Category: Jeremias

Maipadto ti Pannakaparmek ti Jerusalem

1 Imbaon ni Ari Zedekias nga umay kaniak da Pasur nga anak ni Malkias ken Sofonias a padi nga anak ni Maaseyas tapno kiddawenda:

2 “Ikararagannakamikoma itiApo, ta gubatennakami ni Nebucadnesar nga ari ti Babilonia. Agdawatka kenkuana bareng no agaramid iti milagro ket pilitenna nga agsanud ni Nebucadnesar.”

3 Nagsao kaniak tiApoket imbagak kadagiti lallaki a naibaon kaniak

4 nga ibagada ken ni Zedekias ti kinuna ti Apo aDiosti Israel, “Zedekias, parmekek ti armadam a makigubgubat iti ari ti Babilonia ken ti armadana. Urnongekto dagiti armasda iti sentro ti siudad.

5 Siak a mismo ti manggubat kadakayo iti amin a pigsak, amin a pungtotko, rungsot ken ungetko.

6 Patayekto dagiti amin nga agnaed iti daytoy a siudad; matayto dagiti tattao ken animal iti nakaro a sakit.

7 Patiliwkonto ni Zedekias nga ari ti Juda, dagiti ofisialesna ken dagiti tattao a makalasat iti gubat, bisin ken sakit. Tiliwento ida ni Ari Nebucadnesar ken dagiti kabusorda nga agtarigagay a mangpatay kadakuada. Papapataynanto ida ket awanto ti ispalen wenno kaasianna. Siak, ni Yahweh, ti nagsao iti daytoy.”

8 Kalpasanna, kinuna tiAponga ibagak daytoy kadagiti tattao, “Dumngegkayo! Siak ni Yahweh. Pagpilienkayo iti dalan nga agturong iti biag wenno dalan nga agturong iti patay.

9 Siasinoman nga agbati iti siudad, matayto iti gubat wenno iti bisin, wenno iti sakit. Ngem ti rummuar ket sumuko kadagiti taga-Babilonia a madama ti panangdarupda iti siudad, maispalto ti biagna.

10 Inkeddengko a diak ilalaen daytoy a siudad no di ket dadaelek. Mayawatto iti ari ti Babilonia ket puorannanto agingga a dumapu. Siak, ni Yahweh, ti nagsao iti daytoy.”

Ti Pannakaukom ti Kaputotan dagiti Ari ti Juda

11-12 Imbaga kaniak tiAponga ipakaammok daytoy a mensahe kadagiti puli dagiti ari ti Juda, dagiti kaputotan ni Ari David: “Dumngegkay iti ibagak. Siak ni Yahweh. Kitaenyo a maipakat ti hustisia iti inaldaw. Salaknibanyo ti tao nga idadanes ti padana a tao. No diyo isardeng daytoy dakes nga aramidyo, gumil-ayabto ti pungtotko, kas iti apuy a di maiddep.

13 Sika, Jerusalem, agtugtugawkaiti ngatoen dagiti tanap, kas iti dakkel a bato iti patad. Ngem gubatenkanto. Kunam nga awan makabalin a dumarup kenka wenno makastrek kadagiti sarikedkedmo.

14 Ngem dusaenkanto gapu iti aramidmo. Puorakto ti palasiom ket padapuekto ti amin nga adda iti lawlawna. Siak, ni Yahweh, ti nagsao iti daytoy.”

Ti Mensahe ni Jeremias iti Kaputotan dagiti Ari ti Juda

1-2 Binilinnak tiApoa mapan iti palasio ti ari ti Juda, ti kaputotan ni David, ket ibagak iti ari, agraman ofisialesna ken tattao ti Jerusalem nga ipangagda ti sao tiApo. Daytoy ti paibagana:

3 “Siak, ni Yahweh, ibagak nga aramidenyo ti nalinteg ken naimbag. Salaknibanyo ti tao nga idadanes ti padana a tao. Diyo ranggasan wenno parigaten dagiti ganggannaet, dagiti ulila wenno dagiti balo. Diyo patayen ditoy nasantoan a lugar dagiti awan basolna.

4 No pudno nga aramidenyo dagiti imbilinko, agtultuloyto nga agari dagiti kaputotan ni David. Ket sumrekdanto iti daytoy a palasio a nakasakay kadagiti lugan a pakigubat ken kabalio a kaduada dagiti ofisiales ken dagiti tattaoda.

5 Ngemno diyo tungpalen ti saok, isapatak a madadaelto daytoy a palasio. Siak, ni Yahweh, ti nagsao iti daytoy.

6 “Ibilangko a napintas ti palasio ti Juda a kas iti Galaad ken iti Bantay Libano, ngem paglangalangekto agingga nga awan ti agnaed.

7 Mangibaonakto kadagiti mangrebba iti palasio. Ikuyogdanto dagiti wasayda a pangpukan kadagiti napintas a kayo ti sedro ket puorandanto.

8 “Kalpasanna, lumabasto ti adu a ganggannaet. Agsisinnaludsoddanto no apay a siak, ni Yahweh, inaramidko ti kasta iti daytoy dakkel a siudad.

9 Wen, ta binaybay-anyo ti katulaganyo kaniak a Diosyo ket nagdaydayaw ken nagserbikayo kadagiti sabali a dios.”

Mensahe ni Jeremias maipapan ken ni Sallum

10 Tattao ti Juda, diyo sangitan ni Ari Josias,

saanyo a dung-awan ti ipapatayna.

Sangitanyo ketdi iti napait ni Sallumnga anakna,

ta ipanawdan ket saanton nga agsubli,

saannanton a makita ti daga a nakayanakanna.

11 KunatiApomaipapan ken ni Sallum a nangsukat ken ni Josias nga amana nga ari ti Juda, “Awanen ditoy ket dinto agsublin.

12 Matayto iti daga a nangipananda kenkuana ket dinanton makita daytoy a daga.”

Mensahe ni Jeremias maipapan ken ni Jehoyakim

13 Asi pay ti tao a sinusuitik ti panagbalayna

ken sinasaur ti panangpadakkelna iti taengna.

Pagtrabahoenna dagiti kaarrubana

ngem dina tangdanan ida.

14 Asi pay ti tao nga agkuna

nga agpatakder iti palasiona

a nalawa dagiti akingngato a kuartona.

Agpaaramid kadagiti tawa

a sedro dagiti rikepna,

ket papintaanna iti nalabaga.

15 No sedro ti tarikayo ti balaymo

ket napimpintas ngem ti balay dagiti kaarrubam,

ipagarupmo kadi a maysakan nga ari?

Nagpapas ni amam iti naragsak a panagbiag.

Kanayon a nalinteg ti aramidna

ken awan idumdumana

ket rimmang-ay iti amin nga aramidna.

16 Impaayna ti kalintegan dagiti napanglaw,

ket awan nakaan-anoanna.

Kastoy ti kaipapanan ti pannakaammo ken ni Yahweh.

17 Ngem pagimbagam la ti pampanunotem;

patayem dagiti awan basolna,

ket parigatem dagiti tattaom.

Daytoy ti sao tiApo.

18 Isut’gapuna a kuna tiApomaipapan iti ari ti Juda, ni Jehoyakim nga anak ni Josias,

“Awanto ti mangdung-aw iti ipapatayna.

Awanto met ti agkuna,

‘Ania ket ti gasatmon, gayyem!

Ania ket ti gasatmon!’

Awanto ti agladingit wenno agsangit nga agkuna,

‘Ania ket ti gasatmon, apok ken arik!’

19 Maitanemto a kasla natay nga asno,

ulodendanto a yadayo

sadanto ipurruak iti ruar dagiti ruangan ti Jerusalem.”

Ti Mensahe ni Jeremias maipapan iti Pagbanagan ti Jerusalem

20 Tattao ti Jerusalem,

sumang-atkayo idiay Bantay Libano

ket agpukkawkayo.

Inkay idiay Basan ket agsangitkayo.

Inkay kadagiti bambantay ti Moab ket agpukkawkayo

agsipud ta naparmek dagiti amin a kakaduayo.

21 Nagsao tiApokenka idi narang-ayka,

ngem saanka a dimngeg.

Kastoy ti inar-aramidmo iti unos ti panagbiagmo,

pulos a dika nagtulnog itiApo.

22 Itayabto ti angin dagiti pangulom,

agbalinto dagiti kakaduam a balud iti gubat.

Maibabainto ti siudadmo, ket mariribukkanto

gapu iti amin a kinadakesmo.

23 Nagtalgedka kadagiti sedro a naggapu idiay Libano.

Ngem nakakaasikanto inton dumteng ti rigatmo,

a kas iti rigat ti agpasikal.

Ti Panangukom ti Dios ken ni Jeconias

24 KinunatiApoken ni Jeconiasnga anak ni Jehoyakim nga ari ti Juda, “Uray sika ti singsing a tanda nga adda iti makannawan nga imak, siak a sibibiag a Dios, isapatak a lapsutenkanto,

25 ket yawatkanto kadagiti tattao a kabutbutengmo nga agtarigagay a pumatay kenka. Itedkanto ken ni Nebucadnesar nga ari ti Babilonia ken kadagiti soldadona.

26 Ibellengkayto nga agina iti sabali a daga a saanyo a nakayanakan, ket mataykayto sadiay.

27 Tarigagayanyo a makita manen daytoy a pagilian, ngem pulos a dikayton makasubli.”

28 Kinunak, “Nagbalin kadi ni Jeconias a kasla buong a karamba? Naibelleng ket awanen ti mangayat? Daytoy kadi ti gapu no apay a naipanaw agraman dagiti annakna ket naipanda iti daga a saanda pay a nadamdamag?”

29 O daga, daga, daga!

Denggem ti kuna tiApo:

30 “Naikari nga awanto

ti anak daytoy a lalaki,

pulos a dinto agballigi.

Awanto ti kaputotanna

nga agari a kas ken ni David,

ken agturay iti Juda.

Siak ni Yahweh, ti nagsao iti daytoy.”

Namnama iti Masakbayan

1 Asi pay dagiti agtuturay a mangipalubos a mapapatay ken maiwarawara dagiti tattaok.

2 Daytoy ti kuna ti Apo aDiosti Israel kadagiti agturay a rumbeng a mangaywan kadagiti tattaona, “Winarawara ken pinapanawyo dagiti tattaok. Diyo inaywanan ida. Ita, dusaenkayo gapu kadagiti dakes nga inaramidyo.

3 Ayabakto dagiti natda a tattaok kadagiti daga a nangiwaraak kadakuada ket isublikto ida iti dagada. Adunto dagiti annakda, ket umadudanto.

4 Mangisaadakto kadagiti agtuturay a mangaywan kadakuada. Saandanton a mabuteng wenno agamak dagiti tattaok ket saankonton a dusaen ida.Siak, ni Yahweh, ti nagsao iti daytoy.”

5 KunatiApo, “Umayen ti tiempo a panangpilik iti pagbalinek nga ari nga agtaud iti kaputotan ni David. Agturayto a sisisirib daytoy nga ari ket aramidennanto ti naimbag ken nalinteg iti entero a daga.

6 Bayat ti panagturayna, natalgedto dagiti tattao ti Juda ket awanto ti pagpeggadan dagiti Israelita. Panaganandanto dayta nga ari iti ‘TiApoa Nangisalakan Kadatayo.’

7 “Umayen ti tiempo a saanton nga aramaten dagiti tattao ti naganko a sibibiag a Dios a pagsapata, siak a nangiruar kadagiti Israelita manipud Egipto.

8 Pagsapatadanto ketdi ti naganko a sibibiag a Dios a nangiruar kadagiti Israelita manipud kadagiti pagilian iti amianan, ken manipud kadagiti amin a lugar a nangiwarawaraak kadakuada. Agnaeddanto iti bukodda a daga.”

Ti Mensahe ni Jeremias maipapan kadagiti Profeta

9 Nadagsen ti barukongko

ket agpigergerak.

Gapu itiApo,

wen, gapu iti nasantoan a saona,

kaslaak la nabartek a lalaki,

kaslaak la nakainum iti adu nga arak.

10 Napno ti daga iti tattao

a nangtallikud itiApo.

Dakes ti panagbiagda

ket saan a nasayaat ti panangusarda iti bilegda.

Agdung-aw ti daga gapu iti panangilunod tiApo

ket magango dagiti ruot iti pagaraban.

11 Kuna tiApo,

“Agpapada dagiti profeta ken dagiti papadi

a di agbuteng iti Dios.

Naduktalak ida nga agar-aramid iti dakes

iti mismo nga uneg ti Templo.

12 Nagalis ken nasipngetto ti dalanda;

itublakkonto ida ket matuangda.

Idissuorkonto ti didigra kadakuada;

umadanin ti tiempo a pannakadusada.

Siak, ni Yahweh, ti agsasao.

13 Nakitak ti panagbasol dagiti profeta ti Samaria:

nagsaoda iti nagan ni didiosen a Baal,

ket inyaw-awanda dagiti tattaok nga Israelita.

14 Ngemnakitak a nakarkaro ti aramid dagiti profeta ti Jerusalem:

makikamalala ken agulbodda;

tulonganda dagiti tattao nga agaramid iti dakes,

isut’ gapuna nga awan kadakuada ti agsardeng nga agaramid iti saan a rumbeng.

Iti imatangko,

dakesda a kas kadagiti tattao iti Sodoma ken Gomorra.

15 “Iti kasta, siak, ni Yahweh a Mannakabalin-amin, ibagak daytoy a maibusor kadagiti profeta ti Jerusalem:

‘Pakanekto ida iti napait a mula,

painumekto ida iti nasabidongan a danum.

Ngamin, insaknapda ti saan a nadiosan nga aramid

iti entero a daga.’”

16 Kuna tiApoa Mannakabalin-amin kadagiti tattao ti Jerusalem, “Pasig nga ulbod ti ipanamnama kadakayo dagiti profeta. Diyo ipangag ida ta ibagada dagiti arapaapda. Saan a nagtaud kaniak ti sasawenda.

17 Ibagbagada kadagiti tattao, dagiti tattao a saan a dumngeg iti saok, nga awanto ti pakaan-anoanda. Ibagada kadagiti nasukir nga awanto ti didigra a dumteng kadakuada.”

18 Kinunak, “Awan kadagitoy a profeta ti nakaammo kadagiti palimed tiApo. Awan kadakuada ti nakangngeg wenno nakaawat iti mensahena. Awan kadakuada ti nangipangag ken nangtungpal iti saona.

19 “Nadawel a bagio ti kayarigan ti pungtot tiApo. Kasla allawig a bumtak iti ulo dagiti managdakdakes.

20 Saan nga agsardeng no dina maibanag ti amin a panggepna nga aramiden. Iti masakbayan, nalawag a maawatanto daytoy dagiti tattaona.”

21 Kinuna tiApo, “Diak imbaon dagitoy a profeta ngem napanda latta. Awan ti mensahe nga intedko kadakuada, ngem nagsaoda latta iti naganko.

22 No naammoanda ti palimedko, impakaammoda koma ti saok kadagiti tattaok tapno pagpanawanda ti dakes a biagda ken dagiti dakes nga aramidda.

23 “Siak ti Dios nga adda iti amin a lugar. Saan la a maymaysa a disso ti ayanko.

24 Awan ti makapaglemmeng iti disso a diak makita. Diyo kadi ammo nga addaak iti amin a lugar idiay langit ken ditoy daga?

25 Nangngegko ti kuna dagitoy a profeta nga agsao iti ulbod iti naganko. Ibagada nga impakaammok kadakuada dagiti mensahek iti tagtagainepda.

26 Kasano pay kabayag ti panangyaw-awan dagitoy a profeta kadagiti tattaok babaen kadagiti sao a pinarboda?

27 Ipagarupda a gapu kadagiti tagtagainepda, malipatandak dagiti tattaok a kas iti pananglipat kaniak dagidi kapuonanda ket simmurotda ken ni didiosen a Baal.

28 Ti profeta a nagtagtagainep, ibagana koma a tagainepna laeng, ket ti profeta a nakangngeg iti imbagak, ipakaammona koma a sipupudno ti mensahek. Ania aya ti arutang no maidilig iti trigo?

29 Kasla apuy ken martilio ti saok a mangburak iti bato.

30 Busorek dagiti profeta a mangibalikas iti sao ti padada a profeta sada ibaga a saok.

31 Busorek pay dagiti profeta nga agsao iti saoda met laeng ket ibagada a naggapu kaniak.

32 Imdenganyo ti kunak. Siak ni Yahweh. Busorek dagiti profeta a mangibaga iti tagtagainepda a pasig nga ulbod. Saritaenda dagitoy a tagtagainep ket yaw-awanda dagiti tattaok babaen iti panagulbod ken panagpangasda. Diak imbaon wenno imbilin a mapanda. Saanda a makatulong kadagiti tattaok. Siak, ni Yahweh, ti nagsao iti daytoy.”

Ti Dadagsen ni Yahweh

33 Kuna tiApo, “Jeremias, no saludsoden ti maysa kadagiti tattaok wenno profeta wenno padi no ania ti bilinko, kastoy ti ibagam, ‘Dakayo ti dadagsennatiApoket ibellengnakayo.’

34 No adda maysa kadagiti tattaok wenno profeta wenno padi nga agkuna iti, ‘Dadagsen tiApo,’ dusaekto dayta a tao agraman ti familiana.

35 Kastoy koma ketdi ti sawen ti tunggal maysa iti gayyem wenno kabagianna, ‘Ania ti sungbat tiApo? Ania ti kinuna tiApo?’

36 Iti kasta, saandan a kunkuna a makapadagsen ti mensahek agsipud ta no adda mangibaga iti daytoy, pagbalinek ti mensahek a pudno a dadagsen kenkuana. Binallikug dagiti tattao ti sao ti Diosda, ti sibibiag a Dios, ni Yahweh a Mannakabalin-amin.

37 Jeremias, saludsodem kadagiti profeta, ‘Ania ti insungbat tiApokadakayo? Ania ti imbaga tiApo?’

38 No kunada, ‘Makapadagsen ti mensahe tiApo,’ ibagam kadakuada a gapu ta kinunada a daytoy idinto nga imbagak a dida ibaga,

39 pidutekto idanga ipalladaw iti adayo kaniak, isuda ken ti siudad nga intedko kadakuada ken kadagidi kapuonanda.

40 Idissuorkonto kadakuada ti agnanayon a pannakaibabain ken pannakaumsi a dinto malipatan.”

Dagiti Dua a Basket nga Igos

1 Impakitakaniak tiApoti dua a basket nga igos a naikabil iti sango ti Templo. (Napasamak daytoy kalpasan ti panangipanaw ni Nebucadnesar nga ari ti Babilonia ken ni Jeconias nga ari ti Juda. Naipan ti ari a kas balud idiay Babilonia agraman dagiti papangulo ti Juda, dagiti kumikitikit ken mammanday. Anak ni Jehoyakim ni Jeconias.)

2 Naglaon ti maysa a basket kadagiti nasayaat ken nasapa a naluom nga igos. Naglaon met ti maikadua a basket iti nalungsot ken saanen a makan nga igos.

3 Kinuna ni Yahweh kaniak, “Jeremias, ania ti makitam?”

“Igos,” insungbatko. “Dagiti nasayaat nga igos, nasayaatda unay. Dagiti nalungsot, nalungsotda ket saanen a makan.”

4 Kinuna ngarud tiApokaniak,

5 “Siak ni Yahweh a Dios ti Israel, ibilangko dagiti nasayaat nga igos a kas kadagiti tattao a naipan idiay Babilonia ket kaasiakto ida.

6 Aywanan ken isublikto ida iti daytoy a daga. Saankonton a dadaelen ida ket padakkelekto ida. Imulakto ida ket saankonton ida a paruten.

7 Riingekto ti riknada nga agtarigagay a mangammo a siak ni Yahweh. Agbalindanto a tattaok ket siakto ti Diosda agsipud ta agsublidanto kaniak iti amin a pusoda.

8 “No maipapan ken ni Zedekias nga ari ti Juda, kadagiti ofisiales a kakaduana ken kadagiti taga-Jerusalem a nagbati ditoy a daga wenno kadagiti napan idiay Egipto, siak, ni Yahweh, ibilangkonto amin ida a kas kadagiti dakes nga igos a saanen a mabalin a kanen.

9 Didigraekto ida tapno agbuteng dagiti amin a nasion ditoy lubong. Rabrabaken, pagang-angawan ken ab-abiento ida dagiti tattao. Pagilunoddanto ti naganda iti amin a lugar a pangiwarawaraak kadakuada.

10 Mangyegakto iti gubat, bisin ken sakit kadakuada, agingga nga awan a pulos ti matda kadakuada iti daga nga intedko kadakuada ken kadagiti kapuonanda.”

Ti Kabusor a Taga-Amianan

1 Itimaikapat a tawen a panagari ni Jehoyakim nga anak ni Josias idiay Juda, naawatko ti mensahe tiApomaipapan kadagiti amin a taga-Juda. (Daytoy ti umuna a tawen a panagari ni Nebucadnesar idiay Babilonia.)

2 Kinunak kadagiti amin a tattao ti Juda ken ti Jerusalem,

3 “Duapulo ket tallo a tawen itan a kasasaonak tiApo. Nangrugi iti maika-13 a tawen a panagari iti Juda ni Josias nga anak ni Amon agpapan iti daytoy nga aldaw. Kankanayon nga ibagbagak kadakayo dagiti imbagbagana, ngem dikay nangipangag.

4 Dikay dimngeg wenno nangipangag uray pay namin-adu a nangibaon tiApokadakayo kadagiti adipenna a profeta.

5 Imbagada a paglikudanyo ti dakes a panagbiagyo ken dagiti dakes nga aramidyo, tapno mabalinyo ti agnaed iti daga nga inted tiApokadakayo ken kadagidi kapuonanyo kas agnanayon a sanikuayo.

6 Imbagada a dikay agdaydayaw ken agserbi kadagiti sabali a dios. Saanyo a pagpungtoten tiApoiti panagdaydayawyo kadagiti imahen nga inaramidyo. No tinungpalyo tiApo, saannakay koma a dinusa.

7 Ngem mismo a tiApoti nagkuna a diyo impangag. Pinagpungtotyo ketdi gapu kadagiti didiosenyo a nakaigapuan ti panangdusana kadakayo.

8 “Ngarud, gapu ta diyo impangag dagiti sao tiApoa Mannakabalin-amin, kastoy ti kunana,

9 ‘Paayabakto dagiti amin a tattao iti amianan agraman ni adipenko a Nebucadnesar nga ari ti Babilonia. Ibaonkonto ida a manggubat iti daytoy a nasion, kadagiti nagnaed kenkuana ken kadagiti amin a nasion a kabangibangna. Pukawekto ida a mamimpinsan. Agnanayonto nga aglangalang ti dagada ket agbalindanto a pagsidsiddaawan ken pagbutbutngan. Siak, ni Yahweh, ti nagsao iti daytoy.

10 Pagsardengektodagiti ikkisda iti ragsak ken rag-o, ken dagiti naragsak nga arimbangaw dagiti paboda. Iddepekto met dagiti silawda. Awanton ti makan.

11 Aglangalangtodaytoy a daga ket agbalinto a nakabutbuteng ti buyana. Pitopulonto a tawen nga agserbi dagitoy a nasion iti ari ti Babilonia.

12 Kalpasanna, dusaekto ti ari ti Babilonia ken ti nasionna gapu iti basolda. Dadaelekto ti dagada ket aglangalangto iti agnanayon.

13 Dusaekto dayta a nasion. Idissuorkonto dagiti amin nga imbagak a maibusor kenkuana. Ipataykonto dagiti amin a naisurat iti daytoy a libro ken kadagiti amin nga insao ni Jeremias a maibusor kadakuada.

14 Balsekto dagiti taga-Babilonia gapu kadagiti inaramidda, ket adunto a pagilian ken agkakatan-ok nga ari ti mangtagabu kadakuada.’”

Ti Panangukom ti Dios kadagiti Nasion

15 Imbaga kaniak ti Apo aDiosti Israel, “Daytoy ti kopa ti arak a napno iti pungtotko. Alaem ket ipainummo kadagiti amin a nasion a pangibaonak kenka.

16 Agsaruadanto inton inumenda. Agmauyongdanto gapu iti gubat a yegko kadakuada.”

17 Innalak ngarud ti kopa iti ima tiApo, ket impainumko kadagiti nasion a nangibaonanna kaniak.

18 Imminum ti Jerusalem, dagiti il-ili ti Juda, dagiti ari ken dagiti pangulo tapno aglangalangda ken agbalinda a nakabutbuteng ken nakakigkigtot a buya. Iti kasta, aramatento dagiti tattao ti naganda a pagilunod. (Kasta pay laeng agingga ita.)

19-26 Daytoy ti listaan dagiti dadduma a masapul nga uminum iti daytoy a kopa:

Ti Faraon nga ari ti Egipto, dagiti ofisiales ken pangulona;

amin nga Egipcio ken amin a ganggannaet idiay Egipto;

amin nga ari idiay Uz;

amin nga ari kadagiti siudad dagiti Filisteo:

Askelon, Gaza, Ekron ken ti natda iti Asdod;

amin a tattao ti Edom, Moab ken Ammon;

amin nga ari ti Tiro ken Sidon;

amin nga ari iti dagdaga iti igid ti Mediterranean;

siudad ti Dedan, Tema ken Buz;

amin a tattao a nagpukis iti ababa;

amin nga ari ti Arabia;

amin nga ari dagiti tribu ti let-ang;

amin nga ari ti Zimri, Elam ken Media;

amin nga ari ti amianan,

adayo ken asideg nga agsasaruno.

Masapul nga uminum dagiti amin a nasion iti rabaw ti daga. Maudi nga uminum ti ari ti Babilonia.

27 Kalpasanna, kinuna tiApokaniak, “Ibagam kadagiti tattao a siak, ni Yahweh a Mannakabalin-amin a Dios ti Israel, ti mangibilin nga uminumda agingga a mabartek ken agsaruada ket matuangda. Saandan a makabangon gapu iti gubat a yegko kadakuada.

28 No dida kayat nga alaen ti kopa iti imam tapno uminumda, ibagam kadakuada nga imbaga ni Yahweh a Mannakabalin-amin a masapul nga uminumda.

29 Irugikto ti agdadael iti bukodko a siudad. Ipagarupda aya a saandanto a madusa? Madusadanto a madusa agsipud ta iyegkonto ti gubat iti amin a tao iti rabaw ti daga. Siak, ni Yahweh a Mannakabalin-amin, ti agsasao.

30 “Ket sika, Jeremias, masapul nga ipakaammom dagiti amin nga imbagak. Ibagam daytoy kadagitoy a tattao,

‘Manipud langit agpukkawto tiApo,

ket agsao manipud iti nasantoan a taengna.

Pukkawannanto dagiti tattaona;

agriawto a kas iti agpespespes iti ubas.

Mangngegto ti amin a tattao ditoy daga,

31 ket agallangoganto ti timekna iti entero a daga.

Agsipud ta adda pangpabasolan tiApokadagiti nasion.

Ipaulogna ti sentensia iti sangkataoan

ket patayennanto dagiti managdakdakes.

Siak, ni Yahweh, ti nagsao iti daytoy.’”

32 Kuna tiApoa Mannakabalin-amin nga agsasarunonto a didigraenna ti tunggal nasion. Addanto napigsa a bagio nga aggapu iti kaadaywan a pungto ti daga.

33 Iti dayta nga aldaw, maiwarawaranto dagiti pinatay ni Yahweh manipud maysa a pungto ti daga agingga iti sabali a pungto. Awanto ti mangdung-aw kadakuada. Saanto a maitanem dagiti bangkayda. Kasladanto takki a mabuntubunton iti daga.

34 Agsangitkayo, dakayo a pastor dagiti tattaok, agsangitkayo iti napigsa. Agdung-aw ken agiladkayo iti tapok. Umayen ti tiempo a pannakapartiyo,ket mapartikayto a kas iti napili a karnero.

35 Pulos nga awanto ti pamuspusan a makalisikayo.

36-37 Agsangit ken agsainnekkayo gapu ta iti pungtot tiApo, dinadaelna ti natalna a dagada.

38 Binaybay-an tiApodagiti tattaona a kas iti panangpanaw ti leon iti rukibna. Nagbalin a disierto ti daga gapu iti nakabutbuteng a gubat ken iti gumilgil-ayab a pungtot tiApo.

Maidarum ni Jeremias

1 Idimangrugi nga agari ni Jehoyakim nga anak ni Josias idiay Juda,

2 kinuna tiApokaniak, “Agtakderka iti paraangan ti Templo ket ipakaammom kadagiti taga-Juda a mapan agdaydayaw sadiay ti amin nga imbilinko kenka. Awan ti ilimlimedmo. Ibagam amin.

3 Nalabit a dumngegto kenka dagiti tattao ket laksidenda ti kinadakesda. No aramidenda daytoy, diakto ituloy ti panggepko a mangdadael kadakuada gapu iti kinadakesda.”

4 Imbaga kaniak tiAponga idanonko daytoy kadagiti tattao, “Siak, ni Yahweh, ti nagkuna a masapul nga agtulnogkayo kaniak babaen iti panangsurotyo iti pannursurok.

5 Masapul a denggenyo ti sao dagiti adipenko, dagiti profeta a masansan nga ibabaonko kadakayo. Pulos a saanyo nga impangag dagiti sinaoda.

6 Noitultuloyyo ti agsukir, aramidekto iti daytoy a Templo ti kas iti inaramidko iti Silo.Aramatento dagiti amin a nasion a pagilunod ti nagan daytoy a siudad.”

7 Nangngeg dagiti papadi, dagiti profeta ken dagiti amin a tattao nga isasaok dagitoy idiay Templo.

8 Apaman a naisaok ti amin nga imbilin ni Yahweh nga ibagak, ginammatandak sada impukkaw, “Rumbeng a mapapatayka gapu iti daytoy!

9 Apay a kinunam iti nagan tiAponga agbalinto daytoy a Templo a kas iti Silo? Imbagam a madadaelto daytoy a siudad ket awanton ti agnaed.” Ket inaribungbongandak dagiti tattao.

10 Idi nadamag dagiti pangulo ti Juda ti napasamak, dinagdagusda ti pimmanaw iti palasio sada napan iti Templo ket nagtugaw ti tunggal maysa iti Baro a Ruangan.

11 Kinuna dagiti papadi ken dagiti profeta kadagiti pangulo ken kadagiti tattao, “Rumbeng a mapapatay daytoy a tao agsipud ta nagsao iti maibusor iti siudadtayo. Mismo a dakayo ti nakangngeg iti imbagana.”

12 Kinunak, “Imbaonnak tiApoa mangipakaammo iti amin a nangngegyo a maibusor iti daytoy a Templo ken iti daytoy a siudad.

13 Masapul a baliwanyo ti panagbiagyo ken dagiti aramidyo. Tungpalenyo dagiti sao tiApoa Diosyo tapno dinan ituloy ti panggepna a mangdadael kadakayo.

14 No siak a maysa, addaak iti pannakabalinyo! Aramidenyo kaniak ti ammoyo a nasayaat.

15 Ngem tandaananyo daytoy, dakayo ken dagiti tattao iti daytoy a siudad: no patayendak makabasolkayo iti panangpapatayyo iti tao nga awan basolna agsipud ta tiApoti nangibaon kaniak a mangiballaag kadakayo kadagitoy.”

16 Kinuna dagiti pangulo ken dagiti tattao kadagiti papadi ken kadagiti profeta, “Saan koma a maikeddeng a matay daytoy a tao agsipud ta nagsao kadatayo iti nagan tiApoa Diostayo.”

17 Timmakder ti sumagmamano kadagiti panglakayen, ket kinunada kadagiti naguummong sadiay,

18 “Idini Hezekias ti ari ti Juda, imbaga ni profeta Mica a Morastita kadagiti amin a tattao a kinuna daytoy tiApoa Mannakabalin-amin,

‘Kaslanto talon a maarado ti Sion;

agbalinto ti Jerusalem a gabsuon a batbato,

ket agbalinto a bakir ti turod ti Templo.’

19 Saan a pinatay ni Ari Hezekias ken dagiti tattaona ni Mica. Nagbuteng ni Hezekias itiApoket nagdawat iti paraburna. Imbabawi ngarud tiApoti panggepna a mangdidigra kadakuada. Ita, kayatyo kadi a yegtayo ti didigra kadagiti bagbagitayo?”

(

20 Adda idi sabali a lalaki a nagsao iti nagan tiApoiti maibusor iti daytoy a siudad ken iti nasion, kas iti inaramid ni Jeremias. Isu ni Urias nga anak ni Semaias a taga-Kiriat Jearim.

21 Idi nangngeg ni Jehoyakim, dagiti soldadona ken dagiti ofisialesna ti sinaona, pinanggep ti ari a papapatay ni Urias. Ngem naammoan daytoy ni Urias, isut’ gapuna a sibubuteng a naglibas ket napan idiay Egipto.

22 Nupay kasta, imbaon ni Ari Jehoyakim ni Elnatan nga anak ni Acbor ken ti sumagmamano a lallaki idiay Egipto tapno alaenda ni Urias.

23 Insangpetda ni Urias ket pinapatay ni Ari Jehoyakim sana pinaipurruak ti bangkayna iti pagitaneman kadagiti nanumo a tattao.)

24 Ngem gapu iti tulong ni Ahikam nga anak ni Safan, saanak a nayawat kadagiti tattao tapno patayendak.

Ibaklay ni Jeremias ti Sangol

1 Itisaan a nabayag kalpasan ti pannakaisaad ni Zedekias nga anak ni Josias a kas ari ti Juda, imbaga kaniak tiApo

2 nga agaramidak iti bukodko a sangol manipud iti kayo ken lalat ket ikabilko iti tengngedko.

3 Kalpasanna, imbaga kaniak tiAponga ipakaammok ti damagkadagiti ari ti Edom, Moab, Ammon, Tiro ken Sidon babaen kadagiti imbaonda idiay Jerusalem a pannakabagida a makisao ken ni Zedekias.

4 Imbaga kaniak tiApoa Mannakabalin-amin a Dios ti Israel a bilinek ida nga ibagada kadagiti arida ti kinuna tiApo,

5 “Siak, babaen iti dakkel a pannakabalin ken pigsak, pinarsuak ti lubong, ti sangkataoan ken amin nga animal ditoy daga. Mabalinko nga ited ti lubong iti siasinoman a kayatko a pangtedan.

6 Siakti nangikabil kadagitoy a nasion iti babaen ti pannakabalin ti adipenko, ni Ari Nebucadnesar iti Babilonia, ket uray dagiti atap nga animal, agserbida kenkuana.

7 Agserbinto dagiti amin a nasion kenkuana. Agserbidanto met iti anakna ken iti apokona agingga a dumteng ti tiempo a pannakaparmek ti nasionna. Kalpasanna, agserbinto ti pagilianna kadagiti nabileg a pagilian ken kadagiti mannakabalin nga ar-ari.

8 “Ngem no addanto nasion wenno pagarian a saan a paiturayan ken ni Nebucadnesar, yegkonto a kas pangdusak ti gubat, bisin ken angol agingga a dadaelen a mamimpinsan ti ari ti Babilonia dayta a nasion wenno pagarian.

9 Ngarud, diyo patpatien dagiti profetayo wenno ti siasinoman a mangibaga iti mapasamakto iti masakbayan babaen kadagiti tagtagainep wenno pannakiumanna iti espiritu dagiti natay wenno salamangka. Ibagada kadakayo a saanyo a pagserbian ti ari ti Babilonia.

10 Al-allilawendakayo ket isudanto ti pakaigapuan ti pannakayadayoyo iti dagayo. Pagtalawenkayto ket madadaelkayto.

11 Ngem ti nasion a paiturayan iti ari ti Babilonia ket agserbi kenkuana, pagbatiekto iti bukodna a daga tapno talonenna ket agnaed sadiay. Siak, ni Yahweh, ti nangibaga iti daytoy.”

12 Kastoy met laeng ti imbagak ken ni Zedekias nga ari ti Juda, “Paiturayanka iti ari ti Babilonia. Agserbika kenkuana ken kadagiti tattaona ket agbiagkanto.

13 Apay a masapul a mataykayo iti gubat wenno bisin wenno angol? Kasta ti kinuna tiApoa mapasamakto iti nasion a saan nga agserbi iti ari ti Babilonia.

14 Diyo patpatien dagiti profeta a mangibagbaga a dikay agserbi iti ari ti Babilonia. Al-allilawendakayo laeng.

15 Mismo a tiApoti nagkuna a saanna nga imbaon ida. Ul-ulbodendakayo laeng iti naganna. Ngarud, pagtalawennakayto ket mapapataykayto, sika ken dagiti profeta a mangibagbaga kadakayo kadagitoy a kinaulbod.”

16 Kalpasanna, imbagak kadagiti papadi ken kadagiti tattao ti kinuna tiApo, “Diyo patpatien dagiti profeta nga agkuna a maisublinto iti mabiit manipud Babilonia dagiti alikamen ti Templo. Ul-ulbodendakayo.

17 Diyo ipangpangag ida. Agserbikay iti ari ti Babilonia ket agbiagkayto. Apay nga agbalin a gabsuon a batbato ken rebrebba daytoy a siudad?

18 No agpayso a profetada, ken no adda kadakuada ti saok, dawatenda koma kaniak, ni Yahweh a Mannakabalin-amin a saanko a paipan idiay Babilonia dagiti nabati iti Jerusalem nga al-alikamen iti Templo ken kadagiti palasio.”

(

19-20 Idi impanaw ni Ari Nebucadnesar ni Jeconiasnga anak ni Jehoyakim nga ari ti Juda, agraman dagiti natan-ok a lallaki iti Juda ken Jerusalem, imbatina dagiti monmon, palanggana a pagyanan ti danum, dagiti batay ken dagiti dadduma nga alikamen ti Templo.)

21 “Denggenyo ti kunak, siak, ni Yahweh a Mannakabalin-amin a Dios ti Israel, maipanggep kadagiti alikamen a nabati iti Jerusalem, iti Templo ken iti palasio ti ari:

22 Maipandanto idiay Babilonia ket agtalinaeddanto sadiay agingga nga ibaw-ingko ti imatangko kadakuada. Iti dayta nga aldaw, isublikto ida iti daytoy a siudad. Siak, ni Yahweh, ti nagsao iti daytoy.”

Ni Jeremias ken ni Profeta Hananias

1 Itidayta met la a tawen,iti maikalima a bulan iti maikapat a tawen a panagari ni Zedekias, kinasaonak ni profeta Hananias nga anak ni Azzur iti uneg ti Templo. Taga-Gabaon ni Hananias ken anak ni Azzur. Iti imatang dagiti papadi ken dagiti tattao, imbagana kaniak

2 a kinuna tiApoa Mannakabalin-amin a Dios ti Israel, “Pinarmekkon ti pannakabalin ti ari ti Babilonia.

3 Iti uneg ti dua a tawen, isublikto iti daytoy a lugar ti amin nga alikamen iti Templo nga impan ni Ari Nebucadnesar idiay Babilonia.

4 Isublikto ni Jeconias nga ari ti Juda ken anak ni Jehoyakim iti daytoy a lugar. Isublikto pay dagiti amin a tattao iti Juda a naipan a balud idiay Babilonia. Wen, parmekekto ti pannakabalin ti ari ti Babilonia. Siak, ni Yahweh, ti nagsao iti daytoy.”

5 Iti imatang dagiti papadi ken dagiti amin a tattao nga agtaktakder iti Templo, kinunak ken ni profeta Hananias,

6 “Sapay koma ta pumudno ti saom ket isubli tiApoiti daytoy a lugar ti amin nga alikamen ti Templo a naipan idiay Babilonia. Isublina met koma dagiti amin a tattao a naipanaw a kas balud.

7 Ngem denggem ti ibagak kenka ken kadagiti tattao.

8 Impadto dagiti profeta nga immun-una ngem iti panawenta nga umayto ti gubat, bisin ken angol kadagiti adu a nasion ken napipigsa a pagarian.

9 Ngem ti profeta a mangipadto iti kappia, mabigbig a pudno a profeta nga imbaon tiApono matungpal dagiti insaona.”

10 Inikkat ni Hananias ti sangol iti tengngedko sana tinukko-tukkol.

11 Kinunana iti sangoanan dagiti tattao, “Imbaga tiApoa kastoyto ti panangtukkolna iti sangol nga inkabil ni Ari Nebucadnesar iti tengnged dagiti amin a nasion. Aramidennanto daytoy iti uneg ti dua a tawen.” Kalpasanna, pimmanawak.

12 Iti saan unay a nabayag kalpasan daytoy, imbilin ni Yahweh

13-14 nga ibagak ken ni Hananias, “Kinuna tiApoa Mannakabalin-amin a Dios ti Israel a mabalinmo a tukkolen ti kayo a sangol ngem suktannanto iti landok. Mangikabilto iti landok a sangol kadagitoy a nasion ket agserbidanto ken ni Nebucadnesar nga ari ti Babilonia. Kinunana pay nga uray dagiti atap nga animal agserbidanto ken ni Nebucadnesar.”

15 Kinunak ken ni Hananias, “Denggem, Hananias! Saannaka nga imbaon tiApo. Al-allilawem dagitoy a tattao tapno patienda ti ulbod a sasaom.

16 Daytoy ti gapuna a kuna tiApoa pukawennaka. Sakbay a maturpos daytoy a tawen, mataykanto agsipud ta imbagam kadagiti tattao a sukirenda tiApo.”

17 Ket natay ni Hananias iti maikapito a bulan iti dayta met la a tawen.

Ti Surat ni Jeremias kadagiti Judio idiay Babilonia

1 Nagsuratakkadagiti pangulo a naikuyog kadagiti balud, kadagiti papadi, profeta ken amin nga impanaw ni Ari Nebucadnesar idiay Jerusalem ket impanna ida a kas balud idiay Babilonia.

2 Insuratko daytoy kalpasan ti pannakaipanaw ni Ari Jeconias,ni inana, dagiti ofisiales ti palasio, dagiti pangulo ti Juda ken Jerusalem, dagiti mammanday ken dagiti trabahador.

3 Intedko ti surat kada Elasa nga anak ni Safan ken Gemarias nga anak ni Hilkias. Isuda dagiti imbaon ni Ari Zedekias a mapan ken ni Nebucadnesar nga ari ti Babilonia. Daytoy ti nailanad iti surat,

4 “Kuna tiApoa Mannakabalin-amin a Dios ti Israel kadagiti amin a tattao nga impalubosna nga impanaw ni Nebucadnesar idiay Jerusalem ket impanna a kas balud idiay Babilonia:

5 ‘Agbalaykayo ket agsimpakayo. Agmulakayo ket kanenyo ti maapityo.

6 Mangasawa ken aganakkayo. Kalpasanna, pangasawaenyo dagiti annakyo tapno aganakda met. Umadukayo koma; diyo ipalubos a bumassit ti bilangyo.

7 Agserbikayo iti pagimbagan dagiti siudad a nangipanak kadakayo a kas balud. Agkararagkayo kaniak a maipaay kadakuada agsipud ta no narang-ay dagitoy a siudad, narang-aykayto met.

8 Siak, ni Yahweh a Dios ti Israel, ballaagankayo a dikay paallilaw kadagiti profeta a makipagtaeng kadakayo, wenno kadagiti tattao nga agkuna a maipadtoda ti mapasamakto iti masakbayan. Diyo patpatien dagiti tagtagainepda.

9 Aramatenda ti naganko a mangisao iti ulbod. Diak imbaon ida. Siak, ni Yahweh, ti agsasao.’

10 “KunatiApo, ‘Inton maturpos ti Babilonia ti pitopulo a tawenna, sarungkarankayto ket yawidkayo, kas inkarik kadakayo.

11 Siak laeng ti makaammo kadagiti planok a maipaay kadakayo, planok a mangparang-ay a saan ketdi a mangdidigra, plano a mangibanag iti namnamayo iti masakbayan.

12 Umawagkayto kaniak. Agkararagkayto ket sungbatankayto.

13 Sapulendaktoket masarakandakto, agsipud ta birokendakto iti amin a pusoyo.

14 Wen, kunak a masapulandak ket isublikayto iti dagayo. Ummongenkayto manipud kadagiti nadumaduma a daga ken kadagiti amin a lugar a nangiwaraak kadakayo ket isublikayto iti daga a naggapuanyo. Siak, ni Yahweh, ti agsasao.’

15 “Kunayo nga inikkannakayo tiApokadagiti profeta dita Babilonia.

16 Daytoy ti ibaga tiApomaipapan iti ari nga agturay a kas iti panagturay ni David ken maipapan kadagiti tattao iti daytoy a siudad, isuda a kakabagianyo a saan a naikuyog kadakayo a naipanaw a kas balud.

17 Kuna tiApoa Mannakabalin-amin, ‘Yegko ti gubat, bisin ken angol kadakuada, ket pagbalinek ida a kas igos a nalungsot a di mabalin a kanen.

18 Kamatekto ida babaen iti gubat, bisin ken angol. Iti kasta, makigtotto dagiti amin a nasion iti lubong iti makitada. Sadinoman a pangiwaraak kadakuada, makigtot ken agalinggagetto dagiti tattao a makakita iti napasamak kadakuada. Rabrabakento ida dagiti tattao ket usarendanto ti naganda a pagilunod.

19 Mapasamakto daytoy kadakuada agsipud ta dida tinungpal ti saok a pinaibagbagak kadakuada babaen kadagiti adipenko a profeta. Saanda a nangipangag.

20 Dakay amin a tattao a pinaipanko a balud idiay Babilonia, denggenyo ti saok.’

21 “Nagsao tiApoa Mannakabalin-amin a Dios ti Israel maipapan ken ni Ahab nga anak ni Kolaias ken ni Zedekias nga anak ni Maaseyas, isuda nga agsasao iti ulbod kadakayo iti naganna. Kinunana a yawatna ida iti pannakabalin ni Nebucadnesar nga ari ti Babilonia a mangpapatayto kadakuada iti imatangyo.

22 No adda kadagiti tattao a naipanaw iti Jerusalem a kas balud a naipan dita Babilonia ti agtarigagay a mangilunod iti siasinoman, kunananto, ‘Aramiden koma kenka tiApoti kas iti inaramidna kada Zedekias ken Ahab a sibibiag a pinuoran ti ari ti Babilonia.’

23 Daytoyto ti pagbanaganda ta dakes dagiti aramidda. Nakikamalalada, ket nagsaoda iti ulbod iti nagan tiApo. Maibusor daytoy iti pagayatanna. Ammona ti inaramidda, ket agsaksi iti maibusor kadakuada.Daytoy ti sao tiApo.”

Ti Surat ni Semaias

24-25 Inted kaniak tiApoa Mannakabalin-amin a Dios ti Israel ti mensahena nga agpaay ken ni Semaias a taga-Nehelam. Nagsurat idi ni Semaias kadagiti amin a tattao iti Jerusalem ken ni Sofonias nga anak ni padi Maaseyas ken kadagiti amin a papadi. Iti daytoy a surat, imbaga ni Semaias ken ni Sofonias:

26 “Pinagbalinnaka tiApoa padi a kas sukat ni Jehoyada, ket sikan ti pangulo nga ofisialiti Templo. Pagrebbengam a kawaran ken pabaklayan iti landok ti tunggal mauyong nga aginkukuna a profeta.

27 Apay a dimo binabalaw ni Jeremias a taga-Anatot idi agparparang a kas profeta kadagiti tattao?

28 Masapul a mababalaw ni Jeremias agsipud ta imbagana kadagiti tattao idiay Babilonia a maibaludda sadiay iti mabayag. Isut’ gapuna nga agbalayda koma, agsimpada ken kanenda ti apitda.”

29 Imbasa ni Sofonias daytoy a surat kaniak,

30 ket imbilin kaniak tiApo

31-32 nga ipadamagna kadagiti amin a balud idiay Babilonia ti imbaga ni Yahweh maipapan ken ni Semaias: “Siak, ni Yahweh, dusaekto ni Semaias ken amin a kaputotanna. Saanko nga imbaon ni Semaias ngem nagpammarang kadakayo a kas maysa a profeta. Inallilawnakayo a mamati iti ulbod a saona. Awanto ti kaputotanna a makipagnaed kadakayo. Saannanto a mauray dagiti naimbag nga ipaayko kadagiti tattaok. Ngamin, insurona ida nga agsukir kaniak. Siak, ni Yahweh, ti nagsao iti daytoy.”

Ti Kari ni Yahweh kadagiti Kaputotan ni Jacob

1-2 Kinuna kaniak ti Apo aDiosti Israel, “Isuratmo iti libro dagiti amin nga imbagak kenka.

3 Ngamin, dumtengen ti tiempo a panangisublik iti sigud a kasasaad dagiti tattaok iti Israel ken iti Juda. Isublikto ida iti daga nga intedko kadagidi kapuonanda tapno tagikuaendanto manen. Siak, ni Yahweh, ti agsasao.”

4 Kuna tiApokadagiti tattao iti Israel ken Juda,

5 “Nangngegmi ti nakabutbuteng nga ikkis,

ikkis a nakaal-alliaw,

saan nga ikkis ti talna.

6 Ita, panunotenyo daytoy!

Awan ti lalaki nga aganak,

ngem apay a makitak

ti tunggal lalaki a mangil-ilut iti tianna

a kas iti agpasikal a babai?

Apay a bumbumsag ti tunggal maysa?

7 Adda dumteng nga aldaw a nakabutbuteng.

Awan ti aldaw a makapada iti daytoy;

agrigatto dagiti tattaok,

ngem makalasatdanto.”

8 Kuna tiApoa Mannakabalin-amin, “Inton dumteng dayta nga aldaw, tukkolekto ti sangol iti tengngedda. Pugsatekto dagiti kawarda ket saanton a tagabuen ida dagiti ganggannaet.

9 Agserbidanto ketdi kaniak, siak, ni Yahweh a Diosda, ken iti ari nga isaadkonto a nagtaud iti maysa a kaputotan ni David.

10 “Dikayagbuteng, dakayo a tattaok;

dikay agamak, dakayo nga Israelita.

Isalakankayto iti dayta adayo a lugar,

iti dayta a daga a nakaibaludanyo.

Agawidkayto iti bukodyo a daga,

ket agbiagkayto a sitatalna.

Natalgedkayto ket awanto ti

mangbutbuteng kadakayo.

11 Umayakto kadakayo tapno isalakankayo.

Pukawekto a mamimpinsan dagiti amin a nasion

a nangiwarawaraak kadakayo,

ngem saankayto a dadaelen.

Dusaenkayto a dusaen,

ngem no dusaenkayo, dikayto unay parigaten.

Siak, ni Yahweh, ti nagsao iti daytoy.”

12 Kuna tiApokadagiti tattaona,

“Saan a maagasan dagiti sugatyo,

saan a mapaimbag dagiti dunoryo.

13 Awan ti mangaywan kadakayo;

awan agas ti gaddilyo,

awan namnama nga umimbagkayo.

14 Nalipatandakayo ti amin a kaayan-ayatyo;

saandakayon a pagan-ano.

Kaskayla kabusor a dinarupko,

nadagsen ti pannakadusayo,

agsipud ta adu dagiti basolyo,

ken napalalo ti kinadakesyo.

15 Saankayon nga agasug,

saanen a maep-ep ti ut-ot dagiti sugatyo.

Kastoy ti panangdusak kadakayo,

agsipud ta adu dagiti basolyo,

ken nakaro ti kinadakesyo.

16 Ngem ita, maalun-onto met dagiti mangalun-on kadakayo,

ket maipanawto a kas balud dagiti amin a kabusoryo.

Maparigatto met dagiti amin a mangparigat kadakayo,

ket masamsamanto met dagiti mangsamsam iti kinabaknangyo.

17 Paimbagenkayto manen,

paimbagekto dagiti sugatyo,

uray kuna dagiti kabusoryo,

‘Nabaybay-anen ti Sion,

awanen ti mangikankano kenkuana.’

Siak, ni Yahweh, ti nagsao iti daytoy.”

18 Kuna tiApo,

“Isublikto dagiti tattaok iti dagada,

kaasiakto ti tunggal familia.

Mabangonto manen ti Jerusalem,

ket maipatakderto manen ti palasiona.

19 Agkantanto iti pagdaydayaw dagiti agnaed sadiay;

agpukkawdanto gapu iti rag-oda.

Paraburakto ida ket umadunto ti bilangda;

bendisionakto ida ket maidaydayawdanto.

20 Isublikto ti sigud a pannakabalin ti nasion,

ket ipasdekko manen a nalagda;

dusaekto ti amin a mangidadanes kadakuada.

21-22 Agtaudto iti nasionda ti mangituray kadakuada,

agtaudto ti prinsipeda kadagiti tattaoda.

Ayabakto ket umasidegto kaniak,

ta awan ti umay a saan a naawis.

Isudanto dagiti tattaok,

ket siakto ti Diosda.

Siak, ni Yahweh, ti nagsao iti daytoy.”

23-24 Nadawel a bagio ti kayarigan ti pungtot ni Yahweh. Kasla allawig a bumtak iti ulo dagiti managdakdakes. Saan nga agsardeng no dina maibanag ti amin a panggepna nga aramiden. Iti masakbayan, nalawagto a maawatan daytoy dagiti tattaona.