol ken agumda, isu a dinusak ken binaybay-ak ida. Ngem nasukirda ket napanda iti kinaykayatda a papanan.

18 “Nakitak dagiti aramidda ngem paimbagekto ida. Idalan ken tulongakto ida ket liwliwaekto dagiti agladladingit.

19 Ikkakti kappia iti amin, asideg man wenno adayo ti yanda. Paimbagekto dagiti tattaok.

20 Ngem mayarig dagiti managdakdakes iti nadawel a taaw a di agsardeng ti panagdalluyonna, ket mangyeg iti rugit ken pitak.

21 Awanti talna kadagiti managdakdakes,” kuna tiApo.

Ti Pudno a Panagayunar

1 Kuna tiApo, “Agpukkawka iti amin a pigsam! Ipakaammom kadagiti tattaok nga Israelita dagiti basolda!

2 Inaldaw nga agdaydayawda kaniak. Kunada nga aggagarda a makaammo kadagiti dalanko ken mangtungpal kadagiti lintegko. Kunada nga ikkak ida kadagiti linteg nga awan idumdumana ken pagaayatda ti agdaydayaw kaniak.”

3 Saludsoden dagiti tattao, “Ania ti serserbi ti panagayunarmi no di met la ikaskaso tiApo? Apay a parigatenmi ti bagbagimi no dina met la italtalek?”

Kuna tiApokadakuada, “Kinapudnona, no agayunarkayo, birokenyo ti bukodyo a pagragsakan ket idadanesyo dagiti pagtartrabahoenyo.

4 Agayunarkayo tapno agtungpal laeng daytoy iti kinadawel ket agririri ken agkakabilkayo. Ipagarupyo kadi nga ipangagko dagiti kararagyo iti kastoy a panagayunaryo?

5 No agayunarkayo, pagsagabaenyo dagiti bagbagiyo, agdumogkayo a kas iti ruot, ket agyaplagkayo kadagiti nakersang a lupot ken warakiwakanyo iti dapu dagiti pagiddaanyo. Kasta ti kunayo a panagayunar? Ipagarupyo kadi a maragsakanak iti kasta?

6 “Kastoy ti kayatko a panagayunar: Ikkatenyo ti kawar ti panangidadanes ken ti sangol ti kinakillo, ket wayawayaanyo dagiti maparparigat.

7 Ibingayanyoiti taraonyo dagiti mabisin. Pasangbayenyo dagiti napanglaw nga awan pagtaenganna. Kawesanyo dagiti awan aruatenna, ket diyo ipaidam ti tulongyo kadagiti bukodyo a kakabagian.

8 “No aramidenyo daytoy, kaslanto init iti bigbigat ti paraburko a mangraniag kadakayo, ket mabiitto a maimbagan dagiti sugatyo. Kanayonto nga addaak kadakayo tapno isalakankayo. Ti kaaddak ti mangsalaknibto kadakayo iti sadinoman nga ayanyo.

9 No agkararagkayo, sungbatankayto. No awagandak, ipangagkayto.

“No isardengyo ti panagidadanesyo, ti panangipakitayo iti gurayo ken liklikanyo dagiti dakes a sao,

10 no pakanenyo dagiti mabisin ken no itedyo ti masapul dagiti napanglaw, naraniagto a kas iti agmatuon ti sipnget a nanglikmut kadakayo.

11 Kankanayonto nga idalankayo, ket itedkonto ti amin nga agkakaimbag a bambanag a kayatyo. Pagtalinaedenkayto a napigsa ken nasalun-at. Mayarigkayto iti hardin nga adu ti danumna, kas iti ubbog a pulos a di agmaga.

12 Bangonento manen dagiti tattaoyo dagiti pasdek a nabayagen a narba. Agpatakderdanto manen kadagiti daan a fondasion. Maawagankayto a kas tattao a nangipatakder manen kadagiti bakud, ken nangbangon manen kadagiti narpuog a balbalay.”

Ti Gunggona iti Panangngilin iti Aldaw a Panaginana

13 Kuna tiApo, “No ibilangyo a nasagradoan ti Aldaw a Panaginana, ket diyo biroken ti bukodyo a pagimbagan iti dayta nga aldaw; no ipategyo ti nasantoan nga aldawko ket kas panangipakitayo iti panagdayawyo, dikay agbiahe, agtrabaho, wenno agsao iti awan kapapay-anna iti dayta nga aldaw,

14 magun-odyonto ti rag-o a patauden ti panagserbiyo kaniak. Agraemto kadakayo ti entero a lubong. Lak-amenyonto ti kinabaknang ti daga nga intedko ken ni Jacob a kapuonanyo. Siak, ni Yahweh, ti nangibaga iti daytoy.”

Babalawen ti Profeta ti Basol dagiti Tattao

1 Diyo ipagarup a nakapuy tiApoa mangisalakan kadakayo wenno tuleng a di makangngeg iti asugyo.

2 Ngem nayadayokayo iti Dios gapu kadagiti basbasolyo, isut’ gapuna a dinakay ipangag tunggal agdaydayawkayo kenkuana.

3 Ngamin ta nagbasolkayo. Nagpapataykayo ken nagsaokayo iti ulbod ken panangallilaw.

4 Dumatagkayo iti pangukoman, ngem saan a nainkalintegan dagiti pammabasolyo. Agtalekkayo iti kinaulbod tapno mangabakkayo. Ibanagyo dagiti planoyo a mangranggas iti padayo a tao.

5-6 Mayarig iti makasabidong nga itlog ti nagita nga uleg dagiti dakes a panggepyo. Pis-itenyo ti itlog ket rummuar ti maysa nga uleg. Ngem awan imbag nga ited dagiti panggepyo. Awan serserbida a kas iti pagan-anay a naaramid iti sapot ti lawwalawwa.

7 Kanayonnga agpanggepkayo iti dakes, ket agganatkayo a mangibanag. Dikay bumdeng a mangpapatay iti tao nga awan basolna. Iti sadinoman a papananyo, riribuk ken pannakadadael ti iwayatyo.

8 Agpeggad dagiti tattao no addakayo. Dakes amin nga aramidyo. Nakillo ti pagnaanyo ket saan a natalged ti magna iti dayta a dalan.

Ipudno dagiti Tattao ti Basolda

9 Kuna dagiti tattao, “Ita, ammomin no apay a dinakam isalakan ti Dios kadagiti mangranggas kadakami. Birokenmi ti lawag a mangsilaw iti dalanmi ngem kinasipnget la ti adda.

10 Kaskami la bulsek nga agar-arikap. Maitibkolkami iti agmatuon a kasla ketdi tay rabiin. Kasla addakami iti nasipnget a lubong dagiti natay.

11 Maamak ken madanagankami. Segseggaanmi ti panangisalakan ti Dios kadakami a maidaddadanes ken maparparigat, ngem awan ti mauraymi.

12 “OApo, nakaad-adu ti basolmi kenka, ket dagitoy ti agsaksi a maibusor kadakami. Bigbigenmi amin ida.

13 Sinukirdaka, tinallikudandaka ket dimi kayat ti sumurot kenka. Pinarparigatmi ti padami a tao ket sinukirdaka. Pasig nga ulbod dagiti pampanunotenmi. Saan a pudno dagiti saomi.

14 Malapdan ti hustisia ket adda iti adayo ti kinalinteg. Iti paguummongan, maitibkol ti kinapudno ket awan lugar sadiay ti kinatakneng.

15 Awanen ti kinapudno, ket ti siasinoman nga agsardeng nga agaramid iti dakes isu ti biktima ti kinadakes.”

Agsagana ni Yahweh a Mangispal kadagiti Tattaona

Nakita daytoy tiApo, ket saan a maragsakan gapu ta awan ti hustisia.

16 Masdaawa makakita nga awan ti uray maysa a tumulong kadagiti maparparigat. Ngarud, usarennanto ti bukodna a pannakabalin a mangisalakan kadakuada ket magun-odna ti balligi.

17 Ikawesnantoti hustisia a kas kabal ken ti panagballigi a kas helmet. Kawesannanto ti bagina iti nasged a tarigagay tapno mapalinteg ti amin a bambanag. Dusaennanto dagiti managdakdakes kas panangibalesna iti panagsagsagaba dagiti tattao.

18 Dusaennanto dagiti kabusorna kas mayannurot kadagiti inaramidda, uray pay dagiti agnaed iti adayo a daga.

19 Manipud daya agingga iti laud, kabutengto ti amin a tao ti nagan ken pannakabalinna. Dumtengto tiApoa kas iti napegges a karayan, kas iti napigsa nga angin.

20 KunatiApokadagiti tattaona, “Umayakto iti Jerusalem tapno salaknibankayo ken isalakanko ti amin nga agbabawi ken mangtallikud kadagiti basolda.

21 Ket makitulagak kadakayo: Intedkon a kukuayo iti agnanayon ti pannakabalinko ken dagiti pannursurok. Manipud ita, masapul a tungpalendak ken isuroyo dagiti annakyo ken dagiti kaputotanyo nga agtungpal kaniak iti amin a tiempo.”

Ti Dayagto ti Baro a Jerusalem

1 Bumangonka, Jerusalem, ket agraniagka a kas init;

ranraniagannaka ti dayag tiApo!

2 Kinasipngetto ti mangbungon kadagiti dadduma a nasion,

ngem ti silaw tiApoti agraniag kenka,

addanto kenka ti dayag ti kaaddana.

3 Umasidegto dagiti pagilian iti silawmo,

umayto met dagiti ari iti isisingising ti baro nga aldawmo!

4 Iwarasmoti matam ket kitaem ti mapaspasamak:

aguummong dagiti tattaom tapno agawidda!

Aggapunto iti adayo a daga dagiti lallaki nga annakmo;

maubbanto a kasla ubbing dagiti babbai nga annakmo.

5 Makitamto daytoy ket mapnokanto iti rag-o;

agtigergerkanto iti nagpaiduma a ragsakmo.

Mayegto kenka ti sanikua dagiti nasion;

aggapunto iti ballasiw ti taaw ti kinabaknangda.

6 Manipud Midian ken Efa,

dumtengto ti adu a bunggoy a nagsakay kadagiti kamelio.

Aggapudanto idiay Seba a mangyeg

iti balitok ken insenso.

Ipakaammonto dagiti tattao

dagiti naindaklan nga aramid tiApo!

7 Amin a karnero ti Kedar ken Nebayot,

mayegto kenka a kas sakrifisio.

Maidatagdanto iti altar tiApo

a kas daton a makaparagsak itiApo.

Pagbalinento tiApoti Templona a nadaydayag pay.

8 Ania dagitoy barko a kasla ulep ti panaglayagda?

Kasdala kalapati nga agsubli iti pagaponanda.

9 Isuda dagiti nagluganan dagiti tattao ti Dios;

naggapuda iti adayo a daga, isangpetda ida.

Nagitugotda kadagiti pirak ken balitok

a pammadayaw iti nagan ni Yahweh,

ti Nasantoan a Dios ti Israel,

a nangisungsong kadagiti amin a nasion

nga agraemda kadagiti tattaona.

10 Kuna tiApoiti Jerusalem,

“Tarimnento dagiti ganggannaet ti bakudmo,

ket agserbinto kenka dagiti arida.

Dinusaka gapu iti pungtotko,

ngem ita, paraburan ken kaasianka.

11 Aldaw-rabiintoa silulukat dagiti ruanganmo

tapno yeg dagiti ari dagiti nasion

dagiti kinabaknangda kenka.

12 Ngem madadaelto a mamimpinsan

dagiti nasion a saan nga agserbi kenka.

13 “Mayegto kenka ti saleng, parwa ken aruo,

dagiti kasayaatan a tarikayo iti bakir ti Libano.

Maaramatdanto a pangtarimaan kenka, Jerusalem,

maaramatdanto a pangpapintas iti Templok

ken pangpadayag iti siudadko.

14 Umaytodagiti annak dagiti namarparigat kenka,

ket agruknoydanto a mangipakita iti panagraemda.

Agdaydayawto iti sakaanam

dagidi amin a nanglalais kenka.

Awagandakanto iti ‘Ti siudad tiApo,’

‘Sion, ti Siudad ti Nasantoan a Dios ti Israel.’

15 “Saankanton a mabaybay-an ken magurgura,

siudad a napanawan ken naglangalang.

Itan-ok ken papintasenkanto,

maysa a lugar ti agnanayon a rag-o.

16 Taripatoendakanto dagiti nasion ken ari

a kas iti panangtaripato ti ina iti anakna.

Maammoamto a siak, ni Yahweh, insalakanka,

a ti mannakabalin a Dios ti Israel, wayawayaannaka.

17 “Balitok ti yegkonto kenka a saan ket a bronse;

pirak a saan ket a landok, bronse a di ket kayo.

Ikkankanto iti landok a saan ket a bato.

Didakanto parigaten dagiti mangituray kenka;

addanto hustisia ken kappia iti panagturayda.

18 Awanton ariwawa ti panagranggas iti dagam;

awanton panagdadael a mangwarawara iti pagiliam.

Kaslaakto bakud a mangsalaknib kenka;

idaydayawnakto gapu ta insalakanka.

19 “Dimontonmasapul ti init a manglawag kenka iti aldaw

wenno ti bulan a mangraniag kenka iti rabii.

Ta siak ngaApoti agnanayonto a silawmo,

raniagannakanto ti lawag ti dayagko.

20 Agpatingganton ti panagladladingitmo.

Siak, ni Yahweh, ti agnanayon a silawmo;

napapautto ti lawagko ngem ti init ken bulan.

21 Nalintegto ti aramid dagiti amin a tattaom,

ket tagikuaendanto ti daga iti agnanayon.

Immulak ida, inaramidko ida,

tapno maipakita ti kinatan-okko iti amin a parsua.

22 Uray ti familia a kabassitan ken kanumoan

agbalinto a natan-ok a kas iti nabileg a pagilian!

Dagdagusekto nga ibanag daytoy

inton dumteng ti umisu a tiempo.

Siak ni Yahweh!”