Category: Jeremias

1 Itimaikapito a bulan iti dayta a tawen, napan sinarungkaran ni Ismael ni Gobernador Gedalias idiay Mizpa. Kaduana ti sangapulo a lallaki. Anak ni Netanias ni Ismael ken apoko ni Elisama a nagtaud iti familia dagiti ari ken kameng ti maysa kadagiti nangato nga ofisiales ti ari.Bayat ti panaglalanglangda amin a mangan,

2 inasut ni Ismael ken dagiti sangapulo a lallaki ti kampilanda ket pinatayda ni Gedalias.

3 Pinatay pay ni Ismael dagiti amin nga Israelita a kadua ni Gedalias idiay Mizpa, kasta met dagiti soldado ti Babilonia a nairana nga adda idi sadiay.

4 Iti sumuno nga aldaw, sakbay a nagwaras ti damag ti pannakapapatay ni Gedalias,

5 simmangpet ti 80 a lallaki a naggapu idiay Sikem, Silo ken Samaria. Sakbay ti ipapanda, nagibarbasda, rinay-abda dagiti pagan-anayda ken sinugsugatda dagiti bagbagida. Nangitugotda kadagiti makan ken insenso nga idatonda iti Templo.

6 Iti kasta, rimmuar ni Ismael idiay Mizpa ket agsangsangit a simmabat kadakuada. “Pangngaasiyo ta umayyo kitaen ni Gedalias,” kinunana.

7 Apaman a nakastrek dagiti 80 a lallaki iti siudad, pinatay ida ni Ismael ken dagiti tattaona sada intappuak dagiti bangkayda iti maysa a bubon.

8 Ngem adda sangapulo a lallaki iti bunggoy a nagkuna ken ni Ismael, “Pangngaasim ta dinakami patayen! Adu ti trigo, sebada, lana ti olibo ken diro nga inlemmengmi iti taltalon.”

Iti kasta, saanna nga inraman a pinapatay ida.

9 Dakkel ti bubon a nangitappuakan ni Ismael kadagiti pinatayna.Daytoy ti bubon a kinali ni Ari Asa idi madama ti panangraut kenkuana ni Baasa nga ari ti Israel. Pinunno ni Ismael ti bubon kadagiti bangkay dagiti pinatayna.

10 Imbalud ni Ismael dagiti babbai nga annak ti ari ken dagiti dadduma a tattao ti Mizpa nga impaaywan ni Nebuzaradan a kapitan dagiti guardia ken ni Gedalias. Impanawna ida a kas balud ket nagturong iti sakup ti Ammon.

11 Nadamag ni Johanan nga anak ni Karea ken dagiti pangulo ti armada ti krimen nga inaramid ni Ismael.

12 Kinamatda ni Ismael ket nakamakamda iti asideg ti dakkel a tangke ti danum idiay Gabaon.

13 Naragsakan dagiti tattao a balud ni Ismael idi makitada ni Johanan ken dagiti pangulo agraman dagiti kaduada.

14 Iti kasta, nagtatarayda amin a timmipon kadakuada,

15 ngem nakalibas ni Ismael ken walo kadagiti tattaona ket napanda idiay Ammon.

16 Inaywanan ni Johanan ken dagiti pangulo ti armada dagiti soldado, dagiti babbai, dagiti ubbing ken dagiti eunoko a balud nga innala ni Ismael idiay Mizpa kalpasan ti panangpatayna ken ni Gedalias.

17-18 Nagbutengda kadagiti taga-Babilonia gapu ta pinapatay ni Ismael ni Gedalias a pinaggobernador ti ari ti Babilonia iti dayta a daga. Ngarud, nagrubbuatda a mapan idiay Egipto tapno malisianda dagiti taga-Babilonia. Iti dalan, nagsardengda idiay Gerut-Kimham iti asideg ti Betlehem tapno aginanada.

Paikararagan dagiti Tattao ken ni Jeremias

1 Kalpasanna, immay kaniak dagiti amin a pangulo dagiti armada agraman ni Johanan nga anak ni Karea, ni Azariasnga anak ni Hosaias ken nadumaduma a tattao, natan-ok ken nanumo.

2 Kinunada kaniak, “Pangngaasim ta ipangagmo ti dawatmi! Ikararagannakami itiApoa Diostayo. Idawdawatannakam amin a natda. Adukami idi, ngem kas makitam, bassitkamin.

3 Idawdawatmo nga ipakaammo koma tiApoa Diostayo ti tumutop a dalan ken rumbeng nga aramidenmi.”

4 “Ala wen,” insungbatko. “Ikarkararagankayto itiApoa Diostayo kas dawatenyo. No aniaman ti kunana, ibagakto kadakayo. Awanto ti ilimedko.”

5 Kinunada kaniak, “TiApoa Diostayo ti agbalin a pudno ken matalek a saksi a maibusor kadakami no dimi tungpalen dagiti amin nga ibagana kenka nga aramidenmi.

6 Naimbag man wenno dakes, agtulnogkamto itiApoa Diostayo a pangibaonanmi kenka. Awanto ti pakaan-anoanmi no agtulnogkami kenkuana.”

Ti Sungbat ni Yahweh iti Kararag ni Jeremias

7 Kalpasan ti sangapulo nga aldaw, nagsao kaniak tiApo,

8 isu nga inayabak ni Johanan nga anak ni Karea, dagiti amin a pangulo dagiti armada a kinakuyogna ken dagiti nadumaduma a tattao, natan-ok ken nanumo.

9 Kinunak kadakuada, “Kastoy ti imbaga tiApoa Dios ti Israel a nangibaonanyo kaniak tapno idatagko ti dawatyo:

10 ‘No kayatyo ti agnaed iti daytoy a daga, parang-ayenkayo ket saankayo a dadaelen. Imulakayto ket saankayo a paruten. Ladingitek unay ti panangdadaelko kadakayo.

11 Saankayon nga agbutbuteng iti ari ti Babilonia. Diyo kabuteng ta aywanankayo. Salaknibankayo ket isalakankayo iti pannakabalinna.

12 Gapu ta manangngaasiak, ipamuspusak ti panangngaasina kadakayo ket palubosannakayto nga agawid. Siak, ni Yahweh, ti nagsao iti daytoy.’

13-15 “Ngem dakayo a natda iti Juda, saankayo nga agsuksukir itiApoa Diosyo ket saankayo nga agsukir nga agnaed iti daytoy a daga. Diyo kunkuna, ‘Dimi kayat ti agnaed ditoy. Kayatmi ti mapan agnaed idiay Egipto. Awan gubgubat sadiay wenno mangayab kadakami a makigubat. Awan bisin.’ Ta no kunayo daytoy, kastoy met ti sao tiApoa Mannakabalin-amin a Dios ti Israel, ‘No ipapilityo ti mapan agnaed idiay Egipto,

16 makamakamnakayto ti gubat a kabutbutengyo. Surotennakayto ti bisin a kaam-amakyo. Mataykayto idiay Egipto.

17 Matayto amin iti gubat wenno bisin wenno angol ti mapan agnaed sadiay. Awanto ti matda. Awanto ti makalisi iti didigra nga idissuorko kadakuada.’

18 “Kuna tiApoa Dios ti Israel, ‘No inkay idiay Egipto, idissuorkonto kadakayo ti unget ken pungtotko a kas iti indissuorko kadagiti taga-Jerusalem. Nakakaasinto ti kasasaadyo. Pagang-angawandakayto dagiti tattao ket pagilunoddanto ti naganyo. Saanyonton a makita daytoy a lugar.’”

19 Intuloyko ti nagsao, “Imbaga tiApokadakayo a natda iti Juda a dikay mapmapan idiay Egipto. Ita nga aldaw, ballaagankayo

20 a nagbiddutkayo. Imbaondak itiApoa Diostayo a nangikararag kadakayo. Imbagayo nga ibagak amin nga aramidenyo ket tungpalenyo.

21 Ita, imbagak aminen kadakayo, ngem diyo tinungpal ti amin a pinaibaga tiApoa Diostayo.

22 Ngarud, laglagipenyo daytoy: mataykayto iti kampilan wenno bisin wenno angol iti daga a kayatyo a pagnaedan.”

Maipan ni Jeremias idiay Egipto

1 Kalpasan ti panangibagak kadagiti tattao ti amin a pinaibaga tiApoa Diosda,

2 nagsao da Azarias nga anak ni Hosaias, Johanan nga anak ni Karea ken amin a natangsit a lallaki. “Agul-ulbodka,” kinunada kaniak. “Saannaka nga imbaon tiApoa Diostayo a mangibaga kadakami a dikami mapan idiay Egipto.

3 Ngem dinurogannaka ni Baruc nga anak ni Nerias tapno busorennakami ket yawatnakami kadagiti taga-Babilonia a mabalin a mangpatay wenno mangipan kadakam idiay Babilonia.”

4 Iti kasta, saan a tinungpal ni Johanan wenno dagiti amin a pangulo ti armada wenno dagiti tattao ti bilin tiAponga agbatida idiay Juda.

5 Innalani Johanan ken dagiti amin nga ofisiales ti armada ti amin a natda idiay Juda, ket impanda ida idiay Egipto, agraman dagiti amin a nagsubli manipud kadagiti nadumaduma a pagilian a nakaiwarawaraanda;

6 dagiti lallaki, dagiti babbai, dagiti ubbing ken dagiti babbai nga annak ti ari. Innalada dagiti amin a nabati idiay Juda a pinaaywanan ni Nebuzaradan a kapitan dagiti guardia ken ni Gedalias agraman kadakami ken ni Baruc.

7 Sinukirda ti bilin tiApoket napanda idiay Egipto agingga iti siudad ti Tafnes.

8 Idiay Tafnes, kinuna tiApokaniak,

9 “Mangalaka iti sumagmamano a dadakkel a bato ket ikalim ida iti sango ti pagserkan ti palasio ti Faraon iti daytoy a siudad. Aramidem daytoy iti imatang ti sumagmamano a Judio.

10 Ibagam kadakuada a siak, ni Yahweh a Mannakabalin-amin a Dios ti Israel, yegko ditoy ni adipenko a Nebucadnesar nga ari ti Babilonia. Ipasdekkonto ti tronona kadagitoy a bato nga inkalik ket bangonekto ti toldana a kas ari.

11 Umaynanto parmeken ti Egipto. Patayennanto iti angol dagiti nairanta a matay iti angol. Ipanawnanto a kas balud dagiti nairanta a mabalud. Patayennanto iti gubat dagiti naikeddeng a matay iti gubat.

12 Puorannanto dagiti templo dagiti didiosen ti Egipto wenno ipanawnanto ida. Kas iti panangikkat ti agpaspastor kadagiti tuma iti arruatenna agingga nga awanen maikkatna, kastanto met ti aramiden ti ari ti Babilonia iti daga ket agawidto a sibaballigi.

13 Rebbaennanto dagiti nasagradoan a monumento ti Heliopolis idiay Egipto, ket puorannanto dagiti templo dagiti didiosen dagiti Egipcio.”

Ti Mensahe ni Yahweh kadagiti Judio idiay Egipto

1 Nagsao tiApokaniak maipapan kadagiti amin a Judio nga agnaed idiay Egipto, kadagiti siudad ti Migdol, Tafnes, Memfis ken kadagiti adda iti akin-abagatan a paset ti pagilian.

2 Kinuna tiApoa Mannakabalin-amin a Dios ti Israel, “Nakitayo a mismo ti panangdadaelko iti Jerusalem ken kadagiti amin a siudad ti Juda. Langalangda pay laeng agpapan ita ket awan agnaed kadakuada.

3 Kasta ti inaramidko gapu iti kinadakes dagiti tattaoda ket pinagpungtotdak. Nagidatagda iti daton a mapuoran kadagiti didiosen. Nagserbida kadagiti didiosen a dida pay idi nagdaydayawan ken uray dakayo wenno dagidi kapuonanyo.

4 Diak nagsardeng a nangibabaon kadagiti adipenko a profeta a nangibagbaga kadakayo a diyo ar-aramiden dagiti makarimon a bambanag a kagurak.

5 Ngem saankayo a nangipangpangag wenno nangikaskaso. Diyo insardeng dagiti dakes nga aramidyo a nagidatag iti daton a mapuoran kadagiti didiosen.

6 Iti kasta, indissuorko ti unget ken pungtotko kadagiti il-ili ti Juda ken kadagiti lanlansangan ti Jerusalem ket pinuorak ida. Nagbalinda a rebrebba ket nakabutbuteng ti buyada agpapan kadagitoy nga aldaw.

7 “Ngarud, siak, ni Yahweh a Mannakabalin-amin a Dios ti Israel, saludsodek man no apay nga agaramidkayo iti kasta a kinadakes? Kayatyo kadi a yegko ti pannakadadael iti Juda: lallaki ken babbai, ubbing ken maladaga tapno awan ti matda kadakayo?

8 Apay a pagpungtotendak babaen iti panagdaydayawyo kadagiti imahen ken iti panagidatagyo iti daton a mapuoran kadagiti didiosen ditoy Egipto nga immayyo pagnaedan? Aramidenyo kadi dagitoy a pangdadael laeng kadagiti bagbagiyo tapno pagang-angawandakayo dagiti amin a nasion ditoy lubong ket aramatenda a pagilunod ti naganyo?

9 Nalipatanyo kadin dagiti dakes nga inaramid dagidi kapuonanyo kadagiti il-ili ti Juda ken kadagiti lanlansangan ti Jerusalem? Nalipatanyo kadin ti inar-aramid dagiti ar-ari ti Juda ken dagiti assawada? Nalipatanyo kadin ti inar-aramidyo ken dagiti inar-aramid dagiti assawayo?

10 Ngem agpapan ita, dikay pay la agpakumbaba. Dikay latta agbuteng kaniak. Diyo tinungpal dagiti bilin ken linteg nga intedko kadakayo ken kadagidi kapuonanyo.

11 “Iti kasta, siak, ni Yahweh a Mannakabalin-amin a Dios ti Israel didigraenkayto ket ikisapkonto ti entero a Juda.

12 No maipapan kadagiti nabati a tattao idiay Juda a mangipapilit nga agnaed iti Egipto, pukawekto amin ida. Mataydanto amin ditoy Egipto gapu iti gubat ken bisin, natan-ok man wenno nanumo. Nakakaasinto ti kasasaadda. Lalaisento ida dagiti tattao ket agbalinto a lunod ti naganda.

13 Kas iti panangdusak iti Jerusalem, dusaekto dagiti agnaed ditoy Egipto iti gubat, bisin ken angol.

14 Awanto ti makalasat wenno agbiag kadagiti umili a nabati iti Juda nga immay agnaed ditoy Egipto. Awanto ti uray maysa kadakuada a makasubli idiay Juda a tarigagayanda a pagnaedan. Awanto ti agsubli malaksid ti sumagmamano kadagiti nagtalaw.”

15 Ngarud, kinuna kaniak dagiti lallaki a makaammo a nagidatag dagiti assawada iti daton a mapuoran kadagiti didiosen, dagiti amin a babbai nga adda sadiay agraman dagiti Judio nga agnaed iti akin-abagatan a paset ti Egipto,

16 “Dimi kayat a denggen dagiti sao tiAponga ibagbagam kadakami.

17 Aramidenmi latta amin nga inkarimi nga aramiden. Agidatagkami iti daton a mapuoran ken daton a mainum iti didiosen a managan Reyna ti Langit ken kas iti inaramidmin ken inaramid dagidi kapuonanmi, dagiti ari ken papangulomi kadagiti il-ili iti Juda ken kadagiti lanlansangan ti Jerusalem. Adu idi ti taraonmi. Narang-ay ti biagmi ket awan pakaringgoranmi.

18 Ngem manipud idi insardengmin ti agidatag iti daton a mapuoran ken daton a mainum iti Reyna ti Langit, agbisinkami metten. Matay pay ketdin dagiti tattaomi iti gubat ken bisin.”

19 Kinuna met dagiti babbai, “Idi naglutokami iti kankanen a sinan-Reyna ti Langit, ken idi nagidatagkami kenkuana iti daton a mapuoran ken daton a mainum, inanamongan dagiti assawami dagitoy nga aramidmi.”

20 Kinunak kadagiti tattao, lallaki ken babbai, a nagsao iti kasta,

21 “Ipagarupyo aya a saan nga ammo tiApodagiti indatagyo a daton a mapuoran, dakayo ken dagidi kapuonanyo, dagiti ar-ari ken papanguloyo, ken dagiti tattao iti pagilian, kadagiti il-ili ti Juda ken kadagiti lanlansangan ti Jerusalem? Ipagarupyo aya a nalipatannan daytoy?

22 Iti daytoy met la nga aldaw, naglangalangen ti dagayo ket awanen ti agnaed. Nagbalinen a nakabutbuteng ti buyana. Pagilunod dagiti tattao ti nagan ti Jerusalem agsipud ta saanen a maibturan ti Apo dagiti kinadakes nga ar-aramidenyo.

23 Napasamak kadakayo daytoy a pannakadadael, kas makitayo ita, ta nagidatagkayo kadagiti daton a mapuoran kadagiti didiosen; ket nagbasolkayo itiApogapu ta diyo tinungpal amin a bilinna.”

24-25 Imbagak kadagiti tattao, nangruna kadagiti babbai, ti kinuna tiApoa Mannakabalin-amin a Dios ti Israel kadagiti tattao ti Juda nga agnanaed iti Egipto: “Adda kariyo iti Reyna ti Langit, dakayo ken dagiti assawayo. Sinapataanyo nga agidatagkayo kenkuana kadagiti daton a mapuoran ken daton a mainum. Tinungpalyo dagiti kariyo. Tungpalenyo ngarud dagiti karkariyo! Aramidenyo dagiti insapatayo!

26 Ngem ita, denggenyo ti saok, ti kari a sinapataak iti nabileg a naganko kadakayo amin a Judio nga agnanaed ditoy Egipto: Dikayto palubosanen a mangaramat iti naganko no agsapatakayo a kunayo, ‘Isapatak iti nagan ti Apo aDios.’

27 Saankayto a parang-ayen. Dadaelenkayto ketdi. Matayto iti gubat ken bisin ti amin a taga-Juda nga agnaed ditoy Egipto. Awanto a pulos ti mabati.

28 Ngem makalisinto iti patay ti sumagmamano kadakayo. Pumanawdanto ditoy Egipto ket agsublida idiay Juda. Maammoanto dagiti tattao ti Juda a natda kadagiti immay ditoy Egipto no siasino ti pudno ti saona, siak wenno isuda.

29 Siak, ni Yahweh, itedkonto daytoy a pagilasinan: dusaenkayto iti daytoy a lugar ket matungpalto ti inkarik a pannakadadaelyo.

30 Yawatkontoni Faraon Hofra nga ari ti Egipto iti pannakabalin dagiti kabusorna a mangisiksikat kenkuana. Wen, yawatkonto a kas iti panangyawatko ken ni Zedekias nga ari ti Juda iti pannakabalin ni Nebucadnesar nga ari ti Babilonia a kabusorna ken nagpanggep a mangpapatay kenkuana.”

Ti Kari ti Dios ken ni Baruc

1 Itimaikapat a tawen a panagari ni Jehoyakim nga anak ni Josias idiay Juda, insurat ni Baruc nga anak ni Nerias ti indiktarko kenkuana. Imbagak kenkuana

2 ti kinuna ti Apo aDiosti Israel, “Baruc,

3 kunkunam, ‘Asiak pay! Dinegdegan ni Yahweh ti rigrigatko; ninayonanna iti ladingit. Mautoyanakon nga agas-asug ket awan ti pakabang-arak.’

4 “Ngem siak, ni Yahweh, rebbaek ti binangonko ken parutek ti immulak. Aramidekto daytoy iti entero a daga.

5 Tarigagayam kadi ti pannakaisalsaluminam? Dimo tarigagayan ta didigraek ti amin a sangkataoan. Nupay kasta, ipaluboskonto nga awan ti pakaan-anoam iti sadinoman a papanam. Siak, ni Yahweh, ti nagsao iti daytoy.”

Maparmek ti Egipto idiay Carkemis

1 Nagsao tiApokaniak maipapan kadagiti nasion.

2 Maipapaniti Egipto, daytoy ti saona a maibusor iti armada ni Faraon Neco a pinarmek ni Nebucadnesar nga ari ti Babilonia idiay Carkemis iti asideg ti Karayan Eufrates. Pinarmek ni Nebucadnesar iti maikapat a tawen a panagari ni Jehoyakim nga anak ni Josias iti Juda. Kinuna tiApo:

3 “Ipukkaw dagiti ofisiales ti Egipto,

‘Isaganayo dagiti kalasagyo,

ket inkayo makigubat!

4 Isaganayo dagiti kabalioyo

ket agsakaykayo!

Agpuestokayo! Aghelmetkayo!

Asaenyo dagiti gayangyo!

Agkabalkayo!’

5 “Ngem ania ti makitak?”

saludsoden ni Yahweh.

“Agsanudda a sibubuteng.

Maparmek dagiti soldadoda.

Gapu iti butengda,

alistoanda ti agtaray ket saanda a tumalliaw.

6 Saan a makaadayo dagiti napardas a tumaray;

saan a makalibas dagiti mannakigubat.

Maitibkol ken matumbada idiay amianan,

wen, iti igid ti Karayan Eufrates.

7 Siasino daytoy dumakkel a kasla Karayan Nile,

kasla karayan nga aglayus?

8 Ti Egipto ti dumakkel a kasla Karayan Nile,

kasla karayan nga aglayus.

Kinuna ti Egipto, ‘Dumakkelak ket layusekto ti lubong;

dadaelekto dagiti siudad ken dagiti tattao.

9 Abogenyo dagiti kabalio!

Paggunayenyo dagiti lugan a pakigubat!

Ibaonyo a sumaranget dagiti soldado:

dagiti nakakalasag a taga-Etiopia ken taga-Put

ken dagiti pumapana a taga-Lud.’”

10 Daytoy ti aldaw ti Apo aDiosa Mannakabalin-amin:

aldaw a panagibalesna,

aldaw a panangdusana kadagiti kabusorna.

Ibusento ida ti kampilan agingga iti mabsog

ket inumennanto ti darada agingga iti mapnek.

Ita nga aldaw, agidatag ti Mannakabalin-amin

iti daton idiay amianan,

iti igid ti Karayan Eufrates.

11 Inkay idiay Galaad, tattao iti Egipto,

ket agsapulkay iti agas!

Awan serserbi dagiti amin nga agasyo;

awan ti makapaimbag kadakayo.

12 Nadamag dagiti nasion ti pannakaibabainyo;

nangngegda amin ti panagsangsangityo.

Agdidinnungpar dagiti soldado

ket matuangda a padapada.

Umay ni Nebucadnesar

13 Idinapan rinaut ni Nebucadnesar nga ari ti Babilonia ti Egipto, kinuna tiApokaniak,

14 “Ibagam kadagiti il-ili ti Egipto,

idiay Migdol, Memfis ken Tafnes:

‘Agsaganakayo a mangikaluya kadagiti bagbagiyo;

madadaelto iti gubat ti amin nga adda kadakayo.

15 Apay a natuang ni Apis, ti sinan-baka a didiosenyo?

Tinulid ngamin ni Yahweh!’

16 Naitibkol dagiti soldadoyo ket natumbada.

Kunada iti maysa ken maysa,

‘Darasentayo! Agsublitayon kadagiti tattaotayo,

iti ili a nakayanakantayo.

Itarayantayo ti kampilan dagiti kabusor.’

17 “Ikkanyo ti ari ti Egipto iti baro a nagan—

‘Naariwawa ngem awan met mabalbalinna.’

18 Siak, ni Yahweh a Mannakabalin-amin ket ari.

Siak ti sibibiag a Dios.

‘Kas iti Bantay Tabor a kabilgan kadagiti bambantay,

ken ti Bantay Carmel a nangatngato ngem ti baybay,

kastanto ti bileg ti umay mangraut kadakayo.’

19 Agsaganakayo a maipanaw a kas balud,

dakayo a taga-Egipto.

Agbalinto a let-ang ti Memfis,

langalang nga awan ti agnaed.

20 Mayarig ti Egipto iti nabaked a baka,

ngem sinilud ti dakkel a ngilaw a naggapu iti amianan.

21 Uray pay dagiti natangdanan a soldadona,

kasda la urbon ti baka nga awan gawayna.

Saanda a nakiranget;

nagsanud ken nagtarayda amin,

agsipud ta dimtengen ti panungpalanda,

tiempon ti pannakadusada.

22 Agtaray ti Egipto,

agkarasakas a kas iti uleg

ta darupen ti armada ti kabusorna.

Nagtagiwasayda a mangraut kenkuana,

kasda la lallaki nga agpukpukan iti kayo.

23 Pukanenda dagiti kaykayo iti bakirna.

Saan a mabilang dagiti tattaoda;

ad-adu ngem dudon dagiti soldadoda.

24 Maibabain dagiti taga-Egipto;

pinarmek ida dagiti taga-amianan.

Daytoy ti sao tiApo.”

25 Kuna tiApoa Mannakabalin-amin a Dios ti Israel, “Dusaek ni Amon a didiosen ti Tebes, agraman ti Egipto ken dagiti didiosen ken arina. Alaek ti Faraon ken dagiti amin nga agtalek kenkuana.

26 Yawatkonto ida ken ni Ari Nebucadnesar ti Babilonia ken ti armadana, isuda nga agpanggep a pumatay kadakuada. Ngem iti kamaudianna, addanto manen agnaed iti Egipto a kas idi un-unana. Siak, ni Yahweh, ti agsasao.”

Isalakanto ni Yahweh dagiti Tattaona

27 KunatiApo, “Dikay agbuteng, dakayo a tattaok;

dikay agamak, dakayo nga Israelita.

Isalakankayto iti dayta adayo a daga,

iti daga a nakaibaludanyo.

Agsubli ken agbiagkayto a sitatalna;

natalgedkayto ket awanto ti mangbutbuteng kadakayo.

28 Dikay agbuteng ta addaak kadakayo.

Pukawekto a mamimpinsan dagiti amin a nasion

a nangiwarawaraak kadakayo,

ngem saankayto a dadaelen.

Dusaenkayonto a dusaen;

ngem nainkalintegan ti panangdusak kadakayo.

Siak, ni Yahweh, ti nagsao iti daytoy.”

Ti Mensahe ni Yahweh maipapan kadagiti Filisteo

1 Sakbayti panangraut ti Faraon iti Gaza, nagsao kaniak tiApomaipapan kadagiti Filisteo.

2 Kinunana,

“Adtoy, dumakdakkel ti danum iti amianan,

ket manglayus a kas iti karayan.

Layusenna ti daga ken amin a linaonna,

dagiti siudad ken amin nga agnaed kadakuada.

Agpaarayatto dagiti tattao,

nasaemto ti sangitda.

3 Mangngegdanto ti dalagudog dagiti kabalio,

ti karadakad dagiti luglugan a pakigubat

dagiti ranitrit dagiti pilpilid.

Saanto a sublien dagiti amma dagiti annakda,

gapu ta agsalupaypay dagiti imada.

4 Dumtengen ti pannakadadael ti Filistia;

agpatinggan ti amin a tulong

a mabalin nga ited ti Tiro ken Sidon.

Siak, ni Yahweh, dadaelekto dagiti Filisteo,

dagiti naggapu iti igid ti baybay ti Caftor.

5 Kasta unay ti ladingit dagiti taga-Gaza.

Awanen arimekmek dagiti taga-Askelon.

Kasano ti kapaut ti panagdung-aw

dagiti natda a Filisteo?

6 Ipukkawyo, ‘Kampilan tiApo!

Kaanonto nga agsardeng ti panagranggasmo?

Agsublika iti kalubanmo.

Agyanka sadiay ket aginanaka!’

7 Ngem kasano nga aginana

idinto ta inikkak iti trabahona?

Binilinko a rautenna ti Askelon

ken dagiti agnaed iti igid ti baybay.”

Madadael ti Moab

1 Daytoyti kinuna ni Yahweh a Mannakabalin-amin maipapan iti Moab:

“Asi pay dagiti tattao ti Nebo—

nadadaelen ti ilida!

Naparmeken ti Kiriataim,

narban ti nabileg a sarikedkedna.

Naibabainen dagiti tattaona,

2 awanen ti dayag ti Moab.

Sinakup dagiti kabusor ti Hesbon,

ket nagtutulagda a dadaelenda ti nasion ti Moab!

Mapaulimekto ti ili a Dibon;

rautento dagiti kabusor.

3 Ipukkaw dagiti taga-Horonaim,

‘Anian a panagranggas!

Anian a panagdadael!’

4 “Nadadaelen ti Moab;

denggenyo dagiti ubbing nga agsasangit.

5 Denggenyo ti an-anug-ogda

iti sang-atan nga agpa-Luhit.

Denggenyo ti nasaem a sangsangit ti panagsagaba,

iti salogan nga agpa-Horonaim.

6 ‘Agtaraykayo! Isalakanyo ti bagiyo!’ kunada.

‘Agtaraykayo a kasla atap nga asno iti let-ang!’

7 “Moab, nagtalekka idi iti pigsa ken kinabaknangmo,

ngem uray sika maipanawkanto.

Maitalawto ni Kemos a didiosen,

agraman dagiti prinsipe ken papadina.

8 Awanto ti ili a makalisi iti pannakadadael;

agpadpadanto a madadael ti tanap ken ti patad.

Siak, ni Yahweh ti nagsao.

9 Ikkanyo ti Moab iti payak tapno agtalaw.

Aglangalangto dagiti il-ilina,

ket awanton ti agnaed kadakuada.”

(

10 Mailunod ti tao a saan a mangipapuso nga agtrabaho iti aramid ni Yahweh. Mailunod ti tao a saan a mangaramat iti kampilanna nga agpapatay!)

Madadael dagiti Siudad ti Moab

11 Kuna ni Yahweh, “Kanayon a natalged idi ti panagbiag ti Moab. Pulos a saan a naitalaw a kas balud. Kasla arak a nagarinsaed ket saan a nagargaraw. Saan a nayal-alis kadagiti burnay. Saan a nagbaliw ti ingelna ken ti sigud a ramanna.

12 “Ngem, dumtengen ti tiempo a panangibaonko kadagiti tattao a mangibukbok iti Moab a kasla arak. Ipakbodanto amin ti arak ket burakburakenda pay dagiti burnay a nagyananna.

13 Maupayto dagiti Moabita ken ni Kemos a didiosenda a kas iti pannakaupay dagiti Israelita ken ni Betel a didiosen a nagtalkanda.

14 Apay a kunayo a bannuarkayo, lallaki ti Moab,

natutured a soldado a natenneb iti gubat?

15 Nadadaelen ti Moab ken dagiti siudadna,

narangrangkayen dagiti kalaingan nga agtutubona.

Daytoy ti sao ti Ari, ni Yahweh a Mannakabalin-amin.

16 Asidegen ti panungpalan ti Moab;

dandanin ti pannakarbana.

17 “Sangitanyo dayta a nasion, dakayo a kaarrubana,

dakay amin a mangbigbig kenkuana.

Kunayo, ‘Nagpatinggan ti mannakabalin a turayna;

awanen ti dayag ken bilegna.’

18 Dakayo nga agnanaed idiay Dibon,

bumabakayo iti nadayag a saadyo, ket agdalupisakkayo iti tapok.

Adda ditoyen ti mangdadael iti Moab,

rinebbekna dagiti sarikedkedna.

19 Dakayo nga agnanaed idiay Aroer,

agtakderkayo iti igid ti kalsada ket aguraykayo;

saludsodenyo iti siasinoman nga aglibas no ania ti napasamak.

20 ‘Naparmeken ti Moab,’ kunadanto.

‘Sangitanyo ta naibabainen.

Ipakaammoyo kadagiti lugar iti igid ti Karayan Arnon

a nadadaelen ti Moab.’

21 “Dimtengen ti pannakaukom dagiti siudad iti tanap: ti Holon, Jaza, Mefat,

22 Dibon, Nebo, Bet-diblataim,

23 Kiriataim, Bet-gamul, Bet-meon,

24 Keriot ken Bozra. Dimtengen ti pannakaukom dagiti amin a siudad ti Moab nga adda iti adayo wenno asideg.

25 Naparmeken ti bileg ti Moab. Nadadaelen ti pannakabalinna. Siak, ni Yahweh, ti nagsao iti daytoy.”

Maparmek ti Moab

26 Kinuna ni Yahweh, “Bartekenyo ti Moab agsipud ta sinukirnak. Aglugnakto iti mismo a saruana ket katawaanto dagiti tattao.

27 Moab, malagipmo ti panangrabrabakmo idi kadagiti Israelita? Imbilangmo ida a kasla ketdin tiniliw ida ti bunggoy dagiti tulisan.

28 “Dakayo nga agnaed iti Moab, panawanyon dagiti il-iliyo! Inkay agnaed kadagiti rangrangkis! Tuladenyo ti kalapati nga agumok kadagiti rangrangkis.

29 Natangsit unay ti Moab! Nadamagko ti kinatangsit, kinapalangguad ken kinakuspag dagiti tattaona. Nangato ti pangipagpagarupanda iti bagida.

30 Siak, ni Yahweh, ammok ti kinapalangguadda. Awan serserbi ti kinapangasda ket saanto nga agbayag dagiti aramidda.

31 Iti kasta, dung-awakto ti entero a Moab ken dagiti tattao ti Kirheres.

32 Ad-addanto a dung-awak dagiti taga-Sibma ngem dagiti taga-Jazer. Siudad a Sibma, kaska la lanut a bumallasiw ti sangana iti Natay a Baybay ket dumanon idiay Jazer. Ngem ita, nadadaelen dagiti bungbungam iti kalgaw ken dagiti ubasmo.

33 Awanen ti ragsak ken rag-o iti nadam-eg a daga ti Moab. Saanen nga agayus ti arak ti pagpespesan iti arak. Awanen ti agaramid iti arak ken umkis iti rag-o.

34 “Agsangit dagiti tattao ti Hesbon ken Eleale. Mangngeg ti sangsangitda agingga idiay Jaaz. Mangngeg met dagiti adda idiay Zoar, idiay Horonaim ken idiay Baro nga Eglat. Nagmaga payen ti Waig Nimrim.

35 Pasardengekto dagiti tattao ti Moab nga agidatag iti daton a mapuoran kadagiti nangato a lugar, ken agidaton iti sakrifisio kadagiti didiosenda. Siak, ni Yahweh, ti agsasao.

36 “Iti kasta, agladingit toy pusok gapu iti Moab ken kadagiti tattao ti Kirheres; arigko iti maysa nga agtuktokar iti kanta ti pumpon agsipud ta napukaw aminen a sanikuada.

37 Nagpakuskos ti tunggal maysa ket nagibarbasda. Sinugsugatda dagiti imada. Nagarruatda iti nakersang a lupot a mangipakita iti panagbabawida.

38 Pasig a dung-aw ti mangngeg iti tuktok dagiti balbalay ken kadagiti kalkalsada ta binurakko ti Moab a kasla burnay nga awan mangipateg.

39 Narpuogen ti Moab. Agdung-awkayo! Inlingednan ti rupana gapu iti bain. Nadadaelen ket pagang-angawanen dagiti kabangibangna a nasion. Siak, ni Yahweh, ti agsasao.”

Saan a Makalisi ti Moab iti Pannakadusana

40 Inkari ni Yahweh nga addanto nasion a kasla agila a mangsippayot iti Moab.

41 Sakupennanto dagiti il-ili ken sarikedkedna. Iti dayta nga aldaw, agdanagto dagiti soldado ti Moab a kasla iti panagdanag ti agpasikal.

42 Madadaelto ti Moab ket saanton a nasion agsipud ta sinukirnak.

43 Pammutbuteng, abut ken palab-og ti naisagana kadagiti tattao ti Moab. Daytoy ti sao ni Yahweh.

44 Inkeddengkon ti pannakadadael ti Moab. Ti makalisi iti pammutbuteng matnagto iti abut. Ti makaruar iti abut, maipalab-ogto.

45 Agkamang idiay Hesbon dagiti nakakaasi a nagbakwit. Ngem uray ti siudad ti Hesbon nga inturayan idi ni Ari Sihon, maur-uramen. Napuoranen dagiti beddeng ken dagiti kabambantayan dagiti Moabita a naayat iti gubat.

46 Asi pay dagiti taga-Moab! Nadadaelen dagiti nagdaydayaw ken ni Kemos. Naitalaw dagiti annakda ket naipanda a kas balud iti sabali a daga.

47 Ngem iti masakbayan, parang-ayento manen ni Yahweh ti Moab. Amin dagitoy ket imbaga ni Yahweh a mapasamak iti Moab.

Ukomen ni Yahweh dagiti Ammonita

1 Daytoyti sao ni Yahweh a maibusor iti Ammon: “Ayan dagiti lallaki nga annak ti Israel? Awan kadi kadakuada ti mangsalaknib iti dagada? Apay a pinalubosanda dagiti agdaydayaw ken ni Milcom a mangtagikua iti sakup ti tribu ti Gad ket agnaedda sadiay?

2 Ngem dumtengen ti tiempo a pannakangngeg dagiti tattao ti Rabba iti ikkis ti gubat. Madadaelto ti siudad ken agbalin a rebrebba ket mapuoranto agingga a dumapu dagiti barbarriona. Kalpasanna, mapasublinto met laeng dagiti Israelita ti naagaw a dagada.

3 Agsangitkayo, dakayo a taga-Hesbon. Nadadaelen ti Ai a siudadyo. Agdung-awkayo, dakayo a babbai a taga-Rabba! Agpanes ken agsangitkayo. Agtaraykayo a diyo ammo ti turturongenyo, ta maitalawto ni didiosenyo a Milcom agraman dagiti papadi ken prin sipena.

4 “Apay nga agpasindayagkayo, babbai nga awanan pammati? Kumapkapsutkayon. Apay nga agtalgedkayo iti kinabaknangyo ket kunayo nga awan ti makaitured a dumarup kadakayo?

5 Yegkonto ti pagbutnganyo iti aglawlaw. Agtataraykayto amin a mangikaluya iti biagyo. Awanto ti mangurnos kadagiti soldadoyo.

6 “Ngem iti kamaudianna, parang-ayekto manen dagiti Ammonita. Siak, ni Yahweh, ti nagsao iti daytoy.”

Ti Panangukom ni Yahweh iti Edom

7 Daytoyti kinuna ni Yahweh a Mannakabalin-amin maipapan iti Edom: “Napukaw kadin dagiti taga-Edom ti husto a panagpampanunotda? Saanen aya a kabaelan dagiti masirib nga ibaga ti aramidenda? Napukawdan aya dagiti siribda?

8 Tattao ti Dedan, agsubli ken agtaraykayo! Inkay aglemmeng! Dadaelekto dagiti kaputotan ni Esau agsipud ta dimtengen ti tiempo a dusaek ida.

9 No agburas dagiti tattao iti ubas, mangiteddada iti bunga iti sanga ket dagiti agtakaw iti rabii, ti laeng kayatda ti alaenda.

10 Ngem linabusak a namimpinsan dagiti kaputotan ni Esau ket linukasak dagiti paglemlemmenganda tapno awanen pagkamanganda. Nadadaelen dagiti tattao ti Edom, dagiti kakabagianda ken dagiti kaarrubada. Awanen ti nabati.

11 Italekyo kaniak dagiti ul-ulila nga annakyo ta taripatoek ida. Mabalindak a pagtalkan dagiti babbai a balo nga adda iti sidongyo.

12 “No uminum iti kopa ti pannakadusa dagiti saan a rumbeng a madusa, dakayto la ketdin? Dusaenkayto a dusaen. Masapul nga uminumkayo iti kopa ti pannakadusa!

13 Siak a mismo ti agsapata nga agbalinto ti siudad ti Bozra a nakabutbuteng ken langalang. Pagang-angawanto dagiti tattao ket pagilunoddanto ti naganna. Agnanayonto a rebrebba ti amin a kabangibang a barriona. Siak, ni Yahweh, ti nagsao iti daytoy.”

14 Kinunak, “Edom, adda mensahe kaniak tiApo. Nangibaon iti mapan kadagiti nasion a mangipakaammo kadakuada nga ummongenda dagiti buyotda ket agsaganada a mangraut kenka.

15 Pagkapsutennakayto tiApoket awanto ti mangraem kadakayo.

16 Natangsitkayo! Daytoy ti mangallilaw kadakayo. Ipagarupyo nga adda agbuteng kadakayo ngem awan a pulos! Agnaedkayo kadagiti kabatoan a rangrangkis, iti tapaw dagiti bambantay; ngem uray no kas iti kangato ti umok ti agila ti pagnaedanyo, ipababanakayto tiApo. Daytoy ti sao tiApo.”

17 Kinuna ni Yahweh, “Nakaam-amakto ti pannakadadael ti Edom, ket makigtot ken agbutengto dagiti amin nga aglabas a makakita iti amin a napasamak kenkuana.

18 Madadaeltoti Edom a kas iti pannakadadael ti Sodoma ken Gomorra ken dagiti kabangibangda nga il-ili. Awanton ti agnaed sadiay. Daytoy ti sao ni Yahweh.

19 Umayakto a kas iti leon a rummuar iti nasamek a bakir a mapan iti nalangto a pagaraban iti abay ti Karayan Jordan. Kellaatekto a kamaten dagiti Edomita ket agtataraydanto a mangpanaw iti dagada. Iturayanto ida ti piliek a pangulo. Siasino ti kas kaniak? Siasino ti kumarit kaniak? Siasino ti agturay a bumusor kaniak?

20 “Ngarud, denggenyo ti planok a maibusor kadagiti Edomita ken kadagiti agnaed iti siudad ti Teman. Uray dagiti babassit nga annakda maitalawdanto ket makigtotto ti tunggal maysa.

21 Inton maparmek ti Edom, madayyegto ti daga iti daranudor ti pannakatnagna. Agiikkisto dagiti tattao ket dumanonto ti ikkisda idiay Baybay a Nalabaga.

22 Dumarupto ti kabusor a kasla agila a sumippayot manipud langit. Yukradnanto dagiti payakna a maibusor iti Bozra. Iti dayta nga aldaw, agdanagto dagiti soldado ti Edom, kas iti babai nga agpaspasikal.”

Ti Panangukom ni Yahweh iti Damasco

23 Daytoyti kinuna ni Yahweh maipapan iti Damasco: “Madanagan ken maringgoran dagiti tattao kadagiti siudad ti Hamat ken Arpad. Ngamin, nakangngegda iti dakes a damag. Kasla baybay ti butengda a nanglemmes kadakuada. Saanda a makatalna.

24 Agkakapsut dagiti taga-Damasco ket agtatarayda iti kigtotda. Marigatan ken madanaganda a kas iti agpasikal.

25 Namimpinsan a nabaybay-an dayta agdindinamag ken naragsaka siudad.

26 Ngarud, iti dayta nga aldaw, mapapatayto dagiti amin nga agtutubo a lallaki ken dagiti soldado kadagiti lansangan ti siudad.

27 Puorakto dagiti bakud ti Damasco ket dumapunto dagiti palasio ni Ari Benhadad. Daytoy ti kuna ni Yahweh a Mannakabalin-amin.”

Maukom ti Tribu ti Kedar ken ti Hazor

28 Daytoy ti kinuna ni Yahweh maipapan iti tribu ti Kedar ken dagiti agtuturay iti siudad ti Hazor a pinarmek ni Nebucadnesar nga ari ti Babilonia: “Rautenyo dagiti taga-Kedar. Dadaelenyo ti tribu dagiti taga-daya!

29 Alaenyo dagiti toldada, dagiti arbanda, dagiti kurtina ken dagiti amin nga alikamenda. Alaenyo dagiti kamelioda. Ibagayo kadagiti tattao nga adda nakabutbuteng iti amin nga aglawlawda.

30 “Tattao ti Hazor, pakdaarankayo! Siak ni Yahweh. Inkay aglemmeng iti adayo. Adda dakes a panggep ni Nebucadnesar nga ari ti Babilonia, ket kastoy ti kunana,

31 ‘Umaykayo! Rautentayo dagita a tattao nga agbibiag a sitatalna ken sitatalged. Awan rikep ken balunet dagiti ruangan ti siudadda ket awan salaknibda.’

32 “Samsamenyo dagiti kamelio ken amin a bakada. Iwarawarakto iti amin a lugar dagiti tattao nga agpukis iti ababa. Didigraekto ida iti amin a suli.

33 Agbalinto a disierto ti Hazor iti agnanayon, lugar a dagiti laeng atap nga animal ti agnaed. Awanton ti agnaed sadiay. Siak, ni Yahweh, ti nagsao iti daytoy.”

Ti Pannakaukom ti Elam

34 Idi mangrugi ti panagari ni Zedekias idiay Juda, nagsao kaniak tiApoa Mannakabalin-amin maipapan iti daga ti Elam.

35 Kinunana, “Parmekekto amin a lallaki a pumapana a nangpabileg iti Elam.

36 Paganginekto iti napigsa iti amin a suli idiay Elam. Iwarawarakto dagiti tattao iti amin a disso agingga a pagbakwitan dagiti tattao ti amin a lugar.

37 Pagbutngekto dagiti taga-Elam. Kabutengdanto dagiti kabusorda nga agpanggep a mangpapatay kadakuada. Idissuorkonto kadakuada ti napalalo a pungtotko. Ibaonkonto dagiti armada agingga a maikisapda.

38 Papatayekto dagiti ari ken dagiti pangulo ti Elam ket ipasdekkonto ti tronok sadiay.

39 Ngem iti kamaudiananna, parang-ayekto manen dagiti tattao ti Elam. Siak, ni Yahweh, ti nagsao iti daytoy.”

Ti Pannakaparmek ti Babilonia

1 Daytoyti impakaammo kaniak tiApomaipapan iti Babilonia ken kadagiti tattaona:

2 “Ipakaammom ti damag kadagiti nasion! Iwaragawagmo!

Itedmo ti pagilasinan ket iwarasmo ti damag!

Dimo ilimlimed!

Naparmeken ti Babilonia!

Naibabainen ni Bel!

Naburburaken ni Marduk a didiosenna!

Naibabainen dagiti imahen,

narumrumeken dagiti didiosenna.

3 “Immay ti maysa a nasion a taga-amianan tapno rautenna ti Babilonia ket paglangalangennanto. Agtatarayto nga agtalaw dagiti tattao ken dagiti animal, ket awanton ti agnaed sadiay.”

Ti Panagsubli ti Israel

4 Kuna ni Yahweh, “Inton dumteng dayta a tiempo, agsasangitto dagiti tattao ti Israel ken Juda a mangsapul kaniak a Diosda.

5 Agdamagdanto no sadino ti dalan nga agpa-Sion ket surotenda. Makitulagdanto kaniak iti mataginayon a tulag, ket pulos a didanto salungasingen.

6 “Mayarig dagiti tattaok kadagiti napukaw a karnero. Binaybay-an ida dagiti pastorda nga agkalkallautang kadagiti bambantay. Nagalla-allada a kasla karnero ket nalipatandan ti ayan ti balayda.

7 Darupen ida dagiti makasarak kadakuada. Kuna dagiti kabusorda, ‘Saan a dakes ti inaramidtayo ta nagbasolda itiApo. Nagtalek dagidi kapuonanda itiApoket rebbengda koma ti nagtalinaed a sipupudno kenkuana.’

8 “Panawanyoti Babilonia, dakayo nga Israelita! Pumanawkayo iti dayta a daga! Dakayo ti umuna a pumanaw!

9 Tignayek ti bunggoy dagiti nabileg a nasion iti amianan. Parautkonto kadakuada ti Babilonia. Agmaymaysadanto a manggubat iti siudad ket parmekendanto. Saan nga agmintis ti panagpanada a kas kadagiti nalaing a mangnganup.

10 Masamsamanto ti Babilonia. Alaento dagiti agsamsam ti amin a kaykayatda. Siak, ni Yahweh, ti agsasao.”

Maparmek ti Babilonia

11 Kuna ni Yahweh, “Dakayo a taga-Babilonia, sinamsamanyo ti nasionko. Agraragsak ken aglagtolagtokayo a sibaballigi, kaslakayo baka nga agir-irik iti trigo wenno kasla kabalio nga aggargaraigi,

12 ngem maibabain ken madadaelto ti siudadyo. Agbalinto ti Babilonia a kanumoan kadagiti amin a nasion. Agbalinto a let-ang. Natikagto nga awan ti danumna.

13 Gapu iti pungtotko, aglangalangto ti Babilonia ket awanto ti agnaed. Mabaybay-anto a narnarba ket makigtot ken masdaawto dagiti amin nga aglabas a makakita iti napasamak kenkuana.

14 “Dakayo a pumapana, agsaganakayo a manggubat iti Babilonia. Lawlawenyo. Ibiatyo amin a panayo iti Babilonia agsipud ta nagbasol ken ni Yahweh.

15 Ipukkawyo ti ikkis ti gubat iti entero a siudad. Simmukon ti Babilonia. Natibbag ken narpuogendagiti bakudna. Balsek dagiti taga-Babilonia. Balsenyo ngarud ida ket aramidenyo kadakuada ti kas iti inaramidda kadagiti sabsabali.

16 Diyo ipalubos nga agmula wenno agapit dagiti tattao. Mabutengto amin a ganggannaet sadiay iti armada a mangraut kadakuada ket agsublidanto kadagiti bukodda a daga.”

Agsubli ti Israel

17 Kuna ni Yahweh, “Mayarig dagiti Israelita iti arban ti karnero a kinamatkamat ken winarawara dagiti leon. Rinangrangkay nga immuna ida ti ari ti Asiria. Kalpasanna, nginutngotan ni Ari Nebucadnesar dagiti tultulangda.

18 Gapu iti daytoy, siak, ni Yahweh a Mannakabalin-amin a Dios ti Israel, dusaekto ni Ari Nebucadnesar ken ti pagilianna a kas iti panangdusak idi iti emperador ti Asiria.

19 Isublikto dagiti Israelita iti dagada. Agpennekdanto a mangan kadagiti agtubo idiay Bantay Carmel ken iti sakup ti Basan, kasta met kadagiti katurturodan ti Efraim ken Galaad.

20 Inton dumteng dayta a tiempo, awanton ti basol a masarakan iti Israel ken ti kinadakes idiay Juda agsipud ta pakawanekto dagiti inispalko a tattao. Siak, ni Yahweh, ti nagsao iti daytoy.”

Ukomen ti Dios ti Babilonia

21 Kuna ni Yahweh, “Rautenyo dagiti tattao iti Merataim ken Pekod. Patayen ken dadaelenyo ida.Aramidenyo amin nga ibilinko kadakayo.

22 Mangngeg ti daranudor ti gubat iti daga. Adda dakkel a pannakadadael.

23 Mayarig ti Babilonia iti dakkel a martilio a nangburak iti entero a lubong. Ita, natukkotukkolen dayta a martilio. Nakigtot dagiti amin a nasion iti napasamak iti Babilonia.

24 Babilonia, binusornak ket natnagka a dimo napuotan iti palab-og nga insaganak nga agpaay kenka.

25 Linuktakon ti pagiduldulinak kadagiti armasko. Iti pungtotko, inruarkon ida agsipud ta adda trabaho nga ileppasko iti Babilonia. Siak ni Yahweh aDiosa Mannakabalin-amin.

26 Darupenyo iti amin a suli ket rakrakenyo dagiti nakaidulinan dagiti trigona. Buntonenyo dagiti sinamsamyo! Rebbekenyo ti siudad! Dikayo mangibati iti uray ania.

27 Papatayenyo dagiti amin a soldadona! Pukawenyo ida! Nasentensiaan a madadael dagiti tattao ti Babilonia! Dimtengen ti tiempo a pannakadusada.”

(

28 Nagkamang idiay Sion dagiti nagtalaw idiay Babilonia ket imbagada ti panangibales tiApoa Diostayo iti dakes nga inaramid ti Babilonia iti Templona.)

29 “Ibagayokadagiti pumapana a rautenda ti Babilonia. Ibaonyo dagiti amin a makaammo nga agpana. Lakubenyo ti siudad! Diyo ipalubos nga adda makalibas. Ibalesyo kenkuana ti amin nga inaramidna kadagiti sabsabali agsipud ta sitatangsit a nangbusor kaniak, siak a Nasantoan ti Israel.

30 Ngarud, iti dayta nga aldaw, mapapatayto dagiti agtutubo a lallaki iti Babilonia kadagiti kalsada ti siudad. Mapasagto amin a soldadona.

31 “Natangsitka, Babilonia, isut’ gapuna a siak nga Apo aDiosa Mannakabalin-amin, busorenka. Dimtengen ti panangdusak kenka.

32 Maitibkol ken matumbakanto, sika a napalangguad a pagilian. Awanto ti tumulong kenka. Puorakto dagiti siudadmo ket mauramto dagiti amin nga adda iti lawlawmo.”

33 Kuna ni Yahweh a Mannakabalin-amin, “Maparparigat dagiti tattao ti Israel ken ti Juda. Guguardiaan ida a nalaing dagiti nangparmek kadakuada. Dida kayat a wayawayaan ida.

34 Ngem nabilegak a mangisalakan kadakuada. Yahweh a Mannakabalin-amin ti naganko. Isalakanko ida tapno yegko ti talna iti daga idinto a yegko ti riribuk kadagiti tattao ti Babilonia.”

35 Kuna ni Yahweh,

“Agdisso ti kampilan iti Babilonia!

Mapapatay dagiti tattaona,

dagiti agtuturay ken mamasiribna.

36 Mapapatay dagiti ulbod a profeta—

anian a kinamaagda.

Mapapatay dagiti soldadona—

anian a pannakakigtotda.

37 Mapapatay dagiti kabaliona;

marakrak dagiti luganna a pakigubat.

Mapapatay dagiti natangdanan a soldadona—

anian a kinakapuyda.

Mapukaw dagiti gamengna—maala ken masamsamda.

38 Agtikag ti dagana

ket agmaga dagiti karayanna.

Napno ti Babilonia iti nakabutbuteng nga imahen

a namagbalin a maag kadagiti tattao.

39 “Ngarud,agnaedto sadiay dagiti musang, ken dagiti atap nga animal, agraman dagiti narugit a tumatayab. Pulos nga awanton ti agnaed sadiay. Saanton a pagnaedan iti agnanayon nga awan inggana.

40 Dadaelektoti Babilonia a kas iti panangdadaelko idi iti Sodoma ken Gomorra ken kadagiti kabangibangda nga il-ili. Awanton ti agnaed sadiay. Ni Yahweh ti agsasao iti daytoy.

41 “Adtoy, umay dagiti tattao

nga aggapu iti amianan.

Iti pungto ti daga,

agsagsagana a makigubat ti maysa a nabileg a nasion.

42 Nagtagipana ken nagtagikampilanda,

naranggas ken awan asida.

Kasla daranudor ti taaw

ti dalagudog dagiti kabalio a nagsakayanda.

Sisasaganada a manggubat iti Babilonia.

43 Nadamag ti ari ti Babilonia ti kaaddada,

awanen ti bilegna.

Kasta unay ti butengna,

mariknana ti ut-ot a kas iti ut-ot ti agpasikal.

44 “Umayakto a kas iti leon a rummuar iti nasamek a bakir a mapan iti nalangto a pagaraban iti abay ti Karayan Jordan. Kellaatekto a kamaten dagiti taga-Babilonia ket agtataraydanto a mangpanaw iti siudadda. Iturayanto ida ti piliek a pangulo. Siasino ti kas kaniak? Siasino ti kumarit kaniak? Siasino ti agturay a bumusor kaniak?

45 Ngarud, denggenyo ti panggepko a maibusor iti siudad ti Babilonia ken kadagiti tattaona. Uray dagiti babassit nga annakda maitalawdanto ket makigtotto ti tunggal maysa.

46 Inton maparmek ti Babilonia, addanto napigsa nga ikkis ken daranudor a mangdayyeg iti entero a daga. Ti dung-awna mangngegto dagiti nasnasion.”