Category: Jeremias

Ti Isusubli ti Israel

1 Kuna ni Yahweh, “Dumtengen ti tiempo a siakto ti Dios ti amin a tribu ti Israel ket isudanto dagiti tattaok.

2 Kinaasiak dagiti nakalasat iti patay idiay let-ang. Idi tarigagayan dagiti Israelita ti aginana,

3 nagparangak kadakuadamanipud iti adayo. Tattao ti Israel, inay-ayatkayo ket itultuloyko nga ipakita ti napudno a panagayatko kadakayo.

4 Bangonenkayto manen. Alaenyonto manen dagiti panderetayo ket agsasalakayo a siraragsak.

5 Agmulakayto manen iti ubas kadagiti turturod ti Samaria ket kanento dagiti agmula ti bunga dagiti kaubasan.

6 Wen, dumtengen ti tiempo nga ipukkaw dagiti agbambantay nga adda kadagiti turod ti Efraim, ‘Umaykayon! Sumang-attayo idiay Sion ta mapantay itiApoa Diostayo.’”

7 Kuna ni Yahweh,

“Kantaanyo a sirarag-o ti Israel,

ti kangrunaan kadagiti nasion.

Ikantayo ti pagdaydayawyo ket kunayo,

‘Insalakan tiApodagiti tattaona;

inispalna dagiti amin a natda iti Israel.’

8 Alaekto ida manipud iti amianan;

yawidkonto ida manipud iti pungto ti daga.

Kumuyogto kadakuada dagiti bulsek ken dagiti pilay,

dagiti inna ken dagiti dandani agpasngay.

Dakkeldanto a nasion nga agsubli.

9 Agsangsangitto dagiti tattaok nga agsubli;

agkarkararagdanto bayat ti panangyawidko kadakuada.

Iturongkonto ida kadagiti agay-ayus a danum;

nasimpa a dalan ti pagnaanda tapno dida maitibkol.

Siak ti pannakaama ti Israel,

ket ni Efraim ti inauna nga anakko.”

10 Kuna ni Yahweh,

“Dumngegkayo kaniak, dakayo a nasion,

ipakaammoyo ti saok kadagiti adayo a purpuro.

Winarawarak dagiti tattaok

ngem ummongek ken bantayakto ida

a kas iti panangaywan

ti agpaspastor iti arbanna.

11 Winayawayaak dagiti Israelita,

ket inispalko ida iti pannakabalin

ti napigsa a nasion.

12 Umaydanto agkanta a sirarag-o iti tapaw ti Bantay Sion.

Maragsakandanto kadagiti sagsagutko

a trigo, arak, ken lana,

kadagiti karnero ken kadagiti baka.

Kasdanto hardin a nasayaat ti pannakasibogna,

addanto aminen a masapulda.

13 Agsalanto dagiti babbalasang ket agragsakdanto;

dagiti babbaro ken dagiti lallakay agrag-odanto.

Liwliwaekto ida ket agbalinto

a rag-o ti leddaangda,

agbalinto a ragsak ti ladingitda.

14 Pennekekto dagiti papadi iti naimas a taraon,

ket dagiti tattaok mapnekdanto iti imbag nga ipaayko kadakuada.

Daytoy ti sao ni Yahweh.”

Ti Panangngaasi ni Yahweh iti Israel

15 Kunani Yahweh,

“Idiay Rama mangngeg ti arimbangaw,

nasaem a sangsangit ken dungdung-aw.

Dungdung-awan ni Raquel dagiti annakna,

agsangsangit ket dina kayat ti maliwliwa,

ta nataydan amin a padapada.

16 Isardengyon ti agsangsangit,

ket punasenyo dagiti luayo.

Magunggonaanto

ti amin nga impaayyo kadagiti annakyo,

agsublidanto manipud iti daga dagiti kabusor.

17 Adda namnama iti masakbayanyo;

agsublinto dagiti annakyo iti bukodda a daga.

Siak, ni Yahweh, ti nagsao iti daytoy.

18 “Mangngegko dagiti Israelita a mangisangsangit,

‘OApo, kaskami la atap a toro,

ngem insuronakam nga agtulnog.

Yawidnakami iti dagami;

sisasaganakami nga agsubli kenka ngaApoa Diosmi.

19 Naglikudandaka ngem iti saan a mabayag,

kayatmi met la ti agsubli kenka.

Kalpasan ti panangdusam kadakami,

dinandanogmi ti barukongmi

a mangipakita iti panagbabawimi.

Nalalais ken naibabainkami,

ta nagbasolkami idi agtutubokami.’

20 “Israel, napategka nga anakko,

anakko a dungdungoek unay.

Tunggal baliksek ti naganmo,

maragsakanak a makalagip kenka.

Kail-iliwnaka toy pusok; kaasiankanto.

21 Mangikabilkayo iti pagilasinan, markaanyo ti dalan;

birokenyo manen daydi dalan a nagnaanyo.

Agsublikayo, dakayo nga Israelita,

agawidkayo kadagiti il-ili a pinanawanyo.

22 Kasano pay kabayag ti panagsarimadengyo,

dakayo a saan a napudno a tattao?

Pinarsuak ti maysa a baro a banag;

naidumduma a kas iti babai a mangsalaknib iti lalaki.”

Ti Irarang-ay dagiti Tattao ti Dios

23 Kastoy ti kuna ni Yahweh a Mannakabalin-amin a Dios ti Israel, “Inton isublik dagiti tattao iti dagada, kunadanto idiay Juda ken kadagiti il-ilina,

‘Bendisionan koma tiApoti nasantoan a turodti Jerusalem,

ti nasantoan a lugar a pagtaenganna.’

24 Agnaedto dagiti tattao idiay Juda ken iti amin nga il-ilina. Addanto dagiti mannalon ken dagiti agpaspastor agraman arbanda.

25 Pabaroekto ti pigsa dagiti nautoyan ket bussogekto dagiti napakapsutan iti bisin.

26 Iti kasta, kunanto dagiti tattao, ‘Naimas ti turogko ket napigsaak a bimmangon.’

27 “Siak, ni Yahweh, kunak a dumtengen ti tiempo a punnoek ti daga ti Israel ken Juda iti tao ken iti animal.

28 No kasano ti annadko idi a nangparut, nangrebba, nangparmek, nangdadael ken nangrakrak kadakuada, kastanto met ti annadko a mangimula ken mangpadakkel kadakuada.

29 Intonumay dayta a tiempo, saanton a kuna dagiti tattao,

‘Naalsem nga ubas ti kinnan dagiti kapuonan,

ngem dagiti annakda ti naalino.’

30 Nupay kasta, maalinonto ti siasinoman a mangan iti naalsem nga ubas, ket matayto ti tunggal maysa gapu iti basolna met laeng.”

31 Kunani Yahweh, “Dumtengen ti tiempo a mangaramidak iti baro a katulagak kadagiti Israelita ken kadagiti tattao ti Juda.

32 Saanto a kas iti pannakitulagko kadagidi kapuonanda idi iruarko ida idiay Egipto. Uray no arigko iti maysa nga asawa kadakuada, sinalungasingda ti katulaganmi.

33 Intondumteng dayta a tiempo, kastoyto ti pagtutulaganmi kadagiti Israelita: Ikabilkonto ti lintegko iti panunotda ket isuratkonto iti pusoda. Siakto ti Diosda ket isudanto dagiti tattaok.

34 Saantona masapul nga isuroda dagiti kaarruba ken kailianda a mangammo ken ni Yahweh. Ammodakto amin a tattao, natan-ok man wenno nanumo. Pakawanekto dagiti basolda, ket lipatekton dagiti dakes nga inaramidda. Siak, ni Yahweh, ti nagsao iti daytoy.”

35 Ited ni Yahweh ti init a silaw iti aldaw,

iti rabii, pagraniagenna ti bulan ken dagiti bituen.

Kiburenna ti baybay ket agdaranudor dagiti dalluyon;

ni Yahweh a Mannakabalin-amin ti naganna.

36 Inkarina nga agtalinaedto ti Israel iti agnanayon,

santo la mapukaw inton awanen urnos ti sangaparsuaan.

37 Iti aldaw a marukod koma ti langit

ken masukimat dagiti nakaibatayan ti daga,

isunto met ti aldaw a laksidenna dagiti Israelita,

gapu kadagiti amin nga inaramidda.

Daytoy ti sao ni Yahweh.

38 “Dumtengen ti tiempo,” kuna ni Yahweh, “a mabangonto manen ti entero a siudad manipud iti Torre ti Hananel agingga iti lugar a managan iti Ruangan iti Suli.

39 Agtuloy ti beddeng iti laud agingga iti turod ti Gareb ket agsikko iti Goa.

40 Nasantoanto kaniak ti entero a tanap a pakaitaneman dagiti natay ken pagibellengan iti basura. Nasantoanto met ti amin a talon iti surongen ti waig a Kidron agingga iti lugar a managan iti Ruangan ti Kabalio iti daya. Saanton a marakrak wenno madadael daytoy a siudad.”

Gumatang ni Jeremias iti Talon

1 Nagsaokaniak tiApoiti maika-10 a tawen a panagari ni Zedekias idiay Juda. Isu met idi ti maika-18 a tawen a panagari ni Nebucadnesar idiay Babilonia.

2 Iti dayta a tiempo, rarauten ti ari ti Babilonia ti Jerusalem, ket naipupokak iti paraangan ti korte iti palasio ti ari.

3 Pinaibaludnak sadiay ni Ari Zedekias ta pinabasolnak a nangiwarwaragawag a kastoy ti kinuna ni Yahweh, “Yawatko daytoy a siudad iti ari ti Babilonia

4 ket saanto a makalibas ni Ari Zedekias. Mayawatto iti ari ti Babilonia; makitananto iti rupanrupa ket makisaonto kenkuana.

5 Maipanto ni Zedekias idiay Babilonia ket agyanto sadiay agingga a sarungkarak. Uray no makigubat kadagiti taga-Babilonia, saanto nga agballigi. Siak, ni Yahweh, ti nagsao iti daytoy.”

6 Imbaga kaniak tiApo

7 nga umayto ni Hanamel nga anak ni ulitegko a Sallum ket kiddawennanto a gatangek ti talonna idiay Anatot. Adda kalintegak a manggatang ta siak ti kaasitgan a kabagianna.

8 Kas kinuna ni Yahweh, immaynak kinasao ni kasinsinko a Hanamel iti paraangan ti pagguardiaan ket kinunana, “Gatangem ti dagak idiay Anatot iti sakup ti Benjamin. Sika ti kaasitgan a kabagiak. Adda kalintegam a manggatang ken mangtagikua.” Ngarud, daytoy ti nakaammoak a pudno a nagsao kaniak ni Yahweh.

9 Ginatangko ngarud ti talon ni Hanamel ket tinimbangko ti kuarta a pagbayadko. Agpateg iti sangapulo ket pito a bagi ti pirak.

10 Finirmaak ti dokumento. Tinimbreak ken pinasaksiak. Tinimbangko ti kuarta.

11 Innalak dagiti dua a kopia dagiti dokumento ti naglakoan—ti naserraan a kopia a nakailanadan ti tulag ken ti silulukat a kopia.

12 Intedko dagitoy ken ni Baruc nga anak ni Nerias ken apoko ni Maaseyas. Intedko kenkuana iti sango ni Hanamel, dagiti saksi a nagfirma iti dokumento ken dagiti amin a Judio nga agtugtugaw iti paraangan ti korte.

13 Iti imatangda amin, kinunak ken ni Baruc,

14 “Binilinnaka tiApoa Mannakabalin-amin a Dios ti Israel nga alaem dagitoy a dokumento ket idulinmo iti burnay tapno mataginayonda.

15 Kinuna tiApoa Mannakabalin-amin a Dios ti Israel a magatangto manen dagiti balbalay, taltalon ken kaubasan iti daytoy a daga.”

Ti Kararag ni Jeremias

16 Nagkararagak kalpasan ti pannangtedko iti dokumento ti naglakoan ken ni Baruc nga anak ni Nerias. Inkararagko:

17 “ApoDios, pinarsuam ti daga ken ti langit babaen iti dakkel a pannakabalin ken bilegmo. Kabaelam nga aramiden dagiti amin a banag.

18 Impakitam ti di agbalbaliw nga ayatmo kadagiti rinibribu a tattao. Nupay kasta, dusaem dagiti tattao gapu iti basol dagiti ammada. Naindaklan ken nabilegka a Dios.Apoa Mannakabalin-amin ti naganmo.

19 Nainsiriban dagiti planom ket naindaklan dagiti aramidmo. Makitam dagiti aramid dagiti tattao ket gunggonaam ida kas mayannatup iti panagbiag ken aramidda.

20 Idiay Egipto, nagaramidka kadagiti milagro ken kadagiti nakaskasdaaw a banag. Agingga kadagitoy nga aldaw, agar-aramidka pay laeng kadagitoy iti Israel ken kadagiti dadduma a nasion. Iti kasta, ammodakan iti amin a lugar.

21 Babaen kadagiti milagro ken datdatlag a nagbutbutngan dagiti kabusormi, inusarmo ti pannakabalin ken pigsam a nangiruar kadagiti Israelita idiay Egipto.

22 Intedmo kadakuada daytoy nabaknang ken nadam-eg a daga kas inkarim kadagiti kapuonanda.

23 Ngem idi immayda iti daytoy a daga ket tinagikuada, dida nagtulnog kadagiti bilinmo wenno nagbiag a mayannurot kadagiti pannursurom. Awan tinungpalda kadagiti imbilinmo nga aramidenda. Daytoy ti gapuna nga inyegmo kadakuada amin dagitoy a pannakadadael.

24 “Nangbangon dagiti taga-Babilonia kadagiti pangbangenda iti siudad tapno sakupenda. Madaman a rarautenda. Babaen iti gubat, bisin ken angol, matnagto ti siudad iti pannakabalinda. OApo, nganngani matungpalen dagiti amin nga imbagam.

25 Ngem, ApoDios, sika ti nangbilin kaniak a gatangek ti talon iti imatang dagiti saksi uray no dandani sakupenen dagiti taga-Babilonia ti siudad.”

26 Kinuna kaniak tiApo,

27 “Siak ni Yahweh a Dios ti sangkataoan. Kabaelak nga aramiden ti amin a banag.

28 Yawatkodaytoy a siudad ken ni Nebucadnesar nga ari ti Babilonia ken iti armadana ket sakupen

29 ken puorandanto. Padapuendanto agraman dagiti balbalay dagiti tattao a nangpapungtot kaniak. Nagpuor ngamin dagiti tattao iti insenso iti tuktok ti balayda nga agpaay ken ni didiosen a Baal ken nagibukbokda kadagiti inumen a daton kadagiti didiosen.

30 Manipud iti mismo a panangrugi ti pakasaritaanda, pinagpungtotdak dagiti Israelita ken dagiti tattao ti Juda gapu iti dakes nga aramidda.

31 Pinagunget ken pinagpungtotnak daytoy a siudad manipud iti aldaw a pannakabangonna. Inkeddengkon a pukawen,

32 gapu kadagiti amin a dakes nga inaramid dagiti Israelita, dagiti tattao ti Juda, agraman ar-ari ken papanguloda, papadi ken profetada.

33 Naglikudandak, nupay diak nagsardeng a mangisursuro kadakuada. Dida latta mangikaskaso ken dida maisursuro.

34 Inkabildaketdi dagiti kagurak a didiosen iti Templo a nabangon iti naganko ket tinulawanda.

35 Nagbangondakadagiti altar nga agpaay ken ni Baal idiay Tanap ti Hinnom a pangpuoranda kadagiti annakda a daton ken ni didiosen a Moloc. Diak imbilin nga aramidenda daytoy. Di met simrek iti panunotko nga aramidenda daytoy a makarimon a banag a pagbasolan dagiti tattao ti Juda.”

Ikari ni Yahweh ti Namnama

36 Kinuna kaniak ti Apo aDiosti Israel, “Jeremias, imbagamon kadagiti tattao a matnagto daytoy a siudad iti pannakabalin ti ari ti Babilonia. Matnagto gapu iti gubat, bisin ken angol. Ita, denggem pay ti ibagak.

37 Alaekto dagiti tattao manipud kadagiti nasion a nangiwarawaraak idi kadakuada, gapu iti nakaro nga unget ken nabara a pungtotko. Ita, isublikto ida iti daytoy a daga. Pagnaedekto ida ditoy ket awanto ti pakaan-anoanda.

38 Isudanto dagiti tattaok ket siakto ti Diosda.

39 Ikkakto ida iti maymaysa a panggep iti biag: ti panagdayawda kaniak iti amin a tiempo para iti pagimbaganda ken iti pagimbagan dagiti kaputotanda.

40 Makitulagakto kadakuada ket agnanayonto daytoy a tulag: diakto sumardeng nga agaramid iti naimbag kadakuada. Isurokto ida nga agbuteng kaniak iti amin a pusoda tapno saandak a tallikudan.

41 Pagragsakakto ti agaramid kadakuada iti naimbag. Iti amin a puso ken kararuak, pagnaedekto ida iti agnanayon iti daytoy a daga.

42 “Kas iti panangidissuorko iti nakaro a didigra iti daytoy nga ili, kastanto met ti pannangtedko iti amin a naimbag nga inkarik kadakuada.

43 Ibagbaga dagiti tattao nga agbalinto a kasla let-ang daytoy a daga, nga awanto ti tao wenno animal nga agnaed ket maitedto ti daga kadagiti tattao ti Babilonia. Ngem magatangto manen dagiti talon iti daytoy a daga.

44 Gatangento dagitoy dagiti tattao. Mafirmaan, matimbrean ken mapatalgedanto dagiti dokumento. Maaramidto daytoy iti sakup ni Benjamin, kadagiti kabangibang a barrio ti Jerusalem, kadagiti il-ili ti Juda, kadagiti il-ili dagiti bantay, kadagiti il-ili nga adda iti arisadsad ti turturod ken iti abagatan a Juda. Isublikto dagiti tattao iti dagada. Siak, ni Yahweh, ti nagsao iti daytoy.”

Maikari manen ti Namnama

1 Idi sipupupokak pay laeng iti paraangan ti pagguardiaan, dimteng manen kaniak ti mensahe tiApo.

2 Nagsao kaniak ti Apo a nangbukel ken nangipasdek iti daga. Yahweh ti naganna. Kinunana:

3 “Awagannak ket sungbatankanto. Ibagakto kenka dagiti nakaskasdaaw ken naindaklan a banag a saanmo pay nga ammo.

4-5 Siak, ni Yahweh a Dios ti Israel, kunak a marakrakto dagiti balbalay iti Jerusalem ken ti palasio ti ari ti Juda, tapno mausarda iti iraraut dagiti taga-Babilonia. Addanto dagiti sumaranget kadakuada ket mapusekto ti siudad kadagiti bangkay dagiti tattao a papatayek gapu iti unget ken pungtotko. Binaybay-ak daytoy a siudad gapu kadagiti dakes nga aramid dagiti tattaona.

6 Ngem agasakto daytoy a siudad ken dagiti tattaona ket nasalun-atdanto manen. Iparangarangkonto kadakuada ti nabuslon a kappia ken kinatalged.

7 Parang-ayekto ti Juda ken ti Israel. Isublikto ida iti sigud a kasasaadda.

8 Dalusakto ida kadagiti biddutda. Pakawanekto dagiti basbasolda ken ti panagsukirda kaniak.

9 Pagtangsitkonton ti Jerusalem ket isunton ti gubbuayan ti ragsak ken dayawko. Agbuteng ken agkintayegto dagiti amin a nasion ditoy daga a makadamag kadagiti imbag nga ipaayko kadagiti tattao ti Jerusalem ken ti rang-ay nga yegko iti siudad.”

10 Kinuna tiApo, “Kunkuna dagiti tattao a kasla let-ang daytoy a disso. Awan tao wenno animal nga agnaed. Ket pudno ti ibagbagada. Awan tao ita kadagiti ili iti Juda wenno kadagiti kalsada iti Jerusalem. Awan tao wenno animal nga agnaed sadiay. Ngem kadagitoy a lugar, mangngegyonto manen dagiti ariwawa

11 tiragsak ken rag-o, ken dagiti naragsak a parambak ti kasar. Mangngegyonto ti kanta dagiti tattao a mangyeg iti Templok kadagiti datonda a pagyaman. Kunadanto,

‘Agyamankayo itiApoa Mannakabalin-amin,

agsipud ta isu naimbag,

ket agnanayon ti ayatna.’

Parang-ayekto daytoy a daga. Isublikto ti sigud a kasasaadna. Siak, ni Yahweh, ti nagsao iti daytoy.”

12 Kinuna tiApoa Mannakabalin-amin, “Iti daytoy a daga a mayarig iti let-ang ken awan tao wenno animal nga agnaed, addanto manen pagpaaraban dagiti agpaspastor kadagiti karneroda.

13 Kadagiti ili iti katurturodan, kadagiti arisadsad dagiti turturod ken iti abagatan a Juda, iti sakup ti Benjamin, kadagiti barrio iti kabangibang ti Jerusalem, ken kadagiti il-ili ti Juda, bilangento manen dagiti agpaspastor dagiti karneroda. Siak, ni Yahweh, ti nagsao iti daytoy.”

14 KinunatiApo, “Dumtengen ti tiempo a panangtungpalko iti karik kadagiti Israelita ken kadagiti Judio.

15 Iti dayta a tiempo, mangpiliakto iti agbalin nga ari nga agtaud iti kaputotan ni David. Aramidento dayta nga ari ti naimbag ken nalinteg iti entero a daga.

16 Inton dumteng dayta a tiempo, maispalto dagiti tattao ti Juda ket agbiagto a sitatalged dagiti umili iti Jerusalem. Daytoyto ti ipanaganda iti nasion ken siudadda, ‘Insalakannatayo tiApo.’

17 Siak,ni Yahweh, ikarik nga addanto latta kaputotan ni David nga agari iti Israel.

18 Addantolatta padi nga agtaud iti tribu ni Levi nga agserbi kaniak ken mangidatag kadagiti daton a mapuoran, kadagiti daton a makan ken kadagiti sakrifisio.”

19 Kinuna tiApokaniak,

20 “Nakitulagak iti aldaw ken rabii tapno agparangda a kanayon iti naikeddeng a tiempoda. Saan a masalungasing dayta a katulagan.

21 Kasta met a nakitulagak ken ni David nga adipenko nga addanto latta kaputotanna nga agbalin nga ari. Nakitulagak met kadagiti papadi iti kaputotan ni Levi nga agserbidanto a kanayon kaniak. Saan a mawaswas dagitoy a katulagan.

22 Paaduekto dagiti kaputotan ni David nga adipenko ken ti bilang dagiti papadi iti tribu ni Levi nga agserbi kaniak. Narigatto a bilangen ti kaaduda a kas iti karigat ti panangbilang kadagiti bituen wenno kadagiti darat iti igid ti baybay.”

23 Kinuna kaniak tiApo,

24 “Saanmo aya a nadlaw ti kunkuna dagiti tattao a linaksidko ti Israel ken Juda dagiti dua a familia a pinilik? Iti kasta, lalaisenda dagiti tattaok ken saandan nga ibilang ida a nasion.

25 Ngem siak, ni Yahweh, kas iti panangituyangko ti aldaw ken rabii, dagiti annuroten ti daga ken ti tangatang,

26 kastanto met ti panangtungpalko iti nakitulagak kadagiti kaputotan ni Jacob ken ni David nga adipenko. Pumiliakto iti maysa a kaputotan ni David a mangituray kadagiti kaputotan ni Abraham, ni Isaac ken ni Jacob. Kaasiakto dagiti tattaok ket parang-ayekto manen ida.”

Ti Mensahe a maipaay ken ni Zedekias

1 Nagsaokaniak tiApoidi madama ti panangraut ni Nebucadnesar nga ari ti Babilonia iti Jerusalem ken dagiti kabangibangna nga il-ili. Inkuyog ni Nebucadnesar ti armadana, kasta met dagiti armada dagiti nasion ken dagiti tattao nga iturayanna.

2 Kinuna kaniak ti Apo aDiosti Israel nga ibagak daytoy ken ni Ari Zedekias ti Juda, “Siak, ni Yahweh, yawatkonto daytoy a siudad iti ari ti Babilonia ket puorannanto.

3 Dikanto makalisi. Matiliw ken mayawatkanto kenkuana. Makitamto iti rupanrupa ket makasaomto a personal sakanto mapan idiay Babilonia.

4 Denggem, Ari Zedekias, ti ibaga ni Yahweh kenka. Saankanto a matay iti kampilan.

5 Natalnanto ti ipapataymo. Kas iti panangpuor dagiti tattao iti insenso idi itanemda dagidi ammam a nagari nga immun-una ngem sika, kastanto met ti panangpuorda iti insenso a maipaay kenka. Dung-awandakanto a kunkunada, ‘Natayen ti arimi!’ Siak, ni Yahweh, ti nagsao iti daytoy.”

6 Imbagak amin dagitoy ken ni Ari Zedekias idiay Jerusalem

7 idi rarauten ti ari ti Babilonia ti siudad. Gubgubaten pay ti armadana ti Laquis ken Azeka, dagiti kakaisuna a nabati a nasarikedkedan a siudad ti Juda.

Dagiti Tagabu nga Israelita

8 Adda katulagan idi nga inaramid ni Ari Zedekias kadagiti taga-Jerusalem a wayawayaanda

9 dagiti tagabuda. Nagnunumoan amin a tattao ken dagiti panguloda a wayawayaanda dagiti tagabuda a Hebreo, lalaki man wenno babai, tapno awan ti siasinoman nga adda tagabuna a padana nga Israelita.

10 Nagnunumoan amin dagiti tattao ken dagiti panguloda a wayawayaanda dagiti tagabuda. Pudno a winayawayaanda dagiti tagabuda,

11 ngem iti saan a nabayag, nagbaliw ti panunotda. Innalada dagiti tagabuda ket pinilitda a tinagabu manen ida.

12 Isut’ gapuna a kinuna tiApo

13 a Dios ti Israel nga ibagak kadagiti tattao, “Nakitulagak kadagidi kapuonanyo idi iruarko ida idiay Egipto a nakatagabuanda. Imbagak kadakuada

14 akada pito a tawen, wayawayaanda ti siasinoman a padada a Hebreo a nagserbi kadakuada iti innem a tawen. Ngem didak impangag wenno inkaskaso dagidi kapuonanyo.

15 Iti saan pay a nabayag, nagbabawikayo ket inaramidyo ti pakaragsakak. Nagnunumoanyo amin a wayawayaan dagiti padayo a Hebreo ket nagtutulagkayo iti imatangko iti uneg ti Templo a nabangon a pagdaydayawan iti naganko.

16 Ngem nagbabawikayo manen ket imbabaindak. Dakay amin, innalayo met laeng dagiti tagabu a winayawayaanyo ket pinilityo a tinagabu manen ida.

17 Iti kasta, siak, ni Yahweh, kunak kadakayo a saandak a tinungpal. Saanyo a winayawayaan dagiti padayo a Hebreo. Ala ngarud, ikkankayo iti wayawayayo; wayawaya a matay iti gubat, angol ken bisin. Pagbutngekto amin a nasion iti lubong gapu iti aramidko kadakayo.

18-19 Nakitulag kaniak dagiti pangulo ti Juda ken ti Jerusalem agraman dagiti ofisiales ti palasio, dagiti papadi ken dagiti amin a tattao iti daytoy a daga babaen ti pannagnada iti nagbaetan ti dua a kagudua ti toro a baka a pinagguduada. Ngem sinalungasingda ti nagtutulaganmi ket saanda a tinungpal dagiti alagadenna. Iti kasta, aramidekto kadagitoy a tattao ti kas iti inaramidda iti toro.

20 Yawatkonto ida kadagiti kabusorda, kadagiti agpanggep a mangpapatay kadakuada. Kanento dagiti tumatayab ken animal dagiti bangkayda.

21 Yawatkonto met ni Zedekias ken dagiti ofisialesna kadagiti kabusorda nga agpanggep a mangpatay kadakuada. Yawatkonto ida iti armada ti Babilonia a nagsardengen a manggubgubat kadakayo.

22 Ibilinkonto nga agsublida iti daytoy a siudad. Rauten, parmeken ken puorandanto. Pagbalinekto a kas iti let-ang dagiti il-ili ti Juda nga awan ti agnaed. Siak, ni Yahweh, ti nagsao iti daytoy.”

Ni Jeremias ken dagiti Recabita

1 Idia ni Jehoyakim nga anak ni Josias ti ari idiay Juda, kinuna tiApokaniak,

2 “Inka kasarita ti kapuonan dagiti Recabita. Kalpasanna, ipanmo ida iti maysa a kuarto ti Templo ket ikkam ida iti arak.”

3 Iti kasta, innalak ti amin a kameng dagiti Recabita—ni Jaazanias (nga anak ti sabali a Jeremias ken apoko ni Habasinias) ken amin a kakabsat ken annakna a lallaki.

4 Impanko ida iti Templo, iti kuarto dagiti annak ni Hanan nga anak ni Igdalias. Asideg daytoy iti kuarto dagiti ofisiales ket adda iti ngatoen ti kuarto ni Maaseyas nga anak ni Sallum. Maysa kadagiti kangatoan nga ofisial iti Templo ni Maaseyas.

5 Pinasangoak dagiti Recabita kadagiti baso ken harra a napno iti arak, ket imbagak nga uminumda.

6 Ngem insungbatda, “Saankami nga umin-inum iti arak. Ngamin, binilinnakami daydi Jonadab nga anak ni Recab a nagtaudanmi a pulos a dikam uminum iti arak, uray pay dagiti annakmi.

7 Imbilinna pay a saankami nga agbalay, wenno agtalon, agmula wenno gumatang iti kaubasan. Imbilinna nga agnaedkami iti tolda iti unos ti panagbiagmi tapno agbayagkami iti daga a pagnaedanmi a kas ganggannaet.

8 Tinungtungpalmi amin nga imbilin ni Jonadab. Pulos a dikami umin-inum iti arak, uray pay dagiti assawa ken annakmi.

9 Saankami nga agbangon iti balay ket awan ti kaubasan, talon wenno bin-imi.

10 Agnaedkami kadagiti tolda. Napasnekkami a nangtungpal iti amin a bilin ni amami a Jonadab.

11 Ngem idi rinaut ni Nebucadnesar nga ari ti Babilonia daytoy a daga, inkeddengmi ti umay agnaed ditoy Jerusalem tapno mapanawanmi ti armada ti Babilonia ken ti Siria. Daytoy ti gapuna nga agnaedkami ditoy Jerusalem.”

12-13 Kalpasanna, imbaga tiApoa Mannakabalin-amin a Dios ti Israel nga innak ibaga daytoy kadagiti tattao ti Juda ken Jerusalem: “Siak, ni Yahweh, saludsodek no apay a saandak nga impangag ken saanyo a tinungpal ti pannursurok.

14 Nagtulnog dagiti kaputotan ni Jonadab iti imbilinna a saanda nga uminum iti arak. Agpapan ita, awan kadakuada ti uminum iti arak. Saanko nga insardeng ti panagsaok kadakayo ngem saandak a tinungpal.

15 Saanko nga insardeng ti panangibaonko kadagiti adipenko a profeta. Imbagbagada kadakayo nga isardengyo ti dakes nga aramidyo ket agaramidkayo iti naimbag. Binallaagandakayo a saankayo nga agdaydayaw ken agserserbi kadagiti sabali a dios tapno agtultuloy ti panagnaedyo iti daga nga intedko kadagidi kapuonanyo. Ngem saandak nga impangag wenno inkaskaso.

16 Tinungpal dagiti kaputotan ni Jonadab dagiti bilbilin ti amada, ngem dakayo saandak a tinungpal.

17 Iti kasta, siak, ni Yahweh a Mannakabalin-amin a Dios ti Israel, idissuorkonto kadakayo a tattao ti Juda ken ti Jerusalem dagiti amin nga inkarik a pannakadadael. Aramidekto daytoy agsipud ta didak impangag ken didak sinungbatan idi inawagankayo.”

18 Ket imbagak kadagiti kaputotan ni Recab ti sao ni Yahweh a Mannakabalin-amin a Dios ti Israel, “Tinungpalyo ti bilin kadakayo ni Jonadab a kapuonanyo. Sinurotyo dagiti amin a pannursurona ket inaramidyo dagiti amin nga imbilinna kadakayo.

19 Iti kasta, siak, ni Yahweh a Mannakabalin-amin a Dios ti Israel, ikarik nga addanto latta lalaki nga agserbi kaniak iti kaputotan ni Jonadab nga anak ni Recab.”

Basaen ni Baruc ti Pagbasaan iti Templo

1 Idimaikapat a tawen a panagari ni Jehoyakim nga anak ni Josias idiay Juda, kinuna kaniak tiApo,

2 “Mangalaka iti pagsuratan ket isuratmo amin nga imbagak kenka a maibusor iti Israel, iti Juda ken kadagiti amin a nasion. Isuratmo amin nga imbagak kenka manipud idi damo a pannakisaok kenka, idi ni Josias ti ari, agingga ita.

3 Nalabit nga inton mangngeg dagiti tattao ti Juda dagiti amin a didigra a pinanggepko nga idissuor kadakuada, agbalbaliwda ket ikkatenda dagiti amin a dakes a kababalinda. Iti kasta, pakawanekto ti kinadakes ken basolda.”

4 Inayabak ngarud ni Baruc nga anak ni Nerias. Indiktarko kenkuana dagiti amin nga imbaga tiApokaniak, ket insuratna amin ida iti pagsuratan.

5 Kalpasanna, imbilinko kenkuana, “Saanakon a mapalubosan a sumrek iti Templo.

6 Ngem kayatko a mapanka sadiay inton sumaruno a panagayunar dagiti tattao ket ipigsam a basaen daytoy nalukot a pagbasaan a nangisuratam iti indiktarko kenka tapno mangngegda dagiti amin nga imbaga tiApokaniak. Aramidem daytoy iti lugar a mangngeg dagiti amin a tattao agraman dagiti taga-Juda a naggapu kadagiti il-ilida.

7 Mabalin nga agkararagdanto itiApoket idiandanton dagiti dakes nga aramidda, ta no saan agdissuor kadakuada ti napalalo a pungtot ken ungetna.”

8 Imbasa ni Baruc idiay Templo dagiti amin nga imbaga tiApokas imbilinko nga aramidenna.

9 Iti maikasiam a bulan ti maikalima a tawen a panagari idiay Juda ni Jehoyakim nga anak ni Josias, nagayunar dagiti tattao tapno magun-odda ti parabur ni Yahweh. Inaramid daytoy dagiti amin nga agnaed idiay Jerusalem ken amin a naggapu kadagiti il-ili ti Juda.

10 Kalpasanna, binasa ni Baruc ti nalukot a pagbasaan a nakailanadan iti amin nga insaok. Dumdumngeg dagiti tattao bayat ti panagbasana. Inaramidna daytoy iti Templo, iti kuarto ni Gemarias nga anak ni Safan a mammagbaga iti ari. Adda ti kuartona iti akingngato a tukad iti serkan ti Baro a Ruangan ti Templo.

Maibasa ti Nalukot a Pagbasaan kadagiti Ofisiales

11 Nangngeg ni Mikaias nga anak ni Gemarias ken apoko ni Safan ti panangbasa ni Baruc iti sao ni Yahweh a nailanad iti nalukot a pagbasaan.

12 Napan iti palasio ket simrek iti kuarto ti mammagbaga iti ari nga ayan dagiti ofisiales a madama nga agmimiting. Adda sadiay ni Elisama a mammagbaga iti ari, ni Delaias nga anak ni Semaias, ni Elnatan nga anak ni Acbor, ni Gemarias nga anak ni Safan, ni Zedekias nga anak ni Hananias ken dagiti amin nga ofisiales.

13 Impakaammo ni Mikaias dagiti amin a nangngegna nga imbasa ni Baruc kadagiti tattao.

14 Iti kasta, imbaon dagiti ofisiales ni Jehudi a mangibaga ken ni Baruc nga ipanna kadagiti ofisiales ti pagbasaan a binasana kadagiti tattao. (Ni Jehudi ti anak ni Netanias ken apoko ni Selemias, ken apoko ni Cusi iti tumeng.) Impan ni Baruc ti pagbasaan kadakuada.

15 “Agtugawka,” kinunada, “ket ibasam kadakami.”

Binasa ni Baruc ti nalukot a pagbasaan.

16 Kalpasan ti panangbasana, nagkikinnitada a sidadanag ket kinunada ken ni Baruc, “Masapul nga ibagami daytoy iti ari.”

17 Sinaludsodda kenkuana, “Ibagam man kadakami no kasano ti panangisuratmo kadagitoy. Indiktar kadi ni Jeremias kenka?”

18 “Wen,” insungbat ni Baruc. “Indiktar ni Jeremias ti amin nga insuratko iti daytoy a pagbasaan.”

19 Imbagada kenkuana, “Masapul nga aglemmengkayo, sika ken ni Jeremias, ket diyo ibaga iti siasinoman no sadino ti paglemmenganyo.”

Puoran ti Ari ti Nalukot a Pagbasaan

20 Inkabil dagiti ofisiales ti nalukot a pagbasaan iti kuarto ni Elisama a mammagbaga sada napan iti paraangan ti palasio ket imbagada amin iti ari.

21 Pinaala ti ari ti nalukot a pagbasaan ken ni Jehudi iti kuarto ni Elisama. Imbasa ni Jehudi iti ari ken kadagiti amin nga ofisiales nga agtatakder iti lawlawna.

22 Tiempo ti lam-ek idi ket agtugtugaw ti ari iti asideg ti paginudoan iti palasio a pagnanaedanna iti tiempo ti lam-ek.

23 Kada mabasa ni Jehudi ti tallo wenno uppat a binnatog, ragasen ti ari ti nabasa babaen iti bassit nga imuko sana ipurruak iti apuy ti paginudoan. Kasta a kasta ti naaramid agingga a napuoran ti entero a pagbasaan.

24 Ngem saan latta a nagbuteng wenno nagbabawi ti ari ken dagiti ofisialesna a nakangngeg iti amin a naibasa.

25 Nupay nagpakpakaasi da Elnatan, Delaias ken Gemarias a saanna a puoran ti pagbasaan, dina inkaskaso ida.

26 Kalpasanna, binilin ti ari ni prinsipe Jerameel, agraman ni Seraias nga anak ni Azriel, ken ni Selemias nga anak ni Abdeel a tiliwendakami ken ni Baruc a sekretariok. Ngem inlemmengnakami tiApo.

Mangsurat ni Jeremias iti Sabali a Nalukot a Pagbasaan

27 Kalpasan ti panangpuor ni Ari Jehoyakim iti nakaisuratan ti indiktarko ken ni Baruc, imbaga tiApokaniak

28 a mangalaak iti sabali a pagsuratan. Imbagana nga isuratko dagiti amin a nailanad iti umuna a pagbasaan.

29 Imbilinna nga ibagak iti ari, “Pinuoram ti pagbasaan. Sinaludsodmo ken ni Jeremias no apay nga insuratna nga umay ti ari ti Babilonia ket dadaelenna daytoy a daga ken papatayenna dagiti tattao ken animal.

30 Siak, ni Yahweh, kunak kenka, Ari Jehoyakim, nga awanto kadagiti kaputotam ti agari. Maipurruakto ti bangkaymo iti lugar a mainitan iti aldaw ken malinnaawan iti rabii.

31 Dusaenkanto ken dagiti kaputotam agraman dagiti ofisialesmo gapu kadagiti basolyo. Awan kadakayo kasta met kadagiti taga-Jerusalem ken taga-Juda, ti nangipangag kadagiti ballaagko kadakayo. Iti kasta, idissuorkonto kadakayo ti amin a didigra nga imbagak a mapasamakyonto.”

32 Nangalaak iti sabali a nalukot a pagbasaan. Intedko ken ni Baruc a sekretariok ket insuratna ti amin nga imbagak. Insuratna dagiti amin a nailanad iti umuna a nalukot a pagbasaan ken amin nga umasping a mensahe nga indiktarko.

Ti Dawat ni Zedekias ken ni Jeremias

1 Insaadni Nebucadnesar nga ari ti Babilonia ni Zedekias nga anak ni Josias a kas sukat ni Jeconias nga anak ni Jehoyakim a kas ari ti Juda.

2 Ngem saan nga impangag ni Zedekias wenno dagiti ofisiales wenno dagiti tattao ti mensahe nga imbaga kaniak ni Yahweh.

3 Imbaon ni Ari Zedekias ni Jehucal nga anak ni Selemias ken ni Sofonias a padi nga anak ni Maaseyas, nga umay kaniak ket kiniddawda nga agkararagak ken ni Yahweh a Diosmi para iti pagilianmi.

4 Diak pay naibalud idi ket nawayaak pay laeng a makilangen kadagiti tattao.

5 Madama idi ti panangdarup ti armada ti Babilonia iti Jerusalem ngem nagsanudda idi maammoanda a rimmuar ti armada ti Faraon idiay Egipto.

6 Kinuna ti Apo aDiosti Israel

7 nga ibagak ken ni Zedekias, “Adda iti dalan ti armada ti Egipto nga umay tumulong kenka ngem agawidto met laeng.

8 Agsublinto met dagiti taga-Babilonia. Rautendanto ti siudad. Parmeken ken puorandanto.

9 Siak, ni Yahweh, ballaaganka. Dimo allilawen ta bagim. Dimo ipagarup a saanen nga agsubli dagiti taga-Babilonia, ta umaydanto nga umay.

10 Uray no maparmekyo ti entero nga armada ti Babilonia a mangdarup kadakayo, ket dagitinto la nasugatan nga agid-idda kadagiti toldada ti matda, isudanto ti mangparmek iti daytoy a siudad ket puoranda agingga a dumapu.”

Matiliw ken Maibalud ni Jeremias

11 Gapu ta dumtengen ti armada ti Egipto, nagsanud ti armada dagiti taga-Babilonia manipud Jerusalem.

12 Ngarud, nagrubbuatak a rummuar idiay Jerusalem tapno innak iti sakup ti Benjamin ket alaek ti pannakabingayko iti sanikua ti familiami sadiay.

13 Ngem idi makadanonak iti Ruangan ti Benjamin, pinasardengnak ti ofisial dagiti soldado nga agbambantay sadiay. Isu ni Irijas nga anak ni Selemias ken apoko ni Hananias. Kinunana, “Tumiponka gayam kadagiti taga-Babilonia!”

14 “Saan!” insungbatko. “Saanak a tumipon kadakuada.”

Ngem dinak impangag ni Irijas. Tiniliwnak sanak indatag kadagiti ofisiales.

15 Nakapungtotda kaniak ket pinakabkabildak; kalpasanna, pinaipupokdak iti balay ni Jonatan a mammagbaga iti ari. Pinagbalinda a pagbaludan ti balayna.

16 Naipanak iti pagbaludan iti uneg ti daga ket nabayag a naipupokak sadiay.

17 Pinaayabannak ni Zedekias ket idi addaakon iti palasio, nagsaritakami a dudua. “Adda kadi ibaga tiApo?” sinaludsodna.

“Adda,” insungbatko. “Mayawatkanto iti pannakabalin ti ari ti Babilonia.”

18 Sinaludsodko, “Apay a pinaibaludnak? Ania aya ti basolko kenka wenno kadagiti ofisialesmo wenno kadagiti tattao?

19 Sadino ti ayan dagiti profetam a nagkuna a saan nga umay dagiti taga-Babilonia tapno darupendaka wenno daytoy a daga?

20 Ita, agdawatak kenka, Natan-ok nga Ari. Patgam koma ti dawatko. Saannak a paisublin iti balay ni Jonatan. No isublinak matayak la ketdi sadiay.”

21 Iti kasta, pinaipupoknak ni Zedekias iti paraangan ti pagguardiaan. Nagyanak sadiay, ket inaldaw a naikkanak iti tinapay no la ketdi adda tinapay idi kadagiti panaderia.

Maipisok ni Jeremias iti Bubon

1 Nangngeg da Sefatias nga anak ni Matan, Gedalias nga anak ni Pasur, Jehucal nga anak ni Selemias ken Pasur nga anak ni Malkias nga ibagbagak kadagiti tattao

2 ti kinuna tiApo, “Matayto iti gubat wenno bisin wenno angol ti siasinoman a di pumanaw iti siudad. Ngem saanto a mapapatay ti siasinoman a rummuar ken sumuko kadagiti taga-Babilonia. Makalisi ket agbiagto.”

3 Imbagak pay kadakuada a kinuna tiApo, “Yawatkonto ti siudad iti armada ti ari ti Babilonia ket parmekennanto.”

4 Napan ngarud dagiti ofisiales iti ari, ket kinunada kenkuana, “Masapul a mapapatay daytoy a tao. Gapu iti sasawenna, tumakrot dagiti soldado ken dagiti amin a tattao a nabati iti siudad. Saanna a tulongan dagiti tattao no di ket butbutngenna ida.”

5 Kinuna ni Ari Zedekias, “Ala, ipalubosko kadakayo nga aramidenyo kenkuana ti kaykayatyo.”

6 Innaladak ngarud, pinarautandak iti tali sadak impababa iti bubon ni Prinsipe Malkias, iti paraangan ti palasio. Awan danum ti bubon. Pitak la ti adda ket nain-inut a nailumlomak.

7 Ngem nadamag ni Ebedmelec, maysa nga eunoko a taga-Etiopia nga agtartrabaho iti palasio, nga impisokdak iti bubon. Iti dayta nga oras, adda ti ari nga agtugtugaw a kas ukom iti paraangan ti Ruangan ti Benjamin.

8 Napan sadiay ni Ebedmelec ket kinunana,

9 “Natan-ok nga Ari, dakes ti inaramid dagitoy a lallaki. Impisokda ni Jeremias iti bubon. Matay la ketdi a matay sadiay iti bisin. Awanen ti makan iti siudad.”

10 Binilin ti ari ni Ebedmelec a mangala iti tallo a lallaki nga adda sadiay tapno aonendak iti bubon sakbay a matayak.

11 Nangayab ni Ebedmelec kadagiti lallaki sa napan iti kuarto a pagidulinan iti palasio ket nangala kadagiti rutrot a lupot. Siningdananna dagiti lupot iti tali ket impauyaoyna kaniak.

12 Imbaga ni Ebedmelec nga ikabilko dagiti lupot iti kilikilik tapno diak madunor iti tali. Inaramidko daytoy,

13 ket ginuyoddak agingga a nayaondak iti bubon. Naipanak iti paraangan ti pangukoman a nagyanak manipud idin.

Makiuman ni Zedekias ken ni Jeremias

14 Iti maysa nga aldaw, pinaalanak ni Ari Zedekias ket naidatagak kenkuana iti maikatlo a ruangan ti Templo. Kinunana kaniak, “Adda man saludsodek kenka. Dawatek nga awan ti ilimedmo kaniak.”

15 Kinunak, “No ibagak kenka ti pudno, awan duadua a papapataynak. Ket no bagbagaanka, dinak met la ipangag.”

16 Imbaga kaniak ni Zedekias iti nalimed, “Ikarik iti Dios a nangted iti biagtayo a dikanto papapatay wenno yawat kadagiti agpanggep a mangpapatay kenka.”

17 Imbagak ngarud ken ni Zedekias a daytoy ti kinuna tiApoa Mannakabalin-amin a Dios ti Israel: “No sumukoka kadagiti ofisiales ti ari ti Babilonia, maispalto ti biagmo ket saanto a mapuoran daytoy a siudad. Agbiagkanto agraman ti familiam.

18 Ngem no saanka a sumuko, parmekento dagiti taga-Babilonia daytoy a siudad ket puorandanto. Saankanto a makalisi.”

19 “Kabutengko dagiti Judio a kimmappon kadagiti taga-Babilonia,” insungbat ni Ari Zedekias, “amangan no isuda ti pakayawatak ket parigatendak.”

20 “Saankanto a mayawat kadakuada,” kinunak. “Dawatek a tungpalem ti imbaga kenka tiApotapno saankanto a maan-ano ket maispal ti biagmo.

21 Ngem impakita tiApoiti sirmata ti mapasamakto kenka no dika sumuko.

22 Kitaem! Mairuar dagiti amin a babbai a nabati iti palasio ti Juda ket maipanda kadagiti ofisiales ti ari ti Babilonia. Denggem ti kunkunada bayat ti pannakaipanda,

‘Ti ari inyaw-awan dagiti nasinged a gagayyemna,

ket saanda a binigbig ti turayna.

Itan ta nailumlom dagiti sakana iti pitak,

binaybay-anen dagiti gagayyemna.’”

23 Innayonko, “Maipanto dagiti amin nga assawayo ken amin nga annakyo idiay Babilonia. Uray sika, dikanto makalisi. Alaennakanto a kas balud ti ari ti Babilonia. Mapuoranto daytoy a siudad agingga a maikisap.”

24 Kinuna ni Zedekias, “Awan pangibagbagaam iti nagsaritaanta tapno saanka a madaksan.

25 No maammoan dagiti ofisiales a nakisaritaak kenka, umaydanto saludsoden ti nagsaritaanta. Ikaridanto kenka a saandaka a patayen no ibagam amin kadakuada.

26 Ngem ibagam kadakuada a nagpakpakaasika kaniak a saanka a paip-ipan iti balay ni Jonatan tapno sadiay ti pakatayam.”

27 Immay dagiti amin nga ofisiales ket nagsaludsodandak. Imbagak kadakuada ti amin nga imbilin ti ari a sawek. Awan ti naaramidda agsipud ta awan ti nakangngeg iti nagsaritaanmi.

28 Itikasta, naipupokak iti paraangan ti pangukoman agingga a naparmek ti Jerusalem.

Maparmek ti Jerusalem

1 Iti maika-10 a bulan iti maikasiam a tawen a panagari ni Zedekias idiay Juda, dinarup ni Nebucadnesar nga ari ti Babilonia ti Jerusalem. Inkuyogna ti entero nga armadana.

2 Iti maikasiam nga aldaw iti maikapat a bulan ti maika-11 a tawen a panagari ni Zedekias, sinerrekda ti bakud ti Jerusalem.

(

3 Idi naparmekti Jerusalem, napan dagiti amin nga ofisiales ti ari ti Babilonia iti lugarda iti Nagtengnga a Ruangan. Kimmuyog kadakuada da Nergal-sarezer, Samgar Nebo, Sarsekim ken sabali pay a Nergal-sarezer.)

4 Idi makita ni Ari Zedekias ken dagiti amin a soldadona ti mapaspasamak, pinadasda ti aglibas iti rabii manipud iti siudad. Nagnada iti hardin ti palasio iti dalan iti nagbaetan ti dua a bakud. Nagturongda iti Tanap ti Jordan.

5 Ngem kinamat ida ti armada dagiti taga-Babilonia ket tiniliwda ni Zedekias iti tanap iti asideg ti Jerico. Impanda ti ari ken ni Ari Nebucadnesar nga adda iti ili a Ribla iti sakup ti Hamat. Sadiay ti nangsentensiaan ti ari ken ni Zedekias.

6 Idiay Ribla, pinatay ti ari ti Babilonia dagiti lallaki nga annak ni Zedekias iti sangoananna ti amada. Pinapatayna pay dagiti ofisiales ti Juda.

7 Pinasuatna dagiti mata ni Zedekias. Pinakawaranna ni Zedekias sana pinaipan idiay Babilonia.

8 Pinuoran met dagiti taga-Babilonia ti palasio ken dagiti balay dagiti tattao sada rinebba dagiti bakud ti Jerusalem.

9 Kamaudiananna, innala ni Nebuzaradan a kapitan dagiti guardia dagiti tattao a nabati iti siudad agraman dagiti kimmappon kenkuana, ket impanna ida a kas balud idiay Babilonia.

10 Imbatina idiay Juda ti sumagmamano kadagiti kapanglawan a tattao nga awan sanikuana, ket inikkanna ida iti kaubasan ken taltalon.

Mawayawayaan ni Jeremias

11 Ngem binilin ni Ari Nebucadnesar ni Nebuzaradan a kapitan dagiti guardia:

12 “Birokem ni Jeremias ket taripatoem a naimbag. Dimo rangranggasan ket itedmo ti aniaman a kayatna.”

13 Iti kasta, nagibaon ni Nebuzaradan ken ni Nebusasban a nangato nga ofisial, ni Nergal-sarezer a maysa pay a nangato nga ofisial, ken ti dadduma pay nga ofisiales ti ari ti Babilonia.

14 Pinaaladak iti paraangan ti pangukoman. Pinaaywanandak ken ni Gedalias nga anak ni Ahikam ken apoko ni Safan tapno isu ti kumita kaniak a makasangpetak nga awan pakaan-anoak. Nakipagnaedak ngarud kadagiti tattao sadiay.

Ikari ni Yahweh a Salaknibanna ni Ebedmelec

15 Idi sipupukokak pay laeng iti paraangan ti pagguardiaan, imbilin tiApo

16 nga ibagak ken ni Ebedmelec a taga-Etiopia a kinuna tiApoa Mannakabalin-amin a Dios ti Israel, “Kas impakaammok idi, yegkonto ti pannakadadael a saan ketdi a panagrang-ay iti daytoy a siudad. Ket inton mapasamak daytoy, addakanto a makaimatang.

17 Ngem siak, ni Yahweh, salaknibankanto ket saankanto a mayawat iti pannakabalin dagiti tattao a kabutbutengmo.

18 Aywanankanto ket saankanto a mapapatay. Makalasatkanto agsipud ta nagtalekka kaniak. Siak, ni Yahweh, ti nangibaga iti daytoy.”

Makipagnaed ni Jeremias ken ni Gedalias

1 Nakisao kaniak tiApokalpasan ti panangwayawaya kaniak ni Nebuzaradan a kapitan dagiti guardia idiay Rama. Sikakawarak idi a naipan sadiay. Kaduak dagiti dadduma a tattao a naggapu idiay Jerusalem ken Juda, isuda a maipan a kas balud idiay Babilonia.

2 Inyadayonak ti kapitan kadagiti tattao ket kinunana, “Impangta tiApoa Diosmo a dadaelennanto daytoy a daga.

3 Ita, tinungpalnan ti imbagana nga aramidenna. Napasamak amin dagitoy agsipud ta nagbasol dagiti tattaom. Saanda a nagtulnog itiApo.

4 Ita, ikkatekon ti kawarmo ket mawayawayaankan. No kayatmo ti sumurot, agkuyogta a mapan idiay Babilonia ket saankanto a baybay-an. Ngem no madika, dika piliten. Nawayaka a pumili iti sadinoman a papanam iti entero a daga. Inka iti kayatmo a papanan.”

5 Idi saanak a simmungbat,kinuna ni Nebuzaradan, “Agsublika ngarud ken ni Gedalias nga anak ni Ahikam ken apoko ni Safan. Isu ti insaad ti ari ti Babilonia a gobernador kadagiti il-ili ti Juda. Agyanka kenkuana ket agnaedka iti ayan dagiti tattao wenno inka iti sadinoman a kayatmo a papanan.” Inikkannak iti sagut ken taraon sanak pinalubosan.

6 Napanak nakipagyan ken ni Gedalias idiay Mizpa, ket nakipagtaengak kadagiti tattao a nabati iti daga ti Juda.

Maisikat ni Gedalias

7 Addasumagmamano kadagiti ofisiales ken soldado ti Juda a saan a simmuko kadagiti taga-Babilonia. Nadamagda nga insaad ti ari ti Babilonia ni Gedalias nga anak ni Ahikam a kas gobernador ti Juda ken mangimaton kadagiti amin a tattao a saan a naipan a kas balud idiay Babilonia. Dagitoy ti kapanglawan kadagiti tattao iti daga.

8 Napanda ngarud idiay Mizpa ket nakiumanda ken ni Gedalias. Nairaman kadakuada ni Ismael nga anak ni Netanias, Johanan nga anak ni Karea, Seraias nga anak ni Tanhumet, dagiti lallaki nga annak ni Efai a Netofatita ken Jezanias a Maacatita, agraman dagiti soldadona.

9 Impatalged ni Gedalias daytoy kadakuada, “Saankayo nga agbutbuteng a sumuko kadagiti taga-Babilonia. Agnaedkayo iti daytoy a daga. Agserbikayo iti ari ti Babilonia ket awanto ti pakaan-anoanyo.

10 Uray siak, agyanakto ditoy Mizpa ket siakto ti mangibagi kadakayo inton umay dagiti taga-Babilonia. Ngem mabalinyo ti agidulin iti arak, bungbunga ken lana ti olibo, ket agnaedkayo kadagiti il-ili a sakupenyo.”

11 Kabayatanna, nadamag dagiti amin a Judio nga adda idiay Moab, Ammon, Edom ken dagiti dadduma a pagilian a pinalubosan ti ari ti Babilonia ti sumagmamano a Judio nga agnaed idiay Juda ket pinaggobernadorna ni Gedalias.

12 Iti kasta, pinanawanda met dagiti luglugar a nakaiwarawaraanda ket nagsublida idiay Juda. Napanda ken ni Gedalias idiay Mizpa ket nagidulinda iti adu nga arak ken bungbunga.

Mapapatay ni Gedalias

13 Kalpasan daytoy, napan idiay Mizpa da Johanan nga anak ni Karea ken dagiti pangulo dagiti mannakigubat a saan a simmuko ken ni Gedalias. Dimmatagda ken ni Gedalias

14 ket kinunada, “Dimo kad ammo nga imbaon ni Baalis nga ari ti Ammon ni Ismael nga anak ni Netanias tapno papatayennaka?”

Ngem saan a namati ni Gedalias.

15 Sililimed a kinuna ni Johanan ken ni Gedalias, “Palubosannak a mapan mangpapatay ken ni Ismael ket awanto ti makaammo no siasino ti nangaramid. Apay a mapalubosan a mangpatay kenka? No matayka, mawarawara dagiti amin a Judio a simmurot kenka ket dumtengto ti didigra kadagiti amin a tattao a nabati iti Juda.”

16 “Dimo ar-aramiden ti kasta!” insungbat ni Gedalias. “Saan nga agpayso ti kunam maipapan ken ni Ismael.”